בריוון פונעם ראש ישיבה שליט"א

בעזרת ה' יתברך - יום ב' לסדר כי תבוא לאומאן, ט"ו אלול, שנת תשפ"ה לפרט קטן

מרת ... תחי'

איך האב ערהאלטן אייער בריוו.

בנוגע וכו'; ביי מיר אין שטוב פירט מען זיך, מען מאכט רינדעכיגע חלות פאר די סעודות פון ראש השנה, שבת תשובה, ערב יום כיפור, מוצאי יום כיפור און פאר די סעודות פון הושענא רבה.

עס איז דא אסאך טעמים פארוואס מען עסט רינדעכיגע חלות, איין טעם איז, יעצט איז מען דן די גאנצע יאר פון אנהייב ביזן סוף. אויך איז דא א טעם, יעצט שרייען מיר 'המלך' מאכט מען רינדעכיגע חלות אזוי ווי א קרוין. אויך איז דאס מרמז אויפן צדיק, דער רבי זאגט (לקוטי מוהר"ן חלק א', סימן ח), דער צדיק ווערט אנגערופן 'סוחר ישמעאל' ווייל 'סוחר' איז 'סחור', אויפן פסוק (קהלת א, ו): "סוֹבֵב סֹבֵב הוֹלֵךְ הָרוּחַ" - זאגט דער תרגום 'סחור' [רינדעכיג], דער צדיק בלאזט אריין א לופט, א רוח חיים וכו'. אויך איז רינדעכיג מרמז אויף נסים, אזוי ווי חכמינו זכרונם לברכה זאגן (תענית כה:), דער מלאך וואס איז כלול מכל הנסים דמיא לעגלא, בחינת עגולים, בחינת אמונה (עיין ליקוטי מוהר"ן חלק א', סימן ז). די בעסטע טעם איז, אז דאס איז דער מנהג ישראל, אזוי האבן די עלטערן געמאכט.

די אנדערע סעודות; די שבת נאך יום הכיפורים, און אזוי אויך די סעודות פון סוכות - מאכן מיר גראדע חלות.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת דברים, ב' מנחם-אב, שנת תשפ"ד לפרט קטן

מרת ... תחי'

איך האב ערהאלטן אייער בריוו.

מחנך זיין קינדער איז בכלל נישט קיין גרינגע זאך, עס איז די שווערסטע ארבעט וואס איז דא, מען דארף זאגן נאכאמאל און נאכאמאל, מען דארף זיין שטרענג און אויך הארציג.

ביי די שבת ליכט, און אויך ווען איר שיידט אפ חלה, און אזוי אויך ווען מען היט די הלכות וכו' - זאלט איר בעטן דעם אייבערשטן אויף אייער שפראך אז די קינדער זאלן זיין ערליך און זיי זאלן זיין געזונט און שטארק, און ווען מען ציט זיי אויף זאלן זיי נישט ארויסנעמען די גאנצע כוחות פון טאטע מאמע.

מען קען שטענדיג בעטן דעם אייבערשטן, דער אייבערשטער הערט אויס אונזערע תפילות, דאך איז דא מינוטן וואס איז אן 'עת רצון', וואס דעמאלט ווערן אנגענומען די תפילות שנעלער; ביי פרויען איז דאס ווען זיי טוען די מצוות פון נדה, חלה און הדלקת הנר, דעמאלט וועט נישט זיין (שבת לב.): "מתות יולדות" (לפי הגירסא מתות 'ילדות'), זיי וועלן האבן כח צו די קינדער; אז מען וועט זיין נזהר צו בעטן דעם אייבערשטן ביי די דריי מצוות עס זאל זיין גרינג דאס אויפברענגען די קינדער, און מען זאל זוכה זיין צו הייליגע קינדער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן

לכבוד מיין טייערער ... וזוגתו תחי'

זארגט נישט וועגן קינדער, ענק וועלן האבן קינדער; דאס זארגן צו סאך - דאס אליין קען אפהאלטן פון האבן קינדער.

טו וואס חכמינו הקדושים זאגן (בבא בתרא י:): "מַה יַעֲשֶֹה אָדָם וְיִּהְיוּ לוֹ בָּנִים זְכָרִים", וואס זאל א מענטש טון ער זאל זוכה זיין צו קינדער זכרים? רבי אליעזר זאגט: "יְפַזֵר מָעוֹתָיו לַעֲנִיִּים", ער זאל געבן צדקה, און רבי יהושע זאגט: "יְשַׂמַּח אִשְׁתּוֹ לִדְּבַר מִצְוָה", ער זאל פרייליך מאכן זיין ווייב.

זייט מתפלל צום אייבערשטן פאר קינדער, און ווען איר צינדט אן די שבת ליכט זאלט איר בעטן פאר קינדער, אזוי אויך ווען איר טוט די מצוה פון חלה, און ווען מען טוט די הלכות פון טהרת המשפחה - דעמאלט איז אן עת רצון צו בעטן פאר קינדער און צו געהאלפן ווערן.

דער אייבערשטער זאל העלפן איר זאלט האבן הצלחה אין אלע ענינים.