בריוון פונעם ראש ישיבה שליט"א

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

מרת ... תחי'

איך האב ערהאלטן אייער בריוו.

איך האב גרויס צער פון די גאנצע פרשה, עס איז אזוי שרעקעדיג צו זען ווי אזא שיינע משפחה צעפאלט דורך מחלוקת; אייערע עלטערן האבן געלעבט אזוי שיין אלע יארן, און יעצט וועגן א מחלוקת צעפאלט אלעס.

איר זאלט ווייטער מחזק זיין אייער מאמע, און זיין זייער שטארק נישט צו ווערן אריינגעדרייט אין די פרשה. אויך זאלט איר רעדן מיט אייער טאטע, און נישט ווערן אריינגעדרייט אין די פרשה.

איך בעט דעם אייבערשטן פאר אייך איר זאלט האבן קינדער, און הצלחה, ובזכות די מצוה פון כיבוד אב ואם, און בזכות שלום – זאלט איר האבן זרע של קיימא מיט אלעס גוטס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

בנוגע וכו'; ביי אונז פירט מען זיך אז דער מאן ווארט אינדרויסן פון צימער, און זאגט קאפיטל ק' 'מזמור לתודה'. דער רבי זאגט (לקוטי מוהר"ן חלק ב', סימן ב) אז די קאפיטל איז מסוגל להולדה, מען זאגט די קאפיטל נאכאמאל און נאכאמאל ביז מען רופט מיט א מזל טוב.

אויך געבט מען צדקה לזכות די ווייב ולזכות די קינד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

לכבוד מיין טייערער ... נרו יאיר

איך וויל דיר בעטן זאלסט קומען צייטליך און כולל, איך ווייס עס איז דיר שווער, דו ביסט צוגעוואוינט צו האבן א סדר פון גיין שלאפן שפעט וכו'; דאך וויל איך דיר בעטן זאלסט האלטן די זמנים, קומען צייטליך און זיין א חלק פון כולל, זיין א חלק פון די חבורה.

אויך וויל איך דיר בעטן זאלסט אדורכשמועסן מיטן ראש הכולל מיט וועם דו זאלסט לערנען און וואס דו זאלסט לערנען; זיי א חלק פון כולל, זיי א חלק פון די שיינע חבורה - וועסטו זייער מצליח זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

... תחי'

לכבוד אייער געבורטסטאג וואס געפאלט דעם שבת, ג' אייר, זאלט איר זוכה זיין צו געזונטע לאנגע יארן מיט אלעס גוטס.

נעמט זיך פאר לכבוד אייער געבורטסטאג צו זאגן יעדן טאג "נשמת"; לויבט און דאנקט דעם אייבערשטן פאר די חסדים וואס דער אייבערשטער מאכט מיט אייך, דאס וועט אייך געבן צו שפירן טעם גן עדן. אזוי ווי דער הייליגער רבי זאגט (לקוטי מוהר"ן חלק ב', סימן ב): "כִּי זֶה עִקָּר שַׁעֲשׁוּעַ עוֹלָם הַבָּא, לְהוֹדוֹת וּלְהַלֵּל לִשְׁמוֹ הַגָּדוֹל יִתְבָּרַךְ וּלְהַכִּיר אוֹתוֹ יִתְבָּרַךְ", די תענוג פון עולם הבא איז צו דאנקען דעם אייבערשטן און אים לויבן, וויסן אז אלעס איז ער און ער איז אלעס, "שֶׁעַל יְדֵי זֶה סְמוּכִים וּקְרוֹבִים אֵלָיו יִתְבָּרַךְ", ווי מער מען דאנקט דעם אייבערשטן איז מען נענטער צו אים, "כִּי כָּל מַה שֶּׁיּוֹדְעִין וּמַכִּירִין אוֹתוֹ יִתְבָּרַךְ בְּיוֹתֵר", ווייל ווי מער מען ווייסט אז אלעס איז בלויז דער אייבערשטער אליין - "סְמוּכִים אֵלָיו בְּיוֹתֵר", איז מען נענטער צו אים.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

מרת ... תחי', מנהלת בית פיגא, קרית ברסלב

איך האב ערהאלטן אייער בריוו.

יעצט אין די ספירה טעג שטעלט מען אפ דאס טאנצן מיט די קינדער, אזוי ווי עס ווערט גע'פסק'נט אין הלכה אז אין די טעג טאנצט מען נישט (מגן אברהם סימן תצג, סעיף קטן ג); נישט מיט קיין עכטע מוזיק און נישט מיט קיין געמאכטע מוזיק.

יעצט אין די טעג פון ספירה דארף מען באזונדער רעדן צו די קינדער פון גוטע מידות; די ארבעט פון א מנהלת איז - דערמאנען שטענדיג די לערערינס זאלן זיך אומקוקן אויב מען טשעפעט א קינד, און נאכקוקן אויב מען בא'עולה'ט א קינד, און אכטונג געבן מען זאל קיינעם נישט טשעפען.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

לכבוד ... נרו יאיר, מנהל מוסדות היכל הקודש קרית ברסלב ליבערטי

איך האב ערהאלטן דיין בריוו.

וואס ווערסטו דערשראקן אז דער מענעדזשער רופט אינדערפרי אין שטוב די באס דרייווער'ס ווייב זי זאל אויפוועקן איר מאן דעם באס דרייווער? וואס דען זאל דער מענעדזשער טון אז דער באס דרייווער שלאפט און הייבט נישט אויף דעם טעלעפאן? זאל מען לאזן די גאנצע שטעטל שטיין מיט די קינדער און ווארטן און נישט גיין אין חדר?! זייער גוט האט ער געטון.

פון היינט און ווייטער נעם נאר אינגעלייט וואס דאווענען די ערשטע מנין, זיבן אזייגער - פאר די מוסד צו ארבעטן, די וואס דאווענען שפעט די זענען נישט געמאכט צו ארבעטן אין חדר. וואס דארפסטו זיך עסן דאס געזונט יעדן אינדערפרי? וואס דארפסטו זיין דער וועקער פון די מלמדים און דרייווערס? קוק זיך אום אינדערפרי ווער עס שטייט אויף צייטליך און דאווענט די ערשטע מנין, זיבענע, אדער די צווייטע מנין - און נאר די זאלן ארבעטן אין די מוסד.

שטיי אויף אפאר מינוט פריער און גיי התבודדות צווישן די גראז, זיי זיך מתוודה, דערצייל אלעס פארן אייבערשטן - וועסטו זוכה זיין צו גוטע מלמדים. אזוי ווי דער רבי זאגט (ספר המדות אות דרך חלק ב', סימן א): "עַל יְדֵי וִוידוּי דְבָרִים גוֹרְמִים שֶׁהַקָדוֹשׁ בָּרוּךְ הוּא מַזְמִין מְלַמְדֵי תִּינוֹקוֹת שֶׁלוֹמְדִים בֶּאֱמוּנָה".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד ... נרו יאיר, קרית ברסלב

האסט מיר געבעטן איך זאל דיר שרייבן און זיך נישט צוריק האלטן פון זאגן, דו זאגסט דו ווילסט הערן וואס בעסער צו מאכן וכו', וועל איך דיר שרייבן.

זאלסט זיך שטארקן מיט אלע כוחות עס זאל זיין שלום ביי ענק אין שטיבל; אז דו האסט זאכן וואס שטערן דיך פון דעם און פון יענעם וכו' וכו' - זאלסטו דאס דערציילן נאר פארן אייבערשטן ביי התבודדות, אבער אין שול זאלסטו נישט מאכן קיין שום עסק דערפון; אפגעזען אויב מען דאווענט שפעט אדער פרי, שנעל אדער שטייט, דאס איז נישט דיין זאך, דיין זאך איז קומען אין שטיבל מיט א שמייכל, אויפזוכן אין יעדן איינעם דאס גוטס.

מוהרא"ש זאגט, ביי יעדע שטיבל היכל הקודש איז דא אינדרויסן קליפות ומזיקין וואס האלטן צוריק מענטשן פון קומען דאווענען; דאס איז נישט נאר פאר פרישע מקורבים, דאס איז ביי יעדן איינעם, מען קען זיין יארן אין היכל הקודש און פלוצלונג ווערט מען פארכאפט ביי די קליפה פון מחלוקת, מען ווערט פארנומען מיט דעם און מיט יענעם, מען פארגעסט פארוואס מען איז בכלל געקומען קיין ברסלב, פארוואס מען איז געקומען צום רבי'ן.

אויב דו וועסט זיך שטארקן, דו וועסט נישט מאכן קיין עסק פון קיין שום זאך, דו וועסט נאר שמייכלען - וועלן ענק האבן הצלחה מיט די קינדער, און אויב מען וועט זיך בייסן - איז א גרויס רחמנות אויף ענקערע קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

וואס דו הערסט פון מיר ביי די שיעורים, און וואס דו ליינסט אין די בריוו - דאס קענסטו אננעמען, און וואס אנדערע זאגן דיר נאך אין מיין נאמען - אויף דעם נעם איך נישט אחריות.

זיי זיך נישט מבלבל פון די זאכן, נעם די התחזקות פון הייליגן רבי'ן, נעם די חיזוק צו לערנען די הייליגע תורה אויפן סדר דרך הלימוד פון רבי'ן (המבואר בשיחות הר"ן, סימן עו), נעם די חיזוק אויף התבודדות ותפילה, נעם חיזוק אויף זיך דערהאלטן אפילו עס גייט אריבער וואס גייט אריבער; צו בלייבן שטארק מיט אמונה פשוטה, גלייבן אינעם אייבערשטן אז אלעס איז לטובה; נאר דאס זאל דיך אינטערעסירן.

בנוגע זיך אריבערציען קיין פלארידע; זיי מברר אויב די נייע ישוב וועט זיין געבויט אויף תורה ויראת שמים, אויב עס וועט זיין דארט א רב מיט מוסדות התורה. דאס איז אויף וואס א איד דארף קוקן איידער ער גייט וואוינען אין א פלאץ, אויב ער וועט קענען דארט קונה זיין יראת שמים, אויב די סביבה איז ערליך.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד מיין טייערער זון ... נרו יאיר, קרית ברסלב

איך בעט דיר זייער מיין טייערער זון, שטארק זיך בלימוד התורה, קום אין כולל צייטליך און בעט דעם אייבערשטן זאלסט מצליח זיין צו פארשטיין דאס לערנען און ליב האבן צו לערנען.

אנהויב איז שווער, אנהויב שפירט מען נישט א שטארקע הנאה, אבער אז מען ברעכט דאס אדורך - איז מען זוכה צו שיינע זאכן.

מיין טייערער ..., זאג יעדן טאג דעם יום תהילים, זאג יעדן טאג אכצן פרקים משניות און זיי מקפיד צו דאווענען די דריי תפילות מיט מנין מיט א סידור, אן שמועסן ביים דאווענען.

איך בעט פאר דיר און פאר דיין משפחה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד ... נרו יאיר, קרית ברסלב

איך וויל דיר נאכאמאל מחזק זיין זאלסט צוריק אנהויבן מאכן מוזיק ווידיאו; האסט געמאכט ביז אהער אזעלכע שיינע קליפס, טויזנטער מענטשן שעפן פון דעם חיות, און אזויפיל מענטשן זענען מקורב געווארן צום הייליגן רבי'ן דורך דעם, אזויפיל קומען קיין אומאן בזכות דיר; זאלסטו זיך שטארקן און נישט אפלאזן די הייליגע עבודה.

דער הייליגער רבי דערציילט (ספורי מעשיות, מעשה ג): "מעשה, אמאל איז געווען א חכם, פאר זיין טויט האט ער גערופן זיינע קינדער און זיין משפחה, און האט זיי געלאזט צוואה אז זיי זאלן 'אנטרינקען ביימער'; איר מעגט עוסק זיין אין אנדערע פרנסות אויך, נאר דאס זאלט איר זען שטענדיג צו טון: 'אנטרינקען ביימער'"; מוהרא"ש זאגט (ספר נהרי אפרסמון) דאס מיינט מען זאל מקרב זיין מענטשן צום אייבערשטן, עס שטייט אין פסוק (דברים כ, יט): "כִּי הָאָדָם עֵץ הַשָּׂדֶה", א מענטש איז צוגעגליכן צו א בוים, און מען דארף זיי אנטרינקען מיט אמונה.

דו מעגסט עוסק זיין אין אנדערע פרנסה אויך, און דו זאלסט מצליח זיין אין דיין פרנסה, אבער בלייב אנטרינקען ביימער, זיי ממשיך מיט הפצה, ובזכות הפצה וועסטו האבן גרויס שפע.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

מיין ליבער טייערער ... נרו יאיר

איך הער יעצט די גוטע נייעס אז דו ביסט זוכה אין די נאנטע טעג צו מסיים זיין גאנץ תלמוד בבלי; איך בין דיך אזוי מקנא, איך האב נישט זוכה געווען ביי די דרייצן יאר צו מאכן א סיום הש"ס. איך געדענק מיין בר מצוה, איך געדענק ווי מיין הארץ האט געפלאקערט צו לערנען און ענדיגן כאטשיג איין מסכתא, און וויפיל איך האב פרובירט איז עס מיר נישט געגאנגען. וויפיל חלישות הדעת איך האב געהאט, וויפיל מסכתות איך האב אנגעפאנגען, און נאך אפאר בלאט האב איך דאס אפגעלאזט פון גרויס יאוש...

ביז איך בין געוואויר געווארן פון הייליגן רבינ'ס סדר דרך הלימוד (שיחות הר"ן, סימן עו), אז מען קען לערנען אפילו מען פארגעסט, און אפילו מען פארשטייט נישט. דער רבי זאגט (שם, סימן כו): "וְדַע שֶׁלֶּעָתִיד מַזְכִּירִין אֶת הָאָדָם כָּל מַה שֶּׁלָּמַד, אַף אִם שָׁכַח", אויף יענע וועלט דערמאנט מען די נשמה אלעס וואס זי האט געלערנט און פארגעסן, "גַּם בְּנֵי אָדָם הַשּׁוֹמְעִים הַתּוֹרָה שֶׁל הַצַּדִּיק הָאֱמֶת וְאֵינָם מְבִינִים אוֹתָהּ", אזוי אויך, אויב מען האט נישט פארשטאנען וואס מען לערנט, "לֶעָתִיד, בָּעוֹלָם הַבָּא, יָבִינוּ", וועט מען אויף יענע וועלט זוכה זיין דאס צו פארשטיין, "כִּי עִקַּר הַתּוֹרָה הִיא לְהַנְּשָׁמוֹת", ווייל דער עיקר וואס מען לערנט תורה - איז פאר די נשמה, "שֶׁבָּעוֹלָם הַבָּא יִהְיוּ הַנְּשָׁמוֹת בְּקִיאִים וּמַשִּׂיגִים הֵיטֵב אֶת הַתּוֹרָה שֶׁלָּמַד וְשָׁמַע הָאָדָם בָּעוֹלָם הַזֶּה", אז אויף יענע וועלט זאלן די נשמות פארשטיין די תורה וואס זיי האבן געלערנט אויף די וועלט.

איך בעט דיר זייער מיין ליבער ..., שטארק זיך, האסט פארלוירן דיין מאמע, זי איז נפטר געווארן אזוי פלוצלונג, יונגערהייט, איבערגעלאזט א שטוב מיט יתומים, אבער דעם אייבערשטן האסטו, דער אייבערשטער האט דיך נישט איבערגעלאזט, דער אייבערשטער איז מיט דיר. אויך דיין מאמע'ס נשמה גייט ארויף העכער און העכער אין גן עדן - מיט יעדע ווארט תורה וואס דו לערנסט, און מיט יעדע ווארט וואס דו ביסט זיך מתבודד צום אייבערשטן.

שטארק זיך, און שטארק דיינע געשוויסטער, וחזקת והיית לאיש, ווי אזוי? דורך תורה און תפילה; ווער עס טוט די צוויי זאכן, ער לערנט יעדן טאג תורה און גייט התבודדות - דער פאלט נישט אראפ, אזא איינער, וואס עס זאל נאר אריבערגיין אויף אים - בלייבט ער שטארק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

מרת ... תחי'

איך האב ערהאלטן אייער בריוו.

לכבוד אייער געבורטסטאג זאלט איר זיך פארנעמען אפצוגיסן נעגל וואסער אינדערפרי ביים בעט, און נישט אראפגיין פון בעט אן נעגל וואסער.

נעגל וואסער ברענגט קדושה אין שטוב. מוהרא"ש דערציילט, אמאל איז א פרוי געקומען צום גרויסן גאון דער סטייפלער זכותו יגן עלינו, זי האט געוויינט אז אירע קינדער פאלן אוועק פון אידישקייט, און ממש יעצט האט איר זון זיך אפגעשניטן זיינע פיאות רחמנא לצלן, האט דער סטייפלער גאון איר געפרעגט: "איר גיסט זיך אפ נעגל וואסער אינדערפרי?" די פרוי איז רויט געווארן פאר בושה און מודה געווען אז זי גיסט זיך נישט אפ קיין נעגל וואסער, האט דער סטייפלער גאון איר געזאגט: "וואס ווילט איר פון מיר? אז מען גיסט נישט אפ נעגל וואסער בלייבט די טומאה אויף די הענט; וואס מען כאפט אן ווערט טמא, ממילא איז די גאנצע שטוב פול מיט א רוח טומאה רחמנא לצלן, וואס קען איך אייך טון אז איר אליין האט גורם געווען די צרות?" זעט מען וואס פאסירט ווען מען גיסט זיך נישט אפ קיין נעגל וואסער.

איר האט חתונה געהאט און נאך אביסל זענט איר א מאמע, דארפט איר זייער מקפיד זיין אויף די זאך, נישט גיין שלאפן אן זיך אנגרייטן נעגל וואסער און נישט אראפגיין פון בעט אן זיך אפגיסן נעגל וואסער.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

מרת ... תחי', קרית ברסלב

איך האב ערהאלטן אייער בריוו.

אז אייער שוועגערין וויל אייך נישט שיקן א בילד פון א קלייד וואס זי האט איינגעקויפט, און פאר די אנדערע שוועגערין שיקט זי יא - דאס איז נישט קיין צרה, אויף דעם וויינט מען נישט; וואלט איר געוויסט וויפיל צרות עס איז דא ביי אידישע קינדער, וויפיל ווארטן אויף קינדער, וויפיל דארפן א רפואה, וויפיל דארפן שלום בית וכו' וכו' – וואלט איר געדאנקט און געלויבט דעם אייבערשטן אז איר זענט געזונט, אייער מאן איז געזונט, אייערע קינדער זענען געזונט, ענק האבן א גוטע שלום בית, ענק פירן זיך ערליך, ענק זענען מקורב צום צדיק; עס וואלט אייך נישט אינטערעסירט די אלע זאכן.

איך מוז אייך זאגן, ווען אייער מאן האט מיר געברענגט דעם בריוו נאס, דורכגעווייקט מיט טרערן - האב איך זיך דערשראקן, איך האב געטראכט 'עפעס גאר ביטער שטייט אינעם בריוו, אז עס איז געשריבן מיט אזויפיל טרערן'; נאכן עס ליינען און זען אז אלעס איז פיין, ענק אלע זענען געזונט, און די פראבלעם איז 'די שוועגערינס ארויף, די שוועגערינס אראפ, מען האט מיך יא גערופן, מען האט מיך נישט גערופן, מען דארף מיך יא, מען דארף מיך נישט' - האב איך זיך בארואיגט.

אז די שוועגערינס נעמען זיך צאם און מען האט אייך נישט גערופן - דאס איז נישט קיין צרה, אויף דעם וויינט מען נישט, אויף דעם איז גוט צו נעמען די כלל וואס מוהרא"ש לערנט אונז: "ווילסט מיך נישט? וויל איך דיך טויזנט מאל נישט"; כל זמן אייער מאן וויל אייך, אייער מאן לעבט מיט אייך און ער האט יראת שמים - זענט איר די גליקליכסטע פרוי וואס איז דא.

לאכט אייך גוט אויס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד ... נרו יאיר, קרית ברסלב

ווען דו גייסט מיט דיין זון שפאצירן און א גוי גריסט, ער שמייכלט צו דיין זון - זאלסטו אים אויסלערנען צוריק צו גריסן, אבער נאכדעם זאלסטו אים זאגן 'ווי גליקליך זענען מיר אז מיר זענען נישט קיין גוים'.

אזוי אויך ווען דו גייסט אין גראסערי און דער גוי שמייכלט צו דיינע קינדער, זאלסטו אויסלערנען דיינע קינדער צוריק צו גריסן, אבער גלייך נאכדעם זאג הויך: "שכוח אייבערשטער מיר זענען אידן, שכוח אייבערשטער מיר זענען נישט קיין גוים", און זיי אויסלערנען נישט צו קוקן אויף גוים און נישט האבן מיט גוים.

זיי זיך מחי' מיט דעם אז מיר זענען אידן, מיר זענען נישט געבוירן קיין גוים. מוהרא"ש זאגט, ווען מען איז זיך מחי' מיט 'שלא עשני גוי' קען מען נישט אראפפאלן, "כי בכל דבר יכולים הס"מ והקליפות להתאחז בו", ווייל אין יעדע זאך קענען די קליפות זיך אריינמישן און מחליש דעת זיין, "אבל בשמחה זו שלא עשני גוי", אבער ביי די שמחה ווען מען פרייט זיך אז מען איז נישט קיין גוי, "בזה אין להן שום שליטה", ביי דעם האבן זיי נישט קיין שליטה, ווייל דאס איז א פאקט, 'א גוי בין איך נישט, קענסט זאגן אויף מיר אז איך פיר זיך נישט אויף געהעריג, א איד פירט זיך נישט אזוי, פיין און וואויל, אבער א גוי בין איך נישט', "והשמחה הזו עולה על כל השמחות", און ווער עס פרייט זיך מיט דעם - דאס איז די גרעסטע פרייד, (עיין סידור עת רצון תפילת השחר, אות ב).

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד מיין טייערער ... נרו יאיר

איך בין אוועק געפארן אויף פסח, איך בין געווען אין שטעטל קרית ברסלב, איך בין נישט אנגעקומען צו זען דיין בריוו ביז יעצט.

איך האב צער פון וואס דו ביסט אריבער, איך האף צום אייבערשטן דו וועסט זיך שנעל ערהוילן און צוריק קומען צו דיינע כוחות.

איך דערמאן זיך א מעשה וואס מוהרא"ש האט דערציילט, די זעלבע מעשה וואס האט דיר פאסירט אחרון של פסח האט פאסירט ביים הייליגן רבי נתן, עס איז אים אריין א ביין אין האלז, ער האט זיך דערשטיקט, שפעטער האט ער געזאגט: "ווען די ביין איז מיר געווען אין האלז האב איך נישט געקענט רעדן צום אייבערשטן, האב איך געקוקט צום אייבערשטן"; דאס לערנט אונז אז אין יעדע מצב דארף מען זיך ציען צום אייבערשטן, און אז מען קען נישט רעדן, מען איז דערשטיקט - זאל מען קוקן צום אייבערשטן, זיך ציען צו אים.

דאנק און לויב דעם אייבערשטן אז דו לעבסט און אז דו האלסט דא, אמת עס איז דיר צעשטערט געווארן דעם לעצטן טאג יום טוב, און ווי שטארק מען האט זיך געמוטשעט אין שפיטאל ביז מען האט ארויסגענומען דעם ביין, אבער דער רבי לערנט אונז צו קוקן אויף די חסדים, צו טראכטן 'עס וואלט געקענט זיין אסאך ערגער, און חסדי השם יתברך פאר די גרויסע ניסים'.

לכבוד די נס אז דו לעבסט זאלסטו זיך פארנעמען צו דאנקען יעדן טאג דעם אייבערשטן, זאגן "שכוח אייבערשטער" פאר די חסדים און ניסים וואס ער טוט מיט דיר שטענדיג.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד ... נרו יאיר, קרית ברסלב

איך בענק זיך צו דיר, איך ווארט צו הערן פון דיר.

שטארק זיך מיט די איין זאך, מיט קומען אין שול דאווענען די דריי תפילות שחרית מנחה מעריב, ווייל דאס האלט דעם איד אין מחנה ישראל, דאס איז דער יסוד היסודות פון א איד, ווער עס דאווענט די דריי תפילות יעדן טאג - דער איז שטארק מיט די אמונה. דער רבי זאגט (לקוטי מוהר"ן חלק ב', סימן ח) אויף די ווערטער פון די הייליגע חכמים (ברכות נד.) עוג מלך הבשן האט געזאגט: "מַחֲנֵה יִשְׂרָאֵל כַּמָה הַוֵי, תְּלָתָא פַּרְסֵי", תלתא פרסי איז די דריי תפילות, דאס האלט א איד ביי קדושת ישראל, און חס ושלום אויב מען איז מזלזל אין די דריי תפילות - איז זייער ביטער, מען קען אינגאנצן אוועק פאלן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

מרת ... תחי', מנהלת בית פיגא, קרית ברסלב

איך האב נישט קיין ווערטער אייך צו באדאנקען אויף וואס איר טוט פאר אונזערע קינדער און פאר די סקול בית פיגא, און באזונדער דאנק איך אייך פארן באגלייטן די ווייבלעך, די תלמידות בית פיגא - נאך די חתונה, זיי צאמצונעמען, זיי געבן שיעורים, יעדע כיתה באזונדער, און זיך אפגעבן מיט זיי; די מצוה איז גאר גרויס, די מצוה וועט אייך באגלייטן בזה ובבא פאר אייך און פאר אייערע דורות.

האט נישט מורא צו רעדן צו די ווייבלעך קעגן האבן א טעלעפאן; רעדט פון דעם, זייט מחזק די תלמידות איבער דאס שעדליכקייט פון האבן א טעלעפאן, רעדט צו זיי ווי גליקליך מען איז אז מען פאלגט אלעס וואס די צדיקים זאגן, ווי גליקליך מען איז אז מען גייט נאך א צדיק.

אויך דארף מען רעדן אין סקול אין בית פיגא צו די עלטערע מיידלעך וואס גייען שוין באלד חתונה האבן פון נישט האבן א טעלעפאן וואס שטערט דאס לעבן, און פון זיין פעלזן פעסט קעגן די נסיונות הדור, ווייל די טעלעפאן איז סם המוות פאר ערליכע דורות, עס איז אדער אדער; אדער א טעלעפאן אדער ערליכע דורות.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד ... נרו יאיר, קרית ברסלב

געב ווייניגער צדקה, געב ענדערש ארויס ארבעט פאר אנשי שלומינו וואס זענען אנגעוויזן אויף דעם, אפילו זיי קומען אריין אביסל טייערער, ווייל די גרעסטע צדקה איז געבן ארבעט פאר ארעמעלייט. דער רמב"ם רעכנט אויס אלע סארט וועגן פון צדקה, זאגט דער רמב"ם (פרק י' מהלכות מתנות עניים, הלכה ז): "מַעֲלָה גְּדוֹלָה שֶׁאֵין לְמַעְלָה מִמֶּנָּה", די העכסטע צדקה וואס איז פארהאן, וואס איז נישט פארהאן גרעסער'ס פון דעם – "זֶה הַמַּחֲזִיק בְּיַד יִשְׂרָאֵל שֶׁמָּךְ", ווער עס העלפט אן ארעמאן, "מַמְצִיא לוֹ מְלָאכָה כְּדֵי לְחַזֵּק אֶת יָדוֹ", ער ברענגט אים ארבעט, "עַד שֶׁלֹּא יִצְטָרֵךְ לַבְּרִיּוֹת לִשְׁאֹל", ער זאל נישט דארפן צוקומען צו בעטן צדקה, "וְעַל זֶה נֶאֱמַר (ויקרא כה-לה) 'וְהֶחֱזַקְתָּ בּוֹ גֵּר וְתוֹשָׁב וָחַי עִמָּךְ', כְּלוֹמַר, הַחֲזֵק בּוֹ עַד שֶׁלֹּא יִפֹּל וְיִצְטָרֵךְ", העלף אים ער זאל נישט דארפן צוקומען צו צדקה.

ווען דו געבסט ארויס ארבעט און דו האסט א איד א נצרך וואס קומט אריין טייערער פונעם גוי - זאלסטו נישט זוכן צו נעמען דעם גוי וואס קומט אריין ביליגער, געב ארויס די ארבעט פארן איד; דאס איז די גרעסטע צדקה, וועסט האבן א גרעסערע זכות, דאס וועט דיר ברענגען גרויס עשירות בזה ובבא.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד ... נרו יאיר

האסט מיר געבעטן חיזוק צו זיין אין ישיבה מיט די בחורים, דו זאגסט די בחורים הערן נישט וואס מען זאגט זיי מיט איין מאל, מען דארף זיי זאגן אפאר מאל.

מאכסט מיך לאכן; וואס מיינסטו, מיט איין מאל רעדן קען מען יענעם טוישן לטובה? עס גייט נישט אזוי, מען דארף רעדן און רעדן און רעדן ביז מען זעט פירות, מען דארף אסאך סבלנות צו זיין מיט תלמידים, מען דארף שטארקע נערוון און אייזערנע געדולד צו זיי, אבער דאס דארף מען וויסן, אז ביים סוף פועל'ט מען; אז מען רעדט אמת'ע רייד, מען רעדט צו תלמידים פון יראת שמים, ביים סוף פועל'ט מען.

שטארק זיך מיט דיין הייליגע ארבעט, און אז דו האסט מער נישט קיין כח, דו ווילסט אויפהייבן די הענט און אויפגעבן - זאלסטו אויפהייבן דיינע הענט צום אייבערשטן און בעטן דו זאלסט מצליח זיין מיט די תלמידים, זאלסט האבן חן, מיט די ריכטיגע ווערטער.

גיי יעדן טאג הפצה און לייג אריין אין די תלמידים זיי זאלן אויך גיין הפצה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת קדושים, ב' דר"ח אייר, ט"ז לעומר, שנת תשפ"ד לפרט קטן

לכבוד ... נרו יאיר

עס איז מיט גרויס חסדים; קוק גוט וועסטו זען אז דער אייבערשטער איז זייער גוט צו דיר, אפילו מיט אלעס וואס דו גייסט אריבער - איז דא ניסים גלויים.

טראכט אריין וואס קומט דיר, לויט דיינע מעשים וכו'; דער רבי זאגט (לקוטי מוהר"ן חלק א', סימן קסה): "תְּקַבֵּל בְּאַהֲבָה כָּל הָרָעוֹת וְהַיִּסּוּרִין הַבָּאִים עָלֶיךָ", מען דארף אננעמען אלע שלעכטס און יסורים, "כִּי רָאוּי שֶׁתֵּדַע, שֶׁלְּפִי מַעֲשֶׂיךָ אַחַר כָּל הַיִּסּוּרִים וְהָרָעוֹת שֶׁיֵּשׁ לְךָ, עֲדַיִן הוּא מִתְנַהֵג עִמְּךָ בְּרַחֲמִים, כִּי הָיָה מַגִּיעַ לְךָ יוֹתֵר וְיוֹתֵר, חַס וְשָׁלוֹם, לְפִי מַעֲשֶׂיךָ", ווייל לויט דיינע מעשים פירט זיך דער אייבערשטער צו דיר מיט גרויס רחמנות, עס וואלט דיר געקומען אסאך מער שלעכטס חס ושלום, דער רבי טייטשט מיט דעם די פסוק (ויקרא יט, יח): "וְאָהַבְתָּ לְרֵעֲךָ", זאלסט ליב האבן די שלעכטס, "כָּמוֹךָ"; ווייל אזוי ווי דו ביסט - "אֲנִי ה'", פיר איך זיך מיט גרויס חסדים.

היינט נאכט וועט זיין די שיעור אין לעיקוואד, ביי אונז אין בית המדרש, איך וויל אויפלעבן די חבורה דארט. מען וועט דאס קענען מיטהאלטן אין אלע שולן; איך וויל זייער זאלסט קומען צום שיעור זיך מחדש זיין, זיך אויפפרישן מיט אמונה, תפילה, סדר דרך הלימוד וכו'.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת קדושים, כ"ט ניסן, י"ד לעומר, שנת תשפ"ד לפרט קטן

לכבוד ... נרו יאיר

די ישיבה האט זיך צוריק אנגעהויבן מיט א פרישקייט, און איך דאנק דעם אייבערשטן אז ער געבט מיר די זכיה צו זיצן נאך א זמן מיט בחורים, לערנען מיט זיי תורה און לערנען מיט זיי די חיזוק פון הייליגן רבי'ן, און איך בעט דעם אייבערשטן ער זאל מיר געבן כח ממשיך צו זיין מיט דעם מיין גאנץ לעבן.

זיי עוסק אין הפצה, מיט דעם וועסטו פאררעכטן אלע פגמים. דער הייליגער רבי זאגט (ספר המידות אות ניאוף, סימן מא): "תִּקּוּן לְהוֹצָאַת זֶרַע לְבַטָּלָה, שֶׁיִּשְׁתַּדֵּל לְהַחֲזִיר בְּנֵי אָדָם בִּתְשׁוּבָה", ווער עס וויל פאררעכטן זיינע עבירות זאל צוריק ברענגען מענטשן צום אייבערשטן; זאלסטו יעדן טאג עוסק זיין אין די הייליגע עבודה פון הפצה, ווייל עס איז נישט דא קיין גרעסערע זאך ביים אייבערשטן ווי הפצה.

דער הייליגער זוהר זאגט (תרומה קכח:) "תָּא חֲזִי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע: א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; "גָּרִים לְאַכְפְּיָיא סִטְרָא אַחֲרָא, וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ, וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", דער מענטש נעמט אוועק טומאה פון די וועלט און ער מאכט אז דעם אייבערשטנ'ס נאמען זאל ווערן געהייליגט אויף דער וועלט, דער מענטש איז גורם אז אלע וועלטן שטייען אויף זיין זכות. "וְזָכֵי לְמֵחֲמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", ער איז זוכה צו אלע גוטע זאכן אויף די וועלט און אויף יענע וועלט, "כָּל מָארֵי דִּינִין, לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכטס טון - נישט אויף די וועלט און נישט אויף יענע וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים, און קיינער קען אים נישט צוריק האלטן.

מתן שכרה בצדה, די וואס זענען עוסק אין הפצה האבן גרויס שפע.

וועגן ל"ג בעומר ווייס איך נאכנישט וואס איך טו, ווייל זיי זאגן אז זיי גייען פארשפארן מירון, איך בעט דעם אייבערשטן איך זאל וויסן וואס צו טון.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד ... נרו יאיר

דעם שבת בין איך געווען אין קרית ברסלב ליבערטי; וואס זאל איך דיר זאגן, א שבת מיט אנשי שלומינו האט אלע טעמים, מיר האבן זיך זייער מחזק געווען מיט די עצות פון הייליגן רבי'ן. עס איז דא אסאך צו שרייבן פון איין שבת, פון די תורות, חיזוקים וואס מען איז זיך מחי'.

ביי שלש סעודות האבן מיר זיך זייער מחזק געווען מיט די ווערטער פון רבי'ן (שיחות הר"ן, סימן רצה), חכמינו זכרונם לברכה זאגן (כריתות ו:): "כָּל תְּפִלָּה שֶׁאֵין בָּהּ מִתְּפִלַּת פּוֹשְׁעֵי יִשְׂרָאֵל אֵינָהּ תְּפִלָּה", און אז מען טראכט 'ווער בין איך? וואס בין איך דען? מיינע תפילות זענען נישט חשוב', דארף מען וויסן אז דיקא דורך דיר גייען ארויף אלע תפילות. און מען זאל טראכטן "הֲלֹא אִם אֲנִי רָחוֹק בְּעֵינַי מֵהַשֵּׁם יִתְבָּרַךְ כָּל כָּךְ מֵחֲמַת רִבּוּי עֲווֹנוֹתַי", אויב בין איך אזוי ווייט פונעם אייבערשטן צוליב מיינע עבירות, "אִם כֵּן אַדְּרַבָּא עִקַּר שְׁלֵמוּת הַתְּפִלָּה עַל יָדִי דַּיְקָא", קומט אויס אז נאר דורך מיר וועלן אלע תפילות ארויפגיין צום אייבערשטן, "כִּי הֲלֹא אָמְרוּ רַבּוֹתֵינוּ ז"ל (כְּרִיתוֹת ו:) 'כָּל תְּפִלָּה שֶׁאֵין בָּהּ מִתְּפִלַּת פּוֹשְׁעֵי יִשְׂרָאֵל אֵינָהּ תְּפִלָּה'", נאר דורך תפילות פון בעלי תשובה גייען ארויף די תפילות אויבן אין הימל, "וְיַלְפִינָן מִקְּטֹרֶת שֶׁהָיָה בָּהֶם חֶלְבְּנָה", מען לערנט דאס ארויס פון די קטורת. "וְאִם כֵּן, אִם אֲנִי בְּעֵינַי כְּפוֹשֵׁעַ יִשְׂרָאֵל חַס וְשָׁלוֹם", אויב אזוי, אז איך בין אזוי ווייט – "אִם כֵּן אַדְּרַבָּא, כָּל שְׁלֵמוּת הַתְּפִלָּה עַל יָדִי דַּיְקָא וְכַנִּזְכָּר לְעֵיל", איז דורך מיר וועט ווערן אנגענומען די תפילות; דאס דארף מיך מאכן דאווענען שטערקער און בעסער, עיין שם.

חזק ואמץ, לאז זיך נישט צעברעכן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ב' פרשת קדושים, כ"ט ניסן, י"ד לעומר, שנת תשפ"ד לפרט קטן

מרת ... תחי'

איך האב ערהאלטן אייער בריוו.

ווערט נישט פארלוירן און דערשראקן, דער אייבערשטער וועט העלפן, זי וועט וואקסן געזונט און שטארק.

אז אייער טאכטער פרעגט אייך: "וואס דארף מען מיך באקוקן? וכו'" זאלט איר זאגן: "דער דאקטער קוקט אויב דו ביסט געזונט, דארפסט נישט מורא האבן, עס איז נאר פאר געזונט", און חזר'ט נאכאמאל אז קיינער קען נישט קוקן אויפן קערפער אונטער די קליידער, נאר אויב טאטע מאמע נעמען צום דאקטער וכו'.

ווערט נישט פארלוירן, זייט רואיג ביי אייך אין מח - וועט זי אויך זיין רואיג, ווייל ווען די עלטערן זענען נישט רואיג שפירן דאס די קינדער און דאס מאכט זיי אומרואיג.

ווען איר צינד די שבת ליכט זאלט איר מאכן א באזונדערע תפילה פאר איר, זי זאל וואקסן געזונט און שטארק.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת אחרי-ב', כ"ד ניסן, ט' לעומר, שנת תשפ"ד לפרט קטן

מרת ... תחי', קרית ברסלב

זאגט די תפילה יעדן טאג:

"הייליגער באשעפער איך דאנק דיך פאר מיין שיינע לעבן, פאר מיין מאן און מיינע ליכטיגע געזונטע קינדער, דו געבסט מיר אזויפיל גוטס, וויפיל איך וועל דיך דאנקען וועל איך נישט אנקומען צו האבן אנגעהויבן צו דאנקען, ביסט אזוי גוט צו מיר.

אנא השם, איך בעט דיר אייבערשטער העלף מיר מיין שטוב זאל זיין א שטוב וואס לעבט מיטן צדיק, א שטוב וואס מען אטעמט די ווערטער פון צדיקים, א שטוב פון אמונה, א שטוב פון תורה ויראת שמים. הייליגער באשעפער דאס איז דאך מיין גאנצע שטרעבן, צו לעבן מיט דיר, טראכטן פון דיר, איך, מיין מאן און מיינע קינדער זאלן לעבן מיט דיר.

אייבערשטער העלף מיר איך זאל זיין א פרייליכע ווייב צו מיין מאן און א פרייליכע מאמע פאר מיינע קינדער, איך זאל זיי פרייליך מאכן, און געב מיר כח צו קענען טון די שטוב ארבעט מיט שמחה, איך זאל קענען מגדל זיין מיינע קינדער און זען נחת פון מיינע דורות".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת אחרי-ב', כ"ד ניסן, ט' לעומר, שנת תשפ"ד לפרט קטן

לכבוד ... נרו יאיר, קרית ברסלב

איך וויל דיר נאכאמאל בעטן זאלסט האבן קשר מיט אנשי שלומינו, באגריס יעדן איינעם און רעד צו אלעמען, בעיקר מיט די שטילערע וואס רעדן נישט מיט קיינעם, זיי דארף מען באגריסן און מקרב זיין.

ודעת לנבון מען דארף האבן שכל ווי אזוי צו רעדן און וואס צו זאגן, נישט צו גיין אויף די נערווען, יענעם דענערווירן, ווייל נישט אלע ווייסן ווי אזוי צו מקרב זיין און מחזק זיין, מען דארף שמועסן סתם זאכן, יענער זאל שפירן אז ער האט מיט וועם צו רעדן, און נישט אנהויבן זאגן: "ביסט אזוי חשוב, ביסט אזוי גוט".

איך געדענק נאך גוט, ווען איך בין אנגעקומען אין היכל הקודש זענען געווען פון אנשי שלומינו וואס האבן מיך געוואלט מקרב זיין, אבער זיי האבן נישט געוואוסט ווי אזוי, און עס האט געפעלט א האר איך זאל אוועקגיין פון היכל הקודש צוליב זיי, זיי האבן מיך געגלעט און געזאגט ווי גוט איך בין און ווי חשוב איך בין, דאס האט אזוי נערוועז געמאכט.

איך האף דו וועסט מיר העלפן מיט דעם.

דער אייבערשטער זאל העלפן זאלסט האבן הצלחה אין אלע ענינים.