בריוון פונעם ראש ישיבה שליט"א

#42 - גיין נאך צדקה אום פורים
ישועות, צדקה, ישיבה, דאווענען, פורים

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן


 


לכבוד מיין טייערער ... נרו יאיר


איך וויל דיר בעטן אויב דו קענסט צוזאמנעמען די בחורים בימי הפורים און גיין צאמנעמען צדקה פאר די ישיבה. היינט איז אנדערש ווי יארן צוריק, היינט איז דא זייער אסאך אידן וואס זענען ווארעם צו די ישיבה, זיי האבן א געפיל פארן רבי'ן, אידן טיילן אסאך צדקה; איז גוט זאלסט ארומגיין מיט די בחורים.


זאג פאר אלע בחורים זיי זאלן נישט ארויפקומען צו מיר אין שטוב פורים, איך נעם נישט אויף קיין בחורים. פארנאכטס וועלן מיר מאכן א סעודה אין ישיבה, און אריין טאנצן אין די נאכט, דעמאלט קענען די בחורים קומען, אבער דורכן טאג זאלן זיי עוסק זיין אין צאמנעמען צדקה, אויך די אינגעלייט קענסטו אנווארעמען זיי זאלן גיין נאך צדקה בימי הפורים.


איך דארף יעצט האבן זייער אסאך געלט, סיי צו קענען באצאלן אלע איינגעשטעלטע, סיי צו העלפן משפחות איינצורישן דעם יום טוב פסח, א שאד צו קומען זיצן ביי מיר אין שטוב, א שאד צו פארברענגען די צייט; מילא איינער וויל ברענגען משלוח מנות – מילא, דאס דארף נישט נעמען מער ווי צוויי דריי מינוט.


זיי זיך מקבל נישט צו רעדן ביים דאווענען, דארפסט דאך א ישועה, דארפסט א שידוך; זאלסטו זיך מקבל זיין מער נישט צו רעדן ביים דאווענען, אויך נישט זיצן נעבן איינער וואס רעדט צו דיר אין שול.

#41 - גיי אין שול דאווענען מיט א סידור
ישועות, בית המדרש, דאווענען, מנין

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן


 


לכבוד מיין טייערער ... נרו יאיר, קרית ברסלב


איך האף אז די זאכן וואס מיר האבן גערעדט ווערט דיר בעסער, איך ווארט צו הערן גוטע נייעס.


נעם זיך פאר די איין זאך מיט אלע כוחות, צו דאווענען די דריי תפילות, שחרית מנחה מעריב – אין שול, מיט מנין, און אויב דו ביסט פארשלאפן, אדער פארשפעטיגט, און עס איז נישטא נאך א מנין – זאלסטו נישט בלייבן אין שטוב, נאר גיין אין שול דאווענען מיט א סידור.


איך זאג דיר צו, דו וועסט זען גרויסע ניסים, דו וועסט זען ישועות.


שרייב מיר צוריק.

#40 - וואס נאך קענען מיר טון אז די ישועה זאל קומען?
תודה והודאה, ישועות, סגולות

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן


 


לכבוד מיין טייערער ... נרו יאיר, וזוגתו תחי'


ענק האבן שוין געטון אזויפיל סגולות צו געהאלפן ווערן, ענק האבן שוין געמאכט אזויפיל גוטע קבלות און ענק פרעגן 'וואס נאך קענען מיר טון אז די ישועה זאל קומען?'


איין סגולה בלייבט ענק איבער, וואס דאס וועט ענק ברענגען די ישועה, די סגולה פון "תודה והודאה", דאנקען און לויבן.


ביידע אינאיינעם זאלן ענק יעדן טאג אוועקגעבן אביסל צייט, אפאר מינוט, און אויסלויבן דעם אייבערשטן פאר די חסדים וואס ער טוט מיט ענק. רעכנט אויס די חסדים און לויבט אים אויף דעם, זאגט: "שכוח אייבערשטער איך בין געזונט, מיין ווייב איז געזונט", און זי זאגט: "שכוח אייבערשטער איך בין געזונט, מיין מאן איז געזונט", און אזוי ווייטער; דאס עפנט אויף די טויערן פאר ניסים גלוים.

#39 - דארפסט א ישועה, געב צדקה צו דרוקן ספר "אשר בנחל"
ישועות, הדפסה, אשר בנחל

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן


 


לכבוד מיין טייערער ... נרו יאיר


דו דארפסט דאך א ישועה, דו ווארסט שוין א שטיק צייט צו געהאלפן ווערן, זאלסטו געבן צדקה צו דרוקן ספר "אשר בנחל"; מוהרא"ש האט מבטיח געווען, ווער עס וועט דארפן א ישועה – זאל דרוקן זיינע ספרים, בפרט ספר הקדוש "אשר בנחל" – וועט ער גלייך זען א ישועה.

#38 - ווען מען דארף א גרויסע נס אין די געשעפטן
ישועות, פרנסה, טעלעפאן, אידישע שטוב, דאווענען

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן


 


לכבוד מיין טייערער ... נרו יאיר


דארפסט יעצט א גרויסע נס אין דיינע געשעפטן, ווען אלע טענענטס נעמען צאם קעגן דיר, די בעסטע זאך איז, נעם אריין דעם באשעפער אין די געשעפט; זאלסט געבן צדקה, אויך זאלסטו אלעס אפלאזן ווען עס קומט די צייט צו דאווענען שחרית מנחה מעריב, גיי אין שול, פארמאך דעם טעלעפאן און רעד צום גרויסן באשעפער, בעט אים ער זאל דיר העלפן.


אויך אין שטוב זאלסטו נישט האבן דיין טעלעפאן, דיינע קינדער וואקסן אויף און מען קען זיי חס ושלום פארלירן מיט א בלינק מיט די אויג.

#37 - אז דו דארפסט א ישועה, העלף דרוקן ספרים און קונטרסים
ישועות, הדפסה, אשר בנחל, דף גמרא, תיקונים

בעזרת ה' יתברך - יום ג' פרשת תצוה, שובבי"ם, י"א אדר א', שנת תשפ"ד לפרט קטן


 


לכבוד ... נרו יאיר


אז דו דארפסט א ישועה זאלסטו נעמען א חלק אין דרוקן די ספרים און קונטרסים פון מוהרא"ש, מוהרא"ש האט צוגעזאגט, ווער עס וועט העלפן דרוקן זיינע ספרים און קונטרסים, בפרט ספר אשר בנחל - וועט זען אפענע ישועות.


מוהרא"ש פלעגט בעטן פינף הונדערט דאלער פאר א זכות צו דרוקן אשר בנחל, מיר זענען געבליבן מיט די אלטע פרייז, און ווער עס העלפט דרוקן די ספרים און קונטרסים - זעט אפענע ישועות.


מיר האבן יעצט אסאך פרישע קונטרסים צו דרוקן, מיר ווארטן אויף נדבנים, ווער עס וויל נעמען א חלק אין מקרב זיין און מחזק זיין נשמות ישראל מיט די עצות פון רבי'ן.


קומענדיגע וואך ענדיגן מיר מסכת בבא קמא און מיר הויבן אן מסכת בבא מציעא, איך וויל דיך מחזק זיין זאלסט היינט אנהויבן לערנען דעם בלאט גמרא, אפילו נאר בגירסא, בלי הבנה; מוהרא"ש זאגט, ווער עס לערנט גמרא יעדן טאג - דארף שוין נישט קיין שום תיקון; גמרא וואשט אים אפ, גמרא פארברענט אלע שלעכטס.


דער אייבערשטער זאל העלפן זאלסט האבן הצלחה אין אלע ענינים.

#36 - טוט די סגולות פון הייליגן רבי'ן צו האבן קינדער
קינדער, תודה והודאה, ישועות, צדקה

בעזרת ה' יתברך - יום ב' פרשת חקת בלק, ז' תמוז, שנת תשפ"ג לפרט קטן


 


מרת ... תחי'


דאנקט דעם אייבערשטן יעדן טאג, רעכנט אויס דאס גוטס וואס דער אייבערשטער טוט מיט אייך און דאנקט אויף יעדן פרט, דאס וועט עפענען פאר אייך א טיר אין הימל פאר ישועות.


זארגט נישט, איר וועט האבן קינדער. טוט די סגולות פון הייליגן רבי'ן, געבט אפאר פרוטות לצדקה יעדן טאג. דער רבי זאגט (ספר המדות אות בנים, סימן כב): "עַל יְדֵי צְדָקָה זוֹכֶה לְבָנִים", דורך צדקה איז מען זוכה צו האבן קינדער, און געבט די צדקה מיט ביידע הענט. אזוי ווי דער רבי זאגט (שם אות צדקה, סימן כז): "יִתֵּן לִצְדָקָה בִּשְׁתֵּי יָדַיִם, וְיִהְיֶה תְּפִלָּתוֹ נִשְׁמַעַת", דורך געבן צדקה מיט ביידע הענט ווערן די תפילות אנגענומען, און בעטס: "הייליגער באשעפער, בזכות די מצוה פון צדקה - געב מיר געזונטע, ערליכע קינדער".


איך פריי זיך זייער יעדעס מאל איך זע אייער מאן נרו יאיר; איך זע ער פירט זיך מיט יראת שמים, ער קומט דאווענען און אויך זע איך אים לערנען.


דער אייבערשטער זאל העלפן איר זאלט האבן הצלחה אין אלע ענינים.

#35 - מען דארף האקן און האקן, ביז מען איז מצליח
ישועות, משניות, עקשנות, תפילה

בעזרת ה' יתברך - יום ב' פרשת שלח, כ"ג סיון, שנת תשפ"ג לפרט קטן


 


לכבוד מיין טייערער ... נרו יאיר


ווען מען וויל עפענען א פארמאכטע זאך, מען האקט מיטן האק - ווייסט יעדער אז עס גייט נישט מיט איין האק, נאר דורך האקן און האקן אן אן אפשטעל, ביז מען איז מצליח צו עפענען. אזוי איז מיט פועל'ן א ישועה, מען דארף בעטן און בעטן און נאכאמאל בעטן - ביז מען איז מצליח צו פועל'ן ישועות.


באניי צוריק דיין שיעור אין משניות, זאג יעדן טאג כמה פרקים משניות, כסדרן דיקא; דאס היט אפ פון אלעם שלעכטס בזה ובבא.


ווען מען וועט אוועק גיין פון דער וועלט - וועט מען זען דאס גרויסקייט פון לערנען משניות, מען וועט זיך דעמאלט מחי' זיין מיט יעדע פרק, יעדע משנה.

#34 - פרעגן אן עצה פון א צדיק, דאס אליינס איז די ישועה
ישועות, צדיקים, שאלות, אמונת חכמים, פירושים, משלי

בעזרת ה' יתברך


יום ג' פרשת ויקהל-פקודי, כ"א אדר, שנת תשפ"ג לפרט קטן


 


לכבוד מיין ליבער ... נרו יאיר ברסלב, ליבערטי


"וּתְשׁוּעָה", און א הילף קומט, "בְּרֹב יוֹעֵץ", ווער עס איז זיך אסאך מתיעץ (משלי יא, יד).


דער הייליגער רבי טייטשט (לקוטי מוהר"ן חלק א', סימן קמג): "וּתְשׁוּעָה", און א הילף קומט, "בְּרֹב יוֹעֵץ", ווען מען נעמט אן עצה פונעם צדיק. 'רב' דאס איז א רבי, א צדיק. אזוי ווי חכמינו זכרונם לברכה זאגן (תענית ט.): "מֹשֶׁה, אַיְּדֵי דִּנְפִישׁ זְכוּתֵהּ כְּרַבִּים דָּמֵי", משה רבינו איז ווי אסאך; ווייל ווען מען פרעגט אן עצה פון א צדיק, איז אפילו עס קומט נישט אויס גוט, ווייסט מען אז דאס איז פונעם אייבערשטן. און אז מען נעמט נישט קיין עצה פונעם צדיק ברענגט מען זיך אליינס דאס שלעכטס.


דעריבער איז זייער וויכטיג צו גיין צו צדיקים און נעמען ביי זיי עצות אויף יעדע זאך. מיט דעם אליינס וואס מען פרעגט אן עצה, דאס אליינס איז די ישועה, דאס איז ממתיק אלע דינים, והבן למעשה.


 

#33 - רוף ארויס די שמועסערס אינדרויסן פון שול
ישועות, דרך ארץ, בית המדרש, חובות, דאווענען

בעזרת ה' יתברך


יום ה' פרשת עקב, כ"א מנחם-אב, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


איך בעט דיר זייער זאלסט נישט שמועסן ביים דאווענען, איך הער אז ביי ענק אין שול אין עצתו אמונה איז דא א גרופע שמועסערס, מען רעדט אויפ'ן קול און מען לאכט ביים דאווענען.


דו דארפסט דאך א נס ארויסצוגיין פון דיינע חובות; אז דו וועסט זיך מקבל זיין נישט צו רעדן ביים דאווענען - וועסטו ארויסגיין פון דיינע חובות.


אויב דו האסט א שווערע נסיון מיט רעדן, דו האסט עפעס גאר א וויכטיגע וויץ צו זאגן - זאלסטו ארויסרופן די וואס שמועסן און לאכן אינדרויסן פון שול און דארט דערציילן די וויכטיגע זאכן, אבער נישט אין שול; שטער נישט די מתפללים פון דאווענען.

#32 - נישט רעדן פון אנהויב דאווענען ביז'ן סוף, וועסטו האבן א ישועה
ישועות, סגולות, בית המדרש, דאווענען, גבאי, עונשים

בעזרת ה' יתברך


יום ה' פרשת עקב, כ"א מנחם-אב, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


די מתפללים אין בית המדרש עצתו אמונה רעדן זיך אפ אז מען קען נישט דאווענען, דו שטערסט דאס דאווענען, דו שמועסט און לאכסט אויפ'ן קול מיט קלות ראש.


איך בין גרייט צו מאכן מיט דיר א געשעפט, דו דארפסט דאך א גרויסע ישועה; אויב דו ביסט מקבל אויף זיך נישט צו רעדן פון אנהויב דאווענען ביזן סוף - וועסטו האבן א ישועה, און אויב חס ושלום דו וועסט ווייטער זיך אויפפירן מיט קלות ראש אין בית המדרש - וועל איך זאגן די גבאים זאלן דיר ארויסטרייבן.


די אלע וואס שטערן דאס דאווענען - וואלט ענדערש געווען זיי זאלן בלייבן אין שטוב, נישט קומען.


איך האב היינט אינדערפרי פארגעהאלטן די גבאים פאר'ן גארנישט טון און פאר'ן מיר גארנישט זאגן. איך האב זיי געזאגט: "סתם צו האבן דעם טיטל 'גבאי' און לאזן שמועסן, לאכן וכו' - דאס איז נישט גבאים", איך האב זיי געזאגט, אויב דו וועסט ווייטער שמועסן און לאכן ביים דאווענען, זאלן זיי דיר אנכאפן ביים קארג און ארויסטראגן פון שול.


אז דו וועסט אויפהערן פארשעמען דעם אייבערשטנ'ס הויז - וועסטו האבן א גרויסע נס, און אז נישט - ציטער איך וואס וועט זיין.

#31 - אכטונג געבן צו זיצן צוגעדעקט מיט צניעות
צניעות, ישועות, חיזוק פאר פרויען, שבת ליכט

בעזרת ה' יתברך


יום ד' פרשת ואתחנן, י"ג אב, שנת תשפ"ב לפרט קטן


 


מרת ... תחי'


נעמט זיך פאר צו גיין אנגעטון גענוג לאנג, ווען מען זיצט זאלן די קניען זיין גוט צוגעדעקט. דאס וועט זיין א זכות פאר ענק, איר וועט זען א ישועה בקרוב.


זייט נישט ברוגז וואס איך שרייב אייך דאס, אסאך מאל כאפט דער מענטש אליינס נישט אז די קניען זענען אויפגעדעקט ביים זיצן, דערפאר שרייב איך אייך דאס.


ווען איר צינדט אן די שבת ליכט - זאלט איר בעטן דעם אייבערשטן פאר אייך און פאר אייערע דורות זיי זאלן זיין ערליכע אידן. צינדט אן צוויי ליכט פון שמן זית כנגד זכור ושמור, און נאך פיר ליכט כנגד שם הוי', און פאר יעדן קינד לייגט מען צו נאך א ליכט.


מוהרא"ש ברענגט א שיינע מנהג פון צדיקים, אז פרויען זאלן אנטון ביים ליכט צינדן א ווייסע שירצל לכבוד די גרויסע מצוה פון צינדן ליכט.


עס זענען דא יונגע ווייבלעך וואס זאגן עס איז א יאנטשי זאך, ברוך ה' ביי אונז איז שיין און חשוב אלעס וואס צדיקים זאגן.

#30 - אנשטאט טראכטן פון די גרויסע חובות, טראכט פונעם גרויסן באשעפער
תפילות אויף אידיש, תודה והודאה, צרות, ישועות, אמונה, התחזקות, פרנסה, חובות, געלט

בעזרת ה' יתברך


ערב שבת קודש פרשת ואתחנן, חמשה עשר באב, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


פארליר זיך נישט, גיי נישט אריין אין א קטנות הדעת; דו וועסט נישט בלייבן אין די לאך פון חובות, נאך אביסל וועסטו ארויסקריכן דערפון.


איך בעט דיר זייער, פארליר זיך נישט; אנשטאט טראכטן טאג און נאכט ווי גרויס זענען די חובות וואס דו האסט - זאלסטו טראכן ווי גרויס דער באשעפער איז; מעגסט שוין טראסטן דעם אייבערשטן, אזויפיל ניסים האסטו שוין געזען אין לעבן, אזויפיל האסטו שוין גע'דאגה'עט און ביים סוף האט זיך אויסגעלאזט פון אלע דאגות - איין גרויסער בוידעם, איז פארוואס זאלסטו ווייטער דאגה'נען? טראכט פונעם אייבערשטן - וועסטו זען ניסים.


דער הייליגער רבי זאגט (לקוטי מוהר"ן חלק א', סימן כג) די אלע וואס טראכטן פון געלט האבן א טונקלקייט אויפ'ן פנים, אן אויסגעלאשנקייט, עצבות ומרה שחורה, אנפין חשוכין.


טראכט פון באשעפער, טראכט פון רבי'ן, פון צדיקים; גיי אביסל שפאצירן מיט דיין ווייב און קינדער, און זינג זיך: "שכוח אייבערשטער פאר מיין שיינע לעבן, פאר מיין ווייב און קינדער", וועט שוין אויך זיין שפע.

#29 - מען דארף דאווענען מיט הכנעה און דרך ארץ
תודה והודאה, ישועות, בית המדרש, בריוו, דאווענען

בעזרת ה' יתברך


יום ד' פרשת קרח, א' דראש חודש תמוז, שנת תשפ"ב לפרט קטן


 


לכבוד מיין טייערער ... נרו יאיר ברסלב, ליבערטי


דאנק און לויב דעם אייבערשטן אז דיין קינד איז געזונט, פארגעס נישט די ניסים וואס דער אייבערשטער האט געטון מיט דיר; פארגעס נישט ווי פארלוירן דו און דיין ווייב זענען געווען, ווי שטארק איר האט זיך געמוטשעט און ווי דער אייבערשטער האט דיר געהאלפן.


איך וויל דיר בעטן זאלסט קומען דאווענען די דריי תפילות, שחרית, מנחה און מעריב מיט דרך ארץ; ווען מען קומט אין שול דארף מען קומען מיט דרך ארץ, אנגעטון מיט א הוט און רעקל, אביסל רעספעקט פאר'ן אייבערשטנ'ס הויז. ביי די ארבעט און ווען דו ביסט באשעפטיגט אין דיינע זאכן, דעמאלט קענסטו גיין ווי אזוי דו גייסט, אבער ווען מען קומט אין שול, דארף מען קומען מיט דרך ארץ.


אויך זאלסטו זיך מקבל זיין נישט צו רעדן ביים דאווענען; מען דארף דאך אזויפיל רחמי שמים אויף טריט און שריט, מען ווייסט דען וואס גייט זיין די קומענדיגע סעקונדע מיט זיך, מיט די ווייב און קינדער? דארף מען דאווענען מיט הכנעה, מיט דרך ארץ.


איך האף דו וועסט דאס אלעס מקיים זיין.


ליין איבער דעם בריוו יעדע וואך.

#28 - דער אייבערשטער איז גרעסער פון אלע דאקטורים
תפילה והתבודדות, ישועות, רפואה, שמות הצדיקים, בטחון

בעזרת ה' יתברך


ערב שבת קודש פרשת שלח, מברכים החודש, כ"ה סיון, שנת תשפ"ב לפרט קטן


 


מרת ... תחי'


איך האב ערהאלטן אייער בריוו.


לאזט אייך נישט צעברעכן פון קיין שום זאך, ווערט נישט דערשראקן, דער אייבערשטער איז זייער גרויס, ער איז גרעסער פון אלע דאקטורים; א דאקטער וואס היילט איז א גוטער שליח, אבער די דאקטורים וואס דערשרעקן - זיי טאר מען נישט אויסהערן.


בלייבט שטארק מיט אמונה בה', פארלאזט אייך נאר אויפ'ן אייבערשטן; דער אייבערשטער וועט אייך העלפן, איר וועט זען וואונדער.


זאגט נעמען פון צדיקים און בעטס דעם באשעפער אז בזכות די צדיקים וואס איר האט מזכיר געווען זייערע נעמען - זאלט איר זען א ישועה.


שטארקט אייך, זייט נישט פארלוירן, דער אייבערשטער איז מיט אייך.


א גוט שבת.

#27 - געעפנט די מקוה
מקוה, ישועות, שטעטל

בעזרת ה' יתברך


יום א' פרשת אחרי ב', כ"ג ניסן, אסרו חג, שנת תשפ"ב לפרט קטן


 


לכבוד אנשי שלומינו תלמידי היכל הקודש, תושבי קרית ברסלב ליבערטי, ה' עליהם יחיו


איך וויל לאזן וויסן פאר אלע אנשי שלומינו אז די מקוה טהרה איז שוין אפן פאר א גאנצע וואך.


די מקוה טהרה שטייט בהשגחת אונזער דיין שליט"א, די מקוה איז געבויט געווארן דורך די חשוב'ע כולל אינגעלייט אינאיינעם מיט אונזער דיין שליט"א, גרויסע רבנים האבן באוואונדערט די כשרות המקוה.


היות די שטעטל איז אויסגעשפרייט האבן מיר נאך א מקוה פאר שבת ויום טוב אין די ... געגנט.


ביידע מקוואות זענען זייער הייליג און עס האט די סגולות פון געהאלפן ווערן מיט אלע ישועות; דאס איז געבויט געווארן מיט גרויס קדושה.


דא איז די פלאץ זיך צו באדאנקען פאר משפחת ... און משפחת ... פאר'ן אוועקגעבן א חלק פון זייער דירה פאר טהרתן של ישראל; דער אייבערשטער זאל זיי בענטשן מיט אלע ברכות.

#26 - די ישועה קומט בקרוב, און מען פארגעסט פון די שווערע טעג
קינדער, תודה והודאה, צרות, ישועות, נסיונות, קבלה טובה

בעזרת ה' יתברך


יום ד' פרשת אחרי א', י"ב ניסן, שנת תשפ"ב לפרט קטן


 


מרת ... תחי'


איר וועט האבן קינדער, זייט נישט באזארגט, זייט נישט פאר'דאגה'ט.


דער הייליגער רבי זאגט (ספורי מעשיות מעשה יא, מבן מלך ובן השפחה שנתחלפו) ווען עס ווערט טאג הערט מען אזא געלעכטער, דער נאכט פארלירט זיין נאמען, מען געדענקט מער נישט אז עס איז געווען אמאל נאכט; דאס גייט ארויף בכלליות אויף די גאולה העתידה, עס וועט פארגעסן ווערן די גלות טעג וואס איז צוגעגליכן צו נאכט, און אויך בפרטיות ביי יעדן איינעם.


ווען עס איז נאכט, מען ווארט אויף א שידוך, נאכדעם ווען עס ווערט טאג, מען האט חתונה – געדענקט מען נישט אז מען האט אמאל געווארט אויף א שידוך. נאכדעם ווען מען ווארט אויף קינדער, עס איז ממש נאכט; מען וויינט, מען ווארט, מען מיינט שוין אז מען ווארט שוין, דערווייל ווערט מען אנטוישט, חודש נאך חודש, עס איז ממש נאכט; פלוצלונג ווערט טאג, און מען פארגעסט אז עס איז בכלל געווען נאכט.


בעט איך אייך זארגט נישט, איר וועט האבן קינדער. איין זאך זאלט איר טון, איין קבלה טובה, נעמט זיך פאר צו דאנקען דעם אייבערשטן יעדן טאג. רעכנט אויס פאר'ן אייבערשטן גוטע זאכן פון אייער לעבן און דאנקט אים; דאס עפנט אויף די טירן אין הימל פאר ישועות.

#25 - זאג פרקים משניות, וועסטו שנעל ווערן ריין און אויסגעלייטערט
ישועות, תשובה, משניות, לימוד התורה

בעזרת ה' יתברך


יום ד' פרשת צו, י"ג אדר ב', תענית אסתר, שנת תשפ"ב לפרט קטן


 


לכבוד ... נרו יאיר


איך האב ערהאלטן דיין בריוו.


ווען מענטשן וואלטן ווען געוויסט דאס גרויסקייט פון לימוד התורה, ווי שטארק און ווי שנעל דאס העלפט ארויס צו קריכן פון בלאטע, פון שווערע טיפע טומאות - וואלטן אלע געזען גרויסע ישועות, בפרט דורך לימוד ח"י פקרים משניות; לימוד משניות האט א כח אז עס רייניגט די נשמה פון אלע טומאות, פון אלע זוהמות און פון אלע שלעכטס.


עס איז דא גענוג און נאך צייט פאר ח"י פרקים משניות; מען קען דאס איינטיילן אויף אפאר פרקים אינדערפרי, אפאר פרקים מיטאג און אזוי ווייטער. אנשטאט קוקן נייעס, הערן נייעס, זיין פארנומען מיט זאכן וואס קומט גארנישט ארויס קיין נוצן דערפון - נעם די משניות און זאג א פרק נאך א פרק - וועסטו ווערן ריין און אויסגעלייטערט.


דער אייבערשטער זאל העלפן זאלסט האבן הצלחה אין אלע ענינים.

#24 - מיט'ן אפשערן די האר האט איר געעפנט א טיר אין הימל פאר ישועות און רפואות
ישועות, חיזוק פאר פרויען, שטעטל, שערן די האר, מוהרא"ש

בעזרת ה' יתברך


יום ה' פרשת שמות, י"ט טבת, שנת תשפ"ב לפרט קטן


 


לכבוד מיינע טייערע ליבע ... נרו יאיר און ... תחי'


פון נעכטן אינדערפרי ווען איך האב געהערט די גוטע נייעס - בין איך אזוי פרייליך; איך בין אזוי פרייליך אז איר האט געהאט די כח צו טון די גרויסע מצוה פון זיך אפשערן די האר. איר קענט זיך נישט פארשטעלן די גרויסע שמחה וואס איר האט גורם געווען אין הימל, איר האט געעפנט א טיר אין הימל עס זאל קומען צו ענק ישועות און רפואות.


איר האט גורם געווען א נחת רוח פאר מוהרא"ש זכותו יגן עלינו, דער מייסד פון אונזער שיינע קהילה. מוהרא"ש האט זיך זיין גאנץ לעבן מוסר נפש געווען פאר קדושתן וטהרתן של ישראל, מוהרא"ש פלעגט זיך בארומען פאר אלעמען מיט זיין שטעטל יבנאל, אז רובם דרובם פרויען זענען אפגעשוירן, אפילו אסאך פון זיי זענען ספרד'ישע משפחות - דאך שערן זיך אלע אפ.


יעצט בארומט זיך מוהרא"ש מיט אונזער שטעטל, קרית ברסלב ליבערטי, קרוב צו הונדערט משפחות און עס איז נישטא קיין איין קאפ פון האר, אלע פרויען זענען הייליג און טייער.


בזכות די הייליגע זאך וואס איר האט געטון זאלט איר זוכה זיין בקרוב צו זרע של קיימא, קינדער און אייניקלעך צדיקים, די שכינה הקדושה זאל רוען ביי אייך אין שטוב, עס זאל זיין ביי אייך שלום ושלוה, אהבה ואחוה און בלייבן מקושר ענקער גאנצע לעבן מיט הייליגע צדיקים.


ענקער ראש ישיבה.


 

#23 - לאזט נישט אריין ביי ענק די עצבות ומרה שחורה
קינדער, שמחה, ישועות, התחזקות, רפואה, עצבות

בעזרת ה' יתברך


יום ה' פרשת ויגש, ה' טבת, שנת תשפ"ב לפרט קטן


 


לכבוד מיינע טייערע


יעצט ווען איר האט זיך דערוויסט אז איר ווארט נישט, די זאק איז ליידיג, וויל איך אייך זייער בעטן איר זאלט נישט אריינפאלן אין קיין עצבות.


איך ווייס עס איז אייך זייער שווער, איר האט געמיינט אז איר ווארט שוין וכו', איר ווילט שוין זייער שטארק זוכה זיין צו זרע של קיימא; בעט איך אייך, זייט נישט צעבראכן, נעמט ארויס דאס גוטס, איר זעט פון דעם אז איר קענט האבן קינדער, איר זענט געזונט; איר וועט נאך האבן א שטוב מיט קינדער.


שטארקט אייך, ווערט נישט פארלוירן; לאזט נישט אריין ביי ענק די עצבות ומרה שחורה, ווערט נישט פארכאפט אין ספיקות: 'וואס גייט זיין? ווען וועט עס זיין? ווער זאגט עס גייט זיין?' מוהרא"ש זאגט, אלע ספיקות קומט פון טומאת עמלק, עמלק איז בגימטריא ספק, ער מאכט די אלע ספיקות פון (שמות יז, ז): "הֲיֵשׁ ה' בְּקִרְבֵּנוּ אִם אָיִן"; דער רבי קעמפט מיט עמלק, דער רבי זאגט (עיין ספורי מעשיות, מעשה א): "עס איז בודאי יא דא", ישועת ה' כהרף עין!


חזק, חזק, ונתחזק!

#22 - בעט אייך אויס ביים ציון פון הרב הקדוש מריבניץ זכותו יגן עלינו
קינדער, ישועות, חיזוק פאר פרויען, קברי צדיקים, מוהרא"ש

בעזרת ה' יתברך


יום ד' פרשת ויחי, י"א טבת, שנת תשפ"ב לפרט קטן


 


מרת ... תחי'


איר קענט גיין צום ציון פון הרב הקדוש מריבניץ זכותו יגן עלינו; צו א ציון פון א צדיק גייען אפילו פרויען. גייט אינאיינעם מיט אייער מאן נרו יאיר; ער זאל שטיין ביי די מענער זייט און איר זאלט שטיין ביי די פרויען זייט און בעטס פאר קינדער - וועט איר פועל'ן ישועות.


מוהרא"ש זכותו יגן עלינו פלעגט זייער אסאך גיין צום ציון פון הרב הקדוש מריבניץ זכותו יגן עלינו; ווען מוהרא"ש איז געווען אין מאנסי אויף א שמחה - איז ער צוגעגאנגען צום ציון מתפלל זיין. אזוי טו איך אויך, ווען איך בין אין מאנסי - גיי איך ארויף צום ציון הנ"ל, מען זעט דארט גרויסע ישועות.


דער אייבערשטער זאל העלפן איר זאלט האבן הצלחה אין אלע ענינים.


 

#21 - פילע אידישע שטיבער שטייען דורך די גליונות און בריוו
ישועות, הפצה, צדקה, סגולות, בריוו, עצתו אמונה, גליון

בעזרת ה' יתברך


יום ג' פרשת וישלח, י"ב כסליו, שנת תשפ"ב לפרט קטן


 


לכבוד ... נרו יאיר


איך האב ערהאלטן דיין בריוו.


יא, זיכער; אז דו וועסט געבן צדקה צו דרוקן די גליונות און די נייע ספרים עצתו אמונה - וועסטו האבן א ישועה.


די הבטחה וואס מוהרא"ש האט צוגעזאגט, אז ווער עס וועט נעמען א חלק אין דרוקן אשר בנחל וועט זען ישועות, דאס גייט אויך ארויף אויף די גליונות און קונטרסים. וואס שטייט אין די גליונות? וואס שטייט אין די נייע ספרים? עס שטייט נאר ווערטער, שכל און חיזוק פון מוהרא"ש, אזויפיל אידן זענען זיך מחזק מיט דעם, אזויפיל אידישע שטובער שטייען בזכות דעם, אזויפיל קומען צוריק צום אייבערשטן בזכות דעם, וואס איז בכלל די פראגע?


וואויל איז דעם וואס נעמט א חלק אין דרוקן די גליונות מידי שבת בשבתו; די גליונות מאכן אזא מהפכה אין די וועלט, עס איז נאכנישט געווען אזא הפצה אין ברסלב אזוי ווי די הפצה מיט די גליונות. אלע ליינען דאס, אלע ווארטן אויף דעם; מענטשן גייען פון שול צו שול זוכן א גליון, מען ווערט צוגעקלעבט צו דעם, בפרט צו די בריוו פון עצתו אמונה, איש אמונות; מענטשן זאגן אז דאס לעבט זיי אויף, דאס איז זיי אזוי מחזק.


דער אייבערשטער זאל העלפן זאלסט האבן הצלחה אין אלע ענינים.

#20 - עס איז כדאי אויסצוווארטן די ישועה
בחור, שידוכים, ישועות, התחזקות, עבודת השם

בעזרת ה' יתברך


יום ד' פרשת נח, א' דראש חודש מרחשון, שנת תשפ"ב לפרט קטן


 


לכבוד מיין ליבער ... נרו יאיר


איך בעט דיר זייער, ווארט אויס אויף דיין ישועה, פארליר זיך נישט; בלייב שטארק מיט דיין אידישקייט, מיט דיינע שיעורים כסדרן, מיט דיין אמונה און מצוות.


נאך אביסל וועסטו א חתן ווערן, דו וועסט ווערן אן אדם השלם, עס איז כדאי צו ווארטן, עס וועט דיר זיין אזוי גוט און זיס; ווייל וויסן זאלסטו, נאר מיט אמונה האט מען א גוט לעבן, נאר מיט די תורה האט מען א זיס לעבן. דער רבי זאגט זאגט (שיחות הר"ן, סימן נג): "מִי שֶׁיֵּשׁ לוֹ אֱמוּנָה - חַיָּיו חַיִּים", ווער עס האט אמונה, זיין לעבן איז א לעבן; אלעס איז גוט, אלעס איז אזוי געשמאק, מען שפירט שוין דא בזה העולם א טעם גן עדן.


איך האף אז דו וועסט נישט אנטלויפן פאר שלחן עורך, דו וועסט זיך שטארקן, גארנישט אפלאזן פון דיינע גוטע זאכן, פון דיין עבודת השם.


דיין ראש ישיבה.

#19 - אז מ'גלייבט, באקומט מען די ישועה
ישועות, אמונה, אומאן, אמונת חכמים, ברכות

בעזרת ה' יתברך


ליל שישי פרשת נצבים, כ"ו אלול, שנת תשפ"א לפרט קטן


 


מרת ... תחי'


דעם בריוו שרייב איך אייך פון אומאן. מיין ווייב זאגט מיר אז איר זענט זייער צעבראכן, איר זאגט אז אייער מאן האט אייך שוין צוגעזאגט די לעצטע פאר יאר אז ער גייט אהיימברענגען ישועות פון אומאן, און נאכאלץ ווארט איר אויף די ישועה, איר טראכט אז איר וועט שוין נישט געהאלפן ווערן.


דעריבער שרייב איך אייך פון אומאן, וויסן זאלט איר אז מען דארף האבן אמונה, מען דארף גלייבן אז תפילה העלפט, גיין צו צדיקים העלפט, בפרט קומען קיין אומאן אויף ראש השנה העלפט; דאס וואס מען ווארט אויף א ישועה איז נאר פאר די טובה פונעם מענטש.


איך גלייב אז איר גייט האבן א ישועה, איך בין היינט געווען ביים ציון און אסאך געבעטן פאר אייך און פאר אייער מאן, אבער וויסן זאלט איר אז מען דארף האבן אמונה, אמונה איז די כלי מען זאל קענען מקבל זיין, אויב מען בעט א ברכה פון א צדיק, דער צדיק וואונטשט, אויב דער מענטש זאגט נישט "אמן", איז נישטא די פלאץ וואו די ברכה זאל חל זיין, ווען מען זאגט "אמן", מען גלייבט - דעמאלט קומט די ישועה.


די אלע וואס קומען צום צדיק און זאגן "איך האב שוין באקומען אזויפיל מאל הבטחות און למעשה איז גארנישט געשען", זיי האבן טענות; דאס איז די אייגענע פראבלעם, זיי דארפן גלייבן.


איר וועט האבן א ישועה ווייל איך גלייב אז איר וועט שוין געהאלפן ווערן.


כתיבה וחתימה טובה.

#18 - די ישועה איז שוין נאנט, דו וועסט פארגעסן אינגאנצן פון די צרה
בחור, שידוכים, צרות, ישועות

בעזרת ה' יתברך


יום ג' פרשת דברים, ד' מנחם-אב, שנת תשפ"א לפרט קטן


 


טייערער ליבער ... נרו יאיר


איך זע דיין צעריסענע הארץ, איך זע דיין ווייטאג, ווי שטארק דו ווארטסט שוין צו טרעפן דיין שידוך, דו ווילסט שוין אזוי שטארק חתונה האבן כדי צו קענען זיין ערליך, אפגעהיטן פון שלעכטס.


גלייב מיר, איך פרוביר יעדן טאג צו טון פאר דיין שידוך, מיין נישט אז איך פארגעס פון דיר, איך האב אינזין אלע מיינע תלמידים און אלע בחורים וועם איך ווייס, אפילו די וואס לערנען נישט אין ישיבה.


איך בעט דיר טייערער ..., בלייב שטארק, דערהאלט זיך; באלד ווערט טאג, עס וועט פארגעסן ווערן אז עס איז אמאל געווען נאכט. אזוי האט דער מענטש פון וואלד געזאגט פאר'ן אמת'ן בן מלך (ספורי מעשיות, מעשה יא), ווען ער האט געפרעגט וואס איז דאס די גרויסע געלעכטער וואס מען הערט אינדערפרי, האט ער אים געזאגט, די נאכט פרעגט דעם טאג פארוואס ווען דו קומסט האב איך שוין נישט קיין נאמען? טוט דער טאג א גרויסע געלעכטער, עיין שם.


דאס פאסירט ווען מען איז זוכה צו די ישועה, מען ווערט אזוי פרייליך, מען פארגעסט בכלל אז אמאל איז מען געווען אין א צרה.


דראפע זיך און דערהאלט זיך.