בריוון פונעם ראש ישיבה שליט"א

בעזרת ה' יתברך

יום ב' פרשת וירא, י"ב מרחשון, שנת תשפ"ב לפרט קטן

א מתנה פאר מיין ליבער תלמיד ... נרו יאיר

זע צו לערנען און דאווענען – וועסטו אויסוואקסן א גרויסער צדיק.

וואס דו דארפסט - זאלסטו בעטן דעם אייבערשטן אויף דיין שפראך.

פון דיין ראש ישיבה.

בעזרת ה' יתברך

יום ב' פרשת לך לך, ה' מרחשון, שנת תשפ"ב לפרט קטן

לכבוד מיין טייערער ... נרו יאיר

הער נישט אויף דאנקען דעם אייבערשטן אויף די גרויסע חסדים וואס ער טוט מיט דיר, האסט א וואוילע ווייב און א געזונט ליכטיג קינד; דארפסטו נאר דאנקען און לויבן דעם אייבערשטן, וועט דער אייבערשטער דיר שענקען נאך גוטס.

זע אז דיין קאפ זאל זיין אין גוטע זאכן, דאס הייסט, אפילו דו דארפסט זיין פארנומען צו ברענגען פרנסה, זאל דיר דיין קאפ זיין אין תכלית. אדער זאלסטו זיך מתבודד זיין, אדער עוסק זיין אינמיטן ארבעט מיט הפצה; ווען דו טרעפסט איינעם געב יענעם א ספר וכדומה, אדער בענק צום בית המדרש; ווארט צו קענען לערנען און דאווענען.

עס קען זיין א מענטש א מענטש האט געארבעט כל ימיו און ווען ער קומט ארויף אין הימל זעט מען ווי דער מענטש האט זיין גאנץ לעבן געלערנט און געדאווענט, ווייל ער האט געוואלט, געבענקט און געגליסט צו דעם; איז דאס אזוי ווי ער האט דאס געטון.

בעזרת ה' יתברך

מוצאי שבת קודש פרשת עקב, כ"ב מנחם-אב, שנת תשפ"א לפרט קטן

לכבוד מיין טייערער ... נרו יאיר

איך וויל דיר מחזק זיין זאלסט לערנען דיינע שיעורים כסדרן יעדן טאג, לערן יעדן טאג אביסל חומש רש"י, שנים מקרא ואחד תרגום; זונטאג ביז שני, מאנטאג ביז שלישי און אזוי ווייטער.

אויך זאלסטו לערנען יעדן טאג אביסל משניות, לערן צוויי דריי פרקים משניות יעדן טאג; משניות וואשט אפ די נשמה, משנה איז די אותיות נשמה.

אויך לערן אביסל גמרא; אפילו דו פארשטייסט נישט – זאלסטו זאגן די הייליגע ווערטער, דער רבי זאגט (שיחות הר"ן, סימן עו): "שֶׁאֵין צְרִיכִין בְּלִמּוּד רַק הָאֲמִירָה לְבַד", דער עיקר איז דאס זאגן די ווערטער פון די תורה.

טייערער ברודער, נאר דאס וועלן מיר מיטנעמען אויף אייביג; ווילאנג מען לעבט קען מען זיך אנגרייטן מיט צו נעמען תורה, תפלה און מעשים טובים; וואס מען גרייט זיך אן – דאס נעמט מען מיט אויף יענע וועלט.

בעזרת ה' יתברך

יום ג' פרשת דברים, ד' מנחם-אב, שנת תשפ"א לפרט קטן

לכבוד מיין ליבער ... נרו יאיר, קרית ברסלב

זעט אויס די שטעטל איז שוין גרויס, אז עס גייט אריבער אפאר וואכן וואס איך בין דא זומער און עס איז מיר נאכנישט אויסגעקומען צו רעדן מיט דיר אדער אפילו דיר באגרוסן.

איך האף צום אייבערשטן אז אלעס איז אין ארדענונג ביי ענק. דיינע קינדער זע איך יא, איך זע זיי אין חדר און אין סקול, זיי זענען זייער ליכטיג און טייער.

טייערער ברודער, פארגעס נישט פון תכלית; מיר זענען דאך ביים בעל תפלה (ספורי מעשיות, מעשה יב) וואס ער פלעגט ארומגיין זאגן: "עס איז נישטא קיין אנדערע תכלית בזה העולם נאר צו דינען גאט ברוך הוא"; לערנען שיעורים כסדרן, דאווענען דריי תפילות מיט מנין און זיך מתבודד זיין – נאר דאס איז תכלית, אלעס אנדערש איז הבל הבלים.

איך האף דיר צו באגריסן, צו האבן מיט דיר שיחות חברים.

בעזרת ה' יתברך

יום ב' פרשת דברים, ג' מנחם-אב, שנת תשפ"א לפרט קטן

לכבוד מיין ליבער ... נרו יאיר, קרית ברסלב

איך פריי זיך צו הערן אז דו ארבעטסט מער נישט אזוי שווער, האסט אראפגענומען איבריגע שעות, דו קוקסט אויף תכלית. אנשטאט צו מאכן נאך א דאלער גייסטו אהיים צו דיין משפחה, דו העלפסט דיין ווייב און נאכדעם האסטו צייט צו לערנען און דאווענען.

אז מען טראכט אריין זעט מען אז די גאנצע לעבן פליט אריבער ווי א שאטן פון א פייגל וואס פליט, אזוי ווי עס שטייט (תהלים קמד, ד): "כְּצֵל עוֹבֵר"; זאגן די הייליגע חכמים (בראשית רבה צו, ב): "הַלְּוַאי כְּצִלּוֹ שֶׁל כּוֹתֶל, אוֹ כְּצִלּוֹ שֶׁל אִילָן, אֶלָּא כְּצִלּוֹ שֶׁל עוֹף בְּשָׁעָה שֶׁהוּא עָף", עס איז דא אסאך ערליי שאטנ'ס, אפשר איז די לעבן ווי א שאטן פון א בוים אדער א שאטן פון א וואנט וואס איז נישט אזוי שנעל? ניין, נאר ווי א שאטן פון א פייגל וואס פליט; וואס וועלן מיר מיטנעמען מיט אונז? דאס דאווענען און לערנען און גוטע מעשים.

איך בין שטאלץ צו האבן אזעלכע אינגעלייט אין שטעטל; אינגעלייט וואס טראכטן פון תכלית.

בעזרת ה' יתברך

יום ג' פרשת חקת, ה' תמוז, שנת תשפ"א לפרט קטן

מרת ... תחי', קרית ברסלב

איך בין נאך שולדיג א גרויסן דאנק פאר'ן אוועק געבן אזויפיל צייט און כח אהער צו שטעלן פאר אנשי שלומינו אזא שיינע יום טוב שבועות. איר האט באוויזן צוצושטעלן פאר די גאנצע קהילה אכילה, שתי' און לינה, אלע משפחות האבן זייער הנאה געהאט; די זכות זאל אייך ביישטיין, פאר אייך און פאר אייערע דורות.

נעמט אייך נישט צום הארצן פון די וואס העצן קעגן אייער מאן נרו יאיר, אזוי איז אלץ געווען און אזוי וועט אלץ זיין; ווער עס טוט, ווער עס העלפט בויען קהילות בישראל - איז דא אויף זיי טענות, אויף זיי רעדט מען. דעריבער בעט איך אייך זייער איר זאלט זיך נישט נעמען צום הארצן, גלייבט מיר, עס טוט מיר נאך אסאך מער וויי ווען איך הער ווי מען פארשעמט אייך, ווי מען שטעכט אייך.

דאס וואס איר טוט מיט אייער מאן, איר העלפט מיר אויפבויען די שטעטל, דאס וועט איר מיטנעמען; נאר דאס, עפעס אנדערש בלייבט נישט מיט'ן מענטש, נאר וואס מען איז זוכה צו טון פאר'ן אייבערשטן - דאס נעמט מען מיט.

די בזיונות נעמט אוועק אסאך צרות.

בעזרת ה' יתברך

יום ה' פרשת קרח, א' דראש חודש תמוז, שנת תשפ"א לפרט קטן

מרת ... תחי', קרית ברסלב

בארעכנט זיך, טראכטס אריין א מינוט וואס איז דאס די לעבן פונעם מענטש; מען לעבט דאס ביסל יאר וואס איז באשערט, דאס ביסל יארן איז פול מיט צער און עגמת נפש, נאר דאס ביסל גוטס וואס מען טוט - דאס איז א זאך וואס בלייבט.

דאס וואס איר האט געטון מיט די מוסד, געראטעוועט די מוסד זאל נישט פאלן, מסדר געווען די אפיס - דאס איז אייערס, דאס וועט אייך באגלייטן בזה ובבא.

בעזרת ה' יתברך

יום ה' פרשת קרח, א' דראש חודש תמוז, שנת תשפ"א לפרט קטן

מרת ... תחי', קרית ברסלב

האברך ... נרו יאיר האט מיר געזאגט די וואך ווי גוט איר ארבעט, ווי געטריי איר טוט די ארבעט אין אפיס, ווי געשיקט איר זענט.

איך האב גרויס הכרת הטוב פאר אלע אפיס ארבעטער; געבט איבער פאר אלע ווייבלעך אז איך דאנק זיי אלע פאר'ן העלפן די מוסד אזוי געטריי.

נאך אביסל וועט איר האבן א אייגענע הויז אין שטעטל מיט גרויס שפע.

בעזרת ה' יתברך

יום א' פרשת שלח, י"ט סיון, שנת תשפ"א לפרט קטן

לכבוד מיין טייערער ... נרו יאיר

מזל טוב לכבוד די אפשערן פון דיין זון נרו יאיר; דער אייבערשטער זאל העלפן זאלסט האבן ערליך אידיש נחת ביי אים און ביי אלע קינדער.

כאפ אריין יעדן טאג אביסל תורה, מאך זיך שיעורים בכל התורה; מאך זיך א פלאן צו ענדיגן לכל הפחות איין מאל כל התורה כולה: תורה, נביאים, כתובים, ששה סדרי משנה, תלמוד בבלי, תלמוד ירושלמי, ברייתות, הלכה ואגדה. דאס לעבן גייט אריבער אזוי שנעל ווי א שאטן פון א פייגל וואס פליט, אזוי ווי עס שטייט (תהלים קמד, ד): "כְּצֵל עוֹבֵר", זאגן די הייליגע חכמים (בראשית רבה צו, ב): "הַלְּוַאי כְּצִלּוֹ שֶׁל כּוֹתֶל, אוֹ כְּצִלּוֹ שֶׁל אִילָן, אֶלָּא כְּצִלּוֹ שֶׁל עוֹף בְּשָׁעָה שֶׁהוּא עָף", נישט ווי די שאטן פון א וואנט, נאר ווי א פייגל וואס פליט; היינט האסטו אפגעשוירן למזל טוב, מארגן מאכסטו חתונה די קינדער, נאכדעם די אייניקלעך און דאס לעבן איז אריבער...

דאס פלעגט מוהרא"ש כסדר אריינבאקן אין אונז, ער פלעגט זאגן: "איך געדענק מיין אפשערן אזוי ווי עס וואלט געווען נעכטן"; ביי די זיבעציג יאר האט דאס מוהרא"ש געזאגט, ער געדענקט זיין חאלאקע אזוי ווי נעכטן.

ביי אונז איז מען מקפיד אז די אינגלעך, פון די דריי יאר – זאלן טראגן א קאפל און ציצית אויך ביינאכט ביים שלאפן. די ציצית און קאפל טוט מען קיינמאל נישט אויס פון די דריי יאר, אויסער ווען מען גייט אין מקוה אדער אין שויער.

...

יישר כח פאר'ן העלפן חודש'ליך מיט די רענט פאר די ישיבה.

בעזרת ה' יתברך

יום ד' פרשת שלח, כ"ב סיון, שנת תשפ"א לפרט קטן

לכבוד ... נרו יאיר, ביתר

דו קענסט זיך נישט פארשטעלן דיין גרויסקייט אין הימל פון דעם וואס דו ביסט מחזק צענדליגער טויזנטער מענטשן יעדן טאג. צענדליגער טויזנטער מענטשן באקומען טעגליך די חיזוק יומי, די מענטשן קענען נישט קיין אידיש, זיי פארשטייען נישט קיין אידיש, זיי פארשטייען די חיזוק יומי נאר בזכות דיר, וואס דו ביסט דאס מתרגם אזוי שיין און אזוי געשמאק.

דאס איז א מתנה פונעם אייבערשטן, צו קענען מתרגם זיין; ווייל יעדע שפראך האט זיינע וועגן, זיינע אויסדרוקן און זיינע שפריך ווערטער, און אז מען איז דאס מתרגם קען דאס פארלירן דעם געשמאק וכו', דו האסט די מתנה אז דיין תרגום ליינט זיך אזוי שיין, עס הערט זיך בעסער ווי אין אידיש.

שטארק זיך, זיי ממשיך; איך ווייס אז עס גייט אריבער אויף דיר, נישט נאר אויף דיר גייט איבער, אויף יעדן איינעם גייט איבער, אויב מען טוט גוטע זאכן, מען דערהאלט זיך, מען שטארק זיך און ווער רעדט נאך אז מען שטארקט אנדערע - איז מען זייער חשוב ביים אייבערשטן.

טייערער ברודער ..., ווי לאנג מיינסטו וועלן מיר נאך זיין דא? דער גאנצער לעבן פון א מענטש איז זיבעציג יאר, נאכדעם קערט מען זיך צוריק צום אייבערשטן, דעמאלט וועט מען זען דאס גרויסקייט פון 'הפצה', דאס גרויסקייט פון די וואס האבן מחזק געווען אידישע קינדער.

איך בין געווען אין ארץ ישראל ל"ג בעומר, איך האב געהאט בדעה דיר צו טרעפן, איך האב געהאט אין פלאן אז איך וועל קומען צו דיר, למעשה בין איך אהיים געקומען פריער, איך בין נישט אנגעקומען דיר צו טרעפן; איך האף איך וועל נאך זיין די יאר אין ארץ ישראל, איך וויל קומען צו דיר.

געב א גרוס פאר דיין זון ...; זאג אים איך ווארט צו הערן ווי ער האלט אין ש"ס.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת בהעלותך, ט"ז סיון, שנת תשפ"א לפרט קטן

לכבוד מיין טייערער ... נרו יאיר

האברך ... נרו יאיר זאגט מיר אז דו שטייסט אים צו די האנט, דו העלפסט אים מיט די קאמפיין וואס מיר מאכן די יאר, קאמפיין "א וועלט פון חיזוק". איך דאנק דיר פאר'ן העלפן די קאמפיין זאל זיין מיט הצלחה, דו זאלסט האבן הצלחה אין אלע דיינע וועגן.

דאס איז די ערשטע גוטע גריס וואס איך הער אויף דיר, א צווייטע גרוס הער איך אויף דיר, אז דו קומסט אין שול, אין היכל הקודש בארא פארק ביינאכט לערנען דעם בלאט גמרא; דאס איז מיר נאך א גרעסערע שמחה, צו הערן אז דו לערנסט תורה. דאס איז דאך מיין שטרעבן, אז די תלמידים און חברים וואס מיר זענען זיך מחזק מיט די עצות פון רבי'ן - זאלן געדענקען פון תכלית, ארויסכאפן יעדן טאג לערנען די הייליגע תורה.

איך פלאג זיך אזוי מיט יעדן בחור ביז איך מאך אים חתונה, נאר צו קענען הערן אז ער לערנט און דאווענט.

גיי אן מיט'ן שיעור גמרא - וועסטו אלעס פאררעכטן.

בעזרת ה' יתברך

יום ה' פרשת בהעלותך, ט"ז סיון, שנת תשפ"א לפרט קטן

לכבוד מיין טייערער ... נרו יאיר, קרית ברסלב

איך בעט דיר זייער פון די טיפעניש פון מיין הארץ: זיי זיך קובע א שיעור, אדער אינדערפרי אדער ביינאכט אין בית המדרש - צו לערנען גמרא. איך וויל אזוי שטארק אז אלע אינגעלייט אין שטעטל זאלן קומען אדער אינדערפרי אדער ביינאכט - לערנען, אדער מיט א חברותא אדער זיצן ביים שיעור גמרא.

נאר דאס וועט פון אונז איבערבלייבן, דאס ביסל תורה ותפלה, דאס ביסל התבודדות, די מקוה וואס מען טובל'ט זיך, די פרוטות פאר צדקה, שבתים און ימים טובים; נאר דאס וועט פון אונז בלייבן.

איך בעט דיר טייערער ברודער, שרייב מיר יעדע וואך א טעקסט מעסידזש, אן אימעיל אדער א בריוו - וואס דו לערנסט און וויפיל דו לערנסט; איך וויל אזוי שטארק דו זאלסט נישט זיין אן ארימאן - נאקעט פון תורה, נאקעט פון תפלה.

שרייב מיר אויב דו גייסט צו א שיעור, אדער אויב דו האסט א חברותא - וועסטו מיר מחי' זיין.

בעזרת ה' יתברך

יום ב' פרשת אמור, י"ד אייר, פסח שני, שנת תשפ"א לפרט קטן

לכבוד מיין טייערער ... נרו יאיר

דיין ברודער האט מיר דערציילט אז ער האט געגעסן ביי דיר שבת, איך האב אים אויסגעפרעגט וואס מען האט גערעדט ביי די סעודה; איך האב אלץ ליב צו נאשן פון אנשי שלומינו נאך שיחות, נאך שמועסן; אלץ פרעג איך די בחורים: "וואס האט מען געשמועסט ביי דיין טאטנ'ס סעודה?" אפשר וועל איך הערן א פרישע שיחה.

דיין ברודער זאגט מיר ווי מען האט זיך געקאכט ביי די סעודה וואס פאר א חרבנות דער נייער פרעזידענט ביידען האט שוין אנגעמאכט פאר'ן לאנד.

וואס זאל איך דיר זאגן, עס איז מיר א גרויסע ווינדער אז אנשי שלומינו, תלמידי הישיבה זאלן רעדן "אזוינע שטותים!" פארגעסן פון באשעפער, זיין אריינגעטון אין נארישע פאליטיק, בפרט ביים שבת סעודה וואס איז א צייט פון אמונה, א צייט פון דביקות צום אייבערשטן.

איך וויל דיר אויפוועקן פון דיין זיסער חלום, ... נרו יאיר, בארואיג זיך, ביידען איז נישט אזוי שלעכט; נישט דער פרעזידענט וועט אונז העלפן און נישט דער פרעזידענט וועט אונז שעדיגן, דער אייבערשטער פירט די וועלט אזוי שיין.

אז דו ווילסט העלפן בויען די וועלט זאלסטו עוסק זיין אין עבודת ה', אין חינוך הילדים. שבת ביים טיש זאלסטו רעדן נאר פון שיינע זאכן, פון צדיקים, פון גוטע מידות. רעד צו דיינע קינדער פאר אנדערע וועלן רעדן צו זיי, לאז זיך אראפ צו זייער מח.

בעזרת ה' יתברך

יום ג' פרשת יתרו, כ' שבט, שנת תשפ"א לפרט קטן

לכבוד ... נרו יאיר, ירושלים

איך האב ערהאלטן דיין בריוו.

דו שרייבסט מיר פון אלעס; פון די נייעס פון יענע נייעס, אויסער פון דיינע שיעורים; דו טוסט דאס, דו טוסט יענץ - איך ווארט צו הערן תכלית.

ביי מיר איז זייער אינטערעסאנט צו הערן וואס דו לערנסט, וויפיל דו לערנסט, וואס דו האסט מסיים געווען וכו'; איך לעב פון דעם, דאס איז מיין חיות.

שרייב מיר לכל הפחות איין מאל א וואך וואס דו לערנסט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת יתרו, י"ט שבט, שנת תשפ"א לפרט קטן

לכבוד מיין טייערער ... נרו יאיר

מיט'ן אייבערשטנ'ס הילף מאך איך חתונה מיין טייערער זון הרב אלחנן חיים נרו יאיר, די חתונה וועט פארקומען אין ישיבה מיטוואך פרשת תרומה; איך וועל זיך זייער פרייען אז דו וועסט זיך באטייליגן ביי די שמחה מיט דיין משפחה.

איך בענק זיך נאך דיר, איך האב דיר שוין לאנג נישט געזען, איך האף אז אלעס איז אין ארדענונג ביי דיר.

איך וואונדער זיך אויב דו לערנסט נאך דיינע שיעורים כסדרן, מקרא, משנה, גמרא וכו', וכו'; איך געדענק די התמדת התורה דיינע, ווי דו פלעגסט זיצן אין בית המדרש מיט'ן משניות, מיט'ן גמרא.

איך האף איך וועל דאס נאך זוכה זיין צו זען.

בעזרת ה' יתברך

יום א' פרשת יתרו, שובבי"ם, י"ח שבט, שנת תשפ"א לפרט קטן

לכבוד ...

מוהרא"ש זאגט, דער רבי קען יעדן איינעם העלפן, זאל זיין ווער עס זאל נאר זיין, "אפילו הגרוע שבגרועים שמונח בשאול תחתית", אפילו דער ערגסטער מענטש וואס ליגט אין שאול תחתית, "אבל לא בעל מחלוקת", אבער נישט דער וואס מאכט מחלוקות.

איך שטיי ווייט פון די גאנצע פרשה וכו', איך וויל נישט האבן מיט דער זאך, איך בעט דעם אייבערשטן איך זאל זיך נישט נארן, איך זאל נישט פארגעסן ווער איך בין און פארוואס איך בין געקומען צום רבי'ן; איך בין געקומען צום רבי'ן אז דער רבי זאל מיר היילן, איך זאל נישט פארווארפן ווערן; אפהיטן זאל מיך דער אייבערשטער אז איך זאל אנהייבן זאגן דעות אויף אנדערע.

וואויל איז דעם וואס געדענקט פון תכלית און זוכט נישט קיין שלעכטס ביי א צווייטן, ער פילט אן זיינע טעג מיט תורה ותפלה.

בעזרת ה' יתברך

יום ד' פרשת בא, ז' שבט, שנת תשפ"א לפרט קטן

לכבוד מיין טייערער ... נרו יאיר

איך האף אז דו אינוועסטירסט אין גוטע פלעצער, אין פלעצער וואס וועט דיר ברענגען זיכערע פארדינסטן; אז מען גייט יעדן טאג אין שול דאווענען - דאס איז זיכערע רווחים, אז דו וועסט עפענען די גמרא, בלעטערן די הייליגע גמרא - דאס איז זיכערע פארדינסטן, די חומש און משניות - דאס איז זיכערע פארדינסטן.

איך בעט דיר זייער, נעם אן די פאר ווערטער; מאך די ריכטיגע חשבונות, נעם זיך צאם, זע עס זאל עפעס איבערבלייבן, ווייל נאר דאס וועט איבערבלייבן; נאר תורה ותפלה.

פון דיין ראש ישיבה.

בעזרת ה' יתברך

יום א' פרשת שמות, י"ט טבת, שנת תשפ"א לפרט קטן

לכבוד ... נרו יאיר

איך האב ערהאלטן דיין בריוו.

איך בעט דיר זייער זאלסט זיך מחזק זיין מיט אלע דיינע כוחות; בעיקר זאלסטו זיך מחזק זיין אין אמונה אינעם אייבערשטן. בפרט יעצט ווען דו גייסט אריבער אזא שווערע נסיון; האסט חתונה געהאט און זיך גלייך געדארפט גט'ן השם ישמרינו, זי האט דיר אויסגעפאפט וכו', דו האסט אזוי לאנג געווארט, דו האסט געמיינט אז דו האסט געטראפן דיין זיווג, דו וועסט אינאיינעם אויפשטעלן א שיינע שטוב און יעצט איז אלעס צעפאלן, זי האט בכלל נישט געוואלט חתונה האבן נאר דיר פשוט אריינגענארט.

שטארק זיך, נעם אריין אמונה אין דיר, האלט אין איין חזר'ן: 'דער אייבערשטער מאכט אלעס, טוט אלעס און איז אלעס; קיין שום זאך פאסירט נישט פון זיך אליינס, נישטא קיין פערצופאל, נישטא קיין טבע, מקרה און מזל, די גאנצע וועלט איז איין שטיק אייבערשטער, דער אייבערשטער האט זיך אנגעטון כביכול מיט א לבוש פון דומם, צומח, חי און מדבר, אבער אלעס איז ער אליינס, מיר ווייסן גארנישט, מיר פארשטייען גארנישט, מיר ווילן נישט וויסן און פארשטיין, מיר דארפן נאר אים דינען און אין אים גלייבן'.

גיי יעדן טאג התבודדות, בעט דעם אייבערשטן אויף דיין שפראך פשוט'ע הארציגע ווערטער, דורכדעם וועט געשען צוויי זאכן, איינס, דו וועסט טרעפן דיין שידוך און צווייטנס, ביז דו וועסט טרעפן דיין שידוך און נאך וואס דו וועסט טרעפן דיין שידוך וועט דיין לעבן זיין אן אנדערע לעבן, ווייל דאס רעדן צום אייבערשטן בויט אויף א שטארקע אמונה, עס בויט אויף א זיכערקייט אינעם מענטש, מען ווערט א שטארקער מענטש און דאס לעבן איז אנגאנצן אנדערש.

דא האסטו א קליינע תפילה:

"הייליגער באשעפער העלף מיר איך זאל זוכה זיין צו טרעפן מיין זיווג, איך וויל שוין אויפשטעלן א שטוב, איך וויל נישט זיין אליינס.

הייליגער באשעפער, איך גלייב באמונה שלימה אז די גאנצע פרשה; מיין שידוך, מיין גט - אלעס איז פאר מיר לטובה, די גאנצע עגמת נפש וואס איך בין אריבער - אלעס איז נאר פאר מיין גוטס, פאר מיין תיקון. יעצט בעט איך דיר אייבערשטער, העלף מיר, איך וויל חתונה האבן מיט אן ערליכע פרוי, איינע וואס וועט גלייבן אין דיר און גיין אין די וועג פון די תורה, העלף מיר אייבערשטער איך זאל שוין טרעפן מיין שידוך, איך בין אזוי צעבראכן, איך בין אזוי צעריסן, איך קען מער נישט, איך וויל שוין לעבן.

העלף מיר בזכות די הייליגע צדיקים וואס האבן זיך מוסר נפש געווען פאר דיינעט וועגן, בזכות דער הייליגער רבי רבינו נחמן בן פיגא זכותו יגן עלינו ובזכות אלע צדיקים, יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיךָ ה' צוּרִי וְגֹאֲלִי".

בנוגע זיך מתוודה זיין פאר'ן גיין שלאפן ווען מען ליינט קריאת שמע של אריז"ל; על פי הלכה איז מען זיך נישט מתוודה שבת און יום טוב, אבער אז איינער לייגט זיך שלאפן מיט די מחשבה 'דאס איז מיין לעצטע טאג', ער שפירט ביי זיך אז ער דארף זיך אנגרייטן מיט וידוי דברים, - די זענען זיך מתוודה שטענדיג, אפילו שבת און יום טוב.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת וירא, ט"ו מר-חשון, שנת תשפ"א לפרט קטן

לכבוד ... תחי', קרית ברסלב.

איך הער זייער שיינע גריסן אויף דיר פון מרת ...; זי זאגט אז דו העלפסט זייער שיין אין סקול.

קענסט זיך נישט פארשטעלן וואס דער רבי באצאלט פאר די וואס העלפן אים; מיט דעם וואס דו העלפסט די סקול, דו העלפסט מרת ... תחי' - וועסטו האבן א שיינע לעבן.

בעט דעם אייבערשטן זאלסט ליב האבן צו העלפן, זאלסט שפירן בשעת'ן העלפן די סקול א זיסע טעם; זאלסט שוין קוים ווארטן צו קענען קומען נאך א טאג אין סקול העלפן. בעט דעם אייבערשטן אז דיין לעבן זאל נישט אריבערגיין מיט נארישקייטן, דיין לעבן זאל זיין איין שטיק 'הפצה', איין שטיק 'העלפן דעם רבי'ן'. אז מרת ... בעט דיר זאלסט קומען פרייטאג העלפן מיט די קינדער זאלסטו זיך נישט ארויסדרייען, נאר קומען מיט שמחה, ווייל וויפיל מיר וועלן העלפן דעם רבי'ן וועלן מיר נישט קענען באצאלן אויף וואס ער געבט אונז.

ווען דו מאכסט א סיום אויף תהילים זאלסטו מיר שרייבן א בריוו; איך ווארט צו הערן דיינע סיומים.

בעזרת ה' יתברך

יום ד' פרשת האזינו א', כ"ז אלול, שנת תש"פ לפרט קטן, פה אומאן אוקריינא

לכבוד מיין טייערער ליבער ... נרו יאיר.

איך האב באקומען א בילד וואו דו לערנסט פאר דעם בלאט גמרא אינעם עירפארט אין מאלדאווא; דאס האט מיר זייער פרייליך געמאכט, צו זען ווי איר דערהאלט זיך, איר פארלירט זיך נישט, אפילו איר זענט שוין עטליכע טעג אינטערוועגנס דאך פארגעסט איר נישט פון תכלית.

לעת עתה איז נישטא קיין וועג מען זאל ענק ארויסלאזן, אבער ישועת ה' כהרף עין; קען זיין אין די קומענדיגע רגע וועט מען אייך ארויסלאזן, נאכדעם דארף מען ווייטער ניסים וואס איך קען נישט שרייבן.

איך האב געזאגט פאר דיין ווייב זאל שיקן דיין זון אפילו אין אזעלכע אומשטענדן.

בעזרת ה' יתברך

יום ב' פרשת נצבים-וילך, י"ח אלול, שנת תש"פ לפרט קטן

לכבוד מיין ליבער ... נרו יאיר

היינט איז זייער א גרויסער טאג, היינט איז די יום הולדת פונעם הייליגן בעל שם טוב זכותו יגן עלינו און פונעם הייליגן בעל התניא זכותו יגן עלינו; איז יעצט א פאסיגע צייט דו זאלסט זיך באנייען, מאך היינט פאר דיר א "יום הולדת", א טאג וואס דו ווערסט פריש געבוירן, דו הייבסט אן לערנען און דאווענען.

טייערער ..., קום אין שול אינדערפרי און ביינאכט; זיי זיך קובע עתים לתורה, נאר דאס בלייבט פונעם מענטש, אלעס אנדערש איז נאר צייטווייליג. קוק אן זיידי און זיינע ברידער; זיידי זיצט און לערנט ביי די אכציג ווי א יונגער בחור, דאס וואס ער האט געטון אלס בחור - טוט ער נאך ביז'ן היינטיגן טאג.

איך ווארט און האף צו הערן פון דיר וואס דו נעמסט זיך פאר אינעם היינטיגן טאג, י"ח אלול.

מאך זיך גרייט ווייל מיר פארן אם ירצה ה' קיין אומאן.

בעזרת ה' יתברך

יום ה' פרשת פנחס, שבעה עשר בתמוז, שנת תש"פ לפרט קטן

לכבוד ... נרו יאיר.

איך בעט דיר טייערער ליבער ..., מאך שלום מיט דיין ווייב, קריג זיך נישט מיט איר.

ווי לאנג איז דען דאס גאנצע לעבן? חכמינו זכרונם לברכה זאגן (חולין נט.) עס איז דא א פליג וואס הייסט "בַּקָא" וואס לעבט אינגאנצן איין טאג, אנשטאט זיך צו פרייען מיט'ן פאר - קריגן זיי זיך און בלאזן איינער אויפ'ן צווייטן, די נקיבה זאגט פאר'ן זכר, "איך האב געזען ווי דו האסט געביסן א מענטש וואס איז געשווימען אין וואסער און דו האסט מיר נישט גערופן איך זאל אויך האבן בלוט צו עסן, דערפאר גיי איך נישט רעדן מיט דיר פאר זיבן יאר", זיי לעבן קוים איין טאג און זיי קריגן זיך פאר זיבן יאר, איז דא א גרעסערע געלעכטער פון דעם?

אזא פנים האבן די וואס קריגן זיך; מען מיינט אז מען בלייבט דא אויף די וועלט פאר אייביג, בשעת דאס גאנצע לעבן איז אזוי קורץ; בעט איבער דיין ווייב און זיי נישט דערשראקן ווען זי שרייט, נעם עס נישט צום הארצן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

ערב שבת קודש פרשת חקת-בלק, י"א תמוז, שנת תש"פ לפרט קטן

לכבוד מיינע טייערע ליבע חברים שיחיו, תלמידי היכל הקודש ירושלים.

איך בעט אייך זייער איר זאלט זיך שטארקן צו לערנען יעדן טאג אביסל תורה; שטופט נישט אפ די שיעורים אויף שפעטער, אויף מארגן וכדומה.

חכמינו זכרונם לברכה זאגן (אבות ב, ד): "אַל תֹּאמַר לִכְשֶׁאֶפָּנֶה אֶשְׁנֶה", זאג נישט 'ווען איך וועל זיך מסדר זיין וועל איך לערנען', ווייל "שֶׁמָּא לֹא תִפָּנֶה", עס קען זיין אז דו וועסט אייביג בלייבן נישט מסודר; עס זענען פארהאן מענטשן וואס קענען זיך נישט מסדר זיין, שטענדיג האבן זיי וואס צו ערלעדיגן און עס גייט אריבער דער טאג, עס גייט אריבער דער וואך, דער יאר און מען קערט זיך צוריק צום אייבערשטן אן קיין תורה, אן גארנישט.

דער רבי האט געזאגט (שיחות הר"ן, סימן כג): "אויבן אין הימל שרייען די נשמות 'מיר זענען הונגעריג, מיר דארפן עסן; מיר זענען דארשטיג, געבטס אונז צו טרינקען', און ווען מ'וויל זיי געבן עסן און טרינקען זאגן זיי, 'נישט דאס מיינען מיר, מיר דארפן עסן און טרינקען פון תורה און עבודת ה'', אזוי אויך זענען דא נשמות וואס זענען נאקעט, זיי שרייען און בעטן זיך: 'מיר זענען נאקעט, געבטס אונז קליידער מיט וואס זיך צוצודעקן', און ווען מ'וויל זיי געבן קליידער אנצוטון זאגן זיי 'נישט דאס מיינען מיר, מיר דארפן מצוות און מעשים טובים", און דער רבי האט אויסגעפירט: "וואויל איז דעם מענטש וואס עסט יעדן טאג אפאר פרקים משניות, טרינקט קאפיטלעך תהילים און טוט זיך אן מיט מצוות ומעשים טובים".

איך מוז מקצר זיין, איך בין יעצט זייער טרוד; מיר דארף מסדר זיין צווישן די בערג א פלאץ פאר די בחורים, אינגלעך און מיידלעך, מיר קענען נישט זיין אין שטאט. ביי אונז איז זייער שווער אין שטאט זומער, די גוים זענען זייער געמיין, זיי גייען אויסגעטון ווי די חיות, עס פלאקערט א פייער אין גאס; מיר ציען זיך אוועק פון שטאט פאר די זומער וואכן צו זיין אביסל צווישן די בערג, צווישן די גראז און ביימער צו קענען דינען דעם אייבערשטן ריינערהייט.

איך האב נישט קיין וועג ווי אזוי צו שיקן די בריוו, דאך האב איך זיך זייער אנגעשטרענגט צו קענען שיקן דעם קליינעם בריוו פאר אייך ווייל איך האב ענק זייער ליב; איך זע ענקער שטארקייט, ענקער אחדות און ענקער ווילן. איך וועל אייך נאך שרייבן מער במשך די זומער וואכן.

איין זאך בעט איך ענק טייערע ברידער פון ירושלים, גייט נישט אין קיין וויכוחים מיט קיינעם; אז איר הערט ווי מען שפעט פון רבי'ן, פונעם רבינ'ס תלמידים - זאלט איר שווייגן, אונזער זאך איז נישט קיין וויכוחים, אונזער זאך איז נישט נצחון; מיר דארפן נישט פארענטפערן דעם רבי'ן, מיר דארפן נישט טענה'ען מיט יעדן פארעך, מיר דארפן זיך נאר מחי' זיין מיט דעם וואס מיר האבן זוכה געווען צו וויסן פון אזא רבי.

אז איר כאפט זיך אריבער מתפלל זיין ביי מקומות הקדושים זאלט איר בעטן פאר מיר, יואל בן ריצא רעכיל - איך זאל האבן כח ווייטער צו משמש זיין דעם רבי'ן, פארשפרייטן זיינע עצות אין די וועלט.

א פרייליכן שבת.

בעזרת ה' יתברך

יום ה' פרשת נשא ב', י"ב סיון, שנת תש"פ לפרט קטן

לכבוד מיין טייערער ... נרו יאיר.

איך האב זייער הנאה יעדעס מאל ווען דו קומסט ארויף אין ישיבה מיר דערציילן דיינע סיומים, ווי פלייסיג דו לערנסט; כי זה חלקי מכל עמלי, נאר דאס וועט פון מיר איבערבלייבן.

איך מאך זיך א חשבון, היינט איז מיין יום הולדת, מיין געבורטס-טאג; היינט בין איך אריין אין די ימי בינה, אזוי ווי די הייליגע חכמים זאגן (אבות ה, כא): "בֶּן אַרְבָּעִים לַבִּינָה"; מאך איך זיך א חשבון: 'וואס טו איך? וואס וועל איך מיט נעמען מיט מיר? נאר דאס ביסל וואס איך פועל ביי מיינע תלמידים זיי זאלן לערנען און דאווענען'.

שטארק זיך און זיי ממשיך מיט'ן פארשפרייטן די זיסע עצות, די ליכטיגע עצות פונעם הייליגן רבי'ן – מער און שטערקער. זיי קיינמאל נישט צופרידן מיט וויפיל דו טוסט; ווען עס קומט צו הפצה דארף מען אלץ טון מער און מער.

פון דיין ראש ישיבה וואס האט דיר ליב.

בעזרת ה' יתברך

ערב שבת קודש פרשת בהר-בחקותי, כ"א אייר, שנת תש"פ לפרט קטן

לכבוד ... נרו יאיר.

שטארק זיך צו גיין הפצה; זיי ממשיך מיט דיין הייליגע ארבעט.

אינעם היינטיגן גרויסן טאג ווען עס געפאלט דער געבורטס-טאג פון מוהרא"ש דארפן מיר זיך מאכן א שטיקל חשבון הנפש וואס מיר האבן שוין געטון אויף די וועלט צו ברענגען משיח, צוריק צו ברענגען אידישע קינדער צום אייבערשטן.

געב א קוק צו וואס מען קען זוכה זיין; לאמיר זיך מאכן א חשבון, מוהרא"ש איז געווען איין מענטש אליין, איינער אליין; איך געדענק נישט נאך מענטשן וואס זענען געווען אזוי אליין ווי מוהרא"ש, ער האט גארנישט געהאט, אלע זענען געווען קעגן אים; מיט דעם אלעם האט ער פארשפרייט דעם רבי'ן אויף די גאנצע וועלט, אריינגעברענגט אזויפיל קדושה אין די וועלט, אזויפיל לימוד התורה אין די וועלט, אזויפיל שלום בית ביי פארפעלקער, אזויפיל אידן צוריק געברענגט צום אייבערשטן; מוהרא"ש איז צוריק צום אייבערשטן מיט אזויפיל זכותים, דארפן מיר זיך פרעגן מיט וואס וועלן מיר צוריק גיין צום אייבערשטן... ווייל די יארן גייען און לויפן אזוי שנעל, אזוי ווי עס שטייט "כַּצֵּל יָמֵינוּ עַל הָאָרֶץ וְאֵין מִקְוֶה" (דברי הימים-א כט, טו), זאגן אויף דעם חכמינו זכרונם לברכה (בראשית רבה צו, ב): "הַלְּוַאי כְּצִלּוֹ שֶׁל כּוֹתֶל, אוֹ כְּצִלּוֹ שֶׁל אִילָן, אֶלָּא כְּצִלּוֹ שֶׁל עוֹף בְּשָׁעָה שֶׁהוּא עָף", הלואי זאלן אונזערע טעג זיין אזוי ווי דער שאטן פון א וואנט וואס נעמט אביסל צייט ווי לאנג עס גייט אריבער, אדער ווי דער שאטן פון א בוים, אבער אז מען קוקט גוט זעט מען אז דאס לעבן פונעם מענטש איז ניטאמאל ווי אזא שאטן נאר פליט דורך ווי די שאטן פון א פייגל וואס פליט.

גיי ווייטער הפצה, פארפעל נישט קיין איין טאג פון הפצה; געב אכטונג צו גיין אנגעטון שיין בשעת דו ביסט מפיץ. פוץ אויס דיינע שיך, מען טאר נישט ארומגיין מיט שמוציגע שיך; עס איז נישט קיין תירוץ אז אז מען וואוינט צווישן פעלדער וכו'. א תלמיד חכם טאר נישט גיין אנגעטון שמוציג, בפרט מיט שמוציגע שיך און זיכער נישט בשעת הפצה, וואס דעמאלט קוקט מען אויפ'ן מפיץ, מען וויל זען: 'וואס איז ברסלב? ווער איז ברסלב? ווי אזוי פירן זיך די ברסלב'ע?'

פוץ זיך אויס דיין הוט, דיין שיך און דיין רעקל פאר דו גייסט הפצה כדי דו זאלסט מאכן א גוטע און שיינע נאמען פאר'ן רבי'ן, אזוי וועסטו אויך קענען מקרב זיין אלפים ורבבות מענטשן צום אייבערשטן.

איך האף אז דו וועסט אננעמען מיינע ווערטער און פון היינט אן וועסטו אכטונג געבן.