בריוון פונעם ראש ישיבה שליט"א

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

ישראל שמעון נרו יאיר, מגיד שיעור בישיבת היכל הקודש וויליאמסבורג

איך בעט דיר זייער זאלסט רעדן צו די בחורים פון קדושת עיניים, פון זיך היטן די אויגן. ווייל יעצט ווען מיר זענען אריין אין די זומער טעג דארף מען א שמירה עליונה נישט נכשל צו ווערן אין ראיות אסורות, ווייל אין די אויגן איז אנגעהאנגען אלעס, די גאנצע הצלחה פונעם מענטש ליגט אין די אויגן, און חס ושלום אז מען איז מפקיר די אויגן - רייסט מען זיך אינגאנצן אפ פונעם אייבערשטן, מען קומט צו פוגם זיין בברית רחמנא לצלן; וויי און ביטער איז אז מען היט נישט די אויגן, עס ווערן באשאפן פון יעדע שלעכטע קוק קליפות און מזיקים וואס טוען זיך נוקם זיין אינעם מענטש, אויך דער מלאך המות איז זיך נוקם, אזוי ווי חכמינו זכרונם לברכה זאגן (עבודה זרה כ:): "מַלְאַךְ הַמָּוֶת כֻּלּוֹ מָלֵּא עֵינַיִם", דער מלאך המוות איז אינגאנצן אנגעפילט מיט אויגן; ווען עס קומט די צייט דער מענטש זאל נפטר ווערן, קומט דער מלאך המות, ער ציט זיך אויס פון דער ערד ביזן הימל און ער איז איין שטיק אויגן, פול מיט אויגלעך, און ווען דער מענטש זעט אים ווערט ער זייער דערשראקן און פון דעם שטארבט מען; און דער הייליגער חתם סופר זכותו יגן עלינו זאגט בשם זיין רבי'ן, דער גאון וקדוש רבי נתן אדלער זכר צדיק לברכה (חתם סופר בראשית, הקדמה) אז די טויזנטער אויגלעך - דאס זענען פון די אלע הסתכלות אסורות וואס דער מענטש האט געקוקט זיין גאנץ לעבן, די אלע אויגן נעמט דער מלאך המוות און ער קומט צום מענטש און ער הרג'עט אים, ווייל עס איז נישטא נאך א זאך וואס זאל הרג'ענען דעם מענטש ווי נישט היטן די אויגן. מיט דעם טייטשט ער וואס מיר בעטן דעם אייבערשטן פרייטאג צו נאכטס: "וִישֵׁזְבִינָנָא מֵעֵינָא בִּישָׁא, וּמֵחַרְבָּא דְמַלְאַךְ הַמָּוֶת, וּמִדִּינָהּ שֶׁל גֵיהִנֹּם", היט אונז פון א שלעכט אויג, און פונעם מלאך המות, און פון גיהנום; אז דאס גייט אינאיינעם, אז מיר וועלן נישט האבן קיין 'עינא בישא' מיר וועלן היטן די אויגן, וועלן מיר נישט מורא האבן פונעם שווערד פונעם מלאך המוות, און מיר וועלן נישט אנקומען אין גיהנום.

זע אויסצורייסן פון די בחורים די מידה פון ליצנות, איך האב זייער מורא עס זאל נישט זיין צווישן די בחורים די מידה פון ליצנות; אז מען היט נישט די אויגן, מען קוט שלעכטע זאכן, סיי אין גאס, סיי אין א טעלעפאן, אין קאמפיוטער, טעבלעט וכדומה - פאלט אוועק די תמימות. די הייליגע חכמים זאגן (סוטה ט:): "שמשון הלך אחר עיניו", שמשון איז נאך געגאנגען נאך זיינע אויגן, "לפיכך נקרו פלשתים את עיניו", זענען געקומען די פלשתים און אויסגעשטאכטן די אויגן, מידה כנגד מידה; דאס איז ביי יעדן איינעם, אז מען היט נישט די אויגן קומען די פלשתים, דאס זענען די קליפות, און זיי רייסן אויס די אויגן פון זען אלקות, פון שפירן דעם אייבערשטן; די פלשתים דאס זענען די לצים, מיט ליצנות ווערט אויסגעריסן די אויגן, מען זעט מער נישט און מען שפירט נישט דעם אייבערשטן. אזוי ווי די הייליגע חכמים זאגן (סוטה מב.), עס איז דא פיר כיתות וואס: "אין מקבלים פני שכינה", איינע פון די כיתות איז די כת ליצים, און דער הייליגער אריז"ל זאגט (שער מאמרי חז"ל, סוטה מב), די פיר כיתות זענען אנטקעגן די פיר וועלטן, און די כת לצים איז אנטקעגן עולם אצילות, ווייל ליצנות איז אזוי געפערליך אז אפילו מען איז זוכה צו שפירן די ליכטיקייט פון עולם אצילות - קומט ליצנות און פארלעשט עס, מען ווערט אפגעקילט, מען פארלירט עס; און דאס אלעס קומט פון קוקן עבירות, ביז מען פאלט אין פגם הברית רחמנא לצלן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

... נרו יאיר תלמיד ישיבת היכל הקודש ירושלים

דיין מגיד שיעור זאגט מיר אז ער האט דיך זייער ליב, דו פירסט זיך מיט דרך ארץ, דו פירסט זיך מיט גוטע מידות, דו קריגסט זיך נישט מיט די בחורים, איך פריי זיך זייער צו הערן די גוטע גריסן אויף דיר.

טייערער ..., יעצט אין די זומער טעג ווערט שרעקליכע נסיונות אין שמירת עיניים, אויך א גאנץ יאר דארף מען האבן א שמירה אויף די אויגן, מען זאל זיין אפגעהיטן נישט צו קוקן קיין שלעכטס, אבער ווען עס קומט זומער - ווערט גאר שווער, עס ווערט א שרעקליכע פריצות, די גאסן ווערן זייער געפערליך, עס ברענט א פייער פון פריצות און מען קען פארברענט ווערן ביי די קליפות השם ישמרינו, און מיט איין שלעכטע קוק, קען מען פארלירן אזויפיל קדושה און אזויפיל יראת שמים, מען מוז זיך זייער היטן די אויגן מען זאל נישט פארלירן די קדושה און יראת שמים פון אלע יארן עבודת השם, ווייל אין שמירת עיניים ליגט אלעס, אויב מען היט די אויגן קען מען זוכה זיין צו ווערן זייער הייליג, אזוי ווי די הייליגע צדיקים טייטשן, עס שטייט אין פסוק (בראשית לח, כא): "אַיֵּה הַקְּדֵשָׁה הִוא בָעֵינַיִם עַל הַדָּרֶךְ", טייטשן זיי: "אַיֵּה הַקְּדֵשָׁה", ווי אזוי ווערט מען הייליג? און וואס דארף מען טון זוכה זיין צו ווערן הייליג? "הִוא בָעֵינַיִם עַל הַדָּרֶךְ", עס ליגט אין די אויגן, ווען מען גייט אין די וועגן; מען זאל זיך היטן די אויגן אין גאס, מען זאל נישט גיין אין פלעצער וואו מען קען חס ושלום פאלן.

טייערער ... איך בענק זיך צו דיר, איך קוק ארויס אויף דיר, איך ווארט און האף אז דו וועסט נישט נאכלאזן דיין עבודת השם, בעיקר זיך היטן די אויגן; ווייל אז מען היט די אויגן - איז מען זוכה צו א שטארקע אמונה, מען איז זוכה צו שפירן שטענדיג דעם אייבערשטן, אזוי ווי מיר זאגן יעדן טאג ביי קריאת שמע (במדבר טו, לט): "וְלֹא תָתוּרוּ אַחֲרֵי לְבַבְכֶם וְאַחֲרֵי עֵינֵיכֶם", און די הייליגע חכמים זאגן (ברכות יב:): 'אחרי לבבכם' דאס מיינט מען 'מינות', און 'אחרי עיניכם' דאס מיינט מען 'טראכטן פון עבירות'; די צוויי זאכן גייען אינאיינעם, דער וואס היט נישט די אויגן פאלט אריין אין מינות ואפיקורסות, די אמונה ווערט ביי אים פארלאשן, מען שפירט נישט דעם אייבערשטן, מען איז פול מיט מחשבות פון ספיקות און בלבולים, קשיות אויף די אמונה רחמנא לצלן, אבער דער וואס היט די אויגן - דער איז זוכה צו האבן א ריינע אמונה, א קלארע אמונה, און מיט אמונה איז די לעבן זיס און געשמאק; ווייל ווען עס גייט גוט ווייסט מען אז עס איז פונעם אייבערשטן, און אויך חס ושלום ווען עס גייט פארקערט ווי מען וויל - ווייסט מען אז דאס איז אויך אלעס פונעם אייבערשטן, און אז עס קומט פונעם אייבערשט קען נישט זיין אז עס איז שלעכט.

שרייב מיר צוריק בריוו, איך וויל זיין מקושר מיט דיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת אחרי קדושים, ו' אייר, שנת תשפ"ו לפרט קטן

לכבוד ... נרו יאיר

זיי נישט מקנא אנדערע, מיין נישט אז יענעם איז בעסער, נישטא וועם צו מקנא זיין. מוהרנ"ת האט געזאגט: "אויב איינעם מקנא זיין - איז דאס אן ערליכער איד", און ווער עס איז דער ערליכער איד ווייסט מען אויך נישט, מען איז מקנא די זאך פון זיין אן ערליכער איד נאר דאס איז גוט צו מקנא זיין, אנדערע זאכן איז נישטא, נישטא קיין עולם הזה, דער הייליגער רבי זאגט (לקוטי מוהר"ן חלק ב, סימן קיט), אפשר אויבן איז דא אן עולם וואס רופט זיך עולם הזה, דא איז נישטא קיין עולם הזה, דא איז דא דער גיהנום און דער גן עדן; איז מען זוכה צו לעבן מיט צדיקים, מען באניצט זיך מיט זייערע עצות, מען לעבט מיט תורה, מיט תפילה, מיט אמונה - איז מען אין גן עדן, און אז נישט - איז מען אין גיהנום.

אויך אין שלום בית וכו' זאלסטו זיך נישט איינרעדן אז דיין חבר, דיין שכן - האט בעסער וכו', דאס איז דמיונות וואס דער בעל הדמיון - דער יצר הרע - מאכט. חכמינו זכרונם לברכה זאגן (סוכה נב.), דער יצר הרע האט זיבן נעמען, זאגט דער הייליגער רבי (לקוטי מוהר"ן חלק א, סימן כה), היינט האט ער שוין א נייעם נאמען, "דמיון"; ער מאכט צעדרייט דעם מענטש מיט די כח המדמה, ער נעמט אוועק די חן פון שטוב און לייגט עס אין אנדערע מקומות השם ישמרינו.

ברודער טייערער, היט דיינע אויגן, קוק נישט אויף קיינעם, חס ושלום אז מען איז מפקיר די אויגן פארלירט מען די געפיל אין שטוב וכו' וכו', איך בעט דיר, אז דיין ווייב האט פארלוירן איר חן אין דיינע אויגן זאלסטו זיך אנהייבן היטן דיינע אויגן, און אויך בעטן דעם אייבערשטן ער זאל דיך ראטעווען פונעם יצר הרע וואס מאכט דיך משוגע מיט די דמיונות אז אנדערע האבן בעסערס, אנדערע האבן שענערס; וואס איז אלעס דמיונות.

אז דו ביסט פארקלעבט אין קוקן מאוויס וכו' איז דיין עצה אכצן פרקים משניות. ווער עס איז אריינגעפאלן אין מאוויס, איז כמעט אוממעגליך ער זאל זיך קענען פון דעם אפלאזן, נאר מיט די כח פון תורה האט מען די מעגליכקייט צו ווערן צוריק נארמאל; דער רבי זאגט (שיחות הר"ן, סימן יט): "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה - ער טוט עבירות רחמנא לצלן, און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד"; אויב וועט ער זיך מאכן א קביעות צו לערנען יעדן טאג כך וכך, וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס אז עס נעמט ארויס דעם מענטש פון זיין שלעכטס; מוהרא"ש האט מקובל פון אנשי שלומינו אז ווען די רבי האט געזאגט די שיחה האט ער געמיינט מיט דעם דאס לערנען אכצן פרקים משניות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' לסדר טהרה, כ"ח ניסן, שנת תשפ"ו לפרט קטן

... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו, וואו דו בעטסט עצות פאר שמירת עיניים.

יעצט זענען מיר אריין אינעם זומער, די גאסן זענען אזוי געפערליך, און אפילו דער ערליכער איד, דער אפגעהיטענער בחור וואס האט נישט קיין טעלעפאן און כלים, ער איז אפגעהיטן אין שטוב - קען יעצט ממש פארברענט ווערן אין גאס; די גוים, און אין ארץ הקודש די אידן וואס די ערב רב האבן זיי אויסגע'שמד'ט און אוועק גענומען פון די תורה - גייען מיט א שרעקליכע פריצות, מען קען יעדע רגע פארברענט ווערן, השם ישמרינו.

על כן ליבער ..., יעצט ווען מיר פירן זיך אין די טעג פון ספירה מיט הלכות פון אבילות, מען טרויערט אויף די פיר און צוואנציג טויזנט תלמידי רבי עקיבא וואס זענען געשטארבן אין די טעג, דער אריז"ל זאגט (ספר הגלגולים, פרק ט), ווער זענען געווען די פיר און צוואנציג טויזנט תלמידים פון רבי עקיבא וואס זענען אוועק? די זענען געווען גלגולים פון די פיר און צוואנציג טויזנט מענטשן וואס זענען געשטארבן ביי בעל פוער, ווען זמרי בן סלוא איז געקומען צו משה רבינו מיט עזות און חוצפה וכו', זיי זענען מגולגל געווארן אין די תלמידים צו מתקן זיין די פגם; על כן אין די טעג פון ספירה קען מען פאררעכטן די עבירה פון פגם הברית, ווייל קר"י באטרעפט אזוי ווי עמ"ר (פרי עץ חיים שער ספירת העומר פרק ז, בהג"ה).

די ערשטע זאך פאר תיקון הברית איז שמירת עיניים, נישט גיין אין גאסן וואו עס זענען דא פריצות, גיי אפילו א לענגערע וועג וואס איז מער ריין ווי גיין א טריט אריין אין א גאס וואס איז דא דארט פריצות, ווייל אז מען היט די אויגן איז מען זוכה צו ריינע מוחין, מען איז זוכה צו שמחה, דאס לעבן איז זיס, די לעבן איז גוט, מען איז נאנט צום אייבערשטן, מען האט א זיסקייט ביים דאווענען און ביים לערנען, ווייל אלעס איז אנגעהאנגען אין שמירת הברית, און אויב חס ושלום מען איז פוגם בברית, מען היט נישט די אויגן, מען קוקט עבירות - ווערט אזוי ביטער און שלעכט, מען פארלירט די טעם פון לעבן.

נעם די עצה פון הייליגן רבי'ן, זיי זיך מתבודד, זוך א שטילע פלאץ און דארט זאלסטו זיך אויסשמועסן דיין הארץ מיטן אייבערשטן, בעט דעם אייבערשטן דו זאלסט קענען היטן דיינע אויגן, וויין צום אייבערשטן און בעט אים די ווערטער: "הייליגער באשעפער עס איז מיר אזוי שווער צו האבן ריינע אויגן, איך קען נישט גיין אין גאס, איך שפיר ווי א מלחמה, יעדעס מאל וויל איך קוקן, און ווען איך דערמאן זיך פון דיר און איך געדענק אז עס איז נישט גוט צו קוקן איז די קומענדיגע מאל א פרישע מלחמה, עס רייסט מיר צו קוקן, הייליגער באשעפער העלף מיך, ראטעווע מיך, איך וויל זיין אן ערליכער איד, איך וויל האבן הייליגע אויגן"; אזוי זאלסטו זיך אויסוויינען צום אייבערשטן טאג נאך טאג, לייג אריין דיינע אייגענע תפילות ובקשות, שריי צו אים, וויין צו אים, בעט אים ער זאל רחמנות האבן אויף דיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת כי תשא, ט"ז אדר, שנת תשפ"ו לפרט קטן

... נרו יאיר, קרית ברסלב

די וואך ווען מען ליינט פרשת פרה זאלסטו זיך מקבל זיין אוועק צו ווארפן אלע כלים וואס מען קען זען אויף דעם עבירות, און אויך די כלים וואס דו האסט שטילערהייט באהאלטן, וואס קיינער זעט נישט און קיינער ווייסט נישט - זאלסטו אוועק ווארפן. ווייל חכמינו זכרונם לברכה זאגן (תענית טז.): "אָדָם שֶׁתּוֹפֵס שֶׁרֶץ בְּיָדוֹ, אֲפִלּוּ טוֹבֵל בְּכָל מֵימוֹת שֶׁבָּעוֹלָם לֹא עָלְתָה לוֹ טְבִילָה, זְרָקוֹ מִיָּדוֹ כֵּיוָן שֶׁטָּבַל בְּאַרְבָּעִים סָאָה מִיַד עָלְתָה לוֹ טְבִילָה", אז מען טובל'ט זיך אין מקוה ווערט מען ריין נאר אויב מען ווארפט אוועק די טויטע שרץ, און אויב מען כאפט ווייטער אן די טויטע שרץ, אפילו דער מענטש וועט זיך טובל'ן אין אלע מקוה'ס פון די וועלט, בלייבט ער טמא; אז מען וויל תשובה טון, מען וויל זיך רייניגן פארן אייבערשטן - איז די ערשטע זאך אפלאזן די טויטע שרצים, די כלים וואס ברענגט טויט.

טייערער ברודער, אויך די כלים וואס מען דארף האבן פאר ביזנעס זאלסטו זען עס זאל האבן די בעסטע און שטערקסטע פילטערס, מען זאל חס ושלום נישט אנקומען צו זען עבירות און ליצנות, ווייל עס לוינט נישט די גאנצע ביזנעס אויב חס ושלום מען קען צוקומען צו זען עבירות, ליצנות וכו'.

צדיקים זאגן אז די וואך שבת פרשת פרה קען מען זיך מטהר זיין, מאך יעצט דיין גוטע החלטה און בעט דעם אייבערשטן: "הייליגער באשעפער העלף מיר איך זאל האבן ריינע אויגן, הייליגע אויגן, איך זאל אוועק ווארפן אלע כלים וואס פארשמירן מיך און זענען מיך מטמא".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת תצוה, ו' אדר, שנת תשפ"ו לפרט קטן

... נרו יאיר

איך בין זיכער אז מיטן זיך פארנעמען עפעס א גוטע זאך פארן אייבערשטן מיט די "אויגן" – וועט קומען א גרויסע ישועה אויף די "אויגן".

עס שטייט (שמות כא, כד): "עַיִן תַּחַת עַיִן", אן אויג אנשטאט אן אויג, אזוי ווי דער הייליגער רבי טייטשט דעם פסוק (תהלים סב, יג): "וּלְךָ ה' הַחֶסֶד כִּי אַתָּה תְשַׁלֵּם לְאִישׁ כְּמַעֲשֵׂהוּ", זאגט דער רבי (לקוטי מוהר"ן חלק א, סימן קפז), ווי אזוי קען מען וויסן וואס צו פאררעכטן? ווען מען באקומט א שטראף פונעם אייבערשטן – ווער קען זאגן וואס דאס מיינט? מאכט דער אייבערשטער: "מִדָּה כְּנֶגֶד מִדָּה, שֶׁעַל יְדֵי זֶה הוּא מֵבִין לְפַשְׁפֵּשׁ בְּמַעֲשָׂיו וְלֵידַע הַחֵטְא שֶׁפָּגַם בּוֹ וְלָשׁוּב בִּתְשׁוּבָה", אזוי ווייסט דער מענטש אויף וואס זיך נאך צו זוכן, און צו תשובה טון, עיין שם.

נעם זיך פאר עפעס גוטע זאכן מיט די אויגן, אדער נישט קוקן דרשות של דופי, פאדקעסטס פון לצים (לצים מיינט אלעס וואס מען רעדט אויסער תורה און אמונה), אדער נעם זיך פאר צו לייגן א פילטער וכו', נישט זען גלוי עריות, אדער גאר גוטע אויגן, קוקן נאר גוט אויף יעדן איינעם, אדער וואס דו וועסט אליינס שפירן וואס איז ריכטיג.

ישועת ה' כהרף עין, דעם אייבערשטנ'ס הילף קומט אין אן אויגן בליק, דאס מיינט מיטן געבן א בלינק – א פארמאך די אויגן פון נישט קוקן שלעכטס – קומט די ישועה.

בעזרת ה' יתברך - ערב שבת קודש פרשת ויקהל-פקודי, שבת החודש, מברכין ניסן, כ"ד אדר, שנת תשפ"ו לפרט קטן

מיין טייערער ליבער הארציגער ... נרו יאיר

איך בעט דיר זייער, טייערער ליבער תלמיד, דו ביסט יונג, דו ביסט ריין, דו קענסט נאך זוכה זיין צו זיין א גרויסער צדיק, נאר איין זאך - היט דיינע אויגן. איך בעט דיר זייער זאלסט נישט אריינגיין אין קיין קיאסק, אפילו אין א כשר'ע קיאסק, געב זיך אכטונג. די הייליגע חכמים זכרונם לברכה זאגן (שבת יג.), מען זאגט פארן נזיר: "לֵךְ לֵךְ אָמְרִי נְזִירָא, סְחוֹר סְחוֹר לְכַרְמָא לֹא תִקְרָב", גיי נישט אריין אין א וויינגארטן, אפילו דאס אריינגיין אין א וויינגארטן איז נישט קיין עבירה פאר א נזיר, דאך זאגט מען אים: 'גיי נישט אריין', מען זאגט אים: 'מאך זיך גדרים, מאך זיך נישט קיין נסיונות, ווייל דו וועסט נאכדעם צוקומען צו עסן פון די טרויבן'; אזוי אויך טייערער ליבער תלמיד, וואס דארפסטו זיך אריינשטעלן אין א נסיון? מען קען חס ושלום נכשל ווערן אין שלעכטס, חס ושלום אז מען קוקט עבירות איז מען נאכדעם פוגם בברית רחמנא לצלן און מען פארלירט אלעס, מען ווערט א דערביטערטער, א צעקלאפטער, ביז מען וויל שוין נישט לעבן; דאס אלעס הייבט זיך אן מיט מפקיר זיין די אויגן.

טייערער ליבער תלמיד גיי נישט אין קיין קיאסק און נעם נישט אריין אין האנט א טעלעפאן וואס מען קען זען עבירות. חכמינו זכרונם לברכה זאגן (במדבר רבה ב, י): "עֵינָא וְלִבָּא, תְּרֵי סַרְסוּרֵי דַּחֲטָאָה אִינוּן", די אויגן און הארץ זענען די מעקלערס פארן יצר הרע; דאס מאכט מען זאל אראפפאלן אין עבירות רחמנא לצלן, "עַיִן רוֹאֶה", עס הייבט זיך אן אז מען קוקט עבירות, "וְהַלֵּב חוֹמֵד", נאכדעם גליסט מען צו טון עבירות, "וּכְלֵי הַמַּעֲשֶׂה גּוֹמְרִים", ביז מען פאלט אראפ, מען זינדיגט רחמנא לצלן.

הלואי זאלסטו מיך צו הערן, איך האב דיך אזוי ליב, איך קוק אזוי ארויס אז דו וועסט אויסוואקסן א גרויסער צדיק; שרייב מיר צוריק אז דו גייסט מער קיינמאל נישט גיין אין קיין קיאסק און קיינמאל נישט נעמען אין האנט א סמארטפאון.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת ויקהל-פקודי, שבת החודש, מברכין ניסן, כ"ד אדר, שנת תשפ"ו לפרט קטן

... נרו יאיר

איך הער זייער גוטע גריסן אויף דיר פון דיין מגיד שיעור ר' משה שמואל שליט"א, ער זאגט מיר דו האסט אנגעהויבן לערנען פלייסיג; דו לערנסט משניות און דו פירסט זיך מיט דרך ארץ.

יעצט קומט די טעג פון 'בין הזמנים', זאלסטו זיך אכטונג געבן נישט צו גיין ליידיג, ווייל די ערגסטע זאך איז גיין ליידיג. חכמינו זכרונם לברכה זאגן (כתובות נט.): "הַבַּטָּלָה מְבִיאָה לִידֵי זִמָּה", גיין ליידיג ברענגט צו עבירות, "וְלִידֵי שִׁעֲמוּם", און עס ברענגט צו ווערן א נערווען קראנקער מענטש דער אייבערשטער זאל אפהיטן צו וואס מען קען צוקומען דורך גיין ליידיג.

אדער גייסטו אין שול לערנען, אדער דאווענען, אדער העלפסטו דיינע עלטערן, אדער עפעס אן ארבעט; נאר נישט גיין ליידיג, נאר נישט בטל'ען די צייט, און זיכער נישט נעמען א קאמפיוטער, טעבלעט, טעלעפאן און זיך פארברענען די מח השם ישמרינו. קוקן קליפס, מאוויס, ווידיאוס - ברענגט מען זאל ווערן א חולה נפש, מען באקומט ענקזייעטי, פאניק אטאקעס, פחדים; אלעס קומט פון קוקן עבירות רחמנא לצלן.

איך בעט דיך זייער מיין ליבער תלמיד, האלט ריין דיינע אויגן, האלט ריין דיין מח, אויך יעצט 'בין הזמנים' איז דער אייבערשטער דא; היט זיך - וועט דער אייבערשטער דיך היטן, אז דו וועסט זיך היטן די אויגן פון קוקן שלעכטס - וועט דער אייבערשטער דיך אפהיטן פון שלעכטס; דער אייבערשטער זאגט (ירושלמי ברכות א, ה): "אִי יְהָבְתְּ לִי לִבְּךָ וְעֵינֶיךָ", אויב דו וועסט מיר געבן דיין הארץ מיט דיינע אויגן, "אֲנָא יְדַע דְּאַתְּ לִי", ווייס איך אז דו ביסט מיינער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת יתרו, ט"ז שבט, שנת תשפ"ו לפרט קטן

... נרו יאיר

זיי שטארק נישט צו קוקן קיין שלעכטע זאכן, בלייב מיט די פשוט'ע כשר'ע טעלעפאן, ווייל אז מען איז פוגם מיט די אויגן, מען קוקט עבירות, ניאוף, רחמנא לצלן, און מען פאלט אין פגם הברית – פארלירט מען אלעס, מען ווערט א צעבראכענע כלי, אלע ביינער ווערן צעבראכן. אזוי זאגט דער הייליגער רבי (לקוטי מוהר"ן חלק א, סימן נ): "וְזֶה בְּחִינַת חוֹלַאַת שֶׁקּוֹרִין בְּרֶעכֶנִישׁ, רַחֲמָנָא לִצְלָן, שֶׁשּׁוֹבֵר עֲצָמוֹת שֶׁל אָדָם", דורך זינדיגן אין פגם הברית ווערט מען א צעבראכענע שארב, און אזוי זאגט דער הייליגער זוהר (תיקוני זוהר תיקון יט, דף מא:): "וְאִם לָא נָטְרִין בְּהַאי בָּשָׂ"ר אוֹת בְּרִי"ת, אִתְהַפַּךְ לוֹן בַּשֶּׁבֶ"ר", די ווארט בָּשָׂר איז די זעלבע ווי די ווארט שֶׁבֶר, אויב היט מען אפ אות ברית קודש, אם זכו – בשר קודש, איז מען הייליג, און אז נישט – איז מען א צעבראכענע כלי.

איך שרייב דיר נאר ווייל איך האב דיך ליב, איך וויל דו זאלסט האבן א הייליגע שטוב, הייליגע קינדער, די שכינה זאל רוען ביי דיר.

שרייב מיר דיינע סיומים, וועסטו מיך מחי' זיין.

בעזרת ה' יתברך - יום ד' פרשת בא, ג' שבט, שנת תשפ"ו לפרט קטן

לכבוד ... נרו יאיר

קוק נישט קיין מאוויס, קוק נישט מער קיין סטעטוס, פארברען זיך נישט די נשמה, פארברען זיך נישט דיינע אויגן מיט דיין מח. האלט נישט אין אפיס כלים וואס זענען שעדליך, וואס מען קען זען עבירות, ניאוף, רחמנא לצלן; מען פארלירט אלעס, מען ווערט אויסגעריסן פון די וועלט, מען פארלירט די וועלט און יענע וועלט, מען פארלירט די ווייב, די קינדער, מען ווערט פארשעמט פאר אלעמען.

א מענטש מיינט אז ער זיצט שטילערהייט אין זיין קאר, אין זיין אפיס, אין זיין דירה'לע - און קוקט עבירות און קיינער זעט נישט און קיינער וועט נישט וויסן פון דעם; אוי וויי, אוי וויי, מען מיינט אז מען קען זיך באהאלטן, אבער דער אייבערשטער זאגט (ירמיה כג, כד): "אִם יִסָּתֵר אִישׁ בַּמִּסְתָּרִים", א מענטש מיינט ער קען זיך באהאלטן פון מיר, "וַאֲנִי לֹא אֶרְאֶנּוּ, נְאֻם ה'", און איך וועל אים נישט זען; איך וועל פארציילן פאר אלעמען ווער דער מענטש איז.

הלוואי וועסטו אויסהערן די רבנים און די דיינים וואס וויינען און שרייען אז מען זאל נישט האבן שייכות מיט די זאכן וואס זענען מטמא במגע ובמשא ובאוהל, פון קוקן ניאוף פארלירט מען אלעס; די ווייב, די קינדער און די געלט, מען בלייבט אן קיין פרוטה, מען האט טענות אויפן אייבערשטן אז דער אייבערשטער געבט נישט קיין פרנסה, ווען דער מענטש אליינס ווארפט אוועק די שפע, דער מענטש לייגט די שפע ביי די קליפות השם ישמרינו; אוי ווי ביטער עס איז אז מען קוקט ניאוף, אוי ווי שלעכט עס ווערט די לעבן אז מען קוקט ניאוף.

אפגערעדט פון קוקן פאדקעסט, דאס איז דאך ערגער פון דאס ערגסטע; איך בעט דיר, פון דעם זאלסטו זיך זייער היטן, דאס איז אזוי שעדליך, מען ווייסט גארנישט ווי שעדליך דאס איז; עס רייסט אויס דאס ביסל תמימות וואס מען האט אין זיך, מען פארלירט די אמונה, מען ווערט אויסגעריסן פון די וועלט.

שבת פרשת שמות האבן מיר פארגעלערנט אין ישיבה ביי שלש סעודות שיחות הר"ן סימן לב, מורא'דיגע ווערטער פון רבי'ן, עס איז כדאי דו זאלסט לערנען די שיחה. דער רבי רעדט פון זיך היטן פון חקירות, דער רבי זאגט: "וְדַע, כִּי יֵשׁ עֲבֵרוֹת שֶׁהֵם מַכְנִיסִים כְּפִירוֹת בְּאָדָם", עס איז דא עבירות וואס ברענגען אריין אינעם מענטש כפירות ואפיקורסות, (מוהרא"ש זאגט אז דאס איז די עבירה פון פגם הברית, הוצאת זרע לבטלה רחמנא לצלן), "וְיֵשׁ שֶׁבָּאִים עֲלֵיהֶם מַחֲשָׁבוֹת עַל הָאֱמוּנָה מֵחֲמַת שֶׁלֹּא נוֹלְדוּ בִּקְדֻשָּׁה כָּרָאוּי", אויך איז דא וואס האבן קשיות אויף די אמונה ווייל זיי זענען געבוירן געווארן שלא בקדושה, (אן היטן הלכות), "וְיֵשׁ שֶׁהוֹסִיפוּ עַל זֶה מַעֲשֵׂיהֶם הָרָעִים שֶׁעָשׂוּ בְּעַצְמָם, כִּי יֵשׁ עֲבֵרוֹת שֶׁהֵם מַזִּיקִים וּפוֹגְמִים אֶת הָאֱמוּנָה כַּנַּ"ל", און אויך איז דא וואס זיי זענען געבוירן נישט בקדושה און זיי אליינס האבן פארמערט צו טון עבירות, אזוי ווי פריער אויסגעשמועסט; איז וואס איז די עצה? וואס טוט מען דא? זאגט דער רבי: "וְלָזֶה צְרִיכִין בּוּשָׁה וְלֵב נִשְׁבָּר", מען דארף זיך שעמען פונעם אייבערשטן און האבן א צעבראכענע הארץ, "שֶׁמִּי שֶׁיֵּשׁ לוֹ חֲקִירוֹת וּמַחֲשָׁבוֹת אֵלּוּ חַס וְשָׁלוֹם", ווייל ווער עס האט מחשבות פון חקירות און מחשבות קעגן די אמונה – "רָאוּי לוֹ לְהִתְבַּיֵּשׁ מְאֹד", דארף זיך זייער שעמען, "עַל אֲשֶׁר נוֹלַד בְּגַשְׁמִיּוּת כָּזֶה, אוֹ שֶׁעָשָׂה מַעֲשִׂים כָּאֵלּוּ שֶׁבָּא לָזֶה שֶׁיָּבוֹאוּ לוֹ מַחֲשָׁבוֹת כְּנֶגֶד אֱמוּנָתֵנוּ הַקְּדוֹשָׁה", אז ער זעט אזוי אויס, אז ער איז אנגעקומען צו אזא מצב פון האבן חקירות מיט ספיקות רחמנא לצלן, "וּכְבוֹד ה' מָלֵא אֶת כָּל הָאָרֶץ", דער אייבערשטער איז דאך אין די גאנצע וועלט, אזוי ווי עס שטייט אין פסוק (ישעי' ו, ג): "'מְלֹא כָּל הָאָרֶץ כְּבוֹדוֹ', וְעָלָיו בָּאִים מַחֲשָׁבוֹת חַס וְשָׁלוֹם לְגָרְשׁוֹ וּלְעָקְרוֹ חַס וְשָׁלוֹם", און צו מיר קומען אזעלכע מחשבות וואס ווילן מיך אויסרייסן חס ושלום - "מֵאֱלֹקִים חַיִּים אֲשֶׁר הוּא חֵי הַחַיִּים יִתְבָּרַךְ וְיִתְעַלֶּה שְׁמוֹ", פונעם הייליגן באשעפער; ווען מיר האבן דאס געלערנט האבן מיר אלע געהאט טרערן אין די אויגן, אלע זענען זייער נתעורר געווארן לתשובה אפצולאזן די אלע פאדקעסטס וואס מאכן פארגעסן פונעם אייבערשטן, אפלאזן אלע נארישקייטן, און זיך צוריק קערן צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת שמות, י"ח טבת, שנת תשפ"ו לפרט קטן

... נרו יאיר

נאכדעם וואס עס האט פאסירט מיט דיינע אויגן, עס האט דיר געברענט די אויגן; זאלסטו אכטונג געבן עס זאל נישט זיין קיין עין הרע אויף דיר, לייג נישט קיין בילדער פון דיר און דיין משפחה אויף סאושעל מידיע, און אויך זאלסטו זיך נישט אויפטון פאר אנדערע, אפילו פאר חברים, ווייל דאס ברענגט שלעכטע אויגן; עס קען זיין נאנטע חברים האבן קנאה און עס שאדט.

גיס אויס זאלץ אינדרויסן פון דיין טיר פון דיין שטוב, דאס איז א סגולה אוועק צו נעמען עין הרע.

אויך דארף דיר דאס זיין א רמז אז עפעס דארף פארראכטן ווערן מיט די אויגן, אז די אויגן האט דיר געברענט דארף דיר דאס אויפוועקן זיך אכטונג געבן נישט צו קוקן טאלק-שאוס, פאדקעסט, בפרט פון פרומע אידן וואס איז פול מיט מינות וכפירה; בלא יודעים קילט עס אפ די תמימות פון הייליגן רבי'ן.

בעזרת ה' יתברך - יום ה' פרשת שמות, י"ט טבת, שנת תשפ"ו לפרט קטן

לכבוד ... נרו יאיר

קוק נישט קיין מאוויס, קוק נישט קיין קליפס, סטעטוס וכו', און אזוי אויך אלע אנדערע נעמען; אוי וויי, אוי וויי, וואס מען פארלירט דורך קוקן די זאכן, מען פארלירט אלעס, מען פארלירט די וועלט און יענע וועלט. חכמינו זכרונם לברכה זאגן (במדבר רבה ב, י): "עֵינָא וְלִבָּא, תְּרֵי סַרְסוּרֵי דַּחֲטָאָה אִינוּן", די אויגן און הארץ זענען די מעקלערס פארן יצר הרע; דאס מאכט מען זאל אראפפאלן אין עבירות רחמנא לצלן, אז מען קוקט עבירות פאלט מען אין פגם הברית, מען פאלט אין הוצאת זרע לבטלה רחמנא לצלן, מען ביז מען ווערט אינגאנצן משוגע, עס ווערט מקוים וואס שטייט אין פסוק (דברים כח, לד): "וְהָיִיתָ מְשֻׁגָּע מִמַּרְאֵה עֵינֶיךָ אֲשֶׁר תִּרְאֶה", פון קוקן עבירות ווערט מען משוגע.

ליבער ברודער, הארציגער חבר, ווארף אוועק די שלעכטע כלים, אז מען קוקט עבירות דערלייגט מען די גאנצע לעבן, מען פארלירט די מח, מען פארלירט אלעס, א שאד א שאד אלעס צו פארלירן, מען פארלירט די חן, מען פארלירט די סבלנות, מען פארלירט די פרנסה, שלום בית, די געדולד צו לערנען און צו דאווענען, עס ווערט אזוי ביטער ביז מען זוכט עפעס זיך צו בארואיגן, מען נעמט שעדליכע סם, דראגס השם ישמרינו; אלעס הייבט זיך אן פון מפקיר זיין די אויגן.

אז דו וועסט היטן דיינע אויגן וועסטו האבן ברייט פרנסה, אינגעלייט זאגן עדות אז ווי נאר זיי האבן געמאכט גדרים אויף זייערע טעלעפאונס וכו' האבן זיי גלייך געזען ישועות, און אז דו וועסט פילטערן דיינע כלים וועסטו זיכער זען א ישועה אין די פרנסה. מוהרא"ש טייטשט דעם פסוק (תהלים קמה, טו): "עֵינֵי כֹל אֵלֶיךָ יְשַׂבֵּרוּ, וְאַתָּה נוֹתֵן לָהֶם אֶת אָכְלָם בְּעִתּוֹ", 'יְשַׂבֵּרוּ' - קען מען ליינען מיט א שׁין: "עֵינֵי כֹל אֵלֶיךָ 'יְשַׁבֵּרוּ'", אז מען צעברעכט די אויגן - מען קוקט נישט קיין עבירות, "וְאַתָּה נוֹתֵן לָהֶם אֶת אָכְלָם בְּעִתּוֹ" - וועט דער אייבערשטער געבן פרנסה אין צייט.

היינט נאכט וועט זיין די וועכנטליכע שיעור, עס לוינט זאלסט קומען, אפילו מען גייט רעדן פון די זעלבע זאכן וואס מען רעדט די אלע יארן דאך איז דאס וויכטיג, ווייל אויף צו האבן שלום בית און אויף צו אנגיין מיט תורה ותפילה דארף מען האבן כסדר חיזוק, אז נישט פאלט מען ארויס פון דעם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - תשרי, שנת תשפ"ו לפרט קטן

... נרו יאיר, קרית ברסלב ליבערטי

א גרויסן יישר כח פארן צושטעלן אזעלכע געשמאקע וועגן צו קומען צום רבי'ן קיין אומאן אויף ראש השנה, איך האב זייער הנאה געהאט, עס איז געווען א פארגעניגן צו פארן מיט אנשי שלומינו.

איך האף צום אייבערשטן ענק וועלן צושטעלן אויף קומענדיגע יאר, תשפ"ז, אויך א 'נסיעה' צום רבי'ן.

קומענדיגע יאר וויל איך פארן דינסטאג כ"ו אלול, סעפטעמבער 8 למספרם. ראש השנה געפאלט אום שבת קודש און זונטאג, דארפן מיר ארויספארן דינסטאג פארנאכטס אנצוקומען דאנערשטאג אינדערפרי. לויט ווי איך זע וועלן ענק קענען מאכן צוויי טשארטערס, איינס דינסטאג פארנאכטס און איינס מיטוואך, איך וויל פארן דינסטאג.

זיי שטארק מיט שחרית מנחה מעריב, דאווענען דוקא אין שול, נישט אין שטוב, אין אפיס וכדומה.

בעזרת ה' יתברך - תשרי, שנת תשפ"ו לפרט קטן

... נרו יאיר, מאנסי

א גרויסן יישר כח פארן מאכן א טשארטער צו פארן קיין אומאן אויף ראש השנה, און א באזונדערע יישר כח פארן ברענגען א פליגער אן קיין סקרינס. די וועג איז געווען אזוי רואיג, סיי פאר זיך אליין, מען האט נישט געהאט די נסיונות פון קוקן און סיי פאר אונזערע ריינע קינדער, עס איז געווען א מין רואיגקייט אז מען ווייסט אז די קינדער האבן נישט און קענען גארנישט קוקן.

איין זאך איז א שאד, אז די מאנשאפט זענען געווען גויות; ווען מען דינגט א פליגער קען מען בעטן וואס מען וויל, מען וואלט ווען געדארפט בעטן אז די מאנשאפט זאלן זיין נאר מענער. איך האף צום אייבערשטן און איך בעט דיר אז אויף קומענדיגע יאר און אויף ווייטער, ווען דו וועסט מאכן א טשארטער פאר אונזער חבורה – זאל דאס זיין מיט א פליגער אן קיין סקרינס און די מאנשאפט זאלן זיין מענער.

לכבוד די נייע יאר זאלסטו זיך צוריק באנייען מיט לענען ח"י פרקים משניות, דאס איז מסוגל פאר די נשמה, עס רייניגט און זויבערט עס.

בעזרת ה' יתברך - יום ד' פרשת פנחס, כ' תמוז, שנת תשפ"ה לפרט קטן

לכבוד ... נרו יאיר

דער יצר הרע פלאקערט און ברענט, דער יצר הרע פון קוקן אויף פרעמדע ברענט און בריט, ער לאזט נישט אפ, ער ווארפט אראפ אן רחמנות. די איינציגסטע עצה איז - נאכאמאל גיין שרייען צום אייבערשטן: "אייבערשטער איך וויל זיין אן ערליכער איד, איך וויל זיין אפגעהיטן, אייבערשטער ראטעווע מיך, איך ווער פארברענט, עס פלאקערט אין מיר תאות ניאוף, וויפיל איך פרוביר ווער איך נאר ווייטער און ווייטער פון דיר, העלף מיר..."

אויך זאלסטו זיך מאכן א שיעור אין משניות. דער רבי זאגט (שיחות הר"ן, סימן יט): "אֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה, ער טוט עבירות רחמנא לצלן און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם. וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד", אויב וועט ער זיך מאכן א קביעות צו לערנען יעדן טאג 'כך וכך' - וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס, אז עס נעמט ארויס דעם מענטש פון זיין שלעכטס.

אויך זאלסטו זיך מאכן א קביעות צו לערנען גמרא, און אז דו פארשטייסט נישט די גמרא - זאלסטו ווייטער לערנען אפילו אן פארשטיין, זאג די ווערטער פון די הייליגע גמרא. לערנען גמרא און זאגן גמרא פארברענט די קליפה וואס ווארפט אראפ אין פגם הברית הוצאת זרע לבטלה רחמנא לצלן, בפרט גמרא. דער רבי זאגט (לקוטי מוהר"ן חלק א, סימן ריד): "תַּלְמוּד בְּגִימַטְרִיָּא אוֹתִיּוֹת שֶׁל שְׁמָהּ 'לִילִית'", תלמוד באטרעפט אזוי ווי די קליפה וואס ווארפט אראפ דעם מענטש אין פגם הברית רחמנא לצלן, תלמו"ד באטרעפט פיר הונדערט אכציג, און די קליפה לילי"ת באטרעפט אויך פיר הונדערט אכציג, "עַל כֵּן יֵשׁ כֹּחַ בְּלִמּוּד הַתַּלְמוּד לְהַכְנִיעַ אוֹתָהּ", אז מען לערנט גמרא איז מען מכניע די קליפה.

האלט מיט דיר א פושקע, און ווען דו ווילסט א ישועה - לייג אריין אפאר פרוטות און בעט אין אידיש, אין דיין מאמע לשון, אויף דיין שפראך: "הייליגער באשעפער געב מיר א ישועה, העלף מיר..." וועסטו זען ישועות.

יעצט אין די דריי וואכן גייט מען נישט אין פלעצער וואס זענען מסוכן, עס שטייט אין שלחן ערוך (אורח חיים, סימן תקנ"א) אז קטב און מרירי זוכן ווי צו שעדיגן השם ישמרינו.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת פנחס, כ"א תמוז, שנת תשפ"ה לפרט קטן

טייערער ... נרו יאיר

איך בין זייער איבערגענומען פון דיר, ווי דו שטארקסט זיך אויף דיינע נסיונות, און דו קויפסט נישט קיין סמארטפאון. איך בין זייער צופרידן פון דיר, און איך האף צום אייבערשטן אז דו וועסט בלייבן פעלזן פעסט נישט צו האבן די כלי וואס נעמט אוועק יעדע ברעקל יראת שמים.

דא האסטו א קליינע תפילה צו בעטן דעם אייבערשטן יעדן טאג:

"הייליגער באשעפער ראטעווע מיך, דער יצר הרע ברענט אין מיר, איך האב שרעקליכע נסיונות צו קוקן עבירות. איך ווייס נישט וואס צו טון, איך שפיר ווי איך גיי אט אט דורכפאלן און זיך קויפן א כלי צו קוקן נאוף. הייליגער באשעפער היט מיך, האב רחמנות אויף מיר, איך וויל נישט פארלירן מיין יראת שמים, איך וויל נישט פארלירן מיין ווייב, מיינע קינדער, איך וויל זיין א צדיק, איך וויל זיין אפגעהיטן, איך וויל אמונה, איך וויל קדושה..."

אזוי זאלסטו בעטן יעדן טאג דעם אייבערשטן, און לייג צו דיינע אייגענע תפילות, ביז דער אייבערשטער וועט רחמנות האבן אויף דיר.

בעזרת ה' יתברך - יום ה' פרשת במדבר, ב' סיון, מ"ו לעומר, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

אז דיין פרנסה איז זיין א קאר סערוויס דרייווער - זאלסטו זיך זייער אכטונג געבן ווען דו האסט א פרוי אליין אין קאר, נישט רעדן קיין איין איבריגע ווארט, און נישט קוקן קיין איין קוק.

דאס וואס דו זאגסט אז דו שפירסט זיך ווי א שוטה מיטן נישט קוקן און נישט זיין העפליך, און דו שטארקסט זיך מיט די ווערטער פון די הייליגע חכמים (עדיות ה, ו): "מוּטָב לִי לְהִקָּרֵא שׁוֹטֶה כָּל יָמַי", ענדערש זיין א שוטה, "וְלֹא לֵעָשׂוֹת שָׁעָה אַחַת רָשָׁע לִפְנֵי הַמָּקוֹם", און נישט זיין קיין רשע איין סעקונדע פארן אייבערשטן; וויל איך דיר זאגן אז איך בין זייער איבערגענומען פון דיין יראת שמים, ווי דו שלאגסט זיך מיטן יצר הרע, אבער וויסן זאלסטו אז עס איז פינקט פארקערט, ווען מען פאלט אריין מיט א קאר סערוויס דרייווער וואס רעדט און קוקט וכו' וכו' - קוקן די פרויען אים אן ווי א שוטה, אידישע ווייבלעך קען מען נישט פארנארן און פארדרייען, זיי שפירן זייער רואיג און זיכער ווען דער דרייווער קוקט נישט, רעדט נישט, פרעגט נישט, טוט וואס ער האט צו טון, און די אלע וואס מאכן זיך ארענטליך, מען קוקט, מען שמייכלט, דארט זענען די פרויען נישט רואיג.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת במדבר, ב' סיון, מ"ו לעומר, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

זייער גוט טוסטו אז ווען דו גייסט צו דיין שוויגער קוקסטו אראפ, דו פירסט זיך מיט יראת שמים. עס איז נישט קיין סתירה מיט מכבד זיין, מכבד זיין מיינט רעדן שיין, זיך באדאנקען, העלפן; עס איז נישט קיין סתירה מיט זיך היטן די אויגן, זיך פירן איידל.

בנוגע דאס וואס מען זיצט די חתונה געהאטע קינדער, מאן און ווייב - איינער נעבן צווייטן, און עס איז אומבאקוועם ווען א צווייטע פארפאלק זיצט אנטקעגן דיר און דו דארפסט אראפקוקן; וואס קענסטו טון? קענסט נישט איבערדרייען די יוצרות ביי דיין שווער אין שטוב וכו', אם ירצה ה' ווען דו וועסט חתונה מאכן דיינע קינדער און זיי רופן צו דיר פאר סעודות זאלסטו מאכן די מענער פארנט, און די טעכטער און שנירן אונטן, נעבן די מאמע.

זיי פרייליך, גיי א טענצל אפאר מאל א טאג, און הער פרייליכע ניגונים, ווייל דאס היט דעם מענטש פון ניאוף. דער רבי זאגט (לקוטי מוהר"ן חלק א', סימן קסט), שמחה איז א שמירה אויף פגם הברית, אזוי ווי עס שטייט (תהילים קד, לד-לה): "אָנֹכִי אֶשְׂמַח בַּה', יִתַּמּוּ חַטָּאִים מִן הָאָרֶץ, וּרְשָׁעִים עוֹד אֵינָם", ווען איך פריי זיך מיטן אייבערשטן, דעמאלט יִתַּמּוּ חַטָּאִים מִן הָאָרֶץ – איז מער נישטא קיין עבירות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת במדבר, ב' סיון, מ"ו לעומר, שנת תשפ"ה לפרט קטן

לכבוד ... נרו יאיר

איך האב ערהאלטן דיין בריוו.

איך בין אזוי צעשוידערט פון ליינען וואס דו ביסט אריבער אלס יונגער בחור פון רוצחים וואס האבן דיך מטמא געווען אין מקוה; ווי קען זיין אזא זאך פאסירן, נאכדערצו ביי די שענסטע און פרומסטע קהילה? וואס איז פשט?! קיינער זעט נישט? נישטא קיין מקוה איד? נישטא קיין גבאים? אלעס איז הפקר?! ווי קען זיין א מקוה אינמיטן שטאט וואו הונדערטער אידן גייען א טאג און עס זאל פאסירן בריש גלי אז מען איז מטמא בחורים.

יעצט ווען דיין טעראפיסט זאגט דיר זאלסט נישט גיין אין מקוה, ווייל דו ביסט נעבעך קראנק מיט די מחלה פון (דברים כח, לד): "וְהָיִיתָ מְשֻׁגָּע מִמַּרְאֵה עֵינֶיךָ אֲשֶׁר תִּרְאֶה", דו קוקסט ווי א משוגע'נער רחמנא לצלן, דו ווילסט וויסן אויב דאס שטימט מיטן הייליגן רבינ'ס ווערטער; ענדערש זאלסטו יא גיין אין מקוה, נאר זוך א מקוה וואס איז ליידיג, זוך א צייט וואס איז ליידיג, וועט דיר זיין גרינגער.

אז דו ווילסט געהיילט ווערן פון די טומאה, זאלסטו זיך מאכן א שיעור אין לערנען יעדן טאג אכצן פרקים משניות. ווייל ווען מען זינדיגט אין פגם הברית, הוצאת זרע לבטלה רחמנא לצלן גייט דער פגם צו די מח. אזוי ווי דער זוהר זאגט (משפטים קי): "סליקא דיסודא עד אבא ואמא", מען פארלירט די מוחין, און דאס קען מען צוריק באקומען דורך לערנען משניות. אזוי ווי דער רבי זאגט (שיחות הר"ן, סימן יט): "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה, ער טוט עבירות רחמנא לצלן, און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד"; אויב וועט ער זיך מאכן א קביעות צו לערנען יעדן טאג כך וכך, וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס אז עס נעמט ארויס דעם מענטש פון זיין שלעכטס, און רבי נתן פארציילט (חיי מוהר"ן, סימן תקעג): "ווען דער רבי האט געזאגט דעם שיחה, האב איך געפרעגט דעם רבי'ן 'צי תורה קען העלפן אזא איינעם וואס איז אראפגעפאלן אין די עבירה פון פגם הברית - הוצאת זרע לבטלה רחמנא לצלן?' האט דער רבי געשריגן אויף מיר און געזאגט: 'דו ווייסט ווי גרויס דער כח פון תורה איז? תורה איז העכער פון אלעס'"; אפילו אז א מענטש ליגט נעבעך אין די עקלדיגע עבירה פון פגם הברית, הוצאת זרע לבטלה רחמנא לצלן, אויב ער וועט לערנען יעדן טאג 'כך וכך' וועט ער ווערן אן ערליכער איד, און ווי מוהרא"ש זאגט אז ער האט מקובל פון אנשי שלומינו אז ווען די רבי האט געזאגט די שיחה האט ער געמיינט מיט דעם דאס לערנען אכצן פרקים משניות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת נשא, ט' סיון, שנת תשפ"ה לפרט קטן

לכבוד ... נרו יאיר

עס ברענט א פייער אויפן גאס, עס איז אזוי געפערליך, מען קען נישט גיין אין גאס פון די גרויסע פריצות, מען דארף רחמי שמים נישט אראפצופאלן. דער הייליגער רבי פון סאטמער זכותו יגן עלינו האט געזאגט: "היינט אז מען גייט אין שול דארף מען רחמי שמים אז מען זאל אהיים קומען די זעלבע איד, נישט שוואכער, פון די גרויסע נסיונות".

מען דארף שרייען צום אייבערשטן: "הייליגער באשעפער העלף מיך, ראטעווע מיך, איך זאל קענען היטן מיינע אויגן, האבן ריינע אויגן, לויטערע אויגן, הייליגע אויגן, הייליגער באשעפער איך האב נישט די כוחות פאר דעם, איך האב אזא פייער, דער יצר הרע ברענט אין מיר, איך שפיר ווי איך האב נישט קיין בחירה, ראטעווע מיך"; אזוי זאלסטו שרייען טאג טעגליך צום אייבערשטן.

אויך זאלסטו דאווענען מיט מנין, קום אין שול און זיי מקפיד אויף מנין. חכמינו זכרונם לברכה זאגן (ברכות ז ע"ב; תענית ח ע"א), ווען מען דאווענט מיט מנין נעמט דער אייבערשטער אן די תפילות ווי אזוי מען זאל נאר דאווענען. קום אין שול מיט דרך ארץ, קום אין שול אנגעטון מיט הוט און רעקל, און רעד נישט אין שול.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת במדבר, כ"ז אייר, מ"ב לעומר, שנת תשפ"ה לפרט קטן

לכבוד ...

איך האב ערהאלטן דיין בריוו.

חס ושלום גיין צו א ביטש, דאס איז א פלאץ פון גלוי עריות, פרויען דארפן זיין אפגעהיטן נאך מער ווי מענער, חס ושלום זאגן אז פרויען מעגן גיין צו א ביטש וואו גוים שווימען מענער און פרויען; נישטא אן ערגערע פלאץ פון א ביטש, מען טאר נישט אהין גיין. נאר ביי א פלאץ וואו עס איז אפגעטיילט נאר פאר פרויען, נאר דארט מעגן פרויען גיין.

בעזרת ה' יתברך - ערב שבת קודש פרשת אמור, י"ח אייר, ל"ג בעומר, שנת תשפ"ה לפרט קטן

לכבוד מיין טייערער זון ... נרו יאיר

איך בין מתפלל פאר דיר דו זאלסט וואקסן א צדיק און טרעפן א גוטע שידוך.

דא אין מירון ביי רבי שמעון בר יוחאי איז זייער א גרויסע שמחה, אלע קומען זיך פרייען מיט די הילולא. איך האף צום אייבערשטן אז דו וועסט לערנען פלייסיג און אז דו וועסט ענדיגן גאנץ ש"ס וועל איך בלי נדר דיך נעמען דעם קומענדיגן יאר.

מאך זיך א קביעות צו לערנען אינדערפרי אכצן פרקים משניות און לכל הפחות זיבן בלאט גמרא, און ווי לאנג דו האסט נישט געלערנט די צוויי שיעורים, ח"י פרקים משניות און זיבן בלאט גמרא – זאלסטו נישט רעדן און שמועסן מיט קיינעם, אויך זאלסטו זאגן דעם יום תהילים יעדן טאג.

נעכטן ערב ל"ג בעומר בין איך מיט מאמי געגאנגען צו די ציון פון זיידי און באבי פון קארלסבורג, מיר האבן געבעטן פאר דיר און פאר די גאנצע משפחה.

יעצט אין די ברענעדיגע הייסע זומער טעג דארפסטו זיך צוגעוואוינען צו גיין אין גאס מיט די אויגן אראפ, נישט נאר ווען עס קומען די קליפות זאלסטו אראפקוקן, נאר אפילו ווען די גאס איז ליידיג, ווייל נאר אז מען קוקט אראפ קען מען ניצול ווערן פון שלעכטס.

בעזרת ה' יתברך - יום א' פרשת תזריע מצורע, כ"ט ניסן, י"ד לעומר, שנת תשפ"ה לפרט קטן

... נרו יאיר

איך האב ערהאלטן דיין בריוו.

הפצה איז נישט קיין סתירה צו שמירת עינים, זיך היטן די אויגן דארפן זיך אלע, די וואס מאכן נישט הפצה דארפן אויך רחמי שמים מיט שמירת עינים; זאלסטו נישט אפלאזן די הייליגע מצוה פון ראטעווען אידישע נשמות.

דו גיי הפצה, און ווען דו גייסט אין גאס זאלסטו אראפקוקן און וויינען צום אייבערשטן: "הייליגער באשעפער האב רחמנות אויף מיר און אויף אלע אידן, עס איז אזוי געפערליך, עס איז דור המבול, מען קען נישט אזוי לעבן, הייליגער באשעפער ראטעווע מיך פון קוקן איין שלעכטע קוק".

לאז נישט אפ די הייליגע ארבעט פון הפצה, גיי וואס מער הפצה, דער רבי זאגט (ספר המדות אות נאוף, סימן מא), מיט צוריק ברענגען אידישע קינדער צום אייבערשטן - פאררעכט מען חטאת נעורים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת תרומה, כ"ז שבט, שנת תשפ"ה לפרט קטן

לכבוד ... נרו יאיר

ווען דו טוסט אן די טלית, ווען דו מאכסט די עטיפה - זאלסטו בעטן דעם אייבערשטן ער זאל דיך ראטעווען פון די יצר הרע פון עבירות. דער רבי זאגט (לקוטי מוהר"ן חלק א', סימן ז), די מצוה פון ציצית ראטעוועט פון עריות; בעט דעם אייבערשטן אין דיין שפראך א קורצע תפילה: "הייליגער באשעפער, וואס וועט זיין מיט מיר, איך וויל האבן הייליגע אויגן, הייליגע מוחין".

איך בעט דיר מיין טייערער ליבער ברודער, קוק נישט קיין מאוויס, קוק נישט קיין עבירות; דו ווארטסט דאך אויף א נס, דו ווילסט עס זאל געשען א נס מיט דיר מיט דיין פרנסה, מיט וכו', דער רבי זאגט אבער (ספר המדות אות ישועה, סימן ז): "אֵין עוֹשִׂין נֵס לְנוֹאֵף", מען מאכט נישט קיין נס פאר א נואף; דארפסטו כשר'ן דיין טעלעפאן, דיין קאמפיוטער, לעפטאפ - נישט צו קוקן די עקלדיגע אויסגעלאסענע עבירות רחמנא לצלן, נאר אזוי וועט קומען א נס.

מען פארלירט אלעס דורך קוקן עבירות, מען פארלירט די נשמה, מען פארלירט די טעם פון דאווענען. דער הייליגער רבי זאגט (לקוטי מוהר"ן חלק א', סימן נ): "כִּי כָּל הַפּוֹגֵם בַּבְּרִית", ווער עס איז פוגם אין די עבירה פון פגם הברית, "אֵין יָכוֹל לְהִתְפַּלֵּל", קען נישט דאווענען, מען שפירט א ביטערע טעם אינעם דאווענען; וואס פעלט דיר אויס די גאנצע צרה, מען פארלירט אלעס דורך קוקן מאוויס און קליפס.

איך דארף מקצר זיין, איך וועל דיר נאך שרייבן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת נח, כ"ח תשרי, שנת תשפ"ה לפרט קטן

לכבוד ... נרו יאיר

טו וואס נח האט געטון, ווען די גאנצע וועלט איז געווען אזוי געפאלן, "כי השחית כל בשר את דרכו" וגו', ער האט געמאכט א תיבה; דאס מיינט מען תיבות התפילה, ער האט געניצט די זאך פון התבודדות ותפילה, "את האלקים התהלך נח", נח איז געגאנגען מיטן אייבערשטן, ער האט גערעדט צום אייבערשטן, זיך מתבודד געווען צום אייבערשטן; נאר אזוי איז ער געראטעוועט געווארן פון פגם הברית רחמנא לצלן.

איך בעט דיך זייער, מיר זענען יעצט ארויס פון די הייליגע טעג, בלייב ריין און הייליג, קוק נישט קיין מאוויס; וואלסטו געזען וואס איין ראי' אסורה טוט מיט די נפש, רוח ונשמה, ווי עס ווערט שווארץ און פארברענט - וואלסטו זיכער נישט געקוקט. איך בעט דיך, ראטעווע זיך, ראטעווע דיין נשמה, קוק נישט קיין קליפס, מאוויס, אויך נישט אידישע זאכן, ווייל אזוי ארבעט דער יצר הרע, ער ארבעט מיט א פלאן; קוק נאר דאס, און טו נאר דאס, "היום אומר לו עשה כך", היינט זאגט ער אים טו דאס "ומחר אומר לו עשה כך", און מארגן זאגט ער אים טו נאר דאס, "עד שאומר לו", ביז ער זאגט אים, "לך עבוד עבודה זרה", גיי דין עבודה זרה, רחמנא לצלן.

נעם נישט אריין אין שטוב דיין ארבעטס טעלעפאן, טייל אפ די ארבעט מיט די פרנסה, בוי דיין לעבן געזונט; ארבעט אין די שעות פון ארבעט און נאכן ארבעטן לייג אוועק דיינע כלים אין אפיס, און גיי אהיים און אין שול, זיי א איד, זיי א טאטע, זיי א מאן, זיי א מענטש מיט א קלארן פארשטאנד.

טו וואס נח האט געטון, ער האט געזען ווי דער וועלט ווערט חרוב, "כי השחת כל בשר את דרכו על הארץ", די דור המבול איז געווען איין שטיק ניאוף, אזוי ווי די היינטיגע דור, האט ער זיך געמאכט א תיבה, ער האט האט גערעדט ווערטער צום אייבערשטן, טו דו אויך אזוי, גיי התבודדות, גיי שריי צום אייבערשטן: "טאטע איך וויל זיין א איד, טאטע איך וויל נישט טון קיין עבירות, טאטע איך וויל נישט פוגם זיין בברית, איך וויל ריינע אויגן, ריינע מחשבות".

מארגן וועט זיין א שיעור, הלואי וועסטו קומען זיך אויפפרישן מיט דעם רבינ'ס עצות און התחזקות.

ווען דו גייסט איינקויפן פאר שבת, זאלסטו מער נישט קויפן קיין שום 'ליין מאטריאל', נעם נישט אריין אין שטוב 'ליין מאטריאל', האלט דיין שטוב ריין פון פרעמדע השקפות, זע דיין שטוב זאל זיין געבויט אויפן רבינ'ס ווערטער.

דער אייבערשטער זאל העלפן זאלסט האבן הצלחה אין אלע ענינים.