בעזרת ה' יתברך

ערב שבת קודש פרשת וירא, ט"ז מרחשון, שנת תשפ"ו לפרט קטן

לכבוד ... נרו יאיר

וויי וויי אז מען לערנט נישט אויס די קינדער זאלן זיין הייליג, וויי וויי אז נאכאלץ, נאכן הערן יעדן טאג שוידערליכע מעשיות ווי מניוולים באצווינגען קינדער און יונגע בחורים מיט עבירות, און נאכאלץ קען זיין א מנהל וואס פירט א היימישע חדר וואס זאל זאגן: "ביי אונז רעדט מען נישט צו די קינדער פון קדושה".

אודאי זאלסטו רעדן צו די קינדער ווייטער פון קדושה, האב פון קיינעם נישט מורא, דו זאג די קינדער: "קיינער טאר דיך נישט נעמען אין א פארמאכטע צימער און דיר עפענען דיינע קליידער און דיך אנרירן ביי דיינע פריוואטע פלעצער, און אויב איינער וויל דיך אנרירן אדער ער צווינגט דיר דו זאלסט אים אנכאפן ביי די אות ברית קודש - זאלסטו אנטלויפן און דו זאלסט שרייען, און אויב קיינער וויל דיר נישט העלפן זאלסטו גיין צו די פאליציי"; נעם נישט די שטראף אויף דיר, אז א מלמד רעדט נישט צו די קינדער - ווערט ער אליינס בשטראפט השם ישמרינו. אזוי ווי חכמינו זכרונם לברכה זאגן (תנא דבי אליהו רבה, פרק יח), אליהו הנביא האט דערציילט: איך האב אמאל אנגעטראפן א מלמד וואס האט געהאט זייער אסאך תלמידים - בערך צוויי הונדערט תלמידים, נאך א יאר בין איך צוריק געקומען צו די שטאט פון דעם מלמד, ווען איך האב אויפגעזוכט דעם מלמד זיך צו קענען טרעפן מיט אים האט מען מיר געזאגט אז דער מלמד איז שוין געשטארבן צוזאמען מיט זיין ווייב און קינדער, אזוי אויך זענען אלע זיינע תלמידים געשטארבן. האב איך אנגעהויבן זייער שטארק צו וויינען פארוואס דער מלמד מיט זיין משפחה, מיט די תלמידים, זענען אלע געשטארבן, ביז עס איז געקומען צו מיר א מלאך פון הימל און מיר געפרעגט: "אליהו, פארוואס וויינסטו?" האב איך אים געזאגט, "צי דען זאל איך נישט וויינען, אז די אלע זענען געשטארבן...?" האט מיר דער מלאך געזאגט: "וויין נישט אליהו, זיי האבן געטון שמוציגע מעשים, זיי האבן געטון עבירות איינער מיטן צווייטן, זיי האבן פוגם געווען באות ברית קודש דעריבער זענען זיי אלע געשטארבן יונג".

לייג אריין שמחה אין די קינדער, זע עס זאל זיין א פרייליכע לופט אין כיתה, אויך ערנסט, אבער אויך פרייליך; פון איין זייט ווייסן די קינדער אז מען רעדט נישט פון ווען דער רבי לערנט פאר, די קינדער ווייסן אז מען דארף פאלגן, און פון די אנדערע זייט איז פרייליך, די קינדער האבן ליב צו זיין אין חדר, עס איז א געשמאק צו זיין מיטן מלמד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

ערב שבת קודש פרשת וירא, ט"ז מרחשון, שנת תשפ"ו לפרט קטן

לכבוד ... נרו יאיר

ווער נישט באליידיגט פון דיין ווייב, נעם עס נישט צום הארצן, אזוי ווי קליינע קינדער ווען זיי זענען נישט פרייליך און זיי גייען אריין אין א כעס קענען זיי זאגן נישט שיינע ווערטער פאר טאטע מאמע, צום ביישפיל: "ביסט נישט קיין גוטע טאטע", "ביסט אן עקלדיגע מאמע", און עלטערן ווייסן און פארשטייען אז די קינד האט זיי נאכאלץ ליב, און עלטערן וועלן קיינמאל נישט אפלאזן די קינד, אזוי אויך מאן און ווייב, ווען מען ווערט איבערגעשטרענגט און מען צערעדט זיך מיט נישט שיינע ווערטער איינער אויפן צווייטן, טאר מען דאס נישט נעמען פערזענליך, נאר געדענקען אז דאס איז א נסיון וואס מען פרובירט אויס דעם מענטש צו זען אויב ער וועט זיך פארלירן אדער נישט.

עס איז טאקע זייער נישט בא'טעמ'ט צו הערן די ווערטער פון די ווייב, אבער איך בעט דיר נעם עס נישט פערזענליך. קענסט איר זאגן אז עס טוט וויי דאס צו הערן, און "נאכאלץ האב איך דיך זייער ליב וכו' וכו'", און נאכאלץ זאלסטו איר אהיים ברענגען גוטע זאכן. אזוי ווי חכמינו זכרונם לברכה דערציילן (יבמות סג.), רבי חייא האט געהאט א ווייב מיטן נאמען יהודית, זי פלעגט אים זייער אסאך טשעפען, זי פלעגט אים זאגן: "א שאד איך האב נישט געזאגט ביים בעשוי 'ניין'", זי פלעגט אים זאגן: "ביסט נישט שיין וכו' וכו'", מיט דעם אלעם, ווען ער האט געזען א גוטע זאך האט ער איר דאס אהיים געברענגט, און זיין תלמיד דער הייליגער רב, וואס איז אויך געווען א שוועסטער קינד (נעפיו) און געוואוסט וואס טוט זיך אין שטוב – האט אים געפרעגט: "פארוואס ברענגסטו איר די גוטע זאכן, זי טשעפעט דיך, זי טוט דיך וויי?" האט רבי חייא אים געענטפערט: "דַּיֵּינוּ שֶׁמְגַדְלוֹת בָּנֵינוּ", מיר איז גענוג אז זי ציט אויף די קינדער, "וּמַצִּילוֹת אוֹתָנוּ מִן הַחֵטְא", און זי ראטעוועט מיך פון עבירות; זעט מען פון דעם ווי שטארק מען דארף אכטונג געבן צו מכבד זיין די ווייב.

קלאפ זיך נישט, עס קען זיין אז דו דארפסט טאקע תשובה טון, אבער אויך זי דארף וויסן אז מען רעדט נישט אזוי צום מאן, דו בעט דעם אייבערשטן עס זאל זיין ליבשאפט אין שטוב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת וירא, י"ד מרחשון, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

איך וועל דיר זאגן דעם אמת, ביסט געזיצן ביי מיר אפאר שעה מיט דיין ווייב, אין אנהייב האב איך זיך זייער אכטונג געגעבן, איך האב פרובירט צו רעדן מיט שיינעם, אבער נאכן הערן ווי דו שינדסט איר הויט, די וועג ווי דו רעדסט צו איר, ווי דו דערנידערסט איר - האב איך דאס מער נישט געקענט נעמען און דיר געזאגט וואס איך האב דיר געהאט צו זאגן.

די וועג ווי אזוי דו האסט גערעדט צו דיין ווייב האב איך אין מיין לעבן נישט געהערט, איך האב שוין אסאך געזען, אבער די וועג ווען מען זיצט מיט א דריטן און מען וויל אויסארבעטן שלום, מען וויל מאכן פשרות, און דו שטעכסט, און רעדסט אזוי געמיין - דאס האב איך נישט געזען.

שפעטער ווען איך האב געזען אז דו האסט זיך באליידיגט, האב איך געטראכט א שאד די צייט, א שאד איך האב אוועקגעגעבן אזויפיל צייט, מיינע תלמידים האבן געווארט אויף מיר איך זאל מיט זיי גיין אויף א נסיעה צו מקומות הקדושים, די איין מאל א יאר וואס איך קום קיין ארץ ישראל און די בחורים פון ישיבה ווארטן צו זיין אביסל מיט מיר, האב איך דאס אוועק געגעבן, איך האב אלעס געלייגט אין דער זייט צו מאכן שלום, עס זאל זיין השראת השכינה ביי ענק.

הלואי זאלסטו יעצט אננעמען די ווערטער וואס איך האב דיר דעמאלט געזאגט, איינבייגן דעם קאפ פארן אייבערשטן, רעדן שיין צו די ווייב, ווייל נאר אז מען האט שלום בית, מען רעדט שיין, מען רעדט איידל, מען רעדט מיט דרך ארץ - איז דא השראת השכינה מיט אלע ברכות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת חיי שרה, כ' מרחשון, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

איך פריי זיך זייער צו הערן אז דו לערנסט יעדן טאג מקרא און גמרא און דו שרייבסט אז דו שפירסט זיך ווי א נייער מענטש; אז מען לערנט תורה באקומט די נפש און נשמה – עסן, און אזוי ווי אז מען פאסט, מען עסט נישט - ווערט מען דערשלאגן, מען פארלירט די מצב רוח, אדער אויך אז מען לערנט נישט - שפירט די נפש א לאך, א הונגער, א ליידיגקייט, און אויך די נשמה שפירט אזוי, און דאס מאכט דעם מענטש דערשלאגן און דערביטערט, און ווען מען הייבט אן לערנען די הייליגע תורה ווערט מען אנגעפילט מיט א לעבעדיגע גייסט. אזוי ווי דער רבי זאגט (לקוטי מוהר"ן חלק א', סימן ח) אז אין די תורה איז באהאלטן די רוח חיים פונעם אייבערשטן, אזוי ווי עס שטייט (בראשית א, ב): "וְרוּחַ אֱלֹקִים מְרַחֶפֶת עַל פְּנֵי הַמָּיִם", און "אֵין מַיִם אֶלָּא תּוֹרָה" (בבא קמא פב.).

בנוגע זאגן זוהר; זיכער איז גוט צו מאכן א שיעור אין גורס זיין זוהר, דער הייליגער רבי זאגט (שיחות הר"ן, סימן קח): "יָדוּעַ שֶׁלִּמּוּד הַזֹּהַר", לערנען זוהר, "מְסֻגָּל מְאֹד מְאֹד", איז זייער מסוגל פאר די נשמה. "וְדַע שֶׁעַל יְדֵי לִמּוּד הַזֹּהַר נַעֲשֶׂה חֵשֶׁק לְכָל מִינֵי לִמּוּדָם שֶׁל הַתּוֹרָה הַקְּדוֹשָׁה", דורך לערנען דעם הייליגן זוהר באקומט מען א שטארקע גליסטעניש צו לערנען אלע ספרים פון די הייליגע תורה. אויך האט דער הייליגער אריז"ל געגעבן א תיקון פאר א בעל תשובה ער זאל יעדן טאג לערנען פינף בלעטער תיקוני זוהר, דאס וועט אים מתקן זיין און מטהר זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת וירא, י"ג מרחשון, שנת תשפ"ו לפרט קטן

לכבוד ... נרו יאיר

איך האב ערהאלטן דיין בריוו.

בנוגע זיך שעמען וכו'; וויסן זאלסטו, דער רבי זאגט (ספר המדות אות ניאוף, סימן מא): "תיקון להוצאת זרע לבטלה", א תיקון פאר פגם הברית, "שישתדל להחזיר בני אדם בתשובה", מען זאל צוריקברענגען מענטשן צום אייבערשטן, און מוהרא"ש שרייבט אן א שיעור מאל אין די בריוו אז ווער עס וויל פאררעכטן זיינע נישט גוטע מעשים זאל עוסק זיין אין פארשפרייטן דעם הייליגן רבינ'ס עצות פאר די וועלט, דאס איז די גרעסטע תיקון, דאס איז מכפר אויף אלעס; דעריבער וואס דארפסטו זיך שעמען? און פון וועם זאלסטו זיך שעמען? דער עיקר דארפן מיר טראכטן וואס צו טון מיט די בושות אויף יענע וועלט ווען מען וועט שטיין פארן אייבערשטן, פאר די נשמות פון די עלטערן, פון די פריערדיגע צדיקים; וואס וועלן מיר ענטפערן פארן אייבערשטן? די בושות וועט זיין זייער שרעקליך. אזוי ווי חכמינו זכרונם לברכה דערציילן (חגיגה ד:) ווען דער הייליגער רבי אלעזר פלעגט לערנען די פרשה פון יוסף מיט די שבטים, ווי די תורה דערציילט אז ווען יוסף האט זיך אנטפלעקט צו די שבטים און געזאגט "אני יוסף" - האבן זיי זיך זייער פארשעמט, פלעגט רבי אלעזר ווייינען און געזאגט: "מה-דאך ווען א בשר ודם האלט פאָר, זאגט די תורה זיי זענען שרעקליך פארשעמט געווארן, זיי האבן נישט געהאט וואס צו זאגן, איז וואס וועל איך טון ווען דער אייבערשטער וועט מיך פרעגן אויף מיינע מעשים, וואס וועל איך דעמאלט טון...?"

בנוגע ווי אזוי צו געבן די ספרים וכו'; קענסט טון ווי אזוי עס איז דיר גרינגער, און אז עס איז דיר ביידע וועגן שווער - זאלסטו אנהייבן ערשט געבן דעם ספר, און אז יענער נעמט עס בעט צדקה, און אויב יענער זאגט ער דארף נישט - זאלסטו אויך בעטן צדקה. די געלט זאלסטו צעטיילן אין האלב, האלב זאלסטו געבן פאר צדקה פארן דרוקן די ספרים פון הייליגן רבי'ן, און האלב קענסטו נעמען פאר דיר.

בעט דעם אייבערשטן: "רבונו של עולם העלף מיר איך זאל נישט פארגעסן ווי אזוי איך האב אויסגעזען איידער איך האב געפינען דעם הייליגן רבינ'ס ספרים, איך זאל שטענדיג געדענקען וואס די ספרים האבן מיט מיר געטון, ווי דאס האט מיך געברענגט צו לערנען, ווי עס האט מיך איבערגעדרייט מיין מח איך זאל טראכטן פון דיר און בענקען צו דיר אייבערשטער, און בפרט וואס די ספרים האבן מיך געראטעוועט מיין שלום בית און מיין חינוך הילדים, בעט איך דיר רבונו של עולם העלף מיר איך זאל זיך קענען שטארקן, איך זאל עוסק זיין מיין גאנץ לעבן אין מפיץ זיין ספרי רבינו, צו געבן די גוטע לעבן וואס דער רבי האט מיר געברענגט - פאר אלעמען, איך זאל גיין פארשפרייטן די זיסע וואסער פון רבי'ן, די עצות פונעם נ'חל נ'ובע מ'קור ח'כמה פאר אלעמען, און ספעציעל פאר די ערליכע אידן וואס זוכן אזוי שטארק צו זיין ערליך, און עס גייט זיי נישט, זיי זענען פארבלאנזשעט, קיינער ווייסט נישט וואו משה רבינו געפינט זיך, דער שרייט דא, דער שרייט דא, עס איז דא אזא צעמישעניש אין די וועלט, פאר זיי זאל איך געבן די ספרים פון רבי'ן, די גוטע עסן פון דער בעל תפילה, און זיי אלע מקרב זיין צו דיר".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת וירא, י"ג מרחשון, שנת תשפ"ו לפרט קטן

... נרו יאיר

עס איז דא וואס ביים טאנצן מצוה טאנץ זענען זיי מכוון די שם שד"י, זיי טאנצן אהער און אהין לויט די פארעם פונעם אות ש', נאכדעם אות ד' און אות י', מוהרא"ש פלעגט אזוי טאנצן מצוה טאנץ, אויך איז דא וואס זענען מכוון אנדערע שמות.

דער עיקר זאלסטו נישט אויפהערן דאנקען און לויבן דעם אייבערשטן אז די ביסט זוכה חתונה צו מאכן א קינד, דאס איז דאך די גרעסטע זאך, אז מען איז זוכה צו זען ווי די קינדער האבן חתונה און גייען אין די תורה וועג און גייען ברענגען ערליכע דורות. זאלסטו ביים טאנצן זיך פרייען, טאנץ פרייליך, מאך נישט נאך די אלע וואס וויינען ביים טאנצן, טאנץ מיט שמחה, אזוי ווי ברסלב'ע חסידים וואס טאנצן מיט שמחה. אזוי ווי מוהרא"ש דערציילט (מקור השמחה, אות פב), אמאל נאכן טאנצן אין אומאן האט רבי אברהם בן רבי נחמן זכר צדיק לברכה געזאגט: "איך האב שוין געזען ערנסטע טאנצן, אבער פרייליכע טאנצן האב איך נאכנישט געזען", ער האט זיי געוואלט מרמז זיין אז מען זאל טאנצן מיט שמחה, מיט פרייליכקייט, נישט מיט ערנסטקייט, ווייל דער רבי האט געוואלט מען זאל זיין נאר פרייליך, פארקערט ווי די וועלט מיינט, אז ווי מער ערנסט און וואס מער מרה שחורה - איז מען מער דערהויבן. אזוי ווי מוהרא"ש ברענגט (שם, אות סו), אז רבי נחמן טולטשינער זכרונו לברכה פלעגט זאגן: "די וועלט מיינט אז צו זיין א צדיק דארף מען האבן ט' קבין מרה שחורה און צו זיין א ל"ו צדיק דארף מען זיי א וואסער טרעגער, עס איז נישט אזוי, נאר מען קען זיין א פרייליכער לעבעדיגער מענטש און זיין א צדיק, און אויך קען מען זיין א בעל הבית'ישער איד און אן עושר אזוי ווי ר' בערניו (דעם רבינ'ס אייניקל), און זיין דבוק צום אייבערשטן און זיין א ל"ו צדיק".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת וירא, י"ב מרחשון, שנת תשפ"ו לפרט קטן

... נרו יאיר

איך בעט דיר זייער זאלסט זייער אכטונג געבן ווי אזוי דו רעדסט צו דיין ווייב, זאלסט רעדן שיין צו איר, זאלסט רעדן ווייך צו איר, מיט די גרעסטע כבוד און דרך ארץ. מען קען זען אויפן מענטש ווי אזוי ער רעדט אין שטוב צו זיין ווייב; דער וואס רעדט שיין מיט דרך ארץ - דער איז אן ערליכער איד.

מוהרא"ש האט אונז שטענדיג דערמאנט מיר זאלן נישט פארגעסן ווי מיר האבן אויסגעקוקט איידער מיר האבן חתונה געהאט, ווי צעבראכן מען איז געווען, ווי מען האט שוין אויפגעגעבן אז מען וועט נאך אמאל חתונה האבן און האבן א שטוב. מוהרא"ש האט אונז געזאגט מיר זאלן יעדן אינדערפרי זאגן פארן אייבערשטן א דאנק און א לויב אויף דעם וואס מען האט א ווייב, מען איז חתונה געהאט.

דאס אז דיין ווייב וויינט - דאס איז ביי אלעמען, דאס איז די נאטור, פרויען זענען מער געפיליש, מער הארציג, וויינען זיי שנעלער, דעריבער זאגן חכמינו זכרונם לברכה (בבא מציעא נט.): "לְעוֹלָם יְהֵא אָדָם זָהִיר בְּאוֹנָאַת אִשְׁתּוֹ", מען זאל זייער אכטונג געבן נישט טשעפען די ווייב, "מִתּוֹךְ שֶׁדִּמְעָתָהּ מְצוּיָה", ווייל א פרוי וויינט גרינגער און שנעלער.

מאך זיך שיעורים אין חומש, משניות, גמרא, ועוד. לערן אויפן סדר דרך הלימוד פון הייליגן רבי'ן (המבואר בשיחות הר"ן, סימן עו), אז אפילו מען פארשטייט נישט זאל מען ווייטער לערנען. הלואי זאלסטו יעדן טאג גורס זיין אכצן פרקים משניות, לערן אין שטוב אויפן קול, לערן מיט א ניגון, דיין ווייב וועט זיך מחי' זיין ווען זי וועט דיך זען לערנען, אז מען לערנט ווערט מען איידל, מען רעדט איידל און מען האט א גוטע שלום בית.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

מוצאי שבת קודש פרשת לך לך, י"א מרחשון, שנת תשפ"ו לפרט קטן

מרת ... תחי'

איך האב ערהאלטן אייער בריוו.

וואס עס איז דא צו זאגן? דער טעבלעט, טעלעפאן, קאמפיוטער - מאכט חרוב שטובער, עס פארטרייבט די שכינה הקדושה. מוהרא"ש אין די בריוו רופט אן דעם קאמפיוטער - מכשף, כישוף מאכער, ווייל חכמינו זכרונם לברכה זאגן (סנהדרין סז:), וואס איז די נאמען כישוף? "שמכחישין פמליא של מעלה", זיי מאכן שוואך די כוחות פון די קדושה, און דאס איז די קאמפיוטער, טעבלעט, טעלעפאן וכדומה לזה.

בעטס דעם אייבערשטן אייער מאן זאל עס אפלאזן און אוועק ווארפן, בעטס ביי די שבת לעכט דעם אייבערשטן אז אייער שטוב זאל זיין אפגעהיטן פון אלע שלעכטס. נאר מיט תפילה קען מען זוכה זיין צו האבן א הייליגע שטוב, די טומאה כאפט זיך אריין אין די שענסטע שטיבער, ביי די שענסטע משפחות. ממש וואס דער נביא שרייט (ירמיה ט, כ): "כי עלה מות בחלונינו בא בארמנותינו להכרית עולל מחוץ בחורים מרחבות", עס מאכט חרוב די יוגנט, און נאר מיט תפילה פאר ערליכע דורות, מיט וויינען צום אייבערשטן - קען מען זוכה זיין צו האבן א ריינע שטוב.

איר מעגט זאגן אייער מאן שיינערהייט מיט שטארקע ליבשאפט: "אפשר איז בעסער פאר די שטוב עס זאל נישט זיין?" מען מעג רעדן, מען דארף רעדן, אבער עס מוז גיין מיט גרויס ליבשאפט און מיט איידלקייט, נישט דער מאן זאל שפירן ווי מען טיילט אים איין וואס צו טון, כאילו ער איז נישט בעל הבית; מען מוז צו דעם האבן גרויס חכמה.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

מוצאי שבת קודש פרשת לך לך, י"א מרחשון, שנת תשפ"ו לפרט קטן

מרת ... תחי'

איך האב ערהאלטן אייער בריוו.

איך פריי זיך זייער צו הערן אז איר זענט זיך זייער מחזק מיט די עצות פון הייליגן רבי'ן, די חיזוק וואס דער רבי געבט אונז שטארקט אונז מיר זאלן קענען אלעס אריבערגיין.

יעדן אינדערפרי ווען איר ענדיגט ברכות השחר מיט קריאת שמע און איר האט נאך א צען פופצן מינוט פאר איר גייט צו די ארבעט, זאלט איר אפאר מינוט רעדן צום אייבערשטן. נעמט א צעטל און שרייבט אראפ אלעס וואס איר דארפט, אלע אייערע בקשות, אלע געברויכן, און דאס זאלט איר יעדן טאג דורכשמועסן מיטן אייבערשטן אויף אייער אייגענע שפראך. דאס איז די העכסטע זאך וואס קען נאר זיין, דער רבי זאגט (לקוטי מוהר"ן חלק ב', סימן כה): "התבודדות הוא מעלה עליונה וגדולה מן הכל", דאס רעדן צום אייבערשטן אויף די אייגענע שפראך - איז די העכסטע און גרעסטע זאך, העכער פון אלעס; דאס איז וואס משיח וועט אויסלערנען פאר די גאנצע וועלט, מען זאל שמועסן מיטן אייבערשטן אזוי ווי מען רעדט צו א גוטע פריינד, און אזוי ווי א קינד רעדט צו זיין טאטע.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

מוצאי שבת קודש פרשת לך לך, י"א מרחשון, שנת תשפ"ו לפרט קטן

... נרו יאיר, ירושלים

איך האב ערהאלטן דיין בריוו.

אז דיין ווייב וויל דו זאלסט גיין אנגעטון אנדערש ווי דיין טאטע און דאס מאכט צער פאר דיינע עלטערן - זאלסטו חס ושלום מצער זיין דיינע עלטערן, און אז דיין ווייב וועט אנהייבן זינגען דעם אלעמען באקאנטן ניגון: "האסט מער ליב דיין טאטע ווי מיך", "דיין טאטע איז דיר מער חשוב ווי מיך" - זאלסטו איר שיין זאגן: "איך האב דיך זייער ליב, דו ביסט מיר זייער חשוב, און נאכאלץ וויל איך נישט מאכן צער פאר מיינע עלטערן".

געדענק, מען דארף רעדן שיין אין שטוב און נישט גיין אין ויכוחים, און אז די ווייב וויל דו זאלסט אראפנעמען דיין בארד, זאלסטו איר זאגן שיין און איידל: "מיין בארד איז מיר זייער טייער", און פאל נישט ווען זי וויינט און זאגט: "האסט מיך נישט ליב"; זאלסטו צו איר ווייטער רעדן מיט כבוד, איר ווייטער זאגן שיינע זיסע ווערטער ווי שטארק דו האסט איר ליב, און נישט טענה'ן.

דער אייבערשטער זאל העלפן זאלסט האבן הצלחה אין אלע ענינים.

... נרו יאיר

יא, מען מעג אויפקניפן די בארד, מען מעג זיך אויסקעמען די בארד; אדרבה, דער רבי האט זייער מקפיד געווען מען זאל זיין מסודר, גיין צאמגענומען די פיאות מיט די בארד. מען האט געזען ביים רבי'ן ווען ער איז ארויס פון שטוב האט ער זיך צאמגענומען די פיאות וכו'.

מען דארף זיין זייער פרייליך אז מען האט א בארד מיט פיאות, יעדע האר אינעם בארד איז מער ווערד פון כל הון דעלמא, אזויפיל הייליגקייט ליגט באהאלטן אינעם בארד, און דערפאר פארלייגן זיך די קליפות מיט די סטרא אחרא מען זאל אראפנעמען די הייליגע בארד, מיט די בארד אין פיאות אליינס קען מען זיך אזוי מחיה זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

ערב שבת קודש פרשת האזינו, י"א תשרי, מחרת יום הכיפורים, שנת תשפ"ו לפרט קטן

מרת ... תחי'

איך האב ערהאלטן אייער בריוו.

בעטס נישט פון אייער מאן ער זאל זיך צו-פיצן די בארד, די בארד איז זייער הייליג און זייער וויכטיג פארן מענטש מיט זיינע דורות, יעדע איינצעלנע האר פונעם בארד איז שרעקליך הייליג.

די בארד ברענגט פרנסה, די בארד ברענגט שפע, די בארד איז די צינורות, יעדע איינצעלנע האר פונעם בארד איז אזוי הייליג, מען קען זיך גארנישט פארשטעלן דאס טייערקייט און הייליגקייט פון דעם.

א גוט שבת.

בעזרת ה' יתברך

ערב שבת קודש פרשת האזינו, י"א תשרי, מחרת יום הכיפורים, שנת תשפ"ו לפרט קטן

לכבוד ... נרו יאיר

וואויל איז דיר אז דאס איז דיין גאנצע צער, אז דו האסט נישט זוכה געווען צו זיין ביים רבי'ן אויף ראש השנה; אנדערע האבן צער פון נארישקייטן, אנדערע האבן בכלל נישט קיין ווילן צו זיין ביים רבי'ן; פון דעם אליין דארפסטו זיך זייער פרייען, אז דו האסט ווייטאג פון דעם אז דו האסט נישט געקענט אנקומען די יאר צום הייליגן רבי'ן אויף ראש השנה.

מיט דעם בעט איך דיר זייער דו זאלסט זיך מוסר נפש זיין צו זיין פרייליך. דער רבי זאגט דאך (לקוטי מוהר"ן חלק א', סימן סו), דער עיקר איז די ווילן; ווי מער מען גליסט און מען וויל טון גוטס - איז מען זוכה צו דעם, און דו קענסט זיין זיכער אז דער אייבערשטער רעכנט דיר דיין ווילן, דיין בענקשאפט, דיין גליסטעניש - כאילו דו האסט דאס געטון, און חס ושלום טראכטן שלעכט און זיין דערביטערט.

הייב שוין אן מיט תפילות און געבעט פאר קומענדיגע יאר, דו זאלסט זוכה זיין צו זיין אין אומאן ראש השנה. דאווען יעדן טאג אויף דעם, בעט דעם אייבערשטן דו זאלסט קענען צעברעכן די שווערע מניעות.

דער עיקר זאלסטו זיין פרייליך, זיי זיך מוסר נפש צו זיין פרייליך, בעט די תפילה יעדן טאג: "רבונו של עולם העלף מיר איך זאל זיין פרייליך און איך זאל שפירן די שמחה אין אלע מיינע אברים, פון קאפ ביז פיס; ביז איך וועל זיין אזוי פרייליך אז איך וועל אנהויבן טאנצן פון גרויס פרייד אויף די גרויסע חסד אז דו האסט מיך באשאפן א איד און מיר געגעבן די הייליגע מצוות.

איך בעט דיר הייליגער באשעפער, האב רחמנות אויף מיר און נעם אוועק פון מיר די ביטערקייט און פוילקייט, איך זאל נאר זיין פרייליך און פרייליך מאכן אנדערע, און בזכות שמחה זאל איך זוכה זיין צו נכלל ווערן אינגאנצן אין דיר, איך זאל מער נישט זען פאר מיינע אויגן נאר דיך באשעפער, איך זאל זען און שפירן ווי דו ביסט אלעס און עס איז מער גארנישט דא אויף די וועלט נאר דו אליינס, און זוכה זיין צו תשובה שלימה, מעתה ועד עולם אמן סלה".

א פרייליכן שבת.

בעזרת ה' יתברך

יום ג' פרשת נח, כ"ט תשרי, שנת תשפ"ו לפרט קטן

מרת ... תחי'

איר ווייסט אז דער רבי האט געהייסן געבן שאטס, דער רבי האט געזאגט ווער עס געבט נישט קיין שאטס איז א רוצח, און ווי איר ווייסט איז יעצט אין ארץ ישראל דא די קרענק פון מיזעלס, און נארישע פאר'עקשנ'טע מענטשן געבן נישט די שאטס, און עס איז דא נעבעך קינדער וואס גייען אויס פון די מחלה.

עס איז מיר א וואונדער אז אלעס נעמט מען אן פון רבי'ן, און ביי דער זאך ווערט מען קלוגער פון רבי'ן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ג' פרשת נצבים, כ"ג אלול, שנת תשפ"ה לפרט קטן

מרת ... תחי', מנהלת בית פיגא בני ברק

איך האב ערהאלטן אייער בריוו.

ווען א פרוי פרעגט אייך א שאלה אין צניעות איז גרינגער צו זאגן ווי פאר איינער וואס פרעגט נישט, ווייל אז מען פרעגט - איז שוין א סימן אז מען וויל הערן און מען איז גרייט אנצונעמען.

מיט דעם דארף מען וויסן אז מען דארף מיט גיין מיט יענעמ'ס מח און מיט יענעמ'ס געפילן. דאס בעסטע איז אז מען העלפט יענעם טראכטן, מען שמועסט אויס מיט יענעם. למשל מען פרעגט: "דאס איז נישט אביסל צו אויפפאלנד? דאס איז נישט אביסל צו קורץ?" דאס הייסט מען שמועסט מיט יענעם, מען פרעגט יענעם, אזוי ווי לאמיר הערן אויך דיין מיינונג, און אז יענער ענטפערט 'איך זע נישט וואס איז שלעכט מיט דעם וכו'' זעט מען אז יענער איז נאכנישט גרייט.

מען דארף אסאך בעטן דעם אייבערשטן מען זאל רעדן נאר צו אויערן וואס הערן. אזוי ווי דער הייליגער רבי ברענגט דעם לשון הזוהר: "זַכָּאָה מַאן דְּמַלִּיל עַל אוּדְנִין דְּשָׁמְעִין", וואויל איז דעם וואס רעדט צו אויערן וואס הערן.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ג' פרשת נצבים, כ"ג אלול, שנת תשפ"ה לפרט קטן

מרת ... תחי'

די זאך פון איבער טראכטן נאכן פרעגן שאלות איז א שרעקליכע יצר הרע, דאס האט נישט מיט אידישקייט, דאס האט נישט מיט קדושה, דאס האט מיט די יצר הרע וואס וויל צעברעכן; ווייל אז מען האט געטון וואס מען דארף טון, מען האט געפרעגט ביים רב אדער דיין - טאר מען מער נישט איבער טראכטן.

בעטס דעם אייבערשטן איר זאלט זוכה זיין צו זיין פרייליך, וועט איר האבן גוטע מחשבות. דער הייליגער זוהר זאגט (תיקון כב, דף סז.): "וְאַתְוָון בְּשִׂמְחָ"ה אִיהִי מַחֲשָׁבָ"ה", מחשבה איז די זעלבע אותיות פון בשמחה; דורך זיין פרייליך קען מען האבן גוטע מחשבות. אזוי דער רבי זאגט (לקוטי מוהר"ן חלק ב', סימן י): "עַל יְדֵי מָרָה שְׁחוֹרָה" ווען א מענטש איז נישט פרייליך, "אִי אֶפְשָׁר לְהַנְהִיג אֶת הַמֹּחַ כִּרְצוֹנוֹ" איז אים זייער שווער צו קענען טראכטן נארמאל, "וְעַל כֵּן קָשֶׁה לוֹ לְיַשֵּׁב דַּעְתּוֹ" מען קען נישט טראכטן גוט, די קאפ לויפט נעגעטיוו, "רַק עַל יְדֵי הַשִּׂמְחָה יוּכַל לְהַנְהִיג הַמֹּחַ כִּרְצוֹנוֹ, וְיוּכַל לְיַשֵּׁב דַּעְתּוֹ, כִּי שִׂמְחָה הוּא עוֹלָם הַחֵרוּת" אבער ווען א מענטש איז פרייליך, דעמאלט קען ער טראכטן גראד וכו'; ווייל ווען מען איז פרייליך איז דער מח ברייט אפן און נישט מצומצם.

 בעטס דעם אייבערשטן יעדן טאג די תפילה:

"רבונו של עולם העלף מיך איך זאל זיין פרייליך, ביז איך זאל זיין אזוי שטארק פרייליך, איך זאל דיך שפירן אין אלע מיינע ביינער און אין אלע מיינע אדערן, די שמחה וועט קומען צו מיינע פיס און איך וועל טאנצן יעדן טאג פון גרויס שמחה אויף די גרויסע חסדים אז איך בין איד און אז איך קען טון דיינע מצוות.

אנא השם איך בעט דיר אייבערשטער, הרחק ממני את העצבות והעצלות, נעם אוועק פון מיר די דערביטערטקייט און די פוילקייט, העלף מיר איך זאל יעדן טאג רעדן מיט אנדערע פון דאס גרויסקייט פון שמחה, איך זאל זוכה זיין צו קענען פרייליך מאכן אנדערע, און אזוי וועל איך אליין זוכה זיין צו זיין פרייליך, און בזכות וואס איך וועל זיין אזוי שטארק פרייליך וועל איך נכלל ווערן אין דיר, ביז איך וועל קומען צו זען נאר דיך, איך וועל גארנישט זען נאר דיך.

העלף מיר הייליגער באשעפער איך זאל זוכה זיין צו האבן א קלארע לויטערע ריינע אמונה, איך זאל געדענקען אז עס איז גארנישט דא נאר דו באשעפער, און זיי מיר מוחל אלע מיינע עבירות, און איך זאל גארנישט וועלן נאר זיין מיט דיר, אמן סלה".

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ד' לסדר כי תבוא לאומאן, י"ז אלול, שנת תשפ"ה לפרט קטן

מרת ... תחי'

נעמט זיך פאר צו האלטן די גוטע קבלה פון פאריאר, צו מאכן עפעס א גוטע עסן לכבוד שבת, מען דארף נישט נעמען א נייע פרישע גוטע קבלה. נעמט זיך פאר דאס וואס איר האט זיך פארגענומען פאריאר; מאכט עפעס א גוטע עסן לכבוד שבת, מאכט עס מיט שמחה, דער רבי זאגט מאכן עסן פאר שבת איז א תיקון פאר אלעס.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ד' פרשת כי תצא, י' אלול, שנת תשפ"ה לפרט קטן

... נרו יאיר

איך האב ערהאלטן דיין בריוו.

טוסט נישט גוט אז דו ווערסט בכעס און דו דערשרעקסט איר, נישט אזוי האט אונז מוהרא"ש געלערנט; מוהרא"ש האט אונז געלערנט אז חינוך איז פארשטיין דאס קינד, דיין טאכטער פון פינף יאר וויל אויפמערקזאמקייט, זי זעט ווי מען געבט די גאנצע ליבשאפט פאר די בובאלעך, דאס מאכט איר זי זאל נעמען די צומי וכו'.

ווער נישט בכעס און סטראשע נישט וכו', ווען דו זעסט דיין טאכטער נעמט אוועק די צומי פון די בעבי זאלסטו איר געבן ווארעמקייט און איר אויסלויבן און אויסרימען אז זי איז אזוי וואויל און אזוי גוט, וועסטו זען ווי זי וועט פון זיך אליין צוריק געבן די צומי און זי וועט העלפן מיט די קינדער.

שרייען און סטראשען דאס איז נישט די אידישע וועג, דאס איז נערווען און פארלוירנקייט; ווארעמקייט און ליבשאפט - דאס איז חינוך.

איך דארף מקצר זיין, די בחורים ווארטן, איך דארף זיי געבן א שיעור.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ה' פרשת שופטים, ד' אלול, שנת תשפ"ה לפרט קטן

לכבוד ... נרו יאיר

פאר עלטערן איז א מצוה צו פארציילן, און בזכות די מצוה פון פרייליך מאכן עלטערן וועט מען האבן שמירה, עס וועט נישט שאטן קיין שלעכטע אויג.

פאר חברים און פאר די ווייב'ס חבר'טעס איז נישט כדאי צו דערציילן כדי עס זאל נישט שאטן קיין עין הרע, אבער פאר א מאמע וואס שטייט און ווארט צו הערן גוטע בשורות, און טאג און נאכט איז זי מתפלל פאר די קינדער זאלן געהאלפן ווערן - זיי דארף מען פרייליך מאכן, און עס וועט נישט שאטן, שומר מצוה לא ידע דבר רע.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ה' פרשת שופטים, ד' אלול, שנת תשפ"ה לפרט קטן

לכבוד ... נרו יאיר

אזוי איז אין די וועלט, מען מיינט אלץ אז יענעמ'ס גראז איז גרינער; דער וואס וואוינט דא וויל גיין דארט און דער וואס וואוינט דארט - וויל קומען דא.

דו בעט דעם אייבערשטן אז דו זאלסט זוכה זיין צו זיין אן ערליכער איד, עס האט נישט מיט די פלאץ, עס האט מיט דעם מענטש. אזוי ווי דער רבי האט געאגט (לקוטי מוהר"ן חלק ב', סימן נו), א אידישע הארץ טראכט נישט 'דארט איז בעסער, דא איז בעסער', א אידיש הארץ ווייסט אז איבעראל איז דער אייבערשטער.

עס זענען דא צעבראכענע הערצער וואס ליידן וכו' און ווען זיי ליינען און הערן וכו' ווי פרייליך עס איז דא אין שטעטל, טראכטן זיי אז זייער ביטערניש וועט נעלם ווערן וכו'; דאס איז נאריש, ווייל וואו מען געפינט זיך נאר - קען מען זיין פרייליך און מצליח זיין.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום א' פרשת כי תצא, ז' אלול, שנת תשפ"ה לפרט קטן

מרת ... תחי'

עס דארף אייך נישט שטערן די זאכן, און זיכער נישט צעמישן; קוקט נישט אויף אנדערע, און עס זאל אייך נישט שטערן וואס אנדערע טוען.

וויסן זאלט איר, נישט אלעס קען מען זען פון אינדרויסן, עס זענען דא צעבראכענע הערצער, עס זענען דא פרויען וואס גייען אריבער וואס זיי גייען אריבער, און ווען זיי קומען אין שול און זעען דעם מענטש וואס געבט זיי חיזוק – עפנט זיך זייער הארץ צום אייבערשטן, זיי הייבן אן זיך מתבודד זיין וכו'; דאס דארף אייך נישט מבלבל זיין.

דאס איז נישט קיין נייע זאך, איך האב געהערט פון מיין באבע רחל לאה טייטלבוים עליה השלום, נאכן קריג ווען דער הייליגער סאטמער רבי זכותו יגן עלינו האט אריינגעבלאזן א רוח חיים אין די עצמות יבשות, זיי האבן באקומען אזויפיל חיזוק פונעם צדיק, אז זיי פלעגן שטיין אין ווייבער שול און קוקן שעות אויף שעות אויפן רבי'ן. וועט איר פרעגן, וואס איז דא צו קוקן וכו'? אבער אז א מענטש האט געטראפן א רבי וואס געבט רוח חיים, קען מען דאס פארשטיין, אזוי אויך היינט אן א מלחמה זענען דא צעבראכענע הערצער, און דאס קומען אין שול מיט האלטן דאס דאווענען, דאס זינגען, דאס רעדן, און אפילו נאר קוקן – געבט רוח חיים, א לעבעדיגע גייסט.

זייט זיך נישט מבלבל פון קיינעם, טוט וואס איז גוט פאר אייך. אז איר דארפט חיזוק, ווארעמקייט, נאנטקייט צום אייבערשטן, און אין שול באקומט איר דאס – זאלט איר קומען, און נישט קוקן רעכטס, נישט לינקס; טוט וואס איז גוט פאר אייך.

בכלל זאלט איר זיך אזוי אויסשטעלן אייער לעבן, צו קוקן וואס איז גוט פאר אייך, נישט קוקן אויף אנדערע.

שטארקט זיך און גייט אן מיט אייער הייליגע ארבעט פון זיין א מאמע פאר אייערע קינדער, און א ווייב.

בעזרת ה' יתברך

יום א' פרשת כי תצא, ז' אלול, שנת תשפ"ה לפרט קטן

... תחי'

איך האב ערהאלטן די פראגע.

די גרעסטע זאך און די הייליגסטע זאך פאר אידישע מאמעס – איז צו זיין א מאמע פאר די קינדער, און א ווייב פארן מאן. חכמינו זכרונם לברכה זאגן (ברכות יז.): "נָשִׁים בְּמַאי זָכְיָן", וואס איז די חשוב'סטע און הייליגסטע זאך פאר פרויען? "בְּאַקְרוּיֵי בְנַיְהוּ לְבֵי כְנִשְׁתָּא, וּבְאַתְנוּיֵי גֻבְרַיְהוּ בֵּי רַבָּנַן, וְנָטְרִין לְגֻבְרַיְהוּ עַד דְּאָתוּ מִבֵּי רַבָּנַן", דאס אויפציען קינדער צו לערנען תורה און אפווארטן דעם מאן און אים אפהיטן.

זאגן תהילים איז זייער גרויס, תיקון הכללי, שמות הצדיקים איז זייער גרויס, אבער דאס איז ווען מען קען אביסל זיך אפרוען פון די ארבעט מיט די קינדער און מאן, דעמאלט איז א גרויסע זאך צו זאגן תיקון הכללי און שמועסן מיטן אייבערשטן, אים דאנקען און לויבן און בעטן אויף ווייטער.

דער עיקר זייט פרייליך אז איר זענט אויסדערוועלט צו זיין א אידישע מאמע, ברענגען דורות פארן אייבערשטן.

בעזרת ה' יתברך

יום א' פרשת כי תצא, ז' אלול, שנת תשפ"ה לפרט קטן

לכבוד ... נרו יאיר

וואס זאל איך דיר זאגן, נישטא קיין גרעסערע זאך ווי קומען קיין אומאן זיין ראש השנה ביים רבי'ן. דער רבי האט געזאגט (חיי מוהר"ן, סימן תג): "הָרֹאשׁ הַשָּׁנָה שֶׁלִּי עוֹלֶה עַל הַכֹּל, וְהָיָה פֶּלֶא אֶצְלִי מֵאַחַר שֶׁהַמְּקֹרָבִים שֶׁלִּי מַאֲמִינִים לִי, וְלָמָּה לֹא יִזָּהֲרוּ כָּל הָאֲנָשִׁים הַמְקֹרָבִים אֵלַי, שֶׁיִּהְיוּ כֻּלָּם עַל רֹאשׁ הַשָּׁנָה, אִישׁ לֹא יֵעָדֵר, כִּי כָּל עִנְיָן שֶׁלִּי הוּא רַק רֹאשׁ הַשָּׁנָה", מיין גאנצע זאך איז ראש השנה און עס איז מיר א וואונדער פארוואס מיינע מענטשן וואס גלייבן אין מיר, זאלן נישט רעדן צו אלעמען אז מען זאל קומען צו מיר אויף ראש השנה, "וְהִזְהִיר לַעֲשׂוֹת כְּרוּז, שֶׁכָּל מִי שֶׁסָּר אֶל מִשְׁמַעְתּוֹ וּמְקֹרָב אֵלָיו יִהְיֶה עַל רֹאשׁ הַשָּׁנָה אֶצְלוֹ לֹא יֶחְסַר אִישׁ, וּמִי שֶׁזּוֹכֶה לִהְיוֹת עַל רֹאשׁ הַשָּׁנָה רָאוּי לוֹ לִשְׂמֹחַ מְאֹד מְאֹד", דער רבי האט געהייסן מען זאל מאכן א כרוז, אז אלע זאלן קומען צו זיין ראש השנה.

מיט דעם זאג איך דיר, אויב מען וויל דיך באצווינגען צו זיין אין די טריפה'נע מיליטער ביי די ערב רב, זיי האבן דיר ארויפגעלייגט א פארבאט ארויס צו פארן פון לאנד, און אז דו וועסט גיין אין עירפארט וועט מען דיך לייגן אין תפיסה, דו וועסט נישט האבן קיין שופר, קיין מנין ראש השנה, איז זיכער דו זאלסט נישט גיין, ווייל דער זעלבער רבי וואס זאגט מען זאל קומען צו אים אויף ראש השנה, דער זעלבער רבי זאגט (שיחות הר"ן, סימן נא): "גַּם בִּתְמִימוּת אָסוּר לִהְיוֹת שׁוֹטֶה", א שוטה טאר מען נישט זיין; איז זיכער אז אויב וועט מען דיך לייגן אין תפיסה זאלסטו נישט פרובירן צו קומען.

דער אייבערשטער זאל העלפן זאלסט האבן הצלחה אין אלע עניינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ה' פרשת שופטים, ד' אלול, שנת תשפ"ה לפרט קטן

לכבוד ... נרו יאיר

אזוי איז אין די וועלט, מען מיינט אלץ אז יענעמ'ס גראז איז גרינער; דער וואס וואוינט דא וויל גיין דארט און דער וואס וואוינט דארט - וויל קומען דא.

דו בעט דעם אייבערשטן אז דו זאלסט זוכה זיין צו זיין אן ערליכער איד, עס האט נישט מיט די פלאץ, עס האט מיט דעם מענטש. אזוי ווי דער רבי האט געאגט (לקוטי מוהר"ן חלק ב', סימן נו), א אידישע הארץ טראכט נישט 'דארט איז בעסער, דא איז בעסער', א אידיש הארץ ווייסט אז איבעראל איז דער אייבערשטער.

עס זענען דא צעבראכענע הערצער וואס ליידן וכו' און ווען זיי ליינען און הערן וכו' ווי פרייליך עס איז דא אין שטעטל, טראכטן זיי אז זייער ביטערניש וועט נעלם ווערן וכו'; דאס איז נאריש, ווייל וואו מען געפינט זיך נאר - קען מען זיין פרייליך און מצליח זיין.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ה' פרשת שופטים, ד' אלול, שנת תשפ"ה לפרט קטן

לכבוד ... נרו יאיר

פאר עלטערן איז א מצוה צו פארציילן, און בזכות די מצוה פון פרייליך מאכן עלטערן וועט מען האבן שמירה, עס וועט נישט שאטן קיין שלעכטע אויג.

פאר חברים און פאר די ווייב'ס חבר'טעס איז נישט כדאי צו דערציילן כדי עס זאל נישט שאטן קיין עין הרע, אבער פאר א מאמע וואס שטייט און ווארט צו הערן גוטע בשורות, און טאג און נאכט איז זי מתפלל פאר די קינדער זאלן געהאלפן ווערן - זיי דארף מען פרייליך מאכן, און עס וועט נישט שאטן, שומר מצוה לא ידע דבר רע.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.