תוכן השאלה
לכבוד דער ראש ישיבה שליט"א,
קודם כל וויל איך זיך באדאנקען פאר די שיינע שיעורים און דרשות, אין דעם זכות האב איך אנגעהויבן מעביר סדרה צו זיין היי יאר יעדן טאג, ווי אויך א שיעור אין גמרא, איך פיל זיך ווי א נייער מענטש.
איך האב געוואלט פרעגן צי איך זאל אויך לערנען זוהר הקדוש אפילו איך פארשטיי נישט?
יישר כח
תשובה מאת הראש ישיבה שליט"א:
יום ג' פרשת חיי שרה, כ' מרחשון, שנת תשפ"ו לפרט קטן
לכבוד ... נרו יאיר
איך האב ערהאלטן דיין בריוו.
איך פריי זיך זייער צו הערן אז דו לערנסט יעדן טאג מקרא און גמרא און דו שרייבסט אז דו שפירסט זיך ווי א נייער מענטש; אז מען לערנט תורה באקומט די נפש און נשמה – עסן, און אזוי ווי אז מען פאסט, מען עסט נישט - ווערט מען דערשלאגן, מען פארלירט די מצב רוח, אדער אויך אז מען לערנט נישט - שפירט די נפש א לאך, א הונגער, א ליידיגקייט, און אויך די נשמה שפירט אזוי, און דאס מאכט דעם מענטש דערשלאגן און דערביטערט, און ווען מען הייבט אן לערנען די הייליגע תורה ווערט מען אנגעפילט מיט א לעבעדיגע גייסט. אזוי ווי דער רבי זאגט (לקוטי מוהר"ן חלק א', סימן ח) אז אין די תורה איז באהאלטן די רוח חיים פונעם אייבערשטן, אזוי ווי עס שטייט (בראשית א, ב): "וְרוּחַ אֱלֹקִים מְרַחֶפֶת עַל פְּנֵי הַמָּיִם", און "אֵין מַיִם אֶלָּא תּוֹרָה" (בבא קמא פב.).
בנוגע זאגן זוהר; זיכער איז גוט צו מאכן א שיעור אין גורס זיין זוהר, דער הייליגער רבי זאגט (שיחות הר"ן, סימן קח): "יָדוּעַ שֶׁלִּמּוּד הַזֹּהַר", לערנען זוהר, "מְסֻגָּל מְאֹד מְאֹד", איז זייער מסוגל פאר די נשמה. "וְדַע שֶׁעַל יְדֵי לִמּוּד הַזֹּהַר נַעֲשֶׂה חֵשֶׁק לְכָל מִינֵי לִמּוּדָם שֶׁל הַתּוֹרָה הַקְּדוֹשָׁה", דורך לערנען דעם הייליגן זוהר באקומט מען א שטארקע גליסטעניש צו לערנען אלע ספרים פון די הייליגע תורה. אויך האט דער הייליגער אריז"ל געגעבן א תיקון פאר א בעל תשובה ער זאל יעדן טאג לערנען פינף בלעטער תיקוני זוהר, דאס וועט אים מתקן זיין און מטהר זיין.
דער אייבערשטער זאל העלפן זאלסט האבן הצלחה אין אלע ענינים.