בעזרת ה' יתברך

יום א' פרשת במדבר, כ"ז אייר, מ"ב לעומר, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

עס איז זייער גוט צו גיין צו קברי צדיקים מתפלל זיין און זיך דארט מתבודד זיין, אויך בייטאג און אויך ביינאכט, סיי פאר חצות און סיי נאך חצות. דער רבי זאגט (ספר המדות אות צדיק, סימן קעג): "עַל יְדֵי הִשְׁתַּטְּחוּת עַל קִבְרֵי הַצַּדִּיקִים הַקָּדוֹשׁ בָּרוּךְ הוּא עוֹשֶׂה לוֹ טוֹבוֹת, אַף עַל פִּי שֶׁאֵינוֹ רָאוּי לְכָךְ", אפילו ווער עס איז נישט ווערד מען זאל צוהערן זיינע תפילות, ביי קברי צדיקים איז אנדערש, דארט הערט מען צו יעדנ'ס תפילות.

אויך אז מען גייט נעבן א בית עלמין קען מען זיך מתבודד זיין און מען קען זיך אריינעמען וואס וועט בלייבן פונעם מענטש. ווען מען זעט די קברים ווי אלע ליגן אייניג; רייכע, ארעמע, גרויסע, קליינע, אזוי ווי עס שטייט "קָטֹן וְגָדוֹל שָׁם הוּא" (איוב ג, יט), אלע קומען אן אין בית עלמין, און נאר תורה, תפילה, מצוות און גוטע מעשים - נעמט מען מיט, מען קען זיך דארט גוט מתבודד זיין.

וואויל איז דעם מענטש וואס פאלגט דעם רבי'ן און גייט יעדן טאג זיך מתבודד זיין, ער לעבט מיט עלמא דאתי, אז עס וועט קומען א טאג וואס מען וועט אים אוועק נעמען, און אויסטון וכו', אנטון תכריכים און באערדיגן, אזא איינער האט נישט צוטון מיט קיינעם, ער האט נישט מיט מחלוקת, ער האט נישט מיט לשון הרע, רכילות וכו' וכו', די גאנצע טאג, די גאנצע לעבן זיינע - איז מיט אן אנדערע בליק, ער לעבט מיטן אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

ערב שבת קודש פרשת בא, ב' שבט, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

עס איז א גרויסע זאך צו גיין צו קברי צדיקים, זיך אויסגיסן דארט דאס הארץ און מתפלל זיין פאר ישועות.

דער זוהר הקדוש זאגט (פרשת שלח, דף קנח:), כלב האט געזען אז משה רבינו האט געגעבן א ברכה נאר פאר יהושע בן נון אז ער זאל געראטעוועט ווערן פון די עצה פון די מרגלים און אים האט מען נישט געגעבן די ברכה, "אִשְׁתְּמִיט מִנַּיְיהוּ", האט ער זיך אוועק געכאפט פון די מרגלים, "וְאָתֵי לְגַבֵּי קִבְרַיָּיא דַּאֲבָהָן", און געגאנגען קיין חברון צו קברי צדיקים, "וְצַלֵּי תַּמָּן צְלוֹתֵיהּ", ער האט דארט געבעטן דעם אייבערשטן ער זאל נישט פארכאפט ווערן מיט די עצת מרגלים צו קריגן אויף משה רבינו, דער זוהר פרעגט 'ווי אזוי קען זיין אז כלב איז געגאנגען קיין חברון מתפלל זיין ביי די מערת המכפלה איינער אליין, עס זענען דאך דארטן געווען די ריזן מענטשן, ווי אזוי האט ער נישט מורא געהאט פון זיי?!' זאגט דער זוהר הקדוש (שם): "אֲבָל מַאן דְּאִיהוּ בְּדוֹחֲקָא, לָא אִסְתָּכַּל מִדִי", ווער עס איז אין א צרה - קוקט נישט אויף גארנישט, "כַּךְ כָּלֵב, בְּגִין דְּהֲוָה בְּדוֹחֲקָא, לָא אִסְתָּכַּל מִדִי, וְאָתָא לְצַלָּאָה עַל קִבְרֵי אֲבָהָן, לְאִשְׁתְּזָבָא מְעֵיטָא דָּא", אזוי אויך ווען כלב האט געזען אז ער איז אין א גרויסע סכנה - איז ער געלאפן צו קברי צדיקים מתפלל זיין, ער האט נישט געקוקט אויף דעם אז דארט זענען דא די בני ענק; זעט מען פון דעם דאס גרויסקייט פון גיין אויף קברי צדיקים.

מען גייט נישט צו קיין בית עלמין ביינאכט, אבער אז מען וויל נאר אריבערגיין די קברים אויף אנצוקומען צום קבר פונעם צדיק - איז נישט קיין פראבלעם.

דער אייבערשטער זאל העלפן זאלסט האבן הצלחה אין אלע ענינים.