תוכן השאלה
לכבוד דער ראש ישיבה שליט"א,
צום ערשט וויל זיך באדאנקען פאר די גוטע לעבן ברוחניות ובגשמיות וואס איך באקום יעדן טאג פון פריש פונעם ראש ישיבה שליט"א.
איך וויל נאכאמאל פרעגן א שאלה וואס שטערט מיר שוין א לאנגע צייט, און איך וועל זיך פרייען אויב דער ראש ישיבה שליט"א וועט מיר קענען אן עצה געבן.
איך לייד אסאך פון מחשבות און בלבולים וואס דרייען זיך מיר אין קאפ, עס מאכט זיך טעג ווען איך ווער זייער אנגעצויגן, איך שפיר ווי איך קען עס מער נישט איבערטראגן, און איך האב געזען אז דאס רייכערן א ציגארעטל בארואיגט מיר די נערווען, נישט ממש רייכערן רעגלמעסיג, נאר כאפן אמאל א ציגארעטל דא און דארט אביסל.
האב איך געוואלט פרעגן אויב איך קען זיך ערלויבן צו רייכערן אביסל פון צייט צו צייט, ווען איך שפיר אז איך דארף עס האבן וויכטיג פאר מיינע נערווען, אדער זאל איך זיך האלטן שטארק נישט צוצורירן צו קיין ציגארעטל בכלל?
יישר כח
תשובה מאת הראש ישיבה שליט"א:
יום ב' פרשת ויגש, ב' טבת, זאת חנוכה, שנת תשפ"ו לפרט קטן
... נרו יאיר
רייכערן בארואיגט נישט, רייכערן ציט מער אן די נערווען; לערנען תורה בארואיגט די נערווען, גורס זיין פרקים משניות בארואיגט די נערווען; זאג משניות וועסטו באקומען געזונטע שטארקע נערווען.
רייכער נישט, עס איז נישט קיין גוטע זאך, דער רבי האט נישט געוואלט מען זאל רייכערן (חיי מוהר"ן סימן רעג, תעב). מאך זיך א שיעור אין משניות, לכתחילה זאלסטו זאגן יעדן טאג אכצן פרקים משניות, ווייל דער הייליגער רבי האט געזאגט פאר רבי נתן זכרונו לברכה ער זאל יעדן טאג זאגן "ח"י פרקים משניות", אויך האט דער רבי געזאגט פאר עטליכע פון אנשי שלומינו זיי זאלן זאגן יעדן טאג "ח"י פרקים משניות" (עיין שיחות הר"ן סימן קפה), און מוהרא"ש זאגט: "וואס דער רבי האט געזאגט פאר מוהרנ"ת איז פאר אונז אלע געזאגט געווארן".
קענסט זיך נישט פארשטעלן דאס גרויסקייט פון זאגן אכצן פרקים משניות יעדן טאג. עס שטייט פון הייליגן טשערנאבלער מגיד זכותו יגן עלינו אין זיין ספר ליקוטי תורה (הדרכה ו): "תֹּאמַר חַ"י פְּרָקִים מִשְׁנַיוֹת בְּלִי פֵּירוּשׁ בְּכָל יוֹם", זאלסט זאגן יעדן טאג אכצן פרקים משניות, אן קיין טייטש, "כְּדַי שֶׁתִּגְמוֹר בְּכָל חוֹדֶשׁ כָּל הַשִּׁשָּׁה סְדָרִים"; אזוי וועסטו דאס ענדיגן יעדן חודש, "כֵּן תִּנְהַג כָּל יְמֵי חַיֶּיךָ", אזוי זאלסטו זיך פירן דיין גאנצן לעבן. אויך ווערט געברענגט פונעם הייליגן מהר"ם פאפירש (אור צדיקים סימן כב, אות יא): "טוֹב לִלְמוֹד מִשְׁנַיוֹת בְּכָל יוֹם", עס איז זייער גוט מען זאל יעדן טאג לערנען משניות, "וְאִם אֶפְשַׁר שֶׁיַּשְׁלִים חַ"י פְּרָקִים בְּכָל יוֹם, נֶגֶד חַ"י עוֹלָמוֹת, מַה טוֹב וּמַה נָעִים", און אז מען קען לערנען יעדן טאג אכצן פרקים משניות אנטקעגן די אכצן וועלטן, אוי ווי זיס און אוי ווי גוט וועט אים זיין, "יְהִי חֶלְקִי עִמּוֹ", איך וויל האבן א חלק מיט זיי, "כִּי הוּא תִּיקוּן גָּדוֹל לִפְגַם הַבְּרִית, סוֹד קֵל חַי", ווייל מיטן זאגן אכצן פרקים משניות איז מען מתקן וואס מען האט פוגם געווען אין די חטא פון פגם הברית, וואס פון דעם קומען די אלע נערווען השם ישמרינו, "וְיֶשׁ לָהֶם גַּם כֵּן סְגוּלָה לַהֲרוֹג הַיֵּצֶר הָרָע", אויך האט דאס א סגולה צו הרג'ענען דעם יצר הרע, "גַּם סְגוּלָה לְהַמְשִׁיך נְשָׁמָה, שֶׁהִיא אוֹתִיּוֹת מִשְׁנָה", אויך האט דאס א סגולה צו ברענגען א ריינע נשמה אויפן מענטש.
דער אייבערשטער זאל העלפן זאלסט האבן הצלחה אין אלע ענינים.