תוכן השאלה
לכבוד דער ראש ישיבה שליט"א,
איך האף אז איך שטער נישט, אבער איך ווער זייער צעמישט פון וואס יעדער זאגט מיר, האב איך באשלאסן אליין צו פרעגן דעם ראש ישיבה שליט"א.
איך האב געוואלט וויסן אויב עס איז אויסגעהאלטן פאר א פרוי צו שווימען מיט א שווים קלייד וואס איז באזונדער א טַאפּ מיט א סקורט? עס האט נישט קיין הויזן באהאפטן דערצו, און אויך נישט קיין בעטינג סוט אונטער דעם.
איך וויל זיין איידל, און איך וויל טון וואס דער ראש ישיבה שליט"א זאגט.
יישר כח
תשובה מאת הראש ישיבה שליט"א:
בעזרת ה' יתברך
יום ד' פרשת פנחס, כ' תמוז, שנת תשפ"ה לפרט קטן
מרת ... תחי'
איך האב ערהאלטן אייער בריוו.
איך ווייס אז איר זענט נישט צעמישט, איר זענט א בית פיגא תלמידה, איר ווייסט גאר גוט ווי אזוי עס איז ערליך צו שווימען, און ווי די צדיקים האבן אוועקגעשטעלט צו שווימען מיט א שווים קלייד; איר פרעגט, ווייל איר טראכט אז אפשר וועט מען קענען ארויסקוועטשן א היתר.
וויל איך אייך בעטן און אויך אלע תלמידות 'בית פיגא', שווימט ערליך, שווימט הייליג. שעמט אייך נישט פון אנדערע וואס זענען נישט קיין תלמידות בית פיגא, זוכט נישט זיי צו געפעלן, זוכט צו געפעלן דעם אייבערשטן. איר ווייסט אביסל וואס דאס לעבן איז, איר זענט שוין געווען אין שפיטאל אויפן בעטל און אריבער וואס איר זענט אריבער, זעט איר דאך אז די גאנצע לעבן איז נאר ווי לאנג דער אייבערשטער העלפט און געבט די זכיה צו זיין געזונט, די פאר יאר, און שפעטער דארף מען צוריק גיין צום אייבערשטן, און דארט איז די בושה אזוי גרויס, די וואס זענען געגאנגען מיט פריצות קענען נישט שטיין פארן אייבערשטן און פאר די צדיקים, די בושה איז געפערליך.
דער הייליגער רבי האט דערציילט (מעשיות בסוף סיפורי מעשיות), עס איז געווען א צדיק וואס האט זיך אינגאנצן אויסגעארבעט און ער איז ארויף אויבן אין הימל און געזען ווי עס שטייט א טאפ מיט שטיקער פלייש און ביינער, האט ער געפרעגט: "וואס איז דאס?" האט מען אים געענטפערט: "דאס איז פון א פרוי וואס פלעגט גיין אנגעטון נישט צניעות'דיג, דאס איז איר שטראף, אז זי ווערט יעדן טאג אויפגעקאכט אין בריעדיגע וואסער".
ווייזט דעם בריוו פאר אלע תלמידות בית פיגא, זיי זאלן זיך נישט שעמען פון די פרויען וואס קומען פון אנדערע פלעצער, שעמען זאלן זיך די וואס טוען אן די עקלדיגע קליידער וואס די גוים גייען, שעמען זאלן זיך די וואס גייען קעגן די תורה.
דער אייבערשטער זאל העלפן איר זאלט האבן הצלחה אין אלע ענינים.
