תוכן השאלה
לכבוד דער ראש ישיבה שליט"א,
איך וויל זיך נאכאמאל באדאנקען פאר די שיעורים און די עצות, עס איז גאר אנדערש די לעבן ווען מען ווייסט פונעם תכלית.
עס איז דא אן ענין אין וואס איך בין שטארק צעמישט, און איך האף אז דער ראש ישיבה שליט"א וועט מיר קענען ענטפערן און אויסקלארן.
איך בין אויפגעוואקסן מיט א שטארקע ביטול צו דאקטוירים און צו די אלגעמיינע אנגענומענע מיינונג אין געזונטהייט. איידער איך בין מקורב געווארן פלעג איך רופן א פרוי וואס היילט דורך ענערגיע, איך פלעג איר אלץ רופן ווען איך אדער די קינדער האבן נישט גוט געשפירט, זי פלעגט מיר זאגן וואס צו געבן און וואס צו טון, און פארשטייט זיך זי האט געבעטן אסאך געלט פאר דעם.
היינט קען איך שוין נישט רופן קיין ענערגיע פרויען, איך האב אבער אויך נישט אנגעהויבן פלוצלינג צו גלויבן אין די אלגעמיינע דאקטוירים. פארשטייט זיך אז ווען א קינד שפירט נישט גוט בעט איך אסאך דעם אייבערשטן, אבער למעשה דארף איך דאך האבן אחריות אויפ'ן קינד, און דא בין איך זייער צעמישט, וויפיל איז די ריכטיגע באלאנס וואס און וויפיל צו טון.
זאל איך געבן וויטאמינען? און אויב יא, וויפיל און ווי אפט? איז גוט צו גיין צו א קייראפראקטאר? זאל איך טראסטן דעם דאקטער בלינדערהייט אלעס וואס ער זאגט? ווי פרי זאל איך אנהויבן געבן וואקסינען פאר די קינדער? איך בין זייער דערשראקן פון דעם, דער ראש ישיבה שליט"א דארף פארשטיין אז פאר צוואנציג יאר אין א צי האלט איך אין איין הערן ווי שעדליך עס איז.
יעצט אז איך בין ביים רבי'ן, איך הער די שיעורים פונעם ראש ישיבה שליט"א, און איך וויל פאלגן, דארף איך אביסל חיזוק און הדרכה אין די אלע זאכן. אויך וויל איך בעטן א ברכה פאר מיין בעבי וואס האט געהאט די פלו, אבער זי איז נאכאלץ נאכגעלאזט פון דעם.
איך האף דער ראש ישיבה שליט"א וועט מיר קענען געבן די ריכטיגע שכל וואס איך דארף צו טון.
יישר כח
תשובה מאת הראש ישיבה שליט"א:
יום ג' פרשת ויקהל, י"ח אדר, שנת תשפ"ה לפרט קטן
מרת ... תחי'
איך האב ערהאלטן אייער בריוו.
זייט אייך נישט מבלבל פון די זאכן, דער עיקר ביים רבי'ן איז שמחה און תפילה והתבודדות, די צוויי זאכן זענען די צוויי שטריקן אין וואס מען דארף זיך אנכאפן נישט אראפצופאלן. אזוי זאגט מוהרא"ש, דאס וואס דער רבי זאגט (לקוטי מוהר"ן חלק ב', סימן מח): "דַע", זאלסט וויסן, "שֶׁהָאָדָם צָרִיךְ לַעֲבֹר עַל גֶּשֶׁר צַר מְאֹד מְאֹד", יעדער מענטש דארף אריבערגיין זייער א שמאלער בריק, דער לעבן איז ווי א שמאלער בריק, און מען קען יעדע סעקונדע אראפטראסקען אין א טיפע אפגרונד, "וְהַכְּלָל וְהָעִקָּר שֶׁלֹּא יִתְפַּחֵד כְּלָל", דער עיקר איז מען זאל נישט מורא האבן; זאגט מוהרא"ש, ווי אזוי קען מען טאקע אריבערגיין דעם שמאלן בריק אן קיין שרעק? דורך זיך אנכאפן אין די צוויי שטריקן, "שמחה" און "התבודדות"; פון איין זייט האט מען די פרייד "שלא עשני גוי", מען פרייט זיך אז מען איז א אידיש קינד, א קינד ביים אייבערשטן, און די צווייטע שטריק - אז מען האט התבודדות, מען רעדט צום אייבערשטן אזוי ווי מען רעדט צו א גוטער פריינד, יעדע זאך שמועסט מען מיט אים.
וויל איך אייך בעטן איר זאלט זיך נישט פארדרייען דעם קאפ מיט די אלע נארישקייטן וכו', אז מען שפירט זיך נישט גוט, אדער א קינד שפירט זיך נישט גוט - זאלט איר בעטן דעם אייבערשטן און טון וואס די תורה זאגט, גיין צום דאקטער, און אז דער דאקטער פארשרייבט מעדעצין נעמט מען מעדעצין. דער רבי האט בפירוש געזאגט, אז מען דארף גיין צום דאקטער זאל מען נעמען א דאקטער וואס איז א מומחה אין די זאך וואס מען גייט צו אים, און מיט תפילה זעט מען ישועות. אזוי ווי חכמינו זכרונם לברכה זאגן (ויקרא רבה ל, ג): "בַּדּוֹרוֹת הַלָּלוּ", אין די היינטיגע טעג, "שֶׁאֵין לָהֶם לֹא מֶלֶךְ", וואס מיר האבן נישט קיין קעניג, "וְלֹא נָבִיא", און מיר האבן נישט קיין נביא, "לֹא כֹהֵן", מיר האבן נישט קיין כהן, "וְלֹא אוּרִים וְתֻמִּים", און נישט קיין אורים ותומים, "וְאֵין לָהֶם אֶלָּא תְּפִלָּה זוֹ בִּלְבָד", מיר האבן נאר תפילה, "אָמַר דָּוִד לִפְנֵי הַקָּדוֹשׁ בָּרוּךְ הוּא רִבּוֹנוֹ שֶׁל עוֹלָם אַל תִּבְזֶה אֶת תְּפִלָּתָם", אויף אונז בעט דוד המלך 'רבונו של עולם, נעם אן די תפילות פון אידישע קינדער'.
אויף די זאך פון ענערדזשי, זאלט איר וויסן אז דאס איז א דמיון, און דער וואס גייט אריין אין די דמיון הויבט אן דמיונ'ען אז מען ווערט אויסגעהיילט, אבער באמת איז דאס הבל הבלים. אנשטאט גלייבן אין דמיונות - דארף מען גלייבן אינעם אייבערשטן, און אז מען גלייבט אינעם אייבערשטן ווערט מען באמת אויסגעהיילט, און ווען מען הויבט אן רעדן צום אייבערשטן - איז מען זוכה צו אמונה און צו שמחה, און דאס איז די רפואה.
דער אייבערשטער זאל העלפן איר זאלט האבן הצלחה אין אלע ענינים.