בריוון פונעם ראש ישיבה שליט"א

#4305 - אכטונג געבן מכבד צו זיין תלמידי חכמים
בלעטל, תלמוד חכם

בעזרת ה' יתברך


ליל שישי פרשת ויחי, י"ג טבת, שנת תשפ"ג לפרט קטן


 


לכבוד מיין טייערער ... נרו יאיר, גבאי קרית ברסלב ליבערטי


שטארק זיך מיט דיין עבודת הקודש; הן מיט די גבאות, און הן מיט די שיינע קרית ברסלב בלעטל. די מפיצים זענען דאס מפיץ, זיי זאגן אלע אז דאס גייט זייער גוט, מענטשן זענען זיך זייער מחי'.


איך וואלט ווען געדארפט שרייבן יעדע וואך א בריוו, נישט נאר ווען איך האב עפעס צו זאגן וואס מען זאל פאררעכטן.


איך וויל מעורר זיין. פאריגע וואך פרשת ויגש איז געווען ביים "בילד צו דערקענען" געשריבן איינע פון די מענטשן - דער ראש ישיבה אין יבנאל, הרב הגאון רבי אליעזר אדלשטיין שליט"א. עס איז געשריבן געווארן שלא בכבוד סתם זיין נאמען, אן קיין "הרב" און אן קיין "שליט"א". דער ראש ישיבה אין יבנאל איז א גאון, ער איז געווען אלע יארן דער חברותא פון מוהרא"ש זכותו יגן עלינו, ער קען ש"ס בעל פה בלי גוזמא. מען קען זיך דאס אליינס איבערצייגן; וואו מען פרעגט אים אין ש"ס - איז ער דארט בקי.


ביטע אכטונג געבן פון היינט און ווייטער מכבד זיין תלמידי חכמים.


ביטע דרוקן דעם בריוו אינעם בלעטל.

#4304 - אז מען קוקט מאוויס, ווערט מען אפגעריסן פונעם אייבערשטן
שלום בית, מאוויס, טעלעפאן, שמירת עינים, שובבי"ם

בעזרת ה' יתברך


יום ב' פרשת שמות, ט"ז טבת, שנת תשפ"ג לפרט קטן


 


לכבוד ... נרו יאיר


איך וויל דיר נאכאמאל בעטן: קוק נישט קיין מאוויס; אז מען קוקט מאוויס - ווערט מען אפגעריסן פונעם אייבערשטן.


מען איז יעצט אריין אין די טעג פון שובבי"ם, יעצט איז א צייט צו פאררעכטן אלע פגמי הברית; זאלסטו אוועקווארפן דיינע עבירות. קוק נישט קיין קליפס פון גוים און גויות. קוק נישט גארנישט, אפילו נייעס; א שאד די מח זאל דיר ווערן פארברענט, קוק אין די חומש, קוק אין די משניות און אין די הייליגע גמרא.


אויך דיין ווייב וועט זיין אסאך מער פרייליך ווען זי וועט דיך זען מיט אן ערליכע טעלעפאן וואס מען קען נישט זען אין דעם עבירות.


נעם אן מיינע ווערטער, איך מיין נאר דיין גוטס; נאר דו וועסט מרוויח זיין אז דו וועסט פאלגן.


דער אייבערשטער זאל העלפן זאלסט האבן הצלחה אין אלע ענינים.

#4303 - בעט דעם אייבערשטן זאלסט פאלגן דעם רבי'ן און נישט רייכערן
חסידות ברסלב, מוסר, יענער, רייכערן

בעזרת ה' יתברך


יום ג' פרשת ויחי, עשרה בטבת, שנת תשפ"ג לפרט קטן


 


לכבוד ... נרו יאיר, יבנאל


איך האב ערהאלטן דיין בריוו.


איך פריי זיך זייער צו הערן אז דו האסט מיטגעהאלטן די יארצייט סעודה פון הייליגן רבי נתן זכותו יגן עלינו אין היכל הקודש טברי', און אז אלע פירן זיך מיט גרויס דרך ארץ. ביים רבי'ן איז געווען דרך ארץ זייער א וויכטיגע זאך, דער רבי האט געזאגט: "ווען קעניגן וואלטן געוויסט וואס פאר א דרך ארץ איך לערן אויס מיינע תלמידים - וואלטן זיי געשיקט זייערע קינדער צו מיר, איך זאל זיי אויסלערנען דרך ארץ".


בנוגע וכו'; דארפסט נישט האבן חלישות הדעת פון דעם וואס דו האסט געזען אינגעלייט שטייען אינדרויסן פון בית המדרש און רייכערן. עס זענען דא וואס זענען צוגעוואוינט צו רייכערן פון פריער, איידער זייער התקרבות וכו'.


דו בעט דעם אייבערשטן זאלסט פאלגן דעם רבי'ן און נישט רייכערן, און אויך בעט דעם אייבערשטן זאלסט נישט האבן צוטון מיט אנדערע, נאר זען דאס גוטס ביי אנדערע; אזוי וועסטו זיין גליקליך און צופרידן.


דער אייבערשטער זאל העלפן זאלסט האבן הצלחה אין אלע ענינים.

#4302 - זאגט יעדן טאג כאטש איין קאפיטל תהלים
תפילה והתבודדות, תהלים

בעזרת ה' יתברך


יום א' פרשת שמות, ט"ו טבת, שנת תשפ"ג לפרט קטן


 


... תחי', יבנאל


איך האב ערהאלטן אייער בריוו.


איך פריי זיך צו הערן פון אייך אז איר זאגט תהילים און איר האט שוין געזאגט פינף מאל ספר תהילים. זייט ווייטער ממשיך, זאגט יעדן טאג כאטשיג איין קאפיטל און פלעכטס אריין אייערע אייגענע ווערטער צום אייבערשטן; וועלן אייערע תפילות ארויפגיין זייער הויך אין הימל, און איר וועט האבן אלעס גוטס.


געבט א גרוס פאר אייערע עלטערן.


דער אייבערשטער זאל העלפן איר זאלט האבן הצלחה אין אלע ענינים.

#4301 - א באזוך אין קרית יואל און אין קרית ברסלב
חינוך הילדים, מלמדים, מוסדות, הכרת הטוב, הדפסה, מדות טובות, טעלעפאן, לימוד התורה, סיפורי צדיקים, ספרי ברסלב, ראש ישיבה, שמחות, שמירת עינים, פירושים, שובבי"ם, ברית

בעזרת ה' יתברך


יום ג' פרשת שמות, י"ז טבת, שנת תשפ"ג לפרט קטן


 


לכבוד ... נרו יאיר


היינט בין איך נישט געווען אין ישיבה, איך בין געפארן קיין קרית יואל צו א ברית ביי האברך אברהם שבתי נרו יאיר, די ברית איז געווען אין בית המדרש היכל הקודש - בית נתנאל. מיר האבן בטעות אריינגעלייגט די נאמען פון די גאס, אבער עס איז דא נאך א גאס וואס האט די נאמען אין א פארקערטע פלאץ, מיר זענען אנגעקומען שפעטער מיט א שעה. מיר האבן געדאווענט, און נאכן ברית ביי די סעודה האבן מיר גערעדט פון די גרויסקייט פון א ברית מילה, און אויך די גרויסקייט פון די טעג פון שובבי"ם וואס מיר אלע זענען עוסק זיך צו מל'ן, "וּמָל ה' אֱלֹקֶיךָ אֶת לְבָבְךָ" (דברים ל, ו); ווי אזוי קענען מיר אויפשטאפן אונזער הארץ? דורך תורה ותפילה, דורך לערנען יעדן טאג אביסל חומש איינגעטיילט אויף די וואך, און אויך משניות און גמרא; דאס איז מטהר דעם מענטש.


היינט איז מיר נישט גרינג צו פארן צו אלע שמחות, די קהילה וואקסט קיין עין הרע, יעדן טאג איז דא שמחות, אבער הכרת הטוב האב איך געלערנט ביי מוהרא"ש זכותו יגן עלינו. דערפאר בין איך געפארן, ווייל דער אינגערמאן, דער בעל הברית - האט מיר געהאלפן אין די שווערע צייטן ביים עפענען די ישיבה, ער האט געבויט די ישיבה אין וויליאמסבורג, און אויך אלע יארן די קעמפס פאר די ישיבה, און בפרט יעצט מיטן בויען די שטעטל קרית ברסלב אין ליבערטי, ער העלפט מיר זייער שטארק; איז אלס הכרת הטוב בין איך געגאנגען צו זיין שמחה.


אויך בין איך געגאנגען צום חדר אין קרית יואל; וואס זאל איך דיר זאגן, איך בין אזוי מקנא די קינדער, זיי וועלן קיינמאל נישט וויסן וואס זיי האבן און וואס זיי שפארן איין. זיצט דארט מיט זיי צוויי דריי מלמדים, גאלדענע אינגעלייט, הערצער פון פוטער; ווי זיי רעדן צו די יונגע שעפעלעך, ווי זיי האבן סבלנות צו זיי - דאס קען מען נישט מסביר זיין.


איינער זאגט מיר: "איך שיק נישט אין חדר דא אין קרית יואל, עס איז נישט קיין חדר, עס האט נישט קיין פנים פון א חדר"; וואס זאל איך אים זאגן? וואס איז א חדר? א שיינע בנין? א גרויסע כתה? א חדר איז א מלמד מיט א ווייכע הארץ, מיט געדולד - זיצט מיט די קינדער און לייגט אריין אין זיי יראת שמים, לערנט מיט זיי תורה, דאס איז די חדר; אז דו ווילסט דאס אנטון מיט א שיינע בנין - קענסטו דאס טון, אבער נישט דאס איז קובע א חדר; וואס האט מען פון א שיינע אנטון ווען אינעווייניג איז פארפוילט השם ישמרינו...


איך געדענק יארן צוריק, מיין טאכטער איז געווען א קליינע מיידל, פלעגט זי אהיים קומען זאגן אז די שכנים שפעטן פון בית פיגא, מען לאכט פון איר אז זי איז א נעבעך, אז זי האט אין איר קלאס נאר זיבן מיידלעך. איך פלעג איר זאגן: "ווען מען פרעגט דיך וויפיל קינדער לערנען ביי דיר אין שולע, זאג 'איין מיידל, נאר איך מיט מיין לערערין'"; ווייל וואס איז א גוטע שולע? איז דאס געוואנדן וויפיל קינדער עס זענען דא? איז דאס געוואנדן אויב עס זעט אויס מעכטיג? א גוטע שולע איז א לערערין וואס פארשטייט דאס קינד, א לערערין וואס קלאפט נישט אראפ דאס קינד, וואס מאכט נישט דאס קינד פאר א מענטל-קעיס.


פון דארט בין איך געגאנגען צו בית פיגא אין מאנרא; אזוי געשמאק צו זען ווי עס זענען דא ווייבלעך פון אנשי שלומינו וואס לערנען מיט הארץ מיט די קינדער, מען לייגט אריין אין די קינדער א געשמאק אין זיין א איד, א געשמאק אין זיך אנטון איידל.


פון דארט בין איך געפארן אין שטעטל, איך בין געגאנגען באזוכן אונזער בית הדפוס. דארט האט מען מיר געוויזן דעם נייעם קונטרס שפתי תפתח, א פירוש אויף לקוטי מוהר"ן די ערשטע חלק די צווייטע תורה. איך האב זיך אזוי געפריידט דאס צו זען, ווייל דאס וועט זיין א גרויסע זאך פאר די וואס פארשטייען נישט קיין לקוטי מוהר"ן און קוקן אן דעם ספר ווי א מאמר סתום, וועלן זיי קענען אביסל טועם זיין פון הייליגן רבינ'ס עצות און ווערן נאנט צום אייבערשטן.


איך בין פון דארט געגאנגען צום חדר דאווענען מנחה מיט די קינדער, איך האב גערעדט צו די קינדער פון מוותר זיין. איך האב זיי דערציילט וואס חכמינו זכרונם לברכה דערציילן (תענית כה:): "מעשה ברבי אליעזר שירד לפני התיבה ואמר כ"ד ברכות ולא נענה", עס איז געווען אמאל א טרוקעניש, מען האט געמאכט א תענית און רבי אליעזר איז געווען דער שליח ציבור, ער האט געזאגט די פיר און צוואנציג ברכות וואס די הייליגע חכמים האבן מתקן געווען צו זאגן ביי א יום תענית, און עס איז נאכאלץ נישט געקומען קיין רעגן, "ירד רבי עקיבא אחריו ואמר: 'אבינו מלכנו אין לנו מלך אלא אתה, "אבינו מלכנו למענך רחם עלינו', וירדו גשמים", האט רבי עקיבא מתפלל געווען און געזאגט: "אבינו מלכנו אין לנו מלך אלא אתה, אבינו מלכנו למענך רחם עלינו", און עס האט גלייך אנגעהויבן רעגענען. האט מען אנגעהויבן רעדן שלעכט'ס אויף רבי אליעזר, ווייל מען האט געזען אז ווען רבי עקיבא האט מתפלל געווען איז גלייך געקומען רעגן, און ווען ער האט געבעטן איז נישט געקומען רעגן. איז ארויס א 'בת קול' פון הימל און אויסגערופן: 'נישט ווייל רבי עקיבא איז גרעסער פון רבי אליעזר האט מען אנגענומען זיינע תפילות, נאר ווייל רבי עקיבא איז א וותרן, ער איז מעביר על מדותיו', און ווער עס גיבט נאך און ער קריגט זיך נישט, אפילו ווען ער איז גערעכט - העלפט אים דער אייבערשטער און מען געבט אים נאך וואס ער דארף.


אויך די מעשה וואס די הייליגע חכמים דערציילן (שם) אז בזכות א פרוי וואס האט געטון חסד מיט אירע שכנים - איז געראטעוועט געווארן א גאנצע שטאט פון א שריפה; זעט מען אז אויב מען איז מוותר איינער דעם צווייטן - ווערט מען געראטעוועט פון שלעכטס.


איך בין אויך געווען אין בית פיגא און אויך אין כולל.


איך האב זיך זייער אהיים געיאגט צו די חתונה אין ישיבה; היינט נאכט איז דא א חתונה אין ישיבה, א תלמיד הישיבה און א תלמידה פון בית פיגא.


איך וועל דיר נאך שרייבן. איך בעט דיר זייער, כאפ זיך מיט יעצט שובבי"ם צו מתקן זיין אלעס וואס מען דארף פאררעכטן, יעצט איז א צייט פון תיקון הברית. דאס ערשטע זאך זאלסטו אנהויבן רייניגן דיינע אויגן, קוק נישט קיין עבירות, דאס מאכט נישט פרייליך, עס מאכט בעצבות און מרה שחורה, אז מען איז מפקיר די אויגן איז זייער ביטער, אז מען איז מפקיר די אויגן - פארלירט מען די פרנסה. זע דיין טעלעפאן זאל זיין ריין, לייג ארויף א שטארקע פילטער, שפיל נישט אויס, נישטא וועם אויסצושפילן, קענסט זיך אליינס אויסשפילן, און דיינע קינדער וועלן אויך אויסשפילן; דו ווילסט דאך ערליכע דורות.


דער אייבערשטער זאל העלפן זאלסט האבן הצלחה אין אלע ענינים.

#4300 - געב אכטונג פון די וואס פארדרייען דעם הייליגן רבינ'ס ווערטער
שלום בית, חסידות ברסלב, הדרכות, הלכה, חמרות ופרישות

בעזרת ה' יתברך


יום ב' פרשת שמות, ט"ז טבת, שנת תשפ"ג לפרט קטן


 


לכבוד ... נרו יאיר


איך בין זייער דערציטערט פון דיין בריוו.


גיי אוועק פון די וועג פון פרישות, דאס איז נישט ברסלב, דאס איז אויסגעטראכט אליינס. דער רבי האט אונז געלערנט מיר זאלן לעבן מיט די תורה, לעבן מיטן שולחן ערוך; אז דו וועסט ווייטער גיין אויף דעם וועג - וועט זיין א גט, דו וועסט פאלן אין טיפן אפגרונד.


בעט איבער דיין ווייב, דו ביסט עובר אויף שווערע לאווין, און לעב מיט איר. געב אכטונג פון די וואס פארדרייען דעם הייליגן רבינ'ס ווערטער, דער רבי וויל מיר זאלן לעבן מיט די תורה און אזוי זיך צוקלעבן צום אייבערשטן.


איך דארף מקצר זיין.


דער אייבערשטער זאל העלפן זאלסט האבן הצלחה אין אלע ענינים.

#4299 - הער אויף מעסטן דיין ווייב אויב זי איז אזוי גוט ווי דיין מאמע
שלום בית

בעזרת ה' יתברך


יום ב' פרשת שמות, ט"ז טבת, שנת תשפ"ג לפרט קטן


 


לכבוד ... נרו יאיר


איך האב ערהאלטן דיין בריוו.


טייערער ברודער, הארציגער חבר, איך בעט דיר זייער האב סבלנות אין שטוב, טענה נישט מיט דיין ווייב, און אז זי שרייט אויף דיר און זי זידלט דיר - זאלסטו חס ושלום ענטפערן, נאר שווייגן און מקבל זיין אלעס באהבה. הער אויס וואס טוט איר וויי, און אז זי שרייט אז דו קומסט אהיים שפעט פון הפצה - זאלסטו זיך נישט אויסלאכן, זאלסט אהיים קומען פריער. יעצט איז זי מיט פיצלעך קליינע קינדער - איז איר זייער שווער אז דו קומסט אהיים שפעט. שפעטער אין לעבן, ווען דו וועסט האבן גרויסע קינדער - וועסטו קענען קומען אביסל שפעטער, עס וועט איר זיין גרינגער אן דיר.


דאס וואס דו שרייבסט מיר אז דו האסט קיינמאל נישט געהערט דיין טאטע מאמע שרייען און נאר נאך דיין חתונה האסטו דאס געזען ביי דיין שוויגער וכו' און יעצט מיט דיין ווייב וכו'; זוך נישט אז דיין ווייב זאל זיין אזוי ווי דיין מאמע, הער אויף מעסטן דיין ווייב אויב זי איז דיר אזוי גוט ווי דיין מאמע. דיין ווייב איז זייער א טייערע פרוי, און אז זי שרייט - איז א סימן אז עפעס טוט איר וויי, זאלסטו איר אויסהערן.


מען ווערט נישט א מענטל-קעיס אויב מען שרייט אדער מען פארלירט זיך וכו'; אז זי האט צעבראכן דיין טעלעפאן מוז זיין אז עפעס שטארק באדערט איר, זי האט זיך פארלוירן און צעבראכן דיין טעלעפאן וכו'. בעט איר איבער, רעד צו איר שיינע ווערטער. געב איר צייט; געב איר צו שפירן ווי זי איז דיר זייער טייער.


איך קום בקרוב קיין ארץ ישראל, איך וועל רעדן מיט דיר פערזענליך.


דער אייבערשטער זאל העלפן זאלסט האבן הצלחה אין אלע ענינים.

#4298 - די מיידלעך רעדן נאר די הייליגע שפראך אידיש
חיזוק פאר מיידלעך, סקול, אידיש

בעזרת ה' יתברך


יום ב' פרשת שמות, ט"ז טבת, שנת תשפ"ג לפרט קטן


 


מרת ... תחי', לערערין אין בית פיגא ירושלים


איך האב ערהאלטן אייער בריוו.


איך האב הנאה צו הערן אלע איינצעלהייטן פון שולע.


איך פריי זיך זייער אז די מיידלעך וואס זענען אריינגעקומען אין שולע אן קענען אידיש - קענען שוין א גוטע אידיש, און אלע רעדן נאר די הייליגע שפראך אידיש.


איך האף צו קומען קיין ארץ ישראל קומענדיגע וואך און קומען אין בית פיגא.


דער אייבערשטער זאל העלפן איר זאלט האבן הצלחה אין אלע ענינים.

#4297 - א ווייב קען מען נישט אויסשפילן, דו שפילסט זיך אליין אויס
קדושה, שלום בית, טעלעפאן, לימוד התורה

בעזרת ה' יתברך


יום ב' פרשת שמות, ט"ז טבת, שנת תשפ"ג לפרט קטן


 


לכבוד ... נרו יאיר


דיין ווייב זאגט אז די לעצטע שטיק צייט איז זי ממש נישט ביי זיך, זי זעט אין דיין טעלעפאן אז דו האסט דארט אן עפפ פון זיך טרעפן מיט אנדערע השם ישמרינו; זי איז נישט רואיג, זי וויינט זייער.


איך בעט דיר זייער, פאלג די דרשות, די שיעורים - וואס דו האסט געהערט אלע יארן אין ישיבה, א שאד דיין שיינע שטוב וואס דו האסט קוים אנגעהויבן בויען זאל ווערן אויס. ווייל א ווייב קען מען נישט אויסשפילן, מען קען זיך אליינס אויסשפילן, אבער איר קען מען נישט אויסשפילן; אין אנהויב שפילן זיי מיט, אבער ביים סוף פלאצט דאס.


איך בעט דיר זייער, לאז זיך אפ פון דעם נארישן טעלעפאן, דו ביסט א קלוגער אינגערמאן, דו ביסט נישט קיין קליינע קאפ. איך זע אין ישיבה צווישן די בחורים, די נישט קלוגע ווערן פאר'כישוף'ט פאר א טעלעפאן, פאר קוקן מאוויס, קוקן ספארטס; דו ביסט א בר דעת, דו קענסט נעמען א חברותא, אויסנוצן דיינע יונגע יארן מיט לערנען און דאווענען.


דיין ווייב וויינט, זי וויל ווייטער בויען מיט דיר די שטוב, זי וויל ווייטער אויפציען די קינדער; זי איז גרייט מיט דיר ווייטער צו לעבן, זי קוקט דיך נישט אראפ, זי איז אבער זייער דערשראקן.


איך האב איר געזאגט איך וועל רעדן מיט דיר, איך ווארט צו הערן איר צו ענטפערן.

#4296 - דאס לעבן פירט מען מיט די תורה, אזוי ווי דער אייבערשטער וויל
קינדער, תפילה והתבודדות, אמונה, שלום בית, רפואה

בעזרת ה' יתברך


יום ב' פרשת שמות, ט"ז טבת, שנת תשפ"ג לפרט קטן


 


מרת ... תחי'


איך האב ערהאלטן אייער בריוו.


איך פריי זיך זייער צו הערן אז עס איז דא צווישן אייך און אייער מאן שלום און ליבשאפט, ווייל נאר דארט וואו עס איז דא שלום רוט דער אייבערשטער. חכמינו זכרונם לברכה זאגן (שבת.) דעם אייבערשטנ'ס נאמען איז שלום.


בנוגע וכו'; ווארטס נאך אביסל, ווארטס נאך א האלבע יאר; אזוי וועט איר האבן כח פאר די קינדער.


יא האבן קינדער אדער נישט האבן קינדער - האט נישט צוטון וואס מענטשן וועלן זאגן. דאס לעבן איז נישט געוואנדן וואס מענטשן זאגן און וועלן זאגן, דאס לעבן פירט מען מיט די תורה, אזוי ווי דער אייבערשטער וויל, און די תורה זאגט אז מען זאל רעדן מיט א רב און ער זאל זאגן אויב מען איז בכח אדער מען זאל ווארטן.


ווי אזוי באקומט מען די שטארקייט צו לעבן פאר זיך און עס זאל נישט אנגיין וואס מענטשן זאגן? דורך תפילה והתבודדות; דורך רעדן און שמועסן מיטן אייבערשטן. ווען מען שמועסט מיטן אייבערשטן, מען דאנקט אים, מען לויבט אים - דאס מאכט דעם מענטש שטארק; מען באקומט א שטארקע קלארקייט, עס שטערט נישט וואס דער זאגט און וואס יענער זאגט.


דער אייבערשטער זאל העלפן איר זאלט האבן הצלחה אין אלע ענינים.

#4295 - דאס רעדן צום אייבערשטן געבט שטארקייט, עס בארואיגט
תפילה והתבודדות, אמונה, נסיונות

בעזרת ה' יתברך


יום ד' פרשת שמות, י"ח טבת, שנת תשפ"ג לפרט קטן


 


לכבוד ... נרו יאיר


טייערער הארציגער ברודער, שטארק זיך, דראפע זיך און דערהאלט זיך. בזה העולם דארף מען אסאך חיזוק צו קענען אנגיין בעבודת ה', מען פרובירט אויס יעדן איינעם מיט שווערע ביטערע נסיונות; וואויל איז דעם וואס דערהאלט זיך און בלייבט מיט א שטארקע אמונה.


שטעל זיך אפ פאר א סעקונדע און טראכט: 'דער אייבערשטער איז דא, דער אייבערשטער איז מיט מיר, ביי מיר און נעבן מיר'.


עפן דיין מויל, רעד ארויס א ווארט צום אייבערשטן, זאג: "אייבערשטער העלף מיר, אייבערשטער געב מיר כח, אייבערשטער מאך מיך פרייליך".


דאס רעדן צום אייבערשטן געבט שטארקייט, עס בארואיגט; קיין אנדערע עצה איז נישטא.


גלייב מיר, ווער עס נעמט אריין די עצה פון רבי'ן אין זיך - לעבט א חיים טובים, מען לעבט א גן עדן לעבן.


דער אייבערשטער זאל העלפן זאלסט האבן הצלחה אין אלע ענינים.

#4294 - קען זיך דען א מענטש באהאלטן פונעם אייבערשטן?
קדושה, שלום בית, בזיונות, שמירת עינים

בעזרת ה' יתברך


יום ד' פרשת שמות, י"ח טבת, שנת תשפ"ג לפרט קטן


לכבוד ... נרו יאיר


איך שרייב דיר נאכאמאל, קוק נישט קיין ניאוף; קוקן ניאוף איז זייער א גרויסע עבירה, אז מען קוקט ניאוף ווערט מען אויסגעריסן פון די וועלט. וועסט פארלירן די וועלט און יענע וועלט, דיין ווייב וועט דיך איבערלאזן, דיינע קינדער וועלן זיך שעמען מיט דיר, דו וועסט ווערן פארשעמט פאר אלעמען.


איך פארשטיי נישט וואס עס גייט פאר מיט דיר, פארוואס זאלסטו נישט הערן מיינע רייד וואס איך שרייב דיר און רעדט צו דיר אזויפיל מאל; דו מיינסט אז מען קען זיך באהאלטן פונעם אייבערשטן? "אִם יִסָּתֵר אִישׁ בַּמִּסְתָּרִים", קען זיך דען א מענטש באהאלטן פונעם אייבערשטן? "וַאֲנִי לֹא אֶרְאֶנּוּ, נְאֻם ה'" און דער אייבערשטער זאל אים נישט זען (ירמיה כג, כד).


נאכדעם וועסטו וויינען אז דו האסט נישט קיין פרוטה צו דיין נשמה? ווען דו אליינס ווארפסט אוועק די שפע, דו טראגסט די שפע צו די קליפות השם ישמרינו; אוי ווי ביטער עס איז אז מען קוקט ניאוף, אוי ווי שלעכט עס ווערט די לעבן אז מען קוקט ניאוף.


איך קען נישט ווייטער שרייבן, פון גרויס צער, ווי איך זע וואס דו טוסט.

#4293 - די גרויסקייט פון הייליגן קדושת לוי זכותו יגן עלינו
צדיקים, סיפורי צדיקים

בעזרת ה' יתברך


יום ב' פרשת שמות, ט"ז טבת, שנת תשפ"ג לפרט קטן


לכבוד ... נרו יאיר


חס וחלילה צו זאגן אזעלכע ווערטער אויפ'ן הייליגן צדיק דער קדושת לוי זכותו יגן עלינו.


ווי שעמט איר זיך נישט צו שרייבן אז דער הייליגער קדושת לוי האט פארברענגט די צייט, ווען מען רעדט פון דעם גרויסן צדיק דער הייליגער בארדיטשובער רב וואס דער הייליגער רבי האט מעיד געווען פאר רבי נתן זכותו יגן עלינו (חיי מוהר"ן, סימן תקצט) בזה הלשון: "דאס ווייסטו נישט אז דער בארדיטשובער רב זאגט 'דער בורא' שפריצט איהם פייער פון דיא אויגן".


אויך האט דער רבי געהייסן בודק זיין זיינע תפילין ווען דער הייליגער בארדיטשובער רב איז געווען אונטערוועגנס. דער רבי האט געזאגט (שם, סימן ער): "הרב מברדיטשוב הוא גדול בעיני מאד", איך האלט זייער פון הייליגן קדושת לוי, און אז אזא גדול איז אונטערוועגנס און מען איז אים נישט געהעריג מכבד - איז דאס א פגם אין די תפילין.


אויך האט דער הייליגער רבי נתן זוכה געווען צו זיין א שטיק צייט ביים הייליגן קדושת לוי זכותו יגן עלינו. עס איז באוויסט אז דער קדושת לוי האט אים זייער ליב געהאט, ער פלעגט אים רופן: "מיין נתן'לע".


ווער רעדט אויפ'ן הייליגן קדושת לוי? וואס שטייט דא?! מיר דערציילן בסך הכל ווי אזוי דער הייליגער רבי נתן האט געשפירט איידער ער איז אנגעקומען צום רבי'ן. ער האט געשפירט ביי זיך ווי עפעס פעלט אים, ער איז געווען ביי זיך זייער צעבראכן, ויהי היום, איין וואך מוצאי שבת קודש איז ער געשטעלט געווארן צו גיין קויפן בייגל פאר סעודת מלוה מלכה, דער סדר איז געווען אז מען האט געמאכט א גורל יעדע מוצאי שבת ווער עס זאל אנגרייטן די מלוה מלכה, און ווען רבי נתן האט זוכה געווען אינעם גורל, גייענדיג קויפן די בייגל - איז ער זייער צעבראכן געווארן, ער האט געטראכט: 'איך בין באשאפן געווארן צו קויפן בייגל?!'


ער איז אריין אין א שול אין עזרת נשים, ער האט גענומען א תהילים און אנגעהויבן זאגן תהילים מיט גרויס צעבראכנקייט, ביז ער האט איינגעדרימלט. ער חלומ'ט זיך ווי ער קריכט ארויף אויף א לייטער און ער האלט אין איין אראפפאלן, און איינער שרייט פון אויבן: "נתן, דראפע זיך און דערהאלט זיך". שפעטער ווען רבי נתן איז געקומען צום רבי'ן און געזען די צורה פון הייליגן רבי'ן, האט ער געזען אז דעם צורה האט ער געזען אין חלום.


ווער איז מבטל? ווער בויט זיך אויף אנדערע? ווער מאכט אוועק אנדערע?! חס ושלום מבטל זיין דעם הייליגן קדושת לוי זכותו יגן עלינו; ווער איז נאך געווען אזוי נאנט צום הייליגן רבי'ן ווי דער הייליגער קדושת לוי? דער הייליגער קדושת לוי האט געזאגט: "ווען איך וואלט ווען געוויסט אז איך וועל פועל'ן - וואלט איך געלאפן אין די גאסן שרייען 'ווער עס וויל זיין אן ערליכער איד זאל זיך מקרב זיין צו רבי נחמנ'ן'"; נאך האט ער געזאגט: "וואו איך זע עפעס גוטס  - איז יענער מקורב צום הייליגן רבי נחמן".

#4292 - ווען דו האסט א שווערע מינוט, עפן דיין מויל און רעד צום אייבערשטן
תפילה והתבודדות, אמונה, סיפורי צדיקים

בעזרת ה' יתברך


יום ד' פרשת שמות, י"ח טבת, שנת תשפ"ג לפרט קטן


לכבוד ... נרו יאיר


א איד איז קיינמאל נישט אליין, וואו מען געפונט זיך - איז מען מיטן אייבערשטן.


חכמינו זכרונם לברכה דערציילן (ירושלמי ברכות ט, א): "מעשה בספינה אחת של עכו"ם", עס איז אמאל געפארן א שיף מיט גוים, אויפ'ן שיף איז געווען א אידיש אינגל, עס איז געווען א שטורעם, די שיף איז אנגעקומען ערגעץ ווייט אוועק. אלע גויים זענען אראפ פון שיף זוכן עפעס עסן, אבער דער אידיש אינגל איז געבליבן אויפ'ן שיף, זענען מענטשן אים געגאנגען פרעגן: "וואס איז מיט דיר, פארוואס גייסטו נישט אראפ קויפן עפעס עסן?" האט ער געזאגט: "איך בין א פרעמדער, איך ווייס נישט וואו צו גיין", האבן זיי געזאגט: "א אידיש קינד איז נישט פרעמד, 'כל אהן דאת אזיל', וואו א איד גייט, 'אלקך עמך', איז דער אייבערשטער מיט אים", אזוי ווי עס שטייט "כה' אלקינו בכל קראינו אליו".


האסט א שווערע מינוט? גייסט אריבער עפעס א שוועריקייט וכו'? עפן דיין מויל, רעד צום אייבערשטן - וועסטו זען ניסים.


דער אייבערשטער זאל העלפן זאלסט האבן הצלחה אין אלע ענינים.

#4291 - בעטן דעם אייבערשטן אז דאס קינד זאל זיין געזונט
קינדער, תפילה והתבודדות, תודה והודאה, חיזוק פאר פרויען, רפואה

בעזרת ה' יתברך


יום ד' פרשת שמות, י"ח טבת, שנת תשפ"ג לפרט קטן


 


מרת ... תחי'


איך האב ערהאלטן אייער בריוו.


אין די טעג וואס מען ווארט למזל טוב דארף מען טון צוויי זאכן: ערשטנס, דאנקען און לויבן דעם אייבערשטן. צווייטנס, בעטן דעם אייבערשטן אז דאס קינד זאל זיין געזונט ברמ"ח אברים ושס"ה גידים און זיין א גרויסער צדיק.


דער אייבערשטער זאל העלפן איר זאלט האבן הצלחה אין אלע ענינים.

#4290 - ווער עס האט אמונה, דער דינט דעם אייבערשטן מיט יעדע זאך
שמחה, אמונה, עבודת השם, נסיעה, משניות, גמרא, ראש ישיבה, לשון הרע, ארץ ישראל, מעביר סדרה, תמימות

בעזרת ה' יתברך


יום ה' פרשת וארא, י"ב שובבי"ם, כ"ו טבת, שנת תשפ"ג לפרט קטן


 


לכבוד מיינע ליבע ברידער, תלמידי היכל הקודש פון ארץ ישראל, ה' עליהם יחיו


איך בין נאכאלץ אונטער די גוטע געפיל פון זיין מיט אייך דעם פארגאנגענעם וואך, איך האב זיך זייער מחי' געווען מיט ענק. די אמעריקאנער פרעגן וואס איך זאג צו די ארץ ישראל'דיגע תלמידים, זיי זאגן, זיי שפירן אז דער ראש ישבה איז מער פרייליך דארט.


דער אמת איז, איבעראל איז דא מעלות און מעלות, אבער איין זאך וואס איך זע ביי אייך מער ווי אין אנדערע פלעצער, עס איז דא אסאך מער תמימות ביי אייך; דאס איז א שטארקע זאך פאר'ן התקרבות צום רבי'ן. דעם רבינ'ס זאך קען מען נעמען נאר מיט גרויס תמימות, דער רבי האט געזאגט (שיחות הר"ן, סימן קנד): "אַי אַי פְּרָאסְטִיק", ער האט זיך געבענקט צו די גרויסע עבודה פון דינען דעם אייבערשטן פשוט. "גַּם אָמַר", נאך האט דער רבי געזאגט: "שֶׁדִּבֵּר עִם כַּמָּה צַדִּיקִים גְּדוֹלִים", ער האט גערעדט מיט אסאך גרויסע צדיקים, "וְאָמְרוּ גַּם כֵּן", זיי האבן אים אויך געזאגט די זעלבע זאך, "שֶׁלֹּא הִגִּיעוּ לְמַדְרֵגָתָם", אז זיי זענען נישט צוגעקומען צו זייערע מדריגות, "כִּי אִם עַל יְדֵי עִנְיָן פְּרָאסְטִיק", נאר דורך די פשוט'ע עבודה, "שֶׁעָסְקוּ בַּעֲבוֹדָתָם בִּפְשִׁיטוּת גָּמוּר בְּהִתְבּוֹדְדוּת וְשִׂיחָה בֵּינוֹ לְבֵין קוֹנוֹ", זיי האבן אסאך גערעדט צום אייבערשטן פשוט'ערהייט און אסאך געשמועסט מיט'ן אייבערשטן, "וְעַל יְדֵי זֶה הִגִּיעוּ לְמַה שֶּׁהִגִּיעוּ, אַשְׁרֵי לָהֶם", און נאר אזוי זענען זיי צוגעקומען צו וואס זיי זענען צוגעקומען, וואויל איז זיי.


דאס זע איך ביי אייך, עס איז דא א שטארקע תמימות, און דאס האב איך ליב, ווייל דורך תמימות ופשיטות קומט מען צו האבן א קלארע אמונה, וואס דאס איז ביים רבי'ן געווען מער פון אלעם. אזוי ווי דער הייליגער רבי זאגט (שיחות הר"ן, סימן לג): "אֵצֶל הָעוֹלָם אֱמוּנָה הוּא דָּבָר קָטָן", ביי די וועלט איז אמונה א קלייניקייט, "וְאֶצְלִי אֱמוּנָה הוּא דָּבָר גָּדוֹל מְאֹד", אבער ביי מיר איז אמונה גאר א גרויסע זאך, "וְעִקַּר הָאֱמוּנָה הִיא בְּלִי שׁוּם חָכְמוֹת וַחֲקִירוֹת כְּלָל", דער עיקר אמונה איז ווען מען גלייבט אן קיין חכמות, אן קיין חקירות, "רַק בִּפְשִׁיטוּת גָּמוּר", נאר מיט א פראסטקייט, "כְּמוֹ שֶׁהַנָּשִׁים וְהַהֲמוֹן עַם הַכְּשֵׁרִים מַאֲמִינִים", אזוי ווי פרויען און פשוט'ע מענטשן פירן זיך, מען גלייבט אז אלעס איז דער אייבערשטער, ער מאכט אלעס, ער טוט אלעס און ער איז אלעס.


איך בין געווען אויפ'ן וועג צוריק צום לופטפעלד האט מען מיר געזאגט אז מען קען שוין אריינגיין אינעם בני ברק'ער שול, (קוים וואס מען האט זיך אריינגעצויגן אינעם נייעם שול אויף רחוב ירושלים, זענען שוין די שכנים געלאפן צום בית דין מיט א גיוואלד, אז מען זאל אונז נישט אריינלאזן דארט ווייל מיר זענען נישט ערליך; וויי גיוואלד, וואס מען ליידט פון לשון הרע, וויי גיוואלד וואס מען רעדט אלץ אויף צדיקי אמת וואס זענען זיך מוסר נפש צו אויסלייזן די שכינה הקדושה און עס אריינברענגען אין די וועלט; אויף זיי רעדט מען לשון הרע מיט הוצאת שם רע), בין איך געפארן אהין מחזק זיין די שול.


מיר האבן גערעדט פון וואס דער הייליגער רבי זאגט (לקוטי מוהר"ן חלק ב', סימן פו) אויף די וואכעדיגע פרשה (שמות ו, ט): "וְלֹא שָׁמְעוּ אֶל מֹשֶׁה מִקֹּצֶר רוּחַ וּמֵעֲבֹדָה קָשָׁה", אידישע קינדער האבן נישט געוואלט אויסהערן משה רבינו - מקוצר רוח, זאגט דער רבי דאס איז ווייניג אמונה; אז מען האט נישט קיין אמונה דארף מען טון עבודות קשות, ווייל ווער עס האט אמונה, ער ווייסט און גלייבט אז יעדע פינטל וואס מען טוט איז חשוב ביים אייבערשטן - דער דארף נישט פאסטן, דער דינט דעם אייבערשטן מיט יעדע זאך, אזוי ווי עס שטייט (משלי ג, ו): "בְּכָל דְּרָכֶיךָ דָעֵהוּ", מיט יעדע זאך זאלסטו וויסן דעם אייבערשטן, נאר אן אמונה מיינט מען אז מען מוז טון עבודות קשות, דאס זאגט דער רבי, מִקֹּצֶר רוּחַ, אז מען האט נישט אמונה - וּמֵעֲבֹדָה קָשָׁה - דארף מען שווער ארבעטן.


טייערע ברידער, טייערע חברים, לאמיר אנהויבן טון די עצות פון רבי'ן, אנהויבן לערנען יעדן טאג אביסל חומש, מעביר סדרה זיין פון אנהויב וואך. אזוי ווי עס ווערט גע'פסק'נט (אורח חיים סימן רפה, סעיף ג): "מִיּוֹם רִאשׁוֹן וְאֵילַךְ חָשׁוּב עִם הַצִּבּוּר", פון זונטאג קען מען שוין אנהויבן מעביר סדרה זיין, און דער משנה ברורה זאגט (שם, סעיף קטן ח) דער גר"א זכר צדיק לברכה האט זיך אזוי געפירט, יעדן טאג האט ער מעביר סדרה געווען אביסל; זונטאג ביז שני, מאנטאג ביז שלישי, דינסטאג ביז רביעי און אזוי ווייטער; אז מען גייט אויף דעם וועג - ענדיגט מען די סדרה יעדע וואך.


אויך זאלט איר לערנען אביסל משניות; משניות מאכט דעם מענטש פריי, מען גייט ארויס פון אלע קטנות הדעת. חכמינו זכרונם לברכה זאגן (ויקרא רבה ז, ג): "אֵין כָּל הַגָּלֻיּוֹת הַלָּלוּ מִתְכַּנְסוֹת אֶלָּא בִּזְכוּת מִשְׁנַיוֹת", משיח וועט קומען נאר בזכות וואס מען לערנט משניות.


ועל כולם לערנט אביסל גמרא, מיר גייען ענדיגן די וואך מסכת נדרים, מיר הייבן אן מסכת נזיר. בעט איך אייך, כאפט אייך מיט, א שאד עס זאל אריבערגיין א טאג אן לערנען גמרא. דער הייליגער רבי זאגט (לקוטי מוהר"ן חלק א', סימן ריד): "'תַּלְמוּד' בְּגִימַטְרִיָּא אוֹתִיּוֹת שֶׁל שְׁמָהּ 'לִילִית', עַל כֵּן יֵשׁ כֹּחַ בְּלִמּוּד הַתַּלְמוּד לְהַכְנִיעַ אוֹתָהּ", 'תלמוד' באטרעפט די זעלבע מספר ווי די נאמען פון די קליפה וואס מאכט א מענטש זינדיגן אין פגם הברית, און ווען מען לערנט גמרא איז מען מכניע די קליפה; דערפאר האט דער סמ"ך מ"ם זייער מורא פון א דף גמרא, אלעס וועט ער לאזן דעם מענטש זאל טון, אבי נישט עפענען א גמרא.


והעולה על הכל לאמיר אנהויבן זיין פרייליך, זיך פרייען מיט די מצוות וואס מיר טוען, זיך פרייען מיט דעם אז מיר זענען אידן; דורך התבודדות ותפילה קומט מען צו שמחה.


איך בענק שוין, איך וויל שוין קומען נאכאמאל.


דער אייבערשטער זאל העלפן איר זאלט האבן הצלחה אין אלע ענינים.

#4289 - הנהגות פאר'ן לעבן נאך די חתונה
תודה והודאה, שלום בית, לימוד התורה, חתונה, הדרכות, חתן

בעזרת ה' יתברך


יום ד' פרשת שמות, י"ח טבת, שנת תשפ"ג לפרט קטן


 


לכבוד ... נרו יאיר


איך האב ערהאלטן דיין בריוו.


מזל טוב פאר דיין חתונה, דער אייבערשטער זאל דיר העלפן זאלסט בויען א שיינע אידישע שטוב, די שכינה הקדושה זאל שטענדיג רוען צווישן אייך, איר זאלט זען ליכטיגע דורות.


האסט מיר געבעטן איך זאל דיר שרייבן עפעס הנהגות פארן לעבן; ראשית כל זאלסטו לויבן און דאנקען דעם אייבערשטן אויף די גרויסע חסד אז דו האסט חתונה געהאט, האסט אן אשת חיל; וויפיל דו וועסט דאנקען און לויבן - וועסטו נאכאלץ זיין שולדיג דעם אייבערשטן אויף די גרויסע חסדים.


געדענק גוט דעם כלל, 'נישט זיך טענה'ען מיט די ווייב, גיי נישט אריין אין קיין ויכוחים'. מוהרא"ש זאגט, די ווייב דארף מען געבן גערעכט און נישט זיך שפאַרן מיט איר; אפילו מען איז קלאר גערעכט און זי איז נישט גערעכט - איז נישטא קיין ויכוחים, מען זאגט איינמאל צוויי מאל וואס מען האלט, און אז די ווייב זאגט פארקערט - לאזט מען אפ, מען טענה'עט נישט.


נאך א וויכטיגע זאך, זאלסט רעדן מיט איר נאר פון גוטע זאכן; נישט נעגעטיוו. דערצייל איר אלעס, נאר נישט קיין כשלונות און נפילות - חס ושלום.


ברענג איר אהיים א גוטע זאך; די ווייב ווערט פרייליך ווען איר מאן טראכט פון איר און קומט מיט א גוטע זאך וואס זי גלייכט. אזוי ווי חכמינו זכרונם לברכה דערציילן (יבמות סג.): "רַבִּי חִיָיא כִּי הַוָה מְשַׁכַּח מִידִי", רבי חייא, ווען ער פלעגט זען א גוטע זאך וואס זיין ווייב האט ליב - "צִיֵּיר לֵיהּ בְּסוּדְרֵיהּ, וּמַיְיתֵי נִיהֲלֵהּ", פלעגט ער דאס אהיים ברענגען פאר איר.


מאך זיך א שיעור צו לערנען אין שטוב; די ווייב האט ליב צו זען דעם מאן לערנען, אז דו וועסט לערנען וועט זי דיך ארויפקוקן.


איך דארף מקצר זיין, איך דארף גיין צו די בחורים; זיי ווארטן אויף אביסל חיזוק.


דער אייבערשטער זאל העלפן זאלסט האבן הצלחה אין אלע ענינים.

#4288 - ווי אזוי טוט מען תשובה אין די הייליגע שובבי"ם טעג?
שמחה, תשובה, לימוד התורה, עצבות, שובבי"ם

בעזרת ה' יתברך


יום א' פרשת שמות, ט"ו טבת, שנת תשפ"ג לפרט קטן


 


לכבוד ... נרו יאיר


מיר גייען אריין היינט אין די וואכן פון שובבי"ם. דער הייליגער אריז"ל האט אונז מגלה געווען אז אין די וואכן קענען מיר מתקן זיין אלעס וואס מיר דארפן מתקן זיין, בפרט די עבירה פון פגם הברית רחמנא לצלן; אין די טעג קען מען דאס פאררעכטן.


וואס טוט מען צו פאררעכטן די פגמים? מוהרא"ש חזר'ט אן א שיעור מאל די ווערטער פון די הייליגע חכמים זכרונם לברכה (ירושלמי ראש השנה, פרק ד, הלכה ח): "כֵּיוָן שֶׁקִּבַּלְתֶּם עֲלֵיכֶם עוֹל תּוֹרָה", אז מען נעמט אויף זיך די עול תורה, "מַעֲלֶה אֲנִי עֲלֵיכֶם כְּאִילוּ לֹא חֲטָאתָם מִיְמֵיכֶם", זאגט דער אייבערשטער, רעכן איך ענק אזוי ווי איר וואלט קיינמאל נישט געזינדיגט; זאלסטו אין די טעג זיך שטארקן צו לערנען חומש, משניות און גמרא, על פי סדר דרך הלימוד פון רבי'ן (המבואר בשיחות הר"ן, סימן עו), אפילו אן פארשטיין, אפילו נאר זאגן די ווערטער; דאס איז מזכך ומטהר דעם מענטש.


תשובה טון דארף צוגיין מיט שמחה, עצבות ומרה שחורה איז סם המוות. עצבות אז מען לאזט דאס אין זיך - קען זיך דאס צעשפרייטן ווי א שרעקליכער גופט, און ווען עס איז שוין צעשפרייט - איז דאס שווער ארויס צו טרייבן, דעריבער דארף מען דאס גלייך פארטרייבן און נישט לאזן אין זיך קיין ברעקעלע עצבות, נאר זיין פרייליך; נאר אזוי קען מען תשובה טון.


דער אייבערשטער זאל העלפן זאלסט האבן הצלחה אין אלע ענינים.

#4287 - דער רבי האט זוכה געווען צו אלע מדריגות, דורך זאגן תהילים
תפילה והתבודדות, תודה והודאה, תהלים

בעזרת ה' יתברך


יום ב' פרשת מקץ, כ"ה כסליו, א' דחנוכה, שנת תשפ"ג לפרט קטן


 


מרת ... תחי', ירושלים


זעט צו זאגן תהילים, דער הייליגער רבי האט געזאגט (שבחי הר"ן, סימן י), ער האט זוכה געווען צו אלע מדריגות - דורך זאגן תהילים און רעדן אסאך צום אייבערשטן.


ווען איר זאגט תהילים זאלט איר אריינפלעכטן אייערע אייגענע תפילות; סיי לויב און דאנק צום אייבערשטן, און סיי בעטן אויף ווייטער.


דער אייבערשטער זאל העלפן איר זאלט אויפשטעלן שיינע ליכטיגע דורות, קינדער צדיקים, בזכות אייער כיבוד אב ואם. און איר זאלט מצליח זיין מיט אייערע תלמידות, ביז מיר וועלן זוכה זיין אנטקעגן גיין משיח צדקינו, מיר וועלן זיך נישט שעמען אים אנטקעגן צו גיין מיט אונזערע דורות, תלמידות בית פיגא; איידעלע, ערליכע אידישע טעכטער; אמן.


 

#4286 - תהילים ברענגט שלום בית, תהילים ברענגט נחת
שמחה, שלום בית, תהלים, נחת

בעזרת ה' יתברך


יום ב' פרשת ויגש, ב' טבת, זאת חנוכה, שנת תשפ"ג לפרט קטן


 


א מתנה פאר ... תחי'


זאגט אביסל תהילים יעדן טאג;


תהילים געבט כח


תהילים געבט מח


תהילים מאכט פרייליך


תהילים היט דעם מענטש


תהילים ברענגט שלום בית


תהילים ברענגט נחת


 


פון דער ראש ישיבה

#4285 - ווי מער מען דאנקט דעם אייבערשטן, אלץ שטערקער ווערט די מח
תודה והודאה, חיזוק פאר פרויען

בעזרת ה' יתברך


יום ב' פרשת ויגש, ב' טבת, זאת חנוכה, שנת תשפ"ג לפרט קטן


 


מרת ... תחי' ברסלב, ליבערטי


גייט צום פענסטער, קוקט ארויף צום הימל און זאגט: "שכוח אייבערשטער פאר מיין לעבן, שכוח פאר מיין מאן, שכוח פאר מיינע קינדער"; רעכנט אויס די נעמען פון יעדן קינד.


דאס זאלט איר טון יעדן טאג, וועט איר ווערן געזונט און שטארק; ווייל ווי מער מען דאנקט דעם אייבערשטן - אלץ שטערקער ווערט די מח, מען באקומט שטארקע כוחות הגוף והנפש.

#4284 - נאר מיט'ן לערנען הלכות שבת, קען מען היטן שבת
שבת קודש, הלכה

בעזרת ה' יתברך


יום ב' פרשת ויגש, ב' טבת, זאת חנוכה, שנת תשפ"ג לפרט קטן


 


מרת ... תחי' ברסלב, ליבערטי


איך האב ערהאלטן אייער בריוו.


עס איז זייער וויכטיג צו לערנען הלכות שבת, ווייל נאר אזוי קען מען היטן שבת.


בנוגע אויב מען מעג נוצן די דינע פאוני פלעסטיק ראבערס צאמצובינדן די האר פון קליינע קינדער; שבת טאר מען עס נישט נוצן, ווייל עס איז נישט מעגליך דאס צו נוצן אן אויסרייסן האר, ענדערש זאל מען נוצן די גראבע ראבערס, אדער קען מען לייגן די דינע אום ערב שבת און דאס נישט ארויסנעמען א גאנץ שבת.


בנוגע אנגרייטן וועש פאר די קינדער פרייטאג צו נאכטס פאר שבת אינדערפרי; מען מעג אנגרייטן וועש פאר די קינדער, עס איז נישט קיין פראבלעם פון אנגרייטן איין טאג פאר'ן צווייטן; פון ביינאכט אויף אינדערפרי איז איין טאג.


זייט ממשיך צו זאגן תהילים יעדן טאג, וועט איר זען גרויסע ישועות.

#4283 - בעטס אלע אייערע בקשות ביים ציון פון מוהרא"ש זכותו יגן עלינו
תפילות אויף אידיש, יבנאל, תהלים, מוהרא"ש

בעזרת ה' יתברך


יום ב' פרשת ויגש, ב' טבת, זאת חנוכה, שנת תשפ"ג לפרט קטן


 


מרת ... תחי', יבנאל


זאגט יעדן טאג אביסל תהילים - וועט איר האבן אלעס גוטס, ווייל תהילים ברענגט ישועות, תהילים ברענגט נאנט צום אייבערשטן.


אויך זאלט איר אריינפלעכטן אייערע אייגענע תפילות; סיי בקשות און סיי תודה והודאה.


אויך זאלט איר גיין צום ציון פון מוהרא"ש זכותו יגן עלינו און בעטן אלע אייערע בקשות, ווייל דארט איז מסוגל צו ווערן געהאלפן.


אויך בעטס ביים ציון פון מוהרא"ש פאר מיר, יואל בן רייצא רעכיל.

#4282 - תהלים יעדן טאג, וועט אפגעהיטן פון אלעם שלעכטס
תהלים

בעזרת ה' יתברך


יום ב' פרשת ויגש, ב' טבת, זאת חנוכה, שנת תשפ"ג לפרט קטן


 


א מתנה פאר די חשוב'ע תלמידה בית פיגא ... תחי'


זעט צו זאגן תהלים יעדן טאג, וועט איר זיין אפגעהיטן פון אלעם שלעכטס.


פון דער ראש ישיבה

#4281 - תהילים איז דער סוד פון הצלחה
תהלים

בעזרת ה' יתברך


יום ב' פרשת ויגש, ב' טבת, זאת חנוכה, שנת תשפ"ג לפרט קטן


 


א מתנה פאר ... תחי', תלמידה בית פיגא


זעט צו זאגן תהילים - וועט איר זיין געבענטשט מיט אלע ברכות.


תהילים איז דער סוד פון הצלחה, תהילים איז די שליסל פאר אלעס גוטס.


פון דער ראש ישיבה