בריוון פונעם ראש ישיבה שליט"א

בעזרת ה' יתברך - יום ב' פרשת מקץ, כ"ה כסליו, א' דחנוכה, שנת תשפ"ו לפרט קטן

לכבוד יצחק פאפנהיים נרו יאיר, מנהל מוסדות היכל הקודש בארץ הקודש

איך וויל דיר בעטן זאלסט מסדר זיין, צאמנעמען אלע תלמידים פון די מוסדות, סיי פון ירושלים, בני ברק און פון טבריה, זיי זאלן פארן זאת חנוכה קיין טבריה צום קבר רבי מאיר בעל הנס מתפלל זיין.

זאת חנוכה איז זייער א הייליגע צייט, עס שטייט פון הייליגע צדיקים אז זאת חנוכה איז די גמר פון אלע תיקונים. אלע תפילות און אלע מצוות פון חודש אלול, סליחות, ראש השנה, עשרת ימי תשובה, יום הקדוש, סוכות, הושענא רבא, שמיני עצרת און שמחת תורה; ווען עס קומט זאת חנוכה - דעמאלט ווערט די גמר פון אלע תיקונים.

איך וויל דו זאלסט זיך פארבינדן מיט ר' אהרן וועבערמאן, נעמען פון אים די נעמען פון די אלע תומכים וואס געבן זייער נדבה פאר אונזערע מוסדות אין ארץ הקודש, און די קינדער זאלן מתפלל זיין פאר זיי.

איך וועל שרייבן פאר ר' אהרן זאל דיר שיקן די נעמען מיט די בקשות פאר אלע וואס זענען מזכיר טעגליך דעם צדיק'ס נאמען און געבן צדקה פאר רבי מאיר בעל הנס, און בעטן יעדע מאל ביים געבן צדקה אלקא דמאיר ענני.

שטארק זיך מיט דיין הייליגע ארבעט; די שווערע געפילן וכו' - דאס האבן אלע וואס ארבעטן בנאמנות; נאר די וואס ארבעטן מיט אן אמת האבן די מחשבות וכו' וכו'.

בנוגע קומען קיין ארץ ישראל; איך וויל זייער שטארק קומען, איך האף צו קומען, איך וועל דיר מודיע זיין בקרוב אויב איך קום.

דער אייבערשטער זאל העלפן זאלסט האבן הצלחה אין אלע ענינים.

א פרייליכן חנוכה.

בעזרת ה' יתברך - יום ב' פרשת מקץ, כ"ה כסליו, א' דחנוכה, שנת תשפ"ו לפרט קטן

לכבוד אהרן וועבערמאן נרו יאיר, גבאי צדקה מוסדות רבי מאיר בעל הנס

ביטע זיך פארבינדן מיטן מנהל המוסדות אים איבערגעבן די נעמען פון אלע תומכים וואס העלפן די מוסדות אין ארץ ישראל, און ער וועט נעמען די קינדער קיין טבריה מתפלל זיין פאר די אלע ביים קבר פון רבי מאיר בעל הנס; און אז די תומכים ווילן מען זאל בעטן פאר א ספעציעלע זאך זאלסטו דאס איבערגעבן פארן מנהל און די קינדער וועלן דאווענען פאר זיי.

שטארק זיך מיט דיין הייליגע ארבעט. עס איז נישט קיין גרינגע ארבעט, און אודאי וועסטו האבן אסאך מניעות מיט חלישות הדעת; ווייל ווען עס קומט צו טון פאר הייליגע זאכן דעמאלט גייט עס מיט שוועריקייטן. זאלסטו זיך נישט לאזן צעברעכן, אדרבה זאלסט נעמען פון דעם חיזוק אויף ווייטער אנצוגיין, ווייל איך האב געהערט פון מוהרא"ש וואס האט געהערט פון ר' אליהו חיים רוזין זכרונו לברכה וואס האט דאס געהערט פון הצדיק רבי אברהם בן רבי נחמן זכר צדיק לברכה, (וואס יעצט, די פיפטע טאג חנוכה איז זיין יארצייט): "א זאך וואס קומט אן גרינג איז מען חושש אז דאס קומט פון די נישט גוטע, פון די סטרא אחרא, ווייל א גוטע זאך קומט אן שווער"; די ווערטער איז זייער גרויסע חיזוק פאר אלע וואס טוען מיט הייליגע זאכן.

דער אייבערשטער זאל העלפן זאלסט האבן הצלחה אין אלע ענינים.

א פרייליכן חנוכה.

בעזרת ה' יתברך - יום ב' פרשת מקץ, כ"ה כסליו, א' דחנוכה, שנת תשפ"ו לפרט קטן

אהרן נרו יאיר, גבאי מוסדות היכל הקודש בארץ ישראל

דער מנהל שלמה מינצבערג האט מיר געשריבן היינט אז עס פעלט אים עטליכע דרייסיג טויזנט דאלער צו קענען באצאלן די איינגעשטעלטע דעם חודש כסליו. וויל איך דיר בעטן זאלסט זיך שטארקן און שטארקן אנשי שלומינו צו העלפן די הייליגע מוסדות, מען זאל קענען צאלן די מלמדים און טיטשערס אין צייט.

וויסן זאלסטו, און לאז דאס וויסן פאר אנשי שלומינו, דא אין אמעריקע, די וואס פארדינען ווייניג – באקומען בענעפיטן פון די רעגירונג, געלט פאר עסן, געלט פאר שכר לימוד, געלט פאר הייצונג, געלט פאר רענט וכו', דארט אין ארץ ישראל געבט מען גארנישט, דארט אז מען באקומט נישט די ארעמע געהאלט – האט מען גארנישט, פשוטו כמשמעו.

בכן בעט איך דיר, שטארק זיך און שטארק אנשי שלומינו זאלן העלפן חודש'ליך די מוסדות בארץ הקודש, אז מיר זאלן קענען אנגיין מיט די מוסדות דארט.

אנשי שלומינו זענען ווארעם צו העלפן בויען דעם רבינ'ס מוסדות, מען דארף זיי נאר רופן און זיי מחזק זיין צו געבן.

בעזרת ה' יתברך - יום ד' פרשת וירא, י"ד מרחשון, שנת תשפ"ו לפרט קטן

... נרו יאיר, ירושלים

איך האב ערהאלטן דיין בריוו.

איך הער דיינע טענות, איך וויל דיר זאגן, ערשטנס עס איז נאכנישט געבליבן אז מען פירט אריבער די מוסדות קיין בית שמש. צווייטנס, דאס איז מיין געדאנק, נישט דער מנהל; פארקערט, דער מנהל וויל נישט פארמאכן, דאס האב איך געזאגט, אז וואס איז אנדערש ביי ענק ווי אין אמעריקע, מיר האבן נישט קיין מוסדות אין יעדע צווייטע שטאט, מיר האבן איינס אין צפון און איינס אין מרכז, וואס איז אין ארץ הקודש אנדערש? פארוואס קענען די קינדער נישט פארן אזוי ווי ביי אונז וואס קינדער פארן יעדן טאג א שעה מיט א באס?

איך זאג נישט אז מען גייט טאקע אזוי טון, אבער איך וויל זאלסט פארשטיין וואס דא גייט פאר, פון וואו זאל איך נעמען יעדע חודש זעכציג טויזנט דאלער? וואס איז אזוי געפערליך אז קינדער פארן? יעצט קומען דאך אויך קינדער מיט גרויס שמחה פון בית שמש קיין ירושלים? איז וואס איז אז מען וועט דאס מאכן פארקערט, אז מיר האבן באקומען א פלאץ פאר די חדר און בית פיגא, א גרויסע פלאץ, א פלאץ בהרחבה, איז וואס איז אזוי געפערליך?

דאס איז קלאר אז דו זאלסט האבן הכרת הטוב פארן מנהל וואס געבט זיך אזוי אוועק פאר די קינדער, אים רופן כסדר זיך באדאנקען און אים פרעגן וואס מען קען העלפן. איך וויל הערן פון דער מנהל און פון די אפיס אז דו ביסט פון די וואס זוכן צו העלפן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת נח, כ"ט תשרי, שנת תשפ"ו לפרט קטן

לכבוד מיין טייערער ... נרו יאיר, מנהל מוסדות היכל הקודש בארץ הקודש

איך וויל דיר בעטן, היות די מוסדות אין ארץ ישראל ווערן גרעסער און גרעסער און די ארבעט ווערט נאר מער, זאלסטו מער נישט טראגן דעם עול פון די געלט, דו זאלסט נאר זיין פארנומען מיט די חינוך פון די קינדער, סיי ביי די אינגלעך און סיי ביי די מיידלעך. עס זאל נישט פאסירן, אבער אז עס פאסירט אז עס קומט די צייט וואס מען דארף געבן די געהאלט פאר די איינגעשטעלטע אדער צאלן רענט וכו' און עס איז נישטא קיין געלט - איז דאס נישט דיין זארג, לאז די זארג אויף מיר, ווייל אויב דו וועסט זארגן פאר די געלט, וועסטו נישט האבן קיין ישוב הדעת און סבלנות פאר די קינדער.

מיר ארבעטן זייער שווער צו קענען אוועק שטעלן א קרן אז די מוסדות זאלן זיך קענען אויסהאלטן, אנשי שלומינו העלפן זייער, מער פון זייערע כוחות, און מיטן אייבערשטנ'ס הילף וועלן מיר קענען אנגיין.

די שוועריקייטן דארף אונז געבן חיזוק. ווייל איך האב געליינט אז אמאל איז געקומען ר' יודל ראזענבערג זכרונו לברכה, דער וואס האט געפירט די סאטמערע קעמפס, צום הייליגן סאטמער רבי זכר צדיק לברכה און זייער געקרעכצט אז ער גייט אויפגעבן, ווייל עס איז ממש נישט מעגליך צו גיין ווייטער, ער האט געזאגט עס איז אזוי שווער ער קען נישט מער אנגיין, דער רבי האט אים אויסגעהערט און געטראכט און געטראכט, און דער רבי זאגט אים: "ווייסט וואס איך וועל דיר זאגן, ווען עס וואלט געווען גרינג דארף איך עס נישט", א הייליגע זאך קומט אן זייער זייער שווער, מוהרא"ש האט מיר דאס אויך כמה פעמים געזאגט: "איך זע ווי שווער עס גייט ענק ווייס איך אז דאס איז פון די קדושה".

נאך א זאך וואס מוהרא"ש פלעגט מיר אלץ זאגן ווען מיר זענען געקומען זאגן אז עס איז נישטא קיין געלט, מען צאלט נישט די מלמדים און די איינגעשטעלטע; האט מוהרא"ש אלץ געזאגט: "נעם די קינדער זיי זאלן מתפלל זיין, די קינדער זענען ריין זייערע תפילות זענען זייער חשוב", און דאס פלעגן מיר טון און דאס טוען מיר נאכאלץ, די מלמדים בעטן יעדן טאג מיט די קינדער אין אידיש תפילות אז די מוסד זאל האבן געלט צו באצאלן די איינגעשטעלטע און קענען אנגיין אן קיין שום שטערונג. זאלסטו דאס אויך טון, בעט די מלמדים זאלן בעטן יעדן טאג מיט די קינדער פאר די מוסד אז מיר זאלן קענען אנגיין מיט אונזער תיבת נח, א פלאץ פאר אונזערע קינדער נישט צו ווערן פארשוועמט מיט די מבול.

אויך יעדע מאל דו גייסט קיין טבריה צו די חדר און צו בית פיגא זיי אזוי גוט און גיי צו מוהרא"ש צום ציון און בעט פאר מיר יואל בן רייצא רעכיל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת לך לך, ה' מרחשון, שנת תשפ"ו לפרט קטן

... נרו יאיר

איך האב ערהאלטן די נעמען פון אלע וואס געבן חודש'ליך פאר די מוסדות אין ארץ ישראל על טהרת הקודש.

איך האף אם ירצה ה' צו קומען דעם ווינטער צו ענק אויף א באזוך אין ארץ ישראל, איך וועל אם ירצה ה' זיין אין ישיבה, איך וועל באזוכן די חדר מיט בית פיגא, אויך וועל איך מאכן א פריוואטע מסיבה מיט די וואס געבן חודש'ליך פאר די מוסדות אין ארץ ישראל.

שטארק זיך אין לערנען יעדן טאג אכצן פרקים משניות; גיי נישט אריין אין אפיס, הייב נישט אן דיין טאג - נאר נאכן האבן געלערנט ח"י פרקים משניות, משניות וועט דיר געבן א לעבעדיגקייט, משניות וועט דיר געבן א חן, משניות וועט דיך מאכן בענקען צו לערנען נאך און נאך.

געב איבער פאר אלע וואס העלפן מיר אין די מוסד און אין הפצה זיי זאלן נישט מיינען אז זיי זענען פטור פון לערנען שיעורים קבועים על פי סדר דרך הלימוד פון רבי'ן, אלע וואס ווילן זיך האלטן אין היכל הקודש, קודש קדשים - דארפן לערנען יעדן טאג אכצן פרקים משניות און זאגן דעם יום תהלים, די צויי לימודים רייניגן די הארץ און די מח, און אויך בלעטער גמרא.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת שופטים, ד' אלול, שנת תשפ"ה לפרט קטן

לכבוד מיין טייערער ... נרו יאיר

איך האב ערהאלטן די ליסטע פון אלע נעמען וואס האבן געגעבן זייער צדקה פאר די מוסדות אין חודש מנחם אב, איך בין זייער איבערגענומען פון ענק, אזוי שיין, א וואונדער ווי אנשי שלומינו זענען אזוי געטריי פאר די מוסדות.

געב א גרוס פאר אלעמען, זאג זיי איך ווארט זיי אלע צו טרעפן אין אומאן ביים רבי'ן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת עקב, י"ז מנחם-אב, שנת תשפ"ה לפרט קטן

מיין טייערער ... נרו יאיר

מזל טוב פאר דיין געבוירענע מיידל, דער אייבערשטער זאל העלפן זאלסט האבן אסאך נחת פון דעם קינד מיט דיין ווייב אינאיינעם.

איך וויל דיר בעטן זאלסט ווייטער ממשיך זיין מיט העלפן צאמנעמען צדקה פאר אונזערע מוסדות אין ארץ ישראל. ביז יעצט פלעג איך שיקן געלט פון אמעריקע, איך זע נישט איך זאל קענען ווייטער שיקן די געלט, איך וויל די מוסדות זאלן זיך אויסהאלטן פון אנשי שלומינו פון ארץ ישראל. בכן בעט איך דיר זאלסט זיך אריינלייגן מיט די גאנצע הארץ און מח צו העלפן אונזערע מוסדות זאלן קענען אנגיין, מען זאל קענען צאלן די מלמדים אין צייט, און דו זאלסט האבן אזא הצלחה אז דו זאלסט קענען שיקן קיין אמעריקע, ווייל דא האט מען נישט געצאלט די מלמדים און אויך די טיטשערס מיט די איינגעשטעלטע, אין אפיס איז מען שוין שולדיג פון פסח.

זיי מחזק אנשי שלומינו אין ארץ ישראל זיי זאלן געבן די צדקה פאר די מוסדות, זיי זאלן מיר העלפן און זיך אליין העלפן, ווייל אן מוסדות איז גארנישט דא, אז מען קען נישט איבערגעבן פאר די קינדער וואס מוהרא"ש האט אונז געגעבן - וועלן די עלטערן מיט די צייט אפלאזן חס ושלום.

שרייב מיר א באריכט יעדע חודש פון אלע וואס געבן פאר די מוסדות און אלע וואס האלטן אן זייערע התחייבות.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת עקב, י"ז מנחם-אב, שנת תשפ"ה לפרט קטן

לכבוד מיינע טייערע חברי הנהלה פון אונזערע מוסדות היכל הקודש פון ארץ ישראל

איך האב פאר די לעצטע צוויי יאר געשיקט חודש'ליך געלט צו קענען אויפהאלטן אונזערע הערליכע מוסדות היכל הקודש בארץ הקודש על טהרת הקודש, אין אנהויב איז עס געווען קליינע געלטער, צען טויזנט. מיט די צייט איז עס געווארן מער און מער, ביז עס האלט שוין אז איך דארף שיקן חודש'ליך פופציג טויזנט דאלער.

למעשה האב איך פרובירט פון אלע זייטן דאס צו קענען אנהאלטן, יעצט זע איך נישט קיין וועג פון וואו איך קען ווייטער שאפן די געלטער, על כן וויל איך ענק בעטן ענק זאלן איבערנעמען די עול פון שאפן די געלט צו קענען צאלן חודש'ליך די מלמדים און טיטשערס וואס ארבעטן אזוי הארציג און געטריי פאר אונזערע קינדער, זין און טעכטער.

ברוך השם דער געטרייער גבאי און חבר הנהלה ר' אהרן וועבערמאן נרו יאיר האט אוועק געשטעלט די קרן הצלה פאר אונזערע מוסדות וואס נעמען נישט קיין געלט פון די טומאה, מען האט איינגעשפאנט אלע חברים פון ארץ ישראל זאלן געבן זייער צדקה פאר די מוסד, און לויט ווי איך הער פון אים קומט אויס די חשבון אז אויב אלע אינגעלייט וועלן אנהאלטן זייער התחייבות וועלן מיר קענען דעקן חודש'ליך אונזערע מוסדות.

בכן וויל איך ענק זאלן מחזק זיין אנשי שלומינו אז קיינער זאל זיך נישט ארויסדרייען פון געבן די צדקות וואס מען האט זיך מחייב געווען, אזוי וועלן מיר קענען ווייטער אנגיין מיט די מוסדות.

ביי די מוסדות אין חוץ לארץ דארפן מיר אויך רחמי שמים, מען האט נישט געצאלט שוין אפאר וואכן די מלמדים און די טיטשערס, און פאר די אפיס איז מען שוין שולדיג פון פסח, מיר דארפן דא גרויסע ניסים צו קענען ווייטער אנגיין.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ה' פרשת עקב, כ' מנחם-אב, שנת תשפ"ה לפרט קטן

טייערער ... נרו יאיר

שטארק זיך זייער מיט דיין עבודת השם יתברך, און מיטן זיין א גבאי צדקה פאר קופת רבי מאיר בעל הנס פאר אונזערע מוסדות בארץ הקודש על טהרת הקודש.

דאס וואס דו זאגסט אז אנשי שלומינו האבן נישט קיין געפיל צו טהרת הקודש, זיי פארשטייען נישט וואס איז די גרויסקייט פון האבן מוסדות וואס מען נעמט נישט קיין שטיצע פון די ערב רב; לדעתי ביסטו זיך טועה, אנשי שלומינו האבן גאר א שטארקע געפיל צו די מוסדות אין ארץ ישראל, ערשטנס א גרויסע טייל תלמידי היכל הקודש קומען פון סאטמער, מוהרא"ש אליין פלעגט זאגן ביי די שיעורים מיט שטאלץ אז ער איז א סאטמער תלמיד, און אפילו די וואס קומען פון אנדערע קהילות האבן באקומען א געפיל צו דעם פון הערן יארן פון מוהרא"ש איבער די טומאה פון די עירוב רב מיט זייערע רבנים, בפרט די לעצטע צען יאר וואס די מדינה של גיהנום האט געזוכט צו לייגן מוהרא"ש אין תפיסה, זיי האבן געהאט א פלאן צו לייגן מוהרא"ש פאר זעכצן יאר אין תפיסה, און די פרומע וואס זיצן אין כנסת המינים האבן זיך אלע אויסגעלאכט, מען איז זיי געגאנגען בעטן הצילו, ראטעוועט, האבן זיי אלע געלאכט.

לדעתי זענען אנשי שלומינו זייער ווארעם צו דעם, דו האלט אן די הייליגע ארבעט צו קענען אויסהאלטן די מוסדות.

בזכות די גרויסע מצוה זאלסטו האבן אלע ברכות וישועות.

אלקא דמאיר ענינא

בעזרת ה' יתברך - יום ג' פרשת שלח, כ"א סיון, שנת תשפ"ה לפרט קטן

לכבוד מיינע טייערע ליבע חברים תלמידי היכל הקודש פון ארץ ישראל, ה' עליהם יחיו

יעצט ווען עס איז דא די מלחמה מיט איראן דארפן ענק זיך זייער שטארקן אין אמונה, ענק דארפן רעדן אסאך פון אמונה, בעיקר אין שטוב צו די ווייב און קינדער, ווייל נאר אמונה נעמט אוועק די פחדים, נאר אמונה בארואיגט.

איך בעט ענק אלע, געבט אכטונג אויף אייער משפחה, אויף זייער רואיגקייט, אויף זייער פרייליכקייט, און ווען עס גייט אן אלארעם און ענק באשיצן זיך - זאלן ענק פרייליך מאכן די משפחה, זינגען אמונה און מאכן ווערטלעך, ווייל דאס מערסטע וואס שאט פאר די נפש איז די שרעק.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת קרח, כ"ו סיון, שנת תשפ"ה לפרט קטן

לכבוד ... נרו יאיר

מענטשן פרעגן אויב די מלחמה יעצט מיט איראן איז מלחמת גוג ומגוג; וואס זאל איך דיר זאגן, מוהרא"ש האט אונז געזאגט אז די מלחמה פון גוג ומגוג איז אינעם מענטש אליין; אינעם מח, אין הארץ פונעם מענטש. אזוי ווי דער רבי האט פאראויס געזאגט (שיחות הר"ן, סימן לה): "שֶׁהוֹלֵךְ אֶפִּיקוֹרְסוּת גָּדוֹל עַל הָעוֹלָם", פאר משיח וועט קומען וועט אראפקומען א מבול פון כפירות און אפיקורסות.

טייערער ליבער ברודער, איך בעט דיר, קוק נישט קיין שום פאדקעסט, קוק נישט קיין קליפס. ווארף אוועק די טעלעפאן, עס איז א גרויסע סכנה, מען קען אינגאנצן אוועק פאלן. ווער איז דיין רבי? וועם פרעגסטו דיינע שאלות? פרעג אים אויב דו זאלסט האבן דיין טעלעפאון, אדרבה, איך וויל הערן ווי דיין ערליכער איד, דיין מורה דרך - זאגט דיר אז דו קענסט האבן א טעלעפאן, טעבלעט לעפטאפ - וואו מען זעט קליפס, אינטערוויאס, פאדקעסט פון ליצנות און פון כופרים בה'; איך גלייב אז קיין איין דיין וועט דיר דאס מתיר זיין.

אוי וויי, מיין הארץ וויינט ווען איך זע ווי דו ביסט אין א סכנה, אלעס גייט דיר גיין חרוב, אלעס גייט דיר צעפאלן, ווייל דער סמ"ך מ"ם וויל דיך אין דער ערד לייגן, ער וויל דיר אוועק נעמען דיין ווייב, דיין שטוב, דיין גאנצע לעבן, עס איז זייער שרעקעדיג.

דער צדיק רבי אברהם בן רבי נחמן האט געזאגט: "דער סמ"ך מ"ם וויל נישט צונעמען נאר יענע וועלט, ער וויל צונעמען די שיינע זיסע לעבן פון די וועלט", און ווער עס האט אויגן קען דאס זען, ווי שטיבער צעפאלן.

מען הערט אין די נייעס ווי מען קען איינפלאנצן א באמבע אין א טעלעפאן און דער מענטש ווערט גע'הרג'עט, איז דאס פאר מיר א לימוד אז דער טעלעפאן איז א באמבע וואס הרג'ט מיך, עס נעמט אוועק מיין יראת שמים, מיין תמימות, מיין נאאיווקייט.

מען איז פארנומען מיט די נייעס, מיט די מלחמה פון איראן; די מלחמה מיט די טעלעפאן איז סאך א שווערערע מלחמה ווי די מלחמה יעצט מיט איראן, עס איז סאך א גרעסערע סכנה; וויפיל באמבעס פלאצן טאג טעגליך, וויפיל יראת שמים ווערן אוועק גענומען, וויפיל פארלירט מען פון דעם...

עס טוט מיר זייער וויי אז אלעס פרעגסטו מיר און אלעס טוסטו - ביז די טעלעפאן, דאס פארשטייסטו בעסער.

בעזרת ה' יתברך - יום ג' פרשת בהעלותך, י"ד סיון, שנת תשפ"ה לפרט קטן

טייערע חברים פון ארץ ישראל, תלמידי היכל הקודש, ה' עליהם יחיו

איך וויל אייך זייער בעטן ענק זאלן מיר העלפן אוועק שטעלן א קרן הצלה פאר אונזערע מוסדות 'היכל הקודש' 'בארץ הקודש' על 'טהרת הקודש'. ביז דערווייל פרוביר איך אליין - אן קיין הילף פון קיינעם - צו שיקן חודש'ליך פאר די מוסד קרוב צו פופציג טויזנט דאלער, אבער דאס איז נישט ריכטיג, ריכטיג איז אז די מוסד זאל זיך אויפהאלטן אויף אלע אינאיינעם, אלע חברים זאלן טראגן די לאסט פון די מוסדות, עס קען נישט ווייטער אזוי אנגיין.

יעצט איז געקומען דער גבאי אהרן וועבערמאן פון אמעריקע אוועק צו שטעלן די קרן, בעט איך אייך מיינע טייערע ברידער אין ארץ ישראל, נעמט אים אויף בסבר פנים יפות און שליסט אייך אן אין די קרן, געבט ענקער צדקה - מעשר און חומש פאר די קרן, אז די מוסדות זאל קענען ווייטער אנגיין.

ענקער חבר דער ראש ישיבה וואס בענקט זיך נאך אייך.

בעזרת ה' יתברך - יום ה' פרשת בהר-בחוקותי, כ"ד אייר, ל"ט לעומר, שנת תשפ"ה לפרט קטן

... נרו יאיר, יבנאל

איך האב ערהאלטן דיין בריוו.

איך האב זייער יא געוואלט קומען אין יבנאל געבן א שמועס פאר די אינגעלייט, למעשה בין איך געווען זייער אפגעשוואכט, איך האב נישט געהאט די כוחות צו דעם. אויפן וועג פון בני ברק האט מיר דער דרייווער דער גבאי שמעון עוזר אזוי געבעטן איך זאל יא גיין און איך מוז גיין, איך האב אבער נישט געהאט די כח.

איך בעט ענק איבער און אויך זאלסטו איבערגעבן אין שטוב אז איך האב זייער געוואלט קומען, און א דאנק פארן אנגרייטן עסן, און בזכות דאס ווילן און דאס אנגרייטן - דאס אליין וועט ענק ברענגען די ישועה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בהר-בחוקותי, כ"ג אייר, ל"ח לעומר, שנת תשפ"ה לפרט קטן

לכבוד מיין ליבער ... נרו יאיר

איך בין היינט פארטאגס צוריק געקומען פון מיין נסיעה קיין ארץ ישראל, איך האב געבעטן אין ארץ ישראל איך זאל זוכה זיין צו אמונה, ווייל דער רבי זאגט (ליקוטי מוהר"ן חלק א', סימן ז), ארץ ישראל איז מסוגל פאר אמונה, און דאס איז מען נאר זוכה דורך תפילה; ווי מער מען בעט פאר אמונה – אלץ מער און מער ווערט לויטער און קלאר די אמונה.

פאר אלע דיינע שרעק און ענקזייעטי איז דא נאר איין עצה: "אמונה"; חזר'ן אן א שיעור מאל 'דער אייבערשטער איז דא, דער אייבערשטער היט מיך, דער אייבערשטער מאכט אלעס מיט א פינקטליכער חשבון בצדק ובמשפט, בחסד וברחמים'.

קוק נישט קיין מאוויס, יעדע רגע קוקן מאוויס הרג'עט די מח פונעם מענטש, און עס נעמט לאנגע יארן תורה ותפילה ביז מען קען צוריק שטעלן די מח.

אויך הערן נייעס און קוקן נייעס מאכט שווער די מח, עס מאכט ענקזייעטי, עס שעדיגט די רואיגקייט, די שמחה.

איך שרייב דיר דאס ווייל איך ליב דיך.

בעזרת ה' יתברך - יום ג' פרשת אמור, ט"ו אייר, כ"ט לעומר, שנת תשפ"ה לפרט קטן

לכבוד מיין טייערער ... נרו יאיר

איך בין געפארן קיין ארץ ישראל זיין ל"ג בעומר אין מירון ביי התנא אלקי רבי שמעון בר יוחאי, איך בעט אויך פאר דיר און דיין משפחה.

איך שרייב דיר יעצט שפעט אויפדערנאכט, נאכן זיין אויף אפאר טעג מיט גאר ווייניג שלאף, ווייל דו האסט מיר דערציילט נאכן ליל שישי שיעור אז דו האסט אנגעהויבן געבן חודש'ליך זעקס טויזנט שקל פאר די ארץ ישראל'דיגע מוסדות.

וויל איך דיר זאגן, איך בין היינט אינדערפרי געווען אין בני ברק אין חדר און אין בית פיגא, איך בין אן א לשון, איך ווייס נישט ווי אזוי ארויסצוברענגען מיינע געפילן, אביסל וועל איך פרובירן צו דערציילן. סיי די חדר, סיי די סקול פירט זיך זייער שיין, די קינדער זענען זייער פרייליך און צופרידן, אלע שמייכלען, אלע זאגן מיר פה אחד אז זיי האבן ליב צו קומען לערנען, זיי האבן א ליבשאפט צו זייערע רבי'ס און לערערינס, און די חידוש איז אז דאס איז געקניפט און געבינדן מיט א שטארקע דיסציפלין, מיט גרויס דרך ארץ ויראת הכבוד פאר זייערע רבי'ס און לערערינס. אלע דערציילן מעשיות פון בעטן דעם אייבערשטן און ווי זיי זענען געהאלפן געווארן.

דיין זכות איז גרויס, איך דאווען פאר דיין הצלחה.

בעזרת ה' יתברך - יום ג' פרשת אמור, ט"ו אייר, כ"ט לעומר, שנת תשפ"ה לפרט קטן

צו מיין טייערער ... נרו יאיר

איך בין אין ארץ ישראל, איך בין געפארן מתפלל זיין ביי די הייליגע צדיקים, קדושים אשר בארץ המה, און אויך צו מחזק זיין אנשי שלומינו תלמידי היכל הקודש, און אוועק צו שטעלן א פאנד פאר אונזערע מוסדות וואס פירן זיך על טהרת הקודש. איך דאווען פאר דיר און פאר דיין משפחה.

כל זמן מיר זענען דא אויף די וועלט וועלן מיר נישט וויסן און נישט פארשטיין ווי גרויס דער הייליגער רבי איז און דאס גרויסקייט פון זיין כח. אויבן אין הימל וועלן מיר זען דאס גרויסקייט, און דאס גרויסקייט פון די וואס זענען צוגעבינדן צו אים און פאלגן אים, דער רבי זאגט (חיי מוהר"ן, סימן שיד ובהשמטות שם), גרויסע צדיקים זענען מקנא וכו'.

מיר דארפן לערנען זיינע תורות און שיחות, מאך זיך א שיעור אריינצוקוקן יעדן טאג אין די הייליגע בריוו פון אשר בנחל וואס איז צאמגענומען דעם רבינ'ס שכל פאר אונזערע מוחות אויף לעובדא ולמעשה.

בעזרת ה' יתברך - יום ב' פרשת אמור, י"ד אייר, פסח שני, כ"ח לעומר, שנת תשפ"ה לפרט קטן

לכבוד מיין טייערער זון הרב ר' ... נרו יאיר

חסדי השם יתברך איך האב זוכה געווען צו קומען קיין ארץ ישראל מיט מאמי תחי'. מיר זענען ארויסגעפארן נעכטן נאכט און אנגעקומען מאנטאג נאכמיטאג, פסח שני. פון עירפארט זענען מיר געפארן קיין ירושלים. אויפן וועג האבן מיר זיך אפגעשטעלט אין הר המנוחות, מיר זענען געגאנגען מתפלל זיין ביי קברי אבות, ביים זיידן הרב החסיד ר' יצחק דוד פרידמאן עליו השלום, און די באבע רחל פריעדמאן עליה השלום, בת הרב החסיד ר' שלמה גפן עליו השלום. איך האב געבעטן פאר דיר און דיין משפחה. אויך בין איך אריין מתפלל זיין ביים קבר פון הייליגן חיד"א זכותו יגן עלינו, איך האב זיך אביסל אויסגעגאסן דאס הארץ און געוויינט צום אייבערשטן.

פון דארט בין איך געפארן קיין ירושלים צו אונזער שול דאווענען מנחה. ערשט האב איך געכאפט א טבילה, ווען מען פארט אין עירפארט, מען פארט מיט א פליגער דארף מען דאך רחמי שמים, עס איז געפערליך די שמירת עיניים, מען שפירט נישט זיך ביז מען טובל'ט זיך.

מיין ליבער זון, גיי יעדן טאג זיך מתבודד זיין, גיי צווישן די ביימער און גראז און שריי צום אייבערשטן ער זאל דיך מקרב זיין צו אים, דאס שרייען דארף נישט זיין בקול, דער רבי זאגט (שיחות הר"ן, סימן טז), מען קען שרייען שטילערהייט.

איך בין זייער אפגעמאטערט פון די וועג, איך דארף מקצר זיין.

בעזרת ה' יתברך - ערב שבת קודש פרשת תזריע מצורע, ד' אייר, י"ט לעומר, שנת תשפ"ה לפרט קטן

לכבוד מיינע טייערע חברים, תלמידי היכל הקודש פון ארץ ישראל, ה' עליהם יחיו

מיטן אייבערשטנ'ס הילף וועל איך קומענדיגע וואך קומען קיין ארץ ישראל, איך פריי זיך זייער זיך צו טרעפען מיט ענק, איך האף צום אייבערשטן צו קענען אנקומען צו אלע שטעט וואו מיר האבן שולן און צו אלע תלמידי תורה און בית פיגא.

איך וויל ענק אלע לאדענען צו קומען צו די סעודה וואס וועט פארקומען אין ירושלים מאנטאג פארנאכטס, פסח שני, מיר העלפן אוועק שטעלן א קרן פאר אונזערע מוסדות אין ארץ ישראל, "קרן צדקת רבי מאיר בעל הנס" פאר מוסדות "היכל הקודש", "בארץ הקודש", "על טהרת הקודש"; איך האף ענק אלע צו זען.

נישט אלע האבן שוין יעצט די קינדער אין די מוסדות; אין חדר, בית פיגא, ישיבה; אבער די עלטערן וואס האבן די קינדער אין די מוסדות זאגן עדות אז די קינדער באקומען אן ערליכע געזונטע ריינע חינוך, מען צעקלאפט נישט די קינדער, מען בויט אויף די קינדער, מען גרייט אן די קינדער פארן לעבן; די איינגעשטעלטע זענען אזוי איבערגעגעבן, אשרינו שזכינו.

אויך וויל איך ענק איבערבעטן, היות עס זענען דא וואס טענה'ען אז מען וויל וויסן גענוג פרי וואו עס וועלן זיין די שיעורים, און ווען מען וועט קענען אריינקומען, וועלן מיר דאס מאל זיך זייער רעכענען מיט אנשי שלומינו, אז קיינער זאל נישט ווערן בא'עולה'ט, אלע זאלן קענען קומען און מיט האלטן.

מיטן אייבערשטנ'ס הילף וועל איך זיין דעם קומענדיגן שבת פרשת אמור אין מירון ביי מיין טאטע שליט"א, איך וועל שבת נישט אויפנעמען און נישט געבן קיין שיעורים. ביי מיין טאטע שליט"א בין איך א זון, נישט קיין ראש ישיבה. אם ירצה ה' נאך שבת, זונטאג און מאנטאג - וועל איך זיין אין ירושלים.

אויך וועל איך זיין באזונדער מיט די בחורים. דאס הייסט ביי די שיעורים וועלן אלע קענען זיין און אלע זאלן זיין, אבער אינמיטן טאג - וויל איך זיין מיט די בחורים באזונדער, און אויך וויל איך זיין אין אלע תלמוד תורה'ס באזונדער, דארט איז נישט שייך מען זאל זיך אריינשטופן.

ווי גליקליך זענען מיר אז מיר זענען מקורב צום הייליגן רבי'ן וואס לערנט אונז וואס משיח וועט אונז לערנען; צו רעדן און שמועסן מיטן אייבערשטן, אזוי ווי מען רעדט זיך אויס צו א גוטע פריינד, פאר דעם אליין איז שוין כדאי געווען די התקרבות.

א גוט שבת.

בעזרת ה' יתברך - יום א' פרשת תזריע מצורע, כ"ט ניסן, י"ד לעומר, שנת תשפ"ה לפרט קטן

... נרו יאיר

איך האב ערהאלטן דיין בריוו.

פארוואס קומען קיין אמעריקע ווען עס איז דא גוטע ישיבות אין ארץ ישראל און בפרט אין יבנאל? עס איז נישט פשוט צו קומען קיין אמעריקע, מילא א בחור וואס האט דא א זיידע און באבע וואו איינצושטיין - איז עפעס אנדערש, אבער אז נישט - איז נישט כדאי צו קומען, עס לוינט נישט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת כי תשא, י"ב אדר, שנת תשפ"ה לפרט קטן

מיין טייערער ליבער ... נרו יאיר, בני ברק

איך האב ערהאלטן דיין בריוו.

זיי נישט ברוגז אויף וואס דער מנהל שליט"א האט געזאגט, אז מען זאל זיך נישט פארשטעלן ווי די ארמיי פון די ערב רב, און אויף וואס דער מנהל האט געזאגט אז אויב מען וויל פארשטעלן די קינדער ווי אן ארמיי, קען מען זיי מאכן ווי די אמעריקאנע ארמיי, טערקישע ארמיי, רוסישע ארמיי.

דער מנהל פרעגט מיר יעדע זאך, מיר מאכן נאר וואס מיר האבן מקבל געווען פון די הייליגע צדיקים פון די פריערדיגע דרות, און אזוי האב איך מקבל געווען פון מוהרא"ש און פון די הייליגע צדיקים, אז די מיליטער פון די ערב רב איז כולל אלע עבירות פון די תורה, וויל איך נישט מען זאל זיך פארשטעלן ווי זיי, און אפילו מען פארשטעלט זיך ווי גוים - איז דאס נישט ווי מינים, דאס איז אונזער חינוך וואס מיר געבן פאר אונזערע קינדער, אז די מדינה הציונות איז א מרידה אינעם אייבערשטן, א מרידה אין די תורה און א מרידה במלכות שמים.

יעצט זאלסטו זיך נאכאמאל מתבודד זיין אויף וואס מיר זענען געקומען צום רבי'ן, וואס זענען די עיקרים; מיר זענען געקומען צום רבי'ן צו לעבן מיט די זיסע עצות פון לעבן מיט אמונה און זיך מחי' זיין מיט פשטות יהדות און סדר דרך הלימוד, און די חיזוק זיך נישט צו מייאש זיין, און עס זאל דיר נישט מחליש דעת זיין די אנדערע זאכן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - עש"ק פרשת וארא, מברכים החודש, כ"ד טבת, שנת תשפ"ה לפרט קטן

לכבוד מיינע טייערע חברים, תלמידי היכל הקודש פון בית שמש, ה' עליהם יחיו

מזל טוב צום עפענען דעם נייעם שטיבל אין בית שמש, רמה ד.

איך פריי זיך זייער אז מען עפנט די צווייטע שטיבל היכל הקודש אין בית שמש, דער רבי האט דאס געוואלט (ספורי מעשיות סוף מעשה ב, ממלך וקיסר): "מֶען זָאל מַאכִין אַרוּם דֶער גַאנְצֶער שְׁטָאט קְוַואלִין אַרוּם אוּן אַרוּם. כְּדֵי אַז אֵיינֶער וֶועט וֶועלִין אַ טְרוּנְק טוּן זָאל עֶר נִיט בַּאדַארְפְן אַוֶועק גֵיין אַ טְרוּנְק טוּן. נָאר אִיטְלִיכֶער זָאל גִיפִינֶען אַ קְוַואל לֶעבִּין זִיךְ", מוהרא"ש אין ספר נהרי אפרסמון זאגט: "אלו הם בתי כנסיות ובתי מדרשות", דאס זענען שולן; דער רבי וויל מען זאל עפענען שולן וואו מען קען טרינקען פון די מים חיים, קוואל וואסער; אז א איד דארף אביסל חיזוק - זאל ער האבן וואו אריינצוקומען.

איך זאג ענק וואס מוהרא"ש האט אונז געזאגט ווען מיר האבן געעפנט די שול אין וויליאמסבורג, און די ישיבה, און די מוסדות: "אויב וועט זיין ליבשאפט צווישן אייך - וועט ענק קיינער נישט קענען שלעכטס טון און עס וועט זיין גרויס הצלחה"; דאס זאג איך אייך אויך, אויב וועט זיין ליבשאפט צווישן אייך, קיינער וועט נישט זוכן צו טרעטן אויף א צווייטן, מען וועט קומען אין שול מיט ליבשאפט, מיט שמחה - וועלן ענק זייער מצליח זיין, די שטיבל וועט ארויסגעבן א שיין אויף די גאנצע געגנט, רמה ד אין בית שמש.

איך וועל אם ירצה ה' ממנה זיין גבאים פאר די שטיבל נאך שבת.

בעזרת ה' יתברך - יום א' פרשת וארא, י"ט טבת, שנת תשפ"ה לפרט קטן

לכבוד מיין טייערער ... נרו יאיר, אדמיניסטראטער מוסדות היכל הקודש, קרית ברסלב ליבערטי

שיק שוין די געלט פאר חודש טבת פאר די מוסדות בארץ הקודש. דער מנהל פון די מוסדות אין ארץ ישראל, יצחק נרו יאיר, האט מיר געשריבן אז ער דארף 39,863 פאר חודש טבת. ביטע פארבינד זיך מיט אים און שיק אים די גאנצע סכום פון די געלט וואס איך האב דיר פריער געשיקט.

זע אז די געלט קיין ארץ ישראל זאל זיין צייטליך, ווייל זיי זענען מער אנגעוויזן אויף די געלט ווי דא אין אמעריקע; דארט איז נישטא קיין שטאטישע הילף, דארט דארפן די מלמדים און די לערערינס דאס האבן פאר פשוט ברויט און מילך פאר זייערע קינדער.

אשרינו אז אונזער פלאג און מי איז אויף משמש זיין דעם רבי'ן, אויפציען א דור שכולו זכאי, א דור מיט די ריינע אמונה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויגש, ב' דראש חודש טבת, ז' דחנוכה, שנת תשפ"ה לפרט קטן

לכבוד ... נרו יאיר

היינט נאכט איז די הייליגע טאג זאת חנוכה. עס שטייט פון צדיקים אז מען קען פועלן זאת חנוכה ישועות, זאלסטו זיך היטן פון קנאת המלאכים; היט זיך פון כעס און פון מחלוקת, ווייל יעדע מאל עס קומען די הייליגע טעג ווערט א פחד, די מלאכים זענען מקנא דעם מענטש און זיי זוכן אים אראפ צו ווארפן אין מחלוקת, אין כעס, פאר שטותים והבלים. וועסט גוט קוקן, יעדע שבת און יום טוב, און אויך ביי שמחות - ווערט דער מענטש צעשפילט מיט נערווען וכו' וכו', מען הויבט אן שרייען אויף די ווייב און קינדער, מען הויבט אן מיט פארשעמען השם ישמרינו; זאלסטו זיך אכטונג געבן נישט צו ווערן בכעס. היינט נאכט ביים צינדן די הייליגע מנורה זיי זיך מבטל צום אייבערשטן, עס זאל דיר גארנישט אנגיין, עס זאל דיר גארנישט אינטערעסירן, נאר איין זאך - שמחה.

קומענדיגע וואך, פרייטאג פרשת ויחי, עשרה בטבת - געפאלט אויס די יארצייט פון אונזער הייליגער רבי נתן זכותו יגן עלינו. ליל שישי וועלן מיר מאכן די יארצייט סעודה אין מאנסי, אינאיינעם מיט א דינער פאר אונזערע מוסדות אין ארץ ישראל, מוסדות היכל הקודש בארץ הקודש. איך לאדן דיך פערזענליך, איך וויל דו זאלסט קוקן אויף די מוסדות ווי דיינע אייגענע מוסדות, ווייל ביי מיר איז דאס אזוי חשוב און אזוי וויכטיג; מיר זאלן האבן ריינע ערליכע מוסדות על טהרת הקודש, געבויט אויף די וועג פון הייליגן רבי'ן, אזוי ווי מיר האבן מקבל געווען פון מוהרא"ש זכותו יגן עלינו.

דער אייבערשטער זאל העלפן זאלסט האבן הצלחה אין אלע ענינים.

א פרייליכן חנוכה און א גוטן חודש.

בעזרת ה' יתברך - מוצאי שבת קודש פרשת ויצא, ז' כסליו, שנת תשפ"ה לפרט קטן

לכבוד ... נרו יאיר, מנהל מוסדות היכל הקודש בארץ הקודש

איך האב ערהאלטן דיין בריוו.

בנוגע וכו'; געב פאר די קינדער עסן מיטאג אזוי ווי מען פירט זיך ביי ענק וכו', מאך נישט נאך ווי מען טוט אין אמעריקע; יעדע פלאץ האט זיך זיין וועג ווי אזוי מען פירט זיך. מאך נאך נאר די חלק החינוך, די חלק פון געבן גוטע ווערטער פאר יעדן קינד, קוקן אויף די קינדער מיט רחמנות, רעדן צו זייער נשמה, און אויך פארלאנגען א שטארע דרך ארץ, נישט לאזן די קינדער וואקסן מיט הפקירות.

איך האף צום אייבערשטן צו קענען שיקן דעם חודש נאכאמאל געלט פאר די מוסד אין ארץ ישראל. איך בעט דיר א טובה, גיי קיין יבנאל, גיי צו מוהרא"ש, איך מאך דיך א שליח, און בעט פאר מיר, בעט דארט פאר די הצלחה פון די מוסדות, און דער אייבערשטער וואס האט אונז געהאלפן ביז אהער וועט אונז ווייטער העלפן.

געב איבער א פערזענליכע שכוח פאר יעדן מלמד און פאר אלע איינגעשטעלטע, איך בין זיי אלע זייער דאנקבאר.

דער אייבערשטער זאל העלפן זאלסט האבן הצלחה אין אלע ענינים.