בריוון פונעם ראש ישיבה שליט"א

בעזרת ה' יתברך - יום ב' פרשת חקת, ב' תמוז, שנת תשפ"ד לפרט קטן

לכבוד מיין ליבער טייערער ... נרו יאיר, קרית ברסלב

הגם מיר האבן שוין גערעדט, דאך שפיר איך אז איך דארף דיר שרייבן נאך אביסל חיזוק אין דעם פרט.

טייערער ליבער ברודער דער אייבערשטער האט דיך זייער ליב, און יעדע מצוה, יעדע זאך וואס דו טוסט פאר עבודת השם - איז זייער זייער חשוב, און זיי נישט מקנא אנדערע, אפילו ביי עבודת השם טאר מען נישט מקנא זיין אנדערע כאילו זיי גייט עס און מיר גייט עס נישט, נאר איין זאך דארף מען מקנא זיין; דער ערליכן איד וואס מען פרובירט אים אויס, מען פרעגלט אים מיט יסורים און דאך בלייבט ער ביים אייבערשטן, דאך האט ער נישט קיין קשיות און תרעומות; נאר דאס דארף מען מקנא זיין, אבער דאס אז זיי האבן נישט געטון קיינמאל קיין שלעכטס און זיך אראפקלאפן אז איך האב יא געטון שלעכטס, און אזויפיל מאל פוגם געווען וכו' וכו' – דאס איז נישט גוט, דאס ברענגט יאוש רחמנא לצלן; טראכט 'אדרבה, איך האב אזויפיל פוגם געווען און דאך טו איך תשובה, און איך וועל נאכאמאל פרובירן, בין איך אויף א פיל העכערע דרגא', אזוי ווי חכמינו זכרונם לברכה זאגן (ברכות לד:): "מקום שבעלי תשובה עומדין צדיקים גמורים אינם עומדין", די בעלי תשובה קומען אן זייער הויך.

טייערער ברודער, דערצייל פארן אייבערשטן אלע דיינע נפילות, עבירות וכו', דערצייל אים ווי אזוי אלעס האט זיך אנגעהויבן, און בעט אים ער זאל דיר מוחל זיין, און נאכדעם דארפסטו מסיח דעת זיין פון די אלע זאכן און גלייבן באמונה שלימה אז דער אייבערשטער האט מקבל געווען דיין תשובה און איז דיר מוחל במחילה גמורה.

אזוי זאלסטו טון יעדן טאג אינדערפרי, זאלסט איבערבעטן דעם אייבערשטן, אים דערציילן נאכאמאל אלעס, זיך מתוודה זיין מיט ווידוי דברים, ביז אלע עבירות וועלן ארויסגיין פון דיר.

טייערער ברודער, קלאפ זיך נישט אראפ. דער רבי האט געזאגט (חיי מוהר"ן, סימן תנג): "אָט וִוי אִיר זֶעט מִיר; אִיךְ זָאל חַס וְשָׁלוֹם עוֹבֵר זַיין דִי גְרֶעסְטֶע עֲבֵרָה וָואלְט דָאס מִיר גָארְנִישְׁט אַרָאפּ גֶעוָוארְפְן, אִיךְ וָואלְט נָאךְ דֶעם גֶעוֶוען אַזוֹי אֵיין עֶרְלִיכֶער יוּד וִוי פְרִיעֶר, דֶערְנָאךְ וָואלְט אִיךְ תְּשׁוּבָה גִיטָאן", וואלט איך געטון א גרויסע עבירה וואלט מיר די עבירה נישט אראפגעווארפן, איך וואלט תשובה געטון און ווייטער געדינט דעם אייבערשטן; דער רבי האט דאס געזאגט פאר אונז, מיר זאלן וויסן ווי אזוי זיך צו דערהאלטן, ווי אזוי אנצוגיין ווען מען זעט ווי מען האלט און איין אראפפאלן; מיר זאלן תשובה טון און זיך נישט קלאפן, און חס ושלום זיך פיינט האבן.

טייערער ..., עס איז אן איסור גמור זיך פיינט צו האבן, און עס איז א ליגנט צו טראכטן 'דער אייבערשטער האט מיך נישט ליב, חס ושלום', די אלע מחשבות פיגול זענען נישט פון די סטרא דקדושה, עס איז פון די סטרא אחרא וואס האט פיינט דעם מענטש און וויל אים אויסרייסן פון ביידע וועלטן; ווייל דער אייבערשטער האט אונז ליב, ער האט ליב יעדן איד; און ווען א איד טוט תשובה, ער האט חרטה אויף זיינע נישט גוטע מעשים - איז דער אייבערשטער מקבל די תשובה און האט אויף אים רחמנות, און דאס ליבשאפט איז אין לשער.

לערן די מעשה פונעם חכם ותם (ספורי מעשיות, מעשה ט), ווי דער רבי לערנט אונז א וועג אין לעבן ווי מען קען לעבן א חיים טובים דורך נישט קוקן אויף אנדערע מענטשן, דאס איז מיין מעשה און דאס איז דיין מעשה, און גלייב באמונה שלימה אז די אנדערע וועם דו ביסט מקנא - קענען נישט מאכן א נחת רוח פארן אייבערשטן מיט זאכן וואס דער אייבערשטער האט פון דיר א נחת רוח, קלאפ זיך נישט אראפ, אזוי וועסטו קענען אויפלעבן דיינע קינדער; ווייל אז מען איז אליין ביי זיך א צעקלאפטער - ווי קען מען אויפבויען א שטוב... א צעקלאפטער - צעקלאפט אנדערע, און א פרייליכער – מאכט פרייליך אנדערע.

גלייב מיר, איך האב נאכנישט אנגעהויבן שרייבן, עס איז דא אזויפיל חיזוק אין רבינ'ס ספרים, אין די ספרים פון מוהרנ"ת, מוהרא"ש; חיזוק אויף דעם פרט פון זיך נישט קלאפן מיטן עבר, און זיך נישט קלאפן מיט קוקן אויף חברים ווי זיי זענען אזוי מצליח ברוחניות. מאך זיך א שיעור אין רבינ'ס ספרים און טו די עצות – וועסטו זוכה זיין צוצוקומען צו שיינע זאכן.

בעזרת ה' יתברך - יום ג' פרשת חקת, ג' תמוז, שנת תשפ"ד לפרט קטן

מרת ... תחי'

א גרויסן דאנק פארן מקרב זיין און מחזק זיין די נייע משפחות וואס ציען זיך ארויס ביי אונז אין שטעטל, זיי מאכן שפירן גוט און היימיש. ווייל מיר האבן אסאך מפיצים וואס זענען מחזק און מקרב מענטשן פון אינדרויסן פון אונזער קהילה, אבער אין די קהילה דארף מען אויך מפיצים. עס זענען דא אין שטעטל משפחות וואס ווארטן אויף גוטע חבר'טעס, אויף אביסל ווארעמקייט און מקרב זיין וכו' וכו', דעריבער קומט אייך א יישר כח פארן טון מיט אונזערע משפחות.

אז מען האט אינזין דעם אייבערשטן, לעשות נחת רוח להבורא יתברך שמו – ווערט מען נישט אויסגעשעפט און אויסגעמוטשעט, וויפיל מען טוט – האט מען פרישע כחות צו טון נאך און נאך.

זאגט יעדן טאג די דרייצן אני מאמין'ס.

בעזרת ה' יתברך - יום א' פרשת קרח, כ"ד סיון, שנת תשפ"ד לפרט קטן

לכבוד ... נרו יאיר

שבת בין איך געווען אין שטעטל, עס איז געווען הערליך שיין, מען האט זיך זייער מחזק געווען מיטן רבי'ן. ביי שלש סעודות האבן מיר גערעדט פון די מרגלים, ווי קען זיין אז די גרויסע מענטשן וואס די תורה זאגט (במדבר יג, ג): "כֻּלָּם אֲנָשִׁים רָאשֵׁי בְנֵי יִשְׂרָאֵל הֵמָּה" - זאלן אזוי אראפפאלן און צוקומען צו ווערן רשעים, רעדן קעגן דעם אייבערשטן?! נאר מיט די הקדמה, מיטן רבינ'ס ווערטער - קען מען דאס פארשטיין. דער רבי האט דערציילט (לקוטי מוהר"ן חלק ב, סימן קטז), ווען ער איז געווען אין ארץ ישראל האבן אים די צדיקים תלמידי המגיד ממעזריטש געזאגט, זיי האבן זיך נישט געקענט אויסמאלן איידער זיי זענען געקומען קיין ארץ ישראל - אז ארץ ישראל איז א חלק פון די וועלט, זיי האבן געמיינט אז ארץ ישראל איז עפעס א וועלט אויבן אין הימל, ווייל אלע ספרים רעדן פון איר גרויסקייט, און די תורה אליין פארציילט גאר פון איר הייליגקייט וכו'; ביז ווען זיי זענען ארויפגעקומען קיין ארץ ישראל, דאן האבן זיי געזען אז ארץ ישראל איז א פלאץ דא אויף די וועלט, עס איז נישטא קיין שום חילוק אינעם חיצוניות צווישן ארץ ישראל און אנדערע לענדער, נאר דער פנימיות פון ארץ ישראל איז גאר הייליג און גאר הויך.

מיר האבן גערעדט אז דאס קען זיין איז געווען די טעות פון די מרגלים, זיי האבן ערווארטעט צו זען עפעס, און ווען זיי האבן גארנישט געזען פון די חיצוניות האבן זיי חוזק געמאכט (במדבר ג, כז): "וְזֶה פִּרְיָהּ" דאס זענען די פרוכט? אזוי פשוט? און פון דעם זענען זיי אראפגעפאלן.

מיר האבן זיך מחזק געווען, ווען מען וויל זוכה זיין אריינצוגיין אין די קדושה, און דער רבי זאגט טו זאכן וואס זעט אויס פשוט, גיי דאווענען און לערן משניות, זאג גמרא, געב א פרוטה לצדקה; על פי רוב זענען מענטשן מזלזל אין דעם ווייל עס איז נישט אזוי עובד'יש, עס פאסט נישט צו זאגן אביסל תהלים בתמימות ופשיטות, מען זוכט עפעס העכערס, און דאס איז גורם מען זאל אראפפאלן רחמנא לצלן.

עס איז דא אסאך צו דערציילן ווי שיין עס איז געווען דעם שבת. איך בעט דיר זייער זאלסט דינען דעם אייבערשטן בתמימות ופשיטות, קום אין שול דאווענען די דריי תפילות, נעם א חומש הויב אן מעביר סדרה זיין פון היינט, פון אנהויב וואך - יעדן טאג אביסל, לערן משניות אפילו באמירה בעלמא, אזוי אויך גמרא, ועל כולם גיי זיך אויסגיסן דאס הארץ צום אייבערשטן אויף דיין אייגענע שפראך, והעולה על הכל זיי פרייליך שלא עשני גוי - וועסטו זוכה זיין צו ווערן א גרויסער צדיק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת קרח, כ"ז סיון, שנת תשפ"ד לפרט קטן

מרת ... תחי'

איך האב ערהאלטן אייער בריוו.

איך זאג נישט אז איר דארפט דאס טון, איך האב נאר געפרעגט; אויב איר ווילט דאס טון וועט דאס זיין א גוטע זאך פאר אונזער קהילה, צו האבן א פארשטענדליכע כלה טיטשער.

איך וועל דערציילן א פריוואטע זאך וואס איז געווען ביי מיר. מוהרא"ש האט מיר אמאל געזאגט: "איך וויל דיר בעטן, דו זאלסט לערנען מיט די חתנים און דיין ווייב זאל לערנען מיט די כלות"; איך האב דאס דערציילט אין שטוב, אבער מיין ווייב תחי' האט נישט געהאט חשק צו דעם. האב איך געבעטן אונזער מנהלת זי זאל דאס אנהויבן טון, איך האב גערעדט צו מוהרא"ש און מוהרא"ש האט איר געגעבן די זכות דאס צו טון.

איך שרייב דאס אייך, אז איר זאלט נישט מיינען, אויב איך פרעג צי מען וויל עפעס טון - אז מען מוז ענטפערן יא. איך האב כלות וואס זוכן צו לערנען לויט די מסורה און הדרכה וואס מוהרא"ש האט אונז איבערגעגעבן, דעריבער פרעג איך אייך אויב איר ווילט האבן די זכות.

בנוגע וואס איר זאגט איר האט מורא פון די אחריות וכו'; אויף דעם האט שוין דער רבי געזאגט, ווען א שוחט איז געקומען צום הייליגן רבי'ן און געזאגט: "איך האב מורא צו זיין א שוחט", האט אים דער רבי געזאגט: "ווער דען זאל זיין א שוחט, דער וואס ציטערט נישט?" אויך האט רבי נתן געפרעגט דעם רבי'ן, מען טראגט אים אן א רבנות שטעלע, אבער ער האט מורא, אפשר וועט ער פסק'ענען נישט גוט, האט אים דער רבי געזאגט: "ווער דען זאל זיין א רב, דער וואס האט נישט מורא?"

בנוגע וואס איר זאגט איר האט מורא עס וועט אייך אוועק נעמען פון די שטוב ארבעט; דער ענטפער איז, אויב מען טוט דאס פארן אייבערשטנ'ס וועגן וועט דאס גארנישט אוועק נעמען פון די אייגענע שטוב ווירטשאפט, נאר אויב מען האט אינזין געלט, כבוד וכדומה לזה - דעמאלט ווערט אויס שטוב, עס ווערט אויס מאמע, אויס ווייב וכו' און אזוי ווייטער, אבער אויב די כוונה איז גרויס צו מאכן די נאמען פונעם אייבערשטן, לערנען כלות און יונגע ווייבלעך ווי אזוי מען לעבט א חתונה געהאטע לעבן מיטן אייבערשטן, מיט די תורה, מען האט אינזין צו העלפן כלות אויפשטעלן ערליכע דורות - איז גאר אנדערש; עס נעמט גארנישט אוועק פון די שטוב, אדרבה מען זעט א ברכה אין די צייט.

איך זע מיינע חברים טוען נישט א צענטל וואס איך טו, און קיינער פון זיי לייגט נישט שלאפן די קינדער וכו' וכו', און ברוך השם איך העלף אין שטוב יעדן טאג, איך לייג שלאפן די קינדער, איך גיס זיי אפ אינדערפרי נעגל וואסער, אויף דעם אלעס וועט מיין ווייב מעיד זיין; איי ווי איז מעגליך - מיטן טון אזויפיל זאכן, ישיבה, מוסדות, שרייבן בריוו, שרייבן ספרים, אויפנעמען מענטשן, געבן שיעורים, וכו' - אז מען זאל נאך האבן צייט אין שטוב? דער ענטפער איז - וואס שטייט פריער; אויב די כוונה איז טון פארן אייבערשטן - איז דא א ברכה אין די צייט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ה' פרשת שלח, כ"א סיון, שנת תשפ"ד לפרט קטן

טייערער ... נרו יאיר

איך האב שוין זייער לאנג נישט געהערט פון דיר, איך האף צום אייבערשטן אז אלעס איז גוט און דו גייסט אן מיט דיין עבודת השם, און אז דיין ווייב שטעלט זיך אזוי אויף די לענג און אויף די ברייט אז דו זאלסט נישט קומען אין היכל הקודש – מוז זיין אז דו קענסט זוכה זיין צו גאר גרויסע זאכן, גרויסע קדושות, גרויסע מדריגות. אזוי ווי דער רבי זאגט (לקוטי מוהר"ן חלק א', סימן קפה): "כָּל מִי שֶׁיֵּשׁ לוֹ יְגִיעוֹת וְטִרְחוֹת יוֹתֵר בִּתְחִלַּת הַהִתְקָרְבוּת לְהַשֵּׁם יִתְבָּרַךְ, דְּהַיְנוּ שֶׁיֵּשׁ לוֹ מְנִיעוֹת רַבּוֹת וּגְדוֹלוֹת, כְּגוֹן מֵאָבִיו וְאִשְׁתּוֹ וְחוֹתְנוֹ", ווער עס האט שטערונגען פון זיין ווייב און שווער צוצוקומען צום צדיק - "זוֹכֶה אַחַר כָּךְ לְקַבֵּל הַרְבֵּה קְדֻשָּׁה וְטָהֳרָה".

שטארק זיך מיט דיין עבודת השם, לאז נישט אפ; אויף יעדן איינעם גייט אריבער ביטערע שוועריקייטן, און נאר דורכן צדיק קען מען אלעס בייקומען.

שרייב מיר כאטשיג א בריוו, איך זאל וויסן פון דיר און זיך קענען מחזק זיין.

בעזרת ה' יתברך - אייר, שנת תשפ"ד לפרט קטן

... נרו יאיר

לערן און דאווען, וועסטו זיין א גרויסער צדיק.

בעזרת ה' יתברך - יום א' פרשת בהעלותך, י' סיון, שנת תשפ"ד לפרט קטן

לכבוד ... נרו יאיר

שבת אין שטעטל איז געווען הערליך שיין, א שבת מיט אנשי שלומינו האט אלע טעמים. מיר האבן זיך זייער מחזק געווען מיט די אוצרות וואס מיר האבן פון רבי'ן.

שבת אינדערפרי האבן מיר געלערנט סידור עת רצון, די שטיקל פון פרשת התמיד. מוהרא"ש רעדט דארט, אנהויב ווען מען הויבט אן דינען דעם אייבערשטן - שפירט מען א געשמאק, א ברען, אבער נאך א שטיק צייט - הויבט זיך אן זייער שווערע עבודות, מען שפירט ווי מען וועט שוין קיינמאל נישט זוכה זיין צו קומען צו די קדושה. אזוי ווי ווען מען ווערט מקורב צום רבי'ן, אין אנהויב איז מוחין דגדלות, מען שפירט א ברען, א פייער, און ערגעץ ווי ווערט פארלאשן די פלאקער און ברען, מען דארף שווער ארבעטן, ווייל מען שפירט נישט און מען זעט נישט, מען זעט נאר פארקערט. מוהרא"ש איז דארט זייער מחזק מען זאל זיך אנהאלטן מיט אלע כוחות, מען זאל גלייבן אז דאס איז פארן תיקון פונעם מענטש, וואס מען דארף אלעס פאררעכטן.

שבת אינדערפרי ווען איך בין אין שטעטל גלייך איך צו לערנען אונטן אין וואלד צווישן די ביימער, מען הערט דארט די געזאנג פון די פייגלעך, עס איז זייער אנגענעם דארט צו לערנען, און דארט לערנען מיר די שיעורים פון פאַרן דאווענען.

אינדערפרי נאכן דאווענען האבן מיר געלערנט די מעשה פון דעם מלך ועניו (סיפורי מעשיות, מעשה ו). דער רבי זאגט דארט, ווען מען וויל וויסן א זאך דארף מען הערן די קאטאוועס (ווערטלעך) פון די זאך, מיר האבן גערעדט די כלל אין לעבן, ווי אזוי ווייסט מען מיט וועם זיך צו דרייען? ווער איז א גוטער חבר? ווער איז א פארלעסליכער צו מאכן מיט יענעם געשעפטן? גוטע שכנים - וכדומה? דורך הערן יענעמ'ס ווערטלעך קען מען וויסן יענעמ'ס פנימיות; אז איינער מאכט ווערטלעך פון טשעפען און פארשעמען, ער פליקט און שטעכט און זאגט ער מאכט נאר א ווערטל - זאלסטו וויסן אז יענער איז א שלעכטער, שטיי ווייט פון אים, און אז מען הערט איינעם מאכן שמוציגע ווערטלעך השם ישמרינו - ווייסט מען אז יענער איז איין שטיק שמוץ. אזוי ווי דער רבי זאגט (ספר המידות אות ניבול פה, סימן א): "מִי שֶׁמְּדַבֵּר נִבּוּל פֶּה, בְּיָדוּעַ שֶׁלִּבּוֹ חוֹשֵׁב מַחֲשָׁבוֹת אָוֶן", ווער עס רעדט ניבול פה איז א סימן אז זיין גאנצע קאפ איז אים פארדארבן רחמנא לצלן, און אז מען הערט ווערטלעך אויף זאכן וואס צדיקים זאגן - איז א סימן אז דער גלייבט נישט אין צדיקים, ער וויל באמת רעדן אויף די צדיקים נאר ער האט מורא - רעדט ער אויף זאכן וואס דער צדיק טוט; דארף מען זיך זייער אכטונג געבן.

מיר האבן גערעדט פון דעם אז מען דארף זיך זייער אכטונג געבן מיט וועם מען פארברענגט און מיט וועם מען דרייט זיך, ווייל דורך נישט גוטע חברים קען מען אלעס פארלירן, און אז מען פארברענגט אינאיינעם מיט לצים, מען גייט אין שוויץ מיט לצים - קען מען אלעס פארלירן. אפילו איינער דארף גיין אין שוויץ פאר זיין געזונט, פאר זיינע ביינער וכו' - זאל ער נישט גיין מיט אינגעלייט און בחורים וואס זייערע ווערטלעך זענען אויף ערליכע זאכן, ווייל עס נעמט נישט לאנג צו פארלירן די תמימות, עס נעמט נישט לאנג צו ווערן אפגעקילט.

ווייל וויסן זאלסטו, דער סמ"ך מ"ם טוט אלעס צו ברענגען קשיות און ספיקות אויפן אייבערשטן און אויף צדיקים וואס זענען מגלה ומפרסם די הייליגע אמונה, ער טוט אלעס אוועק צו נעמען דעם מענטש פון היכל הקודש, ער האט פיינט דעם רבי'ן און נאכמער היכל הקודש, ווייל אין היכל הקודש - דארט איז דער רבי.

אונזער שול אין בארא פארק האט זיך יעצט אריבערגעצויגן צו א פרישע פלאץ, מען האט זיך אויסגענומען קלאר אז זיי וועלן לאזן לייגן א טאוול "בית המדרש היכל הקודש". יעצט זענען געקומען שכנים און דאס אראפגעפליקט, זיי זאגן מען קען לייגן א טאוול "בית המדרש חסידי ברסלב", אבער די ווארט מוהרא"ש און די ווארט ראש ישיבה – "דאס וועלן מיר נישט צולאזן עס זאל שטיין"; זעסטו שוין קלאר די פיינטשאפט פון די טומאה צו היכל הקודש.

ביי שלש סעודות האבן מיר גערעדט פון די פרשה, דער פסוק זאגט (במדבר ה, יב): "אִישׁ אִישׁ כִּי תִשְׂטֶה אִשְׁתּוֹ", וואס איז די לשון 'תשטה'? זאגט רש"י עס איז ווערטער פון די הייליגע חכמים (סוטה ג.; תנחומא נשא, ה): "אין אדם עובר עבירה", א מענטש טוט נישט קיין עבירות, "אלא אם כן נכנס בו רוח שטות", נאר אז עס גייט אריין אין אים א משוגעת, זאגט די תורה, דער מאן זאל איר נעמען צום כהן און דער כהן נעמט ארויס די משוגעת; דער צדיק געבט אונז עצות ווי אזוי ארויסצוטרייבן די שגעונות וואס איז דא אין אונז. מיר האבן געלערנט נאכאמאל די שיחה פון רבי'ן (שיחות הר"ן, סימן יט) ווי דער רבי זאגט: "שֶׁאֲפִילּוּ אוֹתָן הָאֲנָשִׁים הָרְחוֹקִים מִן הַקְּדֻשָּׁה מְאֹד, שֶׁנִּלְכְּדוּ בִּמְצוּדָה רָעָה, עַד שֶׁרְגִילִין בַּעֲבֵרוֹת חַס וְשָׁלוֹם רַחֲמָנָא לִצְלָן", אפילו א מענטש וואס איז זייער ווייט פון די קדושה - ער טוט עבירות רחמנא לצלן און ער איז שוין אראפגעפאלן אין שאול תחתית, "אַף עַל פִּי כֵן, הַכֹּחַ שֶׁל הַתּוֹרָה גָּדוֹל כָּל כָּךְ, עַד שֶׁיְּכוֹלָה לְהוֹצִיא אוֹתָם מִן הָעֲבֵרוֹת שֶׁרְגִילִין בָּהֶם חַס וְשָׁלוֹם", אפילו אזא מענטש קען די תורה אויך העלפן, די תורה האט אזא כח אז עס קען אים ארויסנעמען פון די עבירות, "וְאִם יַעֲשׂוּ לָהֶם חֹק קָבוּעַ וְחִיּוּב חָזָק לִלְמֹד בְּכָל יוֹם וָיוֹם כָּךְ וְכָךְ, יִהְיֶה אֵיךְ שֶׁיִּהְיֶה; בְּוַדַּאי יִזְכּוּ לָצֵאת מִמְּצוּדָתָם הָרָעָה עַל יְדֵי הַתּוֹרָה", אויב וועט ער זיך מאכן א קביעות צו לערנען יעדן טאג 'כך וכך', וועט ער סוף כל סוף ארויסגיין פון זיין בלאטע, "כִּי כֹּחַ הַתּוֹרָה גָּדוֹל מְאֹד", ווייל די כח פון תורה איז אזוי גרויס אז עס נעמט ארויס דעם מענטש פון זיין שלעכטס.

אך בין צוריק געפארן קיין וויליאמסבורג צו די ישיבה, מיטן אייבערשטנ'ס הילף וועלן מיר ענדיגן דעם זמן קומענדיגע וואך מיטוואך, מיר פארן שוין ארויס קומענדיגע וואך דאנערשטאג פרשת שלח, מיר וועלן זיין זומער אין קרית ברסלב פאר די חדשים תמוז און אב, זיך גרייטן אויף די הייליגע טעג. קומענדיגע וואך בענטשט מען שוין ראש חודש תמוז, דאס דערמאנט אונז שוין פון די הייליגע טעג. תמו"ז איז די ראשי תיבות: ז'מני ת'שובה מ'משמשין ו'באין, עס קומט שוין ראש השנה, מען דארף זיך שוין גרייטן מיט אונזער נסיעה צום רבי'ן. מאך דיר דיינע פלענער ווען צו פארן און ווי אזוי צו פארן, עס איז דא כמה דרכים צו פארן, אדער דורך די טשארטער וואס אלי קנאלל מאכט, אדער דורך פוילן אדער טערקיי; ווארט נישט אויף די לעצטע מינוט.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת במדבר, כ"ו אייר, מ"א לעומר, שנת תשפ"ד לפרט קטן

לכבוד מיין טייערער ... נרו יאיר, תלמיד ישיבת היכל הקודש ירושלים

איך האב ערהאלטן דיין בריוו.

אויף דיין פראגע וואס טוט מען וועגן פאסטן, דו לערנסט אין ספר המידות דאס גרויסקייט וואס מען איז זוכה דורך תעניתים, און פון די אנדערע זייט זאגט מען אז מען זאל נישט פאסטן, דו ווילסט פארשטיין וואס צו טון; עס איז געווען אין רבינ'ס צייט א שטיק צייט וואס דער הייליגער רבי האט געגעבן פאר אנשי שלומינו תיקונים געוויסע טעג צו פאסטן, אבער שפעטער האט דער רבי דאס מבטל געווען, און דער הייליגער רבי נתן וויינט צום אייבערשטן אין די תפילות (ליקוטי תפילות, נ): "וּבְכֵן תְּרַחֵם עָלַי, וּתְזַכֵּנִי וְתוֹרֵנִי וּתְלַמְּדֵנִי, שֶׁאֶזְכֶּה לֵידַע בֶּאֱמֶת אֵיךְ לְהִתְנַהֵג בְּעִנְיַן הַתַּעֲנִיּוֹת שֶׁאֲנִי מְחֻיָּב לְהִתְעַנּוֹת בִּשְׁבִיל תְּשׁוּבָה עַל עֲווֹנוֹתַי הָרַבִּים כִּי אַתָּה לְבַד יָדַעְתָּ אֶת כָּל הַמְּנִיעוֹת וְכָל הַסְּפֵקוֹת וְהַבִּלְבּוּלִים שֶׁיֵּשׁ לִי עַל זֶה, עַד שֶׁאֵינִי יוֹדֵעַ לָתֵת עֵצוֹת בְּנַפְשִׁי כְּלָל בְּעִנְיַן זֶה שֶׁל תַעֲנִיּוֹת וְאַתָּה יוֹדֵעַ כַּמָּה אֲנִי צָרִיךְ לְהִתְעַנּוֹת עַד אֲשֶׁר כָּל יָמַי לֹא יַסְפִּיקוּ לִי לְהִתְעַנּוֹת חֵלֶק אֶחָד מֵאֶלֶף וּרְבָבָה מִמַּה שֶּׁאֲנִי צָרִיךְ לְהִתְעַנּוֹת עַל תִּקּוּן חֵטְא וּפְגַם אֶחָד מֵחֲטָאַי וּפְשָׁעַי וּפְגָמַי הַמְרֻבִּים מְאד וְאֵין אִתָּנוּ יוֹדֵעַ עַד מָה", הייליגער באשעפער ווייז מיר דעם וועג וואס האב איך צו טון מיט תעניתים, דארף איך פאסטן צו מתקן זיין מיינע עבירות? וויפיל דארף איך פאסטן?

ביי אונז איז נישט שייך די גאנצע זאך פון תעניתים, דער רבי האט אונז בפירוש געזאגט (שיחות הר"ן, סימן קנד): "שֶׁעִקַּר מַה שֶּׁהִגִּיעַ לְמַדְרֵגָתוֹ, הוּא רַק עַל יְדֵי עִנְיַן 'פְּרָאסְטִיק'", ער איז צוגעקומען צו זיינע מדריגות נאר דורך זיך פירן פשוט, "שֶׁהָיָה מְדַבֵּר הַרְבֵּה וּמֵשִׂיחַ הַרְבֵּה בֵּינוֹ לְבֵין קוֹנוֹ", ער האט אסאך געשמועסט און גערעדט צום אייבערשטן, "וְאָמַר תְּהִלִּים הַרְבֵּה בִּפְשִׁיטוּת", און ער האט געזאגט אסאך תהילים, "וְעַל יְדֵי זֶה דַּיְקָא הִגִּיעַ לְמַה שֶּׁהִגִּיעַ", און נאר אזוי האט ער זוכה געווען צו וואס ער האט זוכה געווען, "וְדִּבֵּר עִם כַּמָּה צַדִּיקִים גְּדוֹלִים", און דער רבי האט גערעדט מיט אסאך גרויסע צדיקים, "וְאָמְרוּ גַּם כֵּן", זיי האבן אים אויך געזאגט די זעלבע זאך, "שֶׁלֹּא הִגִּיעוּ לְמַדְרֵגָתָם", זיי זענען נישט צוגעקומען צו זייערע מדריגות, "כִּי אִם עַל יְדֵי עִנְיָן פְּרָאסְטִיק", נאר דורך די פשוטע עבודה, "שֶׁעָסְקוּ בַּעֲבוֹדָתָם בִּפְשִׁיטוּת גָּמוּר בְּהִתְבּוֹדְדוּת וְשִׂיחָה בֵּינוֹ לְבֵין קוֹנוֹ", זיי האבן אסאך גערעדט צום אייבערשטן פשוט'ערהייט, און אסאך געשמועסט מיטן אייבערשטן, "וְעַל יְדֵי זֶה הִגִּיעוּ לְמַה שֶּׁהִגִּיעוּ, אַשְׁרֵי לָהֶם", און נאר אזוי זענען זיי צוגעקומען צו וואס זיי זענען צוגעקומען, וואויל איז זיי.

לערן ספר המידות, דאס וועט דיך מאכן פאר אן ערליכער איד, און בעט דעם אייבערשטן אויף יעדע סעיף דו זאלסט זוכה זיין קומען צו דעם, און אז דו זעסט זאכן וואס עס איז דיר שווער - זאלסטו פרעגן דיין מגיד שיעור, אויך קענסטו מיר שרייבן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת בהר, י"ב אייר, כ"ז לעומר, שנת תשפ"ד לפרט קטן

לכבוד ... נרו יאיר

געלויבט דעם אייבערשטן איך האב זוכה געווען צו פארן קיין ארץ ישראל צו זיין אין מירון ל"ג בעומר, ביים תנא אלוקי רבי שמעון.

איך האב זיך היינט געטראפן מיט אנשי שלומינו אין בני ברק, קודם בין איך געווען באזוכן די חדר, גערעדט מיט די קינדער און מיט די מלמדים.

נאכדעם בין איך געגאנגען דאווענען אין אונזער שול מנחה מיט אנשי שלומינו און געזאגט א שמועס פון חיזוק און עצות אויף עבודת השם, וואס מיר האבן מקבל געווען פון מוהרא"ש פון הייליגן רבי'ן.

פון דארט בין איך געגאנגען צו איינע פון די חשוב'ע משפחות רעדן פלענער וועגן עפענען א בית פיגא סקול דעם קומענדיגן זמן.

פון דארט בין איך געפארן קיין מירון, די ישיבה פון ירושלים איז געקומען פאר אפאר טעג; איך וועל זיין מיט זיי, לערנען מיט זיי, דאווענען מיט זיי, זיך באקענען מיט זיי פון דער נאנט.

איך בעט דיר זייער זאלסט זיך נישט לאזן פון די נארישע מחשבות וואס זאגן דיר 'מארגן, מארגן; מארגן וועל איך דאווענען מיט מנין, מארגן וועל איך אויפשטיין, מארגן וועל איך ליינען קריאת שמע, מארגן וועל איך זיך אפגעבן מיט מיינע קינדער'; אם לא עכשיו אימתי, אויב נישט יעצט ווען דען?!

מוהרא"ש זאגט פון צדיקים פשט אין פסוק (שמות יז, ט): "צֵא הִלָּחֵם בַּעֲמָלֵק מָחָר", מען דארף מלחמה האלטן מיט די קליפה פון עמלק וואס זאגט 'מארגן, מארגן'; גיי יעצט אהיים צו דיינע קינדער, רעד מיט זיי, גיי יעצט אין שול דאווענען און ליין היינט קריאת שמע.

איך דארף מקצר זיין, איך בין זייער אפגעמאטערט פון די וועג.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת בהר, י"ג אייר, כ"ח לעומר, שנת תשפ"ד לפרט קטן

טייערער ... נרו יאיר

קלאפ זיך נישט אראפ, מען האט דיך גענוג און נאך אראפגעקלאפט אלע דיינע יארן, יעצט ביסטו געקומען צום רבי'ן – דארפסטו אויסשפייען די אלטע צעדרייטע שיטה פון זיך קלאפן, יעצט דארפסטו אנהויבן האלטן פון דיר, און גלייבן אז דער אייבערשטער האט א נחת רוח פון דיר, און ווארט צו הערן דיין קול ווי דו שרייסט אויס: "טאטע העלף מיר, טאטע האב רחמנות אויף מיר, טאטע איך וויל זיין גוט, איך וויל זיין ערליך".

יעדע ווארט וואס דו רעדסט צום אייבערשטן וועט דיך אויסהיילן פון די אלטע ווייטאג פון די אלע צעקלאפטע ווערטער וואס מען האט דיך אלע יארן געפייניגט און צעקלאפט, דאס רעדן צום אייבערשטן וועט דיך מאכן שטארק, ארויסנעמען אלע ווייטאג.

איך בין יעצט אין מירון ביי רבי שמעון בר יוחאי, איך בין מתפלל פאר דיר און פאר דיין משפחה.

בעזרת ה' יתברך - יום ד' פרשת אמור, ז' אייר, כ"ב לעומר, שנת תשפ"ד לפרט קטן

לכבוד ... נרו יאיר, קרית ברסלב

דיין ווייב האט מיר געבעטן איך זאל דיר מחזק זיין בנוגע וואס דו שפירסט זיך צעקלאפט, ווען דו זעסט דיינע חברים ווי זיי זענען מצליח בעבודת השם ווערסטו זייער צעבראכן.

איך בעט דיר מיין טייערער ליבער ברודער, וואס ווייסטו וואס גייט אריבער אויף זיי? וואס ווייסטו וואס פאר א נסיונות זיי האבן? עס דאכט זיך דיר ווי זיי האבן נישט קיין יצר הרע און זיי האבן נישט קיין נסיונות, און ווי מער דו קוקסט אויף זיי ווערסטו מער און מער גארנישט ביי זיך; פארוואס זאלסטו קוקן אויף אנדערע? דער רבי האט דאך אונז געלערנט די סוד פון האבן א גוט לעבן, פון זיך מחי' זיין מיט וואס מען האט און נישט קוקן אויף יענעמ'ס הצלחה אין עבודת השם.

דער רבי האט דערציילט די מעשה פון דעם חכם און תם (ספורי מעשיות, מעשה ט), דער תם איז געווען א שוסטער, ער פלעגט ארבעטן זייער שווער צו פאבריצירן שיך. ווען ער האט שוין געענדיגט מאכן דעם שיך האט עס געהאט יענץ פנים, עס האט געהאט דריי עקן, אבער ער פלעגט אנכאפן דעם שיך און זיך מחי' זיין דערמיט, ער פלעגט זאגן: "וואס פאר א שיינקייט, וואס פאר א וואוילקייט דאס שיכעלע איז, וואס פאר א זיסקייט דאס שיכעלע איז, וואס פאר א האניג'דיג וואס פאר א צוקערדיג שיכעלע דאס איז"; אבער זיין ווייב האט זיך זייער געוואונדערט, זי האט אים געפרעגט: "אז עס איז יא אזוי, פארוואס אנדערע שוסטערס נעמען דריי גילדן פאר א פאר שיך און דו נעמסט נאר א האלבן טאלער?" האט איר דער תם געענטפערט: "וואס האט דאס צו טון מיט מיר; דאס איז יענעמס מעשה און דאס איז מיין מעשה, און ווייטער פארוואס דארפן מיר שמועסן פון אנדערע מענטשן; לאמיר מאכן א חשבון וויפיל איך פארדין פון דעם שיך", ער פלעגט צאמרעכענען וויפיל ער האט אויסגעגעבן פאר די סחורה און וויפיל עס איז אים אריינגעקומען ריווח, און ער האט געזען אז ער האט מרוויח געווען צען גראשן, האט ער געזאגט פאר זיין ווייב: "וואס זאל מיר באדערן אז איך האב פארדינט עפעס ריווח מיד ליד?"

אז עס כאפט דיר אן א נישט גוטע קנאה, דו הייבסט אן טראכטן פון דיינע חברים ווי זיי זענען מצליח - זאלסטו זיך דערמאנען די ווערטער פון רבי'ן און זינגען: "דאס איז זיין מעשה און דאס איז מיין מעשה, וואס אינטערעסירט מיר יענעמ'ס עבודת השם?" און זיך מחי' זיין מיטן תם, נישט קוקן אויף א צווייטן, ווייל נאר אזוי קען מען האבן א חיים טובים, און אז מען קוקט אויף א צווייטן האט מען נישט קיין לעבן; איינער וואס איז מקנא א צווייטן עסט זיך אויף לעבעדיגערהייט.

מאך זיך נישט נאריש, קלאפ זיך נישט אראפ, ביסט זייער טייער און זייער גוט, אין הימל ביסטו א חידוש שבחידושים. דער הייליגער רבי זאגט (לקוטי מוהר"ן חלק א', סימן לד) יעדער מענטש האט אין זיך א נקודה וואס א צווייטער האט נישט; אזוי ווי חכמינו זכרונם לברכה דערציילן (תענית כא:) עס איז געווען א דאקטער וואס האט געהייסן אבא אומנא, ער פלעגט באקומען יעדן טאג א בת קול פון הימל: "שָׁלוֹם עָלֶיךָ אַבָּא אוּמְנָא"; אביי פלעגט באקומען נאר איין מאל א וואך א גרוס פון הימל, יעדן ערב שבת פלעגט ער הערן א בת קול פון הימל: "שָׁלוֹם עָלֶיךָ אַבַּיֵי"; רבא פלעגט באקומען דעם בת קול נאר איין מאל א יאר, יעדן ערב יום כיפור פלעגט ער הערן: "שָׁלוֹם עָלֶיךָ רָבָא"; זאגט די גמרא אז אביי האט געהאט חלישות הדעת פארוואס ער באקומט נאר איינמאל א וואך א בת קול, און אבא אומנא באקומט יעדן טאג א בת קול, האט מען אים געענטפערט פון הימל: "לָא מָצִית לְמֶעֱבַד כְּעֻבְדָּא דְּאַבָּא אֻמָּנָא", דו קענסט נישט טון וואס אבא אומנא טוט; אזוי ווי דער תם פלעגט זאגן: "דאס איז יענעמ'ס מעשה, און דאס איז מיין מעשה".

אשרינו און פארט אשרינו!

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת אמור, ז' אייר, כ"ב לעומר, שנת תשפ"ד לפרט קטן

לכבוד ... נרו יאיר

איך האב שוין לאנג נישט געהערט פון דיר, איך טראכט אפשר האסטו זיך באליידיגט פון מיר אז איך האב דיר געשריבן זאלסט זיך אפלאזן פון דיינע חכמות המדומות וכו', פון חומרות ופרישות.

איך שרייב דיר דאך נאר די ווערטער פון הייליגן רבי'ן, ווי ער האט אונז געלערנט צו אפלאזן די חכמות פון זיך אפשיידן וכו', נישט לעבן מיט די ווייב וכו'. דער הייליגער רבי זאגט (לקוטי מוהר"ן חלק ב', סימן מד): "גַּם מֵחָכְמוֹת שֶׁיֵּשׁ בַּעֲבוֹדַת הַשֵּׁם בְּעַצְמוֹ צָרִיךְ לְהַרְחִיק מְאֹד", מען דארף זיך זייער היטן פון חכמות, "כִּי כָל אֵלּוּ הַחָכְמוֹת שֶׁל הָעוֹלָם שֶׁיֵּשׁ לְהַנִּכְנָסִין וּמַתְחִילִין קְצָת בַּעֲבוֹדַת הַשֵּׁם, אֵינָם חָכְמוֹת כְּלָל וְהֵם רַק דִּמְיוֹנוֹת וּשְׁטוּתִים וּבִלְבּוּלִים גְּדוֹלִים", ווייל די אלע חכמות וואס מען האט ווען מען הייבט אן דינען דעם אייבערשטן זענען בכלל נישט קיין חכמות, דאס איז דמיונות, שטותים און קאפ דרייעניש, "וְאֵלּוּ הַחָכְמוֹת מַפִּילִין מְאֹד אֶת הָאָדָם מֵעֲבוֹדַת הַשֵּׁם", דאס מאכט אז דער מענטש זאל אפלאזן זיין עבודות השם, "וְעַל אֵלּוּ הַמְדַקְדְּקִים וּמַחְמִירִים בְּחֻמְרוֹת יְתֵרוֹת עֲלֵיהֶם נֶאֱמַר 'וְחַי בָּהֶם, וְלֹא שֶׁיָּמוּת בָּהֶם' כִּי אֵין לָהֶם שׁוּם חִיּוּת כְּלָל", די אלע וואס זענען פארנומען מיט חכמות און ספיקות זענען אלץ מסופק צי זיי האבן יוצא געווען די מצוה אדער נישט - די האבן נישט קיין שום חיות, "וְתָמִיד הֵם בְּמָרָה שְׁחֹרָה מֵחֲמַת שֶׁנִּדְמֶה לָהֶם שֶׁאֵינָם יוֹצְאִים יְדֵי חוֹבָתָם בְּהַמִּצְווֹת שֶׁעוֹשִׂין, וְאֵין לָהֶם שׁוּם חִיּוּת מִשּׁוּם מִצְוָה מֵחֲמַת הַדִּקְדּוּקִים וְהַמָּרָה שְׁחֹרוֹת שֶׁלָּהֶם", זיי זענען שטענדיג דעפרעסט, זיי לעבן אלץ אין ספיקות, און די חומרות ווארפט זיי אריין אין מרה שחורה.

ליבער ברודער, באניי זיך, פריש זיך אויף מיט די רבינ'ס עצות און התחזקות. לערן אסאך לקוטי מוהר"ן, אן דעם רבינ'ס ספרים אז מען לערנט קבלה - איז א גרויסע סכנה, ווייל אן תפילה והתבודדות קען מען זיך זייער אפנארן. מוהרא"ש זאגט, דאס איז וואס חכמינו זכרונם לברכה זאגן (יבמות סב:): "השרוי בלא אישה", דער וואס האט נישט קיין תפילה והתבודדות, "אישה יראת ה' הוא תתהלל" (משלי לא, ל), איז "שרוי בלא שמחה, בלא חומה", אן אלע גוטע זאכן, ווייל נאר מיט תפילה והתבודדות קען מען זוכה זיין צו דביקות בה'.

איך האב אסאך צו רעדן צו דיר, איך האף נאר אז דו ווילסט אננעמען.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת אמור, ז' אייר, כ"ב לעומר, שנת תשפ"ד לפרט קטן

לכבוד ... נרו יאיר

זיי נישט צעבראכן פון די אלע חלישות הדעת וואס גייט אריבער אויף דיר, מען פרובירט אויס יעדן איינעם פון הימל מיט שווערע ביטערע נסיונות. די געפיל וואס דו שפירסט, ווי קיינער דארף דיך נישט, און ווי דו וועסט שוין סיי נישט ווערן א צדיק - דאס האבן אלע צדיקים געשפירט בתחילת התקרבותם, דער רבי אליין האט אויך געהאט דעם געפיל. דער רבי האט געזאגט (לקוטי מוהר"ן חלק ב' סימן מח): "שָׁמַעְנוּ מִצַּדִּיק אֲמִתִּי שֶׁאָמַר", איך האב געהערט פון א אמת'ן צדיק וואס האט געזאגט, (מיר האבן געהערט פון מוהרא"ש אז דאס איז דער רבי אליין), "שֶׁאִלּוּ הָיָה אוֹמֵר לוֹ אֶחָד יִהְיֶה מִי שֶׁיִּהְיֶה", אויב וואלט ער געהאט איינעם - נישט קיין חילוק ווער דער מענטש איז - וואס זאל אים זאגן, "בְּעֵת שֶׁעָסַק בַּעֲבוֹדַת הַשֵּׁם בִּתְחִלָּתוֹ", ווען ער האט אנגעהויבן דינען דעם אייבערשטן: "אָחִי", ברודער, "חֲזַק", שטארק זיך, "וֶאֱחֹז עַצְמְךָ", און דערהאלט זיך - "הָיִיתִי רָץ וּמִזְדָּרֵז מְאֹד בַּעֲבוֹדָתוֹ יִתְבָּרַךְ", וואלט איך זוכה געווען צו טון אסאך מער אין עבודת השם, "כִּי גַּם עָלָיו עָבַר כָּל הַנַּ"ל", ווייל אויף אים איז אויך אריבער שווערע ביטערע נסיונות, "וְלֹא הָיָה שׁוֹמֵעַ שׁוּם הִתְחַזְּקוּת מִשּׁוּם אָדָם", ער האט אויך געשפירט ביי זיך ווי קיינער דארף אים נישט, און קיינער האט אים נישט געגעבן קיין שום חיזוק ווערטער.

ברודער טייערער שטארק זיך, דער אייבערשטער איז מיט דיר, ביי דיר און נעבן דיר, און אז דו שפירסט ווי מען שטופט דיך אוועק פון אלע היכלות, מען לאזט דיר נישט אריין בהיכל הצדיקים - זאלסטו נעמען די עצה פון רבי'ן, די עצה פון התבודדות; זיך גוט גוט אויסוויינען צום אייבערשטן, אים בעטן: "פתחו לי שערי צדק, עפן מיר די טיר רבונו של עולם, איך וויל זיין נאנט צו דיר, איך וויל זיין מיט דיר"; לאז נישט נאך די הייליגע זאך פון התבודדות, ביי דעם דארף מען עקשנות, נישט אפלאזן דעם אייבערשטן, נישט אוועק גיין פונעם אייבערשטן, אפילו ווען מען טרייבט אוועק וכו' וכו'.

מארגן וועט זיין דער וועכנטליכער ליל שישי שיעור אין די נייע בארא פארקער שול, מען האט זיך געדארפט אריבערציען צו א נייע פלאץ, וועט דארט זיין דער שיעור מיט קביעות מזוזה.

דעם שבת קודש וועל איך זיין אין ישיבה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת קדושים, כ"ז ניסן, י"ב לעומר, שנת תשפ"ד לפרט קטן

לכבוד מיין טייערער זון ... נרו יאיר, קרית ברסלב

איך בעט דיר זייער מיין טייערער זון, שטארק זיך בלימוד התורה, קום אין כולל צייטליך און בעט דעם אייבערשטן זאלסט מצליח זיין צו פארשטיין דאס לערנען און ליב האבן צו לערנען.

אנהויב איז שווער, אנהויב שפירט מען נישט א שטארקע הנאה, אבער אז מען ברעכט דאס אדורך - איז מען זוכה צו שיינע זאכן.

מיין טייערער ..., זאג יעדן טאג דעם יום תהילים, זאג יעדן טאג אכצן פרקים משניות און זיי מקפיד צו דאווענען די דריי תפילות מיט מנין מיט א סידור, אן שמועסן ביים דאווענען.

איך בעט פאר דיר און פאר דיין משפחה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת אחרי-ב', כ"ג ניסן, אסרו חג, ח' לעומר, שנת תשפ"ד לפרט קטן

מיין טייערער ליבער ... נרו יאיר

שטארק זיך מיט אלע כוחות נישט צו אויפגעבן אויף דיין עבודת השם. דער רבי איז געווען אמאל ביי א חתונה און דער בדחן האט זיך פארשטעלט צו פרייליך מאכן חתן כלה, ער האט זיך פארשטעלט ווי א רבי; ער האט געמאכט תנועות, געפראוועט, דערנאך איז דער בדחן ארויס און צוריק געקומען אנגעטון מיט שווארצע קליידער ווי א גלח, און דער גאנצער עולם האט געלאכט. האט דער רבי געזאגט: "אט איז מען א מלאך, אט איז מען א גלח"; דער רבי האט ארויסגענומען פון יעדע זאך א לימוד אויף התחזקות פאר עבודת השם, אז מען דארף זיך זייער שטארקן און בעטן דעם אייבערשטן מען זאל בלייבן מיט די געפיל צום רבי'ן, ווייל אט ברענט א מענטש צום אייבערשטן, מען שפירט נאנט צום אייבערשטן, דורך התקרבות לצדיק בענקט מען צום אייבערשטן, און אט איז מען א גלח, מען פאלט אראפ, מען ווערט א חסיד שנפל, וואס איז גרוע ממשומד; מען קילט זיך אפ, מען ווערט קלוג, מען האלט אז מען פארשטייט בעסער פון רבי'ן, השם ישמרינו.

"איך האב דריי סארט מענטשן וואס קומען צו מיר" - האט דער רבי געזאגט, "איינער קומט הערן מיינע תורות, ער האט ליב מיינע שיינע תורות, די טיפקייט, די וועג ווי עס איז געבויט, א צווייטער סארט מענטש קומט עסן קויליטש, און נאכדעם האב איך מענטשן וואס איך בין זיי איינגעבאקן אין הארץ".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת פקודי, א' דראש חודש אדר ב', שנת תשפ"ד לפרט קטן

לכבוד מיין טייערער זון הרב ... נרו יאיר, קרית ברסלב

איך פריי זיך זייער צו הערן שיינע גריסן אויף דיר, אז דו דאווענסט מיט יראת שמים, דאווענסט אויף איין פלאץ מיט א סידור, אן קיין שמועסן; איך בין אזוי פרייליך דאס אלעס צו הערן, אויך דערציילן מיר די כולל אינגעלייט אז דו לערנסט מיט התמדה. איך דאנק דעם אייבערשטן אז איך בין זוכה צו זען מיינע קינדער לערנען און דאווענען.

זע צו זיין צייטליך אין כולל, איינע פון די סודות פון מצליח זיין איז זיין מיט א סדר צייטליך. אויך זאלסטו זאגן פאר אלע אינגעלייט אז איך וויל זייער אלע זאלן זיין צייטליך, און נאר אז מען איז צייטליך – קען מען מצליח זיין.

גיי שלאפן פרי און שטיי אויף פרי, זאגט דעם יום תהלים, נאכדעם זאלסטו לערנען ח"י פרקים משניות; תהילים און משניות זאלן זיין דיינע ערשטע שיעורים.

פון דיין טאטע וואס בעט פאר דיר.

בעזרת ה' יתברך - יום ד' פרשת ויקהל, כ"ו אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

שטארק זיך אין דיין עבודת השם, נוץ אויס דיינע יונגע יארן צו לערנען און דאווענען, די יונגע יארן – אז מען נוצט אויס אויף תורה און עבודת השם – קען מען זוכה זיין אסאך מער ווי אויף דער עלטער, איין טאג אלס אינגערמאן איז ווי א גאנצע יאר אויף דער עלטער.

אויך זאלסטו מאכן צייט יעדן אויף דער נאכט צו שמועסן מיט דיין ווייב, דו האסט זוכה געווען צו אן אשת חיל, זי איז פול מיט געטליכקייט, זי איז נישט פארנומען מיט נארישקייטן, איר קאפ איז ביים אייבערשטן, זי וויל אבער אביסל חיזוק פון דיר, און אויפמערקזאמקייט. גרייט זיך אן עפעס וואס צו שמועסן, דערצייל איר דיין סדר היום, ווי דיין טאג איז געווען.

מוהרא"ש האט מיר כמה פעמים געזאגט, עס טוט אים וויי אז ער האט נאך די חתונה נישט געוואוסט ווי וויכטיג עס איז צו שמועסן אביסל מיט די ווייב, נאך די חתונה האט ער זייער פלייסיג געלערנט, און ווען זיין ווייב האט אים עפעס געפרעגט, האט ער געענטפערט: "נא נא", אזוי ווי מען ענטפערט אינמיטן דאווענען וואו מען קען נישט אויסרעדן, מען ווייזט מיטן פינגער אויפן מויל און מען ברומט "נא נא"; מוהרא"ש האט געזאגט: "וואלט איך געהאט די ספרים אשר בנחל – וואלט איך געוואוסט פון התמדה, און אז די ווייב קומט שמועסן – שמועסט מען, אזוי קען מען נאכדעם נאך מער לערנען, אזוי ווי חכמינו זכרונם לברכה זאגן (מנחות צט.): 'בטולה של תורה, זהו קיומה'".

איך האב זוכה געווען אסאך יארן צו משמש זיין מיין גרויסע זיידע זכותו יגן עלינו אין מירון, זיין התמדה איז דאך געווען אין לשער, ער האט נישט מבטל געווען קיין רגע פון לערנען, ער האט זיך נישט אריינגעלייגט אין בעט, ער האט נאר אביסל געדרימלט אויפן בענקל, ער איז געזיצן שעות און געלערנט די הייליגע תורה, דאך האט ער יעדן טאג געמאכט צייט צו רעדן מיט מיין באבע עליה השלום, דעמאלט איז נאכנישט געווען סעלפאונס, אויך אין אונזער דירה אין מירון איז נישט געווען קיין טעלעפאן, זענען מיר געגאנגען צום טעלעפאן; אינדרויסן פון די מערה איז געווען א טעלעפאן, א פאבליק טעלעפאן, מען האט אריינגעלייגט געלט און גערופן קיין אמעריקע, און מיין זיידע האט געפרעגט מיין באבע וואס זי מאכט, און ער האט אלץ געהאט עפעס צו דערציילן, פון די וועטער און דאס גלייכן, און פון דארט איז ער צוריק געגאנגען לערנען.

מיט חברים איז א שאד צו רעדן, אבער מיט די ווייב – דארף מען רעדן, בפרט מיט א ווייב וואס איז דיר אזוי געטריי און וויל נאר רוחניות, דארפסטו זיכער רעדן.

בעזרת ה' יתברך - יום ה' פרשת תצוה, שובבי"ם, י"ג אדר א', שנת תשפ"ד לפרט קטן

לכבוד מיין טייערער ... נרו יאיר

דער הייליגער רבי זאגט (שיחות הר"ן, סימן נא) "די וועלט נארט אייך, לאזט אייך נישט נארן", קיינער בלייבט נישט מיט די געלט, מען מיינט א גאנצן צייט 'יעצט פארדין איך, יעצט מאך איך געלט', "וּלְבַסּוֹף כְּשֶׁבָּאִין לְחֶשְׁבּוֹן", נאכדעם ווען מען רעכנט אויס, "אֵין נִשְׁאָר בְּיָדָם כְּלוּם", זעט מען זיך אן קיין געלט.

נאר דינען דעם אייבערשטן – דאס איז תכלית, גיין אין שול דאווענען דריי מאל א טאג מיט מנין, לערנען בכל יום מקרא, משנה, גמרא, הלכה, מדרש, וספרי רבינו, און זיך מתבודד זיין, דערציילן פארן אייבערשטן אלעס וואס גייט אריבער, אלעס וואס דער יצר הרע מאכט משוגע בדיבור, במעשה, במחשבה; נאר דאס איז תכלית.

טייערער ברודער, אשרינו שיש לנו רבי וואס איז אונז מחי' ומחזק, און וועקט אונז אויף פון שלאף.

בעזרת ה' יתברך - יום ג' פרשת תרומה, שובבי"ם, ד' אדר א', שנת תשפ"ד לפרט קטן

לכבוד מיין טייערע ליבער ... נרו יאיר

שטארק זיך מיט דיין עבודת השם, ווער נישט צעבראכן פון וואס גייט אריבער וכו' וכו'. דער רבי האט אונז דערציילט אז אלע צדיקים האבן געשפירט די זאך, אז מען איז זיי מרחק, מען דארף זיי נישט, און אויב וואלטן זיי זיך נישט מחזק געווען מיט אלע כוחות – וואלטן זיי נישט זוכה געווען צו ווערן צדיקים. זאלסטו זיך זייער שטארקן מיט תורה ותפילה, גיי אין פעלד, שריי צום אייבערשטן ער זאל דיך מקרב זיין צו אים, וועסטו ווערן א גרויסער צדיק.

איך האב עפעס א וויכטיגע זאך צו רעדן מיט דיר, איך וויל זאלסט מיר העלפן אין שטעטל מיט עפעס גאר וויכטיג, איך וויל רעדן מיט דיר פנים בפנים.

איך האב דיך זייער ליב.

בעזרת ה' יתברך - יום ד' פרשת משפטים, שובבי"ם, כ"ח שבט, שנת תשפ"ד לפרט קטן

לכבוד ... נרו יאיר

העיקר מה שקורין "זיך דערהאלטן"; העיקר ווען עס גייט איבער - דערהאלט מען זיך; מען טאנצט און מען זינגט צום אייבערשטן. אזוי ווי די מעשה גייט, אז דער הייליגער רבי נתן זכרונו לברכה האט געהאט א תלמיד וואס האט געהייסן רבי שאול מטעפליק זכרונו לברכה, ער איז געווען א גרויסער עובד ה', ער האט געדאווענט און געלערנט מיט א געוואלדיגער ברען. איינמאל איז רבי נתן געווען אין טעפליק, און צוזעענדיג זיינע עבודות, ווי ער דינט דעם אייבערשטן מיט אזא התלהבות, האט אים רבי נתן געזאגט: "שאול שאול, איך האב פון דיר נאכנישט קיין הנאה; ווען איך וועל זען ווי שאול פאלט אראפ און הייבט זיך צוריק אויף און דינט ווייטער דעם אייבערשטן - דעמאלט וועל איך הנאה האבן".

מארגן וועט זיין די ליל שישי שיעור אין לעיקוואד, אינאיינעם מיט א סעודת ראש חודש, איך דארף מחזק זיין די לעיקוואד אנשי שלומינו.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת משפטים, שובבי"ם, כ"ז שבט, שנת תשפ"ד לפרט קטן

לכבוד מיין טייערער ליבער ... נרו יאיר, לעיקוואד

איך בענק זיך זייער צו די מעסעדזש וואס דו פלעגסט מיר שיקן וועכנטליך יעדע ערב שבת, א חשבון וויפיל גליונות און קונטרסים דו האסט אויסגעטיילט אין די שולן און אין ישיבות אין לעיקוואד. איך ווייס נישט וואס איז געשען, אויב דו האסט אפגעלאזט הפצה, אדער נאר די מעסעדזש שיקסטו נישט.

ברודער, לאז נישט אפ די הפצה; וואס וואלטן מיר געטון אויב מוהרא"ש וואלט אפגעלאזט די הפצה, ער וואלט געטון עבודת השם אן הפצה, ווי וואלטן מיר געווען? ווי וואלטן מיר אויסגעזען...

לייג אלע עבודות אין דער זייט און נעם זיך צו הפצה; קיין גרעסערס פון דעם איז נישט פארהאן.

בעזרת ה' יתברך - יום ג' פרשת יתרו, שובבי"ם, כ' שבט, שנת תשפ"ד לפרט קטן

מרת ... תחי'

אייער מאן ... נרו יאיר איז א טייערער אינגערמאן, איר זענט גליקליך אז איר האט זוכה געווען צו א טייערע מתנה פון באשעפער.

דאנקט און לויבט דעם אייבערשטן פאר אזא מתנה, און איר זאלט זיין זייער פרייליך.

וויינט נישט ווען אייער מאן זעט, ער זאגט מיר ער קען עס נישט נעמען, ער ווערט זייער דערשראקן. וויינט נאר שטילערהייט צום אייבערשטן, און ווען אייער מאן קומט אהיים – זאלט איר שמייכלען און נאר זיין פרייליך.

שמייכלט און שמייכלט, און ווען איר האט שוין נישט קיין כח צו שמייכלען – זאלט איר זיך אפרוען און שמייכלען; דאס איז דער עיקר עבודת השם ביי פרויען, צו זיין פרייליך, שמייכלען צום מאן.

בעזרת ה' יתברך - ג' פרשת יתרו, שובבי"ם, כ"א שבט, שנת תשפ"ד לפרט קטן

לכבוד מיין טייערער זון ... נרו יאיר

איך הער זייער שיינע גריסן אויף דיר פון דיין עבודת השם, פון דיין לערנען און פון דיין דאווענען; איך בין אזוי פרייליך צו הערן אז דו לערנסט פלייסיג די הייליגע תורה, זה חלקי מכל עמלי.

יעצט נאך די חתונה קענסטו ווערן א גרויסער צדיק. חכמינו זכרונם לברכה זאגן (יומא עב:): "הַלוֹמֵד תּוֹרָה בְּטָהֳרָה", ווי אזוי קען מען לערנען תורה מיט ריינע מחשבות? "נוֹשֵׂא אִשָּׁה, וְאַחַר כָּךְ לוֹמֵד תּוֹרָה", אז מען האט חתונה; יעצט נאך די חתונה זאלסטו אויסנוצן די צייט פאר תורה ותפלה, און פאר התבודדות – וועסטו זוכה זיין צו גרויסע מדריגות.

איך בענק זיך זייער צו דיר, און די גוטע גריסן אויף דיר – דאס בארואיגט מיך.

דיין טאטע דיין ראש ישיבה.

בעזרת ה' יתברך - יום ה' פרשת וארא, שובבי"ם, ראש חודש שבט, שנת תשפ"ד לפרט קטן

לכבוד ... נרו יאיר

דיין טאטע האט מיר געשריבן אז דו לערנסט זייער פלייסיג, און יעצט האסטו זוכה געווען צו ענדיגן די ערשטע מאל ששה סדרי משנה; וואויל איז דיר און וואויל איז דיין חלק אז דו לערנסט די הייליגע תורה.

יעצט אז דו האסט געענדיגט ששה סדרי משנה זאלסטו אנהויבן א שיעור אין גמרא תלמוד בבלי, הויב אן מסכת ברכות, גיי אין א סדר א בלאט נאך א בלאט. כאפ נישט די ווערטער, זאג שטייטלעך, זאג ארויס יעדע ווארט אויפן קול, אזוי וועסטו ווערן א גרויסער צדיק, ווייל דער הייליגער רבי זאגט אז מען זאגט גמרא און מען זאגט משניות - ווערט מען א גרויסער צדיק.

אויך זאלסטו טון די הייליגע זאך וואס דער רבי האט אונז געהייסן טון (לקוטי מוהר"ן חלק ב', סימן כה; צו), זאלסט רעדן יעדן טאג אפאר ווערטער צום אייבערשטן. זוך א שטילע פלאץ וואו קיינער איז נישט דארט, אדער אין דיין שלאף צימער, אדער ביינאכט אין בעט אונטער דיין דעק, אדער אין א ווינקל, און רעד צום אייבערשטן אויף דיין שפראך, בעט דעם אייבערשטן ער זאל דיר העלפן זאלסט נישט פאלגן די יצר הרע, בעט דעם אייבערשטן דו זאלסט אויך זוכה זיין צו ווערן א צדיק.

אז דו וועסט זיין שטארק מיט די צוויי זאכן, איינס - לערנען יעדן טאג אביסל גמרא אפילו אן פארשטיין, און די צווייטע זאך - רעדן יעדן טאג אפאר ווערטער צום אייבערשטן - וועסטו זוכה זיין צו ווערן א גרויסער צדיק.

געב א גרוס פאר דיין טייערע טאטע.

ער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום א' פרשת שמות, שובבי"ם, י"ט טבת, שנת תשפ"ד לפרט קטן

לכבוד מיין טייערער ... נרו יאיר

פרוביר אויס דעם רבינ'ס עצה פון התבודדות, דיין גאנצע לעבן וועט דיר ווערן זיס. גיי יעדן טאג אין א שטילע פלאץ אדער א שטוב, אדער אין פעלד, אדער אין דיין קאר, לעש אויס דיין טעלעפאן און רעד זיך אויס פאר אפאר מינוט צום אייבערשטן, שמועס מיט אים, דערצייל אים ווי שטארק דו ווילסט זיין גוט און ווי דער יצר הרע ברענגט שווערע ביטערע נסיונות; רעד, שריי, וויין און שמועס, קרעכץ זיך אויס צום אייבערשטן; איך זאג דיר אלעס וועט זיך טוישן, עס וועט דיר גרינגער ווערן, וועסט שפירן דעם אייבערשטן, וועסט שפירן ער איז מיט דיר, ביי דיר און נעבן דיר.

אין אנהויבן וועט עס זיין אביסל שווער, אבער עקשן זיך, לאז נישט אפ, און אז דו האסט נישט קיין ווערטער וואס צו רעדן – זאלסטו זאגן: "רבונו של עולם" – אן א שיעור מאל, ביז דו וועסט דורכברעכן און דו וועסט האבן ווערטער.