בריוון פונעם ראש ישיבה שליט"א

בעזרת ה' יתברך - יום א' פרשת נשא א', ראש חודש סיון, שנת תשפ"ו לפרט קטן

לכבוד ... נרו יאיר

מען קען נישט צוקומען צו שמחה נאר דורך תפילה; מען דארף בעטן דעם אייבערשטן יעדן טאג אז מען זאל זוכה זיין צו זיין פרייליך, ווייל ווען א מענטש איז פרייליך וועט ער צוקומען צו די העכסטע מדריגות וואס איז דא אויף די וועלט.

שמחה פארברענט אלע קליפות, און מוהרא"ש זאגט אז דאס איז דער סימן ווי אזוי א מענטש קען זיך מעסטן צי ער איז ביי די קדושה, צי חס ושלום ביי די טומאה; ער זאל קוקן אויב ער איז פרייליך, ווייל שמחה פארברענט אלע קליפות, וואס זייער גאנצער זאך איז עצבות ומרה שחורה, אזוי ווי עס שטייט (ישעיה סה, כה): "וְנָחָשׁ עָפָר לַחְמוֹ", עפר דאס איז עצבות ועצלות, וואס דאס קומט פון יסוד העפר (עיין לקוטי מוהר"ן חלק א, סימן קפט).

יעצט ווען עס קומט דער הייליגער יום טוב שבועות, 'זמן מתן תורתינו', מיר גייען זוכה זיין נאכאמאל צו מקבל זיין די הייליגע תורה, זאלסטו זיך פארנעמען מער נישט צו רעדן קיין שלעכטס אויף קיין שום איד, ווייל די הייליגע חכמים זאגן (ויקרא רבה ט, ט), ווען די אידן זענען געגאנגען אין מדבר איז אלץ געווען מחלוקת, און ווען מען איז געקומען צום בארג סיני - דארט האבן אלע אידן שלום געמאכט, מען האט זיך נישט געקריגט, האט דער אייבערשטער געזאגט: "הֲרֵי שָׁעָה שֶׁאֲנִי נוֹתֵן תּוֹרָה לְבָנָי", יעצט איז די צייט צו געבן די תורה פאר די אידן, ווייל מען קען נישט מקבל זיין די תורה נאר דורך ליבשאפט און אחדות; אז דו וועסט קוקן מיט רחמנות אויף אנדערע - וועט אוועק פאלן די פיינטשאפט, דו וועסט זיך קענען אויסקומען מיט יעדן איינעם; בפרט אין שטוב, דארט דארף מען זיך זייער פארלייגן און טון אלעס אבי עס זאל זיין שלום; מיט די עלטערן און מיט די קינדער און מיט די געשוויסטער. זוך נישט צו זיין גערעכט, זוך צו מאכן שלום - וועסטו זוכה זיין צו באקומען די הייליגע תורה, אזוי ווי די הייליגע חכמים זאגן (פסיקתא דרב כהנא יב, יד), דער אייבערשטער זאגט: "התורה כולה שלום", פארוועם געב איך איר? פאר די וואס זענען בשלום, אזוי ווי עס שטייט (משלי ג, יז): "וכל נתיבותיה שלום".

טייערער ברודער, הארציגער חבר, מיר שטייען נאכאמאל ביים בארג סיני, מיר זענען מקבל די תורה; זאלסטו אפלאזן די עצבות ומרה שחורה, מאך זיך א שטארקע קבלה אז דו גייסט נישט רעדן קיין איין שלעכט ווארט אויף קיינעם, דאס וועט דיר העלפן דו זאלסט קענען מקבל זיין די תורה און קענען לערנען פלייסיג די הייליגע תורה, דער הייליגער רבי זאגט (שיחות הר"ן, סימן צא): "סגולה להתמדת התורה" - נישט צו רעדן אויף אידישע קינדער, ווייל נאר אז מען קוקט גוט אויף יעדן איינעם - קען מען ליב האבן די תורה, עיין שם.

דער אייבערשטער זאל העלפן זאלסט האבן הצלחה אין אלע ענינים.

א גוטן חודש.

בעזרת ה' יתברך - יום ה' פרשת במדבר, כ"ז אייר, ער"ח סיון, שנת תשפ"ו לפרט קטן

שבתי מארקוס נרו יאיר, וויליאמסבורג

איך דאנק דיך זייער פאר אלעס וואס דו העלפסט מיר, און וואס דו טוסט פאר אונזערע מוסדות, סיי מיטן צאלן די רענט פאר די ישיבה אין שטאט, און סיי פארן "קרן הבנין", פארן שאפן די געלט פאר די בנינים אין קרית ברסלב ליבערטי.

יעדע מאל איך בין אין שטעטל און איך גיי באזוכן די חדר – דערקוויקט מיר מיין הארץ צו זען די שיינע שטאק וואס מען האט אויפגעבויט; אזא רחבות, אזא באקוועמקייט, ליכטיג און לופטיג, ממש א מחי'.

אויך יעצט ווען דו האסט זיך אונטערגענומען מיט דיין שותף אשר בער אינדארסקי נרו יאיר, צו אויפבויען פיר כיתות אין מחנה אילן החיים, פאר די קינדער צו לערנען זומער אין וואלד; וואויל איז דיר, וואויל איז ענקער חלק, דער אייבערשטער זאל דיר געבן כח און חן, אז דו און דיין שותף, ענק זאלן קענען ווייטער זיין די גוטע שלוחים צו בויען די מוסדות, ענק זאלן זוכה זיין צו נחת פון ענקערע דורות.

יעצט שבועות איז דאך דיין יום טוב, איך געדענק אז דו ביסט מקורב געווארן יארן צוריק אין אן ערב שבועות פארנדיג קיין קרית יואל, און אויפן וועג האסטו אויסגעהערט א שיעור פון ישיבה, הכנה לקבלת התורה, און דאס האט דיר אויפגעפלאקערט דיין הארץ צו לערנען אויפן סדר דרך הלימוד פון הייליגן רבי'ן (המבואר בשיחות הר"ן, סימן עו), אשרינו...

בעזרת ה' יתברך - יום ה' פרשת במדבר, כ"ז אייר, ער"ח סיון, שנת תשפ"ו לפרט קטן

לכבוד הרב ... שליט"א

היינט איז א טאג וואס אלע בעטן פאר גוטע קינדער, מען לויפט צו קברי צדיקים, מען זאגט יום כיפור קטן און מען וויינט זיך אויס מיט תפילת השל"ה.

איך ווייס פון דיינע שווערע נסיונות, איך טראכט אן עצה פאר דיר, יעדע מאל דו ווילסט גיין אין קיאסק קוקן וכו' – זאלסט טראכטן: 'ווי אזוי וואלט איך געשפירט ווען מיין זון אדער מיין טאכטער טוען דאס? ווי אזוי וועל איך רעאגירן? וואס וועל איך טון?'

וויסן זאלסטו, אלעס וואס דו טוסט, אפילו דו טוסט עס באהאלטענערהייט – וועט זיין פאר דיינע קינדער שווערע נסיונות, דאס וואס דו ווילסט אז דיינע קינדער זאלן זיין – דאס דארפסטו טון.

דער הייליגער רבי זאגט (ספר המדות אות ספר חלק ב, סימן ה): "מִי שֶׁאֵין מִסְתַּכֵּל עַל נָשִׁים", ווער עס היט זיינע אויגן, "זוֹכֶה שֶׁזַּרְעוֹ יְחַבְּרוּ פֵּרוּשִׁים עַל הַתּוֹרָה", איז זוכה צו קינדער תלמידי חכמים וואס וועלן ארויסגעבן ספרים, שרייבן חידושי תורה.

ליבער ברודער, יעצט ווען עס קומט די הייליגע יום טוב שבועות, פון יעצט זאלסטו מער נישט אריבערטרעטן די שוועל פון קיאסק, גיי מער נישט אהין, זיי מקבל די תורה; דו ביסט דאך אזא גוטער מענטש, האסט אזעלכע איידלקייטן, האסט אזא גוטע נאטור, מיט א הייליגע נשמה, האסט א וואוילע ווייב מיט זיסע קינדער, גיי מער נישט קוקן וכו', טו עס פאר דיינע קינדער; איך קען נישט טראכטן און איך וויל נישט טראכטן פון די צער וואס טאטע מאמע גייען אריבער ווען זיי זעען ווי די קינדער נעמען די סמארטפאון וכו', אדער גייען קוקן וכו'.

הייב אן משניות, זאג יעדן טאג אכצן פרקים משניות מיט דעם יום תהלים; די תורה וועט דיר אויסוואשן דיין נשמה, עס וועט דיך מאכן פאר א גרויסער צדיק, און זיי מקפיד צו דאווענען די דריי תפילות מיט מנין.

איך האב דיך ליב, איך ווייס אז דו ווילסט זיין גוט, דו ביסט פשוט געפאנגען – איינגעשפארט אין תפיסה, אבער מיט די חיזוק פון הייליגן רבי'ן, די עצות און חיזוק פון צדיק – קען מען ארויסגיין פון אלע תפיסות.

בעזרת ה' יתברך - יום ה' פרשת במדבר, כ"ז אייר, ער"ח סיון, שנת תשפ"ו לפרט קטן

לכבוד הרב ... שליט"א

היינט איז א טאג וואס אלע בעטן פאר גוטע קינדער, מען לויפט צו קברי צדיקים, מען זאגט יום כיפור קטן און מען וויינט זיך אויס מיט תפילת השל"ה.

איך ווייס פון דיינע שווערע נסיונות, איך טראכט אן עצה פאר דיר, יעדע מאל דו ווילסט גיין אין קיאסק קוקן וכו' – זאלסט טראכטן: 'ווי אזוי וואלט איך געשפירט ווען מיין זון אדער מיין טאכטער טוען דאס? ווי אזוי וועל איך רעאגירן? וואס וועל איך טון?'

וויסן זאלסטו, אלעס וואס דו טוסט, אפילו דו טוסט עס באהאלטענערהייט – וועט זיין פאר דיינע קינדער שווערע נסיונות, דאס וואס דו ווילסט אז דיינע קינדער זאלן זיין – דאס דארפסטו טון.

דער הייליגער רבי זאגט (ספר המדות אות ספר חלק ב, סימן ה): "מִי שֶׁאֵין מִסְתַּכֵּל עַל נָשִׁים", ווער עס היט זיינע אויגן, "זוֹכֶה שֶׁזַּרְעוֹ יְחַבְּרוּ פֵּרוּשִׁים עַל הַתּוֹרָה", איז זוכה צו קינדער תלמידי חכמים וואס וועלן ארויסגעבן ספרים, שרייבן חידושי תורה.

ליבער ברודער, יעצט ווען עס קומט די הייליגע יום טוב שבועות, פון יעצט זאלסטו מער נישט אריבערטרעטן די שוועל פון קיאסק, גיי מער נישט אהין, זיי מקבל די תורה; דו ביסט דאך אזא גוטער מענטש, האסט אזעלכע איידלקייטן, האסט אזא גוטע נאטור, מיט א הייליגע נשמה, האסט א וואוילע ווייב מיט זיסע קינדער, גיי מער נישט קוקן וכו', טו עס פאר דיינע קינדער; איך קען נישט טראכטן און איך וויל נישט טראכטן פון די צער וואס טאטע מאמע גייען אריבער ווען זיי זעען ווי די קינדער נעמען די סמארטפאון וכו', אדער גייען קוקן וכו'.

הייב אן משניות, זאג יעדן טאג אכצן פרקים משניות מיט דעם יום תהלים; די תורה וועט דיר אויסוואשן דיין נשמה, עס וועט דיך מאכן פאר א גרויסער צדיק, און זיי מקפיד צו דאווענען די דריי תפילות מיט מנין.

איך האב דיך ליב, איך ווייס אז דו ווילסט זיין גוט, דו ביסט פשוט געפאנגען – איינגעשפארט אין תפיסה, אבער מיט די חיזוק פון הייליגן רבי'ן, די עצות און חיזוק פון צדיק – קען מען ארויסגיין פון אלע תפיסות.

בעזרת ה' יתברך - יום ד' פרשת במדבר, כ"ו אייר, שנת תשפ"ו לפרט קטן

... נרו יאיר, קרית ברסלב

בנוגע איבערבויען די הויז וכו'; מאך נישט נארישע זאכן, ענדליך ביסטו ארויס פון דיינע חובות, וואס פעלט דיר אויס נאכאמאל חובות... ענדערש זיצן אין א דירה וואס איז נישט אזוי גרויס, נישט אזוי שיין און מסודר – ווי איידער זיך מאכן חובות. נישט איך זאג דאס, דער הייליגער רבי זאגט דאס, דער רבי זאגט (שיחות הר"ן, סימן קכב): "וְטוֹב לִסְבֹּל דֹּחַק", ענדערש זאל מען ליידן די דחקות "אֲפִלּוּ בִּמְזוֹנוֹת, וְכָל שֶׁכֵּן בְּמַלְבּוּשִׁים וְדִירוֹת וְכוּ'", סיי ביים עסן, קליידונג און א דירה וכו', "וְלֹא לִהְיוֹת בַּעַל חוֹב", ווי זיין אין חובות.

היט דיינע אויגן, היט זיך נישט צו האבן קיין טעלעפאן, טעבלעט וואס מען קען אראפפאלן, קוקן עבירות חס ושלום. מוהרא"ש זאגט אז דאס איז וואס דער הייליגער רבי זאגט, עס איז דא עבירות וואס מאכט מען זאל זיין א בעל חוב (שם, סימן קיב), אז דאס איז די עבירה פון זיך נישט היטן די אויגן און פאלן בקדושה רחמנא לצלן, די עבירה פון אדם הראשון, "בעצבון תאכלנה", ביז מען קומט צו ווערן "עֶבֶד לוֹוֶה לְאִישׁ מַלְוֶה" (משלי כב, ז); דער אייבערשטער זאל אונז היטן פון דעם.

בעזרת ה' יתברך - יום ד' פרשת במדבר, כ"ו אייר, שנת תשפ"ו לפרט קטן

... נרו יאיר, קרית ברסלב

איך וויל זיך אויסשמועסן אביסל מיין הארץ; איך בין זייער צעבראכן, איך האב אזויפיל אוועקגעגעבן פאר דיר, אזויפיל בזיונות געליטן וכו' וכו', אויך האב איך דיר אזויפיל יארן אויפגעצויגן ווי אן אייגן קינד, שפעטער האב איך דיר געברענגט דיין שידוך, זיך שטענדיג געזארגט פאר דיר, און נאך יעצט; איך האב א געפיל אז דו האסט עפעס א נישט גוטע זאך באהאלטן, אדער א טעלעפאן, אדער א טעבלעט, לעפטאפ וכדומה; וואס מאכט מיך טראכטן? ווייל איך זע דיך מער נישט, איך זע דו האסט זיך אפגעקילט.

די הייליגע חכמים דערציילן (עבודה זרה יז:), ווען מען האט געכאפט דעם הייליגן רבי אלעזר בן פרטא און מען האט אים געפרעגט: "היתכן דו לערנסט תורה ווען די געזעץ לאזט נישט, און היתכן דו ביסט א רויבער, דו גנב'סט?" האט ער געענטפערט: די צוויי זאכן גייען נישט אינאיינעם, "אִי סַיָּפָא לָא סָפְרָא", אויב בין איך א גנב – לערן איך נישט, "וְאִי סָפְרָא לָא סַיָּפָא", און אויב לערן איך – בין איך נישט קיין גנב, דאס גייט נישט אינאיינעם; דאס זאג איך דיר, דאס גייט נישט אינאיינעם; א סמארטפאון מיט התקרבות צום רבי'ן גייט נישט אינאיינעם, ליצנות, נאוף, אביזרייהו דגילוי עריות גייט נישט מיט יראת שמים, און דו פלעגסט קומען צו די שיעורים, דו פלעגסט זיך צוהערן צו די שמועסן פון יראת שמים, און שוין לאנגע וואכן וואס איך הער נישט פון דיר, און איך זע דיך נישט, קומסט מער נישט אין שול; אוי רייסט מיר מיין הארץ, איך האב דאך אזוי געוואלט זען ערליכע דורות ביי ביינע תלמידים, וואס וועט זיין...

ליבער ברודער, ביסט מיר איינגעקריצט אין הארץ, אויב איז אמת וואס איך טראכט, בעט איך דיר זייער, נעם א האמער, נעם א האק, און צעברעך די עבודה זרה, זיי מקיים די מצוה פון (דברים יב, ג): "וְנִתַּצְתֶּם אֶת מִזְבְּחֹתָם, וְשִׁבַּרְתֶּם אֶת מַצֵּבֹתָם, וַאֲשֵׁרֵיהֶם תִּשְׂרְפוּן בָּאֵשׁ", און קום צוריק, קום אין שול; ווי קען זיין א איד קומט נישט אין שול? קום אין שול, קום דאווענען די דריי תפילות, קום צו א שיעור, נעם זיך א חברותא, קלעב זיך צוריק צו צום אייבערשטן, חדש ימינו כקדם, באניי זיך אין לימוד התורה; מיר גייען מקבל זיין יום טוב שבועות די תורה, מוהרנ"ת האט געטאנצן שבועות מיט די תורה: "א נייע תורה, א נייע תורה!"

און אויב איז דאס נאר א חלום, וויל איך וויסן אויב קען איך עפעס העלפן, וואס גייט אריבער אז מען זעט דיך מער נישט? הלוואי חלום איך, הלוואי האסטו גארנישט קיין שלעכטס.

ווי עס זאל נאר זיין, שטארק זיך מיט אמונה, שטארק זיך מיט תורה ותפילה, שטארק זיך מיט דאנקען און לויבן דעם אייבערשטן.

דער אייבערשטער זאל מיר געבן כח צו קענען ווייטער אנהאלטן און טון וואס מוהרא"ש האט מיר געזאגט צו טון, מחזק זיין בחורים און אברכים וכו'.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... תחי', תלמידת בית פיגא, קרית יואל

איך האב ערהאלטן אייערע מעסעדזשעס.

אז איר ווילט מיך זען, איר בענקט זיך צו מיר – זאלט איר קוקן אין די בריוון פון עצתו אמונה און איש אמונות, דארט קענט איר מיך זען און שטילן אייער בענקעניש, אויך קענט איר הערן די שיעורים אויף די טעלעפאן ליין "קוואל פון אמונה", "קול ברסלב"; מיך נאכלויפן, מיך וועלן זען – איז נאריש.

איר קענט עס זאגן פאר אלע תלמידות, אלע זאלן לערנען די בריוון, די וועכנטליכע בריוון, און וואו עס איז דא א אידישע תפילה – זאל מען דאס ניצן, דאס בעטן, און וואו עס איז דא חיזוק און הדרכה – זאל מען דאס נעמען ווי א פערזענליכע בריוו.

איך שטרענג זיך אן ארויסצוגעבן וועכנטליך די עצתו אמונה ווייל אין די בריוון קען מען זען ווי אזוי זיך צו פירן, און נעמען גאר אסאך חיזוק.

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

... נרו יאיר תלמיד ישיבת היכל הקודש ירושלים

דיין מגיד שיעור זאגט מיר אז ער האט דיך זייער ליב, דו פירסט זיך מיט דרך ארץ, דו פירסט זיך מיט גוטע מידות, דו קריגסט זיך נישט מיט די בחורים, איך פריי זיך זייער צו הערן די גוטע גריסן אויף דיר.

טייערער ..., יעצט אין די זומער טעג ווערט שרעקליכע נסיונות אין שמירת עיניים, אויך א גאנץ יאר דארף מען האבן א שמירה אויף די אויגן, מען זאל זיין אפגעהיטן נישט צו קוקן קיין שלעכטס, אבער ווען עס קומט זומער - ווערט גאר שווער, עס ווערט א שרעקליכע פריצות, די גאסן ווערן זייער געפערליך, עס ברענט א פייער פון פריצות און מען קען פארברענט ווערן ביי די קליפות השם ישמרינו, און מיט איין שלעכטע קוק, קען מען פארלירן אזויפיל קדושה און אזויפיל יראת שמים, מען מוז זיך זייער היטן די אויגן מען זאל נישט פארלירן די קדושה און יראת שמים פון אלע יארן עבודת השם, ווייל אין שמירת עיניים ליגט אלעס, אויב מען היט די אויגן קען מען זוכה זיין צו ווערן זייער הייליג, אזוי ווי די הייליגע צדיקים טייטשן, עס שטייט אין פסוק (בראשית לח, כא): "אַיֵּה הַקְּדֵשָׁה הִוא בָעֵינַיִם עַל הַדָּרֶךְ", טייטשן זיי: "אַיֵּה הַקְּדֵשָׁה", ווי אזוי ווערט מען הייליג? און וואס דארף מען טון זוכה זיין צו ווערן הייליג? "הִוא בָעֵינַיִם עַל הַדָּרֶךְ", עס ליגט אין די אויגן, ווען מען גייט אין די וועגן; מען זאל זיך היטן די אויגן אין גאס, מען זאל נישט גיין אין פלעצער וואו מען קען חס ושלום פאלן.

טייערער ... איך בענק זיך צו דיר, איך קוק ארויס אויף דיר, איך ווארט און האף אז דו וועסט נישט נאכלאזן דיין עבודת השם, בעיקר זיך היטן די אויגן; ווייל אז מען היט די אויגן - איז מען זוכה צו א שטארקע אמונה, מען איז זוכה צו שפירן שטענדיג דעם אייבערשטן, אזוי ווי מיר זאגן יעדן טאג ביי קריאת שמע (במדבר טו, לט): "וְלֹא תָתוּרוּ אַחֲרֵי לְבַבְכֶם וְאַחֲרֵי עֵינֵיכֶם", און די הייליגע חכמים זאגן (ברכות יב:): 'אחרי לבבכם' דאס מיינט מען 'מינות', און 'אחרי עיניכם' דאס מיינט מען 'טראכטן פון עבירות'; די צוויי זאכן גייען אינאיינעם, דער וואס היט נישט די אויגן פאלט אריין אין מינות ואפיקורסות, די אמונה ווערט ביי אים פארלאשן, מען שפירט נישט דעם אייבערשטן, מען איז פול מיט מחשבות פון ספיקות און בלבולים, קשיות אויף די אמונה רחמנא לצלן, אבער דער וואס היט די אויגן - דער איז זוכה צו האבן א ריינע אמונה, א קלארע אמונה, און מיט אמונה איז די לעבן זיס און געשמאק; ווייל ווען עס גייט גוט ווייסט מען אז עס איז פונעם אייבערשטן, און אויך חס ושלום ווען עס גייט פארקערט ווי מען וויל - ווייסט מען אז דאס איז אויך אלעס פונעם אייבערשטן, און אז עס קומט פונעם אייבערשט קען נישט זיין אז עס איז שלעכט.

שרייב מיר צוריק בריוו, איך וויל זיין מקושר מיט דיר.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת בהר בחקותי, י"ט אייר, שנת תשפ"ו לפרט קטן

לכבוד ... נרו יאיר, תלמיד ישיבת היכל הקודש ירושלים

איך האב זייער הנאה צו הערן פון דיין מגיד שיעור ר' משה שמואל נרו יאיר אז דו העלפסט אין ישיבה מיט וואס מען דארף העלפן, עס איז זייער א גרויסע זכות צו העלפן סיי אין ישיבה, סיי אין בית המדרש, ספעציעל ביים הייליגן רבינ'ס ישיבה און בית המדרש, דעמאלט איז דאס גאר א גרויסע זכות, אז מען איז זוכה צו משמש זיין דעם רבי'ן, די זכות איז גאר גרויס.

שטארק זיך, יעצט אין די זומער טעג קען מען זייער מצליח זיין אין עבודת השם, עס איז א גוטע צייט זיך צו באנייען, ווייל די גאנצע בריאה טוט זיך יעצט באנייען, אלע ביימער, אלע גראזן הייבן אן צו שפראצן; נאכן זיין א גאנץ ווינטער טויט, נאכן זיין א גאנץ ווינטער טריקן - הייבן אלע אן מיט א פרישקייט ארויסצוגעבן שיינע פרוכט און שיינע בלעטלעך; איז דאס א צייט פאר אונז אלע זיך צו אויפפרישן, זיך באנייען צו דינען דעם אייבערשטן. דערפאר בעט איך דיר טייערער ליבער ברודער, יעצט אין די זומער טעג זאלסטו זיך באנייען מיט תפילה והתבודדות, טראכט נישט אויף צוריק, טראכט נישט פון די פריערדיגע זמן, פון די ווינטער זמן, קוק נישט אויף צוריק, ווייל דאס צוריק קוקן לאזט נישט דעם מענטש מצליח זיין, און אזוי ווי אלע ביימער און אלע פעלדער הייבן אן מיט א פרישקייט צו וואקסן, צו שפראצן, ארויס צו געבן די גוטע פרוכט און די שיינע בלומלעך - אזוי אויך זאלסטו אנהייבן מיט א נייע התחלה דינען דעם אייבערשטן; מאך זיך א קביעות יעדן טאג צו שמועסן און אויסרעדן דיין הארץ צום אייבערשטן, און אז דו האסט א פעלד - זאלסטו גיין א שפאציר אין פעלד, זיי זיך דארט מתבודד, ווייל עס איז אזוי געשמאק זיך צו מתבודד זיין צווישן די ביימער און גראז, דער הייליגער רבי זאגט (שיחות הר"ן, סימן קסג), ווי געשמאק איז צו גיין צווישן די גראז הערן ווי זיי זינגען שירות ותשבחות צום אייבערשטן, יעדע גראז זינגט א ניגון צום אייבערשטן אן קיין פניות, אן קיין מחשבות זרות, ווי גוט און ווי שיין איז צו זיין צווישן זיי; און אויך אז מען האט נישט קיין פעלד קען מען גיין א שפאציר אין א שטילע גאס און דארט שמועסן מיטן אייבערשטן, אים דערציילן ווי שטארק מען וויל זיין גוט און ווי מען האלט אין איין צוריק פאלן, זיך אויסגיסן דאס הארץ פארן אייבערשטן, אזוי זאלסטו טון יעדן טאג ביז דו וועסט זוכה זיין נאנט צו ווערן צום אייבערשטן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת בהר בחקותי, ט"ז אייר, שנת תשפ"ו לפרט קטן

לכבוד מיין ליבער ... נרו יאיר

איך האב זייער הנאה אז דו ביסט געקומען רעדן, האסט אויסדערציילט דיין ווייטאג וכו'; איך וועל זען וואס מען קען טון, דער עיקר זאלסטו זיך שטארקן, זיך נישט נאכלאזן פון דיין עבודת השם.

יעצט ווען עס קומט דער גרויסער טאג ל"ג בעומר זאלסטו זיך מאכן א שיעור אין ספר הזוהר. מאך זיך א שיעור צו זאגן די ווערטער פון זוהר, ווייל דאס זאגן די ווערטער פון זוהר הייליגט און רייניגט דעם מענטש. אויך זאלסטו זיך מאכן א שיעור אין לערנען ספר תקוני זוהר, דאס זאגן זוהר און זאגן תקוני זוהר טוט אפוואשן די נשמה פון אלע שמוץ, עס איז זייער גוט פאר די נשמה, עס טוט צוקלעבן דעם מענטש צום אייבערשטן. אזוי ווי דער הייליגער רבי זאגט (שיחות הר"ן, סימן קח): "יָדוּעַ שֶׁלִּמּוּד הַזֹּהַר מְסֻגָּל מְאֹד מְאֹד", לערנען זוהר איז זייער מסוגל פאר די נשמה; אויך איז באוויסט אז אמאל איז געקומען א איד צום הייליגן אריז"ל בעטן א תיקון פאר זיינע שלעכטע מעשים, די ביטערע עבירות וואס ער האט נעבעך געטון, האט אים דער הייליגער אריז"ל געגעבן א תיקון צו זאגן יעדן טאג פינף בלאט פון זוהר, און אזוי וועט פאראכטן ווערן זיין נפש, רוח ונשמה פון אלע שמוץ.

דעריבער בעט איך דיר מיין טייערער ברודער, אין די גרויסע טאג ל"ג בעומר וואס רבי שמעון בר יוחאי טיילט מתנות פאר יעדן איינעם - דארף מען נעמען אויף זיך צו האבן א שייכות מיטן הייליגן תנא רבי שמעון בר יוחאי א גאנץ יאר, און ווען דו טאנצט ביי די הדלקה לכבוד רבי שמעון בר יוחאי זאלסטו נעמען אויף זיך צו האבן א שייכות יעדן טאג מיט רבי שמעון בר יוחאי דורך לערנען און זאגן די ווערטער פון זוהר; דאס לערנען זוהר ברענגט א שטארק חשק צו לערנען כל התורה כולה. אזוי ווי דער הייליגער רבי זאגט (שיחות הר"ן, סימן קח): "וְדַע שֶׁעַל יְדֵי לִמּוּד הַזֹּהַר נַעֲשֶׂה חֵשֶׁק לְכָל מִינֵי לִמּוּדָם שֶׁל הַתּוֹרָה הַקְּדוֹשָׁה", דורך לערנען דעם הייליגן זוהר באקומט מען א שטארקע גלוסטעניש צו לערנען אלע ספרים פון די הייליגע תורה.

אויך זאלסטו איבער געבן פאר דיין ווייב תחי' א גרויסן יישר כח פארן מיר העלפן אין בית פיגא, איך בין איר זייער דאנקבאר; איך בין דאנקבאר פאר אלע וואס העלפן אין די סקול און פאר אלע וואס טוען מיט אונזערע תלמידות, איך בין מתפלל פאר זיי און איך בין זיכער אז מען איז זוכה צו זען גרויסע נסים אין דעם זכות.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ד' פרשת במדבר, כ"ו אייר, שנת תשפ"ו לפרט קטן

לכבוד ... נרו יאיר

מיר שטייען שוין זייער נאנט צום גרויסן טאג, דער הייליגער יום טוב שבועות, מיר גייען זוכה זיין צו מקבל זיין די תורה; איך וויל דיר בעטן עפעס וואס ליגט מיר אין הארץ, איך וויל דיר זייער בעטן זאלסט אוועק ווארפן דיין טעלעפאן און טעבלעט אויף וואס דו קוקסט קליפס, סטעטוס וכו' וכו'; דיין שלום בית, דיין שמחת החיים - וועט צוריק קומען, ווייל דורכדעם וואס מען היט נישט די אויגן, און דורך הערן ליצנות, ניבול פה, פארלירט מען די שידוך, מען פארלירט די שלום בית; אזוי ווי די הייליגע חכמים דערציילן (ספר חסידים, סימן שפז), עס איז געווען א מענטש וואס האט אסאך געפאסט אז ער וויל חתונה האבן מיט א פרוי וואס ער האט ליב, ער האט זייער אסאך געבעטן דעם אייבערשטן אויף די שידוך, און מען האט נישט אנגענומען זיינע תפילות מיט זיינע תעניתים, ער האט זיך געוואונדערט פארוואס ער האט נישט באקומען די שידוך אויף וואס ער האט אזויפיל געבעטן, "אָמַר הַחָכָם", האט אים דער צדיק געענטפערט: "מִפְּנֵי שֶׁאַתָּה צוֹפֶה בַּנָּשִׁים", ווייל דו קוקסט אויף פרויען, דעריבער האט דער אייבערשטער דיר נישט נאכגעגעבן דיין געבעט, "זֶה הַצַּעַר הַבָּא עָלֶיךָ בִּשְׁבִיל שֶׁהָיִיתָ צוֹפֶה בַּנָּשִׁים, וְזִמֵּן לְךָ מַה שֶׁלֹא מָצְאָה חֵן בְּעֵינֶיךָ", דיין גאנצע צער וואס דו גייסט אריבער איז ווייל דו היטסט נישט דיינע אויגן, דעריבער האסטו באקומען אן אנדערע שידוך, אן קיין חן.

אז דו וועסט אוועק ווארפן דיין טעבלעט און סמארטפאון וכו' און דו וועסט תשובה טון, דו וועסט היטן דיינע אויגן - וועסטו זוכה זיין צו א שטארקע אמונה, די לעבן וועט דיר זיין זיס און געשמאק. דער הייליגער רבי זאגט (לקוטי מוהר"ן חלק א, סימן לא), אויפן פסוק (תהלים פט, כט): "ובריתי נאמנת לו", אז ברית און אמונה גייען אינאיינעם, און אז מען איז חס ושלום פוגם בברית, מען טוט עבירות, מען קוקט עבירות - פארלירט מען די אמונה; מען קען נישט שפירן געטליכקייט ווען די מח איז פארשמירט מיט עבירות, ווייל ווען מען פארשמירט די אויגן - פארלירט מען די מוחין, אזוי ווי דער הייליגער זוהר זאגט (פרשת משפטים, דף קי): "סילוקא דיסודא עד אבא ואימא", אז מען איז פוגם ביסוד ווערן די מוחין מקולקל, מען פארלירט די מח, מען זעט מער נישט אלקות, מען שפירט מען נישט אלקות, אלעס ווערט פארלאשן.

עס קומט אזא הייליגע יום טוב, מיר קומען נענטער און נענטער צום בארג סיני, מיר גייען זוכה זיין צו הערן נאכאמאל די עשרת הדברות, אבער מען דארף אוועק ווארפן די טויטע שרצים, די הייליגע חכמים זאגן (תענית טז:): "אָדָם שֶׁתּוֹפֵס שֶׁרֶץ בְּיָדוֹ, אֲפִלּוּ טוֹבֵל בְּכָל מֵימוֹת שֶׁבָּעוֹלָם לֹא עָלְתָה לוֹ טְבִילָה, זְרָקוֹ מִיָּדוֹ כֵּיוָן שֶׁטָּבַל בְּאַרְבָּעִים סָאָה מִיַד עָלְתָה לוֹ טְבִילָה", ווען א טמא'נער מענטש טובל'ט זיך מיט א שרץ אין האנט, וועט ער בלייבן טמא, נאר אויב ער לאזט אפ דעם טויטן שרץ - קען ער ווערן טהור, אבער כל זמן ער האלט אן דעם שרץ, אפילו מען טובל'ט זיך אין אלע וואסערן, בלייבט מען טמא; בעט איך דיר, ווארף אוועק די שמוציגע טעלעפאן, מי יודע, ווער ווייסט צי אלעס וואס דו גייסט אריבער וכו' - איז נישט פון דעם וואס די אויגן זענען הפקר רחמנא לצלן...

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת במדבר, כ"ה אייר, שנת תשפ"ו לפרט קטן

לכבוד ... נרו יאיר

וואס גייסטו היינט עסן פאר נאכטמאל? זע צו עסן לאקשן, ווייל מוהרא"ש דערציילט, מען האט אמאל געהערט ווי דער הייליגער רבי ר' אלימלך זכותו יגן עלינו זאגט, אז היינט וויל ער נישט עסן פאר נאכטמאל קאשע, היינט וויל ער לאקשן, ער האט געזאגט ער מיינט נישט די עסן, ער מיינט צו זאגן אז ער וויל נישט עסן קיין קאשע, ער וויל נישט קיין קשיות אויפן אייבערשטן, ער וויל לאקשן, דאס איז די ווערטער 'לֹא-קָשְׁן' – "עס איז מיר גארנישט שווער, איך האב נישט קיין קשיות אויפן אייבערשטן".

על כן בעט איך דיר דו זאלסט אויך זיך באשטעלן א פושקע לאקשן, און אז דו האסט אין שטוב קאשע - זאלסטו גיין אין פעלד אוועק גיסן די קאשע, גיי התבודדות, גיס זיך אויס דיין הארץ, בעט דעם אייבערשטן פאר א קלארע לויטערע שטארקע אמונה, דו זאלסט שפירן דעם אייבערשטן און געדענקען אז עס איז גארנישט דא אויסער אים, אלעס איז דער אייבערשטער, דומם צומח חי מדבר - אלעס אלעס איז אייבערשטער.

ליבער ברודער, הארציגער חבר, נישטא קיין חברים, א שאד זיך צו חנפ'ענען, געב א קוק די זיסע ווערטער פון מוהרא"ש פון די צוואה (צוואת מוהרא"ש, סימן ט): "אִיךְ בֶּעט אַייךְ זֵייעֶר אִיר זָאלְט זִיךְ גוּט אַרַיין נֶעמֶען אִין קָאפּ אַז אִיר הָאט נִישְׁט קֵיינֶעם אוֹיף דֶער וֶועלְט. קַיין שׁוּם מֶענְטְשׁ אוֹיף דֶער וֶועלְט קֶען אַייךְ נִישְׁט הֶעלְפְן, אוּן זִיכֶער קֶען קֵיינֶער אַייךְ נִישְׁט שְׁלֶעכְטְס טוּן. דֶערִיבֶּער זָאלְט אִיר נִישְׁט מוֹרָא הָאבְּן פוּן קַיין שׁוּם מֶענְטְשׁ, אוּן אִיר זָאלְט זִיךְ נִישְׁט חַנְפְ'עֶנֶען צוּ קַיין שׁוּם מֶענְטְשׁ, וַוייל דָאס וֶועט אַייךְ גָארְנִישְׁט הֶעלְפְן; פַארְקֶערְט, דָאס וֶועט אַייךְ נָאר שָׁאטְן צוּם גֶעזוּנְט, וַוייל וֶוען מֶען פַארְלָאזְט זִיךְ אוֹיף מֶענְטְשְׁן, אוּן דֶערְנָאךְ זֶעט מֶען אַז יֶענֶער הָאט גָארְנִישְׁט גֶעקֶענְט הֶעלְפְן, יֶענֶער אִיז בִּכְלַל נִישְׁט אִינְטֶערֶעסִירְט דִיר צוּ הֶעלְפְן, דַאן וֶוערְט מֶען זֵייעֶר אַנְטוֹישְׁט, מֶען וֶוערְט זֵייעֶר צוּבְּרָאכְן אוּן צוּקְלַאפְּט פוּן דֶעם. אַ אִיד וָואס גְלֵייבְּט אָבֶּער אִינֶעם אֵייבֶּערְשְׁטְן, עֶר פַארְלָאזְט זִיךְ אִינְגַאנְצְן נָאר אוֹיפְן אֵייבֶּערְשְׁטְן, דַאן אִיז עֶר זֵייעֶר מַצְלִיחַ".

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ב' פרשת במדבר, כ"ד אייר, שנת תשפ"ו לפרט קטן

לכבוד ... נרו יאיר

אז דו גייסט אריבער שווערע טעג, דו שפירסט ווי דו ווערסט צעקוועטשט - זאלסטו חס ושלום נישט האבן קיין קשיות אויפן אייבערשטן, גלייב אז אלעס וואס דער אייבערשטער טוט איז לטובה. די הייליגע חכמים דערציילן (נדה לא.), צוויי חברים האבן איינגעקויפט סחורה דאס צו פארקויפן אין א צווייטע לאנד, און אזוי גייענדיג צום שיף האט זיך איינער פון זיי צעבראכן די פוס און ער האט נישט געקענט גיין צום שיף, די שיף איז אוועק געפארן מיטן אנדערן שותף, מיטנעמענדיג אלע סחורה, און דער מענטש מיטן צעבראכענעם פוס איז אונטערגעבליבן, האט דער מענטש אנגעהויבן רעדן קעגן די אמונה, ער האט געהאט טענות צום אייבערשטן, און נאך א שטיק צייט האט ער געהערט אז די שיף איז איינגעזונקען אין וואסער מיט אלע מענטשן מיט די גאנצע סחורה, האט ער אנגעפאנגען דאנקען דעם אייבערשטן (ישעיה יב, א): "אוֹדְךָ ה' כִּי אָנַפְתָּ בִּי", איך דאנק דיך אייבערשטער אז דו האסט געצערנט אויף מיר – אז דו האסט מיר צעבראכן די פוס, און אזוי האב איך פארפאסט די שיף און געבליבן לעבן, "יָשֹׁב אַפְּךָ וּתְ'נַחֲמֵנִ'י", אין דעם פסוק איז מרומז דעם הייליגן רבינ'ס נאמען, דער רבי טרייסט אונז, דער רבי פילט אונז אן מיט אמונה, אז דער מענטש זאל דאנקען דעם אייבערשטן אויף אלעס וואס ער טוט מיט אים, אפילו וואס עס זעט אויס ווי שלעכטס.

ליבער ברודער, הארציגער חבר, אפילו ביי דיר האט זיך די מעשה נישט אזוי געענדיגט, זאלסטו זינגען און טאנצן: "'אוֹדְךָ ה'', איך דאנק דיך אייבערשטער פאר אלעס, און אויך פאר אלעס וואס איז מיר אריבער"; גלייב באמונה שלימה אז עס איז נישטא קיין פערצופאל, נישטא קיין פאסירונג, נישטא קיין טבע, נישטא קיין טעותים; אלעס וואס פאסירט איז מיט א פינקטליכער חשבון.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

לכבוד ... נרו יאיר

שטארק זיך מיט אמונה, און אז עס גייט אריבער אויף דיר שווערע טעג, דו שפירסט ווי דו ברעכסט אונטער - זאלסטו זיך שטארקן מיט אמונה; גלייב אז דער אייבערשטער מאכט אלעס מיט א חשבון, אלעס איז נאר פאר דיין טובה. קוק די זיסע ווערטער וואס מוהרא"ש זאגט (צוואת מוהרא"ש, אות יד): "מַיינֶע טֵייעֶרֶע קִינְדֶער אוּן תַּלְמִידִים, וָואס זָאל אִיךְ אַייךְ זָאגְן? אִיר קֶענְט זִיךְ נִישְׁט פָארְשְׁטֶעלְן וִויפִיל יִסוּרִים אוּן עַגְמַת נֶפֶשׁ אִיךְ הָאבּ גֶעלִיטְן אוֹיף דֶער וֶועלְט, אִיךְ הָאבּ מַמָשׁ נִישְׁט גֶעהַאט קַיין אֵיין גוּטְן טָאג אִין מַיין לֶעבְּן, אָן קַיין גֻּזְמָא. אִיךְ הָאבּ יֶעדְן טָאג גֶעוֵויינְט פוּן דִי פִילֶע צַעַר אוּן עַגְמַת נֶפֶשׁ וָואס אִיךְ הָאבּ גֶעהַאט פוּן אַלֶע זַייטְן, פוּן אִינֶעוֵויינִיג אוּן פוּן אִינְדְרוֹיסְן. אָבֶּער אִיךְ הָאבּ זִיךְ שְׁטֶענְדִיג גֶעטְרֵייסְט מִיט דֶעם אַז בָּרוּךְ ה' אִיךְ גְלֵייבּ אִינֶעם אֵייבֶּערְשְׁטְן, אִיךְ וֵוייס אַז אַלֶעס הָאט אַ פּוּנְקְטְלִיכֶער חֶשְׁבּוֹן, אַלֶעס וֶוערְט גֶעפִירְט מִיט אַ גֶעוַואלְדִיגֶע הַשְׁגָחָה פְּרָטִית, אוּן אִיךְ בִּין נָאר אַנְטְלָאפְן שְׁטֶענְדִיג צוּם אֵייבֶּערְשְׁטְן, אוּן נָאר דָאס הָאט מִיר גֶעהָאלְפְן אִיבֶּערְקוּמֶען מַיינֶע צָרוֹת אוּן יִסוּרִים, דֶערִיבֶּער זָאלְט אִיר אוֹיךְ טוּן דִי זֶעלְבֶּע, אִיר זָאלְט חַס וְשָׁלוֹם נִישְׁט הָאבְּן קַיין טַעֲנוֹת אוֹיפְן אֵייבֶּערְשְׁטְן, זִיךְ נִישְׁט אָפְּרֶעדְן אוֹיפְן אֵייבֶּערְשְׁטְן. גֶעדֶענְקְט וָואס דִי חֲזַ"ל זָאגְן (תַּנְחוּמָא תֵצֵא): "צָרִיךְ הָאָדָם לְהַחְזִיק טוֹבָה לְהַקָדוֹשׁ בָּרוּךְ הוּא בִּזְמַן שֶׁהַיְסוּרִין בָּאִין עָלָיו, לָמָה? שֶׁהַיְסוּרִין מוֹשְׁכִין אֶת הָאָדָם לְהַקָדוֹשׁ בָּרוּךְ הוּא" - אַ מֶענְטְשׁ דַארְף דַאנְקֶען דֶעם אֵייבֶּערְשְׁטְן וֶוען עֶר שִׁיקְט אִים יִסוּרִים. פַארְוָואס? וַוייל דִי יִסוּרִים שְׁלֶעפְּן דֶעם מֶענְטְשׁ צוּם אֵייבֶּערְשְׁטְן. נָאךְ זָאגְן דִי חֲזַ"ל (סִפְרִי וָאֶתְחַנַּן): "יְהֵא אָדָם שָׂמֵחַ בְּיִסּוּרִין יוֹתֵר מִן הַטוֹבָה, שֶׁאִילוּ הָאָדָם בְּטוֹבָה אֵין נִמְחָל לוֹ עָווֹן שֶׁבְּיָדוֹ, וּבִּיְסוּרִין נִמְחָל לוֹ" - אַ מֶענְטְשׁ דַארְף זִיךְ מֶער פְרֵייעֶן מִיט דִי יִסוּרִים וָואס עֶר בַּאקוּמְט וִוי מִיט דִי גוּטְס וָואס עֶר בַּאקוּמְט, וַוייל וֶוען אַ מֶענְטְשׁ הָאט נָאר גוּטְס וֶועט עֶר מִיט דֶעם נִישְׁט אָפְּקוּמֶען זַיינֶע עֲבֵירוֹת, אָבֶּער וֶוען עֶר הָאט יִסוּרִים וֶועט דָאס אָפְּמֶעקְן אַלֶע זַיינֶע עֲבֵירוֹת".

שטארק זיך מיט 'תודה והודאה', דאנק און לויב דעם אייבערשטן אויף די גוטע זאכן וואס ער טוט מיט דיר, און אויך אויף אלעס וואס איז אריבער ביז אהער אויף דיר; ווי מער מען לויבט דעם אייבערשטן - ווערט מען נענטער צו אים און מען באקומט גדלות המוחין.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך - יום ג' פרשת בהר בחקותי, י"ח אייר, ל"ג בעומר, שנת תשפ"ו לפרט קטן

... נרו יאיר

דיין בעל הבית האט מיר געזאגט אז דיין סמארטפאון האט גארנישט מיט אים, ער האט דאס אויך נישט ליב, ער האט מיר געזאגט אז איך זאל וויסן אז דו קענסט שיין מצליח זיין ביי אים אנעם טעלעפאן.

על כן בעט איך דיר, ווארף אוועק די סמארטפאון, צעברעך עס אויף פיץ פיצלעך, טו די הייליגע זאך אינעם הייליגן טאג "ל"ג בעומר". יעצט איז דאס טאקע א שווערע נסיון פאר דיר, אבער וויסן זאלסטו, עס וועט אריבערגיין צוויי דריי יאר און דיין לעבן וועט זיין אסאך שענער אן דעם, דיין שמחת החיים, דיין שלום בית, דיין יראת שמים; אלעס וועט זיין אסאך שענער און בעסער.

טייערער ... נרו יאיר, איך האב דא נישט קיין שלום אייגענע אינטערעס, נאר איין אינטערעס, נאר דו, דיין ווייב און דיינע דורות, דאס איז מיין אינטערעס. טו עס פאר דיר אליין, טו עס פארן אייבערשטן, צעברעך דיין טעלעפאן, אזוי וועסטו בלייבן א איד, און דיינע דורות וועלן זיין ערליכע אידן.

איך האב דיך ליב, איך מיין עס מיט מיין גאנצע הארץ.

בעזרת ה' יתברך - יום ג' פרשת בהר בחקותי, י"ח אייר, ל"ג בעומר, שנת תשפ"ו לפרט קטן

... תחי', תלמידה בית פיגא

איך האב ערהאלטן אייער בריוו.

איר זענט מיר זייער חשוב, אויך אייערע טייערע עלטערן זענען ביי מיר זייער באליבט און טייער, איך בעט פאר אייך איר זאלט זיין פרייליך, איר זאלט ליב האבן די וועג פון אייערע עלטערן.

נעמט די עצה פון הייליגן רבי'ן, די עצה פון התבודדות, בעטס א תפילה אויף אייער אייגענע שפראך, בעטס דעם אייבערשטן איר זאלט גיין אויף די גוטע וועג, איר זאלט ליב האבן דעם אייבערשטן, איר זאלט ליב האבן די וועג פון צדיקים, איר זאלט טרעפן א גוטע שידוך, אן ערליכע שידוך, איר זאלסט זוכה זיין אויפצושטעלן אן ערליכע שטוב מיט ערליכע דורות.

טייערע ... תחי', מאכט א נחת פאר אייער טאטע מאמע, מאכט זיי פרייליך; אז מען מאכט פרייליך א טאטע מאמע באצאלט דער אייבערשטער מיט זייער אסאך גוטס; בלייבט אין די ערליכע וועג פון אייערע עלטערן, וועט דער אייבערשטער געבן אסאך גוטס.

שרייבט מיר יעדע וואך א בריוו.

בעזרת ה' יתברך - יום ג' פרשת בהר בחקותי, י"ח אייר, ל"ג בעומר, שנת תשפ"ו לפרט קטן

... נרו יאיר וזוגתו תחי'

היינט אינדערפרי בין איך אויפגעשטאנען, איך בין געפארן קיין קרית יואל צום ציון פון הייליגן רבי'ן זכותו יגן עלינו מ'סאטמער, איך האב דארט זייער געוויינט, פאר ענק ספעציעל. סיי דו און סיי דיין ווייב האבן געלערנט ביי מיר, ענק זענען מיינע תלמידים, ענק זענען אזוי באליבט ווי אייגענע קינדער, איך האב געבעטן מיט הייסע טרערן ענק זאלן נישט פארפאלן גיין דורך די קליפה פונעם סמארטפאון. איך וויין צום אייבערשטן אז מיינע קינדער, מיינע תלמידים ותלמידות זאלן נישט אוועק פאלן פון יראת שמים, פון תמימות, דורכן סמארטפאון.

ווארף אוועק די סמארטפאון, צעברעך עס אויף פיץ פיצלעך, זיי מקריב א קרבן פארן אייבערשטן, טו עס פאר דיינע דורות; איך האב ענק חתונה געמאכט, איך האב ענק נאר געהאלפן, און וואס בעט איך שוין? וואס בעט איך דען? "מָה ה' אֱלֹקֶיךָ שֹׁאֵל מֵעִמָּךְ כִּי אִם לְיִרְאָה" (דברים י, יב), נאר דאס, האלטן די לעבן ריין און זויבער.

דער אייבערשטער זאל רחמנות האבן אויף ענק און אויף מיר, מיין הארץ איז מיר צעבראכן אויף שברי שברים...

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר

נאכן זיין איבער א וואך אין שטעטל, וויל איך דיר זאגן אז די מיטינג וואס מיר האבן געהאט פאריגע וואך ביז שפעט ביינאכט, ביז האלב דריי פארטאגס – איז מיר געווען די שענסטע זאך, ווייל אז עס קען זיין שלום צווישן אונז – איז די גרעסטע זאך, און אז מיר וועלן זיך ליב האבן, אפילו ווען מיר האבן אנדערע מיינונגען – איז דאס עולה על הכל.

וויסן זאלסטו, דער סמ"ך מ"ם האט איין וועג, און נאר איין וועג – ווי אזוי ער קען צעברעכן אונזער קהילה, נאר דורך מחלוקת, און אויב מיר וועלן זיך שטארקן, ווייטער בלייבן ביים רבי'ן, ווייטער אינאיינעם משמש זיין דעם רבי'ן, אפילו מען טוט אנדערש ווי מיר ווילן, און מען הערט נישט אויס וכו' וכו' – וועלן מיר זייער מצליח זיין.

פון היינט און ווייטער זאלסטו זאגן דיין מיינונג, יעדע מאל מען רופט דיך צו א מיטינג זאלסטו זאגן דיין מיינונג, און אז מען וועט נישט טון ווי אזוי דו זאגסט – זאלסטו בלייבן העלפן מיט די גאנצע הארץ, און אויך אז דו וועסט דארפן אויפווישן די מילך וואס זיי האבן אויסגעגאסן וכו' – זאלסטו דאס טון מיט די גאנצע הארץ, טראכט פון רבי'ן, טראכט: 'איך ארבעט נישט פאר קיינעם, איך זוך נישט 'ונעשה לנו שם', איך בין נישט פון די 'דור הפלגה' וואס האבן געזוכט די אייגענע כבוד'; איך האב געזען אזויפיל אין די יארן וואס איך בין דא, אזויפיל מענטש וואס האבן געארבעט, געמאכט און געטון, און ווען זיי האבן אויפגעהערט צו באקומען כבוד – האבן זיי אפגעלאזט; דעמאלט האט זיך אויסגעשטעלט למפרע אז זיי האבן געהאט א באהאלטענע נישט ריכטיגע כוונה, ווייל ווי אזוי קען זיך אויסלעשן די געפיל צום רבי'ן צוליב אזעלכע זאכן...?

איך האב דיך ליב, און יעצט נאכן זיך לאזן בייגן האב איך דיך נאך מער ליב, מיין נישט אז מיך פאלגט מען אלעס וואס איך זאג, דאך בלייב איך ווייטער משמש זיין דעם הייליגן רבי'ן.

שטארק זיך, בלייב העלפן די קהילה, אבער נאר אז דו וועסט אוועק לייגן אלע דיינע חשבונות און יעדן איינעם העלפן, יעדן איינעם געבן א שמייכל, חס ושלום האבן חשבונות מיט דעם און מיט יענעם.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

אברהם הערש נרו יאיר, גבאי קרית ברסלב

שטארק זיך מיטן משמש זיין דעם רבי'ן, דו טוסט אסאך שיינע זאכן פאר הפצה, די שיינע בלעטל וכו', אבער נאך מער איז די שיינע שטעטל, די הפצה וואס קומט ארויס פונעם שטעטל איז עולה על הכל, הונדערטער און טויזנטער מענטשן דרייען זיך אין שטעטל, און אלע זאגן פה אחד אז עס איז נישטא אזוינס ווי דעם רבינ'ס לייט, די איידלקייט און מידות ויראת שמים זעט מען נישט אין ערגעץ; בעט איך דיר זייער, שטארק זיך און זיי ממשיך, לאז נישט נאך פון די הייליגע ארבעט.

איך בעט דיר זייער, זע אז אין שול זאל נישט זיין קיין משונה קרן, מוהרא"ש זאגט "משונה קרן חצי נזק" (בבא קמא יד.); זע אז אלע זאלן קומען אין שול מיט דרך ארץ, מען זאל נישט שמועסן אין שול, עס איז א חוצפה אז מען רעדט אין שול ביים דאווענען; מען קען שמועסן אין פאליש, אויך זאלן אלע קומען אנגעטון מיט הוט און רעקל, נישט ווי מען גייט טשילן.

איך וויל דו זאלסט מאכן אן אסיפה מיט די גבאים פון בית המדרש ..., וואס מען זאל טון זומער מיט די שול אויב אלע מתפללים קומען צום גרויסן שול, אויב מען זאל דאס פארשפארן, ווייל עס קומען דארט שכנים וואס מאכן פארטיס; נישט פאר דעם האב איך געעפנט די שטעטל.

אויך זאלסטו זיצן מיט די גבאים פון בית המדרש ..., איך הער זאגן אז די תפילות בימי החול, מנחה מעריב – איז ווי א גן ילדים, זאלסט זען אויב עס איז וואר; אדער טוישט מען די וועג אדער שפאר אפ, איך דארף נישט אין שטעטל אזא זאך...

והעיקר זאלסטו נאר רעדן צו מענטשן נאכן זיך מתבודד זיין, למשל דו זעסט איינער קומט אין שול מיט זיין טעבלעט און שטייט ביים בימה וכו', זאלסטו זיך מתבודד זיין אז דו זאלסט אים קענען מעורר זיין מיט די ריכטיגע דבורים, ער זאל זיך נישט באליידיגן, און אויב עם כל זה וועט זיך יענער באליידיגן – וואס זאלן מיר טון? מען קען נישט לאזן א שול, א שטעטל, א חדר – בהפקירות.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר

דער הייליגער רבי זאגט (שיחות הר"ן, סימן לב), דער וואס האט א שטארקע אמונה האט שטארקע כוחות פארן לעבן, און אפילו חס ושלום אויב מען האט יסורים קען מען זיך מנחם זיין און זיך מחי' זיין אז דער אייבערשטער וועט רחמנות האבן און עס וועט ביים סוף זיין גוט, און מען קומט אפ אלעס, און אויף יענע וועלט וועט מען האבן עולם הבא. אבער אויב מען האט נישט אמונה, ווען עס קומט א צרה, א פראבלעם – האט מען נישט מיט וואס זיך צו טרייסטן, נישטא צו וועם זיך צו ווענדן, "וְהַכְּלָל, שֶׁעִקָּר הוּא הָאֱמוּנָה", דער עיקר איז אמונה, גלייבן אינעם אייבערשטן אז אלעס איז מיט א חשבון און אלעס איז לטובה, און אלעס איז אים, דעמאלט איז די לעבן א שטארקע לעבן, א גוטע לעבן, א זיסע לעבן.

ווי אזוי איז מען זוכה צו א שטארקע אמונה, א קלארע לויטערע אמונה? דורך התקרבות לצדיקים, דורך לערנען דעם הייליגן רבינ'ס ספרים; דער רבי ברענגט אין אונז א קלארע לויטערע אמונה, מען איז זוכה צו קומען צו אזא שטארקע אמונה, ביז מען איז זוכה צו שפירן אזוי שטארק דעם אייבערשטן, אזוי ווי מען זעט עס פאר די אויגן.

אשרינו שזכינו...

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר

איך וועל זיך זייער פרייען אז דו וועסט אננעמען די פאסטן וואס דער מנהל מרדכי נרו יאיר האט דיר פארגעשלאגן, צו קומען זיין א מלמד ביי אונז אין שטעטל פאר קומענדיגע יאר שנת תשפ"ז פאר די עלצטע כתה, "כתה ט'"; דער אייבערשטער זאל דיר געבן הצלחה, חן און סייעתא דשמיא מיט די תלמידים.

די סוד פון חינוך איז דאס איבערזאגן און איבערזאגן אן א שיעור מאל מיט סבלנות, דער הייליגער רבי זאגט (חיי מוהר"ן, סימן שצא), אפילו מען זעט ווי אלע דרשות און אלעס וואס מען טוט מיטן קינד גייט לאיבוד – דאך וועט אריינגיין איין טראפ פון די חיזוק און פון די ווערטער וואס מען רעדט און מען חזר'ט, און פון דעם וועט ווערן שיינע זאכן; דאס איז די יסוד פון א מחנך, זיין גרייט צו איבערזאגן און איבערזאגן מיט סבלנות און מיט ליבשאפט; דאס וואס דער רבי טוט מיט אונז, וויפיל סממנים גיסט ער אויף אונז און אלעס גייט לאיבוד, דאך גייט אריין א טראפ דא, א טראפ דארט; אזוי דארפן מיר טון מיט די קינדער.

שכוח, זאלסט מצליח זיין.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר

שטארק זיך אין דיין הייליגע ארבעט פון זיין א מלמד פאר תינוקות של בית רבן, די יסוד פון זיין א גוטער מלמד איז 'שמחה', דער מלמד זאל זיין פרייליך, 'בגדלות המוחין'; אויב חס ושלום דער מלמד איז אין עצבות ומרה שחורה, בקטנות המוחין – קען זיין סכנת נפשות, מען קען צעקלאפן די קינדער און זיי מאכן פאר בעלי מומין השם ישמרינו.

מוהרא"ש זאגט, דערפאר ליינט מען פרשת במדבר א וואך פאר יום טוב שבועות, מען ליינט ווי די תורה ציילט די אידן, זאגט רש"י (במדבר א, א): "מתוך חבתן לפניו מונה אותם כל שעה", פון גרויס ליבשאפט וואס דער אייבערשטער האט ליב אונז אידישע קינדער ציילט ער אונז שטענדיג; ווייל מתן תורה און קבלת התורה קען נאר זיין פון גרויס ליבשאפט, נאר אזוי קענען די תלמידים מקבל זיין.

על כן זאלסטו זיך שטארקן מיט אלע כוחות צו זיין פרייליך, לאז זיך נישט פארנארן פון די פרומע קליפות, פון די פרומע שטן, וואס מאכט דיך 'זייער ערנסט', און מאכט דיך זען נאר חסרונות, ניץ דעם רבינ'ס עצות פון זוכן נאר דאס גוטס ביי דיר, ביי די קינדער; בוי זיי אויף.

איך האב נאך אסאך צו זאגן, אבער כל זמן דו ביסט בקטנות המוחין, דו ביסט נישט גרייט צו הערן – וועל איך זיך צוריק האלטן...

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר, קרית יואל

מזל טוב! מזל טוב! דער אייבערשטער זאל העלפן דו אינאיינעם מיט דיין ווייב זאלן זוכה זיין צו מגדל זיין דעם נייעם געבוירענע מיידל לתורה ולחופה ולמעשים טובים, און זען אסאך אידיש ערליכע נחת ביי אלע קינדער אינאיינעם.

דאנקט און לויבט דעם אייבערשטן, הערט נישט אויף צו זאגן: "שכוח אייבערשטער", דאנקט אים פאר אלע חסדים, און נאכן דאנקען זאלן ענק ווייטער דאנקען; דער הייליגער רבי זאגט (לקוטי מוהר"ן חלק ב, סימן ב), דאס דאנקען און לויבן דעם אייבערשטן ברענגט דעם מענטש זייער נאנט צום אייבערשטן, מען איז זוכה שוין דא בזה העולם צו שפירן די טעם פון גן עדן, פון שעשוע עולם הבא.

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

... נרו יאיר

אונז – די סקול בית פיגא – זאגן נישט פאר א מיידל: "רעד נישט מיט א געוויסע מיידל"; מיר טארן דאס נישט טון, מכמה טעמים, אבער ענק עלטערן וואס ענק שפירן אז די חבר'טע איז נישט גוט פאר ענקער טאכטער, זענען ענק מחויב צו טון וואס ענק קענען אפצוהאקן די שייכות צווישן זיי; עלטערן דארפן האלטן אן אפענעם אויג אויף די קינדער און זען אויב זיי האבן א גוטע חברותא.

על כן זייט געווארנט און געבט דאס מערסטע ליבשאפט און געפיל פאר די קינדער, און אין די זעלבע צייט זייער אכטונג געבן אז די קינדער זאלן האבן חברים און חבר'טעס וואס האבן תמימות און אמונת חכמים צו גיין אין די וועג פון הייליגן רבי'ן, ווי מיר האבן מקבל געווען פון מוהרא"ש זכותו יגן עלינו.

זיי מער אין שטוב, קום אהיים פארברענגען מיט די קינדער, ביינאכט ווען די קליינע קינדער שלאפן זאלסטו פארברענגען מיט די עלטערע, שפיל א געים מיט זיי, עס מיט זיי אייסעס, אייזקרים, פאפקארן... זע עס זאל זיין געשמאק אין שטוב.

ועל כולם, תפילה; בעט דעם אייבערשטן יעדן טאג פאר אלע קינדער, בעט פאר אלע באזונדער, נישט בנשימה אחת; עשרת בני המן זאגט מען בנשימה אחת, מען דארף פאר יעדן קינד בעטן באזונדער זיי זאלן האבן גוטע חברים מיט תמימות, מיט אמונת חכמים...

בעזרת ה' יתברך - יום א' פרשת במדבר, כ"ג אייר, שנת תשפ"ו לפרט קטן

אייזיק ראטה נרו יאיר, קרית ברסלב

איך בין היינט געזיצן מיט די חברי הנהלה א מיטינג פון צוועלף ביז זעקס אזייגער, מיר זענען אריבער אויף זייער אסאך זאך, אלעס לטובת די קהילה, דאס גוטס פון אלע אנשי שלומינו.

איך וויל דיר בעטן דו זאלסט מיר העלפן; מיטן העלפן די הנהלה מיט וואס זיי בעטן דיר, ובפרט מיטן העלפן רעגיסטרירן אלע איינוואוינער אין שטעטל צו קענען גיין וועלן ווען עס פעלט אויס; דאס וואס די הייליגע חכמים זאגן: "עשיו שונא ליעקב", איז במלוא מובן המלה, און דורך גיין שטימען וכו' – לאזן זיי אטעמען וכו'.

אויך זאלסטו וויסן אז עס איז אנגעשריבן פאר יעדן איינעם כך וכך זיך מוטשען פארן יאר, דאס הייסט, יעדע יאר שרייבט מען אפ די עמל ויגיעה פארן יאר, 'זכה' – גייט עס פאר גוטע זאכן, עס בויט זיך א שטעטל, א חדר, א בית פיגא, א כולל, א מקוה טהרה, שול, קעמפ, 'לא זכה' – גייט די עמל ויגיעה לריק, צום רוח; וואויל איז דעם וואס זיין פלאג און מי גייט פארן כלל און פאר יפוצו מעיינותיך חוצה.