תוכן השאלה
לכבוד דער ראש ישיבה שליט"א,
איך האב א שטיקל פראבלעם מיט מיין לענדלארד, איך וויל בעטן אויב דער ראש ישיבה שליט"א קען מיר געבן אן עצה ווי אזוי זיך אויסצוקומען מיט אים.
איך וואוין אין א פורניטשט דירה, איך האב זיך אויסגענומען מיט אים ביים ארויסנעמען די דירה אז ער וועט פאררעכטן אלעס וואס פעלט זיך אויס, און בערך צוויי חדשים צוריק האט מיין דרייער זיך אביסל צעבראכן, עס ארבעט פיין, עס טרוקנט די קליידער ברוך ה', אבער עס מאכט א געפערליכע גערודער, ממש מען קען נישט לייגן די קינדער שלאפן בשעת עס ארבעט.
איך האב שוין געזאגט פאר מיין לענדלארד פאר צוויי חדשים צוריק פון דעם פראבלעם, און ער זאגט מיר אלץ 'איך גיי רופן א בעל מלאכה, איך גיי רופן א בעל מלאכה', און למעשה גייט דורך טעג און אין קול ואין עונה. איך רוף אים א וואך שפעטער זאגט ער מיר מען וועט זען וואס מען גייט טון, איך רף אים נאכאמאל לעצטנס און איך שלאג אים פאר אן עצה אז אפשר קען איך רופן א בעל מלאכה און איך וועל אים צאלן און נאכדעם וועל איך עס אראפרעכענען פון די רענט, זאגט ער מיר אז מען גייט "שוין" זען וואס מען גייט טון, ער זאגט אז ער האלט אינמיטן טראכטן צי ער זאל קויפן א נייע אנשטאט פאררעכטן. בקיצור, ער נעמט זיך נישט צוזאם.
מיין שאלה איז וואס איך זאל טון מיט אים, איך טראכט אפשר זאל איך אים נישט צאלן קיין רענט, אדער נישט די גאנצע, ביז ער פאררעכט עס, אדער אים אריינגעבן אין קאפ אריין. איך וויל נישט טון קיין ווילדע זאכן אן קיין מורה דרך, וויל איך בעטן אויב דער ראש ישיבה שליט"א קען מיר מדריך זיין ווי אזוי זיך צו פירן.
א גרויסן יישר כח פאר אלע שיעורים, ווען נישט די שיעורים וואלט איך שוין לאנג זיך צעקריגט מיט געוויסע שכנים וואס טראכטן אביסל אנדערש ווי מיר, זיי לייגן זייערע זאכן אויף פלעצער וואס קען מיר שטערן, און אין זכות פון די שיעורים בין איך מוותר, איך בעט דעם אייבערשטן אז דער ראש ישיבה שליט"א זאל ווייטער האבן כח אנצוגיין.
יישר כח
תשובה מאת הראש ישיבה שליט"א:
בעזרת ה' יתברך
יום ה' פרשת בהעלותך, ט"ז סיון, שנת תשפ"ה לפרט קטן
... נרו יאיר
איך האב ערהאלטן דיין בריוו.
דאס איז א שאלה אין דיני ממונות, דאס דארפסטו פרעגן א דיין. פרעג א דיין אויב דו מעגסט דאס טון, נישט צו צאלן רענט וכו'.
אויך זאלסטו וויסן אז אלעס וואס פאסירט מיטן מענטש, אלעס איז מיט א חשבון, און אז עס צעברעכט זיך עפעס אין שטוב - איז דאס אויך מיט א חשבון. אלעס איז צו דערמאנען דעם מענטש אז דער אייבערשטער פירט אלעס און מאכט אלעס, אזוי ווי די הייליגע חכמים זאגן (תנחומא תצא, ג): "צָרִיךְ אָדָם לְהַחֲזִיק טוֹבָה לְהַקָּדוֹשׁ בָּרוּךְ הוּא בִּזְמַן שֶׁהַיִּסּוּרִין בָּאִין עָלָיו, לָמָּה, שֶׁהַיִּסּוּרִין מוֹשְׁכִין אֶת הָאָדָם לְהַקָּדוֹשׁ בָּרוּךְ הוּא", א מענטש דארף דאנקען דעם אייבערשטן אויף די שוועריקייטן וואס ער האט, ווייל דאס ברענגט אים נענטער צום אייבערשטן, עס מאכט אים לעבן מיט תכלית, מיט חשבון הנפש, טראכטן וואס מען דארף פאררעכטן, און אויך קומט מען אפ מיט דעם וואס מען דארף אפקומען.
דער אייבערשטער זאל העלפן זאלסט האבן הצלחה אין אלע ענינים.
