בריוון פונעם ראש ישיבה שליט"א

בעזרת ה' יתברך

יום ה' פרשת וישלח, י"ד כסליו, שנת תשפ"ב לפרט קטן

לכבוד ... נרו יאיר

מען זאגט מיר פון אפיס אז דו ביסט שולדיג קרוב צו צען טויזנט דאלער פאר שכר לימוד; קען זיין דו ביסט געדרוקט, דו האסט נישט קיין געלט צו צאלן, אבער דאס איז נישט קיין תירוץ אויף דעם וואס דו הייבסט נישט אויף דעם טעלעפאן ווען מען רופט דיר פון אפיס.

עס איז זייער נישט שיין פון עלטערן דאס צו טון פאר די מוסד וואו די קינדער לערנען. די גאנצע מוסד; די מלמדים, די טיטשערס - ארבעטן ביטער שווער, זיי טוען אזויפול פאר די קינדער, קומט אונז דאס צוריק צו טון? זיך נישט וויסנדיג מאכן? צו שפייען אין פנים?!

שכר לימוד איז א נדבה? ווען מען צאלט שכר לימוד טוט מען איינעם א טובה? דאס איז א נדבה?! דאס איז פאר די אייגענע קינדער! דאס איז פאר מענטשן וואס זיצן פון אינדערפרי ביז ביינאכט מיט דיינע קינדער, מיט די גרעסטע מאס סבלנות, דאס טוסטו צוריק?!

איך זאג דיר קלאר דו זאלסט וויסן, אויב דו וועסט זיך נישט וויסנדיג מאכן, דו וועסט איגנארירן די מוסד - וועלן מיר ווייטער לערנען מיט דיינע קינדער, איך גיי זיי נישט פארשעמען, איך גיי זיי נישט אהיים שיקן; אבער וואס איז מיט דיר? וואס בעט איך פון דיר? איך בעט סך-הכל הייב אויף דעם טעלעפאן ווען מען רופט דיר, הער וואס מען בעט; ווער זאגט מיר דארפן די גאנצע צען טויזנט דאלער וואס דו ביסט שולדיג? מיר וועלן זיין צופרידן מיט א צוואנציגער, מיט א צענער; וואס הייסט מען מאכט זיך נישט וויסנדיג?!

בעזרת ה' יתברך

                        יום ב' פרשת תולדות, כ"ט מר-חשון, שנת תשפ"א לפרט קטן

לכבוד האברך ... נרו יאיר.

א גרוס פון דיינע טייערע קינדער, זיי זענען זייער מצליח ביי אונז אין מוסד; איך שטעל זיך פאר אז דו זעסט אויך א גרויסע שינוי לטובה. אלע האבן זיך זייער געטוישט צום גוטן, איך האף צום אייבערשטן אז זיי וועלן אויסוואקסן גרויסע צדיקים, ערליכע אידן.

איך וויל דיר פרעגן פארוואס דו צאלסט נישט שכר לימוד, מען זאגט מיר פון אפיס אז דו צאלסט נישט קיין שכר לימוד. עס איז נישט גערעכט נישט צו צאלן שכר לימוד; לייג אוועק דיינע אייגענע חשבונות וכו', שפיל נישט פאליטיק און באצאל שוין שכר לימוד.

אז דו ביסט ברוגז אויף מיר איז נישט קיין תירוץ, איך דארף נישט מען זאל האלטן פון מיר, איך זוך נישט קיין חסידים; אויף מיר זענען זייער אסאך מענטשן ברוגז, עס האט נישט צו טון, איך וויל וויסן פארוואס דו צאלסט נישט קיין שכר לימוד?

דא האסטו דעם חשבון וויפיל דו קומסט: 11,195$

בעזרת ה' יתברך

יום ג' פרשת האזינו ב', ד' תשרי, שנת תשפ"א לפרט קטן

לכבוד מיין טייערער ליבער חבר ... נרו יאיר.

איך בעט דיר זייער, זאלסט זיך שטארקן מיט אלע כוחות ווייטער צו העלפן די מוסד. איך וויל אזוי שטארק באצאלן יעדן מלמד און יעדע טיטשער און יעדע איינגעשטעלטער נאך בעפאר יום הקדוש, איך וויל קענען זאגן ביים דאווענען: "לְמַעַן נֶחְדַּל מֵעֹשֶׁק יָדֵינוּ".

איך בעט דיר זייער, העלף מיר; גיי ארויס פון דיין קטנות המוחין, דו קענסט מיר העלפן, דו האסט די כוחות. העלף מיר ברענגען שכר לימוד, העלף מיר ברענגען שטאטישע פראגראמען, לאמיר באצאלן נאך פאר יום הקדוש פאר אלע איינגעשטעלטע וואס ארבעטן מיט אזא איבערגעגעבנקייט.

איך ווארט צו הערן פון דיר.

א גמר חתימה טובה.

בעזרת ה' יתברך

יום ה' פרשת מטות-מסעי, כ"ד תמוז, שנת תש"פ לפרט קטן

לכבוד ... נרו יאיר.

שטארק זיך און ווער נישט צעפאלן, מיר זענען שוין איבער געקומען שווערערע וואסערן; דערמאן זיך די אלע יארן וואס דו העלפסט מיר אזוי געטריי, פון ווען מיר האבן געעפנט די ישיבה שטייסטו מיר צו די האנט, דו האסט מיטגעהאלטן אלע שווערע וואסערן וואס איז אריבער אויף אונז, דארפסטו נישט ווערן צעפאלן ווען צוויי אינגעלייט דערשרעקן דיר וכו'.

שטארק זיך ביתר שאת וביתר עוז ווייטער צו העלפן די מוסדות; זע צו צאלן די מלמדים און טיטשערס, זיי ארבעטן אזוי געטריי און אזוי איבערגעגעבן - דארפן מיר זיך זייער אנשטרענגען אז זיי זאלן קענען באקומען זייער געהאלט אין צייט.

בנוגע די משפחות וואס שפעטן פון דיר ווען דו בעסט שכר לימוד; בעט איך דיר, ווער נישט צעפאלן פון קיינעם. דו טו דיינס; ווער עס האט די זכיה, ווער עס איז אן ערליכער איד - וועט דיר צאלן און אז נישט וועט די ישועה קומען פון אן אנדערע וועג. אזוי ווי רבי נתן האט געזאגט פאר'ן רבינ'ס אייניקל ווען ער האט אים געבעטן ער זאל אים העלפן בויען דעם קלויז: "דעם רבינ'ס זאך וועט זיך סיי ווי אויספירן, שענער און בעסער וועט זיין אז דאס וועט קומען דורך דיר".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת האזינו, ז' תשרי, שנת תש"פ לפרט קטן

לכבוד משפחת ... שיחיו.

מען האט מיר מודיע געווען פון אפיס אז איר זענט שולדיג פאר שכר לימוד דער סכום פון ... טויזנט דאללער; נישט נאר דו צאלסט נישט קיין שכר לימוד, נאר דו מאכסט חוזק און א געשפעט פון די גאנצע זאך.

מיר גייען יעצט בעטן דעם אייבערשטן ביי תפילת נעילה: "אַתָּה נוֹתֵן יָד לַפּוֹשְׁעִים, וִימִינְךָ פְשׁוּטָה לְקַבֵּל שָׁבִים, וַתְּלַמְּדֵנוּ ה' אֱלהֵינוּ לְהִתְוַדּוֹת לְפָנֶיךָ עַל כָּל עֲוֹנוֹתֵינוּ, 'לְמַעַן נֶחְדַּל מֵעֹשֶׁק יָדֵינוּ' וּתְקַבְּלֵנוּ בִּתְשׁוּבָה שְׁלֵמָה לְפָנֶיךָ כְּאִשִּׁים וּכְנִיחוֹחִים" וכו', נאכדעם בעט מען נאכאמאל: "וַתִּתֶּן לָנוּ ה' אֱלֹהֵינוּ בְּאַהֲבָה אֶת יוֹם צוֹם הַכִּפֻּרִים הַזֶּה, קֵץ וּמְחִילָה וּסְלִיחָה עַל כָּל עֲוֹנוֹתֵינוּ, 'לְמַעַן נֶחְדַּל מֵעֹשֶׁק יָדֵינוּ' וְנָשׁוּב אֵלֶיךָ לַעֲשׂוֹת חֻקֵּי רְצוֹנְךָ בְּלֵבָב שָׁלֵם"; עס איז נישט פארהאן נאך תפילות וואס מען בעט צוויי מאל ביי נעילה, זעט מען פון דעם די הארבקייט פון זיין שולדיג פאר א צווייטן געלט.

איך בין נישט מוחל קיין איין פרוטה וואס דו קומסט מיר, איך בלוטיג אוועק יעדע רגע פאר די מוסד, פאר דיינע קינדער וכו'; דער אייבערשטער ווייסט אז איך נעם נישט קיין איין פרוטה פונעם מוסד פון ווען די מוסד שטייט, איך לייג אריין אינעם מוסד אלעס וואס איך האב צו קענען באצאלן די איינגעשטעלטע אז די מוסד זאל אנגיין און דו מאכסט זיך נישט וויסנדיג, עס איז א בושה און א חרפה.

איך ווארט צו הערן פונעם מנהל המוסד אז דו האסט אים גערופן און געמאכט א פלאן ווי אזוי צו באצאלן.

דער אייבערשטער זאל דיר געבן שכל דו זאלסט וויסן אז שכר לימוד איז די חשוב'סטע זאך, אז מען צאלט שכר לימוד איז מען מצליח מיט די קינדער.

בעזרת ה' יתברך

יום א' פרשת האזינו, ז' תשרי, שנת תש"פ לפרט קטן

לכבוד ... נרו יאיר, מנהל מוסדות היכל הקודש ברסלב.

איך האב ערהאלטן דיין בריוו.

איך בעט דיר זייער אויב דו קענסט זיך אנשטרענגען מיט אלע כוחות צו באצאלן די מלמדים און איינגעשטעלטע די וואך פאר די קומענדיגע וואכן ביז נאך סכות; דאס הייסט אויף דריי וואכן: פרשת האזינו, די וואך פון יום טוב סוכות און פרשת בראשית. זיי ארבעטן אזוי געטריי א גאנץ יאר, איז יעצט ווען עס קומט יום טוב לאז זיי האבן א שמחת יום טוב זיי זאלן קענען משמח זיין די ווייב און קינדער.

פרוביר דאס צו געבן שוין היינט אדער מארגן, אז עס זאל נישט זיין וואס חכמינו זכרונם לברכה זאגן (חגיגה ה.): "הַמַמְצִיא לוֹ מָעוֹת לֶעָנִי בְּשַׁעַת דָּחְקוֹ", ווער עס ברענגט גלעט פאר'ן ארימאן די לעצטע מינוט ווען ער קען נישט קויפן פאר ביליג, ער מוז קויפן פאר טייער, וואס דאן איז דאס פאר אים א קללה.

איך ווארט צו הערן די גוטע נייעס אז דו האסט זיי באצאלט אויף יום טוב, אזוי וועלן מיר קענען זאגן ביי תפילת נעילה: "לְמַעַן נֶחְדַּל מֵעֹשֶׁק יָדֵינוּ, וּתְקַבְּלֵנוּ בִּתְשׁוּבָה שְׁלֵמָה לְפָנֶיךָ".

איך וועל דיר אם ירצה ה' שיקן ד' מינים אויף יום טוב.

איך שיק דיר א בריוו וואס דו זאלסט שיקן צו די פאר משפחות וואס מאכן זיך נישט וויסנדיג א גאנץ יאר ווען דו רופסט זיי בעטן שכר לימוד; נישט נאר זיי צאלן נישט קיין שכר לימוד, נאר זיי מאכן א געשפעט ווען מען רופט זיי בעטן שכר לימוד.

דער אייבערשטער זאל העלפן זאלסט מצליח זיין אין אלע דיינע וועגן.

א גמר חתימה טובה און א גוט געבענטשט יאר.

...