בריוון פונעם ראש ישיבה שליט"א

בעזרת ה' יתברך - יום ג' פרשת אחרי קדושים, ח' אייר, כ"ג לעומר, שנת תשפ"ה לפרט קטן

לכבוד מיין ליבער ... נרו יאיר

אם ירצה ה' אין אפאר וואכן וועל איך קומען אין שטעטל. ערשט קום איך פאר די זומער וואכן, און איך האף צום אייבערשטן צו בלייבן; וויל איך זייער צוריק גיין אין כולל. איך וועל נישט זיין א גאנצן טאג אין כולל, איך האב דאך די ישיבה און נאך קהל'ישע זאכן, איך וויל זייער פאר צוויי שעה קומען אין כולל, איך וויל וויסן אויב דו ווילסט זיין מיין חברותא צו לערנען טור בית יוסף. אה וואס פאר א זיסקייט דאס איז, איך געדענק די פאר יאר פון אלס חתן ביז איך האב געעפנט די ישיבה האב איך זוכה געווען צו זיצן און לערנען אין כולל און לערנען טור בית יוסף און שלחן ערוך לעובדא ולמעשה, דאס איז טעם גן עדן.

שטארק זיך אין עבודת השם, שטארק זיך מיט דאווענען די דריי תפילות שחרית מנחה מעריב מיט מנין מיט א סידור, אן רעדן אן שמועסן. אויך זאלסטו זיך מאכן א קביעות נישט אויסלאזן שטיקלעך פונעם דאווענען, דאווענען פון אנהויב ביזן סוף אן רעדן. שחרית הויב אן "מה טובו" ביז נאך "עלינו לשבח", מנחה הויב אן "קרבנות" ביז נאך "עלינו", און אזוי אויך מעריב, זאג "שיר המעלות" ביז "עלינו". עס איז נישט גרינג עבודת השם אין אנהויב, מען דארף זיך אנשטרענגען, אבער שפעטער איז דאס אזוי זיס און געשמאק, ווען מען ווערט עלטער ווערט מען נאר יונגער, חכמינו זכרונם לברכה זאגן (קינים ג, ו): "זִקְנֵי תּוֹרָה", די ערליכע אידן, "כָּל זְמַן שֶׁמַּזְקִינִין", ווען זיי ווערן עלטער – "דַּעְתָּן מִתְיַשֶּׁבֶת עֲלֵיהֶן", זיי ווערן אלץ מער צו די זאך.

לאז מיר וויסן אויב דו קענסט באשטיין צו זיין מיין חברותא.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת תזריע מצורע, ב' אייר, י"ז לעומר, שנת תשפ"ה לפרט קטן

מרת ... תחי', קרית ברסלב

איך האב ערהאלטן אייער בריוו.

עס איז זייער שיין פון די משפחות וואס געבן זיך אוועק פאר די קימפעטארינס צוצושטעלן אין שפיטאל פרישטאג, אזויפיל פרויען דערציילן אז זיי זענען ממש אויסגעגאנגען פון שוואכקייט און פון הונגער, און פלוצלונג איז אנגעקומען די חסד פרישטאג, פרישע געשמאקע סענדוויטשעס און זיי ממש געגעבן כח.

אבער איך בעט אייך זייער, אויב ענק ווילן קענען אנהאלטן די חסד - איז דאס נאר מיט איין וועג, אז מען גייט אוועק איינער פארן צווייטן; נאר אז עס וועט זיין שלום צווישן אייך - וועלן ענק מצליח זיין.

אנהויב ווען מיר האבן געעפנט די שטעטל, ווען עס זענען נאך געווען צוואנציג משפחות - איז געקומען צו מיר א משפחה וואס זיי קומען פון א שטעטל... זיי האבן מיר געזאגט מיט טרערן אין די אויגן אז זיי האבן א אינערליכע פחד וואס עס וועט זיין דא אין שטעטל אין יארן ארום, פרעג איך זיי: "וואס גייט פאר? פון וואס רעדן ענק?" זאגן זיי: "מיר קומען פון א פלאץ וואו עס האט זיך אזוי אנגעהויבן, ווען מיר זענען געווען קינדער האט זיך עס געשפירט ווי עס שפירט זיך יעצט דא אין ברסלב'ע שטעטל, און נאך יארן האט דארט אויסגעבראכן א מחלוקת, והוה מה דהוה, משפחות זענען געווארן צעטיילט, נאנטע חברים האבן זיך צעשיידט וכו'", זיי האבן מיר געפרעגט: "וואס קען מען טון אז דא זאל דער שטן נישט אנקומען?"

איך בעט דעם אייבערשטן אז אונזערע ד' אמות זאל בלייבן ריין און הייליג, מען זאל זיך ליב האבן, מען זאל נישט וויי טון איינער דעם צווייטן, עס זאל ארויסקומען נאר נחת רוח פארן אייבערשטן, פאר די צדיקים, פארן רבי'ן און פאר מוהרא"ש, וואס האט רחמנות געהאט אויף אונז און אונז געברענגט ביז דא.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת שמיני, כ"ד ניסן, ט' לעומר, שנת תשפ"ה לפרט קטן

לכבוד מיין טייערער ... נרו יאיר, קרית ברסלב

א גרוס פון שטעטל, פסח בין איך געווען אין שטעטל; וואס זאל איך דיר זאגן, די ווערטער וואס מוהרא"ש האט מיר געזאגט כמה פעמים: "מיר האבן זיך נישט וואס צו שעמען מיט אונזערע בחורים פאר קיינעם", אזוי אויך זאג איך דיר: "מיר האבן זיך נישט וואס צו שעמען מיט אנשי שלומינו"; עס איז מיר געווען א תענוג צו זיין אינאיינעם דעם יום טוב, איך האב זיך זייער געבענקט צו דיר.

בנוגע כולל; איך וויל דו זאלסט צאמנעמען די כולל אינגעלייט און אפשמועסן מיט זיי די פלאן פאר דעם זומער זמן הבא עלינו לטובה, ווי אזוי מען זאל צאמנעמען גאנץ הלכות שבת, אלע זאלן זיין גרייט צו ענדיגן הלכות שבת און זיך פארהערן, און מיטן אייבערשטנ'ס הילף איז דא א נדבן וואס וויל העלפן די כולל אינגעלייט וואס פארהערן זיך און קומען מיט א כתב פון רבנים אויף די בחינה, און פאר יעדע כתב געבט ער טויזנט דאלער, יעדער אינגערמאן וואס וועט זיך פארהערן ביי רבנים וועט באקומען די געלט.

אויך וויל איך דיר בעטן, אויסער דעם וואס דו ביסט דיין פאר די קהילה, דו שטייסט גרייט בייטאג און ביינאכט צו ענטפערן שאלות פאר אלעמען, זאלסטו אויך זיין ראש הכולל, זיין א הילף פאר די כולל אינגעלייט, זען אז אלע זאלן מצליח זיין, אלע זאלן האבן חברותות, אלע זאלן מצליח זיין צאמצונעמען די הלכות וואס מען לערנט די לעצטע דריי יאר, יעדע אינגערמאן זאל באקומען א גוטע געפיל אזוי ווי דו האסט אליין געזען די פאר יאר וואס דו האסט זוכה געווען צו לערנען אין קארלסבורג כולל, ווי ער האט געשעצט און געגעבן כבוד פאר יעדע צורבא מרבנן, אפילו פאר אינגעלייטלעך, ווי ער האט האט זיך אויפגעשטעלט פאר יעדן און געגעבן א גוטע געפיל פאר אלעמען, און דאס האט זיי געשטופט צו לערנען און מצליח צו זיין אין לערנען.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת תזריע מצורע, כ"ט ניסן, י"ד לעומר, שנת תשפ"ה לפרט קטן

... נרו יאיר

איך בין זייער פרייליך צו הערן אז דו פירסט זיך מיט יראת שמים און אז דו העלפסט אין שטעטל אין תלמוד תורה, און אויך העלפסטו מיט די שוחטים; וואויל איז דיר אז דו ניצט אויס די צייט מיט ערליכע זאכן, צו העלפן בויען די שיינע קהילה וואס טראגט דעם הייליגן רבינ'ס נאמען.

איך וויל דיר זייער בעטן, ווען דו ענדיגסט העלפן אין חדר - זאלסטו גיין אין ישיבה און זיין ביים שיעור הלכה. דאס ווייסטו אז דער רבי האט געוואלט מיר זאלן לערנען הלכה, דער רבי זאגט (שיחות הר"ן, סימן כט): "כָּל אִישׁ יִשְׂרְאֵלִי מְחֻיָּב לִלְמֹד בְּכָל יוֹם וָיוֹם פּוֹסְקִים, וְלֹא יַעֲבֹר", יעדער איד איז מחויב צו לערנען יעדן טאג הלכות, יעצט לערנט מען אין ישיבה הלכות שבת, דעם זמן לערנט מען הלכות בורר; זאלסטו נישט פארפאסן קיין איין טאג פון די שיעור, דארפסט וויסן וואס מעג מען טון שבת און וואס מען טאר נישט טון שבת; איז די פאר יאר וואס דו ביסט אין ישיבה - זאלסטו נעמען ערנסט די שיעור הלכה.

ווייז דעם בריוו אויך פאר הבחור ..., דער קעכער אין תלמוד תורה. זאג אים איך וויל ער זאל אויך קומען אין ישיבה נאכן ענדיגן קאכן און העלפן וכו', לערנען הלכה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת שמיני, אסרו חג פסח, כ"ג ניסן, שנת תשפ"ה לפרט קטן

מיין טייערער ליבער ... נרו יאיר, קרית ברסלב

דאס וואס מיר האבן געשמועסט יום טוב אין שטעטל אז מען מוז מוחל זיין אנשי שלומינו, מען טאר נישט לעבן מיט חשבונות אויף אנדערע; אז דער האט מיר געטשעפעט, דער האט געלאכט און יענער האט געפליקט וכו' וכו'; דאס איז די וויכטיגסטע זאך ביים רבינ'ס חדר, צו אפשווייגן און פארגעבן.

וואלסטו געוויסט וואס גייט אריבער אויף מענטשן - וואלסטו בכלל נישט געדארפט ארבעטן אויף דיינע מידות, יענעם צו פארגעבן, ווייל עס גייט אריבער אזעלכע שוועריקייטן אויף יעדן איינעם, און דאס מאכט מען זאל זיך פארלירן און זאגן, שטעכן און אריינפליקן א צווייטן, אבער דאס קומט נישט פון שלעכטקייט, דאס קומט פון דערביטערטקייט.

דו העלפסט מיר אזוי געטריי אויפצושטעלן די הערליכע מוסדות, די הערליכע קהלה קהילת היכל הקודש, דארפסטו געדענקען אז מען דארף האבן אסאך סבלנות מיט מענטשן, און מען דארף זוכן די רחמנות אויף יעדן איינעם, און זען נאר דאס גוטס ביי יעדן איינעם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת שמיני, כ"ד ניסן, ט' לעומר, שנת תשפ"ה לפרט קטן

לכבוד ... נרו יאיר

דעם פסח בין איך געווען אין שטעטל מיט אנשי שלומינו; וואס זאל איך דיר זאגן, איך בין אזוי איבערגענומען פון די שיינע שטעטל, א פלאץ פון שמחה, א פלאץ פון יראת שמים, א פלאץ פון ליבשאפט; איך בין זייער פרייליך.

יום טוב איז געווען זייער שיין. חול המועד האבן מיר געהאט יעדן טאג א סיום הש"ס; איין טאג פון א בחור, איין טאג פון א קינד און איין טאג פון א איד וואס האט שוין חתונה געמאכט די קינדער, עס איז געווען זייער פרייליך.

איך וויל דיר זייער בעטן, יעצט אין ספירה טעג זאלסטו בעטן דעם אייבערשטן זאלסט קענען ארויסגיין פון דיין וועג פאר א צווייטן איד, און אפילו דער איד איז נישט דיין סארט, און אפילו דו האסט חשבונות וכו' - זאלסטו א טובה טון פאר א צווייטן איד, און די גרעסטע טובה איז געבן א גוט ווארט; "א גוט מארגן", "א גוטן טאג", "א גוטע נאכט", א פרעג "וואס מאכסטו?" א פרעג "וואס קען איך טון פאר דיר?"

מוהרנ"ת פלעגט זאגן: "וואלטן אנשי שלומינו זיך געהאלטן מיט ליבשאפט וואלט דער רבי זיי געברענגט צו די העכסטע דרגות", און דערפאר פארלייגט זיך דער סמ"ך מ"ם צו מאכן חלישות הדעת מיט אלע סארט תירוצים פאוואס מען זאל זיך נישט פארשטיין, זיך נישט גריסן, שמועסן וכו' וכו'.

איך האב דיר נאכנישט פארציילט פון די גרויסע ניסים וואס דער אייבערשטער האט געמאכט, מיר האבן געקענט באצאלן אלע איינגעשטעלטע, מיר זענען נישט געבליבן שולדיג קיין איין פרוטה; דאס איז א נס למעלה מדרך הטבע, דאס איז א מעשה פון תפילות און א מעשה פון די איבערגעגעבנקייט פון אנשי שלומינו וואס האבן געגעבן צדקה מער פון זייער מעגליכקייט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת שמיני, אסרו חג פסח, כ"ג ניסן, שנת תשפ"ה לפרט קטן

מיין טייערער ... נרו יאיר

איך וויל דיר בעטן, היות מיר מאכן יעצט גרעסער דעם בית המדרש אין שטעטל - וועלן די קאסטן זיין מער, סיי דאס רייניגן און סיי די הייצונג און לעקטער וכו', זאלסט העלפן דעם גבאי'ן אברהם יושע וועבערמאן נרו יאיר צאמנעמען צדקה אויסצוהאלטן די קאסטן פונעם שול. ער אליין ארבעט זייער שווער, ער דארף א העלפער, "טובים השנים מן האחד" (קהלת ד, ט), עס איז בעסער ווען צוויי מענטשן ארבעטן אינאיינעם, אזוי קען איינער דעם צווייטן מחזק זיין; דאס משמש זיין דעם רבי'ן איז א תיקון פאר אונז, עס דארף זיין די גרעסטע שמחה אז מיר קענען עפעס העלפן און עפעס צוריק טון דעם רבי'ן.

אויך וויל איך דיר בעטן, יעצט זומער זאלסט נישט קומען אין שול מיט דיין קאר, דו וואוינסט אינגאנצן אפאר מינוט פונעם שול, אזוי וועסטו יעדן טאג האבן א קביעות צו רעדן צום אייבערשטן גייענדיג און קומענדיג פון שול צופרי און ביינאכט. וועסט שפירן גוט, ווען מען גייט התבודדות שלעפט מען נישט די שווערע פעק פון דאגות וכו', מען געבט אלעס איבער צום אייבערשטן, די לעבן איז גרינגער און רואיגער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת ויקרא, ו' ניסן, שנת תשפ"ה לפרט קטן

לכבוד מיין טייערער ... נרו יאיר

שטארק זיך מיט דיינע שיעורים כסדרן, און ווען דו מאכסט א סיום - זאלסטו מיר דאס שרייבן, וועסטו מיר געבן פרישע כוחות. ווייל ווען איך הער אז תלמידי הישיבה לערנען און מאכן סיומים - געבט מיר דאס זייער אסאך כח וויטער אנצוגיין מיט די ישיבה און מיט די קהילה.

אויך זאלסטו יעדן אינדערפרי גיין אין מקוה. מוהרנ"ת האט מבטיח געווען, ווער עס וועט זיך טובל'ען יעדן טאג פארן אייבערשטן - וועט ביים סוף האבן א תקוה, ער וועט ווערן אן ערליכער איד.

איך וויל דיר בעטן מיט מיין הארץ א טובה, ווען דו פארסט אין שטעטל זאלסטו פארן זייער פארזיכטיג און שטייט. ווייל יעצט זומער ווען די קינדער שפילן זיך אין די גאסן, בפרט אין די גאס ירושלים - דארט איז ממש סכנת נפשות, דארף מען זייער אכטונג געבן, ווייל מען קען חס ושלום שעדיגן א קינד השם ישמרינו, איך האף דו וועסט מיר טון די טובה.

דער אייבערשטער זאל העלפן מיר זאלן זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.

בעזרת ה' יתברך - יום א' פרשת כי תשא, ט' אדר, שנת תשפ"ה לפרט קטן

לכבוד ... נרו יאיר

איינער פרעגט מיר אין א בריוו, לכבוד דער ראש ישיבה, איך בין געווען צוגעוואוינט אלע יארן צו זיין אין א גרויסע לעבעדיגע שטאט אום פורים, עס איז אלץ געווען פרייליך און לעבעדיג אויף די גאסן, אויסער דעם וואס איך בין געגאנגען צו מיינע עלטערן וואס דארט קומט זיך צוזאם די גאנצע משפחה און עס ווערט אויטאמאטיש מער פרייליך.

דאס יאר געפאלט פורים אום ערב שבת קודש, און אזוי ווי מיר האבן זיך אריבערגעצויגן אין קרית ברסלב אין שטעטל, לכבוד דעם זעט אויס אז מיר וועלן נישט קענען פארן אין ערגעץ, און עס ווערט שוין יעצט אומעטיג ביי אונז אין שטוב, אז מיר גייען האבן דאס יאר א נעבעכדיגע פורים, עס וועט נישט זיין פרייליך, מען וועט דארפן זיצן אליין אינדערהיים.

ווי אזוי קען מען מאכן א פרייליכע און לעבעדיגע פורים זיצנדיג אינדערהיים, אן צו זען לעבעדיגס אין די גאסן, אן מיטצוהאלטן לוסטיג מיט די משפחה, און אזוי ווייטער?

בנוגע וואו צו זיין פורים וכו'; מענטשן האבן א טעות, מענטשן זוכן א פלאץ וואו צו זיין פרייליך, עס האט נישט מיט די פלאץ, זיין פרייליך איז נישט אין א פלאץ, זיין פרייליך איז אין הארץ, זיין פרייליך איז ווען מען נעמט אריין אין מח אז דער אייבערשטער איז דא, ער האט מיך ליב, און ער האט ליב מיינע מצוות, ער האט ליב צו הערן מיין קול ווי איך בעט אים; דאס איז אמת'ע שמחה, זיין פרייליך איז נישט דא אדער דארט, עס איז דורך שרייען יעדן טאג צום אייבערשטן: "רבונו של עולם איך וויל זוכה זיין צו זיין פרייליך, נעם מיך ארויס פון מיין עצבות און מיין מרה שחורה".

ווער עס געדענקט פורים ביי מוהרא"ש, עס איז נישט געווען קיין גרויסער עולם אויסער די לעצטע פאר יאר ווען די ישיבה פלעגט קומען, עס איז געווען גאנצע צען מענטשן, אבער די שמחה איז געווען אזוי שטארק, די שמחה איז אין הארץ, מען טאנצט, מען פרייט זיך ווי מען געפינט זיך נאר, אז מען האט א רבי וואס שרייט: "שכל קוויך" אלע וואס האפן און ווארטן און ווילן זיין גוט  - "לא יבושו", וועלן נישט פארשעמט ווערן, "ולא יכלמו לנצח, כל החוסים בך", און אלע וואס ווארטן אויף די ישועה פונעם אייבערשטן - וועלן געהאלפן ווערן, מען האט מרדכי הצדיק וואס איז לוחם מיט המן הרשע.

ווער עס האט נאר געטראפן ברסלב'ע חסידים פורים, ווייסט אז דאס איז עפעס וואס מען זעט נישט, מען זעט שמחות און בכיות, מען לאכט און מען וויינט, מען טאנצט און מען וויינט ביידע אינאיינעם, מען הערט די שמחה אז מען האט א רבי און מען הערט וויינען אז מען וויל זוכה זיין צו קדושת מרדכי ואסתר.

פורים איז נישט די מוזיק אין די גאסן, עס איז נישט די צעלאזטע זאכן, מען מוטשעט זיך אין די גרויסע שטעט ווי אזוי מען קען דאס אפשטעלן, נישט דאס איז פורים, דאס איז עקשע"ן, פורים איז א הייליגע שמחה, מען טרינקט וויין און עס קומט ארויס די סוד אז עס איז נישטא קיין טבע, נישטא גארנישט נאר דער אייבערשטער.

בלייבט אין שטעטל און מאכט א סעודה אינאיינעם, שלעפט אייך נישט אריין אין שטאט, עס האט נישט קיין פשט אין אזא הייליגע צייט זיך צו שלעפן אויף די וועגן מיט א משפחה וכו', נעמט אייך צאם, מאכט א סעודה און טרינקט און טאנצט, און פועל'ט אלע ישועות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ד' פרשת משפטים, כ"ב שבט, שנת תשפ"ה לפרט קטן

מיין טייערער ... נרו יאיר, קרית ברסלב

איך וויל דיר בעטן זאלסט איבערבעטן ... נרו יאיר, ער איז געקומען צו מיר און מיר געזאגט אז דו האסט אים זייער פארשעמט, ער האט דיר געגריסט שבת, און דו האסט געשריגן אויף אים וכו'; ער איז געווען מיט זיינע קינדער, ער איז אזוי באליידיגט, שוין אריבער אפאר טעג און ער האט געהאט טרערן אין די אויגן פון די בזיון.

ענדליך הער איך שוין אז מען גריסט זיך אין שטעטל, איז פארוואס דארף מען צוריק שרייען ווען מען באגריסט (און אפילו מען גייט מיט די ווייב, פאסט אויך אז מען באגריסט דעם מאן).

בפרט אז ער האט זיך מוסר נפש געווען פאר דיין שידוך, ער האט זיך איינגעשטעלט זיין לעבן דיר א חתן מאכן, דארפסטו געדענקען דיין גאנץ לעבן צו מכיר טובה זיין פאר די גוטס וואס ער האט געטון מיט דיר, און אויך נאך פיל טובות במשך די צייט וואס דו האסט געלערנט אין ישיבה, און דיין ווייב אין סקול.

איך בעט דיר זייער, האב שכל און בעט איבער ווייל אויב מען פארשעמט א צווייטן קען מען זייער ליידן.

מער האב איך נישט וואס צו שרייבן.

בעזרת ה' יתברך - ליל שישי פרשת יתרו, ט"ז שבט, שנת תשפ"ה לפרט קטן

לכבוד ... נרו יאיר, מנהל מוסדות היכל הקודש, קרית ברסלב

בנוגע וכו'; נפטר ווערן איז נישט קיין שרעקעדיגע זאך, מלמדים מעגן דערציילן פון נפטר ווערן, (ביי די יונגערע קלאסן דארף מען נישט רעדן קיין סאך פון דעם), און אז א קינד ווערט דערשראקן פון נפטר ווערן - געבט מען אים צו פארשטיין אז ביי ערליכע אידן איז דאס נישט שרעקעדיג, ווייל אז מען לערנט, מען דאווענט, מען טוט מצוות און מעשים טובים - גייט מען אין גן עדן מיט די הייליגע צדיקים.

בנוגע אויסטיילן די געהאלט האבלוועגס; ביסט גערעכט, מען קען נישט אויסטיילן האלבוועגס, אדער פאר יעדן אדער פאר קיינעם. איך וועל רעדן אין אפיס מען זאל מאכן אלע אויף איין מאל, ווייל איך וויל יא דו זאלסט אויסטיילן די געהאלט פאר די מלמדים, אזוי קענסטו געבן גוטע וועטער, צושרייבן א גוט ווארט, און אויב מען דארף חיזוק פאר שמירת הזמנים - קענסטו דאס גרינגער בעטן וכו'.

מיר דארפן זיך זייער שטארקן, איך האלט פאר מיינע אויגן די מעשה וואס דער רבי האט דערציילט מיטן הערש, דער הייליגער רבי האט דערציילט, א קעניג איז געגאנגען אין וואלד פאנגען חיות מיט זיינע מיניסטארן, דער קעניג האט אנגעהויבן נאכלויפן א הערש, ער האט נאר געוואלט כאפן דעם הערש. פלוצלונג האט אנגעהויבן גיין א שלאקס רעגן, די מענטשן וואס זענען מיטגעגאנגען מיטן קעניג האבן אנגעהויבן אהיימגיין, האט דער קעניג געזאגט: "איך מוז כאפן דעם הערש, אז ענק ווילן אהיימגיין גייט אהיים", און דער רבי האט אויסגעפירט: "איך מוז כאפן דעם הערש, ווער עס וויל - קען צוריקגיין".

אז איך קום אין שטעטל און איך נעם דעם סעווענטין כמספר 'טוב', און איך גיי ארויס ביי 'הונדערט און צוויי' כמנין 'צבי' - צו כאפן די הערש כמנין 'אמונה', און ווער עס וויל קען אהיים גיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ליל שישי פרשת יתרו, ט"ז שבט, שנת תשפ"ה לפרט קטן

לכבוד מיין טייערער ... נרו יאיר

איך האב ערהאלטן דיין בריוו.

איך וועל זיין שבת אין שטעטל וועל איך אים פרעגן פארוואס ער וויל נישט רעדן מיט דיר. איך האב שוין נישט קיין כח פאר די זאכן; פון איין זייט בין איך זייער דאנקבאר פאר אלע וואס העלפן מיר, אבער אז עס ווערט צווישן ענק רייבערייען... איך האב נישט קיין כח צו דעם.

איך דארף דאס אריבערגיין ווייל איך האב אפשר געמאכט צער פאר מוהרא"ש. ווען מען איז געקומען רעדן צו מוהרא"ש קעגן מיר - האט מוהרא"ש געהאט אסאך צער פארוואס מען קריגט זיך, איז דאס א פגם פאר מיר. יעצט דארף איך שפירן ווי עס שפירט ווען צוויי מענטשן וואס ביידע זענען געטריי, ביידע ווילן העלפן און צווישן זיך רעדט מען נישט.

זינג און טאנץ א גאנץ שבת מיט דיינע קינדערלעך, דאנק דעם אייבערשטן פאר די חסדים וואס ער טוט שטענדיג מיט דיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ליל שישי פרשת יתרו, ט"ז שבט, שנת תשפ"ה לפרט קטן

... נרו יאיר

איך האב ערהאלטן דיין בריוו.

אז דו ווילסט קומען וואוינען אין שטעטל - אדרבה ואדרבה, אבער זאלסט וויסן אז אין שטעטל דארף מען אויך רחמי שמים אז די שטוב זאל זיין מקורב.

מאך התבודדות, פרעג דעם אייבערשטן אויב עס איז כדאי, אויב דו זאלסט קומען דא, אויב דיין ווייב וועט טרעפן אין שטעטל גוטע חבר'טעס וכו' וכו'. אודאי און אודאי איז די שטעטל א שיינע ווינקל פון אמונה, שמחה און יראת שמים, אבער אז מען איז נישט צופרידן וואו מען איז וכו' - מאן יימר אז דא וועט פלוצלונג ווערן גוט.

מאך התבודדות, בעט דעם אייבערשטן, פרעג אים: "טאטע וואו זאל איך וואוינען? זאל איך קומען אין שטעטל? זאל איך גיין ערגעץ אנדערש?" בעט און בעט ביז דו וועסט וויסן וואס דו האסט צו טון.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ב' פרשת בא, כ"ח טבת, שנת תשפ"ה לפרט קטן

לכבוד מיין טייערער ... נרו יאיר, קרית ברסלב

איך וויל דיר בעטן זאלסט מכבד זיין די שול און די מקום ארום די שול, עס איז נישט שיין אז דו רייכערסט אין פארנט פון שול; דו ווייסט אז דער רבי האט נישט געוואלט מען זאל רייכערן (חיי מוהר"ן סימן רעג, תעב), איז נישט שיין צו רייכערן ביים רבינ'ס ד' אמות.

אויך זאלסטו נישט ברענגען קיין ברוינפן אין שול, אז דער רבי האט נישט געוואלט מען זאל טרינקען - קען מען נישט קומען ביי אים אין שול און טון אנדערש ווי זיין ווילן.

אויך ביי דיר אין שטוב - אז דו וועסט צאמרעכענען די געלט וואס דו געבסט אויס פאר די ברוינפן, וויין, צוגארעטלעך - וועסטו זען אז דאס זענען דיינע חובות, און אז דו וועסט דאס אפלאזן - איז מער נישט דא קיין חובות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת וארא, כ"ב טבת, שנת תשפ"ה לפרט קטן

מרת ... תחי'

איך האב ערהאלטן אייער בריוו.

איך האב געהאט נעכטן גרויס צער פון וואס איר האט דערציילט, אז אייערע קינדער ליידן פון די פראסטן ביים ווארטן אויפן באס, יעצט ווען עס איז ביטער קאלט און די באס דרייווערס קומען נישט אין צייט, און אייערע קינדער ווערן פארפרוירן פון די פראסטיגע קעלט.

איך האב גערעדט צום מענעדזשער ער זאל מאכן טרעקערס אויפן באס, מען זאל קענען אריינרופן און זען ווען צו שיקן די קינדער.

זייט מיר מוחל, מיר ארבעטן זייער שווער אז זאכן זאלן זיין גוט. מיר זענען א נייע מוסד, מיר האבן נישט קיין געלט, זאכן נעמען אביסל צייט ביז עס ווערט מסודר. איך האף צום אייבערשטן דאס צו קענען מאכן פאר אלע איינוואוינער פון שטעטל, אז מען זאל נישט דארפן אריבערגיין די שווערע זאך אז די קינדער ווארטן אויף די באס אין די ביטערע פרעסטן.

בעזרת ה' יתברך - יום ד' פרשת שמות, ט"ו טבת, שנת תשפ"ה לפרט קטן

לכבוד מיין טייערער ליבער ... נרו יאיר

אוואו ביסטו? איך בענק זיך אזוי צו דיר, שוין אזא לאנגע צייט וואס איך הער נישט פון דיר...

אפשר דאך קען מען צוריק אויפוועקן אונזער נאנטשאפט, טייערער ... נרו יאיר, נישט אלעס איז האבן אן אייגענע הויז, און נישט אלעס איז האבן געלט, דאווענען יעדן טאג מיט מנין די דריי תפילות, דאס איז אלעס.

א שאד דו האסט זיך אוועק געצויגן פון שטעטל צו א פלאץ אן מנין, הלוואי אז דו קומסט צוריק וואוינען נעבן מיר, און אויב דו האסט עפעס טענות אויף אונזער קהילה – זאלסטו זיך אריבערציען צו אן אנדערע קהילה, ווייל וואס וועט זיין מיט די קינדער...

איך זאג דיר דאס, נאר ווייל איך האב דיך ליב, און איך וויל נאר דיין טובה. ווען דו ביסט געווען א בחור, מען האט דיך געווארפן פון אלע ישיבות ווי מען ווארפט א באלי, האב איך דיך אריינגענומען, איך האב דיר געעפנט די טיר, איך האב דיך מקרב געווען און געזארגט פאר דיין שידוך, און געברענגט די טייערע פרוי, דיין ווייב תחי', וויל איך דיר בעטן נאר איין זאך, וואוין צווישן אידן, וואוין אין א גאס וואו דו האסט מנין שבת און וואכן, אויף דעם זאלסטו זיך מוסר נפש זיין.

הלוואי וואלט איך דיר געזען אמאל, וואלטן מיר געקענט רעדן פנים בפנים; אפשר האסטו עפעס ווייטאג אויף מיר, טענות אויף מיר; איך ווייס אז דיינע עלטערן און דיין ווייב'ס עלטערן רעדן וכו', אבער טייערער ..., איך וויל נאר איין זאך, דיין שטוב זאל זיין געבויט אויף די גרונד פון די תורה, אויף די פונדאמענט פון די תורה.

איך ווארט זאלסט מיר ענטפערן.

בעזרת ה' יתברך - יום ג' פרשת תולדות, כ"ה מר-חשון, שנת תשפ"ה לפרט קטן

לכבוד מיין טייערער ... נרו יאיר, קרית ברסלב

זייער גוט אז דו ביסט אריינגעגאנגען אין די פייער דיפארטמענט אין שטעטל, אין ליבערטי. איך האף אריינצולייגן נאך ערליכע אינגעלייט אין די דיפארטמענט, צו קענען העלפן ראטעווען פון פייער.

פארגעס נישט, מיר אלע דארפן עצות צו לעשן די פייער, די שלעכטע פייער וואס ברענט אין הארץ השם ישמרינו. די עצה אויסצולעשן די פייער איז דורך גיסן וואסער, "אין מים אלא תורה" (בבא קמא פב.), וואסער מיינט תורה, "אין מים אלא תפילה" (עיין בעל הטורים בראשית טז, ז), וואסער מיינט תפילה, נאך זאגן די הייליגע חכמים זכרונם לברכה (בראשית רבה ב, ד): "אין מים אלא תשובה", וואסער מיינט תשובה טון מיט תורה און מיט תפילה, דאס איז תשובה, אזוי לעשט מען אויס די שלעכטע פייער וואס וויל פארברענען דעם מענטש.

אן אינטערעסאנטע זאך איז געווען ביי מוהרא"ש, ער האט אמאל שפאצירט מיט די בחורים און א פייער לעשער טראק איז אריבערגעפארן, און ער האט געפיפן און געליאמערט מיט קולי קולות, האט מוהרא"ש געזאגט פאר די בחורים: "ענק זעען, ווען מען לעשט א פייער, מען יאגט זיך צו לעשן א פייער – פארט מען מיט קולי קולות, דאס לערנט אונז אז ווען מען וויל פארלעשן די פייער פון די שלעכטע תאוות, דארף מען שרייען צום אייבערשטן מיט קולי קולות 'הייליגער באשעפער, האב אויף מיר רחמנות, לעש אויס מיין שלעכטע פייער, ראטעווע מיך פון שלעכטס, עס ברענט אין מיר די פייער פון שבעים אומות, שבעים לשונות'".

בעזרת ה' יתברך - יום ג' פרשת ויגש, א' דראש חודש טבת, ו' דחנוכה, שנת תשפ"ה לפרט קטן

מרת ... תחי'

נאכדעם וואס עטליכע פרויען זענען געקומען דערציילן זאכן וואס טויגן נישט וועגן דעם דענטיסט, זאלט איר מפרסם זיין פאר די פרויען אז דער דענטיסט נעבן שטעטל טויג נישט, מען זאל נישט גיין צו אים, ער איז א מניוול און א שוסטער.

דער אייבערשטער זאל אונז היטן פון שלעכטס.

דער אייבערשטער זאל העלפן איר זאלט האבן הצלחה אין אלע ענינים.

א פרייליכן חנוכה און א גוטן חודש.

בעזרת ה' יתברך - יום ד' פרשת מקץ, כ"ד כסליו, שנת תשפ"ה לפרט קטן

מרת ... תחי', קרית ברסלב ליבערטי

איך האב ערהאלטן אייער בריוו.

איך דאנק אייך פארן העלפן אין די קליידער געשעפט אין שטעטל וואו מען קען איינקויפן פאר אפאר דאלער שיינע קליידער, אנשי שלומינו דארפן נישט ווערן קיין בעלי חובות, מען קען לעבן אן חובות און האבן קליידער.

נאך מער דאנק איך אייך פארן אויסגלעטן און אויסגראדן צווישן די פרויען די וואלענטירן, עס זאל זיין שלום צווישן אייך. עס לוינט מיר נישט די גאנצע קליידער געשעפט נאר אויב עס איז דא שלום צווישן אייך, נאר מיט שלום וועלן מיר מצליח זיין, נאר מיט שלום וועלן מיר ברענגען די גאולה. אזוי ווי דער צדיק רבי חיים ויטאל זכרונו לברכה דערציילט (ספר שבחי האר"י ז"ל) אמאל אין אן ערב שבת האט אויסגעבראכן א קריגעריי צווישן אונזערע ווייבער תלמידים פון אריז"ל, און דער אריז"ל האט געזאגט, "בְּקַבָּלַת שַׁבָּת בָּא אֵלַי הַמֶלֶךְ הָרָע, וְאָמַר לִי", אינמיטן קבלת שבת איז געקומען דער מלאך המות און ער האט מיר געזאגט, "גַם אַתֶּם גַם מַלְכְּכֶם תִּסָפוּ", אז איך גיי נפטר ווערן, "וְכָל זֶה בִּגְלַל הַקְּטָטָה שֶׁהָיְתָה בֵּינֵיכֶם הַיוֹם", אלעס צוליב די מחלוקה וואס איז היינט געשען צווישן אייך, "כִּי כָּל פַּעַם שֶׁהָיָה הַשָׁלוֹם שׁוּרָה בֵּינֵיכֶם לֹא הָיְתָה לְמַלְאָךְ הַמָוֶת דְרִיסַת רֶגֶל", ווייל ווי לאנג עס איז געווען שלום צווישן אייך האט דער מלאך המות נישט געהאט קיין שליטה אויף מיר, "כֵּן הָיָה בַּעֲווֹנוֹתֵנוּ הָרַבִּים בְּאוֹתוֹ זְמַן נִתְבַּקֵּשׁ בִּיְשִׁיבָה שֶׁל מַעֲלָה מוֹרֵנוּ וְרַבֵּנוּ עֲטֶרֶת רֹאשֵׁנוּ זַ"ל", וכך הוה, אז דער אריז"ל איז יענע יאר אוועק; א שרעק פון א מעשה, דער אריז"ל איז דא מיט זיינע הייליגע תלמידים און די ווייבער קריגן זיך, און דאס איז גורם אלע צרות; זאלט איר מיר העלפן מיט די איין זאך, עס זאל זיין שלום צווישן די ארבעטער, די וואלענטירן.

איך בין דאנקבאר יעדן איינעם פון אייך, אבער נאר דער וואס זוכט נישט צו זיין בעל הבית און טרעט נישט אויף אנדערע, און אז מיר וועלן פרובירן מיט אלע אונזערע כוחות צו זיין בשלום מיט יעדן איינעם - וועלן מיר זוכה זיין צו ברענגען משיח במהרה בימינו.

דער אייבערשטער זאל העלפן איר זאלט האבן הצלחה אין אלע ענינים.

א פרייליכן חנוכה.

בעזרת ה' יתברך - יום ד' פרשת מקץ, כ"ד כסליו, שנת תשפ"ה לפרט קטן

לכבוד ... נרו יאיר, גבאי קרית ברסלב

געדענק וואס א גבאי מיינט, שמייכלען און אויפלעבן יעדן איינעם בלי יוצא מן הכלל, און זען אין יעדן איינעם נאר דאס גוטס, און אז מען זעט חסרונות - דארף מען גיין זיך מתבודד זיין אין די פעלדער און אין די וועלדער.

אויך דארף מען זען אז אלעס זאל זיך פירן מיט דרך ארץ, די שול און אזוי אלעס ארום - זאל זיין מיט דרך ארץ, און מיט מאכן א גוטע נאמען פארן צדיק; אויפהייבן דעם רבינ'ס נאמען. אזוי ווי דער רבי זאגט (ספר המדות אות צדיק, סימן סט): "מִי שֶׁאוֹהֵב אֶת הַצַּדִּיק", ווער עס האט ליב דעם צדיק, "צָרִיךְ לִשְׁמֹר אֶת הַצַּדִּיק, שֶׁלֹּא יֵצֵא עָלָיו שֵׁם רָע", דארף אכטונג געבן עס זאל נישט ארויסגיין א שלעכטע נאמען אויפן צדיק; בפרט אין היכל הקודש דארף מען זייער מקפיד זיין עס זאל זיין אלעס מיט דרך ארץ.

פארשטייט זיך אז די צוויי זאכן - יעדן ליב האבן און זען עס זאל זיין סדר און דרך ארץ – קען מען נאר צאמשטעלן מיט תפילה והתבודדות.

ביטע איבערגעבן אין שטעטל פאר די אינגעלייט זיי זאלן נישט ארויפקומען צו מיין חנוכה ליכט צינדן, איך וויל צינדן פריוואט מיט מיינע קינדער, מכמה טעמים.

א פרייליכן חנוכה.

בעזרת ה' יתברך - יום ה' פרשת מקץ, כ"ה כסליו, א' דחנוכה, שנת תשפ"ה לפרט קטן

לכבוד מיין טייערער ליבער ... נרו יאיר, קרית ברסלב

ווען דער רמב"ם רעכנט אויס די מעלות פון צדקה, וואס איז א גרעסערע צדקה און וואס איז נאך מער חשוב, זאגט דער רמב"ם (פרק י' מהלכות מתנות עניים, הלכה ז): "מַעֲלָה גְּדוֹלָה שֶׁאֵין לְמַעְלָה מִמֶּנָּה", די גרעסטע צדקה וואס איז דא – "זֶה הַמַּחֲזִיק בְּיַד יִשְׂרָאֵל שֶׁמָּךְ, מַמְצִיא לוֹ מְלָאכָה כְּדֵי לְחַזֵּק אֶת יָדוֹ", אז מען לייגט אריין אן ארעמאן אין ביזנעס, אדער מען שאפט אים א פרנסה, "עַד שֶׁלֹּא יִצְטָרֵךְ לַבְּרִיּוֹת לִשְׁאֹל", ווייל אזוי דארף ער נישט צוקומען צו נעמען צדקה, ער שעמט זיך נישט און ער קען אהיים ברענגען פרנסה.

אחי היקר, זיי שטארק אין די הייליגע מצוה פון העלפן שאפן פרנסה פאר אנשי שלומינו, דאס איז וואס וועט דיר צוניץ קומען בעת צרה. דער רבי זאגט (ספר המדות אות צדקה, סימן לה): "בְּעֵת צָרָה מַזְכִּירִין לוֹ הַצְּדָקוֹת שֶׁנָּתַן", מען דערמאנט די צדקה וואס מען האט געטון, בעת צרה; אויך וועט דיר דאס ראטעווען פון אלעם שלעכטס. דער רבי זאגט (שם, סימן ח): "עַל יְדֵי צְדָקָה נַעֲשֶׂה סוּר מֵרָע", דורך צדקה ווערט מען אן ערליכער איד, "וְנִקְרָא צַדִּיק גָּמוּר", און מען איז א צדיק גמור (שם, סימן ז).

בעזרת ה' יתברך - יום ה' פרשת מקץ, כ"ה כסליו, א' דחנוכה, שנת תשפ"ה לפרט קטן

לכבוד מיין טייערער ... נרו יאיר, קרית ברסלב

איך ווייס נישט פון דיר, איך הער נישט פון דיר, איך מיין זאלסט ענדערש צוריק מופן קיין ארץ ישראל, דארט האב איך מער געהערט פון דיר, ווי יעצט ווען דו וואוינסט אין שטעטל. איך האף דו ביסט נאכאלץ מקורב צום רבי'ן, דו לערנסט דעם רבינ'ס ספרים און פירסט זיך מיט זיינע עצות.

באמת, די שטעטל איז נישט סוף פסוק. איך געדענק איך בין געווען ביי מוהרא"ש אין יבנאל אויף שבתים און עס זענען דארט אויך געווען וואס האבן נישט געהאט מיטן רבי'ן; עס איז נישט סוף פסוק דאס קומען וואוינען אין שטעטל, מען דארף אלץ פריש זיך מתקרב זיין, זוכן אנשי שלומינו וואס וואוינען אין רבינ'ס ספרים, אנשי שלומינו וואס וואוינען אין הערן שיעורים וכו'.

טייערער ברודער באניי זיך, באווייז זיך, שרייב מיר, לאמיר זיך צוריק מקרב זיין צום רבי'ן און מיר וועלן זוכה זיין צו גאר שיינע זאכן.

בעזרת ה' יתברך - יום ב' פרשת וישב, ט"ו כסליו, שנת תשפ"ה לפרט קטן

מרת ... תחי', קרית ברסלב

עס איז אזא זכות דאס אוועק שטעלן די געשעפט אין שטעטל צו פארקויפן קליידער וואס מענטשן האבן גענוצט איין מאל אין לעבן, דאס פארקויפן פאר אפאר דאלער; מיר האבן שוין געשפארט אזויפיל געלט פאר משפחות הנצרכים.

אז איר שרייבט, עס פעלט אויס נאך פרויען זאלן קומען ארבעטן בהתנדבות וכו'; עס איז כדאי צו מפרסם זיין פאר נשות אנשי שלומינו אז מען קען ניצן נאך העלפער, אזויפיל משפחות פרעגן כסדר וואס זיי קענען העלפן די שטעטל, אזויפיל פרויען ווילן צוגעבן פארן שטעטל, זיי ווילן אויך העלפן בויען, זיי ווייסן נישט אז מען זוכט העלפער, איז כדאי צו מודיע זיין אז מען זוכט נאך פרויען זאלן העלפן, סיי מיטן ארום רופן געשעפטן וואס ווארפן אוועק קליידער פון די אלטע סעזאן אין מיסט, און ווען זיי ווייסן ווען אז מען קען טון מיט דעם א צדקה - וואלטן זיי דאס אוועק געגעבן מיט די גרעסטע שמחה, און סיי מיטן העלפן אויסלייגן די קליידער און אוועק ווארפן די נישט גוטע וכו'.

ווי גליקליך זענען מיר אז מיר קענען טון גוטע זאכן אויף די וועלט, די פאר יאר וואס מיר זענען דא, און מיר קענען משמש זיין דעם הייליגן רבי'ן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויצא, ב' כסליו, שנת תשפ"ה לפרט קטן

לכבוד ... נרו יאיר

שלעפ נישט קיין מענטשן צום שטעטל און רעד נישט קיינעם צו אריינצושיקן די קינדער ביי אונז, אז דו ווילסט העלפן - נעם א זעקל ספרים און גיי הפצה; מיטן ציל צו ברענגען מענטשן צום אייבערשטן, נישט צו ברענגען מענטשן וואוינען ביי אונז וכו', עס קומט נישט ארויס קיין גוטס פון דעם, נישט דאס האט מוהרא"ש געוואלט, מען זאל שלעפן מענטשן צו אים; מוהרא"ש האט געוואלט צוציען די גאנצע וועלט צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ויצא, ב' כסליו, שנת תשפ"ה לפרט קטן

... נרו יאיר

איך האב ערהאלטן דיין בריוו.

איך האב געהאט א מעשה, א משפחה האט געהאט טענות אויף אונזער מוסד, זיי האבן נישט אויפגעהערט מיט טענות, האב איך געבעטן די עלטערן און געזאגט: "הערט אויס וואס איז ריכטיג, ענדערש נעמט ארויס די קינדער און לייגט זיי אין א מוסד וואס ענק האלטן אז דארט געבט מען א גוטע חינוך, ווי איידער צו האלטן ביי אונז, און שפעטן טאג און נאכט פון די מוסד", ווייל קינדער ווערן צעמישט פון דעם, זיי פארמאכן זיך, יארן יארן וועט נעמען זיי זאלן קענען געהיילט ווערן.

קינדער קענען נישט נעמען קיין מחלוקת און ליצנות, אינעם קינד'ס מח איז דא דריי מענטשן; זיין טאטע, זיין מאמע און זיין רבי אדער טיטשער; דאס קינד דארף שפירן ווי אלע זענען בשלום, אלע ארבעטן אינאיינעם.

איך זאג דיר אויך, עס איז געזונט זאלסט זיך אוועק ציען פון שטעטל. האב נישט מורא, ביסט נישט דער ערשטער און נישט דער לעצטער, טו עס פאר דיינע קינדער, ווי איידער חוזק מאכן.

איך מיין עס מיט אן אמת.

דער אייבערשטער זאל העלפן זאלסט האבן הצלחה אין אלע ענינים.