בריוון פונעם ראש ישיבה שליט"א

#4 - געבן צדקה איידער מען גייט צום דאקטער
צדקה, רפואה, פדיון נפש, דאקטורים

בעזרת ה' יתברך - יום ד' פרשת ויחי, ט"ו טבת, שנת תשפ"ד לפרט קטן


 


מרת ... תחי'


עס איז כדאי איר זאלט גיין צום דאקטער און הערן וואס ער האט צו זאגן, אמאל קען מען מיט א קלייניקייט פאררעכטן און זיך איינשפארן צער און עגמת נפש, עס איז נישט קיין חסרון אין אמונה צו גיין צום דאקטער; דער רבי זאגט (לקוטי מוהר"ן חלק ב', סימן ג) אז מען מאכט א פדיון נפש – קען דער דאקטער אויסהיילן, ווייל די ווערטער "ורפא ירפא" באטרעפט "פדיון נפש".


געבט געלט פאר דרוקן דעם רבינ'ס ספרים, דאס איז די ריכטיגע פדיון נפש, און גייט צום דאקטער, און מיט א קלייניקייט וועט איר זוכה זיין צו קענען אויסווארטן גאנצע חדשים מיט א געזונט קינד.


פארלירט זיך נישט, געבט נישט אויף. ווען איר ווערט צעבראכן פון די מצב וכו' – זאלט איר אויסדרייען די מחשבות און טראכטן 'וואס האב איך יא?' און נישט טראכטן טאג און נאכט 'וויפיל האב איך פארלוירן...' נאר 'וואס האב איך יא? וויפיל האב איך יא?'


איך ווארט צו הערן א גוטע בשורה.

#3 - יישר כח פארן צושטעלן די נסיעה קיין אומאן פאר די גאנצע קהילה
אומאן, פדיון נפש

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן


 


לכבוד מיין טייערער ... נרו יאיר


איך האב ערהאלטן די פינף הונדערט דאלער פאר פדיון נפש. דער אייבערשטער זאל העלפן עס זאל נמתק ווערן די דינים פון דיר על ידי פלא עליון, וואס איז חסדים גדולים ורחמים גמורים אן קיין דינים.


א גרויסן יישר כח פארן צושטעלן די נסיעה קיין אומאן פאר די גאנצע קהילה, און פארן זארגן פאר מיר און פאר מיינע קינדער מיר זאלן האבן א גרינגע רייזע אהין און צוריק.


דער אייבערשטער זאל דיר פארשרייבן א זיסע יאר, נחת פון דיינע קינדער און הצלחה בכל ענינים.


א גמר חתימה טובה.

#2 - פאר די אפעראציע זאל מען געבן א פדיון נפש און בעטן דעם אייבערשטן
רפואה, פדיון נפש

בעזרת ה' יתברך


יום ב' פרשת בשלח, ח' שבט, שנת תשפ"ב לפרט קטן


 


מרת ... תחי'


איך האב ערהאלטן אייער בריוו.


דער אייבערשטער זאל העלפן אייער קינד זאל זיין געזונט און שטארק, אלעס זאל אריבערגיין בשלום.


פאר מען גייט מאכן די אפעראציע זאלט איר געבן א פדיון נפש און בעטן דעם אייבערשטן אלעס זאל אריבער גיין בשלום.


איך וועל אויך מתפלל זיין אלעס זאל אריבערגיין בשלום.

#1 - זיך פרייען אז מ'איז זוכה משמש זיין דעם רבי'ן
זיכוי הרבים, חסידות ברסלב, פדיון נפש

בעזרת ה' יתברך


יום א' פרשת ויצא, ג' כסליו, שנת תשע"ט לפרט קטן


 


לכבוד ... נרו יאיר, מנהל מוסדות היכל הקודש ברסלב.


איך האב ערהאלטן דיין בריוו.


אשרינו מה טוב חלקינו "אשר בנחל" שם חלקינו וגורלינו, אז מיר האבן די זכיה צו משמש זיין דעם רבי'ן דורכן העלפן פארשפרייטן זיינע ליכטיגע עצות פאר די וועלט. אין חב"ד רופט מען די וואס פארשפרייטן תורת החסידות 'שלוחים', מוהרא"ש האט דאס גערופן 'שמשים'; מוהרא"ש שרייבט צענדליגער מאל אין אשר בנחל אז ווי לאנג ער לעבט וועט ער זיין א 'שמש' פארן רבי'ן צו פארשפרייטן דעם רבינ'ס עצות פאר די וועלט. דארפן מיר זיך פרייען אז מיר האבן זוכה געווען צו משמש זיין דעם רבי'ן און מיר דארפן בעטן אז מיר זאלן אונזער גאנץ לעבן בלייבן געטרייע שמשים.


ווען מען רופט אריין אין אפיס און מען וויל געבן צדקה פאר א פדיון קען די געלט נישט גיין פאר קיין שום זאך, די געלט דארף אנקומען צו מיר פריוואט.


שטארק דיך ווייטער מיט דיין הייליגע ארבעט אויפצובויען מוסדות וואו מען איז מחנך קינדער - אינגלעך און מיידלעך - מיט די ריינע אמונה.


געדענק וואס דער רבי האט געזאגט: "נצחתי ואנצח!" איך האב אויסגעפירט און איך וועל אויספירן.