בעזרת ה' יתברך

יום א' פרשת מקץ, כ"ד כסליו, ערב חנוכה, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

נישטא נאך אזא זאך וואס איז אזוי מטהר דעם מענטש ווי לערנען די הייליגע תורה. חכמינו זכרונם לברכה זאגן (תנא דבי אליהו, פרק יח): "מַה מַיִם הַלָּלוּ מִקְוֶה טָהֲרָה הֵן לְכֹל בָּאֵי הָעוֹלָם וּלְכָל מַעֲשֵׂה יָדָיו שֶׁבָּרָא בָּעוֹלָם", אזוי ווי מקוה רייניגט פון אלע טומאות, "כָּךְ דִּבְרֵי תּוֹרָה מִקְוֶה טָהֲרָה הֵן לְיִשְׂרָאֵל בְּכָל מְקוֹמוֹת מוֹשְׁבוֹתֵיהֶן", אזוי אויך די הייליגע תורה רייניגט דעם מענטש; ווען מען לערנט תורה - ווערט מען אויסגערייניגט פון אלע טומאות און אלע זוהמות. אפילו מען האט פוגם געווען, מען האט זיך פארשמירט מיט עבירות - ווערט מען צוריק ריין.

נאך זאגן זיי (שם): "בּוֹא וּרְאֵה כַּמָּה גְּדוֹלָה כֹּחָהּ שֶׁל תּוֹרָה", קוק דאס גרויסקייט פון די הייליגע תורה, "שֶׁמְּטַהֶרֶת אֶת פּוֹשְׁעֵי יִשְׂרָאֵל בִּזְמַן שֶׁעוֹשִׂין תְּשׁוּבָה אֲפִילוּ מֵעֲבוֹדָה זָרָה שֶׁבְּיָדָן", אפילו מען האט געדינט עבודה זרה, אויב מען טוט תשובה און מען לערנט תורה - ווערט מען אויסגערייניגט, אזוי ווי עס שטייט (יחזקאל לו, כה): "וְזָרַקְתִּי עֲלֵיכֶם מַיִם טְהוֹרִים" וגו', דאס מיינט מען די הייליגע תורה וואס איז צוגעגליכן צו וואסער.

לערנען זוהר רייניגט דעם מענטש. דער הייליגער רבי זאגט (שיחות הר"ן, סימן קח): "יָדוּעַ שֶׁלִּמּוּד הַזֹּהַר", אז לערנען זוהר איז "מְסֻגָּל מְאֹד מְאֹד", זייער מסוגל פאר די נשמה. "וְדַע שֶׁעַל יְדֵי לִמּוּד הַזֹּהַר נַעֲשֶׂה חֵשֶׁק לְכָל מִינֵי לִמּוּדָם שֶׁל הַתּוֹרָה הַקְּדוֹשָׁה", דורך לערנען דעם הייליגן זוהר באקומט מען א שטארקע גליסטעניש צו לערנען אלע ספרים פון די הייליגע תורה.

אויך האט דער הייליגער אריז"ל געגעבן א תיקון פאר א בעל תשובה ער זאל יעדן טאג לערנען פינף בלעטער תיקוני זוהר, דאס וועט אים מתקן זיין און מטהר זיין.

אזוי אויך איז דער הייליגער ספר אור החיים מזכך דעם מענטש.

דער אייבערשטער זאל העלפן זאלסט האבן הצלחה אין אלע ענינים.

א פרייליכן ליכטיגן חנוכה.

בעזרת ה' יתברך - יום ב' פרשת בראשית, אסרו חג סוכות, כ"ד תשרי, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

אודאי זאלן בחורים זיך צוגעוואוינען זאגן די ווערטער פון הייליגן זוהר, אויך קינדער זאל מען אויסלערנען זאגן די הייליגע ווערטער פון זוהר. מוהרא"ש ברענגט פון דעם הייליגן צדיק פון קאמרנא זכותו יגן עלינו (נוצר חסד אבות, פרק ד): "לו עמי שומע לי", הלואי זאל מען מיך אויסהערן, "בדור הרע הזה", אין דעם היינטיגן דור, "שהמינות גובר", וואס עס איז דא אזויפיל שלעכטס, "היה למדים עם תינוק בן תשעה שנים ספר תיקוני זוהר להגות בה", וואלט מען געדארפט צוגעוואוינען קינדער פון די ניין יאר זיי זאלן עוסק זיין אין לערנען דעם הייליגן זוהר, "והיה אז יראת חטאו קודמת לחכמתו", וואלט דאס זיי געהאלפן זיי זאלן זיין אפגעהיטן פון דעם יצר הרע, קוק נאך אינעם ספר.

ביי די וועלט איז אנגענומען, אז מען לערנט זוהר יונגערהייט - ווערט מען משוגע, מוהרא"ש פלעגט שפעטן דערפון; מוהרא"ש זאגט: "פון לערנען זוהר הקדוש ווערט מען נישט משוגע, משוגע ווערט מען פון פגם הברית, הוצאת זרע לבטלה רחמנא לצלן"; חטאות נעורים - דאס מאכט דעם מענטש משוגע, זוהר הקדוש אז מען לערנט - ווערט מען א גרויסער צדיק.

דער אייבערשטער זאל העלפן זאלסט האבן הצלחה אין אלע ענינים.