בריוון פונעם ראש ישיבה שליט"א

בעזרת ה' יתברך - יום ד' פרשת ראה, כ"ב מנחם-אב, שנת תשפ"ג לפרט קטן

לכבוד אנשי שלומינו שיחיו

איך וויל יעדן איינעם פערזענליך איינלאדענען דעם קומענדיגן זונטאג פרשת שופטים, צו די יערליכע מסיבה וואס איך מאך פארן בית התבשיל פון אונזער שטעטל קרית ברסלב, וואס וועט פארקומען אין שטוב פון האברך היקר שלמה יאקאבאוויטש, דער גבאי פונעם בית התבשיל.

עס איז דא צדקות וואס מען דארף מסביר זיין וואס די צדקה איז, וואס די צדקה טוט און וואו די געלט גייט, ביים בית התבשיל דארף מען גארנישט זאגן; אלע ווייסן וואס דאס איז, און די גאנצע שטעטל האט הנאה פונעם בית התבשיל; איינער מער איינער ווייניגער, אבער הצד השווה שבהן, אז אלע האבן נוצן פון דעם, אלע זענען זיך מחי' מיט די עסן און מיט די חלוקות וואס זיי טיילן אויס א גאנץ יאר.

דער אייבערשטער זאל העלפן, בזכות די מצוה פון צדקה זאלן מיר אלע האבן א כתיבה וחתימה טובה און א יאר מיט שפע.

מוהרא"ש זאגט, די גרעסטע צדקה איז געבן עסן פאר הונגעריגע מענטשן.

בעזרת ה' יתברך - יום ד' פרשת ראה, כ"ב מנחם-אב, שנת תשפ"ג לפרט קטן

לכבוד ... נרו יאיר

נעכטן בין איך געווען פארנומען, איך בין אריינגעפארן קיין בארא פארק באזוכן מיין טאכטער, זי האט געהאט א אינגל למזל טוב. איך בין ארויסגעפארן אינדערפרי און צוריק געקומען שפעט ביינאכט. "מָה אָשִׁיב לַה', כָּל תַּגְמוּלוֹהִי עָלָי", איך בין אזוי דאנקבאר דעם אייבערשטן, ער געבט מיר אזויפיל גוטס און אזויפיל נחת; דוד המלך פרעגט, וואס קען איך צוריק טון פארן אייבערשטן - "כָּל תַּגְמוּלוֹהִי עָלָי? כּוֹס יְשׁוּעוֹת אֶשָּׂא וּבְשֵׁם ה' אֶקְרָא", איך וועל רעדן צו אים און אים לויבן; מיט דעם צאלט מען צוריק כביכול דעם אייבערשטן.

איך וואונטש דיר בעת שמחה: "דער אייבערשטער זאל דיר העלפן זאלסט זוכה זיין צו שמחות מיט שמחה ביי דיינע קינדער און אייניקלעך, זאלסט זיך דערהאלטן ביים רבי'ן, זאלסט נישט האבן מיט קיין ליצנות צוטון, זאלסט זיך נאר חבר'ן מיט אנשים תמימים וואס לעבן מיט תמימות ופשיטות".

אויך דאנק איך דיר פארן גיין נאך געלט פאר די מוסד. איך האף אז דאס איז נאר דער אנהויב, דו וועסט ממשיך זיין א גאנץ יאר עוסק זיין אין צוזאמנעמען געלט; גיין נאך צדקה איז מתקן אלע פגמים און מען איז זוכה צו א טלית נאה בגן עדן, צו שיינע קליידער אויבן אין הימל.

עס איז זייער געשמאק אין שטעטל. מיטן אייבערשטנ'ס הילף זענען מיר דא נאך צוויי וואכן, די בחורים פארן אהיים מיטוואך כי תצא און איך און מיין משפחה וועלן צוריק פארן קיין שטאט זונטאג כי תבוא לאומאן. איך וויל זייער בלייבן אין שטעטל, אבער מיר האבן נאכנישט גרייט א פלאץ פאר די בחורים, וואו די ישיבה זאל זיין.

האסט שוין געלערנט היינט א פרק משניות? א בלאט גמרא? זע צו זיין א סוקסעספול מענטש; א פרק משניות א טאג, א בלאט גמרא א טאג - איז סוקסעס.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ה' פרשת ראה, כ"ג מנחם-אב, שנת תשפ"ג לפרט קטן

לכבוד ... נרו יאיר

טייערער ברודער, הארציגער חבר, אין די צייטן פונעם בית המקדש, ווען מען האט געהאט א ספק ווי אזוי זיך צו פירן - איז מען געגאנגען צום כהן גדול, מען האט געפרעגט די פראגע און עס האט אנגעהויבן שיינען די אותיות פונעם חושן, אזוי האט מען געוואוסט ווי אזוי זיך צו פירן. היינטיגע טעג ווען מיר האבן נישט קיין אורים ותומים, וואס זאל מען טון ווען מען ווייסט נישט ווי זיך צו פירן? וועם זאל מען פרעגן? מוהרא"ש זאגט, התבודדות ותפילה איז היינט די אורים ותומים.

חכמינו זכרונם לברכה זאגן (ויקרא רבה ל, ג): "בַּדּוֹרוֹת הַלָּלוּ" אין די היינטיגע טעג, "שֶׁאֵין לָהֶם לֹא מֶלֶךְ" וואס מיר האבן נישט קיין קעניג, "וְלֹא נָבִיא" און מיר האבן נישט קיין נביא, "לֹא כֹהֵן" מיר האבן נישט קיין כהן, "וְלֹא אוּרִים וְתֻמִּים" און נישט קיין אורים ותומים, "וְאֵין לָהֶם אֶלָּא תְּפִלָּה זוֹ בִּלְבָד" מיר האבן נאר תפילה, "אָמַר דָּוִד לִפְנֵי הַקָּדוֹשׁ בָּרוּךְ הוּא רִבּוֹנוֹ שֶׁל עוֹלָם אַל תִּבְזֶה אֶת תְּפִלָּתָם", אויף אונז בעט דוד המלך, רבונו של עולם נעם אן די תפילות פון אידישע קינדער.

דעריבער בעט איך דיר זייער מיין ליבער ברודער, גיי אין א שטילע פלאץ און בעט דעם אייבערשטן; רעד צו אים, שמועס אויס דיינע ספיקות - וועסטו באקומען א קלארקייט אין יעדע זאך, דו וועסט וויסן ווי זיך צו פירן, און עצות אויף יעדע פרט.

היינט נאכט וועט זיין דער וועכנטליכער ליל שישי שיעור, קום זיך אויפפרישן מיט די עצות פון רבי'ן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ראה, י"ט מנחם-אב, שנת תשפ"ג לפרט קטן

לכבוד ... נרו יאיר, מגיד שיעור ישיבת היכל הקודש ירושלים

איך האב ערהאלטן דיין בריוו.

רעד אסאך צו די בחורים פון אמונה און פון אמונת צדיקים, ווייל אז מען האט אמונה אינעם אייבערשטן און אויך אמונת חכמים, מען גלייבט אין די ווערטער פון צדיקים - ווערט דער נפש ריין און מען ווערט אן ערליכער איד.

דער הייליגער רבי האט געזאגט פאר רבי נתן: "ווען דו שרייבסט פון 'אמונה' און פון 'צדיק' - זאלסטו פארשפרייטן דעם פענע"; ווייל אין די צוויי זאכן איז תלוי אלעס. אויך ברענגט מוהרא"ש פונעם הייליגן צדיק רבי ר' ברוך'ל פון מעזיבוזש זכותו יגן עלינו: "אמונה אינעם באשעפער און אמונת חכמים - זענען תרין רעין דלא מתפרשין".

בנוגע אומאן; דו רעד צו די בחורים פון דאס גרויסקייט פון קומען צום רבינ'ס ציון, מער פון דעם איז נישט דיין עסק.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ראה, י"ט מנחם-אב, שנת תשפ"ג לפרט קטן

לכבוד ... נרו יאיר, בני ברק

איך וויל דיר בעטן זאלסט העלפן אין אונזער בית המדרש אין בני ברק. דער גבאי אבא חייא נרו יאיר ווערט יעצט פארנומען מיטן חדר, ער דארף הילף אין בית המדרש; וויל איך דיר בעטן זאלסט אים העלפן.

משמש זיין דעם רבי'ן איז די העכסטע זאך.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ראה, י"ט מנחם-אב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

אסאך מאל ווען מען וויל טון אסאך - טוט מען גארנישט, אבער אז מען ווייסט דאס חשיבות פון אביסל - דעמאלט קומט מען אן צו טון אסאך; אזוי ווי דער הייליגער רבי נתן האט געזאגט: "איך האב געלערנט פון רבי'ן א נייעם דערהער, 'מעט, גם כן טוב', אביסל איז אויך גוט, און דאס האט מיר געמאכט טון זייער אסאך".

מאך זיך אן אפמאך צו זאגן יעדן טאג כאטשיג איין פרק משניות; זאגן א פרק משניות נעמט נישט לאנג, און דאס קען מען טון יעדן טאג; אזוי וועסטו יעדן טאג לערנען.

משניות וועט אוועק נעמען פון דיר אלע אנגעצויגנקייטן, דו וועסט ווערן שטארק מיט זיך.

טו דאס נאך חדר, אין שטוב, עס זאל נישט זיין קיין מחלוקות אויף דיר. אין חדר זאלסטו זיך פירן ווי אלע אנדערע קינדער; קיינער דארף נישט וויסן אז דו ביסט א צדיק. דו שפיל מיט אלע קינדער און פארברענג מיט אלע קינדער אזוי ווי אלע טוען, דער הייליגער רבי האט אויך אזוי געטון. ער פלעגט שפילן מיט די קינדער, און שטילערהייט האט ער אסאך גערעדט צום אייבערשטן. אויך פלעגט ער אסאך טראכטן פונעם שם הוי"ה ברוך הוא, פון די אותיות י–ה–ו–ה, און דער מלמד פלעגט אים שלאגן, דער מלמד האט געמיינט אז ער חלומ'ט; קיינער האט נישט געוואוסט אז דער רבי איז א צדיק, ווייל פון אינדרויסן האט ער זיך געשפילט מיט אלע קינדער.

אזוי זאלסטו טון אין חדר. זיי ווי אלעמען, מען זאל דיך נישט פארשעמען אז דו ביסט ברסלב, און אין שטוב זאלסטו לערנען משניות - וועסטו ווערן אויס אנגעצויגן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ראה, י"ט מנחם-אב, שנת תשפ"ג לפרט קטן

לכבוד ... נרו יאיר

זארג נישט, וועסט האבן קינדער. א שאד צו זארגן, זארגן העלפט נישט, זארגן מאכט נאר שוואך דעם מענטש; גלייב מיט אמונה אז דער אייבערשטער וועט דיר געבן קינדער.

קינדער האט נישט מיט קיין טבע, קינדער האט נאר מיטן אייבערשטן, די שליסל פון קינדער ליגט אינעם אייבערשטנ'ס הענט. חכמינו זכרונם לברכה זאגן (תענית ב.) "אמר רבי יוחנן, ג' מפתחות בידו של הקדוש ברוך הוא", רבי יוחנן זאגט, דריי שליסלען איז נאר אין די הענט פונעם אייבערשטן, "מפתח של גשמים, מפתח של חיה, ומפתח של תחיית המתים", מען דארף בעטן און בעטן און האבן סבלנות.

מאך פרייליך דיין ווייב, רעד צו איר, טרייסט איר, בפרט ווען עס קומט אן נאכאמאל די צייט וכו' - דעמאלט ווערט מען זייער צעבראכן; דארף דער מאן מיט חכמה טרייסטן מיט דבורי אמונה.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ראה, י"ט מנחם-אב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

וואלסטו געוואוסט וויפיל אידן זענען זיך מחי' מיט די קונטרסים פון 'אשר היה אל יואל', מיט די גליונות פון 'שיעורי חינוך' און מיט די גליונות פון 'ספורי מעשיות' - וואלסטו געטאנצן פאר שמחה א גאנצן טאג; אז דו האסט די זכיה צו עוסק זיין אין דעם.

דאס וואס דו האסט בלבולים וכו' וכו'; וויסן זאלסטו, אלע וואס טוען פארן רבינ'ס זאך האבן די געפיל אז זיי טוען גארנישט אויף. אזוי גייט עס, מען טראכט: 'ווער דארף די גליונות? ווער דארף די ספרים? וכו', מען שפירט ביי זיך ווי מען טוט גארנישט, אבער דאס איז נישט אמת; אודאי טוען די ספרים אויף, אודאי איז דאס מקרב מענטשן צום אייבערשטן, עס ברענגט אריין אזויפיל הרהורי תשובה.

איך האב אליינס געהערט כמה פעמים פון מוהרא"ש; פון די גרויסע מחלוקת און בזיונות פלעגט מוהרא"ש צומאל טראכטן 'ווער דארף די ספרים און וואס טוט דאס אויף?' און פינקט אין די מינוט איז פון הימל געקומען אן ענטפער; א בחור איז געקומען זאגן ווי ער איז געראטעוועט געווארן פון די ספרים, אדער א אינגערמאן איז געקומען דערציילן ווי ער איז געווען באגראבן אין שאול תחתית און די קונטרסים - דאס האט אים געראטעוועט.

אז דו האסט בלבולים, דו טראכסט דו געבסט אוועק אזויפיל צייט, וואס טוט דאס שוין אויף...? וויל איך דיר בעטן זאלסט אפלאזן די מחשבות, דאס איז פונעם סמ"ך מ"ם וואס זוכט אלע מיטלען ווי ער קען אפשטעלן די גליונות וואס איז מחזק אזויפיל מענטשן, און דאס ברענגט אריין אזויפיל הרהורי תשובה; נעמט ער זיך צו די ביינער פון די שרייבערס, טייפערס און מגיהים.

חזק ואמץ בכל כוחך.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ראה, י"ט מנחם-אב, שנת תשפ"ג לפרט קטן

לכבוד ... נרו יאיר

איך האב געהערט די פרייליכע נייעס אז דו האסט זוכה געווען אין די יאר צו לערנען גאנץ ש"ס; האסט אנגעהויבן פאראיאר ביי די פטירה פון דיין מאמע עליה השלום און דו גייסט מסיים זיין גאנץ תלמוד בבלי כ"ב לחודש אב, לכבוד די ערשטע יארצייט פון דיין מאמע.

וואס זאל איך דיר זאגן, די שענסטע זאך וואס א קינד קען טון פאר זיין אייגענע נשמה און פאר די נשמה פון די עלטערן - איז לערנען תורה; עס ווערט א שמחה אין אלע עולמות, די נשמה גייט ארויף אין גן עדן העכער און העכער, די נשמה קומט צו איר אייביגע רי.

לערנען גמרא איז אזוי הייליג און אזוי הויך. הער א מעשה וואס מוהרא"ש זכותו יגן עלינו דערציילט, דער הייליגער רבי אלימלך פון ליזענסק זכותו יגן עלינו האט באשטימט אז זיין תלמיד דער הייליגער רבי מענדעלע מרימנוב זכותות יגן עלינו זאל זיין בעל תפילה ראש השנה ביי אים אין שול.

איין יאר האט דער צדיק רבי מענדעלע זכותו יגן עלינו זיך באהאלטן, ער האט נישט געוואלט זיין דער בעל תפילה, און דער הייליגער רבי אלימלך פון ליזענסק האט נישט געוואלט מען זאל צושיקן א צווייטן, ער האט געזאגט מען וועט נישט דאווענען ביז מען וועט אויפזוכן דעם רבי מענדעלע. אלע תלמידים האבן זיך ארויסגעלאזט זוכן דעם רבי מענדעלע, ביז מען האט אים געטראפן. מען האט אים געזאגט: "דער רבי לאזט נישט קיינעם צוגיין צום עמוד, דער רבי זאגט ער ווארט אויף דיר"; דער רבי ר' מענדעלע האט נישט געהאט קיין ברירה, ער איז צוגעגאנגען צום עמוד.

נאכן דאווענען האבן אלע זייער געמוטשעט דעם רבי מענדעלע ער זאל זאגן פארוואס ער האט נישט געוואלט צוגיין צום עמוד. האט ער געזאגט, ער האט מקובל, ווער עס ווערט אויסדערוועלט צו זיין בעל תפילה אין די ימים נוראים מוז לערנען גמרא יעדן טאג פון ט"ו אב, און היות די יאר איז אים געווען זייער שווער די נסיעה פון פריסטיק קיין ליזענסק, און ער האט נישט געלערנט יעדן טאג גמרא, האט ער נישט געוואלט צוגיין צום עמוד, ביז דער רבי אלימלך האט אים געהייסן האט ער געדארפט פאלגן; זעט מען ווי גרויס און הייליג איז לערנען גמרא.

הויב אן נאכאמאל ש"ס לעלוי נשמת דיין מאמע, לערן יעדן טאג זיבן בלעטער; דאס וועט דיך מטהר זיין און מזכך זיין, און אויך וועט דאס זיין א טובה פאר דיין מאמע'ס נשמה.

שטארק זיך, זיי ממשיך מיט דיין עבודות הקודש.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת ראה, י"ט מנחם-אב, שנת תשפ"ג לפרט קטן

... תחי', תלמידה בית פיגא

איך האב ערהאלטן אייער בריוו.

איר האט שוין פרובירט בעטן דעם אייבערשטן אויף דעם יעדן טאג? פרובירט די עצה, בעטס יעדן טאג דעם אייבערשטן: "הייליגער באשעפער, העלף מיר איך זאל זיך אפגעוואוינען פון די נישט גוטע געוואוינהייט" – וועט איר קענען אויסרייסן די שלעכטע נאטור.

תפילה איז זייער שטארק, תפילה איז שטערקער פון טבע, עס איז מהפך די טבע; מען דארף נאר האבן אסאך סבלנות, בעטן, בעטן און נאכאמאל בעטן, און נישט אפלאזן תפילה.

בעטס דעם אייבערשטן מיט שמחה און פרייד, עס איז גאר אנדערש תפילות וואס מען בעט מיט שמחה. דער רבי זאגט (ספר המדות אות תפלה, סימן פא): "תְּפִלָּה שֶׁהִיא בְּשִׂמְחָה", ווען מען בעט דעם אייבערשטן מיט פרייליכקייט, "הִיא עֲרֵבָה וּמְתוּקָה לַשֵּׁם יִתְבָּרַךְ", זענען די תפילות זיס און איינגענעם פארן אייבערשטן.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת ראה, כ"ב מנחם-אב, שנת תשפ"ג לפרט קטן

מרת ... תחי'

יְהִי רָצוֹן מִלְּפָנֶיךָ, עֶס זָאל זַיין דֶער וִוילְן פוּן דִיר הֵיילִיגֶער בַּאשֶׁעפֶער, אִין דִי זְכוּת פוּן דִי הֵיילִיגֶע מִצְוָה פוּן אָפְּשֵׁיידְן חַלָּה - זָאל פַארְרָאכְטְן וֶוערְן דִי פְּגַם פוּן חַוָּה, וָואס הָאט אִיבֶּערְגֶערֶעדְט אָדָם הָרִאשׁוֹן צוּ גֵיין קֶעגְן דִי וִוילְן פוּן אֵייבֶּערְשְׁטְן, אוּן מִיט דֶעם הָאט זִי גוֹרֵם גֶעוֶוען עֶס זָאל זַיין שְׁטַארְבְּן אוֹיף דִי וֶועלְט; דֶערִיבֶּער זָאל דִי זְכוּת פוּן אָפְּשֵׁיידְן חַלָּה בְּרֶענְגֶען דִי גְּאוּלָה, וָואס דַאן וֶועט מֶער נִישְׁט זַיין דִי זַאךְ פוּן שְׁטַארְבְּן, אַזוֹי וִוי עֶס שְׁטֵייט (יְשַׁעְיָה כה, ח): "בִּלַּע הַמָּוֶת לָנֶצַח".

הֵיילִיגֶער בַּאשֶׁעפֶער, הֶעלְף מִיר, בִּזְכוּת וָואס אִיךְ שֵׁייד אָפּ חַלָּה זָאל אִיךְ זוֹכֶה זַיין צוּ עֶרְלִיכֶע דוֹרוֹת אוּן אִיךְ זָאל הָאבְּן מַיינֶע קִינְדֶער בְּנָקֵל וּבְנַחַת. מַיינֶע קִינְדֶער אוּן אֵיינִיקְלֶעךְ זָאלְן זַיין עֶרְלִיכֶע אִידְן, זֵיי זָאלְן גֵיין אִין דִי תּוֹרָה וֶועג, זֵיי זָאלְן אַלֶע לֶעבְּן מִיט אֱמוּנָה, אֱמוּנַת חֲכָמִים אוּן אַהֲבַת הַבּוֹרֵא בָּרוּךְ הוּא.

הֵיילִיגֶער בַּאשֶׁעפֶער, לֵייז אוּנְז שׁוֹין אוֹיס פוּן דֶעם בִּיטֶערְן גָלוּת; מִיר זֶענֶען אִין אַזַא שְׁוֶוערֶע צַייט, מִיר זֶענֶען אַ בִּיטֶערֶע רַחְמָנוּת, כִּי אַתָּה הוּא בַּעַל הָרַחֲמִים, דוּ בִּיסְט דֶער רַחְמָנוּת'דִיגֶער טַאטֶע, בַּאוַוייז זִיךְ שׁוֹין צוּ אוּנְז אוּן שִׁיק שׁוֹין מָשִׁיחַ צִדְקֵינוּ זָאל אוּנְז אוֹיסְלֵייזְן בִּמְהֵרָה בְיָמֵינוּ אָמֵן.

בעזרת ה' יתברך - יום ה' פרשת ראה, כ"ג מנחם-אב, שנת תשפ"ג לפרט קטן

לכבוד ... נרו יאיר

דער גבאי אין בית המדרש בעט מיר ער דארף הילף, ער קען זיך נישט אַן עצה געבן; ער זאגט מיר דיין זון איז זיך מתחצף, ער סטראשעט אים אז ער גייט אים באווארפן מיט שטיינער וכו' וכו'.

וויל איך דיר זייער בעטן, זיי מחנך דיינע קינדער, לאז זיי נישט זיין מחוצפים; קינדער וואס וואקסן אויף מיט עזות, זיי רעדן מיט חוצפה צו עלטערע - דארפן רחמי שמים צו אויסוואקסן ערליכע אידן.

איך בעט דיר זייער, האלט דיינע קינדער נעבן דיר און געב אכטונג אויף זיי - נאכמער ווי מען געבט אכטונג אויפן שווארץ אפפעל - וועסטו האבן פון זיי נחת.

היכל הקודש איז נישט קיין עיר מקלט, היכל הקודש איז נישט קיין הפקר פלאץ; אז מען קומט אין שול - דארפן מען האלטן די קינדער נעבן זיך און וויסן וואס זיי טוען און וואס זיי מאכן; די עלטערן מוזן אכטונג געבן אויף די קינדער, זיי האלטן מיט זיך און זיי מחנך זיין.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ה' פרשת ראה, כ"ג מנחם-אב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

וואס קוקסטו אויף מענטשן? קיינער וועט דיר נישט העלפן אין א צייט פון א צרה, און אפילו נאנטע מענטשן וואס וואלטן דיר יא געוואלט העלפן - קענען דיר אויך נישט העלפן; איז וואס קוקסטו אויף דעם און יענעם? דער רבי קען דיר אבער יא העלפן און ער וועט דיר העלפן.

יעדן טאג ווערן אוועקגעריסן יונגע מענטשן, מענער און פרויען, יונגע קינדער בלייבן אן עלטערן ה' ירחם; די שפיטעלער זענען אנגעפילט מיט אידישע קינדער השם ירחם, און דא איז דא א צדיק וואס האט צוגעזאגט אז ראש השנה קען ער יעדן איינעם העלפן, ער קען אונז אלע מתקן זיין; איז וואס איז די פחד פון קומען צום רבי'ן? קוק וואס רבי נתן שרייבט - וואס דער רבי האט אים געזאגט (חיי מוהר"ן, סימן תז): "אָמַר, שֶׁיְּכוֹלִין אָז אֲנָשִׁים לְקַבֵּל תִּקּוּנִים מַה שֶּׁבְּכָל הַשָּׁנָה לֹא הָיָה בְּאֶפְשָׁר שֶׁיִּהְיֶה לָהֶם תִּקּוּן בְּשׁוּם אֹפֶן, אַף עַל פִּי כֵן בְּרֹאשׁ הַשָּׁנָה יְכוֹלִין אֲפִילּוּ הֵם לְקַבֵּל תִּקּוּן. אַף עַל פִּי שֶׁבְּכָל הַשָּׁנָה אֲפִילּוּ הוּא בְּעַצְמוֹ זִכְרוֹנוֹ לִבְרָכָה לֹא הָיָה יָכוֹל לְתַקְּנָם, אֲבָל בְּרֹאשׁ הַשָּׁנָה גַּם הֵם יְכוֹלִים לְקַבֵּל תִּקּוּנִים, כִּי אָמַר שֶׁהוּא עוֹשֶׂה בְּרֹאשׁ הַשָּׁנָה עִנְיָנִים וְתִקּוּנִים מַה שֶּׁבְּכָל הַשָּׁנָה גַּם הוּא אֵינוֹ יָכוֹל לַעֲשׂוֹת", אפילו מענטשן וואס דער רבי קען א גאנץ יאר נישט העלפן - אבער ראש השנה קען ער יעדן איינעם פאררעכטן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - ב' פרשת עקב, י"ד מנחם-אב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

הער א מעשה וואס מוהרא"ש דערציילט.

עס איז געווען אין די צייטן פון הייליגן מהרש"א, עס האט פאסירט א שרעקליכע מעשה; א בחור, א לץ - וואס האט פון יעדן איינעם חוזק געמאכט, איז אמאל ביי א לויה צוגעגאנגען צום מיטה וואו דער נפטר איז געליגן, ער האט אויפגעדעקט די תכריכים און געגעבן א פאטש פארן נפטר, און אלע האבן געלאכט פון זיין וויץ, פון דאס געוואגטקייט פון דעם לץ.

יענע נאכט פאסירט עפעס שרעקליך, דער בחור הויבט אן שרייען קולי קולות. זיין טאטע וועקט זיך אויף, ער קומט צו לויפן, ער פרעגט זיין זון: "וואס גייט פאר?" דער זון שרייט: "ראטעוועט, א נשמה פון יענע וועלט איז געקומען צו מיר, ער וויל מיך דערווערגן", דער טאטע טראכט: 'מיין זון חלומ'ט א חלום', ער זאגט דעם זון: "גיי צוריק שלאפן".

עס גייט נישט אריבער אפאר מינוט און דער זון שרייט ווייטער: "ראטעוועט, ער הרג'עט מיך!" דער טאטע זעט אז עפעס גייט פאר, ער לויפט אריבער צום הייליגן מהרש"א. דער צדיק איז אויף, ער זיצט און לערנט די הייליגע תורה. דער הייליגער מהרש"א פרעגט: "וואס קען איך ענק העלפן?" דער איד וויינט: "עפעס מאדנע האט פאסירט, וואס טו איך דא? מיין זון זאגט ער קען נישט שלאפן, עפעס א נשמה וויל אים הרג'ענען".

דער הייליגער מהרש"א זאגט פארן טאטן: "דיין זון זאל זיך אראפלייגן דא ביי מיר אין צימער און איך וועל אכטונג געבן אויף אים". דער מהרש"א לייגט דעם בחור שלאפן, און עס גייט נישט אריבער אפאר מינוט און דער בחור הויבט אן שרייען קולי קולות: "ראטעוועט, ער דערווערגט מיך, איך קען נישט אטעמען", דער מהרש"א הויבט אן רעדן צו די נשמה: "ווער ביסטו? און וואס ווילסטו פונעם בחור?" דער נפטר זאגט: "איך בין דער איד וואס איז היינט געשטארבן און דער בחור איז צו מיר צוגעקומען און מיר געגעבן א פאטש, ער האט מיך פארשעמט, איך וויל אים רופן צום בית דין של מעלה, איך וויל אים רופן צו דין תורה פארן מיך פארשעמען". דער הייליגער מהרש"א זאגט: "בשום אין אופן, דו נעמסט נישט אוועק דעם בחור, ער איז נאך יונג און ער דארף נאך לעבן, אויב דו ווילסט א דין תורה, קענסטו מאכן די דין תורה ביי מיר". זאגט דער נפטר: "פיין, אויב אזוי זאל דער רב מיך אויסהערן; דער בחור איז א לץ, ער האט מיר געגעבן א פאטש ביי מיין לויה, איך בין אים נישט מוחל", זאגט דער הייליגער מהרש"א דעם בחור: "דו שעמסט זיך נישט, אזוינס צו טון, געבן א פאטש פאר א נפטר?!" דער בחור הייבט אן וויינען: "איך וויל תשובה טון, איך זאג צו איך גיי מער נישט חוזק מאכן פון מענטשן", דער הייליגער מהרש"א פרעגט דעם נפטר: "אויב דער בחור וועט זיך פארנעמען צו זאגן יעדן טאג א פרק משניות פאר דיין נשמה ביסטו אים מוחל און דו לאזט אים צורו?" זאגט דער נפטר: "יא, אויב ער וועט לערנען פאר מיין נשמה - בין איך אים מוחל".

זאגט דער הייליגער מהרש"א פארן נפטר: "איך וויל דיך פרעגן, ווי קען זיין אז קוים אפאר שעה צוריק ביסטו הערשט אוועק פון די וועלט און דו ביסט שוין געקומען צו דיין רו, דו קענסט שוין קומען פון עולם האמת אין חלום - פארלאנגען א דין תורה? איך קען דיך, דו ביסט נישט דער גרויסער צדיק, דו ביסט א פשוט'ער מענטש, ווי קומט דאס צו דיר אזא שנעלע רו? עס נעמט דאך לאנגע יארן ביז א נשמה קומט אן צו איר רו", זאגט דער נפטר: "איך בין טאקע נישט דער גרויסער צדיק אבער איין זאך האב איך געטון, איך האב אויסגעהאלטן תלמידי חכמים זיי זאלן קענען לערנען, איך האב זיי געגעבן געלט זיי זאלן קענען לערנען".

די מעשה האב איך געהערט פון מוהרא"ש זכותו יגן עלינו, און איך שרייב דיר דאס ווייל דו העלפסט מיר מיט די כולל, איך וויל דיר געבן חיזוק זאלסט ווייטער ממשיך זיין מיר העלפן מיט די כולל, מיר העלפן דעקן חודש'ליך צאלן די טייערע אינגעלייט, און דערצייל די מעשה פאר אלע וואס העלפן דיר, און ווייז די מעשה פאר ... נרו יאיר וואס האט יעצט געגעבן צען טויזנט דאלער פאר די כולל, אז די טייערע אינגעלייט זאלן קענען לערנען.

ווייז דעם בריוו פאר אלע תומכי הכולל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת עקב, י"ב מנחם-אב, שנת תשפ"ג לפרט קטן

לכבוד ... נרו יאיר

איך בעט דיר נאכאמאל, לאז אפ דיין ווייב, הער אויף איר צו שלעפן קיין ברסלב; נעם דעם רבי'ן פאר דיר, לאז איר אפ.

דו קענסט האבן א חיים טובים מיט דיין ווייב אן דעם וואס זי זאל האבן מיט ברסלב; בעט איך דיר, מאך נישט קיין נארישקייטן און נאכדעם וועסטו האבן טענות אויפן אייבערשטן. אזוי ווי שלמה המלך זאגט (משלי יט, ג): "אִוֶּלֶת אָדָם תְּסַלֵּף דַּרְכּוֹ", דורך די נארישקייטן וואס דער מענטש טוט, מאכט ער זיך אליינס עס זאל קומען שלעכטס אויף אים, "וְעַל ה' יִזְעַף לִבּוֹ", נאכדעם איז ער נאך ברוגז אויפן אייבערשטן.

נעם דעם הייליגן רבינ'ס עצות פאר דיר, שפאציר אין כל התורה כולה, מאך זיך שיעורים בכל חלקי התורה און זיי זיך מתבודד מיטן אייבערשטן. טראכט נאר פון אייבערשטן, ווען דו ביסט צווישן מענטשן זאלסטו טראכטן 'אלעס איז אלוקית, אלעס איז אייבערשטער, עס איז ממלא כל עלמין און סובב כל עלמין, אין שום מציאות מבעלדיך כלל, ובכל תנועה ותנועה שם אלופו של עולם'.

ראש השנה זאלסטו קומען קיין אומאן, און אויסער דעם איז גארנישט דא אויף וואס דו דארפסט זיך שטעלן, וד"ל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ואתחנן, ז' מנחם-אב, שנת תשפ"ג לפרט קטן

לכבוד מיין ליבער ... נרו יאיר, קרית ברסלב

מוהרא"ש זאגט (מקור השמחה הודעות נחוצות, אות צא) מען קען דערקענען אויפן פנים פונעם מענטש אויב ער איז מקורב צום צדיק; אויב מען האט א ליכטיגע פנים, מען שמייכלט – דאס איז א סימן אז עס רוט אויפן מענטש א רוח קדושה, א רוח טהרה, און עס שיינט אין אים די אור הגנוז פונעם הייליגן רבי'ן, און חס ושלום אויב מען האט א טונקעלע פנים – איז דאס די סטרא אחרא, און מען איז נאך גאר ווייט פונעם צדיק.

דערפאר ליבער ברודער, דו קענסט זיך אויסוועלן וואס דו ווילסט, אדער זיין ביים צדיק דורך שטענדיג שמייכלען, זיין פרייליך, מיט א ליכטיגקייט, האבן אנפין נהירין, אדער פארקערט, זיין בעצבות, אנפין חשוכין חס ושלום.

מיט א ליכטיגע פנים, מיט א שמייכל – ברענגט מען שלום; ווייל ווער עס זעט די שמייכל – שמייכלט צוריק, דורכדעם ווערט שלום, און אז מען זעט זויערקייט – ברענגט דאס מחלוקת.

בעזרת ה' יתברך - ערב שבת קודש פרשת ואתחנן, נחמו, י' מנחם-אב, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

איך בעט דיר זייער, געב זיך ווייטער אכטונג אויף דיין געזונט, געב זיך אכטונג וואס דו עסט. עס איז א מצות עשה מדאורייתא (דברים ד, טו): "וְנִשְׁמַרְתֶּם מְאֹד לְנַפְשֹׁתֵיכֶם", מען דארף זיך היטן דאס געזונט, עסן געזונט.

ביסט יונג, יעצט איז די צייט צו אכטונג געבן פון צוקער און פון איבערוואג. הויב אן דעם טאג מיט פרוכט, און נאכמיטאג עס גרינצייג און פראטעין; געענדיגט מיט קעיק, מיט סענדוויטש וכו' וכו'; היט דיין געזונט, דאס איז יעצט די וויכטיגסטע זאך פאר דיר.

מיר פארן שוין צום רבי'ן, מען הויבט אן א נייעם יאר, א נייעם בלעטל; ביים רבי'ן וועלן מיר פועל'ן ישועות ורפואות און אלעס וואס מען דארף.

בעזרת ה' יתברך - ערב שבת קודש פרשת ואתחנן, נחמו, י' מנחם-אב, שנת תשפ"ג לפרט קטן

לכבוד מיינע ליבע טייערע ... שיחיו

זארגט נישט, דער אייבערשטער וועט אייך בענטשן מיט זרע של קיימא. ווארפט ארויס פון שטוב די דאגות, עצבות ומרה שחורה, ברענגט אריין שמחה, תקוה, אמונה; וועט איר זען ניסים.

ביידע פון אייך זאלן ווייטער העלפן דעם רבי'ן מיט ענקער הייליגע ארבעט; משמש זיין א צדיק ברענגט נאר גוטס פאר זיך און פאר די דורות הבאים.

בעזרת ה' יתברך - יום ב' פרשת עקב, י"ג מנחם-אב, שנת תשפ"ג לפרט קטן

לכבוד ... נרו יאיר

מען דארף אסאך בעטן דעם אייבערשטן מען זאל זיך נישט נארן בזה העולם. דער רבי זאגט (שיחות הר"ן, סימן נא): "אֶת זֶה תְּקַבְּלוּ מִמֶּנִּי, שֶׁלֹּא יַטְעֶה אֶתְכֶם הָעוֹלָם, כִּי הָעוֹלָם מַטְעֶה מְאֹד", דאס זאלט איר מקבל זיין פון מיר: די וועלט נארט אייך, לאזט אייך נישט נארן. נאך זאגט דער רבי (שם, סימן ו): "הַיֵּצֶר הָרָע דּוֹמֶה כְּמוֹ מִי שֶׁהוֹלֵךְ וְרָץ בֵּין בְּנֵי אָדָם", דער יצר הרע איז צוגעגליכן צו א מענטש וואס לויפט צווישן מענטשן, "וְיָדוֹ סְגוּרָה", מיט א פארמאכטע האנט, "וְאֵין אָדָם יוֹדֵעַ מַה בְּתוֹכָהּ", ער פאפט אויס אלעמען, יעדן דאכט זיך אז ער האט אין זיין האנט דאס וואס ער וויל, דעריבער לויפן אים אלע נאך, ווייל מען מיינט אז מען וועט באקומען די זאך וואס מען וויל, "וְאַחַר כָּךְ הוּא פּוֹתֵחַ אֶת יָדוֹ וְאֵין בָּהּ כְּלוּם", ביים ענדע עפנט ער זיין האנט און מען זעט אז עס איז גארנישט דא דארט.

"כְּמוֹ כֵן מַמָּשׁ הַיֵּצֶר הָרָע", אזוי טוט דער יצר הרע, "שֶׁהוּא מְרַמֶּה כָּל הָעוֹלָם, וְהַכֹּל רָצִים אַחֲרָיו וּמְרַמֶּה לְכָל אֶחָד וְאֶחָד", ער רעדט איין א מענטש מען זאל אים נאכלויפן, ביים סוף ווען דער מענטש גייט אוועק פון די וועלט, עפנט ער זיין האנט און מען דערזעט זיך אינגאנצן אפגעפאטשט נאכדעם וואס מען איז אים נאכגעלאפן א גאנץ לעבן אומזיסט.

לערן דעם בלאט גמרא יעדן טאג, נאך אביסל ענדיגן מיר האלב ש"ס. איך קלער צו מאכן אונזער שבת התוועדות - פאר די אלע וואס העלפן ביי די קאמפיין - שבת פרשת וירא. עס קומט אויס פרייטאג, דער סיום אויף מסכת קידושין, ווען מען ענדיגט האלב ש"ס.

עס איז אזוי אינטערעסאנט, נישט לאנג צוריק זענען מיר אלע געזיצן ביים סיום הש"ס און מיר האבן אלע מקבל געווען מיר גייען יעדן טאג לערנען די הייליגע גמרא, און שוין ענדיגן מיר האלב ש"ס.

לערן יעדן טאג די הייליגע גמרא, און אז דו פארשטייסט נישט דאס לערנען - זאג די ווערטער. דער רבי זאגט מען דארף נשט פארשטיין וואס מען לערנט דער עיקר דארף מען זאגן די ווערטער פון די תורה (שיחות הר"ן, סימן עו).

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת עקב, י"ד מנחם-אב, שנת תשפ"ג לפרט קטן

לכבוד ... נרו יאיר

א גרויסן יישר כח פארן העלפן צוזאמנעמען צדקה פארן יערליכן קאמפיין לטובת המוסדות; ווער עס העלפט דעם הייליגן רבינ'ס מוסד - דערלייגט נישט, מען פארדינט נאר; דער רבי באצאלט ביי וועם ער נעמט.

זיי עוסק אין הפצה, פארשפרייט דעם הייליגן רבינ'ס עצות, טייל אויס די ספרים און קונטריסם פון מוהרא"ש, אזוי אויך די גליונות און קארטלעך. אויך זאלסטו פארשפרייטן די ניגוני אמונה, יעצט איז ארויס נייע ניגונים: "א מופת בין איך", הערליכע ניגונים פון התבודדות און חיזוק פארן לעבן; פארשפרייט דאס פאר אלעמען.

געדענקסט אוודאי וואס מוהרא"ש זכותו יגן עלינו פלעגט דערציילן, וואס האט פאסירט ווען דער הייליגער צדיק רבי יצחק מדרוביטש זכותו יגן עלינו איז נפטר געווארן, רש"י הקדוש איז אים אנטקעגן געקומען אויבן אין הימל און אים געפרעגט: "וואס פאר א גוטע מעשים טוט אייער זון רבי מיכל זלאטשובער, אז דא אין הימל מאכט מען אזא רעש פון אים?" האט דער טאטע רבי יצחק מדרוביטש געענטפערט: "ער לייגט אריין כוחות אינעם דאווענען וכו'", האט אים רש"י הקדוש געזאגט: "פאר דעם אליין וואלט מען נישט געמאכט אזא רעש דא אין הימל פון אים; אסאך צדיקים לייגן אריין כוחות אינעם דאווענען און מען מאכט נישט אזא גרויסע עסק פון זיי", האט דער טאטע רבי יצחק געזאגט: "ער לערנט זייער פלייסיג", האט אים רש"י הקדוש געענפערט: "דאס קען אויך נישט זיין די סיבה, ווייל אסאך צדיקים לערנען פלייסיג די הייליגע תורה, און פאר דעם אליין רעש'ט זיך נאך נישט", האט ער געזאגט: "צוליב זיין חסד און צדקה וכו'", האט רש"י נאכאלץ נישט מסכים געווען, ביז רבי יצחק מדרוביטש האט אים געזאגט: "אפשר ווייל ער ברענגט צוריק מענטשן צום אייבערשטן? ער איז עוסק אין דעם זייער שטארק", האט רש"י הקדוש געזאגט: "היינו דאהני ליה, יעצט פארשטיי איך שוין פארוואס עס רעש'ט זיך פון אים".

נעכטן נאכט איז פארגעקומען א קביעות מזוזה אין שטעטל אינעם נייעם בית המדרש אינעם ירושלים גאס, די זיבעטע שול וואס מיר האבן אין שטעטל. אלע פרעגן, 'ווי אזוי בויט מען די שטעטל אזוי שיין און שנעל?' 'ווי אזוי איז מען מצליח אז ביי די פערטע יאר זאלן מען שוין האבן זיבן שול'ן און מקוואות?' דער ענטפער איז, דער רבי לערנט אונז אויס די סודות פון הצלחה. דער ערשטער סוד איז 'תפילה והתבודדות', נאך א סוד 'נישט מאכן קיין עסק פון מענטשן און פון געלט', ווייל קיינער קען נישט העלפן, נאר דער אייבערשטער - ער העלפט, ער טוט אלעס און מאכט אלעס, צו אים דארף מען האפן און פון אים דארף מען טראכטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת דברים, ראש חודש מנחם-אב, שנת תשפ"ג לפרט קטן

לכבוד ... נרו יאיר

וואויל איז דיין חלק אז דו האסט געגעבן צדקה צו דרוקן דעם זיבעטן חלק פון ספר עצתו אמונה.

דער ספר איז מחי' און מחזק אזויפיל אידן, עס ברענגט אריין אזויפיל הרהורי תשובה.

דער אייבערשטער זאל דיר געבן אסאך הצלחה און דו זאלסט ווייטער האבן די זכי' צו קענען ווייטער דרוקן די ספרים וואס פארשפרייטן אמונה און תשובה אויף די וועלט.

פון דיין ראש ישיבה.

בעזרת ה' יתברך - יום א' פרשת עקב, י"ב מנחם-אב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

איך פריי זיך אזוי שטארק צו זען א בריוו פון דיר, שוין זייער לאנג וואס איך הער נישט פון דיר; איך בענק זיך זייער צו דיר.

פון די פראגע וואס דו פרעגסט זע איך אז דו האסט א ווייכע הארץ פאר אנדערע, עס טוט דיר אזוי וויי אז מען טשעפעט איינער פון די קינדער ביי דיר אין כיתה; דו האסט א אידיש הארץ, א ווייכע הארץ, א 'לב בשר', א ברסלב'ער הארץ. דער הייליגער רבי נעמט אוועק פון אונז דעם "לב האבן", דאס פארהארטעוועטע הארץ צו א צווייטע איד און פלאנצט אין אונז איין א "לב בשר", א ווייכע הארץ.

דער רבי זאגט (חיי מוהר"ן, סימן שלט): "לֶעָתִיד לָבוֹא וֶועט דִיא גַאנְצֶע וֶועלְט זַיין בְּרֶסְלֶבֶע חֲסִידִים", ווען משיח וועט קומען וועלן אלע אידן זיין ברסלב'ער, אזוי ווי עס שטייט (יחזקאל לו, כו) "וַהֲסִרֹתִי אֶת 'לֵב הָאֶבֶן' מִבְּשַׂרְכֶם", איך וועל אוועקנעמען די פארשטיינערטע הערצער, "וְנָתַתִּי לָכֶם 'לֵב בָּשָׂר'", און איך וועל אייך געבן א לב בשר, יעדער וועט פארגינען א צווייטן; לב בשר איז די זעלבע אותיות ווי ברסלב.

דו זאלסט קיינעם נישט טשעפען, און אז דו זעסט אין כיתה ווי קינדער טשעפען און נעמען זיך אויף איינעמ'ס ביינער - זאלסטו נישט מיט לאכן און חס ושלום מיט טשעפען; זאלסט זיין א חבר פאר יענעם.

איך ווארט שוין זייער דיך צו זען נאכמאל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת עקב, י"ב מנחם-אב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

מוהרא"ש זאגט, די ראשי תיבות פון: ש'הכל נ'היה ב'דברו איז ש' נ' ב', די אותיות פון די ראשי תיבות פון הייליגן רבינ'ס נאמען רבינו נ'חמן ב'ן ש'מחה; דער רבי ברענגט אונז מיר זאלן געדענקען 'שהכל נהיה בדברו' - אלעס וואס פאסירט איז פונעם אייבערשטן.

דער רבי בלאזט אין אונז אריין א שטארקע, קלארע, לויטערע אמונה; מיר זאלן זיך נישט פארלירן ווען שוועריקייטן גייען אריבער, מיר זאלן בלייבן גלייבן אז אלעס איז פונעם אייבערשטן פאר אונזער גוטס.

דער רבי האט געזאגט (עיין שיחות הר"ן, סימן ג): "גאט איז גרויס, מיר ווייסן גארנישט".

שטארק זיך מיט אלע כוחות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת עקב, י"ב מנחם-אב, שנת תשפ"ג לפרט קטן

לכבוד ... נרו יאיר

יעדע גוטע זאך וואס מען טוט - איז אין הימל זייער חשוב, אפגערעדט לערנען און דאווענען און טון חסד מיט אנדערע, דאס איז דאך דער עיקר אויף וואס מען באקומט שכר אין הימל.

הער א מעשה, דער הייליגער ישמח משה זכותו יגן עלינו האט אמאל עוסק געווען אין שאפן געלט פאר א וויכטיגע צוועק. ער איז געגאנגען נאך געלט און ער איז אריין אין א קרעטשמע, ער האט געקלאפט אויפן טיש און געזאגט: "רבותי, איך בין עוסק אין א גרויסע מצוה, איך בעט אייך איר זאלט זיך משתתף זיין"; רופט זיך אן א פשוט'ער איד צום הייליגן צדיק: "וויפיל געלט דארף דער רב?" און דער איד האט געגעבן די גאנצע סכום וואס דער צדיק האט אים געבעטן.

דער הייליגער ישמח משה איז געווארן זייער איבערגענומען, ער זאגט דעם איד: "בזכות די מצוה קענסטו בעטן וואס דו ווילסט, קענסט בעטן עשירות, אריכות ימים, וכדומה"; זאגט דער איד: "איך וויל דער רב זאל מיר צוזאגן עולם הבא", און דער ישמח משה האט אים דאס צוגעזאגט. אים איז דאס נישט געווען גענוג, ער האט געבעטן ער וויל די הבטחה בכתב און אזוי האט דער ישמח משה געטון, ער האט אים געשריבן בכתב אז ער וועט זוכה זיין צו עולם הבא.

דער איד איז נפטר געווארן און ער איז געקומען אין חלום צום הייליגן ישמח משה, ער זאגט: "עס איז מיר זייער ביטער; איך זיץ אין גן עדן, איך ווייס גארנישט, איך פארשטיי נישט קיין לערנען, עס איז מיר נישט גוט אין גן עדן", זאגט אים דער הייליגער ישמח משה: "לערן משניות", זאגט דער איד: "איך האב קיינמאל קיין משניות נישט געלערנט", אין גן עדן קען מען נאר לערנען אויב מען האט פארדעם געלערנט. זאגט דער ישמח משה דעם איד: "דעמאלט לערן חומש", זאגט ער: "איך האב נישט געלערנט אין לעבן, נישט קיין פסוק חומש און נישט קיין משנה, גארנישט גארנישט", זאגט אים דער ישמח משה: "אפשר א מעשה פון צאינה וראינה פון פרשת השבוע האסטו אמאל געלערנט?" זאגט דער איד: "דאס יא", זאגט אים דער צדיק: "דעמאלט זיץ אין גן עדן און לערן די מעשיות".

ווען דער ישמח משה האט דערציילט די מעשה האט ער געזאגט: "דער איד איז צו מיר מער נישט צוריק געקומען", איז א סימן אז אפילו מעשיות פון צאינה וראינה איז אין הימל זייער חשוב.

זיי נישט קיין בטלן, כאפ ארויס א פרק משניות, א בלאט גמרא; זאג די ווערטער אפילו אן פארשטיין. גיי שפאצירן יעדן טאג אפאר מינוט מיטן אייבערשטן, רעד צו אים, בעט אים די ווערטער: "הייליגער באשעפער, איך קען רעדן מיט יעדן איינעם שעות אויף שעות שטותים והבלים, דער טאג גייט מיר אריבער מיט שמועסן, און מיט דיר איז מיר אזוי שווער צו רעדן, איך קען קוים ארויסזאגן א ווארט פאר דיר הייליגער באשעפער, העלף מיר, איך וויל רעדן מיט דיר".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

... תחי', תלמידה בית פיגא

איך האף איר זענט צופרידן אין קלאס, איר האט הנאה פון די לערערינס.

איך וויל אייך בעטן איר זאלט זיין פון די מיידלעך וואס זיצן מיט דרך ארץ און רעדן נישט ווען די טיטשער לערנט. איך דענק אייך אלס אן איידל קינד, איך וויל אויך אז אייערע לערערינס זאלן אזוי זאגן. איך ווייס איר זענט א טייער קינד און איך וויל דאס אויך הערן פון אלע איינגעשטעלטע.

זייט פון די קינדער וואס זענען דערוואקסן, מאכט זיך א גוטע נאמען. ווייל עס וועט נישט נעמען לאנג, איר וועט דארפן א כלה ווערן און אז איר וועט זיין פון די איידעלע – וועט איר באקומען א איידעלער חתן, ווייל א שידוך גייט לויט די מעשים, אזוי ווי די הייליגע חכמים זאגן (סוטה ב.): "אֵין מְזַוְּגִין לוֹ לְאָדָם אִשָּׁה אֶלָּא לְפִי מַעֲשָׂיו", א שידוך ווענדט זיך אינעם מענטש.

זאגט יעדן טאג כאטשיג איין קאפיטל תהילים, אויך זאלט איר פרובירן צו זאגן יעדן טאג די תיקון הכללי פון הייליגן רבי'ן, [די צען קאפיטלעך תהילים - טז, לב, מא, מב, נט, עז, צ, קה, קלז, קנ].

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.