בריוון פונעם ראש ישיבה שליט"א

בעזרת ה' יתברך - יום ב' פרשת לך לך, ח' מרחשון, שנת תשפ"ז לפרט קטן

... תחי', תלמידת בית פיגא

איך האב ערהאלטן אייער בריוו.

איך האב צער פון וואס איר שרייבט אינעם בריוו, אז איר טוט זיך אויס ווען איר זענט אליין אין אייער שלאף שטוב און איר גייט צום שפיגל וכו'; א אידישע טאכטער טאר זיך נישט אזוי אויפפירן, מען דארף זיין אנגעטון אפילו מען איז אליין אין שטוב, מען דארף מורא האבן פונעם אייבערשטן; די ערשטע סימן אין שלחן ערוך הייבט זיך אן מיט די הלכה, אז אפילו מען איז אליין אין א הויז - דארף מען זיך פירן אזוי ווי מען וואלט געווען מיט מענטשן, מען דארף טראכטן: 'ווי אזוי וואלט איך זיך געפירט ווען איך בין אין מיין צימער מיט א קעניג? איך וואלט זיך זיכער אויפגעפירט איידל, און אזוי דארף איך זיך פירן אפילו ווען איך בין איינער אליין, ווייל דער אייבערשטער איז דא'.

איר ווילט אן ערליכע שידוך, און איר ווילט ערליכע קינדער, איר ווילט זיך נישט דארפן מוטשען אין לעבן מיט קינדער וואס זענען נישט ערליך, דער הייליגער רבי זאגט (ספר המדות אות בנים חלק א, סימן ט): "נאר אז מען איז איידל האט מען ערליכע קינדער"; און דאס הייבט זיך שוין אן אלס מיידל, און אפילו מען איז אליין אין שטוב דארף מען וויסן אז מען איז נישט אליין, דער אייבערשטער איז דא, דער אייבערשטער איז מיט מיר, ביי מיר און נעבן מיר.

אז איר וועט זיך אכטונג געבן פון היינט און ווייטער צו זיין איידל אפילו ווען איר זענט אליין, און איר וועט חרטה האבן אויף וואס איז געווען ביז אהער - קענט איר נאך אלעס פאררעכטן און נאכאלץ זוכה זיין צו אן ערליכע שידוך מיט ערליכע קינדער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת בראשית, כ"ו תשרי, שנת תשפ"ז לפרט קטן

... נרו יאיר

איך האב זייער הנאה געהאט דיך צו זען הושענא רבה ביי אונז אין שטעטל, איך האף דו האסט אויך הנאה געהאט פון די דאווענען און פון די דרשות, און דאס האט דיך צוריק אנגעצינדן נאכאמאל אנהייבן לעבן מיטן רבי'ן עצות.

איך ווייס נישט וואו דו וואוינסט היינט צו טאגס; אויב דו וואוינסט נאך אין 'מאנסי' זאלסטו וויסן אז מיר האבן א שול אין מאנסי, און יעדע וואך ליל שישי אום ניין אזייגער קען מען מיט האלטן די שיעור וואס מען געבט אין ישיבה; די שיעורים קען מען מיטהאלטן יעדע וואך ליל שישי סיי אין מאנסי, סיי אין מאנרא, אויך אין לעיקוואד און אין שטעטל. די אדרעס פון די מאנסי שול איז 34 יוניען ראוד, ספרינג וואלי, און אז דו וואוינסט נאך אין מאנסי איז א שאד צו פארפאסן די שיעורים, די שיעורים וועקן אויף פון שלאף, עס איז מחזק צו זיין א איד בתמימות ופשיטות, און אויף האבן א גוטע שלום בית מיטן אייבערשטן.

שטארק זיך לכבוד די נייע יאר צו מעביר סדרה זיין יעדן טאג, זונטאג ביז שני, מאנטאג ביז שלישי, און אזוי ווייטער, לערן יעדן טאג שנים מקרא ואחד תרגום. אויך זאלסטו צוריק אנהייבן לערנען משניות, זאג יעדן טאג אפאר פרקים משניות, און מאך זיך א שיעור צו לערנען יעדן טאג צוויי הלכות פון ספר קיצור שלחן ערוך.

בעזרת ה' יתברך - אייר, שנת תשפ"ד לפרט קטן

מתנה לכבוד הבר מצוה

... נרו יאיר

לערן יעדן טאג א סעיף אין שלחן ערוך מיט די תפילין דרבינו תם, אזוי ווי דער הייליגער רבי זאגט (שיחות הר"ן, סימן כט), מען זאל לערנען יעדן טאג הלכה.

פון דיין ראש ישיבה.

בעזרת ה' יתברך - יום ג' פרשת שמיני, כ"ג אדר ב', שנת תשפ"ד לפרט קטן

לכבוד ... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו.

איך פריי זיך זייער צו ליינען דיינע בריוו.

יעצט אז דו האסט מסיים געווען אלע ספרים פון נ"ך זאלסטו זיך מאכן א שיעור אין ספר המידות, פרוביר צו ענדיגן יעדע וואך ספר המידות. דער רבי האט געזאגט (חיי מוהר"ן, סימן שעט): "דער ספר האט מיך געמאכט פאר א איד", אויך זאלסטו זאגן יעדן טאג ח"י פרקים משניות און דעם יום תהלים.

אויך בעט איך דיר, זיי מעביר סדרה יעדע וואך די פרשה שנים מקרא ואחד תרגום, זיי מעביר סדרה פון אנהויב וואך, און פרוביר צו ענדיגן שוין די פרשה שנים מקרא ואחד תרגום אויף דאנערשטאג, אזוי זאלסטו נישט פארפאסן א וואך פון מעביר סדרה זיין.

אויך זאלסטו לערנען יעדן טאג הלכה. דער רבי זאגט (שיחות הר"ן, סימן כט): "כָּל אִישׁ יִשְׂרְאֵלִי מְחֻיָּב לִלְמֹד בְּכָל יוֹם וָיוֹם פּוֹסְקִים, וְלֹא יַעֲבֹר", יעדער איד איז מחויב צו לערנען יעדן טאג הלכות, "וְאִם הוּא אָנוּס וְאֵין לוֹ פְּנַאי, יִלְמַד עַל כָּל פָּנִים אֵיזֶה סְעִיף שֻׁלְחָן עָרוּךְ בְּאֵיזֶה מָקוֹם שֶׁהוּא, אֲפִילּוּ שֶׁלֹּא בִּמְקוֹמוֹ שֶׁהוּא עוֹמֵד עַתָּה בְּשֻׁלְחָן עָרוּךְ", אויב מען האט נישט קיין צייט וכו' זאל מען לערנען א הלכה אפילו נישט כסדרן וואו מען האלט וכו', "כִּי צָרִיךְ לִלְמֹד אֵיזֶה דִּין בְּשֻׁלְחָן עָרוּךְ בְּכָל יוֹם וָיוֹם כָּל יְמֵי חַיָּיו", ווייל מען איז מחויב צו לערנען יעדן טאג הלכה.

הער אויס דיין מגיד שיעור הרב משה שמואל שליט"א און פאלג וואס ער זאגט דיר.

געב א גרוס פאר אלע בחורים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

אלול, שנת תשפ"א לפרט קטן

לכבוד הבחור הבר מצוה ... נרו יאיר

דא האסטו א מתנה ד' חלקי שלחן ערוך, זע צו לערנען יעדן טאג הלכה; דער רבי האט געזאגט (שיחות הר"ן, סימן כט) אז יעדער איד איז מחויב צו לערנען יעדן טאג הלכה.

דער אייבערשטער זאל העלפן זאלסט אויסוואקסן א גרויסער צדיק.

פון דיין ראש ישיבה.