בעזרת ה' יתברך
יום ה' פרשת בהעלותך, י"ז סיון, שנת תשפ"ב לפרט קטן
דאס איז א קליינע אויסצייכענונג פאר די חשוב'ע בית פיגא תלמידה
...
פאר'ן זיך אויפפירן מיט גרויס דרך ארץ.
איך בין זייער דאנקבאר פאר אייך און אויך פאר אלע תלמידות וואס שטעלן זיך צו, וואס זענען איידל און דרך ארץ'דיג.
איר זאלט מצליח זיין אין אלע אייערע וועגן.
בעזרת ה' יתברך
יום ב' פרשת שלח, כ"א סיון, שנת תשפ"ב לפרט קטן
לכבוד מיין טייערער ... נרו יאיר, תלמיד ישיבת תפארת התורה
איך בין זייער פרייליך צו הערן אז דו האסט מסיים געווען ספר הקדוש תיקוני זוהר. איך האף דו גייסט אנהויבן נאכאמאל דעם ספר און דאס לערנען יעדן טאג פון דיין לעבן.
דער ספר הקדוש איז מקדש דעם מענטש, עס לויטערט דעם מענטש. מוהרא"ש זכותו יגן עלינו דערציילט אונז, אמאל איז געקומען א איד צום הייליגן אריז"ל, ער וויל א תיקון פאר זיינע גראבע עבירות רחמנא לצלן, האט אים דער הייליגער אריז"ל געזאגט: "נאדיר א תיקון פאר דיין נפש, רוח ונשמה, זאלסט זאגן יעדן טאג פינף בלעטער תיקונים, דאס וועט דיר מתקן זיין".
מוהרא"ש זכותו יגן עלינו האט אריינגעלייגט אין אונז מיר זאלן לערנען יעדן טאג דעם הייליגן ספר. מוהרא"ש פלעגט זיך בארומען אז ער האט תלמידים וואס זענען מסיים יעדן חודש דעם ספר תיקוני זוהר.
איך בעט דיר זייער דו זאלסט זיך דערהאלטן, נאך אביסל ווערסטו א חתן, נאך אביסל שטעלסטו אויף דיין שטוב. ווארט נאך, דערהאלט זיך, בלייב שטארק מיט גוטע חברים, מיט חברים וואס רעדן איידל, מיט חברים וואס זענען ערליך. היט דיינע אויגן, קוק נישט קיין עבירות, קוק נישט קיין שום מאוויס, סיי אידישע און סיי נישט אידישע וכו'.
גיי זיך מתבודד זיין יעדן טאג, רעד זיך אויס דיין הארץ צום באשעפער, זאג אים ווי שטארק דו ווילסט זיין גוט און עס גייט דיר אזוי שווער. שעם זיך נישט פון אים, ווייל דאס רעדן צום באשעפער ברענגט א שטארקע דביקות, מען ווערט א גרויסער צדיק.
אויך זאלסטו גיין הפצה, וועסטו אלעס מתקן זיין.
פון דיין ראש ישיבה וואס האט דיר ליב.
בעזרת ה' יתברך
ד' פרשת שלח, כ"ד סיון, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
הודו לה' כי טוב כי לעולם חסדו אז דיין קעיס איז פארמאכט; דאנק און לויב דעם אייבערשטן און בעט אים אויף ווייטער.
"הנותן מתנה לחבירו", ווען איינער געבט א מתנה פאר זיין חבר, זאגן די הייליגע חכמים (שבת י:): "צריך להודיעו", זאל ער לאזן וויסן כדי עס זאל זיין מער שלום אויף די וועלט.
זאלסט וויסן, צוויי אינגעלייט פון די חברי הנהלה, האברך ... מיט ... נרם יאיר האבן אוועקגעגעבן פאר דיין קעיס צענדליגער שעות, מיר האבן געהאט שלאפלאזע נעכט אז עס זאל חס ושלום נישט פאסירן מיט דיין משפחה קיין שלעכטס. זאלסט זיך פארצייכענען די צוויי נעמען, דיין גאנץ לעבן זאלסטו האבן פאר זיי הכרת הטוב.
הכרת הטוב מיינט נישט זאלסט אים יעצט קויפן א קראנץ בלומען, אדער א האריגע טלית בייטל און אים שטויסן אין רוקן; הכרת הטוב מיינט זאלסט שטענדיג געדענקען איינער וואס האט אוועקגעגעבן זיין ווייב, קינדער און פרנסה דיר א טובה צו טון.
איך קום יעצט פון א חתונה אין בארא פארק, די חתונה פון החתן ...; איך בין געווען דארט מסדר קידושין. איי וועסטו פרעגן, דער ראש ישיבה האט דאך אן אפמאך נאר צו זיין מסדר קידושין אין ישיבה, וואס איז דא אנדערש? וועל איך דיר זאגן, איך האב געלערנט ביי מוהרא"ש די מדה פון הכרת הטוב; דער חתן'ס טאטע האט מיר געהאלפן ווען איך בין געווען אין נויט, ווען קיינער האט נישט געקוקט אויף די ישיבה – האט ער מיר געהאלפן, דעריבער האב איך פאר זיי הכרת הטוב.
בעזרת ה' יתברך
ד' פרשת שלח, כ"ד סיון, שנת תשפ"ב לפרט קטן
לכבוד מיין טייערער ... נרו יאיר
שטארק זיך, דראפע זיך און דערהאלט זיך.
מען פרובירט אויס יעדן איינעם. דער רבי האט געזאגט (לקוטי מוהר"ן חלק ב', סימן קיט) מען פרובירט אויס יעדן איינעם מיט שווערע ביטערע נסיונות, אין גם אחד וואס זאל נישט אריבערגיין שוועריקייטן; פון אינדרויסן זעט אויס ווי עס גלאנצט פאר יעדן, אבער יעדער איינער מאכט מיט, אפילו די רייכע מענטשן, די שטארקע, די געלונגענע – אלע מאכן מיט שוועריקייטן אין לעבן; איין עצה איז דא, אנטלויפן צום אייבערשטן און אנטלויפן צו די תורה.
איך בעט דיר זייער מיין ליבער ברודער, האסט זיך אזוי שיין דערהאלטן ביז אהער, דערהאלט זיך ווייטער. אנטלויף נישט, בלייב ערליך, בלייב מיט אמונה.
דער הייליגער רבי האט דערציילט די מעשה מיט'ן גוי וואס איז אנטלאפן פאר שלחן עורך, ער איז געבליבן מיט'ן טעם מרור... זאלסטו נישט אנטלויפן, אז דו וועסט זיך דערהאלטן זאג איך דיר צו א גוטע שידוך מיט הערליכע דורות.
פון דיין ראש ישיבה.
בעזרת ה' יתברך
יום ד' פרשת שלח, כ"ג סיון, שנת תשפ"ב לפרט קטן
לכבוד מיין טייערער ... נרו יאיר
איך האב געהערט דיין וויינעדיגע הודעה.
איך ווארף דיר נישט אוועק, איך האב דיר זייער ליב, איך וויל דיר א חתן מאכן; איך וויל אבער דו זאלסט זיין א מענטש, לעבן מיט א סדר; שלאפן בייטאג און אויפזיין ביינאכט – איז נישט קיין עסק.
די מרה שחורה'דיגע מענטשן שלאפן בייטאג און זענען אויף ביינאכט, דערפאר קען מען נישט זיין ביי אונז אין ישיבה אז מען קומט נאכמיטאג; אז דו ווילסט זיין אין ישיבה זאלסטו קומען אינדערפרי צום דאווענען און לערנען דיינע שיעורים כסדרן.
איך ווארף דיר נישט ארויס, און אז דו ווילסט נעמען אן ארבעט פאר א האלבע טאג און קומען נאכמיטאג – איז אויך גוט, אבער שלאפן בייטאג און אויפזיין ביינאכט – דאס איז מרה שחורה און עצבות.
איך האב דיר ליב, איך וויל דו זאלסט האבן א גוט לעבן, און אפילו דו וועסט ווייטער שלאפן בייטאג – ווארף איך דיר נישט אוועק.
בעזרת ה' יתברך
יום ב' פרשת שלח, כ"א סיון, שנת תשפ"ב לפרט קטן
לכבוד מיין טייערער ... נרו יאיר
מזל טוב פאר דיין פערטע סיום הש"ס!
איך בין אזוי איבערגענומען פון דיר, דאס איז דאך אזא וואונדער; א אינגערמאן, א פשוט'ער איד וואס ארבעט רוב טאג צו ברענגען פרנסה האט די שכל צו לערנען די הייליגע תורה, כאפט ארויס יעדע איבריגע מינוט צו לערנען; דו ביסט שוין אריבער פיר מאל גאנץ ש"ס.
דער אייבערשטער זאל דיר העלפן זאלסט זוכה זיין צו בלייבן דיין גאנץ לעבן צוגעקלעבט צו די תורה, און דיינע קינדער זאלן אויך זיין דבוק צו די תורה.
בעזרת ה' יתברך
יום ד' פרשת שלח, כ"ג סיון, שנת תשפ"ב לפרט קטן
מרת ... תחי'
א גרויסן יישר כח פאר'ן מיר איינמעלדן וואס טוט זיך אין די מוסד; איר דארפט נישט מורא האבן מיר צו שרייבן אזעלכע זאכן, איך וויל וויסן פינקטליך וואס טוט זיך.
יעצט אויף למעשה.
מיר האבן אויפגענומען דעם אינגערמאן ... נרו יאיר ער זאל מענידזשן די מוסד; ער איז מיר זייער געטריי, ער טוט די ארבעט אזוי ווי עס דארף צו זיין.
פון די אנדערע זייט דארף איך אייך נישט זאגן וואס דער אינגעמאן ... טוט פאר אונזער מוסד; ער האט א חלק אין אלעס וואס מיר האבן, ער האט געבויט די ישיבה, ער האט געבויט די קעמפס אלע יארן, און יעצט די שטעטל האט ער געבויט, און בויעט עס ווייטער.
... ווייסט ווי געטריי ... איז, און ... ווייסט אז ... איז געטריי.
איך שטיי אין די זייט, איך ווארט צו זען ווער וועט זיין דער העלד און אויפקומען מיט א וועג אז ביידע זאלן קענען ארבעטן אינאיינעם.
זייט נישט דערשראקן, די מוסד צעפאלט נישט; איך לאך זיך גוט אויס, איך געב זיך איבער צום אייבערשטן.
איר קענט זיך נישט פארשטעלן וואס איך גיי אריבער טאג טעגליך; איך האב שוין מיטגעהאלטן אן א שיעור פייערן וואס האט אויסגעבראכן צווישן מענטשן וואס האבן געהאט אייגענע אינטערעסן; דער וואס האט נישט קיין אייגענע נגיעות - דער בלייבט געטריי.
נעכטן האט אויך אויסגעבראכן א קריג צווישן די וואס דרוקן די וועכנטליכע ספרים; איך בעט דעם אייבערשטן ער זאל רחמנות האבן אויף אונז, און שוין שיקן דעם גואל צדק.
אין שטעטל איז נישט מעגליך צו וואוינען נאר אז מען ארבעט אויס די מידות; ווען מען וואוינט צווישן פרעמדע מענטשן קען מען טראכטן 'דער איז שולדיג', 'יענער איז שולדיג', 'מיין לענדלארד איז א חי'', דער שרייט 'דער טענענט איז א רשע', איינער זאגט 'מיין שכן איז פאני', אבער אין שטעטל - דער לענדלארד מיט'ן טענענט מיט'ן שכן - אלע זענען פון די זעלבע מנין, אלע קומען זיך צוזאם אינאיינעם בייטאג און ביינאכט - איז נאר מעגליך צו וואוינען אויב מען ארבעט אויס די מידות.
ווערט נישט דערשראקן; איר קענט ווייזן דעם בריוו פאר אלע וואס ארבעטן אין מוסד.
עס וואלט נישט געווען געפערליך ווען ... וואלט געפרעגט ... וואס צו טון, און עס וואלט געווען שענער ווען ... וואלט צו אים שיין גערעדט.
נאכאמאל, ווערט נישט דערשראקן.
בעזרת ה' יתברך
יום ד' פרשת שלח, כ"ג סיון, שנת תשפ"ב לפרט קטן
לכבוד ... נרו יאיר, תלמוד תורה היכל הקודש ירושלים
דיין מלמד נרו יאיר שרייבט מיר זייער שיינע זאכן אויף דיר; אז דו לערנסט פלייסיג און דו פירסט זיך מיט גוטע מידות.
איך בין אזוי פרייליך, איך האב אזוי הנאה דאס צו הערן; איך גיי שרייבן פאר דיינע עלטערן אז דו ביסט א גוט קינד, און עס איז פאר אונז א זכי' צו האבן אזא גוט קינד אין אונזער חדר אין ירושלים.
שרייב מיר יעדע וואך א בריוו, שרייב מיר וואס טוט זיך אין חדר און נאך - וועסטו מיר מחי' זיין.
בעזרת ה' יתברך
יום ד' פרשת שלח, כ"ג סיון, שנת תשפ"ב לפרט קטן
לכבוד ... נרו יאיר, מנהל תלמוד תורה היכל הקודש ירושלים
אשריך ואשרי חלקך אז דו ביסט עוסק אין אזא הייליגע ארבעט צו מחנך זיין קינדער מיט אמונה און יראת שמים.
איינע פון די וויכטיגסטע זאכן פון א מנהל איז צו מוטיגן די מלמדים, זיי צו געבן חיזוק. מלמדים דארפן זייער אסאך חיזוק, עס איז פון די שווערסטע ארבעט צו זיצן מיט קינדער און האבן צו זיי סבלנות, מען דארף כסדר זיי מחזק זיין, חס ושלום אויב מען איז זיי נישט מחזק קען זיך א מלמד פארלירן און אנהויבן נוצן די הענט; ציפן, שלאגן און שטויסן השם ישמרינו; דאס איז די ארבעט פונעם מנהל, צו אויפהייבן און מחזק זיין די מלמדים.
אפשר איז כדאי די קינדער זאלן זיך לערנען שרייבן, שרייבן איז א וויכטיגע זאך. קינדער דארפן זיך לערנען שרייבן, ליינען וכו'; איז כדאי זיי זאלן מיר שרייבן יעדע וואך א בריוו. אן לחץ; מען קען שרייבן וואס האט זיך געטון אין חדר, וואס מען האט געלערנט; אין אמעריקע שרייבן די קינדער איינמאל א וואך א בריוו.
די מעלה פון דעם איז, זיי לערנען זיך אויס שרייבן, און בעיקר, אמאל ליגט עפעס באהאלטן אינעם קינד'ס הארץ און דורך שרייבן קומט עס ארויס; אסאך קינדער זענען שוין געראטעוועט געווארן דורך דעם, זיי האבן געשריבן, האבן זיי דערציילט זאכן וואס איז נישט גוט, און מען האט זיי געגעבן הילף וד"ל.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ג' פרשת שלח, כ"ב סיון, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
אז דיין ווייב סטראשעט דיר, זי גייט נישט וכו' - זאלסטו איר איבערבעטן און איר געבן גערעכט, אזוי וועט זי גיין וכו'; טו אלעס אין די וועלט אז דיין ווייב זאל זיין מיט דיר וכו'.
מען דארף בעטן דעם אייבערשטן ביי די ברכה פון אתה חונן לאדם דעת אז מען זאל באקומען אביסל שכל און וויסן ווי אזוי צו קענען גיין צווישן די טראפן; נישט אלעס וואס די ווייב זאגט דארף מען טון, אבער מיט שכל דארף מען פארשטיין אז מען דארף זיך מיט איר נישט טענה'ען; מען געבט איר גערעכט און מען טוט וואס מען האט צו טון.
מען דארף אסאך בעטן דעם אייבערשטן מען זאל וויסן ווי אזוי צו קענען אריבערגיין די וועלט אן זיך קריגן און אן ווערן גענארט פון די וועלט. דער רבי האט אונז געלערנט א וויכטיגע זאך; נישט געווען א שיעור וואס מוהרא"ש זאל דאס נישט איבער'חזר'ן פאר אונז, דער הייליגער רבי זאגט (שיחות הר"ן, סימן נא): "אֶת זֶה תְּקַבְּלוּ מִמֶּנִּי, שֶׁלֹא יַטְעֶה אֶתְכֶם הָעוֹלָם", דאס זאלט איר מקבל זיין פון מיר, די וועלט נארט אייך, לאזט אייך נישט נארן; עס קומט די מינוט וואס מען רופט צוריק דעם מענטש, מען נעמט דעם מענטש מען לייגט אים אריין אין א גריבל און מען באדעקט אים מיט ערד, די משפחה גייט אהיים און מען בארואיגט זיך, די ווייב האט חתונה מיט א צווייטן, די קינדער הויבן אן לעבן ווייטער זייער לעבן און קיינעם אין די וועלט פאלט נישט ביי וואס די נשמה הויבט יעצט אן אריבערצוגיין, וואס פאר א שרעקליכע פיין און ליידן זי גייט אריבער; מען נעמט אפיר דעם מענטש, דארט איז נישט אינטערעסאנט ווער איז דער ממלא מקום וכו', דארט איז נישט אינטערעסאנט ווער האט מער מענטשן, ווער איז דער חד בדרא, דארט איז אינטערעסאנט נאר די פרקים משניות און דפים גמרא, דארט איז חשוב יעדע ווארט וואס מען האט גערעדט צום אייבערשטן, דארט איז חשוב דער וואס האט ליב געהאט א צווייטן איד, גערעדט שיין צו א צווייטן, ווער עס האט מחנך געווען זיין שטוב מיט שלום, מיט תורה און מיט קדושה.
איך וועל דיר נישט ענטפערן אויף דיינע אנדערע פראגעס, ווייל וואס האט דאס מיט דיר און וואס האט דאס מיט מיר? עס איז מיר נישט אינטערעסאנט צו רעדן פון דעם און פון יענעם; איך בין זייער פארנומען, איך האב קוים צייט צו ליינען בריוו, ווער רעדט נאך פון ענטפערן; איך האב דיר נאר געענטפערט ווייל ביי מוהרא"ש איז געווען דער ענין פון שלום בית פאר אלעס, און אז דו שרייבסט מיר דיין ווייב וויל נישט גיין וכו', זי וויל נישט האבן מיט דיר וכו', זי סטראשעט דיר וכו' - זאלסטו חס ושלום נישט מאכן קיין עסק אין שטוב פון די זאך.
געדענק: "מיט א ווייב קריגט מען זיך נישט!" די ווערטער קלינגען מיר אין די אויערן, די ווערטער האב איך געהערט ביי מוהרא"ש הונדערטער מאל: "מיט א ווייב קריגט מען זיך נישט", "מיט א ווייב טענה'עט מען נישט", "מיט א ווייב גייט מען נישט אין ויכוחים".
איך האף דו וועסט ארויסנעמען פונעם בריוו רמזים ווי אזוי צו קענען גיין צווישן די טראפן.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ג' פרשת שלח, כ"ב סיון, שנת תשפ"ב לפרט קטן
לכבוד ... נרו יאיר
יעצט הויבן מיר אן דעם יערליכן קאמפיין לטובת אונזערע מוסדות; איך פערזענליך ליג אין חובות, איך בארג און בארג געלט נאר פאר די מוסד.
געלויבט דעם אייבערשטן איך האב געטראפן מוהרא"ש און זיך געלערנט נישט צו בארגן קיין געלט, און איך האף אז דו האסט דאס אויך געלערנט ביי מיר; איך בארג אבער יא געלט פאר די מוסד, און איך קוק זייער ארויס אז יעדער איינער וואס האט שייכות מיט די קהילה, סיי מענער און סיי פרויען - זאלן נעמען א טייל אין די קאמפיין און צאמנעמען צדקה פאר אונזער מוסד.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום א' פרשת שלח, כ' סיון, שנת תשפ"ב לפרט קטן
לכבוד ... נרו יאיר, פלארידע
איך פריי זיך זייער צו הערן ווי דו שטארקסט זיך מיט'ן הייליגן רבי'ן, דאס געבט דיר כח צו קענען זיין א גוטע איד. איך האב זייער הנאה צו הערן אז דו גייסט אין שול דאווענען די דריי תפילות, דו פרייסט זיך מיט טלית און תפילין, און דו שטארקסט זיך אויף אלע נסיונות.
די שורה וואס דו שרייבסט אז דו און דיין ווייב האבן אנגעפאנגען היטן שבת, ביידע פון אייך דרייוון מער נישט שבת - דאס צו הערן איז מיין גרעסטע שמחה! דו קענסט זיך נישט פארשטעלן דאס גרויסקייט פון היטן שבת; יעצט איז דיר דער אייבערשטער מוחל אויף אלעס. חכמינו זכרונם לברכה זאגן (שבת קיח:): "כָּל הַמְשַׁמֵּר שַׁבָּת כְּהִלְכָתָהּ", דער וואס היט שבת, "מוֹחֲלִין לוֹ", איז אים דער אייבערשטער מוחל אויף אלע זיינע עבירות, "שֶׁנֶּאֱמַר", אזוי ווי עס שטייט (ישעיה נו, ב) "'שׁוֹמֵר שַׁבָּת מֵחַלְּלוֹ', אַל תִּקְרֵי מֵחַלְּלוֹ אֶלָּא מָחוּל לוֹ".
שטארק זיך, דער אייבערשטער איז מיט דיר, ביי דיר און נעבן דיר.
מזל טוב צו דיין סיום סדר זרעים; גיי ווייטער מיט סדר מועד, ביז דו וועסט ענדיגן גאנץ משניות.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ב' פרשת שלח, כ"א סיון, שנת תשפ"ב לפרט קטן
מרת ... תחי', ירושלים
איך האב ערהאלטן אייער בריוו.
אפשערן די האר איז זייער א גרויסע זאך, צדיקים האבן צוגעזאגט וואונדערליכע ישועות פאר פרויען וואס האבן מקבל געווען אויף זיך צו שערן די האר.
דער הייליגער נאסוידער רב פלעגט צוזאגן ברכות אויב די פרוי שערט זיך אפ די האר; אמאל האט א מחוצף אים געפרעגט: "וואס וועט דער רב טון אויב די פרוי וועט זיך אפשערן איר האר און די ברכה וועט נישט מקוים ווערן?" האט דער הייליגער צדיק געענטפערט: "איך בין גרייט צו ווערן אויס רב, אבי די פרוי זאל אראפנעמען איר האר"; אזוי שטארק איז אים געגאנגען אין לעבן אז אידישע טעכטער זאלן זיין הייליג און ריין.
ווען עס קומען צו מיר משפחות וואס צווייפלען אין דעם וכו', זיי וואקלען זיך; איין מינוט טראכטן זיי פון זיך אפשערן, און א צווייטע מינוט טראכטן זיי פון בלייבן מיט די האר; ראט איך זיי, ענדערש זאלן זיי ווארטן און דאס טון מיט די גאנצע הארץ, נישט טון זאכן וואס מען איז נאכנישט דערביי, ווייל אז מען טוט דאס נישט מיט די גאנצע הארץ, קען דאס שפעטער ערגער מאכן; ענדערש זאל מען דאווענען אויף דעם, בעטן דעם אייבערשטן מען זאל דאס וועלן טון; מיט תפילה והתבודדות קומט מען אן זייער ווייט.
ווארטס, שערט זיך נאכנישט אפ; בעטס יעדן טאג דעם אייבערשטן די תפילה:
"הֵיילִיגֶער בַּאשֶׁעפֶער הֶעלְף מִיר, אִיךְ וִויל טוּן דַיין וִוילְן, אִיךְ וִויל זַיין עֶרְלִיךְ, אִיךְ וִויל זוֹכָה זַיין צוּ דִי בְּרָכוֹת וָואס דִי צַדִּיקִים הָאִבְּן צוּגֶעזָאגְט פַאר דִי פְרוֹיעֶן וָואס גֵייעֶן אָנְגֶעטוּן אֵיידְל אוּן שֶׁערְן זִיךְ אָפּ זֵייעֶר הָאר.
רִבּוֹנוֹ שֶׁל עוֹלָם, וָואס זָאל אִיךְ טוּן אַז עֶס אִיז מִיר זֵייעֶר שְׁוֶוער אָפְּצוּשֶׁערְן מַיינֶע הָאר? בַּיי מִיר אִיז דָאס אַזוֹי וִוי מֶען זָאל מִיר אָפְּשְׁנַיידְן אַ חֵלֶק פוּן מַיין קֶערְפֶּער, אִיךְ קֶען נִישְׁט טְרַאכְטְן פוּן דָאס טוּן; וִוי אַזוֹי גֵיי אִיךְ אוֹיסְקוּקְן אָן מַיין הָאר? וִוי אַזוֹי גֵייט זִיךְ עֶס שְׁפִּירְן? אָבֶּער פוּן דִי אַנְדֶערֶע זַייט וִויל אִיךְ נִישְׁט בַּאקוּמֶען דִי שְׁטְרָאף וָואס דֶער הֵיילִיגֶער זֹהַר זָאגְט (נָשֹׂא קכה:) אַ פְרוֹי וָואס גֵייט מִיט אוֹיפְגֶעדֶעקְטֶע הָאר זִיךְ שֵׁיין צוּ מַאכְן, אִיז זִי גוֹרֵם אַז עֶס זָאל זַיין אָרֶעמְקֵייט אִין שְׁטוּבּ; אִיךְ וִויל נִישְׁט בְּרֶענְגֶען אָרֶעמְקֵייט אִין שְׁטוּבּ, אִיךְ וִויל נִישְׁט מַיין מַאן אוּן קִינְדֶער זָאלְן זִיךְ מוּטְשֶׁען וֶועגְן מִיר, וֶועגְן מַיין הָאר; בֶּעט אִיךְ דִיר הֵיילִיגֶער בַּאשֶׁעפֶער, הֶעלְף מִיר אִיךְ זָאל טוּן דַיין וִוילְן, אִיךְ זָאל טוּן וָואס דִי הֵיילִיגֶע צַדִּיקִים זָאגְן אוּנְז, אִיךְ זָאל הָאבְּן דִי שְׁטַארְקֵייט אָפְּצוּשֶׁערְן מַיינֶע הָאר. אִיךְ וִויל דָאךְ עֶרְלִיכֶע קִינְדֶער, אִיךְ וִויל דָאךְ הֵיילִיגֶע קִינְדֶער, דֶער זֹהַר זָאגְט, אַ פְרוֹי וָואס דֶעקְט אוֹיף אִיר הָאר אִין שְׁטוּבּ, גָרִים לִבְנָהָא דְּלָא יִתְחַשְּׁבוּן בְּדָרָא, וֶועלְן אִירֶע קִינְדֶער נִישְׁט מַצְלִיחַ זַיין אוּן זֵיי וֶועלְן נִישְׁט זַיין חָשׁוּב.
הֶעלְף מִיר אִיךְ זָאל פַארְטְרַייבְּן דִי נִישְׁט גוּטֶע פוּן אוּנְזֶער שְׁטוּבּ; אַז מֶען שֶׁערְט זִיךְ דִי הָאר גֵייעֶן אַוֶועק אַלֶע מַזִּיקִים פוּן שְׁטוּבּ, הֶעלְף מִיר בִּזְכוּת דִי הֵיילִיגֶע צַדִּיקִים וָואס הָאבְּן זִיךְ מוֹסֵר נֶפֶשׁ גֶעוֶוען פַאר דִיר, זֵיי הָאבְּן אַלֶעס אַוֶועקְגֶעגֶעבְּן אַרַיינְצוּבְּרֶענְגֶען כְּבוֹד שָׁמַיִם אִין דִי וֶועלְט, אָמֵן".
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
ערב שבת קודש פרשת בהעלותך, י"ח סיון, שנת תשפ"ב לפרט קטן
... תחי'
איך האב ערהאלטן אייער בריוו.
אויף אייער פראגע, איר ווייסט נישט פארוואס איר קענט נישט זאגן תהלים, איר עפנט דעם תהלים אבער איר קענט זיך נישט זען ארויסזאגן ווערטער פון תהלים; עס איז דא אן עצה פונעם הייליגן ברסלב'ער רבי. דער רבי זאגט, ווען מען קען נישט דאווענען, מען קען נישט זאגן תהלים, זאל מען זאגן פאר'ן אייבערשטן די ווערטער: "הייליגער באשעפער העלף מיר", "הייליגער באשעפער, העלף מיר איך זאל קענען זאגן א קאפיטל תהילים"; דאס איז א סגולה, עס עפנט גלייך די מויל, עס עפנט די הארץ.
ווען איר נעמט דעם תהלים זאלט איר זאגן א תפילה צום אייבערשטן: "הייליגער באשעפער, העלף מיר, איך וויל זאגן תהלים; העלף מיר איך זאל זיך קענען עפענען מיין הארץ פאר דיר און פועל'ן ישועות".
איך פריי זיך צו הערן אז אייערע פרענדס זענען ערליך, זיי גלייבן אינעם אייבערשטן; איר זענט זיך מחזק מיט זיי.
געבט א גרוס פאר אייער חשוב'ער טאטע.
בעזרת ה' יתברך
יום ג' פרשת בהעלותך, ט"ו סיון, שנת תשפ"ב לפרט קטן
לכבוד ... נרו יאיר
יעצט הער איך פון איינע פון די סעקריטעריס אז די קאמפיוטערס זענען נישט געפילטערט; איך ציטער פאר שרעק וואס גייט פאר ביי אונז אין מוסד.
איך בעט דיר ברחמים, געב אכטונג אויף די כשרות פון אפיס; איך וועל שרייבן פאר אלע איינגעשטעלטע זיי זאלן נישט קומען אין אפיס נאר אויב די קאמפיוטערס זענען כשר.
בעזרת ה' יתברך
יום ה' פרשת בהעלותך, י"ז סיון, שנת תשפ"ב לפרט קטן
מרת ... תחי' ברסלב, ליבערטי
עס איז געקומען צו מיר א פארפאלק, משפחת ... פון ...; די פרוי זאגט, זיי זענען געווען יום טוב שבועות אין שטעטל, האט זי זיך באקענט מיט אייך, יעצט ווילן זיי קומען וואוינען אין שטעטל. זי זאגט, עס איז דא אזעלכע נארמאלע מענטשן אין שטעטל ווי אייך - וויל זי קומען דא וואוינען.
איר מאכט א קידוש השם פאר אונזער קהילה.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
ג' פרשת בהעלותך, ט"ז סיון, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך בענק זיך זייער צו דיר, איך בין געווען מאנטאג אין שטעטל, איך בין געקומען אין חדר. דיין מלמד האט מיר געזאגט אז דו ביסט נישט געקומען, דו האסט זיך נישט גוט געשפירט יענעם טאג, איך האף דו שפירסט זיך שוין גוט.
איך וויל דיר מחזק זיין דו זאלסט זיין שטארק מיט דיינע שיעורים כסדרן, זאלסט לערנען גמרא מיט משניות.
אויך וויל איך דיר מחזק זיין דו זאלסט לערנען דעם דף גמרא יעדן טאג מיט'ן מגיד שיעור ר' ... נרו יאיר. ער לערנט יעדן טאג פאר אין בית המדרש דעם דף גמרא פאר קינדער און בחורים, איך וועל זיך זייער פרייען אז דו וועסט מיטהאלטן דעם שיעור.
אויך זאלסטו גיין צווישן די ביימער זיך מתבודד זיין, בעט דעם באשעפער זאלסט שפירן א טעם אין די הייליגע תורה און אין עבודת השם.
געב א גרוס פאר דיינע חשוב'ע עלטערן.
בעזרת ה' יתברך
ג' פרשת בהעלותך, ט"ז סיון, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך האב זיך זייער געפריידט דיר צו זען אין שטעטל אין חדר, איך האב הנאה צו הערן גוטע גרוסן פון דיין מלמד, דו מאכסט מיר אסאך נחת.
איך וויל דיר מחזק זיין דו זאלסט ווייטער ממשיך זיין צו לערנען דעם בלאט גמרא בכל יום מיט'ן מגיד שיעור הרב ... נרו יאיר.
געדענקסט אוודאי דעם פארגאנגענעם ווינטער בין איך געקומען צו ענק צו א סיום, איך האב זיך זייער געפריידט צו זען ווי איר לערנט מרצונכם הטוב אין די פרייע צייט – די הייליגע גמרא.
זאג פאר'ן מגיד שיעור איך וועל קומען צום סיום מסכת יבמות, אינאיינעם מיט די קינדער און בחורים וואס האלטן מיט דעם לימוד וועלן מיר מאכן א שיינעם סיום. איך האף עס וועט זיין דיינע אלע חברים, זאג זיי אלע אז דאס געבט מיר כח און דאס איז מיין נחת, צו זען ווי איר לערנט און דאווענט און פירן זיך מיט יראת שמים.
בעזרת ה' יתברך
ג' פרשת בהעלותך, ט"ז סיון, שנת תשפ"ב לפרט קטן
מרת ... תחי'
איך דאנק אייך פאר אלעס וואס איר טוט פאר אונזער סקול בית פיגא, עס איז נישטא קיין גרעסערע זאך ווי מחנך זיין אידישע טעכטער מיט אמונה, יראת שמים און ליבשאפט צום אייבערשטן.
ווען מען רעדט צו קינדער קען מען רעדן וויכטיגע זאכן, און מען קען רעדן נארישקייטן, און צומאל מאכן שאדן. דעריבער דארף מען זייער אכטונג געבן נאר צו רעדן פון אמונה, יראת שמים און מדות טובות, אזוי ווייסט מען אז מען רעדט ערליך און גוט, בפרט ווען מען רעדט פון אמונת חכמים דארף מען זייער אכטונג געבן עס זאל זיין מיט שכל.
דער הייליגער רבי זאגט (לקוטי מוהר"ן חלק א', סימן רנה): "כְּשֶׁהָאָדָם הוּא מַאֲמִין בְּהַצַּדִּיק בְּלִי שׁוּם דַּעַת", ווען מען גלייבט אינעם צדיק אן שכל, "אֶפְשָׁר לוֹ לִפֹּל מֵהָאֱמוּנָה, כִּי מֵאֱמוּנָה לְבַד אֶפְשָׁר לִפֹּל", קען מען אראפפאלן פון דעם, "אֲבָל אִם יֵשׁ לוֹ גַּם דַּעַת, שֶׁמֵּבִין גַּם בְּהַדַּעַת", אבער אויב גייט עס מיט שכל, דעמאלט "אֲזַי אִי אֶפְשָׁר לוֹ לִפֹּל", קען מען נישט פאלן.
מען זאל נישט רעדן אין סקול שטותים צו די קינדער, פון חלומות, דמיונות און חזיונות; אין סקול זאל מען רעדן פונעם באשעפער און פון גוטע מידות.
עפעס א נייע צעדרייטע ווינט האט זיך אריינגעכאפט אין אונזער קהילה און עס בלאזט אין די ריכטונג פון די סקול. אין חדר און אין ישיבה בלאזט נישט די ווינט, נאר אין סקול; העלפט מיר ארויסטרייבן די ווינט.
בעזרת ה' יתברך
ג' פרשת בהעלותך, ט"ז סיון, שנת תשפ"ב לפרט קטן
מרת ... תחי'
איך בין אזוי פרייליך צו זען די שיינע ספרים, די "ליכט פון אמונה"; די שיינע שאלות ותשובות וואס איר האט מתרגם געווען אין די ענגלישע שפראך פאר אחינו בני ישראל וואס פארשטייען נישט די אידישע שפראך, עס איז אזוי שיין אויסגעקומען.
איך שיק אייך א מתנה חלק א' פון די "ליכט פון אמונה".
איך וואונטש אייך, דער אייבערשטער זאל אייך געבן כח ווייטער ממשיך צו זיין מיט די הייליגע ארבעט, איר זאלט קענען ארויסגעבן נאך און נאך חלקים.
ווייל די אינגעלייט וואס גייען פארשפרייטן די ספרים אין ענגליש זאגן מיר כסדר ווי הונגעריג מענטשן זענען פאר די ספרים; מען באפאלט זיי, מען בעט זיי נאך א קונטרס, נאך א חלק.
אויך דער מפיץ הרב החסיד רבי נתן נרו יאיר זאגט מיר, די ענגלישע בריוו פון די ליכט פון אמונה איז אזוי פונקטליך מתורגם, עס רירט זיך נישט אוועק קיין ריר פון די אידישע בריוו, און עס איז הערליך, ציענדיג, מיט א רייכע ענגליש געשריבן.
דער אייבערשטער זאל אייך געבן נחת פון די שיינע גארטן, ... נרו יאיר, ... תחי', ... תחי', ... נרו יאיר און ... נרו יאיר, אינאיינעם מיט אייער טייערער מאן ... נרו יאיר.
פון דער ראש ישיבה.
בעזרת ה' יתברך
ערב שבת קודש פרשת בהעלותך (שלח בא"י), י"ח סיון, שנת תשפ"ב לפרט קטן
לכבוד מיינע טייערע חברים, אנשי שלומינו תלמידי היכל הקודש בארץ ישראל, ה' עליהם יחיו
ביי אונז גייט די וואך פרשת בהעלותך, מיר זענען אפגערוקט א פרשה פון ענק. איך וועל ענק שרייבן אביסל פון וואס מיר האבן גערעדט נעכטן ביים שיעור ליל שישי.
עס שטייט אין די תורה (במדבר ח, ג): "וַיַּעַשׂ כֵּן אַהֲרֹן וְגוֹ'", אהרן הכהן האט געצינדן די מנורה, "כַּאֲשֶׁר צִוָּה ה' אֶת מֹשֶׁה", ער האט אנגעצינדן די מנורה אזוי ווי דער אייבערשטער האט באפוילן, זאגט רש"י, דער פסוק קומט אונז לאזן הערן "שבחו של אהרן", מען לויבט אויס אהרן הכהן, "שלא שינה", אז ער האט נישט געמאכט אנדערש.
אלע פרעגן אויף דעם, וואס איז די שבח אז מען טוט נישט אנדערש? וואס איז די חידוש, וואס איז די גרויסקייט, ווער וואלט דען געטון אנדערש פונעם באפעל פונעם אייבערשטן?!
מיט די הקדמות פון הייליגן רבי'ן קען מען דאס פארשטיין. דער הייליגער רבי זאגט (לקוטי מוהר"ן חלק ב', סימן מח): "כְּשֶׁאָדָם נִכְנָס בַּעֲבוֹדַת הַשֵּׁם", ווען א מענטש הויבט אן דינען דעם אייבערשטן, "אֲזַי הַדֶּרֶךְ שֶׁמַּרְאִין לוֹ הִתְרַחֲקוּת", ווייזט מען אים התרחקות, מען הויבט אן שפירן ווי מען איז גארנישט ווערד, מען שפירט ווי מען וויל אים נישט, מען האט אזויפיל בלבולים מיט חלישות הדעת.
דער רבי זאגט (שם): "וְכָל הַנַּ"ל עָבַר עַל כָּל הַצַּדִּיקִים, כַּאֲשֶׁר שָׁמַעְנוּ מִפִּיהֶם בְּפֵרוּשׁ, שֶׁנִּדְמֶה לָהֶם שֶׁהַשֵּׁם יִתְבָּרַךְ אֵין מִסְתַּכֵּל וּפוֹנֶה אֲלֵיהֶם כְּלָל", איך האב געהערט פון צדיקים, זיי האבן אלע אזוי געשפירט, זיי האבן געשפירט אז מען הערט זיי נישט אויס, נאר וואס דען? זיי האבן זיך געשטארקט, זיי זענען געבליבן שטארק און נישט אפגעלאזט זייער ווילן, נאר אזוי האבן זיי זוכה געווען צו ווערן גרויסע צדיקים.
רש"י הקדוש פרעגט (במדבר ח, ב): "למה נסמכה פרשת המנורה לפרשת הנשיאים", פארוואס שטייט די פרשה פון הדלקת המנורה נעבן די פרשה פון די חנוכת הנשיאים? "לפי שכשראה אהרן חנוכת הנשיאים חלשה אז דעתו, כשלא היה עמהם בחנוכה לא הוא ולא שבטו", ווייל אהרן הכהן האט געהאט גרויס חלישות הדעת פארוואס מען האט אים נישט גערופן צו די חנוכת הנשיאים, "אמר לו הקדוש ברוך הוא", האט אים דער באשעפער געזאגט, "חייך שלך גדולה משלהם, שאתה מדליק ומיטיב את הנרות", דו האסט די מצוה פון די מנורה.
לאמיר אביסל אריינטראכטן וואס איז אריבער אויף אהרן הכהן, ער איז געווען אזוי צעבראכן, פול מיט חלישות הדעת, ער האט געשפירט ביי זיך ווי מען דארף אים נישט, ווי מען איז אים מרחק, מיט דעם איז ער געגאנגען טון דעם רצון ה' מיט שמחה. דאס זאגט אונז די תורה: "וַיַּעַשׂ כֵּן אַהֲרֹן", די שבח פון אהרן איז, ער האט געטון די מצוות פונעם אייבערשטן מיט שמחה; ביי טון די מצוות איז ער געווען פרייליך, ער האט זיך נישט געלאזט צעברעכן פונעם יצר הרע.
דאס איז א שטארקע לימוד פאר אונז; ווען דער יצר הרע קומט אונז צעברעכן, ער מאכט אונז חלישות הדעת, ער ברענגט ארויף אין זכרון אלטע נישט גוטע מעשים, ער וויל אונז אראפווארפן מיר זאלן אפלאזן עבודת השם, דארפן מיר קוקן אויף אהרן הכהן; מיט די חלישות הדעת, מיט די בושה, מיט אלע בלבולים – שטייט "וַיַּעַשׂ כֵּן אַהֲרֹן", ווען עס איז געקומען צו טון א מצוה, דעמאלט איז נישטא קיין בלבולים, 'מען דארף מיך יא?' 'מען דארף מיך נישט?' דעמאלט איז דא איין זאך – טון "כַּאֲשֶׁר צִוָּה ה' אֶת מֹשֶׁה".
ווען מיר דארפן דאווענען און לערנען – טאר מען זיך נישט לאזן פארדרייען דעם קאפ פונעם סמ"ך מ"ם; ווען עס קומט צו טון רצון השם, דעמאלט דארף מען עס טון מיט שמחה. דער רבי זאגט (ספר המדות אות שמחה, סימן א): "כְּשֶׁאָדָם עוֹשֶׂה מִצְוָה בְּשִׂמְחָה", ווען מען פריידט זיך ביים טון א מצוה, "זֶה סִימָן שֶׁלִּבּוֹ שָׁלֵם לֵאלֹקָיו", איז א סימן אז דער מענטש איז אינגאנצן צוגעקלעבט צום אייבערשטן.
איר וועט זען אן אינטערעסאנטע זאך, ווען מען מאכט זיך א קאווע, אדער עסן, דעמאלט קומען נישט אריין די מחשבות פון חלישות הדעת, קיינער טראכט נישט ביים עסן: 'בין איך דען ראוי צו עסן?' 'בין איך דען ווערד פאר א קאווע?' ווען עס קומט צו מצוות, פלוצלונג פון אונטער די ערד קומט צו גיין דער סמ"ך מ"ם מיט די מחשבות זרות און בלבולים אראפצואווארפן דעם מענטש.
טייערע ברידער, אנשי שלומינו, שטארקט זיך מיט די זיסע עצות פון רבי'ן, די עצה פון התבודדות איז דאך אזא זיסע עצה, דער לעבן ווערט פשוט גוט. פרובירט דאס אויס, הויבט אן דעם טאג מיט'ן זיך אויסשמועסן מיט'ן באשעפער.
גיי אין א שטילע פלאץ; אדער אין שטוב, אדער אין א שול, אדער גיי א שפאציר אין א שטילע געסל – און רעד זיך אויס צום באשעפער, שמועס מיט אים אין דיין שפראך, רעד צו אים ווי צו א גוטער פריינט. דערצייל אים אלעס וואס דו האסט געטון, דערצייל אים ווי דו פאלסט אראפ אין פגם הברית, וויין זיך אויס צו אים, בעט דעם באשעפער:
"רבונו של עולם, האב רחמנות אויף מיר, איך וויל אזוי שטארק זיין אן ערליכער איד, עס גייט מיר אזוי שווער; וויפיל איך פרוביר צו זיין גוט – פאל איך אראפ".
דער אייבערשטער וועט דיר מוחל זיין, אויך וועסטו אראפנעמען פון דיר אלע עונשים, און דו וועסט שפירן א נייע טעם אין לעבן.
איך בענק זיך צו ענק, איך טראכט אפשר זיך אריבערצוכאפן אויף איין טאג דעם קומענדיגן וואך, מיין שוואגער מאכט חתונה זיין ערשטע קינד. איך האב הכרת הטוב פאר מיין שוואגער, ער האט מיר אסאך מחזק געווען, ער האט א חלק אין מיין התקרבות צום רבי'ן. ער איז געווען אין היכל הקודש, מוהרא"ש זכרונו לברכה האט אים זייער ליב געהאט, שפעטער איז אנגעקומען צו אים ליצנות, מען האט אים געגעבן צו פארשטיין אז היכל הקודש איז נישט דעם רבינ'ס זאך, והוה מה דהוה; אפשר וועל איך זיך אריבערכאפן צו די חתונה.
שטארקט אייך אין הפצה, זיצט נישט מיט פארלייגטע הענט. עס ברענט א פייער פון ניאוף, א פייער פון כפירות ואפיקורסות, גייט לעשן די פייער מיט'ן רבינ'ס ספרים; די קונטרסים און ספרים וואס מוהרא"ש האט געשריבן – דאס לעשט די פייער פונעם סמ"ך מ"ם, די מאורי אש. אידישע קינדער פאלן אין עבירות, בחורים פאלן אין עבירות, נאר דעם רבינ'ס חיזוקים – דאס ברענגט זיי צוריק.
דער הייליגער רבי נתן האט אונז געלאזט צוואה פאר זיין פטירה, ער האט געוויינט: "עזרא הסופר גייט אוועק פון די וועלט, עס קומען ארויס אזויפיל טריפה'נע פסול'ע זאכן, וואס וועט דא זיין? נאר איין בלעטל פון רבינ'ס ווערטער וועט אלעס מתקן זיין"; נעמט די גליונות און קונטרסים, פארשפרייטס דאס צווישן די בני הנעורים – מיט דעם וועלן מיר אלעס מתקן זיין.
מזל טוב פאר די שיינע שמחות צווישן אייך, פאר די חתונה און די שידוכים; דער אייבערשטער זאל העלפן עס זאל זיין נאך און נאך שמחות.
א גוט שבת.
בעזרת ה' יתברך
יום ה' פרשת בהעלותך, י"ז סיון, שנת תשפ"ב לפרט קטן
מרת ... תחי' ברסלב, ליבערטי
איר פרעגט מיר וואס צו טון, אויב איר זאלט ארויסנעמען אייער קינד פון בית פיגא, ווייל מאמעס פון אנדערע קינדער דערציילן אייך אז אייער טאכטער איז נישט וואויל אין סקול, און איר ווייסט פון גארנישט, קיינער רופט אייך נישט פון סקול, ווילט איר וויסן וואס צו טון.
איך וואלט אייך געראטן א בעסערע עצה, אפשר זאלט איר מער נישט רעדן און אויסהערן די פרויען וואס קומען אייך מצער זיין, אזוי ווי רבי נתן זכרונו לברכה האט געזאגט פאר איינעם וואס פלעגט אים כסדר ברענגען לשון הרע, דערציילן וואס דער ... רב רעדט קעגן אים, האט אים רבי נתן געזאגט: "דער ... רב איז נישט מיין מתנגד, דו ביסט מיין מתנגד, דו מאכסט מיר משוגע, דו דערציילסט מיר זאכן וואס איך דארף נישט הערן".
אזוי אויך איז ביי אייער פאל, איר שיקט אייערע קינדער אין אונזערע מוסדות, מיר האבן זייער איבערגעגעבענע לערערינס, און ווער רעדט נאך פון די מנהלת; וואו איז דא אזא מנהלת וואס יעדע קינד איז ביי איר ווי אן אייגן קינד.
מען געבט זיך אפ מיט אייער קינד ווי די טייערסטע זאך, און אז זאכן פאסירן און די מנהלת פארשטייט אז עס איז בעסער נישט איבערצוזאגן פאר די עלטערן, עס וועט נאר קאליע מאכן, איז וואס דארפט איר אויסהערן פרויען וואס האבן איבריגע מאס רייד, וואס ווייסן נישט ווען צו רעדן און ווען צו שווייגן?!
איר זענט די מאמע, איר האט די רעכט צו מאכן מיט אייערע קינדער ווי אזוי איר פארשטייט; אז איר ווילט ארויסנעמען קען איך אייך נישט אפשטעלן, אבער איך קען אייך זאגן זייער קלאר, מיר טוען פאר אייערע קינדער, פאר אלע, פון ארויף ביז אראפ, אינגלעך מיידלעך – דאס בעסטע, מען לייגט אריין אין זיי זייער אסאך כח.
צעברעכט זיך נישט, צעקלאפט זיך נישט; איר זענט א גוטע מאמע און אייערע קינדער זענען זייער טייער, אייער משפחה איז ביי מיר זייער חשוב, און אז אייערע קינדער פאלגן אייך נישט – איז גארנישט, מיינע קינדער ווילן אויך טון וואס זיי ווילן, און איך דארף זיי מחנך זיין, זיי פאלגן נישט מיין ווייב, מיט דעם ווייס איך אז זיי זענען נישט שלעכטע קינדער.
דאס וואס איר שרייבט מיר "מען דארף אוועקנעמען די קינדער פון מיר"; אלע מאמעס טראכטן אמאל אזוי 'אפשר דארף מען אוועקנעמען די קינדער?'
איך בעט אייך זייער, צעברעכט זיך נישט; איר זענט א גוטע מאמע און אייערע קינדער זענען טייערע קינדער, געבט זיי גוטע ווערטער, בויט זיי אויף.
איך האב אייך שוין געשריבן צוויי יאר צוריק א תפלה צו זאגן יעדן טאג, איך שיק אייך איבער נאכאמאל די אלטע בריוו, זעט צו זאגן יעדן טאג די תפלה:
"רבונו של עולם, העלף מיר אז היינט זאל איך נישט שרייען אויף מיינע קינדער. העלף מיר אז מיינע קינדער זאלן מיך פאלגן גלייך ווען איך בעט זיי, מיינע קינדער זאלן הערן ווען איך רעד צו זיי און זיי זאלן זיך נישט שפארן מיט מיר.
הייליגער באשעפער, העלף מיר איך זאל רעדן שיין צו מיין מאן און צו מיינע קינדער, איך זאל זיי נישט פארשעמען און איך זאל חס ושלום נישט שרייען אויף זיי מיאוס'ע ווערטער.
הייליגער באשעפער, העלף מיר איך זאל זיך נישט אויפרעגן ווען מיינע קינדער פאלגן נישט גלייך ווען איך זאג זיי עפעס צו טון, איך זאל געדענקען אז: 'קינדער זענען קינדער'; איך זאל זיי ליב האבן און איך זאל נישט ווערן פארלוירן און גערעגט אויב זיי פאלגן נישט.
איך געב זיך אינגאנצן איבער צו דיר הייליגער באשעפער, איך געב דיר איבער אלע מיינע מחשבות, אלע מיינע דיבורים און אלע מיינע מעשים פונעם היינטיגן טאג און פון אלע מיינע טעג. הייליגער באשעפער, העלף מיר אז איך זאל זיין גוט-מוטיג, ווייל ווען איך בין פרייליך איז מיין מאן פרייליך, און אז איך און מיין מאן זענען פרייליך וועלן די קינדער זיין רואיג און צופרידן.
הייליגער באשעפער, העלף מיר און העלף מיין מאן אז מיר זאלן קענען אויפציען א שיינע ערליכע שטוב, און מגדל זיין אונזערע קינדער צו תורה און צו עבודת השם יתברך.
רבונו של עולם, איך דארף גארנישט און איך וויל גארנישט - נאר ערליכע קינדער, איך וויל זוכה זיין צו קינדער וואס וועלן ליכטיג מאכן דער וועלט, קינדער וואס וועלן נאר טון דיין ווילן.
הייליגער באשעפער, העלף מיר איך זאל קענען חתונה מאכן מיינע קינדער יונגערהייט און גרינגערהייט; מיינע קינדער זאלן זיין אפגעהיטן פון אלעם שלעכטס און זיי זאלן האבן נאר ערליכע חברים".
בעזרת ה' יתברך
ד' פרשת בהעלותך, י"ז סיון, שנת תשפ"ב לפרט קטן
לכבוד מיין טייערער ... נרו יאיר
זיי נישט ברוגז אויף מיר אז איך האב נישט געמאכט צייט פאר דיר און דיין ווייב; איך בין אזוי פארנומען, אפילו מען זעט דאס נישט אן, איך לויף נישט אהער און אהין, עס זעט אויס פון אינדרויסן ווי איך האב צייט, אלעס גייט מיט א רואיגקייט, אבער גלייב מיר, איך האב נישט קיין צייט, איך בין זייער איבערגעשטרענגט; דאך וועל איך מאכן צייט פאר דיר, ווייל איך וויל דו זאלסט האבן שלום בית.
איך בעט דיר זייער, בייג זיך איין דיין קאפ צום אייבערשטן, זיי זיך מבטל צום אייבערשטן. דער רבי האט אמאל אויסגעלערנט פאר רבי נתן ווי אזוי דאס מבטל זיין ארבעט, וואס מען טוט. דער רבי זאגט אים (שיחות הר"ן, סימן רעט): "פארמאך די אויגן, פארמאך דאס מויל, טראכט אז עס איז דא א באשעפער"; ער טוט אלעס, ער האט געטון אלעס און ער וועט אלעס טון. מיין ווייב, מיינע קינדער, מיין פרנסה, מיין לעבן – אלעס איז ער, מען קען זיך גארנישט נעמען אליין; דעמאלט ווערט אלעס גוט, אלעס פאלט אין פלאץ.
איך בעט דיר טייערער ברודער, בעט זיך איבער אין שטוב, אפילו זי דארף דיר איבערבעטן, זיי דו קלוג, וועסטו לעבן א חיים מאושרים.
בעזרת ה' יתברך
יום ג' פרשת בהעלותך, ט"ו סיון, שנת תשפ"ב לפרט קטן
די חשוב'ע בית פיגא תלמידה ... תחי', ברסלב ליבערטי
איך האב ערהאלטן אייער בריוו.
אז איר ווילט א רפואה פאר וכו' - זאלט איר ארבעטן אויף שמחה; פרובירט מיט אלע אייערע כוחות צו זיין פרייליך, זוכט און טראכטס פון די גוטס וואס דער אייבערשטער געבט אייך. ווייל דער הייליגער רבי לערנט אונז (לקוטי מוהר"ן חלק ב', סימן כד) מיר זאלן זיין פרייליך, דער רבי זאגט: "מִצְוָה גְּדוֹלָה לִהְיוֹת בְּשִׂמְחָה תָּמִיד", עס איז א גרויסע מצוה צו זיין פרייליך, און דאס איז א רפואה פאר אלע קרענק, אלע קרענק קומען פון נישט זיין פרייליך; זאלט איר ארבעטן מיט אלע אייערע כוחות צו זיין פרייליך.
טראכטס גוט, טראכטס עס וועט נאך אביסל אוועק גיין אייער פראבלעם, טראכטס פונעם אייבערשטן, ווי ער מאכט אלעס און טוט אלעס.
האלטס זיך פארנומען מיט גוטע זאכן; העלפט אייער מאמע תחי', שפילט זיך מיט אייערע געשוויסטער און רעדט צום אייבערשטן.
בעזרת ה' יתברך
יום ג' פרשת בהעלותך, ט"ו סיון, שנת תשפ"ב לפרט קטן
... תחי', תלמידה בית פיגא ברסלב ליבערטי
איך האב ערהאלטן אייער בריוו.
אויף אייער פראגע אויב עס איז גוט פאר א מיידל צו פארן מיט א בייק מיט צוויי רעדלעך.
איר האט זייער וואוילע עלטערן, פרעגט זיי, און וואס זיי זאגן אייך - אזוי זאלט איר טון; איך וועל זיך נישט מישן, איך וועל לאזן אייערע חשוב'ע עלטערן אייך מחנך זיין.
(מיינע טעכטער, פון ווען זיי ווערן שוין אביסל גרעסער, זיי זענען שוין נישט קיין קליינע בעבילעך קויף איך זיי א סקוטער, דאס איז איידל פאר מיידלעך).
זעט צו זיין חבר'טעס מיט די קינדער וואס אנדערע קוקן זיך נישט אום אויף זיי, זעט צו האבן א לב בשר, אותיות ברסלב (חיי מוהר"ן, סימן שלט), א ווייכע הארץ פאר אנדערע. דער רבי זאגט (שם): "לֶעָתִיד לָבוֹא וֶועט דִיא גַאנְצֶע וֶועלְט זַיין בְּרֶסְלֶבֶיר חֲסִידִים", ווען משיח וועט קומען וועלן אלע אידן זיין ברסלב'ער חסידים, אזוי ווי עס שטייט (יחזקאל לו, כו): "וַהֲסִרֹתִי אֶת לֵב הָאֶבֶן מִבְּשַׂרְכֶם", איך וועל אוועקנעמען די פארשטיינערטע הערצער, "וְנָתַתִּי לָכֶם לֵב בָּשָׂר", איך וועל אייך געבן א לב בשר, יעדער וועט פארגינען א צווייטן.
געבט א גרוס פאר אייערע עלטערן.
