בעזרת ה' יתברך
ערב ל"ג בעומר, שנת תשפ"ב לפרט קטן
מתנה להבחור ...
זע צו לערנען יעדן טאג תיקונים, עס וואשט אויס די נשמה.
צדיקים זאגן: "תיקונים איז אזוי ווי א באד פאר די נשמה"; וואויל איז דעם וואס לערנט תיקונים.
פון דיין ראש ישיבה
בריוון פונעם ראש ישיבה שליט"א
בעזרת ה' יתברך
ערב שבת קודש פרשת, י"ב אייר, כ"ז לעומר, שנת תשפ"ב לפרט קטן
טייערע ליבע חברים, תלמידי היכל הקודש ארץ ישראל, ה' עליהם יחיו
איינע פון די שיינע זאכן וואס מיר האבן זוכה געווען צו הערן פון מוהרא"ש זכותו יגן עלינו איז די ווערטער וואס דער הייליגער רבי נתן זכותו יגן עלינו זאגט וועגן "פסח שני" (לקוטי הלכות ברכת הפרות הלכה ה, אות טז).
די פרשה פון פסח שני, די מצוה פון פסח שני – איז ארויסגעקומען נאר נאכדעם וואס די אידן וואס זענען טמא געווארן, זיי האבן נישט געקענט מקיים זיין די הייליגע מצוה פון "קרבן פסח" – זענען געקומען צו משה רבינו מיט א טענה (במדבר ט, ז): "'לָמָּה נִגָּרַע', וואס זענען מיר אנדערש? איך בין טמא, איך טאר נישט מאכן דעם קרבן פסח, פארוואס? איך וויל אבער אויך מאכן די הייליגע מצוה!" משה רבינו האט געזען די רצון, די ווילן פון אט די אידן, האט ער זיי געזאגט: "איך גיי פרעגן דעם אייבערשטן", ער האט פארשטאנען אז דא גייט עפעס זיין, ווייל ווען מענטשן ווילן זיין גוט, זיי בעטן זיך: "למה נגרע" – העלפט דער אייבערשטער. די הייליגע חכמים זאגן דאך (שבת קד.): "הבא לטהר", ווען מען וויל זיין גוט, "מסייעים אותו", העלפט מען פון הימל; דער אייבערשטער האט געזאגט פאר משה רבינו זאל זיי געבן נאך א געלעגנהייט צו מאכן יעצט דעם פסח.
דאס איז א שטארקע חיזוק פאר אונז, מיר זענען דאך ווי אזוי מיר זענען, "וכולנו אין פנינו יפות כלל" (לקוטי מוהר"ן חלק ב', סימן לט), מיר דארפן רחמי שמים, דער אייבערשטער זאל רחמנות האבן אויף אונז; אז מיר וועלן נישט אפלאזן די רצון, מיר וועלן בעטן דעם אייבערשטן, מיר וועלן שרייען צום אייבערשטן: "למה נגרע, וואס בין איך אנדערש? איך וויל אויך זיין א צדיק, איך וויל אויך האבן א ריינע מח מחשבה. איך האלט אין איין פאלן, רבונו של עולם, איך בין ממש א פארלוירענער, העלף מיר, ראטעווע מיר" – וועלן מיר זוכה זיין, מען וועט אונז געבן נאך א געלעגנהייט אנצוהויבן פונדאסניי.
טייערע ליבע חברים תלמידי היכל הקודש, מיר גייען יעצט אריין אין א ליכטיגע וואך, אין די ספירה פון הוד. די וואך זענען תַּרְעִין פְּתִיחָן, די טירן זענען אפן (זוהר הקדוש פרשת בהעלותך, דף קנג.). די וואך האבן מיר די גרויסע הילולא פון רבי שמעון בר יוחאי, איך האף מיט'ן אייבערשטנ'ס הילף צו זיין ל"ג בעומר אין מירון, אויך די שבת נאך ל"ג בעומר. נאך שבת וועל איך זיין אין ירושלים, איך וועל דאווענען אין אונזער שול, אויך וויל איך באזוכן די חדר, די צאן קדשים.
איך וויל אייך נאר בעטן איין זאך. רבי שמעון בר יוחאי זאגט אין זוהר, איידער ער האט אנטפלעקט די הייליגע סודות אין פרשת נשא, די אידרא קדישא, זאגט רבי שמעון בר יוחאי א לשון וואס מוהרא"ש פלעגט אסאך חזר'ן מיט אונז, רבי שמעון בר יוחאי זאגט פאר די הייליגע חברים (נשא קכח.): "אֲנָן בַחֲבִיבוּתָא תַּלְיָא", אונזער זאך איז זיין חברים, אונזער כח איז נאר אז מיר וועלן זיך ליבן, "אֲנָן" איז ראשי תיבות: א'נשי נ'חל נ'ובע; ברסלב'ער חסידים מוזן זיך ליב האבן, מיר מוזן זיך ליידן. מוהרא"ש פלעגט זאגן: "מיר קענען זיך נישט פארשטעלן צו וואס פאר א מדריגות דער רבי וועט אונז צוברענגען אז מיר וועלן זיך ליב האבן, מיר וועלן לעבן באחדות".
זייט מיר נישט מפרסם, זייט ענדערש מפרסם די נומער פון די שיעורים, די בריוו און גליונות. גייט הפצה מיט די שיינע קונטרסים עצתו אמונה מתורגם; עס איז אזוי שיין, אזוי זיס; נישטא א קונטרס וואס מען זאל זיך נישט טרעפן דערין, יעדע קונטרס עצתו אמונה איז דא דערין אזויפיל חיזוק און שכל ווי אזוי זיך צו קענען דערהאלטן.
איך וועל זיין אם ירצה ה' אין ירושלים זונטאג; די גבאים וועלן שוין מודיע זיין ווען און וואו, איך דארף נישט מען זאל מיך מפרסם זיין.
שבת וועל איך זיין ביי מיין טאטע שליט"א אין מירון. איך קען נישט לאדענען מענטשן, איך בין דארט אליינס א גאסט. איך וועל מאכן צייט נאך שבת צו קענען רעדן מיט ענק, מיט יעדן איינעם באזונדער.
דער עיקר דארפן מיר זיך אויפפרישן פונדאסניי, פריש מקורב ווערן, אנהויבן נוצן די ליכטיגע עצות פון רבי'ן. זיך מתבודד זיין; א שאד דאס נישט צו טון, מען ווערט דאך אויסגעלייזט פון אלע פראבלעמען ווען מען רעדט צום אייבערשטן, מען שמועסט מיט אים ווי מען שמועסט מיט א גוטע פריינט; דאס לעבן ווערט אזוי זיס, אלע צרות און פראבלעמען איז נאר ווען מען פארגעסט פונעם אייבערשטן, אלע מרירות איז כל זמן מען לעבט אן אמונה; ווי נאר מען דערמאנט זיך 'עס איז דאך דא א באשעפער, עס איז דא איינער וואס פירט מיך, איך בין נישט אליינס, איך בין ביים אייבערשטן אין די האנט' – ווערט אלעס גוט.
בנוגע מירון; ווער עס קען קומען צו רבי שמעון בר יוחאי – זאל זיכער קומען, ביי רבי שמעון בר יוחאי באקומט מען ישועות. צדיקים טייטשן, די הייליגע חכמים זאגן א לשון (ברכות ט.): "כְּדַאי הוּא רַבִּי שִׁמְעוֹן לִסְמֹךְ עָלָיו בִּשְׁעַת הַדְּחַק", דאס מיינט צו זאגן, ווען עס דרוקט, ווען מען איז בדוחק – קען מען זיך פארלאזן אויף רבי שמעון בר יוחאי; אבער מען דארף זיך נישט קריגן, און חס ושלום זיך שלאגן צוצוקומען ביזן ציון, אינעם מערה.
מוהרא"ש זאגט בפירוש: "די גאנצע הר מירון איז א מקום צו פועל'ן ישועות"; זיכער זיך נישט קריגן מיט די ערב רב. מוהרא"ש האט אונז געזאגט זיך אכטונג געבן פון זיי, די ערב רב זענען רוצחים, עס איז נישט כדאי צו האבן מיט זיי. מיר האבן די זאך פון תפילה והתבודדות; וואו מען שטייט – קען מען זיך מתבודד זיין.
איך ווארט שוין צו זיין מיט ענק.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
לכבוד מיין טייערער ... נרו יאיר, קרית יואל
איך האב ערהאלטן דיין פראגע.
דיין זאך זאל זיין הפצה, מוהרא"ש האט דיר דאך בפירוש געזאגט זאלסט נישט טון קיין וכו', איז וואס פרעגסטו איבער?
אז דו וועסט טון אין פארשפרייטן די ספרים, דו וועסט טון אין הפצה – וועסטו האבן שפע, עס וועט דיר נישט פעלן קיין געלט.
פרוביר עס אויס, הויב אן צוריק "הפצה" – וועט דיר נישט פעלן קיין געלט.
אינדערפרי זאלסטו לערנען דיינע שיעורים: מקרא, משנה, גמרא, מדרש, הלכה ואגדה, זוהר, תיקוני זוהר וספרי רבינו, און מיטאג זאלסטו זיך ארויסלאזן אויפ'ן פראנט, ווי א סאלדאט גייט אין מלחמה – מיט ספרים וקונטרסים, דאס איז די געווער – וועסטו זייער מצליח זיין.
בעזרת ה' יתברך
ה' פרשת אמור, י"ב אייר, כ"ז לעומר, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
איך ווארט צו הערן פון דיר וואס דו לערנסט, איך וויל דו זאלסט נעמען א חברותא, לערנען יעדן טאג. א שאד די יונגע יארן זאלן אריבערגיין מיט זאכן וואס בלייבט נישט, יעצט איז דיין שענסטע צייט פון לעבן, פארוואס זאלסטו נישט אויסנוצן דיינע שענסטע יארן.
זעץ זיך צו צום שיעור וואס דער דיין שליט"א לערנט פאר. אפילו דו פארשטייסט נישט די שיעור אזוי גוט, דאך איז גוט צו זיצן ביים שיעור. אנהויב איז שווער, ביז מען געוואוינט זיך צו מער און מער, ביים סוף פארשטייט מען.
איך בעט דיר זייער זאלסט מיר שרייבן דיינע שיעורים, דיינע חברותות – און אזוי ווייטער.
איך האף דו לייגסט אוועק די אלע בריוו וואס איך שרייב דיר, און דו לערנסט עס נאכאמאל און נאכאמאל.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
ליידער דרייען זיך ארום מנוולים וואס זענען מטמא אידישע קינדער. מוהרא"ש זאגט, א מנוול וואס לויפט נאך קינדער און בחורים – דארף מען איינשפארן אין תפיסה, מען טאר נישט מחפה זיין אויף זיי, די זענען רוצחים, מען טאר נישט רחמנות האבן אויף זיי.
בנוגע דעם אינגערמאן וואס דו שרייבסט מיר וכו'; איך האב מקבל געווען פון מוהרא"ש זכותו יגן עלינו ווי אזוי זיך צו פירן אין די זאכן, וועם יא ארויסווארפן און וועם נישט, וד"ל.
איך האף דו שטארקסט זיך, איך האב דיר שוין לאנג נישט געזען ביי שיעורים; אפשר וועט זיין פון צייט צו צייט די ליל שישי שיעור אין די בארא פארק שול, אפשר וועסטו קומען, עס וועט דיר זיין גרינגער.
העיקר שטארק זיך באמונה פשוטה, אמונה איז די מקור הברכות. רבינו אמר (לקוטי מוהר"ן חלק א', סימן לא): "אֱמוּנָה הִיא מְקוֹר הַבְּרָכוֹת, בִּבְחִינוֹת (משלי כח): 'אִישׁ אֱמוּנוֹת, רַב בְּרָכוֹת'".
בעזרת ה' יתברך
ה' פרשת אמור, י"ב אייר, כ"ז לעומר, שנת תשפ"ב לפרט קטן
לכבוד מיין טייערער ... נרו יאיר
מוהרא"ש זאגט: "מיר וועלן האבן א שווערערע דין וחשבון ווי אנדערע, מען וועט אונז פרעגן 'פארוואס האסטו נישט געפאלגט דעם רבי'ן? האסט דאך געהאט א רבי מיט וואונדערליכע עצות!'"
דער עיקר עצה פון רבי'ן איז זיך אויסקרעכצן צום אייבערשטן, אפילו מען פאלט זאל מען נישט בלייבן ביי די פלאץ נאר שרייען צום אייבערשטן, אים בעטן; אזוי שטייט דאך (דברים כב, כז): "צָעֲקָה הַנַּעֲרָה", דעריבער: "אֵין לַנַּעֲרָה חֵטְא מָוֶת", ווייל זי האט געשריגן, "וְאֵין מוֹשִׁיעַ לָהּ".
דאס דארפן מיר טון ווען מען זעט זיך אזוי ווייט... שרייען צום אייבערשטן: "רבונו של עולם, העלף מיר, נעם מיך ארויס פון מיין בלאטע, נעם מיך צו דיר, זיי מיך מקרב צו דיר".
איך האף צום אייבערשטן צו זיין ל"ג בעומר אין מירון, איך וועל דאווענען פאר דיר.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
קומענדיגע וואך פאר איך מיט'ן אייבערשטנ'ס הילף קיין ארץ ישראל, איך האף צו זיין ל"ג בעומר אין מירון.
איך וויל דיר בעטן דו זאלסט נעמען די קינדער אין פעלד מיט די פייל און בויגן, עס איז א מנהג ישראל אז קינדער שפילן ל"ג בעומר מיט פייל און בויגן.
עס איז דא כמה טעמים אויף דעם, איך האב געהערט פון מיין טאטע שליט"א א שיינע רמז אויף דעם. די הייליגע חכמים זאגן (ירושלמי שביעית ט, א; תוספות עבודה זרה טז ע"ב, דבור המתחיל דימוס) ווען רבי שמעון בר יוחאי איז ארויס פון זיין באהעלטעניש האט ער געזען איינער פאנגט פייגלעך, עס קומט א פייגל, עס ווערט כמעט געפאנגען און פלוצלונג פליט די פייגל אוועק, נאכדעם קומט א פייגל און ער הערט א בת קול פון הימל: "ספיקולא" געכאפט! און די פייגל ווערט געפאנגען, זאגט רבי שמעון בר יוחאי פאר זיין זון רבי אלעזר: "קוק, אפילו א קליינע פייגעלע קען מען נישט פאנגען נאר נאכדעם וואס מען זאגט אין הימל מען זאל איר פאנגען"; דעריבער שיסט מען ל"ג בעומר מיט א פייל און בויגן, צו ווייזן וואס רבי שמעון בר יוחאי לערנט אונז, קיין שום זאך פאסירט נישט פון זיך אליינס, קיין שום זאך איז א פערצופאל, יעדע זאך איז בהשגחה נפלאה פונעם אייבערשטן.
גיי מיט די קינדער ל"ג בעומר אין פעלד, שפיל מיט זיי, טאנץ מיט זיי, פריי זיך מיט זיי, אויך זינגט צום אייבערשטן אינאיינעם. לערן זיי אויס וואס רבי שמעון בר יוחאי האט געלערנט אין פעלד מיט די הייליגע חבריא: "דער אייבערשטער איז דא, דער אייבערשטער האט ליב אידישע קינדער".
בעזרת ה' יתברך
יום ד' פרשת אמור, י' אייר, כ"ה לעומר, שנת תשפ"ב לפרט קטן
לכבוד ... נרו יאיר ברסלב, ליבערטי
נישט באצאלן חובות איז נישט אזא עוולה ווי זיך נישט וויסנדיג מאכן פון די מענטשן. ווען מען מאכט זיך נישט וויסנדיג איז מען א לוה רשע ולא ישלם; וואס איז דאס זיך נישט וויסנדיג מאכן? האסט נישט צו באצאלן? – זאג יענעם: "איך גיי דיר באצאלן", "איך האב א פלאן ווי אזוי דיר צו באצאלן", "איך וועל דיר באצאלן צוביסליך", וכדומה לזה. רעד, ענטפער, קום צום טעלעפאן ווען יענער רופט. יענער האט דאך דיר געהאלפן ווען דו ביסט געווען צעדרוקט, ער האט דיר געבארגט געלט; וואס איז דאס מען מאכט זיך נישט וויסנדיג?!
פאלג וואס איך זאג דיר, מאך זיך א ליסטע פון אלע וועם דו קומסט געלט, און זאלסט יעדן איינעם רופן און זאגן די ווערטער: "איך שעם זיך פון וואס איך האב געטון, אז איך האב זיך נישט וויסנדיג געמאכט פון דיר, איך קום דיר געלט שוין אזא לאנגע צייט, שוין אריבער דער זמן הפרעון און איך איגנאריר דיך, איך וויל דיר נאר זאגן אז איך גיי דיר אם ירצה ה' באצאלן ביזן לעצטן פרוטה; איך האב א שטיקל פלאן, איך ווארט אויף געוויסע געלטער און איך וועל דיר באצאלן".
ווען דער מלוה וועט הערן אז דו טראכסט נאך פון באצאלן וועט שוין אראפגיין די חימה, און ווען ער וועט הערן אז דו בעטסט אים איבער און אז דו געדענקסט נאך ווען ער האט געעפנט זיין טיר פאר דיר – וועט ער אויסווארטן ביז דו וועסט אים באצאלן, וועסטו נישט זיין קיין (תהלים לז, כא): "לֹוֶה רָשָׁע וְלֹא יְשַׁלֵּם".
דאס זאלסטו שוין טון גלייך נאך ליינען דעם בריוו; נעם זיך צאם, שרייב אראפ אלע נעמען, אלע חובות, נעם דעם טעלעפאן און הויב אן רופן.
צווייטנס זאלסטו יעדן איינציגסטן טאג גיין אין פעלד, וואוינסט דאך אין שטעטל צווישן פעלדער און וועלדער; גיי אין פעלד אונטער דיין הויז, דארפסט נישט גיין צי טיף, גיי אביסל אריין צווישן די ביימער, קענסט אהין טראגן א בענקל; דארט זאלסטו וויינען צום אייבערשטן מיט די ווערטער, זאג די געבעט:
"רבונו של עולם, העלף מיר, איך בין אין א טיפע גרוב, איך זינק אין חובות, איך בין שולדיג געלט פאר מענטשן, איך האב גענומען הלוואות פון קרעדיט קארדס - און איך האב נישט קיין געלט זיי צו באצאלן, איך האב נישט קיין געלט פאר'ן טאג טעגליכן לעבן, איז פון וואו זאל איך נעמען געלט זיי צו באצאלן?
הייליגער באשעפער, איך בין אזוי שטארק פארשעמט; וואס טו איך דא ווייטער? וואס זאג איך פאר זיי?
אנא, איך בעט דיר, זיי מיר מוחל, איך טו תשובה; דער הייליגער רבי האט אונז אנטפלעקט (שיחות הר"ן, סימן קיב): "יֵשׁ עֲבֵרָה שֶׁעָנְשָׁהּ שֶׁל עֲבֵרָה הַהִיא שֶׁיְּהֵא בַּעַל חוֹב תָּמִיד, וַאֲפִלּוּ יַעֲשֶׂה כָּל טַצְדְּקִי דְּאֶפְשָׁר וְהִתְפַּעֲלוּת לֹא יוֹעִיל כְּלָל, וְיִהְיֶה בַּעַל חוֹב תָּמִיד", עס איז דא אן עבירה וואס דער עונש פון די עבירה איז אז מען איז א גאנץ לעבן א בעל חוב, וואס מען זאל נאר נישט טון – וועט מען אלץ בלייבן א בעל חוב; דאס איז די עבירה פון פגם הברית, הוצאת זרע לבטלה רחמנא לצלן, רחמנא לשיזבן.
על כן באתי לפניך הייליגער באשעפער, זיי מיר מוחל, איך הויב אן פון יעצט, איך הויב אן פונדאסניי, איך גיי שוין זיין וואויל, איך גיי שוין זיין ערליך, איך גיי מער נישט טון קיין עבירות, זיי מיר מוחל, נעם אן מיין תשובה, נעם אן מיין צעבראכנקייט, מיין פארלוירנקייט, יהיו לרצון אמרי פי והגיון לבי לפניך ה' צורי וגואלי".
דאס זאלסטו טון יעדן טאג מיט א קביעות, קוק נישט אויף די וועטער; זאל רעגענען, שנייען, דינערן און בליצן; דו גיי מיט א קביעות.
דריטנס, די אלע וואס האבן דיר געבארגט געלט, זיי זאלסטו אלץ באדאנקען, אויך יעצט ווען זיי רופן דיר און צומאל וועלן זיי שרייען אויף דיר, זאלסטו זיי נישט רעכענען פאר דיינע פיינט, זיי זענען נישט דיינע פיינט, זיי זענען דיינע פריינט, זיי האבן דיר דאך געבארגט, געעפנט דעם טיר בעת דחקות, דו ביסט דיין פיינט, זיי זאלסטו שטענדיג מכיר טוב זיין.
אז דו וועסט פאלגן יעדע ווארט פונעם בריוו וועט נישט נעמען לאנג ביז דו וועסט אפצאלן אלע דיינע חובות און דו וועסט נאך בלייבן מיט גרויס שפע.
איך פאר קומענדיגע וואך קיין מירון, איך וועל בעטן פאר דיר און דיין משפחה ל"ג בעומר ביים תנא האלקי רבי שמעון.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
לכבוד מיין טייערער ... נרו יאיר
אין ל"ג בעומר איז א מנהג צו שיסן מיט א פייל און בויגן, עס איז דא כמה טעמים בזה. איינע פון די טעמים, דער הייליגער זוהר זאגט (תיקונים, תיקון יח, דף לו:): "וְסִימָנָא דָא יְהֵא בִידָךְ", דאס זאל זיין דיין סימן, "עַד דְּתֶחזֵי קַשְׁתָּא בְּגַוְּונוֹי נְהִירִין לָא תְצַפֵּי לְרַגְלֵי דִמְשִׁיחָא", ווען מען וועט זען א קשת בְּגַוְּונוֹי נְהִירִין וועט משיח קומען; דעריבער שפילט מען מיט'ן קשת צו ווייזן אז ל"ג בעומר איז א טאג וואס איז מסוגל לזה.
מיט'ן רבינ'ס הקדמות קען זיין פשט, דער רבי זאגט (לקוטי מוהר"ן חלק א, סימן ב): "עִקַּר כְּלֵי זֵינוֹ שֶׁל מָשִׁיחַ הוּא הַתְּפִלָּה", משיח וועט אייננעמען די וועלט מיט תפילה, "וְכָל מִלְחַמְתּוֹ שֶׁיַּעֲשֶׂה", אלע זיינע מלחמות, "וְכָל הַכְּבִישׁוֹת שֶׁיִּכְבֹּשׁ", אלעס וואס משיח וועט אייננעמען, "הַכֹּל מִשָּׁם", אלעס וועט זיין מיט תפילה; זיין געווער, זיין שווערד, זיין בויגן – וועט זיין תפילה. אזוי ווי עס שטייט (בראשית מח, כב): "בְּחַרְבִּי וּבְקַשְׁתִּי", זאגט רש"י, מיט תפילה און בקשה; דאס קען זיין פשט וואס רבי שמעון בר יוחאי זאגט פאר זיין זון, ווילאנג דו וועסט נישט זען א קשת בְּגַוְּונוֹי נְהִירִין, כל זמן עס איז נישטא תפילה, "לָא תְצַפֵּי לְרַגְלֵי דִמְשִׁיחָא", איז דאס נישט משיח; דער סימן פון משיח איז קשת התפלה.
ל"ג בעומר איז א הייליגע טאג, עס ווערט נתגלה סודות התורה, מען הויבט אן שפירן דעם אייבערשטן אין יעדע זאך; נעמט מען די קינדער און מען געבט זיי א בויגן, זיי אויסלערנען אז עס איז דא איין עצה – תפילה והתבודדות, והבן למעשה.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
לכבוד מיין טייערער ... נרו יאיר ברסלב, ליבערטי
אין ל"ג בעומר איז א מנהג אז די קינדער שפילן זיך ביי א פייל און בויגן, עס ווערט געברענגט א טעם פון צדיקים, עס שטייט אין זוהר (תיקונים, תיקון יח, דף לו:) דער הייליגער רבי שמעון בר יוחאי האט געזאגט פאר זיין זון רבי אלעזר: "לָא תְצַפֵּי לְרַגְלֵי דִמְשִׁיחָא עַד דְּתֶחזֵי קַשְׁתָּא בְּגַוְּונוֹי נְהִירִין", דער סימן פון ביאת משיח וועט זיין ווען מען וועט זען א קשת בְּגַוְּונוֹי נְהִירִין; ל"ג בעומר איז א טאג וואס רבי שמעון בר יוחאי האט מגלה געווען די סודות התורה וואס ברענגט משיח, דערפאר גייען די קינדער ארויס אין פעלד שפילן מיט א קשת, מרמז צו זיין אז ל"ג בעומר איז א צייט פון ביאת משיח.
זאלסטו נעמען די קינדער ל"ג בעומר, גיין מיט זיי אין פעלד; מען זאל שיסן מיט'ן בויגן און בעטן דעם אייבערשטן משיח זאל שוין קומען.
לייג אריין אין די קינדער יראת שמים, רעד צו זיי פון שכר ועונש. אויב מען טוט מצוות באקומט מען גן עדן, קינדער דארף מען פארשטיין געבן גן עדן לויט זייער פארשטאנד; און אויב מען טוט אן עבירה איז דא עונשים, און אז מען טוט תשובה נעמט מען אוועק די עונשים.
בעזרת ה' יתברך
ערב שבת קודש פרשת אמור, י"ב אייר, כ"ז לעומר, שנת תשפ"ב לפרט קטן
... גבאי בית המדרש עצתו אמונה, ליבערטי
איך האב ערהאלטן דיין פראגע.
וואויל איז דיר אז דו ביסט א משמש ביים רבי'ן. עס איז נישט גרינג צו זיין א שמש אין בית המדרש; פון איין זייט דארף מען אכטונג געבן אויף סדר, אין בית המדרש זאל נישט זיין קיין הפקרות, פון די אנדערע זייט דארף מען אכטונג געבן אויף מענטשן, קיינעם נישט וויי טון; מען דארף קענען גיין לרוחו של כל אחד ואחד, דעריבער דארף א גבאי שטענדיג בעטן דעם אייבערשטן צו וויסן ווי אזוי צו פירן דעם בית המדרש.
צדיקים זאגן, די ראשי תיבות פון גבאי איז א'נא ב'כח ג'דולת י'מינך, מען בעט דעם אייבערשטן מען זאל וויסן ווי אזוי זיך צו פירן.
די וואך שבת, א שבת פאר ל"ג בעומר, פירן מיר זיך צו טאנצן "בר יוחאי", אויך דעם שיר "אמר רבי עקיבא" - פאר מען זאגט כגוונא, דאס הייסט נאך קדיש יתום.
א פרייליכן שבת.
בעזרת ה' יתברך
יום ג' פרשת אמור, ט' אייר, כ"ד לעומר, שנת תשפ"ב לפרט קטן
לכבוד מיין טייערער ... נרו יאיר
א גרויסן יישר כח פאר'ן העלפן די מוסד אזוי געטריי, האסט אראפגענומען פון מיר די עול פון צאלן רענט פאר די ישיבה און בית המדרש אין וויליאמסבורג, אויך יעצט האסטו זיך אונטערגענומען צו צאלן די הוצאות פונעם נייעם שול אין בארא פארק.
מיט'ן אייבערשטנ'ס הילף פאר איך קומענדיגע וואך קיין ארץ ישראל, איך וועל זיין אין מירון ביי מיין טאטע שליט"א. וויל איך דיר בעטן אויב דו קענסט מיר אנגרייטן די נעמען פון אנשי שלומינו, זייער נאמען מיט די מאמעס נאמען; רוף אן אלעמען בעטן זייער נעמען, איך וויל מתפלל זיין פאר אלעמען, פועל'ן ישועות פאר אלעמען.
ל"ג בעומר איז זייער א גרויסע טאג, א הייליגע טאג; מען קען פועל'ן ישועות, בפרט ביי רבי שמעון אין מירון.
דארפסט נישט פרעגן זייערע בקשות, בעט נאר די נעמען זייערע.
בעזרת ה' יתברך
ד' פרשת אמור, י"א אייר, כ"ו לעומר, שנת תשפ"ב לפרט קטן
... תחי', תלמידה בית פיגא ליבערטי
איך האב ערהאלטן אייער בריוו.
איך פריי זיך זייער צו הערן אז איר האט ליב סקול, איר האט ליב אייערע טיטשערס. אויך פריי איך זיך זייער צו הערן פון אייך אז איר זאגט תהילים, איר האט שוין געזאגט צוויי און צוואנציג מאל תהילים.
אייערע טיטשערס זאגן אויף אייך נאר גוטע גרוסן; ווען איך פרעג א נאמען פון א דרך ארץ'דיגע מיידל, זאגן אלע אייער נאמען צווישן די דרך ארץ'דיגע מיידלעך. דערפאר שרייב איך אייך צוריק, איך וויל אייך שטארקן איר זאלט ווייטער זיין דרך ארץ'דיג.
איר מאכט נחת פאר אייערע עלטערן.
בעזרת ה' יתברך
ב' פרשת אמור, ט' אייר, כ"ד לעומר, שנת תשפ"ב לפרט קטן
... תחי', תלמידה בית פיגא
איך האב ערהאלטן אייער בריוו.
דער אייבערשטער זאל אייך געבן לאנגע געזונטע יארן.
לכבוד אייער יום הולדת, איר זענט געווארן א בת מצוה – זאלט איר זיך פארנעמען עפעס א גוטע זאך, (שרייבט מיר וואס איר האט זיך פארגענומען לכבוד אייער יום הולדת).
היינט האבן מיר אייערע טיטשערס געזאגט אז איר זענט אן אויסנאם מיידל, בפרט אין דרך ארץ; דעריבער האב איך גענומען די מי אייך צוריק צו שרייבן.
בעזרת ה' יתברך
יום א' פרשת אמור, ז' אייר, כ"ב לעומר, שנת תשפ"ב לפרט קטן
מרת ... תחי'
איך האב ערהאלטן אייער בריוו.
עס ווענדט זיך ווען, וואו און פארוואס; סתם אזוי איז נישט כדאי צו עסן שבת סעודות וכדומה צוויי פארפעלקער אינאיינעם, וואס פעלט עס אויס? פארוואס דארף מען דאס טון?
אז מען פארט צו א רבי מקבל זיין קדושה און מען האט נישט אן אייגענע אכסניא - דעמאלט קען מען יא עס ביי אנדערע, אויך נאר מיט יראת שמים, אזוי אויך ווען מען איז ביי די עלטערן און עס קומען נאך קאפלס; אבער סתם אזוי, זיך צאמנעמען חברים, מענער מיט די ווייבער עסן אינאיינעם, פארברענגען אינאיינעם - איז נישט כדאי, עס קומט נישט ארויס קיין גוטס פון דעם.
איך פריי זיך צו הערן אז איר האט מסיים געווען די צווייטע מאל תהלים, יעצט זאלט איר נאכאמאל אנהויבן תהלים; א גאנץ לעבן זאלט איר זאגן תהלים.
בעזרת ה' יתברך
יום א' פרשת אמור, ז' אייר, כ"ב לעומר, שנת תשפ"ב לפרט קטן
מרת ... תחי'
זעט צו זאגן תהלים יעדן טאג; תהלים געבט כח, תהלים רייניגט דעם מח, תהלים שטארקט די נערוון; דער לעבן ווערט זיס, דער לעבן ווערט געשמאק.
אויך זאלט איר זיך אויסרעדן צום אייבערשטן אויף אייער שפראך. אלע מחשבות וואס קומען אריין אין אייער מח, די שלעכטע מחשבות - זאלט איר ארויסזאגן פאר'ן אייבערשטן; וועט איר זען גרויסע נסים.
בעזרת ה' יתברך
ב' פרשת אמור, ט' אייר, כ"ד לעומר, שנת תשפ"ב לפרט קטן
... תחי', תלמידה בית פיגא
איך האב ערהאלטן אייער בריוו.
איך בעט אייך זייער, קלאפט ארויס די שלעכטע מחשבה, דער יצר הרע מאכט אייך דאס טראכטן, אז איר זענט גארנישט ווערד; עס איז נישט אמת, איר זענט יא ווערד, איר זענט א טייער קינד, א שטאלץ פאר אונזער סקול – אזא תלמידה.
נעמט נישט אן די לשון הרע אז דער אייבערשטער האט אייך נישט ליב; עס איז ליגנט, דער אייבערשטער האט אייך יא ליב.
ווען עס קומט אריין אין אייך די שלעכטע מחשבה: 'דער אייבערשטער האט מיך נישט ליב' – זאלט איר זאגן צו זיך: "דער אייבערשטער האט מיך ליב, דער אייבערשטער דארף מיך יא, איך בין יא ווערד".
בנוגע אייער שידוך; האט נישט מורא, איר וועט האבן א גוטע שידוך, איך וועל אם ירצה ה' זיין אייער שדכן.
בעזרת ה' יתברך
ב' פרשת אמור, ט' אייר, כ"ד לעומר, שנת תשפ"ב לפרט קטן
... תחי', תלמידה בית פיגא
איך האב ערהאלטן אייער בריוו.
איך פריי זיך זייער צו הערן פון אייך אז איר זענט צופרידן פון אונזער סקול בית פיגא, אויך זאגן די טיטשערס אז איר זענט א דרך ארץ'דיגע מיידל.
אויף אייער פראגע וועגן באנייען קליידער אין די ספירה טעג וכו'; ווארטס ביז ל"ג בעומר.
אויף אייער פראגע וועגן א ווייסע טַאפּ; אויב עס איז צניעות'דיג קענט איר גיין א ווייסע טַאפּ.
אויף אייער פראגע ווי אזוי צו זיין פרייליך; רעדט צום אייבערשטן, דערציילט אים אייערע מחשבות דיבורים און מעשים – דאס מאכט פרייליך.
בעזרת ה' יתברך
יום ד' פרשת אמור, י' אייר, כ"ה לעומר, שנת תשפ"ב לפרט קטן
לכבוד ... נרו יאיר ברסלב, ליבערטי
מען דארף טראכטן וואס מען קען טון, דער זומער איז נאכנישט דא אבער די בערן זענען שוין דא; וואס וועט זיין זומער? אפשר האסטו אן עצה וואס מען קען דא טון?
די בערן קומען צו מיסט; די בערן זענען נישט קיין סכנה, זיי קומען צו מיסט; מיר דארפן טראכטן עפעס אן עצה וואס מען קען טון.
דאס איז זיכער אז מען דארף אכטונג געבן צו האלטן ריין אינדרויסן פון שטוב, מען דארף אויסלערנען די קינדער זאלן זיך צאמנעמען און נאכרוימען נאכן ענדיגן שפילן, און פרובירן פארמאכן די מיסט קאנעס.
רעד מיט דיינע שכנים, מיט די חברים - וואס מען קען טון פטור צו ווערן פון די אומגעוואונטשענע געסט.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ד' פרשת אמור, י' אייר, כ"ה לעומר, שנת תשפ"ב לפרט קטן
לכבוד מיין טייערער ליבער ... נרו יאיר
איך האב ערהאלטן דיין בריוו.
וואס איז בכלל די פראגע? אז דער אינגערמאן האט גערעדט מיט דיר קעגן צדיקי אמת ווילסטו מיט אים עפענען א שול?! דו שרייבסט אז נאכן רעדן מיט אים ביסטו געווארן גוט צעמישט, דו האסט אנגעהויבן טראכטן מחשבות קעגן מוהרא"ש, ביז דו האסט געמאכט התבודדות - האסטו זיך דערמאנט ווער דו ביסט און וואס דו האסט געטון - ביסטו צוריקגעקומען צו זיך; יעצט ווילסטו גיין מיט אים זיצן ביי איין טיש? וואלסט געזיצן מיט א רוצח ביי איין טיש?!
איך רעד מיט יעדן איינעם, אויסער מיט די וועם איך בין נאר חושש אז זיי ווילן מיר אנרעדן קעגן צדיקי אמת.
נקוט האי כללא בידך: 'ווער עס רעדט אויף מוהרא"ש - איז א נואף', אנדערש וואלט ער נישט גערעדט; איי עס שטימט נישט, עס זעט נישט אויס, ער גייט מיט א קאפטן, מיט א ווייסע קאפעלע... איז דער תירוץ אז מען קען גיין מיט א געלע קאפטן, מיט א ווייסע קאפעלע און זיין א גרויסער נואף.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
לכבוד ... נרו יאיר
איך האב ערהאלטן דיין פראגע.
דער רבי האט אונז געלערנט וואס צו ענטפערן ווען מען פרעגט שאלות וכו', און ווען מען האלט פאר וכו'; בפרט ווען מען רעדט קעגן רבי'ן.
דער רבי דערציילט (ספורי מעשיות מעשה יג - די זיבן בעטלערס, דעם פינפטן טאג) אמאל איז געווען א שמועס, מענטשן האבן זיך בארומט מיט די זאך פון מיעוט מחזיק את המרובה, א קליינע מקום וואס האלט אין זיך אסאך, "אֵיינֶער הָאט גִיזָאגְט אַז זַיין שְׁוַוייגִין אִיז מִיעוּט מַחְזִיק אֶת הַמְרוּבָּה. וַוייל עֶר הָאט אוֹיף זִיךְ זֵייעֶר אַסַאךְ מְקַטְרִיגִים אוּן בַּעֲלֵי לָשׁוֹן הָרָע וָואס רֵיידִין אוֹיף אִים, מֶען קְרִיגְט אוֹיף אִים אוּן מֶען רֶעט אוֹיף אִים זֵייעֶר אַסַאךְ, אוּן עֶר שְׁוַוייגְט, דָאס אִיז זַיין תִּירוּץ אוֹיף אַלֶע קַשְׁיוֹת אוּן אוֹיף אַלֶעס וָואס מֶען רֶעט אוֹיף אִים. מִיט זַיין שְׁוַוייג פַארְעֶנְטְפֶערְט עֶר אַלְץ. נִמְצָא אִיז זַיין שְׁוַוייגִין אַ מִיעוּט מַחְזִיק אֶת הַמְרוּבָּה".
מוהרא"ש זאגט: "השתיקה תשובת הכסיל", שווייגן איז דער ענטפער פאר'ן נאר; טענה נישט מיט קיינעם, פארענטפער זיך נישט פאר קיינעם. אז מען וועט דיר פארדרייען דעם קאפ 'ברסלב איז געמאכט פאר שוואכערע סארט מענטשן, דו ביסט דאך א גאלדענער איד' - זאלסטו נישט ענטפערן, שפעטער גיי אין א זייט און וויין צום אייבערשטן, אזוי ווי דער שני למלכות האט געטון ווען אלע האבן אים אפגערעדט, מען האט אים מדחה געווען; ער האט געוויינט צום אייבערשטן, ער האט געזאגט (שם, מעשה א): "אִיךְ וֵוייס עֶס אִיז בְּוַודְאַי יָא דָא".
שטארק זיך מיט דיינע שיעורים כסדרן.
איך האף זיך צו זען מיט דיר קומענדיגע וואך אין ארץ ישראל.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
מרת ... תחי'
איך האב ערהאלטן אייער בריוו.
אסאך האבן די זאך אז זיי ווייסן נישט ווי אזוי צו געבן א קאמפלימענט; דאס קלאפט אויס צווישן מאן און ווייב, מען ווארט אויף א גוט ווארט און ווען מען באקומט עס נישט ווערט מען אנגעגעסן אויפ'ן צווייטן.
די ריכטיגע וועג איז יענעם העלפן געבן א גוט ווארט. צום ביישפיל, אין אייער פאל וואס איר שרייבט אז עס שטערט אייך אז אייער מאן זאגט אייך קיינמאל נישט אויף אייערע קליידער א גוט ווארט, ווען איר קויפט זיך א נייע קלייד זאגט ער גארנישט, און ווען איר טוט זיך אן שיין פאר אים זאגט ער אויך גארנישט, עס שטערט אייך וכו'; די ריכטיגע וועג איז, אים העלפן געבן גוטע ווערטער; פרעגט אים: "דער קלייד איז שיין?" "די שיך צייגט גוט אויף מיר?" אפשר אין אנהויב וועט ער נישט וויסן וואס צו ענטפערן; דאס איז נישט ווייל ער ווייסט נישט די זאכן, ער ווייסט זייער גוט די זאכן, ער ווארט איר זאלט זיך שיין אנטון און צייגן גוט וכו'; ער ווייסט נאר נישט ווי אזוי מען רעדט פון די זאכן, ער ווייסט נישט ווי אזוי זיך ארויסצוברענגען.
אזוי איז מיט גוטע ווערטער; פון ווארטן אויף גוטע ווערטער קומט מען אין ערגעץ נישט אן, מען דארף זיין דער וואס הויבט אן געבן גוטע ווערטער, און העלפן יענעם געבן גוטע ווערטער, נישט זיך אויפעסן אז מען האט נישט באקומען א גוט ווארט. צום ביישפיל, נאכן עסן אז אייער מאן זאגט נישט "שכוח פאר די עסן, עס איז זייער גוט געווען" - זאלט איר אים פרעגן: "די עסן איז גוט געווען? האסט הנאה געהאט?" און ער וועט ענטפערן "יא"; צוביסליך וועט ער שוין אליינס זאגן: "שכוח פאר די עסן, עס איז זייער גוט געווען".
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
כאפ ארויס אביסל צייט און לערן דיינע שיעורים. חכמינו זכרונם לברכה זאגן (שבת לא.) ווען א מענטש קומט ארויף אויף יענע וועלט פרעגט מען אים: "קָבַעְתָּ עִתִּים לַתּוֹרָה", בפשטות מיינט מען אים צו פרעגן צי ער האט געהאט א קביעות'דיגע שיעור יעדן טאג צו לערנען תורה. אבער דער רבי זאגט (לקוטי מוהר"ן חלק א', סימן רפד) אז 'קֶבַע' איז א לשון פון 'גְּזֵלָה', אזוי ווי עס שטייט (משלי כב, כג): "וְקָבַע אֶת קֹבְעֵיהֶם נָפֶשׁ"; דאס איז פשט פון די שאלה, מען פרעגט דעם מענטש: 'קָבַעְתָּ עִתִּים לַתּוֹרָה' האסט אראפגע'גנב'עט צייט צו לערנען? האסט ארויסגעכאפט פון דיין פארנומענעם טאג אפאר מינוט פאר תורה?
קענסט הערן שיעורים בשעת דו לערנסט סדר דרך הלימוד, אויך קענסטו הערן מוזיק בשעת'ן לערנען.
וואויל איז דעם מענטש וואס כאפט ארויס צייט צו לערנען די הייליגע תורה.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ה' פרשת אמור, י"א אייר, כ"ו לעומר, שנת תשפ"ב לפרט קטן
לכבוד מיין טייערער ... נרו יאיר, צפת
איך האב ערהאלטן דיין בריוו.
זע צו מסיים זיין ספר תקוני זוהר אויפ'ן הייליגן טאג ל"ג בעומר. דער רבי האט געזאגט (שיחות הר"ן, סימן רפה): "עַל סֵפֶר הַתִּקּוּנִים לְבַד לֹא יַסְפִּיקוּ אֲלָפִים סְפָרִים לְבָאֵר עֹצֶם רִבּוּי הַסּוֹדוֹת שֶׁיֵּשׁ שָׁם", טויזנט ספרים איז נישט גענוג פארשטיין צו געבן די סודות וואס איז דא אין ספר תיקונים; עיין שם.
איך וועל אם ירצה ה' זיין ל"ג בעומר אין מירון, אויך שבת נאך ל"ג בעומר; איך וועל זיין ביי מיין טאטע שליט"א.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ב' פרשת אמור, ח' אייר, שנת תשפ"ב לפרט קטן
לכבוד ... נרו יאיר ברסלב, ליבערטי
דו זאלסט נאר אויפהייבן דיין ווייב, אזוי וועט זי ווערן איינס מיט דיר, זי וועט ווערן צוגעצויגן צו דיר.
חכמינו זכרונם לברכה זאגן (סנהדרין כב:): "אֵין הָאִשָׁה כּוֹרֶתֶת בְּרִית, אֶלָּא לְמִי שֶׁעֲשָׂאָהּ כְּלִי", א פרוי ווערט איינס מיט איר מאן וואס מאכט איר פאר א כלי; זאגט מוהרא"ש, ווען דער מאן בויט אויף זיין ווייב, ער מאכט איר פאר א 'יש', א 'כלי' - דעמאלט ווערט זי איינס מיט אים.
ווי אזוי בויט מען אויף די ווייב? דורך געבן גוטע ווערטער: "ביסט גוט", "ביסט טייער", "ביסט אזוי וואויל", "ביי מיר ביסטו אזוי חשוב", וכדומה; דאס בויט און הייבט אויף.
וואויל איז דעם ערליכן איד וואס געבט שטארק אכטונג אויף זיין ווייב, ער טשעפעט איר נישט, ער טוט נישט וויי - דער לעבט שוין בזה העולם א חיים טובים, א גן עדן לעבן.