בריוון פונעם ראש ישיבה שליט"א

#2 - יעדעס מאל מען וויל גיין צום צדיק ווערט גרויסע מניעות
קברי צדיקים, צדיקים, מניעות, פוילקייט

בעזרת ה' יתברך


יום ג' פרשת כי תשא, י"ד אדר א', פורים קטן, שנת תשפ"ב לפרט קטן


 


לכבוד ... נרו יאיר


וויסן זאלסטו, יעדעס מאל מען וויל גיין צום צדיק ווערט גרויסע מניעות, מען ווערט פלוצלונג פויל, פלוצלונג האט מען נישט קיין כח, מען טראכט 'נישט היינט, נאר מארגן'; דאס איז אלעס מניעות, מען וויל צוריק האלטן דעם מענטש ער זאל נישט גיין.


דער רבי רעדט שוין פון דעם, דער רבי זאגט (לקוטי מוהר"ן חלק א', סימן עב): "אזוי פאסירט יעדעס מאל מען וויל נאר גיין צום צדיק, און אזוי אויך ווען מען צעברעכט שוין די מניעה, מען קומט צום צדיק - הויבט מען אן טראכטן 'פארוואס האט אויסגעפעלט צו קומען וכו' וכו'".


אודאי זאלסטו גיין צום ציון, דארט איז די פלאץ וואו דו וועסט פועל'ן דיין ישועה. פאר אהין זיך אויסבעטן; דער רבי זאגט (ספר המדות אות צדיק, סימן קעג): "עַל יְדֵי הִשְׁתַּטְּחוּת עַל קִבְרֵי הַצַּדִּיקִים הַקָּדוֹשׁ בָּרוּךְ הוּא עוֹשֶׂה לוֹ טוֹבוֹת, אַף עַל פִּי שֶׁאֵינוֹ רָאוּי לְכָךְ", ביי א ציון פון א צדיק ווערן נתקבל די תפילות.


בעט אויך פאר מיר, יואל בן רייצא רעכיל, איך זאל האבן כח ווייטער צו טון די גוטע זאכן.


דער אייבערשטער זאל העלפן זאלסט האבן הצלחה אין אלע ענינים.

#1 - שטארק זיך, זיי נישט פויל, לויף אין מקוה
מקוה, פוילקייט

בעזרת ה' יתברך


יום ד' פרשת ויצא, ט' כסליו, שנת תשפ"א לפרט קטן


 


לכבוד ... נרו יאיר, תלמיד ישיבת תפארת התורה.


איך האב ערהאלטן דיין בריוו.


דו בעטסט חיזוק אויף צו גיין אין מקוה, לעצטנס איז דיר שווער צו גיין אין מקוה; דו ווערסט פויל, דו האסט נישט קיין געדולד.


וויסן זאלסטו, דער הייליגער בעל שם טוב זכותו יגן עלינו האט געזאגט אז ער איז צוגעקומען צו אלע זיינע מדריגות ווייל ער איז געווען זייער נזהר צו גיין אין מקוה יעדן טאג. אזוי אויך איז באוואוסט וואס דער הייליגער רבי אהרן קארלינער זכותו יגן עלינו האט געזאגט: "מקוה איז טאקע נישט קיין מצוה, אבער צו וואס מקוה קען צוברענגען קען קיין שום אנדערע מצוה נישט צוברענגען".


שטארק זיך, זיי נישט פויל; געוואוין זיך צו אז די ערשטע זאך וואס דו טוסט ווען דו שטייסט אויף איז גיין אין מקוה. אודאי איז דא אויף מקוה אסאך מניעות, דער יצר הרע מאכט עס אויסזען ווי א שווערע זאך, ער וויל נישט מען זאל גיין אין מקוה, ער ווייסט אז איינמאל מען גייט אין מקוה ווערט מען אן ערליכער איד, אזוי ווי דער הייליגער רבי נתן זכרונו לברכה האט געזאגט: "מקוה איז די זעלבע לשון פון תקוה, אז מען גייט אין מקוה האט מען א תקוה אז מען וועט אלעס פאררעכטן".


חזר דעם בריוו יעדן טאג - וועסטו באקומען א שטארקע חשק צו לויפן אין מקוה.


דער אייבערשטער זאל העלפן זאלסט האבן הצלחה אין אלע ענינים.