תוכן השאלה
לכבוד דער ראש ישיבה שליט"א,
ס'איז באו מים עד נפש, איך פיל נישט קיין טעם אין לעבן, איך האב געוואלט גיין זיך נעמען דאס לעבן, אבער קודם מוז איך פרובירן. איך שרייב צום ראש ישיבה שליט"א ווייל עפעס אן עצה מוז זיכער זיין, און איך קען מער נישט.
איך האב נישט קיין פרוטה אין טאש. איך ווייס אז דער ראש ישיבה שליט"א זאגט אז מען זאל דאנקען דעם אייבערשטן אויף וואס מען האט יא, אבער למעשה בין איך סטאק, איך האב פשוט גארנישט.
די חובות האלטן ביי מער פון פופצן טויזנט דאלער, און איך זע נישט אז עס זאל קענען ווערן מסודר. איך מאך התבודדות אויף פרנסה אבער איך האלט אין ערגעץ נישט.
איך ווייס אז אנדערע מענטשן האבן מער חובות פון מיר, אבער למעשה לעב איך אין די שווערע מצב, אן קיין וועג ארויס.
איך קען נישט שטערן דעם ראש ישיבה שליט"א מיט לאנגע בריוו, דאס האב איך אבער געמוזט שרייבן.
יישר כח
תשובה מאת הראש ישיבה שליט"א:
יום ד' פרשת חיי שרה, י"ט מר-חשון, שנת תשפ"ה לפרט קטן
לכבוד ... נרו יאיר
איך האב ערהאלטן דיין בריוו.
גיי הפצה וועסטו האבן שפע; נעם א זעקל ספרים, קונטרסים וכו' - און גיי אויף די הייזער מזכה זיין נשמות ישראל. מענטשן ווארטן אויף די ספרים, מענטשן געבן אזוי שיין צדקה פאר מפיצים, סיי דו וועסט עוסק זיין אין ברענגען די גאולה, צו ביאת המשיח, סיי דו וועסט פאררעכטן דיינע מעשים, אפגערעדט צו עולם הבא, און מתן שכרה בצדה – דו וועסט האבן פרנסה, וועסט קענען אהיים ברענגען געלט פאר דיין משפחה.
פון זיצן מיט פארלייגטע הענט און וויינען און קרעכצן - וועסטו נישט געהאלפן ווערן. מוהרא"ש זאגט, דער רבי האט אונז געגעבן א כלי ווי מען קען אריינלייגן די הענט און ארויסנעמען געלט; 'הפצה', לזכות נשמות ישראל מיט די עצות פון רבי'ן, די עצות וואס משיח וועט אריינברענגען אין די וועלט. אויסער וואס מען איז זוכה צו עולם הבא, אזוי ווי דער הייליגער זוהר זאגט (תרומה קכח:), "תָּא חֲזֵי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע, זאגט דער הייליגער זוהר, א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא. גָּרִים לְאַכְפְּיָיא סִטְרָא אַחֲרָא. וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ. וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; ער נעמט אוועק טומאה פון די וועלט, און ער מאכט אז דעם אייבערשטנ'ס נאמען זאל ווערן געהייליגט אויף די וועלט, דער מענטש איז גורם אז אלע וועלטן שטייען אויף זיין זכות. "וְזָכֵי לְמֵחַמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", און ער איז זוכה צו אלע גוטע זאכן אויף די וועלט און אויף יענע וועלט, "כָּל מָארֵי דִּינִין, לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכטס טון, נישט אויף די וועלט און נישט אויף יענע וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים, און קיינער קען אים נישט צוריק האלטן; מען איז זוכה אהיים צו ברענגען פרנסה און נישט לעבן א לעבן פון שקר און חנופה, זיך מאכן ווי מען האט געלט און לעבן אויף קרעדיט קארדס און חובות.
עס העלפט נישט איבער רעכענען נאכאמאל און נאכאמאל וויפיל חובות מען האט, עס וועט דיר נישט העלפן, גיי טו עפעס. דער צדיק דער רש"ב מליובאוויטש זכותו יגן עלינו האט געזאגט א טייער ווארט: "טובה פעולה אחת מאלף אנחות", בעסער עפעס טון, ווי הונדערט קרעכצן; נעם א זעקל ספרים, און איך זאג דיר צו דו וועסט אהיים קומען מיט שפע.
דער אייבערשטער זאל העלפן זאלסט האבן הצלחה אין אלע ענינים.