בריוון פונעם ראש ישיבה שליט"א

בעזרת ה' יתברך

יום ג' פרשת בא, י"ז שובבי"ם, ב' שבט, שנת תשפ"ג לפרט קטן

לכבוד מיין טייערער ... נרו יאיר

א גרויסן יישר כח פאר'ן מיר געבן א מתנה, אן עירקאנדישן ביי מיר אין שטוב, און פאר'ן שיקן דיינע ארבעטערס זאלן דאס אינסטאלירן; איך בין דיר זייער דאנקבאר.

שטארק זיך בלימוד התורה, זיי שטארק אין לערנען יעדן טאג. לערנען תורה איז אזוי ווי אן עירקאנדישן פאר'ן מענטש. דער רבי זאגט (לקוטי מוהר"ן חלק א', סימן צב) אויף די ווערטער וואס רבי שמעון בר יוחאי זאגט (תקוני זוהר תיקון יג, דף כז:): "אִלְמָלֵא כַּנְפֵי רֵאָה דְּנָשְׁבִי עַל לִבָּא", ווען נישט די פינף פליגלען פונעם לונג וואס בלאזט זיך אויף יעדע פאר סעקונדעס, "הֲוֵי לִבָּא אוֹקִיד כָּל גּוּפָא", וואלט דער מענטש פארברענט געווארן פונעם ברענעדיגן הארץ. זאגט דער רבי, די 'חֲמִשָּׁה כַּנְפֵי רֵאָה' - דאס איז 'חמשה חומשי תורה' וואס קילט אפ דעם ברענעדיגן יצר הרע, און ווען נישט די תורה - וואלט מען פארברענט געווארן פון די היץ פון די תאוות היצר הרע.

דו האסט מיר געגעבן אן עירקאנדישן - וויל איך דיר צוריק באצאלן מיט אן עירקאנדישן; איך וועל דיך מחזק זיין צו לערנען יעדן טאג מקרא, משנה, גמרא, מדרש, הלכה ואגדה, ספרי רבינו ועוד שאר ספרים. עס הערט זיך אסאך, אבער מיט'ן סדר דרך הלימוד פון רבי'ן (המבואר בשיחות הר"ן, סימן עו), דורך זאגן די ווערטער, דורך לערנען בלי הבנה, אן פארשטיין - קען מען באווייזן צו לערנען און ענדיגן כל התורה כולה.

בעזרת ה' יתברך

יום טוב חנוכה, שנת תשע"ט לפרט קטן

לכבוד ... נרו יאיר.

איך געב דיר א מתנה א סעט: "תוספתא" אלץ הכרת הטוב אויף דעם וואס דו העלפסט מיר צושטעלן עסן פאר די קינדער און בחורים – פרישטאג און לאנטש וכו', אזוי אויך פארן האלטן די ישיבה ריין.

שטארק דיר בלימוד התורה און אין התבודדות, וועסטו זוכה זיין צו טרעפן א גוטע שידוך.

קוק אויף דיינע ברידערס ווי שיין זיי האבן חתונה געהאט – נאר ווייל זיי האבן אויסגענוצט זייערער יארן בתורה ותפלה און מיטן משמש זיין דעם רבי'ן.

פון דיין ראש ישיבה וואס האט דיר זייער ליב.

...