בריוון פונעם ראש ישיבה שליט"א

#24 - מען קען זיין אין ישיבה אפילו מען איז נישט אין ישיבה
ישיבה

בעזרת ה' יתברך


יום ג' פרשת ואתחנן, י"ב מנחם-אב, שנת תשע"ט לפרט קטן


 


לכבוד מיין טייערער ... נרו יאיר.


איך האב ערהאלטן דיין נדבה פאר די ישיבה, יישר כח.


איך בין זייער פרייליך יעדעס מאל איך זע דיר קומען אין ישיבה; הלוואי וואלסטו געקומען מער אפט.


יעדעס מאל ווען דו ענדיגסט ארבעטן זאלסטו קומען אין ישיבה זיך אויפפרישן מיט די עצות פון רבי'ן.


מען קען זיין אין ישיבה אפילו מען איז נישט אין ישיבה; אפילו מען איז ארויס פון ישיבה, מען איז געגאנגען ארבעטן וכדומה – קען מען זיין ווייטער אין ישיבה, אז מען טוט דאס וואס מען לערנט אין ישיבה; מען לערנט אביסל חומש רש"י יעדן טאג, פרקים משניות און גמרא, אזוי אויך דאווענט מען שחרית, מנחה און מעריב מיט מנין, מען איז פרייליך און מען מאכט אלעמען פרייליך – דאן איז מען א תלמיד הישיבה.


שטארק זיך, דער אייבערשטער איז מיט דיר, ביי דיר און נעבן דיר.

#23 - יעדער האט ארויסגעכאפט א ששה סדרי משנה
לימוד התורה, ישיבה

בעזרת ה' יתברך


יום ג' פרשת במדבר, ראש חודש סיון, שנת תשע"ט לפרט קטן


 


לכבוד מיין טייערער ליבער... נרו יאיר.


איך האב ערהאלטן דיין נדבה פאר די ישיבה, יישר כח.


איך האף אז דו ביסט מסודר און איך האף אז דו פירסט זיך ווייטער מיט די לימודים וואס דו האסט ארויסגעכאפט פון ישיבה.


ברוך ה' געלויבט דעם אייבערשטן אז איך האב נאך קיינעם נישט פארפירט; יעדע בחור וואס האט זיך דא דורכגעדרייט האט ארויסגעכאפט א ששה סדרי משנה, געענדיגט חמשה חומשי תורה; דו אליינס האסט זוכה געווען צו לערנען און ענדיגן משניות כמה פעמים, און כמה מסכתות הש"ס.


איך זע אז דו קומסט נישט לעצטנס אין ישיבה, די גאס זעט דיר אויס מער "גלאנציג און בליטשקעדיג"; הלואי זאלסטו צוריק קומען אין די הייליגע ישיבה וואו מען חזר'ט אמונה ויראת שמים, אדער כאטשיג ארויפקומען מפעם לפעם.


פון דיין ראש ישיבה וואס האט דיר ליב.

#22 - יעדע זאך וואס דו טוסט אין ישיבה, וועט דיר בלייבן פאר אן אייביגע זכות
ישיבה, משמש דעם רבי'ן

בעזרת ה' יתברך


יום א' פרשת אחרי ב', אסרו חג, כ"ג ניסן, שנת תשע"ט לפרט קטן


 


 לכבוד מיין טייערער ... נרו יאיר, תלמיד ישיבה תפארת התורה.


איך האב ערהאלטן דיין נדבה פאר די ישיבה, יישר כח.


וויסן זאלסטו אז יעדע זאך וואס דו טוסט אין ישיבה, אנגעהויבן מיט'ן רייניגן, מסדר זיין, פאררעכטן וכו', וכו' – וועט דיר בלייבן פאר אן אייביגע זכות.


חכמינו זכרונם לברכה  זאגן (ברכות ז:): "גְּדוֹלָה שִׁמּוּשָׁהּ יוֹתֵר מִלִּמּוּדָהּ", ווען מען איז משמש א צדיק איז דאס אסאך מער ווי ווען מען לערנט תורה פונעם צדיק; ווייל מיט דעם וואס מען איז משמש דעם צדיק ווערט מען א כלי לקבל די יראת שמים און די שכל פונעם צדיק.


דאס וואס דו טוסט האב איך געטון לאנגע יארן, סיי אלץ בחור ביי מיין זיידע; איך האב לאנגע יארן געוואשן דעם בית המדרש און מסדר געווען די ספרים, אזוי אויך פארראכטן און אלעס געטון פאר'ן בית המדרש. אויך ווען איך בין מקורב געווארן צום רבי'ן און איך האב אנגעהויבן דאווענען אין בית המדרש "היכל הקודש" אין וויליאמסבורג פלעג איך מיט ... נרו יאיר יעדע וואך וואשן לכבוד שבת דעם בית המדרש און די בית הכסא'ס, וכו' וכו'; קיינער האט מיר נישט געבעטן דאס צו טון און קיינער האט נישט געוויסט אז מיר פלעגן דאס טון פאר לאנגע יארן. מיר האבן געשפירט ווי מיר טוען די עבודה אין בית המקדש.


חכמינו זכרונם לברכה זאגן (משנה תמיד ב, ב): "מִיָּמָיו לֹא נִתְעַצֵּל הַכֹּהֵן מִלְּהוֹצִיא אֶת הַדָּשֶׁן", עס האט קיינמאל נישט פאסירט אז מען זאל דארפן בעטן די כהנים זאלן רייניגן דעם מזבח.


דעריבער בעט איך דיר זייער, שטארק זיך ווייטער צו העלפן שיין מאכן די ישיבה, חדר און מיידל סקול, העלף מיר אויפשטעלן מוסדות וואו מיר זענען מחנך אונזערע קינדער מיט די ריינע אמונה. אין דעם זכות וועסטו בקרוב זוכה זיין צו א גוטע שידוך.


זיי מיר מודיע יעדע סיום וואס דו מאכסט; מיין גאנצע חיות איז צו הערן פון נאך א תלמיד אז ער לערנט און איז מסיים מסכתא נאך מסכתא.


פון דיין ראש ישיבה.


...

#21 - ביסט געווארן א נייער מענטש זייט דו ביסט אריינגעקומען אין ישיבה
לימוד התורה, תפילה והתבודדות, בחור, שידוכים, ישיבה, סיום

בעזרת ה' יתברך


יום א' פרשת אחרי ב', כ"ג ניסן, שנת תשע"ט לפרט קטן


 


לכבוד מיין טייערער ... נרו יאיר, תלמיד ישיבת תפארת התורה.


איך האב ערהאלטן דיין בריוו.


איך וויש מיר מיינע אויגן צו זען אויב איך זע גוט... די פילע סיומים וואס דו האסט געמאכט, וואס דו האסט אלץ געלערנט במשך די האלבע יאר זייט דו האסט אנגעהויבן לערנען אויפן סדר דרך הלימוד (כמבואר בשיחות הר"ן, סימן עו); הונדערטער פרקים משניות, הונדערטער דפים גמרא און אלע ספרים פון רבי'ן.


וואס זאל איך דיר זאגן, מיר האבן זיך נישט מיט וואס צו שעמען פון קיין שום אנדערע חסידות און פון קיין שום אנדערע פלאץ ווען מיר קוקן זיך אן און זעען וואס דער רבי האט אונז אלץ געגעבן און וואס ער געבט אונז ווייטער; אשרינו מה טוב חלקינו ומה נעים גורלינו 'אשר בנחל' שם חלקינו וגורלינו, אז מיר געפונען זיך אין אזא הייליגע פלאץ "היכל הקודש קודש קדשים", א פלאץ וואס מען ווערט אנגעפולט מיט תורה, מיט אמונה און מיט מידות טובות.


דיין ברודער האט מיר דערציילט אז דיין טאטע האט אים געזאגט אויף דיר אז ער שעפט פון דיר פיל נחת; אלע זאגן פה אחד אז זייט דו ביסט אריין געקומען אין ישיבה ביסטו געווארן א נייער מענטש, פול מיט דרך ארץ וכו' וכו'. ביי דיר איז ממש מקיום געווארן וואס שלמה המלך זאגט (משלי טז, ז): "בִּרְצוֹת ה' דַּרְכֵי אִישׁ, גַּם אוֹיְבָיו יַשְׁלִם אִתּוֹ", ווען דער אייבערשטער איז מרוצה פון א מענטש מאכט דער אייבערשטער אז אפילו די פיינט פונעם מענטש זאלן אים העלפן; די אלע וואס האבן דיר מונע געווען פון מקורב ווערן צום רבי'ן אלע זאגן אויף דיר און זענען מודה אז דו ביסט אויף א גוט פלאץ.


זארג נישט פאר דיין שידוך; אז דו וועסט זיך פירן מיט יראת שמים וועסטו טרעפן א גוטע שידוך. מוהרא"ש פלעגט שטענדיג זאגן פאר אנשי שלומינו ווען זיי האבן געהאלטן ביי א שידוך טון מיט א טאכטער און זיי האבן געוואלט וויסן אויף א בחור צי ער איז אן ערליכער בחור צי נישט, אז זיי זאלן גיין קוקן ווי אזוי דער בחור דאוונט; אויב דער בחור דאוונט אזוי ווי עס דארף צו זיין, ער דאוונט אין א סידור, ער שטייט אויף איין פלאץ פון אנהייב דאווענען ביזן סוף דאווענען, ער דריידט זיך נישט ארום און ער שמועסט נישט קיין איין ווארט ביים דאווענען, דאס ווייזט אז דער בחור האט יראת שמים, אבער אויב דריידט ער זיך א גאנצן דאווענען אהער און אהין איז א סימן אז ער איז אינו מן הישוב.


נעם זיך פאר נישט צו רעדן ביים דאווענען; דאוון מיט'ן בעל תפילה פון אדון עולם ביז אדון עולם וועסטו זיך מאכן א גוטע נאמען און זוכה זיין צו א גוטע שידוך.


דער אייבערשטער זאל העלפן זאלסט האבן הצלחה אין אלע ענינים.

#20 - די גרויסע זכות פון העלפן די ישיבה
צדקה, ישיבה

בעזרת ה' יתברך


יום ד' פ' יתרו, י"ז שבט, יומא דהילולא של מוהרא"ש זצוק"ל שנת תשע"ט לפ"ק


 


מרת ... תחי'.


א גרויסן דאנק פאר'ן העלפן די ישיבה מיטן צושטייער געבן פאר די רענט פון דעם חודש ... דאללער; דער אייבערשטער זאל ענק העלפן אז בזכות די צדקה זאלט איר זוכה זיין צו מצליח זיין אין אלע וועגן.


איך שפיר ווי איך דארף אייך שרייבן אז עס איז שוין א לענגערע צייט וואס אייער מאן העלפט מיר מיט אזא געטריישאפט, ער נעמט צוזאם פון אלע תלמידים חודש'ליך געלט צו קענען צאלן די רענט פון די בנין הישיבה וואס קאסט מיר לעת עתה פופצן טויזנט דאללער א חודש, און צוגאב צו דעם - די רענט פון די סקול וואס קאסט פיר טויזנט דאללער.


איר ווייסט דאך אוודאי וויפיל בחורים זענען געראטעוועט געווארן דא אין ישיבה און וויפיל משפחות זענען אויפגעשטעלט געווארן בזכות די ישיבה; ווען איך וואלט געהאט די לחץ אויף מיין קאפ צו דארפן צאלן דאס אלעס וואלט איך נישט געקענט געבן די שיעורים און שרייבן די בריוון.


איר מיט אייער מאן נרו יאיר נעמען א חלק אין אלע גוטע זאכן וואס ווערן געטון דא אין ישיבה וכו'.


איך וואונטש אייך איר זאלט נאר האבן גליק און נחת פון אייערע קינדער, מיט אלעס גוט'ס.


א גריס פון אייער מאן נרו יאיר, ווען ער ארבעט נישט כאפט ער זיך אריין אין ישיבה מיט א חומש, א משניות וכו'.

#19 - מ'מוז זיך האלטן מיט אן ערליכע חבורה
חברים, ישיבה

בעזרת ה' יתברך


יום ד' פ' יתרו, י"ז שבט, יומא דהילולא של מוהרא"ש זצוק"ל שנת תשע"ט לפ"ק


 


לכבוד מיין טייערער ... נרו יאיר.


א גרויסן יישר כח פאר'ן העלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל העלפן אז בזכות די צדקה זאלסטו זוכה זיין צו מצליח זיין אין אלע דיינע וועגן.


נאכ'ן דיר נישט זען אזוי לאנג און נישט הערן פון דיר האב איך זיך זייער שטארק געפריידט דיר צו זען פאריגע וואך ביים ליל שישי שיעור; אינמיטן שיעור האב איך דיר באמערקט און זיך זייער שטארקט געפריידט. איך האב געוואלט רעדן מיט דיר נאכ'ן שיעור אבער איך האב געדארפט אהיים גיין.


וויל איך דיר זאגן אז עס איז זייער וויכטיג זיך צו האלטן אין א חבורה פון ערליכע אידן; עס מוז נישט זיין דוקא אונזער חבורה "היכל הקודש", אבער מען מוז האבן א חבורה פון ערליכע חברים וואו מען געהערט און וואו מען איז זיך מחזק.


עס טוט מיר זייער וויי צו זען אז תלמידים קומען נישט נאך די חתונה ווייטער אין ישיבה, מען ווערט אריינגעטון אין זוכן פרנסה וכו' וכו' ביז מען קילט זיך אפ; נישט דוקא אז מען קומט נישט אין ישיבה, נאר דאס אז מען לעבט אליינס אן גוטע חברים – דאס איז נישט גוט.


דערפאר יעצט ווען איך האב דיר געזען ביים שיעור ליל שישי האב איך געהאט א מורא'דיגע שמחה, זעענדיג אז דו האסט נאך א געפיל אין רבי'ן.


איך האב דיר ליב; איך וויל רעדן מיט דיר.

#18 - איך ווארט צו רעדן מיט דיר
ישיבה

בעזרת ה' יתברך


ערב שבת קודש פרשת יתרו, י"ט שבט, שנת תשע"ט לפרט קטן


 


לכבוד מיין טייערער ... נרו יאיר.


א גרויסן יישר כח פארן העלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל העלפן אז בזכות די מצוה פון צדקה זאלסטו מצליח זיין אין אלע דיינע וועגן.


איך האב זיך זייער געפרייט דיר צו זען ביי די יארצייט סעודה פון מוהרא"ש זכר צדיק לברכה.


איך האב געוואלט רעדן מיט דיר, פארוואס ביסטו נישט צוגעקומען מיר באגריסן? איך בענק מיר אזוי שטארק דיר צו זען, ענדליך זע איך דיר אין ישיבה וואו דו האסט פארברענגט דיינע יונגע יארן.


איך האף אז דו לערנסט נאך יעדן טאג חומש מיט אביסל משניות, דורכדעם וועסטו האבן הצלחה.

#17 - שפירט דערווייטערט פון די ישיבה
הפצה, ישיבה, רענט

בעזרת ה' יתברך


יום ב' פרשת בא, ראש חודש שבט, שנת תשע"ט לפרט קטן


 


לכבוד מיין טייערער ... נרו יאיר.


א גרויסן יישר כח פארן העלפן די ישיבה מיטן געבן פאר די רענט פון דעם חודש ... דאללער; בזכות די צדקה זאלסטו מצליח זיין אין אלע ענינים.


דו האסט מיר נעכטן געזאגט אז דו שפירסט זיך דערווייטערט פון ישיבה וכו'.


חכמינו זכרונם לברכה זאגן (ירושלמי פאה א, א) אויפן פסוק (דברים לב, מז): "כִּי לֹא דָבָר רֵק הוּא מִכֶּם - וְאִם הוּא רֵיק - מִכֶּם", איז דאס פון ענק; דאס ווענדט זיך אין דיר אליינס. אסאך תלמידים שפירן אזא הרגשה נאכדעם וואס זיי גייען ארויס פון ישיבה, זיי דארפן עוסק זיין אין ברענגען פרנסה, ממילא קומט מען ווייניגער ארויף, הייבט מען זיך אן שפירן דערווייטערט, אבער דאס האט נאר מיט'ן מענטש אליינס.


דערפאר גיב איך דיר אן עצה, דו זאלסט עוסק אין הפצה; זאלסט מפיץ זיין פאר אידישע קינדער דעם רבינ'ס עצות, אזוי וועסטו זיין מחובר.


קוק גוט וועסטו זען אז די אלע "תלמידי היכל הקודש" וואס האבן גענומען "הפצה" פאר זייער לעבן, די אלע זענען פריש און ניי.


איך האב דאס געזען ביי די פטירה פון מוהרא"ש זכר צדיק וקדוש לברכה; די אלע תלמידים וואס זענען עוסק אין הפצה זענען נישט צעטומלט געווארן פון גארנישט, ביי די לוי' אליינס זענען זיי גאגאנגען הפצה.


אבער די אלע וואס זענען בבחינת מקבלים זענען געווארן אזוי צעבראכן, אפילו היינט ווען עס איז שוין אריבער אפאר יאר זייט די הסתלקות פון מוהרא"ש זענען זיי נאך אלץ בעצבות – ה' ישמרינו.


זיי א משפיע וועסטו שטענדיג זיין פריש און באהאפן צום רבי'ן.

#16 - יעדער תלמיד איז ביי מיר ווי אן אייגן קינד
אמונה, ישיבה

בעזרת ה' יתברך


יום ב' פרשת וארא, כ"ג טבת, שנת תשע"ט לפרט קטן


 


לכבוד מיין ליבער תלמיד ... נרו יאיר.


איך האב ערהאלטן דיין בריוו.


איך געדענק נישט פונקטליך וואס מיר האבן גערעדט וכו', אבער איך בין נישט מוותר אויף קיין איין תלמיד; יעדער תלמיד וואס האט געלערנט אין ישיבה איז ביי מיר ווי אן אייגן קינד.


געלויבט דעם אייבערשטן אז עס ווערן נתרבה תלמידים, אינגעלייט וכו' אין די הונדערטער'ס וואס זענען זיך מחי' מיט די דיבורים פון הייליגן רבי'ן; אבער ביי מיר זענען די תלמידים פון ישיבה מער חשוב ווי אלעס. די וואס האבן געלערנט אין ישיבה דורכאויס זייערע בחור'ישע יארן – דאס איז אן ענין אחר לגמרי, ממש ווי מיינע קינדער.


דאס האב איך דיר געשריבן; אז איך וויל דו זאלסט ווייטער קומען צו די שיעורים און זיין א טייל פון אזא פלאץ וואו עס קאכט די אמונה.


א גרויסן יישר כח פארן העלפן די ישיבה מיטן געבן פאר די רענט פון דעם חודש ... דאללער; בזכות די צדקה זאלסטו מצליח זיין אין אלע דיינע וועגן.

#15 - דער יצר הרע פארלייגט זיך אויף יעדן מיט אנדערע סארט בלבולים
שמחה, משניות, ישיבה, נסיונות, התרחקות

בעזרת ה' יתברך


יום ג' פרשת ויחי, י' טבת, שנת תשע"ט לפרט קטן


 


לכבוד מיין טייערער ... נרו יאיר, תלמיד ישיבת תפארת התורה.


איך האב ערהאלטן דיין בריוו.


איך פריי מיר זייער צו הערן אז דיין לעבן האט זיך געטוישט צום גוטן זייט דו ביסט אריין געקומען אין ישיבה, דו שרייבסט מיר אז דו האסט באקומען א נייע הארץ און דו ווילסט שוין היינט טון נאר גוטס. דאס איז גענוי וואס פאסירט מיט א מענטש ווען ער ווערט מקורב צום רבי'ן; דער הייליגער רבי נעמט אוועק פון אים דער "לב האבן" און פלאנצט אים איין אנשטאט דעם א "לב בשר" אזוי ווי עס שטייט (יחזקאל לו, כו): "וְנָתַתִּי לָכֶם לֵב חָדָשׁ וְרוּחַ חֲדָשָׁה אֶתֵּן בְּקִרְבְּכֶם, וַהֲסִרֹתִי אֶת 'לֵב הָאֶבֶן' מִבְּשַׂרְכֶם וְנָתַתִּי לָכֶם 'לֵב בָּשָׂר'"; לב בשר איז די זעלבע אותיות ווי ברסלב (עיין חיי מוהר"ן, סימן שלט).


שטארק דיר ווייטער בלימוד משניות און פרוביר צו זאגן יעדן טאג ח"י פרקים משניות. משניות האט אין זיך א געוואלדיגע כח אז עס נעמט ארויס פונעם מענטש אלע שלעכטס און מאכט די נשמה ריין און לויטער, אזוי אויך האט משניות א כח ארויס צו שלעפן א מענטש אפילו ער איז שוין אראפ געפאלן אין טיפן אפגרינד און ער ליגט אין שאול תחתית. מוהרא"ש פלעגט כסדר זאגן אז די ראשי תיבות פון (תהלים ל, ד): "הֶ'עֱלִיתָ מִ'ן שְׁ'אוֹל נַ'פְשִׁי" איז משנה; דאס הייסט אז א מענטש זאגט משניות נעמט עס אים ארויס פון שאול תחתית.


איך פריי מיר זייער אז דו ביסט שוין ארויס געקראכן פון דיין דעפרעשן און דו שטארקסט דיר מיט אלע כוחות צו זיין פרייליך, אזוי ווי דער הייליגער רבי זאגט (ליקוטי מוהר"ן, חלק ב', סימן כה): "מִצְוָה גְּדוֹלָה לִהְיוֹת בְּשִֹמְחָה תָּמִיד", עס איז א גרויסע מצוה צו זיין שטענדיג פרייליך, "וּלְהִתְגַּבֵּר לְהַרְחִיק הָעַצְבוּת וְהַמָּרָה שְׁחֹרָה בְּכָל כֹּחוֹ", און זיך אנשטרענגען אוועק צו נעמען פון זיך די עצבות און מרה שחורה מיט אלע כוחות. "וְכָל הַחוֹלַאַת הַבָּאִין עַל הָאָדָם, כֻּלָּם בָּאִין רַק מִקִּלְקוּל הַשִֹֹּמְחָה", אלע מחלות און קרענק וואס קומען אויפן מענטש קומט פון עצבות און מרה שחורה. דער רבי זאגט דארט ווייטער: "וְגַם חַכְמֵי הָרוֹפְאִים הֶאֱרִיכוּ בָּזֶה, שֶׁכָּל הַחוֹלַאַת הַבָּאִין עַל הָאָדָם, כֻּלָּם בָּאִין רַק מִקִּלְקוּל הַשִֹֹּמְחָה", אויך די דאקטורים זענען מודה אז אלע פראבלעמען און קרענק קומען פון נישט זיין פרייליך, און שמחה איז א רפואה פאר אלע קרענק; ווען א מענטש איז פרייליך נעמט ער אוועק פון זיך אלע צרות און יסורים.


דאס וואס דו שפירסט אז איך דארף דיר נישט און דו שפירסט זיך איבעריג אין ישיבה; זאלסטו וויסן אז דאס איז נאך א וועג פונעם יצר הרע צו צעברעכן דעם מענטש און אים אוועק שלעפן פונעם צדיק, ער טוט דאס מיט יעדן וואס וויל מקורב ווערן צום רבי'ן.


איך וועל דיר דערציילן א מעשה וואס וועט דיר געבן שטארקע חיזוק, ווען רבי יודל זכרונו לברכה איז מקורב געווארן צום הייליגן רבי'ן האט מען אים געזאגט אז דער רבי איז ברוגז אויף אים, ר' יודל האט נישט געוויסט אז דאס קומט פונעם יצר הרע וואס טוט אלע פעולות צו מרחק זיין דעם מענטש פונעם צדיק, האט ער מורא געהאט אריין צו גיין צום רבי'ן צו דערגיין וואס עס גייט פאר. נאך דריי טעג האט ער זיך שוין נישט געקענט איינהאלטן פון זען דעם רבי'ן, האט ער געטראכט צו זיך: 'זאל זיין וואס זאל זיין, איך מוז אריין גיין צום רבי'ן', דער רבי האט פארשטאנען ברוח קדשו די נסיונות וואס ר' יודל גייט אריבער, גלייך ווען ר' יודל איז אריין געקומען צום רבי'ן האט אים דער רבי געזאגט: "ווען א מענטש וויל מקורב ווערן צום אמת דעמאלט איז זיך דער שקר מתגבר אויפן מענטש, און אז דער מענטש שטארקט זיך אויפן שקר, ער צעברעכט דעם שקר דעמאלט ווערט פון 'שֶׁקֶר' – 'קֶשֶׁר'", און דער רבי האט אויסגעפירט: "דו וועסט שוין בלייבן מקושר צו מיר דיין גאנצע לעבן".


זעט מען פון דעם ווי דער יצר הרע פארלייגט זיך אויף יעדן איינעם באזונדער אים מבלבל צו זיין מיט כל מיני בלבולים און כל מיני מחשבות זרות, אבי ער זאל אפלאזן דעם רבי'ן, דערפאר דארף מען אסאך בעטן דעם אייבערשטן אז מען זאל מאכן פון שֶׁקֶ"ר א קֶשֶ"ר שֶׁל קַיָּמָא נישט אפצולאזן דעם הייליגן רבי'ן.


איך האב דיר ליב.

#14 - בלייב אין ישיבה און קום אין ישיבה יעדן טאג
בחור, ישיבה, רענט

בעזרת ה' יתברך


יום ג' פרשת וישב, י"ט כסליו, שנת תשע"ט לפרט קטן


 


לכבוד מיין טייערער ... נרו יאיר.


א גרויסן יישר כח פארן ארויסהעלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל דיר העלפן אז אין זכות פון די מצוה פון צדקה זאלסטו מצליח זיין אין אלע דיינע וועגן.


בלייב אין ישיבה און קום אין ישיבה יעדן טאג; גיי נישט נאך די בחורים וואס גייען אוועק פון ישיבה צו ארבעטן, דו וועסט נאך גענוג ארבעטן אין לעבן.


גיי נאך די וועגן פון דיינע ברידער; אלע פון זיי האבן געהאלפן די ישיבה אז עס זאל אנגיין מיט הצלחה, האט דער אייבערשטער זיי געגעבן הצלחה.


העלף מיר דרייוון די קינדער פון תלמוד תורה און מיידל סקול; בוי אויף די מוסד וואו דו וועסט עווענטועל שיקן דיינע קינדער.


וואויל איז דיר אז דו האסט נישט א סמארטפאון מחובר צום אינטערנעט; דער אייבערשטער זאל דיר געבן כח צו בלייבן פעלזן פעסט נישט צו האבן אינטערנעט ביי דיר.


...

#13 - לערנען פלייסיג איז כיבוד אב ואם
אומאן, כיבוד אב ואם, ישיבה, רענט

בעזרת ה' יתברך


יום ג' פרשת וישב, י"ט כסליו, שנת תשע"ט לפרט קטן


 


לכבוד מיין טייערער ... נרו יאיר.


יישר כח פארן ארויסהעלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל דיר העלפן אז אין דעם זכות זאלסטו מצליח זיין אין אלע דיינע וועגן.


ווי אויך וויל איך דיר דאנקען פארן מיר העלפן צוזאמשטעלן געלט איך זאל קענען ארויסגיין פון די חובות וואס איך האב פונעם בנין אין אומאן; איך וואונטש דיר דו זאלסט טרעפן דיין זיווג בקרוב בזכות די מצוות צדקה.


... היקר והנחמד, איך האב זייער הנאה אז דו האסט געביטן דיין סדר היום, דו קומסט אינדערפרי און מען זעט דיר מער און בית המדרש, ווי אויך אז דו לערנסט גמרא מיט משניות. אין דעם זכות וועסטו טרעפן א גוטע שידוך.


זיי מכבד דיין טאטע, אבער פון דער אנדערער זייט זאלסטו געדענקען וואס "כבד את אביך" מיינט; "כבד את אביך" מיינט אז דו וועסט לערנען פלייסיג, דאווענען, האבן יראת שמים און גוטע מידות.


א פרייליכן חנוכה.


פון דיין ראש ישיבה.


...

#12 - הלואי זאל מען אריינברענגען אין מענטשן חתונה צו מאכן ביליג
הכרת הטוב, חתונה, ישיבה, אידיש געלט, רענט

בעזרת ה' יתברך


יום ג' פרשת וישב, י"ט כסליו, שנת תשע"ט לפרט קטן


 


לכבוד מיין טייערער ליבער חתן ... נרו יאיר.


דיין שוואגער האט מיר געבעטן איך זאל העלפן צוזאמשטעלן געלט פאר דיין טאטע יעצט ווען ער מאכט חתונה.


איך וועל דיר זאגן דעם אמת, אז איך אליינס דערטרענק זיך אין חובות פון די ישיבה, מוסד וכו' וכו', אבער איך האב א גרויסע הכרת הטוב פאר דיין טאטע שליט"א.


יארן צוריק, ראש חודש ניסן שנת תש"ע ווען די רבנים האבן זיך צוזאמגעזעצט דן זיין איבער דעם עקזיסטענץ פון די ישיבה איז דיין טאטע געקומען און געהאקט אויפן טיש ווען ער האט דערביי געשריגן צו די רבנים וכו' און דאס האט אסאך צוגעגעבן אז זיי זאלן נישט ארויסקומען מיט א "קול קורא" אנטקעגן די ישיבה.


איך האב געמאכט א ווינט ביי די תלמידים פון ישיבה אז זיי זאלן חתונה האבן אין ישיבה, אזוי האט מען נישט קיין חובות. מען מאכט די חתונה מיט א אידישן טעם מלא חן; הלוואי זאל איך דאס קענען אריינברענגען ביי אלעמען, אז מען זאל פראווען א שמחה בשעת מען פריידט זיך "באמת".


יעצט אז דו ביסט אין וויליאמסבורג וויל איך דיר מחזק זיין צו קומען אינדערפרי צו די שיעור אין גמרא, ווייל אויב מען הייבט אן דעם טאג מיט א בלאט גמרא איז דער גאנצער טאג אן אנדערע טאג.


א גרויסן יישר כח פארן ארויסהעלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל דיר העלפן אז אין דעם זכות זאלסטו מצליח זיין אין אלע דיינע וועגן.


...

#11 - נישטא וואס צו טון פאר א שידוך, נאר תפלה
שידוכים, ישיבה, רענט

בעזרת ה' יתברך


יום א' פרשת וישב, י"ז כסליו, שנת תשע"ט לפרט קטן


 


לכבוד מיין טייערער ליבער הארציגער ... נרו יאיר.


מזל טוב פאר דיין שוועסטערס שידוך.


זייער קלוג האסטו געטון אז דו האסט פארגעשלאגן פאר דיינע עלטערן אז זיי זאלן אויסהערן שידוכים פאר דיינע שוועסטערס בשעת וואס דו האסט נאכנישט זוכה געווען צו טרעפן דיין זיווג; איין שוועסטער האט שוין חתונה געהאט, יעצט איז נאך א שוועסטער א כלה געווארן, און אם ירצה ה' יעצט וועט קומען דיין רייע צו טרעפן דיין שידוך.


אחי היקר, עס איז נישט דא וואס צו טון ווען עס קומט צו טרעפן א שידוך – נאר תפילה, נאכאמאל תפילה, נאכאמאל תפילה און ווארטן און האפן לישועת ה'.


איך בעט דיר טייערער ברודער קום אין ישיבה; האלט זיך יונג און פריש. איך ווארט יעדן טאג אויף דיר, קוק נישט אויף דעם אז עס איז נאר געבליבן יונגע בחורים, קום צו מיר און קוק נישט אויף קיינעם; ווילאנג דו האסט חיזוק פון דיין ראש ישיבה זאל דיר גארנישט אנגיין.


איך בין יעצט אין הימל העכער די וואלקענעס; איך שרייב דיר פונעם עראפלאן אויפן וועג קיין אומאן צום רבינ'ס ציון וואו איך וועל דאווענען פאר דיר, אבער האלט זיך שטארק.


איך דאנק דיר פארן ארויסהעלפן די ישיבה מיטן געבן פאר די רענט פון דעם חודש ... דאללער; אין דעם זכות זאלסטו האבן הצלחה אין אלע דיינע ענינים.


...

#10 - איך פריי מיך ווען איך זע דיר אין ישיבה
הפצה, ישיבה, רענט

בעזרת ה' יתברך


יום ד' פרשת וישלח, י"ג כסליו, שנת תשע"ט לפרט קטן


 


לכבוד מיין טייערער ... נרו יאיר.


איך בין יעצט אין הימל העכער די וואלקענעס אויפן וועג קיין ארץ ישראל.


איך וועל בעטן פאר דיר און פאר דיין משפחה ביי מוהרא"ש; איך וועל דערציילן פאר מוהרא"ש ווי פלייסיג דו גייסט הפצה.


טייערער ... נרו יאיר, איך פריי מיך זייער שטארק יעדעס מאל ווען איך זע דיר אין ישיבה.


א גרויסן יישר כח פארן העלפן די ישיבה מיטן צושטייער געבן פאר די רענט פון דעם חודש ... דאללער; דער אייבערשטער זאל דיר העלפן אין דעם זכות אז דו זאלסט מצליח זיין אין אלע דיינע וועגן.


...

#9 - כאטש ביסט נישט אין ישיבה, קום ארויף צו א שיעור
פרנסה, ישיבה, רענט

בעזרת ה' יתברך


יום ד' פרשת וישלח, י"ג כסליו, שנת תשע"ט לפרט קטן


 


לכבוד מיין טייערער ... נרו יאיר.


איך פריי מיך זייער צו זען דיין נאמען צווישן די וואס העלפן חודש'ליך די ישיבה; דער אייבערשטער זאל העלפן אז בזכות די צדקה זאלסטו זוכה זיין צו מצליח זיין אין אלע דיינע וועגן.


איך בענק מיך נאך דיר...; איך פארשטיי אז דו ביסט ארויס פון ישיבה און דו ביסט געגאנגען ארבעטן וכו', מיט דעם אלעם וועל איך זיך זייער פרייען דיר צו זען אמאל ביי א שיעור.


דו ווייסט דאך וואס מיר רעדן ביי די שיעורים; נאר שיינע עצות און ווארימע דיבורים וואס העלפט דעם מענטש אינעם טאג טעגליכן לעבן.


דיין ראש ישיבה.


...

#8 - קום אמאל ארויף אין ישיבה
ישיבה, רענט

בעזרת ה' יתברך


יום ד' פרשת וישלח, י"ג כסליו, שנת תשע"ט לפרט קטן


 


לכבוד מיין טייערער ... נרו יאיר.


 איך דאנק דיר פארן העלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל העלפן אז בזכות די צדקה זאלסטו זוכה זיין צו מצליח זיין אין אלע דיינע וועגן.


איך בענק מיר צו דיר און צו הערן וואס דו מאכסט; איך האב דיר ליב טייערער ... נרו יאיר.


קום אמאל ארויף אין ישיבה; אמאל פלעגסטו זיך אריבערכאפן אינמיטן טאג ביי לאנטש, דו פלעגסט ארויף קומען אין ישיבה זאגן אביסל תהלים, עס האט געהאט אלע טעמים.


... טייערער, שטארק דיר און זיי שטאלץ מיט דיין אידישקייט – וועסטו טרעפן א גוטע שידוך.


וואס דו דארפסט זאלסטו בעטן פונעם אייבערשטן.


דיין ראש ישיבה.


...

#7 - דיין זון זאל מיט לערנען הלכות שבת
הלכה, ישיבה, רענט

בעזרת ה' יתברך


יום ד' פרשת וישלח, י"ג כסליו, שנת תשע"ט לפרט קטן


 


לכבוד מיין טייערער חבר הר"ר ... שליט"א.


א גרוס פון דיינע טייערער ליכטיגע קינדער, בפרט דיין זון הבחור ... נרו יאיר; ער פירט זיך מיט יראת שמים, ער דאווענט ערליך און ער לערנט פלייסיג.


איך האב אויפגענומען א מגיד שיעור וועלכער זאל פארלערנען הלכה, יעצט לערנט מען הלכות שבת – די סימנים הקטנים; איך האב זייער שטארק חשק אז דיין זון זאל מיט לערנען די הלכות. איך מאך דאס בתורת התנדבות, נאכדעם וואס דער מגיד שיעור האט מיר געזאגט אז ער קען נאר פארלערנען אויב ס'איז בתורת התנדבות, ווייל אויב איז א מוז פאר אלע בחורים צו קומען הייבט זיך אן "מעשה ישיבה" און מען קען שטערן ביים שיעור.


איך האב שוין געשריבן פאר דיין ווייב תחי' אז זי זאל מחזק זיין דיין זון ... נרו יאיר ער זאל זיין פון די וואס באטייליגן זיך ביים הלכה שיעור, עס נעמט אינגאנצן א דריי פערטל שעה.


איך דאנק דיר פארן העלפן די ישיבה מיטן געבן פאר די רענט פון דעם חודש ... דאללער; דער אייבערשטער זאל העלפן אז בזכות די צדקה זאלסטו האבן הצלחה אין אלע דיינע וועגן.


יישר כח.


...

#6 - איך קען נישט יעצט פארן קיין ארץ ישראל
תפילה והתבודדות, ישיבה, ארץ ישראל

בעזרת ה' יתברך


יום ד' פרשת נח, ב' דראש חודש מר-חשון, שנת תשע"ט לפרט קטן


 


לכבוד מיין טייערער ... נרו יאיר.


איך האב ערהאלטן דיין בריוו.


גלייב מיר, איך וויל אסאך מער ווי דיר גיין קיין ארץ ישראל; איך בענק און גליסט צו זיין אין ארץ ישראל און זוכה זיין צו אמונה, אריכות אפים, קדושת הברית און צו אלע מדריגות וואס דער רבי שרייבט וואס מען איז זוכה ווען מען איז אין ארץ ישראל (עיין ליקוטי מוהר"ן, חלק א', סימן קנה; ועוד). אויך בענק איך זייער צו מוהרא"ש'ס ציון, איך וויל זייער שטארק אהין גיין מתפלל זיין.


באמת האב איך געהאט בדעה צו פארן יעצט קיין ארץ ישראל, אבער איך קען נישט אוועק גיין פון די ישיבה. מוהרא"ש האט מיר געגעבן א שליחות צו לערנען מיט בחורים, יעצט זענען מיר אריין אין א נייע יאר, די עלפטע יאר פון ישיבה; עס זענען אריין געקומען אסאך נייע תלמידים און איך קען זיי יעצט נישט איבער לאזן.


טייערער ... נרו יאיר, דו וואוינסט דאך נעבן "מערת אליהו", דארט האבן מיר זיך געטראפן דאס ערשטע מאל פאר דריי יאר צוריק ווען איך בין געפארן קיין חיפה מיט די בחורים זיי ווייזן דעם הייל וואו אליהו הנביא האט זיך באהאלטן פון די עובדי הבעל אינעם הר הכרמל, דארט האט ער אויס געשריגן פאר אלע געצן דינער (מלאכים א יח, לט): "ה' הוא האלקים!" דארפסטו זיך שטארקן מיטן רעדן צום אייבערשטן; דאס האט אונז דער הייליגער רבי אויסגעלערנט, אז א מענטש האט קיינעם נישט אויף דער וועלט נאר דעם אייבערשטן; ווי מער מען געוואוינט זיך צו צו רעדן צום אייבערשטן ווערט מען מער און מער אויסגעלייטערט.


זיי מתפלל אז איך זאל זוכה זיין צו קומען בקרוב קיין ארץ ישראל.


דער אייבערשטער זאל העלפן זאלסט מצליח זיין אין אלע דיינע וועגן.

#5 - יישר כח פאר'ן העלפן די קאמפיין פאר די ישיבה
הכרת הטוב, ישיבה

בעזרת ה' יתברך


יום ה' פרשת חקת, ח' תמוז, שנת תשע"ח לפרט קטן


 


לכבוד מו"ה ... הי"ו


ראשית כל וויל איך אייך דאנקען פארן העלפן דעם "טשערעדי קאמפיין" עס זאל געקרוינט ווערן מיט הצלחה.


דער אייבערשטער האט געהאלפן אז די קאמפיין האט געהאט א דאפעלטע הצלחה און עס איז אריין געקומען דאפעלט ווי מען האט זיך גערעכנט; דאס איז נאר בזכות וואס איר האט ארויס געהאלפן מיט אלע אייערע כוחות.


איר געדענקט דאך אודאי ווען מיר האבן געעפענט די ישיבה וואסערע רדיפות מיר זענען דעמאלט אויסגעשטאנען; מען האט אייך גע'רודפ'ט אויף די עבירה אז איר האט אונז פארדינגען א פלאץ פאר די ישיבה. און יעצט האט דער אייבערשטער געהאלפן אז עס ווערן נתרבה די תלמידים, אזוי ווייט אז מיר האבן שוין נישט קיין פלאץ פאר די קינדער.


איך דאנק אייך פארן העלפן אז די קאמפיין זאל זיין מיט הצלחה; סיי וואס איר האט געהאלפן בגוף אז איר האט זיך אנגעשטרענגט עס זאל זיין מיט הצלחה, סיי מיט די דרשות וואס איר האט דערביי געבעטן דעם עולם אנטייל צו נעמען אין די צדקה ובעיקר פארן געבן פאר יעדע פרוטה דאפעלט.

#4 - סטראשען וועט גארנישט העלפן
שלום בית, תפילה והתבודדות, ישיבה

בעזרת ה' יתברך


יום א' פרשת חקת, ד' תמוז, שנת תשע"ח לפרט קטן


 


לכבוד ... נרו יאיר


איך האב ערהאלטן די הודעה.


זאג פאר דיין שוואגער אז מיר זאל ער נישט סטראשען מיט פאליציי; איך בין דאס אלעס אריבער שוין פאר צען יאר צוריק. ווען מיר האבן געעפענט די ישיבה פלעגן עלטערן קומען מיט פאליציי ארויס נעמען זייער קינד (דאס איז פארגעקומען אין דיינע יארן, ווען דו האסט דא געלערנט), זאל דיין שוואגער קומען מיט פאליציי ארויס נעמען זיין בחור.


אנשטאט ער זאל גיין מיט פאליציי צו די ישיבה פון וואו מען האט ארויס געווארפן זיין בחור, וואס דאס איז אנטקעגן די געזעץ, ווייל על פי חוק המדינה טאר מען נישט אוועק שיקן א תלמיד אינמיטן זמן וכו'; קומט ער מיר סטראשען און מיר דערשרעקן מיט פאליציי... זאג אים וואס חושי הארכי האט געזאגט פאר אבשלום אויף זיין טאטע דוד המלך (שמואל-ב יז, ח): "אַתָּה יָדַעְתָּ אֶת אָבִיךָ וְאֶת אֲנָשָׁיו כִּי גִבֹּרִים הֵמָּה וּמָרֵי נֶפֶשׁ הֵמָּה כְּדֹב שַׁכּוּל בַּשָּׂדֶה, וְאָבִיךָ אִישׁ מִלְחָמָה"; איך בין דאס אלעס שוין אריבער, עס איז נישט דא קיין געזעץ אז איך דארף ארויס שיקן א בחור וואס זעצט זיך אריין אין בית המדרש.


שטארק דיר צו דאווענען שחרית מנחה מעריב מיט מנין און דאווען מיט א סידור פון אינעווייניג; צדיקים האבן געטייטשט, עס שטייט אין די מגילה (אסתר ט, כה): "אָמַר עִם הַסֵּפֶר יָשׁוּב מַחֲשַׁבְתּוֹ הָרָעָה"; אז מען דאווענט אין א סידור איז דאס א סגולה אז מען זאל מכוון זיין פירוש המילות און אלע פרעמדע מחשבות זאלן אוועק גיין. אז דו וועסט דאווענען מיט מנין וועסטו האבן פרנסה בשפע.


פארגעס נישט צו העלפן אין שטוב; לאז דיר אפ פון אלע כלומר'ישע חברים. ווען דו ענדיגסט ארבעטן גיי גלייך אהיים און ווען דו גייסט דאווענען מנחה מעריב בלייב נישט אין גאס שמועסן מיט חברים, דאס איז אלעס א בלויזער דמיון, ווייל א מענטש האט קיינעם נישט בזה העולם, א מענטש איז איינער אליין; נאר דאס וואס ער ציט אויף זיינע קינדער על דרך התורה דאס וועט אים איבער בלייבן.


דער אייבערשטער זאל העלפן זאלסט מצליח זיין אין אלע דיינע וועגן.

#3 - מיט תהלים און התבודדות, באקומט מען אלע ישועות
תפילה והתבודדות, תהלים, תפלות אויף אידיש, ישיבה

בעזרת ה' יתברך


יום ה' פרשת שלח, כ"ד סיון, שנת תשע"ח לפ"ק


 


לכבוד ... נרו יאיר


דו קענסט זיך נישט פארשטעלן ווי שטארק איך האב הנאה דיר צו זען ווי דו כאפסט זיך ארויף אין ישיבה יעדן טאג ווען דו האסט לאנטש און דו זאגסט תהילים.


וויסן זאלסטו אז אין תהלים ליגן אלע ישועות, אזוי ווי דער רבי זאגט (ליקוטי מוהר"ן, חלק ב', סימן עג): "מִי שֶׁרוֹצֶה לִזְכּוֹת לִתְשׁוּבָה, יִהְיֶה רָגִיל בַּאֲמִירַת תְּהִלִּים, כִּי אֲמִירַת תְּהִלִּים מְסֻגָּל לִתְשׁוּבָה", ווער עס וויל תשובה טון זאל זאגן תהילים; ר' נתן פלעגט זאגן יעדן טאג דעם 'יום תהילים', אז מען זאגט יעדן טאג דעם יום ענדיגט מען יעדע וואך גאנץ תהילים.


דער הייליגער רבי האט אונז געגעבן א מתנה וואס הייסט 'התבודדות'; אז א מענטש זאל גיין אין א פלאץ וואו קיינער איז נישט דארט און זיך אויסרעדן זיין הארץ צום אייבערשטן אויף זיין אייגענע שפראך, ער זאל פארציילן פארן אייבערשטן אלעס וואס גייט אריבער אויף אים. ווען א מענטש זאגט פארן אייבערשטן אז ער וויל זיין ערליך; ער וויינט צו אים: "רבונו של עולם, וואס זאל איך טון אז דער יצר הרע ווארפט מיר אראפ נאכאמאל און נאכאמאל? וויפיל מאל איך נעם זיך פאר צו זיין וואויל פאל איך נאכאמאל אראפ!" דורכדעם נעמט ער אראפ פון זיך אלע עונשים; דער אייבערשטער איז אים מוחל און נעמט אים צוריק.


איך פריי מיר צו הערן אז דו העלפסט די מוסד און דו האסט געגעבן פאר די רענט פון חודש ... למספרם ...; אין דעם זכות זאלסטו טרעפן דיין שידוך בקרוב.


יעדעס מאל דו האסט אפאר פרייע מינוט אדער א טאג וואס דו ארבעטסט נישט קום ארויף אין ישיבה, טינק דיך איין אינעם רבינ'ס קוואל. דער הייליגער רבי זאגט (חיי מוהר"ן, סימן שלב): "אֲנִי נָהָר הַמְטַהֵר מִכָּל הַכְּתָמִים", איך בין א טייך וואס רייניגט פון אלע שמוציגע פלעקן; אז מען קומט צו א פלאץ וואו מען רעדט נאר פון רבי'ן איז מען זוכה צו שיינע זאכן, אלע פלעקן און אלע עבירות ווערן אפגעוואשן.


דער אייבערשטער זאל העלפן זאלסט מצליח זיין אין אלע דיינע וועגן.

#2 - אז מ'טוט תשובה איז מען זייער חשוב ביים אייבערשטן
שבת קודש, תשובה, אמונה, ישיבה

בעזרת ה' יתברך


ערב שבת קודש פרשת שלח, כ"ה סיון, שנת תשע"ח לפ"ק


 


לכבוד ... נרו יאיר


איך האב ערהאלטן דיין בריוו.


דו קענסט זיך נישט פארשטעלן ווי חשוב דו ביסט ביים אייבערשטן; חכמינו זכרונם לברכה זאגן  (ברכות לד.): "בְּמָקוֹם שֶׁבַּעֲלֵי תְּשׁוּבָה עוֹמְדִים - שָׁם אֵין צַדִּיקִים גְּמוּרִים יְכוֹלִים לַעֲמֹד", א בעל תשובה איז זייער חשוב ביים אייבערשטן; דערפאר, אז דו האסט אנגעהויבן היטן שבת קודש, וועט דיר דער אייבערשטער מוחל זיין אויף אלע דיינע עבירות וואס דו האסט עובר געווען, ווייל ווען מען היט שבת איז דער אייבערשטער מוחל אויף אלע עבירות (שבת קיח:).


בעט דעם אייבערשטן דו זאלסט קענען קומען לערנען אינעם הייליגן רבינ'ס ישיבה, וואס דאס איז באמת א 'ישיבה', אזוי ווי דער רבי זאגט (ליקוטי מוהר"ן, חלק ב', סימן ה): פארוואס רופט מען א ישיבה מיטן נאמען 'ישיבה'? "כְּשֶׁיֵּשׁ רַבִּי אֲמִתִּי עִם תַּלְמִידִים, עַל יְדֵי זֶה נִתְקַבֵּץ וְנִתְלַקֵּט חֶלְקֵי הָאֱמוּנָה", ווייל דער אמת'ער צדיק לערנט מיט זיינע תלמידים אמונה, ער לייגט איין אין זיי אז עס איז דא א באשעפער אויף דער וועלט, "וְעַל כֵּן נִקְרָא לִמּוּד הָרַב עִם הַתַּלְמִידִים יְשִׁיבָה, עַל שֵׁם קִבּוּץ חֶלְקֵי הָאֱמוּנָה, כִּי הָרַב הוּא מַשְׁגִּיחַ עַל חֶלְקֵי הָאֱמוּנָה שֶׁל כָּל אֶחָד וְאֶחָד, וּלְהַעֲלוֹתָם", אזוי ווי עס שטייט (תהלים קא, ו): "עֵינַי בְּנֶאֱמְנֵי אֶרֶץ לָשֶׁבֶת עִמָּדִי" 'לָשֶׁבֶת עִמָּדִי' איז 'יְשִׁיבָה', עיין שם; זעט מען אז אויב עס איז דא א פלאץ וואו מען לערנט מיט תלמידים אמונה - דאס איז א ישיבה, אבער אז מען לערנט נישט קיין אמונה מיט די תלמידים איז דאס נישט קיין ישיבה. כאטשיג עס שטייט אויפגעשריבן אויפן בנין "ישיבה ..." אבער א ישיבה איז נאר וואו מען לייגט אריין אמונה אין די תלמידים.


דעריבער זאלסטו בעטן דעם אייבערשטן דו זאלסט קענען קומען לערנען ביים הייליגן רבינ'ס ישיבה; מיט תפילה קען מען אלעס פועל'ן.


ביז דערווייל פרוביר זיך צו שטארקן מיט אלע כוחות; רעד נישט קיין ניבול פה חס ושלום און טשעפע נישט קיינעם אזוי וועסטו זיך איינקויפן א גוטע נאמען, און דו וועסט טרעפן דיין זיווג בקרוב.


דער אייבערשטער זאל העלפן זאלסט האבן הצלחה אין אלע ענינים.

#1 - ווילסט טאקע א בחור פון ישיבה?
שידוכים, ישיבה

בעזרת ה' יתברך


יום ב' פרשת שמיני-ב, כ"ד ניסן, ט' לעומר, שנת תשע"ח לפרט קטן


 


לכבוד ... נרו יאיר


איך האב ערהאלטן דיין בריוו.


אויב דו ווילסט א וואוילער בחור פאר דיין טאכטער, דו ווילסט א בחור וואס לעבט מיטן אייבערשטן, דו ווילסט איינער וואס וועט מכבד זיין דיין טאכטער און זיך פירן מיט יראת שמים - ווייסטו אליינס וואס דו האסט צו טון; דו קענסט ארויף קומען אין ישיבה און איך וועל דיר אנטראגן א בחור וואס וועט דיר נאר ברענגען נחת.


געלויבט דעם אייבערשטן אז איך האב שוין זוכה געווען במשך די צען יאר וואס די ישיבה שטייט צו האבן א חלק אין איבער הונדערט שידוכים און איך בעט דעם אייבערשטן ער זאל מיר ווייטער העלפן איך זאל קענען זיין א גוטער שליח צו מאכן שידוכים מיין גאנץ לעבן, ווייל עס גייט מיר אין לעבן צו העלפן בחורים און מיידלעך זיי ארויס צו נעמען פון זייער תפיסה.


דער רבי האט פארציילט (חיי מוהר"ן, סימן פד) ער האט געפרעגט אין הימל וואס וועט זיין זיין פרנסה? האט מען אים געענטפערט: "דו וועסט זיין א שדכן"; מוהרא"ש זכרונו לברכה זאגט: "פארוואס האט דאס דער רבי אונז דערציילט? ווייל דער רבי וויל מיר זאלן אים נאכמאן מיט אלע זיינע זאכן; מיר זאלן נאר עוסק זיין אין אויפשטעלן אידישע שטובער פארן אייבערשטן".


געלויבט דעם אייבערשטן אז איך בין נישט קיין שדכן פאר געלט וואס דרייט אויס זיין רוקן אין די סעקונדע וואס דער שידוך ווערט; ביי מיר איז נישט אזוי, איך לאז נישט אפ מיינע תלמידים. מיינע תלמידים זענען ביי מיר ווי מיינע אייגענע קינדער, אזוי ווי חכמינו זכרונם לברכה זאגן (סנהדרין יט:): "כָּל הַמְלַמֵד בֶּן חֲבֵירוֹ תּוֹרָה כְּאִילוּ יָלְדוֹ"; דאס איז נישט סתם א גוט ווארט וואס מען זאגט פארן מלמד: "שפיר זיך גוט ווייל עס איז כאילו ילדו", נאר דאס איז אויך אן התחייבות. מען זאגט פארן מלמד: "געב אכטונג אויף יענעמס קינד אזוי ווי דו וואלסט ווען אכטונג געגעבן אויף דיין קינד; ווען דו לערנסט מיט א תלמיד טראכט: 'כאילו ילדו'".


דו שרייבסט מיר אז דו ביסט געקומען זוכן א בחור פאר דיין טאכטער, דו האסט זיך אוועק געשטעלט אונטן פון ישיבה און געזען בחורים רייכערן וכו', בחורים מיט טעלעפאנס וכו'; מיר זעט אויס ווי דו ווילסט מיר סתם טשעפען, אנדערש קען איך נישט טראכטן וואס דו ווילסט. דערפאר וויל איך דיר מודיע זיין אז מיר קען מען נישט טשעפען; איך וועל ווייטער מחזק זיין בחורים, און אויב דיין בחור וועט אנקומען אין א מצב וואס ער וועט נישט האבן קיין ישיבה וועל איך אויף אים אויך רחמנות האבן, אזוי ווי דער בערגערס זון האט געזאגט פארן קיסר ווען ער האט אים געפרעגט: "אויב דער קיסר וועט דיר אונטער קומען וואס וועסטו טון מיט אים?" האט ער אים געזאגט: "איך וואלט אים מפרנס געווען אזוי ווי איך בין דיר מפרנס (עיין סיפורי מעשיות מעשה י, פון דער בערגער און דער ארימאן)".


איך האב נישט קיין צייט צו קיין נארישקייטן; זאל דיר דער אייבערשטער העלפן זאלסט מצליח זיין אין אלע דיינע וועגן און זאלסט בקרוב טרעפן א גוטע שידוך פאר דיין טאכטער.