בריוון פונעם ראש ישיבה שליט"א

בעזרת ה' יתברך - ערב שבת קודש פרשת נח, ה' מרחשון, שנת תשפ"ז לפרט קטן

... נרו יאיר

איך האב ערהאלטן א בריוו פון דיין ווייב, זי שרייבט אז זי האט נישט די כוחות מער צו אויפוועקן ענקער בחור, עס נעמט איר יעדן טאג צוויי שעה אים צו וועקן, זי שרייבט אז זי פאלט פון אירע כוחות.

איך בעט דיר זייער, זיי מחזק דיין ווייב זי זאל קוקן גוט אויף אים, און זי זאל וויסן אז אזוי איז ביי רוב שטיבער, עס נעמט שעות צו וועקן די בחורים; און מען ווערט נישט אויס גוט קינד, און מען ווערט נישט שלעכט - אז מען קומט נישט ארויס פון בעט, און ווי שענער ענק וועלן קוקן אויף אים - וועט ער האבן א מוט און כח אויפצושטיין.

איך בעט דיר זייער, מאכט נישט קיין חרבנות, צוקריגט ענק נישט מיט אים, א שאד אים צו פארלירן, פרובירט אים צו לייגן שלאפן און פרובירט אים צו וועקן, און אז עס גייט - איז גוט, און אז נישט - איז אויך גוט, און חס ושלום נישט ווערן מיט אים צוקריגט, אז ער זאל אנהייבן רעדן מיט חוצפה, חס ושלום זיך צו צוקריגן וועגן די זאכן.

מען דארף מיט חכמה וויסן יעדן קינד ווי אזוי מען קען אים אויפבויען און מיט וועלכע שפראך צו רעדן צו אים, און חס ושלום זיך צורייבן און בידים אים מאכן פאר א מחוצף; ווייל אין רוב פעלער ווען קינדער הייבן אן רעדן מיט חוצפה - איז דאס ווייל מען מאכט זיי מיט די אייגענע הענט פאר מחוצפים.

איך דארף מקצר זיין, א גוט שבת.

בעזרת ה' יתברך - יום ד' פרשת נח, ג' מרחשון, שנת תשפ"ז לפרט קטן

לכבוד ... נרו יאיר

קלאפ זיך נישט און צעברעך זיך נישט, ווייל אפילו מען זאל האבן געטון ביטערע עבירות - קען מען פאררעכטן און צוריק קומען צום אייבערשטן, אזוי ווי מיר זעען די וואך אין די פרשה שטארקע חיזוק אז אלע קענען תשובה טון; רש"י (בראשית ו, יד; דבור המתחיל עשה לך תיבת), ברענגט אראפ וואס די הייליגע חכמים זאגן (מדרש אגדת בראשית נח א, ב), פארוואס האט דער אייבערשטער געזאגט פאר נח צו בויען א תיבה, עס איז דא גענוג וועגן פארן אייבערשטן צו ראטעווען נח מיט די משפחה? נאר דער אייבערשטער האט געוואלט מענטשן זאלן תשובה טון, דער אייבערשטער האט געזאגט, אפשר ווען נח וועט בויען א תיבה פאר אזוי לאנג, פאר הונדערט און צוואנציג יאר - וועלן מענטשן תשובה טון; און דא רעדט מען פון די ערגסטע עבירות, למעשה האבן זיי נישט תשובה געטון; אבער פאר אונז איז דאס שטארקע חיזוק, אז מיר קענען זיך צוריק קערן צום אייבערשטן, אזוי ווי די הייליגע חכמים זאגן (מדרש שמות רבה יט, ד): "אֵין הַקָּדוֹשׁ בָּרוּךְ הוּא פּוֹסֵל לִבְרִיָּה, אֶלָּא לַכֹּל הוּא מְקַבֵּל, הַשְּׁעָרִים נִפְתָּחִים בְּכָל שָׁעָה, וְכָל מִי שֶׁהוּא מְבַקֵּשׁ לִכָּנֵס יִכָּנֵס", דער אייבערשטער ווארפט נישט אוועק קיין שום מענטש, די טירן זענען שטענדיג אפן, ווער עס וויל צוריקקומען צום אייבערשטן - קען שטענדיג צוריקקומען צו אים, און נאך זאגן די הייליגע חכמים (ברכות לד.): "בְּמָקוֹם שֶׁבַּעֲלֵי תְּשׁוּבָה עוֹמְדִים, אֵין צַדִּיקִים גְמוּרִים יְכוֹלִים לַעֲמוֹד שָׁם", א בעל תשובה איז זייער חשוב ביים אייבערשטן, ער קומט אן אויף א פלאץ וואו צדיקים קומען נישט אן; ווייל א מענטש וואס איז שוין געווען אריינגעכאפט ביים סמ"ך מ"ם און רייסט זיך ארויס פון דארט, ער קערט זיך צוריק צום אייבערשטן - איז זייער חשוב אויבן אין הימל.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת נח, א' דראש חודש מרחשון, שנת תשפ"ז לפרט קטן

... נרו יאיר

שטארק זיך מיט אלע כוחות, גיי נישט ארום מיט עצבות, גלייב אז דער אייבערשטער האט פאר דיר אויך אנגעגרייט א שידוך, און ביז דיין שידוך קומט - זאלסטו זיך שטארקן מיט התבודדות, און אז דו פאלסט וכו' - זאלסטו זיך אויס'טענה'ן צום אייבערשטן אז דו שפירסט ווי דו האסט נישט די מעגליכקייט צו זיין אפגעהיטן וכו' וכו', און וויסן זאלסטו אז דער אייבערשטער האט ליב ווען מען טענה'ט זיך אויס כביכול מיט אים, און מען בעט אים ער זאל מוחל זיין; ספעציעל בחורים וואס זיי זענען אזוי צעבראכן ביי זיך, קיינער ווייסט נישט וואס גייט אריבער אויף זיי, זיי ווילן חתונה האבן, זיי ווילן זיין אפגעהיטן און ריין און עס גייט זיי נישט, און וויפיל זיי בעטן זיך: 'טראגט אונז אן א שידוך', 'רעדט א שידוך' - גלייבט זיי קיינער נישט, מען מיינט אז זיי מאכן זיך וכו'; קיינער ווייסט נישט וואס א בחור גייט אריבער, נאר די אמת'ע צדיקים - זיי טענה'ן פאר די בחורים פארן בית דין של מעלה, אזוי ווי מוהרא"ש זכותו יגן עלינו פלעגט שטענדיג זאגן: "איך וועל טענה'ן אויבן אין הימל פארן בית דין של מעלה אז בחורים זענען נישט שולדיג, בחורים זענען וואויל, דאס וואס זיי פאלן אין עבירות, זיי זענען פוגם אין פגם הברית, זיי פאלן אראפ אין עֲשָׂרָה כִּתְרִין דִמְסָאֲבוּתָא - דאס איז ווייל זיי דארפן חתונה האבן, מען קען זיי נישט געבן קיין עונש".

איך וועל דיך נישט לאזן פאלן, איך וועל דיך שטענדיג מחזק זיין.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום ד' פרשת בראשית, כ"ו תשרי, שנת תשפ"ז לפרט קטן

... נרו יאיר, מאנסי

א זיסע יאר פאר דיר און פאר דיין משפחה; איך האב דיך נישט געזען די יאר אין אומאן ביים הייליגן רבינ'ס קיבוץ, איך האף אלעס איז ביי דיר גוט, איך האף דו ביסט שטארק אין עבודת השם, זיך נישט נאכלאזן, און זיך כסדר באנייען, מוהרא"ש האט אונז געלערנט, א שטארקער מענטש איז נישט איינער וואס פאלט קיינמאל נישט, א שטארקער מענטש איז איינער וואס וויפיל מאל ער זאל נאר פאלן – הייבט ער זיך אלץ צוריק אויף כאילו לא הי', ער הייבט אן פונדאסניי.

ברודער, דראפע זיך און דערהאלט זיך, והעיקר האב נישט קיין שום קשיות און טענות אויפן אייבערשטן, גלייב באמונה שלמה אז אלעס וואס גייט אריבער אויף דיר און דיין ווייב איז פאר דיין טובה, ווייל דער אייבערשטער מאכט נישט קיין שלעכטס, אלעס איז פאר די טובה, פאר די עתיד און נצחיות – פונעם מענטש.

מאך זיך א שיעור צו לערנען דעם הייליגן רבינ'ס ספרים, בפרט ספר הקדוש אשר בנחל, די זיסע בריוון פון מוהרא"ש וואס איז תמציות פון הייליגן רבינ'ס ספרים, דאס וועט אויפבויען דיין אמונה, דו וועסט ווערן פרייליך, דו וועסט שפירן דעם אייבערשטן, ווייל מיט אמונה ווערט אזוי זיס און ליכטיג, מען שפירט די איינגענעמע לויטערע ליכטיגע אמונה.

שרייב מיר מפעם לפעם, וועסטו מיך מחי' זיין.

בעזרת ה' יתברך - יום ה' פרשת בראשית, כ"ז תשרי, שנת תשפ"ז לפרט קטן

לכבוד ... נרו יאיר

איך בעט דיר זייער, שטארק זיך מיט אלע דיינע כוחות, און אז דו ביסט נאכאמאל אראפגעפאלן זאלסטו גלייבן באמונה שלימה אז דו קענסט נאך תשובה טון און ווערן א גרויסער צדיק. ווייל דער הייליגער רבי זאגט (לקוטי מוהר"ן חלק ב, סימן קיב): "אִם אַתָּה מַאֲמִין שֶׁיְּכוֹלִין לְקַלְקֵל, תַּאֲמִין שֶׁיְּכוֹלִין לְתַקֵּן", אויב דו גלייבסט אז דו קענסט טון שלעכטס - גלייב אז דו קענסט פאררעכטן; אפילו מען איז געפאלן אין גאר שלעכטע פלעצער, און גאר הארבע עבירות - קען מען פון דארט זיך צוריק קערן צום אייבערשטן, ווייל די הייליגע חכמים זאגן (יומא לח:): "בָּא לְטַמֵּא פּוֹתְחִין לוֹ", ווען איינער וויל זינדיגן עפנט מען אים אויף א טיר; בפשטות מיינט דאס אז מען עפנט אים א טיר ער זאל קענען גיין זינדיגן, דער רבי איז אבער מגלה גרויסע סודות דא, דער רבי זאגט (לקוטי מוהר"ן חלק א, סימן ט): "בא לטמא", איינער וואס איז נעבעך אראפגעפאלן, "פותחין לו", עפנט מען אים א טיר, מען העלפט אים ער זאל קענען צוריק קומען; פון הימל האט מען רחמנות אויף אים, מען ווארט ער זאל צוריק קומען צום אייבערשטן.

קוק נישט קיין מאוויס, קליפס, ווידיאוס און סטעטוס; אז מען פארשמירט די אויגן פארלירט מען די פרנסה, מען פארלירט די אריכות אפים, מען ווערט א נערוועזער, מען באקומט שוואכע נערווען; ווייל אז מען איז פוגם בברית קודש - פארלירט מען אלעס, און דאס ווילן זיי, דער סמ"ך מ"ם וויל אלעס אוועק נעמען, מאכן דעם מענטש אומגליקליך סיי ברוחניות און אויך בגשמיות, דעריבער זוכט ער אראפצואווארפן דעם מענטש אין פוגם זיין באות ברית קודש, ער מאכט אים קוקן עבירות רחמנא לצלן, ביז ער פאלט אין הוצאת זרע לבטלה רחמנא לצלן, און דעמאלט פארלירט מען אלעס.

א אינגערמאן האט מיר דערציילט, ער האט געדארפט א גרויסע ישועה, עפעס פריוואט, עס איז נישט יעצט צו דערציילן, און ער האט זיך מקבל געווען צווישן אים אינעם איבערשטן אז ער גייט מער נישט קוקן קיין קליפס, מאוויס וכדומה (ער האט נישט געקוקט עבירות, ער פלעגט קוקן נייעס מיט סתם זאכן), און ער האט געזען א ישועה, ממש א נס; זאלסטו אויך דאס אויספרובירן, אנהייבן היטן דיינע אויגן - וועסטו זען א נס, וועסט זען ישועות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת בראשית, כ"ה תשרי, שנת תשפ"ז לפרט קטן

לכבוד ... נרו יאיר

דאנק דעם אייבערשטן - וועסטו באקומען כח, דאנקען און לויבן דעם אייבערשטן געבט פיזישע כוחות און בעיקר גייסטישע כוחות; פרוביר עס אויס יעצט, עס קאסט נישט קיין געלט, זאג יעצט ארויס די ווערטער: "שכוח אייבערשטער פאר מיין שיינע לעבן, שכוח אייבערשטער פאר אלע גוטע זאכן וואס דו טוסט מיט מיר"; ווי אזוי שפירסטו זיך? שפירסט אודאי בעסער, זאג עס נאכאמאל - וועסטו שפירן נאך בעסער, און ווי מער דו וועסט עס טון - וועסטו ווערן מער און מער אנגעפילט מיט חיות צום לעבן.

די גאנצע וועלט דרייט זיך איבער מיט די נייעס וואס האט פאסירט חול המועד ווי א טעראריסט האט געהאלטן אינמיטן אראפווארפן אן אנגעפילטע פליגער מיט אידן השם ישמרינו, און ניסים האט פאסירט אז איינער אויפן פליגער האט געראטעוועט די גאנצע פליגער; מענטשן קענען נישט קומען צו זיך פון די מעשה, אבער קיינער כאפט נישט אז יעדע רגע מאכט דער אייבערשטער מיט אונז ניסים און קיינער ווייסט נישט און קיינער רעדט נישט פון דעם, אזוי ווי די הייליגע חכמים זאגן (נדה לא.): "לעולם אפילו בעל הנס אינו מכיר בנסו", דער מענטש וואס האט געהאט א נס כאפט זיך נישט און אנערקענט נישט די גרויסע וואונדער וואס דער אייבערשטער טוט מיט אים, אזוי ווי די הייליגע חכמים זאגן (מדרש תהלים, קו), די וועלט קען נישט אנגיין אן ניסים, און מענטשן ווייסן נישט וויפיל ניסים דער אייבערשטער טוט מיט זיי יעדע רגע, אויף דעם שטייט (תהלים קלו, ד): "לעושה נפלאות גדולות לבדו", נאר דער אייבערשטער אליין ווייסט די נסים וואס ער מאכט מיט אונז.

עס קומט א לאנגע ווינטער, איך וויל דיר בעטן דו זאלסט זיך מאכן א סדר היום ווען אויפצושטיין און וויפיל זיין אין שול, און וויפיל זיין ביי די ארבעט; דו ווערסט עלטער, דו דארפסט שוין אנהייבן טראכטן מער פון תכלית.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת וזאת הברכה א', צווייטע אות פון שם הוי"ה, י"ב תשרי, שנת תשפ"ז לפרט קטן

... נרו יאיר, לעיקוואד

ווען איך האב גענומען דיין ענוועלאפ פון "פדיון נפש" האט מיך זייער געכאפט ביים הארץ ווי דו שרייבסט אז די יאר האסטו מפיץ געווען אין שטאט לעיקוואד הונדערט צוואנציג טויזנט גליונות, וואו! דאס איז א שיינע נומער, דאס איז א שיינע מתנה צו קומען צום הייליגן רבי'ן אויף ראש השנה.

די יאר זאלסטו ווייטער עוסק זיין אין פארפלייצן אלע שולן אין לעיקוואד מיט די גליונות; סיי אין אידיש, אין לשון הקודש און אויך אין ענגליש. אויך זאלסטו גיין אין כוללים, ווייל די כולל אינגעלייט דארפן גאר אסאך חיזוק. די הייליגע חכמים זאגן (סוכה נב.): "כָּל הַגָדוֹל מֵחֲבֵירוֹ", ווי גרעסער מען איז, "יִצְרוֹ גָדוֹל הֵימֶנוּ", דארף מען מער חיזוק; די אלע אינגעלייט און אויך בחורים וואס לערנען אין ישיבה דארפן מער חיזוק ווי אינגעלייט און בחורים וואס ארבעטן; זאלסטו גיין אין די כוללים און ישיבות מיט די גליונות, מיט די קונטרסים, מחזק זיין די בני הנעורים זיי זאלן בלייבן ביים אייבערשטן, און בלייבן ביי די תורה.

די הייליגע חכמים דערציילן (תענית כא.), אילפא און רבי יוחנן זענען ביידע געווען אין כולל און געלערנט תורה, אבער עס איז איבערגעגאנגען אויף זיי וואס איז אריבערגעגאנגען, זענען זיי ביידע ארויס פון כולל, אויפן וועג ארויס זענען זיי געזיצן אונטער א שוואכע וואנט, במקום סכנה, זענען צוויי מלאכים געקומען, זאגט איין מלאך פארן צווייטן: "לאמיר זיי הרג'ענען, ווייל זיי האבן אפגעלאזט דאס לערנען תורה", זאגט דער צווייטער מלאך: "ניין, טשעפע נישט, ווייל איינער פון זיי וועט נאך ווערן א גרויסער ראש ישיבה".

די גמרא פירט אויס, רבי יוחנן האט געהערט די שמועס, אבער אילפא האט דאס נישט געהערט, און רבי יוחנן איז צוריק אין ישיבה, אין כולל און געווארן דער גרויסער רבי יוחנן, עד כאן.

נו, וואס זעסטו פון די מעשה? מיט אביסעלע חיזוק ווערט מען א רבי יוחנן; שטעל זיך פאר ווען אילפא טרעפט אויך א מפיץ (מלאך), און זאגט אים: "דראפע זיך און דערהאלט זיך" – וואלט געווען נאך א ראש ישיבה, רבי אילפא, אבער 'רבי אילפא לא שמע', ער האט נישט געטראפן א גליון וואס זאל אים זאגן: "אחי, חזק ואחוז עצמך בכל כוחך", והבן למעשה.

בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן

לכבוד ... נרו יאיר, מאנסי

דער הייליגער רבי זאגט (שיחות הר"ן, סימן שב): "דֶער עִיקָר אִיז 'מִבֶּטֶן שְׁאוֹל שִׁוַּעְתִּי'", ווען מען שפירט זיך אז מען איז נישט באליבט וכו', דעמאלט זאל מען שרייען צום אייבערשטן, אזוי ווי יונה הנביא ווען ער איז געווען אין בטן שאול, האט ער פון דארט געשריגן צום אייבערשטן (יונה ב, ג); אזוי דארפן מיר טון, נישט אפלאזן דאס וועלן זיין גוט, נישט אויפגעבן, נאר פון וואו מען געפינט זיך, אפילו טיף אין בלאטע – זאל מען פון דארט שרייען: "טאטע, נעם מיך ארויס פון בלאטע".

דער הייליגער רבי האט געמאכט א כרוז דעם לעצטן שבת נחמו, דער רבי האט געזאגט הויך אויפן קול: "געוואלד, זייט אייך נישט מייאש, קיין יאוש איז גארנישט פארהאן" (לקוטי מוהר"ן חלק ב, סימן עח); און מען הערט נאכאלץ דעם קול פון רבי'ן, דער קול ווערט נאר שטערקער, אז אפילו מען איז אראפגעפאלן וכו' זאל מען נישט אויפגעבן, נאר ווייטער וועלן און זיך בענקען צו זיין גוט, און ארויסזאגן די גוטע רצונות פארן אייבערשטן, ווייל דער אייבערשטער האט א גרויסע נחת רוח צו הערן די קול פון די געפאלענע און פארבלאנזשעטע, ווי זיי בענקען זיך צוריק צו קומען, והבן למעשה.

בעזרת ה' יתברך - יום ב' פרשת בראשית, כ"ד תשרי, אסרו חג, שנת תשפ"ז לפרט קטן

לכבוד ... נרו יאיר וזוגתו תחי'

איך פארשטיי דיינע געפילן וכו', ווען דו מיט דיין ווייב זעען ווי קיינער איז נישט מכיר טובה אויף וואס ענק טוען, ענק הערן נישט קיין איין גוט ווארט וכו', און דאס האט צוגעברענגט אז דו זאלסט ווערן אויסגעברענט וכו'; דאך בעט איך דיר זייער, לכבוד די נייע יאר און לכבוד די גוטע נייעס וואס איז דא ביי ענק – זאלן ענק יא צוריק אנהייבן העלפן מיטן משמש זיין דעם הייליגן רבי'ן, און אז ענק באקומען נישט קיין גוטע ווערטער מיט מתנות – זאלן ענק זיך אליין מחזק זיין איינער דעם צווייטן, און זיך דערמאנען: 'ווי האט מיך דער רבי געפונען? ווי האב איך אויסגעזען אנעם רבי'ן? און צו וואו האט מיך דער רבי געברענגט, און וואס נאך ווארט אונז וכו'?

ווער האט געגעבן פאר מוהרא"ש גוטע ווערטער פארן מאכן אזא מהפכה אין די וועלט פארן דרוקן און פארשפרייטן דעם רבינ'ס ספרים אז מיר זאלן האבן אזא ליכטיגקייט? קיינער; קיינער האט נישט געגעבן גוטע ווערטער, מען האט נאר געשפעט וכו', און מוהרא"ש האט נישט געקוקט אויף דעם, מוהרא"ש האט ווייטער משמש געווען דעם הייליגן רבי'ן מיט אזא נאמנות און מיט אזא מסירות הגוף והנפש; מיר דארפן גיין אין די וועגן, מיר דארפן האבן הכרת הטוב פארן רבי'ן ותלמידיו הקדושים, טון ווייטער פאר הפצה, פארשפרייטן דעם רבינ'ס ספרים, עצות, חיזוק פאר אלעמען – אן ערווארטן...

בעזרת ה' יתברך - ערב שבת קודש פרשת האזינו - שבת תשובה, ז' תשרי, שנת תשפ"ז לפרט קטן

... נרו יאיר, בית שמש

איך האב ערהאלטן דיין בריוו.

איך האב הנאה צו זען דיינע חידושי תורה וואס דו ביסט מחדש מיט די הקדמות פון הייליגן רבי'ן, וואס בלאזט אריין חיות אין נשמות ישראל, אז אפילו א 'ציפור שמרדה', א נשמה וואס איז פארבלאנזשעט פון די קדושה – "כֹּל הֵיכָא דְּאִיתֵיהּ בְּבֵי גַזָּא דְּרַחֲמָנָא אִיתֵיהּ דִּכְתִיב 'לַה' הָאָרֶץ וּמְלוֹאָהּ'" (חולין קלט.) איז מען נאכאלץ ביים אייבערשטן, מען קען זיך נאך צוריק קערן, מען קען תשובה טון.

לכבוד די נייע יאר זאלסטו זיך שטארקן אין 'הפצה', גיי הפצה ביי די פרומע שטיבער, גיי הפצה צו כולל אינגעלייט און בחורי ישיבה; ביי ענק איז דא אסאך מפיצים וואס גיין צו די נישט פרומע געגנטער, מיר דארפן מפיצים ביי די פרומע; קיינער ווייסט נישט וואס גייט אריבער אויף די ערליכע אינגעלייט, מען מיינט אז מען דארף גיין הפצה נאר ביי די וואס מען האט נעבעך אוועק געפירט פון אידישקייט און אויסגע'שמד'ט רחמנא לצלן, מען דארף היינט אסאך מער עוסק זיין אין קירוב קרובים, די היימישע ציבור איז אזוי צעבראכן, דער בילד פון אינדרויסן איז טאקע זייער שיין, אבער פון אינעווייניג איז מען אויסגעלאשן און אויסגעברענט, מען איז אויפגעגעבן, און אלע ווארטן אויף חיזוק, חיזוק אויף אמונה; זאלסטו גיין דיקא אין כוללים, אין ישיבות און אין שולן.

אויך בעט איך דיר זייער, זיי מחזק אנשי שלומינו, בעיקר די בחורים און די אברכים - זיי זאלן הערן די שיעורים, די טעגליכע שיעורים וואס מען געבט אין ישיבה און זיכער די וועכנטליכע שיעור פאר אינגעלייט; עס איז אזוי וויכטיג צו הערן דעם רבינ'ס עצות, חיזוק און שכל, נאר אזוי קען מען זיך דערהאלטן, נאר אזוי קען מען זיך האלטן פריש, און נישט ווערן אלט.

דער אייבערשטער זאל העלפן זאלסט האבן הצלחה אין אלע ענינים.

א גמר חתימה טובה.

בעזרת ה' יתברך

יום ו', ערב ראש השנה שנת תשפ"ז לפרט קטן

...

בזכות וואס דו העלפסט דרוקן דעם רבינ'ס ספרים און דו העלפסט די קרן הדפסה – זאלסטו האבן א גוט געבענטשט יאר מיט אלע ברכות און ישועות.

ובעיקר זאלסטו ווייטער האבן די געפיל צו העלפן דרוקן און פארשפרייטן דעם רבינ'ס עצות, שכל און חיזוק – פאר די וועלט.

א כתיבה וחתימה טובה.