בעזרת ה' יתברך - יום ה' פרשת ויגש, ט' טבת, שנת תשפ"ד לפרט קטן
מרת ... תחי', מנהלת בית פיגא, קרית ברסלב ליבערטי
איך האב ערהאלטן אייער בריוו.
עס איז א גוטע זאך מען זאל מאכן מיט די עלטערע מיידלעך עקסערסייז, עס איז גוט און געזונט ברוחניות ובגשמיות.
פארשטייט זיך עס דארף זיין בצניעות; נישט מיט קיין הויזן אדער לעגינגס.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - יום ד' פרשת חיי שרה, כ"ד מר-חשון, שנת תשפ"ד לפרט קטן
מרת ... תחי'
אויב איר מאכט אין שטעטל אן עקסערסייז קלאס פאר פרויען און מיידלעך - קען עס נאר זיין בצניעות; אז אלע וואס צאלן געלט צו קומען צו די קלאס - קומען איידל אנגעטון, ווי עס פאסט פאר אידישע טעכטער. קיינער מוז נישט קומען, אבער ווער עס קומט - קומט אנגעטון איידל, מען רעדט איידל, מען פארברענגט און מען האט הנאה, און נאר אויב עס וועט זיין מיט צניעות – וועט איר האבן הצלחה. אויב וועט זיין ביי אייך אין שטוב א פלאץ פון פריצות - וועט נישט זיין קיין הצלחה, און אייער שטוב וועט חרוב ווערן חס ושלום.
עס זענען דא צעבראכענע ווייבלעך, צעבראכענע מיידלעך פון צעבראכענע שטיבער וואס זענען נישט צופרידן מיט זיך, א שאד; וואלט מען געטון די עצות פון רבי'ן, בעטן יעדן טאג צו זיין פרייליך - וואלט מען געזען גרויסע ניסים, מען וואלט אנגעהויבן שפירן א טעם אין לעבן, מען וואלט נישט געלאפן צו די גוי טמא זיך אנטון ווי זיי.
אז מען וועט קומען ביי אייך מאכן עקסערסייז מיט הויזן אדער לעגינגס און רעדן ניבול פה - וועט נישט זיין קיין הצלחה, און עס קען שאטן פאר אייער שטוב.
הויזן פאר פרויען און מיידלעך איז פריצות; אפילו ביים שלאפן און אפילו ביי עקסערסייז. אזוי אויך לעגינגס פאר א פרוי און מיידל איז אן עקל, א גרויל, און יעדע זאך וואס מען טוט ביי אונז אין די קהילה וואס איז אונטער מיין נאמען - דארף מען קומען אנגעטון איידל.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ב' פרשת תולדות, כ"ז מר-חשון, שנת תשפ"ג לפרט קטן
... תחי'
איך האב ערהאלטן אייער בריוו.
הויזן פאר א מיידל איז פריצות און דאס זעלבע לעגינגס; אפילו ביים מאכן עקסערסייז טאר מען נישט גיין מיט הויזן און לעגינגס.
דעריבער אויב וויל מען מאכן ביי אונז אין בית פיגא סקול עקסערסייז מיט די מיידלעך - קען מען דאס נאר טון צניעות'דיגערהייט, מען קען נישט און מען טאר נישט אנטון הויזן ביים מאכן עקסערסייז. אויך זאל מען נישט קומען אין סקול מיט לאנגע קליידער, מען קען מאכן עקסערסייז מיט די געהעריגע קליידער מיט וואס מען קומט, וד"ל.
איך בעט אייך איר זאלט שטיין אויף דעם, די תלמידות זאלן זיך פירן בצניעות.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ד' פרשת תולדות, כ"ט מר-חשון, ערב ראש חודש כסליו, שנת תשפ"ג לפרט קטן
לכבוד אנשי שלומינו תלמידי היכל הקודש, תושבי קרית ברסלב ליבערטי, ה' עליהם יחיו
בשורה טובה פאר אנשי שלומינו, איך האב געעפנט א דזשים אין שטעטל, א פלאץ וואו מען קען מאכן עקסערסייז פאר די נשמה.
די פלאץ איז אין שול; מען קען קומען יעדן אינדערפרי לערנען און דאווענען, זיך אויפבויען די נשמה; מען זאל האבן א געזונטע נשמה, א שטארקע נשמה.
אויך ווערט די גוף אויפגעבויט און געזונט, עס ווערט זייער שטארק. אזוי זאגט די תורה (משלי א, ג): "כִּי לִוְיַת חֵן הֵם לְרֹאשֶׁךָ", אז מען לערנט תורה - ווערט די קאפ געזונט און בא'חן'ט, "וַעֲנָקִים לְגַרְגְּרֹתֶךָ", אז מען לערנט תורה - ווערט די האלז געזונט און באצירט. נאך שטייט (שם ג, ח): "רִפְאוּת תְּהִי לְשָׁרֶךָ", אז מען לערנט תורה ווערט די בויך אויסגעהיילט, "וְשִׁקּוּי לְעַצְמוֹתֶיךָ", און אז מען לערנט תורה ווערן די מארך פון די ביינער געשטארקט (עירובין נד).
איך בעט דיר זייער, נישט וואס יעדער איינער טוט - דארפסטו נאכטון. ענדערש קום מאכן עקסערסייז אויף דיין נשמה, בוי אויף דיין נשמה. קום אין שול לערנען, מאך נאך די אינגעלייט וואס קומען אין שול, וואס זענען זיך קובע עתים לתורה. דער גוי האט נישט קיין תורה, האט נישט קיין מקוה און נישט קיין דאווענען - גייט ער אינדערפרי אויפבויען זיין קערפער, דער גוי האט נישט קיין עתיד, ביי אים איז דער גוף די גאנצע לעבן, לויפט ער אינדערפרי טון דאס. דו ביסט א איד, דו האסט א נשמה - קום אין שול, זיי זיך קובע עתים לתורה.
מאך זיך א שיעור אין רבינ'ס ספרים - וועט מען דיר נישט קענען פארנארן. דער רבי זאגט (חיי מוהר"ן, סימן רס) דער וואס האט געטרינקען פון די אונגארישע וויין - אים קען מען נישט פארנארן.
גיי אביסל התבודדות, גיי שפאצירן הינטער דיין שטוב, רעד זיך אויס צום אייבערשטן, בעט אים: "הייליגער באשעפער, געב מיר אביסל שכל, איך זאל געדענקען וואס איז תכלית, וואס וועט בלייבן פון מיר".
דער אייבערשטער זאל העלפן זאלסט האבן הצלחה אין אלע ענינים.
