בריוון פונעם ראש ישיבה שליט"א

בעזרת ה' יתברך - יום ד' פרשת שופטים, ערב ראש חודש אלול, שנת תשפ"ג לפרט קטן

... תחי', תלמידה בית פיגא קרית ברסלב

איך האב ערהאלטן אייער בריוו.

איך פריי זיך זייער צו הערן אז איר האט געענדיגט פאריגע וואך שבת די ערשטע מאל ספר תהילים.

נאך מער פריי איך זיך אז איר שרייבט איר האט קוים צייט ווען צו זאגן תהילים, ווייל א גאנצן צייט העלפט איר אייער מאמע; וויסן זאלט איר, נישטא קיין גרעסערע זאך ווי העלפן א מאמע, איר זאלט א גאנצן צייט העלפן אייער מאמע, און איר זאלט זוכן וואס מער איר צו העלפן, ווייל דער אייבערשטער וויל מיר זאלן טון די מצוה פון כיבוד אב ואם.

דער הייליגער חזון איש זכותו יגן עלינו איז געווען זייער גרויס, אמאל האט אים איינער געפרעגט: "ווי אזוי וואקסט מען אויף א חזון איש?" האט ער געזאגט: "דורך די מצוה פון כיבוד אב ואם"; ער האט זיך מוסר נפש געווען פאר די מצוה און ער איז געווארן זיייער זייער גרויס.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת שופטים, ערב ראש חודש אלול, שנת תשפ"ג לפרט קטן

... תחי', תלמידה בית פיגא קרית ברסלב

איך האב ערהאלטן אייער בריוו.

אז איר האט מורא ביינאכט, איר קענט נישט שלאפן פון שרעק – זאלט איר טראכטן פון אמונה; טראכטס 'דער אייבערשטער איז דא, מיט מיר, ביי מיר און נעבן מיר, ער היט מיך, ער איז דא, קיינער קען מיר גארנישט טון'.

נעמט זיך פאר צו מאכן פאָר ברכות און נאך ברכות, ווייל אויב מען פארגעסט צו מאכן ברכות ביים עסן, מען עסט אן א פאָר ברכה אדער מען פארגעסט צו מאכן א נאך ברכה - פון דעם קומט שרעק. דער הייליגער רבי זאגט (ספר המדות אות פחד, סימן יד): "מִי שֶׁאֵינוֹ נִזְהָר בְּבִרְכַּת הַנֶּהֱנִין", ווער עס איז נישט געווארנט צו מאכן ברכות ביים עסן, "תְּחִלָּה", פאָר ברכות, "וָסוֹף", און נאָך ברכות - "פְּחָדִים בָּאִים עָלָיו", וועט ער האבן פחדים; אזוי ווי עס שטייט (תהלים נג, ה-ו): "אָכְלוּ לֶחֶם, אֱלֹקִים, לֹא קָרָאוּ", אז מען עסט ברויט און מען דאנקט נישט דעם אייבערשטן – "שָׁם, פָּחֲדוּ פַחַד", ווערט מען דערשראקן.

בזכות מאכן ברכות וועט איר מער נישט מורא האבן.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת שופטים, ערב ראש חודש אלול, שנת תשפ"ג לפרט קטן

לכבוד ... נרו יאיר

היינט איז א טאג פון תשובה, מען זאגט יום כיפור קטן און מען הייבט שוין אן זאגן היינט ביי מנחה (תהילים, קאפיטל כז): "לְדָוִד ה' אוֹרִי וְיִשְׁעִי"; ביי אונז איז דער מנהג צו זאגן לדוד ה' ביי שחרית נאכן יום און ביי מנחה - נאך חזרת הש"ץ, איידער קדיש תתקבל, און מען זאגט דאס ביז שמחת תורה.

דאס וואס דו ביסט מיואש, אז שוין א לאנגע צייט וואס דו ווילסט זיין ערליך, דו בעטסט און דו שפירסט ווי עס גייט נישט, עס רוקט זיך נישט, אדרבה דו שפירסט ווי דו ווערסט ווייטער און ווייטער פונעם אייבערשטן; ליבער ברודער, דער הייליגער רבי האט דערציילט (שבחי הר"ן, סימן יב): "הָיָה נִדְמֶה לוֹ תָּמִיד שֶׁאֵין מִסְתַּכְּלִין עָלָיו כְּלָל וְאֵין שׁוֹמְעִין לוֹ כְּלָל", ווען ער פלעגט רעדן צום אייבערשטן האט זיך אים שטענדיג געדאכט אז מען הערט נישט אויס אויבן אין הימל וואס ער בעט און אז קיינער קוקט נישט אויף אים, "רַק אַדְּרַבָּה, נִדְמֶה לוֹ שֶׁמַּרְחִיקִין אוֹתוֹ מֵעֲבוֹדָתוֹ יִתְבָּרַךְ בְּכָל מִינֵי הַרְחָקוֹת וּכְאִלּוּ אֵין רוֹצִין בּוֹ כְּלָל וּכְלָל", פארקערט, ווי מער ער פלעגט רעדן צום אייבערשטן האט זיך אים אלץ מער געדאכט ווי מען דארף אים נישט, "כִּי הָיָה רוֹאֶה שֶׁחוֹלְפִין וְעוֹבְרִין כַּמָּה וְכַמָּה יָמִים וְשָׁנִים וַעֲדַיִן הוּא רָחוֹק מֵהַשֵּׁם יִתְבָּרַךְ וְלא זָכָה עֲדַיִן לְשׁוּם הִתְקָרְבוּת", ווייל ער האט געזען אז עס גייען אריבער אסאך יארן און ער האט נאכאלץ נישט זוכה געווען צו ווערן נאנט צום אייבערשטן, "עַל כֵּן נִדְמָה בְּעֵינָיו שֶׁאֵין שׁוֹמְעִין דְּבָרָיו כְּלָל, וְאֵין מִסְתַּכְּלִין עָלָיו כְּלָל, רַק אַדְּרַבָּא, מַרְחִיקִין אוֹתוֹ בְּכָל מִינֵי הִתְרַחֲקוּת מֵעֲבוֹדָתוֹ יִתְבָּרַךְ", דערפאר האט זיך אים געדאכט אז קיינער הערט אים נישט אויס, אדרבה עס האט אים אויסגעזען ווי מען שטופט אים אוועק פון די קדושה, "אַךְ אַף עַל פִּי כֵן הָיָה מְחַזֵּק עַצְמוֹ מְאֹד, וְלֹא הִנִּיחַ אֶת מְקוֹמוֹ", מיט דעם אלעם האט זיך דער רבי זייער געשטארקט און נישט אויפגעהערט מיט זיין עבודת השם יתברך.

טייערער ברודער, נעם די ווערטער פאר חיזוק, אז אלע צדיקים האבן געשפירט אין אנהויב פון זייער עבודת השם ווי מען הערט זיי נישט אויס און מען איז זיי מרחק. דער רבי דערציילט (שם): "וְכַמָּה פְּעָמִים הָיָה שֶׁהָיָה נוֹפֵל בְּדַעְתּוֹ מֵחֲמַת זֶה שֶׁרָאָה שֶׁהוּא מִתְפַּלֵּל וּמַעְתִּיר וּמַפְצִיר כָּל כָּךְ שֶׁיִּתְקָרֵב לַעֲבוֹדַת הַשֵּׁם יִתְבָּרַךְ וְאֵין מִסְתַּכְּלִין עָלָיו כְּלָל, וּמֵחֲמַת זֶה נָפַל לִפְעָמִים בְּדַעְתּוֹ וְלֹא הָיָה מְדַבֵּר עוֹד כָּל כָּךְ בֵּינוֹ לְבֵין קוֹנוֹ אֵיזֶה יָמִים", אסאך מאל האט זיך געמאכט ביים רבי'ן אז ער איז געווארן זייער צעבראכן, זעענדיג אז ער האט שוין אזוי סאך געדאווענט און געבעטן, אבער עס דאכט זיך אים אז מען דארף אים נישט, און ער האט אויפגעהערט מאכן התבודדות, "אַחַר כָּךְ נִזְכַּר בְּעַצְמוֹ וְהִתְבַּיֵּשׁ בְּעַצְמוֹ עַל שֶׁהִרְהֵר אַחַר מִדּוֹתָיו יִתְבָּרַךְ, כִּי בֶּאֱמֶת בְּוַדַּאי הַשֵּׁם יִתְבָּרַךְ חַנּוּן וְרַחוּם וְכוּ', וּבְוַדַּאי הוּא רוֹצֶה לְקָרְבוֹ וְכוּ', וְחָזַר וְנִתְחַזֵּק בְּדַעְתּוֹ וְהִתְחִיל שׁוּב לְהַעְתִּיר וּלְדַבֵּר לִפְנֵי הַשֵּׁם יִתְבָּרַךְ כַּנַּ"ל", ביז ער האט זיך געכאפט וואס ער האט געטון און ער האט זיך זייער פארשעמט אז ער האט נאכגעלאזט פון די הייליגע עבודות השם, האט ער צוריק אנגעהויבן רעדן צום אייבערשטן, "וְכֵן הָיָה כַּמָּה פְּעָמִים", אזוי איז געווען אסאך מאל, עיין שם.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - ערב שבת קודש פרשת שופטים, ב' דראש חודש אלול, שנת תשפ"ג לפרט קטן

לכבוד ... נרו יאיר

מען בלאזט שוין שופר, מען דארף זיך שוין דערוועקן און צוריק קומען צום אייבערשטן. דער הייליגער רבי האט געזאגט פאר רבי נתן (חיי מוהר"ן, סימן לט) אום ראש חודש אלול: "היינט האב איך זיך זייער דערשראקן ווען איך האב געהערט בלאזן שופר; שפעטער איז צוגעקומען צו מיר מיין טאכטער אדל און מיר געזאגט: 'טאטע, היינט האב איך זיך זייער דערשראקן, איך האב תשובה געטון ווען איך האב געהערט בלאזן שופר'", האט דער רבי דעמאלט מגלה געווען דעם תורה (לקוטי מוהר"ן חלק א', סימן קמא): אויף די ווערטער פונעם פסוק (דברים ל, ו): "אֶ'ת לְ'בָבְךָ וְ'אֶת לְ'בַב", וואס איז נוטריקון דאס ווארט "אלול"; ווען א מענטש איז זוכה און ער שפירט זיינע זינד, ער כאפט וואס ער האט אלץ געטון און ער טוט תשובה דערויף, דעמאלט אלע זיינע קינדער - סיי די קינדער, און סיי די קינדער וואס זענען נעבעך באשאפן געווארן פון זינד - פגמי הברית - אלע טוען תשובה.

נעכטן ליל שישי איז געווען זייער א שיינע שיעור, איך האף דו האסט גוט געהערט וואס מיר האבן גערעדט, פון ארויסנעמען די פיינטשאפט פון הארץ; ווייל כל זמן מען קען נישט ליידן א צווייטן - איז מען נאך זייער ווייט פונעם אייבערשטן, מען דארף אויף דעם אסאך ארבעטן, מען דארף אסאך שרייען ביי התבודדות: "רבונו של עולם, וואס איז דאס אז איך בין אנגעגעסן אויף דעם און אויף יענעם? רבונו של עולם וואס איז דאס אז איך קען נישט קוקן א צווייטן איד אין פנים? וואס איז דאס אז איך האב פיינט א צווייטן?"

מוהרא"ש זאגט, אלע עבודות וואס מען דינט דעם אייבערשטן, אויב האט מען פיינט א צווייטן איד - לאכט מען אין הימל פון דעם איד, יעצט אלול מוז מען דאס פאררעכטן. מוהרא"ש ברענגט בשם דעם הייליגן אריז"ל, די ראשי תיבות פון שופ"ר איז (דברים כט, יז): "שֹׁ'רֶשׁ פֹּ'רֶה רֹ'אשׁ וְ'לַעֲנָה", פרעגט מוהרא"ש, לכאורה וואס האט דער פסוק מיט בלאזן שופר? נאר רש"י זאגט, וואס איז דאס שֹׁ'רֶשׁ פֹּ'רֶה רֹ'אשׁ וְ'לַעֲנָה? "שׁוֹרֶשׁ מְגַדֵּל עֵשֶׂב מַר כְּגִידִין שֶׁהֵם מָרִים, כְּלוֹמֶר מַפְרֶה וּמַרְבֶּה רֶשַׁע בְּקִרְבְּכֶם"; דאס הייסט, ווען מען הערט דעם שופר - דארף דאס אויפוועקן דעם מענטש ער זאל תשובה טון, ארויסנעמען פון זיך דאס רשעות וואס ליגט אין אים וכו', ער זאל אנהייבן קוקן גוט אויף אנדערע און טון נאר חסד מיט אנדערע.

נעכטן בין איך געזיצן א סעודת ראש חודש מיט אונזערע טייערע כולל אינגעלייט, איך געדענק מיין זיידע קארלסבורגער רב זכרונו לברכה פלעגט מאכן יעדע ראש חודש א סעודה מיט די כולל אינגעלייט, איך בין זייער איבערגענומען פון די כולל אינגעלייט, זיי לערנען מיט גרויס התמדה און פירן זיך מיט יראת שמים.

א פרייליכן שבת.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת שופטים, ערב ראש חודש אלול, שנת תשפ"ג לפרט קטן

לכבוד הרב...

דאס וואס מען זאגט אז די פרוי מרת ... תחי' איז נישט סטאביל צו קענען אויפציען אירע קינדער און אז זי ליידט אויף ... - איז נישט וואר; די שלעכטע שמועות האט איר געוועזענער מאן ארויסגעלאזט, ווייל ער וויל פון איר צונעמען די קינדער.

פארקערט, ער האט פאר מיר מודה געווען כמאה עדים, (ווען ער האט געטראכט צוריק צו גיין צו איר), אז די אלע זאכן זענען בלבולים.

אויך האב איך בכתב - סיי פון אים ווי ער איז מודה אויף זאכן וואס ער האט געטון שלא על פי תורה, און אויך ווי די קינדער האבן מיר געשריבן שרעקליכע זאכן, וואס אין כאן המקום לפורטם אז ער איז א סכנה פאר זיי וד"ל.

איך בין גרייט צו קומען עדות זאגן.

בעזרת ה' יתברך - יום ד' פרשת שופטים, ערב ראש חודש אלול, שנת תשפ"ג לפרט קטן

... תחי', תלמידה בית פיגא קרית ברסלב

איך האב ערהאלטן אייער בריוו.

אז די מיידלעך, די שכינות טשעפען אייך - זאלט איר נישט צוריק טשעפען; שפילט מיט אייערע געשוויסטער און מיט קינדער וואס טשעפען נישט.

טשעפעט נישט קיינעם און זיכער נישט קיין שכנים, מיט שכנים מוז מען לעבן בשלום. איר זאלט נישט צוריק טשעפען, האט נישט מורא, ביים סוף וועלן די אלע שכנים וואס טשעפען - ווערן פארשעמט. אזוי ווי דער הייליגער רבי זאגט (ספר המדות אות מריבה, סימן כח): "מִי שֶׁחוֹלֵק עִם שְׁכֵנָיו", ווער עס קריגט זיך מיט זיינע שכנים – "לְסוֹף שֶׁיִּהְיֶה לַעַג לְאוֹיְבָיו", ביים סוף וועט ער ווערן פארשעמט.

בענטשט אין א בענטשער, זאגט ארויס שיין און קלאר יעדעס ווארט - וועט איר נישט האבן קיין מחלוקת. דער הייליגער רבי זאגט (שם חלק ב', סימן ז): "עַל יְדֵי בִּרְכַּת הַמָּזוֹן", דורך בענטשן ברכת המזון, "נִתְיַשֵּׁב הַמַּלְכוּת מִן הַמְּרִיבוֹת וְהַמִּלְחָמוֹת", ענדיגן זיך די קריגערייען און מלחמות.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת שופטים, ערב ראש חודש אלול, שנת תשפ"ג לפרט קטן

מרת ... תחי'

איך האב ערהאלטן אייער בריוו.

די תורה זאגט, א פרוי פון ווען זי האט חתונה - דארף זי צודעקן די האר פון קאפ. עס איז אן אפענע משנה (כתובות עב.): "וְאֵלּוּ יוֹצְאוֹת שֶׁלֹּא בִכְתֻבָּה", די  פרויען ווען זיי גט'ן זיך - באקומען זיי נישט קיין כתובה געלט, "הָעוֹבֶרֶת עַל דַּת מֹשֶׁה וִיהוּדִית", א פרוי וואס פאלגט נישט די תורה, "וְאֵיזוֹהִי דַת יְהוּדִית, יוֹצְאָה וְרֹאשָׁהּ פָּרוּעַ", אז זי גייט מיט אן אויפגעדעקטע קאפ; גיין צוגעדעקט די קאפ איז דת יהודית, דאס איז די גאוה פון אידישע פרויען, דאס איז זייער שטאלץ - צו גיין צוגעדעקט די האר פון קאפ.

בנוגע אייער פראגע אויב מען זאל זיך דוקא צודעקן מיט א געוויסע סארט צודעק, און אויב די נייע צודעק איז א חסרון אין צניעות; דער ענטפער איז, א שניעל, בענדענע אדער סנוד, די אלע זאכן זענען אויסגעהאלטן אין צניעות הונדערט פראצענט; עס איז פינקט אזוי ווי גיין א טורבאן, ספאנדזש טיכל וכדומה.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת שופטים, ערב ראש חודש אלול, שנת תשפ"ג לפרט קטן

לכבוד ... נרו יאיר, לינדען

איך האב ערהאלטן דיין בריוו.

עס איז געקומען די צייט מיר זאלן עפענען אין לינדען א בית המדרש היכל הקודש.

א שיינע צאל אינגעלייט האבן זיך געקויפט הייזער אין לינדען ניו דזשערסי און נאך אינגעלייט קויפן יעצט דארט הייזער, דארפן מיר עפענען א בית המדרש.

איך וועל אם ירצה ה' קומען צו ענקער חבורה, און איך האף צום אייבערשטן איר וועט מצליח זיין, און ביז א קורצע צייט וועלן מיר קענען עפענען מוסדות פאר אונזערע קינדער.

נעם די פלאץ פון דיין חבר וואס וויל דיר געבן זיין בעיסמענט פאר הונדערט דאלער א חודש, און פארבינד זיך מיט די גבאים אין שטעטל, זיי וועלן דיר העלפן מיט טישן און בענקלעך.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת שופטים, כ"ו מנחם-אב, שנת תשפ"ג לפרט קטן

לכבוד ... נרו יאיר

היינט איז א גרויסער טאג, די יארצייט פון הייליגן רבי'ן פון סאטמער זכותו יגן עלינו. מוהרא"ש זאגט, בזכות דעם הייליגן רבי'ן פון סאטמער זענען מיר אלע היינט פרומע ערליכע אידן. דער צדיק האט זיך מוסר נפש געווען נאכן קריג און אריינגעבלאזן א פרישע גייסט אין די צעבראכענע איבערלעבער. דער רבי זכותו יגן עלינו האט אויסגעפירט די נבואה פון יחזקאל הנביא, פון די עצמות יבשות, ממש די נבואה פון יחזקאל (יחזקאל לז, ד-ה): "שִׁמְעוּ דְּבַר ה', כֹּה אָמַר ה' אֱלֹקִים לָעֲצָמוֹת הָאֵלֶּה, הִנֵּה אֲנִי מֵבִיא בָכֶם רוּחַ וִחְיִיתֶם"; ער האט אריינגעבלאזן א פרישע גייסט, אריינגעבלאזן אמונה אין די איבערלעבער, זיי זאלן נאכאמאל חתונה האבן און נאכאמאל ברענגען קינדער און אויפשטעלן א דור פארן אייבערשטן.

מיר האבן נישט קיין השגה אין די גרויסקייט פון די צדיקים; ווי זיי זענען געווען שטארק מיט די אמונה, נישט מהרהר געווען אויפן אייבערשטן, נישט געהאט קיין טענות, נישט געהאט קיין קשיות אויף אים, זיי זענען געבליבן געטריי ווי לייבן פאר די תורה.

זיי נישט בכעס אין שטוב, זיי נישט בייז אויף דיין ווייב; אז דו וועסט זיין בכעס, דו וועסט מקפיד זיין - וועסטו פארלירן. חכמינו זכרונם לברכה זאגן (קידושין מ:): "רגזן לא עלתה בידו אלא רגזנותא", אז מען רעגט זיך האט מען נאר דאס גערעגאכטס.

דער בית יוסף ברענגט א מעשה (אורח חיים, סימן רצט) עס איז געווען א איד וואס איז געווען קרעציג, זיין גאנצע גוף איז אים געווען אויסגעשלאגן מיט קרעץ, איינמאל מוצאי שבת איז זיין ווייב געגאנגען שעפן פרישע וואסער פאר אים, ער זאל זיך קענען באדן. זי האט זיך פארשמועסט מיט חברט'עס, זי איז נישט גלייך אהיים געקומען. דער מאן איז אריין אין א כעס און ווען זי איז אהיים געקומען האט ער גענומען די גאנצע פאס וואסער און דאס צעבראכן, די וואסער האט זיך אויסגעגאסן און ער איז געווארן אביסל אנגעשפריצט; וואו עס האט געשפריצט אויף אים - איז די קרעץ אראפ, און ער האט דערלייגט די רפואה, ווייל אין די וואסער פון מוצאי שבת איז געווען אין דעם פון די באר פון מרים, וואלט ער זיך געבאדן מיט דעם - וואלט ער געהאט א גאנצע רפואה און פון כעס האט ער אלעס דערלייגט; דאס איז וואס די חכמים זאגן: "רגזן לא עלתה בידו אלא רגזנותו".

בעט איבער דיין ווייב און הער אויף זיך רעגן אויף יעדע זאך; דיין ווייב איז דיר נישט שולדיג אויף גארנישט. אז זאכן גייען דיר שלא כסדר - האט דאס נישט מיט איר, דאס האט מיט דיר אליין; דו דארפסט תשובה טון, אנהויבן לערנען און דאווענען - וועלן דיר זאכן גיין כסדר.

מארגן ענדיגן מיר מסכת גיטין און מיר הויבן אן מסכת קידושין; א שאד א טאג וואס גייט אריבער אן לערנען די הייליגע גמרא.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת שופטים, כ"ח מנחם-אב, שנת תשפ"ג לפרט קטן

לכבוד ... נרו יאיר

היינט איז געווען די ברית ביי מיין אייניקל, א זון פון מיין איידעם נתנאל שליט"א. מיין שווער הרב ר' מרדכי אהרן מייזליש שליט"א איז געווען דער סנדק, איך האב געזאגט די ברכות און געגעבן דעם נאמען 'יחזקאל', נאך מיין זיידע קארלסבורגער רב זכרונו לברכה. מיין זיידע האט מיך גענומען קיין אומאן אלס בחור צוויי מאל; איין מאל בין איך געווען מיט אים, און א צווייטע מאל מיט אים - אינאיינעם מיט מיין טאטע שליט"א.

ביי די ברית האב איך געזאגט וואס מוהרא"ש זאגט, מען ווינטשט: "כשם שנכנס לברית, כן יכנס לתורה ולחופה ולמעשים טובים", 'כשם' מיטן נאמען וואס מען האט געגעבן פארן קינד - ביים ברית, 'כן יכנס לתורה ולחופה ולמעשים' - דאס זאל אים העלפן צו לערנען און דאווענען; אזוי ווי דער הייליגער רבי אלימלך פון ליזענסק זכותו יגן עלינו זאגט (ספר נועם אלימלך, במדבר) א נאמען נאך א צדיק העלפט, "שֶׁיִּהְיֶה גַם כֵּן צַדִּיק", אז דער מענטש זאל אויך זיין א צדיק, "מַחֲמַת שֶׁנִּתְעוֹרֵר הָאוֹר שֶׁל הַצַּדִּיק שֶׁהוּא בָּעוֹלָם הָעֶלְיוֹן", דאס וועקט אויף די ליכטיגקייט פונעם צדיק אויבן אין הימל.

א מורא'דיגע מעשה וואס איך האב געהערט פון מוהרא"ש, דער גרויסער גאון רבי שלמה קלוגער זכר צדיק לברכה איז געווען אמאל ביי א ברית, און מען האט זיך דארט זייער פארזוימט, האט ער געפרעגט: "וואס ווארט מען?" האט מען אים געזאגט אז דער טאטע פונעם קינד גוסס'ט און מען ווארט אז דער טאטע פונעם קינד זאל שטארבן, מען זאל קענען געבן א נאמען פארן קינד נאך זיין טאטע. האט דער גרויסער גאון געזאגט: "איך פארשטיי נישט וואס מיט ענק גייט פאר, מאכט שוין דעם ברית, אזוי וועט אליהו הנביא קומען צו גיין און מען וועט אויסבעטן פאר די חולה ער זאל האבן א רפואה שלימה", וכך הוה, מען האט געמאכט די ברית און מען האט גע'פועל'ט א רפואה פארן טאטן פונעם רך הנימול, ביז דריי טעג איז ער שוין געגאנגען אויף זיינע פיס; זעט מען דאס גרויסקייט פון זיין ביי א ברית.

אליהו הנביא קומט צו יעדן ברית און מען קען פועל'ן גרויסע ישועות, און אלע וואס זענען ביים ברית - איז מען מוחל אלע עבירות. אפילו מען זעט נישט אליהו הנביא, דארף מען וויסן - אז גלייבן איז מער ווי זען, אז מען גלייבט אז אליהו הנביא געפינט זיך ביי א ברית איז דאס נאכמער ווי זען. מוהרא"ש האט דערציילט, דער הייליגער נודע ביהודה זכותו יגן עלינו האט איינמאל פסח ביים סדר נאך 'שפוך חמתך' - אראפבאגלייט ביזן גאס אליהו הנביא און אים באגריסט: "גוט יום טוב!" ווען ער איז צוריק געקומען צום סדר האט ער געזאגט: "איר מיינט איך האב געזען אליהו הנביא, דעריבער בין איך געגאנגען באגלייטן? איך וועל ענק זאגן, איך האב אים נישט געזען און דאך בין איך געגאנגען באגלייטן, ווייל איך גלייב אז ער איז דא, און גלייבן איז נאך מער פון זען".

מיין טאטע שליט"א איז יעצט אין מירון ביי רבי שמעון בר יוחאי. ער גייט אלע יארן פון נאך ט' באב ביז א' סליחות אין מירון, ער איז דארט מיט מיין מאמע תחי'. ער גרייט זיך דארט פאר די הייליגע טעג, אזוי ווי מיין זיידע קארלסבורגער רב זכרונו לברכה פלעגט טון; זיצן פון נאך ט' באב ביז א' סליחות ביי רבי שמעון בר יוחאי.

דער אייבערשטער זאל העלפן, זה הקטן גדול יהי', כשם שנכנס לברית כן יכנס לתורה ולחופה ולמעשים טובים, און אלע זאלן זען ישועות און רפואות.

מארגן ערב ראש חודש אלול איז א טאג פון תשובה, מען טרעט אריין אין די ימי הרחמים והסליחות. די טייערע ספרדי'שע אידן הויבן שוין אן זאגן סליחות, זיי זאגן גאנץ אלול סליחות. מיר דארפן זיך שוין אויך אויפוועקן און תשובה טון, מיר וועלן מארגן זאגן אינאיינעם יום כיפור קטן מיט מנחה, אום אכט אזייגער.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - ערב שבת קודש פרשת שופטים, ב' דראש חודש אלול, שנת תשפ"ג לפרט קטן

לכבוד מיינע טייערע חברים, טייערע ליבע ברידער, תלמידי היכל הקודש בארץ ישראל, ה' עליהם יחיו

איך בענק זיך זייער נאך ענק, איך האף צום אייבערשטן מיר וועלן זיך זען ביים הייליגן רבינ'ס קיבוץ ראש השנה אין אומאן.

די וואך האב איך געהאט א גאסט פון ארץ ישראל, דער מנהל המוסדות איז געקומען פאר א באזוך ביי אונז אין שטעטל, ער האט מיר דערציילט ווי שיין עס פירט זיך די חדר, סיי אין ירושלים און סיי אין טבריה, אויך האט ער מיר דערציילט פון די נייע חדר וואס האט זיך געעפנט די וואך אין בני ברק; איך האב זייער הנאה צו הערן ווי שיין עס איז ביי ענק, ווי שיין ענק גייען אן.

איך וויל ענק אלע בעטן, זייט אייך מחזק אין די זאך פון הפצה; יעדער איינער זאל אליין עוסק זיין אין הפצה - יעדער לויט זיין בחינה און לויט זיינע כוחות, ווייל מיר קומען צום רבי'ן, וועט אונז דער רבי פרעגן די פראגע וואס דער רבי האט געפרעגט אנשי שלומינו: "אויב איר זענט דא, פארוואס איז נישט די גאנצע וועלט דא? און אז די וועלט איז נישטא, פארוואס זענט איר יא דא?" אז מיר האבן אזעלכע גוטע עצות ווי זיך צו מחזק זיין, גוטע עצות ווי צו לעבן מיט א ווייב און קינדער, איז וואס איז מיט די וועלט, פארוואס ברענגט מען דאס נישט אריין אין אנדערע?!

נאך א טובה וויל איך אייך בעטן, רעדט שיין אין שטוב מיט דרך ארץ, מען קען נישט שרייען אויף א ווייב, מען קען נישט ווארענען, סטראשען וכו'; מען דארף רעדן צו די ווייב, מיט גרויס דרך ארץ. דער רבי האט אונז זייער געווארענט מיר זאלן מכבד זיין די ווייב און זיי האלטן טייער (שיחות הר"ן, סימן רסד), דאס ברענגט השראת השכינה אין שטוב, און ברכה.

טייערע ברידער, אלול איז א צייט פון תשובה; וואס איז תשובה? מען זאל זיין צופרידן ווי אזוי דער אייבערשטער פירט און מאכט אלעס; תשובה איז, זיך איבערגעבן צום אייבערשטן, נישט האבן קיין תרעומות אויף אים.

מאכט אייך שיעורים אין רבינ'ס ספרים, אין די קונטרסים און בריוו פון מוהרא"ש; די ספרים בויען אויף א קלארע שטארקע אמונה, ווען מען לערנט די ספרים ווערט מען אנגעפילט מיט הרהורי תשובה.

א פרייליכן שבת.

א כתיבה וחתימה טובה, א גוט געבענטשט יאר.

בעזרת ה' יתברך - יום ב' פרשת שופטים, כ"ז מנחם-אב, שנת תשפ"ג לפרט קטן

לכבוד ... נרו יאיר

עס איז נישט קיין עצה ארום צו גיין דערביטערט וכו', גיי ארום מיט א שמייכל, שמייכל צו יעדן איינעם. מענטשן האבן ליב א פרייליכער מענטש, מענטשן קענען נישט ליידן א ביטערער מענטש; דער וואס קרעכצט שטענדיג, וויינט און דערציילט זיינע צרות פאר יעדן איינעם, אלע וועלן פון אים אנטלויפן, קיינער איז נישט אינטערעסירט צו הערן יענעמ'ס צרות.

דער הייליגער רבי זאגט (לקוטי מוהר"ן חלק א', סימן כט): "טוֹב הַכֹּל חֲפֵצִים לִשְׁמוֹעַ", גוטע זאכן ווילן אלע הערן; זאלסטו נאר דערציילן פאר יעדן איינעם די חסדים פונעם אייבערשטן, און ביי התבודדות זאלסטו זיך אויסוויינען און אויסקרעכצן.

עס איז געווען א ברסלב'ער חסיד וואס האט גארנישט געהאט, אבער טאקע גארנישט, און ער פלעגט יעדן איינעם זאגן: "דער אייבערשטער איז אזוי גוט צו מיר", "דער אייבערשטער געבט מיר נאר גוטס".

היינט ענדיגט מען מסכת גיטין און מארגן הויבט מען אן מסכת קידושין; זיי קלוג, כאפ זיך ארויף אויפן וואגן. לערן יעדן טאג דעם בלאט גמרא, אפילו בגירסא, אפילו בלי הבנה כלל. דער רבי זאגט (שיחות הר"ן, סימן עו): "אֵין צְרִיכִין בְּלִמּוּד רַק הָאֲמִירָה לְבַד", מען דארף נאר זאגן די ווערטער, "וּמִמֵּילָא יָבִין", ביים סוף וועט מען שוין פארשטיין.

מיטן אייבערשטנ'ס הילף פארן מיר קיין אומאן פון היינט מאנטאג שופטים - פיר וואכן, א גאנצע פליגער תלמידי היכל הקודש. יעצט הייסט עס מיר וועלן זיך אפשטעלן אין פוילן אין ליזענסק ביים הייליגן רבי אלימלך זכותו יגן עלינו, און פון דארט וועלן מיר פארן צום רבי'ן. קויף דו אויך א טיקעט און קום צום רבי'ן; זוכה זיין צו קומען צום רבי'ן - קוקט מען נישט אויף געלט.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת שופטים, כ"ח מנחם-אב, שנת תשפ"ג לפרט קטן

לכבוד ... נרו יאיר

איך וויל נאכאמאל בעטן אלע אנשי שלומינו זאלן זייער אכטונג געבן נישט צו פארן שנעלער ווי מען מעג, און אויך נישט האלטן דעם טעלעפאן ווען מען דרייווט. איך וויל בעטן בכלליות, און בפרטיות אין שטעטל, מען זאל האלטן די געזעץ, מען זאל נישט פארן שנעל און נישט האלטן דעם טעלעפאן ביים דרייוון, און אויב מען זעט איינעם פארן שנעל זאל מען יענעם פארהאלטן, ווייל אויב מען פאלגט נישט די געזעץ קען מען הרג'ענען מענטשן השם ישמרינו, די וועגן אין שטעטל זענען געדרייט און שמאל, מען דארף פארן זייער פארזיכטיג.

אויך בעט איך אלע איינוואוינער פון שטעטל צו האלטן זויבער ארום די שטוב און אכטונג געבן די מיסט זאל זיין גוט פארפאקט, עס זאל זיין זויבער און ריין.

בעט איבער יעדן איינעם פון אנשי שלומינו, ווייל נאר דורך שלום מאכט מען רוען די שכינה הקדושה, און אויב מען קריגט זיך, מען האט זיך פיינט - פארטרייבט מען די שכינה הקדושה פון די פלאץ.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - ערב שבת קודש פרשת ואתחנן, נחמו, י' מנחם-אב, שנת תשפ"ג לפרט קטן

לכבוד מיין טייערער ליבער ... נרו יאיר

איך בענק זיך זייער נאך דיר, א שאד דו קומסט נישט אין שטעטל כאטשיג איין מאל א וואך באזוכן דעם ראש ישיבה מיט אנשי שלומינו.

עס איז וויכטיג צו בלייבן צוגעבינדן צום ראש ישיבה און אנשי שלומינו. אויף די וועלט דארף מען אסאך חיזוק, און ביים רבי'ן קען מען זיך גוט אויפפרישן, זיך מחזק זיין, זיך אנגרייטן אויף שפעטער.

זיי שטארק מיט א פרק משניות א טאג, א בלאט גמרא א טאג און חומש מיטן תרגום; אויף דעם זיי נישט מוותר.

בעזרת ה' יתברך - ב' פרשת ראה, כ"א מנחם-אב, שנת תשפ"ג לפרט קטן

מרת ... תחי', קרית ברסלב

בנוגע אייער פראגע אויב איר זאלט זיך לערנען צו זיין א הצלה וואלענטיר, צו קענען העלפן פרויען אין שטעטל בעת צרה ובעת שמחה; אדרבה ואדרבה, פארבינדט זיך מיט מרת ... תחי', זי האט שוין געלערנט צו זיין א הצלה וואלענטיר, זי העלפט אין שטעטל זייער געטריי ווען פרויען דארפן הילף; זי גייט מאכן אין די קומענדיגע טעג א קלאס פאר פרויען זיך צו לערנען ווי אזוי צו העלפן ווען מען ווערט געשעדיגט.

איך וויל זייער מאכן אין שטעטל א באזונדערע אפטיילונג פאר פרויען, עס זאלן זיין הצלה וואלענטירן פרויען, אז די אלע מאלן וואס עס איז בכלל נישט קיין פיקוח נפש זאלן די מענער אוועק שטיין פון די פרויען; דאס הייסט ווען א פרוי צעשניידט זיך אדער צעבייגט זיך די פוס וכו' וכו' - זאלן פרויען זיך פארען מיט פרויען און מענער מיט מענער, און ווען עס איז פיקוח נפש - נאר דעמאלט קוקט מען ווער עס קען קומען שנעלער, דעמאלט זאגט די תורה מען דארף ראטעווען א נפש מישראל, דאס איז דוחה אלעס.

איך בעט דעם אייבערשטן אונזער ד' אמות אין שטעטל זאל זיין הייליג און ריין.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - ערב שבת קודש פרשת ואתחנן, נחמו, י' מנחם-אב, שנת תשפ"ג לפרט קטן

לכבוד מיינע טייערער ... נרו יאיר, קרית ברסלב

קויף נישט אייגענע מאשינען צו פרינטן די גליונות, אפילו עס מאכט זיך וואכן וואס די גליונות ווערן פארטיג שפעטער און די בית הדפוס וויל שוין נישט דרוקן - ווילסטו קענען אליין דרוקן.

ענדערש זאל נישט זיין קיין גליונות און עצתו אמונה פאר די וואך, ווי איידער טשעפען דעם בית הדפוס.

פון וואו זאל איך קענען באצאלן די איינגעשטעלטע פון בית הדפוס אז אלע וועלן דרוקן פאר זיך...? און אז מען וועט מער נישט נעמען ביים בית הדפוס ספרים, קונטרסים, גליונות וכו' – וועל איך דארפן פארמאכן, חס ושלום.

ענדערש זאלסטו רעדן צו די מתנדבים וואס ארבעטן לשם שמים אן קיין געלט, זיי זאלן זיך צואיילן מיט די גליונות, אז עס זאל זיין גרייט זונטאג אז מען זאל דאס קענען דרוקן אינעם בית הדפוס קרית ברסלב ליבערטי.

לערן יעדן טאג דעם בלאט גמרא, אפילו דו פארשטייסט נישט – זאלסטו זאגן די ווערטער.

בעזרת ה' יתברך - ערב שבת קודש פרשת ואתחנן, נחמו, י' מנחם-אב, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

מיר פארן שוין נאך אביסל קיין אומאן אויף ראש השנה צום הייליגן רבי'ן, דארט וועלן מיר זיך אויספאקן אלעס וואס איז אריבער די יאר און פון די פארגאנגענע יארן, מיר וועלן איבערלאזן אלע פעקלעך צרות און יסורים, און אהיימברענגען ישועות און רפואות.

איך געב יעדן אינדערפרי א שיעור גמרא, איך האב געמיינט אז דורכאויס די זומער וואכן וואס איך בין מיט ענק אין שטעטל – וועסטו קומען, למעשה פאר איך שוין אהיים נאך אפאר וואכן און איך זע דיך נישט; דו וואלסט זיך מחי' געווען אנצוהייבן די טאג מיט א בלאט גמרא און חיזוק פון רבי'ן.

בעזרת ה' יתברך- ב' פרשת ראה, כ"א מנחם-אב, שנת תשפ"ג לפרט קטן

לכבוד ... נרו יאיר, חבר הנהלת קרית ברסלב ליבערטי

איך דארף הילף אין שטעטל, וואס קען מען טון אז די וואך פון ראש השנה - ווען אלע מענער פארן אוועק צום רבי'ן - זאל זיין טרענספארטעישן אין שטעטל פאר די פרויען? קום אויף מיט א פלאן עס זאל זיין צוגעשטעלט א סערוויס פון טרענספארטעישן פאר די פרויען צו קענען גיין און קומען.

עס איז גענוג שווער פאר די פרויען אז דער מאן פארט אוועק פאר א וואך, זיי בלייבן אליין מיט די קינדער; דארף מען פרובירן זיי מאכן גרינג מיט וואס מען קען.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך- יום א' פרשת ראה, י"ט מנחם-אב, שנת תשפ"ג לפרט קטן

לכבוד ... נרו יאיר

זיי עוסק אין צוזאמנעמען געלט פאר די מוסד; איך בעט דיר נישט דיין אייגענע געלט, איך בעט דיר זאלסט גיין נאך געלט. עס שטייט פון צדיקים, ווער עס גייט נאך געלט - איז מתקן אלע עבירות, גיין נאך געלט איז מזכך דעם מענטש.

שעם זיך נישט צו גיין נאך געלט, אין די פאר שעה ביז מיר ענדיגן דעם קאמפיין קענסטו נאך העלפן די מוסד; אז אלע זאלן זיך אביסל אנשטרענגען קענען מיר אנקומען צום ציל.

אזויפיל מענטשן נעמען זייער גאנצע חיות פון רבי'ן, זיי לעבן אויף די שיעורים, זיי לעבן אויף די חיזוק פון די ספרים און קונטרסים פון מוהרא"ש; זיי וואלטן ווען געוואלט האבן א חלק אין די מוסד, זיי ווארטן מען זאל זיי בעטן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - ערב שבת קודש פרשת ואתחנן, נחמו, י' מנחם-אב, שנת תשפ"ג לפרט קטן

לכבוד מיין טייערער ליבער ... נרו יאיר

איך וויל דיר בעטן א טובה, איך וויל מאכן שבת סעודות אין ישיבה פאר די בחורים וואס קומען פון אויסלאנד. ביז יעצט פלעגן אנשי שלומינו נעמען געסט, למעשה איז געשען צוויי זאכן; שוין כמעט נישטא קיין משפחות וואס נעמען געסט אין וויליאמסבורג, רובם ככולם האבן זיך ארויסגעצויגן אין שטעטל, עס זענען געבליבן געציילטע משפחות אינגעלייט וואס איז נישט שייך פאר זיי צו נעמען געסט. צווייטנס, עס זענען דא אסאך בחורים פון אויסלאנד, ואין הקומץ משביע, אויך זענען דא משפחות וואס איז מיר נישט ניחא אז מיינע בחורים זאלן עסן ביי זיי.

וויל איך דיר בעטן זאלסט מיר העלפן צושטעלן סעודות אין ישיבה פאר די בחורים וואס איך וועל דיר זאגן. וואס דו קענסט בעטן ביי געשעפטן וואס האבן איבריגע עסן פאר צדקה – איז גוט, און וואס מען דארף צוקויפן – וועל איך דיר באצאלן; דאס איז פאר מיר א גרויסע הילף.

אלע בחורים ווילן עסן ביי מיר, קען איך נישט נעמען קיינעם, ווייל עס ווערט קנאה.

בעזרת ה' יתברך- ב' פרשת ראה, כ"א מנחם-אב, שנת תשפ"ג לפרט קטן

מרת ... תחי', קרית ברסלב

וואויל איז אייך אז איר האט אוועק געווארפן די טעלעפאן, און איך האף צום אייבערשטן אז איר וועט קענען ביישטיין די שווערע נסיון וואס מען פרובירט אונז אויס איידער משיח קומט, איר וועט האבן א ריינע שטוב אן קיין טעלעפאן, צו קענען מקבל זיין פני משיח צדקינו.

איר האט דאך געזען אביסל וואס א מענטש איז; די שטיק צייט וואס איר זענט געווען אין שפיטאל - האט איר דאך געזען וואס דאס לעבן איז, ווי פון איין מינוט צום צווייטן איז מען אויס; דארף אייך זיין גרינגער צו טראכטן פון תכלית.

ווען עס קומט אייך א נסיון – זאלט איר טראכטן פון אייערע דורות, טראכטס: 'ווי אזוי וויל איך מיינע קינדער זאלן זיין? וואס פאר א קינדער וויל איך? קינדער מיט טעלעפאנ'ס מיט ברענעדיגע נסיונות - אדער ריינע זויבערע קינדער וואס וועלן דינען דעם אייבערשטן, זיין געטריי דעם אייבערשטן?'

יעדע אידישע מאמע וועט זאגן 'איך וויל ענדערש ערליכע דורות'.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך- ערב שבת קודש פרשת ואתחנן, נחמו, י' מנחם-אב, שנת תשפ"ג לפרט קטן

לכבוד מיין ליבער טייערער ... נרו יאיר

אז איינע פון דיינע חברים האבן א טאלאנט פון מתרגם זיין מוהרא"ש'ס ספרים אויף אנדערע שפראכן, א צווייטער האט א טאלאנט פון שרייבן ניגוני אמונה און א דריטער מיט א צווייטע טאלאנט, און דו פרעגסט זיך אליין: 'מה חובתי בעולמי, וואס איז מיין טאלאנט אויף וואס איך בין באשאפן?'

זאג איך דיר ליבער ברודער, דיין זאך איז זיין א איד, דינען דעם אייבערשטן, דאווענען דריי תפילות, לערנען שיעורים כסדרן בכל התורה כולה, מחנך זיין די קינדער מיט יראת שמים און אמונה, און טון חסד; דאס איז דיין פליכט, מיין פליכט און אלעמענ'ס פליכט.

צעברעך זיך נישט אז דו האסט נישט עפעס מיט וואס דו קענסט עפעס מער וכו'; זיין א פשוט'ער איד, טון דעם ווילן פונעם אייבערשטן, זיין פרייליך, זיין צופרידן, פרייליך מאכן אנדערע, שמייכלען צו אנדערע.

א ברסלב'ער חסיד האט געזאגט, די גרעסטע טאלאנט איז, איינער וואס האט קיין שום טאלאנט און ער דינט דעם אייבערשטן מיט שמחה און מיט אמונה – דאס איז העכער און שטערקער פון יעדע טאלאנט.

בעזרת ה' יתברך

יום ג' פרשת נצבים וילך, י"ט אלול, שנת תשפ"ג לפרט קטן

מרת ... תחי', קרית ברסלב

עס איז זייער א גוטע זאך וואס איר טוט אז מען נעמט זיך צוזאמען משפחות עסן די סעודות ראש השנה ווען די מענער זענען אין אומאן; אזויפיל משפחות וועלן הנאה האבן, בפרט די יונגע ווייבלעך וואס האבן נישט וואו צו זיין ראש השנה, אזוי וועלן זיי האבן שיינע יום טוב'דיגע סעודות.

בנוגע אויב מען זאל בעטן אפאר דאלער פון יעדע משפחה פאר געצייג און עסן וכו'; מען קען בעטן געלט, אבער אז איינער געבט נישט - זאל מען נישט יענעם ארויסשיקן, מען זאל יעדן איינעם אויפנעמען בסבר פנים יפות.

דער אייבערשטער זאל העלפן בזכות די חסד און הכנסת אורחים וואס איר טוט - זאל מען זוכה זיין צו א גוט געבענטשט יאר.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ראה, י"ט מנחם-אב, שנת תשפ"ג לפרט קטן

לכבוד ... נרו יאיר

א יישר כח פארן העלפן די מוסד, פארן עוסק זיין אין צוזאמנעמען צדקה; מען קען מיטהאלטן בערך וויפיל מען איז אנגעקומען, מען האלט שוין ביי צען טויזנט נדבות, איבער צען טויזנט מאל האט מען געבעטן צדקה פון מענטשן, דאס איז זייער א שיינע סכום.

היינט נאכט וועט זיין א מסיבה פון הכרת הטוב פאר אלע וואס האבן געהאלפן מיט די צדקה קאמפיין, אינאיינעם מיט א שיעור הכנה לאומאן; מיר וועלן זיך גרייטן צום הייליגן רבינ'ס ראש השנה.

אלע נערוון קראנקהייטן קומען פון חסרון אמונה, מען פארגעסט פונעם אייבערשטן; אזוי אויך אלע שלום בית פראבלעמען קומען פון דעם וואס מען פארגעסט פונעם אייבערשטן, מען פארגעסט פונעם אלופו של עולם, מען נעמט ארויס פון 'גאט' דעם אות א' - ווערט גט; זאלסטו אסאך חזר'ן אמונה - וועסטו נישט האבן מיט די נערוון, און דו וועסט זוכה זיין צו (סוטה יז.): "שכינה ביניהם".

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ה' פרשת ראה, כ"ג מנחם-אב, שנת תשפ"ג לפרט קטן

לכבוד ... נרו יאיר, גבאי בית המדרש היכל הקודש בני ברק

געב אכטונג אז עס זאלן זיך נישט דרייען אין בית המדרש ביי אונז - בחורים וואס רעדן ניבול פה, געב אכטונג אונזערע קינדער און אונזערע בחורים זאלן זיין ריין; אונזער ד' אמות זאל זיין הייליג.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.