בריוון פונעם ראש ישיבה שליט"א

בעזרת ה' יתברך - יום א' פרשת ראה, כ"א מנחם-אב, שנת תשפ"ד לפרט קטן

לכבוד ... נרו יאיר

איך וויל דיר זייער בעטן זאלסט איבערנעמען די ישיבה קטנה אין וויליאמסבורג, דו זאלסט זיין מיט די בחורים פון אינדערפרי ביז נאכמיטאג, ווייל איך וויל מאכן די יאר הבא עלינו לטובה אנדערש ווי אלע יארן, איך וועל אם ירצה ה' קומען נאכמיטאג צו מנחה און געבן א שיעור, און דו וועסט זיין פון אינדערפרי ביז נאכמיטאג.

פרעג דיין ווייב אויב זי וויל העלפן די חתונות אין ישיבה, אם ירצה ה' דעם ווינטער וועט זיין א שיינע פאר חתונות און מיר דארפן הילף ביי די פרויען; מאכן די האר, כאפן בילדער, עס זאל נישט קאסטן קיין איין פרוטה פאר ביידע מחותנים; די מצוה פון הכנסת כלה איז זייער א גרויסע מצוה.

בנוגע טרינקען קאוק; מוהרא"ש האט מיר געזאגט איך זאל עס נישט טרינקען, ווייל ער האט געהערט פון רבי משה זכרונו לברכה אז די הכשר איז נישט אויסגעהאלטן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת עקב, ט"ז מנחם-אב, שנת תשפ"ד לפרט קטן

לכבוד ... נרו יאיר

חסדי השם יתברך איך האב היינט זוכה געווען צו זיין ביי א ברית פון מיין אייניקל, בן בני הרב אלחנן חיים שליט"א, ויקרא שמו בישראל יחזקאל, נאך מיין זיידע, הגאון רבי יחזקאל רוטה זכר צדיק לברכה, רב דקארלסבורג.

מיין טאטע שליט"א איז נישט געווען ביים ברית, ער איז אין מירון; אלע יארן פארט ער קיין מירון פון נאך ט' באב ביז שבת סליחות, ער זיצט ביים תנא רבי שמעון בר יוחאי און גרייט זיך פאר די הייליגע טעג. מיין שווער הרב רבי מרדכי אהרן מייזליש שליט"א איז יא געווען, אויך איז ער געקומען נעכטן נאכט צום וואך נאכט.

נעכטן איז געווען א חתונה אין שטעטל עס האט געהאט אלע טעמים, די חתונה איז געווען אין מיידל סקול, אלע משתתפים זאגן אז די חתונה האט געהאט אלע טעמים, די חתן כלה זענען געווען זייער פרייליך, און די מחותנים זענען געווען גאר פרייליך אז די חתונה האט זיי נישט געקאסט קיין איין דאלער, זיי זענען געקומען ווי מחותנים און אהיים ווי מחותנים מיט אמת'ע שמחה.

אז מען טראכט אריין זעט מען אז עס האט נישט קיין שום פשט צו מאכן טייערע שמחות, פאר אפאר שעה לוינט נישט צו שפילן שיינער איד און ווערן פאר די גאנצע לעבן א בעל חוב, א גנב; עס לוינט צו מאכן שיינע איידעלע שמחות און לעבן א געזונטע לעבן.

די גאנצע זאך פון מאכן טייערע שמחות קומט פון די גוים, פון די אומות העולם, עס קומט פון די טומאה, און פון אזוי לאנג זיין אין גלות - ווייסט מען שוין נישט וואס איז שיין און וואס איז געמיין, א נס אז מוהרא"ש האט אזויפיל גערעדט צו אונז וואס איז אן אמת'ע שמחה, וואס איז שיין, וואס איז ריין; אזוי קענען אנשי שלומינו מאכן שיינע אידישע שמחות.

אפילו די וועם דער אייבערשטער האט געגעבן שפע, פרנסה - האבן אויך נישט קיין רעכט אויס צו געבן געלט ביי זייערע שמחות, זיי זענען גורם אז די אנדערע וואס האבן נישט קיין געלט - זאלן מוזן בארגן און לעבן א חובות לעבן, א גנב לעבן, א פארקנעכטעטע לעבן, זיי זעען אויס ווי שיינע אידן אבער זיי זענען די וואס הרג'ענען כלל ישראל, אז מען גייט צו א שמחה און מען זעט ווי דער בעל שמחה האט דא אויסגעגעבן געלט, וואלט מען געדארפט - אנשטאט שמייכלען און זאגן 'אזא שיינע שמחה' - זאגן: היתכן מען טוט שאדן מאכן פאר אנדערע.

איך האף ביי אונז אין די קהילה וועלן אלע מאכן פשוט, און העלפן איינער דעם צווייטן לעבן א לעבן אן גניבות און חובות, און די וואס האבן יא שפע, פרנסה - וועלן נישט פורץ גדר זיין, זיי וועלן העלפן אנדערע מיט נישט אויסגעבן געלט פאר שמחות, און די סיפוק החיים וועלן זיי שעפּן פון משניות און פון פארברענגען מיט די ווייב און קינדער.

שכוח פארן העלפן קאמפיינען פאר אונזערע מוסדות.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת במדבר, כ"ח אייר, מ"ג לעומר, שנת תשפ"ד לפרט קטן

הכלה ... תחי'

איך האב געהערט וואס איר גייט אריבער יעצט פאר אייער חתונה, ווען די גאנצע עול פון צורישן די חתונה ליגט אויף אייך אליין, אייער טאטע האט אייך געזאגט איר זאלט אלעס אליין אנגרייטן און איר שפירט ווי איר ווערט צעדרוקט וכו'.

דאנקט און לויבט דעם אייבערשטן אז די שוועריקייטן איז פאר שמחות נישט פון צרות; איר גייט אויפשטעלן א אידישע שטוב, איר גייט אויסלייזן די שכינה הקדושה, דערנענטערן די גאולה, און פרייט אייך אז איר קענט העלפן אייער טאטע, און אז עס קומט אן שווער - זאלט איר גיין אין א ווינקל און זיך שטילערהייט אויסשמועסן מיטן אייבערשטן און אים בעטן אויף כח און מח.

האלטס פאר אייערע אויגן די ווערטער: "העלפן א טאטע און מאמע איז די הייליגסטע זאך".

בזכות די הייליגע מצוה וועט איר האבן ערליכע געזונטע דורות.

בעזרת ה' יתברך - יום ב' פרשת כי תשא, י"ז אדר א', שנת תשפ"ד לפרט קטן

הכלה ... תחי'

עס טוט מיר זייער וויי צו הערן אייער ווייטאג, אז איר האט זיך צעבראכן אייער פוס, איר וועט נישט קענען טאנצן ביי אייער אייגענע חתונה, און אויך דארפט איר אריבערגיין א סערדזשערי, עס טוט זייער וויי.

אבער טייערע כלה ... תחי', שטארקט זיך, זייט פרייליך, איי וועט איר פרעגן, ווי אזוי שטארקט מען זיך אין אזא מצב? דער ענטפער איז, מען שטארקט זיך מיט אמונה, אז מען ווייסט 'דער אייבערשטער מאכט נישט קיין שלעכטס, דער אייבערשטער מאכט נאר גוטס'; מיט אמונה, מיט גלייבן אז עס איז נאר פאר אונזער טובה - מיט דעם קען מען זיך שטארקן.

געלויבט דעם אייבערשטן איר זענט געזונט, אייער חתן איז געזונט, און דער אייבערשטער וועט אויסהיילן אייער פוס, נאך אביסל האט איר צוריק געזונטע פיס, זאלט איר זיך זייער שטארקן און זיין זייער פרייליך.

בעזרת ה' יתברך - ג' פרשת יתרו, שובבי"ם, כ"א שבט, שנת תשפ"ד לפרט קטן

לכבוד מיין טייערער זון ... נרו יאיר

איך הער זייער שיינע גריסן אויף דיר פון דיין עבודת השם, פון דיין לערנען און פון דיין דאווענען; איך בין אזוי פרייליך צו הערן אז דו לערנסט פלייסיג די הייליגע תורה, זה חלקי מכל עמלי.

יעצט נאך די חתונה קענסטו ווערן א גרויסער צדיק. חכמינו זכרונם לברכה זאגן (יומא עב:): "הַלוֹמֵד תּוֹרָה בְּטָהֳרָה", ווי אזוי קען מען לערנען תורה מיט ריינע מחשבות? "נוֹשֵׂא אִשָּׁה, וְאַחַר כָּךְ לוֹמֵד תּוֹרָה", אז מען האט חתונה; יעצט נאך די חתונה זאלסטו אויסנוצן די צייט פאר תורה ותפלה, און פאר התבודדות – וועסטו זוכה זיין צו גרויסע מדריגות.

איך בענק זיך זייער צו דיר, און די גוטע גריסן אויף דיר – דאס בארואיגט מיך.

דיין טאטע דיין ראש ישיבה.

בעזרת ה' יתברך - יום ב' פרשת בא, שובבי"ם, נ' שבט, שנת תשפ"ד לפרט קטן

לכבוד ... נרו יאיר

חסדי השם נעכטן איז געווען די חתונה פון מיין זון הרב שמעון נרו יאיר מיט א טאכטער פון ר' אברהם משה שטראססער, מיין טאטע שליט"א איז געווען דער מסדר קידושין, עס איז געווען א הערליכע חתונה, מען קען גארנישט באשרייבן די געפילן וואס מען האט געשפירט ביי די שמחה.

לערן יעדן טאג דעם הייליגן רבינ'ס ספרים, עס זאל נישט אריבערגיין איין טאג אן לערנען דעם הייליגן רבינ'ס ספרים, דאס איז אונזער איינציגסטער טרייסט מיר זאלן זוכה זיין צו תשובה און צו תיקון המעשים. אזוי ווי דער הייליגער רבי אלימלך זכותו יגן עלינו זאגט די וואך אין די פרשה (ספר נועם אלימלך, ערשטע שטיקל) פארוואס האט דער אייבערשטער געזאגט פאר משה רבינו: "בא אל פרעה", קום צו פרעה, "כי אני הכבדתי את לבו", ווייל איך האב הארט געמאכט זיין הארץ נישט ארויס צו לאזן די אידן פון מצרים, אויב אזוי וואס האט משה רבינו צו גיין צו אים, ער האט דאך א הארטע הארץ, ער וועט דאך נישט צוהערן?! זאגט דער הייליגער רבי אלימלך זכותו יגן עלינו, א רשע לויפט אלץ צוריק צו שלעכטס, און אפילו ער זעט ווי דער אייבערשטער מאכט וואונדער - פאלט ער אלץ צוריק צו זיין שלעכטס, "אבל כשהצדיק מדבר אליו יום יום", אבער ווען דער צדיק רעדט צו אים טאג נאך טאג – "יכול להיות מתקיים בידו זמן רב", וועט זיך עס האלטן ביי אים א לאנגע צייט.

דעם שבת וועל איך זיין אם ירצה ה' אין שטעטל לכבוד די שבע ברכות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת וארא, שובבי"ם, כ"ח טבת, שנת תשפ"ד לפרט קטן

לכבוד ... נרו יאיר, מנהל תלמוד תורה היכל הקודש קרית ברסלב

איך וויל נישט מען זאל מבטל זיין חדר און שולע צוליב די חתונה פון מיינע קינדער, עס איז נישט קיין ענין זיך אריינצושלעפן פון שטעטל צו מיין שמחה, איך מיין עס זייער ערנסט; איך וויל נישט מען זאל קומען מיט די קינדער, אזוי ווי עס איז איינגעפירט ביי אנדערע חסידות'ן; געב עס איבער פאר אלעמען.

אונזער רבי'שע חתונה איז ראש השנה; מוהרא"ש האט מיר געזאגט ווען איך האב געפרעגט וואס צו ענטפערן פאר די עלטערן, אז מיר פארמאכן די חדר די גאנצע וואך פון ראש השנה ווען מיר אלע פארן צום הייליגן רבי'ן קיין אומאן אויף ראש השנה, האט מוהרא"ש מיר געזאגט: "דאס איז אונזער רבי'שע חתונה, אזוי ווי ביי אלע איז מען מבטל די חדר אינעם טאג וואס דער רבי מאכט חתונה, דאס איז אונזער רבי'ס חתונה".

איך האף דיין קאפ און מח איז ביי די קינדער און ביי די מלמדים, נישט אין אפיס. איך האב זיך געמאכט א גדר, איך גיי נישט אין אפיס ביז נאכמיטאג, איך זיץ רוב טאג מיט די בחורים; הלואי זאלסטו אויך אזוי טון, זיין פארנומען מיט די מלמדים און קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת וארא, שובבי"ם, כ"ט טבת, שנת תשפ"ד לפרט קטן

לכבוד ... נרו יאיר

אז דו זוכסט תיקונים פאר דיינע חטאות נעורים - זאלסטו לערן אסאך בלעטער גמרא. מוהרא"ש זכרונו לברכה דערציילט פון הרב הקדוש רבי בנציון מבאבוב זכותו יגן עלינו, בעל מחבר ספר "קדושת ציון", אמאל זענען צו אים געקומען בחורים און געבעטן ער זאל זיי געבן א תיקון פאר זייערע עבירות, זיי האבן אים דערציילט אלע זייערע חטאות נעורים וואס זיי האבן געטון און געבעטן א תיקון, האט ער זיי געזאגט זיי זאלן לערנען יעדן טאג א בלאט גמרא, האבן אים די בחורים געזאגט אז דאס איז זיי זייער שווער, האט דער באבוב'ער רב זיי געזאגט: "ענק ווילן די סארט תיקונים פון זיך פייניגן, פאסטן, אדער גולגול שלג וכדומה? פארוואס זאלט איר נישט נעמען די הייליגסטע תיקון - לערנען די הייליגע גמרא?"

איך וויל דיך לאדענען צו מיין שמחה; מיין זונ'ס חתונה אם ירצה ה' קומענדיגע וואך זונטאג. דער אייבערשטער זאל העלפן זאלסט אויך זוכה זיין צו חתונה מאכן די קינדער יונג, אוועק ווארפן די חכמות המדומות, טון וואס איז ריכטיג, טון וואס איז גוט פאר די קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת ויגש, ה' טבת, שנת תשפ"ד לפרט קטן

לכבוד מיין טייערער ... נרו יאיר

עס איז זייער וויכטיג ווען מען האלט ביים חתונה מאכן קינדער – צו דאנקען דעם אייבערשטן אויף יעדן קינד און יעדע אייניקל, ווייל ווי מער מען דאנקט און מען לויבט דעם אייבערשטן – ווערט אלעס שענער און בעסער.

נאך א וויכטיגע זאך, ווען דו רעדסט מיט דיין זון – געדענק אים צו זאגן יעדע מאל א גוט ווארט אויף זיין ווייב, און ווען דו רעדסט מיט דיין שנור – זאלסטו איר יעדע מאל זאגן ווי דאנקבאר דו ביסט דעם אייבערשטן פאר אזא שנור.

עס איז אזוי וויכטיג פאר יונגע פארפעלקער צו הערן די זיסע ווערטער ווי: "האסט א וואוילע ווייב", "האסט א טייערער מאן".

בעט דעם אייבערשטן זאלסט געבן יעדן קינד אסאך גוטע ווערטער.

בעזרת ה' יתברך - יום א' פרשת ויגש, ה' טבת, שנת תשפ"ד לפרט קטן

לכבוד מיין טייערער ... נרו יאיר

דאנק און לויב דעם אייבערשטן אז דו האלסט שוין דא, דו גייסט שוין חתונה האבן, דו באקומסט א כלה ערליך און איידל; ווי מער דו וועסט דאנקען און לויבן דעם אייבערשטן – אלץ מער גוטס וועט קומען צו דיר.

עס איז גאר אנדערש דאס חתונה האבן ווען מען איז מקורב צום צדיק אמת, די לעבן איז טעם גן עדן. אזוי ווי דער רבי זאגט (שיחות הר"ן, סימן רנב): "כְּשֶׁמְּקֹרָבִים לְצַדִּיק הָאֱמֶת", די אלע וואס זענען נאנט צום אמת'ן צדיק, "טוֹעֲמִים טַעַם גַּן עֵדֶן", שפירן די טעם וואס מען שפירט אין גן עדן; מען רעדט איידל און שיין צו די ווייב, מען ערווארט נישט פון איר – ממילא ווערט מען נישט אנטוישט, מען גרויסט זיך נישט איינער אויפ'ן צווייטן, יעדע זאך וואס מען באקומט איז ווי א געשאנק; עס איז דא עסן – איז דאס א געשאנק, עס איז דא קליידער – איז עס א געשאנק.

בעזרת ה' יתברך - ערב שבת קודש פרשת וישלח, י"ח כסליו, שנת תשפ"ד לפרט קטן

לכבוד מיין טייערער ... נרו יאיר וזוגתו תחי'

מזל טוב פאר ענקער חתונה, דער אייבערשטער זאל העלפן עס זאל זיין א בנין עדי עד, און איר זאלט זוכה זיין צו דורות ערליכע אידן.

לכבוד די גרויסע חסדים וואס דער אייבערשטער האט מיט ענק געמאכט וואלט געפאסט זיך פארצונעמען א גוטע זאך, א קבלה טובה; טראכטס אינאיינעם וואס וואלט געווען א גוטע זאך זיך פארצונעמען.

איך מיש זיך נישט ביי אנדערע, און זיכער נישט ווען מען פרעגט מיך נישט, אבער אויב איר ווילט וויסן וואס איך האב פארצולייגן; איך טראכט די בעסטע קבלה פאר ענק איז זיך פארנעמען, אז ביידע פון ענק זאלן יעדן טאג זאגן קאפיטל ק', "מזמור לתודה", און די לעצטע פסוק זאלט איר זאגן אויך אין אייער שפראך, אין אידיש: "'כי טוב ה', ווייל דער אייבערשטער איז גוט, 'לעולם חסדו', גוטס וואס בלייבט אויף אייביג, נישט אויף צייטווייליג, 'ועד דור ודור', און אויף אלע דורות, 'אמונתו', איז זיין באגלייבטקייט, דער אייבערשטער איז גוט".

א ליכטיגן חנוכה.

בעזרת ה' יתברך - יום ג' פרשת ויצא, ח' כסליו, שנת תשפ"ד לפרט קטן

לכבוד החתן ... נרו יאיר

מזל טוב! דער אייבערשטער זאל העלפן זאלסט גיין צו די חתונה מיט שמחה און הרחבת הדעת, און אויפשטעלן דורות ערליכע אידן.

בנוגע נייע בעטן וכו'; נוץ נישט די אלטע בעטן. מוהרא"ש זאגט מען זאל נישט נוצן בעטן פון א פארפאלק וואס האבן זיך גע'גט, ווייל דאס איז וואס דער רבי רעדט (לקוטי מוהר"ן חלק א', סימן רכט): "דע שיש עצים וכו' שאינם מסגלים להולדת בנים ולגדלם".

קויף זיך נייע בעטן; סיי די מאטראץ און סיי די העלצער וואס האלטן דעם מאטראץ; אלעס זאל זיין ניי. אזוי אויך די בעט געוואנט זאל מען נישט נוצן פון א גע'גט'ע פארפאלק.

בעזרת ה' יתברך - יום ב' פרשת וירא, ט"ו מר-חשון, שנת תשפ"ד לפרט קטן

לכבוד ... נרו יאיר

איך בעט דיר זייער, רעד שיין אין שטוב, קריג זיך נישט מיט דיין ווייב; דער רבי האט אונז זייער געווארנט מיר זאלן מכבד זיין די ווייב. דער רבי זאגט (שיחות הר"ן, סימן רסד): "הֲלֹא הַנָּשִׁים הֵם סוֹבְלִים צַעַר וְיִסּוּרִים גְּדוֹלִים מְאֹד מְאֹד מִיַּלְדֵיהֶם, צַעַר הָעִבּוּר וְהַלֵּדָה וְהַגִּדּוּל, כַּאֲשֶׁר יָדוּעַ לַכֹּל עֹצֶם מַכְאוֹבָם וְצַעֲרָם וְיִסּוּרֵיהֶם", דער רבי האט געזאגט מען דארף זייער אכטונג געבן אויף די ווייב, ווייל זיי גייען אריבער זייער אסאך ווייטאג פון צער גידול בנים, צער לידה וכו'.

דאס וואס פאסירט יעדע פאר טעג, עס קילט זיך אפ די שלום און די אהבה - דאס קומט פונעם סמ"ך מ"ם. דער רבי זאגט (שם, סימן רסג) שֶׁזֶּה מַעֲשֶׂה בַּעַל דָּבָר, שֶׁמַּנִּיחַ אֶת עַצְמוֹ עַל זֶה מְאֹד, לְקַלְקֵל הַשָּׁלוֹם שֶׁל בְּנֵי הַנְּעוּרִים, כְּדֵי שֶׁיִּתָּפְסוּ בִּמְצוּדָתוֹ חַס וְשָׁלוֹם עַל יְדֵי זֶה", דער רבי האט געזאגט אז דאס איז מעשה בעל דבר, דער יצר הרע מאכט מען זאל זיך צעטיילן, ווייל אז מען איז אן א ווייב כאפט ער אריין דעם מענטש ביי אים אין זאק אריין, "כִּי הוּא אוֹרֵב עַל זֶה מְאֹד, לְתָפְסָם בִּנְעוּרֵיהֶם עַל יְדֵי קִלְקוּל הַשְּׁלוֹם בַּיִת חַס וְשָׁלוֹם, שֶׁגּוֹרֵם בְּעַרְמוּמִיּוּתוֹ לְקַלְקֵל הַשָּׁלוֹם שֶׁבֵּינֵיהֶם", ווייל דער יצר הרע לאקערט אויף יונגע פארפעלקער זיי צו צעטיילן און אזוי כאפט ער זיי אריין אין שמוציגע עבירות.

נעכטן איז געווען א חתונה אין ישיבה הערליך שיין; די חתונות אין ישיבה זענען הערליך שיין, מלא טעם, עס האט א אידישע חן, ובנוסף לזה איז עס גאר בחינם.

היינט בין איך געווען ערלעדיגן פאר די חתונה פון מיין זון, איך האב באשטעלט בגדים, אויך א קיטל מיט טליתים. איך קויף איין נאר וואס עס פעלט אויס, אזוי שלעפט עס נישט אריין אין חובות.

איך שרייב אראפ יעדע פרוטה וואס מיר געבן אויס פאר די חתונה, איך וועל דאס דיר שיקן די וואך פון די חתונה, דיר ווייזן אז מען קען חתונה מאכן אן קיין חובות, מען קען הנאה האבן פון די שמחה, נישט ווערן צעדרוקט.

איך בין אביסל פארנומען אין די טעג, איך וועל דיר נאך שרייבן מער באריכות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת לך לך, י"א מר-חשון, שנת תשפ"ד לפרט קטן

לכבוד משפחת ... שיחיו, ירושלים

איך האב ערהאלטן אייער בריוו.

אז איר ווילט געבן חתן הדרכה פאר אייער זון החתן נרו יאיר, ווי אזוי מען לערנט אין היכל הקודש - קענט איר זיך ווענדן צום מגיד שיעור האברך משה שמואל נרו יאיר, מגיד שיעור אין היכל הקודש אין ירושלים; ער לערנט מיט אונזערע חתנים פון ארץ ישראל, ער לערנט פינקטליך וואס מוהרא"ש האט געזאגט צו לערנען, אן צולייגן אן אראפנעמען.

בנוגע באצאלן וכו'; מוהרא"ש האט אוועק געשטעלט מען זאל נישט בעטן קיין געלט ביים מדריך זיין חתנים וכלות, דעריבער בעט ער נישט קיין געלט, אבער דאס מיינט נישט אז מען זאל נישט געבן; עס איז ריכטיג צו געבן עפעס, ווייזן אז מען איז מכיר אין די ארבעט וואס ער טוט.

גייט צו די חתונה מיט די ריכטיגע הכנות, מיט תודה והודאה - וועט איר שפירן ביי די שמחה א שטארקע שמחה מיט א העכערקייט; נאר אז מען דאנקט און לויבט - קען מען נעמען די שמחה אזוי ווי מען דארף, אז נישט - דארף מען זיך אנטרינקען מיטן ביטערן טראפ; גייט קוקן ווי אזוי מחותנים זענען ביי זייערע קינדער'ס חתונות, אלע זענען אנגעטרינקען פון גרויס צער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת לך לך, י' מר-חשון, שנת תשפ"ד לפרט קטן

לכבוד מיין טייערער ליבער ... נרו יאיר, תלמיד ישיבת תפארת התורה

איך האב ערהאלטן דיינע בריוו.

וואס קען איך דיר זאגן? וואס איז דא צו זאגן? די צער פון א בחור איז נישט צו פארשטיין, עד כדי כך, מוהרא"ש זאגט (ארך אפים, אות סבלנות לבחור): "אין צער כצערו של בחור, ואף אחד בעולם מבין את הצער של רווק", קיינער פארשטייט נישט די ווייטאג פון א בחור וואס וויל חתונה האבן און וויל זיין אפגעהיטן בשמירת הברית – און עס גייט אים נישט, ער האלט אין איין פוגם זיין רחמנא לצלן.

גיי התבודדות יעדן טאג און וויין צום אייבערשטן, בעט אים ער זאל רחמנות האבן אויף דיר. בעט אין דיין שפראך, אין אידיש, אייגן געמאכטע תפילות. לאז נישט אפ די שווערד פון תפילה – וועסטו מנצח זיין, וועסט אראפנעמען אלע דינים פון דיר און זוכה זיין צו א שידוך בקרוב.

האלט זיך פריש, לאז זיך נישט נאך. בייט יעדן טאג די וועש, גיי נישט צוויי טעג מיט די זעלבע וועש.

אויך זאלסטו זיך אפוואשן יעדן טאג און זיך צוזאמנעמען די פיאות, די בארד.

גיי אנגעטון ריין, אן קיין פלעקן.

בעזרת ה' יתברך - יום ד' פרשת נח, ג' מר-חשון, שנת תשפ"ד לפרט קטן

לכבוד ... נרו יאיר

מזל טוב פאר דיין חתונה, דער אייבערשטער זאל העלפן עס זאל זיין א בנין עדי עד, א קשר של קיימא מיט דורות ישרים ומבורכים.

מיר איז היינט שווער צו גיין אויף חתונות, איך בין זייער פארנומען, איך האב ממש נישט קיין איבריגע מינוט, איך גיי נישט צו קיין שמחות, נאר שמחות אין ישיבה.

לערן יעדן טאג אין שטוב א בלאט גמרא, דאס וועט מאכן א ליכטיגקייט אין שטוב, עס וועט מאכן שלום בית. דו וועסט שפירן גוט און דיין ווייב וועט זיך שפירן גליקליך מיט דיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת בראשית, אסרו חג סוכות, כ"ד תשרי, שנת תשפ"ד לפרט קטן

לכבוד ... נרו יאיר

איך האב ערהאלטן די הזמנה פאר די חתונה.

מזל טוב פאר די חתונה פון אייער זון, דער בכור ... נרו יאיר.

דער אייבערשטער זאל העלפן די חתן כלה זאלן בויען א שיינע שטוב מיט ערליכע דורות, און איר און אייער ווייב זאלן זען אסאך נחת פון דעם קינד און פון אלע קינדער.

איר קענט זיך נישט פארשטעלן אייער זכות וואס איר האט מיטן מפרסם זיין דעם הייליגן רבינ'ס עצות פאר די וועלט, דאס איז די גרעסטע זאך וואס איז דא; אויבן אין הימל בארומט מען זיך זייער מיטן מענטש וואס איז מגלה די אמונה פאר אנדערע און איז זוכה מקרב זיין רחוקים לשם יתברך.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת כי תבא לאומאן, י' אלול, שנת תשפ"ג לפרט קטן

מרת ... תחי'

מארגן וועט זיין א חתונה אין ישיבה, אויך מיטוואך; איך וויל בעטן אלע וואס קענען ארויסהעלפן מיט מאכן עסן וכדומה - זאלן זיך מעלדן צו מרת ... תחי'; עס איז א גרויסע זאך אנטייל צו נעמען אין די גרויסע מצוה.

נאר מיט די הילף פון אנשי שלומינו וועלן מיר קענען ווייטער אנגיין מיט חתונות אין ישיבה, מיר האלטן שוין קרוב צו פופציג חתונות; שטעלט אייך פאר, פופציג חתונות איז הונדערט מחותנים; הונדערט משפחות האבן שוין חתונה געמאכט בחינם, און נאר מיט די הילף פון אנשי שלומינו; איינער מאכט א קעיק, א צווייטער א סאלאט, א דריטער אביסל פלייש און קוגל און מען קען חתונה מאכן אן חובות.

איך דאנק אייך אלע פארן מיר העלפן טון און אויספירן מוהרא"ש'ס ווילן.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

דו פרעגסט אויף וואס דו מעגסט זיך שטעלן ביי זיווג שני; די אלע זאכן אויף וואס דו שטעלסט זיך איז זייער שיין און זייער פיין, אבער קוק זיך אן, קוק ווי די יארן גייען אריבער; שוין אזויפיל יאר וואס דו ביסט אליין, עולם חשך בעדך, פארוואס זאלסטו נישט חתונה האבן? אזוי ווי די הייליגע תורה זאגט, (בראשית ב, יח): "לֹא טוֹב הֱיוֹת הָאָדָם לְבַדּוֹ", עס איז נישט גוט צו זיין אליין, נישט חתונה געהאט; וואס איז דער זאך פון זיך קלויבן? מען דארף חתונה האבן, טון דעם רצון פונעם אייבערשטן.

זיין אליין איז נישט קיין עסק. דאס וואס דו זאגסט וועגן דיינע קינדער; געלויבט דעם אייבערשטן, דיינע קינדער זענען מסודר, זיי האבן אלע ווארעמע שטיבער ווי זיי האדעווען זיך; יעצט איז די צייט פון קוקן אויף זיך, דו דארפסט חתונה האבן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ואתחנן, ה' מנחם-אב, שנת תשפ"ג לפרט קטן

לכבוד מיין טייערער ... נרו יאיר 

עס איז כדאי זאלסט שוין פרעגן דעם שכן ... אויב מיר וועלן קענען אויך די יאר דינגען דעם פלאץ אנטקעגן די ישיבה צו קענען מאכן די סוכה, ווייל מען קומט שוין נענטער צו די ימים טובים; מיר פארן שוין קיין אומאן און מיר דארפן שוין זארגן פאר א סוכה.

אויך זאלסטו באשטעלן טרינקען און אלעס וואס מען דארף פאר חתונות אין ישיבה, ווייל די טאג וואס מיר הויבן אן חדר, מאנטאג כי תבוא – וועט זיין א חתונה אין ישיבה, דינסטאג אויך און מיטוואך אויך. דאס הייסט מיר קומען אהיים פון שטעטל זונטאג, און מאנטאג הויבט זיך אן גלייך די ארבעט; זאלסטו שוין זארגן אלעס זאל זיין גרייט.

אויך איז כדאי צו איבער-פעינטן די ישיבה; די בית המדרש און די לאנטש רום. מען דארף דאס שוין טון ווייל אין פינף וואכן – גייען מיר שוין צוריק.

איך דאנק דיר פאר אלעס וואס דו העלפסט מיר, בעיקר מיטן געבן ארבעט פאר די בחורים, זיי ארייננעמען אין די ארבעט זיי זאלן באדינען דעם רבי'ן; ווייל אלע וואס באדינען דעם רבי'ן, העלפן אין ישיבה – די האבן מער שאנס צו בלייבן ביים רבי'ן.

בעזרת ה' יתברך - יום ג' פרשת דברים, כ"ט תמוז, שנת תשפ"ג לפרט קטן

הכלה ... תחי', ירושלים

איך האב ערהאלטן אייער בריוו.

עס איז זייער שרעקעדיג צו הערן וואס איר זענט אריבער וכו' וכו'; איינער פון אייער משפחה האט אייך באצווינגען רחמנא לצלן און יעצט ווען איר שטייט איידער אייער חתונה - ווערט אייך שלעכט, איר קענט נישט טראכטן פון חתונה האבן, איר שפירט ווי איר קענט עס נישט דערהייבן.

וויסן זאלט איר א כלל אין לעבן: "פון יעדע פראבלעם איז דא א וועג ארויס, אז עס איז געווען א וועג אריין אינעם פראבלעם, איז בודאי דא א וועג ארויס"; בפרט אז מען באנוצט זיך מיט די עצה פון הייליגן רבי'ן, 'תפילה והתבודות', מען בעט יעדן טאג דעם אייבערשטן - איז מען זוכה ארויס צו קריכן פונעם צרה.

דער הייליגער רבי האט דערציילט ממש אזא מעשה, פון א כלה וואס איז נעבעך פארכאפט געווארן ביי די נישט גוטע. דער רבי האט דערציילט (מעשה א, ספורי מעשיות) מען האט פרובירט גיין צו אלע סארט טערעפי, צו אלע גרויסע מענטשן און ווילדע מענטשן, קיינער האט נישט געטראפן א וועג איר אויסצוהיילן, ביז מען האט זיך דערוואוסט פון א גאלדענע בארג און א פערל שלאס, דעם צדיק'ס עצות פון תפילה והתבודדות, ביז מען האט איר ארויסגענומען פון די נישט גוטע.

זארגט נישט, האט נישט מורא, גייט צו מאמע רחל'ס קבר און זאגט די תפילה יעדן טאג:

"הייליגער באשעפער איך האב א פראבלעם, איך גיי נאך אביסל חתונה האבן און איך בין זייער דערשראקן פון לעבן מיט א מאן, נאכדעם וואס איך בין אריבער אלס מיידל ווען מען האט מיך באצווינגען מיט אן עבירה, איך קען נישט טראכטן פון חתונה האבן, אנשטאט איך זאל זיך פרייען אז די חתונה טאג ווערט נענטער און נענטער - ווער איך מער דערשראקן, ווייל עס קומט מיר ארויף דאס וואס מען האט מיך באצווינגען מיט עבירות.

אנא ה' העלף מיר, נעם ארויס פון מיר די פחד און לייג אריין אין מיר א שמחה, איך זאל זיין פרייליך, איך זאל וועלן חתונה האבן און וועלן לעבן מיט א מאן אזוי ווי אלע געזונטע ערליכע אידן לעבן, הייל מיך אויס, מאך מיך רואיג, העלף מיר איך זאל פארגעסן וואס האט פאסירט מיט מיר און איך זאל ווערן געזונט.

אנא ה', איך וויל א שטארקע אמונה, צו וויסן און געדענקען אז אלעס ביסטו, עס איז גארנישט דא אויף די וועלט אויסער דיר, דו ביסט אלעס, דו מאכסט אלעס, דו טוסט אלעס; נישטא קיין מציאות אן דיר. איך וויל א לויטערע אמונה, ווייל נאר מיט אמונה קען מען לעבן; אזוי האבן די הייליגע צדיקים געזאגט: 'מי שיש לו אמונה', ווער עס האט אמונה - 'חייו חיים', לעבט א לעבן; העלף מיר זיסער טאטע איך זאל האבן א לויטערע און קלארע אמונה, וויסן אז דו ביסט ממלא כל עלמין וסובב כל עלמין, אין שום מציאות מבלעדיך כלל, ובכל תנועה ותנועה שם אלופו של עולם, דו האסט זיך פארשטעלט אין דומם, צומח, חי, מדבר.

העלף מיר איך זאל גיין צו מיין חתונה מיט שמחה, און מיין גאנצע לעבן זאל ווערן נאך מער און נאך מער פרייליך, אמן".

איך זאג אייך צו, אויב איר וועט נעמען די עצה פון רבי'ן ערנסט, איר וועט זאגן די תפילה יעדן טאג ביז די חתונה - וועט איר גיין צו די חתונה מיט שמחה און איר וועט וועלן לעבן אזוי ווי דער אייבערשטער האט געהייסן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ג' פרשת במדבר, כ"ה אייר, מ' לעומר, שנת תשפ"ג לפרט קטן

לכבוד ... נרו יאיר, קרית ברסלב

דיין מחותן איז געווען ביי מיר, ער וויל מיך מכבד זיין מיט סידור קידושין. איך האב אים אפגעזאגט; איך מאך נישט קיין סידור קידושין, איך בין נישט קיין רבי און נישט קיין רב, אין טו נישט די זאכן. נאר אין ישיבה - דארט טו איך אלעס, ווייל איך וויל אריינברענגען אין מיינע תלמידים זאלן לעבן ווי אידן, זיך פירן ווי ערליכע אידן, נישט נאכמאכן די גוים, נישט אויסגעבן געלט פאר זאכן וואס פעלט נישט אויס; דעריבער אז מען מאכט חתונה אין ישיבה - גיי איך ארויס פון מיין וועג.

אויך איז מיר שווער צו גיין צו שמחות, איך בין זייער פארנומען; איך גיי נאר צו משפחה שמחות וואו איך דארף גיין, און אויך אין ישיבה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת בהר בחוקותי, י"ז אייר, ל"ב בעומר, שנת תשפ"ג לפרט קטן, אתרא קדישא מירון

לכבוד מיין טייערער ... נרו יאיר, קרית ברסלב

דיין טאכטער האט זייער געוויינט צו מיר, זי האלט שוין נישט אויס, זי וויל חתונה האבן. וויל איך דיר בעטן מיין ליבער חבר, מאך איר א כלה, טו וואס איז ריכטיג, וואס שטייט אין די תורה; ווייל היינט איז א גרויסע סכנה, דער דור פאלט טויזנטער דרגות יעדן טאג און עס איז א גרויסע רחמנות אויף אונזערע קינדער, די נסיונות זענען געפערליך און עס איז דא נאר איין עצה - זיי חתונה מאכן.

ליבער ברודער, מאך דיין טאכטער א כלה, ראטעווע איר ווי לאנג זי איז ערליך און ריין; ווארט נישט זי זאל פאלן, זי איז א גוט קינד, אן אויסגעצייכנטע תלמידה, אבער מען דארף וויסן אז אויסגעצייכנט מיינט נישט צו זאגן אז מען בלייבט אויסגעצייכנט; נאר אז מען גייט אין די תורה וועג - קען מען בלייבן אויסגעצייכנט.

יעצט וועט מען מוזן מודה זיין צו מוהרא"ש, ווען עס קומען אריין שרעקליכע מעשיות פון די שענסטע און בעסטע מוסדות, ווי מיידלעך פאלן אין עבירות, יעצט וועט מען מוזן אויפהערן לאכן פון מוהרא"ש און טון וואס מוהרא"ש האט אונז געלערנט, אז נאר חתונה האבן איז די עצה; נאר חתונה האבן ראטעוועט דעם דור.

איבערפעינטן א הויז קען מען שפעטער, אבער א שידוך טון - איז קיינער נישט פארזיכערט אז מען וועט קענען טון שפעטער.

בעזרת ה' יתברך

יום ב' פרשת תזריע מצורע, כ"ו ניסן, י"א לעומר, שנת תשפ"ג לפרט קטן

טייערער ... נרו יאיר

איך פריי זיך אז דו ביסט מיט געקומען מיט אונזער נסיעה קיין פוילן, דאס איז א גוטע הכנה פאר דיין חתונה, זיך אויסבעטן ביי די הייליגע צדיקים.

איך האף דו וועסט נאך דיין חתונה בלייבן משמש זיין דעם רבי'ן, דו וועסט דיין גאנץ לעבן בלייבן צוגעבינדן צום רבי'ן - וועסטו זיין אויך ביים רבי'ן אויף יענע וועלט.

פון דיין ראש ישיבה.

בעזרת ה' יתברך

יום א' פרשת שמיני א', י"א ניסן, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

איך פריי זיך זייער צו הערן די שיינע זאכן, ווי דיין לעבן איז דיר אזוי שיין און אז דיין ווייב זאגט דיר אז זי שפירט - זייט ענקער התקרבות צום רבי'ן - ווי איר זענט אינמיטן ענקער שבע ברכות.

ביי מיר איז אויך אזוי, איך בין שוין חתונה געהאט איבער צוויי און צוואנציג יאר און עס שפירט זיך ווי שנה ראשונה. מיטן רבינ'ס עצות, שכל און חיזוק - איז דער לעבן א זיסע חלום, מיט די שטארקע אמונה וואס דער רבי געבט אונז איז דער לעבן אזוי גוט.

זאלסט האבן א פרייליכן יום טוב.

דער אייבערשטער זאל העלפן מיר זאלן שוין זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.