בעזרת ה' יתברך
יום ב' פרשת שמות, ט"ז טבת, שנת תשפ"ב לפרט קטן
... תחי'
זארגט נישט פאר אייער שידוך, א שידוך האט מיט'ן אייבערשטן. חכמינו זכרונם לברכה זאגן (בראשית רבה סח, ג): "אֵין זִוּוּגוֹ שֶׁל אִישׁ אֶלָּא מִן הַקָדוֹשׁ בָּרוּךְ הוּא", א שידוך האט נאר מיט'ן אייבערשטן.
זאגט יעדן טאג תהלים און בעטס דעם אייבערשטן פאר א גוטע ערליכער מאן. בעטס דעם אייבערשטן אייער שטוב זאל זיין געשטעלט אויף אמונת חכמים, די שטוב זאל זיין אנגעפולט מיט'ן רבינ'ס עצות און חיזוקים.
פון דער ראש ישיבה.
בעזרת ה' יתברך
יום ד' פרשת ויחי, י"א טבת, שנת תשפ"ב לפרט קטן
לכבוד מיין טייערער ליבער ... נרו יאיר
עס האט מיר זייער וויי געטון די מעשה וואס האט פאסירט, דו האסט געכאפט פעטש פון וכו'; דער אייבערשטער זאל רחמנות האבן אויף דיר און אננעמען די בזיונות און דיר געבן א גוטע שידוך.
ביי מיר ביסטו זייער חשוב, איך האב דיר זייער ליב; זיי זיך נישט מבלבל פון קיינעם, בלייב שטארק מיט דיין עבודת הקודש; סיי מיט דיינע שיעורים כסדרן און סיי מיט העלפן די ישיבה.
מאך זיך א צייט צו רעדן מיט די בחורים וואס האבן נישט קיין חברים, דאס איז די גרעסטע מצוה. איך האב באמערקט אז דו האסט א גוטע ווייכע הארץ, דו ביסט גוט פארדעם. די הייליגע חכמים זאגן (מגילה ג:) מת מצוה קומט פאר אלע מצוות, עס איז די גרעסטע זאך אויף די וועלט.
בעזרת ה' יתברך
יום א' פרשת שמות, ט"ו טבת, שנת תשפ"ב לפרט קטן
... תחי', תלמידה בית פיגא
איך האב געליינט אייער פארווייטאגטע בריוו; איר שרייבט זייער שרעקעדיגע ווערטער, איר ווילט ענדיגן אייער לעבן, איר קענט נישט אויסהאלטן די ווייטאג פון אייער מאמע; אייער טאטע שרייט און פארשעמט איר ווען אלע קינדער הערן, עס איז נישטא קיין איין נארמאלע שמועס צווישן זיי.
עס שטעכט מיר זייער אין מיין הארץ צו הערן וואס איר גייט אריבער; איך האב נישט געוויסט ווי ווייט עס גייט, איך האב נישט געוויסט ווי שטארק אייער מאמע ליידט; איך בעט אייך זייער, האט נאך אביסל סבלנות, נאך אביסל וועט איר חתונה האבן, איר וועט שוין נישט דארפן מיטהאלטן די קריגערייען פון אייערע עלטערן.
בעטס דעם אייבערשטן איר זאלט באקומען אן ערליכער חתן, אן ערליכער מאן וואס וועט זיין גאנץ לעבן שיין רעדן צו אייך, בעטס דעם אייבערשטן פאר אן ערליכער מאן; מיט תפילה וועט איר דאס באקומען, בעטס אן א שיעור אויף אן ערליכע לעבן.
מיר געפונען, לאה האט זייער אסאך געבעטן דעם אייבערשטן זי זאל חתונה האבן מיט א צדיק. דער הייליגער זוהר זאגט (ויחי, רכג.): "לֵאָה כָּל יוֹמָהָא, הֲוַת בְּפָרָשַׁת אוֹרְחִין קַיָּימָא", לאה פלעגט גיין התבודדות, "וּבָכַת", און זי האט געוויינט צום אייבערשטן, "בְּגִינֵיהּ דְּיַעֲקֹב, כַּד שָׁמְעַת דְּאִיהוּ צַדִּיקָא", זי האט געוויינט אז זי וויל חתונה האבן מיט דער צדיק יעקב, "וּצְלוֹתָא אַקְדָמַת לֵיהּ", ביז זי האט זוכה געווען חתונה צו האבן מיט אים, "רָחֵל לָא נָפְקַת לְאוֹרְחִין לְעַלְמָא, בְּגִינֵי כָּךְ זָכְתָה לֵאָה לְאִתְקַבְּרָא עִמֵּיהּ", רחל האט נישט געדאווענט אויף דעם, דעריבער האט לאה זוכה געווען אויך צו ליגן אין מערת המכפלה מיט יעקב אבינו, ווייל זי האט אסאך געבעטן דעם אייבערשטן צו חתונה האבן מיט דעם צדיק.
בעטס אויף אן ערליכן מאן, נאר ערליכע אידן האבן שלום בית; אויב איז דא יראת שמים - דעמאלט רעדט מען שיין צו די ווייב, מען האט זיך ליב; ווידעראום דער וואס האט נישט יראת שמים - פייניגט די ווייב, טשעפעט די ווייב. מען דארף אסאך בעטן דעם אייבערשטן צו באקומען א מאן וואס האט שייכות מיט א צדיק, א מאן וואס פאלגט א צדיק; דעמאלט איז דאס לעבן זיס.
איר זאלט מכבד זיין אייער טאטע און אייער מאמע; אויב מען קריגט זיך זאלט איר זיך נישט אריינמישן, נאר בעטן דעם אייבערשטן מען זאל זיך נישט קריגן.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ד' פרשת ויגש, ד' טבת, שנת תשפ"ב לפרט קטן
די חשוב'ע תלמידה פון בית פיגא ... תחי'
איך האב ערהאלטן אייער בריוו.
אז אייערע עלטערן ווילן אייך געבן מעדעצין צוליב דעם וואס איר ווילט אזוי שטארק חתונה האבן – זאלט איר אויפהערן מוטשען פאר א שידוך, ווייל מען וועט אייך נאך ארויפלייגן אויף מעדעצין; אנשטאט מוטשען אייערע עלטערן זאלט איר צוריק גיין צום אייבערשטן, אים קענט איר בעטן און מוטשען.
איר דערמאנט מיך א מעשה, מיין באבע עליה השלום, מיין מאמע'ס מאמע, זי איז געווען א גרויסע צדיקת און זייער א קלוגע, האט זי דערציילט אז נאכן קריג איז זי געווען אזוי זיכער אז משיח קומט שוין אט אט אז זי האט גערעדט מיט יעדן איינעם נאר פון משיח, איין טאג הערט זי ווי מען רעדט אונטער איר רוקן אז זי איז משוגע געווארן, ווייל זי רעדט צופיל פון משיח, האט זי דעמאלט אויפגעהערט צו רעדן; זי איז געווען גענוג קלוג צו וויסן פון וואס צו רעדן און מיט וועם צו רעדן.
דאס זעלבע וואונטש איך אייך, איר זאלט האבן די ריכטיגע פארשטאנד צו וויסן וואס צו רעדן און צו וועמען צו רעדן. רעדט צום אייבערשטן, דער אייבערשטער זעט אייער צעבראכן הארץ, אייער ווילן, ווי שטארק איר ווילט זיין גוט, איר ווילט חתונה האבן צו ווערן גאנץ, צו אנהייבן לעבן.
אויך בעט איך אייך זייער, פרובירט מיט אלע אייערע כוחות צו זיין פרייליך; עס איז טאקע שווערער – יעצט ווען מען ווארט אויף א שידוך – צו זיין פרייליך, אבער אז דער רבי זאגט מען זאל זיין פרייליך – דארף זיין א וועג אויך יעצט צו זיין פרייליך.
בעזרת ה' יתברך
ד' פרשת מקץ, כ"ח כסליו, ד' דחנוכה, שנת תשפ"ב לפרט קטן
לכבוד מיין טייערער ליבער ... נרו יאיר
איך האב ערהאלטן דיין מעסידזש.
איך וועל זיך אומקוקן פאר א גוטער בחור פאר דיין טאכטער, דיין טאכטער תחי' איז זייער א חשוב קינד, פון די אויסגעצייכנסטע תלמידות פון בית פיגא; עס קומט איר א גוטער בחור, אן ערליכער בחור, נישט געכאפטערהייט; זאג איר מען גייט אויסקלויבן א גוטער בחור פאר איר.
פארליר זיך נישט, "גאט איז גרויס!" מיר ווייסן גארנישט וואס טוט זיך, מיר דארפן זיך שטארקן מיט אלע כוחות אין אמונה.
בעזרת ה' יתברך
יום ג' פרשת מקץ, כ"ו כסליו, ב' דחנוכה, שנת תשפ"ב לפרט קטן
לכבוד ... נרו יאיר
יעצט הער איך אז דו ביסט צוריק געגאנגען צום טרינק; דיין זיידע זאגט מיר ער זעט ביי דיר פלעשער ברוינפן, ער האט מיר געבעטן איך זאל נישט זאגן אז ער האט אויסגעזאגט, אבער איך זאג יא ווער עס האט מיר געזאגט, ווייל איך וויל דיר ראטעווען פון די מחלה ה' ישמרינו.
וואס איז דיין פלאן? ביז א קורצע צייט שטייסטו אין שידוכים, דו ווילסט אוודאי חתונה האבן, נו וואס טראכסטו? ווער זאל וועלן א שיכור פאר א מאן? איך וועל דארפן זוכן פאר דיר א כלה וואס טרינקט אויך.
איך האלט פון דיר, איך האב דיך זייער ליב, איך וויל נאר דיין גוטס, דעריבער בעט איך דיר: "לאז אפ וויין און ברוינפן, אפילו ביר זאלסטו נישט טרינקען!"
לערן יעדן טאג די תורה פון רבי'ן, לקוטי מוהר"ן חלק ב', סימן כו – וואס רעדט זיך פון שכרות, און זאג די תפלה פון רבי נתן (לקוטי תפילות חלק ב', סימן כג).
אויך זאלסטו לערנען די פסוקים אין ספר משלי, די מוסר רייד פון שלמה המלך'ס מאמע, ווי זי זאגט (משלי לא, ד-ז): "אַל לַמְלָכִים לְמוֹאֵל", עס פאסט נישט פאר קעניגן וואס זענען נאנט צום אייבערשטן זיך אזוי צו פירן, "אַל לַמְלָכִים שְׁתוֹ יָיִן", עס פאסט נישט פאר קעניגן צו טרינקען וויין, "וּלְרוֹזְנִים אֵי שֵׁכָר", פאר גרויסע הערשער איז נישט גוט אלטע וויין, "פֶּן יִשְׁתֶּה וְיִשְׁכַּח מְחֻקָּק", ווען מען טרינקט – קען מען פארגעסן די הייליגע תורה וכו', "תְּנוּ שֵׁכָר לְאוֹבֵד", וויין איז גוט פאר רשעים וואס גייען סיי ווי ווערן אויס, זיי ווערן פארלוירן, "וְיַיִן לְמָרֵי נָפֶשׁ", וויין איז גוט פאר דערביטערטע מענטשן, "יִשְׁתֶּה וְיִשְׁכַּח רִישׁוֹ", דורכן טרינקען פארגעסן זיי זייער ארעמקייט, "וַעֲמָלוֹ לֹא יִזְכָּר עוֹד", זיי געדענקען נישט זייער פלאג, אבער דו טרינק נישט.
קוק די פסוקים אין משלי סוף קאפיטל כג: "לְמִי אוֹי לְמִי אֲבוֹי", אויף וועם איז א קלאג? "לְמִי מִדְיָנִים", ווער קריגט זיך? "לְמִי שִׂיחַ", ווער רעדט אסאך? "לְמִי פְּצָעִים חִנָּם", ווער כאפט קלעפ? "לְמִי חַכְלִלוּת עֵינָיִם", ווער האט רויטע אויגן? שלמה המלך פרעגט די פראגעס, און ענטפערט: "לַמְאַחֲרִים עַל הַיָּיִן", פאר די וואס טרינקען וויין, "לַבָּאִים לַחְקֹר מִמְסָךְ", פאר די וואס קומען פארשן ווי אזוי מען מאכט שטארקע וויין, גוטע וויין.
לערן די אלע פסוקים פון משלי און זאג די תפלה, ווייל איך ציטער וואס וועט זיין דיין סוף.
איך וויל דיר העלפן, איך ווארט דו זאלסט מיר ענטפערן אויף די בריוו.
בעזרת ה' יתברך
יום ד' פרשת מקץ, כ"ז כסליו, ג' דחנוכה, שנת תשפ"ב לפרט קטן
לכבוד ... נרו יאיר
איך בעט דיר זייער, שטארק זיך מיט אלע דיינע כוחות; דער אייבערשטער וועט דיר נישט פארלאזן, דו וועסט טרעפן דיין זיווג.
עס זיך נישט אויף מיט וואס עס איז געווען, מיט וואס דו ביסט אריבער השם ישמרינו. דער רבי זאגט (חיי מוהר"ן, סימן תקצה): א מענטש האט כמה וכמה שידוכים, און אפילו די שידוכים וואס מען טראגט בלויז אן - איז אויך א שידוך, און אמאל דארף מען זיך טרעפן, עס ווערט א שידוך און נאכדעם ווערט עס אויס שידוך, און אמאל דארף מען חתונה האבן און מען גט זיך - אויך צו קענען צוקומען צום ריכטיגן שידוך.
דו וואוינסט דאך אין קרית יואל סמוך ונראה צום ציון פון הייליגן רבי'ן זכותו יגן עלינו מסאטמאר, גיי ארויף יעדן טאג פאר אפאר מינוט און זאג א קאפיטל תהילים פון טיפעניש פון הארץ, בעט דו זאלסט טרעפן דיין שידוך. דער הייליגער רבי זאגט (ספר המדות אות צדיק, סימן קעג): "עַל יְדֵי הִשְׁתַּטְּחוּת עַל קִבְרֵי הַצַּדִּיקִים הַקָּדוֹשׁ בָּרוּךְ הוּא עוֹשֶׂה לוֹ טוֹבוֹת, אַף עַל פִּי שֶׁאֵינוֹ רָאוּי לְכָךְ", ווען א מענטש גייט אויף קברי צדיקים מתפלל זיין, הערט דער אייבערשטער צו זיינע תפילות.
דו שרייבסט מיר איך זאל זיין דיין שדכן; איך בעט דעם אייבערשטן יעדן טאג אז איך וויל זיין דיין שדכן. דער רבי האט דערציילט (חיי מוהר"ן, סימן פד) ער האט גע'חלומ'ט ווי ער פרעגט אויבן אין הימל וואס ער זאל טון פאר פרנסה, האט מען אים געענטפערט: "דיין פרנסה וועט זיין אז דו וועסט זיין א שדכן", מוהרא"ש האט זיין גאנץ לעבן געטון אין שידוכים, דער רבי זאגט בפירוש (לקוטי מוהר"ן חלק ב', סימן פט) דער צדיק איז דער שדכן; איך וועל טון פאר דיר.
א ליכטיגן חנוכה.
בעזרת ה' יתברך
יום ג' פרשת מקץ, כ"ו כסליו, ב' דחנוכה, שנת תשפ"ב לפרט קטן
... תחי'
איך האב ערהאלטן אייער בריוו.
איך פריי זיך זייער צו הערן אז איר זענט זיך מחי' ומחזק מיט די עצות פון הייליגן רבי'ן, דעם רבינ'ס חיזוק און עצות איז ממש אייער לעבן; איר גייט מיט די עצה פון התבודדות, איר רעדט צום אייבערשטן, איר זאגט תהלים מיט תמימות ופשיטות, עס איז אייך אזוי גוט.
בנוגע אייער פראגע אויב איז מעגליך איר זאלט באקומען אן ערליכער ברסלב'ער בחור ווען אייער שטוב איז מער מאדערן, נישט פרום; וואס איז בכלל די שאלה? אוודאי איז דאס מעגליך! זייט נישט דערשראקן, זייט נישט אין ספיקות, ווייל ווי אזוי איר ווילט אויסשטעלן אייער שטוב - אזוי וועט זיין; אז איר ווילט א ווארעמע ערליכע שטוב - וועט איר דאס באווייזן, אלעס ווענדט זיך אינעם מענטש. עס איז דא הונדערטער משפחות, ערליכע ווארעמע משפחות - וואס די עלטערן זענען מער מאדערן, מיט דעם האבן די קינדער אויפגעשטעלט שיינע אידישע שטובער.
זייט ממשיך מיט אייער עבודות השם; זייט זיך מתבודד און זאגט תהלים. בעטס דעם אייבערשטן יעדן טאג אויף אייער אייגענע שפראך איר זאלט טרעפן אייער זיווג און זוכה זיין אינאיינעם אויפצושטעלן אן ערליכע ווארעמע ברסלב'ער שטוב.
א ליכטיגן חנוכה.
בעזרת ה' יתברך
יום ה' פרשת וישב, כ"א כסליו, שנת תשפ"ב לפרט קטן
... תחי'
איך האב ערהאלטן אייער בריוו.
איך פריי זיך זייער צו הערן אז איר האט אפגעהאקט אלע קשרים, איר האט מער נישט קיין שייכות מיט דעם בחור.
בזכות דעם וואס איר האט עומד געווען בנסיון, איר האט אלעס אפגעלאזט - וועט איר באקומען א גוטע שידוך, אן ערליכע שידוך.
זאגט יעדן טאג דעם יום תהלים, און בעט דעם אייבערשטן אויף אייער שפראך אלעס וואס איר ווילט.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ג' פרשת ויצא, ה' כסליו, שנת תשפ"ב לפרט קטן
לכבוד מיין טייערער ... נרו יאיר, תלמיד ישיבת תפארת התורה
דו ביסט זייער א וואוילער בחור, איך בין זייער איבערגענומען פון דיין יראת שמים; איך וועל איבערגעבן פאר דיינע עלטערן אז איך בין זייער צופרידן פון דיר.
האב נישט מורא פון קיינעם, זיי שטארק. דו וועסט בקרוב טרעפן א גוטע שידוך.
גיי יעדן טאג אביסל התבודדות, שמועס אויס דיין הארץ צום אייבערשטן; רעד צו אים אלעס, שעם זיך נישט; דערצייל אים אין דיין שפראך אלעס וואס שטערט דיר, אלע מחשבות און בלבולים וכו', - וועסטו ווערן א שטארקער מענטש, דו וועסט זיין זיכער מיט דיר.
פון דיין ראש ישיבה וואס האט דיר זייער ליב.
בעזרת ה' יתברך
יום ב' פרשת ויצא, ד' כסליו, שנת תשפ"ב לפרט קטן
לכבוד מיין טייערער ... נרו יאיר
איך בעט דיר זייער, האלט זיך שטארק, לאז זיך נישט צעברעכן פון קיין שום זאך אויף דער וועלט. א שידוך האט נישט מיט קיינעם, נאר מיט'ן אייבערשטן. אז דו ווילסט שוין דיין שידוך - האסטו איין ברירה, גיין נאכאמאל צום אייבערשטן און אים בעטן ברחמים ובתחנונים.
נאך א וויכטיגע זאך וויל איך דיר בעטן, ווער נישט אויסער זיך ווען איינער האט דיר געזאגט א ווארט, אדער אז איינער קוקט אויף דיר, מען קען נישט אזוי לעבן; אז מען האט דיר געזאגט א ווארט אדער געקוקט אויף דיר - זאלסטו דאס אראפשלינגען און גיין ווייטער, בפרט ווען דיינע עלטערן זאגן דיר א ווארט וואס שמעקט דיר נישט - זאלסטו נישט ווערן אויס מענטש; עס איז נישט עק וועלט ווען א טאטע זאגט עפעס וואס שמעקט נישט.
מוהרא"ש זאגט בשם צדיקים אויפ'ן פסוק (בראשית כה, יד): "וּמִשְׁמָע וְדוּמָה וּמַשָּׂא", 'וּמִשְׁמָע', מען דארף קענען הערן, 'וְדוּמָה', און שווייגן, 'וּמַשָּׂא', און דערהייבן.
פון דיין ראש ישיבה.
בעזרת ה' יתברך
מוצאי שבת קודש פרשת תולדות, ב' כסליו, שנת תשפ"ב לפרט קטן
טייערער ... נרו יאיר
דראפע זיך און דערהאלט זיך, האלט זיך מיט אלע כוחות; אפילו עס איז דיר ביטער שווער, דו ביסט צעבראכן פון אלעס וואס גייט אויף דיר אריבער, דו ווארטסט שוין אזוי לאנג אויף א שידוך, מען האט דיר איבערגעהיפט; דיין יונגערע שוועסטער האט שוין חתונה געהאט, און דיינע יונגערע נעפיוס און ניסעס - אלע האבן חתונה און דו האסט נאכנישט געטראפן דיין שידוך.
דאך בעט איך דיר זייער ליבער טייערער ברודער, פארליר נישט די אמונה ובטחון, גלייב באמונה שלימה אז אלעס איז לטובה, דער אייבערשטער טוט נאר גוטס, עס איז פאר דיר אויך דא א שידוך. זאלסט זיין פרייליך, זאלסט ארומגיין מיט א פרייליכע פנים.
נעם די עצה פון רבי'ן: "התבודדות"; זיי זיך מתבודד יעדן טאג, זאג פאר'ן באשעפער ווי שטארק דו ווילסט זיין ערליך און עס איז דיר אזוי שווער, וועסטו מאכן אזא רעש; דער אייבערשטער האט זייער ליב ווען מען טענה'ט זיך, מען בעט אים מיט טענות און אמתלאות (לקוטי מוהר"ן חלק א', סימן קכד; שיחות הר"ן סימן סט).
קענסט זיך נישט פארשטעלן צו וואס מען איז זוכה דורך התבודדות ותפלה, די מח ווערט לויטער, מען ווערט א גרויסער צדיק.
בעזרת ה' יתברך
יום ה' פרשת ויצא, ז' כסליו, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
איך נעם אן די מוסר; עס קומט זיך מיר אסאך מער.
בנוגע דיין זון; געלויבט דעם אייבערשטן ער איז זייער וואויל, ער לערנט פלייסיג און פירט זיך מיט יראת שמים.
אויף דיין טענה פארוואס איך ענטפער דיר נישט וועגן די שידוך; דאס נישט ענטפערן - דאס איז די תשובה, קומט אויס אז איך האב דיר יא געענטפערט.
איך האף צום אייבערשטן אז דו וועסט זיך זייער שטארקן אפילו איך קום נישט אן צו רעדן צו דיר און דיר צו ענטפערן, פון הערן די שיעורים און לערנען די בריוו באקומט מען ענטפערס אויף יעדע פראגע און יעדע ספק.
איך פארשטיי אז דו ווילסט פריוואטע אויפמערקזאמקייט; זיי מיר מוחל, איך בין פארנומען מיט די בחורים און קינדער, דאס איז ביי מיר די ערשטע און דאס וויכטיגסטע, און אז עס בלייבט איבער צייט דארף איך לערנען מיינע שיעורים און פארשטייט זיך אהיים גיין העלפן מיין ווייב. אפשר איז דא אנדערע פלעצער וואס מען קען באקומען מער פריוואטע אויפמערקזאמקייט, דא אין היכל הקודש אפילו איינער זאל קיינמאל נישט קומען רעדן פריוואט, אויב עפנט ער זיינע אויערן ווי א טראכטער און הערט אויס די שיעורים, ער עפנט די אויגן און לערנט די בריוו - איז נישטא קיין זאך וואס ער זאל נישט זען און האבן א תשובה דערויף.
מיט דעם אלעם וועל איך פרובירן צו מאכן צייט פאר דיר.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ב' פרשת תולדות, כו מרחשון, שנת תשפ"ב לפרט קטן
... תחי'
זעט צו זאגן יעדן טאג תהלים, בעטס דעם אייבערשטן איר זאלט טרעפן א גוטע שידוך.
א שידוך האט נאר מיט'ן אייבערשטן; ווי מער מען בעט פאר א שידוך – אלץ נענטער ווערט די שידוך.
בעזרת ה' יתברך
יום ד' פרשת ויצא, ו' כסליו, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
בנוגע דיין פראגע, ווען מען גייט צו עלטערן וכו'; עס ווענדט זיך וואו דער קאפ איז, אויב די מח מחשבה איז ווי עס דארף צו זיין וכו' - איז נישט קיין פראבלעם, און אז מען טראכט פון אנדערע - דעמאלט איז נישט גוט סיי וואו מען איז.
בנוגע וכו'; מען מעג אלעס.
בנוגע אויב דער בחור זאל געבן זיין שריפט, די אנדערע זייט וויל נישט גיין ווייטער מיט'ן שידוך נאר אויב דער בחור ווייזט זיין שריפט; פאר א שידוך איז כדאי אלעס צו טון, וואס קען מען טון אז אידישע קינדער ווערן אזוי פארדריידט מיט דמיונות.
זאג דיין חבר ער זאל זיין גרייט, מען וועט אים זאגן מען זעט פון זיין שריפט אז ער איז א כעסן און נאך שלעכטע מידות - זאל ער נישט ווערן צעבראכן.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ג' פרשת ויצא, ה' כסליו, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
בשעת מען איז אין א קלעם מיינט מען אז עס איז עק וועלט, מען קען נישט טראכטן אז פון די צרה וועט ארויסקומען א טובה, מען דארף אבער גלייבן אז דאס איז נאר א טובה, שפעטער ווען מען קוקט צוריק זעט מען וואס פאר א נס דער אייבערשטער האט געמאכט דוקא דורך די זאך וואס האט אויסגעזען שלעכט.
נישט לאנג צוריק שרייבסטו אז מען האט דיר ארויסגעווארפן פון ישיבה ווייל דו ביסט א ברסלב'ער און דו מאכסט נאך בחורים ברסלב, יעצט זעסטו די טובה וואס מען האט געטון מיט דיר, מען האט דיר ארויסגעווארפן וכו'; יעצט האסטו געטראפן א ישיבה, א ווינקל וואס מען לאזט אטעמען, קענסט לערנען דיינע שיעורים כסדרן על פי סדר דרך הלימוד פון רבי'ן בגירסא (כמבואר בשיחות הר"ן, סימן עו), קענסט זאגן יעדן טאג ח"י פרקים משניות און אזוי אויך קענסטו ענדיגן ש"ס יעדע יאר, לערנען יעדן טאג זיבן בלאט.
שטארק זיך בתפילה והתבודדות, בעט דעם אייבערשטן פאר דיין שידוך. זוך דיר א שטילע פלאץ, דארט זאלסטו גיין יעדן טאג און רעדן צום אייבערשטן, זאלסט זיך נישט שעמען צו דערציילן אלע דיינע שלעכטע מחשבות, אלע דיינע נישט גוטע מעשים און אים בעטן ער זאל דיר מקרב זיין צו אים.
געב א גרוס דיין ברודער ...
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ב' פרשת ויצא, ד' כסליו, שנת תשפ"ב לפרט קטן
לכבוד ... נרו יאיר
דו האסט א גרויסער נס אז דו האסט זיך גע'גט; יעצט זאל דער אייבערשטער דיר געבן אן ערליכע געזונטע שידוך, דו זאלסט קענען אויפשטעלן אן ערליכע אידישע שטוב.
איך בעט דיר זייער זאלסט זיך שטארקן, זאלסט זיך נישט נאכלאזן; דריי זיך נישט ביינאכט אין גאס, האלט א סדר אזוי ווי דו ביסט חתונה געהאט, לייג זיך צייטליך און שטיי אויף אין צייט. זיי זיך קובע א צייט אינדערפרי צו לערנען דיינע שיעורים כסדרן אויפ'ן סדר דרך הלימוד פון רבי'ן (כמבואר בשיחות הר"ן, סימן עו), מאך זיך א שיעור אין חומש רש"י, לערן יעדן טאג אביסל חומש רש"י מיט'ן תרגום; זונטאג ביז שני, מאנטאג ביז שלישי און אזוי ווייטער, אויך זאלסטו לערנען אפאר פרקים משניות יעדן טאג, אז דו פארשטייסט נישט די משניות - זאלסטו זאגן די ווערטער, דער רבי זאגט (שיחות הר"ן, שם): "אֵין צְרִיכִין בְּלִמּוּד רַק הָאֲמִירָה לְבַד", מען דארף נישט מער פון זאגן די ווערטער; ווען מען זאגט די ווערטער פון די הייליגע תורה - ווערט מען נאנט צום אייבערשטן.
איך האף צום אייבערשטן אז עס וועט נישט נעמען לאנג ביז דו וועסט טרעפן א געזונטע ערליכע שידוך.
בעזרת ה' יתברך
יום ב' פרשת ויצא, ד' כסליו, שנת תשפ"ב לפרט קטן
לכבוד ... נרו יאיר
דו האסט א גרויסער נס אז דו האסט זיך גע'גט; יעצט זאל דער אייבערשטער דיר געבן אן ערליכע געזונטע שידוך, דו זאלסט קענען אויפשטעלן אן ערליכע אידישע שטוב.
איך בעט דיר זייער זאלסט זיך שטארקן, זאלסט זיך נישט נאכלאזן; דריי זיך נישט ביינאכט אין גאס, האלט א סדר אזוי ווי דו ביסט חתונה געהאט, לייג זיך צייטליך און שטיי אויף אין צייט. זיי זיך קובע א צייט אינדערפרי צו לערנען דיינע שיעורים כסדרן אויפ'ן סדר דרך הלימוד פון רבי'ן (כמבואר בשיחות הר"ן, סימן עו), מאך זיך א שיעור אין חומש רש"י, לערן יעדן טאג אביסל חומש רש"י מיט'ן תרגום; זונטאג ביז שני, מאנטאג ביז שלישי און אזוי ווייטער, אויך זאלסטו לערנען אפאר פרקים משניות יעדן טאג, אז דו פארשטייסט נישט די משניות - זאלסטו זאגן די ווערטער, דער רבי זאגט (שיחות הר"ן, שם): "אֵין צְרִיכִין בְּלִמּוּד רַק הָאֲמִירָה לְבַד", מען דארף נישט מער פון זאגן די ווערטער; ווען מען זאגט די ווערטער פון די הייליגע תורה - ווערט מען נאנט צום אייבערשטן.
איך האף צום אייבערשטן אז עס וועט נישט נעמען לאנג ביז דו וועסט טרעפן א געזונטע ערליכע שידוך.
בעזרת ה' יתברך
יום ג' פרשת תולדות, כ"ז מרחשון, שנת תשפ"ב לפרט קטן
לכבוד ... נרו יאיר
בנוגע די מוסד וכו'; זאלסט פארלאנגען ביים בית דין אז דיינע קינדער זאלן גיין אין ערליכע מוסדות, זי זאל נישט לייגן די קינדער אין נישט פרומע מוסדות.
צווייטנס, זאלסט זען צו האבן די קינדער ביי דיר וואס מער; סתם אזוי ווען מען צעטיילט זיך השם ירחם גייען די קינדער צו די מאמע, אבער אז די מאמע וויל אוועק נעמען די קינדער פון די אידישע וועג - זאלסטו פרובירן מיט דיינע לויערס אויף אלע וועגן אז די קינדער זאלן זיין וואס מער ביי דיר.
בנוגע אויב דו מעגסט ווייזן פאר דיינע קינדער ווידיאוס פון שיעורים פון התחזקות; בדרך כלל איז נישט גוט צו ווייזן פאר קינדער קיין שום ווידיאו, אפילו פון גוטע זאכן; אבער ביי דיר איז א יוצא מן הכלל, אין דיין פאל ווען די מאמע ווייזט זיי נישט גוטע זאכן השם ירחם - זאלסטו זיי יא ווייזן שיעורי תורה, שיעורי חיזוק.
בנוגע וואס דו זאלסט זיי ענטפערן ווען די קינדער פרעגן דיר: "טאטי, פארוואס פירסטו זיך איין וועג און מאמי פירט זיך אן אנדערע וועג?" זאלסטו זיי זאגן: "מען דארף בעטן דעם אייבערשטן אז אלע אידן זאלן תשובה טון, אלע אידן זאלן גיין אין די וועג פון די תורה"; רעד נישט צו זיי קעגן זייער מאמע דירעקט, נאר: "מען דארף מתפלל זיין אז מאמי זאל תשובה טון".
בנוגע אויף וואס דו זאלסט קוקן ביי א שידוך, אויף וואס דו זאלסט זיך שטעלן, וואס קען מען פארקוקן וכו'; דאס איז נישט נוגע יעצט, כל זמן דו ביסט נאך חתונה געהאט איז נישטא אזא זאך רעדן פון א שידוך, נאך די גט וועט מען רעדן.
בעט דעם אייבערשטן ער זאל רחמנות האבן אויף דיר, אויף דיינע קינדער און אויף אלע אידן.
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ד' פרשת וירא, י"ד מרחשון, שנת תשפ"ב לפרט קטן
לכבוד מיין טייערער ... נרו יאיר, תלמיד ישיבת תפארת התורה
הער נישט אויס דעם צעדרייטן שכן וואס רעדט צו דיר, ער איז א גרויסער נאר און א טיפש, ווער נישט דערשראקן פון אים. איך זאג דיר דו וועסט שיין חתונה האבן, דו וועסט יא האבן שלום בית, דו וועסט האבן א זיסע לעבן.
דו זיי ממשיך פאלגן דעם רבי'ן, דאווען אלע דריי תפילות מיט מנין, לערן דיינע שיעורים כסדרן יעדן טאג און זיי זיך מתבודד, זאג פאר'ן באשעפער וואס דו האסט באקומען ביים רבי'ן, דערצייל דעם אייבערשטן וואס אויף דיר איז אריבער, נאר פאר'ן אייבערשטן דערצייל עס, בעט דעם אייבערשטן ער זאל רחמנות האבן אויף דיר, מען זאל דיר נישט אוועק שלעפן פון רבי'ן.
ווי אזוי וועסטו אויסקוקן אז דו לאזט אפ דעם רבי'ן? אזוי ווי דער שכן וואס צעברעכט בחורים, אזוי קוקט מען אויס.
דו זיי ממשיך מיט דיין עבודת השם – וועסטו שיין חתונה האבן, דו וועסט האבן די גן עדן אויף די וועלט.
בעזרת ה' יתברך
יום ד' פרשת וירא, י"ד מרחשון, שנת תשפ"ב לפרט קטן
לכבוד ... נרו יאיר
איך האב ערהאלטן דיין בריוו.
עס איז מיר א גרויסע וואונדער צו הערן פון א תלמיד היכל הקודש אזעלכע ווערטער; האסט גארנישט געהערט שלעכטס אויף די מיידל, אדרבה, האסט געהערט אז זי איז אן איידעלע, א וואוילע, און דו זאגסט אפ די שידוך ווייל די עלטערן זענען שלעפערס? ווייל דער טאטע גייט נאך געלט?!
פלאי פלאים, א איד גייט נאך געלט צו קענען מפרנס זיין די שטוב - דאס מאכט אים פאר א שלעפער? א איד נעמט פון קופת צדקה - דאס מאכט אים ווייניגער חשוב? וואו בין איך אויף די וועלט? ביסטו אפשר פון די מדינה פון עשירים וואס אלעס איז וועדליג דאס געלט? מיר זענען דאך פון די בעל תפילה'ס לייט וואס מען קוקט גארנישט אויף געלט.
מענטשן זענען מזלזל אין משפחות וואס זענען נצרכים, זיי ווייסן נישט אז דאס גייט פאסירן ביי די אייגענע קינדער אדער אייניקלעך. אזוי ווי חכמינו זכרונם לברכה דערציילן (שבת קנא:) דער הייליגער רבי חייא האט געזאגט פאר זיין ווייב: "כי אתי עניא", ווען אן ארעמאן קלאפט אין טיר, "אקדימי ליה ריפתא", זאלסטו אים געבן ברויט צו עסן, "כי היכי דלקדמו לבניך", אזוי וועט מען אויך געבן פאר אונזערע קינדער ווען זיי וועלן בעטן צדקה, האט זי געפרעגט רבי חייא: "מילט קא לייטת להו", דו שעלטסט מיר, פארוואס זאגסטו אזוינס? אונזערע קינדער גיין קלאפן ביי די טירן פאר צדקה?! האט רבי חייא איר געזאגט: "קרא קא כתיב", נישט איך זאג דאס, דער פסוק זאגט דאס (דברים טו, י): "כִּי בִּגְלַל הַדָּבָר הַזֶּה יְבָרֶכְךָ ה' אֱלֹקֶיךָ..." די חכמים זאגן, "גלגל הוא שחוזר בעולם", די וועלט דריידט זיך ווי א רעדל, ארעמקייט קומט צוריק צום מענטש, "אם הוא לא בא", און אז עס קומט נישט צום מענטש, דער מענטש האט יא געלט, "בא בנו", קומט די ארעמקייט צום קינד, "ואם בנו לא בא, בן בנו בא", און אז די קינדער זענען נישט ארעם - וועט עס אנקומען צום אייניקל, דעריבער טאר מען נישט מזלזל זיין אין קיין ארעמעלייט.
ביי א שידוך קוקט מען אויף דריי זאכן. די ערשטע זאך פרעגט מען זיך נאך אויב די מיידל איז געזונט, מוהרא"ש זאגט "בראשית ברא", בראשית - די ערשטע זאך, ברא - געזונט, געזונט איז דאס וויכטיגסטע, דאס דארף מען גוט מברר זיין, אויב מען באהאלט נישט עפעס, אויב איז דאס געזונט מיט די נערווען. די צווייטע זאך - אויב זי איז ערליך, אויב זי האט יראת שמים, זי וויל אויפשטעלן א שטוב על דרך התורה, אויפציען קינדער אויף די אידישע וועג. דאס קען מען גרינג מברר זיין, מען קוקט ווער זענען אירע חברט'עס, מוהרא"ש זאגט אז מען וויל דערקענען א מענטש - קוקט מען ווער זענען די חברים; דער מענטש אליינס קען זיך אסאך מאל גוט פארשטעלן, ווען מען זעט די חברים זעט מען אלעס. דריטנס, אויב זי האט גוטע מידות; די דריי זאכן קוקט מען ביי א שידוך.
אויב איז די מיידל געזונט, ערליך און האט גוטע מידות - מאכט מען א צייט און א פלאץ וואו דער בחור און מיידל טרעפן זיך און רעדן פאר א שטיק צייט, מען פרעגט דעם בחור אויב זי האט חן, און מען פרעגט די מיידל אויב ער האט חן און מען ענדיגט די שידוך, דאס איז אויף וואס מען קוקט און מען זוכט.
ווער איז דער טאטע? וואס טוט די מאמע? ווי אלט איז די זיידע און ווי קלוג איז די באבע? די פעטערס זענען רייכע? די מומעס זענען באלעבאסטעס? ווער זענען די מחותנים? זיי האבן יא געלט אדער נישט געלט וכו' וכו'? - דאס איז נישט וויכטיג.
דאס וואס מען האט געזען א בילד פון די מיידל, זי גייט אנגעטון זייער פשוט; אויף דעם דערציילן שוין די הייליגע חכמים (נדרים סו.), א בחור האט אמאל געמאכט א נדר, ער גייט נישט טון א געוויסע שידוך, שפעטער האט דער הייליגער תנא רבי ישמעאל געזאגט מען זאל אנטון די מיידל מיט שיינע קליידער און איר שיין מאכן, מען האט געמאכט נאך א בעשוי און דער בחור האט געזאגט: "די מיידל וויל איך יא", האט דער הייליגער תנא רבי ישמעאל געוויינט, ער האט געזאגט: "וואס קען מען טון אז עס איז דא ארעמע מיידלעך וואס קענען זיך נישט אנטון שיין און עס גייט זיי נישט קיין שידוכים..."
איך וויל דיר נישט וויי טון, אבער קוק ביי דיר; דו ביסט א טייערער בחור, איך האלט זייער פון דיר, איך פרוביר דיר אנצוטראגן שידוכים; וועט איינער קומען זאגן ער וויל דיר נישט נעמען פאר אן איידעם ווייל ער הערט אז דיינע עלטערן קריגן זיך וכו'? איי, וואס ביסטו שולדיג? איי, וואס האט דאס מיט דיר? וואס קענסטו טון אז דיינע עלטערן האבן נישט געהאט דעם רבי'ן אין זייער לעבן? זיי ווייסן נישט פון דעם אז מען קען לעבן דא בזה העולם א חיים טובים; די קשיא איז נישט אזוי שווער אויף אנדערע מענטשן, ווייל אזוי טראכטן מענטשן, מען קוקט אויף די ארום און ארום; אבער מיר תלמידי היכל הקודש וואס מוהרא"ש האט אונז שוין געעפנט דעם קאפ - דארפן אנדערש צו גיין צו א שידוך.
בעט דעם אייבערשטן ער זאל רחמנות האבן אויף דיר, זאג פאר'ן אייבערשטען ווי שווער עס איז דיר צו זיין אליין, אז דו ווילסט חתונה האבן, מער נישט זיין קיין פלג גוף, און זאג נישט אפ קיין שידוך נאר אויב עס איז דא א פראבלעם אין געזונט און יראת שמים.
דא האסטו א שיינע תפילה צו זאגן יעדן טאג ביז דו טרעפסט דיין שידוך:
"רִבּוֹנוֹ שֶׁל עוֹלָם, הֵיילִיגֶער בַּאשֶׁעפֶער, הֶעלְף מִיר אַז אִיךְ זָאל שׁוֹין זוֹכֶה זַיין צוּ טְרֶעפְן אַ גוּטֶע שִׁידוּךְ, אִיךְ זָאל זוֹכֶה זַיין חֲתוּנָה צוּ הָאבְּן שְׁנֶעל אוּן גְרִינְג אוּן נִישְׁט דַארְפְן וַוארְטְן מֶער אַזוֹי לַאנְג.
הֵיילִיגֶער בַּאשֶׁעפֶער אִיךְ וֵוייס אַז אִיךְ הָאבּ זִיךְ נִישְׁט אוֹיפְגֶעפִירְט וִוי עֶס דַארְף צוּ זַיין, אוּן אַז אִיךְ בִּין נִישְׁט אֵייבִּיג גֶעוֶוען אַזוֹי וואוֹיל אוּן עֶרְלִיךְ. אִיךְ בֶּעט דִיר אָבֶּער, רִבּוֹנוֹ שֶׁל עוֹלָם, אַז דוּ זָאלְסְט נִישְׁט קוּקְן אוֹיף דֶעם אוּן צוּלִיבּ דֶעם צוּרִיק הַאלְטְן מַיין שִׁידוּךְ. זֵיי מִיר מוֹחֵל אוֹיף אַלֶעס וָואס אִיךְ הָאבּ נִישְׁט גוּט גֶעטוּן, אוּן הֶעלְף מִיר אַז אִיךְ זָאל שׁוֹין שְׁנֶעל חֲתוּנָה הָאבְּן, אוּן דָאס וֶועט מִיר הֶעלְפְן אוּן רַאטֶעוֶוען אַז אִיךְ זָאל מֶער נִישְׁט טוּן קַיין עֲבֵירוֹת אוּן אִיךְ זָאל שׁוֹין זַיין וואוֹיל אוּן עֶרְלִיךְ.
וָואס זָאל אִיךְ טוּן, רִבּוֹנוֹ שֶׁל עוֹלָם? פוּן מַיין זַייט בִּין אִיךְ גְרֵייט חֲתוּנָה צוּ הָאבְּן הַיינְט נַאכְט! וָואס קֶען אִיךְ טוּן אַז אִיךְ הָאבּ נָאכְנִישְׁט גֶעטְרָאפְן מַיין שִׁידוּךְ? אִיךְ וַוארְט אוּן אִיךְ וַוארְט אוּן אִיךְ בֶּעט דִיר שׁוֹין אַזוֹי לַאנְג אַז אִיךְ וִויל שׁוֹין חֲתוּנָה הָאבְּן, אוּן דֶערְוַוייל אִיז עֶס נָאכְנִישְׁט אָנְגֶעקוּמֶען.
דִי חַזַ"ל זָאגְן אוּנְז אַז וֶוען אֵיינֶער הָאט חֲתוּנָה נָאךְ דִי צְוָואנְצִיג יָאר, וֶועט עֶר שׁוֹין זַיין גַאנְץ לֶעבְּן טְרַאכְטְן פוּן עֲבֵירוֹת, אוּן דוּ זָאגְסְט אוֹיף אַזַא מֶענְטְשׁ אַז זַיינֶע בֵּיינֶער זָאלְן צוּגֵיין. פַארְוָואס זָאל מִיר קוּמֶען אַזַא הַארְבֶּער עוֹנֶשׁ אַז אִיךְ זָאל מַיין גַאנְץ לֶעבְּן טְרַאכְטְן פוּן עֲבֵירוֹת, אוּן אַז מַיינֶע בֵּיינֶער זָאלְן צוּגֵיין? וָואס בִּין אִיךְ דֶען שׁוּלְדִיג? פַארְוָואס קוּמְט עֶס מִיר? אִיז מִיר נִישְׁט גֶענוּג דִי שְׁרֶעקְלִיכֶע פַּיין אוּן וֵוייטָאג וָואס אִיךְ הָאבּ פוּן דֶעם אַלֵיין אַז אִיךְ הָאבּ נָאכְנִישְׁט חֲתוּנָה גֶעהַאט?
הֵיילִיגֶער בַּאשֶׁעפֶער הֶעלְף מִיר אַז אִיךְ זָאל זוֹכֶה זַיין צוּ הָאבְּן סַבְלָנוּת אוּן גֶעדוּלְד, אוּן אוֹיסְוַוארְטְן מִיט רוּאִיגְקֵייט בִּיז אִיךְ וֶועל שׁוֹין זוֹכֶה זַיין חֲתוּנָה צוּ הָאבְּן. הֶעלְף מִיר אַז אִיךְ זָאל נִישְׁט הָאבְּן קַיין קֻשְׁיוֹת אוֹיף דִיר. הֶעלְף מִיר אַז אִיךְ זָאל גְלֵייבְּן מִיט אַ שְׁטַארְקֶע אֱמוּנָה אַז דוּ טוּסְט אַלֶעס נָאר צוּם גוּטְן, אוּן יֶעדֶע זַאךְ הָאט אַ פּוּנְקְטְלִיכֶער חֶשְׁבּוֹן, אוּן מִיט דֶעם זָאל אִיךְ זִיךְ שְׁטַארְקְן אוּן נִישְׁט זַיין אַזוֹי צוּבְּרָאכְן פוּן מַיינֶע שְׁוֶוערִיקַייטְן.
הֵיילִיגֶער בַּאשֶׁעפֶער, נָאר דוּ קֶענְסְט מִיר פַארְשְׁטֵיין! נָאר דוּ וֵוייסְט מַיינֶע גֶעפִילְן! וִוי אַזוֹי אִיךְ שְׁפִּיר זִיךְ אַזוֹי פַארְשֶׁעמְט אוּן דֶערְנִידֶערְט פוּן מִיר אַלֵיין! אַז אַלֶע מַיינֶע חֲבֵרִים הָאבְּן שׁוֹין חֲתוּנָה גֶעהַאט אוּן נָאר אִיךְ בִּין גֶעבְּלִיבְּן אַלֵיין! הֶעלְף מִיר אַז דִי בִּזְיוֹנוֹת זָאלְן זַיין פַאר כַּפָּרַת עַווֹנוֹת אַז מִיט דֶעם זָאל אִיךְ אָפְּקוּמֶען אַלֶע מַיינֶע עֲבֵירוֹת, אִיךְ זָאל מֶער נִישְׁט דַארְפְן לַיידְן אַזוֹיפִיל אוּן אִיךְ זָאל שׁוֹין זוֹכֶה זַיין חֲתוּנָה צוּ הָאבְּן בְּקָרוֹב.
אִיךְ וֵוייס אוּן אִיךְ גְלֵייבּ, הֵיילִיגֶער בַּאשֶׁעפֶער, אַז דוּ וֶועסְט מִיר זִיכֶער נִישְׁט פַארְלָאזְן. סוֹף כָּל סוֹף וֶועל אִיךְ זוֹכֶה זַיין חֲתוּנָה צוּ הָאבְּן. אוּן דֶערְפַאר בֶּעט אִיךְ דִיר, רִבּוֹנוֹ שֶׁל עוֹלָם, אַז וֶוען אִיךְ וֶועל שׁוֹין חֲתוּנָה הָאבְּן זָאל אִיךְ זוֹכֶה זַיין צוּ הָאבְּן אַ גוּטֶע שָׁלוֹם בַּיִת, אִיךְ זָאל זִיךְ קֵיינְמָאל נִישְׁט קְרִיגְן אִינְדֶערְהֵיים, עֶס זָאל שְׁטֶענְדִיג הֶערְשְׁן בַּיי אוּנְז אַהֲבָה וְאַחְוָה וְשָׁלוֹם וְרֵעוּת, מִיר זָאלְן זִיךְ לִיבּ הָאבְּן אוּן הָאבְּן אַ גְלִיקְלִיךְ לֶעבְּן אִינְאֵיינֶעם, אוּן אִיךְ זָאל זִיךְ קֵיינְמָאל נִישְׁט דַארְפְן גֶט'ן חַס וְשָׁלוֹם.
הֶעלְף מִיר אַז אִיךְ זָאל שְׁטֶענְדִיג זַיין אַ וַתְּרָן, אִיךְ זָאל אֵייבִּיג מְוַותֵּר זַיין אוּן נִישְׁט זִיךְ קְרִיגְן נָאר שְׁטֶענְדִיג אַרוֹיסְהֶעלְפְן. מִיר זָאלְן הָאבְּן אַ פְרֵיילִיכֶע הוֹיז, עֶס זָאל זִיךְ שְׁפִּירְן דִי שִׂמְחָה אִין דִי לוּפְט בַּיי אוּנְז אִינְדֶערְהֵיים. אִיךְ זָאל זוֹכֶה זַיין צוּ הָאבְּן גֶעזוּנְטֶע אוּן עֶרְלִיכֶע קִינְדֶער, אִיךְ זָאל זֵיי אוֹיפְצִיעֶן אוֹיפְ'ן עֶרְלִיכְן אִידִישְׁן וֶועג אוּן זֶען אַסַאךְ אִידִישׁ נַחַת פוּן זֵיי. מַיין שְׁטוּבּ זָאל זַיין אָפְן פַאר אַנְדֶערֶע אִידִישֶׁע קִינְדֶער אַרַיינְצוּנֶעמֶען אוֹרְחִים אוּן צוּ טוּן אַסַאךְ צְדָקָה אוּן חֶסֶד.
הֵיילִיגֶער בַּאשֶׁעפֶער, נֶעם אָן מַיין תְּפִלָה, אוּן הֶעלְף מִיר שׁוֹין, אִין זְכוּת פוּן אַלֶע צַדִיקִים וּבִּפְרַט אִין דִי זְכוּת פוּן הֵיילִיגְן רֶבִּי'ן רַבֵּינוּ נַחְמָן בֶּן פֵיגָא זְכוּתוֹ יָגֵן עָלֵינוּ, [אוּן אִין זְכוּת פוּן רַבֵּינוּ אֱלִיעֶזֶר שְׁלֹמֹה בֶּן מְנַחֶם זְאֵב זְכוּתוֹ יָגֵן עָלֵינוּ, וָואס הָאט גֶעמַאכְט דִי תְּפִלָה], אָמֵן כֵּן יְהִי רָצוֹן".
דער אייבערשטער זאל העלפן זאלסט האבן הצלחה אין אלע ענינים.
בעזרת ה' יתברך
יום ב' פרשת לך לך, ה' מרחשון, שנת תשפ"ב לפרט קטן
... תחי', תלמידה בית פיגא ברסלב
איך האב ערהאלטן אייער בריוו.
איך האב זייער הנאה אז איר זענט אפן מיט מיר, איר דערציילט מיר אינעם בריוו איז איר האט א באהאלטענע אייפאון און אז איר האט אראפגענומען די פילטער; זייער גוט צו זיין אפן, אזוי קען איך מיט'ן אייבערשטנ'ס הילף אייך פרובירן צו העלפן און בעטן פאר אייך.
איין זאך וויל איך אייך פרעגן, זאגט מיר דעם אמת, נאך אביסל זענט איר אין די יארן פון ווערן א כלה, וואס פאר א חתן ווילט איר? א בחור וואס האט באהאלטענערהייט א טעלעפאן און קוקט אויף אלע עקלדיגע גוי'טעס? א בחור וואס ווייקט זיך אין שמוץ? א בחור וואס וועט זיין גאנץ לעבן אייך אויסשפילן? ער וועט זיך מאכן כאילו ער דארף אייך און באמת וועט ער נעמען זיין הנאה פון קוקן עבירות? אדער איר דארפט א ריינער בחור וואס היט די אויגן, ער וועט נאר קוקן אויף אייך, ער וועט נאר אייך דארפן, נאר אייך וועלן און נאר אייך ליב האבן?
וויסן זאלט איר, חכמינו זכרונם לברכה זאגן (סוטה ב.): "אֵין מְזַוְּגִין לוֹ לְאָדָם אִשָׁה אֶלָּא לְפִי מַעֲשָׂיו", מען ברענגט א זיווג לויט די מעשים פונעם מענטש; אז איר וועט זיך מתגבר זיין אויף די נסיון, איר וועט אפלאזן די נארישע זאכן, וועט אייער מאן אויך נישט קוקן די זאכן, און אז נישט וועט די לעבן זיין זייער נישט גוט.
איך גיי נישט זאגן פאר קיינעם אייער עבר, איך האף איר וועט זיך בארעכענען און שוין אפלאזן די נישט גוטע חבר'טעס און זיך חבר'ן מיט גוטע מיידלעך; גלייבט מיר, איך מיין נאר אייער גוטס, נאר איר וועט בענעפיטירן אז איר וועט זיך היטן פון נישט גוטע חבר'טעס.
איך וועל אייך אויסקלויבן א גוטער בחור וואס וועט אייך זיין געטריי אייער גאנץ לעבן.
שרייבט מיר אייערע סיומים פון תהילים, שרייבט מיר אז איר גייט אפלאזן די נישט גוטע חבר'טעס; איר זענט א גאר גוטע מיידל, בלייבט שטארק.
בעזרת ה' יתברך
יום א' פרשת לך לך, ד' מרחשון, שנת תשפ"ב לפרט קטן
... תחי', תלמידה בית פיגא ברסלב
איך האב ערהאלטן אייער בריוו.
זייט מתפלל פאר א גוטע שידוך, א שידוך האט נאר מיט'ן אייבערשטן; איך האב שוין גערעדט מיט אייערע עלטערן וועגן א שידוך פאר אייך, איך זוך פאר אייך א גוטער בחור מיט גוטע מידות און א ירא שמים.
דאנקט דעם אייבערשטן פאר אייערע טייערע עלטערן.
דער אייבערשטער זאל העלפן איר זאלט האבן הצלחה אין אלע ענינים.
בעזרת ה' יתברך
יום ד' פרשת נח, א' דראש חודש מרחשון, שנת תשפ"ב לפרט קטן
לכבוד מיין ליבער ... נרו יאיר
איך בעט דיר זייער, ווארט אויס אויף דיין ישועה, פארליר זיך נישט; בלייב שטארק מיט דיין אידישקייט, מיט דיינע שיעורים כסדרן, מיט דיין אמונה און מצוות.
נאך אביסל וועסטו א חתן ווערן, דו וועסט ווערן אן אדם השלם, עס איז כדאי צו ווארטן, עס וועט דיר זיין אזוי גוט און זיס; ווייל וויסן זאלסטו, נאר מיט אמונה האט מען א גוט לעבן, נאר מיט די תורה האט מען א זיס לעבן. דער רבי זאגט זאגט (שיחות הר"ן, סימן נג): "מִי שֶׁיֵּשׁ לוֹ אֱמוּנָה - חַיָּיו חַיִּים", ווער עס האט אמונה, זיין לעבן איז א לעבן; אלעס איז גוט, אלעס איז אזוי געשמאק, מען שפירט שוין דא בזה העולם א טעם גן עדן.
איך האף אז דו וועסט נישט אנטלויפן פאר שלחן עורך, דו וועסט זיך שטארקן, גארנישט אפלאזן פון דיינע גוטע זאכן, פון דיין עבודת השם.
דיין ראש ישיבה.
בעזרת ה' יתברך
מוצאי ראש השנה, ג' תשרי, שנת תשפ"ב לפרט קטן
לכבוד מיין טייערער ... נרו יאיר
איך האף אז קומענדיגע יאר ראש השנה וועסטו האבן שכל צו נעמען א פלאץ נעבן דעם בעל תפילה, דאווענען אינאיינעם מיט אלע בחורים. ראש השנה איז א צייט וואס מען איז דן דעם מענטש זיין גאנצע יאר, עס איז נישט קיין צייט זיך צו דרייען אינדרויסן און שמועסן מיט די עקלדיגע גוים - די שומרים ביים טיר.
איך שרייב דיר דעם בריוו אין עירפארט אויפ'ן וועג אהיים; איך בין גוט אויסגעמוטשעט, קוים וואס איך שלאף די גאנצע וואך אין אומאן; איך דאווען פאר'ן עמוד שחרית און מוסף, איך בלאז די תקיעות און געב דרשות, איך נעם אויף מענטשן די גאנצע צייט, איך בין גוט אויסגעמוטשעט; דאך שרייב איך דיר יעצט ווייל עס באדערט מיר, איך האב דיר נישט געזען ביים דאווענען, האסט זיך געדריידט אינדרויסן א גאנץ דאווענען.
איך שרייב דיר נאר ווייל איך האב דיר ליב, איך וויל דיין טובה; דו ביסט א יונגער בחור, אויב דו וועסט אכטונג געבן צו האבן גוטע חברים, דו וועסט דאווענען און לערנען - וועסטו זיך מאכן א גוטע נאמען, נאכדעם וועסטו קענען טון א גוטע שידוך, דו וועסט האבן א גוט לעבן.
זע צו לערנען אסאך משניות, דאס וועט דיר היטן פון אלעם שלעכטס.
דיין ראש ישיבה.
