בריוון פונעם ראש ישיבה שליט"א

בעזרת ה' יתברך - יום א' פרשת נשא א', ראש חודש סיון, שנת תשפ"ו לפרט קטן

... נרו יאיר

טייערער ברודער, הארציגער חבר, יעצט אין די זומער טעג זאלסטו זיך מקבל זיין מיט א פעסטע אפמאך אפצוהיטן דיינע אויגן, און אז דו ביסט נכשל געווארן מיט ראיות אסורות - זאלסטו זיך אויסוויינען פארן אייבערשטן ער זאל דיר מוחל זיין, ווייל נאר דורך טרערן פון תשובה וואס מען וויינט זיך אויס צום אייבערשטן קען מען אויסוואשן די אויגן, און מען קען פאררעכטן די שרעקליכע פגם; מען דארף פארגיסן טייכן טרערן צום אייבערשטן אז מיר זאל זיך קענען היטן די אויגן, ווייל אלע צרות וואס קומען אויפן מענטש איז נאר ווייל מען היט זיך נישט די אויגן; מען פארלירט אזויפיל גוטס דורך זיך נישט היטן די אויגן, מען פארלירט די שידוך, מען פארלירט די שלום בית און מען פארלירט די פרנסה.

די הייליגע חכמים דערציילן (ספר חסידים, סימן שפז), א איד איז געקומען מיט א טענה צום הייליגן רבי יהודא החסיד היתכן ער האט אסאך געפאסט און מתפלל געווען אויף א געוויסע שידוך, און מען האט נישט אנגענומען זיינע תפילות, "אָמַר הַחָכָם", האט אים דער צדיק געענטפערט: "זֶה הַצַּעַר הַבָּא עָלֶיךָ בִּשְׁבִיל שֶׁהָיִיתָ צוֹפֶה בַּנָּשִׁים, וְזִמֵּן לְךָ מַה שֶׁלֹא מָצְאָה חֵן בְּעֵינֶיךָ", דיין גאנצע צער וואס דו גייסט אריבער איז ווייל דו היטסט נישט דיינע אויגן.

ליבער ברודער, הארציגער חבר, מאך זיך א קביעות צו גיין התבודדות, זוך א פלאץ; א שטילע פלאץ, א ליידיגע פלאץ, און דארט זאלסטו זיך מתבודד זיין, זאלסט זיך אויסגיסן דיין הארץ צום אייבערשטן, וויין זיך אויס און בעט: "הייליגער באשעפער זיי מיר מוחל אז איך האב ביז אהער נישט געהיטן מיינע אויגן, איך שעם זיך אזוי שטארק, פון אינדרויסן שפיל איך א שיינע שפיל, איך שטעל זיך אהער ווי אן ערליכער און פרומער, אלע קענען מיך ווי א טייערער און אן איידעלער, אבער פון דיר הייליגער באשעפער קען איך זיך נישט באהאלטן, דו ווייסט דאך אלעס, דו זעסט אלעס, אנא השם איך בעט דיר אייבערשטער, העלף מיר איך זאל קענען ארויס גיין פון מיין בלאטע, איך זאל זוכה זיין צו הייליגע אויגן, איך זאל זוכה זיין צו ריינע אויגן, העלף מיר בזכות די הייליגע צדיקים וואס האבן זיך מוסר נפש געווען פאר דיר און פאר כלל ישראל, עננו ה' עננו, העלף מיר איך זאל מער נישט האבן קיין איין שלעכטע קוק, איך זאל ניצן מיינע אויגן נאר צו לערנען תורה, אמן סלה".

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום ג' פרשת נשא א', ג' סיון, שנת תשפ"ו לפרט קטן

לכבוד ... נרו יאיר

ליבער ברודער, הארציגער חבר, זיי זיך מקבל צו לערנען יעדן טאג די הייליגע תורה, מאך זיך א סדר צו לערנען יעדן טאג מקרא, משנה, גמרא און הלכה. ביים אנהייב וועסטו נאכנישט פארשטייין אלעס וואס דו לערנסט, דאך זאלסטו לערנען, זאלסט גורס זיין די ווערטער, זאג די ווערטער, ווייל דער זוהר הקדוש זאגט (קדושים פה:), ווען א מענטש לערנט תורה און ער פארשטייט נישט וואס ער לערנט, "וְהוּא בִּרְחִימוּתָא דְּאוֹרַיְיתָא, לָעֵי בָּהּ, וּמְגַּמְגֵּם בָּהּ בְּגִמְגוּמָא דְּלָא יָדַע", און פון גרויס ליבשאפט צו די תורה, לערנט ער ווייטער אפילו ער פארשטייט נאכנישט וואס ער לערנט; "כָּל מִלָּה וּמִלָּה סַלְּקָא", יעדעס ווארט תורה וואס ער לערנט גייט ארויף אויבן אין הימל, "וְקוּדְשָׁא בְּרִיךְ הוּא חַדֵּי בְּהַהִיא מִלָּה", און דער אייבערשטער פרייט זיך מיט יעדע ווארט תורה, דער אייבערשטער נעמט די ווערטער און פלאנצט איין די ווערטער אויבן אין הימל ארום א טייך, און עס ווערט פון זיי גרויסע 'ערבות' ביימער, עיין שם.

ליבער ברודער, זע אז דיינע טעג און דיינע יארן זאלן דיר נישט אריבער גיין מיט גארנישט און מיט נישט; פארוואס זאלסטו נישט אנהייבן לערנען תורה? די תירוצים דיינע זענען נישט קיין אמת'ע תירוצים, און אז דו האסט נישט קיין חברותא, דו האסט נישט קיין מסגרת וכדומה - הייב אן פאר דיר אליין לערנען, און אז מען האט דיך צעקלאפט אין דיינע יונגע יארן, מען האט דיר אויפגעוויזן אז דו וועסט שוין מער קיינמאל נישט זיין א תלמיד חכם - איז דאס נישט קיין תירוץ אויף נישט צו לערנען. נעם א משניות און הייב אן מסכת ברכות, זאג די ווערטער פון די משנה הויך מיט א געשמאק און מיט א זיסקייט, זאג א משנה נאך א משנה, ביז דו וועסט ענדיגן די ערשטע פרק, נאכדעם הייב אן פרק ב, און אזוי גיי ווייטער ביז דו וועסט ענדיגן די ערשטע מסכתא, נאכדעם זאלסטו אנהייבן מסכת פאה; אזוי זאלסטו לערנען מסכתא נאך מסכתא, ביז דו וועסט ענדיגן סדר זרעים. נאכדעם זאלסטו גיין צו סדר מועד, ביז דו וועסט זוכה זיין צו ענדיגן ששה סדרי משנה, און אזוי זאלסטו טון מיט גמרא; הייב אן לערנען מסכת ברכות, לערן א בלאט נאך א בלאט, און אז דו פארשטייסט נישט - זאלסטו נישט ווערן צעבראכן, זאלסט בעטן און וויינען צום אייבערשטן עס זאל זיך עפענען פאר דיר דיינע אויגן און דיין פארשטאנד, דו זאלסט זוכה זיין צו פארשטיין די הייליגע תורה, און אז דו פארשטייסט נאכאלץ נישט - זאלסטו ווייטער זאגן די ווערטער ביז דו וועסט קומען צו פארשטיין.

עס קען זיך הערן אינטערעסאנט, סתם זאגן די ווערטער, איז דאס דען לימוד התורה? ליבער ברודער, ערשטנס זאלסטו וויסן אז יא, דאס אליין איז לימוד התורה; די הייליגע חכמים זאגן (עבודה זרה יט.): "לעולם ליגריס איניש", א מענטש זאל לערנען בגירסא, "ואף על גב דלא ידע מאי קאמר", אפילו ער פארשטייט נאכנישט דאס לערנען; און צווייטנס, דאס איז די וועג צו קומען צו פארשטיין, ווייל ווען מען איז מדקדק און מען וויל גלייך פארשטיין די טיפקייט פון יעדע ווארט תורה - טוט דאס מבלבל זיין דעם מענטש, און דאס קען אמאל צוברענגען אז מען זאל אפלאזן דאס לערנען, אבער אז מען לערנט מער אויפן שנעלן וועג, און אז מען פארשטייט נאכנישט אזוי קלאר גייט מען ווייטער, מען שטעלט זיך נישט אפ - דאס ברענגט א שטארקע חשק צו לערנען מער און מער, און דאס מאכט מען זאל פארשטיין דאס לערנען.

הייב שוין אן לערנען, קוק נישט אויף קיינעם, און זיי גרייט אז מען וועט דאס דיר אוועק מאכן, מענטשן וועלן שמייכלען, מען וועט לאכן וכו', אויך וועט מען זיך וועלן טענה'ען מיט דיר, ווייל אזוי גייט עס מיט יעדע זאך אין עבודת השם, ווי נאר א מענטש הייבט אן דינען דעם אייבערשטן מיט אן אמת דארף ער אריבער גיין די מניעה אז מען שפעט און מען לאכט פון אים, און טאקע דערפאר הייבט אן דער הייליגע שלחן ערוך אין די ערשטע סימן: "ולא יבוש מפני המלעיגים עליו בעבודת השם יתברך", מען זאל זיך נישט שעמען פון די וואס שפעטן אפ פון דינען דעם אייבערשטן; ווייל דאס איז די וויכטיגסטע הקדמה איידער מען הייבט אן לערנען שלחן ערוך, צו וויסן אז עס גייען זיין מענטשן וואס גייען פון אים שפעטן; דערפאר זאלסטו זיין שטארק נישט אפצולאזן דאס לערנען די הייליגע תורה, און ביז א קורצע צייט וועסטו זוכה זיין אז עס וועט זיך עפענען פאר דיר דיינע אויגן און דיין שכל, דו וועסט זוכה זיין צו פארשטיין דאס לערנען און ווערן א גרויסער צדיק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת נשא א', ב' סיון, שנת תשפ"ו לפרט קטן

לכבוד ... נרו יאיר

יעצט ווען עס קומט דער הייליגער יום טוב שבועות, זמן מתן תורתינו, מיר גייען זוכה זיין צו מקבל זיין די תורה פונדאסניי - זאלסטו זיך זייער פרייען, ווייל די גאנצע וועלט שטייט נאר בזכות וואס מיר האבן מקבל געווען די תורה. די הייליגע חכמים זאגן (שמות רבה מז, ד), וואלטן די אידן נישט מקבל געווען די תורה - וואלט דער אייבערשטער געמאכט אויס וועלט; קומט אויס אז היינט יום טוב שבועות, זמן מתן תורתינו - איז זייער א פרייליכע צייט, אז מיר האבן מקבל געווען די תורה און מיר האלטן די תורה, מיר זענען מחי' די גאנצע וועלט, א גאנץ יום טוב דארף מען זיין נאר פרייליך.

ליבער ברודער, יעצט אינעם יום טוב שבועות, זמן מתן תורתינו - זאלסטו זיך זייער פרייען, לאז זיך נישט צעברעכן, פריי זיך מיט 'שלא עשני גוי', א גוי בין איך נישט, איך בין א איד. די הייליגע חכמים זאגן (מדרש פליאה), גלייך ווען דער אייבערשטער האט אנגעהויבן זאגן די ערשטע דיבור: "אנכי ה' אלוקיך" - האט משה רבינו שוין אויסגעשריגן: "שלא עשני גוי"; ווייל דאס איז דאך די גרעסטע שמחה, אז מיר זענען אויסדערוועלט, מיר זענען דעם אייבערשטנ'ס קינדער; פון די שמחה קען מען נישט אראפפאלן, ווייל אפילו מען זעט זיך זייער ווייט, מען זעט זיך זייער געפאלן, מען לערנט נישט, מען דאווענט נישט, מען זעט נאר שלעכטס אין זיך, מען האט נישט מיט וואס צו זיין פרייליך - קען מען נאכאלץ זיין פרייליך מיט דעם אז מען איז נישט קיין גוי, און דאס איז נאך א טעם פארוואס מיר מאכן די ברכה יעדן טאג אז מיר זענען נישט קיין גוי, לכאורה וואלט ווען געווען ריכטיג צו זאגן א ברכה: "שעשני ישראל", אז מיר זענען אידן, וואס מאכט מען א פארקערטע ברכה, אז מיר זענען נישט קיין גוי? נאר דער יצר הרע זוכט אלע וועגן ווי אזוי צו צעקלאפן דעם מענטש און אים אויפווייזן אז ער איז שוין גארנישט ווערד, און פון אים וועט שוין גארנישט זיין; וואלט דער מענטש אריין אין א קטנות הדעת נישט צו מאכן די ברכה 'שעשני ישראל', ער וואלט זיך געקלאפט: 'בין איך דעם א איד? אזוי פירט זיך אויף א איד? קען איך דען מאכן די ברכה בשם ומלכות – 'שעשני ישראל'? איך בין נישט אזוי ווי מען דארף צו זיין'; דערפאר מאכן מיר די ברכה 'שלא עשני גוי' אז אפילו דער וואס איז גוט צעבראכן און ער האלט זיך פאר א גארנישט - קען אויך אויסשרייען: 'שלא עשני גוי, וואס זאל נאר זיין, א גוי בין איך נישט, איך בין באשאפן מזרע ישראל'; על כן ליבער ברודער זאלסטו זיך זייער פרייען מיט 'שלא עשני גוי', אז מיר זענען זוכה צו קבלת התורה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת נשא א', ראש חודש סיון, שנת תשפ"ו לפרט קטן

לכבוד ... נרו יאיר

מען קען נישט צוקומען צו שמחה נאר דורך תפילה; מען דארף בעטן דעם אייבערשטן יעדן טאג אז מען זאל זוכה זיין צו זיין פרייליך, ווייל ווען א מענטש איז פרייליך וועט ער צוקומען צו די העכסטע מדריגות וואס איז דא אויף די וועלט.

שמחה פארברענט אלע קליפות, און מוהרא"ש זאגט אז דאס איז דער סימן ווי אזוי א מענטש קען זיך מעסטן צי ער איז ביי די קדושה, צי חס ושלום ביי די טומאה; ער זאל קוקן אויב ער איז פרייליך, ווייל שמחה פארברענט אלע קליפות, וואס זייער גאנצער זאך איז עצבות ומרה שחורה, אזוי ווי עס שטייט (ישעיה סה, כה): "וְנָחָשׁ עָפָר לַחְמוֹ", עפר דאס איז עצבות ועצלות, וואס דאס קומט פון יסוד העפר (עיין לקוטי מוהר"ן חלק א, סימן קפט).

יעצט ווען עס קומט דער הייליגער יום טוב שבועות, 'זמן מתן תורתינו', מיר גייען זוכה זיין נאכאמאל צו מקבל זיין די הייליגע תורה, זאלסטו זיך פארנעמען מער נישט צו רעדן קיין שלעכטס אויף קיין שום איד, ווייל די הייליגע חכמים זאגן (ויקרא רבה ט, ט), ווען די אידן זענען געגאנגען אין מדבר איז אלץ געווען מחלוקת, און ווען מען איז געקומען צום בארג סיני - דארט האבן אלע אידן שלום געמאכט, מען האט זיך נישט געקריגט, האט דער אייבערשטער געזאגט: "הֲרֵי שָׁעָה שֶׁאֲנִי נוֹתֵן תּוֹרָה לְבָנָי", יעצט איז די צייט צו געבן די תורה פאר די אידן, ווייל מען קען נישט מקבל זיין די תורה נאר דורך ליבשאפט און אחדות; אז דו וועסט קוקן מיט רחמנות אויף אנדערע - וועט אוועק פאלן די פיינטשאפט, דו וועסט זיך קענען אויסקומען מיט יעדן איינעם; בפרט אין שטוב, דארט דארף מען זיך זייער פארלייגן און טון אלעס אבי עס זאל זיין שלום; מיט די עלטערן און מיט די קינדער און מיט די געשוויסטער. זוך נישט צו זיין גערעכט, זוך צו מאכן שלום - וועסטו זוכה זיין צו באקומען די הייליגע תורה, אזוי ווי די הייליגע חכמים זאגן (פסיקתא דרב כהנא יב, יד), דער אייבערשטער זאגט: "התורה כולה שלום", פארוועם געב איך איר? פאר די וואס זענען בשלום, אזוי ווי עס שטייט (משלי ג, יז): "וכל נתיבותיה שלום".

טייערער ברודער, הארציגער חבר, מיר שטייען נאכאמאל ביים בארג סיני, מיר זענען מקבל די תורה; זאלסטו אפלאזן די עצבות ומרה שחורה, מאך זיך א שטארקע קבלה אז דו גייסט נישט רעדן קיין איין שלעכט ווארט אויף קיינעם, דאס וועט דיר העלפן דו זאלסט קענען מקבל זיין די תורה און קענען לערנען פלייסיג די הייליגע תורה, דער הייליגער רבי זאגט (שיחות הר"ן, סימן צא): "סגולה להתמדת התורה" - נישט צו רעדן אויף אידישע קינדער, ווייל נאר אז מען קוקט גוט אויף יעדן איינעם - קען מען ליב האבן די תורה, עיין שם.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום ה' פרשת במדבר, כ"ז אייר, ער"ח סיון, שנת תשפ"ו לפרט קטן

שבתי מארקוס נרו יאיר, וויליאמסבורג

איך דאנק דיך זייער פאר אלעס וואס דו העלפסט מיר, און וואס דו טוסט פאר אונזערע מוסדות, סיי מיטן צאלן די רענט פאר די ישיבה אין שטאט, און סיי פארן "קרן הבנין", פארן שאפן די געלט פאר די בנינים אין קרית ברסלב ליבערטי.

יעדע מאל איך בין אין שטעטל און איך גיי באזוכן די חדר – דערקוויקט מיר מיין הארץ צו זען די שיינע שטאק וואס מען האט אויפגעבויט; אזא רחבות, אזא באקוועמקייט, ליכטיג און לופטיג, ממש א מחי'.

אויך יעצט ווען דו האסט זיך אונטערגענומען מיט דיין שותף אשר בער אינדארסקי נרו יאיר, צו אויפבויען פיר כיתות אין מחנה אילן החיים, פאר די קינדער צו לערנען זומער אין וואלד; וואויל איז דיר, וואויל איז ענקער חלק, דער אייבערשטער זאל דיר געבן כח און חן, אז דו און דיין שותף, ענק זאלן קענען ווייטער זיין די גוטע שלוחים צו בויען די מוסדות, ענק זאלן זוכה זיין צו נחת פון ענקערע דורות.

יעצט שבועות איז דאך דיין יום טוב, איך געדענק אז דו ביסט מקורב געווארן יארן צוריק אין אן ערב שבועות פארנדיג קיין קרית יואל, און אויפן וועג האסטו אויסגעהערט א שיעור פון ישיבה, הכנה לקבלת התורה, און דאס האט דיר אויפגעפלאקערט דיין הארץ צו לערנען אויפן סדר דרך הלימוד פון הייליגן רבי'ן (המבואר בשיחות הר"ן, סימן עו), אשרינו...

בעזרת ה' יתברך - יום ה' פרשת במדבר, כ"ז אייר, ער"ח סיון, שנת תשפ"ו לפרט קטן

לכבוד הרב ... שליט"א

היינט איז א טאג וואס אלע בעטן פאר גוטע קינדער, מען לויפט צו קברי צדיקים, מען זאגט יום כיפור קטן און מען וויינט זיך אויס מיט תפילת השל"ה.

איך ווייס פון דיינע שווערע נסיונות, איך טראכט אן עצה פאר דיר, יעדע מאל דו ווילסט גיין אין קיאסק קוקן וכו' – זאלסט טראכטן: 'ווי אזוי וואלט איך געשפירט ווען מיין זון אדער מיין טאכטער טוען דאס? ווי אזוי וועל איך רעאגירן? וואס וועל איך טון?'

וויסן זאלסטו, אלעס וואס דו טוסט, אפילו דו טוסט עס באהאלטענערהייט – וועט זיין פאר דיינע קינדער שווערע נסיונות, דאס וואס דו ווילסט אז דיינע קינדער זאלן זיין – דאס דארפסטו טון.

דער הייליגער רבי זאגט (ספר המדות אות ספר חלק ב, סימן ה): "מִי שֶׁאֵין מִסְתַּכֵּל עַל נָשִׁים", ווער עס היט זיינע אויגן, "זוֹכֶה שֶׁזַּרְעוֹ יְחַבְּרוּ פֵּרוּשִׁים עַל הַתּוֹרָה", איז זוכה צו קינדער תלמידי חכמים וואס וועלן ארויסגעבן ספרים, שרייבן חידושי תורה.

ליבער ברודער, יעצט ווען עס קומט די הייליגע יום טוב שבועות, פון יעצט זאלסטו מער נישט אריבערטרעטן די שוועל פון קיאסק, גיי מער נישט אהין, זיי מקבל די תורה; דו ביסט דאך אזא גוטער מענטש, האסט אזעלכע איידלקייטן, האסט אזא גוטע נאטור, מיט א הייליגע נשמה, האסט א וואוילע ווייב מיט זיסע קינדער, גיי מער נישט קוקן וכו', טו עס פאר דיינע קינדער; איך קען נישט טראכטן און איך וויל נישט טראכטן פון די צער וואס טאטע מאמע גייען אריבער ווען זיי זעען ווי די קינדער נעמען די סמארטפאון וכו', אדער גייען קוקן וכו'.

הייב אן משניות, זאג יעדן טאג אכצן פרקים משניות מיט דעם יום תהלים; די תורה וועט דיר אויסוואשן דיין נשמה, עס וועט דיך מאכן פאר א גרויסער צדיק, און זיי מקפיד צו דאווענען די דריי תפילות מיט מנין.

איך האב דיך ליב, איך ווייס אז דו ווילסט זיין גוט, דו ביסט פשוט געפאנגען – איינגעשפארט אין תפיסה, אבער מיט די חיזוק פון הייליגן רבי'ן, די עצות און חיזוק פון צדיק – קען מען ארויסגיין פון אלע תפיסות.

בעזרת ה' יתברך - יום ה' פרשת במדבר, כ"ז אייר, ער"ח סיון, שנת תשפ"ו לפרט קטן

... נרו יאיר וזוגתו תחי'

די גבאים פונעם "קרן הבנין", האברך שבתי מיט אשר בער נרם יאיר האבן מיר דערציילט אז ענק האבן מנדב געווען צוויי כיתות אין "בית פיגא" אין שטעטל, איך וויל ענק בענטשן, דער אייבערשטער זאל ענק געבן נחת ביי ענקערע קינדער, ערליכע אידישע דורות מיט הצלחה, געזונט און סייעתא דשמיא.

נ.ב. דאס איז די בעסטע אינוועסטמענט אין די היינטיגע טעג; מענטשן זוכן גוטע אינוועסטמענטס, קיינער ווייסט נישט וואס מארגן גייט זיין, וואו לוינט זיך צו אינוועסטירן; די בעסטע פלאץ צו אינוועסטירן איז אין ערליכע תלמידי תורה, ערליכע בתי חינוך, ישיבות, כוללים וכדומה, דארט איז זיכערע פארדינסטן.

בעזרת ה' יתברך - יום ד' פרשת במדבר, כ"ו אייר, שנת תשפ"ו לפרט קטן

... תחי', תלמידה בית פיגא

איך האב ערהאלטן אייער בריוו.

אז מען טראגט אייך אן שידוכים – זאלט איר זאגן פאר אייערע טייערע עלטערן זיי זאלן זיך אריינטון און אויסהערן, זייט נישט קיין עקשן זיך עקשנ'ען צו נעמען דוקא א בחור פון אונזער ישיבה; וואס מיינט איר, ביי אונז אין ישיבה דארף מען נישט רחמי שמים? די וואך איז געווען צוויי גיטין פון בחורים וואס האבן געלערנט דא און זיי זענען געפאלן פאר די סמארטפאון און די שטוב זייערע איז צעפאלן, און מיין הארץ איז מיר צעריסן דערפון; וואס מיינט איר? דא איז מען פארזיכערט?

עקשנ'ט זיך נישט, זאגט אייערע טייערע עלטערן זיי זאלן אויסהערן שידוכים און זיך גוט נאכפרעגן, און וויינט צום אייבערשטן פאר ערליכע דורות, און איר זאלט נישט אפטרעטן פון די מסורה פון אייערע עלטערן, חס ושלום לאזן ביי אייך אין שטוב די קליפה, די סמארטפאון.

מער קען איך נישט שרייבן, בעטס פאר מיר

בעזרת ה' יתברך - יום ה' פרשת בהר בחקותי, כ' אייר, שנת תשפ"ו לפרט קטן

... נרו יאיר

איך האב ערהאלטן דיין בריוו.

איך בין נישט דערקעגן דו זאלסט קומען אין שטעטל וואוינען, אז דו ווילסט קומען וואוינען אין שטעטל קענסטו קומען; אבער דאס וואס דו טראכסט אז אין שטעטל גייסטו ווערן א מלאך, און דיינע פראבלעמען גייען אוועק פליען - דאס איז נישט אזוי, נאכן קומען דא וואוינען וועסטו זיך ווייטער דארפן מוטשען מיט די מחשבות און בלבולים וכו' וכו', אויך אין שטעטל וועסטו דארפן זיך שטארקן מיטן רבינ'ס עצות און מיט די חיזוקים; נישטא קיין גאראנטי, מען דארף יעדן טאג פונדאסניי זיך שטארקן מיט אמונת חכמים, מיט טון די עצות פון רבי'ן און זיך מחזק זיין צו זיין בשמחה.

בנוגע דיין קינד וכו'; דער אייבערשטער זאל העלפן ער זאל האבן א רפואה שלימה. דו ווייסט אודאי וואס דער רבי זאגט (לקוטי מוהר"ן חלק א, סימן רא), א סגולה פאר סיז'ערס וכדומה איז געבן צדקה; זאלסטו געבן צדקה פארן 'רבינ'ס זאך' דאס איז פאר 'הדפסה', צו דרוקן דעם רבינ'ס ספרים און די ספרים פון מוהרא"ש, די בריוון און קונטרסים, וואס איז דעם רבינ'ס שכל, דעם רבינ'ס דיבורים, נאר מער אראפגעברענגט אויף א שפראך פאר אונזער דור, אז די בני הנעורים זאלן פארשטיין און קענען ניצן די עצות; דאס וועט אוועק נעמען די חולי נופל און ער וועט האבן א רפואה שלימה.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

ישראל שמעון נרו יאיר, מגיד שיעור בישיבת היכל הקודש וויליאמסבורג

איך בעט דיר זייער זאלסט רעדן צו די בחורים פון קדושת עיניים, פון זיך היטן די אויגן. ווייל יעצט ווען מיר זענען אריין אין די זומער טעג דארף מען א שמירה עליונה נישט נכשל צו ווערן אין ראיות אסורות, ווייל אין די אויגן איז אנגעהאנגען אלעס, די גאנצע הצלחה פונעם מענטש ליגט אין די אויגן, און חס ושלום אז מען איז מפקיר די אויגן - רייסט מען זיך אינגאנצן אפ פונעם אייבערשטן, מען קומט צו פוגם זיין בברית רחמנא לצלן; וויי און ביטער איז אז מען היט נישט די אויגן, עס ווערן באשאפן פון יעדע שלעכטע קוק קליפות און מזיקים וואס טוען זיך נוקם זיין אינעם מענטש, אויך דער מלאך המות איז זיך נוקם, אזוי ווי חכמינו זכרונם לברכה זאגן (עבודה זרה כ:): "מַלְאַךְ הַמָּוֶת כֻּלּוֹ מָלֵּא עֵינַיִם", דער מלאך המוות איז אינגאנצן אנגעפילט מיט אויגן; ווען עס קומט די צייט דער מענטש זאל נפטר ווערן, קומט דער מלאך המות, ער ציט זיך אויס פון דער ערד ביזן הימל און ער איז איין שטיק אויגן, פול מיט אויגלעך, און ווען דער מענטש זעט אים ווערט ער זייער דערשראקן און פון דעם שטארבט מען; און דער הייליגער חתם סופר זכותו יגן עלינו זאגט בשם זיין רבי'ן, דער גאון וקדוש רבי נתן אדלער זכר צדיק לברכה (חתם סופר בראשית, הקדמה) אז די טויזנטער אויגלעך - דאס זענען פון די אלע הסתכלות אסורות וואס דער מענטש האט געקוקט זיין גאנץ לעבן, די אלע אויגן נעמט דער מלאך המוות און ער קומט צום מענטש און ער הרג'עט אים, ווייל עס איז נישטא נאך א זאך וואס זאל הרג'ענען דעם מענטש ווי נישט היטן די אויגן. מיט דעם טייטשט ער וואס מיר בעטן דעם אייבערשטן פרייטאג צו נאכטס: "וִישֵׁזְבִינָנָא מֵעֵינָא בִּישָׁא, וּמֵחַרְבָּא דְמַלְאַךְ הַמָּוֶת, וּמִדִּינָהּ שֶׁל גֵיהִנֹּם", היט אונז פון א שלעכט אויג, און פונעם מלאך המות, און פון גיהנום; אז דאס גייט אינאיינעם, אז מיר וועלן נישט האבן קיין 'עינא בישא' מיר וועלן היטן די אויגן, וועלן מיר נישט מורא האבן פונעם שווערד פונעם מלאך המוות, און מיר וועלן נישט אנקומען אין גיהנום.

זע אויסצורייסן פון די בחורים די מידה פון ליצנות, איך האב זייער מורא עס זאל נישט זיין צווישן די בחורים די מידה פון ליצנות; אז מען היט נישט די אויגן, מען קוט שלעכטע זאכן, סיי אין גאס, סיי אין א טעלעפאן, אין קאמפיוטער, טעבלעט וכדומה - פאלט אוועק די תמימות. די הייליגע חכמים זאגן (סוטה ט:): "שמשון הלך אחר עיניו", שמשון איז נאך געגאנגען נאך זיינע אויגן, "לפיכך נקרו פלשתים את עיניו", זענען געקומען די פלשתים און אויסגעשטאכטן די אויגן, מידה כנגד מידה; דאס איז ביי יעדן איינעם, אז מען היט נישט די אויגן קומען די פלשתים, דאס זענען די קליפות, און זיי רייסן אויס די אויגן פון זען אלקות, פון שפירן דעם אייבערשטן; די פלשתים דאס זענען די לצים, מיט ליצנות ווערט אויסגעריסן די אויגן, מען זעט מער נישט און מען שפירט נישט דעם אייבערשטן. אזוי ווי די הייליגע חכמים זאגן (סוטה מב.), עס איז דא פיר כיתות וואס: "אין מקבלים פני שכינה", איינע פון די כיתות איז די כת ליצים, און דער הייליגער אריז"ל זאגט (שער מאמרי חז"ל, סוטה מב), די פיר כיתות זענען אנטקעגן די פיר וועלטן, און די כת לצים איז אנטקעגן עולם אצילות, ווייל ליצנות איז אזוי געפערליך אז אפילו מען איז זוכה צו שפירן די ליכטיקייט פון עולם אצילות - קומט ליצנות און פארלעשט עס, מען ווערט אפגעקילט, מען פארלירט עס; און דאס אלעס קומט פון קוקן עבירות, ביז מען פאלט אין פגם הברית רחמנא לצלן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

... נרו יאיר תלמיד ישיבת היכל הקודש ירושלים

דיין מגיד שיעור זאגט מיר אז ער האט דיך זייער ליב, דו פירסט זיך מיט דרך ארץ, דו פירסט זיך מיט גוטע מידות, דו קריגסט זיך נישט מיט די בחורים, איך פריי זיך זייער צו הערן די גוטע גריסן אויף דיר.

טייערער ..., יעצט אין די זומער טעג ווערט שרעקליכע נסיונות אין שמירת עיניים, אויך א גאנץ יאר דארף מען האבן א שמירה אויף די אויגן, מען זאל זיין אפגעהיטן נישט צו קוקן קיין שלעכטס, אבער ווען עס קומט זומער - ווערט גאר שווער, עס ווערט א שרעקליכע פריצות, די גאסן ווערן זייער געפערליך, עס ברענט א פייער פון פריצות און מען קען פארברענט ווערן ביי די קליפות השם ישמרינו, און מיט איין שלעכטע קוק, קען מען פארלירן אזויפיל קדושה און אזויפיל יראת שמים, מען מוז זיך זייער היטן די אויגן מען זאל נישט פארלירן די קדושה און יראת שמים פון אלע יארן עבודת השם, ווייל אין שמירת עיניים ליגט אלעס, אויב מען היט די אויגן קען מען זוכה זיין צו ווערן זייער הייליג, אזוי ווי די הייליגע צדיקים טייטשן, עס שטייט אין פסוק (בראשית לח, כא): "אַיֵּה הַקְּדֵשָׁה הִוא בָעֵינַיִם עַל הַדָּרֶךְ", טייטשן זיי: "אַיֵּה הַקְּדֵשָׁה", ווי אזוי ווערט מען הייליג? און וואס דארף מען טון זוכה זיין צו ווערן הייליג? "הִוא בָעֵינַיִם עַל הַדָּרֶךְ", עס ליגט אין די אויגן, ווען מען גייט אין די וועגן; מען זאל זיך היטן די אויגן אין גאס, מען זאל נישט גיין אין פלעצער וואו מען קען חס ושלום פאלן.

טייערער ... איך בענק זיך צו דיר, איך קוק ארויס אויף דיר, איך ווארט און האף אז דו וועסט נישט נאכלאזן דיין עבודת השם, בעיקר זיך היטן די אויגן; ווייל אז מען היט די אויגן - איז מען זוכה צו א שטארקע אמונה, מען איז זוכה צו שפירן שטענדיג דעם אייבערשטן, אזוי ווי מיר זאגן יעדן טאג ביי קריאת שמע (במדבר טו, לט): "וְלֹא תָתוּרוּ אַחֲרֵי לְבַבְכֶם וְאַחֲרֵי עֵינֵיכֶם", און די הייליגע חכמים זאגן (ברכות יב:): 'אחרי לבבכם' דאס מיינט מען 'מינות', און 'אחרי עיניכם' דאס מיינט מען 'טראכטן פון עבירות'; די צוויי זאכן גייען אינאיינעם, דער וואס היט נישט די אויגן פאלט אריין אין מינות ואפיקורסות, די אמונה ווערט ביי אים פארלאשן, מען שפירט נישט דעם אייבערשטן, מען איז פול מיט מחשבות פון ספיקות און בלבולים, קשיות אויף די אמונה רחמנא לצלן, אבער דער וואס היט די אויגן - דער איז זוכה צו האבן א ריינע אמונה, א קלארע אמונה, און מיט אמונה איז די לעבן זיס און געשמאק; ווייל ווען עס גייט גוט ווייסט מען אז עס איז פונעם אייבערשטן, און אויך חס ושלום ווען עס גייט פארקערט ווי מען וויל - ווייסט מען אז דאס איז אויך אלעס פונעם אייבערשטן, און אז עס קומט פונעם אייבערשט קען נישט זיין אז עס איז שלעכט.

שרייב מיר צוריק בריוו, איך וויל זיין מקושר מיט דיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת במדבר, כ"ז אייר, שנת תשפ"ו לפרט קטן

לכבוד ... נרו יאיר

מוהרא"ש ברענגט בשם צדיקים, די סופי תיבות פונעם פסוק (דברים טז, טו): "וְהָיִיתָ' אַךְ' שָׂמֵחַ'" איז דער שם "חַתָּ"ךְ", די שם פון פרנסה; שמחה איז מסוגל פאר פרנסה.

דיינע עיקר תפילות זאלן זיין אויף זיין פרייליך, אין דעם איז תלוי אלעס, די גאנצע הצלחה איז תלוי אין שמחה, אז מען איז פרייליך איז מען מצליח, אזוי ווי דער הייליגער רבי זאגט (ספר המדות אות שמחה חלק ב, סימן א): "מִי שֶׁהוּא שָׂמֵחַ תָּמִיד, עַל יְדֵי זֶה הוּא מַצְלִיחַ", דער וואס איז שטענדיג פרייליך איז שטענדיג מצליח.

מיין נישט אז דאס איז עפעס א גרינגע עבודה, עס איז גאר א שווערע עבודה, מוהרא"ש זאגט, עס איז גרינדער צו פאסטן און טון סיגופים - ווי זיין פרייליך; ווייל די נאטור איז - צו זיין טרויעריג, אויף יעדן מענטש גייט אריבער שוועריקייטן אין לעבן, און דאס שלעפט אים אראפ אין דאגות און אין מרה שחורה. אזוי ווי דער הייליגער רבי זאגט (לקוטי מוהר"ן חלק ב, סימן כד): "כִּי טֶבַע הָאָדָם לִמְשֹׁךְ עַצְמוֹ לְמָרָה שְׁחֹרָה וְעַצְבוּת מֵחֲמַת פִּגְעֵי וּמִקְרֵי הַזְּמַן, וְכָל אָדָם מָלֵא יִסּוּרִים", יעדער איינער האט זיך זיינע שוועריקייטן אין לעבן וואס מאכט אים דערביטערט און צוגעלייגט, "עַל כֵּן צָרִיךְ לְהַכְרִיחַ אֶת עַצְמוֹ בְּכֹחַ גָּדוֹל לִהְיוֹת בְּשִׂמְחָה תָּמִיד, וּלְשַׂמֵּחַ אֶת עַצְמוֹ בְּכָל אֲשֶׁר יוּכַל וַאֲפִילּוּ בְּמִלֵּי דִּשְׁטוּתָא", און מען דארף פרובירן מיט אלע כוחות צו זיין פרייליך; מען דארף זיך פרייליך מאכן מיט וואס מען קען - אפילו מיט נארישקייטן.

בעט די תפילה יעדן טאג, שנייד אויס פונעם בריוו די תפילה און נעם עס מיט דיר, און בעט די תפילה יעדן טאג:

"רִבּוֹנוֹ שֶׁל עוֹלָם הֶעלְף מִיר אִיךְ זָאל זַיין פְרֵיילִיךְ אוּן אִיךְ זָאל שְׁפִּירְן דִי שִׂמְחָה אִין אַלֶע מַיינֶע אֵבָרִים, פוּן קָאפּ בִּיז פִיס; בִּיז אִיךְ וֶועל זַיין אַזוֹי פְרֵיילִיךְ אַז אִיךְ וֶועל אָנְהֵייבְּן טַאנְצְן פוּן גְרוֹיס פְרֵייד אוֹיף דִי גְרוֹיסֶע חֶסֶד אַז דוּ הָאסְט מִיךְ בַּאשַׁאפְן אַ אִיד אוּן מִיר גֶעגֶעבְּן דִי הֵיילִיגֶע מִצְווֹת; אִיךְ בֶּעט דִיר הֵיילִיגֶער בַּאשֶׁעפֶער, הָאבּ רַחְמָנוּת אוֹיף מִיר אוּן נֶעם אַוֶועק פוּן מִיר דִי בִּיטֶערְקַייט אוּן פוֹילְקַייט, אִיךְ זָאל נָאר זַיין פְרֵיילִיךְ אוּן פְרֵיילִיךְ מַאכְן אַנְדֶערֶע, אוּן בִּזְכוּת שִׂמְחָה זָאל אִיךְ זוֹכֶה זַיין צוּ נִכְלָל וֶוערְן אִינְגַאנְצְן אִין דִיר, אִיךְ זָאל מֶער נִישְׁט זֶען פַאר מַיינֶע אוֹיגְן נָאר דִיךְ בַּאשֶׁעפֶער, אִיךְ זָאל זֶען אוּן שְׁפִּירְן וִוי דוּ בִּיסְט אַלֶעס אוּן עֶס אִיז מֶער גָארְנִישְׁט דָא אוֹיף דִי וֶועלְט נָאר דוּ אַלֵיין, אוּן זוֹכֶה זַיין צוּ תְּשׁוּבָה שְׁלֵמָה, מֵעַתָּה וְעַד עוֹלָם, אָמֵן סֶלָה".

דֶער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת במדבר, כ"ו אייר, שנת תשפ"ו לפרט קטן

לכבוד ... נרו יאיר

מיר שטייען שוין זייער נאנט צום גרויסן טאג, דער הייליגער יום טוב שבועות, מיר גייען זוכה זיין צו מקבל זיין די תורה; איך וויל דיר בעטן עפעס וואס ליגט מיר אין הארץ, איך וויל דיר זייער בעטן זאלסט אוועק ווארפן דיין טעלעפאן און טעבלעט אויף וואס דו קוקסט קליפס, סטעטוס וכו' וכו'; דיין שלום בית, דיין שמחת החיים - וועט צוריק קומען, ווייל דורכדעם וואס מען היט נישט די אויגן, און דורך הערן ליצנות, ניבול פה, פארלירט מען די שידוך, מען פארלירט די שלום בית; אזוי ווי די הייליגע חכמים דערציילן (ספר חסידים, סימן שפז), עס איז געווען א מענטש וואס האט אסאך געפאסט אז ער וויל חתונה האבן מיט א פרוי וואס ער האט ליב, ער האט זייער אסאך געבעטן דעם אייבערשטן אויף די שידוך, און מען האט נישט אנגענומען זיינע תפילות מיט זיינע תעניתים, ער האט זיך געוואונדערט פארוואס ער האט נישט באקומען די שידוך אויף וואס ער האט אזויפיל געבעטן, "אָמַר הַחָכָם", האט אים דער צדיק געענטפערט: "מִפְּנֵי שֶׁאַתָּה צוֹפֶה בַּנָּשִׁים", ווייל דו קוקסט אויף פרויען, דעריבער האט דער אייבערשטער דיר נישט נאכגעגעבן דיין געבעט, "זֶה הַצַּעַר הַבָּא עָלֶיךָ בִּשְׁבִיל שֶׁהָיִיתָ צוֹפֶה בַּנָּשִׁים, וְזִמֵּן לְךָ מַה שֶׁלֹא מָצְאָה חֵן בְּעֵינֶיךָ", דיין גאנצע צער וואס דו גייסט אריבער איז ווייל דו היטסט נישט דיינע אויגן, דעריבער האסטו באקומען אן אנדערע שידוך, אן קיין חן.

אז דו וועסט אוועק ווארפן דיין טעבלעט און סמארטפאון וכו' און דו וועסט תשובה טון, דו וועסט היטן דיינע אויגן - וועסטו זוכה זיין צו א שטארקע אמונה, די לעבן וועט דיר זיין זיס און געשמאק. דער הייליגער רבי זאגט (לקוטי מוהר"ן חלק א, סימן לא), אויפן פסוק (תהלים פט, כט): "ובריתי נאמנת לו", אז ברית און אמונה גייען אינאיינעם, און אז מען איז חס ושלום פוגם בברית, מען טוט עבירות, מען קוקט עבירות - פארלירט מען די אמונה; מען קען נישט שפירן געטליכקייט ווען די מח איז פארשמירט מיט עבירות, ווייל ווען מען פארשמירט די אויגן - פארלירט מען די מוחין, אזוי ווי דער הייליגער זוהר זאגט (פרשת משפטים, דף קי): "סילוקא דיסודא עד אבא ואימא", אז מען איז פוגם ביסוד ווערן די מוחין מקולקל, מען פארלירט די מח, מען זעט מער נישט אלקות, מען שפירט מען נישט אלקות, אלעס ווערט פארלאשן.

עס קומט אזא הייליגע יום טוב, מיר קומען נענטער און נענטער צום בארג סיני, מיר גייען זוכה זיין צו הערן נאכאמאל די עשרת הדברות, אבער מען דארף אוועק ווארפן די טויטע שרצים, די הייליגע חכמים זאגן (תענית טז:): "אָדָם שֶׁתּוֹפֵס שֶׁרֶץ בְּיָדוֹ, אֲפִלּוּ טוֹבֵל בְּכָל מֵימוֹת שֶׁבָּעוֹלָם לֹא עָלְתָה לוֹ טְבִילָה, זְרָקוֹ מִיָּדוֹ כֵּיוָן שֶׁטָּבַל בְּאַרְבָּעִים סָאָה מִיַד עָלְתָה לוֹ טְבִילָה", ווען א טמא'נער מענטש טובל'ט זיך מיט א שרץ אין האנט, וועט ער בלייבן טמא, נאר אויב ער לאזט אפ דעם טויטן שרץ - קען ער ווערן טהור, אבער כל זמן ער האלט אן דעם שרץ, אפילו מען טובל'ט זיך אין אלע וואסערן, בלייבט מען טמא; בעט איך דיר, ווארף אוועק די שמוציגע טעלעפאן, מי יודע, ווער ווייסט צי אלעס וואס דו גייסט אריבער וכו' - איז נישט פון דעם וואס די אויגן זענען הפקר רחמנא לצלן...

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

לכבוד ... נרו יאיר

נעכטן ל"ג בעומר אין שטעטל איז געווען זייער שיין, מיר האבן געצינדן די הדלקה לכבוד רבי שמעון בר יוחאי, אויך איז געווען א סעודה. ביי די סעודה האבן מיר גערעדט פון זיך מקבל זיין א גוטע קבלה, מיר האבן גערעדט פון זיך מקבל זיין א גוטע קבלה אין שמירת עיניים, און נישט צו האבן א טעלעפאן וואס מען קען זען עבירות רחמנא לצלן, און אפילו מען מאכט זיכער אז די טעלעפאן זאל זיין מיט א פילטער - דארפן מיר טראכטן פון אונזערע קינדער און אייניקלעך, וואס וועט זיין מיט זיי? און אז קיין איין רב; נישטא קיין רב בישראל - מען רעדט פון ערליכע רבנים - וואס זאל זאגן אז עס איז נישט קיין פראבלעם צו האבן א סמארטפאון.

ל"ג בעומר פארטאגס בין איך געפארן קיין קרית יואל צום ציון פון הייליגן רבי'ן, איך האב דארט געזאגט די תיקון הכללי און זיך מתבודד געווען, די הארץ האט זיך מיר געעפנט, איך האב זייער געוויינט דארט, און דעמאלט איז מיר אריינגעקומען במחשבה אז איך דארף רעדן צו די אינגעלייט און צו די ווייבלעך זיך צו שטארקן אויף די שווערע נסיון און בלייבן מיט א פשוט'ע כשר'ע טעלעפאן.

איך בעט דיר זייער דו זאלסט זיך מאכן א חשבון וואס איז דיר וויכטיגער, די באקוועמליכקייט פון די טעלעפאן אדער דורות ערליכע אידן; אויך מיט א כשר'ע טעלעפאן דארף מען רחמי שמים מיט אונזערע קינדער, מאך זיך א חשבון, וואס וועט זיין מיט אונזערע קינדער און אייניקלעך? אויך זאלסטו וויסן אז אפילו דיר קומט אויס יא צו האבן א טעלעפאן דארפסטו זיך רעכענען אויך מיט מיר, דו קענסט נישט ארויסנעמען צווישן מענטשן דעם טעלעפאן, עס מאכט מיר שאדן; מיינע קינדער, מיינע תלמידים ותלמידות זעען אז מען קען טון וואס מען וויל, מען דארף נישט פאלגן רבנים, עס נעמט אוועק זייער תמימות.

גיי התבודדות, בעט דעם אייבערשטן ער זאל דיך העלפן דו זאלסט קענען טון וואס איז ריכטיג אפילו עס איז נישט אזוי באקוועם, דו זאלסט האבן שמירת עיניים און ריינע מחשבות וכו'.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת במדבר, כ"ה אייר, שנת תשפ"ו לפרט קטן

לכבוד ... נרו יאיר

וואס גייסטו היינט עסן פאר נאכטמאל? זע צו עסן לאקשן, ווייל מוהרא"ש דערציילט, מען האט אמאל געהערט ווי דער הייליגער רבי ר' אלימלך זכותו יגן עלינו זאגט, אז היינט וויל ער נישט עסן פאר נאכטמאל קאשע, היינט וויל ער לאקשן, ער האט געזאגט ער מיינט נישט די עסן, ער מיינט צו זאגן אז ער וויל נישט עסן קיין קאשע, ער וויל נישט קיין קשיות אויפן אייבערשטן, ער וויל לאקשן, דאס איז די ווערטער 'לֹא-קָשְׁן' – "עס איז מיר גארנישט שווער, איך האב נישט קיין קשיות אויפן אייבערשטן".

על כן בעט איך דיר דו זאלסט אויך זיך באשטעלן א פושקע לאקשן, און אז דו האסט אין שטוב קאשע - זאלסטו גיין אין פעלד אוועק גיסן די קאשע, גיי התבודדות, גיס זיך אויס דיין הארץ, בעט דעם אייבערשטן פאר א קלארע לויטערע שטארקע אמונה, דו זאלסט שפירן דעם אייבערשטן און געדענקען אז עס איז גארנישט דא אויסער אים, אלעס איז דער אייבערשטער, דומם צומח חי מדבר - אלעס אלעס איז אייבערשטער.

ליבער ברודער, הארציגער חבר, נישטא קיין חברים, א שאד זיך צו חנפ'ענען, געב א קוק די זיסע ווערטער פון מוהרא"ש פון די צוואה (צוואת מוהרא"ש, סימן ט): "אִיךְ בֶּעט אַייךְ זֵייעֶר אִיר זָאלְט זִיךְ גוּט אַרַיין נֶעמֶען אִין קָאפּ אַז אִיר הָאט נִישְׁט קֵיינֶעם אוֹיף דֶער וֶועלְט. קַיין שׁוּם מֶענְטְשׁ אוֹיף דֶער וֶועלְט קֶען אַייךְ נִישְׁט הֶעלְפְן, אוּן זִיכֶער קֶען קֵיינֶער אַייךְ נִישְׁט שְׁלֶעכְטְס טוּן. דֶערִיבֶּער זָאלְט אִיר נִישְׁט מוֹרָא הָאבְּן פוּן קַיין שׁוּם מֶענְטְשׁ, אוּן אִיר זָאלְט זִיךְ נִישְׁט חַנְפְ'עֶנֶען צוּ קַיין שׁוּם מֶענְטְשׁ, וַוייל דָאס וֶועט אַייךְ גָארְנִישְׁט הֶעלְפְן; פַארְקֶערְט, דָאס וֶועט אַייךְ נָאר שָׁאטְן צוּם גֶעזוּנְט, וַוייל וֶוען מֶען פַארְלָאזְט זִיךְ אוֹיף מֶענְטְשְׁן, אוּן דֶערְנָאךְ זֶעט מֶען אַז יֶענֶער הָאט גָארְנִישְׁט גֶעקֶענְט הֶעלְפְן, יֶענֶער אִיז בִּכְלַל נִישְׁט אִינְטֶערֶעסִירְט דִיר צוּ הֶעלְפְן, דַאן וֶוערְט מֶען זֵייעֶר אַנְטוֹישְׁט, מֶען וֶוערְט זֵייעֶר צוּבְּרָאכְן אוּן צוּקְלַאפְּט פוּן דֶעם. אַ אִיד וָואס גְלֵייבְּט אָבֶּער אִינֶעם אֵייבֶּערְשְׁטְן, עֶר פַארְלָאזְט זִיךְ אִינְגַאנְצְן נָאר אוֹיפְן אֵייבֶּערְשְׁטְן, דַאן אִיז עֶר זֵייעֶר מַצְלִיחַ".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת במדבר, כ"ד אייר, שנת תשפ"ו לפרט קטן

לכבוד ... נרו יאיר

אז דו גייסט אריבער שווערע טעג, דו שפירסט ווי דו ווערסט צעקוועטשט - זאלסטו חס ושלום נישט האבן קיין קשיות אויפן אייבערשטן, גלייב אז אלעס וואס דער אייבערשטער טוט איז לטובה. די הייליגע חכמים דערציילן (נדה לא.), צוויי חברים האבן איינגעקויפט סחורה דאס צו פארקויפן אין א צווייטע לאנד, און אזוי גייענדיג צום שיף האט זיך איינער פון זיי צעבראכן די פוס און ער האט נישט געקענט גיין צום שיף, די שיף איז אוועק געפארן מיטן אנדערן שותף, מיטנעמענדיג אלע סחורה, און דער מענטש מיטן צעבראכענעם פוס איז אונטערגעבליבן, האט דער מענטש אנגעהויבן רעדן קעגן די אמונה, ער האט געהאט טענות צום אייבערשטן, און נאך א שטיק צייט האט ער געהערט אז די שיף איז איינגעזונקען אין וואסער מיט אלע מענטשן מיט די גאנצע סחורה, האט ער אנגעפאנגען דאנקען דעם אייבערשטן (ישעיה יב, א): "אוֹדְךָ ה' כִּי אָנַפְתָּ בִּי", איך דאנק דיך אייבערשטער אז דו האסט געצערנט אויף מיר – אז דו האסט מיר צעבראכן די פוס, און אזוי האב איך פארפאסט די שיף און געבליבן לעבן, "יָשֹׁב אַפְּךָ וּתְ'נַחֲמֵנִ'י", אין דעם פסוק איז מרומז דעם הייליגן רבינ'ס נאמען, דער רבי טרייסט אונז, דער רבי פילט אונז אן מיט אמונה, אז דער מענטש זאל דאנקען דעם אייבערשטן אויף אלעס וואס ער טוט מיט אים, אפילו וואס עס זעט אויס ווי שלעכטס.

ליבער ברודער, הארציגער חבר, אפילו ביי דיר האט זיך די מעשה נישט אזוי געענדיגט, זאלסטו זינגען און טאנצן: "'אוֹדְךָ ה'', איך דאנק דיך אייבערשטער פאר אלעס, און אויך פאר אלעס וואס איז מיר אריבער"; גלייב באמונה שלימה אז עס איז נישטא קיין פערצופאל, נישטא קיין פאסירונג, נישטא קיין טבע, נישטא קיין טעותים; אלעס וואס פאסירט איז מיט א פינקטליכער חשבון.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר, קרית יואל

מזל טוב! מזל טוב! דער אייבערשטער זאל העלפן דו אינאיינעם מיט דיין ווייב זאלן זוכה זיין צו מגדל זיין דעם נייעם געבוירענע מיידל לתורה ולחופה ולמעשים טובים, און זען אסאך אידיש ערליכע נחת ביי אלע קינדער אינאיינעם.

דאנקט און לויבט דעם אייבערשטן, הערט נישט אויף צו זאגן: "שכוח אייבערשטער", דאנקט אים פאר אלע חסדים, און נאכן דאנקען זאלן ענק ווייטער דאנקען; דער הייליגער רבי זאגט (לקוטי מוהר"ן חלק ב, סימן ב), דאס דאנקען און לויבן דעם אייבערשטן ברענגט דעם מענטש זייער נאנט צום אייבערשטן, מען איז זוכה שוין דא בזה העולם צו שפירן די טעם פון גן עדן, פון שעשוע עולם הבא.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

ישראל יוסף נרו יאיר, קרית ברסלב

זיי מחזק די בחורים אלע זאלן העלפן, אלע זאלן האבן א חלק אין משמש זיין דעם רבי'ן; אדער אין ישיבה אדער אין שול, אדער ווען עס קומט צו ימים טובים וכדומה.

עס האט מיר געשטערט ביי די ל"ג בעומר מעמד צו זען אין שול גויים טיילן עסן און רייניגן, פארוואס נישט אונזערע בחורים? פארוואס זאלן די בחורים נישט האבן די געפיל? און אז זיי האבן נישט די געפיל צו העלפן – פארוואס זאל מען זיי נישט מאכן האבן דעם געפיל? אלע יארן אין ישיבה אין וויליאמסבורג איז אזוי געווען געבויט די ישיבה, אז בחורים העלפן, בחורים טוען, בחורים מאכן.

וויסן זאלסטו, עס איז אדער אדער, אדער לייגסטו אריין א געפיל אין א בחור צו העלפן, מען מאכט אים א סדרן, א גבאי, א שמש וכו', דעמאלט נעמט ער זיין חיות פון דעם, און אז נישט – וועט ער זיך באהאלטן מיט צוגארעטלעך, מיט א טעלעפאן, מיט נישט גוטע זאכן.

איך בעט דיר זייער, בלאז אריין אין די בחורים א חיות צו משמש זיין דעם הייליגן רבי'ן, טו מיט זיי וואס איך האב געטון מיט דיר, געדענק ווען דו ביסט געקומען אין ישיבה, נאך פאר דיין בר מצוה, ווי איך האב דיר געגעבן א בעזעם אין האנט און דיר געלערנט רייניגן; פארוואס נאר הבחור חיים זאנוויל, מיט הבחור אלימלך נרו יאיר, און יוסף שלמה, אברהם יצחק? א שאד אז נישט אלע האבן א חלק אין משמש זיין, און ווען עס קומט א יום טוב, א מעמד – ווער דארף גוי'אישע וועיטערס? עס גייט אוועק די חן; וואו זענען אונזערע בחורים?

איך בעט דיר זייער זאלסט מיר העלפן מיט דעם, און זען אז יעדער בחור זאל זיין א שמש פאר די קהילה; עס איז אזוי געזונט און אזוי הייליג.

שיק מיר יעדן טאג א מעסעדזש מיט יעדע פרט ופרט וואס טוט זיך אין ישיבה.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר, קרית יואל, מאנרא

איך האב געזען דיינע מעסעדזשעס.

א שאד אז דו ביסט אין אזא קטנות הדעת, דו שלאגסט זיך אליינס, אז איך בין ברוגז אויף דיר וכו' וכו', נארישע שטותים, איך האב דיך אזוי ליב, און דיר שוין אזויפיל מאל געזאגט אז דו ביסט אין א שקר, עס זעט אויס אז דו האסט שוין גע'חזר'ט די ליגנט אזויפיל מאל אז דו ביסט איבערצייגט אז דאס איז אמת.

דער הייליגער רבי רעדט שוין פון דעם, דער רבי זאגט (חיי מוהר"ן, סימן תק"נ): "יֵּשׁ אֶחָד שֶׁשּׁוֹכֵב עַל מִטָּתוֹ", אמאל איז דא, א מענטש ליגט אין בעט, "וּבוֹדֶה מִלִּבּוֹ דְּבַר שֶׁקֶר עַל חֲבֵרוֹ", און ער טראכט אויס א ליגנט אויף זיין חבר, "שֶׁחֲבֵרוֹ דִּבֵּר עָלָיו אוֹ עָשָׂה לוֹ שֶׁלּא כַּהֹגֶן לְהַכְעִיסוֹ וְכַיּוֹצֵא בָּזֶה", אז זיין חבר האט גערעדט קעגן אים אדער געטון עפעס קעגן אים, "וּמַתְחִיל לְהִתְרַגֵּז עַל זֶה וּבוֹעֵר כַּעֲסוֹ עַל חֲבֵרוֹ", און ער הייבט אן ברענען פון כעס, "וְנִתְמַלֵּא רֹגֶז עָלָיו חִנָּם עַל לֹא דָבָר", און ער ווערט גערעגט אויף זיין חבר פאר גארנישט און פאר נישט, "כִּי הוּא בְּעַצְמוֹ חָשַׁב וּבָדָה זֹאת עַל חֲבֵרוֹ", ווייל ער אליינס האט דאס אויסגעטראכט, "וּבֶאֱמֶת חֲבֵרוֹ נָקִי מִזֶּה לְגַמְרֵי", און באמת איז זיין חבר ריין פון דעם.

איך בעט דעם אייבערשטן דו זאלסט ארויסגיין פון די קטנות הדעת, דו זאלסט אפלאזן די נארישע שטותים און זיך שוין איבערצייגן אז איך האב דיך ליב און יעדער האט דיך ליב, און אז מען הערט נישט אויס דיינע מיינונגען מיינט נישט אז מען האט דיך נישט ליב, און אז מען פאלגט נישט וואס דו זאגסט מיינט נישט אז מען וויל דיך מרחק זיין.

ביי מיר איז קלאר אז אלעס זענען דיר מכיר טובה פאר אלע טובות וואס דו האסט געטון, קיינער האט דיך נישט מרחק געווען, דאס איז דער סמ"ך מ"ם וואס זוכט צו מאכן מחלוקת צווישן דעם קעניג'ס לייט, ... נרו יאיר האלט מיך כסדר פאר היתכן איך לאז צו אזוינס, מען זאל דיך מרחק זיין וכו'; איך האלט נישט אזוי, איך ווייס אז דאס ביסטו אליינס וואס דו שלאגסט דיך אליינס, דו חזר'סט די שקר ביז עס ווערט אמת ביי דיר...

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר

געב אכטונג פון הערן ניגונים פון די פרייע זינגערס, די איזראעלישע מוזיק, עס איז איין שטיק ניבול פה, איין שטיק גלוי עריות רחמנא לצלן.

איך בין דיך דן לכף זכות אז דו פארשטייסט נישט זייער טמא'נע שפראך, דו קענסט נישט העברעאיש, דאך אפילו אן פארשטיין – איז דאס מטמא דעם מענטש.

איך בעט דיר זייער, איך וויל דיר אזוי שטארקן מאכן א גוטע חסידי'שע ערליכע שידוך, אבער איך האב מורא, איך ווייס נישט וואס דו ווילסט, אויב דו ווילסט אויפשטעלן אן ערליכע שטוב, אדער דו ווילסט גיין מיט א שטריימל בעקיטשע און זיין פריי פון יראת שמים.

איך האב דיך ליב, איך האב ליב דיינע עלטערן, איך בעט דיר ווארף אוועק די טומאה, די פרייע ניגונים, די טריפה'נע בילדער.

איך וויל דו זאלסט מיר שרייבן א בריוו, שרייב מיר וועלכע לעבן דו ווילסט, איך וויל דיר מאכן א שידוך.

חבר זיך נאר מיט בחורים וואס רעדן איידל, אז דו זעסט א בחור רעדט ניבול פה קום מיר דערציילן, העלף מיר האלטן ריין די קהילה.

בעזרת ה' יתברך - יום א' פרשת אחרי קדושים, ב' אייר, שנת תשפ"ו לפרט קטן

... תחי'

זאגט תהלים און פלעכטס אריין אייערע אייגענע לויב ווערטער צום אייבערשטן.

אויך זאלט איר אים בעטן פאר אייערע דורות, זיי זאלן וואקסן הייליג און זיין גרויסע צדיקים.

בעזרת ה' יתברך - יום ה' פרשת אמור, י"ג אייר, שנת תשפ"ו לפרט קטן

לכבוד ... נרו יאיר

נעם אריין אמונה אין דיר, לעב מיט אמונה, חזר אמונה, חזר זיך אז עס איז גארנישט דא אויסער דעם אייבערשטן, אלעס פירט דער אייבערשטער, אלעס מאכט ער, אלעס טוט ער און אלעס איז ער אליינס, און אז עס גייט אריבער אויף דיר יסורים וכו' - זאלסטו וויסן אז דאס איז מיט א חשבון. חכמינו זכרונם לברכה זאגן (חולין ז:): "אין אדם נוקף אצבעו מלמטה אלא אם כן מכריזין עליו מלמעלה", א מענטש צוקלעמט זיך נישט זיין פינגער אן דעם וואס מען זאל אויסרופן אין הימל פון פאראויס אז דער מענטש זאל זיך צעקלאפן זיין פינגער; און אזוי אויך מיט פרנסה, די הייליגע חכמים זאגן (יומא לח.): "בשמך יקראוך ובמקומך יושיבוך, אין אדם נוגע במה שמוכן לחבירו", קיינער קען נישט צורירן צו א פרוטה וואס איז אנגעגרייט פארן חבר, "ואין מלכות נוגעת במלכות חברתה אפילו כמלוא נימא", און קיינער קען נישט צונעמען פון א צווייטן; נאך זאגן חכמינו זכרונם לברכה (ברכות נח.): "אפילו ריש גרגיתא מן שמיא מנו ליה", אפילו דער וואס איז ממונה צו ארבעטן ביי די סוער, שמוציגע ארבעט - איז אויך פון הימל.

רעד מיט מענטשן דיבורי אמונה, ביי יעדע זאך זאלסטו מזכיר זיין דעם אייבערשטנ'ס נאמען, וואס מען רעדט זאלסטו זאגן: "ברוך השם", "געלויבט השם יתברך", "אם ירצה השם", "חסדי השם", "כי טוב השם"; דאס וועט אראפנעמען פון דיר אלע שלעכטס, אזוי זאגט דער הייליגער רבי (ספר המדות אות אמונה, סימן לג): "עַל יְדֵי אֱמוּנָה, הַקָּדוֹשׁ בָּרוּךְ הוּא יִסְלַח לְךָ עַל כָּל עֲווֹנוֹתֶיךָ", דורך אמונה איז דער אייבערשטער מוחל אויף אלע עבירות.

ביים רבי'ן באקומט מען א קלארע אמונה, דער רבי לערנט מיט אונז אמונה. דער הייליגער רבי זאגט (שיחות הר"ן, סימן לג): "אֵצֶל הָעוֹלָם אֱמוּנָה הוּא דָּבָר קָטָן", ביי די וועלט איז אמונה א קלייניקייט, "וְאֶצְלִי אֱמוּנָה הוּא דָּבָר גָּדוֹל מְאֹד", אבער ביי מיר איז דער עיקר אמונה.

דעם שבת וועל איך זיין אם ירצה ה' אין קרית ברסלב ביי מיין איידעם שליט"א און דאווענען אין די שול ביי די גאס פון ירושלים.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - ערב שבת קודש פרשת בהעלותך (שלח בא"י), כ' סיון, שנת תשפ"ו לפרט קטן

החתן ... נרו יאיר

מזל טוב פאר דיין שידוך, דער אייבערשטער זאל העלפן דו זאלסט האבן א שיינע לעבן אינאיינעם מיט דיין כלה תחי', ענק זאלן אויפשטעלן א בית נאמן בישראל.

איך וויל דיר בעטן דו זאלסט דיין גאנץ לעבן געדענקען די פרייליכע צייט פון דיין שידוך, דו זאלסט אנהאלטן די שמחה, דיין גאנץ לעבן זאלסטו זיין פרייליך און דאנקבאר דעם אייבערשטן פאר די גרויסע חסדים וואס ער טוט מיט דיר.

אויך זאלסטו פרייליך מאכן דיין זיידע און באבע, דיין באבע ווערט זייער פרייליך ווען דו רופסט איר, און ווען דו גייסט צו איר. דיין טאטע עליו השלום איז געווען איר באליבסטער זון, און ווען דו מיט דיינע געשוויסטער קומען צו איר – לעבט זי אויף.

באצאל מיר פאר שדכנות אז דו וועסט רופן דיין באבע יעדן טאג און ארויפגיין צו איר כאטשיג איין מאל א וואך.

דיין ראש ישיבה וואס האט דיך ליב ווי אן אייגן קינד.

בעזרת ה' יתברך - יום ה' פרשת שלח (קרח בא"י), כ"ו סיון, שנת תשפ"ו לפרט קטן

... נרו יאיר

איך בענק זיך זייער צו דיר, איך וויל דיר שרייבן אפאר שיינע הנהגות ווי אזוי דו זאלסט זיך פירן, אזוי וועסטו אויסוואקסן אן ערליכער איד.

ווען עס קומט די צייט צו גיין שלאפן זאלסטו גיין שלאפן מיט יראת שמים, נעם אין בעט מעשה ביכלעך פון סיפורי צדיקים; אז מען שלאפט איין מיט מעשיות פון צדיקים - איז די שלאף א הייליגע שלאף, מען שלאפט מיט שמירה, און ליין קריאת שמע שעל המיטה; דער יצר הרע פארלייגט זיך זייער מען זאל מזלזל זיין אין קריאת שמע שעל המיטה, ווייל דאס הרג'ט אים. אזוי ווי די הייליגע חכמים זאגן (ברכות ה.): "כָּל הַקּוֹרֵא קְרִיאַת שְׁמַע עַל מִטָּתוֹ, מַזִיקִין בְּדֵילִין הֵימֶנּוּ", דער וואס ליינט קריאת שמע פאר ער לייגט זיך שלאפן - גייען אלע מזיקים אוועק פון אים; דער יצר הרע, דער מלאך המזיק - ווערט אויס דורך קריאת שמע שעל המיטה, ער האט מורא פון דעם. נאך זאגן די הייליגע חכמים (שם): "כָּל הַקּוֹרֵא קְרִיאַת שְׁמַע עַל מִטָּתוֹ כְּאִילוּ אוֹחֵז חֶרֶב שֶׁל שְׁתֵּי פִּיּוֹת בְּיָדוֹ", ווער עס ליינט קריאת שמע פארן גיין שלאפן - איז אזוי ווי ער האלט א מעסער וואס איז שארף פון ביידע זייטן, און אזוי הרג'עט ער אויס אלע מזיקים, און נאך זאגן די הייליגע חכמים (ברכות ח:), רבא האט געזאגט פאר זיינע קינדער: "אַל תֵּשְׁבוּ עַל מִטַּת אֲרַמִּית", איר זאלט נישט שלאפן אין א גוי'אישע בעט, זאגט די גמרא עטליכע פשטים וואס דאס מיינט, דער ערשטער פשט איז: "לֹא תִּגְנוּ בְּלֹא קְרִיאַת שְׁמַע", ער האט זיי אנגעזאגט זיי זאלן נישט גיין שלאפן אן ליינען קריאת שמע; זעט מען פון דעם ווי חשוב עס איז ווען מען ליינט קריאת שמע פאר מען לייגט זיך שלאפן.

זאג דעם: "רבונו של עולם הרינו מוחל", זיי מוחל יעדן איינעם. דער הייליגער זוהר דערציילט (פרשת מקץ, דף רא:), אז דער הייליגער תנא רבי אבא איז אמאל געזיצן ביים אריינגאנג פון די שטאט לוד, ער האט געזען איינעם אנקומען זייער אפגעמאטערט, דער איד האט זיך אראפגעזעצט זיך אפצורוען און ער האט איינגעדרימלט. ווען דער איד איז דארט געשלאפן באמערקט רבי אבא ווי א שלאנג קריכט צום מענטש און איידער דער שלאנג האט געקענט אנקומען צום מענטש - איז אראפגעפאלן א צווייג אויף אים און אזוי איז די שלאנג גע'הרג'עט געווארן.

ווען דער איד האט זיך אויפגעוועקט און געזען די טויטע שלאנג האט ער זיך אויפגעשטעלט און זיך אוועק געריקט פון זיין פלאץ וואו ער איז געשלאפן, און פינקט א סעקונדע דערויף איז אראפגעפאלן די גאנצע שטיקל ערד וואו ער איז פריער דארט געשלאפן, איז רבי אבא צוגעגאנגען צו אים און געפרעגט: "זאגט מיר, ווער זענט איר און וואס זענען אייערע מעשים אז דער אייבערשטער האט מיט אייך געטון צוויי גרויסע נסים?" זאגט דער איד: "נישטא קיין מענטש אויף די וועלט וואס האט מיר געטון עפעס שלעכט וואס איך זאל אים נישט מוחל זיין און אים איבערבעטן, און אויב בין איך נישט מצליח צו טרעפן דעם מענטש וואס האט מיר געטון שלעכטס - בין איך נישט אריין אין בעט שלאפן ביינאכט איידער איך האב אים מוחל געווען", האט רבי אבא געוויינט און געזאגט: "יעצט זע איך אז דו ביסט ווערד אז דער אייבערשטער האט געטון מיט דיר נסים".

נאכן מוחל זיין אלעמען, זאלסטו ליינען קריאת שמע און זיך מתוודה זיין. ליין קריאת שמע שעל אריז"ל, עס נעמט נישט לאנג צו ליינען קריאת שמע של האריז"ל, די דריי פרשיות פון קריאת שמע, און זיך מתודה זיין אויף אלעס וואס מען האט פוגם געווען. דער הייליגער רבי נתן זאגט (לקוטי הלכות קריאת שמע שעל המטה, הלכה ב): ווען א מענטש ליינט קריאת שמע ביינאכט פאר ער גייט שלאפן און ער איז זיך מתוודה – "אֵינוֹ זָז מִשָׁם עַד שֶׁמוֹחֲלִין לּוֹ", איז מען אים מוחל אויף אלע זיינע עבירות.

גרייט זיך אן נעגל וואסער איידער דו גייסט שלאפן, מען קען זען א סימן אויף איינעם אויב ער האט יראת שמים, אויב ער גרייט אן נעגל וואסער. און גיי שלאפן איידל, טו זיך איבער די נאכט קליידער איידל, מיט יראת שמים - וועט די שלאף זיין א הייליגע שלאף מיט הייליגע חלומות, און די טאג וועט זיך אנהייבן מיט גרויס שמחה, וועסט זייער מצליח זיין אין עבודת השם.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ה' פרשת קרח, (חקת בא"י), ג' תמוז, שנת תשפ"ו לפרט קטן

... נרו יאיר וזוגתו תחי'

יעצט ווען ענק שיקן אייער טאכטער תחי' אין מיידל קעמפ זאלן ענק אויסלערנען די קינדער ווי אזוי מען שווימט איידל, לייגט אריין אין די טעכטער דאס שיינקייט פון זיין איידל, ווייל דער לאנגער גלות איז גורם (תהלים קו, לה): "וַיִּתְעָרְבוּ בַגּוֹיִם וַיִּלְמְדוּ מַעֲשֵׂיהֶם", מען לערנט זיך פון די גוים, מען גייט אין זייערע וועגן; לערן דיין שטוב, דיין ווייב און טעכטער – מען זאל חס ושלום שווימען מיט א בעדינ"ג סו"ט, נאר שווימען מיט א שווים קלייד וואס איז ערליך און איידל, ווייל אפילו א מיידל צווישן מיידלעך און א פרוי צווישן פרויען - דארף אויך זיין איידל און הייליג, און אויך אויב מען איז אליין אין א סווימינג פול, מען איז אליין אין שטוב - דארף מען זיין הייליג און איידל, און אז מען איז איידל - איז מען זוכה צו געזונטע ערליכע קינדער, מען איז זוכה צו הייליגע קינדער, אזוי ווי דער רבי זאגט (ספר המדות אות בנים, סימן ט): "צְנִיעוּת שֶׁבָּאִשָּׁה מְזַכָּה לָהּ לְבָנִים הֲגוּנִים", אז מען פירט זיך איידל און צניעות'דיג - איז מען זוכה צו הייליגע קינדער.

אז דו ווילסט דיינע טעכטער זאלן ליב האבן די איידעלע וועג, זאלסטו שעצן דיין ווייב'ס צניעות; אז דיין ווייב האט א גוטע מנהג, זי האט זיך אונטער גענומען צו גיין א געוויסע וועג, איידל - זאלסטו איר מחשיב זיין, איר אויסרימען, דעמאלט וועלן דיינע טעכטער אויך וועלן גיין אין די וועג, אבער אז דו וועסט זיך אונטער לאכן פון אירע גוטע מנהגים, דו וועסט שפעטן פון איר, דו וועסט שפעטן פון די רבנים וואס לערנען ווי אזוי זיך צו פירן - וועלן די קינדער אלעס אפלאזן, און זיי וועלן גיין א טרעפ ווייטער פון דיר, זיי וועלן לאכן און שפעטן פון אלעס; פריי זיך אז דיין ווייב וויל זיין גוט, זי זוכט גוטע קבלות, זיי איר מחזק, און געב איר גוטע ווערטער אז זי איז איידל, אזוי וועסטו זוכה זיין צו בנים צדיקים. ווייל ווען דער הייליגער בעל שם טוב זכותו יגן עלינו איז געווען אין אינסטאנבול האט ער געזען קינדער מיט גאר הייליגע נשמות, ער האט געזען זיי האבן נשמות פון תנאים, האט דער הייליגער בעל שם טוב געזאגט אז דאס קומט פון זייערע מאמעס וואס זיי זענען זייער איידל און פירן זיך זייער בצניעות.

דער אייבערשטער זאל העלפן איר זאלט האבן הצלחה אין אלע ענינים.