בעזרת ה' יתברך - יום ה' פרשת אחרי-ב', כ"ד ניסן, ט' לעומר, שנת תשפ"ד לפרט קטן
לכבוד ... נרו יאיר, קרית ברסלב
טראג אוועק אלע בעלי חיים פון שטוב, מען ליידט אסאך צרות אז מען האט בעלי חיים אין שטוב פון די עבירה פון צער בעלי חיים.
געב זיך אפ מיט דיינע קינדער און לאז די פארמערס האדעווען הינער וכו'.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ג' פרשת יתרו, שובבי"ם, כ' שבט, שנת תשפ"ד לפרט קטן
מרת ... תחי'
איך האב ערהאלטן אייער בריוו.
איך פריי זיך זייער צו הערן אז איר זאגט תהלים, און אז איר האט שוין געענדיגט כמעט צוויי הונדערט מאל. ווען איר זאגט תהלים – זאלט איר אריינפלעכטן אייערע אייגענע לויב ווערטער און אייגענע בקשות, עס מאכט א גרויסע רעש אין הימל ווען מען לויבט און מען בעט דעם אייבערשטן אינאיינעם מיט תהלים.
שפילט נישט מיט קיין קעץ; גלעט זיי נישט און האט גארנישט מיט קיין בעלי חיים, בפרט אין די חדשים וואס מען ווארט למזל טוב - דארף מען זיך אויך אכטונג געבן נישט קוקן אויף טמא'נע בעלי חיים.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ה' פרשת במדבר, כ"ז אייר, שנת תש"פ לפרט קטן
טייערער ... נרו יאיר.
איך הער פון דיין מלמד זייער גוטע זאכן אויף דיר; אז דו לערנסט, דו דאווענסט און דו פירסט זיך מיט דרך ארץ. דער אייבערשטער זאל העלפן זאלסט אויסוואקסן א גרויסער צדיק.
האסט מיר געפרעגט אויב דו קענסט האבן הינדלעך ביי דיר אין שטוב; עס איז נישט קיין פראבלעם צו האדעווען הינער, מען דארף נאר זייער אכטונג געבן זיי צו געבן עסן און טרינקען און זיי זאלן האבן וואו צו שלאפן ביינאכט.
גיי אביסל שפאצירן אין פעלד; ארום דיין שטוב האסטו שיינע פעלדער, דארט זאלסטו זינגען צום אייבערשטן און וואס דו דארפסט זאלסטו בעטן נאר פון אים.
