בריוון פונעם ראש ישיבה שליט"א

בעזרת ה' יתברך

יום ב' פרשת בשלח, כ"ב שובבי"ם, ח' שבט, שנת תשפ"ג לפרט קטן

לכבוד מיין ליבער טייערער ... נרו יאיר

איך בעט דיר זייער, גיי יעדן טאג צום שיעור הלכה. דער הייליגער רבי האט געוואלט מען זאל לערנען יעדן טאג הלכה (שיחות הר"ן, סימן כט).

זיי קלוג, נוץ אויס דיינע יונגע יארן מיט לערנען. איך באצווינג טאקע נישט אלע בחורים צו גיין צום שיעור הלכה וואס מיין זון הרב אלחנן חיים שליט"א לערנט פאָר, אבער דו זיי קלוג און גיי צום שיעור, א שאד צו פארברענגען אזויפיל צייט און גארנישט טון.

אז דו וועסט לערנען פלייסיג - וועסטו מאכן א נחת פאר דיינע עלטערן. דו האסט דאך אזעלכע טייערע עלטערן, וועסטו האבן א גרויסע מצוה און דו וועסט טרעפן אן ערליכער שידוך.

איך האף דו וועסט מיך פאלגן, איך וויל דאך נאר דיין גוטס. אזוי אויך טו נישט קיין שום זאך אן פרעגן. געוואוין זיך צו, פרעג יעדע זאך אין דיין לעבן, ווייל ווער עס גייט נאך דעם אייגענעם שכל - קען זיך זייער פארפלאנטערן אין לעבן, און נאר דער וואס גייט אין די וועג פון צדיקים - איז אים גוט.

פון דיין ראש ישיבה וואס ליבט דיך.

בעזרת ה' יתברך

יום ב' פרשת משפטים, ל"ו שובבי"ם, כ"ב שבט, שנת תשפ"ג לפרט קטן

לכבוד ... נרו יאיר, מלמד בתלמוד תורה היכל הקודש

איך האב הנאה אז דו שרייבט מיר וואס טוט זיך אין חדר אין שטעטל.

איך וויל דיר בעטן זאלסט קומען צייטליך, און אפאר מינוט פריער. זיין א מלמד איז א גרויסע אחריות, און אז מען נעמט אראפ אפילו איין מינוט פון די צייט וואס מען דארף געבן פאר די קינדער - קען מען דאס נישט באצאלן.

דיין ברודער ר' ישראל יוסף נרו יאיר זאגט מיר, עס איז אים זייער שווער אינדערפרי אליינס ווען די מלמדים קומען נישט אין צייט. איך בעט דיר זייער, שטיי אים צו די האנט, ער זאל נישט פאלן פון די כוחות. איך האף בקרוב וועט איר האבן א גוטע מנהל, ר' מרדכי, וואס וועט ענק קענען מחזק זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת שמות, י"ח טבת, שנת תשפ"ג לפרט קטן

לכבוד מיין ליבער טייערער ... נרו יאיר

איך האב באקומען א גרוס פון דער בעל הבית וואו דו ארבעסט, ער שרייבט מיר אז ער קען זיך נישט איבערקומען פון דיין איידלקייט און דיין התמדת התורה, דו קומסט אין ארבעט מיט א זעקל ספרים, און יעדע איבריגע מינוט ביסטו שוין מיט דיינע ספרים.

אויך דיין איידלקייט; ער שרייבט אז דער גוי וואס ארבעט דארט זאגט אים אז דו ביסט אנדערש פון אנדערע, דו רעדסט נאר איידל, דו רעדסט נישט ניבול פה, און ווען איינער דערווייגט זיך צו רעדן ניבול פה – ביסטו זייער שטרענג, דו לאזט דאס נישט.

שטארק זיך, זיי ממשיך מיט לערנען און דאווענען און יראת שמים, כי זה כל האדם.

איך קוק זייער ארויס אויף דיר, וכו' וכו'.

בעזרת ה' יתברך

יום ג' פרשת ויגש, ג' טבת, שנת תשפ"ג לפרט קטן

לכבוד דער חשוב'ער מלמד הרב ... נרו יאיר, מלמד בחדר היכל הקודש קרית ברסלב ליבערטי.

איך וויל דיך דערמאנען צו זיין צייטליך. איך נעם זיך אויס מיט דיר צו זיין צייטליך, אויב קענסטו נישט זיין אין צייט - קענסטו נישט זיין ביי מיר קיין מלמד; איך בין נישט מוחל אויף דעם, און איך וויל נישט הערן קיין שום תירוץ.

אויך וויל איך דיך מחזק זיין, חס ושלום ארויסצוגיין פון כיתה אין די צייט וואס מען דארף לערנען מיט די קינדער, איבערלאזן די קינדער אויף הפקר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת וישב, י"ט כסליו, שנת תשפ"ג לפרט קטן

לכבוד ... נרו יאיר

וואס האסטו פון טענה'ען מיט דעם און מיט יענעם? א שאד די צייט; אין די צייט קענסטו אריינכאפן א פרק משניות, א בלאט גמרא, אפאר קאפיטלעך תהילים. א שאד צו טענה'ען, א שאד ויכוחים; יענער וועט נישט טוישן זיין מיינונג פאר דיר, איז פארוואס זאלסטו פארברענען דיינע טעג מיט קוקן וואס דער זאגט און וואס יענער זאגט?

וויפיל צייט גייט דיר אוועק א טאג פון קוקן נאר סטעטוס און נאר דאס און נאר יענץ? וויפיל צייט פארלירסטו אין א טאג, אין א וואך... דו ביסט שוין נישט קיין קינד, דו ביסט שוין דערוואקסן, לאז אפ די קינדערישע נארישע זאכן. נעם א זעקל ספרים, נעם עס מיט דיר, "חֲטוֹף וְאֱכוֹל", כאפ אריין נאך תורה, "חֲטוֹף וְאִישְׁתֵּי" כאפ אריין נאך תפילה, "דְּעָלְמָא דְּאָזְלִינָן מִינֵיהּ כְּהִלּוּלָא דָּמִי" (עירובין נד.), ווייל די וועלט איז אזוי ווי א חתונה, ווער עס כאפט אריין עסן און טרינקען ביי די חתונה - דער איז זאט, און ווער עס עסט נישט - דער בלייבט הונגעריג; אזוי איז די וועלט, וואס מען כאפט אריין - דאס האט מען; אז מען לערנט יעדן טאג חומש רש"י, משנה, גמרא, וכו' - דאס בלייבט, דאס נעמט מען מיט.

קומענדיגע וואך זונטאג נאכט איז שוין חנוכה; גרייט זיך אן א מנורה פאר דיר און פאר דיינע קינדער און מאך שוין פלענער מיט דיין ארבעט זיי זאלן דיר לאזן אהיים קומען צינדן די מנורה מיט דיינע קינדער. מען מוז זיין צייטליך אין שטוב, חנוכה איז א צייט וואס דער טאטע פלאנצט קדושה מיט אמונה אין זיינע קינדער. קליינע קינדער אז מען האלט זיי אויף שפעט - ווערן זיי מיד און זיי האלטן נישט מיט. אז מען איז צייטליך אין שטוב, זעקס אזייגער - דעמאלט קען מען האבן א שיינע צייט מיט די קינדער; זינגען, טאנצן און זיי דערציילן פון די ניסים וואס דער אייבערשטער טוט מיט אונז.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ג' פרשת ויצא, ה' כסליו, שנת תשפ"ג לפרט קטן

לכבוד ... נרו יאיר, תלמוד תורה היכל הקודש טברי'

איך באקום גוטע גריסן אז דו לערנסט פלייסיג און דו פירסט זיך מיט דרך ארץ אין חדר.

יעצט אין די יונגע יארן איז די בעסטע צייט אין לעבן. חכמינו זכרונם לברכה זאגן (שבת קנד.): "יַנְקוּתָא כְּלִילָא דְוַרְדָא", די יונגע יארן איז די שענסטע חלק פונעם רויז, די בעסטע צייט אין לעבן; נוץ אויס די צייט פאר לערנען און דאווענען.

אויף דיין פראגע אויב עס איז א גוטע זאך צו טראגן א האנט זייגער אדער נישט; א טייל זאגן עס איז אזוי ווי א קידושין רינגל פאר'ן יצר הרע, אנדערע זאגן עס איז גאר גוט, עס העלפט מען זאל נישט מבטל זיין קיין צייט פון לערנען.

מוהרא"ש זכותו יגן עלינו איז געגאנגען א האנט זייגער, געבויט אויף די בריוו וואס דער הייליגער רבי נתן שרייבט פאר זיין זון צוויי וואכן איידער זיין הסתלקות (עלים לתרופה יום א' וישב, שנת תר"ה): "אֲהוּבִי בְּנִי חֲבִיבִי" צו מיין טייערער ליבער זון, "יְקַבֵּל הַזֵּייגֶירִיל" נעם מיין זייגער, "וְיִשְׁתַּדֵּל שֶׁיְּתַקְּנוּ אוֹתוֹ מִיָּד" און זע עס צו פאררעכטן גלייך, "בְּאֹפֶן שֶׁיֻּחְזַר לְיָדִי הַיּוֹם עַל יְדֵי מוֹסֵר כְּתָב זֶה" און שיק עס מיר נאך היינט צוריק מיט דעם מענטש וואס געבט דיר איבער מיין בריוו, "וְהַשֵּׁם יִתְבָּרַךְ יָאִיר עָלֵינוּ אוֹר קְדֻשַּׁת חֲנֻכָּה הַקָּדוֹשׁ הַבָּא עָלֵינוּ לְטוֹבָה", און מיר זאלן זוכה זיין אז דער אייבערשטער זאל אונז ליכטיג מאכן אונזערע אויגן אין די הייליגע טעג פון חנוכה, "וּבְחַסְדּוֹ יִשְׁלַח אוֹרוֹ וַאֲמִתּוֹ וְכוּ'" און אונז שיקן זיינע חסדים, "נָגִילָה וְנִשְֹמְחָה בִּישׁוּעָתוֹ" מיר זאלן זיך פרייען מיטן אייבערשטנס הילף.

"גַּם יְקַבֵּל מִכְתָּבִים מִטְּשֶׁעהרִין וְיִמְסְרֵם לְהַשַּׁיָּכִים אֲלֵיהֶם" אויך זאלסטו איבערנעמען אלע בריוו און דאס איבערגעבן פאר וועם מען דארף דאס איבערגעבן, "וְשָׁלוֹם לְכָל אַנְשֵׁי שְׁלוֹמֵנוּ בְּאַהֲבָה רַבָּה" און לאז גריסן אלע אנשי שלומינו.

"לְר' נַחְמָן נֵרוֹ יָאִיר אֲנִי מַזְהִיר" און רבי נחמן ווארן איך זייער אן, "שֶׁיְּבַלֶּה הַיּוֹם אֵיזֶה שָׁעוֹת וְיַעֲמֹד עַל הַזֵּייגֶיר מַאכֶיר" ער זאל פארברענגען אסאך צייט היינט ביים זייגער מאכער, "שֶׁיִּגְמֹר תִּקּוּן הַזֵּייגֶירִיל הַיּוֹם בְּכִי טוֹב" ער זאל היינט נאך צוענדיגן פאררעכטן די זייגער, "וְגַם אַתָּה תֵּלֵךְ עִמּוֹ וּתְבַקֵּשׁ מֵהַזֶּיגֶיר מַאכֶיר שֶׁיְּתַקְּנוֹ מִיָּד" און דו מיין טייערער זון זאלסט אויך אהין גיין און זען ער זאל דאס ענדיגן נאך היינט, "וּמִן הַסְּתָם תַּעֲשֹוּ עַל צַד הַיּוֹתֵר טוֹב" און דו וועסט זיכער זען ער זאל דאס גוט פאררעכטן, "כִּי יְדַעְתֶּם כַּמָּה מֻכְרָח לִי הַזֵּייגֶיר בְּכָל שָׁעָה" ווייל דו ווייסט זיכער ווי וויכטיג דער זייגער איז פאר מיר; געבויט אויף די ווערטער וואס רבי נתן שרייבט איז מוהרא"ש געגאנגען מיט א זייגער.

איך גיי נישט מיט א האנט זייגער ווייל ביי אונז אין די משפחה איז דאס נישט אנגענומען. דאס בעסטע איז זאלסט פרעגן דיין טאטע נרו יאיר, ער זאל דיר זאגן אויב דו זאלסט יא גיין דערמיט אדער נישט, אויב דאס איז א זאך וואס איז אנגענומען ביי אייך.

דער עיקר זאלסטו זיך צוגעוואוינען בעטן דעם אייבערשטן יעדע זאך אין דיין שפראך, אויף פראסט אידיש, און זאלסט שמועסן מיטן אייבערשטן אויף פראסט אידיש, וועסטו זוכה זיין צו ווערן א גרויסער צדיק.

שרייב מיר ווייטער אלע דיינע פראגעס.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת לך לך, ו' מר-חשון, שנת תשפ"ג לפרט קטן

לכבוד מיין טייערער ליבער חתן ... נרו יאיר

יעצט אין טעג און וואכן וואס דו גרייסט זיך צו דיין חתונה - זאלסטו אויסנוצן די צייט מיט תורה ותפילה. האסט באקומען א טייערע כלה, דארפסטו זיך גרייטן אזוי ווי עס דארף צו זיין מיט דיינע שיעורים כסדרן, חומש רש"י, ח"י פרקים משניות און דפים גמרא מיט התבודדות ותפילה; שפיל זיך נישט ווי א קליין קינד וכו'.

ביינאכט גיי נאך געלט, העלף דיין טאטע זאל נישט ווערן א בעל חוב פון דיך חתונה מאכן.

יעצט ביסטו יונג, קענסטו נישט באגרייפן וואס מיינט עלטערן, שפעטער ווען דו וועסט עלטער ווערן וועסטו זיך כאפן וואס מיינט עלטערן. מענטשן רייסן זיך די האר פון קאפ ווען זיי טראכטן פון זייערע יונגע יארן, זייער כיבוד אב ואם.

איך האב דיך זייער ליב, איך האב דיר געברענגט א גאר חשוב'ע כלה, איך ווארט צו זען ווי שיין דו וועסט לעבן מיט די עצות פון רבי'ן.

פאלג מיך, נוץ אויס דיין צייט פאר תורה ותפילה און אין די איבריגע צייט גיי נאך געלט פאר דיינע עלטערן.

אויך זאלסטו מיר שרייבן יעדע וואך א בריוו, ווייל איך וויל ווייטער האבן מיט דיר א נאנטע קשר. יעצט אין ישיבה זע איך דיר יעדן טאג און מיר רעדן יעדן טאג, אבער נאך דיין חתונה הויבט זיך אן א נייע פרשה, דו וועסט שוין נישט קומען אין ישיבה יעדן טאג, איך וויל נישט אונזער שייכות זאל ווערן דערווייטערט, וויל איך דו זאלסט מיר שרייבן יעדע וואך א בריוו, און איך וועל דיר ענטפערן אם ירצה ה'.

דא האסטו אפאר יסודות פאר דיין לעבן. נעגל וואסער, מקוה, די דריי תפילות דאווענען מיט מנין, תיקון הכללי, התבודדות, מעביר סדרה זיין יעדן טאג, משניות, א בלאט גמרא, שמחה און יעדן טאג אהיים רופן דיינע עלטערן.

דיין ראש ישיבה

בעזרת ה' יתברך

יום ג' פרשת נח, א' דראש חודש חשון, שנת תשפ"ג לפרט קטן

לכבוד מיין טייערער ליבער ... נרו יאיר

אפשר ווילסטו קומען אין כולל לערנען די הייליגע תורה? האסט דאך נישט קיין פרנסה; סתם זיך דרייען און פרייען - איז דאך נישט קיין עסק, און זיכער נישט אריינשלאפן אין טאג אריין. די שטוב קען צעפאלן; ווייל אז די ווייב שטייט אויף לויפן צו די ארבעט און צו די קינדער, און דער מאן שלאפט אריין אין טאג אריין - שטערט דאס די ווייב, קען חס ושלום די ליבשאפט ווערן אפגעקילט, און ווי קען זי ארויפקוקן וכו'.

יעצט איז דיינע שענסטע יארן, די שענסטע צייט אין לעבן. מאך זיך א סדר אויפצושטיין פארטאגס, נעם זיך א חברותא און נוץ אויס דיינע טעג; אדער טוסטו עפעס פאר פרנסה אדער זיץ און לערן, גיי נישט ליידיג.

שרייב מיר צוריק, וועסטו מיר מחי' זיין.

בעזרת ה' יתברך

יום א' פרשת תולדות, כ"ו מר-חשון, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

אויף דיין פראגע, ווען דו האסט נישט קיין צייט - וואס דו זאלסט ענדערש טון, אדער לערנען גמרא אדער גיין פארשפרייטן דעם רבינ'ס עצות און חיזוק?

גלייב מיר, עס איז דא צייט פאר ביידע; עס איז דא צייט פאר שיעורים כסדרן און צייט פאר הפצה, און אז דו זעסט נישט אין דיין סדר היום צייט פאר ביידע - זאלסטו ענדערש גיין הפצה; גרעסערס פון מזכה זיין נאך א איד מיט די עצות פון רבי'ן - איז נישט פארהאנען.

גיי הפצה - וועסטו האבן א תיקון אויף פגם הברית רחמנא לצלן. דער רבי זאגט (ספר המדות אות ניאוף, סימן מא): "תִּיקוּן לְהוֹצָאַת זֶרַע לְבַטָלָה שֶׁיִּשְׁתַּדֵּל לְהַחְזִיר בְּנֵי אָדָם בִּתְשׁוּבָה", א תיקון צו פאררעכטן וואס מען האט געזינדיגט אין פגם הברית - איז צוריק ברענגען מענטשן צום אייבערשטן.

בעזרת ה' יתברך

יום ה' פרשת בראשית, כ"ד תשרי, שנת תשפ"ג לפרט קטן

לכבוד מיין טייערער ... נרו יאיר ברסלב, ליבערטי

לכבוד דעם נייעם יאר זאלסטו גיין שלאפן צייטליך, אזוי וועסטו קענען אויפשטיין פארטאגס לערנען און דאווענען.

אין שטעטל איז נישטא וואס צו טון ביינאכט, עס איז א מחי' צו לעבן דארט; מען גייט שלאפן פרי, אזוי קען מען אויפשטיין פרי.

נעם זיך א חברותא פאר אינדערפרי צו לערנען דעם בלאט גמרא, מען הויבט אן מסכת נדרים, א הערליכע מסכתא. נעם א חברותא צו לערנען יעדן אינדערפרי, וועסט זיך אזוי מחי' זיין; עס איז גאר אנדערש דאס לערנען אינדערפרי, אפילו דו לערנסט א גאנצן טאג אין כולל - וועסטו שפירן פארטאגס עפעס א גאר גוטע טעם ביים לערנען.

דער עיקר בעט איך דיר, בטל נישט קיין צייט. דריי זיך נישט אינדרויסן פון שטוב, נאך מעריב גיי אהיים; אדער העלף דיין ווייב, אדער לערן אין שטוב, אדער גיי שלאפן.

זיי מכבד דיין שווער, ווען דו זעסט אים גרוס אים און זאג אים א יישר כח פאר אלעס. אזוי אויך מיט יעדן איינעם; באגרוס דיין לענדלאר, באגרוס די גבאים, באגרוס יעדן איינעם, ברענג אריין אין שטעטל אחדות און ליבשאפט.

פון דיין ראש ישיבה וואס האט דיך ליב.

בעזרת ה' יתברך

יום ה' פרשת בראשית, כ"ד תשרי, שנת תשפ"ג לפרט קטן

מרת ... תחי'

אייער מאן האט מיך געפרעגט שמחת תורה אויב איר זאלט נעמען די ארבעט ביי ..., היות עס האט א חסרון אז אסאך מאל ענדיגט מען די ארבעט שפעט, ער וויל וויסן וואס איך האלט.

איך מיין עס איז יא כדאי צו נעמען די ארבעט, ענדערש ווי גיין ליידיג; א יונג ווייבל אן קינדער איז נישט גוט צו זיין אן אן ארבעט, גיין ליידיג איז שעדליך, גיין ליידיג מאכט דעפרעסט, ענדערש זאלט איר נעמען די ארבעט, אפילו איר ענדיגט אמאל שפעט, און ווען איר וועט האבן קינדער - דעמאלט קענט איר בלייבן אין שטוב, זיין א מאמע פאר די קינדער.

זאגט יעדן טאג אינדערפרי ברכת השחר, קריאת שמע, די דרייצן אני מאמין'ס און רעדט צום אייבערשטן אויף אייער שפראך. בעטס אים אלעס וואס איר דארפט, שמועסט מיטן אייבערשטן, דאנקט אים אויף אייער לעבן; ווי מער מען דאנקט - ווערט זיסער דאס לעבן.

אויב איר האט זאכן דורך צו רעדן - קענט איר קומען זונטאג מיט אייער מאן קיין וויליאמסבורג, אדער יעדע מוצאי שבת מברכים אין שטעטל, דעמאלט נעם איך אויף בקביעות מיינע תלמידים.

בעזרת ה' יתברך

יום ה' פרשת בראשית, כ"ד תשרי, שנת תשפ"ג לפרט קטן

לכבוד מיין טייערער ... נרו יאיר ברסלב, ליבערטי

איך וויל דיר בעטן דו זאלסט טון עפעס פאר פרנסה, איך וויל נישט האבן ביי אונז אין די קהילה מענטשן וואס גייען ליידיג; מען קען וואוינען אין שטעטל נאר אז מען איז באשעפטיגט מיט אן ארבעט.

דער הייליגער רבי נתן האט געזאגט פאר די וואס געבן קעסט, זיי האלטן אויס די קינדער - נאר אז זיי לערנען און דאווענען, אז נישט זאל מען ארויסווארפן זייערע קישענעס און דעקעס, די בעט געוואנט - פון פענסטער; זיי זאלן זיך מוזן טרעפן א דירה און צאלן רענט, אבי נישט גיין ליידיג.

עס איז נישט אויסגעהאלטן צו לעבן א סדר היום - אויפשטיין חצות, זיך ווייקן אין מקוה ביז צוויי אזייגער און זיך שטעלן דאווענען שחרית נאכמיטאג.

גיי ארבעטן. לייג זיך שלאפן צייטליך און שטיי אויף צייטליך, זיי זיך קובע צו לערנען און דאווענען.

לאז מיך וויסן דיין סדר היום, איך וויל נישט האבן אין שטעטל קיין בטלנים.

איך שרייב דיר וויל איך ליב דיר.

בעזרת ה' יתברך

יום ד' פרשת וירא, ט"ו מר-חשון, שנת תשפ"ג לפרט קטן

מרת ... תחי'

איך האב ערהאלטן אייער בריוו.

שמועסט אפ מיט די טיטשערס אז אלעס וואס זיי דארפן האבן פאר די קינדער אין סקול - דארף מען אריינגעבן כך וכך טעג פריער וכדומה, און נאר אזוי וועט מען דאס טון. און אז די טיטשערס זענען פארשלעפט און זיי קענען זיך נישט צאמנעמען - וועט די אפיס דאס נישט צושטעלן, זיי וועלן דאס אליינס דארפן צושטעלן.

בנוגע קומען צייטליך; שרייבט מיר די נעמען פון די טיטשערס ווער עס קומט נישט צייטליך, איך וויל שטיין אויף דעם אז מען זאל זיין צייטליך.

בנוגע מאכן א רעגנבויגן אין קלאס; עס איז נישט קיין פראבלעם.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ד' פרשת בראשית, כ"ד תשרי, אסרו חג, שנת תשפ"ג לפרט קטן

לכבוד מיין טייערער ... נרו יאיר ברסלב, ליבערטי

עס איז א שאד אז דו האלסט נישט די זמנים פון כולל, דו קומסט נישט צייטליך. יעצט זאגט מיר דיין חברותא ער וויל א צווייטע חברותא פאר'ן קומענדיגן יאר; ער איז בעצם זייער צופרידן צו לערנען מיט דיר, ווען דו קומסט אין כולל לערנסטו פלייסיג, אבער ביז דו קומסט אן דארף ער ווארטן; עס איז אים נישט גוט, ער וויל איינער וואס נעמט ערנסט כולל.

בנוגע קויפן א דירה אינעם נייעם שטעטל וכו'; ענדערש בלייב אין כולל און וואוין פאר רענט מיט מנוחה, ווי איידער האבן אן אייגענע דירה און דארפן ארויסגיין פון כולל צו קענען דעקן די הוצאות.

אז דו וועסט בלייבן אין כולל לערנען בהתמדה - וועט קומען פאר דיר א דירה אן דארפן דאגה'נען. חכמינו זכרונם לברכה זאגן (אבות ג, ה): "כָּל הַמְקַבֵּל עָלָיו עֹל תּוֹרָה, מַעֲבִירִין מִמֶּנּוּ עֹל מַלְכוּת וְעֹל דֶּרֶךְ אֶרֶץ".

זע צו היטן די זמנים.

בעזרת ה' יתברך

יום ג' פרשת כי תצא, י' אלול, שנת תשפ"ב לפרט קטן

לכבוד מיין טייערער ... נרו יאיר

אשריך ואשרי חלקך אז דער טאג גייט דיר אריבער מיט אזעלכע הייליגע זאכן; יעדע רגע איז פאר הפצה, צו פארשפרייטן דעם הייליגן רבינ'ס עצות פאר די גאנצע וועלט.

קרעכץ נישט אז דו קומסט נישט אן מיט די ארבעט. חכמינו זכרונם לברכה זאגן (ברכות כה:): "לֹא נִתְּנָה תּוֹרָה לְמַלְאֲכֵי הַשָּׁרֵת", מיר זענען נישט קיין מלאכים, מיר זענען מענטשן; וויפיל מען קען טון - דארף מען טון, אז מען טוט דאס מערסטע וויפיל מען קען - מאכט דער אייבערשטער ניסים. חכמינו זכרונם לברכה זאגן (בבא בתרא צט.): "מָקוֹם אָרוֹן אֵינוֹ מִן הַמִּדָּה", דער ארון האט נישט בדרך הטבע קיין פלאץ אין קדשי קדשים, עס איז נישט שייך אריינצושטופן מיט כח, דער אייבערשטער האט געמאכט א נס אז עס האט יא געהאט פלאץ; אזוי איז ביי אלעם, ווען מען געבט זיך איבער צום אייבערשטן - געשעט א נס און עס איז דא צייט און פלאץ.

איך שיק דיר דא די זמנים פאר ראש השנה שנת תשפ"ג הבא עלינו לטובה. מאך א שיינעם צעטל, דרוק עס אינעם גליון, און אויך זאל מען דאס אנגרייטן אויפצוהענגען אינעם בנין אין אומאן, אלע זאלן וויסן ווען מען דאווענט און ווען עס וועט זיין שיעורים:

מוצאי שבת כי תבוא וועלן מיר זאגן סליחות אום איינס אזייגער.

שבת פרשת נצבים וועלן מיר זיין מיט'ן אייבערשטנ'ס הילף אין אומאן. די זמן הדלקת הנרות אין אומאן איז בשעה 6:45.

מיר וועלן דאווענען מנחה און קבלת שבת בשעה 7:30, נאך די סעודה וועט זיין א באטע, מיר וועלן זינגען זמירות און רעדן פון הייליגן רבי'ן.

שבת אינדערפרי וועלן מיר דאווענען שחרית בשעה 9:30, נאכן דאווענען וועט מען פארלערנען ספורי מעשיות.

מנחה וועט מען דאווענען בשעה 7:00, נאך מנחה וועט זיין שלש סעודות.

מוצאי שבת ביי חצות וועלן מיר זאגן סליחות, אום 1:00 נאך סליחות וועט מען קענען מאכן פדיון נפש.

ערב ראש השנה אינדערפרי וועלן מיר דאווענען שחרית אום 8:00, נאכן דאווענען וועט זיין פדיון נפש.

זמן הדלקת הנרות ערב ראש השנה איז 6:30, מען וועט דאווענען דעם לעצטן מנחה פונעם יאר ערב ראש השנה ביים זמן הדלקת הנרות.

שחרית ביידע טעג ראש השנה וועט זיין 8:00

5:00 וועט מען גיין תשליך, מנחה וועט זיין 6:00, און 6:30 וועט זיין די דרשה.

דעם צווייטן טאג ראש השנה וועט מען אויך דאווענען מנחה 6:00, און די דרשה וועט זיין 6:30.

די זמן פון מוצאי יום טוב איז 8:00.

געב איבער פאר האברך ... ער זאל צושטעלן שטרות פרוזבול פאר'ן גאנצן עולם.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ד' פרשת שופטים, ד' אלול, שנת תשפ"ב לפרט קטן

לכבוד ... נרו יאיר, מנהל תלמוד תורה היכל הקודש ירושלים

איך האב ערהאלטן דיין בריוו.

אשריך ואשרי חלקך אז דו האסט גענומען אויף דיר דעם גאנצן עול פון די תלמוד תורה און מיידל שולע וואו מיר זענען מחנך די קינדער מיט די זיסע עצות וואס מיר האבן מקבל געווען פון מוהרא"ש זכותו יגן עלינו.

איך וועל אם ירצה ה' שרייבן פאר די מלמדים און טיטשערס חיזוק און הדרכה.

בנוגע אראפרעכענען געלט פון די איינגעשטעלטע פאר'ן קומען שפעט; איך וועל דיר זאגן ווי אזוי מיר מאכן אין אמעריקע. אונזערע מלמדים אין אמעריקע קומען נישט אין חדר צוליב זייער געהאלט, זיי קענען מאכן אסאך מער געלט ערגעץ אנדערש, אין אמעריקע מאכט א מלמד זיבן-אכט הונדערט דאלער א וואך, דאס איז זייער ווייניג אנטקעגן וואס מען צאלט פאר אנדערע ארבעט. אונזערע מלמדים זענען מלמדים ווייל זיי ווילן לערנען מיט קינדער תורה, יראת שמים און מידות טובות, זיי האבן בכלל נישט אינזין די געלט; מיר געבן א געהאלט פאר די איינגעשטעלטע ווייל זיי דארף לעבן, אבער זיי קומען בכלל נישט פאר דעם.

אויב מיר וועלן אראפרעכענען געלט פאר'ן מלמד וועט אים דאס נישט מאכן קומען מער צייטליך, עס וועט אים נאר אוועק נעמען די אפעטיט פון ארבעטן מיט'ן מנהל, הנהלה און אפיס. אז א מלמד קומט שפעט - רעדט מען צו אים, מען הערט אים אויס, מען לייגט זיך אריין אינעם מצב אים צו פארשטיין; אפשר קען ער נישט קומען, אפשר גייט ער עפעס אריבער, און מען ארבעט אויס עס זאל נישט שאטן פאר די קינדער.

ווען דער מלמד קומט אריין פאר די געלט - דעמאלט קען ארבעטן אראפנעמען די געלט, ווייל דאס איז די איינציגסטע סיבה פארוואס ער ארבעט בכלל.

לויט וואס איך הער זענען אונזערע מלמדים אין ירושלים - מלמדים וואס קומען נישט צו די ארבעט פאר די געהאלט, זיי קומען ווייל זיי ווילן בויען מוסדות היכל הקודש, מוסדות וואו מען וועט מחנך זיין קינדער מיט די זיסע וועג פון רבי'ן, די קינדער זאלן באקומען א ליבשאפט צום באשעפער, א ליבשאפט צו די תורה; איז דעמאלט נישט כדאי צו שפילן מיט די מינוטן וואס מען קומט שפעט, ענדערש דארף מען זיי מחזק זיין צו קומען צייטליך און אז זיי קענען נישט - דארף מען זען די קינדער זאלן נישט זיין אן קיין השגחה.

איך וויל זייער האבן איינגעשטעלטע ביי אונזער מוסד אין ירושלים וואס קומען נישט פאר די געהאלט, נאר וואס זענען איבערגעגעבן בלב ונפש, זייער גאנצע מח איז נאר צו בויען סאלדאטן פאר'ן אייבערשטן; אין אזא פאל, אז דער מלמד איז אן איבערגעגעבענער, א געטרייער, און עס מאכט זיך אן אונס - איז נישט כדאי אראפצונעמען פון זיין געהאלט.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך

יום ד' פרשת ראה, כ"ז מנחם-אב, שנת תשפ"ב לפרט קטן

לכבוד מיין טייערער ... נרו יאיר ברסלב, ליבערטי

ציינער איז נישט א זאך מיט וואס מען שפילט זיך; אויב מען מאכט זיך נישט צו טון, מען גייט נישט צום ציין דאקטער - קען מען זיך זען אויף דער עלטער אן קיין ציינער.

נעם דיינע קינדער צום ציין דאקטער, שטיי אויף דעם אויף יעדן קינד; עס איז נישט קיין תירוץ צו זאגן: "אין שטעטל איז נישטא קיין ציין דאקטער", קודם כל עס איז יא דא, און אז נישט - זאלסטו אריינפארן ביזן שטאט צו האבן גוטע געזונטע ציין.

יעצט ווען דיין ציין איז דיר חרוב פרעגסטו וואס דו קענסט זיך פארנעמען א גוטע קבלה פאר א רפואה; דאס זאלסטו זיך פארנעמען, נישט צו לאזן וויכטיגע זאכן אויף מארגן, קוק וואס פאסירט אז מען פארנאכלעסיגט.

א כתיבה וחתימה טובה.

בעזרת ה' יתברך

ערב שבת קודש פרשת ואתחנן, חמשה עשר באב, שנת תשפ"ב לפרט קטן

לכבוד מיין טייערער ... נרו יאיר, תלמיד ישיבת תפארת התורה

היינט אינדערפרי ווען דו האסט מיר דערציילט אז דו האסט אנגעהויבן און געענדיגט מסכת תענית - האסטו מיר אזוי מחי' געווען, איך געדענק נישט ווען איך זאל זיך אזוי פרייען; איך פריי זיך צו זען אז דו לערנסט, דו גייסט יעדן טאג לערנען און מסיים זיין מסכת תענית פאר פערציג טעג, ביז ראש השנה - זוכה זיין צו די סגולה פון א חתן ווערן.

טייערער ..., איך זאג דיר אפשר אביסל מער מוסר ווי אנדערע, אבער פארשטיי מיר אז דאס איז וויל איך ליב דיר. פאר מיינע קינדער זאג איך נאכמער מוסר; פאר מיינע קינדער אין ישיבה, און אויך די וואס האבן שוין חתונה געהאט - האב איך געזאגט זייער אסאך מוסר, ווייל איך האב ליב מיינע קינדער, איך וויל דאס בעסטע פאר זיי, און דעריבער זאג איך דיר אויך מוסר, נאר ווייל איך האב דיר ליב; ביז איך זע אז מיינע ווערטער טוען סיי ווי נישט אויף, דעמאלט לאז איך אפ די מוסר, איך מאך צו מיינע אויגן.

זיי נישט ברוגז אז איך זאג דיר אויפצושטיין דאווענען אין צייט, און צו האבן גוטע חברים, חברים מיט תמימות אן ליצנות; איך וויל נאר דיין גוטס.

בעזרת ה' יתברך

יום א' פרשת חקת, ד' תמוז, שנת תשפ"ב לפרט קטן

לכבוד מיין טייערער ... נרו יאיר

היינט בין איך געזיצן מיט אלע וואס ארבעטן אין קרן הדפסה היכל הקודש, איך האב זיך אינטערעסירט ווי עס האלט די לוח לשנת תשפ"ג לפ"ק, מען האט מיר געזאגט אז מען ווארט אויף דיר, דו זאלסט ענדיגן די הגהה.

איך האף דו וועסט דאס ענדיגן ווי שנעלער, ווייל היום קצר והמלאכה מרובה, די צייט איז קורץ אין די ארבעט איז אסאך; מען דארף דאס שוין דרוקן, אנגרייטן פאר'ן קומענדיגן יאר.

עס כאפט א קיצל צו הערן 'שנת תשפ"ג'; מיר האבן נעכטן אנגעהויבן די יאר מיט אזויפיל קבלות טובות, ווי איז די יאר אזוי אריבער? וואו זענען די טעג? די וואכן?

יעצט זומער ווען דו ביסט אין קאנטרי - קענסטו מקיים זיין דעם רבינ'ס ווערטער, זיך מתבודד זיין צווישן די גראז און ביימער; וואויל איז דעם וואס איז מקיים דעם רבינ'ס ווילן בתמימות ובפשיטות.

בעזרת ה' יתברך

יום ה' פרשת קרח, ב' דראש חודש תמוז, שנת תשפ"ב לפרט קטן

לכבוד מיין טייערער ... נרו יאיר

אז מען רעדט דיר א שידוך זאלסטו זאגן אז דו ביסט גרייט זיך צו טרעפן, און ווי שנעלער ענדיגן די שידוך.

עס איז דא א לשון אין ספורי מעשיות (מעשה יג, פון די ז' בעטלערס): "תֵּיכֶּף וִוי מֶע הָאט אָנְגִיהוֹבְּן דֶערְפוּן צוּ שְׁמוּסְן, אִיז דָאס זֵיי אַלֶע זֵייעֶר גִיפֶעלְן, הָאט מֶען זֵיי מְשַׁדֵךְ גִיוֶוען", תיכף ווי מען האט נאר אנגעהויבן רעדן פונעם שידוך צווישן די צוויי קינדער וואס זענען פארלוירן געווארן וכו', האט מען גלייך פארמאכט די שידוך; זיי האבן זוכה געווען צו די גרויסע מדריגות נאר ווייל זיי האבן חתונה געהאט, זיי האבן זיך נישט געקלויבט.

יארן לויפן אריבער, מען געבט זיך איין דריי און מען גייט שוין צוריק צום אייבערשטן. איך בעט דיר זייער, דו פון דיין זייט זאלסטו נישט זיין קיין עיכוב; אז א שדכן רופט דיר - זאלסטו מיט ארבעטן און זאגן אז דו ווילסט זיך טרעפן, נאר אזוי וועסטו חתונה האבן. אזוי ווי רבי נתן האט געזאגט: "די ים וועט נישט קומען צו מיר, און אויב איך וויל פארן קיין ארץ ישראל - דארף איך פארן צום ים"; אזוי אויך ביי דיר, פון זיך קלויבן 'איך דארף נאר א שידוך מיט די אלע תנאים' - וועט גארנישט ווערן, מען דארף חתונה האבן צו טון רצון ה', נישט רצון עצמו.

בעזרת ה' יתברך

יום ג' פרשת חקת, ו' תמוז, שנת תשפ"ב לפרט קטן

לכבוד ... נרו יאיר

איך האב ערהאלטן דיין בריוו.

דער פראבלעם איז נישט "וואטס-עפפ", דער פראבלעם איז אז דער מענטש אנטלויפט פון זיין לעבן. טעקסט מעסעדזש איז אויך שעדלעך ווען מען נוצט דאס אוועק צו לויפן פונעם לעבן; איך זע ביי בחורים, ווי נאר זיי באקומען א טעלעפאן - שרייבן זיי זיך איין אויף גרופס, עס גייט אוועק די טאג, די קאפ און די מח, מען ווערט א קנעכט פאר'ן טעלעפאן.

אז דו דארפסט האבן וואטס-עפפ פאר פרנסה, פאר קאר סערוויס - איז דאס נישט קיין פראבלעם, קענסט דאס האבן, אבער זאלסט זען נאר צו האבן די איינע קאנטעקט, די איין גרופ און נישט מער. אז דו וועסט האבן נאך קאנטעקטס; דער וועט דיר שיקן נאר איין בילד, א צווייטער וועט דיר שיקן נאר א גענעץ און א דריטער א סניס - ביסטו פערטיג, ביסטו פארקנעכטעט, דיין ווייב אן אלמנה און דיינע קינדער יתומים.

די שפראך פון "צדיק אמת", "אמת לאמיתו", "אמת'ן אמת'ן אמת" - לאז איבער דארט וואו דו ביסט, דא קום דינען דעם אייבערשטן, לערנען, דאווענען און רעדן שיין אין שטוב צו די ווייב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ד' פרשת נשא, ט' סיון, שנת תשפ"ב לפרט קטן

לכבוד מיין טייערער ... נרו יאיר ברסלב, ליבערטי

איך האב ערהאלטן דיין בריוו מיט די כולל געלט.

זיי מיר מוחל, איך האב נישט דיר געמיינט. איך האב געבעטן דעם מנהל ער זאל שרייבן אויף אלע טשעקס, ווער עס האט נישט געהיטן די צייט זאל צוריק שיקן געלט, וויפיל ער פארשטייט; איך האב געמיינט די אינגעלייט וואס היטן נישט די צייט, נישט דיר האב איך געמיינט, דו ביסט א טייערער אינגערמאן; הלוואי זאלן מיר האבן נאך אזעלכע אינגעלייט ווי דיר.

שטארק זיך מיט תפילה והתבודדות, גיי אביסל שפאצירן אין פעלד. דו וואוינסט דאך אין גן עדן, די שטעטל איז אזוי ריין, אזוי הייליג.

איך בין געווען יום טוב שבועות אין שטעטל, איך האב זיך אזוי מחי' געווען, איך האב געלייגט א טיש הונטערן שול, צווישן די ביימער, איך האב דארט געלערנט שבועות אינדערפרי און זיך מתבודד געווען. עס האט זיך געשפירט אזוי גוט; וואס מער דארף מען פון זיך מתבודד זיין צווישן די פעלדער, מען שפירט דעם אייבערשטן, ממש די ברכה פון די תורה (ויקרא כו, יב): "וְהִתְהַלַּכְתִּי בְּתוֹכְכֶם", ווי רש"י זאגט: "אֲטַיֵּל עִמָּכֶם בְּגַן עֵדֶן".

בעזרת ה' יתברך

ה' פרשת אמור, י"ב אייר, כ"ז לעומר, שנת תשפ"ב לפרט קטן

לכבוד מיין טייערער ... נרו יאיר ברסלב, ליבערטי

איך ווארט צו הערן פון דיר וואס דו לערנסט, איך וויל דו זאלסט נעמען א חברותא, לערנען יעדן טאג. א שאד די יונגע יארן זאלן אריבערגיין מיט זאכן וואס בלייבט נישט, יעצט איז דיין שענסטע צייט פון לעבן, פארוואס זאלסטו נישט אויסנוצן דיינע שענסטע יארן.

זעץ זיך צו צום שיעור וואס דער דיין שליט"א לערנט פאר. אפילו דו פארשטייסט נישט די שיעור אזוי גוט, דאך איז גוט צו זיצן ביים שיעור. אנהויב איז שווער, ביז מען געוואוינט זיך צו מער און מער, ביים סוף פארשטייט מען.

איך בעט דיר זייער זאלסט מיר שרייבן דיינע שיעורים, דיינע חברותות – און אזוי ווייטער.

איך האף דו לייגסט אוועק די אלע בריוו וואס איך שרייב דיר, און דו לערנסט עס נאכאמאל און נאכאמאל.

בעזרת ה' יתברך

ליל שישי פרשת קדושים, ה' אייר, כ' לעומר, שנת תשפ"ב לפרט קטן

לכבוד מיין טייערער ... נרו יאיר, גבאי בית המדרש אשר בנחל, ברסלב ליבערטי

דו שרייבסט מיר אז דו האסט זייער הנאה פון די בריוו געשריבן פאר גבאים, וועל איך דיר שרייבן נאך.

איינע פון די וויכטיגע זאכן פאר די הצלחה פון א שול – איז זמנים, מען דארף זיך שטעלן דאווענען ווען מען איז קובע א צייט. בדרך כלל קומען נישט מענטשן צייטליך, דארף זיין א גבאי אין צייט, אדער דער גבאי דארף ממנה זיין א בעל תפילה וואס זאל אנהויבן צייטליך. דער בעל תפילה דאווענט געשמאק, נישט כיפערדיג, נישט ציענדיג – דעמאלט קען מען זייער מצליח זיין.

אויך דארף מען זיין שטיל ביים דאווענען, מען טאר נישט שמועסן ביים דאווענען; נאר אזוי קען זיין הצלחה.

איך וועל דיר נאך שרייבן בעזר השם.

בעזרת ה' יתברך

יום ג' פרשת אחרי ב', כ"ה ניסן, שנת תשפ"ב לפרט קטן

לכבוד מיין באליבטער ... נרו יאיר, ברסלב ליבערטי

דער דיין שליט"א, דער ראש הכולל – זאגט מיר, דו לערנסט זייער פלייסיג, אבער ער זאגט עס שטערט זייער אז דו האלסט נישט קיין זמנים, מען קען נישט זיין אין כולל אזוי, ער זאגט מיר ער האט זיך קובע מקום געווען אויסגעדרייט זיין פנים צום וואנט צוליב דיר, ער קען נישט זען ווי דו קומסט טאג איין טאג אויס עלף אזייגער אדער צוועלף.

דעריבער בעט איך דיר זייער זאלסט אויסדרייען דיין סדר היום. תיכף נאך מעריב זאלסטו אהיים גיין, בלייב נישט שמועסן אין שול, בלייב נישט טון פאר הדפסה, גארנישט, גיי אהיים, האסט א ווייב וואס ווארט דיר.

יעצט זומער ווען מען דאווענט מעריב שפעט דארפסטו זיין אין שטוב שפעטסטנס צען אזייגער, אזוי וועסטו קענען אויפשטיין פארטאגס לערנען דיינע שיעורים כסדרן און דאווענען, עסן פת שחרית און זיין גרייט און צייט אין כולל.

איך וועל שרייבן פאר דיין ווייב זי זאל דיר העלפן אויפשטיין צייטליך.