בריוון פונעם ראש ישיבה שליט"א

בעזרת ה' יתברך - יום א' פרשת האזינו א', א' סליחות, כ"ד אלול, שנת תשפ"ג לפרט קטן

לכבוד ... נרו יאיר

פרשת האזינו גייט די יאר צוויי וואכן, די וואך און קומענדיגע וואך; מען קען שוין מעביר סדרה זיין פון די וואך, הויב אן היינט מעביר סדרה זיין.

שלאג נישט דיינע קינדער, דער רבי האט נישט געלאזט שלאגן. דער רבי האט געזאגט: "וואס מען האט גע'פועל'ט מיט שלעכטנ'ס וואלט מען געקענט פועל'ן גרינגער און בעסער מיט שיינעם".

מיטן אייבערשטנ'ס הילף פאר איך מארגן קיין אומאן; איך נעם מיט מיינע זין פון די זעקס יאר און ארויף. די פלאן איז, מיר פארן קיין פוילן, אין פוילן וועלן מיר זיין אין ליזענסק ביים הייליגן רבי אלימלך זכותו יגן עלינו און פון דארט וועלן מיר פארן קיין אומאן; לויט די פלאן דארפן מיר אנקומען מיטוואך אינדערפרי אין אומאן.

די נסיעה איז טאקע א שווערע, אבער עס לוינט.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת האזינו א', א' סליחות, כ"ד אלול, שנת תשפ"ג לפרט קטן

לכבוד ... נרו יאיר

די שוועריקייטן איז נאר פון פאראויס, איינמאל מען קומט קיין אומאן - צעפאלט די גאנצע דמיון; נישטא קיין גט, נישטא גארנישט; פון פאראויס זעט עס אויס שרעקעדיג.

וואס ברסלב'ער חסידים גייען אריבער צו קענען קומען ראש השנה קיין אומאן - איז נישט קיין שכל'דיגע זאך, מען זעט קלאר ווי די קדושה שלאגט זיך מיט די טומאה; געוואלד און געשריגן, וואס איז אזוי שלעכט אז מען פארט צו צדיקים אויף ראש השנה?! אלע פארן ראש השנה צו זייער רבי, וואס דארף מען אזוי שלאגן און פייניגן דעם ברסלב'ן חסיד? אלא מאי מוז זיין אז דא איז א מלחמה פון די קדושה מיט די טומאה.

די מניעות - אז מען איז זוכה צו צעברעכן - ווערט אזוי זיס, עס ווערט נעימו"ת, עס ווערט ליכטיג.

אינעם ליד פון רבי יצחק ברייטער זכרונו לברכה, זינגט ער: "שׁוֹמְרִים זֹאת תַּלְמִידָיו", ברסלב'ער חסידים טוען וואס דער רבי האט געזאגט, "מִדֵּי שָׁנָה בְּשָׁנָה לְהִתְרָאוֹת לְפָנָיו", אלע יארן צו קומען קיין אומאן, "שׁוֹבְרִים עַל זֶה מְנִיעוֹת עֲצוּמוֹת", מען צעברעכט אלע שוועריקייטן פון קומען קיין אומאן, "כִּי זֶה תִּקוּנָם הַמְּיֻחָד לִפְנֵי יוֹדֵעַ תַּעֲלוּמוֹת".

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום א' פרשת האזינו א', א' סליחות, כ"ד אלול, שנת תשפ"ג לפרט קטן

לכבוד ... נרו יאיר

עס איז כדאי צו לערנען יעצט פאר די הייליגע טעג מסכת ראש השנה, מסכת יומא און מסכת סוכה. מוהרא"ש זאגט, אויסער די שיעורים קבועים וואס מיר האבן - איז גוט צו לערנען די מסכתא פונעם יום טוב וואס קומט, מוהרא"ש פלעגט דאס אנרופן א באקשיש (א באנוס רופט מען אין אראביש באקשיש).

זיי מוחל אלע וואס האבן דיר וויי געטון, האלט נישט קיין האס אין זיך, האלט נישט קיין פיינטשאפט אין זיך; חזר אמונה, אלעס וואס איז אריבער - איז פונעם אייבערשטן, עס איז נישט דער און נישט יענער.

אז מיר וועלן רייניגן אונזער הארץ פון שנאה, פון נקמה - וועט דער אייבערשטער אונז מוחל זיין.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת נצבים וילך, י"ט אלול, שנת תשפ"ג לפרט קטן

מרת ... תחי', מנהלת בית פיגא

נישטא די ווערטער ארויס צו ברענגען אייערע זכותים וואס איר האט פון וואס איר געבט זיך אזוי אוועק פאר אונזערע קינדער, זיי מחנך זיין מיט אמונה, מיט קדושה וצניעות און מידות טובות.

עס איז גוט אז איר וועט נישט זיין א טיטשער קומענדיגע יאר, היות די מוסד ווערט גרעסער – דארפן די קינדער און די לערערינס א מנהלת וואס מען קען רעדן וכו'; כל זמן די מוסד איז געווען קליין האט איר געקענט זיין מנהלת אינאיינעם מיט טיטשן, אבער יעצט דארף מען קענען צוקומען צו אייך מער צייט.

איך ווארט יעדע וואך אויף צו הערן א באריכט פון סקול.

כתיבה וחתימה טובה.

בעזרת ה' יתברך - יום ד' פרשת נצבים וילך, כ' אלול, שנת תשפ"ג לפרט קטן

לכבוד מיין טייערער ... נרו יאיר

אינגעלייט און בחורים זאגן מיר וועכנטליך אז זיי זענען זיך מחי' מיט דיינע דיבורים וואס דו רעדסט ביי ספורי מעשיות און ביי שלש סעודות. דו גיסט אזויפיל חיזוק; אפילו א טרוקענער ווערט אנגעטרונקען פון די פיינע זיסע קוואל וואסער וואס קוועלט פונעם נחל נובע מקור חכמה.

רעד נאר חיזוק; מענטשן זענען אזוי צעבראכן, אלע וואס קומען אין שול – די זענען זעקלעך צרות, זעקלעך פראבלעמען, צעבראכן און צעשאסן, קיינער איז נישט אינטערעסירט יעצט אויף קריטיק, מען דארף זיי באגיסן מיט עמערס וואסער, חיזוק פון הייליגן רבי'ן.

ליין פאר בריוו פון אשר בנחל אידיש, אדער עצתו אמונה וכו'.

בעזרת ה' יתברך - יום ד' פרשת נצבים וילך, כ' אלול, שנת תשפ"ג לפרט קטן

טייערער ליבער ... נרו יאיר

איך בענק זיך נאך דיר, איך האב דיר שוין אזוי לאנג נישט געזען; פארוואס קומסטו מער נישט טרינקען פון הייליגן רבינ'ס קוואל? איך וויל זיך מיט דיר מחזק זיין, קום צו די שיעורים, קום צום דאווענען, שטופ אריין דעם קאפ צווישן תלמידי היכל הקודש.

שטארק זיך מיט די עצות פון רבי'ן – התבודדות ותפילה און שיעורים בכל התורה כולה, על פי סדר דרך הלימוד פון רבי'ן (המבואר בשיחות הר"ן, סימן עו). גיין מיט די ווערטער פון רבי'ן, פון "אחד הי' אברהם", מען קען נאר דינען דעם אייבערשטן אז מען קוקט נישט אויף קיינעם, מען דינט דעם אייבערשטן, מען טוט וואס מען דארף טון.

כתיבה וחתימה טובה.

בעזרת ה' יתברך - יום ד' פרשת נצבים וילך, כ' אלול, שנת תשפ"ג לפרט קטן

לכבוד מיין טייערער ... נרו יאיר

שוין א לאנגע צייט האב איך נישט געהערט פון דיר, איך האף אז דו שטארקסט זיך מיט די עצות פון רבי'ן, מיט התבודדות ותפילה און מיט דיינע שיעורים אויפ'ן סדר דרך הלימוד (המבואר בשיחות הר"ן, סימן עו).

רבי נתן האט אמאל געטראפן א ברסלב'ער חסיד מיט א גרויע ווייסע בארד, האט רבי נתן אים זייער אויסגעלויבט, ער האט געזאגט: "א ווייסע בארד און א ברסלב'ער חסיד?!" ווייל בדרך כלל קומט דער סמ"ך מ"ם און קילט אפ דעם מענטש פון רבי'ן.

מאך זיך א שיעור אין די הייליגע ספרים – וועסטו האבן כח אנצוגיין בעבודת ה', בפרט אין די הייליגע בריוו פון ספר אשר בנחל; אז דו וועסט דאס לערנען – וועסטו קיינמאל נישט אויפגעבן.

בעזרת ה' יתברך - יום ד' פרשת נצבים וילך, כ' אלול, שנת תשפ"ג לפרט קטן

מרת ... תחי', קרית ברסלב

דאס איז די וועג; זייט שטארק מיט די וועג, אויסלערנען דרך ארץ פאר די מיידלעך; דא רעדט מען נישט פון קליינע קינדער, דא רעדט מען פון גרויסע קינדער, מען מוז אויסלערנען "דרך ארץ".

הלוואי וואלטן אלע טיטשערס געשטאנען אויף 'דרך ארץ', פארלאנגט פון די קינדער דיסציפלין; אז ווען א טיטשער רעדט – קען מען נישט רעדן און נישט זיך אויפשטעלן וכו' וכו'.

האט נישט מורא אז די קינדער וועלן אייך נישט ליב האבן, קינדער האבן ליב א טיטשער וואס איז שטרענג און הארציג; אז מען האט באמת ליב די קינדער – קען מען אסאך אסאך פארלאנגען.

בעזרת ה' יתברך - יום ד' פרשת נצבים וילך, כ' אלול, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

איך האב דיר שוין אסאך געשריבן, דאך וויל איך דיר נאך שרייבן, ווייל מען דארף אסאך חיזוק אויף העלפן די ווייב, זיין אין שטוב בגוף ובמח.

די גרעסטע זאך איז העלפן די ווייב מיט די קינדער, א ווייב שפירט אויב דער מאן איז דא פאר איר אדער ער דרייט מיט איר ארום, אז זי האט הילף פונעם מאן קען זי ברענגען קינדער און זיי מחנך זיין. דערפאר בעט איך דיר זייער, האלט דיין שטוב העכער אלעס און דאס זאל זיין פריאריטעט נומער איינס, אזוי וועט דיין ווייב האבן כח און אינאיינעם וועלן ענק אויפציען הערליכע ערליכע דורות.

אז דו ווילסט מיר העלפן אין שטעטל – דארף איך איין זאך, עס זאל זיין ליבשאפט צווישן אייך, עס איז מיר נמאס צו הערן ווי מען קריגט זיך; איך ווער פון דעם קראנק און איך ווער פשוט פארעקלט פון זיך געפינען צווישן מחלוקות.

בעזרת ה' יתברך - יום ד' פרשת נצבים וילך, כ' אלול, שנת תשפ"ג לפרט קטן

לכבוד מיין טייערער ... נרו יאיר, קרית ברסלב

ברוכים הבאים בשם השם, מיר פרייען זיך זייער פאר אזא חשוב'ע משפחה ביי אונז אין שטעטל, דער אייבערשטער זאל ענק באגליקן ענק זאלן קענען ערציען אין שטעטל ענקערע קינדער לתורה ויראת שמים.

טייערער ..., זיי זיך קובע צו לערנען פארטאגס; אין שטעטל איז דא צוויי וועגן, אדער קען מען זיין א גרויסער צדיק, אדער א גרויסער ליידיגגייער; אזוי האט רבי נתן געזאגט: "אין וואלד קען מען זיין אדער א גרויסער צדיק, זיך מתבודד זיין און עוסק זיין אין לימוד התורה, אדער זיין א גרויסער הולטיי"; בעט איך דיר זאלסט גיין שלאפן פרי און אויפשטיין פארטאגס, אז מען גייט שלאפן פרי – קען מען נאך זאגן תיקון חצות פארטאגס, נאכדעם לערנען אפאר שעה שיעורים כסדרן און נאכדעם אנהויבן דעם טאג.

מאך נישט קיין פלענער, טו צו דער זאך. עס זענען דא אינגעלייט וואס וואוינען שוין פיר יאר אין שטעטל און קענען זיך נישט צוזאמנעמען אויפצושטיין לערנען; טו צו דער זאך, זיי זיך קובע צו גיין שלאפן פרי, טו גארנישט ביינאכט.

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן

לכבוד מיין טייערער ... נרו יאיר

איך בין אזוי צעטרייסלט פון די מעשה וואס דו האסט מיר דערציילט, אז דער שלום בית [חרוב-]מאכער האט געזאגט פאר דיין איידעם און טאכטער זאלן זיך צעטיילן השם ישמרינו. איך בין גרייט צו רעדן מיט זיי, איך בין גרייט אוועק צו געבן אסאך צייט פאר דעם; לאז מיר וויסן אויב זיי ווילן קומען צו מיר.

שומי שמים, וואס די שלום בית [חרוב-]מאכער טוען מיט כלל ישראל. אויף דעם האט שוין מוהרא"ש אזויפיל געשריבן און גערעדט, ווי מען זאל זיך אכטונג געבן פון גיין צו א שלום בית [חרוב-]מאכער. די ערשטע סימן פון א חרוב מאכער איז – אז ער נעמט געלט, דאס איז שוין א רוטע לאמפ, דאס ווייזט אז ער דארף דא פרנסה; וועט ער זיי אין דער ערד לייגן פאר זיין תאוות ממון, השם ישמרינו.

ברודער, פארליר זיך נישט, שטארק זיך; דו זיי ממשיך מיט תפילה והתבודדות און לאז מיר וויסן אויב זיי ווילן זיך לאזן רעדן צו מיר.

א גמר חתימה טובה.

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן

לכבוד מיין טייערער ... נרו יאיר

איך האב ערהאלטן די פינף הונדערט דאלער פאר פדיון נפש. דער אייבערשטער זאל העלפן עס זאל נמתק ווערן די דינים פון דיר על ידי פלא עליון, וואס איז חסדים גדולים ורחמים גמורים אן קיין דינים.

א גרויסן יישר כח פארן צושטעלן די נסיעה קיין אומאן פאר די גאנצע קהילה, און פארן זארגן פאר מיר און פאר מיינע קינדער מיר זאלן האבן א גרינגע רייזע אהין און צוריק.

דער אייבערשטער זאל דיר פארשרייבן א זיסע יאר, נחת פון דיינע קינדער און הצלחה בכל ענינים.

א גמר חתימה טובה.

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן

לכבוד מיין טייערער ... נרו יאיר

איך האב ערהאלטן די טויזנט דאלער פאר פדיון נפש, דער אייבערשטער זאל דיר געבן א זיסע יאר מיט הצלחה אין אלע דיינע וועגן.

לכבוד די נייע יאר נעם זיך פאר צו רופן דיינע עלטערן יעדן טאג. די מצוה פון כיבוד אב ואם איז היינט אזוי גרינג צו מקיים זיין, מיט איין טעלעפאן רוף קען מען זיך איינקויפן עולם הבא; מיט אפאר גוטע ווערטער, מיט זיך אינטערעסירן וואס זיי מאכן און זיי געבן די געפיל אז מען זארגט זיך פאר זיי – איז מען זוכה צו די בעסטע ברכות.

זיי מחזק דיין ווייב זאל זיך אפגיסן "נעגל וואסער"; אז די מאמע גיסט זיך אפ נעגל וואסער ביים בעט – איז דא קדושה וטהרה אין שטוב און מען איז מצליח מיט די קינדער.

א גמרא חתימה טובה.

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן

לכבוד מיין טייערער ... נרו יאיר וזוגתו תחי'

איך האב ערהאלטן די פינף הונדערט דאלער פאר פדיון נפש, דער אייבערשטער זאל ענק אנשרייבן און פארזיגלען א זיסע געבענטשטע יאר; פאר ענק און פאר די גאנצע משפחה.

טראכטס גוט וועט אייך זיין גוט; די מחשבה האט אזא שטארקע כח אז וואס מען טראכט – דאס פאסירט.

אמאל האט אדל – דעם רבינ'ס טאכטער – זיך זייער נישט גוט געשפירט, דער רבי איז איר געקומען באזוכן און איר געזאגט: "טראכט צו זיך אז עס איז שוין אסאך בעסער", האט אדל געפרעגט: "ווי אזוי קען איך אזוי טראכטן בשעת איך שפיר שטארקע ווייטאג?" האט דער רבי איר געזאגט: "די מחשבה האט א שטארקע כח, און אז דו וועסט אזוי טראכטן – וועט אזוי זיין.

דאס איז די גרעסטע עבודה, צו טראכטן גוט און צו גלייבן אז דער אייבערשטער מאכט נאר גוט.

א גמר חתימה טובה.

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן

לכבוד מיין טייערער ... נרו יאיר וזוגתו תחי'

איך האב ערהאלטן די צוויי הונדערט דאלער פאר פדיון נפש. דער אייבערשטער זאל העלפן ענק זאלן זוכה זיין צו געהאלפן ווערן מיט קינדער; עס קומט א נייע יאר, דארפן ענק גלייבן אז דער אייבערשטער וועט ענק העלפן, עס וועט נאך ליכטיג ווערן פאר ענק.

איך בעט פאר ענק, איך האב אמונה; איך ווייס דער אייבערשטער וועט ענק העלפן מיט זרע של קיימא.

לכבוד די נייע יאר זאלסטו זיך שטארקן אין דאווענען יעדן טאג דריי תפילות, שחרית מנחה מעריב מיט מנין, און דיין ווייב זאל זיך פארנעמען זיך צו שטארקן מיט אפגיסן נעגל וואסער פאר א זכות איר זאלט שוין נפקד ווערן בזרע של קיימא.

גמר חתימה טובה.

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן

לכבוד מיין טייערער ... נרו יאיר לינדען, ניו דזשערסי

וואויל איז דיר אז דו האסט זוכה געווען צו קומען צום הייליגן רבי'ן אויף אומאן אויף ראש השנה, דער הייליגער רבי האט געזאגט (חיי מוהר"ן, סימן תג): "וּמִי שֶׁזּוֹכֶה לִהְיוֹת אֶצְלוֹ עַל רֹאשׁ הַשָּׁנָה, רָאוּי לוֹ לִשְׂמֹחַ מְאֹד מְאֹד", ווער עס איז געווען ביי אים ראש השנה – דארף זיך זייער זייער פרייען א גאנץ יאר.

א איד האט זיך אויסגערעדט צו רבי נתן אז ער האט נישט קיין דיבורים ביי התבודדות, האט אים רבי נתן אזוי ווי אנגעשריגן און געזאגט: "קענסט נישט זאגן טויזנט מאל 'רבונו של עולם ראטעווע מיך'? זאג דעמאלט טויזנט מאל 'רבונו של עולם'"; רבי נתן האט דאס נישט גענומען פאר א תירוץ נישט צו מאכן התבודדות, ווייל מען דארף מאכן התבודדות אפילו מען האט נישט וואס צו רעדן.

נעם צוזאמען די אינגעלייט אין לינדן און רעד צו זיי די דיבורים וואס מען רעדט אין היכל הקודש, פשוט'ע דיבורים. תשפ"ד איז ראשי תיבות: ת'הא ש'נת פ'שוט'ע ד'יבורים; נאר דיבורי אמונה, דיבורי התחזקות.

גמר חתימה טובה.

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

וואויל איז דיר אז דו האסט צעבראכן די מניעות און געקומען מיט דיין זון צום הייליגן רבי'ן קיין אומאן אויף ראש השנה.

ווי גליקליך זענען מיר אז מיר האבן אזא רבי, עס איז טאקע געווען א שווערע נסיעה, אבער דער רבי האט אמאל געזאגט: "ווען איך האב ווען אזא רבי וואס ענק האבן – וואלט איך געגאנגען צופיס"; לאמיר זיך פארשטעלן, מיר זענען געפארן פון ריישא איבער פופצן שעה, דאס צו וואקן מיט די פיס ווייס איך נישט ווילאנג עס קען נעמען, און ווען דער רבי האט דאס געזאגט האט איינער געפרעגט: "און אויף צוריק וואס וואלט דער רבי געטון?" האט דער רבי געזאגט: "איך וואלט געלאפן"; ווייל נאכן זוכה זיין צו קומען צום רבי'ן און הערן אזעלכע ליכטיגע עצות – קען מען אהיימלויפן, עס איז דא א וועג צו לעבן.

א גמר חתימה טובה, א זיסע יאר, א געבענטשט יאר - פאר דיר און פאר דיין גאנצע משפחה און פאר גאנץ כלל ישראל.

בעזרת ה' יתברך - ג' פרשת האזינו ב', ה' תשרי, שנת תשפ"ד לפרט קטן

לכבוד מיין טייערער ליבער ... נרו יאיר

דערמאן זיך די ווערטער וואס מוהרא"ש האט אונז געזאגט מיט יארן צוריק ווען מיר זענען אריבער אין די סקילמאן בית המדרש. מוהרא"ש האט מיך געפרעגט אויב דער קומט נאך דאווענען ביי אונז און אויב דער קומט; ווען איך האב געענטפערט: "ניין", זאגט מיר מוהרא"ש די ווערטער: "א גענעראל שטעלט זיך נישט אפ אין מלחמה ווען עס פאלט א זעלנער".

וואס זאל איך דיר זאגן, מוהרא"ש האט מיך גוט אנגעגרייט; די ווערטער קלינגען מיר אין די אויערן, און ווען עס געבט א ציפ אין הארץ ווי דער מקורב האט זיך אפגעקילט און ווי די משפחה האט איבערגעלאזט היכל הקודש – דערמאן איך זיך די ווערטער וואס מוהרא"ש האט מיר געזאגט און איך שטעל נישט אפ די מלחמה פאר קיין שום פרייז אויף דער וועלט.

עס איז דא צייטן וואס דו קענסט זיך מחזק זיין נאר מיט וואס דוד המלך האט זיך מחזק געווען (שמואל א ל, ו): "וַיִּתְחַזֵּק דָּוִד בַּה' אֱלֹקָיו".

א גמר חתימה טובה.

נאך סוכות וועלן מיר אם ירצה ה' קובע זיין די זמן החתונה.

איך שיק מתנות, אבער דו פיר זיך מיט דיינע מנהגים. מיר ערווארטן נישט קיין מתנות, מיר זענען צופרידן מיט די שידוך אליינס.

בעזרת ה' יתברך - יום ג' פרשת האזינו ב', ד' תשרי, שנת תשפ"ד לפרט קטן

מרת ... תחי', בארא פארק

איך האב ערהאלטן אייער בריוו.

בנוגע מוחל זיין די לערערין און די מנהלת וואס האבן אזוי געפייניגט אייער טאכטער וכו'; נעמט אריין אין אייך די אמונה, אז אלעס וואס איר זענט אריבער, אלע צער און עגמת נפש - אלעס איז פאר אייער טובה און פאר אייערע קינדער'ס טובה; קיינער קען נישט טון שלעכטס אדער גוטס אן דעם וואס מען זאל אויסרופן אויבן אין הימל.

דאס מיינט נישט צו זאגן אז די וואס טוען שלעכטס וועלן נישט באקומען קיין שטראף; וויי און ביטער איז פאר ווער עס טוט וויי א צווייטן איד, ווער עס פייניגט א צווייטן באקומט א שטראף פריער אדער שפעטער. פון די אנדערע זייט דארף מען אבער וויסן אז קיינער און טאקע קיינער קען נישט טון שלעכטס, אלעס איז פון אויבן.

דעריבער בעט איך אייך, חזר'ט אייך אמונה, גלייבט באמונה שלימה אז אלעס איז פון אייבערשטן, אלעס איז נאר אייך צו ברענגען נענטער צום אייבערשטן און צו א שטערקערע אמונה.

מיין מאמע תחי' זאגט: "אויבן אין הימל איז דא א באזונדערע גיהנום פאר די פרינציפלס וואס פייניגן אידישע מאמעס און אידישע טעכטער".

דער אייבערשטער זאל העלפן איר זאלט האבן הצלחה אין אלע ענינים.

א גמר חתימה טובה.

בעזרת ה' יתברך - יום ג' פרשת האזינו ב', ד' תשרי, שנת תשפ"ד לפרט קטן

מרת ... תחי'

בנוגע אייער מאן נרו יאיר; ער איז א טייערער מענטש מיט אויסטערלישע מידות, זעלטן צו געפינען אזא איידעלער, אזא בר דעת און אן ערליכער, עס דארף נישט זיין פאר אייך אזא שווערע זאך אים ארויפצוקוקן און אים שעצן; וואלט ער געווען א נארישער, א נישט קלוגער - איז אויך דא וועגן ווי אזוי מען קען שעצן און ארויפקוקן, איז זיכער אין אייער פאל וואס איר האט א קלוגער מאן, א געלונגענער מאן - דארף אייך זיין גרינג אים צו שעצן.

דער אייבערשטער זאל העלפן איר זאלט האבן הצלחה אין אלע ענינים.

א גמר חתימה טובה.

בעזרת ה' יתברך - יום ה' פרשת נצבים וילך, כ"א אלול, שנת תשפ"ג לפרט קטן

מרת ... תחי'

איך האב ערהאלטן אייער בריוו.

איבערבעטן דארף מען נאר איינעם וועם מען האט וויי געטון; אויב איינער טוט זיך אליינס וויי - זאל זיך יענער אליינס איבערבעטן. אז אייער חבר'טע איז אנגעווייטאגט אז איר האט איר נישט דערציילט אייערע פריוואטע מעשיות וכו'; זי בלאזט, זי רעדט נישט מיט אייך - זאל זי זיך אליינס איבערבעטן ערב ראש השנה און ערב יום כיפור, עס האט גארנישט מיט אייך.

נעמט אייך געזונטע חבר'טעס, ריכטיגע חבר'טעס.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ה' פרשת נצבים וילך, כ"א אלול, שנת תשפ"ג לפרט קטן

לכבוד ... נרו יאיר

איך האב דיר שוין געענטפערט, אז די יאר זאלסטו בלייבן אין שטוב און נישט חרוב מאכן דיין שלום בית, אויף די פאל איז מוטב שיחלל שבת אחת וכו'; איז וואס פרעגסטו מיר נאכאמאל און נאכאמאל?

אז דו פארשטייסט אליינס וואס צו טון - וואס פרעגסטו מיר?

ביטע נעם נישט אוועק מיין צייט, אז דו פרעגסט און איך ענטפער דיר - פרעג נישט איבער.

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת נצבים וילך, י"ט אלול, שנת תשפ"ג לפרט קטן

לכבוד ... נרו יאיר, קרית ברסלב

א גרויסן יישר כח פארן העלפן די מוסד מיט שאפן געלט מיר זאלן קענען אנגיין און נישט צוזאמברעכן.

יעצט דארף איך האבן געלט צו ענדיגן דעם בית החיים, מיר דארפן פינף און זיבעציג טויזנט דאלער פאר די בית החיים. אויך דארף איך צוויי הונדערט טויזנט דאלער פאר די מקוה טהרה אין די נייע געגנט פון שטעטל.

עס איז דא נאך זאכן, אבער די צוויי זאכן דארף איך וויכטיג אויף יעצט.

לאז נישט אפ דיינע שיעורים; אין שטוב זאלסטו מאכן צייט צו העלפן און צו שמועסן מיט דיין ווייב, און שטיי אויף פארטאגס; זיי זיך קובע א צייט פארטאגס צו לערנען אין שול. פארטאגס איז גאר אנדערש, נישטא וואס צו ערלעדיגן, מען קען לערנען מיט א רואיגקייט.

אויך בעט איך דיר, גיי התבודדות; וואוינסט אין שטעטל, טו כאטשיג אין שטעטל וואס דער רבי זאגט, וואס האט מען פון שטעטל אז מען גייט נישט התבודדות צווישן די גראז צווישן די ביימער...

דער אייבערשטער זאל העלפן זאלסט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת נצבים וילך, י"ט אלול, שנת תשפ"ג לפרט קטן

מרת ... תחי', קרית ברסלב

איר קענט זיך נישט פארשטעלן דאס גרויסקייט פון העלפן דער רבי און העלפן די סקול בית פיגא; משמש זיין דעם רבי'ן, העלפן די מוסדות - די זאכן נעמט מען מיט אויף יענע וועלט.

איך וויל אייך זייער בעטן איר זאלט טון אלעס וואס די מנהלת תחי' זאגט, זייט איר רעכטע האנט און טוט נאר וואס זי זאגט אייך. אז זי זאגט עפעס און איר פארשטייט פון מיר אנדערש - זאלט איר ווייטער טון וואס זי זאגט, ווייל דאס איז די הצלחה פון א פלאץ, אז די טיטשערס און ארבעטערס ארבעטן אלע אינאיינעם; ווי נאר מען הויבט אן מיט מחלוקות חס ושלום - צעפאלט אלעס. דעריבער בעט איך אייך, זייט די מנהלת'ס רעכטע האנט, טוט וואס זי בעט, אלעס מיט שמחה; מיט דעם וועט איר מיר זייער העלפן.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.

בעזרת ה' יתברך - יום ג' פרשת נצבים וילך, י"ט אלול, שנת תשפ"ג לפרט קטן

מרת ... תחי'

איך האב ערהאלטן אייער בריוו.

מען דארף נישט גיין צום דאקטער זיך אונטערזוכן, און אפילו אויב מען געפינט עפעס נישט גוט חס ושלום ביי איינע פון די געשוויסטער און דער דאקטער זאגט אז אלע געשוויסטער דארפן קומען זיך אונטערזוכן, ווייל עס איז א זאך וואס האט מיט די גאנצע משפחה - דארף מען נישט גיין; מוהרא"ש זכותו יגן עלינו זאגט בשם צדיקים: "אז מען זוכט זיך - טרעפט מען, דעריבער זאל מען נישט גיין צום דאקטער זיך אונטערזוכן".

עס איז דא אין ספר לקוטי מוהר"ן (חלק ב' סימן א, אות יא) אויסגעשמועסט די גאנצע זאך פון טרעפן א געוויקס השם ישמרינו; דער רבי שמועסט אויס אלע סארט געוויקסן, ווי אזוי עס הויבט זיך אן אינעם מענטש, ביי א טייל איז דאס א גענעטישע (דזשינעריק) זאך, עס קומט נאך פון די עלטערן; דארט זאגט דער רבי אז א מענטש קען זיך אויסהיילן מיט תפילה.

עס איז כדאי צו לערנען די תורה און זאגן די תפילה, און זיך נישט זארגן.

דער אייבערשטער זאל העלפן איר זאלט האבן הצלחה אין אלע ענינים.

א כתיבה וחתימה טובה, א גוט געבענטשט יאר.