בריוון פונעם ראש ישיבה שליט"א

בעזרת ה' יתברך - יום א' פרשת עקב, י"ב מנחם-אב, שנת תשפ"ג לפרט קטן

לכבוד ... נרו יאיר

יעדע גוטע זאך וואס מען טוט - איז אין הימל זייער חשוב, אפגערעדט לערנען און דאווענען און טון חסד מיט אנדערע, דאס איז דאך דער עיקר אויף וואס מען באקומט שכר אין הימל.

הער א מעשה, דער הייליגער ישמח משה זכותו יגן עלינו האט אמאל עוסק געווען אין שאפן געלט פאר א וויכטיגע צוועק. ער איז געגאנגען נאך געלט און ער איז אריין אין א קרעטשמע, ער האט געקלאפט אויפן טיש און געזאגט: "רבותי, איך בין עוסק אין א גרויסע מצוה, איך בעט אייך איר זאלט זיך משתתף זיין"; רופט זיך אן א פשוט'ער איד צום הייליגן צדיק: "וויפיל געלט דארף דער רב?" און דער איד האט געגעבן די גאנצע סכום וואס דער צדיק האט אים געבעטן.

דער הייליגער ישמח משה איז געווארן זייער איבערגענומען, ער זאגט דעם איד: "בזכות די מצוה קענסטו בעטן וואס דו ווילסט, קענסט בעטן עשירות, אריכות ימים, וכדומה"; זאגט דער איד: "איך וויל דער רב זאל מיר צוזאגן עולם הבא", און דער ישמח משה האט אים דאס צוגעזאגט. אים איז דאס נישט געווען גענוג, ער האט געבעטן ער וויל די הבטחה בכתב און אזוי האט דער ישמח משה געטון, ער האט אים געשריבן בכתב אז ער וועט זוכה זיין צו עולם הבא.

דער איד איז נפטר געווארן און ער איז געקומען אין חלום צום הייליגן ישמח משה, ער זאגט: "עס איז מיר זייער ביטער; איך זיץ אין גן עדן, איך ווייס גארנישט, איך פארשטיי נישט קיין לערנען, עס איז מיר נישט גוט אין גן עדן", זאגט אים דער הייליגער ישמח משה: "לערן משניות", זאגט דער איד: "איך האב קיינמאל קיין משניות נישט געלערנט", אין גן עדן קען מען נאר לערנען אויב מען האט פארדעם געלערנט. זאגט דער ישמח משה דעם איד: "דעמאלט לערן חומש", זאגט ער: "איך האב נישט געלערנט אין לעבן, נישט קיין פסוק חומש און נישט קיין משנה, גארנישט גארנישט", זאגט אים דער ישמח משה: "אפשר א מעשה פון צאינה וראינה פון פרשת השבוע האסטו אמאל געלערנט?" זאגט דער איד: "דאס יא", זאגט אים דער צדיק: "דעמאלט זיץ אין גן עדן און לערן די מעשיות".

ווען דער ישמח משה האט דערציילט די מעשה האט ער געזאגט: "דער איד איז צו מיר מער נישט צוריק געקומען", איז א סימן אז אפילו מעשיות פון צאינה וראינה איז אין הימל זייער חשוב.

זיי נישט קיין בטלן, כאפ ארויס א פרק משניות, א בלאט גמרא; זאג די ווערטער אפילו אן פארשטיין. גיי שפאצירן יעדן טאג אפאר מינוט מיטן אייבערשטן, רעד צו אים, בעט אים די ווערטער: "הייליגער באשעפער, איך קען רעדן מיט יעדן איינעם שעות אויף שעות שטותים והבלים, דער טאג גייט מיר אריבער מיט שמועסן, און מיט דיר איז מיר אזוי שווער צו רעדן, איך קען קוים ארויסזאגן א ווארט פאר דיר הייליגער באשעפער, העלף מיר, איך וויל רעדן מיט דיר".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

... תחי', תלמידה בית פיגא

איך האף איר זענט צופרידן אין קלאס, איר האט הנאה פון די לערערינס.

איך וויל אייך בעטן איר זאלט זיין פון די מיידלעך וואס זיצן מיט דרך ארץ און רעדן נישט ווען די טיטשער לערנט. איך דענק אייך אלס אן איידל קינד, איך וויל אויך אז אייערע לערערינס זאלן אזוי זאגן. איך ווייס איר זענט א טייער קינד און איך וויל דאס אויך הערן פון אלע איינגעשטעלטע.

זייט פון די קינדער וואס זענען דערוואקסן, מאכט זיך א גוטע נאמען. ווייל עס וועט נישט נעמען לאנג, איר וועט דארפן א כלה ווערן און אז איר וועט זיין פון די איידעלע – וועט איר באקומען א איידעלער חתן, ווייל א שידוך גייט לויט די מעשים, אזוי ווי די הייליגע חכמים זאגן (סוטה ב.): "אֵין מְזַוְּגִין לוֹ לְאָדָם אִשָּׁה אֶלָּא לְפִי מַעֲשָׂיו", א שידוך ווענדט זיך אינעם מענטש.

זאגט יעדן טאג כאטשיג איין קאפיטל תהילים, אויך זאלט איר פרובירן צו זאגן יעדן טאג די תיקון הכללי פון הייליגן רבי'ן, [די צען קאפיטלעך תהילים - טז, לב, מא, מב, נט, עז, צ, קה, קלז, קנ].

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

... תחי', תלמידה בית פיגא קרית ברסלב

אייער טאטע האט מיר געברענגט א בריוו פון אייך, איך האב זיך זייער געפרייט צו הערן אז איר האט געענדיגט דעם דריטן מאל ספר תהילים. איך מוז אייך זאגן, איך בין זייער איבערגענומען פון אייער אויפפירונג, אז א יונג קינד זאל האבן אזא פארשטאנד, צו זאגן יעדן טאג אביסל תהילים; דאס ווייזט אז איר זענט א קלוג קינד, איר ווייסט וואס איז חשוב און וואו עס לוינט זיך צו אינוועסטירן.

זייט פרענדס מיט אלע אייערע שכנים, שפילט מיט די קינדער וואס מאכן נישט קיין קריגערייען, און אויב מען פארשעמט ביים שפילן איינאיינעם - א מיידל - זאלט איר נישט האבן קיין האנט אין דעם, איר זאלט אוועקגיין פון די שפיל, איר זאלט נאר שפילן מיט קינדער וואס שפילן מיט אלעמען.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת ואתחנן, ז' מנחם-אב, שנת תשפ"ג לפרט קטן

לכבוד ... נרו יאיר

מארגן נאכט וועלן מיר זיך אלע אוועק זעצן אויף דער ערד און זאגן מגילת איכה, מיר וועלן אלע וויינען אויף די ביטערע גלות.

ט' באב ביינאכט פאסטן אלע, אפילו קינדער; אלע טרויערן אויפן גלות. אינדערפרי קענען קינדער עסן, אבער נישט קיין נאש; מען לערנט אויס די קינדער אז אלע דארפן טרויערן אויפן חורבן בית המקדש.

אויך מיידלעך פון די צוועלף יאר, אויך ווייבלעך - אלע פאסטן; אויב איז מען אין די חדשים וואס מען ווארט, אדער אין די חדשים וואס מען זייגט - זאל מען פרעגן א רב אויב מען דארף פאסטן.

ט' באב טוט מען אויס די שיך, ט' באב דארפן זיך מאן און ווייב דערווייטערן, ט' באב טאר מען זיך נישט שמירן דעם גוף און נישט די פנים.

ט' באב ווער עס שלאפט געווענליך מיט צוויי קישנעס - זאל שלאפן מיט איין קישן, און ווער עס שלאפט מיט איין קישן - זאל שלאפן אן קיין קישן.

ט' באב באדט מען זיך נישט, אפילו קינדער, און אפילו די הענט וואשט מען נאר ביז די עק פינגער. אויך די פנים וואשט מען נישט, און אויב עס איז דא שמוץ ביי די אויגן מעג מען דאס אראפנעמען מיט פייכטע הענט.

ט' באב גריסט מען זיך נישט ביז חצות היום, און אויב איינער גריסט מעג מען צוריקגריסן האלבוועגס.

ט' באב לערנט מען נישט ווייל מען דארף טרויערן און לערנען תורה מאכט פרייליך. נאכמיטאג נאך מנחה קען מען לערנען שיעורים כסדרן וואס מען לערנט יעדן טאג, ווי ח"י פרקים משניות, יום תהלים, וכדומה.

אשר בנחל קען מען לערנען ט' באב.

ט' באב ארבעט מען נישט, נאך חצות קען מען מקיל זיין ביי געוויסע פעלער.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת עקב, י"ג מנחם-אב, שנת תשפ"ג לפרט קטן

מרת ... תחי'

אייער מאן האט מיר געשריבן אז איר ווילט זיך גט'ן, ער האט מיר געבעטן איך זאל אייך שרייבן אפאר ווערטער.

לדעתי זאלט איר זיך נישט גט'ן, און אז איר שפירט נישט קיין קליק מיט אייער מאן - איז דאס נישט קיין סיבה זיך צו גט'ן; איר האט א מאן וואס טשעפעט אייך נישט, ער איז גוט צו אייך, זאלט איר אים נישט אוועק ווארפן.

וואס ווייסט איר וואס פאר א גליקן איר וועט טרעפן...? וואס ווייסט איר וואס וועט זיין מיט אייך...? איך קען אייער מאן, ער איז א טייערער אינגערמאן, אן איידעלער, א וואוילער; טוט נישט די נארישקייט זיך צו גט'ן צוליב דמיונות וואס חבר'טעס זאגן, ווי אזוי מען שפירט און ווי אזוי עס קליקט.

איך האב נישט קיין אייגענע אינטערעס, איך וויל נאר דאס גוטס ביי ענק.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת עקב, י"ג מנחם-אב, שנת תשפ"ג לפרט קטן

מרת ... תחי'

איך האב ערהאלטן אייער בריוו.

הערט נישט אויס די וואס רעדן צו אייך קעגן אייער מאן וכו', ווייל ווער עס רעדט צו א פארפאלק זיך צו גט'ן - דער איז א שליח פונעם שטן, זאל זיין ווער זאל נאר זיין.

איך בעט אייך זייער, שטארקט אייך מיט אמונה אינעם אייבערשטן, גלייבט באמונה שלימה אז וואס עס גייט אריבער אויף אייך איז נאר לטובה, און וויסן זאלט איר, מיט אלע שוועריקייטן וואס גייט אריבער אויף אייך - איז דאס נאכאלץ אסאך גרינגער ווי זיך גט'ן און זיין עלענד, אפגערעדט די צער וואס די קינדער גייען אריבער ווען טאטע און מאמע זענען צעטיילט; נאר אפילו פאר אייך אליין וועט זיין אסאך שווערער.

עס בוזשעווען ווינטן פון די לינקע גאס און עס שניידט אריין אין היימישע הערצער מיט געדאנקען פון די סטרא אחרא, זיי זאגן: "הער אויף ליידן", "גט זיך און פטור פון אלע צרות", און צענדליגער און הונדערטער משפחות צעטיילן זיך השם ישמרינו, און נאכדעם איז אזוי ביטער; מען קען זיך נישט פארשטעלן די ביטערע טעם וואס א גרוש און א גרושה שפירן, ערגער ווי טויט השם ישמרינו; מען איז פארוואגלט און פארווארפן, מען האט נישט קיין פלאץ אויף די וועלט.

אנטלויפן פונעם מאן מאכט נישט גרינגער, עס מאכט נאר שווערער; איין עצה איז דא, אנטלויפן צום אייבערשטן און נעמען די עצה פון רבי'ן, פון אזמרה (לקוטי מוהר"ן חלק א', סימן רפב), זוכן גוטס אין זיך און זוכן גוטס אין יענעם; זוכט גוטע פינטלעך אין אייער מאן און טראכטס פון דעם, און לויבט אים און רימט אים - וועט אייך ווערן גרינגער.

דאנקט יעדן טאג דעם אייבערשטן אויף די חסדים וואס ער טוט מיט אייך - וועט איר אנהויבן שפירן א שטארקע נאנטקייט צום אייבערשטן, עס וועט אנהויבן קומען א טעם אין לעבן און אלע פראבלעמען וועלן אוועקפאלן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

מרת ... תחי'

זעט צו היטן אויף אייער געזונט. מען מוז עסן, בפרט אין די חדשים וואס מען ווארט למזל טוב דארף מען זייער אכטונג געבן צו עסן געזונט און נעמען די ריכטיגע ווייטאמין צו האבן כח.

דער הייליגער בעל שם טוב זכותו יגן עלינו זאגט, 'היטן אויף די געזונט מוז מען מער ווי היטן אויף די נשמה, ווייל א קליינע לאך אין גוף איז א גרויסע לאך אין די נשמה'; ווייל אויב מען ווערט אפגעשוואכט פיזיש - קען מען נישט דינען דעם אייבערשטן, מען ליגט אין בעט און מען טוט גארנישט.

איך שרייב אייך דאס נאר ווייל אייער מאן שרייבט מיר ער בעט מיר איך זאל אייך מחזק זיין, ער שרייבט אז איר עסט גארנישט, איר זענט אין א סכנה.

זאגט שמות הצדיקים. מוהרא"ש זאגט פאר פרויען וואס ווארטן, מען זאל זאגן אין די חדשים "שמות הצדיקים" - נעמען פון צדיקים, און בעטן דעם אייבערשטן אז בזכות די הייליגע צדיקים זאל מען האבן גרינג דאס קינד. ווייל דער רבי זאגט (ספר המדות אות צדיק חלק ב', סימן כ): "עַל יְדֵי הַזְכָּרַת שֵׁמוֹת הַצַּדִּיקִים יְכוֹלִים לְהָבִיא שִׁנּוּי בַּמַּעֲשֶׂה בְּרֵאשִׁית, כְּלוֹמַר לְשַׁנּוֹת הַטֶּבַע", דורכן דערמאנען די נעמען פון צדיקים קען מען טוישן די טבע; זאלט איר זאגן די נעמען פון צדיקים וואס איר געדענקט אויסנווייניג, צום ביישפיל: אברהם אבינו, יצחק אבינו, יעקב אבינו, משה רבינו, אהרן הכהן, יוסף הצדיק, דוד המלך, שלמה המלך, רבי שמעון בר יוחאי, רבי יצחק לוריא אשכנזי, רבי ישראל בעל שם טוב, רבי נחמן בן פיגא מברסלב, רבי נתן מברסלב, מוהרא"ש מיבנאל וכו' וכו', און נאך נעמען פון צדיקים וואס מען געדענקט, און נאכדעם זאלט איר זאגן די תפילה:

"יְהִי רָצוֹן מִלְּפָנֶיךָ אָבִי שֶׁבַּשָׁמַיִם, אִין דִי זְכוּת וָואס אִיךְ הָאבּ דֶערְמַאנְט דִי נֶעמֶען פוּן דִי צַדִּיקִים, בִּזְכוּת זֵייעֶר תּוֹרָה, זֵייעֶרֶע מַעֲשִׂים טוֹבִים אוּן זֵייעֶר מְסִירַת נֶפֶשׁ, וִוי זֵיי הָאבְּן זִיךְ מוֹסֵר נֶפֶשׁ גֶעוֶוען פַאר דַיינֶעט וֶועגְן, זָאלְסְטוּ מִיר הֶעלְפְן אִיךְ זָאל גֶעבּוֹירְן גְרִינְג אַ גֶעזוּנְט קִינְד בְּרַמַ"ח אֵיבָרִים וּשְׁסָ"ה גִּידִים; אִיךְ זָאל זוֹכָה זַיין אַרִיבֶּער צוּ גֵיין דִי אַלֶע טֶעג וָואס אִיךְ וַוארְט גְרִינְגֶערְהֵייט. נֶעם אַוֶועק פוּן מִיר אַלֶע מִינֵי עַיִן הָרַע'ס אַז קֵיינֶער זָאל מִיךְ נִישְׁט קֶענֶען שֶׁעדִיגְן. הֶעלְף מִיר אִיךְ זָאל זוֹכָה זַיין צוּ הָאבְּן עֶרְלִיכֶע קִינְדֶער וָואס וֶועלְן טוּן דַיין וִוילְן זֵייעֶר גַאנְץ לֶעבְּן. רִבּוֹנוֹ שֶׁל עוֹלָם הֶעלְף מִיר אִיךְ זָאל זַיין גֶעזוּנְט אוּן שְׁטַארְק מַיין גַאנְצֶע לֶעבְּן, אִיך זָאל אֵייבִּיג טוּן נָאר גוּטֶע מַעֲשִׂים וָואס דוּ וֶועסְט הָאבְּן פוּן דֶעם אַ נַחַת רוּחַ, יִהְיוּ לְרָצוֹן אִמְרֵי פִי וְהֶגְיוֹן לִבִּי לְפָנֶיךָ, יְ"יָ צוּרִי וְגוֹאֲלִי, אָמֵן כֵּן יְהִי רָצוֹן".

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

... תחי', מחנה בית פיגא ברסלב

איך הער זייער גוטע גריסן אויף אייך פון די לערערינס און פון די סטעף, און איך הער אז איר זענט א גרויסע בעלת חסד; א גרויסע מצוה טוט איר אז איר געבט זיך אפ מיט די צוויי קינדער פון משפחת  ... וואס דער טאטע איז אין שפיטאל. מען קען זיך נישט פארשטעלן דאס גרויסקייט פון טון חסד פאר אנדערע, מוהרא"ש זאגט: "משיח וועט קומען צוליב די גוטע אידן וואס טוען חסד"; ווער עס געבט זיך אוועק פאר א צווייטן איד - דער איז מקרב די גאולה.

דער הייליגער בעל שם טוב זכותו יגן עלינו האט געזאגט: "א נשמה קומט אראפ אויף די וועלט פאר זיבעציג יאר, עס גייט איבער אויף אים וואס עס גייט איבער וכו', אבי ער זאל א טובה טון פאר א צווייטן איד".

וואס איר דארפט - בעטס דעם אייבערשטן אין אייער שפראך, און אויך וואס עס שטערט אייך - זאלט איר דערציילן דעם אייבערשטן.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

לכבוד ... נרו יאיר מנהל תלמוד תורה היכל הקודש, קרית ברסלב

די טריפס וואס מען מאכט - איז נישט לפי רוחי; איך שרייב דיר דאס ווייל די מוסד ווערט גרויס און נישט יעדע זאך פרעגט מען מיר, דו אלס מנהל וויל איך זאלסט וויסן אז די טריפס איז נישט לפי רוחי.

מוהרא"ש האט אוועקגעשטעלט אין יבנאל חדר, אין יבנאל סקול – זיי זאלן נישט גיין הוצקען מיט די קינדער, נאר גיין אויף מקומות הקדושים און אויפן וועג זיך אפשטעלן זיך אויסלופטערן ביי א וואסער, אדער צווישן שיינע גראז און ביימער, עסן און שפילן, אבער נישט גיין אויף סכנה'דיגע פלעצער.

ביי אונז אין אמעריקע איז אויך דא מקומות הקדושים; מען קען נעמען די קינדער קיין קרית יואל צום ציון פון הייליגן רבי'ן פון סאטמער זכותו יגן עלינו, קיין מאנסי צום ציון פון ריבניצער רבי זכותו יגן עלינו אדער קיין קווינס צום אוהל, און אויפן וועג קען מען זיך אפשטעלן זען די נאטור, די וואונדער פונעם אייבערשטן.

עס פעלט בכלל נישט אויס נעמען קינדער פאָרן שעות אויף שעות, עס איז נישט לפי רוחי.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

מרת ... תחי'

איך האב ערהאלטן אייער בריוו.

אז אייער מאן קומט נישט צו די שיעורים אין ישיבה - איז ער נישט קיין מתנגד און נישט קיין חסיד שנפל. טרייבט נישט איבער; איר האט א טייערע מאן, א גאלדענע הארץ.

דא איז נישט קיין חסידות ווי אלע דארפן קומען צו די שיעורים; די שיעורים זענען פאר בחורים, עס איז בכלל נישט פאר אינגעלייט; וואס דארפט איר זיך אויפעסן אייער געזונט אז אייער מאן גייט נישט צו די ראש ישיבה'ס שיעורים?!

דאנקט דעם אייבערשטן - וועט איר זען ניסים.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

מרת ... תחי'

איך האב ערהאלטן אייער בריוו.

פארבינדט זיך מיטן דיין און פרעגט אים וואס צו טון, ווי אזוי זיך צו פירן. שעמט זיך נישט צו דערציילן די גאנצע מעשה; אז איר האט יעצט געטראפן די שאלות און אז איר האט אינגאנצן פארגעסן פון די שאלות און איר האט ווייטער געלעבט אין שטוב וכו' השם ישמרינו; דער דיין וועט אייך מדריך זיין וואס צו טון.

אונס רחמנא פטריה, ווערט נישט פארלוירן.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ד' פרשת עקב, חמשה עשר באב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

דו פרעגסט אויף וואס דו מעגסט זיך שטעלן ביי זיווג שני; די אלע זאכן אויף וואס דו שטעלסט זיך איז זייער שיין און זייער פיין, אבער קוק זיך אן, קוק ווי די יארן גייען אריבער; שוין אזויפיל יאר וואס דו ביסט אליין, עולם חשך בעדך, פארוואס זאלסטו נישט חתונה האבן? אזוי ווי די הייליגע תורה זאגט, (בראשית ב, יח): "לֹא טוֹב הֱיוֹת הָאָדָם לְבַדּוֹ", עס איז נישט גוט צו זיין אליין, נישט חתונה געהאט; וואס איז דער זאך פון זיך קלויבן? מען דארף חתונה האבן, טון דעם רצון פונעם אייבערשטן.

זיין אליין איז נישט קיין עסק. דאס וואס דו זאגסט וועגן דיינע קינדער; געלויבט דעם אייבערשטן, דיינע קינדער זענען מסודר, זיי האבן אלע ווארעמע שטיבער ווי זיי האדעווען זיך; יעצט איז די צייט פון קוקן אויף זיך, דו דארפסט חתונה האבן.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ה' פרשת ואתחנן, ט' באב, שנת תשפ"ג לפרט קטן

לכבוד ... נרו יאיר

יעצט זומער ווען איך בין מנהל וויל איך באקומען יעדן טאג א טעקסט מעסעדזש ווען מען איז אנגעקומען אין קעמפ, (נישט אין פארקינג לאט, נאר ביי די קינדער).

אויך אויב מען גייט אוועק אינמיטן טאג דארף מען מיר דאס שרייבן.

בעזרת ה' יתברך - יום ג' פרשת ואתחנן, ז' מנחם-אב, שנת תשפ"ג לפרט קטן

לכבוד ... נרו יאיר

מזל טוב פארן אפשערן פון דיין זון, דער אייבערשטער זאל העלפן זאלסט האבן אסאך נחת פון אים און פון אלע דיינע קינדער בזכות וואס דו העלפסט אזוי געטריי די מוסדות מיט דיין גאנצע הארץ.

איך בעט דיר זייער, העלף מיר טרעפן א בנין פאר אונזערע קינדער; מיר דארפן וויכטיג א נייעם גרויסן בנין פאר די מוסד. עס איז אינטערעסאנט, מיר האבן קוים אנגעהויבן די שטעטל, קוים אנגעהויבן די חדר און מיר האלטן שוין ביי אפאר הונדערט קינדער - אינגלעך און מיידלעך; מיר האבן נישט קיין פלאץ וואו צו לייגן די קינדער.

פון הימל שטופט מען אונז צום וואנט, מיר זאלן שרייען און דאווענען פאר א בנין פארן תלמוד תורה. אינטערעסאנט, אמאל האבן מיר נישט געהאט געלט צו קויפן - האבן מיר געדארפט דאווענען מיר זאלן קענען קויפן, היינט איז דא געלט, מיר האבן א נדבן - איז נישטא א פלאץ וואו צו בויען, דארפן מיר ווייטער צוקומען צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ואתחנן, ז' מנחם-אב, שנת תשפ"ג לפרט קטן

מרת ... תחי'

איך האב ערהאלטן אייער בריוו.

א שאד אז זי וויל זיך גט'ן, זי וועט נישט באקומען א בעסערער מאן ווי אים; ער איז א גאלדענער מענטש מיט גוטע מידות, א שאד א שאד.

איז וואס אז ער איז נישט קיין שטארקער, ער קען נישט מחליט זיין; וועגן דעם גט מען זיך?

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ג לפרט קטן

לכבוד ... נרו יאיר

רבי נתן איז אמאל געווען ביים רבי'ן (שיחות הר"ן, סימן שב) און דער רבי רופט זיך אן אפאר ווערטער וואס האט זייער באנומען רבי נתן, דער רבי זאגט אים: "דער עיקר איז 'מִבֶּטֶן שְׁאוֹל שִׁוַּעְתִּי'", דאס וואס שטייט ביי יונה הנביא (יונה ב, ג) ווי ער האט געשריגן צום אייבערשטן ווען די פיש האט אים איינגעשלינגען.

דאס איז א טיפע לימוד פאר אונז; אז מען זעט זיך אין שאול תחתית, מען איז איינגעשלינגען ביים יצר הרע, זאל מען שרייען צום אייבערשטן: "רבונו של עולם, האב אויף מיר רחמנות; העלף מיר! איך וויל זיין אן ערליכער איד".

נעם א טייל אינעם יערליכן קאמפיין, גיי נאך געלט צו דיינע באקאנטע; האב נישט קיין בושה צו בעטן צדקה, מאך נישט קיין מציאות פון קיינעם, אזוי וועט דיר זיין גרינגער צו בעטן צדקה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ום ב' פרשת ואתחנן, ו' מנחם-אב, שנת תשפ"ג לפרט קטן

לכבוד ... נרו יאיר

איך האב ערהאלטן דיין בריוו.

געב דיין שווער סנדקאות, ובזכות די מצוה פון כיבוד אב - וועסטו זוכה זיין צו ערליכע דורות.

עס איז טאקע א גרויסע זאך צו געבן סנדקאות פאר א צדיק, אבער כיבוד אב איז זייער א גרויסע מצוה. אזוי אויך מכבד זיין א שווער איז זייער א גרויסע זאך, עס ברענגט שלום און שלום ברענגט אלע ברכות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ואתחנן, ז' מנחם-אב, שנת תשפ"ג לפרט קטן

לכבוד ... נרו יאיר

א גרויסן יישר כח פאר זיין אזא גוטע רבי און פארן זיין א געטרייער באס דרייווער; וואס מען טוט פאר די מוסד איז נצחיות, בפרט אז מען ברענגט קינדער צו לערנען און מען טראגט זיי אהיים - דאס איז נישט א פראסטע ארבעט, דאס איז א הייליגע ארבעט; דארפסט זיך זייער פרייען אז דיינע יארן גייען אריבער מיט אזעלכע הייליגע זאכן.

האסט נישט קיין אנונג וואס מענטשן מוטשען זיך. נעכטן איז צו מיר געקומען א אינגערמאן, ער האט געקויפט אן אינוועסטמענט, ער האט געבארגט אויף שווערע ציפעדיגע פראצענט; יעצט שטעלט זיך ארויס אז איינער פון די קרובים פונעם מוכר שרייט אז עס איז גארנישט יענעמ'ס, עס איז זיינ'ס; זיי קריגן זיך שוין דריי יאר אין קארט, ביז דערווייל צאלט ער ציפעדיגע ריבית, די טייטל קאמפעני זאגט 'ווארט, מען וועט זען ווער איז גערעכט'; בקיצור, דער אינגערמאן זאגט עס קאסט אים הונדערטער טויזנטער דאלער, ער קען נישט אנגיין מער. דאס איז א אינגערמאן וואס אלע טראכטן 'ער האט עס', 'ער מאכט עס', 'ער האט שווערע געלטער', און קוק ווי ער ליידט; יעצט פרעג איך דיר, אז דו ביסט א מלמד, דיין טאג גייט אריבער מיט אידישע קינדער, ארבעסט טאקע שווער אבער עס וועט בלייבן דיין ארבעט לנצח נצחים...

איך בעט דיר זייער זאלסט דערציילן יעדע פרט פארן מנהל נרו יאיר, יעדע פרט ופרט וואס טוט זיך אין קלאס און אויפן באס; געענדיגט מיט נישט רעדן, דער מנהל דארף וויסן יעדע פרט וואס טוט זיך, יעדן טאג זאלסטו אים עפעס דערציילן, ווייל נאר אז מען ארבעט אינאיינעם קען מען מצליח זיין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ום ג' פרשת ואתחנן, ז' מנחם-אב, שנת תשפ"ג לפרט קטן

לכבוד ... נרו יאיר

יישר כח פארן לערנען מיט מיינע קינדער דעם בלאט גמרא יעדן טאג, איך האב זייער הנאה. איך שמועס מיט מיין זון, איך פרעג אים וואס מען לערנט, ער זאגט מיר נאך פון אויסענווייניג זאכן פון די גמרא; ממש וואונדערליך ווי דו לייגסט אריין אין יונגע קינדער זיי זאלן ארויסנעמען יעדן טאג פונעם בלאט גמרא ידיעות התורה, און א באזונדערע יישר כח פארן זיי נעמען הפצה, זיי אויסלערנען גיין פארשפרייטן אמונה פאר נשמות ישראל.

ווען דו נעמסט די קינדער הפצה געב אכטונג זיי זאלן נישט האלטן די געלט פאר זיך, די עלטערן זאלן נעמען דאס געלט אדער זאלסטו דאס צוזאמנעמען עס זאל גיין פאר הדפסה פאר קויפן נאך ספרים; עס איז נישט געזונט פאר קינדער צו האבן גרויס געלט.

און א גרויסן יישר כח פאר אלעס וואס דיין ווייב תחי' טוט פאר בית פיגא און פארן מאכן שיעורים פאר ווייבלעך, דאס איז ממש הצלת נפשות, פשוט כמשמעו.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ום ג' פרשת ואתחנן, ז' מנחם-אב, שנת תשפ"ג לפרט קטן

לכבוד ... נרו יאיר

נעכטן האבן די בחורים מיר דערציילט א מעשה פון דיר וואס האט מיך זייער באנומען, איך האב געדאנקט דעם אייבערשטן אז דו ביסט מלמד ביי אונז.

זיי דערציילן אז א קינד האט איינגעמאכט אין כיתה און דו האסט עס באמערקט, און ווען דו האסט געזען אז ארום זיין טיש איז וכו' און באלד וועלן די קינדער דאס באמערקן און ער וועט ווערן פארשעמט, ביסטו אריבער מיט א קאווע און מיט חכמה אויסגעגאסן; האסט געגעבן א שריי: "אוי וויי, די קאווע האט זיך אויסגעגאסן", אזוי איז נישט מעגליך געווען צו כאפן אז דאס קינד האט דארט איינגעמאכט; איך האב געזאגט: "שכוח אייבערשטער אז מיר האבן מלמדים וואס האבן אזא הארץ, טראכטן ווי אזוי אכטונג צו געבן אויף די קינדער ווען זיי מאכן טעותים".

אז דו שטייסט אויף שפעט און דו האסט א פראגע, אדער מקוה אדער גיין אין חדר? איז דער ענטפער: "דו דארפסט גיין אין חדר"; איי איך האב דיר נעכטן געזאגט אז מען קען נישט זיין קיין מלמד ביי אונז נאר אז מען גייט אין מקוה? זאג איך דיר יעצט: "אמת, מען קען נישט זיין קיין מלמד ביי אונז אז מען גייט נישט אין מקוה, און אויך קען מען נישט זיין קיין מלמד - נישט ביי אונז און אין קיין שום פלאץ אויף דער וועלט - אויב מען איז אפילו איין מינוט שפעט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ואתחנן, ז' מנחם-אב, שנת תשפ"ג לפרט קטן

לכבוד ... נרו יאיר

איך בעט דיר זייער, שטארק זיך, געב נישט אויף, ביסט נישט אזוי שלעכט ווי דו מיינסט; פארט ביסטו א איד, ביסט גע'מל'ט, האסט א בארד און פיאות, פארט טוסטו אן תפילין, האסט א מזוזה ביי דיין טיר, גייסט מיט ציצית, פארט עסטו כשר'ס און העיקר ביסטו דאך פיל מיט גוטע ווילן, דו ווילסט זיין גוט און דו גלייבסט אינעם אייבערשטן; דארפסטו זייער פרייליך זיין.

די וואך וועט נישט זיין קיין ליל שישי שיעור.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת ואתחנן, ז' מנחם-אב, שנת תשפ"ג לפרט קטן

לכבוד ... נרו יאיר, מנהל תלמוד תורה היכל הקודש קרית ברסלב

איך האב ערהאלטן דיין בריוו.

מען דארף א באס רבי, אויף יעדן באס; קינדער קענען נישט פארן אן א באס רבי, עס איז זייער וויכטיג. אויך דארפן די מלמדים אדער אנדערע אפווארטן די קינדער ביים אנקומען אין חדר און ביים אהיים גיין, קינדער טארן נישט זיין הפקר פאר אפילו איין סקונדע; סיי אויבן אין פארקינג לאט ביי די באסעס דארפן זיין מלמדים אדער אנדערע צו זען אז די קינדער קומען אראפ דעם בארג, און סיי אונטן ביים בנין דארף מען אפווארטן די קינדער.

בכלל וויל איך דיר זייער בעטן זאלסט רעדן צו די מלמדים קלארע ווערטער אז מען מוז זיין צייטליך, און אויב מען האלט נישט קיין זמנים - זאלסטו נעמען פרישע מלמדים. זאג די מלמדים: "געענדיגט מיט סטראשען, מיר דארפן נעמען די ארבעט ערנסט", און אז א מלמד פרעגט דיר וואס זאל ער טון אויב ער שטייט אויף שפעט, פון איין זייט האט דער ראש ישיבה אים געזאגט ער מוז גיין אין מקוה און פון די אנדערע זייט איז שוין שפעט...? זאלסטו אים זאגן: "געענדיגט מיט די קינדערישקייטן".

קוק גוט וועסטו זען, די מלמדים וואס זענען אין כיתה צייטליך, זיי זענען אין כיתה נאך איידער די קינדער זענען דארט - די האבן הצלחה, די דארפן נישט שרייען און נישט פארגיטיגן, אלעס גייט מיט ישוב הדעת.

איך יאג זיך זייער צו די בחורים, איך וועל נאך רעדן מיט דיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ג לפרט קטן

לכבוד מיין טייערער ... נרו יאיר, מנהל מוסדות היכל הקודש בארץ ישראל

איך פריי זיך זייער אז דו העלפסט אויפשטעלן די חדר אין בני ברק, זאלסט זיין געבענטשט מיט אלע ברכות.

איך וואונטש דיר זאלסט האבן כח צו קענען העלפן סיי די חדר אין ירושלים, טבריה און די נייע חדר אין בני ברק.

אז דו וועסט זיך צובינדן צום אייבערשטן, דו וועסט זיך איבערגעבן צו אים און לעבן מיט א שטארקע אמונה - וועסטו קענען טון און טון.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת דברים, ראש חודש מנחם-אב, שנת תשפ"ג לפרט קטן

מרת .. תחי'

איך האב ערהאלטן אייער בריוו.

אז מען קען אויסארבעטן נישט אוועק ווארפן קיין עסן, נאר געבן פאר משפחות - איז דאס זייער א גרויסע מצוה; סיי נישט עובר זיין אויף בל תשחית און סיי העלפן משפחות וואס קענען נישט איינקויפן, זיי לעבן אין דחקות.

די מיידל ... תחי' איז זייער צעקלאפט, איר דארף מען זייער אויפבויען; זי קומט נישט צייטליך נישט ווייל זי וויל נישט, נאר ווייל זי איז זייער צעקלאפט וכו'.

רעדט מיט די מיידלעך, שמועסט מיט זיי - פון דאס שיינקייט פון זיין א אידישע איידעלע פרוי; לייגט אריין אין זיי א ליבשאפט צו איידלקייט, א ליבשאפט צו די תורה און צו גיין אין די וועג פון צדיקים.

בנוגע די מוזיק ווידיאו וואס איר גייט מאכן מיט די מיידלעך, וויל איך אייך בעטן, מאכט זיכער עס זאל זיין אויף אונזערע השקפה; נעמט ווייבלעך וואס זוכן נישט נאכצומאכן די וועלט, נעמט תלמידות וואס זייער קאפ און מח איז 'דער רבי' און 'מוהרא"ש', נישט ווייבלעך וואס האבן שוין געקוקט אזויפיל מאוויס אין לעבן און געהערט אזויפיל נישט אידישע ניגונים וכו' וכו'.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ד' פרשת ואתחנן, ח' מנחם-אב, שנת תשפ"ג לפרט קטן

... תחי'

איך האב ערהאלטן אייער בריוו.

טוט נישט די נארישקייט נאכאמאל, עס קען זיך ענדיגן זייער ביטער; ווארטס מיט געדולד אז דער אייבערשטער זאל אייך שיקן אייער באשערטע.

אסאך ווייבלעך האבן היינט זייער חרטה אויף וואס זיי האבן געטון אין די יונגע יארן, ווען זיי האבן שטארק געוואלט א כלה ווערן און זיי האבן זיך אליין געזוכט גליקן וכו'.

ווארטס אויס דער אייבערשטער זאל אייך שיקן אייער שידוך.