בריוון פונעם ראש ישיבה שליט"א

#72 - דו זאלסט קיינמאל נישט ענדערן דיין חסידי'שע לבוש
שידוכים, מדות טובות, בארד און פאות, לבוש

בעזרת ה' יתברך


יום ג' פרשת ואתחנן, י"ב מנחם-אב, שנת תשע"ט לפרט קטן


 


לכבוד מיין טייערער ליבער תלמיד, הבחור ... נרו יאיר.


איך האב ערהאלטן דיין נדבה פאר די ישיבה, יישר כח.


איך דאנק דיר זייער פאר'ן מיר העלפן אזוי געטריי. אזוי אויך בין איך זייער איבערגענומען פון דיינע גוטע מידות, דו גרויסט זיך נישט אויף קיינעם, דו העלפסט אזוי סאך און דו טוסט דאס אן טרעטן אויף אנדערע בחורים.


איך בעט דיר זייער דו זאלסט קיינמאל נישט ענדערן דיין חסידי'שע לבוש; גיי נישט נאך די וואס טוישן זיך – היינט דאס און מארגן עפעס אנדערש, בלייב פעלזן פעסט מיט די חסידי'שע קליידער. געדענק וואס דער הייליגער רבי האט געזאגט פאר'ן בן מלך וואס איז געווארן אן אינדיק: "מען קען בלייבן אין אינדיק אפילו מען איז אנגעטון"; דאס זעלבע זאג איך דיר: "מען קען זיין א פרייליכער בחור, הנאה האבן פון אלע תענוגים אויף די וועלט און בלייבן מיט די בארד און פיאות, מיט חסידי'שע העמדער און הויזן וכו', וכו'".


בית פיגא תלמידות וועלן נאר נעמען בחורים פון ישיבה וואס ווילן אויפשטעלן א חסידי'שע שטוב, גיין אנגעטון חסידי'ש וכו', וכו'.


בקרוב וועסטו זוכה זיין צו טרעפן דיין שידוך.

#71 - דאס אויסזען פונעם מענטש איז נישט אלעס
שידוכים

בעזרת ה' יתברך


יום ג' פרשת ואתחנן, י"ב מנחם-אב, שנת תשע"ט לפרט קטן


 


לכבוד הכלה ... תחי'.


איך האב ערהאלטן דיין בריוו.


מזל טוב פאר דיין שידוך! דער אייבערשטער זאל העלפן זאלסט אויפשטעלן א בית נאמן בישראל מיט ערליכע אידישע דורות לשם ולתפארת.


וואס הייסט דו ביסט ברוגז פאר'ן ענטפערן אויפן שידוך "יא"? אז דו האסט זיך מיט אים געטראפן איינמאל און נאכאמאל און דו האסט מיט דיין אייגענע ווילן געענטפערט "יא", און מען האט געמאכט א לחיים, - וואס איז שייך יעצט צו זאגן אז דו ווילסט נישט ווייטער גיין מיט'ן שידוך וועגן זיין אויסזען, אז ער זעט אויס צו א גרויסער חאניאק וכדומה?


איך וויל וויסן וואס איז פשט פון ענטפערן "יא" און א מינוט נאכדעם זאגן "ניין"; דו ברענגסט נישט ארויס אינעם בריוו קיין שום סיבה פאר'ן וועלן אפלאזן א שידוך, סתם צו זאגן אז ער איז א חאניאק וכו', דאס האסטו דאך געזען פאראויס און דאך ביסטו איינגעגאנגען אויף דעם.


עס איז זייער א שווערע שאלה צו ענטפערן, איך וואלט ווען געדארפט הערן מער פרטים פון דיר.


פון אויסנווייניג זאג איך דיר אז נישט אלעס איז דאס אויסזען פונעם מענטש. ווען דער אייבערשטער האט געזאגט פאר שמואל הנביא ער זאל גיין זאלבן א קעניג פאר די אידן - איינער פון ישי'ס קינדער, און ער האט געזען אליאב - ישי'ס עלסטער קינד, האט ער געטראכט צו זיך: 'ער איז זיכער דער קומענדיגע קעניג', ווייל אליאב איז געווען א שיינער מענטש און א געבויטע געשטאלט, שטייט דארט אז דער איבערשטער האט געזאגט פאר שמואל הנביא (שמואל-א טז, ז): "אַל תַּבֵּט אֶל מַרְאֵהוּ", קוק נישט אויף זיין שיינע אויסזען, "וְאֶל גְּבֹהַּ קוֹמָתוֹ", און קוק נישט אויף זיין שיינע געבויטע געשטאלט, "כִּי מְאַסְתִּיהוּ", ווייל איך האב אים פאר'מיאוס'ט צו זיין קעניג.


חכמינו זכרונם לברכה דערציילן אויף אים אז ער איז געווען א כעסן (פסחים סו:), פון אינדרויסן האט מען דאס נישט געזען; פון אינדערויסן האט ער אויסגעזען ווי דער שענסטער בחור. האט דער אייבערשטער געזאגט: "כִּי לֹא אֲשֶׁר יִרְאֶה הָאָדָם, כִּי הָאָדָם יִרְאֶה לַעֵינַיִם וַה' יִרְאֶה לַלֵּבָב", א מענטש זעט אנדערש, דער מענטש זעט נאר וואס די אויגן זעען אבער דער אייבערשטער זעט די הארץ.


אז דיינע עלטערן האבן זיך גוט נאכגעפרעגט אויף דעם בחור און זיי זאגן אז ער איז א גאלדענער בחור און דו אליינס ביסט געזיצן מיט אים אפאר שעה און דו האסט מסכים געווען צום שידוך, איז וואס איז יעצט פלוצלינג געשען אז דו עקלסט זיך פון אים?


איך ווארט דאס אויסצושמועסן מיט אייך.

#70 - עס איז נישט דא נאך אזא צער ווי די צער פון א בחור
קדושה, בחור, שידוכים, תפלות אויף אידיש

בעזרת ה' יתברך


יום ב' פרשת דברים, ד' מנחם-אב, שנת תשע"ט לפרט קטן


 


לכבוד הבחור ... נרו יאיר, תלמיד ישיבת תפארת התורה.


איך האב ערהאלטן דיין בריוו.


איך בעט דיר זייער, דראפע דיר און דערהאלט זיך מיט אלע דיינע כוחות. ווער נישט צעבראכן ווען דו זעסט ווי עס גייט אריבער א יאר נאך א יאר און דו טרעפסט נישט דיין שידוך; דו האסט שוין געמיינט פון לאנג צוריק אז דו וועסט שוין זיין חתונה געהאט וכו'.


קיינער פארשטייט נישט די צער וואס א בחור גייט אריבער, "עס איז נישט דא נאך אזא צער ווי די צער פון א בחור"; ווייל מען האלט אין איין אראפ פאלן אין פגם הברית אין הוצאת זרע לבטלה רחמנא לצלן וואס דאס מאכט נאכדעם זייער בעצבות און מרה שחורה'דיג, און וויפיל מען וויל ארויס קריכן פון דעם האלט מען אין איין צוריק פאלן.


איך בעט דיר זייער, נעם אריין אין דיר די אמונה. וויסן זאלסטו אז דער אייבערשטער האט דיר אנגעגרייט א שידוך נאך פון פאר דו ביסט געבוירן געווארן, און דו וועסט געהאלפן ווערן בקרוב ממש; דו זאלסט ווייטער טון אלע סגולות וואס די הייליגע צדיקים האבן אונז געגעבן, בפרט די סגולות וואס דער רבי זאגט - זאלסטו מקיים זיין בתמימות ופשיטות.


זע צו זאגן יעדן טאג די "קָרְבָּנוֹת הַנְּשִׂיאִים"; דער רבי זאגט (ספר המידות, אות חיתון, סימן ו): "מִי שֶׁקָּשֶׁה לוֹ לִמְצֹא זִוּוּגוֹ, יַרְגִּיל אֶת עַצְמוֹ לִקְרוֹת בְּקָרְבְּנוֹת הַנְּשִׂיאִים", וועם עס גייט שווער צו טרעפן א שידוך, זאל ער זאגן אסאך די 'קָרְבָּנוֹת הַנְּשִׂיאִים'; (די קריאה וואס מען ליינט חנוכה, פון (במדבר ז, א): "וַיְהִי בְּיוֹם כַּלּוֹת משֶׁה לְהָקִים אֶת הַמִּשְׁכָּן", ביזן סוף. דאס איז געדרוקט אין יעדע סידור ביי קריאת התורה - קריאה לחנוכה). נאכדעם ווען מען ענדיגט זאגן די 'קָרְבָּנוֹת הַנְּשִׂיאִים', בעט מען דעם אייבערשטן - יעדער איינער אויף זיין שפראך:


"רבונו של עולם! העלף מיר איך זאל זוכה זיין צו טרעפן מיין זיווג בזכות וואס איך האב געפאלגט וואס דער הייליגער רבי זאגט, אז מען זאל זאגן 'קָרְבָּנוֹת הַנְּשִׂיאִים'; העלף מיר באשעפער איך זאל שוין זוכה זיין צו טרעפן מיין זיווג. עס איז מיר אזוי שווער צו זיין א פלג גוף, עס איז מיר זייער שווער צו זיין ערליך איך האלט אין איין אראפפאלן אין די עבירה פון פגם הברית הוצאת זרע לבטלה, דאס מאכט מיר אזוי צובראכן און צושאסן איך וויל אזוי שטארק זיין פרייליך און עס גייט מירנישט עס מיעט זיך צו עצבות ווען איך בין אליינס; אייבערשטער, איך וויל חתונה האבן וכו' וכו'".


שטארק זיך טייערער ... נרו יאיר; דו מאכסט א קידוש השם מיט דיין התנהגות, דיינע מידות און דיין התנהגות איז אויסנאם. איך בעט דיר זיי נישט צעבראכן, נאך אביסל וועט קומען דיין ישועה.


דאנק דעם אייבערשטן אז דו ווייסט פון רבי'ן און פון זיינע תלמידים וואס זענען אונז מחזק, מעודד ומשמח. בפרט אז מיר ווייסן פון מוהרא"ש וואס האט זיך זיין גאנץ לעבן מוסר נפש געווען פאר מיידלעך און בחורים, "מיין זאך איז בחורים" - פלעגט מוהרא"ש זאגן; "איך בין אראפ געקומען אויף די וועלט אויפצוהייבן בחורים און זיי ווייזן א וועג ווי אזוי זיך צו דערהאלטן". מוהרא"ש פלעגט זאגן פאר בחורים זיי זאלן טענה'ען יעדן טאג צום אייבערשטן: "רבונו של עולם! איך וויל נישט זינדיגן אין פגם הברית - הוצאת זרע לבטלה; רבונו של עולם! איך וויל זיין אפגעהיטן פון עבירות; וואס זאל איך טון אז איך פאל אראפ נאכאמאל און נאכאמאל, איך וויל נישט רעדן קיין ניבול פה, איך ווייס אז עס איז נישט גוט צו רעדן די רייד, העלף מיר אייבערשטער איך זאל זיך היטן פון רעדן ניבול פה".


שרייב מיר נאך בריוו וועסטו מיר מחי' זיין.


דער אייבערשטער זאל העלפן זאלסט מצליח זיין אין אלע דיינע וועגן.

#69 - מ'טראגט אן א שידוך וואס איז קעגן ברסלב
חסידות ברסלב, שידוכים

בעזרת ה' יתברך


יום ג' פרשת מטות-מסעי, כ"ז תמוז, שנת תשע"ט לפרט קטן


 


... תחי'.


איך האב ערהאלטן אייער בריוו.


מען דארף זיך נישט עקשנ'ען דוקא פאר א ברסלב'ער בחור; דער עיקר דארף מען קוקן אויב דער בחור איז א ירא שמים און א בעל מידות טובות, אז דער מאן איז א ירא שמים און א בעל מידות טובות און די ווייב איז א ברסלב'ע איז ממילא די גאנצע שטוב א ברסלב'ע שטוב.


בנוגע דאס וואס מען טראגט אייך אן א בחור מיט אלע מעלות אבער מען זאגט אייך אז דער בחור איז ממש פייער אנטקעגן ברסלב, און איר ווילט וויסן וואס צו טון ווייל אייער גאנצע לעבן איז דער רבי; איך בין ברור כשמש אז דער בחור ווייסט נישט וואס ברסלב איז, מן הסתם איז ער נישט קיין חסיד פון די אלע וואס מאכן א שלעכטע נאמען אויף ברסלב, ווייל אויף ברסלב אליינס קריגט קיינער נישט. הכל מודים אז מען דארף לעבן מיט אמונה, הכל מודים אז מען דארף רעדן צום אייבערשטן, הכל מודים אז מען דארף זיין פרייליך און הכל מודים מען דארף קוקן גוט און דן זיין לכף זכות יעדן איינעם; אז מען לייגט אריין די אלע זאכן אין א קאלקעלעיטער קומט אויס דער סך הכל: "שיטת ברסלב".


גייטס זיך טרעפן מיט'ן בחור, רעדטס מיט אים איין מאל און נאכאמאל - וועט איר זען צי עס איז פאר אייך. איר מעגט אים זאגן אז אייער גאנצע לעבן האט זיך געביטן זייט איר נעמט אייער שכל און הדרכה פון רבי'ן.


איך ווארט צו הערן פון אייך בקרוב א מזל טוב.

#68 - עלטערן האבן שוין לאנג פארגעסן וואס א בחור און א מיידל גייען אריבער
שידוכים, חיזוק פאר מיידלעך, תהלים

בעזרת ה' יתברך


יום ב' פרשת מטות-מסעי, כ"ו תמוז, שנת תשע"ט לפרט קטן


 


... תחי'.


איך האב ערהאלטן אייער בריוו.


איך פריי זיך זייער צו הערן אז איר זענט זיך מחי' ומחזק מיט'ן הייליגן רבינ'ס עצות; דאס דערהאלט אייך אין לעבן נישט אויפצוגעבן.


איך פריי זיך זייער צו הערן אז איר האט זוכה געווען צו מסיים זיין די צוויי אין פערציגסטע מאל תהילים; זייטס ממשיך מיט'ן זאגן יעדן טאג דעם יום תהילים. דער הייליגער רבי זאגט (שיחות הר"ן, סימן צח) אז תהילים איז אזוי ווי א שטעקן אויף וואס א שוואכע מענטש ליינט זיך אן, ווען א מענטש זאגט תהילים באקומט ער א שטארקע בטחון זיך צו פארלאזן אויפן אייבערשטן. אזוי ווי דוד המלך זאגט (תהלים יח, יט): "וַיְהִי ה' לְמִשְׁעָן לִי", דער אייבערשטער איז פאר מיר א אנלאנער, איך פארלאז זיך אויף אים, איך ליג אויף אים.


בנוגע אייער שידוך וכו', איר ווילט וויסן צי איר דארפט עפעס טון ווען אייערע עלטערן זאגן אייך אז איר זאלסט זיך נישט יאגן, זיי טענה'ן אז נאר שוואכע קינדער דארף מען שנעל חתונה מאכן וכו' וכו', איר ווילט וויסן וואס צו טון; עס נישט דא וואס צו טון, ווייל עלטערן האבן שוין לאנג פארגעסן וואס א בחור און א מיידל גייען אריבער טאג נאך טאג; ווי שטארק זיי ווילן חתונה האבן און ווי שווער עס איז צו זיין אליין; ממילא איז נישט שייך וואס צו טון, איר זאלט ווייטער מתפלל זיין, בעטס דעם אייבערשטן יעדן טאג פאר א גוטע שידוך, אן ערליכע שידוך. בעטס פאר ערליכע דורות, וועט אייך דער אייבערשטער העלפן.


שרייבטס מיר ווען עס וועט זיין נאכאמאל א צוזאמקום אין ארץ ישראל וועל איך אייך שרייבן נאך א בריוו.


 

#67 - די אלע בחורים וואס האבן געהאלפן די מוסדות, האבן זייער מצליח געווען
שידוכים, מוסדות, דרייוון

בעזרת ה' יתברך


יום ג' פרשת פנחס, כ' תמוז, שנת תשע"ט לפרט קטן


 


לכבוד מיין טייערער ליבער תלמיד ... נרו יאיר.


איך האב ערהאלטן דיין נדבה פאר די ישיבה, יישר כח.


וואויל איז דיר אז דו נוצט אויס דיינע יונגע יארן מיט לערנען תורה און טון גוטע מעשים, דאס וועט דיר באגלייטן דיין גאנצע לעבן.


צווישן די בחורים אין ישיבה ביסטו אן אויסנאם; דיין צוגעלאזנקייט צו אנדערע בחורים איז עפעס אויסנאם, דו באנעמסט זיך צו אנדערע בחורים מיט א גוטע באנעמונג, נאך אביסל וועסטו טרעפן א גוטע שידוך.


איך וויל דיר בעטן זאלסט מאכן לייסענס צו דרייוון א באס, אזוי וועסטו מיר קענען העלפן טראגן און ברענגען די די קינדער פון תלמוד תורה און בית פיגא. איך האף אז דו וועסטו בקרוב טרעפן דיין שידוך, אבער ביז דו האסט חתונה, ווילאנג דו ביסט אין ישיבה – זאלסטו מיר העלפן.


געב א קוק ווי די אלע בחורים וואס האבן געהאלפן די ישיבה, די חדר, די מיידל סקול; בפרט די וואס האבן געהאלפן מיט טרענספארטעישן – האבן אזוי שיין חתונה געהאט און האבן היינט צוטאגס כל טוב, אייגענע הייזער און ביזנעסער.


לאז מיר וויסן אויב דו נעמסט אן מיין בקשה.


פון דיין ראש ישיבה וואס האט דיר ליב.

#66 - נוץ אויס די קעמפ ווי עס דארף צו זיין
שידוכים, מדות טובות, חיזוק פאר מיידלעך, קעמפ

בעזרת ה' יתברך


יום ד' פרשת בלק, י"ד תמוז, שנת תשע"ט לפרט קטן


 


... תחי', תלמידה בית פיגא ברסלב.


איך האב זייער האנה צו הערן פון אונזער חשוב'ע מנהלת מרת ... תחי'  גוטע גריסן אויף דיר.


אויך הער איך פון אלע שיינע זאכן אויף דיר; פון דיינע גוטע מדות, פון דיין גוט הארץ ווי דו געבסטו אכטונג אויף אנדערע מיידלעך, אויך ער איך אז דו פירסט זיך בצניעות.


וויל איך דיר מחזק זיין דו זאלסט זיך ווייטער פירן אויף דעם שיינעם וועג, אזוי וועסטו זיך איינקויפן די וועלט – דו וועסטו באקומען א גוטע נאמען און טרעפן א גוטע שידוך, און אויך וועסטו זיך איינקויפן יענע וועלט – דו וועסט באקומען שכר פונעם אייבערשטן.


יעצט ווען מיר געפונען זיך אין קעמפ צווישן די גראז און ביימער איז א גוטע צייט צו גיין אביסל שפאצירן צווישן זיי און זינגען צום אייבערשטן. אים דאנקען און לויבן פאר די חסדים וואס ער טוט מיט אונז, בפרט אויף די חסד אז מיר ווייסן פונעם הייליגן רבינ'ס עצות וואס משיח וועט אויסלערנען פאר אלעמען, די עצה פון שמועסן מיט'ן אייבערשטן; אים דערציילן אלעס וואס גייט אריבער און אלעס וואס מען טראכט – פחדים, דמיונות, מחשבות רעות וכו', וכו'.


ווי מער מען געוואוינט זיך צו צו טון די עצה – אלץ מער ווערט דאס לעבן בעסער און זיסער.


זע צו זאגן תהלים יעדן טאג.


פון דיין ראש ישיבה.

#65 - דער שכר פון א שדכן איז זייער זייער גרויס
שידוכים, שדכנים

בעזרת ה' יתברך


יום ג' פרשת בלק, י"ג תמוז, שנת תשע"ט לפרט קטן


 


לכבוד מיין טייערער ... נרו יאיר.


איך האב ערהאלטן דיין נדבה פאר די ישיבה, יישר כח.


דו קענסט זיך נישט פארשטעלן דאס גרויסקייט פון זיין א שדכן, אויספירן נאך א שידוך.


אוודאי איז דאס זייער א שווערע מצוה; מען קען ממש אראפגיין פון זינען ווילאנג מען פירט אויס א שידוך, יעדער צד מיט זיינע דמיונות, יעדער מיינט אז זיין משפחה איז עפעס ווייס איך וואס. אבער דער שכר פון זיין א שדכן איז זייער זייער גרויס.


דערפאר בעט איך דיר זייער זאלסט שוין טון פאר ... נרו יאיר, רוף נאכאמאל אן די עלטערן פון די מיידל און שטופ צו דעם שידוך.


מיר דארפן נאכגיין די וועג פון מוהרא"ש וואס האט זיין גאנץ לעבן עוסק געווען אין שידוכים און אין שלום בית; דורכדעם וועלן מיר זוכה זיין צו אלע ברכות.


איך ווארט צו הערן וואס טוט זיך מיט'ן שידוך.

#64 - נישטא קיין ווערטער דיר צו דאנקען פאר'ן אהערשטעלן ביידע קעמפס
לימוד התורה, שידוכים, הכרת הטוב, קאנטרי

בעזרת ה' יתברך


יום ד' פרשת חקת, ז' תמוז, שנת תשע"ט לפרט קטן


 


לכבוד מיין טייערער ליבער ... נרו יאיר, וואס דו ביסט מיר באליבט ווי מיין אייגן קינד.


איך האב ערהאלטן דיין נדבה פאר די ישיבה, יישר כח.


איך האב נישט קיין ווערטער דיר צו דאנקען פאר'ן אהערשטעלן ביידע קעמפס; די בחורים קעמפ און מיידל קעמפ. דו האסט געארבעט יומם ולילה במשך וואכן און חדשים אז מיר זאלן קענען זיצן אינדרויסן פון שטאט בקדושה ובטהרה צווישן די גראז און ביימער. די זכותים פון אלע גוטע זאכן פון די גאנצע מחנה גייט אויף דיין חשבון; דאס וועסטו מיט נעמען אויף די וועלט און אויף יענע וועלט.


איך בעט דיר זייער זאלסט קומען אין בית המדרש יעדן טאג לערנען אביסל; אמת טאקע די גאנצע קעמפ ווארט אויף דיר, יעדער ציט דיר צו זיינע באדערפענישן; דער דארף וואסער, דער דארף סוער, איינער דארף א געז רענדזש, א צווייטער א בעט וכו' וכו', מיט דעם אלעם זאלסטו זיך אריינ'גנב'ענען אין בית המדרש לערנען יעדן טאג אביסל חומש, משניות, גמרא און תהלים.


אנטלויף נישט, ווייל נאך אביסל וועסטו שוין שטיין אונטער די חופה און אויפשטעלן א בית נאמן בישראל.


דיין ראש ישיבה וואס ליבט דיר.

#63 - אודאי זאלסטו אויסהערן דעם שידוך
שידוכים

בעזרת ה' יתברך


יום ב' פרשת חקת, ה' תמוז, שנת תשע"ט לפרט קטן


 


לכבוד ... נרו יאיר.


איך האב ערהאלטן דיין בריוו.


אודאי זאלסטו אויסהערן דעם שידוך; דאס הייסט נישט אלט, דו ביסט פיר און צוואנציג און זי איז זיבן און צוואנציג, דאס איז זייער פאסיג.


גיי ווי פריער ארויס מיט איר, שמועס מיט איר און הער פון איר וואס זי וויל אין לעבן; צי זי וויל אויפשטעלן אן ערליכע שטוב.


דער אייבערשטער זאל העלפן זאלסט בקרוב זוכה זיין אויפצובויען דיין שטוב, עס זאל מקיום ווערן ביי דיר (חגי ב, ט): "גָּדוֹל יִהְיֶה כְּבוֹד הַבַּיִת הַזֶּה הָאַחֲרוֹן, מִן הָרִאשׁוֹן".

#62 - אלע וואס קריגן אויף ברסלב האבן נישט קיין אנונג וואס ברסלב איז
חסידות ברסלב, שידוכים, חיזוק פאר מיידלעך

בעזרת ה' יתברך


יום ד' פרשת קרח, א' דראש חודש תמוז, שנת תשע"ט לפרט קטן


 


... תחי'.


איך האב ערהאלטן אייער בריוו.


איך האב גערעדט מיט אייערע עלטערן און זיי אנגעטראגן א וואוילער בחור פון ישיבה. עס איז נישט גרינג פאר זיי צו טון א שידוך מיט א בחור פון די ברסלב'ער ישיבה ווייל ליידער ליידער רעדט מען אויף אונז לשון הרע און מען איז מוציא שם רע, ווייל דער ס"מ האט זייער פיינט דעם רבי'ן, ער האט מורא פון רבי'ן ווייל ווי נאר א מענטש ווערט מקורב צום הייליגן רבי'ן רייסט ער זיך ארויס פונעם ס"מ.


וויסן זאלט איר אז די אלע וואס קריגן אויף ברסלב האבן נישט קיין אנונג וואס ברסלב איז, זיי ווייסן נישט וואס זיי ווייסן נישט. אזוי אויך די אלע וואס רעדן אויף די ברסלב'ע ישיבה ווייסן נישט וואס טוט זיך באמת אינעווייניג, ווען זיי וואלטן געוויסט וואס ברסלב איז און וואס מען לערנט אין ישיבה וואלטן זיי נישט געקריגט, אדרבה, זיי וואלטן ווען אויך געקומען נעמען חיזוק פון רבי'ן.


דער הייליגער רבי האט געזאגט (שיחות הר"ן, סימן קפב): "עָלַי אֵין חוֹלְקִים כְּלָל, רַק הֵם חוֹלְקִים עַל מִי שֶׁעָשָֹה כַּךְ כְּמוֹ שֶׁבּוֹדִים הַחוֹלְקִים עָלָיו, וְעַל אִישׁ כָּזֶה בְּוַדַּאי רָאוּי לַחֲלֹק", אויף מיר קריגט מען נישט, מען קריגט אויף אזא איינעם וואס האט געטון דאס וואס זיי זאגן אויף מיר אז איך האב עס געטון און אויף אזא איינעם דארף מען טאקע קריגן.


זייטס נישט באזארגט און געבט זיך איבער צום אייבערשטן, נעמטס אריין אין קאפ אז א שידוך ליגט נאר אין דעם אייבערשטנ'ס הענט. אזוי ווי חכמינו זכרונם לברכה זאגן (בראשית רבה סח, ג): מיר געפונען סיי אין די תורה און נביאים און אין כתובים אז א שידוך האט נאר מיט'ן אייבערשטן, אין די תורה ווערט געברענגט (בראשית כד, נ) וואס לבן און בתואל האבן געזאגט פאר אליעזר ווען ער האט געוואלט נעמען רבקה פאר יצחק אבינו, "מֵה' יָצָא הַדָּבָר", מיר זענען מודה אז דער שידוך איז פונעם אייבערשטן, אין נביאים שטייט (שופטים יד, ד) אז שמשון הגיבור האט גענומען א פרוי זיינע עלטערן האבן נישט געוואלט, זאגט די תורה: "וְאָבִיו וְאִמּוֹ לֹא יָדְעוּ כִּי מֵה' הִיא", זיינע עלטערן האבן נישט געוויסט אז דער שידוך קומט פונעם אייבערשטן, און אין כתובים שטייט (משלי יט, יד) שלמה המלך זאגט א הויז און א פארמעגן קען מען באקומען בירושה פון עלטערן אבער: "וּמֵה' אִשָּׁה מַשְׂכָּלֶת", א שידוך קומט פונעם אייבערשטן, זעען מיר איבעראל אז א שידוך האט נאר מיט'ן באשעפער.


איינמאל אייערע עלטערן וועלן זען דעם בחור און שמועסן מיט אים וועלן אלע דמיונות, קשיות און ספיקות אוועק פאלן.


איך האף צום אייבערשטן אז בקרוב וועט איר שוין א כלה ווערן.

#61 - זיי ממשיך העלפן אויפצושטעלן דעם רבינ'ס מוסדות, וועסטו אויך געהאלפן ווערן
שידוכים, מוסדות, קאנטרי

בעזרת ה' יתברך


יום ד' פרשת קרח, א' דראש חודש תמוז, שנת תשע"ט לפרט קטן


 


לכבוד מיין טייערער ליבער ... נרו יאיר.


איך האב ערהאלטן דיין נדבה פאר די ישיבה, יישר כח.


דו וועסט נאך זען ווי שיין דו וועסט געהאלפן ווערן; נאך אביסל וועסטו זוכה זיין צו טרעפן א גוטע שידוך און זוכה זיין אויפצושטעלן ערליכע דורות. איך בעט פאר דיר יעדן איינציגסטן טאג דו זאלסט זוכה זיין צו טרעפן דיין שידוך.


שטארק זיך און זיי ווייטער ממשיך מיט די גרויסע מצוה וואס דו האסט זוכה געווען אז דו העלפסט מיר אויפשטעלן די הייליגע מוסדות.


איוב האט געזאגט (איוב ה, ז): "אָדָם לְעָמָל יוּלָד", יעדער איינער בזה העולם מוטשעט זיך, זאגן חכמינו זכרונם לברכה (ברכות יז.): "אַשְׁרֵי מִי שֶׁעֲמָלוֹ בַּתּוֹרָה", וואויל איז דעם וואס לייגט אריין די מי און פלאג אין די תורה אדער אין בויען מוסדות וואו מען לערנט תורה, דאס וועט בלייבן פאר אים א זכות אויף די וועלט און אויף יענע וועלט.


קודם זאל אלעס זיין מסודר אין מיידל קעמפ, נאכדעם זאלסטו זארגן פאר די בחורים און אינגל קעמפ.

#60 - דער אייבערשטער פירט די וועלט
שידוכים, אמונה, קשיות

בעזרת ה' יתברך


ערב שבת קודש פרשת בהעלותך, י"ח סיון, שנת תשע"ט לפרט קטן


 


לכבוד ... נרו יאיר.


איך האב זיך נאכגעפרעגט אויף וכו', עס איז זייער א גוטע זאך; לדעתי זאלסטו גיין צום שידוך, דער אייבערשטער זאל דיר באגלייטן אויף טריט און שריט.


אחי היקר, שטארק זיך און שטארק אנדערע מיט די עצות פון רבי'ן. דער הייליגער רבי זאגט (עיין שיחות הר"ן, סימן ג; אשר בנחל ח' תקע"ח): "גאט איז גרויס, גרויס, גרויס, מען ווייסט גארנישט"; מיר ווייסן נישט דעם אייבערשטנ'ס דרכים, א מענטש קען צומאל טראכטן: 'פארוואס דארף אזוי זיין?!' 'פארוואס דארף איך דאס דורכגיין?' 'פארוואס דארפן מיינע קינדער דאס מיט מאכן?' איין תירוץ איז דא: "דער אייבערשטער פירט די וועלט".


איך ווארט צו הערן בקרוב א מזל טוב.


א פרייליכן שבת.


 

#59 - יישר כח פאר'ן מיר העלפן אזוי געטריי מיט די סקול
אומאן, שידוכים, מוסדות, סקול

בעזרת ה' יתברך


יום ג' פרשת בהר, ט"ז אייר, שנת תשע"ט לפרט קטן


 


לכבוד מיין טייערער ... נרו יאיר.


איך האב ערהאלטן דיין נדבה פאר די ישיבה, יישר כח.


א גרויסן יישר כח פאר'ן מיר העלפן אזוי געטריי מיט די סקול; די גאנצע עול פון רייניגן, מסדר זיין, ברענגען עסן וכו' וכו', - האסטו אראפגענומען פון מיר. דו זארגסט פאר יעדע פרט פאר די מיידלעך און דו רייניגסט יעדע נאכט די סקול מיט דיינע אייגענע הענט אן קיין באצאלונג.


זארג נישט פאר דיין שידוך; דו וועסט אם ירצה ה' זוכה זיין צו טרעפן א גוטע שידוך אויף אויפשטעלן א בית נאמן בישראל. וואס מען טוט פאר א צווייטן טוט מען נאר פאר זיך; אז מען העלפט די מוסד וואס פארשפרייט דעם הייליגן רבינ'ס עצות און די הייליגע אמונה אויף די וועלט – העלפט מען זיך אליינס. יעדע ריר וואס דו טוסט פאר'ן מוסד וועט דיר צוניץ קומען.


בנוגע די זיצן אין אומאן; אפשר איז כדאי דו זאלסט רעדן צו האברך היקר לי ... נרו יאיר, פרעג אים צי עס איז כדאי צו באשטעלן נאך פאר די יאר די בעסערע באקוועמערע בענק און טישן, אזוי וועסטו וויסן ווי אזוי מסדר צו זיין די מאפע צו קענען אנגרייטן צו פארקויפן זיצן פאר ראש השנה תש"פ הבא עלינו לטובה.


נאכאמאל, איך דאנק דיר און איך בעט פאר דיר יעדן טאג, ... בן ... להצלחה.


פון דיין ראש ישיבה.

#58 - די גאנצע זאך פון שידוכים איז א פארבארגענע זאך
שידוכים, מוהרא"ש, חיזוק פאר מיידלעך, יבנאל

בעזרת ה' יתברך


מוצאי שבת קודש פרשת אמור, י"ג אייר, שנת תשע"ט לפרט קטן


 


... תחי'.


איך האב ערהאלטן אייער בריוו.


אייער שידוך און אייער ברידערס שידוך איז אנגעהאנגען נאר אינעם אייבערשטן, עס איז א שאד צו זארגן ווען דער אייבערשטער זארגט שוין פאר דעם.


איר שרייבט: "עס גייט שווער שידוכים ווייל מיר זענען ספרד'ישע"; ביים אייבערשטן איז נישט קיין חילוק אשכנזי'שע, חסידי'שע, ספרדי'שע, תמיני'שע און מאראקאי'שא, ער מאכט אלע שידוכים. דעריבער איז א שאד זיך צו קלאפן און טראכטן אז עס גייט שווער שידוכים וועגן איר זענט ספרדי'ש. קומט קיין אמעריקא וועט איר זען וויפיל אשכנזי'שע בחורים פון דריי און צוואנציג יאר ווארטן אויף זייערע שידוך, עס האט גארנישט צו טון פון וואו מען שטאמט. מיר זענען אלע קינדער פונעם אייבערשטן וואס געבט אונז אייניג לעבן.


וויסן זאלט איר אז די גאנצע זאך פון שידוכים איז א פארבארגענע זאך און איז פארהוילן פון אלעמען, דאס ליגט נאר אין דעם אייבערשטנ'ס הענט. אזוי ווי חכמינו זכרונם לברכה זאגן (בראשית רבה סח, ג): מיר געפונען אין די תורה און נביאים און אין כתובים אז א שידוך האט נאר מיטן אייבערשטן. אין די תורה שטייט (בראשית כד, נ): לבן און בתואל האבן געזאגט פאר אליעזר ווען ער האט געוואלט נעמען רבקה פאר יצחק אבינו, "מֵה' יָצָא הַדָּבָר", מיר זענען מודה אז דער שידוך איז פונעם אייבערשטן, אין נביאים שטייט (שופטים יד, ד): שמשון הגיבור האט גענומען א פרוי וואס זיינע עלטערן האבן נישט געוואלט, זאגט די תורה: "וְאָבִיו וְאִמּוֹ לֹא יָדְעוּ כִּי מֵה' הִיא", זיינע עלטערן האבן נישט געוואוסט אז דער שידוך קומט פונעם אייבערשטן, און אין כתובים שטייט (משלי יט, יד): שלמה המלך זאגט: א הויז און א פארמעגן קען מען באקומען בירושה פון עלטערן, אבער "וּמֵה' אִשָּׁה מַשְׂכָּלֶת", א שידוך קומט פונעם אייבערשטן.


איך וואלט אייך גע'עצה'ט איר זאלט פארן מיט אייער ברודער קיין יבנאל צום ציון פון מוהרא"ש זכותו יגן עלינו. מוהרא"ש האט מבטיח געווען מיט א שטארקע הבטחה (צוואת מוהרא"ש, אות ה): "אִיךְ זָאג צוּ אַז יֶעדֶער בָּחוּר אָדֶער מֵיידְל וָואס דַארְף אַ שִׁידוּךְ אוּן זֵיי וֶועלְן קוּמֶען דָא אוֹיף מַיין קֵבֶר אוּן דוּרְכְזָאגְן גַאנְץ סֵפֶר תְּהִלִים פוּן אָנְפַאנְג בִּיזְן סוֹף פַאר מַיין זְכוּת, וֶועל אִיךְ טוּן אַלֶעס וָואס אִיךְ קֶען, אַז זֵיי זָאלְן טְרֶעפְן זֵייעֶר שִׁידוּךְ. אוּן דָאס זָאג אִיךְ צוּ מִיט אַ שְׁטַארְקֶע צוּזָאג".


מען זעט אפענע ניסים און ישועות יעדן טאג ביים ציון פון מוהרא"ש; בחורים און מיידלעך קומען צו פארן אהין פון די גאנצע וועלט אויסזאגן תהילים צו טרעפן זייער שידוך.


דער אייבערשטער זאל העלפן איר זאלט האבן הצלחה אין אלע ענינים.

#57 - גוטע מדות וועט דיר ברענגען א גוטע שידוך
שידוכים, מדות טובות, חברים

בעזרת ה' יתברך


יום א' פרשת אמור, ז' אייר, שנת תשע"ט לפרט קטן


 


לכבוד מיין טייערער ... נרו יאיר, תלמיד ישיבת תפארת התורה.


איך האב ערהאלטן דיין נדבה פאר די ישיבה, יישר כח.


אז דו וועסט זיך פירן מיט גוטע מידות, דו וועסט אכטונג געבן אויף א צווייטע בחור און קיינמאל נישט וויי טון א צווייטן – וועסטו זיך מאכן א גוטע נאמען און בקרוב זוכה זיין צו טרעפן דיין זיווג.


נעם דאס פאר דיין מצוה וואס אין דעם זאלסטו זיך אריינלייגן מיט אלע דיינע כוחות און אלע חומרות; אזוי ווי עס ווערט געברענגט פון חכמינו זכרונם לברכה (שבת קיח:): "אֲבוּךְ בְּמַאי זָהִיר טְפֵי?" אז א מענטש זאל נעמען אויף זיך איין מצוה וואס אין די מצוה וועט ער זייער נזהר זיין, זאלסטו נעמען די מצוה פון (ויקרא יט, יח): "וְאָֽהַבְתָּ לְרֵֽעֲךָ כָּמוֹךָ"; נאר קוקן גוטס אויף א צווייטן און נאר זוכן רחמנות צו האבן אויף א צווייטן, דורכדעם וועסטו זיין א גרויסער חידוש; דיינע עלטערן וועלן שעפן פון דיר אסאך נחת.


דער אייבערשטער זאל העלפן זאלסט האבן הצלחה אין אלע ענינים.


...

#56 - מסדר זיין די חתונות אין ישיבה על צד היותר טוב
סמארטפאון, שידוכים, חתונה, אידיש געלט

בעזרת ה' יתברך


יום א' פרשת אמור, ז' אייר, שנת תשע"ט לפרט קטן


 


לכבוד מיין טייערער ... נרו יאיר, שמש בית מדרשינו.


איך האב ערהאלטן דיין נדבה פאר די ישיבה, יישר כח.


קומענדיגע וואך אום ל"ג בעומר וועלן מיר האבן נאך א חתונה אין ישיבה למזל טוב פון החתן ... נרו יאר.


בעט איך דיר זייער אויב דו קענסט מיר העלפן אויספירן רצונו של מוהרא"ש זכר צדיק לברכה וואס האט כל ימיו געשטרעבט חתונה צו מאכן בחורים און מיידלעך ווי יונגער. איינע פון די סיבות פארוואס מען פארשפעטיגט חתונה צו מאכן די קינדער איז ווייל עס קאסט אסאך געלט, דעריבער האט מוהרא"ש געבויט א זאל אין יבנאל אז חתונה מאכן זאל זיין בחנם פאר אנשי שלומינו. יעצט האבן מיר דאס נאכגעמאכט ביי אונז אין ישיבה, אז עס זאל נישט קאסטן קיין געלט חתונה צו האבן.


רוף אן די מחותנים זיי פרעגן וויפיל עסן מען זאל צושטעלן פאר די סעודה; די סעודה איז אויסדרוקליך נאר פאר די נאנטע משפחה. נישט אז מיר וועלן חס ושלום אוועק שיקן איינער וואס קומט צו די סעודה – כמעשה קמצא ובר קמצא (גיטין נה); חס ושלום אויפצוהייבן א גאסט פון א סעודה. אזוי אויך ווערט געברענגט אין ספר קב הישר (פרק כו; סד; ועוד) שרעקליכע סיפורים איבער אוועקשיקן מענטשן פון א סעודה, בפרט ביי א שמחה. - אבער מען איז נישט מחויב צו רופן די גאנצע שטאט וכו', אזוי ארום קען מען חתונה מאכן אן חובות.


אויך בעט איך דיר זאלסט זען זיך צו האלפטן צו די זמנים, נישט אריין צו ציען שפעטער ווי עלף אזייגער.


אויך וועט אם ירצה ה' פארקומען אסרו חג שבועות די חתונה פון מיין זון שלמה נרו יאיר; איך דאנק און איך לויב דעם אייבערשטן אז מען האלט שוין דא. מיין הארץ איז פול מיט דאנקבארקייט פאר'ן הייליגן באשעפער אז מיר האבן א פלאץ וואו מען לאזט לעבן, מען קען חתונה מאכן די קינדער מיט שמחה – אן חובות, אן דאגות, און אן לחץ וכו', וכו'.


ביז דערווייל קומט ביז יעצט אויס די קאסטן וואס עס קאסט מיר די חתונה – הכל, בכל, מכל, כל – ווייניגער ווי די תפילין וואס עס האט מיר געקאסט ביים דעם חתנ'ס בר מצוה.


איך דאנק דיר פאר אלעס וואס דו העלפסט מיר; איך גיי אריבער יעצט אביסעלע שוועריקייטן וכו', וכו', אבער דער אייבערשטער וואס האט מיר ביז יעצט געהיטן פון אלעס שלעכטס וועט מיר ווייטער היטן פון אלעס שלעכטס. מיינע אויגן זענען געוואנדן נאר צום אייבערשטן און מיין האפענונג איז נאר צו אים.


בעט דעם אייבערשטן אז דו זאלסט נישט אריינפאלן אין די נעץ פון "סאושעל מידיע"; עס איז א גרויסע נפקא מינה פון הערן נייעס אויף "קול מבשר" ביז צו קוקן סטאטוס וכו'. בעט דעם אייבערשטן אז דו זאלסט זיך קענען דערהאלטן מיט די נסיונות הדור.


...

#55 - מיר פארן קיין יבנאל פועל'ן שידוכים פאר אלע בחורים
שידוכים, יבנאל

בעזרת ה' יתברך


יום א' פרשת אחרי ב', אסרו חג, כ"ג ניסן, שנת תשע"ט לפרט קטן


 


 לכבוד ר' ... נרו יאיר.


איך האב ערהאלטן דיין נדבה פאר די ישיבה, יישר כח.


איך זיץ יעצט אויפן פליגער אויפן וועג קיין ארץ ישראל, איך פאר קיין יבנאל מיט די בחורים פון ישיבה; איך זיץ דא מיט דיין זון הבחור ... נרו יאיר, ער איז א טייער קינד, א ירא שמים און א גאלדענע הארץ. ער העלפט די ישיבה זייער געטריי, מיט יעדע זאך וואס מען דארף.


מיר פארן קיין יבנאל פועל'ן שידוכים פאר אלע בחורים; מיר גייען אויסזאגן תהלים ביים ציון אזוי ווי מוהרא"ש שרייבט (צוואת מוהרא"ש, אות ה): "אִיךְ זָאג צוּ אַז יֶעדֶער בָּחוּר אָדֶער מֵיידְל וָואס דַארְף אַ שִׁידוּךְ אוּן זֵיי וֶועלְן קוּמֶען דָא אוֹיף מַיין קֵבֶר אוּן דוּרְכְזָאגְן גַאנְץ סֵפֶר תְּהִלִים פוּן אָנְפַאנְג בִּיזְ'ן סוֹף פַאר מַיין זְכוּת, וֶועל אִיךְ טוּן אַלֶעס וָואס אִיךְ קֶען אַז זֵיי זָאלְן טְרֶעפְן זֵייעֶר שִׁידוּךְ. אוּן דָאס זָאג אִיךְ צוּ מִיט אַ שְׁטַארְקֶע צוּזָאג".


דער אייבערשטער זאל העלפן אז מיר זאלן אלע פועל'ן ישועות פאר אונז און פאר אלע אידן.


א יישר כח פאר'ן העלפן די ישיבה.


...

#54 - ביסט געווארן א נייער מענטש זייט דו ביסט אריינגעקומען אין ישיבה
לימוד התורה, תפילה והתבודדות, בחור, שידוכים, ישיבה, סיום

בעזרת ה' יתברך


יום א' פרשת אחרי ב', כ"ג ניסן, שנת תשע"ט לפרט קטן


 


לכבוד מיין טייערער ... נרו יאיר, תלמיד ישיבת תפארת התורה.


איך האב ערהאלטן דיין בריוו.


איך וויש מיר מיינע אויגן צו זען אויב איך זע גוט... די פילע סיומים וואס דו האסט געמאכט, וואס דו האסט אלץ געלערנט במשך די האלבע יאר זייט דו האסט אנגעהויבן לערנען אויפן סדר דרך הלימוד (כמבואר בשיחות הר"ן, סימן עו); הונדערטער פרקים משניות, הונדערטער דפים גמרא און אלע ספרים פון רבי'ן.


וואס זאל איך דיר זאגן, מיר האבן זיך נישט מיט וואס צו שעמען פון קיין שום אנדערע חסידות און פון קיין שום אנדערע פלאץ ווען מיר קוקן זיך אן און זעען וואס דער רבי האט אונז אלץ געגעבן און וואס ער געבט אונז ווייטער; אשרינו מה טוב חלקינו ומה נעים גורלינו 'אשר בנחל' שם חלקינו וגורלינו, אז מיר געפונען זיך אין אזא הייליגע פלאץ "היכל הקודש קודש קדשים", א פלאץ וואס מען ווערט אנגעפולט מיט תורה, מיט אמונה און מיט מידות טובות.


דיין ברודער האט מיר דערציילט אז דיין טאטע האט אים געזאגט אויף דיר אז ער שעפט פון דיר פיל נחת; אלע זאגן פה אחד אז זייט דו ביסט אריין געקומען אין ישיבה ביסטו געווארן א נייער מענטש, פול מיט דרך ארץ וכו' וכו'. ביי דיר איז ממש מקיום געווארן וואס שלמה המלך זאגט (משלי טז, ז): "בִּרְצוֹת ה' דַּרְכֵי אִישׁ, גַּם אוֹיְבָיו יַשְׁלִם אִתּוֹ", ווען דער אייבערשטער איז מרוצה פון א מענטש מאכט דער אייבערשטער אז אפילו די פיינט פונעם מענטש זאלן אים העלפן; די אלע וואס האבן דיר מונע געווען פון מקורב ווערן צום רבי'ן אלע זאגן אויף דיר און זענען מודה אז דו ביסט אויף א גוט פלאץ.


זארג נישט פאר דיין שידוך; אז דו וועסט זיך פירן מיט יראת שמים וועסטו טרעפן א גוטע שידוך. מוהרא"ש פלעגט שטענדיג זאגן פאר אנשי שלומינו ווען זיי האבן געהאלטן ביי א שידוך טון מיט א טאכטער און זיי האבן געוואלט וויסן אויף א בחור צי ער איז אן ערליכער בחור צי נישט, אז זיי זאלן גיין קוקן ווי אזוי דער בחור דאוונט; אויב דער בחור דאוונט אזוי ווי עס דארף צו זיין, ער דאוונט אין א סידור, ער שטייט אויף איין פלאץ פון אנהייב דאווענען ביזן סוף דאווענען, ער דריידט זיך נישט ארום און ער שמועסט נישט קיין איין ווארט ביים דאווענען, דאס ווייזט אז דער בחור האט יראת שמים, אבער אויב דריידט ער זיך א גאנצן דאווענען אהער און אהין איז א סימן אז ער איז אינו מן הישוב.


נעם זיך פאר נישט צו רעדן ביים דאווענען; דאוון מיט'ן בעל תפילה פון אדון עולם ביז אדון עולם וועסטו זיך מאכן א גוטע נאמען און זוכה זיין צו א גוטע שידוך.


דער אייבערשטער זאל העלפן זאלסט האבן הצלחה אין אלע ענינים.

#53 - יישר כח פאר'ן העלפן אויף יום טוב
שידוכים, הכרת הטוב

בעזרת ה' יתברך


יום ה' פרשת אחרי א', י"ג ניסן, שנת תשע"ט לפרט קטן


 


לכבוד ... נרו יאיר.


איך האב ערהאלטן די געלט פאר יום טוב.


א גרויסן יישר כח פאר'ן זארגן פאר מיר פערזענליך, אז איך זאל האבן אויף יום טוב.


דער אייבערשטער זאל העלפן דו זאלסט זוכה זיין צו אויפגעראכטן ווערן; דו זאלסט טרעפן דיין זיווג און זוכה זיין צו קינדער, בנים ובני בנים עוסקים בתורה ובמצוות. און מיר אלע זאלן שוין זוכה זיין צו עסן דעם קרבן פסח - (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און מיר זאלן שוין זוכה זיין צו (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.


א פרייליכן יום טוב.

#52 - א שאד זיך צו זארגן אזויפיל
שידוכים, חיזוק פאר פרויען, פחדים, קינדער, תפלות אויף אידיש

בעזרת ה' יתברך


יום ג' פרשת טהרה, ד' ניסן, שנת תשע"ט לפרט קטן


 


א באזארגטע מאמע תחי'.


איך האב ערהאלטן אייער ערשטע בריוו און אויך אייער צווייטע בריוו.


איך האב אויך געטראכט אז דאס איז סתם לחץ וכו'; איר שרייבט דאך אליינס אז וויפיל איר פרובירט צו נישטערן און זוכן זאגן אלע די זעלבע זאך, אז דער חתן איז א געשמאקער און א גוטער, און דאס וואס ער באווייזט זיך שעמעוודיג און צוריק געצויגן דאס איז ביי אסאך חתנים; איז דאך ממש א שאד פאר אייערע שלאפלאזע נעכט און פאר אייערע פחדים.


דאס איז אלעס מעשה שטן צו שטערן אייערע שענסטע צייט אין לעבן; איר האט געארבעט, געאקערט און געזייט אזויפיל יארן, יעצט ענדליך ווען איר שניידט שוין די פירות נאכדעם וואס אייער טאכטער איז א כלה געווארן בשעה טובה ומוצלחת דארפט איר יעצט נאר טאנצן, דאנקען און לויבן דעם אייבערשטן, אבער אנשטאט טאנצן פאר שמחה וויינט איר א גאנצן טאג.


איר פרעגט אין אייער צווייטע בריוו: "חוץ פון ווייטער דאווענען וואס איך פרוביר צו טון, ליגט אויף מיר א חוב עפעס צו טון? אדער זאל איך לאזן די זאך לויפן?" וויל אייך זאגן אז איר האט נאך איין זאך צו טון; חוץ פון דאווענען ליגט אויף אייך א פליכט צו טון נאך א זאך וואס דאס וועט אייך העלפן, איר דארפט אנהייבן צו דאנקען דעם אייבערשטן פאר די גרויסע נס וואס ער האט געמאכט מיט אייך אז אייער טאכטער איז א כלה געווארן; אודאי זאלט איר ממשיך זיין צו בעטן פאר די כלה, אבער נישט מיט די וועג וואס איר בעט ביז יעצט - מיט עצבות, פחדים און דמיונות וכו' וכו' נאר מתוך שמחה.


דער הייליגער רבי זאגט (ליקוטי מוהר"ן, חלק א', סימן קעה): "עִקַּר מַעֲלַת הַבְּכִיָּה, שֶׁתִּהְיֶה מֵחֲמַת שִׂמְחָה", ווען מען וויינט צום אייבערשטן זאל מען וויינען מתוך שמחה, דערפאר זעט מען אז די ראשי תיבות פון דאס ווארט "בְּכִיָּ"ה" איז "בְּ'שִׁמְךָ יְ'גִילוּן כָּ'ל הַ'יּוֹם (תהלים פט, יז)", מען וויינט צום אייבערשטן ווייל מען ווייסט אז מיר זענען אין זיינע הענט און ער קען אונז העלפן, נישט חס ושלום וויינען פון פחד און שרעק וואס דאס איז נישט גוט.


איך שיק אייך א תפילה וואס איר זאלט יעדן טאג זאגן צום אייבערשטן ביז די חתונה פון אייער טאכטער און אויך נאך די חתונה:


"רִבּוֹנוֹ שֶׁל עוֹלָם אִיךְ דַאנְק דִיר אוּן אִיךְ לוֹיבּ דִיר פַאר אַלֶע חֲסָדִים וָואס דוּ טוּסְט מִיט מִיר; דוּ הָאסְט מִיר גֶעגֶעבְּן אַזַא שֵׁיינֶע לֶעבְּן, דוּ הָאסְט מִיר גֶעגֶעבְּן אַ טַייעֶרֶע מַאן מִיט זִיסֶע אוּן לִיכְטִיגֶע קִינְדֶער, יְיַשֶׁר כֹּחַ אֵייבֶּערְשְׁטֶער פַאר אַלֶעס וָואס דוּ גֶעבְּסְט מִיר. בַּאזוּנְדֶער דַאנְק אִיךְ דִיר טַאטֶע אוֹיף דִי גְרוֹיסֶע נֶס וָואס דוּ הָאסְט גֶעמַאכְט מִיט מִיר אַז מַיין טָאכְטֶער ... תִּחְיֶ' אִיז אַ כַּלָּה גֶעוָוארְן בְּשָׁעָה טוֹבָה וּמֻצְלַחַת; מָה אָשִׁיב לַה' - וָואס קֶען אִיךְ דִיר בַּאצָאלְן, כָּל תַּגְמוּלוֹהִי עָלָי - פַאר אַלֶעס גוּטְס וָואס דוּ גֶעבְּסְט מִיר, אֵיין זַאךְ קֶען אִיךְ טוּן: כּוֹס יְשׁוּעוֹת אֶשָּׂא וּבְשֵׁם ה' אֶקְרָא, אִיךְ וֶועל פוּן הַיינְט אוּן וַוייטֶער דִיר דַאנְקֶען אוּן לוֹיבְּן; אִיךְ וֶועל אַלֶעמֶען דֶערְצֵיילְן דִי גְרוֹיסֶע נִסִּים אוּן חֲסָדִים וָואס דוּ טוּסְט מִיט מִיר כְּסֵדֶר.


הֵיילִיגֶער בַּאשֶׁעפֶער הֶעלְף מִיר אִיךְ זָאל זוֹכֶה זַיין חֲתוּנָה צוּ מַאכְן אַלֶע מַיינֶע קִינְדֶער; זֵיי זָאלְן הָאבְּן אַ גוּט לֶעבְּן אוּן זֵיי זָאלְן אוֹיפְשְׁטֶעלְן עֶרְלִיכֶע אִידִישֶׁע דּוֹרוֹת. הֶעלְף מַיין טָאכְטֶער ... דִי כַּלָּה, זִי זָאל גֵיין צוּ דִי חוּפָּה גְרִינְג אוּן פְרֵיילִיךְ; זִי זָאל אוֹיפְשְׁטֶעלְן צוּזַאמֶען מִיט אִיר מַאן עֶרְלִיכֶע אִידִישֶׁע דּוֹרוֹת בִּזְכוּת אַלֶע הֵיילִיגֶע צַדִּיקִים וָואס הָאבְּן זִיךְ מוֹסֵר נֶפֶשׁ גֶעוֶוען פַאר דִיר, בִּפְרַט דֶער הֵיילִיגֶער רֶבִּי - רַבֵּינוּ נַחְמָן בֶּן פֵיגֶא זְכוּתוֹ יָגֵן עָלֵינוּ, אוּן רַבֵּינוּ אֱלִיעֶזֶר שְׁלֹמֹה בֶּן מַלְכָּה זְכוּתוֹ יָגֵן עָלֵינוּ, אָמֵן".


דער אייבערשטער זאל אייך העלפן איר זאלט זיך פרייען מיט די שמחה און מיט די ניסים וואס דער אייבערשטער טוט מיט אייך.

#51 - קיינער איז נישט שולדיג, מ'דארף זיך נאר שטארקן
שידוכים, התחזקות

בעזרת ה' יתברך


יום ד' פרשת טהרה, ה' ניסן, שנת תשע"ט לפרט קטן


 


לכבוד ... נרו יאיר, תלמיד ישיבת תפארת התורה ברסלב.


איך בעט דיר זייער טייערער ... נרו יאיר זאלסט זיך אויפהערן צו באשולדיגן און דו זאלסט איר אויך נישט באשולדיגן; נעם אריין אין דיין קעפעלע אז דער אייבערשטער - ער אליין - האט געמאכט אז דו זאלסט א חתן ווערן און אז דער שידוך זאל ווערן אויס, אז זי זאל אפלאזן די שידוך. עס האט נישט צו טון מיט דיר און אויך נישט מיט איר - נאר מיטן אייבערשטן; ער פירט אלעס, ער טוט אלעס און ער מאכט אלעס. ווי לאנג דו וועסט טראכטן 'ווער איז שולדיג?' וועסטו ווערן מער און מער צעבראכן און צעשאסן.


איך וויין פאר דיר; עס טוט מיר אזוי וויי צו זען ווי דו ביסט בעצבות זייט די שידוך איז געווארן אויס, איך בעט דעם אייבערשטן יעדן טאג דו זאלסט טרעפן דיין זיווג און נאך מער בעט איך דעם אייבערשטן פאר דיר אז ביז דיין שידוך וועט אנקומען זאלסטו האבן שכל זיך איבערצוגעבן צום אייבערשטן און קיינעם נישט באשולדיגן.


געב א קוק, מיר האבן פארלוירן די וואך אונזער טייערער זיסער חבר שמעי ענדצווייג עליו השלום; ער איז געווען א בעל יסורים זיין גאנץ לעבן, ער איז געזיצן געלעמט און זיך נישט געקענט רירן די הענט און אויך נישט די פוס; פונדעסטוועגן איז זיין שמייכל קיינמאל נישט אראפ פון זיין פנים. ער האט קיינמאל נישט געקרעכצט און זיך קיינמאל נישט אפגערעדט, נאר שטענדיג געשמייכלט; ברוך השם אז דו האסט געזונטע הענט און געזונטע פוס, עס פעלט דיר גארנישט נאר אביסל חיזוק דו זאלסט אויסווארטן דיין ישועה.


דער אייבערשטער זאל העלפן מיר זאלן שוין זוכה זיין צו (פסחים קטז:): "וְנֹאכַל שָׁם מִן הַזְּבָחִים וּמִן הַפְּסָחִים"; און צום (מיכה ז, טו): "כִּימֵי צֵאתְךָ מֵאֶרֶץ מִצְרָיִם אַרְאֶנּוּ נִפְלָאוֹת", אמן.


א פרייליכן יום טוב.


 

#50 - אין זכות פון צניעות וועסטו האבן א גוטע שידוך
שידוכים, צניעות, חיזוק פאר מיידלעך

בעזרת ה' יתברך


יום א' פרשת צו, י' אדר ב', שנת תשע"ט לפרט קטן


 


... תחי', תלמידה בית פיגא ברסלב.


איך האב ערהאלטן דיין בריוו.


איך פריי זיך זייער צו ליינען וואס דו שרייבסט אז דו פירסט זיך בצניעות און דו האסט מער נישט צו טון מיט וכו', אז דו וועסט זיך ווייטער פירן ערליך וועסטו מאכן א נחת רוח פארן הייליגן באשעפער.


יעצט שטייען מיר פאר דעם יום טוב פורים וואס די גאנצע נס פון פורים איז געקומען דורך אסתר המלכה וואס האט זיך געפירט בצניעות, אזוי ווי חכמינו זכרונם לברכה דערציילן אונז (תרגום אסתר ב, ז): "אֶסְתֵּר הֲווּ קָרִין לָהּ", מען האט גערופן אסתר המלכה מיט'ן נאמען 'אסתר', "עַל דִי הֲוַת צְנִיעָא בְּבֵיתָא דְּמָרְדְּכַי שַׁבְעִין וַחֲמֵשׁ שְׁנִין, וְלָא חֲזָת אַפֵּי גְבַר אֱלָהֵן אַפֵּי מָרְדְּכַי", ווייל אסתר המלכה איז געווען זייער צניעות'דיג אין מרדכי הצדיק'ס הויז; פאר פינף און זיבעציג יאר האט זי נישט געקוקט אויף קיין שום פרעמדע מאן, זי האט נאר געקוקט אויף מרדכי הצדיק - דערפאר האט זי זוכה געווען אז זי האט געראטעוועט גאנץ כלל ישראל.


דער אייבערשטער זאל העלפן אז אין די זכות וואס דו שטארקסט זיך אין צניעות זאלסטו זוכה זיין צו טרעפן א שידוך און אויפשטעלן א בית נאמן בישראל.


זע צו גיין מיט א פארמאכטע קנעפל.

#49 - מזל טוב צו די 30'סטע סיום ששה סדרי משנה
שידוכים, משניות, סיום

בעזרת ה' יתברך


יום ה' פרשת פקודי, א' דראש חודש אדר ב', שנת תשע"ט לפרט קטן


 


לכבוד מיין טייערער זון החתן ... נרו יאיר.


איך פריי זיך זייער צו הערן פון דיר אז דו האסט מסיים געווען דעם ערב ראש חודש אדר ב' די דרייסיגסטע מאל 'ששה סדרי משנה'; זה חלקי מכל עמלי, מיין גאנצע חיות איז צו זען ווי דו לערנסט און ווי דו פירסט זיך מיט יראת שמים. יעדעס מאל איך דערצייל פאר מאמי תחי' ווי פלייסיג דו לערנסט, זאגט זי מיר אויך דאס זעלבע, אז דאס איז איר גאנצע לעבן.


געב א קוק די גרויסע נס וואס דער אייבערשטער האט געטון מיט דיר, דו האסט זוכה געווען צו טרעפן א כלה פון א חשוב'ע שטוב, א איידעלע צניעות'דיגע כלה מיט גוטע מידות; זאלסטו נישט אויפהערן דאנקען דעם אייבערשטן אויף די גרויסע ניסים וואס ער טוט מיט אונז.


דער אייבערשטער זאל העלפן דו זאלסט ווייטער ממשיך זיין מיט דיין תורה תפילה און עבודת השם.

#48 - דיין שידוך איז שוין צוגעגרייט פאר דיין געבורט
בחור, שידוכים

בעזרת ה' יתברך


יום א' פרשת פקודי, כ"ו אדר א', שנת תשע"ט לפרט קטן


 


לכבוד ... נרו יאיר, תלמיד ישיבת תפארת התורה.


איך האב ערהאלטן דיין בריוו.


וואס זאל איך דיר זאגן טייערער ... נרו יאיר, א שידוך האט נאר מיט'ן אייבערשטן, אזוי ווי חכמינו זכרונם לברכה זאגן אונז (בראשית רבה סח, ג): "מָצִינוּ בַּתּוֹרָה בַּנְּבִיאִים וּבַכְּתוּבִים שֶׁאֵין זִוּוּגוֹ שֶׁל אִישׁ אֶלָּא מִן הַקָדוֹשׁ בָּרוּךְ הוּא", מיר געפונען אין די תורה און נביאים און אין כתובים אז א שידוך האט נאר מיט'ן אייבערשטן; זאלסטו זיך פארלאזן אויפ'ן אייבערשטן אז ער וועט דיר ברענגען דיין שידוך בקרוב, זאלסט נישט זיין פאר'דאגה'עט און טראכטן שלעכטע מחשבות אז דו וועסט בלייבן א בחור וכו', ווייל נאך פאר דו ביסט געבוירן געווארן האט דער אייבערשטער שוין אנגעגרייט דיין שידוך, אזוי ווי חכמינו זכרונם לברכה זאגן (סוטה ב.): "אַרְבָּעִים יוֹם קוֹדֶם יְצִירַת הַוָּלָד בַּת קוֹל יוֹצֵאת וְאוֹמֶרֶת בַּת פְּלוֹנִי לִפְלוֹנִי", פערציג טעג פאר יצירת הולד רופט מען אויס אויבן אין הימל: "בַּת פְּלוֹנִי לִפְלוֹנִי", ממילא דארפסטו זיך גארנישט זארגן.


דו זאלסט ווייטער ממשיך זיין דינען דעם אייבערשטן, קום און ישיבה יעדן אינדערפרי, טו אן תפילין און דאוון שחרית מיט שמחה, נאכדעם זאלסטו לערנען דיינע שיעורים כסדרן – מקרא, משנה און גמרא, אויך זאלסטו זיך צוגעוואוינען צו זאגן יעדן טאג תהילים.


איך בעט דיר, זיי נישט צעבראכן; גלייב אינעם אייבערשטן אז ער וועט דיר העלפן, נאך אביסל וועסטו זוכה זיין צו טרעפען דיין שידוך און חתונה האבן.


דאס וואס דו קענסט נישט איינשלאפן ביינאכט פון זארג, טראכטנדיג: 'וואס וועט זיין?' אזוי ווי דו שרייבסט מיר אינעם בריוו אז גאנצעטע נעכט וואלגערסטו זיך אין בעט און דו קענסט נישט איינשלאפן טראכטנדיג: 'ווען וועל איך טרעפן מיין שידוך?' אנשטאט טראכטן די אלע שלעכטע מחשבות זאלסטו דאס אויסזאגן פאר'ן אייבערשטן; שמועס מיט'ן אייבערשטן אין בעט. דעק זיך איבער דיין קאפ מיטן דעק און וויין צו אים אונטערן דעק, בעט אים: "הייליגער באשעפער, געב מיר שוין מיין שידוך"; שמועס מיט אים אויף דיין שפראך - 'אידיש', פארצייל אים אלע דיינע זארגן: 'וואס וועט זיין?' 'ווען וועט עס זיין?' 'מיט וועם וועט עס זיין?'


דער הייליגער רבי זאגט (שיחות הר"ן, סימן סח): "עִיקָר הִתְבּוֹדְדוּת שֶׁל דָּוִד הַמֶּלֶךְ הָיָה עַל מִטָּתוֹ", דוד המלך האט זייער אסאך גערעדט צום אייבערשטן ווען ער איז געלעגן אין בעט, "בְּעֵת שֶׁשָּׁכַב עַל מִטָּתוֹ וְכִסָּה עַצְמוֹ בְּסָדִין, אָז הָיָה מְדַבֵּר וּמֵשִׂיחַ כָּל לִבּוֹ לִפְנֵי הַשֵּׁם יִתְבָּרַךְ", ווען ער איז געלעגן אין בעט פלעגט ער זיך צודעקן מיט זיין דעק און דארט האט ער גערעדט און זיך אויסגעשמועסט מיט'ן אייבערשטן, אזוי ווי עס שטייט (תהלים ו, ז): "אַשְׂחֶה בְּכָל לַיְלָה מִטָּתִי", איך שמועס יעדע נאכט מיטן אייבערשטן אויף מיין בעט, "בְּדִמְעָתִי עַרְשִׂי אַמְסֶה", מיט מיינע טרערן מאך איך נאס מיין בעט, און דער רבי פירט אויס: "אַשְׁרֵי מִי שֶׁיַּרְגִּיל עַצְמוֹ לְקַיֵּם הַנְהָגָה זוֹ הָעוֹלָה עַל הַכֹּל", וואויל איז דעם וואס געוואוינט זיך צו דאס טון.


איך בעט דיר מיין טייערער תלמיד ... נרו יאיר, דראפע זיך און דערהאלט זיך. איך האף אם ירצה ה' צו פארן בקרוב קיין ארץ ישראל, קיין יבניאל צו מוהרא"ש'ס ציון. איך וויל דו זאלסט מיט קומען מיט מיר, דארט איז א פלאץ וואו מען קען פועל'ן שידוכים, אזוי ווי מוהרא"ש האט מבטיח געווען מיט א שטארקע הבטחה (צוואת מוהרא"ש, אות ה): "אִיךְ זָאג צוּ אַז יֶעדֶער בָּחוּר אָדֶער מֵיידְל וָואס דַארְף אַ שִׁידוּךְ אוּן זֵיי וֶועלְן קוּמֶען דָא אוֹיף מַיין קֵבֶר אוּן דוּרְכְזָאגְן גַאנְץ סֵפֶר תְּהִלִים פוּן אָנְפַאנְג בִּיזְן סוֹף פַאר מַיין זְכוּת, וֶועל אִיךְ טוּן אַלֶעס וָואס אִיךְ קֶען, אַז זֵיי זָאלְן טְרֶעפְן זֵייעֶר שִׁידוּךְ. אוּן דָאס זָאג אִיךְ צוּ מִיט אַ שְׁטַארְקֶע צוּזָאג".


מען זעט אפענע ניסים און ישועות יעדן טאג ביים ציון פון מוהרא"ש; בחורים און מיידלעך קומען צו פארן אהין פון די גאנצע וועלט אויסזאגן תהילים צו טרעפן זייער שידוך. דעריבער וויל איך דו זאלסט מיט קומען מיט מיר קיין יבניאל און דארט אויסזאגן תהילים לזכות רבינו אליעזר שלמה בן מנחם זאב זכותו יגן עלינו, וועסטו בקרוב טרעפן דיין שידוך.


דער אייבערשטער זאל העלפן זאלסט האבן הצלחה אין אלע ענינים.