בעזרת ה' יתברך
יום ה' פרשת וישב, כ"א כסליו, שנת תשפ"ב לפרט קטן
... תחי'
איך האב ערהאלטן אייער בריוו.
איך פריי זיך זייער צו הערן אז איר האט אפגעהאקט אלע קשרים, איר האט מער נישט קיין שייכות מיט דעם בחור.
בזכות דעם וואס איר האט עומד געווען בנסיון, איר האט אלעס אפגעלאזט - וועט איר באקומען א גוטע שידוך, אן ערליכע שידוך.
זאגט יעדן טאג דעם יום תהלים, און בעט דעם אייבערשטן אויף אייער שפראך אלעס וואס איר ווילט.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
ערב שבת קודש פרשת וישב, מכרכים החודש, כ"ב כסליו, שנת תשפ"ב לפרט קטן
לכבוד מיינע טייערע חברים, תלמידי היכל הקודש ירושלים, ה' עליהם יחיו
איך בעט אייך זייער, שטארקט אייך אינאיינעם, זייט אייך מחזק מיט די זיסע עצות פון הייליגן רבי'ן. געדענקט, אונזער הצלחה איז נאר אז מיר וועלן זיך ליב האבן און זיך ליידן; אז מיר וועלן זיך ליב האבן - וועלן מיר קענען אריינברענגען אורו של משיח, דעם רבינ'ס שכל - אין די גאנצע וועלט.
פארשטייט גוט, יעדער מענטש איז א שכל פרטי, יעדער מענטש האט זיין וועג ווי אזוי ער טראכט, זיין וועג ווי אזוי ער פירט זיך, מיר אלע קומען צום רבי'ן דער רבי זאל אונז היילן, דער רבי זאל אונז ברענגען צום תכלית, מיר זאלן טראכטן פון בורא כל עולמים. ווען מען נעמט זיך צאם א גאנצער עולם קען אויסקומען רייבערייען, דער שלעפט אהער, דער שלעפט אהין, יעדער איינער האט דאך זיין וועג פון טראכטן, אבער אז מען קוקט אויף די נשמה, מען קוקט אויף די תכלית; פארוואס מען האט זיך צאמגענומען - דעמאלט איז גוט, דעמאלט האט מען זיך ליב.
מיינט נישט אז איך בין ווייט פון ענק; מצד הגוף זענען מיר אביסל ווייט, אבער מיין הארץ, מיין מח - איז מיט ענק. איך האלט מיט יעדע ריר ביי אייך אין שול, די גבאים שרייבן מיר יעדע פרט ופרט, איך פריי זיך בעיקר מיט איין זאך, דאס איז ביי מיר דער עיקר; אינגעלייט און בחורים שרייבן מיר אז מען האלט זיך זייער באחדות, יעדער שפירט זיך גוט אין שול, מען שמייכלט איינער צום צווייטן, מען פארגינט זיך איינער דעם צווייטן; דעריבער שרייב איך אייך, זייט ממשיך מיט די וועג ווי אזוי איר פירט זיך - וועט דער בית המדרש אין ירושלים זיין א מאגאנעטישער פלאץ, עס וועלן קומען און קומען בחורים און אינגעלייט, אלע וועלן טרעפן חיזוק דארט.
יעצט קומט דער הייליגער יום טוב חנוכה, ביי אונז פירט מען זיך אנצוטון בגדי שבת ווען מען צינדט, מען דאווענט מעריב און מען גייט אהיים גלייך צינדן. מוהרא"ש איז געווען זייער ברוגז אויף די וואס פארן אוועק שבת חנוכה, לאזן איבער די ווייב און קינדער; מוהרא"ש זאגט, חנוכה איז א חינוך יום טוב, חנוכה איז א צייט וואס דער טאטע זיצט אין שטוב מיט די קינדער, מען פריידט זיך, מען זינגט און מען טאנצט אינאיינעם.
איך בין געווען די וואך ביי א נסיעה צו מקומות הקדושים, איך האב זייער הנאה געהאט פון די נסיעה, בעיקר צו זיין מיט אפאר חברים פון אונזער בית המדרש אין ירושלים. אינו דומה ווען מען זיצט אפאר טעג אינאיינעם, מען זיצט אינאיינעם, מען פארט גאנצע טעג און נעכט אינאיינעם, דעמאלט זעט מען דעם מענטש דורך און דורך, איך האב זייער הנאה געהאט.
מיר האבן גערעדט אויפ'ן וועג אסאך נקודות ווי אזוי א שול דארף זיך פירן, די גבאים וועלן אייך שוין איבערגעבן. איך וויל זייער שטארק אז דער שול אין ירושלים זאל זיך פירן מיט א מורא'דיגע דרך ארץ וואס מען זעט נישט ערגעץ אנדערש.
איך האב געהערט פון די גבאים בשעת די נסיעה אז איר ווארט זייער שטארק אויף א בריוו, דער גאנצער עולם וויל אזוי שטארק א בריוו; וועל איך פרובירן מיט אלע כוחות אייך צו שרייבן יעדע וואך א בריוו.
א פרייליכן שבת און א ליכטיגער חנוכה.
בעזרת ה' יתברך
יום ד' פרשת וישב, כ' כסליו, שנת תשפ"ב לפרט קטן
לכבוד מיין טייערער ... נרו יאיר
איך בין יעצט אויפ'ן וועג אהיים פון א נסיעה, מיר זענען געפארן מתפלל זיין ביי קברי צדיקים. איך זיץ יעצט אין עירפארט, איך האב אביסל צייט, וועל איך דיר שרייבן אביסל חיזוק.
וויסן זאלסטו, אויבן אין הימל קוקט מען גאר אנדערש אויף א מענטש. דא קוקט מען ווער עס האט געלט, ווער עס האט כבוד, ווער עס האט א פאלאץ, א טייערע קאר וכו' וכו', מען מאכט אן עסק פון די זאכן, אבער אויבן אין הימל איז אן אנדערע וועלט, אויבן קוקט מען ווער עס דערהאלט זיך, מען קוקט צו וועם לויפט דער מענטש בעת צרה; דער וואס איז שטארק אין אמונה, דער וואס פארלירט זיך נישט ווען עס גייט אים נישט ווי אזוי ער וויל - דער איז זייער חשוב.
אויך איז חשוב יעדע מצוה, יעדע ווארט תורה, בפרט ווען מען איז פאריאגט צו ברענגען פרנסה און מען כאפט אריין אביסל תורה, א פרק משניות, א בלאט גמרא, א קאפיטל תהלים - איז דאס זייער חשוב.
עס קומט א צייט וואס מען זעט דאס שיינקייט פון די תורה ותפלה, דעמאלט בלייבט נאר דאס איבער.
יעצט קומען די הייליגע חנוכה טעג, די טעג זענען געשטעלט אויף דאנקען און לויבן דעם אייבערשטן; זאלסטו זיך באנייען און דאנקען דעם אייבערשטן אויף אלעס וואס ער טוט מיט דיר.
בעזרת ה' יתברך
יום ד' פרשת וישב, כ' כסליו, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך האף דו געבסט אכטונג אויף דיין ווייב תחי'. נישט לאנג צוריק האב איך דיר געשריבן א בריוו ווי אזוי אכטונג צו געבן אויף א ווייב, איך האף דו חזר'סט די בריוו. וואלסט ווען געדארפט נעמען אלע בריוו וואס איך האב דיר פערזענליך געשריבן, דאס צאמבינדן און דאס חזר'ן כאטשיג איינמאל א וואך.
איך האב דיר געשריבן אזעלכע וויכטיגע זאכן; עס איז נישט קיין חידושים, עס שטייען אין די בריוו פשוט'ע זאכן, אבער עס איז זייער וויכטיג, צום ביישפיל די אלע בריוו וואס רעדן זיך פון שלום בית; ווי אזוי צו רעדן מיט די ווייב, ווי אזוי אכטונג צו געבן אויף איר, נישט אוועק מאכן איר משפחה, איר לאזן גיין צו משפחה, איר לאזן קויפן קליידער, נישט זיין קיין קמצן, געבן גוטע ווערטער - דאס אלעס זענען זייער פשוט'ע זאכן. עס זעט אויס קינדיש, עס זענען דא מענטשן וואס לאכן פון די בריוו, אבער דער מציאות ווייזט אז מענטשן ווייסן נישט, אדער כאפט מען זיך נישט ווי וויכטיג דאס איז; הלוואי זאלסטו איבער'חזר'ן אלע בריוו וואס דו האסט באקומען און אכטונג געבן אויף דיין ווייב.
דו האסט באקומען פון הימל א מתנה, אזא אשת חיל, זי איז דיר אזוי געטריי - דארפסטו איר מכבד זיין, רעדן שיין, ווייך און הארציג צו איר. זי איז זייער אן איידעלע, בבחינת בת מלך, וואס מען דארף רעדן ווייך און הארציג.
טראג איר וואו זי וויל גיין, נעם איר אריין אין שטאט צו אירע עלטערן און צו איינקויפן, נישטא קיין וויכטיגערע זאך ווי שלום בית, ווייל ווען עס איז אתה שלום וביתך שלום, דעמאלט איז וכל אשר לך שלום; אלעס איז גאנץ מיט שלום בית.
בעזרת ה' יתברך
יום א' פרשת וישב, י"ז כסליו, שנת תשפ"ב לפרט קטן
לכבוד מיין טייערער ... נרו יאיר, מלמד מוסדות היכל הקודש
איך האב דורכגעבליקט די בחינה אויף די פרשת השבוע פון בני היקר ... נרו יאיר, איך האב זיך זייער געפריידט צו זען ווי גוט ער קען די פרשה חומש רש"י כזקן ורגיל.
איך דאנק דיר טייערער מלמד פאר'ן לערנען מיט די קינדער אזוי קלאר די גאנצע פרשה מידי שבוע בשבוע. חומש רש"י דארף זיין דער עיקר לימוד, חומש רש"י ברענגט יראת שמים.
מוהרא"ש פלעגט שטענדיג חזר'ן די ווערטער וואס דער הייליגער צדיק רבי מרדכי'לע מנאדבורנא זכותו יגן עלינו האט געזאגט פאר הרב הקדוש מסאטמאר זכותו יגן עלינו אלס קינד: "קינדערלעך פילעוועט ענק מיט חומש רש"י, וועט איר וויסן וואו דער אייבערשטער געפונט זיך".
איך פאר היינט קיין אייראפע צו מקומות הקדושים מתפלל זיין, מיר פארן קיין אוהעל צום הייליגן ישמח משה זכותו יגן עלינו, קיין קאלוב, קערעסטיר ועוד; איך וועל מתפלל זיין פאר דיר, פאר דיין משפחה און פאר אלע דיינע תלמידים.
בעזרת ה' יתברך
יום ד' פרשת וישב, כ' כסליו, שנת תשפ"ב לפרט קטן
לכבוד מיין טייערער ... נרו יאיר, ירושלים
איך האב אפאר מינוט אין עירפארט וועל איך דיר שרייבן אפאר ווערטער.
וויסן זאלסט, נישטא קיין ווערטער ארויסצוברענגען דיינע זכותים און די זכותים פון דיין ווייב תחי'; עס איז נישטא קיין גרעסערע זאך ביים אייבערשטן ווי די זאך פון הפצה, וואס דאס איז מקרב אידישע קינדער צום אייבערשטן.
טויזנטער אידן זענען זיך מחי' מיט די עצתו אמונה און איש אמונות המתורגם. איך קוק דאס איבער יעדע וואך, איך וויל זען אויב עס גייט נישט אוועק פון די מכוון, בשעת איך קוק דאס דורך ווער איך אזוי צוגעקלעבט צו דעם, איך בין זיך מחי' מיט די שיינע לשון, די שיינע חיזוק.
טייערער ברודער, חזק ואמץ ואחוז עצמך בכל כחך! זיי מחזק דיין ווייב זי זאל נישט אפלאזן די הייליגע ארבעט.
איך דאווען פאר ענק, פאר דיר און דיין גאנצע משפחה איר זאלט מצליח זיין. איך האב מתפלל געווען פאר דיר ביי אלע מקומות הקדושים.
איך האב אזוי הנאה פון ענקער חבורה, היכל הקודש ירושלים; אזעלכע טייערע אינגעלייט. ... נרו יאיר, ... נרו יאיר, ... נרו יאיר און דו ... נרו יאיר, איך האב ענק ליב באהבת נפש. איך וויל אזוי שטארק יעצט קומען אויף א שבת אין ירושלים, איך האב גערעדט צו ... אויב עס איז מעגליך צו זיין אין שול, אויב דאס איז נישט צו קליין.
שטארק זיך ברודער, אלע בלבולים וחלישת הדעת וואס גייט אריבער - דאס איז דעם רבינ'ס זאך. אלע וואס טוען פאר'ן רבי'ן מיינען אז מען דארף זיי נישט, אלע וואס זענען עוסק אין פארשפרייטן דעם רבי'ן גייען אריבער די זאכן; וואויל איז דעם וואס קומט דאס איבער, ער שטארקט זיך אויף אלעס.
איך מוז מקצר זיין, די אינגעלייט פון ארץ ישראל גייען שוין ארויף אויפ'ן פליגער.
זיי געזונט, לאז אלעמען גריסן.
יואל בן ריצא רעכיל
בעזרת ה' יתברך
יום ה' פרשת וישלח, י"ד כסליו, שנת תשפ"ב לפרט קטן
לכבוד מיין טייערער ... נרו יאיר
א גרוס פון דיין זון הבחור ... נרו יאיר, ער לערנט זייער פלייסיג, ער דאווענט מיט יראת שמים און אויך האט ער גוטע מידות. איך האף ער איז אויך צופרידן, ווייל מיר זענען זייער צופרידן צו האבן אזא טייערער תלמיד הישיבה.
שטארק זיך בעבודת השם, באנוץ זיך מיט די עצה פון רבי'ן, די עצה פון התבודדות ותפלה. רעד זיך אויס צום אייבערשטן אויף דיין אייגענע שפראך, די עצה איז א גרינגע עצה. רבי נתן זאגט (לקוטי מוהר"ן חלק ב', סימן קא): "אַף עַל פִּי שֶׁנִּמְצָאִים כַּמָּה עֵצוֹת טוֹבוֹת בְּסִפְרֵי רַבֵּנוּ זִכְרוֹנוֹ לִבְרָכָה", עס איז דא אסאך עצות פאר'ן לעבן אין רבינ'ס ספרים, "אַף עַל פִּי כֵן, עַל פִּי רֹב קָשֶׁה לְהָאָדָם לְקַיֵּם הָעֵצָה בְּעַצְמָהּ", מיט דעם אלעם איז שווער פאר'ן מענטש מקיים צו זיין די עצות, "עַל כֵּן הָעִקָּר הוּא תְּפִלּוֹת וּתְחִנּוֹת וּבַקָּשׁוֹת, יִהְיֶה אֵיךְ שֶׁיִּהְיֶה", דעריבער איז דער עיקר צו בעטן, דאווענען און וויינען צום אייבערשטן, "שֶׁיּוֹצִיא אוֹתוֹ מֵחֹשֶׁךְ לְאוֹר", ער זאל מיך ארויסנעמען פון טונקלקייט צו ליכטיגקייט, "וְיַחֲזִירֵהוּ בִּתְשׁוּבָה שְׁלֵמָה בֶּאֱמֶת", און מען זאל זוכה זיין צו תשובה טון.
און אפילו מען זעט ווי עס גייט אריבער א לאנגע צייט וואס מען בעט און מען שרייט, "וַעֲדַיִן הוּא רָחוֹק מְאֹד מְאֹד", און מען איז נאך זייער ווייט; אויב מען וועט זיין שטארק, מען וועט נישט אפלאזן, "בְּוַדַּאי סוֹף כָּל סוֹף יַעֲנֵהוּ הַשֵּׁם יִתְבָּרַךְ", וועט אים דער אייבערשטער העלפן, "בְּלִי סָפֵק, רַק חֲזַק וֶאֱמָץ".
בעזרת ה' יתברך
יום ה' פרשת וישב, כ"א כסליו, שנת תשפ"ב לפרט קטן
מרת ... תחי'
איך וויל אייך דערציילן פון מיין נסיעה, איך האב זייער הנאה געהאט פון די נסיעה; מיר האבן געדאווענט ביי די הייליגע צדיקים, עס איז געווען זייער שיין.
איך וויל אייך זאגן, דאס מערסטע האב איך הנאה געהאט ביי די נסיעה פון די טייערע אינגעלייט פון ארץ ישראל, איך האב זיי שוין אלע געקענט פון פארדעם, שוין גערעדט מיט זיי, אבער ווען מען זיצט אינאיינעם טעג און נעכט אויף א באס; מען פארט, מען עסט, מען שלאפט און מען איז מיד אינאיינעם - דעמאלט באקענט מען זיך מער. דער איד ..., ... און ... דאס זענען אזעלכע טייערע מענטשן, נארמאלע מענטשן, מענטשן מיט ישוב הדעת, באזעצענע מענטשן; איך האב זייער הנאה געהאט צו זיין מיט זיי די גאנצע נסיעה.
איך האף אז אלעס איז ביי אייך גוט, איך האב געבעטן פאר אייך ביי די צדיקים, איך בעט כסדר פאר אייך; נישט אלעמאל קומט מיר אן צו ענטפערן בריוו, זאלט איר נישט מיינען אז איך האב פארגעסן פון אלע גוטע זאכן וואס איר האט מיר געטון במשך אלע יארן, איך געדענק גוט אלע גוטע זאכן, איך בעט פאר אייך כסדר פאר אייער מאן און קינדער; אז איך וועל קומען קיין ארץ ישראל וועל איך נאכאמאל קומען צו אייך.
זאגט פאר די כלה ... תחי' אז זי קען גיין ארבעטן צו קענען העלפן אירע עלטערן חתונה מאכן, זי דארף נישט בלייבן אין סקול.
בנוגע רעדן מיט די חתן; זאל זי פרעגן אירע עלטערן. מוהרא"ש האט געהאלטן אז חתן כלה קענען רעדן אויפ'ן טעלעפאן, אבער דאס דארף זיין מיט די הסכמה פון די עלטערן.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ה' פרשת וישב, כ"א כסליו, שנת תשפ"ב לפרט קטן
לכבוד ... נרו יאיר
איך בעט דיר זייער, דערהאלט זיך מיט אלע דיינע כוחות; עס איז יעצט טאקע זייער שווער, אבער אחר הרע יבוא הטוב, עס וועט דיר שוין ליכטיג ווערן.
בלייב שטארק, לערן דיינע שיעורים כסדרן; לערן יעדן טאג חומש רש"י, לערן ח"י פרקים משניות, א בלאט גמרא און אסאך אשר בנחל. אשר בנחל האט א כח אויפצוהייבן א מענטש פון יעדע פראבלעם, אפילו מען זאל דורכגיין שווערע ביטערע טעג, אויב לערנט מען אשר בנחל האט מען כח אלעס אריבערצוגיין.
בנוגע קומען אין ישיבה; יעצט איז נישט כדאי דו זאלסט קומען, איך וויל זיך נישט פארפלאנטערן מיט די רעגירונג. איך ווייס אז דיר גייט גארנישט אן, דו ביסט גרייט אויף מסירות נפש, דו ביסט א פלאם פייער, אבער איך דארף אכטונג געבן אויף מיר און אויף די ישיבה, איך קען נישט טון קיין ווילדע זאכן. סתם אזוי ווען בחורים קומען אין ישיבה נעם איך יעדן איינעם אריין, אפילו עס איז דא סטראשערייען, מען ווארנט מיר - איך האב נישט מורא פון קיינעם, אבער אז די רעגירונג זוכט דיר - דארף איך זייער אכטונג געבן.
פארבינד זיך מיט עסקנים; איך בין זיכער אז עס זענען דא עסקנים וואס וועלן דיר העלפן אלעס זאל זיין ליגאל, דעמאלט וועסטו קומען קיין אמעריקע.
זיי נישט ברוגז, איך זוך דיר נישט אוועק צו שטופן; איך האב דיר ליב און איך וויל דיר האבן אין ישיבה, עס איז פשוט א סכנה פאר מיר און פאר דיר אז דו זאלסט קומען.
רעד צו האברך ... נרו יאיר, ער איז א מענטש מיט ישוב הדעת, ער איז א מענטש מיט פארשטאנד; ער וועט דיר העלפן עס זאל זיין ליגאל, אזוי וועסטו קענען קומען אין ישיבה.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום א' פרשת וישב, י"ז כסליו, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
איך האב געליינט דיין בריוו בכובד ראש, עס האט מיר געציפט ביים הארץ הערנדיג וואס דו ביסט אלץ אריבער, פון דיינע יונגע יארן.
קלאפ זיך נישט אראפ, נעם דעם רבינ'ס שכל. דער רבי זאגט (שיחות הר"ן, סימן כו): "אֵצֶל הָעוֹלָם הַשִּׁכְחָה הִיא חִסָּרוֹן גָּדוֹל בְּעֵינֵיהֶם", ביי די וועלט איז שכחה א חסרון, "אֲבָל בְּעֵינַי, יֵשׁ בְּהַשִּׁכְחָה מַעֲלָה גְּדוֹלָה", אין מיינע אויגן איז שכחה א גרויסע זאך, "כִּי אִם לֹא הָיְתָה שִׁכְחָה, לֹא הָיָה אֶפְשָׁר לַעֲשׂוֹת שׁוּם דָּבָר בַּעֲבוֹדַת ה'", וואלט ווען נישט געווען קיין שכחה וואלט מען נישט געקענט טון קיין שום זאך אין עבודת השם, "אִם הָיָה זוֹכֵר כָּל מַה שֶּׁעָבַר לֹא הָיָה אֶפְשָׁר לוֹ לְהָרִים אֶת עַצְמוֹ לַעֲבוֹדָתוֹ יִתְבָּרַךְ בְּשׁוּם אֹפֶן", אויב וואלט מען געדענקט יעדע זאך וואס מען האט געטון וואלט מען נישט געקענט אנהייבן טון גוטע זאכן, "גַּם הָיוּ מְבַלְבְּלִים אֶת הָאָדָם מְאֹד כָּל הַדְּבָרִים שֶׁעוֹבְרִים עָלָיו", אויך וואלט מען געווארן געשטערט פון אלעס וואס איז אריבער, "אֲבָל עַכְשָׁו עַל יְדֵי הַשִּׁכְחָה נִשְׁכָּח מַה שֶּׁעָבַר", אבער יעצט ווען עס איז דא שכחה, מען פארגעסט - פארגעסט מען די אלע נישט גוטע זאכן, קען מען אנהייבן פון פריש דינען דעם אייבערשטן.
דאס איז דעם רבינ'ס שכל, דעם רבינ'ס זאך איז: הייב אן פונדאסניי, שלעפ נישט דיין עבר, הרג'ע זיך נישט מיט אלטע זאכן וואס מען האט דיר בא'עוולה'ט אדער זאכן וואס דו האסט יענעם בא'עוולה'ט, נישטא גארנישט קיין נוצן פון זיך אויפעסן מיט אלטע מעשיות. רבי נתן זאגט (שיחות הר"ן, שם): "וְאֶצְלוֹ הַדֶּרֶךְ, שֶׁכָּל מַה שֶּׁעָבַר וְהָלַךְ, נִפְסָק וְהוֹלֵךְ לַחֲלוּטִין, וְאֵינוֹ חוֹזֵר בְּדַעְתּוֹ עוֹד כְּלָל", ביים רבי'ן איז נישט געווען אינטערעסאנט אלטע זאכן, א זאך וואס איז געווען האט מען מער נישט גערעדט און געטראכט, "וְאֵינוֹ מְבַלְבֵּל כְּלָל עַצְמוֹ עוֹד בַּמֶּה שֶּׁכְּבָר עָבַר וְהָלַךְ".
עס איז זייער שווער אפילו נאר צו ליינען וואס דו ביסט אריבער אין דיינע יונגע יארן, מען האט דיר געפייניגט השם ישמרינו; יעצט איז צייט זיך צו רוקן פאראויס אין לעבן, יעצט דארפסטו טראכטן ווי אזוי דו קענסט זיך בעסער מאכן; דאס קען נאר געשען מיט דעם רבינ'ס וועג פון התבודדות ותפילה און זיך כסדר מחדש זיין.
איך ליין אלע דיינע בריוו, שרייב מיר נאך.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ה' פרשת וישב, כ"א כסליו, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
זיי נישט קיין אויבער חכם; אז איך זאג דיר זאלסט אכטונג געבן נישט רעדן מיט מיידלעך - ווייס איך וואס איך זאג.
איך ענטפער אויך נישט פאר קיין מיידלעך און איך נעם נישט אויף קיין מיידלעך, איך רעד נאר מיט תלמידות מיט די הסכמה פון זייערע עלטערן, און אויפ'ן טעלעפאן רעד איך בכלל נישט.
מוהרא"ש האט מיר דאס געזאגט מיט יארן צוריק ווען מען האט באשמוצט א ברסלב'ער משפיע, מען האט ארויסגעלאזט אויף אים א שם רע (אגב, מוהרא"ש האט מיר דעמאלט געזאגט אז אלעס איז שקר, עס איז א בלבול, עס איז נישט אמת, עס איז אלעס וועגן געלט), אז איך זאל זייער אכטונג געבן נישט צו רעדן אויפ'ן טעלעפאן מיט מיידלעך און פרויען, און נישט אויפנעמען. מוהרא"ש האט מיר געזאגט אז ער געבט זייער אכטונג ווען ער נעמט אויף פרויען אז עס זאל זיין א גבאי אין צימער.
אז מען רופט דיר בעטן ספרים - זאלסטו בעטן אן אדרעסס און ברענגען צום טיר; חס ושלום זיך אפשמועסן צו טרעפן ערגעץ שטילערהייט. אז דו וועסט מיר נישט פאלגן וועסטו מער חרוב מאכן ווי אויפטון, איך ווייס וואס איך זאג.
דאס וואס מען האט דיר גערופן פון די פאליציי וכו' - דאס איז אן אויסנאם פאל; דער בחור איז אנטלאפן, זיי זוכן דעם בחור, א גאנצע סיפור באריכות. דאס מיינט נישט צו זאגן דו זאלסט נישט ענטפערן מער דעם טעלעפאן פאר בחורים; אז א בחור רופט דיר, ער וויל ספרים, ער וויל חיזוק - זאלסטו אים געבן, אבער מיידלעך זאלסטו נישט ענטפערן.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ד' פרשת וישב, כ' כסליו, שנת תשפ"ב לפרט קטן
לכבוד מיין טייערער ליבער הארציגער ... נרו יאיר
איך בין יעצט אויפ'ן וועג צוריק פון א נסיעה. חסדי השם יתברך מיר זענען געפארן מיט א קבוצה תלמידי היכל הקודש מתפלל זיין ביי די הייליגע צדיקים, קדושים אשר בארץ המה. איך האב מתפלל געווען פאר דיר.
איך האב דיר שוין לאנג נישט געזען, איך בענק זיך צו דיר, איך האף אז אלעס איז ביי דיר אין בעסטן ארדענונג, איך האף אז דו נוצט דעם רבינ'ס עצות, די זיסע עצה פון זוכן גוטס אין זיך און אין א צווייטן. דער רבי זאגט (לקוטי מוהר"ן חלק א', סימן רפב) אפילו מען זעט זיך פול מיט חסרונות, מען זעט זיך שלעכט, מען איז פול מיט תאוות רעות – מוז מען זוכן א פינטעלע גוטס און מאכן אן עסק פון די נקודות טובות, זיך ליב האבן מיט די פינטעלע גוטס, דאס ברענגט דעם מענטש צו ווערן א גרויסער צדיק.
איך האב דיר זייער ליב, דעריבער וועל איך דיר שרייבן אביסל די סדר הנסיעה.
מיר זענען ארויסגעפארן זונטאג נאכמיטאג פון נוארק צוזאמען פינף און דרייסיג מענטשן; אפאר בחורים פון ישיבה מיט אינגעלייט תלמידי היכל הקודש. אויפ'ן וועג האב איך געשריבן בריוון. איך בין געווען זייער פרייליך, ווייל איך האב געבעטן דעם אייבערשטן איך זאל זיין פרייליך.
מיר זענען אנגעקומען קיין וויען מאנטאג אינדערפרי, מיר זענען צוגעפארן צום בית המדרש, מיר האבן געכאפט א טבילה, דארט האבן מיר זיך באגעגנט מיט נאך חברים תלמידי היכל הקודש פון ארץ ישראל, טייערע אינגעלייט, גרויסע מפיצים.
מיר האבן געדאווענט, איך האב געליינט, עולה געווען לתורה און געבענטשט גומל. מען האט געגעסן פת שחרית און זיך ארויסגעלאזט קיין אונגארן.
אויפ'ן וועג האבן מיר זיך אפגעשטעלט ביים ציון פון הייליגן חתם סופר זכותו יגן עלינו, מיר האבן געזאגט אינאיינעם דעם "יום ראשון" פון תהלים, געזינגען ניגוני התעוררות און זיך מתבודד געווען. האברך ... נרו יאיר האט מיר געברענגט אלע נעמען פון די וואס העלפן די ישיבה, איך האב געבעטן פאר אלעמען, פאר דיר אויך, דיין נאמען איז געווען אויף די קוויטלעך.
מיר האבן געדאווענט מנחה און זיך ארויסגעלאזט אויף א לאנגע נסיעה, זיבן שעה זענען מיר געפארן אלע אינאיינעם מיט א באקוועמע באס, רוב וועג, פאר לאנגע שעות, האבן מיר גערעדט שיחות וסיפורים פון הייליגן רבי'ן.
איך האב פארברענגט מיט די ארץ ישראל'דיגע חברים, מיר האבן זיך מחזק געווען מיט די אוצרות וואס מוהרא"ש האט אונז איבערגעגעבן פון רבי'ן. עס זענען געווען צוויי גבאים פון בית המדרש היכל הקודש ירושלים, מיר האבן גערעדט געוויסע פונקטן וואס מען דארף אכטונג געבן אין א בית המדרש היכל הקודש.
מיר זענען אנגעקומען אין אוהעל שפעט ביינאכט, מיר זענען געגאנגען קודם דאווענען מעריב, איך האב געזען אז עס איז דא א מקוה האט מיר אנגעכאפט א חשק זיך צו טובל'ען. הגם איך בין געווען אינדערפרי אין מקוה, אבער א ברסלב'ער חסיד גלוסט זיך ווי מער צו גיין אין מקוה, למעשה האב איך זיך אפגעבריט מיינע פיס, עס איז געווען קאכעדיג הייס, סכנת נפשות, איך בין ארויס מיט א נס.
מיר האבן געזאגט אינאיינעם "יום שני" פון תהלים און מיר האבן געזינגען דעם "אהבה רבה" ניגון פון רבי הערשעלע רימנובער זכותו יגן עלינו, עס איז געווען א גרויסע התעוררות, איך האב געהאט גרויס התעוררות, איך האב זיך געעפנט מיין הארץ, איך האב געהאט אפאר מינוט גוטע התבודדות, אויך דארט האב איך פארגעליינט אלע נעמען פון אלע קוויטלעך.
איך בין ארויס פון דארט האב איך זיך אנגעהויבן גוט שפירן. דארפסט פארשטיין, נאכן פארן אזויפיל שעות ווערט מען צעטומלט, אבער אז דער אייבערשטער העלפט, מען קען זאגן אפאר אמת'ע דיבורים פאר'ן אייבערשטן, מען קען זיך אויסקרעכצן און לאזן א טרער – דארף מען שוין נישט עפעס מער.
פון דארט זענען מיר געפארן קיין ליסקע צום הייליגן צדיק רבי הערשעלע ליסקער זכותו יגן עלינו, דער מחבר פונעם ספר אך פרי תבואה, א תלמיד פונעם הייליגן ישמח משה זכותו יגן עלינו. מיר האבן דארט געזאגט אינאיינעם תיקון חצות, תיקון רחל און תיקון לאה, מיר האבן געזינגען אידישע תפילות אינאיינעם. מיר האבן געזינגען דעם ניגון פון הרב הקדוש רבי אייזיקל קאלובער זכותו יגן עלינו:
"גלות גלות, ווי גרויס ביסטו - שכינה הקדושה, ווי שיין ביסטו.
וואלט דער גלות קלענער געווען - וואלט די שכינה שענער געווען".
עס איז געווען א גרויסע התעוררות, צוביסליך זענען מיר געקומען צו זיך.
פון דארט זענען מיר געפארן קיין קערעסטיר, מיר האבן זיך דערכאפט דאס הארץ, עס איז געווען צוגעשטעלט א געשמאקע סעודה, מיר האבן דארט גענעכטיגט.
דינסטאג אינדערפרי האבן מיר זיך גע'טובל'ט אין מקוה און געדאווענט, געגעסן פת שחרית און ארויף צום ציון פון הרב הקדוש רבי ישעי'לע מקערעסטיר זכותו יגן עלינו. מיר האבן געזאגט דעם יום תהלים, "יום שלישי", נאכדעם האבן מיר געזינגען ניגוני התעוררות און זיך מתבודד געווען.
איך האב געבעטן פאר דיר דארט. איך וועל דיר זאגן דעם אמת, איך וואלט נישט געדענקט צו בעטן פאר דיר, נאר האברך ... נרו יאיר האט מיר געגעבן דיין נאמען מיט נאך אסאך נעמען, די אלע וואס העלפן די מוסד, האב איך געבעטן פאר דיר; עס איז געווען א גרויסע התעוררות.
האברך ... נרו יאיר פון קרית ברסלב האט געמאכט אן אפיל, מען האט צאמגענומען צדקה פאר'ן בית התבשיל, פאר נצרכים פון אנשי שלומינו.
פון קערעסטיר זענען מיר געפארן קיין מאַד, אויפ'ן וועג האבן מיר געהאט שיחות חברים מיט די חברים פון ארץ ישראל און פון חוץ לארץ.
איך בין יעצט אביסל אפגעמאטערט פון די נסיעה, איך האב נישט די כוחות זיך מצמצם זיין צו שרייבן וואס מען האט גערעדט, הלוואי זאלן די אינגעלייט דאס אפשרייבן; מען האט גערעדט אזעלכע שיינע שיחות וסיפורים פון מוהרא"ש און אנשי שלומינו.
מיר האבן געזאגט צען קאפיטלעך תהלים ביים ציון פונעם קול ארי' זכותו יגן עלינו, נאכדעם האבן מיר געזאגט דעם קאפיטל "שיר המעלות ממעמקים" פסוק בפסוק ביים ציון פונעם לבושי מרדכי זכותו יגן עלינו. מיר האבן געזינגען די שיינע זיסע ליד:
"איך וויל זיין א איד, איך וויל זיין א איד - איך וויל זיין א פשוט'ער איד,
ווייל דער עיקר אידישקייט - זאגט דער הייליגער רבי - איז זיך פירן בתמימות ובפשיטות".
מען האט דאס געזינגען מיט'ן גאנצן הארץ צום אייבערשטן.
פון דארט זענען מיר געפארן קיין קאלוב, אויפ'ן וועג האבן מיר געלערנט דעם שיעור גמרא, עס איז געווען אזוי שיין צו זען ווי אזוי אנשי שלומינו לערנען שיעורים כסדרן.
מיר האבן געזינגען ניגונים פון הרב הקדוש מקאלוב, מען האט זיך מחזק געווען מיט דעם רבינ'ס עצות פון דאנקען דעם אייבערשטן. בפרט יעצט אין די הייליגע חנוכה טעג, זאגט דער הייליגער רבי (לקוטי מוהר"ן חלק ב', סימן ב) חנוכה איז טעג פון הודאה; דער גאנצער לעבן ווערט גוט און זיס ווען מען דאנקט דעם אייבערשטן, מען ווערט נענטער און נענטער צום אייבערשטן.
ביים ציון פון הרב הקדוש מקאלוב זכותו יגן עלינו האבן מיר געזען די טיטל וואס מען האט געשריבן אויף די מצבה: "הי' ערליכער איד, והי' לומד גמרא על הדף".
מען האט געזאגט דארט די סוף פונעם יום תהלים, "יום רביעי", מען האט געזינגען א ניגון פון הרב הקדוש מקאלוב זכותו יגן עלינו, געדאווענט מנחה און זיך ארויסגעלאזט אויפ'ן וועג קיין רומעניע.
אויפ'ן וועג האבן מיר גערעדט מעשיות וואס מיר האבן געהאט, ניסים וואס דער אייבערשטער האט געמאכט מיט'ן באצאלן חובות.
די וועג קיין רומעניע איז געווען אביסל שווער, מען האט אונז אויפגעהאלטן ביים גרעניץ אפאר שעה, מען איז אנגעקומען שפעטער ווי געפלאנט קיין סיגוט.
אין סיגוט האט קהילת סאטמאר געבויט א הערליכע בנין, א מקוה, א בית המדרש - מיט אלע באקוועמליכקייטן, דו מיינסט ממש אז דו ביסט אין וויליאמסבורג אדער מאנרא. מיר האבן דארט געגעסן, געדאווענט מעריב און געגאנגען צום ציון פונעם הייליגן ייטב לב, קדושת יום טוב און עצי חיים זכותם יגן עלינו. מיר האבן דארט געזאגט אינאיינעם תיקון חצות, דארט ביים ציון, נאכדעם האבן מיר געזאגט תהלים, "יום חמישי".
לכתחלה האבן מיר געהאט אין פלאן צו פארן קיין קארלסבורג צום מראה יחזקאל זכותו יגן עלינו, אבער א טייל עולם האבן זיך ממש געבעטן מען זאל אפשטעלן די נסיעה, עס איז געווארן חלוקי דעות, א טייל האבן געזאגט מען זאל גלייך פארן קיין קארלסבורג, א טייל האבן געזאגט אז אויב מען פארט ווייטער שפירן זיי אז דאס וועט זיי צוטרעטן צום מח, עס איז נישט פאר זייערע כחות צו פארן יעצט ביינאכט א נסיעה פון זעקס שעה.
איך האב געהאט גרויס חשק צו פארן קיין קארלסבורג, די גאנצע זאך וואס מיר זענען געפארן בכלל קיין רומעניא איז נאר געווען אז מיר זאלן קענען גיין קיין קארלסבורג, דאך האב איך זיך געמוזט רעכענען מיט די אויסגעמוטשעטע אידן, מען האט אפגעשטעלט די נסיעה און מען האט זיך אראפגעלייגט פאר דריי שעה, פון דריי אזייגער פארטאגס ביז זעקס אזייגער.
מען האט געדאווענט און זיך ארויסגעלאזט קיין קלויזנבורג, א וועג פון פיר שעה, אויפ'ן וועג האבן מיר געלערנט דעם דף גמרא. מוהרא"ש זכותו יגן עלינו האט אין אונז אזוי שטארק אריינגעבאקן מיר זאלן לערנען יעדן טאג א בלאט גמרא, אפילו מען איז אונטערוועגנס, צעבראכן און צעפארן, דאך איז מען נישט מוותר אויפ'ן בלאט גמרא.
וואס זאל איך דיר זאגן מיין טייערער ברודער, מיין הארץ איז פול מיט לויב און דאנק צום אייבערשטן אז ער האט אויף מיר רחמנות געהאט, מיך מקרב געווען צום רבי'ן; וואו וואלט איך געווען, ווי אזוי וואלט איך אויסגעזען אן דעם רבינ'ס עצות, שכל און חיזוק? דאס האלט אונז ביים לעבן, דאס ברענגט אונז צום אייבערשטן. אז מען פאלגט דעם רבי'ן, מען באנוצט זיך מיט די עצה פון התבודדות און תפלה – איז מען גאר גליקליך.
מיר קומען שוין אן אין קלויזנבורג עירפארט, מיר פארן פון דארט קיין ווארשא און פון דארט פארן מיר אהיים קיין ניו יארק; מיר וועלן אנקומען אם ירצה ה' מיטוואך נאכט.
מארגן וועט נישט זיין די וועכנטליכע שיעור, עס איז דא א חתונה אין ישיבה, די דרייסיגסטע חתונה אין ישיבה בחנם. דאס אלעס איז צו פארדאנקען מוהרא"ש זכותו יגן עלינו וואס האט אונז געלערנט מיר זאלן זיך נישט נאריש מאכן מיט טייערע שמחות; מיר זאלן חתונה מאכן די קינדער יונג אויפ'ן פשוט'ן וועג.
דעם שבת פרשת וישב, שבת מברכים חודש טבת, וועל איך זיין אין שטעטל. אויך די קומענדיגע וואך, שבת חנוכה, וועל איך זיין אם ירצה ה' אין שטעטל, זיין מיט אנשי שלומינו.
איך דארף מקצר זיין, איך וועל דיר נאך שרייבן.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד אונזער חשוב'ע מנהלת תחי' ברסלב, ליבערטי
איך בין יעצט אין הימל העכער די וואלקענעס, אויפ'ן וועג צו מקומות הקדושים. איך וועל מתפלל זיין פאר אייך און פאר אלע טיטשערס און תלמידות.
איך וויל אייך בעטן, ווערן איר געבט שיעורים פאר כלות און ווייבלעך, זאלט איר זיי זאגן וואס מוהרא"ש האט געהאלטן וועגן נעי"ל פאלי"ש, מוהרא"ש איז געווען זייער דערקעגן. מוהרא"ש האט קיינעם נישט געשוינט, ווען פרויען האבן געפרעגט מוהרא"ש אויב זיי מעגן לייגן נעי"ל פאלי"ש איז מוהרא"ש געווארן זייער צוקאכט און געזאגט א שטארקע ניין.
אפילו די פרויען וואס מען קען זיי נאכנישט זאגן אלעס, מען דארף גיין מיט זיי שטייטלעך, בהדרגה; די פרויען וואס מוהרא"ש פלעגט זיי נישט זאגן אין אנהייב ווי אזוי זיך צו פירן - אויך זיי האט מוהרא"ש שטרענג געזאגט אז מען טאר דאס נישט לייגן. אפילו די קלעי"ר (די דורכזיכטיגע) איז אסור, אויך איז דאס א חציצה, עס ברענגט צו גרויסע מכשולות.
לערנט די כלות מיט די ווייבלעך די שיינקייט פון צניעות, דאס זיסקייט פון אידישע קליידער. אפילו זיי מאכן זיך שיין פאר'ן מאן וכו' זאלן זיי זיך שיין מאכן אויף די אידישע וועג. די וואס לערנען מיט כלות זיך אהערצושטעלן מיט פריצות'דיגע בגדים - איז דמיונות; עס העלפט נישט, עס מאכט נישט פרייליך און עס מאכט נישט זאט.
בנוגע דער גוי אין סקול; איך זאג נאכאמאל קלאר און הויך, איך האף מען וועט מיר הערן פון פאלגן: "איך וויל נישט עס זאל זיין א גוי אין סקול אין די שעות וואס די קינדער זענען דארט!" ענדערש זאל זיין שמוציג, ענדערש זאל מען זיך נישט קיין עצה געבן, ווי איידער א גוי טמא זאל זיך דרייען צווישן די מיידלעך.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך האב היינט געזען בילדער פון די ארבעט ביים בנין התלמוד תורה. איך בין אזוי פרייליך צו זען ווי די ארבעט גייט שנעלער ווי איך האב זיך פארגעשטעלט.
וואס זאל איך דיר זאגן, האסט גענומען פאר דיר א גוטן מקח. אלע צדקות זענען הייליג, אלע צדקות זענען וויכטיג, אבער דו האסט געכאפט א גוטער ביינדל, א גרויסער מוציא; די זכות פון תורה פון תינוקות של בית רבן - דאס איז העכער אלעס!
דער בנין וואס דו האסט מנדב געווען מיט אלע צוגעהערן - דאס האסטו, דאס איז דיינס, דאס וועסטו מיטנעמען מיט דיר, דאס וועט דיך ראטעווען פון חבוט הקבר ומדינה של גיהנום.
די גאנצע וועלט שטייט אויף די תורה פון תינוקות של בית רבן, און ווער עס העלפט קינדער זאלן האבן א פלאץ וואו צו לערנען, זאלן האבן עסן, עס זאלן זיין מלמדים - דער אינוועסטירט אין גוטע פלעצער.
איך בין דיר מקנא מיט דעם.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
מרת ... תחי'
איך שפיר אז איך דארף אייך שרייבן ווי איבערגענומען איך בין פון אייער מאן.
עס איז אריבער אפאר יאר פון ענקער חתונה, יעצט קען מען זען ווער דער מענטש איז. די ערשטע שטיק צייט פון די חתונה איז ביי אלעמען א צייט וואס מען ווארט צו זען ווי דער מענטש וועט זיך באלאנסירן. יעצט זע איך אייער מאן קומען אין שול לערנען, ער האט זיינע שיעורים קבועים, ער דאווענט ערליך און אלע האבן הנאה פון אים, ער העלפט די מוסד אזוי געטריי. איך האלט זייער פון אים, איך האב אים זייער ליב, מיר ווערן אלץ נענטער און נענטער.
חנוכה איז א צייט פון דאנקען און לויבן, זאלט איר זיצן אין די זייט ווען אייער מאן צינדט אן די הייליגע ליכט און דאנקען דעם אייבערשטן, זיצט מיט די קינדער און זאגט: "שכוח אייבערשטער".
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר
איך פלי יעצט אין די הימלען, איך פלי מיט אן עראפלאן; מיר זענען יעצט אויף א נסיעה צו מקומות הקדושים מיט א גרופע אינגעלייט מתפלל זיין פאר די גאנצע קהילה.
איך האף צום אייבערשטן אז דו פירסט זיך שיין צו דיין ווייב. דו האסט באקומען א מתנה פון הימל, דו האסט א נס; דו האסט באקומען א טייערע ווייב, זאלסטו אכטונג געבן אויף איר, זי זאל זיין ביי דיר דאס טייערסטע זאך, רעד צו איר ווייך און הארציג.
קום צו מיר מיט דיין ווייב, איך וויל ענק מדריך זיין, ענק לערנען ווי אזוי צו לעבן. בדרך כלל נעם איך אויף תלמידים יעדן זונטאג, זונטאג ארבעטן ענק נישט, זאלט איר קומען.
עס איז וויכטיג פאר א יונגע פארפאלק צו האבן הדרכה, עס נעמט א שטיק צייט ביז מען שטייט אויף די אייגענע פוס.
רוף מיר פרעגן אויב דו זאלסט קומען, פאר דו קומסט.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך הער אז ביי דיר אין שטוב קומען זיך צאם אין די צייט פון שלש סעודות יונגע ווייבלעך, שכנים; מען פארברענגט אינאיינעם, מען איז זיך מחזק, מען דערציילט מעשיות פון תפלה.
זאג פאר דיין ווייב אז איך האב זייער הנאה אז מען טוט דאס, עס איז א גרויסע זאך צו מחזק זיין איינער דעם צווייטן אויף תפילה און אמונה.
אין אנהייב ווען מיר האבן געעפנט די שטעטל, פלעגן די פרויען זיך צאמנעמען איינמאל א וואך, דינסטאג נאכט; מען האט געשמועסט פון תפילה, אויך יעדע וואך האט גערעדט א צווייטע פרוי, זי האט דערציילט איר סיפור התקרבות, אדער אירע שווערע מניעות און ווי אזוי זי איז דאס בייגעקומען. צוביסליך איז געווארן מער און מער משפחות, איז שוין שווער צו האלטן א גאנצע עולם שטיל.
עס איז דא א פרוי וואס זי איז זיך ממש מוסר נפש פאר די פרויען צאמקום, עס איז איר זכות פון אנהייב ביז'ן סוף, זי פרובירט עס זאל זיין מיט א געשמאק, זי פרובירט צו האלטן די זאך מסודר, מיט א סדר. למעשה זענען דא פרויען וואס האבן נישט קיין חשק צו די פראגראם, דעריבער פריי איך זיך אז ביי ענק אין שטוב קומט מען זיך צוזאם רעדן חיזוק אויף תפילה.
שלש סעודות איז א צייט וואס איז זייער הייליג, די צדיקים האבן דאס געוויסט, האבן זיי איינגעפירט מען זאל זיך צאמנעמען און רעדן פון הייליגע זאכן.
זאג פאר דיין ווייב זי זאל ממשיך זיין זיך צאמנעמען מיט'ן ציל צו דערציילן שיינע מעשיות פון תפלה און פון צדיקים וכדומה.
אז עס איז געשטעלט אויף חיזוק פאר תפלה און סיפורי צדיקים - וועט עס האבן א קיום, עס וועט ארויסקומען נאר גוטע זאכן.
הלוואי זאלן דאס אנדערע פרויען נאכמאכן.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר
פרעג דיין ווייב אויב זי קען צאמנעמען די עלטערע מיידלעך מיט די יונגע ווייבלעך, מאכן א גרופע ווער עס וויל העלפן ביי די ווייבער שול ווען עס איז דא שמחות.
ביי די מענער זענען דא אינגעלייט מיט בחורים, מען ארבעט אינאיינעם, אלע צוזאמען, בהתנדבות. קיינער דארף נישט קיין געלט, מען וויל זיך העלפן איינער דעם אנדערן, מען זאל קענען חתונה מאכן בחנם.
ביי די פרויען טוען דאס די מיידלעך, אבער צוביסליך האבן די מיידלעך חתונה, אויך זענען אסאך תלמידות געגאנגען לערנען אין שטעטל סקול, עס ווערט אפגעשוואכט די העלפערס וואס העלפן.
עס לאזט זיך נישט גלייבן, די וואך וועט זיין מיט'ן אייבערשטנ'ס הילף די "דרייסיגסטע!" חתונה. מאך א חשבון וויפיל מיר האבן געשפארט; דרייסיג חתונות איז א חשבון פון זעכציג מחותנים'ס חתונה - בחנם, הונדערטער טויזנטער דאלער איינגעשפארט פאר אידישע קינדער.
נעכטן נאכט איז געווען נאך א שמחה אין ישיבה ביי התלמיד ... נרו יאיר, מיט א תלמידה פון סקול; די גאנצע שידוך, פון אנהייב ביזן סוף, לחיים-ווארט-תנאים - האט געקאסט נישט מער פון ניינציג דאלער, פאר די ברעסלעט.
פרעג איך דיר, איז דאס נישט א ווייטאג צו הערן פון מענטשן ווי זיי ווערן בעלי חובות ביים שידוך טון...
פרעג דיין ווייב אויב זי איז גרייט.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר, מאנסי
איך פריי זיך צו הערן אז דיין ווייב נעמט צוזאם נשות אנשי שלומינו ביי ענק אין שטוב זיך מחזק זיין מיט'ן רבינ'ס עצות.
באמת דארפן פרויען אסאך מער חיזוק ווי די מענער. די פרויען זענען מיט די קינדער טאג און נאכט, נאכט און טאג - אן א הפסק, זייער גאנצע לעבן איז איין שטיק מסירות נפש. די פרויען זאגן אז די צאמקום - דאס געבט זיי כח, זיי קוקן ארויס אויף דעם; זיי קומען אהיים פריש, אנגעפילט מיט כח ווייטער צו טון די שטוב ארבעט.
ווייז דעם בריוו פאר דיין ווייב, זאל זי וויסן אז זי האט א גרויסע זכות; נישטא קיין גרעסערע זכות ווי מחזק זיין אידישע קינדער.
יעצט דריידט זיך איבער די וועלט מיט א נייעס, מען האט מפנה געווען א אידישע נפטר פון מאראקא, ער איז אוועק באלד צוויי יאר צוריק, דעמאלט האט מען נישט געלאזט טראגן נפטרים קיין ארץ ישראל, האט מען אים באערדיגט אין מאראקא און יעצט האט מען אים ארויפגעטראגן קיין ארץ ישראל. די חברה קדישא זענען צוגעוואוינט צו אזעלכע זאכן, מען באערדיגט די ביינער, למעשה ווען מען האט געעפנט די ארון האבן זיי געזען א גאנצער מענטש, אזוי ווי ער וואלט יעצט אוועק.
דער איד איז געווען א שליח חב"ד, ער האט מזכה געווען אידן אין מאראקא. די גוף זיינע איז געווען פריש, אזוי ווי ער וואלט נפטר געווארן נעכטן.
דאס איז א קידוש השם, צו זען דאס גרויסקייט פון צדיקים; זייער גוף בלייבט פריש. די וואס טוען פאר אנדערע אידן, זיי זענען מחזק אידן, ברענגען זיי צוריק צום אייבערשטן - די בלייבן גאנץ.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך האב געזען א בילד וואס גייט מיר נישט ארויס פון קאפ; איך האב געזען מוהרא"ש אפאר טעג פאר'ן הסתלקות אין שפיטאל אויפ'ן בעטל, מוהרא"ש האט געפאטשט און געשמייכלט, מוהרא"ש האט געזאגט: "איך פאטש אז איך גיי אוועק פון די וועלט".
וואס זאל איך דיר זאגן, דאס בילד לויפט מיר נאך. מוהרא"ש האט אין זיין לעבן זיך אפגעליטן צרות צרורות און דאך האט ער נישט פארלוירן די אמונה, נישט געהאט קיין קשיות אויף די אמונה, ער האט זיין גאנץ לעבן נאר געטון פאר די אמונה; אריינברענגען אמונה אין אונז און אין די גאנצע וועלט.
אז מיר וועלן פאלגן מוהרא"ש, מיר וועלן גיין אין די וועגן, מיר וועלן זיך באנוצן מיט די עצות פון רבי'ן - וועלן מיר זוכה זיין צוצוקומען צו א שטארקע אמונה, מיר וועלן זיין צוגעקלעבט צום אייבערשטן, מיר וועלן אויך קענען פאטשן און שמייכלען, זיין אמת'דיג איבערגעגעבן צום אייבערשטן.
טייערער ברודער, גיי אביסל שפאצירן, זיי זיך מתבודד; בעט דעם אייבערשטן ער זאל דיר מקרב זיין צו אים, בעט אים: "קרבינו לעבודתיך, הט לבי ליראה את שמך", בעט אין אידיש: "טאטע איך וויל זיין ערליך, העלף מיר".
עס איז דאך א מחי' דאס לעבן ווען מען גייט התבודדות.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך בין יעצט אין הימל אויפ'ן פליגער, אויפ'ן וועג צו מקומות הקדושים; איך גיי בעטן פאר אונז אלע און פאר דיר און דיין ווייב.
איך וויל דיר זאגן, איך הער גאר גוטע גרוסן אויף דיר, הערליכע זאכן; דיין לערנען, דיין דאווענען ויראת שמים; איך פריי זיך זייער צו הערן.
איך בענק זיך זייער צו דיר, איך האף צו זיין אין שטעטל די וואך שבת מברכים חודש טבת, איך האף דיר צו זען.
איך האב זיך זייער געפרייט צו זען דיין בריוו פון מקוה; אז זייט דו האסט געהערט א שמועס צוויי יאר צוריק ביי קאראנע וועגן מקוה, ווי וויכטיג מקוה איז – האסטו נישט פארפעלט קיין איין טאג מקוה.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
בנוגע באדן וכו'; דיין זון ווערט שוין גרויס, איז בעסער אים צוגעוואוינען צו נעמען א שויער.
איך האב זייער הנאה אז דו פרעגסט יעדע פרט ופרט פון חינוך הבנים והבנות.
דער אייבערשטער זאל העלפן זאלסט האבן נחת דקדושה.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
מרת ... תחי' ברסלב, ליבערטי
אזוי ווי איר האט אייזערנע געדולד צו די קינדער אין סקול, איר זענט א געטרייע מחנכת, איר האט סבלנות צו די מיידלעך, איר ווערט נישט פארלוירן ווען א מיידל לאכט, שמייכלט, שטעקט ארויס די צונג וכדומה; נאך מער סבלנות און ווארעמקייט דארף מען האבן צו דערוואקסענע.
פארוואס זאג איך אייך דאס?
איך ווייס אז איר פרובירט מיט אלע כחות צו מאכן די וועכנטליכע צאמקום פאר די טייערע פרויען, נשות אנשי שלומינו. אין אנהייב ווען די שטעטעל איז געווען קליין, געציילטע משפחות - איז געווען ממש א מחי', אזוי ווי די שפריך ווארט גייט: "ווי קלענער דער עולם - אלץ גרעסער די שמחה"; מען איז געזיצן אינאיינעם די פאר פרויען, מען האט געשמועסט, מען האט גערעדט פון תפלה, פון צדיקים. יעצט איז די שטעטל זיך אביסל צואוואקסן איז אייך שווער צו האלטן שטיל די פרויען און הערן מעשיות פון תפילה, אזוי אויך ווען איר נעמט די מייק און איר בעט מען זאל זיין שטיל.
זאלט איר נישט נעמען גארנישט פערזענליך, קיינער מיינט נישט קיין שלעכטס; יעדער איז גוט, יעדער איז וואויל; מען דארף האבן סבלנות און שכל צו דערוואקסענע מענטשן אזוי ווי צו קינדער.
שטארקט זיך, זייט יעדן איינעם מחזק; אלע דארפן א גוט ווארט, אלע דארפן א שמייכל. דער וואס געדענקט צו שמייכלען צו יעדן איינעם, מאכט יעדן גוט שפירן - באקומט א שמייכל פונעם אייבערשטן אליינס; מען הייבט אן שפירן א נאנטקייט צום אייבערשטן, וואס אן אנדערער שפירט נישט.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
יעצט קומען די הייליגע חנוכה טעג, איך וועל דיר שרייבן אפאר הנהגות:
- מיר פירן זיך אנצוטון בגדי שבת (שטריימל און בעקיטשע) בעפארן צינדן די הייליגע ליכט, מען בלייבט זיצן מיט די בגדי שבת די האלבע שעה אדער מער – וואס מען זיצט ביי די ליכט.
- מיר צינדן נישט ביים פענסטער ווייל היינט איז די עיקר פרסומי ניסא אין שטוב, מיר צינדן ביי א טיר, ביי די לינקע זייט.
- עס איז כדאי צו כאפן א טבילה בעפאר'ן צינדן, אבער דאס קען נישט אפשטופן דאס צינדן.
- ערב שבת חנוכה צינדט דער מאן אן קודם די מנורה און גלייך נאכדעם צינדט די ווייב די שבת ליכט.
- מוצאי שבת חנוכה מאכט מען קודם הבדלה און נאכדעם צינדט מען אן די חנוכה לעכט.
- מען דארף זיין אין שטוב אלע נעכט חנוכה צייטליך, אפילו די וואס זענען עוסק אין די הייליגסטע זאך, אין הפצה – דארפן אלעס אפשטעלן און אהיים גיין צינדן אין צייט, זינגען און טאנצן מיט די משפחה.
- חנוכה איז א צייט פון "להודות ולהלל", מען דארף דאנקען און לויבן דעם אייבערשטן אז מיר ווייסן פון רבי'ן, מיר האבן אזא רבי מיט אזעלכע תלמידים.
בעזרת ה' יתברך
יום ב' פרשת וישב, י"ח כסליו, שנת תשפ"ב לפרט קטן
לכבוד מיין טייערער ... נרו יאיר
יעצט קומט יום טוב חנוכה, דער הייליגער רבי זאגט (לקוטי מוהר"ן חלק ב', סימן ב): "יְמֵי חֲנֻכָּה הֵם יְמֵי הוֹדָאָה", חנוכה איז א צייט פון דאנקען און לויבן דעם אייבערשטן, דאס איז שעשועי עולם הבא.
דעריבער וויל איך דיר מחזק זיין דו זאלסט אנהייבן פון היינט, פונדאסניי - דאנקען דעם אייבערשטן אויף די ניסים וואס ער טוט מיט דיר.
זע צו זיין צייטליך, ביים זמן הדלקה - אין שטוב, זעקס אזייגער איז דער זמן. מאך זיך גרייט דו זאלסט קענען זיין צייטליך.
צינד די הייליגע מנורה, זינג זמירות און זאג: "שכוח אייבערשטער פאר מיין לעבן, שכוח אייבערשטער איך בין א איד, שכוח אייבערשטער איך האב א משפחה, שכוח פאר יעדע זאך"; דאנק און לויב אן א שיעור, דאס וועט עפענען א טיר אין הימל, עס וועט קומען נאך ניסים, נאך ישועות.
א יישר כח פאר אלס וואס דו האסט געהאלפן פאר די נסיעה; איך וועל מתפלל זיין פאר דיר, פאר דיין ווייב און קינדער.
