בריוון פונעם ראש ישיבה שליט"א

בעזרת ה' יתברך - יום ה' פרשת בהר בחקותי, כ' אייר, שנת תשפ"ו לפרט קטן

לכבוד ... נרו יאיר

קומענדיגע וואך ענדיגט זיך די חזקה פון האבן א בעט אין אומאן ביי אונזער בנין, ביז ראש חודש סיון האט מען די חזקה צו קענען נאכאמאל דינגען די בעט; מיר האבן געמאכט די זאך היות עס זענען דא פרישע מקורבים וואס ווילן איינשטיין ביי אונזער בנין, זיין מיט תלמידי היכל הקודש, אויך איז דא וואס ווילן נעמען נאך א בעט פאר די קינדער וואס ווערן קומענדיגע יאר זיבן יאר; וויל איך דיך דערמאנען, אויב דו ווילסט די יאר הבא עלינו לטובה זיין מיט אונזער חבורה - זאלסטו באצאלן די בעט ביז ראש חודש סיון.

שטארק זיך מיט אמונה, ווייל דער הייליגער רבי זאגט (שיחות הר"ן, סימן נג): "מִי שֶׁיֵּשׁ לוֹ אֱמוּנָה חַיָּיו חַיִּים", ווער עס האט אמונה - לעבט א גוט לעבן, "וְהוּא מְבַלֶּה יְמֵי חַיָּיו בְּטוֹב תָּמִיד", און ער פארברענגט זיינע טעג מיט גוטס. "כִּי כְּשֶׁהוֹלֵךְ לוֹ כָּרָאוּי וְיֵשׁ לוֹ טוֹב, בְּוַדַּאי טוֹב לוֹ", ווייל ווען עס גייט אים גוט, עס גייט אים ווי אזוי ער וויל - איז דאך גוט, "וַאֲפִילּוּ כְּשֶׁאֵינוֹ כָּךְ, דְּהַיְנוּ שֶׁאֵין מִתְנַהֵג לוֹ כְּסֵדֶר וְיֵשׁ לוֹ יִסּוּרִים חַס וְשָׁלוֹם, גַּם כֵּן טוֹב", און אפילו ווען עס גייט אים נישט ווי אזוי ער וויל, ער האט שווערע טעג, ער האט ווייטאג און יסורים - איז אים ווייטער גוט, "כִּי הוּא בָּטוּחַ שֶׁאַף עַל פִּי כֵן הַשֵּׁם יִתְבָּרַךְ יְרַחֵם עָלָיו לְהַבָּא וְיֵיטִיב אַחֲרִיתוֹ", ווייל ער פארלאזט זיך אז דער אייבערשטער וועט רחמנות האבן אויף אים און אים העלפן, "כִּי מֵאַחַר שֶׁהַכֹּל מֵאִתּוֹ יִתְבָּרַךְ, בְּוַדַּאי הַכֹּל לְטוֹבָה", ווייל אז אלעס איז פונעם אייבערשטן, אלעס קומט פון אים - מוז זיין אז אלעס איז נאר לטובה. "אֲבָל מִי שֶׁאֵין לוֹ אֱמוּנָה חַס וְשָׁלוֹם", אבער ווער עס האט נישט קיין אמונה - "חַיָּיו אֵינָם חַיִּים כְּלָל", לעבט נישט, דאס לעבן איז אים נישט קיין לעבן. "כִּי תֵּכֶף כְּשֶׁעוֹבֵר עָלָיו אֵיזֶה רָעָה שׁוּב אֵין לוֹ שׁוּם חִיּוּת", ווייל ווי נאר עס גייט אויף אים אריבער עפעס שלעכטס - האט ער מער נישט קיין לעבן, "כִּי אֵין לוֹ בַּמֶּה לְנַחֵם עַצְמוֹ כְּלָל", ער האט זיך נישט מיט וואס צו טרייסטן, "מֵאַחַר שֶׁאֵין לוֹ אֱמוּנָה כְּלָל", ווייל ער האט נישט קיין אמונה - "וְאֵין לוֹ שׁוּם חִיּוּת וְשׁוּם טוֹב", האט ער גארנישט, גארנישט, "מֵאַחַר שֶׁהוֹלֵךְ בְּלִי הַשֵּׁם יִתְבָּרַךְ וּבְלִי הַשְׁגָּחָה רַחֲמָנָא לִצְלָן", ווייל ער לעבט אנעם אייבערשטן, "אֲבָל עַל יְדֵי אֱמוּנָה, מַה טּוֹב וְיָפֶה הַחִיּוּת שֶׁלּוֹ", אבער מיט אמונה איז די לעבן אזוי שיין און זיס.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת במדבר, כ"ה אייר, שנת תשפ"ו לפרט קטן

לכבוד ... נרו יאיר

וואס גייסטו היינט עסן פאר נאכטמאל? זע צו עסן לאקשן, ווייל מוהרא"ש דערציילט, מען האט אמאל געהערט ווי דער הייליגער רבי ר' אלימלך זכותו יגן עלינו זאגט, אז היינט וויל ער נישט עסן פאר נאכטמאל קאשע, היינט וויל ער לאקשן, ער האט געזאגט ער מיינט נישט די עסן, ער מיינט צו זאגן אז ער וויל נישט עסן קיין קאשע, ער וויל נישט קיין קשיות אויפן אייבערשטן, ער וויל לאקשן, דאס איז די ווערטער 'לֹא-קָשְׁן' – "עס איז מיר גארנישט שווער, איך האב נישט קיין קשיות אויפן אייבערשטן".

על כן בעט איך דיר דו זאלסט אויך זיך באשטעלן א פושקע לאקשן, און אז דו האסט אין שטוב קאשע - זאלסטו גיין אין פעלד אוועק גיסן די קאשע, גיי התבודדות, גיס זיך אויס דיין הארץ, בעט דעם אייבערשטן פאר א קלארע לויטערע שטארקע אמונה, דו זאלסט שפירן דעם אייבערשטן און געדענקען אז עס איז גארנישט דא אויסער אים, אלעס איז דער אייבערשטער, דומם צומח חי מדבר - אלעס אלעס איז אייבערשטער.

ליבער ברודער, הארציגער חבר, נישטא קיין חברים, א שאד זיך צו חנפ'ענען, געב א קוק די זיסע ווערטער פון מוהרא"ש פון די צוואה (צוואת מוהרא"ש, סימן ט): "אִיךְ בֶּעט אַייךְ זֵייעֶר אִיר זָאלְט זִיךְ גוּט אַרַיין נֶעמֶען אִין קָאפּ אַז אִיר הָאט נִישְׁט קֵיינֶעם אוֹיף דֶער וֶועלְט. קַיין שׁוּם מֶענְטְשׁ אוֹיף דֶער וֶועלְט קֶען אַייךְ נִישְׁט הֶעלְפְן, אוּן זִיכֶער קֶען קֵיינֶער אַייךְ נִישְׁט שְׁלֶעכְטְס טוּן. דֶערִיבֶּער זָאלְט אִיר נִישְׁט מוֹרָא הָאבְּן פוּן קַיין שׁוּם מֶענְטְשׁ, אוּן אִיר זָאלְט זִיךְ נִישְׁט חַנְפְ'עֶנֶען צוּ קַיין שׁוּם מֶענְטְשׁ, וַוייל דָאס וֶועט אַייךְ גָארְנִישְׁט הֶעלְפְן; פַארְקֶערְט, דָאס וֶועט אַייךְ נָאר שָׁאטְן צוּם גֶעזוּנְט, וַוייל וֶוען מֶען פַארְלָאזְט זִיךְ אוֹיף מֶענְטְשְׁן, אוּן דֶערְנָאךְ זֶעט מֶען אַז יֶענֶער הָאט גָארְנִישְׁט גֶעקֶענְט הֶעלְפְן, יֶענֶער אִיז בִּכְלַל נִישְׁט אִינְטֶערֶעסִירְט דִיר צוּ הֶעלְפְן, דַאן וֶוערְט מֶען זֵייעֶר אַנְטוֹישְׁט, מֶען וֶוערְט זֵייעֶר צוּבְּרָאכְן אוּן צוּקְלַאפְּט פוּן דֶעם. אַ אִיד וָואס גְלֵייבְּט אָבֶּער אִינֶעם אֵייבֶּערְשְׁטְן, עֶר פַארְלָאזְט זִיךְ אִינְגַאנְצְן נָאר אוֹיפְן אֵייבֶּערְשְׁטְן, דַאן אִיז עֶר זֵייעֶר מַצְלִיחַ".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת במדבר, כ"ד אייר, שנת תשפ"ו לפרט קטן

לכבוד ... נרו יאיר

אז דו גייסט אריבער שווערע טעג, דו שפירסט ווי דו ווערסט צעקוועטשט - זאלסטו חס ושלום נישט האבן קיין קשיות אויפן אייבערשטן, גלייב אז אלעס וואס דער אייבערשטער טוט איז לטובה. די הייליגע חכמים דערציילן (נדה לא.), צוויי חברים האבן איינגעקויפט סחורה דאס צו פארקויפן אין א צווייטע לאנד, און אזוי גייענדיג צום שיף האט זיך איינער פון זיי צעבראכן די פוס און ער האט נישט געקענט גיין צום שיף, די שיף איז אוועק געפארן מיטן אנדערן שותף, מיטנעמענדיג אלע סחורה, און דער מענטש מיטן צעבראכענעם פוס איז אונטערגעבליבן, האט דער מענטש אנגעהויבן רעדן קעגן די אמונה, ער האט געהאט טענות צום אייבערשטן, און נאך א שטיק צייט האט ער געהערט אז די שיף איז איינגעזונקען אין וואסער מיט אלע מענטשן מיט די גאנצע סחורה, האט ער אנגעפאנגען דאנקען דעם אייבערשטן (ישעיה יב, א): "אוֹדְךָ ה' כִּי אָנַפְתָּ בִּי", איך דאנק דיך אייבערשטער אז דו האסט געצערנט אויף מיר – אז דו האסט מיר צעבראכן די פוס, און אזוי האב איך פארפאסט די שיף און געבליבן לעבן, "יָשֹׁב אַפְּךָ וּתְ'נַחֲמֵנִ'י", אין דעם פסוק איז מרומז דעם הייליגן רבינ'ס נאמען, דער רבי טרייסט אונז, דער רבי פילט אונז אן מיט אמונה, אז דער מענטש זאל דאנקען דעם אייבערשטן אויף אלעס וואס ער טוט מיט אים, אפילו וואס עס זעט אויס ווי שלעכטס.

ליבער ברודער, הארציגער חבר, אפילו ביי דיר האט זיך די מעשה נישט אזוי געענדיגט, זאלסטו זינגען און טאנצן: "'אוֹדְךָ ה'', איך דאנק דיך אייבערשטער פאר אלעס, און אויך פאר אלעס וואס איז מיר אריבער"; גלייב באמונה שלימה אז עס איז נישטא קיין פערצופאל, נישטא קיין פאסירונג, נישטא קיין טבע, נישטא קיין טעותים; אלעס וואס פאסירט איז מיט א פינקטליכער חשבון.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

לכבוד ... נרו יאיר

שטארק זיך מיט אמונה, און אז עס גייט אריבער אויף דיר שווערע טעג, דו שפירסט ווי דו ברעכסט אונטער - זאלסטו זיך שטארקן מיט אמונה; גלייב אז דער אייבערשטער מאכט אלעס מיט א חשבון, אלעס איז נאר פאר דיין טובה. קוק די זיסע ווערטער וואס מוהרא"ש זאגט (צוואת מוהרא"ש, אות יד): "מַיינֶע טֵייעֶרֶע קִינְדֶער אוּן תַּלְמִידִים, וָואס זָאל אִיךְ אַייךְ זָאגְן? אִיר קֶענְט זִיךְ נִישְׁט פָארְשְׁטֶעלְן וִויפִיל יִסוּרִים אוּן עַגְמַת נֶפֶשׁ אִיךְ הָאבּ גֶעלִיטְן אוֹיף דֶער וֶועלְט, אִיךְ הָאבּ מַמָשׁ נִישְׁט גֶעהַאט קַיין אֵיין גוּטְן טָאג אִין מַיין לֶעבְּן, אָן קַיין גֻּזְמָא. אִיךְ הָאבּ יֶעדְן טָאג גֶעוֵויינְט פוּן דִי פִילֶע צַעַר אוּן עַגְמַת נֶפֶשׁ וָואס אִיךְ הָאבּ גֶעהַאט פוּן אַלֶע זַייטְן, פוּן אִינֶעוֵויינִיג אוּן פוּן אִינְדְרוֹיסְן. אָבֶּער אִיךְ הָאבּ זִיךְ שְׁטֶענְדִיג גֶעטְרֵייסְט מִיט דֶעם אַז בָּרוּךְ ה' אִיךְ גְלֵייבּ אִינֶעם אֵייבֶּערְשְׁטְן, אִיךְ וֵוייס אַז אַלֶעס הָאט אַ פּוּנְקְטְלִיכֶער חֶשְׁבּוֹן, אַלֶעס וֶוערְט גֶעפִירְט מִיט אַ גֶעוַואלְדִיגֶע הַשְׁגָחָה פְּרָטִית, אוּן אִיךְ בִּין נָאר אַנְטְלָאפְן שְׁטֶענְדִיג צוּם אֵייבֶּערְשְׁטְן, אוּן נָאר דָאס הָאט מִיר גֶעהָאלְפְן אִיבֶּערְקוּמֶען מַיינֶע צָרוֹת אוּן יִסוּרִים, דֶערִיבֶּער זָאלְט אִיר אוֹיךְ טוּן דִי זֶעלְבֶּע, אִיר זָאלְט חַס וְשָׁלוֹם נִישְׁט הָאבְּן קַיין טַעֲנוֹת אוֹיפְן אֵייבֶּערְשְׁטְן, זִיךְ נִישְׁט אָפְּרֶעדְן אוֹיפְן אֵייבֶּערְשְׁטְן. גֶעדֶענְקְט וָואס דִי חֲזַ"ל זָאגְן (תַּנְחוּמָא תֵצֵא): "צָרִיךְ הָאָדָם לְהַחְזִיק טוֹבָה לְהַקָדוֹשׁ בָּרוּךְ הוּא בִּזְמַן שֶׁהַיְסוּרִין בָּאִין עָלָיו, לָמָה? שֶׁהַיְסוּרִין מוֹשְׁכִין אֶת הָאָדָם לְהַקָדוֹשׁ בָּרוּךְ הוּא" - אַ מֶענְטְשׁ דַארְף דַאנְקֶען דֶעם אֵייבֶּערְשְׁטְן וֶוען עֶר שִׁיקְט אִים יִסוּרִים. פַארְוָואס? וַוייל דִי יִסוּרִים שְׁלֶעפְּן דֶעם מֶענְטְשׁ צוּם אֵייבֶּערְשְׁטְן. נָאךְ זָאגְן דִי חֲזַ"ל (סִפְרִי וָאֶתְחַנַּן): "יְהֵא אָדָם שָׂמֵחַ בְּיִסּוּרִין יוֹתֵר מִן הַטוֹבָה, שֶׁאִילוּ הָאָדָם בְּטוֹבָה אֵין נִמְחָל לוֹ עָווֹן שֶׁבְּיָדוֹ, וּבִּיְסוּרִין נִמְחָל לוֹ" - אַ מֶענְטְשׁ דַארְף זִיךְ מֶער פְרֵייעֶן מִיט דִי יִסוּרִים וָואס עֶר בַּאקוּמְט וִוי מִיט דִי גוּטְס וָואס עֶר בַּאקוּמְט, וַוייל וֶוען אַ מֶענְטְשׁ הָאט נָאר גוּטְס וֶועט עֶר מִיט דֶעם נִישְׁט אָפְּקוּמֶען זַיינֶע עֲבֵירוֹת, אָבֶּער וֶוען עֶר הָאט יִסוּרִים וֶועט דָאס אָפְּמֶעקְן אַלֶע זַיינֶע עֲבֵירוֹת".

שטארק זיך מיט 'תודה והודאה', דאנק און לויב דעם אייבערשטן אויף די גוטע זאכן וואס ער טוט מיט דיר, און אויך אויף אלעס וואס איז אריבער ביז אהער אויף דיר; ווי מער מען לויבט דעם אייבערשטן - ווערט מען נענטער צו אים און מען באקומט גדלות המוחין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר

דער הייליגער רבי זאגט (שיחות הר"ן, סימן לב), דער וואס האט א שטארקע אמונה האט שטארקע כוחות פארן לעבן, און אפילו חס ושלום אויב מען האט יסורים קען מען זיך מנחם זיין און זיך מחי' זיין אז דער אייבערשטער וועט רחמנות האבן און עס וועט ביים סוף זיין גוט, און מען קומט אפ אלעס, און אויף יענע וועלט וועט מען האבן עולם הבא. אבער אויב מען האט נישט אמונה, ווען עס קומט א צרה, א פראבלעם – האט מען נישט מיט וואס זיך צו טרייסטן, נישטא צו וועם זיך צו ווענדן, "וְהַכְּלָל, שֶׁעִקָּר הוּא הָאֱמוּנָה", דער עיקר איז אמונה, גלייבן אינעם אייבערשטן אז אלעס איז מיט א חשבון און אלעס איז לטובה, און אלעס איז אים, דעמאלט איז די לעבן א שטארקע לעבן, א גוטע לעבן, א זיסע לעבן.

ווי אזוי איז מען זוכה צו א שטארקע אמונה, א קלארע לויטערע אמונה? דורך התקרבות לצדיקים, דורך לערנען דעם הייליגן רבינ'ס ספרים; דער רבי ברענגט אין אונז א קלארע לויטערע אמונה, מען איז זוכה צו קומען צו אזא שטארקע אמונה, ביז מען איז זוכה צו שפירן אזוי שטארק דעם אייבערשטן, אזוי ווי מען זעט עס פאר די אויגן.

אשרינו שזכינו...

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר

שטארק זיך אין דיין הייליגע ארבעט פון זיין א מלמד פאר תינוקות של בית רבן, די יסוד פון זיין א גוטער מלמד איז 'שמחה', דער מלמד זאל זיין פרייליך, 'בגדלות המוחין'; אויב חס ושלום דער מלמד איז אין עצבות ומרה שחורה, בקטנות המוחין – קען זיין סכנת נפשות, מען קען צעקלאפן די קינדער און זיי מאכן פאר בעלי מומין השם ישמרינו.

מוהרא"ש זאגט, דערפאר ליינט מען פרשת במדבר א וואך פאר יום טוב שבועות, מען ליינט ווי די תורה ציילט די אידן, זאגט רש"י (במדבר א, א): "מתוך חבתן לפניו מונה אותם כל שעה", פון גרויס ליבשאפט וואס דער אייבערשטער האט ליב אונז אידישע קינדער ציילט ער אונז שטענדיג; ווייל מתן תורה און קבלת התורה קען נאר זיין פון גרויס ליבשאפט, נאר אזוי קענען די תלמידים מקבל זיין.

על כן זאלסטו זיך שטארקן מיט אלע כוחות צו זיין פרייליך, לאז זיך נישט פארנארן פון די פרומע קליפות, פון די פרומע שטן, וואס מאכט דיך 'זייער ערנסט', און מאכט דיך זען נאר חסרונות, ניץ דעם רבינ'ס עצות פון זוכן נאר דאס גוטס ביי דיר, ביי די קינדער; בוי זיי אויף.

איך האב נאך אסאך צו זאגן, אבער כל זמן דו ביסט בקטנות המוחין, דו ביסט נישט גרייט צו הערן – וועל איך זיך צוריק האלטן...

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר, קרית יואל

מזל טוב! מזל טוב! דער אייבערשטער זאל העלפן דו אינאיינעם מיט דיין ווייב זאלן זוכה זיין צו מגדל זיין דעם נייעם געבוירענע מיידל לתורה ולחופה ולמעשים טובים, און זען אסאך אידיש ערליכע נחת ביי אלע קינדער אינאיינעם.

דאנקט און לויבט דעם אייבערשטן, הערט נישט אויף צו זאגן: "שכוח אייבערשטער", דאנקט אים פאר אלע חסדים, און נאכן דאנקען זאלן ענק ווייטער דאנקען; דער הייליגער רבי זאגט (לקוטי מוהר"ן חלק ב, סימן ב), דאס דאנקען און לויבן דעם אייבערשטן ברענגט דעם מענטש זייער נאנט צום אייבערשטן, מען איז זוכה שוין דא בזה העולם צו שפירן די טעם פון גן עדן, פון שעשוע עולם הבא.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

שמואל לייב פעלבערבוים נרו יאיר, קרית ברסלב

"זה היום עשה ה' נגילה ונשמחה בו", איך בין אזוי פרייליך אז עס איז דא "ברסלב'ע פלייש", עופות וואס זענען גע'שחט'ן דורך אונזערע טייערע שוחטים, ברסלב'ע חסידים, יראים ושלמים, אינגעלייט וואס פירן זיך בקדושה ובטהרה, אינגעלייט שוחטים וואס נעמען נישט דעם חלף, דעם מעסער – נאר נאכן זיך מתבודד זיין.

זאלסט זיין געבענטשט פארן טון אלע שווערע ארבעט אז דאס זאל קענען צושטאנד קומען.

זיי מודיע פאר אנשי שלומינו אז מען קען האבן "ברסלב'ע פלייש", און זיץ מיט די חברי הנהלה, מען זאל דאס קענען אוועקשטעלן ריכטיג, עס זאל זיין אונטער די קהילה, אזוי וועט זיין סייעתא דשמיא, ווייל אלעס פון די קהילה "קהילת היכל הקודש" האט סייעתא דשמיא, מוהרא"ש פארעט זיך פאר די קהילה, מען זעט בחוש אז די הצלחה איז שלא כדרך הטבע, עס איז עפעס א העכערע כח, די כח פון צדיקים.

דער אייבערשטער זאל דיר געבן הצלחה און נחת ביי דיינע קינדער און אייניקלעך, אמן.

בעזרת ה' יתברך - יום ה' פרשת אחרי קדושים, ו' אייר, שנת תשפ"ו לפרט קטן

יואל מנחם גרשון נרו יאיר

איך וויל מאכן א מעשה'לעך פאר די קינדער לכבוד ל"ג בעומר, די מעשה פון ירושלמי וואס רבי שמעון בר יוחאי האט געהאט ביים ארויסגיין פון הייל.

בעט דעם מעלער זאל מאכן א בילד ווי א פאנגער פאנגט פייגלעך און ווי אפאר פייגעלעך זענען שוין אין די נעץ, און ווי א פייגל פליט אוועק פונעם נעץ אויף ארויף, און ווי צוויי מענטשן איינער עלטער און איינער יונגער, איינער ווייזט אויפן פייגעלע. דער פאנגער זאל אויסקוקן אביסל מיט א שרעקעדיגע פנים אז די קינדער זאל זיך וועלן פארטון אינעם בילד. די פייגלעך זאלן זיין גרויסע; בכלל גלייך איך מער די גרויסע בילדער.

איינס... צוויי... דריי... נישט געלונגען, א מחוצף די פייגעלע, איך וועל אים נאך באלד כאפן.

איינס... צוויי... דריי... נישט געלונגען, וואס גייט פאר? די פייגלעך פליען אזוי שנעל אוועק... איך גיי פרובירן נאך איינמאל, איינס... צוויי... דריי... כאפ...! געלונגען, אריינגעכאפט!

האסט געהערט די בת קול: "ספיקולא"? דאס מיינט געכאפט.

טייערע קינדער, די מעשה האט פאסירט ווען דער הייליגער תנא רבי שמעון בר יוחאי איז ארויס פון די הייל נאכן זיך באהאלטן פון די רוימער פאר דרייצן יאר, די רוימער האבן געוואלט הרג'ענען רבי שמעון בר יוחאי ווייל ער האט געזאגט אז מען דארף אכטונג געבן פון די גוים, זיי ווילן מאכן די אידן זאלן טון עבירות, רבי שמעון בר יוחאי האט זיך געדארפט באהאלטן, און ווען ער איז ארויס געקומען האט ער געזען ווי א פאנגער פאנגט פייגלעך און עס גייט אים נישט, ביז ער הערט א בת קול וואס זאגט: "ספיקולא", דאס מיינט געכאפט; האט רבי שמעון בר יוחאי געזאגט פאר זיין זון רבי אלעזר: "קוק, אפילו א קליינע פייגעלע קען מען נישט פאנגען נאר נאכדעם וואס מען זאגט אין הימל מען זאל איר פאנגען, איז דאך זיכער אז קיין שום זאך קען נישט פאסירן מיט א מענטש נאר אז מען רופט דאס אויס אין הימל".

טייערע קינדער, מיר גייען בעטן דעם אייבערשטן מיר זאלן האבן א שטארקע אמונה, מיר זאלן וויסן אז קיינער קען גארנישט טון, קיינער קען נישט שלעכט טון; מען דארף זיך פארלאזן נאר אויפן אייבערשטן.

ואמרתם כה לחי... רבי שמעון בר יוחאי..."

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת בהר בחקותי, ט"ז אייר, שנת תשפ"ו לפרט קטן

... נרו יאיר וזוגתו תחי'

אוי ווי שווער עס איז מיר צו הערן די שרעקליכע בשורה, אוי וויי, אוי עס רייסט די הארץ; טאטע מאמע זאלן אריבער גיין אזא פאסירונג, ענק האבן פארלוירן א טאכטער אזוי פלוצלונג; ברוך דיין האמת, המקום ינחם אתכם מתוך שאר אבלי ציון וירשלים דער אייבערשטער זאל ענק טרייסטן ענקערע צעבראכענע הערצער, און אויך אונזערע צעבראכענע הערצער, און מיר זאלן שוין זוכה זיין צו די גאולה שלימה במהרה בימנו.

מוהרא"ש זאגט, ביים מנחם זיין אבלים, ניצט מען דעם לשון "המקו"ם ינחם אתכם" וואס איז דער לשון 'המקו"ם' ינחם אתכם? נאר עס שטייט אין זוהר (תיקוני זוהר תיקון כו, דף עא:), הוי"ה בהכאה באטרעפט מקו"ם. דאס הייסט: אז מען רעכנט צען מאל די אות י', פינף מאל די אות ה', זעקס מאל די אות ו', און נאכאמאל פינף מאל די אות ה' - קומט אויס הונדערט זעקס און אכציג (186) אזוי ווי די ווארט מקו"ם; מוהרא"ש זכרונו לברכה איז דאס מסביר, ווען א מענטש כאפט קלעפ, און אז ער ווייסט אז אלעס וואס גייט אריבער אויף אים קומט פונעם אייבערשטן, ער ווייסט אז הוי"ה בהכאה - "עולה מקום", בלייבט מען אין פלאץ, די לעבן גייט ווייטער אן, ווייל אויב חס ושלום מען איז אונטער געווארפן אונטער טבע, מקרה און מזל, מען מיינט אז זאכן פאסירן פון זיך אליין חס ושלום, און מען הייבט זיך אן באשולדיגן אז מען וואלט ווען געקענט טון אזוי, מען וואלט ווען געקענט מאכן אנדערש, דעמאלט האט מען מער נישט קיין 'מקום' אויף די וועלט, מען שפירט זיך ווי א פארטיבענער השם ישמרינו; און דאס זאגט מען פאר די אבלים: "המקו"ם ינחם אתכם מתוך שאר אבלי ציון וירושלים.

ליבער ברודער איך בעט דיר זאלסט זיך זייער שטארקן, וויסן זאלסטו, מיר ווייסן גארנישט, מיר פארשטייען גארנישט, מיר ווייסן אז דער אייבערשטער פירט די וועלט בצדק ובמשפט. דער הייליגער רבי זאגט (לקוטי מוהר"ן חלק ב, סימן נב), דאס וואס מיר פארשטייען נישט דרכי המקום - דאס איז די גרויסקייט פונעם אייבערשטן, וואלטן מיר אלעס פארשטאנען - וואלט געווען כביכול די שכל פונעם אייבערשטן אזוי ווי אונזער שכל; מיר פארשטייען נישט דרכי המקום, מיר גלייבן באמונה שלימה אז אלעס וואס דער אייבערשטער טוט - איז גוט, אלעס איז בהשגחה, און מען דארף שטענדיג חזר'ן דעם פסוק (דברים לב, ד): "הַצּוּר תָּמִים פָּעֳלוֹ, כִּי כָל דְּרָכָיו מִשְׁפָּט, אֵל אֱמוּנָה וְאֵין עָוֶל, צַדִּיק וְיָשָׁר הוּא", אלעס וואס דער אייבערשטער טוט - איז מיט א פינקטליכער חשבון.

בעזרת ה' יתברך - יום א' פרשת בהר בחקותי, ט"ז אייר, שנת תשפ"ו לפרט קטן

... נרו יאיר

איך זע אז דו ביסט געבליבן די יאר אין שטעטל אויף ל"ג בעומר, ביסט נישט געפארן קיין מירון; ליבער ברודער, הארציגער חבר - מען קען זיך מקשר זיין צום צדיק וואו מען געפינט זיך, אפילו דער וואס איז נישט אנגעקומען צו זיין אין מירון קען זיך אויך מקשר זיין צום הייליגן תנא רבי שמעון בר יוחאי און פועל'ן ישועות און רפואות און אלע גוטע זאכן, רבי שמעון בר יוחאי געפינט זיך דארט וואו מען לערנט זיינע תורות, און דארט וואו מען פירט זיך אזוי ווי ער האט געלערנט; דער רבי האט אמאל געזאגט: "א שיינע חתונה איז יעצט אין מירון, אבער דער חתן איז דא"; ווייל דארט וואו מען פירט זיך אזוי ווי דער צדיק האט געוואלט - דארט איז דער צדיק.

אז מען לערנט דעם הייליגן זוהר, מען זאגט די ווערטער פונעם זוהר - איז דאס גערעכנט אזוי ווי מען איז ביי די מערה, עס איז גערעכנט אזוי ווי מען איז זיך משתטח אויפן ציון פונעם צדיק. דער הייליגער רבי זאגט (לקוטי מוהר"ן חלק א, סימן קצב), די פנים, שכל און נשמה פונעם צדיק ליגט אין זיינע ספרים; די זעלבע ווערטער זאגט דער הייליגער צדיק רבי נחום מטשערנאביל זכותו יגן עלינו (ישמח לב, מסכת שבת, דף תקיא), ווען מען לערנט די תורות פונעם צדיק - איז אזוי ווי מען איז זיך משתטח אויפן קבר פון דעם צדיק, "שִׂפְתוֹתָיו דּוֹבְבוֹת בַּקֶּבֶר" (יבמות צז.), אז דאס גייט ארויף ווען מען לערנט די תורות פונעם צדיק איז דאס אזוי ווי מען איז זיך משתטח ביים קבר פונעם צדיק, עיין שם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת אמור, ט' אייר, שנת תשפ"ו לפרט קטן

... תחי'

איך האב ערהאלטן די בריוו.

דאס וואס עס האט פאסירט, עס האט זיך אייך אריינגעכאפט א בילד במחשבה פון א צלם, פון א שתי וערב, און איר האט עס נישט געקענט ארויסנעמען פון קאפ, איר זענט דערשראקן אז דאס האט פאסירט אין א צייט וואס איר זענט אהיים געקומען וכו', און איר זענט דערשראקן וכו'; מאכט נישט קיין עסק דערפון, א צלם איז גארנישט, די גאנצע זאך איז איין גרויסע דמיון, איר דארפט גארנישט מורא האבן.

דאס אז די מחשבה איז נישט ארויס - דאס איז פשוט, דאס זאגט שוין דער הייליגער רבי (לקוטי מוהר"ן חלק א, סימן עב): "כִּי זֶה טֶבַע וּסְגֻלַּת שֶׁל אֵלּוּ הַיְצָרִין הָרָעִים הַמְזֹהָמִים", אזוי ארבעט די שלעכטע שמוציגע יצר הרע, "כָּל מַה שֶּׁרוֹצִים לְהִתְגַּבֵּר עַל אֵלּוּ הַמַּחֲשָׁבוֹת", ווי מער מען וויל זיך שטארקן אויף זיי, "יוֹתֵר וְיוֹתֵר הֵם מִתְגַּבְּרִים", שטארקן זיי זיך שטערקער אויפן מענטש; אזוי ווי ווען מען לויפט אוועק פון איינעם, און אז מען קוקט צוריק אויף יענעם ווערט יענער שטערקער, ווייל ער זעט ווי מען קוקט צוריק, און דאס מאכט יענער זאל ווייטער נאכלויפן, אזוי ארבעט די שלעכטע מחשבות, ווי מער מען שלאגט זיך מיט זיי ווערן זיי שטערקע, מען קען זיי נישט פארטרייבן דורך זיך קריגן מיט זיי.

די עצה פטור צו ווערן פון די מחשבות איז שמחה, דער רבי זאגט דארט: "גַּם עַצְבוּת הוּא מַזִּיק מְאֹד וְנוֹתֵן כֹּחַ לְזֶה הַיֵּצֶר הָרָע הָעָב הַגַּשְׁמִי", נאר מיט שמחה קען מען זיין א בעל הבית אויף די מחשבות, דער זוהר הקדוש זאגט בשמח"ה איז די אותיות מחשבה; מיט שמחה קען מען קאנטראלירן די מחשבות.

די אנדערע בלבול וכו'; דאס איז אלעס מעשה סמ"ך מ"ם אז מען זאל זיך נישט פרייען מיט די גרויסע מצוה וואס מען איז זוכה צו טון וכו'; זייט פרייליך אז איר זענט זוכה צו היטן די הלכות און צו גיין וכו', ווייל מיט שמחה של מצוה וכו' ברענגט מען אראפ הייליגע נשמות, דאס איז די סוד פון ברענגען געזונטע הייליגע נשמות - שמחה של מצוה, זיין פרייליך אז מען טוט דעם רצון פונעם אייבערשטן וכו' וכו'.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת אמור, י"ג אייר, שנת תשפ"ו לפרט קטן

לכבוד ... נרו יאיר

נעם אריין אמונה אין דיר, לעב מיט אמונה, חזר אמונה, חזר זיך אז עס איז גארנישט דא אויסער דעם אייבערשטן, אלעס פירט דער אייבערשטער, אלעס מאכט ער, אלעס טוט ער און אלעס איז ער אליינס, און אז עס גייט אריבער אויף דיר יסורים וכו' - זאלסטו וויסן אז דאס איז מיט א חשבון. חכמינו זכרונם לברכה זאגן (חולין ז:): "אין אדם נוקף אצבעו מלמטה אלא אם כן מכריזין עליו מלמעלה", א מענטש צוקלעמט זיך נישט זיין פינגער אן דעם וואס מען זאל אויסרופן אין הימל פון פאראויס אז דער מענטש זאל זיך צעקלאפן זיין פינגער; און אזוי אויך מיט פרנסה, די הייליגע חכמים זאגן (יומא לח.): "בשמך יקראוך ובמקומך יושיבוך, אין אדם נוגע במה שמוכן לחבירו", קיינער קען נישט צורירן צו א פרוטה וואס איז אנגעגרייט פארן חבר, "ואין מלכות נוגעת במלכות חברתה אפילו כמלוא נימא", און קיינער קען נישט צונעמען פון א צווייטן; נאך זאגן חכמינו זכרונם לברכה (ברכות נח.): "אפילו ריש גרגיתא מן שמיא מנו ליה", אפילו דער וואס איז ממונה צו ארבעטן ביי די סוער, שמוציגע ארבעט - איז אויך פון הימל.

רעד מיט מענטשן דיבורי אמונה, ביי יעדע זאך זאלסטו מזכיר זיין דעם אייבערשטנ'ס נאמען, וואס מען רעדט זאלסטו זאגן: "ברוך השם", "געלויבט השם יתברך", "אם ירצה השם", "חסדי השם", "כי טוב השם"; דאס וועט אראפנעמען פון דיר אלע שלעכטס, אזוי זאגט דער הייליגער רבי (ספר המדות אות אמונה, סימן לג): "עַל יְדֵי אֱמוּנָה, הַקָּדוֹשׁ בָּרוּךְ הוּא יִסְלַח לְךָ עַל כָּל עֲווֹנוֹתֶיךָ", דורך אמונה איז דער אייבערשטער מוחל אויף אלע עבירות.

ביים רבי'ן באקומט מען א קלארע אמונה, דער רבי לערנט מיט אונז אמונה. דער הייליגער רבי זאגט (שיחות הר"ן, סימן לג): "אֵצֶל הָעוֹלָם אֱמוּנָה הוּא דָּבָר קָטָן", ביי די וועלט איז אמונה א קלייניקייט, "וְאֶצְלִי אֱמוּנָה הוּא דָּבָר גָּדוֹל מְאֹד", אבער ביי מיר איז דער עיקר אמונה.

דעם שבת וועל איך זיין אם ירצה ה' אין קרית ברסלב ביי מיין איידעם שליט"א און דאווענען אין די שול ביי די גאס פון ירושלים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת בהר בחקותי, י"ח אייר, ל"ג בעומר, שנת תשפ"ו לפרט קטן

לכבוד ... נרו יאיר

"היום תשמע שועתנו בזכות אדונינו בר יוחאי", היינט איז זייער א הייליגע טאג, מען קען זוכה זיין צו פועל'ן ישועות; די גרעסטע ישועה וואס מען קען פועל'ן איז - מען זאל זיך אויפוועקן פון די שלאף פון נאכלויפן טאג און נאכט די בהמות, זוכן נאך געלט און נאך געלט, און אנהייבן זוכן דעם אייבערשטן.

ווען מען לערנט זוהר זעען מיר דאס ליבשאפט וואס דער אייבערשטער האט ליב אידישע קינדער, נישטא קיין שטיקל אין ספר הזוהר וואס זאל זיך נישט אנהייבן מיט די הקדמה: "זכאין אינון ישראל", וואויל איז פאר אונז אידישע קינדער, "דקודשא בריך הוא אתרעי בהו", אז דער אייבערשטער האט אונז אויסדערוועלט, "ובגין דאתרעי בהו קרא לון בנין", און דער אייבערשטער האט אונז ליב, ער ריפט אונז קינדער; יעדע מאל רבי שמעון בר יוחאי הייבט אן מגלה זיין סודות הייבט ער אן נאכאמאל מיט די הקדמה, אז דער אייבערשטער האט אזוי שטארק ליב אידן; אויך געפינען מיר זייער אסאך אין הייליגן זוהר דאס גרויסקייט פון א איד ווען ער טוט א מצוה, און ווי גרויס תורה און תפילה איז, ווען א מענטש לערנט תורה ווערט ער זייער באליבט ביים אייבערשטן, און ווען מען דאווענט גייען ארויף די תפילות ביזן אייבערשטן, עס ווערט פון די תפילות א קרוין כביכול פארן אייבערשטן.

דער הייליגער רבי שמעון בר יוחאי וועקט אונז אויף, דער הייליגער רבי זאגט (לקוטי מוהר"ן חלק א, תורה לכו חזו), רבי שמעון בר יוחאי איז א וואַכעדיגע זאך אזוי ווי עס שטייט (דניאל ד, י): "עִ'יר וְ'קַדִּישׁ מִ'ן שְׁ'מַיָּא נָ'חִת", א הייליגע וואַכעדיגע מלאך איז אראפ פון הימל, דאס איז די ראשי תיבות שמעו"ן; אז דאס איז רבי שמעון בר יוחאי, ער וועקט אונז אידישע קינדער מיר זאלן נישט זיין אזוי פארלאשן פונעם לאנגן טיפן גלות, פון וואס עס גייט אריבער, מען זאל וויסן און גלייבן אז 'דער אייבערשטער האט מיך אויך ליב', און אז 'יעדע זאך וואס איך טו איז חשוב ביים אייבערשטן, און אפילו איך קום נאכנישט אן צו טון די גוטע זאכן, אבער א רצון האב איך, איך וויל טון גוט, איך וויל זיין גוט - איז דאס זייער זייער באליבט ביים אייבערשטן'; אזוי ווי רבי שמעון בר יוחאי זאגט אין הייליגן זוהר (תרומה קנ:): "לית רעותא טבא דיתאביד", קיין איין גוטע ווילן ווערט נישט פארלוירן, דער אייבערשטער זעט די גוטע ווילן; און אז מען נעמט אריין די לימוד גייט מען ארויס פונעם אייגענעם גלות, ווייל אויסער וואס מיר זענען אינעם גרויסן גלות, בנוסף לזה איז יעדער איינער אין זיין פריוואטע גלות, מען שפירט זיך דערווייטערט, מען שפירט זיך פארטריבן פון די קדושה, מען קוקט זיך אן שלעכט, מען דמיונ'ט זיך אז דער אייבערשטער איז חס ושלום ברוגז, און דורך די לימוד פון רבי שמעון בר יוחאי, דורך די לימוד פון זוהר וואס שרייט אויס נאכאמאל און נאכאמאל דאס גרויסקייט פון אידישע קינדער, ווי שטארק דער אייבערשטער האט ליב יעדן איד – 'יפקון מן גלותא', גייט מען ארויס פון גלות (זוהר פרת נשא, קכד:), און אז אלע וועלן ארויסגיין פונעם אייגענעם גלות, מען וועט לעבן מיט א ליבשאפט צום אייבערשטן און צו די תורה - וועלן מיר ארויסגיין פונעם לאנגן גרויסן גלות במהרה בימינו אמן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת בהר בחקותי, ט"ז אייר, שנת תשפ"ו לפרט קטן

לכבוד ... נרו יאיר

געב זיך אכטונג מען זאל דיך נישט בא'גנב'ענען, געטרוי נישט קיינעם, דארפסט נישט דערציילן אז דו האסט אוועק געלייגט געלט; ווי ווייניגער רעדן אלץ געזונטער. רעד נישט פון זיך, בלאז נישט פון זיך, עס קומט נישט ארויס קיין גוטס פון זיך בארימען און זיך גרויסן.

מיר האבן אנגעהויבן א פרישע מסכתא, מסכת חולין; כאפ זיך מיט, הייב אן לערנען יעדן טאג דעם בלאט גמרא, יעדן טאג א בלאט. לערנען גמרא און זאגן גמרא פארברענט די קליפה וואס ווארפט אראפ דעם מענטש אין פגם הברית, הוצאת זרע לבטלה רחמנא לצלן. דער הייליגער רבי זאגט (לקוטי מוהר"ן חלק א, סימן ריד): "תַּלְמוּד בְּגִימַטְרִיָּא אוֹתִיּוֹת שֶׁל שְׁמָהּ 'לִילִית'", תלמוד באטרעפט אזוי ווי די קליפה וואס ווארפט אראפ דעם מענטש אין פגם הברית, רחמנא לצלן, תלמו"ד באטרעפט פיר הונדערט אכציג, און די קליפה לילי"ת באטרעפט אויך פיר הונדערט אכציג, "עַל כֵּן יֵשׁ כֹּחַ בְּלִמּוּד הַתַּלְמוּד לְהַכְנִיעַ אוֹתָהּ", אז מען לערנט גמרא איז מען מכניע די קליפה.

ליבער ברודער הארציגער חבר, זע זיך צו שטארקן מיט וואס דו קענסט נאר, און קיין שום זאך זאל דיך נישט צעברעכן, ווייל אויף די וועלט דארף מען זייער אסאך חיזוק. אויך די גרויסע צדיקים וואס האבן קיינמאל נישט געזינדיגט און זיי האבן זייער גאנץ לעבן געדינט דעם אייבערשטן - אויך זיי האבן געדארפט זייער אסאך התחזקות, און נאר דורכדעם וואס זיי האבן זיך געשטארקט האבן זיי זוכה געווען צו וואס זיי האבן זוכה געווען, אויך דער הייליגער רבי האט בפירוש געזאגט (לקוטי מוהר"ן חלק ב, סימן מח), אויב וואלט אים איינער געזאגט א גוט ווארט אין זיינע יונגע יארן, אפילו נאר די איין ווארט 'ברודער שטארק זיך' - וואלט עס אים זייער געהאלפן; איז דאך זיכער אז מיר קליינע מענטשלעך, וואס מיר זענען צעבראכן אויף פיצלעך פיצלעך, וואס נאר דער אייבערשטער ווייסט וואס אויף אונז גייט אריבער - איז דאך זיכער אז מיר דארפן זיך שטארקן און זיך נישט נאכלאזן.

אמאל האט רבי נתן גערעדט מיט אנשי שלומינו אז אויף יעדן איינעם גייט אריבער שווערע ביטערע נסיונות און מען דארף זיך דערהאלטן מיט אלע כוחות, אינמיטן רעדן האט ער זיך זייער צופלאקערט און געזאגט: "פארוואס איז רבי שמעון בן יוחאי געווארן רבי שמעון בן יוחאי? ווייל ער האט געהאט די מאס התחזקות! פארוואס איז דער אר"י הקדוש געווארן דער אר"י הקדוש? ווייל ער האט געהאט די מאס התחזקות! פארוואס איז דער בעל שם טוב הקדוש געווארן דער בעל שם טוב הקדוש? ווייל ער האט געהאט די מאס התחזקות! פארוואס איז דער הייליגער רבי געווארן דער הייליגער רבי? ווייל ער האט געהאט די מאס התחזקות! און פארוואס בין איך וואס איך בין? ווייל איך האב די מאס התחזקות!" דאס איז די יסוד פון זוכה זיין צו קומען צו די העכסטע מדריגות, זיך דערהאלטן און נישט אויפגעבן; ווייל אויף אלע צדיקים איז אריבער וואס איז אריבער, און נאר ווייל זיי האבן זיך דערהאלטן זענען זיי צוגעקומען צו זייערע מדריגות.

איך האב נאך אסאך צו שרייבן אבער איך דארף גיין צו די בחורים, זיי ווארטן אויף אביסל חיזוק.

דער אייבערשטער זאל העלפן זאלסט האבן הצלחה אין אלע ענינים.

מקשר זיין צום הייליגן תנא רבי שמעון בר יוחאי

בעזרת ה' יתברך

יום ב' פרשת בהר בחקותי, י"ז אייר, שנת תשפ"ו לפרט קטן

לכבוד ... נרו יאיר

היינט נאכט איז ל"ג בעומר; וויסן זאלסטו, סיי די וואס זענען זוכה צו זיין אין מירון און סיי די וואס זענען נישט זוכה צו זיין אין מירון - קענען זוכה זיין זיך צו מקשר זיין צום הייליגן תנא רבי שמעון בר יוחאי און צו זיין אין די מערה.

ווען איך בין געווען פאריאר תשפ"ה אין מירון מיט די בחורים פון די ישיבה אין ירושלים האבן זיי מיר געבעטן איך זאל זיי ווייזן די פתח המערה, די עפענונג וואו מען גייט אריין צו די הייל, די פתח המערה; איך האב זיי געזאגט אז די וועג אנצוקומען אין די מערה איז דורך די מויל, מערה מיינט מען זיין דבוק אינעם אייבערשטן 'מערה' איז א לשון פון באהאפטן אזוי ווי עס שטייט (מלכים א ז, לו): "כְּמַעַר אִישׁ וְלֹיוֹת" וגו', א לשון פון ארומגענומען און באהאפטן; ווי אזוי קען מען זיין צוגעקלעבט און באהאפטן צום אייבערשטן? מיט די מויל, מיטן ניצן די מויל, בעטן דעם אייבערשטן אויף יעדע זאך; אזוי ווי דער רבי זאגט (לקוטי מוהר"ן חלק ב, סימן פד): "דַּע שֶׁעִקָּר הִתְחַבְּרוּת וּדְבֵקוּת לְהַשֵּׁם יִתְבָּרַךְ הוּא עַל יְדֵי תְּפִילָה", דער עיקר וואס קלעבט צו דעם מענטש און טוט אים באהעפטן צום אייבערשטן - איז תפילה, דאס איז די מערה פון רבי שמעון בר יוחאי, דורכן הייליגן זוהר - וואס אויף דעם איז געבויט אלע ספרים פון די הייליגע צדיקים - ווערט מען באהאפטן צום אייבערשטן; ווען מען בעט דעם אייבערשטן אויף א זאך וואס מען וויל באקומען, למשל מען ווארט אויף א שידוך און מען בעט דעם אייבערשטן: "הייליגער באשעפער איך וויל מיין שידוך, איך וויל חתונה האבן, איך קען נישט מער זיין אליין", אדער מען בעט אויף פרנסה, אויף געזונט וכו', מען בעט: "הייליגער באשעפער איך דארף פרנסה, איך דארף קינדער" - איז נישט נאר מען איז זוכה צו באקומען די שידוך, פרנסה און קינדער, נאר אסאך מער, מען איז זוכה צו ווערן צוגעקלעבט צום אייבערשטן; ווייל מיט דעם וואס מען בעט דעם אייבערשטן, דאס בעטן אליינס קלעבט צו דעם מענטש צום אייבערשטן, מען באקומט א שטארקע אמונה; דאס אליינס איז שוין די גרעסטע ישועה פארן מענטש.

ליבער ברודער, הארציגער חבר, בעט דעם אייבערשטן: "'חוּס וְרַחֵם נָא עָלֵינוּ, בְּהִלּוּלָא דְּבַר יוֹחָאי', הייליגער באשעפער בזכות דעם הייליגן צדיק העלף מיר, האב רחמנות אויף מיר, מיין לעבן זאל מיר נישט אריבערגיין מיט נארישקייטן, איך וויל זיין ערליך, איך וויל זיין אפגעהיטן פון עבירות; 'רְצוֹנֵנוּ לִרְאוֹת מַלְכֵּנוּ, בְּהִלּוּלָא דְּבַר יוֹחָאי', הייליגער באשפער איך וויל דיך שפירן, איך וויל דיך זען, איך וויל נישט מסיח דעת זיין פון דיר - 'בִּזְכוּת אֲדוֹנֵנוּ בַּר יוֹחָאי'; הייליגער באשפער איך בין פארזינקען אין מיינע נארישקייטן, איך לויף נאך די געלט, איך לויף נאך מיינע עבירות, וויפיל געלט איך פארדין - דארף איך נאך און נאך, איך פארגעס פון תכלית, איך פארגעס אז איך וועל איין טאג דארפן אוועק גיין פון די וועלט, איך וועל זיין א גוסס, א נפטר, מען וועט מיך אוועקפירן פון מיין אפיס, פון מיין שטוב, מען וועט מיך טראגן ווייט אין פעלד, דארט וועל איך ליגן אליין, און וואס וועל איך דעמאלט מיט נעמען מיט מיר? נאר די גוטע זאכן וואס איך בין זוכה אריינצוכאפן יעדן טאג, מיין ציצית, מיין תפילין, מיין מזוזה, מיין היטן שבת; העלף מיך אייבערשטער איך זאל יעדן טאג גיין אין שול דאווענען שחרית מנחה מעריב, העלף מיר איך זאל יעדן טאג לערנען אביסל תורה, איך זאל עפענען א חומש און לערנען די פרשת השבוע, חומש תרגום מיט רש"י, מעביר סדרה זיין יעדן טאג לויט די טעג פון די וואך, און לערנען גמרא, משניות, הלכה – 'בִּזְכוּת אֲדוֹנֵנוּ בַּר יוֹחָאי'".

דער אייבערשטער זאל העלפן זאלסט האבן הצלחה אין אלע ענינים.

דורך זיין פרייליך האט מען גוטע מחשבות

בעזרת ה' יתברך

יום ב' פרשת אמור, י' אייר, שנת תשפ"ו לפרט קטן

לכבוד ... נרו יאיר

די יאר וועל איך נישט זיין אין מירון ל"ג בעומר, די יאר מאכן מיר אין שטעטל ל"ג בעומר א סעודה, מיר וועלן מסיים זיין ספר הזוהר. אויך וועט זיין א הדלקה, מען וועט דאנקען דעם אייבערשטן אז מיר האבן זוכה געווען צום נחל נובע מקור חכמה, וואס אפילו העיר וקדיש מן שמיא צריך לקבל משם (חיי מוהר"ן, סימן קפט), ווייל אז מיר קליינע מענטשלעך וואס מיר זענען אזוי ווייט פון פארשטיין די סודות פון ספר הזוהר, די אורות און השגות; אז מיר זאלן דאס קענען פארשטיין און לעבן מיט דעם - דאס קען נישט זיין נאר דורך די הקדמות פון הייליגן רבי'ן, וואס ער לאזט זיך אראפ צו די נידריגסטע פלאץ, דארט אויך אויסשרייען אז עס איז מלא כל הארץ כבודו.

שטארק זיך מיט אלע כוחות צו זיין פרייליך, דער הייליגער זוהר זאגט (תיקון כב, דף סז.): "וְאַתְוָון בְּשִׂמְחָ"ה אִיהִי מַחֲשָׁבָ"ה", מחשבה איז די אותיות בשמחה; דורך זיין פרייליך האט מען גוטע מחשבות, פאזעטיווע מחשבות. דער הייליגער רבי זאגט (לקוטי מוהר"ן חלק ב, סימן י): "עַל יְדֵי מָרָה שְׁחוֹרָה", ווען א מענטש איז נישט פרייליך, "אִי אֶפְשָׁר לְהַנְהִיג אֶת הַמֹּחַ כִּרְצוֹנוֹ", איז אים זייער שווער צו קענען טראכטן נארמאל, "וְעַל כֵּן קָשֶׁה לוֹ לְיַשֵּׁב דַּעְתּוֹ", מען קען נישט טראכטן גוט, די קאפ לויפט נעגעטיוו, "רַק עַל יְדֵי הַשִּׂמְחָה יוּכַל לְהַנְהִיג הַמֹּחַ כִּרְצוֹנוֹ, וְיוּכַל לְיַשֵּׁב דַּעְתּוֹ, כִּי שִׂמְחָה הוּא עוֹלָם הַחֵרוּת", אבער ווען מען איז פרייליך, זענען די מחשבות מסודר און מיושב.

פרייטאג, פסח שני - זענען מיר מסיים מסכת מנחות און מען הייבט אן שבת א נייע מסכתא, מסכת חולין. איך בעט דיר זייער, כאפ זיך מיט מיטן באן, עס פארט א באן היכל הקודש, יעדן טאג לערנט מען א בלאט גמרא מיט נאך אסאך לימודים, כאפ זיך מיט, די תורה וועט דיר געבן אלעס גוטס.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת בא, ראש חודש שבט, שנת תשפ"ו לפרט קטן

... נרו יאיר

איך וויל דיך מחזק זיין זאלסט ווייטער ממשיך זיין מיט מגיה זיין די אידישע בריוו וואס מוהרא"ש האט געשריבן און מיט ענדיגן די מפתחות, איך וויל שוין ענדיגן דרוקן די סעט אשר בנחל באידיש. איך האב מבטיח געווען פאר מוהרא"ש אז איך וועל דרוקן דאס דרוקן און פארשפרייטן פאר די וועלט; ברוך ה' די ערשטע דריי חלקים איז ארויס הערליך, יעצט ווארט איך אויף די קומענדיגע פיר חלקים, און איך האב דיר עס איבערגעגעבן צו מגיה זיין, און עס שלעפט זיך אזוי לאנג.

איך וויל דו זאלסט זיין אפן מיט מיר, זאג מיר אויב דו קענסט עס מאכן און ענדיגן אויף די יאר, איז גוט, אז נישט וועל איך דאס געבן פאר א קאמפעני דאס צו ענדיגן, ווייל עס איז שוין אזוי לאנג, יעצט ווערט עלף יאר פון מוהרא"ש'ס הסתלקות, און עס איז מיר א בושה אז נאכאלץ האב איך דאס נישט געענדיגט, ביטע מיר לאזן וויסן אויב דאס איז דיר ביכולת צו קענען ענדיגן, ווייל נדרי לה' אשלם, איך דארף מקיים זיין מיין צוזאג.

גארנישט איז העכער פון די שמחה אין שבת קודש

בעזרת ה' יתברך

ערב שבת קודש פרשת בא, ה' שבט, שנת תשפ"ו לפרט קטן

לכבוד ... נרו יאיר

די וואך שבת איז די דריטע שבת פון שובבי"ם, צדיקים האבן געזאגט אז די שבת איז זייער א פרייליכע שבת, זיי האבן געזאגט א רמז 'מצוה 'בו' יותר מ'בשלחו'', דאס איז מרמז אז די שבת פרשת 'בא' איז זייער גרויס, נאך מער פון שבת בשלח; זאלסטו די וואך זיך פארלייגן אויף די איין זאך, 'זיין פרייליך', אלעס אנדערש זאל דיך נישט אנגיין; די עסן, די ריינקייט, די שלאפן, די בעקיטשע, אלעס איז זייער גוט און זייער חשוב, אבער נישט אויפן חשבון פון פארלירן די שמחה פון שבת. ווייל חכמינו זכרונם לברכה זאגן (שבת קיח:): "כָּל הַמְשַׁמֵּר שַׁבָּת כְּהִלְכָתָהּ", ווער עס היט שבת, "אֲפִילוּ עוֹבֵד עֲבוֹדָה זָרָה כְּדוֹר אֱנוֹשׁ", אפילו ער איז אזוי ווייט געפאלן אין די הארבסטע עבירות, אין די עבירה פון עבודה זרה רחמנא לצלן - "מוֹחֲלִין לוֹ", איז אים דער אייבערשטער מוחל אויף אלע זיינע עבירות; זאלסטו שבת זיין נאר פרייליך, טאנץ און פריי זיך 'איך בין א שומר שבת, איך בין א איד!'

קויף איין גוטע זאכן לכבוד שבת, ווען עס קומט צו קויפן פאר שבת זאלסטו נישט קארגן, האב אמונה, גלייב אז דער אייבערשטער וועט דיר העלפן, און ביים איינקויפן זאלסטו בעטן שטילערהייט: "הייליגער באשעפער איך קויף איין לכבוד שבת, איך וויל מכבד זיין שבת, איך וויל אז מיינע קינדער זאלן ליב האבן שבת, געב מיר שפע צו קענען אלעס באצאלן און ארויסגיין פון מיינע חובות"; ווייל בזכות מכבד זיין שבת איז מען זוכה צו עשירות, אזוי ווי חכמינו זכרונם לברכה דערציילן (שבת קיט.), רבי חייא בר אבא איז אמאל געווען אין די שטאט לודקיא און איז איינגעשטאנען ביי א איד, און ער האט דארט געזען שבת ביי די סעודה אז מען האט אריינגעברענגט א גאלדענעם טיש, דער טיש איז געווען געמאכט פון אזויפיל גאלד אז זעכצן מענטשן האבן דאס געדארפט אויפהייבן; אינעם טיש זענען געווען זעכצן זילבערנע קייטלעך צוגעבינדן צו זיי טעלערס און גלעזער, אויפן טיש זענען געווען אלע געשמאקע עסן און טרינקען, און שמעקעדיגע בשמים, און ווען מען האט אריינגעברענגט דעם טיש האט מען געזינגען דעם קאפיטל תהילים (תהלים כד, א): "לַה' הָאָרֶץ וּמְלֹאָהּ וגו'", אלעס אויף די וועלט איז דעם אייבערשטנ'ס, און נאכן עסן האבן זיי געזינגען דעם קאפיטל תהילים (שם קטו, טז): "הַשָּׁמַיִם שָׁמַיִם לַה' וְהָאָרֶץ נָתַן לִבְנֵי אָדָם", און רבי חייא בר אבא האט געפרעגט דעם בעל הבית: "וואס פאר א גוטע זאך האסטו געטון אז דער אייבערשטער האט דיר געגעבן אזא רייכטום?" האט ער געזאגט: "איך בין א קצב (בוטשער), און ווען איך זע א שיינע בהמה לייג איך דאס אוועק פאר מיר פאר שבת", האט אים רבי חייא געזאגט: "אַשְׁרֶיךָ שֶׁזָּכִיתָ", וואויל איז דיר אז דו האסט זוכה געווען צו דעם, "וּבָרוּךְ הַמָּקוֹם שֶׁזִּכֵּךְ לְכָךְ", און געלויבט איז דער אייבערשטער אז ער האט דיר מזכה געווען מיט דעם.

א פרייליכן שבת.

בעזרת ה' יתברך

יום ג' פרשת ויצא, ה' כסליו, שנת תשפ"ו לפרט קטן

... נרו יאיר, לינדן ניו דזשערסי

זוך אויף גוטע חברים וואס פירן זיך בתמימות, מיט זיי זאלסטו זיך חבר'ן, און אנטלויף פון חכמות און ליצנות, בפרט פון די חכמות און ליצנות וואס איז דא ביי די וואס זעען אויס ווי חסידים וכו'.

מוהרנ"ת רופט זיי אן (לקוטי הלכות נזיקין הלכה ד, אות כח): "קְלִפַּת נֹגַהּ", זיי זענען אויסגעמישט טוב מיט רע, פון איין זייט איז טאקע דא אין זיי טוב, "כִּי אֵינָם פּוֹרְקִין עֹל חַס וְשָׁלוֹם", זיי האבן נישט אראפגעווארפן די עול התורה והמצוות, "וּקְצָתָם הֵם אֲנָשִׁים כְּשֵׁרִים קְצָת, וְלִפְעָמִים אוֹמְרִים דִּבְרֵי אֱמֶת", אבער פון די אנדערע זייט האבן זיי אין זיך חכמות מיט ליצנות. מוהרנ"ת זאגט דארט, פון איין זייט זענען זיי מער סכנה ווי פון הערן גוים און אפיקורסים, "כִּי מֵעַכּוּ"ם וְאֶפִּיקוֹרְסִים רֹב יִשְֹרָאֵל מְרַחֲקִים עַצְמָן מֵהֶם", ווייל פון גוים און מינים זענען רוב אידן אינגאנצן דערווייטערט, "אַךְ מֵאֵלּוּ הַכְּשֵׁרִים קְצָת", אבער פון די – "אֵין מִתְרַחֲקִים מֵחָכְמָתָם כָּל כָּךְ", איז מען נישט דערווייטערט, "וּבֶאֱמֶת הֵם מַזִּיקִים הַרְבֵּה", און זייערע ווערטער שאטן, "שֶׁמִּתְלוֹצְצִים מִכַּמָּה דַּרְכֵי הַתְּמִימוּת הָאֲמִתִּיּוֹת" וְכוּ', ווייל זיי שפעטן פון די תמימות פון די צדיקי אמת.

זיי זיך קובע צו זאגן יעדן טאג "אכצן פרקים משניות", און דעם "יום תהילים", בתמימות ופשיטות, ווייל נאר דאס וועט בלייבן פון אונז.

בעזרת ה' יתברך - יום ה' פרשת אחרי קדושים, ו' אייר, שנת תשפ"ו לפרט קטן

מרת ... תחי'

איך האב ערהאלטן אייער בריוו.

ווער זאגט ענק קענען נישט האבן קינדער נאטירליך? ווער האט אזוי געזאגט? דער דאקטער?! דער דאקטער איז נישט באגלייבט, דער דאקטער איז נישט קיין פוסק, די תורה האט געגעבן רשות פארן דאקטער נאר אויף איין זאך, אויף היילן דעם מענטש, אבער צו גיין זאגן פאר מענטשן אז מען קען נישט האבן קיין קינדער, אדער מען קען נישט האבן קיין רפואה - דאס איז נישט בארעכטיגט.

מיר האבן תפילה וואס איז העכער פון טבע, דאווענט צום אייבערשטן, בעטס אים מיט רחמנות ער זאל ענק געבן קינדער, און לאכט זיך אויס פון די טבע, נישטא קיין טבע, אלעס איז דער אייבערשטער, אזוי וועלן ענק האבן קינדער. דער הייליגער רבי זאגט (לקוטי מוהר"ן חלק ב, סימן א): "כִּי כְּשֶׁנִּגְאֶלֶת הַתְּפִילָּה אָז נוֹפְלִים כָּל הָרְפוּאוֹת, כִּי נִתְרַפְּאִין עַל יְדֵי דְבַר ה'", ווען מען דאווענט צום אייבערשטן - פאלן אוועק אלע רפואות, מען דארף מער נישט קיין רפואות, ווייל מען ווערט אויסגעהיילט דורך דעם אייבערשטן אליין, "וַאֲזַי כָּל הַדָּאקְטוֹרִים מִתְבַּיְּשִׁין בָּרְפוּאוֹת שֶׁלָּהֶם", דעמאלט שעמען זיך אלע דאקטוירים מיט זייערע רפואות; "כִּי אֲזַי אֵין כֹּחַ לְשׁוּם רְפוּאָה כִּי כָל הָעֲשָׂבִים חוֹזְרִים כֹּחָם לְתוֹךְ הַתְּפִילָּה", ווייל אלע כוחות וואס ליגן אין די מעדעצינען גייען אריין אין די ווערטער פון תפילה און מען ווערט אויסגעהיילט דערמיט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת אחרי קדושים, ו' אייר, שנת תשפ"ו לפרט קטן

מרת ... תחי', קרית ברסלב

איך האב ערהאלטן אייער בריוו.

בנוגע וואס איר פרעגט אז מען האט אייך גערופן פון ..., זיי ווילן ברענגען א מאביל מיט דאקטוירים אין שטעטל ביים בית המדרש בודק זיין אלעמען אויב מען איז געזונט, אויב מען האט צוקער, אויב די הארץ איז גוט וכו'; איר ווייסט גאנץ גוט וואס מוהרא"ש האלט, מוהרא"ש האט אונז געזאגט מיר זאלן נישט גיין צום דאקטער פאר זיך אונטערזוכן, מוהרא"ש זאגט, עס איז מקובל פון צדיקים 'אז מען זוכט - טרעפט מען', דעריבער זאל מען נישט גיין זיך בודק זיין, מען גייט צום דאקטער נאר ווען מען שפירט זיך נישט גוט.

זאגט פאר ..., אז אויב זיי נויטיגן זיך אין געלט - קען מען מאכן אן אפיל ביי אונז אין שול זיי ארויס צו העלפן, אבער בשום אין אופן קומען זיך אוועק שטעלן מיט א מאביל ביים שול סקרינען די מענטשן; ביי אונז מאכט מען דאס נישט.

יעצט האבן זיי גענומען די באקאנטע מארקעטינג קאמפעני ... און מען דערשרעקט אלעמען אז אלע מוזן על פי תורה זיך סקרינען, מען מוז גיין צום דאקטער, און א רחמנות אויף אידישע קינדער, מען לאזט זיך פירן לויט די מארקעטינג כצאן בלי רועה, בשעת אלע צדיקים האבן קלאר געזאגט מען זאל נישט גיין צו קיין דאקטוירים סתם זוכן צרות, ועל כולם דער הייליגער רבי וואס האט אונז געזאגט אז די דאקטוירים זענען איינגעשטעלט ביים מלאך המות וכו'.

(עס איז אבער וויכטיג צו איבערגעבן פאר די עלטערן אז דער רבי האט קלאר געזאגט מען זאל געבן שאטס פאר די קינדער, עס ווערן מער און מער ביי אונז אין די קהילה משפחות וואס ווערן פארפירט פון די פארדרייטע שיטה וואס לאזן נישט געבן שאטס, עס זענען דא ביי אונז וואס העצן אויף יונגע ווייבלעך, מען דערשרעקט זיי אז כאילו די שאטס זענען וואס ברענגען אלע צרות, דער רבי האט אונז געזאגט זייער שארף, דער רבי זאגט אז טאטע מאמע וואס געבן נישט קיין שאטס - זענען רוצחים).

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ב' פרשת אמור, י' אייר, שנת תשפ"ו לפרט קטן

טייערער ... נרו יאיר, וויליאמסבורג

וואס מאכסטו עפעס? וואס הערט זיך ביי דיר? איך זע דיך ווייניג אבער איך טראכט פון דיר, איך בעט פאר דיר, איך האב ווייטאג פאר דיר, עס דרוקט מיר אז ענק ווארטן אזוי לאנג פאר ענקער ישועה.

איך וויל דיך מחזק זיין, יעצט קומט דער גרויסער טאג ל"ג בעומר; וויסן זאלסטו, ל"ג בעומר איז מסוגל אויסצו'פועל'ן קינדער, און אפילו די דאקטוירים זאגן אז מען קען נישט האבן קיין קינדער, דארף מען וויסן אז דאס איז אלץ פאר דער וואס איז אונטער געווארפן אונטער די טבע, אבער דער וואס גלייבט אז עס איז נישטא קיין טבע, די גאנצע טבע איז נאר א בריאה פונעם אייבערשטן, די גאנצע טבע ווערט געפירט דורך דעם אייבערשטן, און דורך בעטן דעם אייבערשטן, און דורך טון די סגולות הצדיקים - קען מען זוכה זיין צו ברענגען קינדער; זאלסטו שיסן מיט די פייל און בויגן אין דעם הייליגן טאג, ווייל דער רבי זאגט (ספר המדות אות בנים, סימן סג), שיסן ל"ג בעומר מיטן פייל און בויגן איז א סגולה פאר קינדער; און מיט אמונה, און מיט אמונה אין די סגולות פון צדיקים - וועסטו זוכה זיין צו קינדער, בנים ובני בנים עוסקים בתורה ובמצוות.

אז מען וויל זוכה זיין צו קינדער - מוז מען זיך פארלייגן אויף זיין בשלום, לעבן מיט אהבה ואחוה. אזוי ווי מיר געפינען, חכמינו זכרונם לברכה דערציילן (שיר השירים רבה א, לא), אז דער הייליגער תנא רבי שמעון בר יוחאי האט צוגעזאגט קינדער פאר א פאר-פאלק וואס האבן לאנגע יארן נישט געהאט קיין קינדער, ער האט זיי געבענטשט מיט קינדער, ווען ער האט געהערט אז זיי האבן זיך זייער ליב, זיי ווילן זיך נישט קריגן, זיי ווילן לעבן בשלום, עיין שם; אזוי קען יעדער איינער זוכה זיין צו פועל'ן ישעות אין דעם הייליגן טאג דורך לעבן אין שטוב מיט ליבשאפט, נישט זיך קריגן, נישט זוכן צו זיין גערעכט, נאר צו זיין קלוג, שטענדיג נאכגעבן; דאס ברענגט אלע ישועות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת אחרי קדושים, ד' אייר, שנת תשפ"ו לפרט קטן

מיין ליבער טייערער ... נרו יאיר, טברי'

איך האב ערהאלטן דיין בריוו, דיין הארץ.

עס איז נישט ריכטיג וואס מען טשעפעט דיך אין מיין נאמען אז איך וואלט פארמאכט די מוסדות אין טברי' וכו' וכו'; איך בין זייער צופרידן פון די מוסדות ביי ענק, איך האב גרויסע פארגעניגן פון די חינוך ביי ענק.

פון היינט אין ווייטער ווען איינער קומט דיר עפעס זאגן בשמי, אין מיין נאמען - זאלסטו טון אזוי: איז דאס א גוטע זאך - זאלסטו דאס אננעמען, איז דאס א זאך וואס דו ווערסט צעבראכן - זאלסטו דאס בודק זיין, דו קענסט מיך אליינס פרעגן; קענסט מיר שרייבן, אדער רופן, אדער שיקן א שליחות מיט איינעם וואס דרייט זיך אין ישיבה זאל אנפרעגן; לאז דיך נישט פון קיינעם צעברעכן.

איך בין זייער פרייליך מיט די חדר אין טברי' און מיט די בית פיגא, זיי ממשיך מיט דיין הארץ און מיט דיין נשמה, לייג אריין אין די קינדער אמונה, יראת שמים, מידות טובות; אויך זאלסטו רעדן צו זיי פון קדושה, זיי זאלן זיך היטן די אויגן וכו' וכו'.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת אמור, ט' אייר, שנת תשפ"ו לפרט קטן

... נרו יאיר

איך האב גערעדט מיט דיין ווייב בנוגע דיינע קינדער; איך בעט פאר ענק אז אלע זאלן זיין געזונט, עס זאל נמתק ווערן אלע דינים פון די גאנצע משפחה, איך בין זיכער אז אלעס וועט זיך איבערדרייען לטובה.

יעצט קומט ל"ג בעומר; ל"ג בעומר איז א מנהג צו שיסן מיט א פייל און בויגן. איינע פון די טעמים איז, חכמינו זכרונם לברכה דערציילן (בראשית רבה עט, ו), ווען דער הייליגער תנא רבי שמעון בן יוחאי מיט זיין זון דער הייליגער תנא רבי אלעזר זענען ארויס פון די מערה נאך דרייצן יאר, האבן זיי געזען ווי א פאנגער פאנגט פייגלעך, זיי זעען ווי א פייגל ווערט שיער אריינגעכאפט, און אין די לעצטע סעקונדע האט זיך די פייגל געראטעוועט, נאכדעם קומט א פייגל און זיי הערן א בת קול פון הימל וואס זאגט: "געפאנגען" און די פייגל איז געפאנגען געווארן; האט דער הייליגער תנא רבי שמעון בן יוחאי געזאגט פאר זיין זון: "זעסט, אפילו א קליינטשיג פייגעלע קען אויך נישט געכאפט ווערן אן דעם וואס מען זאל דאס אפשרייבן אויבן אין הימל, איז דאך זיכער אז אלעס וואס איז אויף אונז אריבער איז פון הימל מיט א פינקטליכער חשבון"; דערפאר שיסט מען מיט די פייל און בויגן, צו געדענקען די לימוד פון דער פאנגער וואס האט געפאנגען און דער הייליגער תנא רבי שמעון בן יוחאי האט געזאגט אז אפילו א קליין פייגל קען מען נישט פאנגען נאר מיט רשות פון אויבן; מיר זאלן געדענקען אז יעדע זאך וואס פאסירט פון א קליינע זאך ביז א גרויסע זאך, אלעס איז מיט א פינקטליכער חשבון.

ליבער ברודער באשולדיג זיך נישט, און צעקוועטש זיך נישט, אלעס וואס גייט אריבער אויף דיר, מיט דיין ווייב, מיט דיינע קינדער, אלעס איז נאר ווייל מען וויל הערן דיין קול ווי דו רעדסט צום אייבערשטן, און דאס איז נאך א טעם אויף וואס מיר פירן זיך צו שיסן מיט א פייל און בויגן. ווייל דער זוהר הקדוש זאגט (תיקון ו, דף לו:), ווען משיח וועט קומען וועט מען זען א קשת מיט ליכטיגע קאלירן, און דאס וועט זיין די סימן אז משיח איז דא, ווען מען וועט זען די פייל און בויגן מיט ליכטיגע קאלירן, דאס מיינט מען די קשת פון אידישע קינדער; אידישע קינדער באניצן זיך נישט מיט געווער, אזוי ווי עס שטייט (תהלים מד, ז): "כִּי לֹא בְקַשְׁתִּי אֶבְטָח וְחַרְבִּי לֹא תוֹשִׁיעֵנִי", איך פארלאז זיך נישט אויף א פייל און בויגן און נישט אויף א שווערד; אידישע קינדער באניצן זיך מיט תפילה והתבודדות, דאס איז די שווערד פון אידן. אזוי ווי יעקב אבינו האט געזאגט פאר יוסף (בראשית מח, כב): "בְּחַרְבִּי וּבְקַשְׁתִּי", זאגט דארט רש"י, מיט מיינע תפילות; דאס איז אונזער שווערד און אונזער קשת, און דאס וועט אויך זיין די שווערד פון משיח, ווייל משיח וועט אייננעמען די וועלט אן קיין געווער, משיח וועט אייננעמען די וועלט מיט תפילה, ער וועט אריינברענגען אין די וועלט די זאך פון רעדן צום אייבערשטן און בעטן דעם אייבערשטן; דעריבער שיסן מיר ל"ג בעומר מיט א פייל און בויגן, צו דערמאנען אז מיר ווארטן אויף משיח וואס וועט אונז ברענגען דעם קשת בגוונא נהירין.

דער ל"ג בעומר שיסער דארף אונז דערמאנען מיר זאלן זיך מחזק זיין אין תפילה והתבודדות, מיר זאלן בעטן יעדע זאך פונעם אייבערשטן, און ווען מען געפינט זיך אין א קלעם, אין א צרה - זאל מען ניצן די מויל; די ליפן זענען אין א פארעם פון א בויגן און די צינג איז די פייל, מען זאל בעטן דעם אייבערשטן. חכמינו זכרונם לברכה זאגן (ירושלמי ברכות ט, א): "אִם בָּא עַל אָדָם צָרָה", אז א מענטש האט א צרה, "לֹא יִצְוַוח", זאל ער נישט שרייען, "לֹא לְמִיכָאֵל, וְלֹא לְגַבְרִיאֵל", נישט צו מלאך מיכאל און נישט צו מלאך גבריאל – "אֶלָא לִי יִצְוַוח", נאר צו מיר זאל ער שרייען, "וַאֲנִי עוֹנֶה לוֹ מִיַד", און איך וועל אים גלייך העלפן; מיט תפילה קען מען אלעס פועל'ן, תפילה איז די שטערקסטע געווער מיט וואס מען קען באזיגן אלע פיינט.

דאס זאלסטו טון, נאר רעדן צום אייבערשטן; דאנק אים אויף יעדע זאך און בעט אים אויף אלעס וואס דו דארפסט, האלט די קשת אין האנט און שיס פיילן, עפן דיין מויל און שיס ארויס פיילן, דאס מיינט מען דיבורים צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.