בריוון פונעם ראש ישיבה שליט"א

בעזרת ה' יתברך - יום ב' פרשת וזאת הברכה א', ה' תשרי, שנת תשפ"ה לפרט קטן

לכבוד ... נרו יאיר

איך בין אזוי דערשראקן פאר דיר אז דו טוסט עבירות מיט דיין שוועסטער; די תורה זאגט (ויקרא יח, ט), אז מען טוט עבירות מיט א שוועסטער באקומט מען כרת; דאס איז אויסער דעם וואס נאך א פאר יאר, ווען זי וועט חתונה האבן - וועט איר מאן דיך פארשעמען פאר אלעמען, דו וועסט נישט קענען קומען צו קיין שמחות ביי די משפחה, דו וועסט נישט קענען אהיים קומען צו דיין טאטע מאמע, מען וועט דיך פארשעמען, מען וועט דיך פארטרייבן; אלע וועלן אוועק נעמען די קינדער פון דיר, קיינער וועט דיך נישט לאזן קומען צו זיי אין שטוב.

ווער ווייסט אויב דאס איז די סיבה פארוואס דו האסט נאכנישט דיין שידוך; אז דו וועסט תשובה טון וועט דער אייבערשטער דיר מוחל זיין און דו וועסט טרעפן א שידוך, און אז נישט - וועסטו רחמנא לצלן ווערן פארשניטן.

א גמר חתימה טובה, א גוט געבענטשט יאר.

בעזרת ה' יתברך - יום ב' פרשת ואתחנן, ח' מנחם-אב, שנת תשפ"ד לפרט קטן

לכבוד ... נרו יאיר

איך האף דו וועסט מיר העלפן די יאר מיט די קאמפיין, מיר האבן נישט קיין שטיצע פון די גאס, מיר זענען אנגעוואנדן אויף יעדן איינעם פון אנשי שלומינו זאל צאמנעמען צדקה און ארויסהעלפן.

אז דו ביסט נעבעך אראפגעפאלן אין עבירות רחמנא לצלן, דו ביסט אין גיהנום, אין שאול תחתית - זאלסטו אנהויבן לערנען משניות, דאס וועט דיך ארויסנעמען פון גיהנום. עס ווערט געברענגט (מדרש תלפיות אות אל"ף, סוף ענף "אפוד") אז אשר בן יעקב זיצט ביים טויער פונעם גיהנום און לאזט נישט אריין די אלע וואס האבן געלערנט אסאך משניות; אזוי אויך די וואס זענען שוין אנגעקומען אין גיהנום, בזכות לימוד משניות גייט מען ארויס פון גיהנום.

מוהרא"ש זאגט, דאס וואס דער רבי זאגט (לקוטי מוהר"ן חלק א', סימן א), מען קען נישט מכניע זיין דעם יצר הרע וואס מאכט משוגע דעם מענטש צו טון עבירות, נאר דורך לערנען תורה, דער רבי זאגט אז די תורה איז ווי א שטעקן, די תורה איז ווי די אות ו'; זאגט מוהרא"ש, דאס מיינט מען ו' סדרי משנה; מיט די משניות שלאגט מען די רוח שטות און מען ווערט נארמאל, מען ווערט אויסגעהיילט פון אלע תאוות.

דיין רפואה איז משניות; אז דו וועסט זיך מאכן א קביעות צו לערנען יעדן טאג משניות - וועסטו ווערן אויסגעהיילט פון אלע גייסטישע פראבלעמען, וועסט זען וואונדער, אויך וועסטו באקומען סבלנות, וועסט זיך נישט כעס'ן אויף יעדע זאך.

איך בעט דיר נאכאמאל, יעצט ביי די קאמפיין - די פאר טעג - זאלסטו רופן דיינע פריינד, דיין משפחה, דיינע שכנים, דיינע באקאנטע - בעטן צדקה, אויך קענסטו גיין ביי די הייזער, ביי די קאנטריס - בעטן צדקה פאר ברסלב; שעם זיך נישט מיט היכל הקודש. דער רבי האט געזאגט פאר זיין תלמיד רבי נפתלי (חיי מוהר"ן, סימן רטו), בשעת ער איז געזיצן ביי א שלום זכר און אים געבעטן ער זאל זינגען א ניגון, אבער רבי נפתלי האט זיך געשעמט און איז געבליבן שטיל, האט אים דער רבי געזאגט: "ר' נפתלי וואס שעמסטו זיך? בשבילנו נברא העולם, די גאנצע וועלט איז באשאפן געווארן פאר אונז", אזוי ווי חכמינו זכרונם לברכה זאגן (ברכות ו:) אויפן פסוק (קהלת יב, יג): "'כִּי זֶה כָּל הָאָדָם', כָּל הָעוֹלָם נִבְרָא אֶלָּא בִּשְׁבִיל זֶה", די גאנצע וועלט איז באשאפן געווארן נאר פאר דעם צדיק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת קרח, כ"ח סיון, שנת תשפ"ד לפרט קטן

לכבוד ... נרו יאיר

אלע צרות און יסורים וואס מען ליידט אין לעבן - קומט פון פוגם זיין בברית; אז מען היט זיך נישט די אויגן, מען קוקט עבירות רחמנא לצלן - פאלט מען נאכדעם אין פגם הברית, הוצאת זרע לבטלה רחמנא לצלן, און מען באשאפט דורכדעם קליפות ומשחיתים וואס פייניגן א גאנץ לעבן. אזוי ווי דער רבי זאגט (ספר המידות אות נאוף, סימן כו): "עַל יְדֵי הוֹצָאַת זֶרַע לְבַטָּלָה בּוֹרֵא קְלִפּוֹת הַמִּתְלַבְּשִׁים בִּבְנֵי אָדָם מִתְנַגְּדִים וְחוֹלְקִים עָלָיו, וְעוֹשִׂין לוֹ יִסּוּרִין", דורך די עבירה פון פגם הברית, הוצאת זרע לבטלה - באשאפט מען קליפות, און די קליפות גייען אריין אין מענטשן וואס קריגן זיך מיט אים און טוען אים אפ שרעקליכע יסורים.

גיי אין א ווינקל; אין דיין קאר, אין דיין אפיס - ווען עס איז ליידיג, אדער דאס גלייכן, און בעט דעם אייבערשטן דו זאלסט קענען זיך אפשאקלען פון קוקן שלעכטס, פון האבן א קאמפיוטער, טעלעפאן, טעבלעט וכו' און קוקן עבירות - וועסטו נישט דארפן אזויפיל ליידן.

אויך זאלסטו היינט קומען צום שיעור, איך וויל זיך מיט דיר מחזק זיין אינאיינעם, זיך אויפפרישן צו טון די עצות פון רבי'ן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן

לכבוד ... נרו יאיר

איך וויל דיר זייער בעטן, מהיום והלאה זאלסטו נישט רעדן מער מיט די שכנ'טע די בעל הבית פון דיין דירה; עס שמעקט פון ניאוף, עס שמעקט פון עבירות; ווער עס וועט הערן אזא זאך, אז א אינגערמאן אין שנה ראשונה שטייט און רעדט שעות און שעות מיט א שכנ'טע וועט זאגן אז דאס שמעקט פון עבירות.

געדענקסט ווי שטארק דו האסט געוויינט אלס בחור זאלסט טרעפן א שידוך, און געדענקסט ווי דו האסט זיך געפרייט ווען דו ביסט א חתן געווארן, האסט באקומען אן אשת חיל, א מתנה פון אייבערשטן; זאלסטו אכטונג געבן נישט צו פארלירן דיין לעבן בזה ובבא.

האב שכל, געב נישט אוועק דאס לעבן צוליב א פערטל שעה. דער רבי זאגט (לקוטי מוהר"ן חלק ב', סימן קח): "אַ מֶענְטְשׁ פוּן אֵיין תַּעֲנוּגְ'ל וֶועגְן פוּן אַ פֶערְטְל שָׁעָה, קָאן עֶר אָן וֶוערְן גָאר דֶעם עוֹלָם הַזֶּה מִיט דֶעם עוֹלָם הַבָּא".

אז זי האט עפעס צו רעדן וועגן די דירה - קען זי אנרופן דיין ווייב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת שמיני, כ"ב אדר ב', שנת תשפ"ד לפרט קטן

לכבוד מיין טייערער ליבער ... נרו יאיר

איך האב ערהאלטן דיין בריוו.

ווארף אוועק דיין טעבלעט, ווער ווייסט אויב דאס איז נישט דער שטער צו דיין ישועה; אזויפיל דאווען איך פאר דיר דו זאלסט שוין טרעפן דיין שידוך און קען זיין אז די מאוויס וואס דו קוקסט אויפן טעבלעט - דאס האלט אלעס צוריק.

ענדערש קויף זיך א כשר'ע טעלעפאן ווי איידער האבן די כלים וואס נאכן פילטערן קענסטו דאס נאכאלץ עפענען, און קוקן ניאוף רחמנא לצלן. דער רבי זאגט קלאר (לקוטי מוהר"ן חלק ב', סימן פז): "וּמֵחֲמַת זֶה הַפְּגָם יוּכַל לְאַבֵּד אֶת זִוּוּגוֹ, כִּי מֵאַחַר שֶׁנָּטָה מִזִּוּוּגוֹ קָשֶׁה לוֹ לִמְצֹא אֶת זִוּוּגוֹ", ווען א מענטש זינדיגט אין פגם הברית - פארלירט ער זיין שידוך, "וַאֲפִילּוּ אִם יִמְצָא אֶת זִוּוּגוֹ", און אפילו איינער וואס האט שוין זיין שידוך, ער האט שוין חתונה געהאט, "תִּהְיֶה לוֹ מְנַגֶּדֶת וְלא תִּהְיֶה נוֹטָה אַחַר רְצוֹנוֹ", וועט זיך זיין ווייב קריגן מיט אים וכו', אבער אז מען טוט תשובה - "אֲזַי מוֹצֵא זִוּוּגוֹ, וְהִיא אֵינָהּ כְּנֶגְדּוֹ, רַק כִּרְצוֹנוֹ", איז מען דעמאלט זוכה צו טרעפן דעם שידוך.

טייערער ברודער, ווארף אוועק די טעבלעט, ווארף אוועק די כלים וואס דו קענסט זען ניאוף, מען פארלירט אלעס אז מען קוקט ניאוף; מען פארלירט די לעבן, די פרנסה, די שמחה, די מנוחה; אז מען איז פוגם בברית - ווערט די לעבן טונקל, שווארץ, קאמפליצירט; אלעס פון זיך נישט היטן די אויגן.

טייערער ..., גיי יעדן טאג התבודדות, וויין צום אייבערשטן אויף דיין שפראך, שריי צו אים ער זאל דיר געבן דיין שידוך, זאג אים: "הייליגער באשעפער איך וויל שוין מיין שידוך, איך וויל חתונה האבן, איך וויל זיין ערליך, איך וויל זיין הייליג, איך וויל האבן מיין לעבן, מיין ווייב, מיינע קינדער.

רבונו של עולם, איך בין אזוי צעבראכן, איך בין אזא רחמנות, איך האלט אין איין זינדיגן אין די עבירה פון פגם הברית, הוצאת זרע לבטלה, איך ווייס אז דאס איז גורם אז מיין שידוך זאל זיך אפשטופן, אבער אייבערשטער וואס קען איך טון נישט אראפצופאלן אין די עבירה? טאטעניו וואס קען איך טון אז איך קען נישט עומד זיין בנסיון, איך דארף חתונה האבן, נאר אז איך וועל חתונה האבן וועל איך זיך קענען האלטן בקדושה ובטהרה, אנא ה' איך בעט דיר אייבערשטער, וואו איז מיין שידוך? ווען באקום איך מיין שידוך? איך קען נישט מער, איך וויל א שידוך און איך וויל א ריינעם מח".

אזוי זאלסטו בעטן דעם אייבערשטן יעדן טאג, ביז דער אייבערשטער וועט רחמנות האבן און דיר געבן א שידוך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת שמיני, כ"ד אדר ב', שנת תשפ"ד לפרט קטן

לכבוד ... נרו יאיר

איך בין אזוי פארווייטאגט, אזויפיל יגיעות וטרחות וואס איך מוטשע זיך מיט דיר דו זאלסט האבן א חיים טובים, און מיט די קליינע טעלעפאן, פון קוקן ניאוף - פארלירסטו אלעס. אז מען קוקט עבירות - פארלירט מען אלעס, אז מען קוקט ניאוף - קומט א ביטערע סוף; איז פארוואס זאלסטו האבן ביי דיר אין טאש א שמוץ טעלעפאן וואס מען קען קוקן עבירות.

איך בעט דיר זייער, ווארף אוועק די שמוץ טעלעפאן, די שמוץ טעבלעט, קום צוריק צום אייבערשטן, קער זיך צוריק צו די הייליגע תורה. קוקן עבירות מאכט נישט פרייליך, עס מאכט נישט צופרידן; קוקן עבירות מאכט מער דיפרעסט, מער דערביטערט.

איך האב אזוי רחמנות אויף דיר, איך קוק זיך צו ווי צוביסליך פארלירסטו אלעס, די קליפות האבן דיך פארכאפט, זיי מאכן פון דיר ליצנות, זיי שלעפן דיך צו קוקן נאך א קליפ, נאך א מאווי פון שיקוץ, תיאוב און ניאוף, ליבער ברודער ווארף אוועק די זאכן, צעברעך די געטשקע, קום צוריק צום אייבערשטן.

דער אייבערשטער האט דיך ליב, ער ווארט זאלסט קומען צו אים, קום אין שול דאווענען די דריי תפילות, קום צוריק צו די תורה, באניי זיך מיט דיינע שיעורים אין מקרא, משנה, גמרא, הלכה ואגדה וכו'.

האסט א ווייב; קוק אויף איר, רעד מיט איר; פארוואס זאלסטו קוקן אויף פרעמדע, פארוואס זאלסטו זיך שרייבן מיט פרעמדע, וואס איז מיט דיר געשען?!

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת פקודי, א' דראש חודש אדר ב', שנת תשפ"ד לפרט קטן

לכבוד מיין ליבער ... נרו יאיר

איך האב ערהאלטן דיין בריוו.

איך האב היינט גערעדט צו דיינע עלטערן, איך האב אנגעטראגן א שידוך, איך האף צום אייבערשטן צו קענען זיין דער גוטער שליח, אויספירן ביי דיר א שידוך.

זיי ממשיך מיט דיין עבודת השם, מיט דיינע שיעורים כסדרן על פי סדר דרך הלימוד פון הייליגן רבי'ן (המבואר בשיחות הר"ן, סימן עו); לערן יעדן טאג מקרא, משנה, גמרא, אויך לערן תיקונים אין דעם רבינ'ס ספרים.

ועל כולם גיי שרייען צום אייבערשטן: "רבונו של עולם, ראטעווע מיך, איך פאל אין בלאטע, איך בין פוגם בברית, רבונו של עולם איך וויל זיין ערליך, איך וויל זיין גוט און עס גייט מיר נישט, וויפיל איך פרוביר פאל איך מער אראפ, רבונו של עולם זיי מיר מוחל, פארגעב מיר מיינע זינד, און העלף מיר זיין גוט".

טייערער ברודער, שטארק זיך מיט די צוויי עצות, לערנען און דאווענען; דאס איז די עצה צו לעשן די פייער פון ניאוף.

איך האף צום אייבערשטן צו הערן גוטע נייעס ביי דיר בקרוב.

בעזרת ה' יתברך - יום ג' פרשת תצוה, שובבי"ם, י"א אדר א', שנת תשפ"ד לפרט קטן

לכבוד ... נרו יאיר

איך האב ערהאלטן דיינע בריוו.

יעצט הער איך אז דו גייסט טון עבירות שטילערהייט, דו גייסט מיט פרעמדע; אוי וויי איז מיר אז איך דארף דאס הערן, אזויפיל האב איך אוועק געגעבן פאר דיר, איך האב אזוי ארויסגעקוקט אז דו וועסט חתונה האבן און דינען דעם אייבערשטן, איך האב אוועק געגעבן צענדליגער שעה פאר דיר, און יעצט הער איך אז דו טוסט עבירות, דו גייסט מיט פרעמדע רחמנא לצלן.

איין זאך קען איך דיר זאגן, דו וועסט פארשעמט ווערן פאר די גאנצע וועלט, דו וועסט בלייבן אן א שטוב, אן דיינע קינדער; אדער טוסטו תשובה, אז נישט וועט זיין זייער ביטער, עס איז נישט הפקר.

איך קען דיך נישט אויפנעמען כל זמן דו טוסט עבירות, און איך וויל נישט דו זאלסט האבן א שייכות מער מיט אונזער קהילה.

בעזרת ה' יתברך - יום ב' פרשת תצוה, שובבי"ם, י' אדר א', שנת תשפ"ד לפרט קטן

לכבוד ... נרו יאיר

ווען דו ביסט זיך מתבודד זאלסטו שרייען צום אייבערשטן ער זאל דיך רייניגן פון די פיינטשאפט און קנאה וואס איז איינגעגעסן אין דיר, ווייל ווער עס זינדיגט אין פגם הברית וכו' - קומט אים שטענדיג אריין מחשבות פון קנאה, שנאה, כעס רציחה וכו' - און אלע שלעכטע מידות.

דעריבער זאלסטו זיך אויסרעדן צום אייבערשטן און זאגן: "הייליגער באשעפער, רייניג מיך פון מיינע שלעכטע מידות, הייליגער באשעפער איך וויל זיין גוט, איך וויל זיין ריין, וואס טו איך דא מיט די פיינטשאפט, מיט די קנאה, מיט די כעס און רציחה, רייניג מיך".

אויך זאלסטו זיך מאכן א שיעור אין לערנען ספר המידות, און ביי יעדע מידה זאלסטו נאס מאכן דעם ספר; זיך מתבודד זיין מיט הייסע טרערן אז די שלעכטע מידות זאלן ארויסגיין און די גוטע מידות זאלן אריינקומען.

איך האף אז דו ביסט עוסק אין הפצה. פארבינד זיך מיט אונזער בית הדפוס, פרעג וואס דו קענסט העלפן מיט פארשפרייטן די ספרים; מיר קענען נוצן הילף בגוף, בטירחא ובממון. אזוי ווי רבי נתן האט אונז געלאזט צוואה מיר זאלן עוסק זיין אין פארשפרייטן די ספרים וואס ברענגען די גאולה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת תרומה, שובבי"ם, ה' אדר א', שנת תשפ"ד לפרט קטן

לכבוד ... נרו יאיר

די גרעסטע צדקה איז העלפן דרוקן דעם רבינ'ס ספרים און דאס פארשפרייט פאר אלעמען. בפרט ווער עס האט פוגם געווען בברית, אין הוצאת זרע לבטלה רחמנא לצלן, אדער געפאלן אין ניאוף, מיט נשג"ז, רחמנא לצלן רחמנא לישזבן - איז זיין תיקון צו דרוקן די ספרים און דאס פארשפרייטן, אזוי וועט ער פאררעכטן וואס ער האט פוגם געווען.

עס איז דא אסאך ספרים, אסאך גוטע זאכן, אבער פון איין זאך רעדט קיינער נישט; קיינער רעדט נישט צו די בחורים און אינגעלייט וואס זענען געפאלן אין פגם הברית, די וואס זענען נעבעך אריינגעפאלן אין די נעץ פונעם שטן, זיי ליגן אין די טומאה פון ניאוף, זיי גייען ארום זייער פארלוירן, זייער צעבראכן, זיי טראכטן מחשבות פון זיך נעמען דאס לעבן, און נאר די ספרים און קונטרסים פון מוהרא"ש רעדט צו זיי, איז זיי מחזק און ווייזט זיי די וועג צוריק צו קומען צום אייבערשטן.

געב דיין צדקה צו דרוקן די ספרים פון רבי'ן, בפרט די ליכטיגע זיסע קונטרסים פון מוהרא"ש און די הייליגע בריוו פון אשר בנחל, וואס איז מחי' ומחזק אלפים ורבבות; וועסטו אלעס מתקן זיין.

מארגן וועט זיין די ליל שישי שיעור אין ישיבה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת יתרו, שובבי"ם, י"ט שבט, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

ווער האט דיר פארדרייט דיין קאפ אז לעבן מיט א ווייב איז תאוות? ווער האט דיר איינגערעדט די זאכן?! לעבן מיט די ווייב איז נישט קיין תאוות; אז מען היט די הלכות, און מען לעבט מיט די ווייב מיט שלום און מיט ליבשאפט - איז מען נישט קיין בעל תאוה.

געב זיך אכטונג פון די פארדארבענע מלמדים וואס לערנען מיט חתנים קעגן די תורה, זיי לערנען חומרות ופרישות, און נאכדעם פאלט מען אין ביטערע עבירות. אזוי ווי דו אליינס דערציילסט, אז דו ביסט נעבעך אזוי געפאלן אז דו גייסט מיט גוי'טעס רחמנא לצלן רחמנא לישזבן, וואלסטו געלעבט ווי די תורה לערנט - וואלסטו געהאט א שמירה.

מוהרא"ש זכותו יגן עלינו זאגט, משיח וועט הענגען אלע מדריכים ומדריכות וואס לערנען פאר חתנים און כלות - חומרות ופרישות, מוהרא"ש האט יעדן איינעם מחזק געווען, מוהרא"ש האט נישט געהאנגען קיין מענטשן, אבער ווען מען רעדט פון פארפירערס וואס פירן אראפ כלל ישראל; זיי זענען עתיד ליתן את הדין.

מאך זיך נישט נאריש מיט די זאכן, לעב אזוי ווי די תורה זאגט, לעב אזוי ווי דער אייבערשטער זאגט צו לעבן, מאך נישט קיין חכמות. דער הייליגער רבי זאגט (לקוטי מוהר"ן חלק ב', סימן מד): "גַּם מֵחָכְמוֹת שֶׁיֵּשׁ בַּעֲבוֹדַת הַשֵּׁם בְּעַצְמוֹ צָרִיךְ לְהַרְחִיק מְאֹד", מען דארף זיך זייער היטן פון חכמות, "כִּי כָל אֵלּוּ הַחָכְמוֹת שֶׁל הָעוֹלָם שֶׁיֵּשׁ לְהַנִּכְנָסִין וּמַתְחִילִין קְצָת בַּעֲבוֹדַת הַשֵּׁם, אֵינָם חָכְמוֹת כְּלָל וְהֵם רַק דִּמְיוֹנוֹת וּשְׁטוּתִים וּבִלְבּוּלִים גְּדוֹלִים", ווייל די אלע חכמות וואס מען האט ווען מען הויבט אן דינען דעם אייבערשטן - זענען בכלל נישט קיין חכמות, דאס איז דמיונות, שטותים און קאפ דרייענישן, "וְאֵלּוּ הַחָכְמוֹת מַפִּילִין מְאֹד אֶת הָאָדָם מֵעֲבוֹדַת הַשֵּׁם", דאס מאכט אז דער מענטש זאל אפלאזן זיין עבודת השם, "וְעַל אֵלּוּ הַמְדַקְדְּקִים וּמַחְמִירִים בְּחֻמְרוֹת יְתֵרוֹת עֲלֵיהֶם נֶאֱמַר 'וְחַי בָּהֶם, וְלֹא שֶׁיָּמוּת בָּהֶם' כִּי אֵין לָהֶם שׁוּם חִיּוּת כְּלָל", די אלע וואס זענען פארנומען מיט חכמות און ספיקות - זענען אלץ מסופק צי זיי האבן יוצא געווען די מצוה צי נישט - די האבן נישט קיין שום חיות, "וְתָמִיד הֵם בְּמָרָה שְׁחֹרָה מֵחֲמַת שֶׁנִּדְמֶה לָהֶם שֶׁאֵינָם יוֹצְאִים יְדֵי חוֹבָתָם בְּהַמִּצְווֹת שֶׁעוֹשִׂין וְאֵין לָהֶם שׁוּם חִיּוּת מִשּׁוּם מִצְוָה מֵחֲמַת הַדִּקְדּוּקִים וְהַמָּרָה שְׁחֹרוֹת שֶׁלָּהֶם", זיי זענען שטענדיג דיפרעסט, זיי לעבן שטענדיג אין ספיקות, און די חומרות ווארפט זיי אריין אין מרה שחורה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ג' פרשת יתרו, שובבי"ם, כ"א שבט, שנת תשפ"ד לפרט קטן

...

איך האב געהערט די מעסעדזש, עס איז מיר שלעכט געווארן, איך האב געמיינט איך פאל חלשות... ווי קען זיין אזא זאך, א ווייבל זאל גיין אונטערן מאנ'ס רוקן רעדן מיט א פרעמדער מאן... הענט און פוס ציטערן מיר, איך ווייס נישט וואס צו טון.

זאג פאר די ווייבל, אדער טוט זי תשובה, זי לאזט אפ די עקלדיגע גרויליגע זאך פון רעדן מיט א פרעמדער מאן אונטערן מאנ'ס רוקן – וועט דער אייבערשטער איר מוחל זיין, און אז נישט – קען אנקומען א ביטערע מחלה וואס מען ענדיגט דאס לעבן אין שפיטאל; ווייל אויף אלעס איז דער אייבערשטער מאריך אף, ער ווארט, אויסער אויף זנות (בראשית רבה כו, ה).

איך האב געהערט די מעסעדזש איידער איך האב געטאנצן מצוה טאנץ ביי א חתונה אין ישיבה, איך האב נישט געהאט כח צו טאנצן פון הערן אזא מעשה.

איך דארף מקצר זיין, איך האב נישט קיין כח.

בעזרת ה' יתברך - ערב שבת קודש פרשת בא, שובבי"ם, ט' שבט, שנת תשפ"ד לפרט קטן

לכבוד ... נרו יאיר

טו אלעס אבי עס זאל זיין שלום אין שטוב, בייג זיך אראפ אבי עס זאל זיין שלום, זיי מוחל דיין ווייב, האלט נישט קיין רוגזא אין דיר; ווייל אלע זאכן וואס שטערט דיך פון דיין ווייב - דאס איז אלעס מעשה שטן, ער וויל צעשטערן די שלום אין שטוב.

נעכטן זאגט מיר א אינגערמאן אז עפעס טוט זיין ווייב און עס שטערט אים זייער, עד כדי כך אז ער עקלט זיך פון איר; זאג איך אים: "טייערער ברודער, עס איז נישט דאס און נישט יענץ, עס איז מעשה שטן, דיך שטערט דאס, א צווייטן שטערט עפעס אנדערש"; יעדער האט עפעס א זאך וואס דאס שטערט אים, ווען באמת איז אלעס אונטערגעשטעלט פונעם שטן, חרוב מאכן די שלום בית.

נישט איך זאג דאס, דער רבי זאגט דאס, און מוהרא"ש האט דאס טויזנטער מאל גע'חזר'ט פאר אונז, די ווערטער פון רבי'ן. דער רבי זאגט (שיחות הר"ן, סימן רסג): "זֶה מַעֲשֶׂה בַּעַל דָּבָר, שֶׁמַּנִּיחַ אֶת עַצְמוֹ עַל זֶה מְאֹד, לְקַלְקֵל הַשָּׁלוֹם שֶׁל בְּנֵי הַנְּעוּרִים, כְּדֵי שֶׁיִּתָּפְסוּ בִּמְצוּדָתוֹ חַס וְשָׁלוֹם עַל יְדֵי זֶה", דער יצר הרע זוכט ווי ער קען אוועק נעמען די ליבשאפט צווישן מאן און ווייב, ער וויל נאר מען זאל זיך צעטיילן, ווייל אזוי קען ער גרינגער אראפווארפן דעם מענטש אין עבירות, "כִּי הוּא אוֹרֵב עַל זֶה מְאֹד, לְתָפְסָם בִּנְעוּרֵיהֶם עַל יְדֵי קִלְקוּל הַשְּׁלוֹם בַּיִת חַס וְשָׁלוֹם, שֶׁגּוֹרֵם בְּעַרְמוּמִיּוּתוֹ לְקַלְקֵל הַשָּׁלוֹם שֶׁבֵּינֵיהֶם", דער יצר הרע לאקערט אויף יונגע פארפעלקער זיי צו צעטיילן, אזוי ווארפט ער זיי אראפ אין שמוציגע עבירות.

א פרייליכן שבת.

בעזרת ה' יתברך - יום ג' פרשת וארא, שובבי"ם, כ"ח טבת, שנת תשפ"ד לפרט קטן

לכבוד ... נרו יאיר

היט דיינע אויגן, קוק נישט קיין עבירות, קוק נישט קיין מאוויס, קוק נישט אויף פרעמדע. מוהרא"ש זאגט, דאס איז די בעסטע סגולה פאר פרנסה בשפע, מוהרא"ש טייטשט דעם פסוק (תהלים קמה, טו): "עֵינֵי כֹל אֵלֶיךָ יְשַׂבֵּרוּ, וְאַתָּה נוֹתֵן לָהֶם אֶת אָכְלָם בְּעִתּוֹ", 'יְשַׂבֵּרוּ' – קען מען ליינען מיט א שׁין: "עֵינֵי כֹל אֵלֶיךָ 'יְשַׁבֵּרוּ'", אז מען צעברעכט די אויגן, מען קוקט נישט קיין עבירות - "וְאַתָּה נוֹתֵן לָהֶם אֶת אָכְלָם בְּעִתּוֹ", וועט דער אייבערשטער געבן פרנסה אין צייט.

אז דו וועסט היטן די אויגן; נישט קוקן קיין עבירות, נישט קוקן מאוויס, קליפס און בילדער פון פרעמדע, אויך ביי די ארבעט מיט די סעקריטעריס פרויען וועסטו נישט קוקן - וועסטו זוכה זיין צו פרנסה בריווח; ווייל ווען מען היט נישט די אויגן - קומט מען נאכדעם צו פוגם זיין בברית, וואס דאס ברענגט אלע צרות אויפן מענטש; דאס ברענגט ארעמקייט. אזוי ווי דער הייליגער זוהר זאגט (פנחס, רמד:): "מַאן דִּמְזַלְזֵל בְּפִרוּרִין דְּנַהֲמָא, עֲנִיּוּתָא רָדִיף אֲבַּתְרֵיהּ", ווער עס איז ווארפט אראפ ברעקלעך פון ברויט וועט זיין אן ארעמאן, "כָּל שֶׁכֵּן מַאן דִּמְזַלְזֵל בְּפִירוּרִין דְּמוֹחָא", איז דאך זיכער אז אויב מען איז מוציא זרע לבטלה רחמנא לצלן - פארלירט מען דאס מזל און מען ווערט אן ארעמאן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת שמות, שובבי"ם, י"ט טבת, שנת תשפ"ד לפרט קטן

לכבוד ... נרו יאיר

עס איז נישט אויסגעהאלטן די וועג פון נעמען א מיידל זאל מענידזשן אינגעלייט, עס שמעקט פון ניאוף.

אדער נעמסטו אוועק די מיידל פון מיינע אינגעלייט, אדער זאג איך פאר מיינע תלמידים נישט צוריק צו גיין צו די ארבעט.

בעזרת ה' יתברך - ערב שבת קודש פרשת ויגש, עשרה בטבת, שנת תשפ"ד לפרט קטן

לכבוד ... נרו יאיר

דיין ווייב זאגט אז דו ביסט זייער היימיש מיט איר שוועסטער, דו רעדסט מיט איר שעות אויף שעות. זיי נישט נאריש, טו נישט אזעלכע זאכן, רעד נישט מיט דיין שוועגערין, האסט א ווייב - רעד מיט איר. עס איז עקלדיג און גרויליג צו רעדן מיט פרעמדע; האסט א ווייב, רעד מיט איר; זי וויל אזוי שטארק האבן א ווארעמע שטוב, הייליג און ריין, דו טראכסט פון איר זי טראכט פון דיר, און ביידע טראכטן פונעם אייבערשטן.

עס איז א גרויסע מצוה צו גיין צו עלטערן אויף שבתים, ימים טובים וכו', אבער אויב עס ווערט א מצב פון חמור-אייזל פוטער-אייזל השם ישמרינו - בלייבט מען אין שטוב אפגעהיטן.

זאג נישט 'מען קען מיינען, וואס איז דער פראבלעם? מען שמועסט נאר, מען טוט גארנישט שלעכט, מען לאכט נאר, מען שמייכלט נאר'; שלמה המלך זאגט (משלי ו, כז): "הֲיַחְתֶּה אִישׁ אֵשׁ בְּחֵיקוֹ וּבְגָדָיו לֹא תִשָּׂרַפְנָה", קען דען א מענטש האלטן פייער אויפן שויס און זיינע קליידער וועלן נישט פארברענט ווערן? "אִם יְהַלֵּךְ אִישׁ עַל הַגֶּחָלִים וְרַגְלָיו לֹא תִכָּוֶינָה", קען דען א מענטש שפאצירן אויף ברענעדיגע קוילן און זיינע פיס זאלן נישט פארברענט ווערן? "כֵּן הַבָּא אֶל אֵשֶׁת רֵעֵהוּ, לֹא יִנָּקֶה כָּל הַנֹּגֵעַ בָּהּ", דאס זעלבע סוף וועט זיין מיט א מענטש וואס זאגט 'איך שמועס נאר, איך פארברענג נאר'; רחמנא לצלן.

גיי יעדן טאג התבודדות, שריי צום אייבערשטן: "רבונו של עולם איך בין אין א סכנה, איך רעד מיט פרעמדע, איך טראכט פון פרעמדע, ראטעווע מיך איך זאל שוין אפלאזן פרעמדע".

א גוט שבת.

בעזרת ה' יתברך - יום ג' פרשת ויגש, ז' טבת, שנת תשפ"ד לפרט קטן

לכבוד ... נרו יאיר

לאז אפ אלע חכמות, הער אויף מיט די אויבער'חכמ'קייט; טו וואס דער אייבערשטער הייסט - וועסטו געראטעוועט ווערן פון אלע צרות. חכמינו זכרונם לברכה זאגן (דברים רבה ו, ו): "יֵשׁ מַזִּיק", עס איז דא א מלאך וואס שעדיגט דעם מענטש, "שֶׁקּוֹשֵׁט כְּחֵץ", עס שיסט ווי א פייל, "וְטָס כָּעוֹף", און פליט ווי א פייגל, און ער מאכט צרות פארן מענטש. "אָמַר הַקָּדוֹשׁ בָּרוּךְ הוּא", דער אייבערשטער זאגט, "אִם קִיַּמְתָּ מִצְוַת שִׁלּוּחַ הַקֵּן", אויב דו טוסט די מצוה פון שלוח הקן, "אֲנִי מַצִּילְךָ מֵאוֹתָן", וועל איך דיך ראטעווען פון זיי, "שֶׁנֶּאֱמַר", אזוי ווי עס שטייט (תהלים צא, ה) "לֹא תִירָא מִפַּחַד לָיְלָה", וועסט נישט מורא האבן פון די שרעק פון די נאכט, "מֵחֵץ יָעוּף יוֹמָם"; מוהרא"ש געבט אונז צו פארשטיין אז דאס גייט ארויף אויף וואס רבי נתן זאגט (עיין לקוטי הלכות בשר בחלב הלכה ד, אות ב), "שַׁלֵּחַ תְּשַׁלַּח אֶת הָאֵם", שיק אוועק דיינע חכמות, 'אֵם' - דאס איז חכמות, "וְאֶת הַבָּנִים תִּקַּח לָךְ" (דברים כב, ז) - דאס מיינט מען די מעשים טובים; די עצה פטור צו ווערן פון די מזיקים וואס ווערן באשאפן פון פגם הברית, איז דורך אוועק ווארפן די חכמות המדומות און טון מצוות ומעשים טובים.

ווען מען איז פוגם בברית ווערט די מח אינגאנצן פארדרייט, מען הויבט אן האבן קשיות אויפן אייבערשטן חס ושלום, קשיות אויף צדיקים, מען איז אין א גרויסע סכנה; די איינציגסטע עצה ווי אזוי מען קען זיך ראטעווען - איז דורך זיך פירן בתמימות ופשיטות, ווייטער דינען דעם אייבערשטן אן קיין חכמות.

איך בעט דיך זייער, לאז אפ אלע חכמות, וויל נישט פארשטיין וואס דו קענסט נישט פארשטיין, און זוך נישט צו פארשטיין וואס איז דיר נישט מעגליך צו פארשטיין; מיר דארפן טון וואס די הייליגע צדיקים זאגן אונז, לערנען און דאווענען און זיין זייער פרייליך; דאס זאגן די הייליגע חכמים, אין זכות פון שלוח הקן, אז מען ווארפט אוועק די חכמות, מען טוט מצוות און מעשים טובים - ווערט מען געראטעוועט פון די מזיקים וואס ווערן באשאפן פון פגם הברית, דער אייבערשטער זאל אונז היטן פון דעם.

 דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת מקץ, ג' טבת, זאת חנוכה, שנת תשפ"ד לפרט קטן

לכבוד ... נרו יאיר

היינט זאת חנוכה איז א גרויסער טאג, מען קען היינט אנהויבן דינען דעם אייבערשטן מיט שמחה.

בעט איך דיך זייער, הויב אן נאכאמאל, לאז נישט נאך דיין ווילן, געב נישט אויף; דער רבי האט געשריגן מיט א הויך קול (לקוטי מוהר"ן חלק ב', סימן עח): "גיוואלד! קיין יאוש איז גארנישט פארהאנען!"

טייערער ברודער מיינע, געענדיגט מיט די טומאה, היינט זאת חנוכה קענסטו זוכה זיין צו ווערן ריין פארן אייבערשטן, ווארף אוועק די טומאה, קוק נישט קיין מאוויס מער, קוק נישט קיין זוהמה; אז מען קוקט עבירות ווערט מען בעצבות, מען פארלירט אלעס.

פאלג מיך טייערער הארציגער חבר, אנשטאט זיך באהאלטן מיט א טעבלעט, אייפאד, סמארטפאון און קוקן שמוץ, קוקן ניאוף רחמנא לצלן - זאלסטו זיך באהאלטן מיטן אייבערשטן; זוך א ווינקל וואו קיינער איז נישט דארט און שמועס זיך אויס דאס הארץ, רעד זיך אויס דיין הארץ צום אייבערשטן, וויין צו אים, זאג אים: "רבונו של עולם, ווען וועל איך שוין תשובה טון? איך ליג אין בלאטע, איך ליג אין עבירות, מיין גאנצע מח מחשבה איז נאר ניאוף; העלף מיר טאטע, ראטעווע מיך באשעפער".

דער אייבערשטער זאל העלפן זאלסט האבן הצלחה אין אלע ענינים.

א פרייליכן חנוכה און א גוט שבת.

בעזרת ה' יתברך - יום ב' פרשת וישב, כ"א כסליו, שנת תשפ"ד לפרט קטן

מרת ... תחי', קרית ברסלב

איך האב ערהאלטן אייער בריוו.

רעדט נישט מיט פרעמדע מענער, דאנקט דעם אייבערשטן אז איר האט א מאן, א וואוילער מאן, א ירא שמים; מיט אים רעדט און מיט אים פארברענגט. עס איז זייער עקלדיג אז א פרוי רעדט, שמועסט און לאכט מיט א פרעמדער מאן, און דער סוף קען זיין גאר ביטער.

לאזט נישט אריין ביי אייך אין שטוב אנדערע קאפלס, און אז אייער מאן קען נישט זאגן ניין – זאלט איר זיין דער שטארקער וואס זאגט ניין.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת וישב, כ' כסליו, שנת תשפ"ד לפרט קטן

לכבוד ... נרו יאיר

דער אייבערשטער האט דיך ליב, דער אייבערשטער איז דיין טאטע. א קינד קען אלץ צוריקקומען צו זיין טאטע; אפילו דו האסט פוגם געווען, ביסט געפאלן אין גראבע זינד - קענסטו נאכאלץ צוריקקומען, דער אייבערשטער האט דיך זייער זייער ליב.

לאז זיך נישט אפ, לאז זיך נישט צעברעכן פון קיין שום זאך אויף די וועלט, דאס איז די גרעסטע זאך און מיט דעם מעסט מען דאס גרויסקייט פון א מענטש, נאר מיט דעם; דער וואס דערהאלט זיך, דער וואס געבט נישט אויף און גייט נישט אוועק פונעם אייבערשטן.

בנוגע דיין פרנסה וכו'; געלט האט קיינער נישט, עס איז א גרויסע שפיל, שפיל דו אויך דעם שפיל - כאילו דו האסט אסאך געלט; טראכט 'איך האב זייער אסאך געלט, איך האב עס יעצט אינוועסטירט', און לאך זיך גוט אויס.

אלעס איז דמיון, נאר דער אייבערשטער איז אמת; יעדע מחשבה וואס מען טראכט, אויב איז עס נישט פון אמונה - איז עס דמיון.

שבת חנוכה וועל איך זיין אין שטעטל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת לך לך, ט' מר-חשון, שנת תשפ"ד לפרט קטן

לכבוד ... נרו יאיר

אפילו דו ביסט אזוי אראפגעפאלן רחמנא לצלן, דו ביסט אזוי פארכאפט ביי די קליפות, דיינע אויגן זענען פארשמירט מיט קוקן ... רחמנא לצלן, דיין מח איז אזוי פארברענט; מיט דעם אלעם זאלסטו זיך נישט מייאש זיין, ווייל דער אייבערשטער איז זייער גרויס און ער קען דיר אויך העלפן.

נעם די עצה פון מוהרא"ש, וואס האט גענומען די עצה פון רבי'ן, מאך זיך א שיעור אין משניות; זאג יעדן טאג אפאר פרקים משניות. דער רבי זאגט (שיחות הר"ן, סימן יט): "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה - ער טוט עבירות רחמנא לצלן, און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד", אויב וועט ער זיך מאכן א קביעות צו לערנען יעדן טאג 'כך וכך' - וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס, אז עס נעמט ארויס דעם מענטש פון זיין שלעכטס.

זיי זיך נישט מייאש.

איך בין זייער פארנומען, איך מוז מקצר זיין.

דער אייבערשטער זאל העלפן זאלסט האבן הצלחה אין אלע ענינים

בעזרת ה' יתברך - יום ד' פרשת נח, ג' מר-חשון, שנת תשפ"ד לפרט קטן

לכבוד מיין ליבער טייערער ... נרו יאיר, בארא פארק

דער עיקר תיקון אויף תאות ניאוף - איז אמונה, נישטא קיין אנדערע וועג ווי אזוי מען קען ווערן געראטעוועט פון תאות ניאוף. אזוי ווי דער הייליגער רבי זאגט (לקוטי מוהר"ן חלק א', סימן לו): "כי תקון של הרהורי זנות שבא לאדם, שיאמר 'שמע' ו'ברוך שם'", ווען מען האט שלעכטע מחשבות פון ניאוף זאל מען ליינען קריאת שמע, "וכשאדם מקבל עליו על מלכות שמים", ווען א מענטש ליינט קריאת שמע, ער ווייסט אז דער אייבערשטער מאכט אלעס און פירט אלעס, - "ומפריש את נשמתו מנשמת ערב רב, הבאים מאשה זונה, שהיא שפחה בישא", גייט ער אוועק פון די טומאה.

טייערער ברודער, עס ברענט, עס פלאקערט, דער יצר הרע - ער ווארפט אראפ אין פגם הברית רחמנא לצלן; וויפיל מען פרובירט זיך פארצונעמען פרישע קבלות – פאלט מען און מען פאלט... ברודער, עס איז דא איין עצה, וויינען צום אייבערשטן: "הייליגער באשעפער, איך וויל אמונה, איך וויל וויסן אז דו ביסט אלעס, דו מאכסט אלעס, דו טוסט אלעס, נישטא קיין טבע, קיין מקרה, קיין מזל". דער רבי זאגט (שם) ווער עס איז נעבעך צוגעוואוינט צו פוגם זיין – דארף וויינען, "צריך להוריד דמעות בשעת קבלת מלכות שמים", וויינען: "רבונו של עולם, וואו בין איך פארקראכן... רבונו של עולם איך וויל אמונה, איך וויל דיך שפירן".

הונדערט טויזנט מאל "אשרינו" אז מיר האבן אזא רבי.

בעזרת ה' יתברך - יום ד' פרשת נח, ג' מר-חשון, שנת תשפ"ד לפרט קטן

לכבוד ... נרו יאיר

אז עס פלאקערט אין דיר תאוות ניאוף - זאלסטו נעמען א משניות און דאס אויסלעשן מיט פרקים משניות, ווייל נאר דורך תורה קען מען אויסלעשן די שרעקליכע פייער פון ניאוף; נאר משניות וועט דיך ראטעווען, נאך א פרק, נאך א פרק און נאך א פרק - דאס וועט דיך ראטעווען פון די פייער וואס פארברענט דיר.

משניות האט אין זיך אלע סגולות און אלע ישועות; קענסט זיך נישט פארשטעלן וואס דו וועסט זוכה זיין דורך לערנען משניות, דורך זאגן די ווערטער אפילו אן פארשטיין.

אויב דו האסט נישט קיין געלט און דו דארפסט בארגן געלט - זאלסטו נישט נוצן קיין קרעדיט קארד; קרעדיט קארד איז א דרך קצרה וארוכה, עס זעט אויס גרינג, אבער ביים סוף ווערט מען צעביסן אויף שטיקער, מען צאלט שרעקליכע ריבית; ענדערש זאלסטו גיין הפצה און גיין נאך געלט - ווי זיך שיסן מיט קרעדיט קארדס.

זאג תהילים קאפיטל פג, בעט דעם אייבערשטן עס זאל נישט געשעדיגט ווערן קיין איין איד און משיח זאל אונז שוין אויסלייזן.

א שִׁיר מִזְמוֹר לְאָסָף: ב אֱלֹקִים אַל דֳּמִי לָךְ אַל תֶּחֱרַשׁ וְאַל תִּשְׁקֹט אֵ-ל: ג כִּי הִנֵּה אוֹיְבֶיךָ יֶהֱמָיוּן וּמְשַׂנְאֶיךָ נָשְׂאוּ רֹאשׁ: ד עַל עַמְּךָ יַעֲרִימוּ סוֹד וְיִתְיָעֲצוּ עַל צְפוּנֶיךָ: ה אָמְרוּ לְכוּ וְנַכְחִידֵם מִגּוֹי וְלֹא יִזָּכֵר שֵׁם יִשְׂרָאֵל עוֹד: ו כִּי נוֹעֲצוּ לֵב יַחְדָּו עָלֶיךָ בְּרִית יִכְרֹתוּ: ז אָהֳלֵי אֱדוֹם וְיִשְׁמְעֵאלִים מוֹאָב וְהַגְרִים: ח גְּבָל וְעַמּוֹן וַעֲמָלֵק פְּלֶשֶׁת עִם יֹשְׁבֵי צוֹר: ט גַּם אַשּׁוּר נִלְוָה עִמָּם הָיוּ זְרוֹעַ לִבְנֵי לוֹט סֶלָה: י עֲשֵׂה לָהֶם כְּמִדְיָן כְּסִיסְרָא כְיָבִין בְּנַחַל קִישׁוֹן: יא נִשְׁמְדוּ בְעֵין דֹּאר הָיוּ דֹּמֶן לָאֲדָמָה: יב שִׁיתֵמוֹ נְדִיבֵמוֹ כְּעֹרֵב וְכִזְאֵב וּכְזֶבַח וּכְצַלְמֻנָּע כָּל נְסִיכֵמוֹ: יג אֲשֶׁר אָמְרוּ נִירְשָׁה לָּנוּ אֵת נְאוֹת אֱלֹקִים: יד אֱלֹקַי שִׁיתֵמוֹ כַגַּלְגַּל כְּקַשׁ לִפְנֵי רוּחַ: טו כְּאֵשׁ תִּבְעַר יָעַר וּכְלֶהָבָה תְּלַהֵט הָרִים: טז כֵּן תִּרְדְּפֵם בְּסַעֲרֶךָ וּבְסוּפָתְךָ תְבַהֲלֵם: יז מַלֵּא פְנֵיהֶם קָלוֹן וִיבַקְשׁוּ שִׁמְךָ ה': יח יֵבֹשׁוּ וְיִבָּהֲלוּ עֲדֵי עַד וְיַחְפְּרוּ וְיֹאבֵדוּ: יט וְיֵדְעוּ כִּי אַתָּה שִׁמְךָ ה' לְבַדֶּךָ עֶלְיוֹן עַל כָּל הָאָרֶץ:

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת בראשית, אסרו חג סוכות, כ"ד תשרי, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

אז דו נעמסט זיך פאר נישט צו רעדן מער קיין ניבול פה - קענסטו צוריק קומען ביי אונז אין היכל הקודש, אויך נאר בתנאי אז דו וועסט נישט ארויסנעמען קיין טעלעפאן וכדומה - קוקן שמוציגע זאכן.

וויסן זאלסטו, יעדער איינער קען תשובה טון, אבער נאר אז מען לאזט אפ דעם טויטן שרץ; כל זמן מען האלט אין האנט די טויטע שרץ, אפילו מען טובל'ט זיך אין מקוה אריז"ל, אפילו מען גייט אין אלע קוועלער - בלייבט מען טמא. אזוי זאגן די הייליגע חכמים (תענית טז.): "אָדָם שֶׁתּוֹפֵס שֶׁרֶץ בְּיָדוֹ, אֲפִלּוּ טוֹבֵל בְּכָל מֵימוֹת שֶׁבָּעוֹלָם לֹא עָלְתָה לוֹ טְבִילָה, זְרָקוֹ מִיָּדוֹ כֵּיוָן שֶׁטָּבַל בְּאַרְבָּעִים סָאָה מִיַד עָלְתָה לוֹ טְבִילָה", ווען איינער איז טמא און טובל'ט זיך - ווערט ער ריין נאר אויב ער לאזט אפ דעם טויטן שרץ, ווייל ווי לאנג מען האלט אן דעם טויטן שרץ, אפילו מען טובל'ט זיך אין אלע וואסערן, אין אלע מקוואות - בלייבט מען טמא, נאר אז מען ווארפט אוועק די טויטע שרצים - ווערט מען טהור.

אז דו ווילסט תשובה טון - ווארף אוועק דיין טעלפאן און אנדערע מאשינדלעך וואס מען קען זען עבירות, און אזוי וועסטו קענען תשובה טון.

זאג אסאך משניות אפילו בלי הבנה כלל, וועט אריינגיין אין דיר א ריינקייט.

איך בין נישט ברוגז אויף דיר, איך האב דיך אוועקגעשיקט נאר ווייל ביי אונז אין היכל הקודש דארף איך אכטונג געבן מען זאל רעדן נאר איידל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת נצבים וילך, י"ט אלול, שנת תשפ"ג לפרט קטן

לכבוד ... נרו יאיר

עס איז געווען איינער פון אנשי שלומינו, משה אלי'. אין אנהויב ווען ער איז מקורב געווארן - איז ער געווען זייער ווייט, ער איז געלעגן אין ניאוף, אין אריך אנפין דקליפה (עיין לקוטי מוהר"ן חלק א, סימן רמב). יעדע מאל ווען ער איז געקומען צום ציון האט ער אזוי געוויינט ביים ציון ביז דער ערד פון ציון איז נאס געווארן פון זיינע טרערן, ער האט זיך אויסגעגאסן זיין הארץ צום אייבערשטן, ער האט געשריגן: "הייליגער באשעפער, ראטעווע מיך פון די פייער פון ניאוף, פון די שבעים מדורין, כלליות התאות, כלליות שבעים אומות, פון תאות ניאוף רחמנא לצלן", און פון אזויפיל וויינען איז ער ארויסגעקראכן פון זיינע תאוות. הגם אין אנהויב האבן אים אנשי שלומינו מרחק געווען, אבער ער האט אויף קיינעם נישט געקוקט, ער איז ווייטער געקומען צום ציון און געוויינט דארט, ביז ער האט זוכה געווען זיך אויסצולייטערן.

פארשטיי וואס דו האסט צו טון די וואך וואס דו וועסט זיין אין אומאן; זאלסט גיין נאכאמאל און נאכאמאל צום ציון און וויינען צום אייבערשטן ער זאל דיך ראטעווען פון די פייער פון ניאוף.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.