בריוון פונעם ראש ישיבה שליט"א

בעזרת ה' יתברך - יום ג' פרשת אחרי קדושים, ד' אייר, שנת תשפ"ו לפרט קטן

מרת ...

איך האב ערהאלטן אייער בריוו.

איך וויל אייך נאכאמאל זאגן, די גאנצע זאך פון מעשר האט נישט מיט אייך, דאס איז אייער מאן'ס געשעפט; איך האב אייך שוין אפאר מאל געזאגט איר זאלט זיך נישט מישן אין דעם, עס זאל אייך נישט אנגיין צי אייער מאן געבט יא מעשר אדער נישט.

דאס וואס איר פרעגט ווי קען אריינקומען א ברכה אין שטוב ווען מען געבט נישט קיין מעשר? אז איר וועט זיין פרייליך - וועט זיין ברכה אין שטוב, דער הייליגער רבי זאגט (לקוטי מוהר"ן חלק א, סימן סט): "כִּי עִקַּר הָעֲשִׁירוּת עַל יְדֵי הָאִשָּׁה", אז די פרוי - זי איז מזכה די שטוב מיט שפע; דורך זיין פרייליך, דורך קוקן גוט אויפן מאן, דורך זיך מבטל זיין צום אייבערשטן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויגש, ג' טבת, שנת תשפ"ו לפרט קטן

... נרו יאיר, מאנסי

איך דאנק דיר פארן העלפן די ישיבה, פארן געבן דיין מעשר און חומש פאר די רענט פון די ישיבה; מיט דעם האסטו א זכות אין אלע תורה ותפילה וואס ווערט געלערנט און געדאווענט דורך די תלמידי הישיבה, און אויך אין אלע גוטע זאכן וואס מענטשן טוען בזכות די דרשות וואס ווערן געזאגט אין די פיר ווענט פון די ישיבה.

געב א חומש פון דיינע רווחים, דער רבי זאגט (שיחות הר"ן, סימן רפט), אז מען געבט א חומש פאר צדקה איז מען מקיים "ובכל מאודך"; דער רבי האט עס געזאגט פאר ר' דוב פון טשערין, און ער האט טאקע אזוי געטון, און ער איז זייער רייך געווארן, און ער האט געזאגט: "איך האב נישט מורא פון בית דין של מעלה, צוליב דעם וואס איך האב געגעבן פון מיינע פארדינסטן א חומש".

בזכות וואס דו העלפסט מיר איך זאל קענען ווייטער אנגיין מיט די ישיבה זאלסטו זוכה זיין עס זאל געשען א נס מיט וכו', דו זאלסט זען א ישועה אין דאס וואס דו דארפסט וכו' וכו'.

בעזרת ה' יתברך - יום ג' פרשת תולדות, כ"ה מר-חשון, שנת תשפ"ה לפרט קטן

לכבוד מיין ליבער ... נרו יאיר

זע צו זאגן יעדן טאג תהילים, הלוואי אז דו קענסט צוריק אנהויבן זאגן יעדן טאג דעם יום תהילים. לייג תהילים אלס דיין ערשטע שיעור, אינדערפרי זאלסטו גלייך נאך ברכות התורה נעמען א תהילים און זינגען צום אייבערשטן, און פלעכט אריין דיינע אייגענע לויב און דיין אייגענע געבעט; דאס וועט דיר ברענגען א שידוך (ספר המידות אות חיתון, סימן ט).

דיין מעשר געב פאר לומדי תורה. העלף אינגעלייט וואס זיצן און לערנען תורה מתוך הדחק, אזוי ווי דער רבי זאגט (שם אות צדקה, סימן ט): "מִצְוָה לָזוּן אֵלּוּ שֶׁעוֹסְקִים בַּתּוֹרָה יוֹתֵר מֵאֵלּוּ שֶׁאֵין עוֹסְקִין", עס איז א מצוה צו געבן צדקה פאר די וואס לערנען תורה; דאס וועט זיין א זכות פאר דיין נשמה, עס וועט ווערן גערעכנט ווי דו אליין זיצט און לערנט א גאנצן טאג.

בעזרת ה' יתברך - יום ג' פרשת תולדות, כ"ה מר-חשון, שנת תשפ"ה לפרט קטן

לכבוד מיין טייערער ליבער ... נרו יאיר

מזל טוב פאר דיין נייע ביזנעס, דער אייבערשטער זאל דיר העלפן זאלסט האבן גרויס הצלחה.

איך וויל דיר שרייבן אפאר וויכטיגע אנווייזונגען ווי אזוי צו פירן א ביזנעס און מצליח זיין.

הדבר הראשון, עס מוז געפירט ווערן מיט די תורה. יעדע שאלה; צי אין ריבית, צי אין השגת גבול, עני המהפך בחררה, גניבה, גזילה וכדומה – מוז מען פרעגן א רב, א דיין – און טון ווי אזוי מען פסק'נט. דער רבי זאגט (לקוטי מוהר"ן חלק א', סימן רפ), וואס איז דאס אז מען רופט איינעם צו דין תורה? זאגט דער רבי, די תורה איז זיך נוקם אינעם מענטש פארן פירן די ביזנעס שלא על פי תורה, עיין שם.

שנית, גיי נישט אין אפיס נאר נאכן דאווענען שחרית, און שטעל אפ די געשעפט ביי מנחה מעריב.

שלישית, נעם אריין א שיתוף, כביכול דעם אייבערשטן; פון די פארדינסטן געב מעשר (אדער ווי אנשי שלומינו פירן זיך צו געבן א חומש).

פערטנס, רעד שיין צו יעדן איינעם. חכמינו זכרונם לברכה זאגן (אבות ד, ג): "אַל תְּהִי בָז לְכָל אָדָם", זאלסט יעדן איינעם געבן גוטע באנעמונג. מיין שיטה איז, אנשטאט אריינלייגן קאפ, מח און געלט אין מארקעטינג – זאל מען אריינלייגן די נשמה אין קאסטעמער סערוויס, גוטע באנעמונג צו יעדן; צום קליינעם, צום גרויסן, צום רייכן און צום ארעמאן.

איך דארף מקצר זיין, אז דו וועסט טון די זאכן וועסטו האבן גרויס הצלחה.

בעזרת ה' יתברך - יום ה' פרשת אחרי-ב', כ"ד ניסן, ט' לעומר, שנת תשפ"ד לפרט קטן

לכבוד ... נרו יאיר

געב ערליך מעשר, וועסטו האבן גרויס שפע, און אז דו פארדינסט און דו אינוועסטירסט די געלט אין פרישע ביזנעס - דארף מען פון פאראויס געבן מעשר, און נאר אזוי קען מען ערווארטן הצלחה.

האב נישט קיין שרעק אז אויב דו וועסט געבן צדקה וועסטו נישט האבן פאר דיר, עס איז פארקערט; ווען מען געבט צדקה - הויבט אן קומען גרויס שפע, עס דאפלט זיך און טריפלט זיך די הכנסה.

בעט דעם אייבערשטן זאלסט זוכה זיין אז דיין צדקה זאל זיין צדקה, דיין געלט זאל גיין פאר גוטע פלעצער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת תצוה, שובבי"ם, י"א אדר א', שנת תשפ"ד לפרט קטן

לכבוד מיין טייערער ... נרו יאיר

איך האב ערהאלטן דיין בריוו.

איך פריי זיך יעדעס מאל דו שרייבסט מיר. עס איז זייער וויכטיג צו בלייבן צוגעבינדן נאך די חתונה ווען מען ווערט פאריאגט מיט ברענגען פרנסה, און דורך שרייבן בריוו איז נאך א וועג ווי צו בלייבן נאנט.

דיין מעשר זאלסטו געבן פאר צדקה, וועסטו האבן שפע.

האב נישט מורא, דו וועסט נישט ווערן פארארעמט אז דו וועסט געבן מעשר, נעם אריין אין קאפ אז די מעשר איז נישט דיינס, אזוי וועט דיר זיין גרינגער דאס געבן מעשר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת תרומה, שובבי"ם, ד' אדר א', שנת תשפ"ד לפרט קטן

לכבוד ... נרו יאיר, מאנסי

איך האב ערהאלטן דיין בריוו.

מעשר געלט געבט מען פאר צדקה, נישטא אזא זאך נעמען מעשר פאר זיך; אז מען נעמט מעשר געלט פאר זיך - פארלירט מען פון די שפע.

אינטערעסאנט, דאס איז די ערשטע זאך וואס מען וויל שניידן; ווען מען שפירט א צמצום, טראכט מען די ערשטע זאך מען גייט שניידן פון די צדקה, מען גייט אויסארבעטן צו נעמען די מעשר פאר דאס און פאר יענץ... אז מען איז מצומצם אין די פרנסה - דארף מען די ערשטע זאך תשובה טון, קומען אין שול דאווענען דריי מאל א טאג מיט מנין, און זיך פירן מיט דרך ארץ ביים דאווענען, נישט רעדן מיט קיינעם ביים דאווענען, נישט נוצן דעם טעלעפאן ביים דאווענען.

אז דו קענסט זיך נישט דעקן - זאלסטו נישט אויפהערן געבן צדקה; געב דיין מעשר פאר צדקה, און א ברסלב'ער חסיד מיט שכל געבט זיין מעשר פאר אייביגע צדקות, פאר דרוקן דעם הייליגן רבינ'ס ספרים, פארשפרייטן די זיסע ליכטיגקייט פאר די וועלט. אז מען מאכט זיך א חשבון, ווי אזוי וואלטן מיר אויסגעקוקט אנעם רבי'ן און ווי אזוי זענען מיר מקורב געווארן, נאר דורך די הייליגע ספרים; דארפן מיר מקרב זיין די גאנצע וועלט צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת ויצא, ט' כסליו, שנת תשפ"ד לפרט קטן

לכבוד ... נרו יאיר

איך וויל בעטן פון דיר זאלסט געבן דיין מעשר און דיין צדקה געלט פאר די ישיבה. דו ביסט דאך א תלמיד פון די ישיבה, דארפסטו העלפן די ישיבה. דער רבי שרייבט אין א בריוו פאר אנשי שלומינו (הובא בתחילת ספר עלים לתרופה): "דערמאנט אייך איטליכער ווי איך האב אייך געפינען", דער רבי בעט אונז מיר זאלן נישט פארגעסן ווי אזוי מיר האבן אויסגעזען ווען מיר האבן געטראפן דעם רבי'ן, און העלפן די פלאץ וואס העלפט דיר.

נעם א פושקע פון די מוסד אין שטוב, אין אפיס און אין קאר; און ווען עס ווערט פול זאלסטו מיר עס ברענגען, די פרוטה'לעך העלפט מיר צאלן די איינגעשטעלטע.

מארגן וועט זיין די ליל שישי שיעור אין ישיבה, אויך שבת וועל איך זיין אין וויליאמסבורג.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת ויקהל-פקודי, י"ט אדר, שנת תשפ"ג לפרט קטן

לכבוד מיין ליבער ... נרו יאיר

איך האב ערהאלטן דיין בריוו.

דו קענסט מאכן לייסענס צו דרייוון א קאר, עס איז נישט קיין שום פראבלעם צו דרייוון. דער הייליגער רבי זאגט עס איז גוט צו דרייוון (עיין חיי מוהר"ן, די ערשטע שיחה אין די צווייטע חלק).

געב אכטונג זיך נישט צו רייצן מיט דיינע עלטערן. זיי מכבד דיינע עלטערן, רעד נישט פון די זאך פון האבן לייסענס, ווייל עס לוינט נישט די גאנצע לעבן אויב מען מאכט צער פאר די עלטערן. אז זיי קוקן דאס אן ווי מען פארט אפ פון אידישן וועג - זאלסטו זיך נישט רייצן און זאגן מען מעג יא; מען טאר נישט טענה'ען מיט עלטערן.

קענסט נעמען געלט פון הפצה פאר אלע דיינע געברויכן; יעדן ענדע טאג זאלסטו זיך מאכן א חשבון וויפיל געלט דו האסט געמאכט, נעם אראפ מעשר אזוי ווי מען נעמט אראפ פון א געהאלט; די מעשר געב פאר צדקה און די איבריגע געלט איז דיינס.

זיי ממשיך מיט הפצה, וועסטו אלעס מתקן זיין.

דער אייבערשטער זאל העלפן זאלסט האבן הצלחה אין אלע ענינים.