בריוון פונעם ראש ישיבה שליט"א

בעזרת ה' יתברך - יום ג' פרשת ויקרא, ט' אדר ב', שנת תשפ"ד לפרט קטן

לכבוד ... נרו יאיר

אז דו וועסט זיך דערהאלטן - וועסטו זען ניסים; אלעס ווענדט זיך אין דיר, אויב דו וועסט זיך דערהאלטן. קענסט אודאי די מעשה וואס דער רבי האט דערציילט מיטן סוחר וואס האט זיך מפרנס געווען פון פארקויפן ערד צו מאכן דערפון ליים, און אמאל ביים גראבן האט ער געטראפן א טייערע שטיין, מען האט אים געזאגט אז עס איז נישטא אין די גאנצע מדינה איינער וואס זאל האבן דאס געלט צו קענען באצאלן פאר אזא טייערע דיימאנט שטיין, נאר אין לאנדאן אינעם עיר המלוכה - וועט מען קענען אפקויפן פון אים דער שטיין.

ער איז געפארן צום ים, ווען ער איז אנגעקומען צום פּארט האט ער געוויזן דעם דיימאנט שטיין פארן שיפס קאפיטאן, ער האט אים איינגערעדט אז ער האנדלט מיטן קעניג, דער שיפס קאפיטאן האט געהייסן מען זאל אים מכבד זיין מיט גרויס כבוד. דער איד פלעגט זיך שפילן מיטן דיימאנט, איינמאל האט ער איינגעדרימלט ביים עסן, דער משרת רוימט אפ דעם טיש מיטן דיימאנט אינאיינעם, און ווארפט אלעס אריין אין וואסער. דער איד וועקט זיך אויף און זעט אז ער האט אלעס פארלוירן... ער איז געווארן זייער צעבראכן, ער איז שיעור נישט אראפ פון זינען, ער האט געטראכט צו זיך: 'יעצט ווען דער שיפס קאפיטאן וועט זיך דערוויסן אז איך האב גארנישט, וועט ער מיך אריינווארפן אין וואסער, וואס קען איך דא טון?' האט ער אפגעמאכט ביי זיך אז ער וועט זיך מאכן פרייליך, ער וועט זיך מאכן כאילו ער איז רייך, און ער האט נאכאלץ ביי זיך דעם דיימאנט שטיין.

דער שיפס קאפיטאן פלעגט אלץ אריינקומען צו אים אין צימער שמועסן מיט אים, און דער איד האט זיך ווייטער געמאכט פרייליך פונקט אזוי ווי פריער; איין טאג זאגט אים דער שיפס קאפיטאן: "איך זע אז דו ביסט א קלוגער מענטש, וויל איך דיך פארטרויען מיט א גרויסן סוד, איך האב דא אינעם שיף אסאך סחורה וואס איך קען נישט אריינברענגען אין לאנדאן, ווייל מען איז מיר חושד אז איך גנב'ע דאס, איך וועל עס איבערשרייבן אויף דיין נאמען און מיר וועלן זיך שפעטער פאררעכענען". אזוי האבן זיי געטון; נאכן אנקומען קיין לאנדאן האט דער שיפס קאפיטאן געכאפט א הארץ אטאקע, און דער איד איז געבליבן מיט אלע פארמעגנס וואס ער האט אים איבערגעשריבן און ער איז געווארן א גרויסער עושר.

דער רבי האט אויסגעפירט די מעשה מיט די ווערטער: "די דיימאנט שטיין איז נישט געווען דעם איד'ס, והא ראי' ער האט דאס פארלוירן; די סחורה פונעם שיף האט געהערט פארן איד והא ראי' ער האט דאס באקומען; און ווי אזוי איז ער געווארן אזוי רייך? נאר ווייל ער האט זיך דערהאלטן".

ביי דיר וועט מען אויספירן אנדערש, מען וועט זאגן מיט דיין מעשה, דאס האסטו פארלוירן ווייל עס איז נישט געווען דיינ'ס, און די ניסים האסטו באקומען אז דו וועסט זיך דערהאלטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ויקרא, ח' אדר ב', שנת תשפ"ד לפרט קטן

לכבוד ... נרו יאיר

דער הייליגער רבי האט דערציילט, עס זענען געווען צוויי גרויסע עשירים שכנים הויז צו הויז, איינער איז געווען א קארגער און דער צווייטער איז געווען א גרויסער בעל צדקה; אמאל איז געקומען אן ארעמאן און געבעטן צדקה פון דעם קמצן, האט דער קמצן אים געזאגט: "איך האב אסאך ביימער וואס מען דארף זיי צעשניידן אויף קליינע שטיקלעך, אז דו וועסט מיר צעשניידן די ביימער וועל איך דיר געבן עסן", דער ארעמאן האט גענומען א האק און זיך גענומען צו די שווערע ארבעט, ער האט צעהאקט אלע ביימער אויף שפענדלעך, ווען ער האט געענדיגט איז ער געקומען צום בעל הבית בעטן עסן, זאגט אים דער קמצן: "קום מיט מיר", און ער פירט אים צום שכן'ס הויז - די הויז פונעם צווייטן עושר - און זאגט אים: "קלאפ אריין ביי דעם טיר, דא וועסטו אלעס באקומען; עסן, געלט וכו'".

דער ארעמאן האט געמיינט אז דאס איז איין זאך, איין בעל הבית; ער קלאפט אריין און תיכף ומיד האט מען אים אויפגענומען מיט א מורא'דיגע שמחה, מען האט אים געגעבן צו עסן מכל טוב וטוב, אינמיטן עסן האט זיך דער ארעמאן אנגערופן: "איך האב זייער שווער געהארעוועט פאר די עסן", פרעגט מען אים: "וואס הייסט?" ענטפערט ער: "איך האב געהאקט האלץ א גאנצן טאג ביז איך האב באקומען דאס עסן, דאס איז מיר בכלל נישט אנגעקומען גרינג", האט מען אים געזאגט: "אִיר הָאט גֶעאַרְבֶּעט אוּמְזִיסְט אוּן גֶעגֶעסְן אוּמְזִיסְט", מען האט אים ערקלערט וואס דא איז פארגעקומען, אז דאס זענען צוויי מענטשן און אויב וואלט ער קודם אנגעקומען אהער וואלט ער בכלל נישט געדארפט ארבעטן, ווייל דא געבט מען פאר יעדן איינעם עסן בחינם.

טו תשובה, זאג: "הייליגער באשעפער איך גיי שוין זיין גוט, העלף מיר איך זאל זיך נישט דארפן אזוי מוטשען, זיי מיר מוחל אויף מיינע זינד" - וועסטו זוכה זיין צו פרנסה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת פקודי, ה' אדר ב', שנת תשפ"ד לפרט קטן

לכבוד מיינע טייערע חברים פון ארץ ישראל, ה' עליהם יחיו

די וואך זעען מיר אין די פרשה שטארקע חיזוק, די אידן האבן געברענגט די חלקים פון די משכן פאר משה רבינו עס אויפצושטעלן, משה רבינו האט נישט געוויסט וואס צו טון, ער האט פארשטאנען אז דאס איז נישט אין זיינע כוחות, א מענטש קען נישט אויפשטעלן אזא גרויסע משכן, אזעלכע שווערע ברעטער, שוועלן וכו'; האט משה רבינו געפרעגט דעם אייבערשטן (רש"י שמות לט, לג): "אֵיךְ אֶפְשָׁר הֲקָמָתוֹ עַל יְדֵי אָדָם", ווי איז מעגליך א מענטש זאל דאס אויפשטעלן? "אָמַר לוֹ, עֲסֹק אַתָּה בְּיָדְךָ וְנִרְאֶה כִּמְקִימוֹ, וְהוּא נִזְקָף וְקָם מֵאֵלָיו", האט אים דער אייבערשטער געזאגט: "דו מאך מיט דיינע הענט כאילו דו שטעלט עס אויף, און עס וועט זיך אויפשטעלן בדרך נס".

דאס איז זייער שטארקע חיזוק פאר יעדן איינעם אין יעדן מצב, מען דארף נאר אנהויבן טון און דער אייבערשטער העלפט. דאס איז סיי ביי פרנסה; ווען מען מאכט זיך חשבונות וויפיל מען פארדינט און וויפיל דאס לעבן קאסט, זעט מען אז עס איז נישט מעגליך זיך צו דעקן, א בחינה פון: "אֵיךְ אֶפְשָׁר הֲקָמָתוֹ עַל יְדֵי אָדָם", ווי איז מעגליך איך זאל קענען אנגיין מיט מיין משפחה? זאגט דער אייבערשטער: "מאך נישט קיין חשבונות, דו טו רצון השם, גיי ברענג פרנסה, טו עפעס און עס וועט זיך אויפשטעלן א שיינע שטוב".

נעכטן האט זיך מיר א אינגערמאן זייער אויסגערעדט אז עס קאסט אים א חודש דאס לעבן כך וכך, און לויט זיין געהאלט פעלט אים כך וכך חודש'ליך, עס איז נישט מעגליך ער זאל ווייטער אנגיין, דער אינגערמאן איז נישט דער איינציגסטער, דאס איז יעדער צווייטער מענטש, מען מאכט זיך חשבונות און עס שטימט נישט; דארף מען וויסן און געדענקען אז א אידישע לעבן, א אידישע שטוב - איז א בחינה פון די משכן; ביים בית המקדש, זאגן די הייליגע חכמים (בבא בתרא צט.): "מָקוֹם אָרוֹן אֵינוֹ מִן הַמִּדָּה", ווען מען האט אריינגעברענגט דעם ארון אין קדשי הקדשים האט מען געזען אז די חשבון שטימט נישט, מען האט געמאסטן מיט מעסטערס, מען האט געשריבן צעטלעך, עס האט נישט געשטימט, עס האט נישט געקענט אריינגיין אין קדשי קדשים מיטן שכל אנושי, למעשה איז געווען בדרך נס אז דער ארון איז געווען אין קדשי הקדשים; איי עס שטימט נישט, עס איז נישט מעגליך – אבער אזוי איז געווען. די נס איז נישט געווען איין טאג, איין שעה, א נס ווי קריעת ים סוף, וואס די וואסער האט זיך געשפאלטן פאר א שטיק צייט, די נס איז געווען הונדערטער יאר; יאר נאך יאר, חודש נאך חודש, טאג נאך טאג; דער ארון ליגט אין קדשי הקדשים, און לויט די צעטלעך שטימט עס נישט, לויט די מאס קען דאס נישט זיין, מען קוקט אויפן צעטל און עס שטימט נישט, אבער מען קוקט אריין אין בית המקדש זעט מען אז דער ארון ליגט דארט.

אזוי דארף מען לעבן, מאך נישט קיין חשבונות מיט צעטלעך, מען האט גארנישט פון רעכענען נאכאמאל און נאכאמאל וויפיל דאס לעבן קאסט און וויפיל מען פארדינט, מען דארף מאכן אן אנדערע חשבון; עס איז דא א באשעפער, און אז מען רעדט צו אים און מען בעט אים - געבט ער, און ווער רעדט נאך אז מען וויינט זיך אויס צו אים, מען זאגט: "הייליגער באשעפער איך קען נישט מער, די חובות דרוקן מיר, העלף מיר איך זאל קענען אהיימברענגען געלט פאר מיין ווייב און קינדער, הייליגער באשעפער איך ווייס איך בין זיך אליין שולדיג, איך האב געזינדיגט, הרעותי מעשי וקפחתי את פרנסתי, איך טו יעצט תשובה, איך גיי שוין זיין וואויל, איך האב חרטה אויף אלע מיינע נישט גוטע מעשים, זיי מיר מוחל, נעם אן מיין תשובה און געב מיר שפע".

טייערע ברידער אין ארץ ישראל, נעמט אן די פאר ווערטער וואס איך שרייב מיט גרויס איילעניש, עס ווערט שוין שבת ביי ענק, איך מוז שוין שיקן דעם בריוו; איך האב נאך אסאך אסאך צו שרייבן פון די זאך פון מאכן מיט די הענט און די משכן ווערט אויפגעשטעלט, 'עֲסֹק אַתָּה בְּיָדְךָ וְנִרְאֶה כִּמְקִימוֹ'; דאס איז מיט אלעס, דאס איז מיט שלום בית, דאס איז מיט חינוך הילדים, דאס איז מיט יעדע פרט אין לעבן; מיר קענען גארנישט, מיר דארפן נאר טון וואס דער אייבערשטער זאגט, און דער אייבערשטער העלפט, "וְהוּא נִזְקָף וְקָם מֵאֵלָיו", עס ווערט געטון.

נאך א בחינה, 'עֲסֹק אַתָּה בְּיָדְךָ' מאך מיט די הענט, הייב אויף דיינע הענט צום אייבערשטן מיט תפילה.

איך דארף מקצר זיין, עס איז שוין דער זמן ביי ענק.

א פרייליכן שבת.

בעזרת ה' יתברך - יום ד' פרשת פקודי, ג' אדר ב', שנת תשפ"ד לפרט קטן

לכבוד מיין טייערער ... נרו יאיר, קרית יואל

לאז נישט אפ דיין הייליגע ארבעט פון "הפצה", פארשפרייט צווישן בני הנעורים; בחורים, כולל אינגעלייט – די קונטרסים, גליונות און ספרים פון מוהרא"ש, עצות פון הייליגן רבי'ן, אויך פאר פרויען און מיידלעך.

אויך זאלסטו מאכן א שטורעם צווישן אנשי שלומינו אלע זאלן עוסק זיין אין הפצה, דערצייל פאר די אינגעלייט וואס ארבעטן ביטער שווער און קענען נישט דעקן דעם חודש, דערצייל זיי וואס פאר א שפע מען מאכט דורך הפצה, און די זכותים פון אפראטעווען גאנצע דורות.

קום אין ישיבה, נעם בחורים, מאך א סדר פון גיין הפצה, און וואו מען זאל גיין, שטעל צוזאם חברותות ווער עס זאל גיין מיט וועם, ווייל איך וויל יעדער בחור און יעדער אינגערמאן אשר בשם היכל הקודש יכונה – זאל טון פאר הפצה.

בעזרת ה' יתברך - יום ה' פרשת ויקהל, כ"ז אדר א', שנת תשפ"ד לפרט קטן

לכבוד ... נרו יאיר, קרית ברסלב

איך וויל דיר מחזק זיין זאלסט לערנען מיט דיין כיתה א' אינגל יעדן טאג די עברי וואס דער מלמד שיקט אהיים.

א רחמנות אויף די וואס געבן אוועק די קינדער פאר די ביזנעס, עס גייט אריבער אפאר יאר און מען האט גארנישט, נישט קיין ביזנעס און נישט קיין דורות, די קינדער דארפן נישט די עלטערן, זיי געדענקען גוט ווי אלע יארן זענען זיי גארנישט ווערד געווען, די עלטערן זענען געווען פארנומען מיט די ביזנעס.

איך בעט דיר בכל לשון של בקשה, געב אוועק צייט פאר דיין כיתה א' אינגל, חזר מיט אים די עברי וואס דער מלמד שיקט אהיים; נישט פארהער אים און שלאג אים, נאר חזר מיט אים; יעדע אות וואס ער זאגט גוט - געב אים א גלעט, א שמייכל.

אויך זאלסטו געבן א גוט ווארט פאר דעם מלמד פון דיין זון; וואלסטו געווען איין טאג מלמד - וואלסטו אנדערש געקוקט אויף די מלמדים, אפילו די עלטערן וואס באדאנקען זיך פאר די מלמדים און געבן גוטע ווערטער פאר די מלמדים - ווייסן נישט וואס א מלמד איז.

פרנסה דארף מען ברענגען, מען דארף ארבעטן, אבער פון דיין ביזנעס וועט נישט בלייבן, עס איז אויף כפרת עוונות, מען דארף ארבעטן פאר די זינד; פון דיינע קינדער וועט בלייבן דורות, און אז דו וועסט זיך אפגעבן מיט זיי - וועסטו זען שיינע דורות מיט אסאך נחת.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת ויקהל, כ"ד אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

נאר מיט שחרית מנחה מעריב קען מען האבן עשירות, אן דאווענען די דריי תפילות האט מען גארנישט; חלום נישט פון מצליח זיין אן די דריי תפילות.

זיי שטארק ווי א לייב, ווען עס קומט צו דאווענען – לאז אלעס אפ, לאז אלעס קראכן, שטופ נישט אפ דאס דאווענען פאר גארנישט. נעם אריין דעם אייבערשטן אין דיין ביזנעס, שחרית מנחה מעריב זאל זיין א חלק פון דיין ביזנעס, פון דיין לעבן; וועסטו זייער מצליח זיין.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

איך הער זאגן אז דו גייסט אריבער שווערע דחקות ועניות, דו האסט נישט קיין געלט, האסט נישט קיין הייצונג, דו זיצט מיט דיין משפחה אין די ביטערע פרעסטן, האסט נישט גארנישט.

ליבער ברודער, איך וויל דיר בעטן צוויי זאכן, ערשטנ'ס אז דו ביסט אין אזא מצב – זאלסטו גיין נאך געלט, על פי הלכה מעג מען נעמען צדקה אויב מען האט נישט. גיי ביים דאווענען צווישן די מנינים, בעט ביי אנשי שלומינו צדקה, זאג פארוואס דו גייסט, פארוואס דו נעמסט צאם; פאר הייצונג, פאר דיין משפחה, דיין בעבי זאל נישט פארפרוירן ווערן. צווייטנ'ס, גיי צווישן די גראז, גיי פון הינטער דיין שטוב אין פעלד, הייב אויף דיינע אויגן צום הימל און זאג: "הייליגער באשעפער, געב מיר א מתנת חנם, געב מיר א גענאדע, געב מיר שפע איך זאל קענען מפרנס זיין מיין משפחה, הייליגער באשעפער, איך ווייס אז איך בין שולדיג, צוליב מיינע זינד האב איך נישט פרנסה, איך טו תשובה, איך האב חרטה אויף מיינע זינד, פארגעב מיר, זיי מיר מוחל, איך גיי שוין זיין וואויל, רבונו של עולם האב רחמנות אויף מיר, העלף מיך ארויסגיין פון אלע מיינע חובות".

אויך זאלסטו זיך ווענדן צו האברך אשר בער נרו יאיר, ער איז געשטעלט מטעם די הנהלה צו העלפן אלע אנשי שלומינו קענען באקומען די פראגראמען וואס די שטאט געבט פאר משפחות וואס קענען נישט צאלן הייצונג, עסן וכדומה.

אויך זאלסטו רעדן צו מיין זון הרב אלחנן חיים נרו יאיר, ער האט א צדקה קאסע צו העלפן משפחות נצרכים.

בעזרת ה' יתברך - יום א' פרשת ויקהל, כ"ג אדר א', שנת תשפ"ד לפרט קטן

לכבוד מיין טייערער ... נרו יאיר, קרית ברסלב

שטארק זיך מיט דיין הייליגע ארבעט, מיטן גיין פארשפרייטן די ספרים און קונטרסים וואס מוהרא"ש האט געשריבן; עצות און שכל פון הייליגן רבי'ן וואס איז מחי' ומחזק די גאנצע וועלט.

די וואס גייען הפצה – די האבן אלעס, סיי די וועלט און סיי יענע וועלט, סיי פרנסה בשפע, סיי די זכותים זענען זייער גרויס, מען איז מתקן אלע פגמים, עס איז א תיקון גמור אויף פגם הברית רחמנא לצלן, און מען איז מקרב די גאולה שלימה.

יעצט קומט די ווארעמע טעג, דארף מען אסאך חיזוק אויף די אויגן; זאלסטו נעמען די קונטרסים חיזוק פאר די אויגן, סיי אין אידיש, לשון הקודש און אזוי ווייטער.

האלט חשבון וויפיל שעה דו ביסט עוסק אין הפצה, און ווען מיר וועלן זיין ראש השנה ביים רבי'ן – זאלסטו דאס זאגן דעם רבי'ן.

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן

לכבוד מיין טייערער ... נרו יאיר

"ארבעטן ארבעט מען פאר די עבירות, און געלט געבט דער אייבערשטער אומזיסט", אזוי האט דער רבי געזאגט; געלט האט מען נישט מער אויב מען האט נישט קיין קאנקורענט, ממילא דארף דיר נישט שטערן אז האברך ... טוט אויך וואס דו טוסט, ווייל ער קען דיר נישט צונעמען קיין איין פרוטה.

טייערע ברודער, עס העלפט נישט נאכלויפן דעם דאלער. חכמינו זכרונם לברכה זאגן (עירובין יג:): "כל הדוחק את השעה" זאגט רש"י: "מתיגע להעשיר", מען לויפט נאך די געלט, "שעה דוחקתו", ווערט מען צעדרוקט, "וכל הנדחה מפני שעה", און דער וואס גלייבט אז דער אייבערשטער געבט פרנסה, און מען ארבעט פאר די עבירות, "שעה עומדת לו", וועט ער זייער מצליח זיין.

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן

לכבוד מיין טייערער ... נרו יאיר, קרית יואל

זייער גוט האסטו געטון אז דו ביסט אוועק געגאנגען פון די ארבעט צוליב דעם וואס מען רעדט ניבול פה רחמנא לצלן, געוואלד און געשריגן, מען באקט די הייליגע מצה און מען רעדט ניבול פה ביים וועלגערן, רעדלען די הייליגע מצה. א וואונדער אז קיינער זאגט נישט גארנישט, מען פארקויפט די מצות אלס "מצה שמורה". דער הייליגער רבי זאגט: "מצה שמורה איז שמירת הברית, שמירת המח", דער רבי זאגט (לקוטי מוהר"ן חלק א, סימן ה) חמץ איז: "קּוֹל פָּגוּם, חָכְמָה פְּגוּמָה", רעדן און טראכטן שמוציג, און מצה איז: "קוֹל טוֹב, חָכְמָה טוֹבָה".

האב נישט קיין דאגות, זארג נישט, וועסט טרעפן א גרינגע פרנסה און א ריינע פרנסה.

יעצט אז דו פארציילסט מיר וואס גייט פאר ביי די מצה בעקעריי, ווי מען רעדט ביי די הייליגע מצות ניבול פה, וויל איך אזוי שטארק האבן די ברסלב'ע מצה בעקעריי, וואו מען רעדט נאר פון אמונה, און מעשיות פון תפילה, און מען איז זיך מתבודד.

בעזרת ה' יתברך - יום ג' פרשת כי תשא, י"ח אדר א', שנת תשפ"ד לפרט קטן

לכבוד מיין טייערער ... נרו יאיר

דארפסט יעצט א גרויסע נס אין דיינע געשעפטן, ווען אלע טענענטס נעמען צאם קעגן דיר, די בעסטע זאך איז, נעם אריין דעם באשעפער אין די געשעפט; זאלסט געבן צדקה, אויך זאלסטו אלעס אפלאזן ווען עס קומט די צייט צו דאווענען שחרית מנחה מעריב, גיי אין שול, פארמאך דעם טעלעפאן און רעד צום גרויסן באשעפער, בעט אים ער זאל דיר העלפן.

אויך אין שטוב זאלסטו נישט האבן דיין טעלעפאן, דיינע קינדער וואקסן אויף און מען קען זיי חס ושלום פארלירן מיט א בלינק מיט די אויג.

בעזרת ה' יתברך - יום ב' פרשת כי תשא, י"ז אדר א', שנת תשפ"ד לפרט קטן

לכבוד מיין טייערער ליבער ... נרו יאיר

איך וויל דיר מחזק זיין זאלסט געדענקען צו געבן ליבשאפט אין שטוב, דיין ווייב ווארט פאר דיין גוט ווארט, זי לעבט אויף ווען דו קוקסט אויף איר און דו געבסט איר די געפיל מיט די גוט ווארט וכו'.

איך בין זיכער, אז דו וועסט געדענקען פון איר, דו וועסט איר געבן ליבשאפט – וועט דיר ווערן גרינגער מיט פרנסה. דער רבי זאגט (לקוטי מוהר"ן חלק א', סימן סט): "עִקַּר הַמָּמוֹן שֶׁל הָאָדָם בָּא לוֹ עַל יְדֵי בַּת זוּגוֹ", די פרנסה קומט בזכות די ווייב; אז דו וועסט געדענקען איר צו געבן ליבשאפט – וועסטו זען ווי עס וועט דיר גרינגער ווערן.

מיין טייערער ליבער ברודער, הויב אן דיין טאג מיט א קליינע שפאציר אויפן פעלד ארום דיין שטוב, מיט תפילות; הויב אן מיט דאנקען און לויבן, אויך זאלסטו בעטן דעם אייבערשטן עס זאל זיין שלום אין שטוב, נחת פון די קינדער, און בעיקר אויף שמחה.

בעזרת ה' יתברך - ערב שבת קודש פרשת תרומה, שובבי"ם, ז' אדר א', שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

דאס וויכטיגסטע איז - דו זאלסט רעדן מיט דיין שותף אפענע דיבורים; זאג אים וואס שטערט דיר, זאג אים דיינע געפילן. דערצייל אים אז דו ווייסט ער האט געעפנט נאך א ביזנעס, און זייט דעמאלט איז זיין קאפ נישט ביי די אלטע ביזנעס, און דו אלס געלט שותף - ביסטו זייער נישט רואיג, דו שפירסט אז ער טוט נישט פאר די ביזנעס.

עס איז זייער וויכטיג צו זיין אפן, ווייל אין איין רגע קען אויפפלאמען א פייער און ווערן א מחלוקת; קודם האט מען אין הארץ עפעס ווייטאג, און אז מען רעדט נישט הויבט מען אן בויען בנינים, ביז עס ווערט א מחלוקת און דעמאלט ליידן אלע.

ועל כולם זאלסטו גיין התבודדות, גיי אין א ווינקל וואו קיינער זעט נישט און קיינער הערט נישט, אדער אין דיין קאר אדער אין דיין אפיס, און וויין זיך אויס צום אייבערשטן, זאג: "הייליגער באשעפער העלף מיר, איך בין אריין אין א געשעפט און אינוועסטירט מיליאנען דאלער און איך בין נישט רואיג, העלף מיר איך זאל האבן הצלחה". דערצייל דעם אייבערשטן די שותפות וואס דו האסט געמאכט מיט אונזער מוסד, אז יעדע דאלער וואס מען איז מרוויח - גייט כך וכך פראצענט פאר די מוסד, דערצייל אלעס, דערצייל אז דו ביסט נישט רואיג און דו קענסט נישט שלאפן. איך זאג דיר צו, מיט התבודדות וועט אלעס זיין אזוי גוט און אזוי זיס, דו וועסט ארום גיין רואיג, דו וועסט קענען שלאפן און עס וועט זיין גרויס הצלחה.

איך אלס שותף - טו יא מיינע פליכטן, איך בעט פאר דיר און פאר דיין הצלחה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת תרומה, שובבי"ם, ד' אדר א', שנת תשפ"ד לפרט קטן

לכבוד ... נרו יאיר, מאנסי

איך האב ערהאלטן דיין בריוו.

מעשר געלט געבט מען פאר צדקה, נישטא אזא זאך נעמען מעשר פאר זיך; אז מען נעמט מעשר געלט פאר זיך - פארלירט מען פון די שפע.

אינטערעסאנט, דאס איז די ערשטע זאך וואס מען וויל שניידן; ווען מען שפירט א צמצום, טראכט מען די ערשטע זאך מען גייט שניידן פון די צדקה, מען גייט אויסארבעטן צו נעמען די מעשר פאר דאס און פאר יענץ... אז מען איז מצומצם אין די פרנסה - דארף מען די ערשטע זאך תשובה טון, קומען אין שול דאווענען דריי מאל א טאג מיט מנין, און זיך פירן מיט דרך ארץ ביים דאווענען, נישט רעדן מיט קיינעם ביים דאווענען, נישט נוצן דעם טעלעפאן ביים דאווענען.

אז דו קענסט זיך נישט דעקן - זאלסטו נישט אויפהערן געבן צדקה; געב דיין מעשר פאר צדקה, און א ברסלב'ער חסיד מיט שכל געבט זיין מעשר פאר אייביגע צדקות, פאר דרוקן דעם הייליגן רבינ'ס ספרים, פארשפרייטן די זיסע ליכטיגקייט פאר די וועלט. אז מען מאכט זיך א חשבון, ווי אזוי וואלטן מיר אויסגעקוקט אנעם רבי'ן און ווי אזוי זענען מיר מקורב געווארן, נאר דורך די הייליגע ספרים; דארפן מיר מקרב זיין די גאנצע וועלט צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת תרומה, שובבי"ם, ד' אדר א', שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

דו פרעגסט אויב איך ווער נערוועז יעדעס מאל דו שרייבסט מיר א מעסעדזש וועגן הפצה; וואס זאל איך דיר זאגן, די סארט מעסעדזש מאכט נאר פרייליך, יעדעס מאל דו שרייבסט מיר 'איך בין געגאנגען היינט הפצה פאר כך וכך שעה, עס איז געגאנגען כך וכך ספרים, און געמאכט כך וכך געלט' - געבסטו מיר חיות.

א שאד די וואס ארבעטן פון עלות השחר ביז צאת הנשמה און מוטשען זיך אזוי שטארק צו ברענגען פרנסה; וואלטן זיי ווען געגאנגען הפצה וואלטן זיי געמאכט גאלד, ווייל ווער עס גייט הפצה האט גרויס שפע.

שרייב מיר ווייטער אלעס וועגן הפצה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת תרומה, שובבי"ם, ד' אדר א', שנת תשפ"ד לפרט קטן

לכבוד ... נרו יאיר, קרית ברסלב

איך האב זיך זייער פארעקלט ווען איך האב געכאפט א היטש מיט דיין קאר. איך קען נישט פארשטיין ווי קען זיין אן ערליכער איד זאל זיך אזוי פירן, אזוי שמוציג, אזוי פארשמירט, די קאר איז פול מיט באטלעך עסן, בעגס שמוץ, און דו ביסט דאך א תלמיד היכל הקודש; טאר דאס נישט זיין, מען דארף זיין ריין און צוזאמגענומען. אין א קאר עסט מען נישט, א קאר איז נישט קיין סטארידזש וואו מען האלט זאכן.

איך בין ממש פארשעמט אז די תלמידים פירן זיך אזוי, אפשר איז דאס פארשמירטע קאר א פלאץ פארן שר פון עניות, 'נבל', וואס האט ליב פארשמירטע פלעצער און ברענגט עניות (פסחים קיא:). אזוי ווי דער רבי זאגט (ספר המדות אות ממון, סימן לא): "מְאִיסוּתָא דְבֵיתָא", א פארשמירטע שמוציגע הויז, "מֵבִיא לִידֵי עֲנִיּוּת", ברענגט ארעמקייט.

האלט ריין דיין קאר, האלטן ריין דיינע בגדים, ווארף אוועק אלע זעקלעך, דעקלעך און האלטערס, גיי אנגעטון ריין; וועסטו פארטרייבן די נישט גוטער רוח 'נבל', און דו וועסט האבן גרויס שפע.

בעזרת ה' יתברך - ערב שבת קודש פרשת משפטים, שובבי"ם, א' דר"ח אדר, שנת תשפ"ד לפ"ק

לכבוד ... נרו יאיר

נעכטן בין איך געפארן געבן די ליל שישי שיעור אין לעיקוואד, מיר האבן געגעסן א סעודה לכבוד ראש חודש אדר, און דער אייבערשטער האט געגעבן גוטע דיבורים, מען האט גערעדט פון רבי'ן, און אז מען רעדט פון רבי'ן - טוען אלע תשובה; דער רבי האט געזאגט: "איך האב גע'פועל'ט ביים אייבערשטן, ווען מען וועט רעדן פון מיר וועט מען האבן א הרהור תשובה, מען וועט ווערן כקטן שנולד".

מיר האבן געלערנט די תורה פון "וְאֵלֶּה הַמִּשְׁפָּטִים אֲשֶׁר תָּשִׂים לִפְנֵיהֶם", (לקוטי מוהר"ן חלק א', סימן י'), דער רבי זאגט: "כְּשֶׁיֵּשׁ, חַס וְשָׁלוֹם, דִּינִים עַל יִשְׂרָאֵל, עַל יְדֵי רִקּוּדִים וְהַמְחָאַת כַּף אֶל כַּף נַעֲשֶׂה הַמְתָּקַת הַדִּינִין", וואס טוט מען ווען עס איז דא דינים? דורך טאנצן און פאטשן גייען אוועק די דינים, אז מען איז פרייליך גייט מען ארויס פון אלע צרות; די שלום בית ווערט גוט, די פרנסה ווערט ברייט, און בעיקר - מען קען גרינגער באזיגן דעם יצר הרע ווען מען איז פרייליך, ווען מען פאטשט און מען טאנצט.

די וואך שבת וועל איך נישט זיין אין וויליאמסבורג, איך פאר אוועק שאפן געלט פאר די מלמדים, איך האף דו ביסט מכיר טובה אז איך העלף דיר, איך פאר אוועק פון שטוב אנשטאט דיר; עס וואלט ווען געדארפט זיין אז דו זאלסט זיין דער וואס איז פארנומען זוכן א וועג פאר דיינע קינדער זיי זאלן האבן א מלמד מיט א לערערין וכו', למעשה פָּארע איך זיך פאר דיר; מיט אלע כוחות שאף איך געלט פאר דיינע קינדער, זאלן האבן מלמדים און לערערינס.

זיי פרייליך, זיי זיך מוסר נפש אויף דעם, בפרט אין שבת קודש; שבת דארף מען זיין נאר פרייליך, קריג זיך נישט מיט קיינעם, בפרט אין שטוב זאל זיין נאר שלום.

א פרייליכן שבת, א גוטן חודש.

בעזרת ה' יתברך - יום ב' פרשת בשלח, שובבי"ם, י"ב שבט, שנת תשפ"ד לפרט קטן

לכבוד ... נרו יאיר

איך האב ערהאלטן דיין בריוו.

קויף זיך א הויז, א שאד אוועקצאלן רענט, ענדערש קויפן און זיך אליינס צאלן די רענט.

יעדער קען האבן אן אייגענע הויז, מען דארף נישט קיין גרויסע געלטער צו האבן אן אייגענע הויז; מען דארף איין זאך, א שטארקע ווילן; מיט א שטארקע ווילן קען מען דאס באווייזן.

זיי נישט קיין בטלן, שפרינג אריין אין קויפן א הויז. מוהרא"ש זכותו יגן עלינו פלעגט זאגן פאר די תלמידים זיי זאלן קויפן הייזער, און ווען מען האט געפרעגט ווי אזוי מען באווייזט דאס, מען האט נישט קיין געלט? פלעגט מוהרא"ש זאגן די גראם: "אביסל בארגט מען, אביסל זארגט מען, ביז מען האט א הויז".

דאווען מיט מנין און בענטש ברכת המזון אין א סידור מיט שמחה - וועסטו זוכה זיין צו האבן גרויס שפע.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת וארא, שובבי"ם, כ"ט טבת, שנת תשפ"ד לפרט קטן

מרת ... תחי'

איך האב ערהאלטן אייער בריוו.

בנוגע וכו'; מאכט זיך א גדר נישט צו קוקן אייער בעל הבית אין פנים, נאר ווען איר דארפט אדורכרעדן מיט אים זאכן פון די ביזנעס – זאלט איר אראפקוקן און בשום אין אופן קוקן אויף אים; ביי פרויען איז אויך דא די מצוה פון זיך היטן די אויגן.

וואס פעלט אייך אויס צו גיין ארבעטן? איר זאגט דאך אליינס אז אייער שלום בית איז נישט ווי אמאל, איר טראכט פונעם בעל הבית מער ווי פון אייער מאן השם ישמרינו; ענדערש בלייבט אין שטוב און טראכטס פונעם אייבערשטן און פון אייער מאן.

אז איר וועט זיך מאכן די גדר פון נישט קוקן אין אפיס דעם בעל הבית אין פנים - וועט צוריק ווערן אייער שלום בית אזוי ווי אמאל; אייער מאן וועט שיינען פאר אייך מיט אלע חן פון דער וועלט.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך - יום ג' פרשת וארא, שובבי"ם, כ"ח טבת, שנת תשפ"ד לפרט קטן

לכבוד מיין טייערער ... נרו יאיר

געב זיך אכטונג נישט צו זיין פריינדליך מיט די סעקריטערי ביי דיר אין אפיס. זאלסט איר נישט קוקן אין פנים, עס איז אסור צו קוקן א פרוי אין פנים (שלחן ערוך אבן העזר סימן כא, סעיף א), און זיכער נישט ווען מען זיצט אינאיינעם אין אפיס; עס קען זיין דו וועסט אלעס פארלירן רחמנא לצלן.

קוק נישט אין פנים, קוק אראפ, פיר זיך ערליך מיט יראת שמים; דער אייבערשטער איז אין אפיס און זעט אלעס וואס דו טוסט.

מאך זיך א חשבון אויב דו זאלסט ווייטער האבן די אפיס מיט די סעקריטערי און פארשווארצט ווערן בזה ובבא, אדער פארמאכן די געשעפט און האבן גן עדן בזה ובבא. גיי התבודדות און וויין צום אייבערשטן: "הייליגער באשעפער וואס איז געשען מיט מיר? איך בין היימיש מיט פרעמדע, הייליגער באשעפער ראטעווע מיך".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת וארא, שובבי"ם, כ"ח טבת, שנת תשפ"ד לפרט קטן

לכבוד ... נרו יאיר

היט דיינע אויגן, קוק נישט קיין עבירות, קוק נישט קיין מאוויס, קוק נישט אויף פרעמדע. מוהרא"ש זאגט, דאס איז די בעסטע סגולה פאר פרנסה בשפע, מוהרא"ש טייטשט דעם פסוק (תהלים קמה, טו): "עֵינֵי כֹל אֵלֶיךָ יְשַׂבֵּרוּ, וְאַתָּה נוֹתֵן לָהֶם אֶת אָכְלָם בְּעִתּוֹ", 'יְשַׂבֵּרוּ' – קען מען ליינען מיט א שׁין: "עֵינֵי כֹל אֵלֶיךָ 'יְשַׁבֵּרוּ'", אז מען צעברעכט די אויגן, מען קוקט נישט קיין עבירות - "וְאַתָּה נוֹתֵן לָהֶם אֶת אָכְלָם בְּעִתּוֹ", וועט דער אייבערשטער געבן פרנסה אין צייט.

אז דו וועסט היטן די אויגן; נישט קוקן קיין עבירות, נישט קוקן מאוויס, קליפס און בילדער פון פרעמדע, אויך ביי די ארבעט מיט די סעקריטעריס פרויען וועסטו נישט קוקן - וועסטו זוכה זיין צו פרנסה בריווח; ווייל ווען מען היט נישט די אויגן - קומט מען נאכדעם צו פוגם זיין בברית, וואס דאס ברענגט אלע צרות אויפן מענטש; דאס ברענגט ארעמקייט. אזוי ווי דער הייליגער זוהר זאגט (פנחס, רמד:): "מַאן דִּמְזַלְזֵל בְּפִרוּרִין דְּנַהֲמָא, עֲנִיּוּתָא רָדִיף אֲבַּתְרֵיהּ", ווער עס איז ווארפט אראפ ברעקלעך פון ברויט וועט זיין אן ארעמאן, "כָּל שֶׁכֵּן מַאן דִּמְזַלְזֵל בְּפִירוּרִין דְּמוֹחָא", איז דאך זיכער אז אויב מען איז מוציא זרע לבטלה רחמנא לצלן - פארלירט מען דאס מזל און מען ווערט אן ארעמאן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת וארא, שובבי"ם, ראש חודש שבט, שנת תשפ"ד לפרט קטן

לכבוד מיין טייערער ... נרו יאיר, קרית ברסלב

אז דו פרעגסט מיר וועגן די ארבעט; ענדערש זאלסטו בלייבן אן ארבעט ווי צו ארבעטן דארט, עס איז עקלדיג צו הערן אזא זאך, א מיידל זאל מענידזשן אינגעלייט; זאג זיך אפ פון די ארבעט.

דו וועסט זיכער טרעפן א כשר'ע ארבעט, א ריינע פלאץ מיט יראת שמים. פאלג מיך, גיי שוין אוועק פון די ארבעט.

די אלע אמעריקאנע אידן וואס האבן פארלוירן זייער דזשאב צוליב שמירת שבת – די האבן איבערגעלאזט דורות נאמנים לשם, אזוי אויך מיט די היינטיגע נסיונות; די וואס קוקן נישט אויף גארנישט, זיי זענען גרייט צו פארלירן פרנסה אבי צו בלייבן ערליך – נאר פון זיי וועט איבערבלייבן דורות נאמנים לשם.

בעזרת ה' יתברך - יום ג' פרשת וארא, שובבי"ם, כ"ח טבת, שנת תשפ"ד לפרט קטן

לכבוד מיין טייערער ... נרו יאיר

יעצט ווען דו האסט נישט קיין פרנסה – דארפסטו נאכמער אכטונג געבן די וועג ווי דו רעדסט צו דיין ווייב, עס זאל זיין מיט די גרעסטע מאס כבוד און דרך ארץ. ווייל דער הייליגער רבי זאגט (לקוטי מוהר"ן חלק א', סימן סט): "כִּי עִקַּר הַמָּמוֹן שֶׁל הָאָדָם בָּא לוֹ עַל יְדֵי בַּת זוּגוֹ", די געלט קומען דורך די ווייב, "כִּי עַל יְדֵי אוֹר נַפְשָׁהּ, מִזֶּה בָּא לוֹ הַמָּמוֹן"; דארפסטו זייער אכטונג געבן איר מכבד צו זיין, אזוי וועסטו האבן פרנסה.

ווייז נישט ארויס פאר איר קיין שום דאגות חס ושלום, זיי קלוג נישט צו פארלירן דיין שטוב, ווייל אסאך מאל קען פאסירן אז מען פארלירט די פרנסה און מען שטארקט זיך נישט – פארלירט מען נאך זאכן.

זיי שטארק מיט תורה ותפילה, און דער אייבערשטער זאל דיר געבן פרנסה בריווח.

בעזרת ה' יתברך - יום א' פרשת וארא, שובבי"ם, כ"ו טבת, שנת תשפ"ד לפרט קטן

לכבוד מיין טייערער ... נרו יאיר, קרית יואל

האסט מיך געפרעגט אויב דו זאלסט זיך קויפן א סמארטפאון, עס וועט דיר זיין גרינגער אין די ביזנעס.

קוק צוריק, די אלע יארן האסטו פארדינט, האסט אהיים געברענגט פרנסה – אן א טעלעפאן, זאלסטו בלייבן אזוי, און דו וועסט זען ניסים. דער הייליגער רבי זאגט (ספר המדות אות ישועה, סימן ז): "אֵין עוֹשִׂין נֵס לְנוֹאֵף", ניסים קומען נאר אז מען איז הייליג; דארפסט נישט קיין טעלעפאן, דארפסט נישט פרישע נסיונות, גענוג די ביטערע נסיונות וואס מיר האבן, וואס דארפסטו זיך ברענגען פרישע תאוות ניאוף... דער רבי זאגט (שם אות ניאוף, סימן ט): "תַּאֲוַת נִאוּף אֵינוֹ נִרְחָק מִן הָאָדָם אֶלָּא עַל יְדֵי הַרְחָקַת רְאוּת הָעַיִן וְהַמַּחֲשָׁבָה", דורך היטן די אויגן און די געדאנקען – קען מען זוכה זיין צו זיין הייליג.

בעט דעם אייבערשטן אז דו און דיינע דורות זאלן קענען ביישטיין די שווערע חבלי משיח.

בעזרת ה' יתברך - יום א' פרשת שמות, שובבי"ם, י"ט טבת, שנת תשפ"ד לפרט קטן

לכבוד ... נרו יאיר

עס איז נישט אויסגעהאלטן די וועג פון נעמען א מיידל זאל מענידזשן אינגעלייט, עס שמעקט פון ניאוף.

אדער נעמסטו אוועק די מיידל פון מיינע אינגעלייט, אדער זאג איך פאר מיינע תלמידים נישט צוריק צו גיין צו די ארבעט.