בריוון פונעם ראש ישיבה שליט"א

בעזרת ה' יתברך - יום ג' פרשת ויקהל, י"ח אדר, שנת תשפ"ה לפרט קטן

... נרו יאיר, טברי'

איך האב ערהאלטן דיין בריוו.

לכבוד דיין געבורטס טאג זאלסטו זיך מקבל זיין, ווען דו דאווענסט מיט מנין אין שול - זאלסטו נישט רעדן ביי חזרת הש"ץ און אויסהערן די בעל תפילה מיט א סידור. אזוי ווי דער הייליגער רבי אלימלך זכותו יגן עלינו זאגט אין צעטיל קטן (סעיף יא): "בחזרת הש"ץ השמונה עשרה", ווען דער בעל תפילה גייט איבער די שמונה עשרה, "יעיין בסידור", זאל מען אריינקוקן אין סידור, "לענות אמן בכל כחו על כל ברכה וברכה", און ענטפערן אמן מיט די גאנצע כח אויף יעדע ברכה.

געב א גרוס פאר דיינע עלטערן, האסט זייער וואוילע עלטערן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ויקהל, י"ח אדר, שנת תשפ"ה לפרט קטן

מרת ... תחי'

איך האב ערהאלטן די הודעה.

מזל טוב פאר אייער שמחה, דער אייבערשטער זאל אייך געבן כח און מח צו קענען מגדל זיין אייערע קינדער געזונטערהייט מיט גרויס שמחה.

אייער חלישות הדעת קומט פון דעם וואס איר קוקט אויף א צווייטן וכו'; וויפיל איך שרייב אייך און וויפיל איך רעדט צו אייך איר זאלט קוקן אויף אייער שיינע לעבן וואס איר האט – פאלט איר צוריק און איר קוקט אויף דעם און אויף יענעם, אויף אייערע געשוויסטער און אויף אנדערע, און דאס ווארפט אייך אזוי אראפ אין עצבות און חלישות הדעת.

הערט אויף קוקן אויף אנדערע, הויבט אן לעבן ווי דער תם וואס האט געזאגט (ספורי מעשיות מעשה ט', מחכם ותם): "וואס האט יענעמ'ס מעשה צו טון מיט מיר? וואס האט יענעמ'ס לעבן מיט מיר? דאס איז מיין מעשה און דאס איז זיין מעשה", און אזוי האט ער געלעבט א פרייליכערע לעבן ווי דער חכם. אמת, אז ביי פרויען איז דא מער די זאך פון קוקן אויף אנדערע, חכמינו זכרונם לברכה זאגן (מגילה יג:): "אין אשה מתקנאה אלא בירך חבירתה", א פרוי ווערט צעשפילט דורך קוקן אויף אירע חבר'טעס; אבער דער רבי האט אונז געלערנט דער וועג פונעם תם, זוכן דאס גוטס ביי זיך, נישט קוקן אויף אנדערע, עס זאל נישט אינטערעסירן וואס טוט זיך ביי אנדערע, און אפילו ביי רוחניות, אז מען זעט אנדערע זענען מצליח, אנדערע מאכן אזוי, אנדערע טוען בעסער - זאל מען געדענקען 'דאס איז מיין מעשה און דאס איז יענעמ'ס מעשה', דער רבי האט אונז געלערנט די זאך פון תפילה והתבודדות, רעדן און שמועסן מיטן אייבערשטן, נאך א ווארט זאגן דעם אייבערשטן, נאך א שכח געבן דעם אייבערשטן; דאס איז עבודת השם, נישט קוקן אויף אנדערע און זוכן יענעם נאכצומאכן.

אז איר וועט אויפהערן קוקן אויף אנדערע וועט איר מער נישט האבן קיין פינטל חלישות הדעת, און איר וועט זיין שטענדיג פרייליך.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויקהל, י"ח אדר, שנת תשפ"ה לפרט קטן

... תחי'

איך האב ערהאלטן אייער בריוו.

זארגט נישט, איר וועט שוין יעצט טרעפן א גוטע שידוך, איר זאלט טון אייערס, דאנקט און לויבט דעם אייבערשטן, דאנקט אים אויף יעדע זאך, רעדט צו אים אזוי ווי מען רעדט צו א גוטע פריינד, אין אייער שפראך, אין אידיש, זאגט אים: "שכוח אייבערשטער אז איך בין א איד, שכוח אייבערשטער אז איך בין געזונט, שכוח אייבערשטער פאר מיינע עלטערן, שכוח אייבערשטער אז איך ווייס פון אזא הייליגע רבי וואס לערנט מיך אויס צו רעדן צו דיר און דיך צו דאנקען".

געבט נישט אויף, אייער ישועה איז שוין דא.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויקהל, י"ח אדר, שנת תשפ"ה לפרט קטן

מיין טייערער ליבער ... נרו יאיר, קרית ברסלב

איך האב ערהאלטן דיין מעסעדזש.

שטארק זיך מיט אמונה אינעם אייבערשטן, און שטארק זיך מיט תפילה. נעם די סגולה פון רבי'ן פאר קינדער, דער רבי זאגט (ספר המדות אות בנים, סימן כב), אז מען מאכט פרייליך די ווייב, מען לעבט בשלום - איז מען זוכה צו קינדער; און פארקערט חס ושלום, אויב מען האט זיך פיינט - זאגט דער רבי - (שם, סימן נו), פארלירט מען לא עלינו די קינדער.

נאך א סגולה איז דא פון רבי'ן פאר קינדער, גיי שלאפן פרי און שטיי אויף פרי, זעץ זיך ארויס צווישן די ביימער הינטער דיין שטוב מיט א תהילים, זינג צום אייבערשטן אביסל תהילים, דאנק אים און לויב אים. שטיי אויף פארטאגס און זינג קאפיטלעך תהילים, וועסטו זוכה זיין צו שיינע דורות. דער רבי זאגט (שם, סימן סה): "הַשִּׁירוֹת וְהַתִּשְׁבָּחוֹת שֶׁאוֹמְרִין קֹדֶם אוֹר הַיּוֹם, הוּא סְגֻלָּה לְבָנִים", דאס זינגען און לויבן דעם אייבערשטן פארטאגס, איז א סגולה פאר קינדער.

איך בעט דיר זייער, פאל נישט אריין אין קיין יאוש און עצבות, זיי פרייליך און מאך פרייליך דיין ווייב; וועסטו זוכה זיין צו קינדער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ויקהל, י"ח אדר, שנת תשפ"ה לפרט קטן

מרת ... תחי'

איר דארפט זיך זייער פרייען אז איר האט די זכיה אז אונטער אייך ווערן מחוזק און מקורב אזוי סאך מענטשן, אייער מאן איז זיך מוסר נפש צו פארשפרייטן די ספרים און קונטרסים פון מוהרא"ש פאר די גאנצע וועלט, און דאס אלעס איז אייער זכות, וואס איר העלפט אים, איר זענט אים מחזק און איר זענט אים א גוטע ווייב.

איר קענט זיך נישט פארשטעלן די גרויסקייט אין טייערקייט ווי מען קוקט אין הימל אויף די וואס טוען פאר אידישע קינדער, די וואס פארשפרייטן דעם הייליגן רבינ'ס ספרים און עצות וואס ברענגט צוריק אידישע קינדער צום אייבערשטן, נישטא קיין גרעסערע זאך ביים אייבערשטן ווי צוריק ברענגען אידישע קינדער צו די תורה. דער הייליגער זוהר זאגט (תרומה קכח:): "תָּא חֲזֵי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע, זאגט דער הייליגער זוהר, א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא, גָּרִים לְאַכְפְּיָיא סִטְרָא אַחֲרָא, וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ, וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; ער נעמט אוועק טומאה פון דער וועלט און ער מאכט אז דעם אייבערשטנ'ס נאמען זאל ווערן געהייליגט אויף דער וועלט, דער מענטש איז גורם אז אלע וועלטן שטייען אויף זיין זכות. "וְזָכֵי לְמֵחַמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", און ער איז זוכה צו אלע גוטע זאכן אויף די וועלט און אויף יענע וועלט, "כָּל מָארֵי דִּינִין, לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכט'ס טון, נישט אויף די וועלט און נישט אויף יענע וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים, און קיינער קען אים נישט צוריק האלטן.

בזכות העלפן אייער מאן צו קענען אנהאלטן זיין הייליגע ארבעט זאלט איר האבן אלעס גוטס.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת ויקהל, י"ח אדר, שנת תשפ"ה לפרט קטן

לכבוד מיין טייערער ... נרו יאיר

איך האב ערהאלטן פון דיין זון א בריוועלע, ער פרעגט וואס ער זאל זיך פארנעמען לכבוד זיין געבורטס טאג.

זייער גוט אז דו לערנסט אויס דיינע קינדער זאלן זיך מקבל זיין ביי זייער געבורטס טאג א גוטע קבלה און זיין מיט דעם שטארק א גאנץ יאר. ביי אונז מאכט מען נישט קיין פארטיס; נישט אין חדר, נישט אין סקול און אויך נישט אין שטוב, נישט פאר קינדער און נישט פאר עלטערע; מיר זענען נישט קיין אמעריקאנער, מיר טוען נאר וואס מיר האבן מקבל געווען פון צדיקים.

עס איז זייער גוט אויסצולערנען די קינדער, סיי די זין און סיי די טעכטער - זאלן זיך אונטערנעמען א גוטע זאך לכבוד זייער געבורטס טאג און זיין שטארק מיט דעם פאר די גאנצע יאר, און דעם קומענדיגן יאר זאלן זיי זיך אונטערנעמען נאך א גוטע זאך.

איך האב אים געשריבן ער זאל זיך אונטערנעמען אויסצוהערן חזרת הש"ץ, און דו אלס טאטע זאלסטו אים אויסלויבן און אויסרימען און געבן גוטע ווערטער, און דערציילן אין שטוב כסדר ווי שיין ער דאווענט, אזוי וועט עס ווערן ביי אים א טבע שני, ער וועט ווערן צוגעוואוינט צו דעם און ער וועט זיך אזוי פירן זיין גאנץ לעבן.

הויב אן דיין טאג מיט א שפאציר, מיט התבודדות, הויב אן דאנקען און לויבן. אזוי וועט זיך דיין הארץ דיר עפענען און דו וועסט זיך קענען אויסגיסן דיין הארץ, ארויסגעבן אלע דרוק, אלע אנגעצויגנקייט וכו' וכו', עס וועט דיר ווערן זיס און געשמאק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת פקודי, כ"ז אדר, שנת תשפ"ה לפרט קטן

לכבוד ... נרו יאיר

צוויי זאכן וויל איך דיר בעטן און דאס וועט זיין דיין ישועה, ערשטנס זאלסטו אנהויבן דאווענען די דריי תפילות מיט מנין. חכמינו זכרונם לברכה זאגן (ברכות נד): "מַחֲנֵה יִשְׂרָאֵל כַּמָה הַוֵי, תְּלָתָא פַּרְסֵי", עוג מלך הבשן איז געגאנגען און אויסגעריסן א בארג פון דריי פרסה, ער האט דאס געוואלט ווארפן אויף די אידן. זאגט דער רבי (לקוטי מוהר"ן חלק ב', סימן ח), די דריי תפילות ווערן אנגערופן מחנה ישראל, דאס שטארקט דעם מענטש צו בלייבן ביים אייבערשטן, עוג מלך הבשן וויל אוועק נעמען דעם איד פונעם אייבערשטן, פון מחנה ישראל, "מַחֲנֵה יִשְׂרָאֵל כַּמָה הַוֵי, תְּלָתָא פַּרְסֵי", פרסי איז א לשון פון דאווענען די דריי תפילות, דאס איז מחנה ישראל, ער ווארפט ארויף א בארג אויף די דריי תפילות, און ווי נאר מען לאזט אפ דאס דאווענען דריי מאל יעדן טאג - גייט מען אוועק פון אידישקייט, ובכן וויל איך דיר בעטן דו זאלסט זיך אויף דעם מוסר נפש זיין, צו קומען יעדן טאג אין שול.

צווייטנס, דיין ווייב זאלסטו מכבד זיין מער ווי דו ביסט זיך אליין מכבד. אזוי ווי חכמינו זכרונם לברכה זאגן (יבמות סב:): "והמכבדה יותר מגופו", דער וואס איז מכבד זיין ווייב מער ווי זיך אליין, אויף אים זאגט דער פסוק (איוב ה, כד): "וְיָדַעְתָּ כִּי שָׁלוֹם אֹהָלֶיךָ, ווייל דאס איז די ווילן פונעם אייבערשטן, צו מכבד זיין די ווייב און רעדן שיין צו איר, איר אויסהערן, איר געבן די גוטע געפיל, זי זאל זיין די טייערסטע זאך.

אז דו וועסט די צוויי זאכן טון - וועסטו האבן גרויס שפע, און דו וועסט אויפשטעלן ערליכע דורות פארן אייבערשטן.

גיי יעדן טאג א שפאציר מיט התבודדות, אפילו פאר צוויי דריי מינוט נאר, און שמועס מיטן אייבערשטן, בעט אים ער זאל דיר העלפן דו זאלסט נישט פארברענגען דיינע יארן מיט נארישקייטן, דו זאלסט זוכה זיין צו תשובה שלימה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת פקודי, כ"ה אדר, שנת תשפ"ה לפרט קטן

לכבוד ... נרו יאיר

ברסלב'ע חסידות איז לערנען דעם הייליגן רבינ'ס ספרים; נאר אז מען לערנט דעם הייליגן רבינ'ס ספרים, מען האט א שיעור אין ליקוטי מוהר"ן, אין די שיחות וכו' - האט מען א שייכות מיטן רבי'ן, אז מען לערנט נישט דעם רבינ'ס ספרים איז עס א גרויס געלעכטער. מוהרא"ש דערציילט, רבי נחמן טולטשינער זכרונו לברכה האט אמאל געכאפט א היטש (טרמפ) מיט איינעם יוסל פאראנטשיק, אזוי שמועסנדיג זאגט ער פאר רבי נחמן טולטשינער: "איך האב געקענט דעם רבי'ן", רבי נחמן איז געווארן זייער פרייליך און ער האט אים אביסל מקנא געווען, איז ער געקומען צו רבי נתן און אים געזאגט אז ער האט געטראפן איינעם יוסל פאראנטשיק וואס האט געקענט דעם רבי'ן, זאגט אים רבי נתן: "יוסל פאראנטשיק האט נישט געקענט דעם רבי'ן, ער האט נאר געזען דעם רבי'ן, אבער דו קענסט דעם רבי'ן, ווייל דו לערנסט די ספרים פון רבי'ן"; דער וואס לערנט די ספרים פון הייליגן רבי'ן - דער קען דעם רבי'ן, דער איז א ברסלב'ער חסיד, אבער אז מען לערנט נישט די ספרים - האט מען נישט קיין שייכות מיטן רבי'ן.

מאך זיך א שיעור אין רבינ'ס ספרים, און אין ספר אשר בנחל וואס נעמט צאם אויף למעשה דעם הייליגן רבינ'ס דיבורים. דער הייליגער רבי זאגט (חיי מוהר"ן, סימן שנח): "מיט יעדע שיחה וואס איך שמועס מיט ענק קען מען זיין אן ערליכער איד, און נישט סתם אן ערליכער איד, נאר אן ערליכער איד אזוי ווי איך מיין אן ערליכער איד"; דעם רבינ'ס ספרים וועקט אויף פון שלאף, עס נעמט דעם מענטש וואס איז ביי זיך אויפגעגעבן און ברענגט אים צו דינען דעם אייבערשטן.

ליצי לצנות אויב מען לערנט נישט דעם רבינ'ס ספרים; ווי קען איינער זאגן "איך בין א ברסלב'ער" ווען ער איז נאך איין מאל נישט אריבער דעם רבינ'ס ספרים? ווי קען מען זיך בארימען 'איך בין ביים רבי'ן' ווען מען האט נאכנישט געעפנט דעם רבינ'ס ספרים, דאס איז אזא לאכעדיגע זאך; מוהרא"ש פלעגט אונז שטענדיג זאגן: "מען קען נישט זיין א ברסלב'ער חסיד נאר אז מען לערנט די ספרים פון הייליגן רבי'ן"; דער וואס וויל קענען דעם רבי'ן דארף לערנען דעם רבינ'ס ספרים, נישט דאס קענען די זקנים ונערים מיינט א ברסלב'ער חסיד, נישט דאס וויסן די נוסח מיט די ניגונים איז ברסלב, דער רבי קען מען טרעפן נאר אין זיינע ספרים, דער רבי זאגט (לקוטי מוהר"ן חלק א', סימן קצב): "פָּנָיו שִׂכְלוֹ וְנִשְׁמָתוֹ נִמְצָאִים בְּתוֹךְ סִפְרוֹ", די פנים, שכל און נשמה פונעם צדיק, געפינט זיך אין זיינע ספרים.

שטארק זיך, הויב אן פון יעצט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת פקודי, כ"ד אדר, שנת תשפ"ה לפרט קטן

לכבוד ... נרו יאיר

איך וויל דו זאלסט אויך טון פאר הדפסה והפצה, דו קענסט זיך נישט פארשטעלן ווי חשוב דער מענטש וואס איז עוסק אין צוריק ברענגען אידישע קינדער – איז ביים אייבערשטן, דער וואס פארשפרייט דעם הייליגן רבינ'ס עצות און מיט דעם ברענגט ער צוריק פארבלאנזשעטע נשמות צום אייבערשטן איז מורא'דיג חשוב ביים אייבערשטן. אזוי ווי עס שטייט אין זוהר הקדוש (תרומה קכח:): "תָּא חֲזֵי, כָּל מַאן דְּאָחִיד בְּיָדָא דְּחַיָּיבָא וְאִשְׁתָּדַּל בֵּיהּ, לְמִשְׁבַק אָרְחָא בִּישָׁא", קום און זע, זאגט דער הייליגער זוהר, א מענטש וואס ברענגט צוריק זינדיגע מענטשן צום אייבערשטן, "אִיהוּ אִסְתַּלָּק בִּתְלַת סִלּוּקִין, מַה דְּלָא אִסְתַּלָּק הָכִי בַּר נָשׁ אַחֲרָא. גָּרִים לְאַכְפְּיָיא סִטְרָא אַחֲרָא. וְגָרִים דְּאִסְתָּלַּק קוּדְשָׁא בְּרִיךְ הוּא בִּיקָרֵיהּ. וְגָרִים לְקַיְּימָא כָּל עָלְמָא בְּקִיּוּמֵיהּ לְעֵילָּא וְתַתָּא", דער מענטש איז זוכה ארויף צו גיין אויף א פלאץ וואס קיין שום מענטש איז נישט זוכה; ער נעמט אוועק טומאה פון דער וועלט, און ער מאכט אז דעם אייבערשטנ'ס נאמען זאל ווערן געהייליגט אויף דער וועלט. דער מענטש איז גורם אז אלע וועלטן שטייען אויף זיין זכות. "וְזָכֵי לְמֵחַמֵי בְּנִין לִבְנוֹי", ער איז זוכה צו זען קינדער און אייניקלעך, "וְזָכֵי בְּהַאי עָלְמָא, וְזָכֵי לְעָלְמָא דְּאָתֵי", און ער איז זוכה צו אלע גוטע זאכן אויף דער וועלט און אויף יענער וועלט, "כָּל מָארֵי דִּינִין, לָא יַכְלִין לְמֵידָן לֵיהּ, בְּהַאי עָלְמָא וּבְעָלְמָא דְּאָתֵי", קיינער קען אים נישט שלעכטס טון, נישט אויף דער וועלט און נישט אויף יענער וועלט, "עָאל בִּתְרֵיסַר תַּרְעֵי, וְלֵית מַאן דְּיִמְחֵי בִּידֵיהּ", ער גייט אריין אין דרייצן טויערן פון שערי רחמים, און קיינער קען אים נישט צוריק האלטן.

מען הערט אזויפיל שוידערליכע מעשיות ווי מענטשן נעמען זיך דאס לעבן נאר פון דעפרעסיע, נאר פון פארלוירנקייט, נאר פון דעם וואס מען האט נישט אמונה, מען ווייסט נישט פארוואס מען לעבט, פאר וועם מען לעבט, מען דרייט זיך ארום מיט קשיות און טענות 'וואס דארף איך ליידן? וואס גייט מיר אריבער דאס אלעס?' מען ווייסט נישט פון די ליכטיגע אמונה אינעם אייבערשטן.

גיי ארויס פון דיין באקוועמע ווינקל, הייב זיך אויף פאר א צווייטע איד, שארץ ארויף דיינע ערמל פאר א אידישע נשמה, געב א קארטל, געב א גליון, געב א סי די, א ספר, א קונטרס; וועסטו ראטעווען אידישע לעבנס.

היינט נאכט וועט זיין א שיעור פאר די פרויען, זאלסטו זען צו זיין אין שטוב צייטליך אז דיין ווייב זאל קענען קומען צום שיעור, ווייל יעצט אין די טעג וואס מען ברענגט אריין דעם יום טוב פסח דארפן די פרויען אסאך אסאך חיזוק, און אויך דארפן זיי וויסן די הלכות ווי אזוי מען מאכט פסח'דיג, וואס איז וויכטיג און וואס איז נישט וויכטיג; זאלסטו אהיים גיין פרי און איר מחזק זיין צו קומען צום שיעור.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת פקודי, כ"ג אדר, שנת תשפ"ה לפרט קטן

לכבוד ... נרו יאיר

יעדן איינעם העלפסטו, יעדן איינעם הערסטו אויס, יעדן איינעם געבסטו היטשעס, און ווען דיין ווייב וויל רעדן מיט דיר - הערסטו איר נישט אויס, און ווען זי בעט דיר א וועג זאלסט איר טראגן און ברענגען - מאכסטו איר דעם גיהנום; ביסט נארמאל? ביסט א געזונטער?!

ביסט א גאנצער מאכער אין שול, מאכסט און טוסט, עס קען אויסזען ווי דו ביסט ממש א גאלדענער מענטש, אבער אין שטוב איז אן אנדערע מעשה, דארט הערסטו נישט, זעסט נישט, מאכסט א געשפעט, איך ווייס נישט ווי אזוי א מענטש קען זיך אזוי אויפפירן, און די גרעסטע וואונדער איז, אז דו פאררופסט זיך א תלמיד פון מוהרא"ש. איך מיין דו ביסט פון די "חבורת קויליטש", ווי דער רבי האט געזאגט: "איך האב דריי סארט מענטשן וואס קומען צו מיר, עס זענען דא מענטשן וואס קומען עסן קויליטש (בארכעס), עס זענען דא וואס קומען הערן מיינע תורות, און נאכדעם האב איך מענטשן וואס איך בין איינגעקריצט אין זייער הארץ"; צו זיין פון די דריטע חבורה דארף מען אסאך לערנען דעם רבינ'ס ספרים.

מאך זיך א שיעור אין ספר הקדוש אשר בנחל, וועסטו זען וואס מוהרא"ש לערנט אונז; מיר זאלן האלטן טייער די ווייב, איר אויסהערן, איר טראגן און איר ברענגען. שלמה המלך זאגט (משלי יב, י): "יוֹדֵעַ צַדִּיק נֶפֶשׁ בְּהֶמְתּוֹ", דער ערליכער איד ווייסט וואס זיין ווייב און קינדער דארפן, אפילו אויף די בהמות האט ער רחמנות, "וְרַחֲמֵי רְשָׁעִים אַכְזָרִי", און די רחמנות פון רשעים איז אכזריות'דיג, ווייל זיי האבן רחמנות דארט וואו מען דארף נישט רחמנות האבן; ער לויפט אוועק פון שטוב ווען די ווייב דארף הילף, צו די ווייב און די אייגענע קינדער פירט ער זיך ווי אן אכזר, השם ישמרינו.

גיי יעדן טאג אין פעלד און שריי צום אייבערשטן: "הייליגער באשעפער איך וויל זיין אן ערליכער איד, איך וויל רעדן שיין צו מיין ווייב און קינדער, איך וויל סבלנות, אויסהערן מיין ווייב און קינדער, איר העלפן, איר טראגן און ברענגען, איך ווער אזוי נערוועז וכו' וכו'".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת כי תשא, י"ב אדר, שנת תשפ"ה לפרט קטן

לכבוד מורינו הרב ר' ... שליט"א

איך האב יעצט א שליח אין אמעריקע וואס פארט קיין ארץ ישראל, איך פריי זיך זייער אז איך קען שיקן א משלוח מנות.

דער אייבערשטער זאל געבן כח און הצלחה צו קענען ליכטיג מאכן פאר אידישע קינדער מיט די זיסע ליכטיגע עצות פון הייליגן רבי'ן.

איך וויל בעטן א ברכה פאר מיר און פאר מיין משפחה. יואל בן ריצא רעכיל וזו' אסתר גיטל בת חיה שרה הודיא, און מיינע קינדער, שלמה ומשפ', אלחנן חיים ומשפ', מרים העניא זיסל ומשפ', שמעון ומשפ', נחמן נתן, יצחק דוד, צבי, רחל לאה, יוסף, מנחם, יחזקאל, מלכה.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

מיין טייערער ... נרו יאיר

איך האב ערהאלטן דיין בריוו.

א טאטע און א מאמע דארף מען מכבד זיין, זאל זיין וואס זאל נאר זיין, ווייל אזוי האט דער אייבערשטער אונז באפוילן, און אז די מצוה קומט אן שווער - וועט די שכר זיין גרעסער.

אז דיין טאטע רעדט צו דיר קעגן דיין ווייב - זאלסטו האבן שכל און דאס נישט איבערזאגן אין שטוב, און אז דיין ווייב רעדט צו דיר שלעכטס וועגן דיינע עלטערן - זאלסטו מיט שכל דאס נישט קיינעם דערציילן; זיי ווי אהרן הכהן וואס האט אויסגעדרייט און ארומגעדרייט - אבי עס זאל זיין שלום (אבות דרבי נתן יב, ג).

מען דארף נישט אלעס דערציילן, בפרט פאר עלטערן און פאר א ווייב, דארט דארף מען זיין זייער פארזיכטיג נישט צו מאכן קיין פייער. אזוי ווי מוהרא"ש זכרונו לברכה דערציילט, ביים הייליגן צדיק רבי מרדכי'לע פון נאדבורנא זכותו יגן עלינו, ווען זיין מאמע פלעגט אריינקומען צו אים אין צימער רעדן צו אים שלעכטס אויף זיין ווייב, האט דער הייליגער רבי מרדכי'לע זכותו יגן עלינו איר אויסגעהערט מיט דרך ארץ און כבוד, און נאכן ענדיגן רעדן, ווען זי איז ארויסגעגאנגען, האט ער גענומען זיין קאפל, דאס אויסגעשאקלט און זיך צוריק געזעצט לערנען. שפעטער קומט אריין די רעביצין און הויבט אן שרייען: "דיין מאמע איז דא געווען, וואס האט זי געוואלט? דיין מאמע איז א שלעכטע, א ביטערע, איך בין אסאך בעסער פון איר", זי האט געשריגן און געשריגן; ווידער האט איר דער הייליגער רבי מרדכי'לע אויסגעהערט און געשאקלט מיטן קאפ, און ווען זי איז ארויס פון צימער האט ער גענומען זיין קאפל, דאס אויסגעשאקלט און זיך צוריק געזעצט לערנען. דער גבאי האט דאס אלעס אונטערגעהערט, האט ער געפרעגט: "רבי, פאר די מאמע געבט דער רבי גערעכט און פאר די ווייב געבט דער רבי גערעכט?" האט דער צדיק געזאגט: "דו ביסט אויך גערעכט..." אים צו לערנען דער טיפער לימוד פון טון אלעס אויף דער וועלט אבי עס זאל זיין שלום.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

... תחי', תלמידה בית פיגא

איך האב ערהאלטן אייער בריוו.

וועגן אייערע שרעקעדיגע חלומות - איז דא איין עצה, זיין פרייליך; בעטס אייערע עלטערן זאלן אייך געבן צו הערן ווען איר גייט שלאפן - מעשיות פון צדיקים; דאס וועט אוועק נעמען אלע שרעק, ווייל מעשיות פון צדיקים מאכט פרייליך און געבט א ישוב הדעת.

בעטס אסאך דעם אייבערשטן איר זאלט זוכה זיין צו באקומען א מאן וואס לערנט און דאווענט און פירט זיך מיט יראת שמים. איר זענט נאך א יונג קינד, איר האט נאך א שיינע פאר יאר צו קענען זיך גוט אויסבעטן אויף אן ערליכער מאן. מיינט נישט אז דאס באקמט מען אומזיסט, נאר נאך אסאך תפילה און אסאך טרערן - איז מען זוכה צו א מאן אן ערליכער איד.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

מיין טייערער ... נרו יאיר

בנוגע דעם שידוך וואס איך האב אנגעטראגן פאר משפחת ...; ער רופט מיר אן אז דער בחור האט איינגעדרימלט אינמיטן די בעשאו. איך וויל דיר בעטן זאלסט רעדן צום בחור און אים מחזק זיין, ווי עס זעט אויס איז ער מיואש, ער האט שוין אויפגעגעבן, מען דארף אים זייער שטארקן.

נישטא קיין גרעסערע מצוה פון עוסק זיין אין שידוכים, און אז מען כאפט בזיונות וכו' - טאר מען נישט אפלאזן די גרויסע מצוה. מיטן מאכן שידוכים לייזט מען אויס די שכינה פון גלות, און מען ברענגט נענטער די גאולה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

מרת ... תחי'

איך האב ערהאלטן אייער בריוו.

מזל טוב פאר די שמחה, דער אייבערשטער זאל העלפן איר זאלט האבן אסאך אידיש נחת פון דעם קינד און פון אלע קינדער.

דאס וואס איר וויינט אסאך, איר האט ווייניג כח; דאס איז זייער נארמאל, דאס מיינט נישט אז איר זענט נישט א גוטע מאמע, דאס מיינט נישט אז עפעס פעלט אייך, און אז איר האט נישט קיין כח צו זייגן, איר געבט מילך באטלעך - איז גארנישט שלעכט.

קלאפט זיך נישט, אזוי קומט עס, עס נעמט אפאר וואכן ביז מען קומט צוריק צו די כוחות, און אז די בעבי וויינט און איר וויינט מיט, איר האט נישט קיין כח - דאס איז זייער נארמאל, און אז אייערע חבר'טעס מאכן אייך שפירן ווי איר זענט נישט קיין געטרייע מאמע, זאלט איר זיך נישט נעמען צום הארצן.

בעטס דעם אייבערשטן: "הייליגער באשעפער געב מיר כח, און מאך מיך פרייליך"; מען דארף נישט כח צו בעטן דעם אייבערשטן, מען מאכט מיט די ליפן, מען זאגט: "באשעפער איך האב נישט כח, געב מיר כח, מאך מיר פרייליך"; דאס געבט אסאך אסאך כח.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

מרת ... תחי'

איך האב ערהאלטן אייער בריוו.

יעצט אין די חדשים וכו' - איז ביי אלעמען אזוי, מען איז מיד, מען האט ווייניגער כח.

קלאפט זיך נישט אראפ מיט דעם וואס איר זענט מיד און איר האט ווייניג כח, און די שטוב ווערט נאכגעלאזט. מען מעג שלאפן, און אז מען איז מיד נאכן שלאפן - קען מען נאכאמאל שלאפן. קלאפט זיך נישט אראפ מיט דעם, טראכטס פון די מתנה וואס איר באקומט פונעם אייבערשטן, דאנקט און לויבט דעם אייבערשטן אז איר האלט שוין דא.

זאגט יעדן טאג די דרייצן אני מאמין.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

מרת ... תחי', קרית ברסלב

איך האב ערהאלטן אייער הודעה.

פאריאר ווען איר זענט געקומען אויסגיסן אייער הארץ אז אייער שטוב צעפאלט האב איך אייך געבעטן דריי זאכן, און איינע פון די זאכן איז געווען איר זאלט מער נישט קוקן קיין מאוויס וכו', און ברוך השם זייט איר האט זיך אונטערגענומען די דריי זאכן וכו' - איז אייער שטוב געווארן צוריק א 'גן עדן'.

וויל איך אייך שטארקן איר זאלט ווייטער זיין זייער שטארק נישט אנרירן די זאכן. אפילו אייער מאן האט נאך יעצט די טעלעפאן וכו', דאס האט נישט מיט אייך, איר זאלט זיין פעלזן פעסט נישט אנצורירן די טעלעפאן, אזוי וועט איר האבן ערליכע קינדער און שלום בית.

בעטס דעם אייבערשטן די תפילה יעדן טאג:

"הייליגער באשעפער העלף מיר איך זאל האבן אמונת חכמים, איך זאל גלייבן אין די ווערטער וואס צדיקים זאגן, נישט צו האבן א טעלעפאן, נישט צו קוקן אינעם טעלעפאן. הייליגער באשעפער געב מיר די שטארקקייט עס זאל מיר אפילו נישט זיין קיין נסיון די זאכן, ווייל ווי קען איך זיין קלוגער פון די הייליגע צדיקים, פון מוהרא"ש זכותו יגן עלינו, וואס האט אזויפיל געוויינט און געזאגט אז די טעלעפאן, טעבלעט, קאמפיוטער - מאכט חרוב א אידישע שטוב, ווי קען איך טראכטן אז איך ווייס בעסער, העלף מיר איך זאל זיך אינגאנצן מבטל זיין פאר די צדיקים און נישט אנרירן קיין טעלעפאן, טעבלעט, קאמפיוטער".

אָנָּא הַשֵּׁם העלף מיר איך זאל זיין צופרידן, איך זאל זיין פרייליך, און נעם אוועק פון מיר די עצבות און מרה שחורה. אָנָּא הַשֵּׁם, הַרְחֵק מֵעָלַי אֶת הָעַצְבוּת וְהַמָּרָה שְׁחוֹרָה, איך בעט דיר אייבערשטער, דערווייטער פון מיר די עצבות און דעפרעסיע, מאך מיך פרייליך, מאך מיך אזוי פרייליך אז איך זאל אנהויבן טאנצן פון רוב שמחה, און יעדער ארום מיר זאל ווערן פרייליך, אָנָּא הַשֵּׁם געב מיר א שטארקע אמונה, איך זאל דיך שפירן, איך זאל לעבן מיט די געדאנק אז אלעס ביסטו, אלעס איז אלוקית און אלוקית איז אלעס, דומם צומח חי מדבר - אלעס איז אין סוף ברוך הוא".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

... נרו יאיר

ווען דו קומסט אהיים און דו הערסט ווי דיין ווייב שרייט אויף די קינדער, דער קינד איז א שלעכטער אין דער קינד איז א מחוצף, יעדער איז שלעכט, און דאס מאכט דיך טראכטן שלעכט אויף איר, אז זי קלאפט די קינדער; זאלסטו גלייך איבערנעמען די לייצעס און העלפן מיט וואס דו קענסט נאר אז זי זאל קומען צו זיך, דאס שרייען אויף די קינדער איז פון זיין זייער איבערגעשטרענגט.

די צייט פון פארנאכטס איז קריטיש וויכטיג צו זיין אין שטוב העלפן די ווייב מיט די קינדער. אז דו ווילסט שמועסן און זיך אויסלופטערן - זאלסטו דאס טון אין אנדערע צייטן, נישט פארנאכטס ווען די שטוב איז איבערגעקערט, אלע קינדער דארפן אויף איין מאל יעדער עפעס אנדערש, אלעס פליט, און אלע שרייען און וויינען; זאלסטו אהיים לויפן און איבערנעמען די לייצעס ביז דיין ווייב קומט צו זיך.

יעצט ווען מען האט נאר קליינע קינדער - איז אביסל שווער, און מיט דער צייט ווערט אלעס גרינגער, די קינדער וואקסן אונטער, מען פארלאנגט פון זיי יעדער זאל עפעס העלפן, ווערט אלעס גרינגער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

... נרו יאיר

איך האב ערהאלטן דיין בריוו.

וואויל איז דיר און וואויל איז דיין חלק אז דו לעבסט מיט די עצות פון הייליגן רבי'ן.

בנוגע דיין פראגע אויב דו זאלסט פאלגן דיינע עלטערן, אדער גיין נאך דיין הארץ וכו'; ביז דערווייל זאלסטו נאכנישט אנטון די קליידער ווי מען גייט ביי אונז חסידים, יעצט זאלסטו גיין אזוי ווי דו גייסט, און דער אייבערשטער וועט העלפן, ווען דו וועסט א חתן ווערן - וועסטו דעמאלט אנטון די חסידי'שע קליידער.

בנוגע די שידוך וואס דיין ראש ישיבה האט דיר גערעדט און דו האסט שוין געהאט א בעשאו, און יעצט האט די מיידל געזאגט ניין, און די שידוך גייט דיר נישט ארויס פון קאפ, דו דארפט אן עצה; ערשטנס, געדענק וואס מוהרא"ש האט אונז געלערנט 'אויב איינער דארף מיך נישט, דארף איך יענעם טויזנט מאל נישט'; אז די מיידל האט אפגעלאזט - זאלסטו נישט זיין צעבראכן, צווייטנס - אלע שידוכים וואס מען טראגט אן און עס ווערט נישט, דאס איז אלעס שידוכים; יעדע שידוך וואס מען רעדט נאר, מען טראגט עס אן - איז אויך א שידוך. עס איז דא אמאל וואס מען טרעפט זיך, מען רעדט איינער מיטן צווייטן, עס זעט שוין אויס ווי עס גייט ווערן א שידוך, למעשה ווערט נישט דער שידוך; זאגט דער רבי (ספר המדות אות חתון, סימן ז), אז דאס איז אויך א שידוך, און ווען דעם רבינ'ס ווייב איז נפטר געווארן און דער רבי איז געווען אין ראדוויל בעפארן א שידוך טון מיט זיין צווייטע ווייב, זענען געקומען אסאך פרויען זיך משדך זיין מיט אים. האט דער רבי געזאגט (חיי מוהר"ן, סימן תקצה): "אלע זענען מיינע שידוכים, און יעדער מענטש האט כמה וכמה זיווגים, ביי יעדן איינעם גייט עס אנדערש", אלע שידוכים וואס מען רעדט איז שוין אויך א בחינה פון א שידוך, אפילו עס ווערט נישט אויסגעפירט.

דער רבי האט געזאגט (חיי מוהר"ן, שם): מענטשן שמועסן ביי זיך אין שטוב: "דער בחור וואלט גוט געווען פאר די מיידל"; אפילו ווען דער שידוך זאל זיך נישט אנהויבן און נישט ענדיגן - איז דאס אויך א בחינה פון א שידוך. "וְלִפְעָמִים נוֹסְעִים לַעֲשׂוֹת הַשִּׁדּוּךְ וּבְעֵת הַגְּמָר נִפְרָדִים מֵאֵיזֶה סִבָּה, וְלִפְעָמִים נִגְמָר הַשִּׁדּוּךְ וְאַחַר כָּךְ מַפְסִיקִים הַקֶּשֶׁר שֶׁל תְּנָאִים, וְלִפְעָמִים בָּאִין לִידֵי נִשּׂוּאִין וְאַחַר כָּךְ בְּסָמוּךְ נַעֲשֶׂה גֵּט בֵּינֵיהֶם. וְלִפְעָמִים אֵינוֹ נַעֲשֶׂה הַגֵּט עַד אַחַר אֵיזֶה זְמַן וְכַיּוֹצֵא בָּזֶה כַּמָּה בְּחִינוֹת שֶׁיֵּשׁ בְּעִנְיְנֵי הַשִּׁדּוּכִים וְהַזִּוּוּגִים שֶׁאֵינָם נִגְמָרִים אַחַר כָּךְ, אֲבָל כֻּלָּם הֵם בְּחִינַת זִוּוּגִים שֶׁלּוֹ. כִּי כָּל אֶחָד יֵשׁ לוֹ כַּמָּה זִוּוּגִים, רַק שֶׁאֵצֶל זֶה נִגְמָר אֵיזֶה זִוּוּג שֶׁלּוֹ עַל יְדֵי אֵיזֶה דִּבּוּר בְּעָלְמָא שֶׁמְּדַבְּרִים מִזֶּה הַשִּׁדּוּךְ, וְלִפְעָמִים עַל יְדֵי אֵיזֶה דִּבּוּר יוֹתֵר אוֹ עַל יְדֵי אֵיזֶה הִתְקַשְּׁרוּת אוֹ נְסִיעָה אוֹ עֻבְדָּא בִּשְׁבִיל הַשִּׁדּוּךְ לְפִי שָׁעָה וְכוּ' כַּנַּ"ל"; זעט מען פון דעם אז יעדע זאך וואס מען טוט פאר א בחור און פאר א מיידל כדי זיי זאלן טרעפן זייער שידוך - אפילו עס ווערט נישט - איז דאס אויך עפעס, ווייל עס ווערט נענטער זייער ריכטיגע שידוך, עיין שם.

שטארק זיך אין דיין עבודת השם, לאז נישט נאך פון דיין לערנען און דאווענען, און גיי יעדן טאג התבודדות; זוך אויף א שטילע פלאץ און שמועס אויס דיין הארץ מיטן אייבערשטן. זאג אים ווי שטארק דו ווילסט זיין ערליך און דו ווילסט שוין אזוי שטארק דיין שידוך, וועסטו זען ווי דיין ישועה וועט שוין קומען.

אויך זאלסטו זיך אריבערכאפן קיין יבנאל צום ציון פון מוהרא"ש זכותו יגן עלינו. מוהרא"ש האט מבטיח געווען מיט א שטארקע הבטחה (צוואת מוהרא"ש, אות ה): "אִיךְ זָאג צוּ אַז יֶעדֶער בָּחוּר אָדֶער מֵיידְל וָואס דַארְף אַ שִׁידוּךְ אוּן זֵיי וֶועלְן קוּמֶען דָא אוֹיף מַיין קֵבֶר אוּן דוּרְכְזָאגְן גַאנְץ סֵפֶר תְּהִלִים פוּן אָנְפַאנְג בִּיזְן סוֹף פַאר מַיין זְכוּת, וֶועל אִיךְ טוּן אַלֶעס וָואס אִיךְ קֶען, אַז זֵיי זָאלְן טְרֶעפְן זֵייעֶר שִׁידוּךְ, אוּן דָאס זָאג אִיךְ צוּ מִיט אַ שְׁטַארְקֶע צוּזָאג".

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת תצוה, ו' אדר, שנת תשפ"ה לפרט קטן

... תחי', תלמידה בית פיגא ירושלים

איך האב ערהאלטן אייער בריוו.

איך פריי זיך זייער אז איר גייט אנגעטון איידל, און ווען איר האט א ספק אויף א קליידל, אויב עס איז איידל אדער נישט - גייט איר צום שפיגל, און איר פרעגט זיך אליין: "וואלט איך געגאנגען מיט די קליידל מקבל פנים זיין משיח צדקינו?" און אזוי קומט ארויס די ווארהייט אויב די קלייד איז איידל.

בעטס דעם אייבערשטן איר זאלט האבן א געפיל אין גיין אנגעטון איידל, מיט תפילה והתבודדות איז מען זוכה צו באקומען א טעם און א געפיל צו איידלקייט און צו די אידישע חן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת כי תשא, י"ב אדר, שנת תשפ"ה לפרט קטן

מרת ... תחי'

אייער מאן איז א וואוילער מענטש, ער איז גאר א גוטער, און אז איר וועט קוקן אויף אים גוט - וועט ער ווערן נאך בעסער, און אז איר וועט קוקן נאך בעסער וועט ער ווערן נאך בעסער. אזוי ווי שלמה המלך זאגט (משלי יד, א): "חַכְמוֹת נָשִׁים", א קלוגע פרוי, "בָּנְתָה בֵיתָהּ", בויעט אויף איר שטוב מיט געבן גוטע ווערטער, און מיט נישט ענטפערן ווען דער מאן פארלירט זיך.

א שאד מען לערנט דאס נישט מיט די מיידלעך אין די סקולס; אנשטאט לערנען שטותים והבלים פון זאכן וואס מען דארף בכלל נישט וויסן פארן לעבן, וואלט מען ווען געדארפט לערנען די חכמה ווי אזוי מען בויט אויף א מאן, ווי אזוי מען בויט אויף קינדער, ווי אזוי מען בויט זיך אליין אויף; דורך אויפזוכן דאס גוטס און דורך דן זיין לכף זכות, זוכן עפעס גוטס, און נאר פון דעם טראכטן; וואלט מען דאס געלערנט מיט די מיידלעך - וואלט מען ווען געקענט איינשפארן אלע גיטין, עס וואלט געווען שלום ושלוה.

ערשטנס דארפט איר אנהויבן קוקן גוט אויף זיך אליין, זיך נישט אראפווארפן, זיך נישט באשולדיגן אויף יעדע זאך; וואס דאס דארף נישט זיין א שווערע זאך, ווייל איר זענט זייער טייער, און נאכדעם זאלט איר אויפזוכן דאס גוטס ביי אייער טייערער מאן, וואס איז טאקע גוט און וויל נאר זיין גוט, און אזוי אויך מיט אייערע עלטערן וכו' וכו'.

גלייבט דעם רבי'ן, דער רבי איז דער דאקטער פאר אלע דורות ביז משיח וועט קומען, נאר דער רבי היילט און וועט אונז ווייטער היילן, נאר דעם רבינ'ס עצות היילן די נפש, און אז דער רבי זאגט אונז (לקוטי מוהר"ן חלק א', סימן רפב) אז דורך קוקן גוט קען מען יעדן איינעם מאכן פאר א גרויסער צדיק - דארף מען דאס טון, און אז דער רבי זאגט אונז אן עצה צו שמועסן מיטן אייבערשטן יעדן טאג - דארף מען דאס טון, מען דארף זיך באשטימען א צייט און א פלאץ יעדע טאג פאר אפאר מינוט און זיך אויסרעדן צום אייבערשטן, אים בעטן: "הייליגער באשעפער איך וויל זיין פרייליך, הייליגער באשעפער איך וויל נאר דיך, איך וויל זיין ערליך, איך וויל זיין הייליג, געוואלד איך גיי שוין באלד צוריק אהיים צו דיר, מיט וואס וועל איך קומען צו דיר? ווי אזוי וועל איך שטיין ביים בית דין של מעלה? העלף מיר, ראטעווע מיך, איך זאל האבן גוטע אויגן, נאר זען גוטס ביי יעדן איינעם, און אפילו ווען איינער טוט מיר וויי זאל איך דאס נישט נעמען פערזענליך און פיינט האבן יענעם, נאר קוקן אויף יענעם מיט א רחמנות, מיט ליבשאפט".

זייט שטארק מיט די צוויי עצות, זוכן גוטס אין יעדן איינעם, בעיקר אין זיך אליין און אין אייער מאן, און מיט די צווייטע עצה פון שמועסן מיטן אייבערשטן; וועט אייער לעבן אייך ווערן גן עדן, זיס, געשמאק, איינגענעם און בא'טעמ'ט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת כי תשא, י"ב אדר, שנת תשפ"ה לפרט קטן

מיין טייערער ... נרו יאיר

איך האב ערהאלטן דיין בריוו.

אז דיין ווייב וויינט - זאלסטו זיך נישט פארלירן, זאלסט איר אויסהערן, און אויב וויינט זי צוליב דיר - זאלסטו איר איבערבעטן, און אויב וויינט זי צוליב אנדערע - זאלסטו זיך אננעמען פאר איר.

ווער נישט דערשראקן, אזוי גייט דאס, שנה ראשונה, שנה שניה און אמאל שפעטער אויך, די ווייב וויינט אסאך, אויך באשולדיגן זיי זיך, זיי זאגן: "איך האב נישט געמעגט חתונה האבן", און "איך בין דער ערגסטער", "א רחמנות אויף דיר אז דו האסט אזא פרוי" וכו' וכו'; מען טאר זיך נישט דערשרעקן און אנטלויפן חס ושלום, מען דארף זייער אכטונג געבן אויסהערן און אויפבויען, און איר זאגן ווי פרייליך מען איז מיט איר, און ווי שטארק מען דאנקט דעם אייבערשטן אז מען איז צו איר חתונה געהאט.

ברודער, וואס וואלטן מיר געטון אן דעם רבי'ן? ברודער איך האב א שאלה, ווי אזוי גייען מענטשן אריבער דאס לעבן אנעם רבינ'ס עצות? אשרינו מה טוב חלקינו אז מיר האבן דעם רבי'ן ומה נעים גורלנו 'אשר בנחל' שם גורלינו, אז מיר האבן מוהרא"ש וואס האט אזוי ליכטיג געמאכט דעם רבינ'ס זאך, אזוי ווי דער צדיק רבי אברהם בן רבי נחמן האט פאראויס געזאגט פאר רבי משה טשענסטעחאווער זכרונו לברכה (רבי לוי יצחק'ס שוואגער), ווען ער האט אים באגלייט צום מקוה. אויפן וועג ארויס האט רבי אברהם אים געזאגט: "אין פופציג יאר ארום וועט זיין נייע זאכן אין רבינ'ס זאך, עס וועט קומען א אינגערמאן און פארשפרייטן דעם רבינ'ס ליכטיגקייט אויף די גאנצע וועלט", די שיחה האט ער אים געזאגט בשנת תרע"ה; אזוי ליכטיג געמאכט דעם רבינ'ס עצות, אז אונז פשוט'ע מענטשן וואס מיר זענען ווי מיר זענען, זאלן קענען לעבן מיט די עצות, מיט שלום בית און מיט אלעס.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת כי תשא, י"ב אדר, שנת תשפ"ה לפרט קטן

... נרו יאיר

געב אכטונג נישט צו רעדן צו דיין ווייב קעגן איר מאמע; אויב דו האסט פחדים אדער ווייטאג - זאלסטו דאס דערציילן דעם אייבערשטן ביי התבודדות, דיין שוויגער האט דיך נישט פיינט און אויך נישט דיין שווער.

אלעס וואס ליגט דיר אויפן הארץ - זאלסטו נאר אויסרעדן צום אייבערשטן, גיי אין א שטילע פלאץ און וויין צום אייבערשטן און קום אהיים מיט א שמייכל פון אויער צו אויער, און געב אסאך גוטע ווערטער פאר דיין ווייב, און אויך ווען דו גייסט צו אירע עלטערן זאלסטו ווייניג רעדן, רעד נאר ווען מען פרעגט דיר, זיץ שטיל מיט דרך ארץ, און איידער דו גייסט אהיים זאלסטו זיך שיין באדאנקען.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת כי תשא, י"ב אדר, שנת תשפ"ה לפרט קטן

מרת ... תחי', קאנאדע

עס איז א גרויסע זאך ארויסהעלפן די פרויען טעלעפאן ליין, אזויפיל פרויען זענען זיך אזוי מחי', אזויפיל משפחות שעפן חיות און עס געבט זיי פרישע כוחות אנצוגיין מיטן לעבן.

יעדע זאך וואס מען טוט פאר הפצה, פארשפרייטן דעם הייליגן רבינ'ס עצות אין די וועלט - איז מקרב די גאולה, און יעדער איינער וואס העלפט ארויס אריינברענגען די עצות פון רבי'ן אין די וועלט - האט א חלק אין ברענגען משיח צדקינו וואס וועט שוין באלד קומען, אמן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת כי תשא, י"ג אדר, תענית אסתר, שנת תשפ"ה לפרט קטן

לכבוד ... נרו יאיר

היינט נאכט איז די הייליגע יום טוב פורים, איך וויל דיר שרייבן בקיצור אונזערע מנהגים ווי אזוי מיר פירן זיך.

מען קומט אין שול צו מנחה מעריב שוין אנגעטון מיט בגדי שבת.

מען געבט א מחצית השקל פאר זיך, פאר די ווייב און אויך פאר די קינדער, דריי האלבע דאלער פאר יעדן מענטש, און מען בעט דעם אייבערשטן מען זאל זוכה זיין געראטעוועט צו ווערן פונעם יצר הרע. דער רבי זאגט (ספר המדות אות צדקה חלק ב, סימן יט): "על ידי נתינת שקלים ניצולין מיצר הרע", דורך געבן שקלים ווערט מען געראטעוועט פונעם יצר הרע.

מען פאסט אויס נאכן מגילה ליינען; און אויב מען איז הונגעריג, מען האט נישט קיין כח - קען מען אויספאסטן נאך מעריב אויף א קלייניקייט, נישט אויף קיין סעודה.

מען ליינט די מגילה ביינאכט און בייטאג, אויך פרויען זענען מחויב צו הערן מגילה ליינען, סיי ביינאכט און סיי אינדערפרי.

היינט נאכט איז נישט קיין מצוה צו טרינקען, און אויך נישט קיין מצוה פון משלוח מנות. היינט נאכט איז בעסער צו גיין שלאפן פרי, אזוי קען מען אויפשטיין פרי לערנען און דאווענען, אויסניצן די הייליגקייט פונעם טאג.

מאך נישט קיין עסק וכו', געב נאך אין שטוב, זיי א מוותר; דורך נאכגעבן קומט מען צו זיין א מרכבה פון די שכינה, ווייל ווי נאר מען וויל גארנישט, מען דארף גארנישט, מען וויל נאר טון דעם ווילן פונעם אייבערשטן - רוט די שכינה ביי דעם מענטש.

דער אייבערשטער זאל העלפן זאלסט האבן הצלחה אין אלע ענינים.

א פרייליכן פורים.