בעזרת ה' יתברך - ערב חג השבועות, ד' סיון, מ"ח לעומר, שנת תשפ"ד לפרט קטן
לכבוד ידיד נפשי הרה"ח ... שליט"א
א גרוס פון די חשוב'ע אייניקלעך, אלע פירן זיך מיט יראת שמים און מיט גרויס דרך ארץ.
איך בענק זיך זייער צו אייך, און איך האף צום אייבערשטן אלעס איז ביי ענק גוט.
דער אייבערשטער זאל אייך געבן געזונט און נחת און מיר זאלן זוכה זיין צו מקבל זיין משיח צדקינו, אמן.
בעזרת ה' יתברך - ערב שבת קודש פרשת שלח, מברכין תמוז, כ"ב סיון, שנת תשפ"ד לפרט קטן
לכבוד ... נרו יאיר
געלויבט דעם אייבערשטן איך שפיר זיך שוין גוט, און איך וויל דיר דאס לאזן וויסן, ווייל איך האב דיר געגעבן פינף הונדערט דאלער צו דרוקן אשר בנחל פאר א זכות רפואה פאר מיר; ברוך השם איך שפיר זיך שוין גוט.
יעצט וויל איך נאכאמאל א זכות, איך שיק דיר דא נאכאמאל פינף הונדערט דאלער צו דרוקן דעם הייליגן ספר 'אשר בנחל'. איך וויל דיר בעטן זאלסט אריינלייגן די נעמען פון מיין משפחה; מיין נאמען, מיין ווייב'ס נאמען און די נעמען פון מיינע קינדער; עס זאל זיין א זכות פאר מיינע קינדער זאלן מצליח זיין זומער, זיי זאלן לערנען און דאווענען און זיין געזונט.
שטארק זיך, ווער נישט פארלוירן יעצט ווען די בית הדפוס גייט אריבער שווערע טעג, עס איז נישטא קיין געלט צו צאלן די איינגעשטעלטע; דו גיי ווייטער צאמנעמען צדקה פון אנשי שלומינו, ווייל אנשי שלומינו זענען זייער ווארעם פאר הדפסה.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ה' פרשת שלח, כ"א סיון, שנת תשפ"ד לפרט קטן
מרת ... תחי'
איך האב ערהאלטן אייער בריוו.
עס איז גוט צו כאפן א דרימל אינמיטן טאג, עס קלארט אויס די מח. אזוי ווי דער רבי זאגט (שיחות הר"ן, סימן קי) דורך שלאפן - גייען אוועק אלע שטותים און בלבולים, און מען באקומט א שטערקערע אמונה.
א אידישע מאמע וואס האדעוועט קינדער, מען זייגט קינדער און מען ווארט קינדער וכו' - איז א נארמאלע זאך צו ווערן מיד און צו וועלן כאפן א דרימל.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - יום ד' פרשת שלח, כ' סיון, שנת תשפ"ד לפרט קטן
מרת ... תחי'
איר האט א טייערע מאן, איר האט א מאן אן ערליכער איד, ער איז אזוי פרייליך מיט אייך, ער האט אייך אזוי ליב, ער זאגט מיר ער דארף אן עצה ווי אזוי ער קען אייך פרייליך מאכן; ער האט אויסגעפלאצט צו מיר אין א געוויין אז ער וויל איר זאלט זיין פרייליך וכו' וכו'.
בעט איך אייך, איר זאלט נישט אויפהערן דאנקען דעם אייבערשטן פאר די מתנה פון האבן א מאן אן ערליכער איד, און אים זייער שעצן, וועט פון ענק ארויסקומען קינדער צדיקים; ווייל ווען מאן און ווייב שעצן זיך און מען פירט זיך איידל - קומען קינדער צדיקים.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך - אייר, שנת תשפ"ד לפרט קטן
מרת ... תחי'
זאגט יעדן טאג אביסל תהלים, אויך זאלט איר אריינפלעכטן צווישן די פסוקי תהלים אייערע אייגענע לויב ווערטער און די אייגענע בקשות.
אויך זאלט איר זיך זייער פרייען אז איר האט א מאן וואס איז עוסק אין מחזק זיין אידישע קינדער, זיי מזכה זיין אין חינוך הבנים והבנות, ווייזן פאר די קינדער דאס שיינקייט פון תורה ומצוות. עס איז גאר א גרויסע זכות אז איר העלפט אים און אז איר שעצט אים.
בזכות די גוטע זאכן זאלט איר זען נאר נחת ביי אייערע דורות.
ברסלב'ער ראש ישיבה
בעזרת ה' יתברך - אייר, שנת תשפ"ד לפרט קטן
מרת ... תחי'
זאגט יעדן טאג אביסל תהלים און פלעכטס אריין די אייגענע געבעט, און זיכער די אייגענע לויב ווערטער צום אייבערשטן; וועט די תהלים ארויפגיין אזוי הויך, נאך העכער פון די מלאכים, עס וועט אנקומען צום אייבערשטן אליין און איר וועט זען גרויסע נסים.
די תהלים איז א צייכן פון דאנקבארשאפט פארן זיך אוועקגעבן בלב ונפש פאר די גליונות וואס זענען מגלה ומפרסם דעם אייבערשטן, בפרט די גליונות פון שיעורי חינוך, וואס מאכט א שטארקע מהפיכה ביי אידישע קינדער.
בזכות דעם זאלט איר זען נחת ביי אייערע קינדער און אויך זען נחת פון זיך אליין.
דער ראש ישיבה
בעזרת ה' יתברך - אייר, שנת תשפ"ד לפרט קטן
טייערער ליבער ... נרו יאיר
אות להכרת הטוב ממערכת שיעורי חינוך פארן מתרגם זיין בכל שבוע את הגליון בלב ונפש.
הראש ישיבה
בעזרת ה' יתברך - אייר, שנת תשפ"ד לפרט קטן
טייערער ליכטיגער ... נרו יאיר
א קליינע מתנה, א קליינע צייכן פאר די אלע גוטע זאכן וואס דו טוסט צו פארשפרייטן דעם הייליגן רבינ'ס עצות און חיזוק פאר די גאנצע וועלט, פארן אויפשטעלן די שיינע ברסלב'ע מוסדות און די שיינע קהילה.
ובפרט פארן זיך אזוי אוועקגעבן צו העלפן די "מערכת שיעורי חינוך", די גליונות און קונטרסים וואס מוטיגט און ווייזט פאר עלטערן דאס שיינקייט פון חינוך, ווי אזוי מחנך זיין אידישע קינדער.
בזכות די גוטע מעשים דיינע זאלסטו זען ליכטיגע הייליגע דורות.
פון דער ראש ישיבה.
בעזרת ה' יתברך - אייר, שנת תשפ"ד לפרט קטן
טייערער ליבער ... נרו יאיר
וואלסטו געוואוסט דאס גרויסקייט פון מזכה זיין אידישע קינדער מיט די גליונות פון שיעורי חינוך – וואלסטו אפגעלאזט אלעס און נאר עוסק געווען אין מזכה זיין נשמות ישראל מיט די שיינע גליונות פון שיעורי חינוך.
בעט איך דיר טייערער שוואגער, חזק ואמץ בעבודתך הקדושה, לאז נישט אפ די הייליגע ארבעט, צענדליגער טויזנטער אידן זענען זיך מחי' מיט דיין ארבעט; זיי ממשיך ביתר שאת וביתר עוז.
דיין ראש ישיבה, דיין שוואגער וואס ליבט דיך.
בעזרת ה' יתברך - יום ב' פרשת נשא, ד' סיון, מ"ח לעומר, שנת תשפ"ד לפרט קטן
א מתנה פאר דער חשוב'ער ... נרו יאיר
לערן יעדן טאג משניות, אפילו אן פארשטיין. דאס וועט דיר מאכן פאר א גרויסער צדיק.
בעזרת ה' יתברך - יום ה' פרשת בהעלותך, י"ד סיון, שנת תשפ"ד לפרט קטן
... תחי'
זעט צו זאגן יעדן טאג אביסל תהלים, אפילו נאר איין קאפיטל, און לויבט און דאנקט דעם אייבערשטן פאר אלע חסדים, דאס וועט ברענגען נאך און נאך ניסים.
ווי מער מען דאנקט דעם אייבערשטן – אלץ מער האט מען אויף וואס צו דאנקען.
בעזרת ה' יתברך - ערב שבת קודש פרשת שלח, מברכין תמוז, כ"ב סיון, שנת תשפ"ד לפרט קטן
לכבוד ... נרו יאיר
היינט ערב שבת מברכים תמוז דארף שוין געבן א שטיקל קיצל אין די ביינער; דורשי רשומות זאגן, תמוז איז די ראשי תיבות: ז'מני ת'שובה מ'משמשין ו'באין, עס קומט שוין אלול, מען פארט שוין צום רבי'ן נאכאמאל אויף ראש השנה; דארפן מיר זיך פרעגן 'ווי האלט איך מיט מיין שמירת עיניים? שמירת המח והמחשבה? ווי האלט איך מיט ביטול זמן, וויפיל צייט עסט מיר די טעלעפאן און די קאמפיוטער אויף?'
אפשר דאך, אולי יחוס? אולי ירחם? נישט צו האבן די טעלעפאן - נישט אין שטוב, נישט אין קאר, נאר אין אפיס ביי די ארבעט; טייערער הארציגער ברודער, עס איז שוין כמעט אריבער די יאר, וויפיל שעות האסטו פארברענט מיט די טעלעפאן - מיט קוקן די נייעס? מיט קוקן זינגערס אנא בערד זינגען און ווארפן זייער קערפער? וויפיל צייט אוועק געגעבן פאר קוקן ווי מען מאכט חוזק פון מענטשן? לשון הרע, ליצנות, אפגערעדט גילוי עריות שפיכות דמים?
בעט דעם אייבערשטן: "הייליגער באשעפער נעם אוועק פון מיר די כלים, די טעלעפאן, אייפאד, טעבלעט וכו' וכו', העלף מיר איך זאל קענען אויפשטעלן א שיינע ערליכע שטוב מיט ערליכע דורות".
א פרייליכן שבת.
בעזרת ה' יתברך - יום ה' פרשת שלח, כ"א סיון, שנת תשפ"ד לפרט קטן
לכבוד ... נרו יאיר
חסדי השם יתברך איך בין אנגעקומען אין שטעטל אין קרית ברסלב ליבערטי, א טייערע ווינקל, א גן עדן בזה העולם, איך קען דיר נישט מסביר זיין ווי שיין דא איז, ווי זיס דא איז; אלע לעבן מיטן רבי'ן, אלע אטעמען אמונה.
היינט אינדערפרי האב איך געדאווענט מיט די ערשטע מנין זיבן אזייגער, די שול איז געווען אנגעפילט מיט טייערע אינגעלייט. נאכן דאווענען האבן מיר געלערנט די בלאט גמרא, מען האט אנגעהויבן מסכת בבא בתרא, נאכדעם בין איך געגאנגען אין בית פיגא; איך בין פול מיט דאנק צום אייבערשטן.
די יאר וועט אויך זיין די יערליכע קאמפיין צו העלפן די מוסדות, איך האף דו וועסט מיר העלפן די יאר, מער ווי פאראיאר. איך ווייס עס איז נישט גרינג ארויס צו גיין בעטן געלט, אבער מאך זיך א חשבון וואס דו באקומסט, וואס דיינע קינדער באקומען, וויפיל קומען אונז פארן רבי'ן? וויפיל זענען מיר שולדיג פארן רבי'ן? וועלן מיר גיין נאך געלט און העלפן מיט די יערליכע קאמפיין.
היינט וועט זיין די וועכנטליכע שיעור פאר אינגעלייט אין שטעטל, זע צו קומען צום שיעור מיט א נייע התחלה; כאילו דו האסט יעצט די ערשטע מאל געהערט פון ברסלב און דו ווילסט קומען בתמימות ופשיטות הערן חיזוק פון רבי'ן, חיזוק און עצות ווי צו קענען לעבן דאס לעבן מיט זיסקייט און מיט אמונה.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ב' פרשת קרח, כ"ה סיון, שנת תשפ"ד לפרט קטן
לכבוד ... נרו יאיר
איך פרוביר נאכאמאל, אפשר וועט מיר עס דאס מאל געלונגען, פועל'ן ביי דיר זאלסט נישט האבן קיין טעלעפאן וואס איז פארבינדן מיט די וועלט, און אז דו דארפסט עס האבן פאר פרנסה - זאלסטו דאס האלטן אין געשעפט אדער אין אפיס, נישט אין שטוב.
"עֲשֵׂה לְמַעַן תִּינוֹקוֹת שֶׁל בֵּית רַבָּן שֶׁלֹּא חָטְאוּ" טו עס פאר דיינע דורות, פאר דיין עתיד, "עֲשֵׂה לְמַעַן חָרְבַּן בֵּיתָךְ", טו עס פאר דיין שטוב זאל נישט חרוב גיין, בעט דעם אייבערשטן זאלסט האבן די שטארקקייט נישט צו נאכגעשלעפט ווערן נאך די ווינט וואס בלאזט אויף די נישט גוטע זייט.
מיטן אייבערשטנ'ס הילף גיי איך דעם זומער שאפן געלט פאר דיר, פאר דיינע קינדער; איך גיי שאפן געלט פאר זייער חדר און סקול, און אזוי ווייטער, איך וויל דיר בעטן זאלסט אויך צולייגן א האנט; סיי דו, סיי דיין ווייב - זאלן גיין נאך געלט, צאנעמען געלט פאר אונזערע מוסדות. איך טו דאס נישט פאר מיר, איך טו עס פאר דיר, פאר דיינע דורות. שטיי נישט פון דער זייט באקוועמערהייט ווען דיין ראש ישיבה מוטשעט זיך צו קענען אנהאלטן דיין מוסד, דיין קהילה. די יאר וועט זיין אנדערש פון די פריערדיגע יארן, אלע וועלן העלפן, קיינער שטייט נישט פון דער זייט.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום א' פרשת חקת, ב' דראש חודש תמוז, שנת תשפ"ד לפרט קטן
לכבוד ... נרו יאיר
שבת אין שטעטל איז געווען הערליך, עס איז דא אזויפיל צו דערציילן און צו שרייבן פון איין שבת מיט אנשי שלומינו; א שאד אז קיינער שרייבט נישט אפ די שיינע שבתים. איך וועל דיר שרייבן בקיצור אביסל פון די שיינע דיבורים וואס מיר האבן גערעדט.
שבת אינדערפרי ביי סיפורי מעשיות האבן מיר געלערנט די מעשה פון די זביב ועכביש (סיפורי מעשיות, מעשה ז) דער רבי זאגט: "דער קעניג האט פארשטאנען אז מען וויל אים ווייזן מיט די זאך פון די פליג מיט די שפין", מיר האבן זיך מחזק געווען אז יעדע זאך וואס פאסירט - דארף מען זיך אפשטעלן און זיך פרעגן 'וואס וויל מען מיר לערנען? וואס וויל מען מיר ווייזן?' און אז מען קען נישט אויסטראכטן וואס מען דארף פאררעכטן זאל מען דאס דורכשמועסן מיטן אייבערשטן, און זאגן: "רבונו של עולם איך ווייס איך דארף עפעס פאררעכטן, איך ווייס אבער נישט וואס, ווייז מיר וואס איך דארף פאררעכטן".
מיר האבן זיך זייער מחזק געווען מיט דאנקען דעם אייבערשטן, אז ווען עפעס גייט אריבער - זאל מען זיך מאכן א חשבון אויב מען האט שוין היינט געדאנקט און געלויבט דעם אייבערשטן, ווייל ווי מער מען דאנקט און מען לויבט - שפארט מען איין עגמת נפש.
ביי שלש סעודות האבן מיר געלערנט ליקוטי מוהר"ן חלק א סימן י, אות ט, ווי דער רבי טייטשט אויס די ווערטער פון רבה בר בר חנה (בבא בתרא עד.), ער דערציילט ער האט געטראפן א טייעא וואס האט אים געוויזן די לעכער וואו עס קומט ארויס א רויך, וואו קרח איז איינגעזינקען געווארן, ווי דער רבי טייטשט אויס די ווערטער, אז ווען א מענטש פאלט אריין אין די לעכער פון קרח, פון מינות וכפירה - איז דא איין וועג ווי אזוי מען קען זיך צוריק קערן, דורך דעם צדיק וואס איז ווי א רומח 'רוח' 'מ"ם', דער צדיק ער האט א כח "כי אפיק הוה איחרך איחרוכי", ער געבט א נייעם לעבן, אריכות ימים פארן מענטש, מען הויבט אן לעבן מיטן אייבערשטן.
היינט איז געווען ביי מיר א סעודת ראש חודש מיט די אינגעלייט וואס העלפן מיר דעקן די כולל. יעצט דארף איך לויפן צו א חתונה פון איינער וואס האט מיך געראטעוועט בעת צרה יארן צוריק ווען מען האט מיר געוואלט שלעכטס טון, און ער האט זיך ארויסגעשטעלט מיר צו העלפן, ער מאכט חתונה, איך וועל דיר נאך שרייבן.
איך בעט דיר זייער גיי נישט וואו מען רעדט ניבול פה, גיי נישט. חכמינו זכרונם לברכה זאגן (שבת לג:) און דער רבי ברענגט דאס (ספר המדות אות ניבול פה, סימן ג): "בַּעֲווֹן נִבּוּל פֶּה צָרוֹת וּגְזֵרוֹת מִתְחַדְּשׁוֹת", צוליב די עבירה פון ניבול פה קומען אסאך צרות און נייע גזירות אויף די וועלט, "וּבַחוּרֵי יִשְׂרָאֵל מֵתִים, חַס וְשָׁלוֹם", יונגע מענטשן שטארבן, "וִיתוֹמִים וְאַלְמָנוֹת צוֹעֲקִים וְאֵינָם נַעֲנִין", יתומים און אלמנות שרייען פאר הילף און זיי ווערן נישט געענטפערט, אלעס דורך די עבירה פון ניבול פה.
וואס ווייסטו וויפיל פרנסה איז דיר אנגעשריבן און דורך רעדן ניבול פה פארלירסטו אלעס... אזוי ווי חכמינו זכרונם לברכה זאגן (שבת לג.) און דער רבי זאגט דאס (ספר המדות אות ניבול פה, סימן ד): "הַמְנַבֵּל פִּיו, אֲפִילּוּ חוֹתְמִין עָלָיו גְּזַר דִּין שֶׁל שִׁבְעִים שָׁנָה לְטוֹבָה", ווער עס רעדט ניבול פה, אפילו מען האט אים אפגעשריבן א גוטע זאך פאר זיבעציג יאר, "הוֹפְכִין עָלָיו לְרָעָה", דרייט מען עס איבער צו שלעכט, "גַּם מַעֲמִיקִין לוֹ גֵּיהִנּוֹם", דורך ניבול פה מאכט מען זיך טיפער די גיהנום, "גַּם לַשּׁוֹמֵעַ וְשׁוֹתֵק", און נישט נאר דער וואס רעדט ניבול פה, נאר אפילו דער וואס הערט אויס ניבול פה.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום ה' פרשת בחוקותי, כ"ב אייר, ל"ז לעומר, שנת תשפ"ד לפרט קטן
מיין טייערער ... נרו יאיר, לעיקוואד
שלמה המלך זאגט (משלי יג, א): "בֵּן חָכָם" א קלוגער זון, "מוּסַר אָב" האט ליב צו הערן די מוסר פון טאטן, "וְלֵץ" און א לץ, "לֹא שָׁמַע גְּעָרָה" האט נישט צוגעהערט די געשריי פון מוסר.
קען זיין, מען רעדט אויך צום טאטן, מען זאגט דעם טאטן 'אויב דו ווילסט האבן ערליכע קליגע קינדער – זאלסטו זיין מחנך זיין, לערן זיי ווי צו האבן גוטע מידות, שטראף זיי ווען זיי פירן זיך מיט חוצפה, און פארלאנג פון זיי צו לערנען און דאווענען'; דאס זאגט אונז דער פסוק, 'בֵּן חָכָם' אויב דו ווילסט א קלוגער זון, דו ווילסט ערליכע קינדער, 'מוּסַר אָב' דארף דער טאטע זיי מחנך זיין, ווייל חס ושלום אויב מען זאגט גארנישט, מען לאזט די קינדער הפקר - 'וְלֵץ' וועלן די קינדער זיין לצים - 'לֹא שָׁמַע גְּעָרָה' ווייל זיי האבן נישט געהערט קיין איין געשריי פון טאטן, מען האט זיי נישט געלערנט ווי זיך צו פירן.
ולכן, וואויל איז פאר די עלטערן וואס זענען נישט פויל ווען עס קומט צו חינוך הבנים והבנות, זיי מאכן ברכות מיט די קינדער, זיי בענטשן ברכת המזון מיט די קינדער ווארט ביי ווארט, דאווענען מיט די קינדער, ליינען קריאת שמע מיט זיי; וועלן זיי האבן אסאך נחת, והבן למעשה.
בעזרת ה' יתברך - יום א' פרשת חקת, ב' דראש חודש תמוז, שנת תשפ"ד לפרט קטן
לכבוד מיין טייערער ... נרו יאיר, קרית ברסלב
איך האב זיך זייער געפרייט דיך צו זען נעכטן ביי מלוה מלכה, איך האב פון דיר גוטע זכרונות פון ישיבה, ווי דו פלעגסט לערנען משניות און זאגן תהלים, איך וויל ווייטער האבן מיט דיר שייכות און א נאנטקייט.
טייערער ליבער ..., איך וויל דיר זייער בעטן זאלסט זיין שטארק מיט די איין זאך, מיט קומען אין שול דאווענען די דריי תפילות מיט מנין. חכמינו זכרונם לברכה זאגן (ברכות ו:) ווער עס קומט אין שול דאווענען מיט מנין – מאכט דער אייבערשטער פאר אים וואס ער דארף, "נוגה לו", דער אייבערשטער מאכט אים ליכטיג.
טייערער ... נרו יאיר, דארפסט דאך ישועות, סיי אין פרנסה, און סיי וכו', קום אין שול וועסטו זען ישועות. בעט דעם אייבערשטן: "באשעפער איך וויל קומען אין שול, באשעפער העלף מיר".
בעזרת ה' יתברך - יום ג' פרשת קרח, כ"ו סיון, שנת תשפ"ד לפרט קטן
לכבוד ... נרו יאיר
נעכטן האט זיך אנגעהויבן דער זומער זמן, איך בין געזיצן מיט די בחורים אין מחנה אילן החיים אין די וואלד צווישן די ביימער, געלערנט מיינע שיעורים כסדרן אפאר שעה, עס איז ממש טעם גן עדן. איך שפיר זיך מיט די בחורים אזוי ווי פופצן יאר צוריק ווען מען האט געעפנט די ישיבה, מיט די זעלבע התחדשות; איך האב הנאה צו זיין מיט זיי, לערנען מיט זיי, שמועסן מיט זיי פון רבי'ן און פון יראת שמים.
אויך בין איך יעדן אינדערפרי אין כולל, איך לערן מיט די כולל אינגעלייט טור בית יוסף. יעצט לערנט די כולל הלכות שבת; סימן שא, הלכות פון הוצאה. איך האב מיך אזוי מחי' געווען, די אינגעלייט לערנען מיט אזא קלארקייט, מיט אזא ישוב הדעת. נעכטן האבן מיר געלערנט די הלכה פון טלית מקופלת, זיי קענען גוט די סוגיא, זיי זענען גוט אויסגעקאכט אין דעם, ממש צו באוואונדערן.
אויך איז דא די שיעור יעדן אינדערפרי נאכן דאווענען שחרית הינטן אין וואלד צווישן די ביימער, עס איז דא אסאך אינגעלייט וואס האלטן מיט די שיעור גמרא. איך האב פון דעם נחת, צו זען ווי מוהרא"ש'ס ארבעט גייט נישט לאיבוד; מוהרא"ש האט אזויפיל געאקערט אין אונז מיר זאלן לערנען יעדן טאג דעם בלאט גמרא, דער גאנצער טאג איז אנדערש ווען מען לערנט גמרא.
שבועות האב איך געבעטן דעם אייבערשטן איך וויל ווייטער ענדיגן שרייבן דעם פירוש 'שפתי תפתח' אויפן ליקוטי מוהר"ן, א פירוש אין אידיש; ברוך ה' איך האב יעצט געענדיגט סימן ד'. איך לייג אריין יעדן טאג אפאר שעה אין דעם; דאס לערנען און דאס אפשרייבן אין אידיש אויף למעשה, אזוי ווי מוהרא"ש האט אונז געלערנט; נאר מחדש זיין חידושים אויף למעשה.
איך בעט דיר זייער זאלסט זיך פרייען מיט דעם אז דו ביסט א איד און נישט קיין גוי, דער רבי זאגט (לקוטי מוהר"ן חלק ב', סימן י) אויב מען האט א חיות און א שמחה פון דעם פרט - פון דעם קען מען נישט פאלן, ווייל וואס עס זאל נאר זיין, וואס עס זאל נאר איבערגיין אויף דיר - בלייבט מען ווייטער פרייליך, אז 'א איד בין איך, און א גוי בין איך נישט'.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום א' פרשת קרח, כ"ד סיון, שנת תשפ"ד לפרט קטן
לכבוד ... נרו יאיר
שבת בין איך געווען אין שטעטל, עס איז געווען הערליך שיין, מען האט זיך זייער מחזק געווען מיטן רבי'ן. ביי שלש סעודות האבן מיר גערעדט פון די מרגלים, ווי קען זיין אז די גרויסע מענטשן וואס די תורה זאגט (במדבר יג, ג): "כֻּלָּם אֲנָשִׁים רָאשֵׁי בְנֵי יִשְׂרָאֵל הֵמָּה" - זאלן אזוי אראפפאלן און צוקומען צו ווערן רשעים, רעדן קעגן דעם אייבערשטן?! נאר מיט די הקדמה, מיטן רבינ'ס ווערטער - קען מען דאס פארשטיין. דער רבי האט דערציילט (לקוטי מוהר"ן חלק ב, סימן קטז), ווען ער איז געווען אין ארץ ישראל האבן אים די צדיקים תלמידי המגיד ממעזריטש געזאגט, זיי האבן זיך נישט געקענט אויסמאלן איידער זיי זענען געקומען קיין ארץ ישראל - אז ארץ ישראל איז א חלק פון די וועלט, זיי האבן געמיינט אז ארץ ישראל איז עפעס א וועלט אויבן אין הימל, ווייל אלע ספרים רעדן פון איר גרויסקייט, און די תורה אליין פארציילט גאר פון איר הייליגקייט וכו'; ביז ווען זיי זענען ארויפגעקומען קיין ארץ ישראל, דאן האבן זיי געזען אז ארץ ישראל איז א פלאץ דא אויף די וועלט, עס איז נישטא קיין שום חילוק אינעם חיצוניות צווישן ארץ ישראל און אנדערע לענדער, נאר דער פנימיות פון ארץ ישראל איז גאר הייליג און גאר הויך.
מיר האבן גערעדט אז דאס קען זיין איז געווען די טעות פון די מרגלים, זיי האבן ערווארטעט צו זען עפעס, און ווען זיי האבן גארנישט געזען פון די חיצוניות האבן זיי חוזק געמאכט (במדבר ג, כז): "וְזֶה פִּרְיָהּ" דאס זענען די פרוכט? אזוי פשוט? און פון דעם זענען זיי אראפגעפאלן.
מיר האבן זיך מחזק געווען, ווען מען וויל זוכה זיין אריינצוגיין אין די קדושה, און דער רבי זאגט טו זאכן וואס זעט אויס פשוט, גיי דאווענען און לערן משניות, זאג גמרא, געב א פרוטה לצדקה; על פי רוב זענען מענטשן מזלזל אין דעם ווייל עס איז נישט אזוי עובד'יש, עס פאסט נישט צו זאגן אביסל תהלים בתמימות ופשיטות, מען זוכט עפעס העכערס, און דאס איז גורם מען זאל אראפפאלן רחמנא לצלן.
עס איז דא אסאך צו דערציילן ווי שיין עס איז געווען דעם שבת. איך בעט דיר זייער זאלסט דינען דעם אייבערשטן בתמימות ופשיטות, קום אין שול דאווענען די דריי תפילות, נעם א חומש הויב אן מעביר סדרה זיין פון היינט, פון אנהויב וואך - יעדן טאג אביסל, לערן משניות אפילו באמירה בעלמא, אזוי אויך גמרא, ועל כולם גיי זיך אויסגיסן דאס הארץ צום אייבערשטן אויף דיין אייגענע שפראך, והעולה על הכל זיי פרייליך שלא עשני גוי - וועסטו זוכה זיין צו ווערן א גרויסער צדיק.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך - יום א' פרשת חקת, ב' דראש חודש תמוז, שנת תשפ"ד לפרט קטן
לכבוד מיינע טייערע ... נרו יאיר וזוגתו תחי'
בזכות וואס ענק זענען ארויף א טרעפ אין צניעות, דיין ווייב תחי' האט זיך אנגעטון א טיכל - זאל דער אייבערשטער ענק בענטשן מיט שפע און מיט ערליכע דורות. דער רבי זאגט (ספר המדות אות בנים, סימן ט): "צְנִיעוּת שֶׁבָּאִשָּׁה מְזַכָּה לָהּ לְבָנִים הֲגוּנִים", די איידעלע פרוי איז זוכה צו גוטע ערליכע קינדער.
דיר בעט איך זאלסט דאנקען דעם אייבערשטן אז דו האסט א קלוגע איידעלע ווייב, זאלסט איר כסדר אויסלויבן.
בעזרת ה' יתברך - יום א' פרשת חקת, ב' דראש חודש תמוז, שנת תשפ"ד לפרט קטן
לכבוד מיין טייערער ליבער ... נרו יאיר, קרית ברסלב
איך בעט דיר זייער, שנייד נישט דיין הייליגע בארד און פאות. איך ווייס דו האסט יעצט א נסיון וכו', דאך בעט איך דיר פון מיין הארץ, ריר נישט אן די בארד.
דער הייליגער זוהר רופט אן די בארד (נשא קל ע"ב; עיין טעמי המצוות פרשת קדושים): "צינורות", רערן (פייפס) וואס ברענגט די שפע פון הימל צום מענטש, און אז מען שניידט עס – שטעלט זיך אפ די שפע.
מיין טייערער ... נרו יאיר, האלט זיך שטארק מיט די בארד און פיאות, נעם נישט אראפ דיין צלם אלקים, בעט דעם אייבערשטן דו זאלסט ליב האבן דיין בארד און פאות, עס זאל זיין ביי דיר הייליג.
איך האב דיך זייער ליב, איך האף דו וועסט עס נישט טון פאר מיר.
פון דיין ראש ישיבה, דיין טאטע, דיין שווער, דיין אלעס.
בעזרת ה' יתברך - יום א' פרשת חקת, ב' דראש חודש תמוז, שנת תשפ"ד לפרט קטן
לכבוד מיין טייערער ... נרו יאיר
האסט ממש געראטעוועט די זאך, שוין אפאר וואכן וואס מען האט נישט געקענט באצאלן די כולל אינגעלייט, און דו ביסט געקומען ווי א מלאך פון הימל און געגעבן צען טויזנט דאלער, און דו האסט אראפגענומען פון מיר די גרויסע דרוק.
בזכות וואס דו העלפסט אויסהאלטן לומדי תורה – זאלסטו זוכה זיין צו אלעס גוטס.
זע צו לערנען יעדן טאג דעם בלאט גמרא, וועסטו שפירן גן עדן אויף די וועלט.
בעזרת ה' יתברך - יום א' פרשת חקת, ב' דראש חודש תמוז, שנת תשפ"ד לפרט קטן
לכבוד מיין טייערער ... נרו יאיר
איך דאנק דיר בשם די גאנצע קהילה, און באזונדער דאנק איך דיר פון מיר אליין פארן מיר גרינגער מאכן מיין ארבעט, מיטן אראפנעמען די עול פון שאפן געלט פאר די רענט פון ישיבה און פון אלעס ארום.
א באזונדערע יישר כח פארן שאפן יעצט נדבנים פאר די נייע בנין אויף לינקאלן פאר בית פיגא.
און א באזונדערע דאנק פארן העלפן אין אומאן מיטן נייעם שאטער וואס מען שטעלט אויף די יאר נעבן אונזער בנין, צו קענען עסן דארט די סעודות.
מיטן מיר העלפן אז די עול פון די געלט זאל נישט ליגן אויף מיר – נעמסטו א חלק אין אלעס וואס מיר טוען; דיין זכות איז זייער גרויס.
בעזרת ה' יתברך - יום א' פרשת חקת, ב' דראש חודש תמוז, שנת תשפ"ד לפרט קטן
מרת ... תחי', קרית ברסלב
איך האב ערהאלטן אייער בריוו.
איך האב געהאט טרערן אין מיינע אויגן ביים ליינען אייער בריוו, ווי איר פארציילט מיר די גוטע נייעס אז איר האט אויפגעגעבן אייער סמארטפאון און זיך געקויפט א פשוט'ע טעלעפאן, בזכות די חיזוק פון די וועכנטליכע פרויען שיעורים.
דער אייבערשטער זאל אייך העלפן איר זאלט קענען אויפציען ערליכע אידישע דורות, די שכינה זאל רוען ביי אייך אין שטוב, און עס זאל זיין נאר ברכה והצלחה.
