בריוון פונעם ראש ישיבה שליט"א

בעזרת ה' יתברך - יום ג' פרשת עקב, י"ד מנחם-אב, שנת תשפ"ו לפרט קטן

לכבוד ... נרו יאיר

פון היינט זעקס וואכן פארן מיר צום הייליגן רבי'ן אויף ראש השנה, זיין אין אומאן. איך וויל דיך מחזק זיין זאלסט איבער שפרינגען אלע בלבולים, ווייל אז דער רבי זאגט (חיי מוהר"ן, סימן תג): "הָרֹאשׁ הַשָּׁנָה שֶׁלִּי עוֹלֶה עַל הַכֹּל", זיין ביי מיר ראש השנה איז גרעסער פון אלעס, און איך וואונדער זיך אויף מיינע תלמידים וואס גלייבן אין מיר, פארוואס זאלן זיי נישט מעורר זיין מיינע מענטשן אז אלע זאלן קומען צו מיר אויף ראש השנה?! קיינער טאר נישט פעלן! "כִּי כָּל עִנְיָן שֶׁלִּי הוּא רַק רֹאשׁ הַשָּׁנָה", ווייל מיין גאנצע זאך איז ראש השנה; און דער רבי האט געהייסן מען זאל מודיע זיין פאר אלע מענטשן וואס גלייבן אין אים, אז ער האט געהייסן קומען צו אים אויף ראש השנה, און ווער עס איז זוכה צו זיין ביי אים אויף ראש השנה דארף זיך זייער פרייען א גאנץ יאר, עיין שם.

גיי אריבער אלע בלבולים וכו' און אלע קושיות און ספיקות וכו' וכו'; ווען מען האט געפרעגט דעם רבי'ן די אלע קשיות האט דער רבי געזאגט (שם, סימן תו): "וועט זיין נאך א קשיא", עס איז דאך נישט די ערשטע קשיא און נישט די לעצטע קשיא, יעדע גוטע זאך און יעדע הייליגע זאך איז ארומגענומען מיט קשיות, מען דארף נישט קוקן אויף דעם.

איך וויל דיר בעטן זאלסט נישט גיין ביינאכט מיט חברים; האסט איין חבר, דאס איז דיין ווייב. ביינאכט נאך מעריב גיי אהיים, על פי רוב די וואס דרייען זיך ביינאכט אין גאס זענען מענטשן אן קיין שטוב, מענטשן וואס האבן נישט קיין משפחה, דו האסט א ווייב מיט קינדער - דארפסטו אהיים גיין, מאך זיך א קבלה טובה נאך תפילת מעריב נישט צו רעדן מיט קיינעם נאר מיט דיין ווייב.

איך וויל דיר פרעגן אויב דו וועסט מיר קומענדיגע וואך ביים קאמפיין העלפן אדער דו וועסט זוכן תירוצים? איך וויל אז אלע זאלן עוסק זיין אין גיין נאך געלט, רופן באקאנטע, משפחה; נישט אבי יוצא צו זיין, נאר מיט די גאנצע הארץ.

די חובות וואס איך האב - איז נישט מיינע, איך זאג דיר מיט אן אמת, דאס איז נישט מיינע, איך האב דאס געבארגט נאר פאר די קהלה; קענסטו נישט שטיין אין דער זייט...

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת עקב, י"ג מנחם-אב, שנת תשפ"ו לפרט קטן

לכבוד ... נרו יאיר

אשרינו מה טוב חלקינו, ווי גליקליך זענען מיר אז מיר ווייסן פונעם הייליגן רבי'ן, מיר ווייסן פון די עצות, שכל און חיזוק פון הייליגן רבי'ן, דער רבי לאזט נישט שלאפן און דער רבי לאזט נישט פאלן; מיט די עצה פון רעדן צום אייבערשטן, אים בעטן נאכאמאל און נאכאמאל ער זאל אונז מקרב זיין צו אים, און אפילו מען זעט ווי מען האלט אין איין פאלן זאל מען נישט אויפגעבן, מיר זאלן וויסן אז די רחמנות פונעם אייבערשטן איז עד אין לשער, דער אייבערשטער האט ליב ווען מען שרייט צו אים.

אמאל איז מוהרנ"ת געקומען צום רבי'ן, דער רבי איז געליגן אין בעט און דער רבי רופט זיך אן (שיחות הר"ן, סימן שב): "דער עיקר איז 'מִבֶּטֶן שְׁאוֹל שִׁוַּעְתִּי'"; דאס וואס שטייט ביי יונה הנביא (יונה ב, ג), ווי ער האט געשריגן צום אייבערשטן ווען די פיש האט אים איינגעשלינגען; אזוי אויך ווען מען שפירט ווי מען איז איינגעשלינגען ביים יצר הרע, מען פאלט אראפ אין שלעכטע מעשים זאל מען שרייען צום אייבערשטן: "רבונו של עולם, האב אויף מיר רחמנות, העלף מיר! איך וויל זיין אן ערליכער איד"; מוהרנ"ת האט זיך אזוי מחי' געווען מיט די פאר ווערטער און געזאגט אז די שיחה איז גאר חשוב און גאר וויכטיג, ווייל אמאל שפירט מען אזוי ווייט, מען שפירט זיך ווי דער ערגסטער מענטש, מען שפירט ווי מען איז אין די בטן הקליפות; זאל מען געדענקען אז אויך פון דארט הערט דער אייבערשטער און עס איז זייער באליבט ביים אייבערשטן.

איך וויל דיר בעטן זאלסט מיר די יאר אויך העלפן ביים קאמפיין, איך נעם דאס זייער פערזענליך, איך וויל יעדער אן אויסנאם זאל גיין נאך געלט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

מרת ... תחי'

דא האט איר א תפילה צו זאגן יעדן טאג:

"הייליגער באשעפער איך לויב דיך און דאנק דיך פאר אלע חסדים און טובות וואס דו טוסט מיר, וויפיל איך זאל נאר דאנקען וועל איך נישט אנקומען צו דאנקען אויף אלעס גוטס וואס דו טוסט מיט מיר.

אייבערשטער איך וויל זיך צו דיר אויסרעדן עפעס גאר פריוואט, מיין יונגסטע שוועסטער האט נאכנישט קיין קינדער און דאס טוט מיר אזוי שטארק וויי, איך קען עס נישט נעמען, ספעציעל ווען איך מאך א שמחה, אנשטאט איך זאל זיך פרייען - ווערט מיין הארץ פארקלעמט מיט די צער פון מיין שוועסטער; אנא ה', העלף מיין שוועסטער זי זאל אויך מאכן שמחות, און העלף מיר איך זאל זיך קענען שטארקן, איך זאל קענען קאנטראלירן מיינע מחשבות, זיך פרייען ביי מיינע שמחות, נישט אויסמישן די שמחות מיט די געפילן וכו', איך זאל דיך שטענדיג דאנקען, און שטענדיג זיין נאר בשמחה, אמן".

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

... נרו יאיר, קרית יואל

איך האב ערהאלטן דיין בריוו מיט די פדיון.

איך בין מתפלל פאר דיינע קינדער זיי זאלן אויסוואקסן ערליך, אויך בין איך מתפלל פאר דיר דו זאלסט זיך קענען דערהאלטן יעצט ווען דו גייסט אריבער דיין פרשה ה' ירחם.

והעיקר זאלסטו נישט פארגעסן צו אויפזוכן גוטס אין דיין חשכות, אין דיין צרה, און דו זאלסט דאנקען דעם אייבערשטן; דאס וועט דיר געבן מוחין און כח צו קענען זיך דערהאלטן און אנגיין אין דיין לעבן, קענען דינען דעם אייבערשטן בשמחה ובטוב לב.

גיי ארויף צום ציון פון הייליגן רבי'ן זכותו יגן עלינו מסאטמער, גיס אויס דיין הארץ און דערצייל דעם אייבערשטן דיין גאנצע פרשה, און אז די הארץ איז פארקלעמט זאלסטו זיך אויסרעדן אן די הארץ, ווייל די טרוקענע תפילות זענען זייער חשוב אין הימל.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

שטארק זיך מיט אלע כוחות, אפילו עס איז דיר ביטער שווער, שוין אזוי לאנג וואס דו דארפסט א שידוך, שוין אזויפיל יאר וואס דו ביסט אליין, און עס גייט איבער וואס גייט איבער; דאך זאלסטו זיך שטארקן באמונה שלמה אז דו האסט אויך א שידוך, און ישועת ה' כהרף עין.

איך בין דיך זייער דאנקבאר, ווייל איך בין איבערגעגאנגען די חשבונות פון די לעצטע אכט יאר וואס מיר מאכן די קאמפיין, אינאיינעם האסטו מיר געהאלפן ברענגען פאר די קהילה א חשבון פון איבער הונדערט און צען טויזנט דאלער, און איך האף אז אויך די יאר וואסטו מיר העלפן גיין נאך געלט.

קומענדיגע וואך דינסטאג, מיטוואך און דאנערשטאג פרשת ראה – וועט אם ירצה ה' זיין די יערליכע קאמפיין פון 'אנשי חיל'; איך בעט דיר זייער, העלף מיר ארויסגיין פון מיינע חובות, די חובות זענען נישט מיינע, דאס בארג איך פאר ענק, צו בויען די קהילה און די מוסדות פאר די דורות הבאים.

הייב אן זאגן יעדן טאג דעם יום תהלים, און זיי מסיים יעדע וואך ספר תהלים, און פלעכט אריין דיינע אייגענע לויב ווערטער און תפילות ובקשות פאר א גוטע שידוך מיט געזונטע דורות.

בעזרת ה' יתברך - יום א' פרשת עקב, י"ב מנחם-אב, שנת תשפ"ו לפרט קטן

... נרו יאיר

איך בעט דיר זייער, שטארק זיך מיט אלע דיינע כוחות, יעדן איינעם פרובירט מען אויס, אויף יעדן איינעם גייט אריבער שווערע ביטערע ניסיונות, און אז מען דערהאלט זיך, מען בלייבט שטארק מיט אמונה אינעם אייבערשטן – איז מען זייער חשוב אין הימל, ווייל אין הימל קוקט מען אנדערש ווי מען קוקט דא, דארט איז געלט נישט חשוב, דארט איז הייזער, אינוועסטמענט, כבוד, מעכטיגקייט – בכלל נישט אויף וואס מען קוקט; דארט קוקט מען נאר אויף דעם, אויף ווער עס האט זוכה געווען צו בלייבן ביי די אמונה, ווער עס האט זיך דערהאלטן אין אלע צרות ויסורים.

קומענדיגע וואך מאך איך א דרייוו אז די גאנצע קהילה זאל ארויסגיין פון די באקוועמליכע לעבן און גיין נאך געלט פאר די קהילה און מוסדות, איך ווייס אז עס זענען דא וואס זאגן אז דאס האט נישט באמת מיטן ראש ישיבה וכו' וכו', עס איז נישט אמת, די קאמפיין איז מיך ארויס צו בעילן פון מיינע חובות וואס איך בארג פאר די קהילה און מוסדות.

איך זע אז במשך די פריערדיגע אכט יאר האסטו זייער ווארעם געהאלפן, דו האסט געברענגט איבער פינף און פופציג טויזנט דאלער נאר פון די קאמפיינס אליין, אויסער וואס דו העלפסט מיר אזוי געטריי, איך האף די יאר וועסטו מיר ווייטער העלפן בכל לב ובכל נפש.

א גרוס פון דיין זון, איך זע אים יעדן פארטאגס לערנען מיט התמדה דא אין שול.

בעזרת ה' יתברך - ערב שבת קודש פרשת דברים, חזון, ג' מנחם-אב, שנת תשפ"ו לפרט קטן

לכבוד מיין טייערער לייבי ראטה נרו יאיר, פאנדרעיזער פון אונזער בית הדפוס דחסידי ברסלב

האסט אוודאי געהערט די פרייליכע נייעס אז איך האב א שידוך געטון מיט מיין טייערער זון החתן הרב נחמן נתן נרו יאיר, מה אשיב לה' כל תגמולוהי עלי, איך בין אזוי פרייליך אז דער אייבערשטער האט מיר געהאלפן און מיר האבן זיך געקענט משדך זיין מיט די חשוב'ע משפחה פון אנשי שלומינו, אונזער טייערער גבאי פון שטעטל.

לכבוד די שמחה שיק איך דיר פינף הונדערט דאלער פאר די קרן הדפסה, צו דרוקן די ספרים פון הייליגן רבי'ן, די עצות פון הייליגן רבי'ן, די קונטרסים פון מוהרא"ש, די גליונות און אזוי ווייטער.

ביי אנשי שלומינו איז אנגענומען אז ווען מען האט א צרה פארבינדט מען זיך מיטן בית הדפוס און מען איז מנדב פינף הונדערט דאלער פאר די הייליגע ספרים אשר בנחל, עצתו אמונה און אזוי ווייטער, אבער איך מיין אז דאס איז א שטיקל טעות; אוודאי ווען מען האט א צרה דארף מען לויפן צו די סגולה פון דרוקן די הייליגע ספרים, טון די סגולה וואס מוהרא"ש האט געזאגט, אז ווער עס וועט מנדב זיין פאר אשר בנחל, ווער עס וועט העלפן דרוקן די קונטרסים - וועט זען א גרויסע ישועה, אבער מען דארף נישט ווארטן אויף א צרה; אז דער אייבערשטער העלפט אז עס איז דא א שמחה אין די משפחה - דעמאלטס איז די פאסיגע צייט צו מנדב זיין פאר די קרן הדפסה, און האבן א חלק אין פארשפרייטן דעם רבינ'ס ספרים, האבן א חלק אין די גאולה, א חלק מיט ביאת משיח, שיבוא במהרה בימינו אמן.

בעזרת ה' יתברך - יום א' פרשת ואתחנן, ה' מנחם-אב, שנת תשפ"ו לפרט קטן

מרת ... תחי'

אייער זון האט מיר דערציילט אז איר גייט יעצט אריבער וכו', איר זענט זייער אפגעשוואכט וכו', מען האט געפונען ביי אייך וכו', ה' ישמרנו.

איך וויל אייך מחזק זיין איר זאלט זיך זייער שטארקן און אויפזוכן דאס גוטס וואס דער אייבערשטער טוט מיט אייך, ווייל ווי מער מען זוכט דאס גוטס און מען זעט די חסדים וואס דער אייבערשטער טוט, און מען דאנקט און לויבט דעם אייבערשטן - אלץ שנעלער קומט די רפואה. ווייל דער הייליגער רבי האט אונז מגלה געווען אז שמחה איז די רפואה פאר אלע מחלות, דער רבי זאגט (לקוטי מוהר"ן חלק ב', סימן כד): "מִצְוָה גְּדוֹלָה לִהְיוֹת בְּשִֹמְחָה תָּמִיד", עס איז א גרויסע מצוה צו זיין שטענדיג פרייליך, "וּלְהִתְגַּבֵּר לְהַרְחִיק הָעַצְבוּת וְהַמָּרָה שְׁחֹרָה בְּכָל כֹּחוֹ", און אוועק נעמען פון זיך די עצבות און מרה שחורה מיט אלע כוחות. "וְכָל הַחוֹלַאַת הַבָּאִין עַל הָאָדָם, כֻּלָּם בָּאִין רַק מִקִּלְקוּל הַשִֹּמְחָה", און אלע מחלות און קרענק וואס קומען אויפן מענטש קומט נאר צוליב עצבות און מרה שחורה, "וְגַם חַכְמֵי הָרוֹפְאִים הֶאֱרִיכוּ בָּזֶה, שֶׁכָּל הַחוֹלַאַת עַל יְדֵי מָרָה שְׁחֹרָה וְעַצְבוּת, וְהַשִּׂמְחָה הִיא רְפוּאָה גְּדוֹלָה", אפילו די דאקטוירים זענען מודה אז שמחה איז א רפואה פאר אלע קרענק.

אייער זון האט מיר דערציילט וואס איר גייט יעצט אריבער מיט די טאכטער, און ווי איר נעמט דאס זייער זייער צום הארצן וכו' וכו', און ווי עס זעט אויס איז דאס די סיבה פון די מחלה וכו' וכו', בעט איך אייך זייער איר זאלט אויפזוכן די חסדים וואס דער אייבערשטער טוט מיט אייך, דאנקט און לויבט דעם אייבערשטן פאר די טייערע ליכטיגע קינדער וואס איר האט, און דאנקט און לויבט דעם אייבערשטן אויך פאר די טאכטער, און פרובירט איר דן צו זיין לכף זכות, זוכט אויף גוטע זאכן אין איר, און נאר פון דעם זאלט איר טראכטן, עס איז נישט געזונט צו וויינען טאג און נאכט ווען א קינד גייט זיך זיין וועג וכו'.

דער הייליגער רבי נתן זאגט, ווען א מענטש דאנקט דעם אייבערשטן זאגט דער אייבערשטער פאר די מלאכים: "קוקט, דא איז א מענטש וואס דאנקט מיר, איך וועל אים געבן נאך מער גוטס, ער זאל מיר נאך מער דאנקען", און חס ושלום ווען איינער רעדט זיך אפ, ער באקלאגט זיך, זאגט מען אין הימל, מען וועט אים געבן יסורים און צרות ער זאל האבן וואס צו קרעכצן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום א' פרשת ואתחנן, ה' מנחם-אב, שנת תשפ"ו לפרט קטן

... תחי', תלמידה בית פיגא בני ברק

זאגט תהלים און בעטס דעם אייבערשטן יעדע זאך, רעד צו אים אזוי ווי מען רעדט און מען שמועסט מיט א גוטע פריינד, און ווי אזוי א קינד רעדט און שמועסט מיט זיין טאטע.

פירט זיך איידל, די שענסטע מתנה וואס דער אייבערשטער האט געגעבן פאר אידישע טעכטער איז צניעות, זיין איידל; דארט וואו עס איז דא איידלקייט – דארט איז די שכינה הקדושה.

פון דער ראש ישיבה

בעזרת ה' יתברך - יום א' פרשת ואתחנן, ה' מנחם-אב, שנת תשפ"ו לפרט קטן

... תחי', תלמידה בית פיגא בני ברק

זאגט יעדן טאג תהלים, און פלעכטס אריין אייערע אייגענע לויב ווערטער און אייערע בקשות; דער הייליגער רבי זאגט (שיחות הר"ן, סימן צב), תהלים איז אזוי ווי א משענת אויף וואס מען קען זיך אונטערלאנען, מען פאלט נישט.

פירט אייך מיט דרך ארץ צו אייערע עלטערן, זייט מכבד טאטע מאמע מיט גרויס שמחה.

פון דער ראש ישיבה.

בעזרת ה' יתברך - יום ה' פרשת דברים, ב' מנחם-אב, שנת תשפ"ו לפרט קטן

לכבוד ... נרו יאיר

מה אשיב לה' כל תגמולוהי עלי, אז דער אייבערשטער האט מיר געהאלפן איך האב געקענט טון א שידוך מיט מיין טייערער ליבער זון הרב נחמן נתן שליט"א, מיר האבן זיך משדך געווען מיט דעם חשוב'ן מחותן רבי אברהם הערש וועבערמאן נרו יאיר, דער גבאי פון שטעטל. וויפיל דארף איך דאנקען דעם אייבערשטן אויף די גרויסע חסדים וואס דער אייבערשטער טוט מיט מיר; דער אייבערשטער זאל העלפן אז דו זאלסט אויך זען שמחות ביי דיינע קינדער, און נחת און פרייד געזונטערהייט.

ליבער ברודער, זע צו לערנען יעדן טאג אביסל חומש, טייל איין די וואכעדיגע פרשה לויט די טעג פון די וואך; זונטאג זאלסטו לערנען שנים מקרא ואחד תרגום ביז שני, מאנטאג זאלסטו גיין ווייטער, פון שני ביז שלישי; דינסטאג זאלסטו גיין ווייטער, פון שלישי ביז רביעי; אזוי זאלסטו טון אלע טעג פון די וואך, ביז דו וועסט ענדיגן די גאנצע פרשה שנים מקרא ואחד תרגום, דאס וועט דיך היטן פון אלעם בייזן, און דאס וועט זיין א שמירה פאר דיר און פאר דיין גאנצע משפחה.

אויך זאלסטו זיך מאכן א שיעור אין משניות; זאג יעדן טאג כמה וכמה פרקים משניות, דאס וועט דיר העלפן זיך צו קענען שטארקן אויף די שווערע ביטערע נסיונות וואס דער יצר הרע ברענגט דיר.

ליבער ברודער, אז דו וועסט יעדן טאג גורס זיין פרקים משניות וועסטו ביים סוף מנצח זיין די שווערע מלחמה, דו וועסט ארויסגיין פון דיין פלאנטער, פון דיין בלאטע. אזוי ווי דער הייליגער רבי זאגט אין שיחות הר"ן (סימן י"ט): "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה, ער טוט עבירות רחמנא לצלן און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד"; אויב וועט ער זיך מאכן א קביעות צו לערנען יעדן טאג 'כך וכך', וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס, אז עס נעמט ארויס דעם מענטש פון זיין שלעכטס, און רבי נתן דערציילט (חיי מוהר"ן, סימן תקעג): "ווען דער רבי האט דאס געזאגט, האב איך געפרעגט דעם רבי'ן צי תורה קען העלפן אזא איינעם וואס איז אראפגעפאלן אין די עבירה פון פגם הברית, הוצאת זרע לבטלה רחמנא לצלן? האט דער רבי געשריגן אויף מיר און געזאגט: 'דו ווייסט ווי גרויס די כח פון תורה איז? תורה איז העכער פון אלעס'"; און אפילו אז א מענטש ליגט נעבעך אין די עקלדיגע עבירה פון פגם הברית, הוצאת זרע לבטלה רחמנא לצלן, אויב ער וועט לערנען יעדן טאג 'כך וכך' - וועט ער ווערן אן ערליכער איד.

היינט נאכט וועט זיין אם ירצה השם די וועכנטליכע ליל שישי שיעור, זע צו קומען ווייל יעדער איינער דארף חיזוק, און אפילו דו ווייסט שוין אלעס וואס מען גייט שמועסן ביים שיעור, דו ווייסט פינקטליך וועלכע שיחות און וועלכע תורות מיר גייען זאגן די וואך, דאך דארף דער מענטש דאס נאכאמאל הערן און דאס נאכאמאל אויפפרישן; ווייל די נסיונות ווערן שטערקער און שטערקער און מען דארף האבן דעם רבינ'ס חיזוק, איך האף דיך צו זען ביים שיעור.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ואתחנן, ו' מנחם-אב, שנת תשפ"ו לפרט קטן

לכבוד ... נרו יאיר

שבת איז געווען זייער שיין מיט אנשי שלומינו, ביי שלש סעודות האבן מיר גערעדט וואס דער הייליגער רבי זאגט (שיחות הר"ן, סימן י"ט): "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה, ער טוט עבירות רחמנא לצלן און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד"; אויב וועט ער זיך מאכן א קביעות צו לערנען יעדן טאג 'כך וכך', וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס, אז עס נעמט ארויס דעם מענטש פון זיין שלעכטס; מיר האבן עס מקשר געווען מיט דעם וואס די הייליגע חכמים זאגן (תנחומא דברים, א), אויפן פסוק (דברים א, א): "אֵלֶּה הַדְּבָרִים אֲשֶׁר דִּבֶּר מֹשֶׁה אֶל כָּל יִשְׂרָאֵל", אז די אידן האבן געפרעגט משה רבינו, נעכטן האסטו געזאגט: "לֹא אִישׁ דְּבָרִים אָנֹכִי", ווען דער אייבערשטער האט געזאגט אז דו זאלסט גיין צו פרעה, האסטו געזאגט איך קען נישט רעדן, און יעצט זאגסטו: 'אֵלֶּה הַדְּבָרִים'? זאגן די הייליגע חכמים, אז אויב א מענטש איז א 'חַיָּךְ', ער האט נישט קיין ווערטער, ער קען נישט רעדן - זאל ער לערנען די הייליגע תורה, 'וְהִתְרַפֵּא', און ער וועט ווערן אויסגעהיילט; האבן מיר זיך מחזק געווען אז דאס איז ממש וואס דער הייליגער רבי זאגט, אז אויב איינער איז א 'חַיָּךְ', 'חַיָּךְ' איז אויך א לשון פון חוּכָא וּטְלוּלָא, ער האט אין זיך ליצנות, ער איז פארכאפט ביי די קליפות - 'שְׁנֵה אֶת הַתּוֹרָה', זאל ער לערנען די הייליגע תורה, און מיט די כח התורה - 'וְהִתְרַפֵּא' וועט ער ווערן א גרויסער צדיק, אן ערליכער איד.

ליבער ברודער, באניי זיך און מאך זיך א שיעור אין לערנען יעדן טאג אביסל מקרא, אביסל משנה, גמרא, הלכה, און אזוי ווייטער; וועסטו ווערן א גרויסער צדיק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת דברים, כ"ח תמוז, שנת תשפ"ו לפרט קטן

לכבוד ... נרו יאיר

דער הייליגער רבי האט אונז געלערנט (לקוטי מוהר"ן חלק א, סימן רפב), אז מיר מוזן קוקן גוט און אויפזוכן גוטס ביי יעדן איינעם, און אפילו עס זעט אויס ווי ביי דעם מענטש איז נאר דא שלעכטס, האט דער רבי געזאגט אז עס קען נישט זיין אז א מענטש זאל זיין אינגאנצן שלעכט, כולו רע, עס איז זיכער דא אין אים א פינטעלע גוטס, און דער רבי זאגט אז אויב מען וועט זען די גוטס און מען וועט טראכטן פון די פינטעלע גוטס - מיט דעם קען מען מהפך זיין יעדן מענטש, אים ארויסנעמען פון די שלעכטס און ברענגען צו ווערן א גרויסער צדיק.

דאס איז פון די יסודות אין ברסלב'ער חסידות, מוהרא"ש זאגט אז דאס איז פון די יסודות וואס דער הייליגער רבי האט אונז אוועקגעשטעלט; מיר זאלן זוכן אין יעדן איינעם גוטס, אויך אין זיך אליינס זאל מען אויפזוכן גוטס, טראכטן פון די גוטס און זיך מחיה זיין מיט די גוטס, און מיט דעם קען מען זוכה זיין אינגאנצן צו ווערן א גרויסער צדיק.

על כן ליבער ברודער, איך בעט דיר זייער, לאז שוין אפ די שלעכטס, לאז שוין אפ די מרה שחורה, לאז שוין אפ דאס זיך אראפקלאפן, הייב אן זיך מחיה זיין מיט די גוטע זאכן וואס דו האסט; זיי זיך מחי' מיט די מזוזה וואס דו האסט ביי די טיר פון דיין שטוב, זיי זיך מחי' מיט די בארד און פאות דיינע, זיי זיך מחי' מיט די ציצית, זיי זיך מחי' מיט די תפילין; פון דעם זאלסטו טראכטן, זאלסט גיין א טענצל און דאנקען דעם אייבערשטן: "שכוח הייליגער באשעפער אז איך בין א איד און איך האב די זכי' צו טון דיינע מצוות".

ליבער ברודער, איך בעט דיר זייער, אויך אין שטוב מיט דיין ווייב און דיינע קינדער זאלסטו זיך אנשטרענגען צו זען נאר גוטס, און בינד זיך אויף פון די קייטן פונעם סמ"ך מ"ם וואס ער האט דיך געבונדן אין זיין תפיסה, און ער מאכט דיך קוקן און טראכטן און געדענקען נאר פון די חסרונות פון דיין ווייב און די קינדער, דורכדעם צעשטערט ער דיר דיין לעבן, דו פייניגסט זיך, דו האסט נישט קיין מנוחה, דו קענסט נישט אנגיין אין דיין טאג, עס בוזשעוועט דיר דיין קאפ מיט די אלע שלעכטס וואס דו זעסט אין זיי; הייב אן פאלגן דעם רבי'ן, זוך אויף איין גוטע זאך אין דיין ווייב, און אזוי אויך איין גוטע זאך אין יעדער פון דיינע קינדער און זיי זיך מחי' מיט דעם, און טראכט: 'זיי זענען דאך אזוי גוט מיט די גוטע זאך וואס זיי טוען'.

מאך זיך א שיעור און לערנען דעם הייליגן רבינ'ס ספרים, מאך זיך א שיעור אין ספר הקדוש לקוטי מהר"ן. דער הייליגער רבי האט געזאגט (חיי מוהר"ן, סימן שמט): "וְאָמַר, שֶׁמִּי שֶׁיֵּשֵׁב וְיַעֲסֹק בִּסְפָרָיו רַק בְּלִי קִנְטוּר וְנִצָּחוֹן, וְיִסְתַּכֵּל בּוֹ בֶּאֱמֶת, אָז בְּוַדַּאי יִהְיוּ נִבְקָעִין אֶצְלוֹ כָּל גִּידֵי קַשְׁיוּת לְבָבוֹ, ואמר בזו הלשון: 'סע וועט אים אלע אדערן טרענען'", ווער עס וועט לערנען זיין ספר מיט אן אמת, וועט זיך אים עפענען אלע פארשטאפטע אָדערן, אפילו די הארץ איז פארשטאפט.

מאך זיך א שיעור און לערנען די שיחות פון הייליגן רבי'ן, דער רבי האט געזאגט (שם, סימן שנח): "מיט יעדע שיחה וואס איך שמועס מיט ענק קענט איר זוכה זיין צו זיין אן ערליכער איד, נישט סתם אן ערליכער איד נאר אן ערליכער איד אזוי ווי איך מיין אן ערליכער איד".

מאך זיך א שיעור אין סיפורי מעשיות, דער רבי האט געזאגט (שם, סימן כה), אז די מעשיות וועקן אויף א מענטש פון שלאף; אויך מאך זיך א שיעור אין ספר המידות, דער רבי האט געזאגט פאר זיין תלמיד רבי נפתלי, דער רבי האט אים געוויזן דעם ספר המידות און געזאגט (שם, סימן שעט): "מיין ליבער הארציגער חבר, דער ספר האט מיך געמאכט פאר א איד".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת ואתחנן, ה' מנחם-אב, שנת תשפ"ו לפרט קטן

לכבוד ... נרו יאיר

איך בעט דיר זייער, שטארק זיך מיט אלע דיינע כוחות, און אפילו דו זעסט אז דו ביסט פול מיט עבירות, דו זעסט זיך ווי א דורכפאל, דו זעסט זיך ווי א נישט נארמאלער וכו' וכו' - דאך זאלסטו דיך זייער שטארקן און אויפזוכן גוטע נקודות ביי דיר.

דער הייליגער רבי האט אונז געלערנט (לקוטי מוהר"ן חלק א, סימן רפב), אז א מענטש זאל אויפזוכן אין זיך א גוטע זאך, פון דעם זאל ער טראכטן און אויף דעם זאל ער קוקן, און דאס איז די עצה צו ווערן א גרויסער צדיק; די עצה העלפט סיי ביי זיך, און אויך מיט אנדערע; מיט די ווייב, מיט קינדער, מיט שכנים, חברים וכו' וכו'.

ליבער ברודער, טייערער חבר, זע אז די טעג און וואכן זאלן דיר נישט אריבערגיין מיט נארישקייטן, זע אריינצוכאפן יעדן טאג אביסל גוטס וואס וועט בלייבן לנצח נצחים. זע צו לערנען יעדן טאג אביסל מקרא, שנים מקרא ואחד תרגום איינגעטיילט לויט די טעג פון די וואך. די צווייטע שיעור זאלסטו זען צו לערנען יעדן טאג אפאר פרקים משניות און אפילו אן פארשטיין, זאג די ווערטער, לערן אויפן סדר דרך הלמוד פון הייליגן רבי'ן, אזוי ווי עס איז אויסגעשמועסט אין שיחות הר"ן (סימן ע"ו): "שאין צריכים בלימוד רק האמירה לבד, לומר הדברים כסדר וממילא יבין", אז אפילו מען פארשטייט נישט וואס מען לערנט - זאל מען זאגן די ווערטער און ביים סוף וועט מען פארשטיין.

אויך זאלסטו זען צו לערנען יעדן טאג דעם בלאט גמרא. דער הייליגער רבי זאגט (ספורי מעשיות מעשה ז, מזבוב ועכביש), אז דער בארג האט געזאגט פארן קעניג: "מיר וויל מען אויך שלעכט טון, איך האב אויך פיל שונאים וואס ווילן מיך הרג'ענען, אבער דער דף איז אויף מיר מגין", און אז דו וועסט האבן דעם דף, כל זמן דו וועסט לערנען דעם דף, דו וועסט זיך צובינדן צום דף, דאס מיינט מען דעם בלאט גמרא – "באדארפסטו קיין מורא נישט צו האבן", אז דו וועסט לערנען תורה - וועסטו ווערן אן ערליכער איד, און אפילו לעת עתה זינקסטו אין בלאטע, דו ביסט שוין כמעט דערטרונקען אין די טיפע בלאטעס, אזוי ווי עס שטייט (תהלים סט, ג): "טָבַעְתִּי בִּיוֵן מְצוּלָה וְאֵין מָעֳמָד", אבער מיט די כח התורה וועסטו ארויסגיין פון אלע בלאטעס, אזוי ווי דער הייליגער רבי זאגט (שיחות הר"ן, סימן י"ט): "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון קדושה, ער טוט עבירות רחמנא לצלן און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם, וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה, בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה, כִּי כֹּחַ הַתּוֹרָה גָּדוֹל מְאֹד"; אויב וועט ער זיך מאכן א קביעות צו לערנען יעדן טאג 'כך וכך', וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס, אז עס נעמט ארויס דעם מענטש פון זיין שלעכטס, און רבי נתן דערציילט (חיי מוהר"ן, סימן תקעג): "ווען דער רבי האט דאס געזאגט, האב איך געפרעגט דעם רבי'ן צי תורה קען העלפן אזא איינעם וואס איז אראפגעפאלן אין די עבירה פון פגם הברית, הוצאת זרע לבטלה רחמנא לצלן? האט דער רבי געשריגן אויף מיר און געזאגט: 'דו ווייסט ווי גרויס די כח פון תורה איז? תורה איז העכער פון אלעס'"; אפילו א מענטש וואס ווייקט זיך אין די עקלדיגע עבירה פון פגם הברית, הוצאת זרע לבטלה רחמנא לצלן, וועט די תורה אים ארויסשלעפן פון זיין בלאטע און ער וועט ווערן אן ערליכער איד.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת דברים, כ"ז תמוז, שנת תשפ"ו לפרט קטן

לכבוד ... נרו יאיר

איך בעט דיר זייער, דערהאלט זיך און שטארק זיך, און לאז זיך נישט צעברעכן פון קיין שום זאך; דאס איז דאס גרויסקייט פון א מענטש אויף די וועלט, אז אפילו עס גייט אריבער אויף אים צרות ויסורים, "כל משבריך וגליך עליו עברו" - דערהאלט ער זיך און ער גייט ווייטער אן אין לעבן.

ליבער ברודער, דער הייליגער רבי האט אונז געלערנט מיר זאלן זוכן אין די צרה – הרוחה, ווי דער אייבערשטער האט רחמנות און ער מאכט מיט אונז גוטס, און אז דיין לעבן איז ביטער אזוי ווי א לעמאן - זאלסטו מאכן לעמאנאדע, פונעם ביטערן לעמאן - קען מען אויך גוט מאכן, מען קען מאכן א געשמאקע טרונק, לעמאנעיד; באצוקער דיין לעבן, באזיס די ביטערקייט.

וויסן זאלסטו, פון עצבות און מרירות באקומט מען גארנישט, און מען פועל'ט גארנישט דורך זיין דערביטערט, נאר דורך שמחה פועל'ט מען און מען איז זוכה צו ישועות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת דברים, כ"ח תמוז, שנת תשפ"ו לפרט קטן

... נרו יאיר

איך דאנק דיך פארן מחזק זיין די בחורים און אינגעלייט פון אנשי שלומינו, עס איז זייער א גרויסע מצוה צו מחזק זיין אונזערע בחורים און אינגעלייט, מען איז פארנומען טאג און נאכט עוסק צו זיין אין הפצה, פארשפרייטן דעם רבינ'ס לימודים פאר די וועלט, דארף מען ערשט אנהייבן מיט קירוב קרובים.

זיי מחזק די בחורים און אברכים זיי זאלן אויסהערן יעדן טאג שיעורים און אויף לערנען יעדן טאג די בריוון, ווייל נאר אזוי האט מען כח אנצוגיין. גלייב מיר, איך האב דאס געזען אלע יארן אין היכל הקודש, די וואס האבן געהערט די שיעורים און געלערנט די בריוון – די זענען אלץ געווען פריש, פיל מיט חיות, און די וואס האבן אפגעלאזט דאס הערן די שיעורים – די זענען געווארן אויסגעטריקנט, און במשך די צייט אפגעלאזט.

ווען דו רעדסט צו אנשי שלומינו, סיי אין ישיבה און סיי צו די אינגעלייט – זאלסטו אוועק געבן צייט צו רעדן פון אמונת חכמים, ווייל אין דעם איז תלוי די גאנצע אידישקייט.

בעזרת ה' יתברך - יום ב' פרשת דברים, כ"ח תמוז, שנת תשפ"ו לפרט קטן

מרת ... תחי', קרית ברסלב

איך האב ערהאלטן די הודעה.

דאס וואס איר שרייבט אז איר האט נישט קיין וועג מיט אייער קינד, איר קענט אים נישט מחנך זיין, ער פאלגט נישט און ער נעמט ארויס די גאנצע כח וכו', איר שפירט ווי איר קענט מער נישט אנגיין.

נעמט די עצה פון הייליגן רבי'ן (שיחות הר"ן, סימן ב), דער רבי פלעגט יעדן טאג אינדערפרי איבערגעבן די טאג פארן אייבערשטן, אלעס וואס האט מיט אים, זיין ווייב און קינדער און אזוי ווייטער, אז אלעס זאל זיין גוט וכו'; אזוי איז גוט צו טון, און אזוי זאלט איר טון, זאגט: "אייבערשטער איך געב זיך איבער צו דיר, איך געב איבער מיינע קינדער און מיין מאן, איך קען נישט אליין, איך פאל פון מיינע כוחות, איך בין אפגעשוואכט, העלף מיך אז מיין זיסע קינד ... זאל מיך פאלגן, ער זאל זיך נישט קריגן מיט מיר און מיט די געשוויסטער..."

איר וועט זען, די טעג וואס מען געדענקט זיך איבערצוגעבן צום אייבערשטן – גייט אלעס געשמירט, און די טעג וואס מען פארגעסט – קען מען נישט דורכשטופן דעם טאג...

בעזרת ה' יתברך - יום ב' פרשת דברים, כ"ח תמוז, שנת תשפ"ו לפרט קטן

מרת ...

איך האב ערהאלטן די הודעה.

איר קענט גיין צום דאקטער זיך בודק זיין צו זען אז אלעס איז גוט מיט דיר וכו', עס איז כדאי איר זאלט גיין, אזוי וועט איר ווערן רואיג און פרייליך; ווייל יעדע מאל מען האט קאפ וויי, די קאפ שווינדלט וכו' – איז א חלק פון די ווייטאג די פחד און שרעק, און אמאל איז דאס רוב פון די ווייטאג; איז כדאי צו גיין צום דאקטער צו זען אז מען איז געזונט און שטארק.

דער עיקר זאלט איר זיך שטארקן מיט שמחה, זינגט און טאנצט ניגוני אמונה, אמונה מיט שמחה איז די בעסטע ווייטאמין און די בעסטע מעדעצין, מען ווערט אויסגעהיילט פיזיש און גייסטיש, און דערפאר האט דער הייליגער רבי אזויפיל גערעדט צו אונז פון זיין פרייליך און פון טון אלעס אבי צו זיין פרייליך, אפילו זיך מאכן נאריש, אבי זוכה זיין צו שמחה וואס איז א רפואה פאר אלעס.

זארגט נישט, איר זענט געזונט און שטארק, און אז איר ווערט נישט רואיג זאלסט איר גיין צום דאקטער וכו', און זינגט און טאנצט, וועט איר מיט שמחה פארטרייבן די קליפות און זיין ארום גענומען מיט די שכינה הקדושה.

אינדערפרי זאגט ברכת השחר מיט קריאת שמע, זאגט די אני מאמין, זאגט דאס מיט טייטש; וועט איר זוכה זיין צו א שטארקע אמונה.

בעזרת ה' יתברך - ערב שבת קודש פרשת חקת בלק, (בלק בא"י), י"א תמוז, שנת תשפ"ו לפ"ק

לכבוד ... נרו יאיר

שבת זאלסטו זיין נאר פרייליך, און ביי די סעודות זאלסטו זיך נייטן צו זיין רק בשמחה, זינג זמירות בשמחה, זינג נישט וויינעדיגע ניגונים, זינג פרייליכע ניגונים.

מאך קידוש מיט שמחה, עס די שבת'דיגע עסן מיט שמחה, און דאנק הויך אויפן קול דעם אייבערשטן פאר דיין שיינע משפחה; רעכן אויס אלע קינדער ביים נאמען, זאג שכוח אייבערשטער פאר דעם קינד, און פאר דעם קינד, און גיי שלאפן בשמחה, און דאווען בשמחה.

א גאנצע וואך איז עצבות זייער געפערליך, און ספעציעל ווען עס קומט שבת דארף מען דערווייטערן די עצבות בתכלית הריחוק.

אז די נישט גוטע רוח כאפט דיך אן, זאלסטו גיין אין א זייט און בעט דעם אייבערשטן: "אָנָּא הַשֵּׁם הַרְחֵק מֵעָלַי אֶת הָעַצְבוּת וְהַמָּרָה שְׁחוֹרָה, אִיךְ בֶּעט דִיר אֵייבֶּערְשְׁטֶער, דֶערְוַוייטֶער פוּן מִיר דִי עַצְבוּת אוּן דֶעפְּרֶעסְיֶע, וְזַכֵּנִי לִהְיוֹת בְּשִׂמְחָה, מַאךְ מִיךְ פְרֵיילִיךְ, מַאךְ מִיךְ אַזוֹי פְרֵיילִיךְ אַז אִיךְ זָאל אָנְהוֹיבְּן טַאנְצְן פוּן רוֹב שִׂמְחָה, אוּן יֶעדֶער אַרוּם מִיר זָאל וֶוערְן פְרֵיילִיךְ".

א פרייליכן שבת.

בעזרת ה' יתברך - יום ה' פרשת פנחס, שבעה עשר בתמוז, שנת תשפ"ו לפרט קטן

לכבוד ... נרו יאיר

זארג נישט פאר פרנסה, קוק ארויף צום אייבערשטן, האב בטחון אינעם אייבערשטן – וועט דער אייבערשטער דיר געבן גרויס שפע, און זע צו לעבן אזוי ווי די מעשה וואס דער הייליגער רבי האט דערציילט פונעם בעל בטחון, וואס איז געווען "נאר פרייליך", און האט בכלל נישט געזארגט וואס וועט זיין מארגן, יעדן טאג איז ער געגאנגען זען וואס ער קען היינט טון פאר פרנסה, און די ערשטע זאך וואס מען האט אים אנגעטראגן – האט ער גענומען מיט גרויס שמחה, און ווען ער האט געענדיגט ארבעטן האט ער איינגעקויפט א סעודה, "און די סעודה איז געווען א סעודה", און ער האט געהאט צייט צו עוסק זיין בעבודת השם, ער האט געלעבט א חיים טובים, א זיס לעבן, אפילו ער האט יעדן טאג געטון עפעס אנדערש, דאך האט ער זיך בכלל נישט מבלבל געווען פון דעם, נאר געטון דעם רצון השם, געטון וואס איז אים אונטערגעקומען צו טון.

דער עיקר זאלסטו זיך פארלאזן אויפן אייבערשטן, און זיך נישט פייניגן מיט אזויפיל טראכטן: 'וואס וועט זיין? ווי אזוי? ווען? פארוואס?' פארלאז זיך אויפן אייבערשטן, אזוי ווי עס שטייט אין פסוק (תהלים לז, ה): "גּוֹל עַל ה' דַּרְכֶּךָ וּבְטַח עָלָיו וְהוּא יַעֲשֶׂה"; ווייל דער עיקר וואס מענטשן ליידן אין פרנסה וכו' – איז דער עיקר במחשבה, מען פייניגט זיך מיט מארגן, מען פייניגט זיך מיט וואס וועט זיין, ווייל אויף די היינטיגע טאג האט מען, נאר די דאגות: 'וואס וועט זיין?' דאס איז די צרה, די בראך; על כן זאלסטו זיך פארלאזן אויפן אייבערשטן.

א גרינגע תענית.

בעזרת ה' יתברך - יום ה' פרשת חקת בלק, (בלק בא"י), י' תמוז, שנת תשפ"ו לפרט קטן

לכבוד ... נרו יאיר

דער עיקר בזה העולם איז "זיך דערהאלטן", מיט דעם מעסט זיך דאס שיינקייט פונעם מענטש, ווען עס גייט אריבער וואס עס גייט אריבער און דער מענטש בלייבט שטארק מיט די אמונה, ער האט נישט קיין טענות און תרעומות אויפן אייבערשטן, ער בלייבט מיט תמימות, מיט אמונה.

חזר אמונה, חזר זיך: 'ממלא כל עלמין וסובב כל עלמין, אין שום מציאות מבלעדיך יתברך כלל, ובכל תנועה ותנועה שם אלופו של עולם, אלעס איז אלקות, אלעס איז א לבוש פארן אין סוף ברוך הוא'; דורך חזר'ן אמונה ווערט אלעס גרינגער, די נערווען ווערן געשטארקט, מען קען נעמען די שוועריקייטן.

מאך זיך שיעורים אין רבינ'ס ספרים וועט דיין אמונה ווערן לויטער און קלאר, ווייל די אלע וואס זענען מקורב צום צדיק האמיתי באקומען א לויטערע קלארע ריינע אמונה (לקוטי מוהר"ן חלק ב, סימן ח).

קום צום ליל שישי שיעור, וועסט באקומען פרישע לופט צו אטעמען.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת פנחס, ט"ו תמוז, שנת תשפ"ו לפרט קטן

לכבוד ... נרו יאיר

אז דו זוכסט וואו צו אנטלויפן, וואו זיך צו באהאלטן – איז נאר דא איין פלאץ, אנטלויף צום אייבערשטן און צו די תורה, עס וועט דיר ווערן אזוי זיס און ליכטיג.

מוהרא"ש דערציילט, אמאל האט דער הייליגער צאנזער רב זכותו יגן עלינו געפרעגט זיין טאכטער וואס האט חתונה געהאט און געגאנגען וואוינען אין אוקריינע: "וואס מאכן עפעס די אידן אין אוקריינע?" האט זי געענטפערט: "טאטע, די ליידן דארט פון די רוצח'ישע אוקריינער איז מער ווי מען האט געליטן אין מצריים...", זאגט דער צדיק: "זאג נישט אזוי, מער פון מצרים קען נישט זיין, אין מצרים איז געווען דאס ערגסטע, ווייל עס איז געווען פאר קבלת התורה, עס איז נישט געווען וואו צו אנטלויפן, וואו זיך צו באהאלטן, היינט האבן מיר א תורה וואו זיך צו באהאלטן און וואו צו אנטלויפן".

לערן דעם בלאט גמרא יעדן טאג חק ולא יעבור, עס זאל זיין ביי דיר חשוב אזוי ווי אנטון תפילין יעדן טאג.

אויך זאלסטו האלטן מיט דיר א קליין תהלים; אזוי ווי מען האלט מיט זיך אין די הייסע זומער טעג א באטל וואסער, זיך צו דערקוויקן, אזוי זאלסטו האלטן א תהלים און זיך מחי' זיין; אזוי זאגט דער הייליגער רבי (חיי מוהר"ן, סימן תפה), א קאפיטל תהלים איז ווי א קאלטע טרינק פאנטש.

די וואך ליל שישי וועט נישט זיין קיין שיעור, מען פאסט תענית שבעה עשר בתמוז.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת פנחס, י"ד תמוז, שנת תשפ"ו לפרט קטן

לכבוד ... נרו יאיר

מוהרא"ש זאגט, אלעס וואס גייט איבער, אלע שוועריקייטן און יסורים – איז נאר ווייל פון הימל וויל מען זען צו וועם דער מענטש וועט זיך ווענדן בעת צרה, וואס וועט דער מענטש טון? וועט ער זיך פארלירן און חס ושלום שעלטן וכו' וכו', אדער וועט ער זיך דערהאלטן און בלייבן מיט א שטארקע אמונה אינעם אייבערשטן.

שטארק זיך, בעט דעם אייבערשטן פאר א קלארע לויטערע אמונה; דו זאלסט אים שטענדיג שפירן, און געדענקען אז אלעס איז ער, און אלעס וואס טוט פאסירן – איז פונעם אייבערשטן, און אז אלעס איז נאר פאר די טובה פונעם מענטש. אזוי ווי די הייליגע חכמים זאגן (ברכות ס:): "כָּל מַה דְּעָבֵיד רַחְמָנָא לְטָב עָבֵיד", אלעס וואס דער אייבערשטער טוט – איז גוט.

די לעבן ווערט גרינג און זיס מיט אמונה, ווייל ווער עס האט אמונה – זאגט דער הייליגער רבי (שיחות הר"ן, סימן נג): – "חַיָּיו חַיִּים", איז זיין לעבן א לעבן, "וְהוּא מְבַלֶּה יְמֵי חַיָּיו בְּטוֹב תָּמִיד", און ער פארברענגט זיינע טעג מיט גוטס. "כִּי כְּשֶׁהוֹלֵךְ לוֹ כָּרָאוּי וְיֵשׁ לוֹ טוֹב, בְּוַדַּאי טוֹב לוֹ", ווייל ווען עס גייט אים גוט, עס גייט אים אזוי ווי ער וויל - איז דאך גוט, "וַאֲפִילּוּ כְּשֶׁאֵינוֹ כָּךְ, דְּהַיְנוּ שֶׁאֵין מִתְנַהֵג לוֹ כְּסֵדֶר וְיֵשׁ לוֹ יִסּוּרִים חַס וְשָׁלוֹם, גַּם כֵּן טוֹב", און אפילו ווען עס גייט אים נישט אזוי ווי ער וויל, ער האט שווערע טעג, ער האט ווייטאג און יסורים - איז אים ווייטער גוט, "כִּי הוּא בָּטוּחַ שֶׁאַף עַל פִּי כֵן הַשֵּׁם יִתְבָּרַךְ יְרַחֵם עָלָיו לְהַבָּא וְיֵיטִיב אַחֲרִיתוֹ", ווייל ער פארלאזט זיך אז דער אייבערשטער וועט רחמנות האבן אויף אים און אים העלפן, "כִּי מֵאַחַר שֶׁהַכֹּל מֵאִתּוֹ יִתְבָּרַךְ, בְּוַדַּאי הַכֹּל לְטוֹבָה", ווייל אז אלעס איז פונעם אייבערשטן, אלעס קומט פון אים - מוז זיין אז אלעס נאר לטובה, עיין שם.

גיי א טענצל יעדן טאג: "אשרינו שזכינו להתקרב לרבינו", וואס שטארקט אונז מיט אמונה, און מיט זיין דבוק צום אייבערשטן, זיך מתבודד זיין צום אייבערשטן און זיך בענקען צום אייבערשטן; אשרינו.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת דברים, כ"ז תמוז, שנת תשפ"ו לפרט קטן

לכבוד ... נרו יאיר

איך בעט דיר זייער, דערהאלט זיך און שטארק זיך, און לאז זיך נישט צעברעכן פון קיין שום זאך; דאס איז דאס גרויסקייט פון א מענטש אויף די וועלט, אז אפילו עס גייט אריבער אויף אים צרות ויסורים, "כל משבריך וגליך עליו עברו" - דערהאלט ער זיך און ער גייט ווייטער אן אין לעבן.

ליבער ברודער, דער הייליגער רבי האט אונז געלערנט מיר זאלן זוכן אין די צרה – הרוחה, ווי דער אייבערשטער האט רחמנות און ער מאכט מיט אונז גוטס, און אז דיין לעבן איז ביטער אזוי ווי א לעמאן - זאלסטו מאכן לעמאנאדע, פונעם ביטערן לעמאן - קען מען אויך גוט מאכן, מען קען מאכן א געשמאקע טרונק, לעמאנעיד; באצוקער דיין לעבן, באזיס די ביטערקייט.

וויסן זאלסטו, פון עצבות און מרירות באקומט מען גארנישט, און מען פועל'ט גארנישט דורך זיין דערביטערט, נאר דורך שמחה פועל'ט מען און מען איז זוכה צו ישועות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת פנחס, שבעה עשר בתמוז, שנת תשפ"ו לפרט קטן

טייערער ליבער ... נרו יאיר

וויסן זאלסטו, נישטא נאך א זאך וואס טוט שטארקן די נערווען ווי התבודדות ותפילה; דאס דערציילן און זיך אויסשמועסן דאס הארץ מיטן אייבערשטן – מאכט שטארקע נערווען, עס נעמט אוועק אלע נערוועזקייטן, מען באקומט א שטארקע מח.

מענטשן וואס זענען נישט מקורב צום רבי'ן, וואס ווייסן נישט פון די סוד פון התבודדות; אויף זיי איז א גרויסע רחמנות, ווייל ווען עס גייט זיי אריבער עפעס נישט גוט, אדער עפעס א צער, אדער עגמת נפש – דערציילן זיי עס פאר די ווייב, און על פי רוב וואס קען א ווייב טון? וואס פאר א עצות קען זי דען געבן? אנשטאט שטארקן – ווערט מען מער צעבראכן, פול מיט חלישות הדעת, אבער א ברסלב'ער חסיד וואס פאלגט דעם רבי'ן און גייט אביסל התבודדות יעדן טאג, ער דערציילט דעם אייבערשטן אלעס – דאס מאכט שטארקע נערווען, דאס ברענגט א קלארע לויטערע אמונה, מען האט כח אנצוגיין מיט די מצב, מיט די זאכן וואס מען גייט אריבער.

אשרינו אז מיר האבן א רבי וואס געבט אונז חיזוק און עצות מיט א קלארע לויטערע אמונה.