בעזרת ה' יתברך - יום ה' פרשת ויחי, י"ב טבת, שנת תשפ"ו לפרט קטן
מיין ליבער ... נרו יאיר, תלמיד ישיבת היכל הקודש ירושלים
יעצט ווען איך בין דא אין ארץ ישראל זאגט מיר דיין מגיד שיעור ר' משה שמואל נרו יאיר אז דו ביסט אן אויסגעצייכנטע תלמיד, סיי מיט העלפן די ישיבה, סיי מיט האבן א געפיל פאר א צווייטן, און מיט דיין כיבוד אב ואם; איך בין זייער צופרידן דאס צו הערן.
שטארק זיך, גיין אן מיט דיין עבודת השם, מיטן העלפן אין ישיבה מיט וואס מען דארף, משמש זיין דעם רבי'ן איז א זאך וואס בלייבט לנצח.
בעזרת ה' יתברך - יום ד' פרשת ויחי, י"א טבת, שנת תשפ"ו לפרט קטן
... נרו יאיר וזוגתו תחי'.
איך בין יעצט אין ארץ ישראל, נעכטן בין איך געווען אין מירון, אויך אין טברי' ביי רבי מאיר בעל הנס, און אויך אין יבנאל ביי מוהרא"ש, איך האב ענק אינזין געהאט ענק זאלן שוין האבן א ישועה, איך האב געבעטן פאר ענק.
איך דאנק ענק פאר אלעס וואס ענק טוען פאר די מוסדות און פאר די קהילה, דער אייבערשטער זאל ענק העלפן ענק זאלן מצליח זיין אין אלע ענקערע ענינים.
בעזרת ה' יתברך - יום א' פרשת שמות, ט"ו טבת, שנת תשפ"ו לפרט קטן
... נרו יאיר
דיין ווייב האט מיר געשריבן ווען איך בין געווען אין ארץ ישראל אז דו האסט שרעקליכע יסורים, איך האב אסאך געבעטן פאר דיר, איך האב דערמאנט אלע גוטע זאכן וואס דו האסט געטון פאר אונזערע מוסדות און קהילה; איך ווארט צו הערן אז דו שפירסט זיך שוין גוט, די ווייטאג איז אוועק.
שטארק זיך, פארליר זיך נישט, דער אייבערשטער וועט מאכן ניסים, עס וועט דיר בעסער ווערן און ברייטער ווערן, נאר חס ושלום נישט פרעגן קיין קשיות אויף די אמונה, נאר בעטן ברחמים ובתחנונים.
לערן יעדן טאג ח"י פרקים משניות און זאג די "יום תהלים", דאס זאל זיין פאר אלע אנדערע שיעורים, ווייל משניות און תהלים איז פאר די נשמה.
בעזרת ה' יתברך - יום ד' פרשת ויגש, ד' טבת, שנת תשפ"ו לפרט קטן
לכבוד מיין טייערער ... נרו יאיר ויזרח
דראפע זיך און דערהאלט זיך!
דו האסט א טענה אז דער מנהל איז דיר נישט דן לכף זכות ווען אין די זעלבע צייט ביסטו אים נישט דן לכף זכות... דו ווייסט וואס ליגט אויף א מנהל? דו ווייסט אז יעדע רגע גייט אריבער אויף אים שטארקע דריק וכו' וכו'; אז דו וועסט אים דן זיין לכף זכות וועט ער דיר דן זיין לכף זכות.
שטארק זיך מיט אלע כוחות צו ווייטער העלפן דעם רבי'ן, בלייב משמש זיין דעם רבי'ן.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ג' פרשת ויגש, ג' טבת, שנת תשפ"ו לפרט קטן
אלימלך עגאמי נרו יאיר, ישיבת היכל הקודש, קרית ברסלב ליבערטי
יישר כח פארן העלפן דעם שמש אין שטעטל ר' ישראל פוקס נרו יאיר מיטן רייניגן די טישל וואו עס ליגט די קאווע און זיכער מאכן אז עס איז דא קאפס, קאווע, צוקער און מילך.
דאס איז אויך אין די מצוה פון הכנסת אורחים; א איד קומט אין שול הונגעריג, דארשטיג, און מען גרייט צו א גלעזל ווארעמע טרינקען, ווארעמע קאווע, ווארעמע טיי. מען וואלט ווען אויך געדארפט לייגן א מאשין מיט קאלטע סעלצער פאר די ווארעמע טעג, מחי' זיין ווער עס קומט נאר אריין אין שול.
אויך זאלסטו גריסן מיט דרך ארץ, גרוס דיין מגיד שיעור, גרוס דעם מנהל, גריס די חברים, די בחורים, און אויך אין שול זאלסטו גריסן. דאס איז זייער א שיינע מידה, אזוי ווי חכמינו זכרונם לברכה זאגן (אבות ד, טו): "הוי מקדים בשלום כל אדם", זאלסט יעדן איינעם באגריסן; נישט ווארטן יענער זאל אנהייבן, נאר דו זאלסט יענעם פעדערן און באגריסן. די משנה זאגט דארט ווייטער: "והוי זנב לאריות", זאלסט זיין א וויידל פארן לייב, "ואל תהי ראש לשועלים", און נישט זיין א קאפ פונעם פוקס. מוהרא"ש זאגט (ספר תורת אבות): די צווייטע חלק משנה איז אן עצה צו קענען מקיים זיין די ערשטע זאך פון שטעדניג באגריסן יעדן איינעם; דורכדעם וואס מען האט די נאטור פונעם לייב, א לייב האט די נאטור פון זיך נישט אויסדרייען, דעריבער איז דער לייב דער קעניג פון די חיות, נאר אזוי קען מען זיין א קעניג, אז מען קוקט נישט אויף אנדערע, מען דרייט זיך נישט אויס הערן וואס מען שמועסט אויף מיר, וואס מען רעדט הינטער מיר, מען קוקט נאר אויף פאראויס, מען טוט וואס מען האט צו טון, און א פוקס האט א פארקערטע נאטור, דער פוקס דרייט זיך אלץ אויס הערן וואס מען שמועסט, וואס מען רעדט; דאס זאגן די הייליגע חכמים, זאלסט יעדן איינעם שיין באגריסן א גוט מארגן, א גוטן טאג, וואס מאכסטו? וואס הערט זיך? ווי אזוי איז מען זוכה דאס צו טון? "והוי זנב לאריות", דורך זיין שטארק ווי דער לייב נישט צו קוקן אויף קיינעם, האבן זעלבסטזיכערקייט, "ואל תהי ראש לשועלים", און נישט זיין ווי דער נארישער פוקס וואס דרייט זיך אויס קוקן וואס דער זאגט און וואס יענער זאגט; וואויל איז דעם וואס באגריסט יעדן איינעם מיט א שמייכל.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ב' פרשת ויגש, ב' טבת, זאת חנוכה, שנת תשפ"ו לפרט קטן
מיין טייערער ... נרו יאיר, תלמיד ישיבת היכל הקודש ירושלים
איך האב ערהאלטן דיין בריוו.
א גרויסן יישר כח פארן העלפן אין חדר. דער מנהל נרו יאיר זאגט מיר, ווען ער בעט דיר זאלסט קומען העלפן אין חדר - זאגסטו קיינמאל נישט אפ, און ווען עס מאכט זיך אז א מלמד קען נישט אנקומען און מען דארף שנעל איינעם פאר א במקום, אז מען בעט דיר קומסטו צו לויפן און דו טוסט עס מיט הארץ, און אפילו עס איז דיר שווער - טוסטו דאס מיטן גאנצן הארץ.
ווען דו האסט א פראגע אין חינוך - זאלסטו דאס דורכרעדן מיטן מנהל, דער מנהל וועט דיר העלפן מיט דיינע פראגעס.
הייב אן דיין טאג מיט ח"י פרקים משניות, לאז עס נישט אויף סוף טאג, אנהייב טאג גייט עס געשמאק, מיט א זריזות, די משניות וועט דיך אויסלייטערן, אויסרייניגן פון אלע שלעכטס, עס וועט אריינבלאזן אין דיר א רוח טהרה, א הייליגע גייסט.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ד' פרשת מקץ, כ"ז כסליו, ג' דחנוכה, שנת תשפ"ו לפרט קטן
... תחי'
איך ווייס אז איר זענט פארווייטאגט, איר ווילט שוין אזוי שטארק האבן נאך קינדער, און דאס ווארטן און ווערן יעדע מאל אנטוישט ווארפט אייך אראפ אין א דערביטערטקייט.
וויל איך אייך בעטן איר זאלט אנהייבן דאנקען דעם אייבערשטן אויף וואס איר האט יא, דאנקט אים פאר אייער טייער קינד; דאס וועט ברענגען נאך ישועות. ווייל ווי מער מען דאנקט און מען לויבט דעם אייבערשטן – ציט מען צו זיך ישועות און רפואות און ניסים למעלה מדרך הטבע.
אויך זאלט איר העלפן אין "בית פיגא", יעצט ווען איר האט נאכנישט קיין קליינע קינדער האט איר צייט, זאלט איר קומען אין בית פיגא און העלפן מיט וואס איר קענט; העלפן בית פיגא איז מסוגל פאר קינדער.
בעזרת ה' יתברך - יום ד' פרשת מקץ, כ"ז כסליו, ג' דחנוכה, שנת תשפ"ו לפרט קטן
... נרו יאיר, קרית ברסלב ליבערטי
וואס איז די פלאן מיט די מצה בעקעריי אין שטעטל? איך וויל וויסן אויב דו פלאנסט צו עפענען די יאר די בעקעריי, איך וויל נישט בלייבן פסח אן מצות; לאז מיר וויסן דיינע פלענער.
שטארק זיך, בלייב משמש זיין דעם רבי'ן, אפילו עס איז שווער, באלד וועט אלעס ווערן גרינג און מיר וועלן זיך בענקען צו די צייטן וואס מען האט געארבעט שווער אן קיין הילף, אן קיין פרוטה וכו' וכו'.
הייב אן דיין טאג פארטאגס מיט מקוה, תיקון חצות, התבודדות, ח"י פרקים משניות, יום תהילים, תיקוני זוהר, ליקוטי מוהר"ן, שחרית, פת שחרית. העלף דעם רבי'ן און נאכדעם גיי הפצה, אויך זאלסטו העלפן דיין ווייב, און אז דו האסט נאך אביסל צייט זאלסטו אביסל טאנצן.
בעזרת ה' יתברך - ערב שבת קודש פרשת וישב, מברכין החודש, כ"ב כסליו, שנת תשפ"ו לפרט קטן
... נרו יאיר, תלמיד ישיבת היכל הקודש קרית ברסלב
איך הער פונעם משמש ר' ישראל פוקס נרו יאיר אז דו העלפסט רייניגן די מקוה און אויך וואשסטו די האנטוכער, איך וויל דיר זאגן א גרויסן יישר כח פארן העלפן דעם רבינ'ס שול, מען קען זוכה זיין צו זייער שיינע זאכן דורכן רייניגן דעם רבינ'ס שול. דאס ווייסטו אודאי אז מוהרא"ש פלעגט דאס טון אין די יונגע יארן, ער פלעגט קומען אין די ברסלב'ע שול אין בארא פארק און געוואשן די פלאר מיט די בית הכסא'ס און זיך מתבודד געווען בשעת מעשה, גערעדט און געזינגען צום אייבערשטן. מוהרא"ש דערציילט, ווען ער פלעגט רייניגן דעם בית המדרש האט ער געבעטן דעם אייבערשטן ער זאל קענען אריינברענגען דעם רבי'ן אין די וועלט.
הייב אן דיין טאג מיט אכצן פרקים משניות און א יום תהילים און זיבן בלאט גמרא, זאג די ווערטער פון די תורה, וועסטו אויסוואקסן א גרויסער צדיק.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום א' פרשת וישב, י"ז כסליו, שנת תשפ"ו לפרט קטן
... נרו יאיר, קרית ברסלב
סיי דו און סיי דיין ווייב פרעגן וואס ענק קענען נאך העלפן, ענק זענען פול מיט הכרת הטוב פאר אלעס וואס ענק האבן באקומען; זאג פאר דיין ווייב אז מיט דעם וואס זי העלפט אין "בית פיגא" – דאס איז פאר מיר זייער חשוב, און אויך דו קענסט מיר העלפן מיט מחזק זיין דיין ווייב זי זאל ווייטער העלפן "בית פיגא", און אז דו קענסט איר טראגן און ברענגען – איז דאס פאר מיר זייער חשוב, ווייל "בית פיגא" איז די חשוב'סטע זאך פון די קהילה; אוועק שטעלן די טעכטער מיט א שטארקע פרינציפ ליב צו האבן אידישקייט, ליב האבן די תורה און ליב האבן די מצוות פונעם אייבערשטן, אזוי ווי חכמינו זכרונם לברכה זאגן (מדרש תנחומא נשא, י): "וְיִשְׁמְרֶךָ בְּבָנוֹת", די טעכטער זאלן זיין אפגעהיטן, ווייל טעכטער דארפן מער שמירה ווי בנים-אינגלעך.
קומענדיגע וואך איז חנוכה, זאלסטו זיצן ביי די לעכט, זינג זמירות, און זינג - לויב און דאנק - צום אייבערשטן אז דו האסט אזא ליכטיגע משפחה, און בעט פאר דיר, פאר דיין ווייב און דיינע קינדער.
זיי ממשיך צו הערן שיעורים, אזוי וועסטו זיך אויפפרישן, רוף יעדן טאג קול ברסלב, קול הצדיק, קול אמונה – וועסטו הערן דרשות וואס ווערט געגעבן אין רבינ'ס ספרים, דו וועסט ווערן ווי ניי געבוירן, ווייל דער רבי זאגט: "ווער עס וועט זיך דערמאנען פון מיר, וועט ווערן כקטן שנולד".
בעזרת ה' יתברך - ערב שבת קודש פרשת ויצא, ח' כסליו, שנת תשפ"ו לפרט קטן
מיין ליבער הארציגער תלמיד הבחור ... נרו יאיר, ירושלים
שטארק זיך מיט לערנען און דאווענען, און ווען דו האסט איבריגע צייט זאלסטו העלפן אין ישיבה און אין שול, פרעג די גבאים וואס מען קען בעסער מאכן און אויך אין ישיבה זאלסטו זיין די רעכטע האנט פארן מנהל און מגיד שיעור.
איך האב געזען בילדער ווי דו פארבסט (קאלעכסט) די ווענט אין ישיבה אין ירושלים, דאס איז א גרויסע זאך, משמש זיין דעם רבי'ן; דאס וועט דיר בלייבן.
שטארק זיך מיט לערנען אכצן פרקים משניות. מוהרא"ש זאגט, משניות נעמט אראפ אלע פלעקן פון די נשמה, אפילו די גאר שטארקע איינגעגעסענע פלעקן וואס זעט אויס עס וועט שוין בלייבן, דורך משניות קומען זיי ארויס. זאג די ווערטער, דער רבי זאגט (שיחות הר"ן, סימן עו), אז מען דארף נישט ביים לערנען נאר זאגן די ווערטער און ביים סוף וועט מען פארשטיין; משניות רייניגט דעם מענטש, מען ווערט א גרויסער צדיק.
קענסט ווייזן דעם בריוו פאר דיינע חברים, זיי זאלן אויך העלפן אין שול; רייניגן, ספאנדזשען און פאררעכטן. איך זע פון די קעמרעס ווי דו העלפסט; די אונטערקאם איז צעבראכן, איך קען נישט רעדן, אבער זען - זע איך, און איך האב אזוי הנאה צו זען פון די קעמרע ווי דו רייניגסט די ישיבה, די שול און אזוי ווייטער.
איך בענק זיך נאך דיר, איך האב דיך זייער ליב, הלואי וואלסטו מיר געשריבן בריוו, מיר זאלן האבן א נענטערע קשר.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום א' פרשת ויצא, ג' כסליו, שנת תשפ"ו לפרט קטן
... נרו יאיר, ארגענטינע
זיי מחזק זיין ברודער ער זאל בלייבן ביים רבי'ן, ער זאל בלייבן העלפן בויען די קהילה, סיי יעצט ביז ער טרעפט זיין שידוך און אויך שפעטער ווען ער וועט שוין טרעפן זיין שידוך; פון העלפן דעם רבי'ן דערלייגט מען נישט, אדרבה, מען איז נאר מרויח, און אז מען דרייווט א באס צו טראגן די קינדער אין חדר, אין סקול – שאדט עס נישט פארן שידוך, עס ברענגט נאר די שידוך נענטער.
הער א מעשה, מוהרא"ש האט מיך איינמאל גערופן זאגן אז א טאטע פון א בחור וואס האט געלערנט אין ישיבה און געדרייווט די באס ביי אונז אין וויליאמסבורג-בארא פארק – איז געקומען זיך באקלאגן צו אים אז עס גייט אים נישט קיין שידוך פאר זיין זון, די שדכנים זאגן אז אלע זאגן אפ די שידוך ווייל ער פירט א ברסלב'ע באס, מוהרא"ש האט מיך גערופן איך זאל אים זאגן אז ער זאל מער נישט פירן דעם באס, מוהרא"ש האט נישט געוואלט מאכן צער פאר דעם טאטן, אבער מוהרא"ש האט מיר געזאגט: "נו, וועלן מיר זען יעצט ווען ער וועט אפלאזן די ברסלב'ע באס און גיין צו אנדערע מוסדות אויב עס וועט אים יא גיין א שידוך", און מוהרא"ש האט געזאגט פארן בחור וואס האט אים איבערגענומען: "זאלסט נישט מורא האבן אז דאס וועט דיר שאטן פאר דיין שידוך, אדרבה, דאס וועט דיר ברענגען דיין שידוך"; הכלל, פון העלפן די מוסד דערלייגט מען נישט, מען איז מרוויח בזה ובבא.
זיי מחזק זיין ברודער ער זאל צוריק קומען מיר העלפן בויען די מוסד, איך דארף יעצט רחמי שמים, איך בין שולדיג געהאלט פאר די איינגעשטעלטע, סיי דא אין אמעריקע און סיי אין ארץ ישראל, איך בין זייער צעבראכן, אבער איך גלייב מיט מיין גאנצע הארץ אז דער אייבערשטער גייט אונז העלפן, ווייל די מוסד איז דעם אייבערשטנ'ס, מען רעדט נאר פון אים, די קינדער רעדן נאר פון אים און נאר צו אים.
בעזרת ה' יתברך - יום ב' פרשת תולדות, כ"ו מרחשון, שנת תשפ"ו לפרט קטן
לכבוד מיין טייערער ... נרו יאיר, קרית ברסלב
איך באקום אזעלכע גוטע גריסן פון די עלטערן פון דיין דרייוון די באס יעדן אינדערפרי; פון דיין פינקטליכקייט, פון דיין ערליכקייט וכו', ממש א מחי'; הלואי זאלן נאך אפאר ביזנעסלייט דאס טון, אנהייבן דעם טאג מיט העלפן די מוסד.
איך וויל דיר בעטן, אפשר ביסטו מחזק דיין חבר ... נרו יאיר זאל אויך מאכן אינדערפרי א באס רוט פאר בית פיגא, אזוי ווי דיר. ... האט דאך אנגעהויבן זיין הצלחה מיט דרייוון אינאיינעם מיט דיר, נאך יארן צוריק ווען ענק זענען געווען בחורים אין ישיבה, ווייל איך האב א דרייווער וואס קומט יעדן טאג שפעט און די סקול ווערט צעפארן, א טייל קינדער קומען צייטליך און א טייל קינדער קומען שפעט, די טיטשערס ווייסן נישט וואס צו טון, מען קען נישט אנהייבן די לימודים.
זיי אים מחזק, זאג אים אז מען דערלייגט נישט פון אנהייבן די טאג מיט העלפן די מוסד.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - מוצאי שבת קודש פרשת לך לך, י"א מרחשון, שנת תשפ"ו לפרט קטן
לכבוד מיין טייערער ... נרו יאיר, קרית ברסלב
איך וויל דיך סיי דאנקען און סיי איבער בעטן; ערשט פאר די שיינע שול וואס דו האסט אויפגעבויט, און אויך אויף די שיינע חדר.
איך ווייס נישט וואס צו טון, איך שעם זיך וואס עס האט פאסירט, אז איך בין דיר געבליבן שולדיג פארן שול אין שטעטל אזויפיל געלט; וואלט איך געוויסט אין וואס פאר א גרויסע געלטער עס וועט אריינציען - וואלט איך דאס נישט געטון; איך בעט איבער, איך פרוביר צו טון וואס איך קען צו קענען ענדיגן באצאלן וויפיל איך קום דיר.
איך בעט דיר זייער זאלסט געדענקען די ניסים וואס דער אייבערשטער האט געטון מיט דיר ביז אהער, דערמאן זיך וויפיל מאל דו האסט געמיינט אז עס איז עק וועלט, ביסט געווען אזוי צעדרוקט מיט חובות, און דער אייבערשטער האט דיך געהאלפן, אזוי וועט יעצט אויך זיין, דער אייבערשטער וועט מאכן גרויסע נסים, וועסט ארויסגיין פון די דחקות און האבן גרויס שפע מיט די זכותים פון בויען אזא שיינע שטעטל.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - תשרי, שנת תשפ"ו לפרט קטן
... נרו יאיר, קרית ברסלב
איך וויל דיר בעטן זאלסט מיר העלפן צוריק באקומען די געלט פון די זיצן, דער אינגערמאן ... זאגט ער איז געווען אין עירפארט צו קומען צום רבי'ן מיט די געלט אוןמען האט עס פון אים אוועק גענומען ווייל עס איז געווען מער פון וויפיל מען מעג אריבערפירן די גרעניץ.
ביטע פארבינד זיך מיט אים און נעם א לויער זאל זען צוריק צו באקומען די גאנצע געלט, עס איז אסאך געלט, קרוב צו דרייסיג טויזנט דאלער, און איך האב גערעכנט אויף דעם צו באצאלן אלעס וואס מיר דארפן באצאלן.
לכבוד די נייע יאר זאלסטו זיך פארנעמען צו העלפן בויען די קהילה מיט די מוסדות און אויך יעדן יחיד מיט וואס מען קען נאר. איך ווייס אז דיין גאנצע ווילן און שטרעבן איז אלעס אפצולאזן און זיצן און לערנען א גאנצן טאג, אבער געדענק, חכמינו זכרונם לברכה זאגן (ירושלמי ברכות ה, א): "הָעוֹסֵק בְּצָרְכֵי צִבּוּר כְּעוֹסֵק בַּתּוֹרָה", מיטן טון פאר די חדר און בית פיגא – איז דאס אזוי ווי לערנען תורה, און נאך מער, ווייל דאס מערסטע וואס דו קענסט לערנען תורה אין איין שעה איז זעכציג מינוט, דו קענסט נישט לערנען מער פון זעכציג מינוט א שעה, מה שאין כן, אויב דו שטעלסט אויף מוסדות וועט מען לערנען אין איין שעה טויזנטער און צענדליגער טויזנטער מינוט, וד"ל.
א גמר פאר די גוים און א חתימה טובה פאר דיר.
בעזרת ה' יתברך - יום ה' פרשת כי תצא, י"א אלול, שנת תשפ"ה לפרט קטן
מיין טייערער ליבער ... נרו יאיר
איך זע אז דו ווילסט זייער העלפן די קהילה, דו פרובירסט צו העלפן ווי דו קענסט נאר.
וויל איך דיר בעטן, לייג אריין דיינע כוחות אין די חדר, דו האסט דאך א געפיל פאר די חדר, איך זע ביי דיר אין כתה ביסטו זייער מצליח, און אז דו האסט נאך כח, נאך צייט – זאלסטו דאס ניצן צו העלפן די חדר, אראפנעמען ארבעט פון די מנהל. אלעס אנדערש וועט מען טרעפן מענטשן וואס זאלן טון, אבער די חדר דאס איז מיר דאס וויכטיגסטע, די קינדער זאלן מצליח זיין אין לערנען און מיט אלעס וואס מען קען מיט זיי אויפטון.
מיט די קינדער איז דא אזויפיל וואס צו טון, און אפילו אלעס וועט זיין מסודר – וועט מען אלץ קענען מאכן שענער און שענער.
איך האב דיך ליב, איך האף דו וועסט מיר נישט אפזאגן.
בעזרת ה' יתברך - יום ד' פרשת שופטים, ג' אלול, שנת תשפ"ה לפרט קטן
טייערער ... נרו יאיר, קרית ברסלב
איך האלט אז זיין א באס דרייווער פאר די מוסד איז גאר א גוטע זאך, עס איז א מלאכה קלה ונקי', מען פארדינט שיין און מען ארבעט נאר אפאר שעה אינדערפרי און אפאר שעה נאכמיטאג. מען קען זיך קובע זיין א קביעות צו לערנען, און ווער רעדט נאך אז מען איז משמש דעם רבי'ן, מען ארבעט אין רבינ'ס חדר.
אז דו פרעגסט מיך וואלט איך דיר געראטן צו קומען דרייווען א באס פארן רבינ'ס חדר.
נאך א מעלה, מען איז ארומגענומען מיט א גוטע חברותא, מלמדים יראי שמים, ווי איידער צו גיין אין אן אפיס מיט מענטשן וואס האבן נישט מיטן רבי'ן וכו'.
זונטאג פאר איך שוין אהיים פון שטעטל, איך האב זיך זייער געבענקט, איך האב געמיינט איך וועל דיך זען דעם זומער, זעט אויס ביסט געווען פארנומען.
בעזרת ה' יתברך - יום ד' פרשת ראה, כ"ו מנחם-אב, שנת תשפ"ה לפרט קטן
מרת ... תחי'
איך דאנק אייך פאר'ן מאכן צוויי מאל וועכנטליך א פרויען צאמקום, איינס מאנטאג נאכט און נאך איינס דינסטאג אינמיטן טאג פאר די פרויען וואס האבן נישט קיין וועג צו קומען ביינאכט. איר האט א גרויסע מצוה, ווייל דער וואס איז מחזק אידישע פרויען, אידישע מאמעס - איז זייער חשוב ביים אייבערשטן; אידישע פרויען, אידישע מאמעס - זענען די עתיד פון כלל ישראל, זיי ברענגען קינדער, זיי זענען מגדל די קינדער און זיי זענען אזוי איבערגעשטרענגט מיט די ארבעט, זיי ווערן אראפגעשלעפט טאג טעגליך, און מען דארף אריינבלאזן אין זיי א רוח חיים. בפרט אנשי שלומינו וואס זענען נאך מער צעבראכן, ווייל חכמינו זכרונם לברכה זאגן (סוכה נב.), ווי גרעסער מען איז - אלץ מער צעבראכן ווערט מען, אזוי ווי די גמרא ברענגט דארט די מעשה, אליהו הנביא האט געזאגט פאר אביי ער זאל נישט זיין צעבראכן ווען ער זעט ווי פשוט'ע מענטשן האבן נישט די שווערע נסיונות, ווייל ווי מער צדיק מען איז - אלץ מער פארלייגט זיך די סטרא אחרא צו צעברעכן, און מוהרא"ש שרייבט אז מען קען געפינען צווישן תלמידי היכל הקודש באהאלטענע צדיקים, פון די ל"ו צדיקים וואס זענען מקבל אפי שכינתא בכל יום.
אויך א גרויסן יישר כח פאר אלעס וואס ענק טוען מיט די פרויען פאראיין (לעדיס עקזילערי) יעצט ביי די נשי חיל קאמפיין, און אזוי אויך דורך די יאר מיט אלעס וואס מען טוט פאר די קהלה. איין זאך וואס מען דארף נאך מתקן זיין, ווי אזוי מען קומט אן צו די פרויען וואס זענען איינזאם, וואס זענען בטבע צוריק געצויגן און זיי באווייזן זיך נישט, און זיי האבן נישט קיין פריינד, ווי אזוי מען קען זיי ליכטיג מאכן.
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה, א גוט געבענטשט יאר.
בעזרת ה' יתברך - יום ד' פרשת ראה, כ"ו מנחם-אב, שנת תשפ"ה לפרט קטן
מרת ... תחי'
איך האב ערהאלטן די מעסעדזש.
דאס איז טאקע א נס וכו', אבער נאך א נס האבן מיר, אז מיר האבן אזעלכע געטרייע סעקרעטעריס אין אפיס ווי אייך מיט די אנדערע, וואס וואלטן געקענט אוועק שפאצירן אין אלע צייטן וואס עס ווערט אזוי איבערגעשטרענגט, און עס זעט אויס ווי אלעס צעפאלט און ענק בלייבן ווייטער ארבעטן פאר די מוסדות מיט אזא איבערגעגעבנקייט; דאס איז די גרויסע נס וואס דער אייבערשטער מאכט מיט אונז.
פארלירט אייך נישט, און זייט מחזק די אנדערע סעקרעטעריס זיי זאלן ווייטער העלפן די מוסד. אז מען טראכט אריין וויפיל שיינע זאכן קומען ארויס פון די מוסדות; אזויפיל תורה, אזויפיל תפילה, אמונה און אזויפיל חסד; אלע וואס העלפן נעמען פון די זכותים.
דער אייבערשטער זאל העלפן איר זאלט האבן הצלחה אין אלע ענינים.
א כתיבה וחתימה טובה, א גוט געבענטשט יאר.
בעזרת ה' יתברך - יום ה' פרשת עקב, כ' מנחם-אב, שנת תשפ"ה לפרט קטן
... תחי'
א גרויסן יישר כח פאר אלעס וואס איר טוט צו העלפן די מוסדות, ביי מיר איז די מוסד דאס וויכטיגסטע און טייערסטע זאך פון די גאנצע קהילה, און ווער עס העלפט די מוסדות – האט א זכות פאר אייביג, פאר זיך און פאר זיינע דורות.
אויך זאלט איר זיין געבענטשט פארן העלפן די מוסד און אין די זעלבע צייט נישט וויי טון קיינעם. אמאל קומט איינער העלפן און ער העלפט זייער געטריי, אבער ביים העלפן טוט ער צעטרעטן אנדערע, מען טוט מבטל זיין אנדערע, וויי טון אנדערע, אין אזא פאל איז שוין א בחינה פון 'מוחל טובות', ענדערש העלף נישט; דעריבער דאנק איך אייך אז איר העלפט די מוסד מיט שלום, מען געבט אכטונג אויף אנדערע'ס געפילן.
בזכות וואס איר העלפט זאלט איר זען נחת ביי אייערע קינדער.
בעזרת ה' יתברך - יום ה' פרשת עקב, כ' מנחם-אב, שנת תשפ"ה לפרט קטן
צו מיין טייערער ... נרו יאיר, קרית ברסלב
אפילו מיר האבן שוין גערעדט – דאך וויל איך דיר דאס געבן בכתב.
אז דו וועסט מיר העלפן מיט די מוסד וכו' – וועסטו זיך נישט מוטשען מיט דיינע אייגענע געשעפטן, און ווי מער דו וועסט טון פאר די מוסד – וועסטו האבן מער און מער הצלחה.
די קינדער אין חדר האבן נישט קיין פלאץ, אויך זענען די מלמדים נישט באצאלט געווארן. די טיטשערס און די אייגעשטעלטע אין אפיס – איז מען שולדיג פון פסח, און נאך זאכן וואס דארפן ערלעדיגט ווערן.
אויך דארף מען איבערגיין מיט די מנהלת תחי' אויב די טיטשערס ווערן געהעריג באצאלט אדער נישט.
איך האף צום אייבערשטן ער וועט מאכן מיט אונז ניסים ווייטער אזוי ווי ביז יעצט, ווייל אלעס וואס דו זעסט ביי אונזערע מוסדות איז הוילע ניסים ונפלאות, חסדים גמורים.
בעזרת ה' יתברך - יום ב' פרשת עקב, י"ז מנחם-אב, שנת תשפ"ה לפרט קטן
צו מיין טייערער ... נרו יאיר, קרית ברסלב
איך טראכט צו קומען צו ענקער געגנט אויף שבת פרשת שופטים, מחזק צו זיין די אלע משפחות פון די געגנט וואס האבן נישט מיטגעהאלטן במשך די זומער וואכן די באטע מיט סיפורי מעשיות און שלש סעודות; לאז מיר וויסן אויב דו מיט די אנדערע גבאים ווילן דאס, און אויב ענק קענען צושטעלן אלעס וואס פעלט זיך אויס.
שטארק זיך מיט דיין עבודת השם, מיט תורה תפילה און מיט משמש זיין דעם רבי'ן, ברענג אריין א חיות אין אנשי שלומינו, דאס וועט דיך ברענגען צו גדלות המוחין. ווייל דער רבי זאגט (לקוטי מוהר"ן חלק א', סימן קפד; שיחות הר"ן, סימן צט), אן עצה צו קומען צו גדלות המוחין – מען זאל רעדן דבורי התחזקות מיט אנדערע, דאס איז א סגולה צו אליין ווערן מחוזק, עס איז א סגולה זאך, נישט קיין שכל, ווייל אז מען וועט זיך אליין זאגן די זעלבע ווערטער וועט עס נישט אויסמאכן, און ווען מען זאגט עס פאר א צווייטן – קנאקט עס צוריק און עס איז אים אליין מחי'.
בעזרת ה' יתברך - יום ג' פרשת דברים, ד' מנחם-אב, שנת תשפ"ה לפרט קטן
טייערע ... נרו יאיר
האסט א זכות אז דו העלפסט דער רבי מיטן טראגן די עול ביים קיאסק, אין באזאר, און נאך.
איך וויל דיר בעטן זאלסט מאכן עפעס א וועג אז די אלע באקסעס און בעגס קליידער וואס מענטשן ברענגען – זאל מען אריינלייגן אין א שטוב וואו מען קען נישט אריינגיין (אפשר מאכן א האלבע טיר), ווייל זייער אסאך מאל, די מענטשן וואס ברענגען קליידער רייסן אויף באקסעס און בעגס צו זוכן נייע פרישע קליידער וואס עס איז נאכנישט אויסגעלייגט אויף די פאליצעס (שעלפס), און ווען די ווייבלעך וואס זענען זיך מתנדב (וואלענטירן) קומען מסדר זיין די נייע קליידער – איז די ארבעט זייער שווער, עס ליגן איבערגעדרייטע באקסעס, אויסגעגאסענע וועש.
דעריבער וויל דיך דיר בעטן זאלסט אויפקומען מיט אן עצה ווי אזוי מען קען מאכן מען זאל ברענגען קליידער, וועש וכדומה, אבער מען זאל נישט קענען צוקומען אויסצופאקן, אז די ארבעט זאל זיין גרינג און מסודר.
הויב אן דיין טאג מיט התבודדות, גיי א שפאציר צווישן די ביימער, דאנק דעם אייבערשטן פאר דיין התקרבות צום רבי'ן.
בעזרת ה' יתברך - יום ג' פרשת דברים, ד' מנחם-אב, שנת תשפ"ה לפרט קטן
טייערער ... נרו יאיר
איך וויל דיר בעטן דו זאלסט אריינקומען אין די הנהלה ביי אונז אין די קהילה, קהילת היכל הקודש דחסידי ברסלב בארצות הברית, ווערן א חבר הנהלה.
עס איז א שווערע אמט, מען טוט טאג און נאכט פאר די ציבור און ווייניג זענען מכיר טוב, בעיקר האט מען טענות (און דאס איז פארוואס איינער פון די חברי הנהלה האבן זיך ארויסגעצויגן), אבער פון די אנדערע זייט איז די שכר אויבן אין הימל זייער גרויס, און אויך אויף די וועלט מאכט מען א 'מי שברך' יעדע וואך אין שול: "וכל מי שעוסקים בצרכי ציבור באמונה", די אלע וואס טוען פארן ציבור מיט באגלייבטקייט אן קיין אינטערעס, אן קיין עוולות, "הקדוש ברוך הוא ישלם שכרם", דער אייבערשטער זאל זיי באצאלן, "ויסיר מהם כל מחלה", און אוועק נעמען פון זיי אלע קרענק, "וירפא לכל גופם", און אויסהיילן זייער קערפער, "ויסלח לכל עוונם", און זיי מוחל זיין אויף זייערע זינד, "וישלח ברכה והצלחה בכל מעשי ידיהם, ונאמר אמן".
אז דו וועסט מיר זיין געטריי און מיר העלפן – וועסטו נישט חרטה האבן נישט בזה און נישט בבא.
בעזרת ה' יתברך - יום ב' פרשת מטות-מסעי, כ"ה תמוז, שנת תשפ"ה לפרט קטן
מרת ... תחי'
איך וויל אייך בעטן, אפשר ווילט איר קומען העלפן ביי די מוסד, מיר דארפן האבן א פרוי וואס זאל אנפירן די פראגראם פאר די קליינע קינדער, אז אלעס זאל זיין לויט ווי די געזעץ פארלאנגט און זיך פירן לויט די אנווייזונגען פון די מנהלת תחי', מיר טראכטן אז איר וואלט געווען זייער פאסיג פאר דעם.
פארגעס נישט, דאס איז נישט סתם אבי אן ארבעט, דאס איז דעם רבינ'ס מוסדות, מוסדות וואס זענען געבויט אויף מחנך זיין דורות פארן אייבערשטן, מחנך זיין די קינדער זאלן לעבן מיט א ליבשאפט צום אייבערשטן.
איך וועל אייך זייער מכיר טובה זיין אז איר וועט אננעמען דעם אמט, אזוי וועט עס זיין גוט אוועק געשטעלט, און די מוסד וועט מרוויח זיין, און קענען באצאלן די איינגעשטעלטע אין צייט.
א גרויסן יישר כח.
