בעזרת ה' יתברך
יום ב' פרשת קרח, כ"ח סיון, שנת תשפ"ב לפרט קטן
מרת ... תחי'
איך האב ערהאלטן אייער בריוו.
בנוגע אייער פראגע פון זיך שטעכן מיט די מעדעצין וואס נעמט אוועק די אפעטיט, איר הערט פון מענטשן אז דאס ארבעט וואונדערליך, איר ווילט וויסן אויב איר זאלט דאס טון; טוט נישט די נייע זאך וואס מענטשן טוען יעצט פון זיך שטעכן מיט א מעדיקעישן וואס נעמט אוועק די אפעטיט, די אלע זאכן זענען נישט גוט; אזוי אויך זאלט איר נישט מאכן די סליוו, עס איז נישט כדאי זיך לייגן אונטער א מעסער, מוהרא"ש פלעגט אפרעדן פון דאס טון.
ענדערש זאלט איר נעמען דעם רבינ'ס מעדעצין, פון זיין פרייליך. דער רבי זאגט (לקוטי מוהר"ן חלק ב', סימן כד): "מִצְוָה גְּדוֹלָה לִהְיוֹת בְּשִׂמְחָה תָּמִיד", עס איז א גרויסע מצוה צו זיין שטענדיג פרייליך, "וּלְהִתְגַּבֵּר לְהַרְחִיק הָעַצְבוּת וְהַמָּרָה שְׁחֹרָה בְּכָל כֹּחוֹ", און זיך שטארקן מיט אלע כחות נישט צו זיין דעפרעסט. "וְכָל הַחוֹלַאַת הַבָּאִין עַל הָאָדָם, כֻּלָּם בָּאִין רַק מִקִּלְקוּל הַשִּׂמְחָה", ווייל אלע מחלות און אלע קרענק וואס קומען אויפ'ן מענטש - איז נאר ווייל מען איז דעפרעסט און נישט פרייליך.
גייט שפאצירן יעדן טאג; עס איז זייער געזונט צו גיין שפאצירן, עס איז געזונט פאר'ן גוף און פאר'ן מח, ביים שפאצירן זאלט איר דאנקען דעם אייבערשטן, קוקט ארויף צום הימל, אזוי ווי עס שטייט (ישעיה מ, כו): "שְׂאוּ מָרוֹם עֵינֵיכֶם וּרְאוּ מִי בָרָא אֵלֶּה"; זייט אייך מתבונן, ווער האט דאס אלעס באשאפן? דאס וועט אייך פרייליך מאכן, אזוי וועט איר זיין געזונט און שטארק.
דוד המלך האט דאס געטון, ער פלעגט גיין שפאצירן און זיך מתבודד זיין; רעדן צום אייבערשטן, זינגען צו אים, אים דאנקען און לויבן; פון דעם האט ער געמאכט דעם ספר תהילים.
דער אייבערשטער זאל העלפן איר זאלט האבן הצלחה אין אלע ענינים.
