בריוון פונעם ראש ישיבה שליט"א

בעזרת ה' יתברך

יום א' פרשת עקב, ט"ז מנחם-אב, שנת תשפ"א לפרט קטן

מרת ... תחי'

איך האב ערהאלטן אייער בריוו.

שטארקט זיך און שטארקט די מיידלעך; לייגט אריין אין זיי א ליבשאפט צו אידישקייט. דאס איז די וויכטיגסטע זאך אין אונזער דור, צו ווייזן פאר די יוגענט דאס שיינקייט און געשמאק פון זיין א איד; מען זאל קוקן אויף די שיינקייט פון צניעות.

 איך האב אסאך געבעטן דעם אייבערשטן מיר זאלן האבן גוטע טיטשערס, איידעלע טיטשערס, קלוגע טיטשערס, טיטשערס וואס וועלן רעדן מיט שכל, וויסן וואס צו רעדן, ווי אזוי צו רעדן וכו'.

א גרויסן יישר כח פאר'ן צוריק קומען נאך א יאר טיטשן.

בעזרת ה' יתברך

יום א' פרשת עקב, ט"ז מנחם-אב, שנת תשפ"א לפרט קטן

מרת ... תחי'

יישר כח פאר'ן העלפן די סקול אזוי געטריי.

איך בין אייך זייער דאנקבאר פאר אלעס וואס איר טוט פאר אונזערע קינדער, איך האף איר וועט בלייבן ארבעטן קומענדיגע יאר ביי אונז אין בית פיגא.

אייער צניעות איז א ביישפיל פאר די תלמידות, די קינדער שמועסן צווישן זיך אז זיי ווילן גיין אנגעטון אזוי שיין צניעות'דיג ווי אייך נאך די חתונה.

בעזרת ה' יתברך

יום א' פרשת עקב, ט"ז מנחם-אב, שנת תשפ"א לפרט קטן

מרת ... תחי'

א גרויסן יישר כח פאר'ן העלפן אזוי געטריי די סקול בית פיגא, די עלטערן זענען זייער צופרידן פון אייער ארבעט.

נעכטן האבן מיר געהאט א מיטינג וועגן די קומענדיגע יאר, איך פריי זיך זייער אז איר גייט זיין טיטשער אין בית פיגא ליבערטי; דער אייבערשטער זאל העלפן עס זאל זיין מיט גרויס הצלחה.

בעזרת ה' יתברך

יום א' פרשת עקב, ט"ז מנחם-אב, שנת תשפ"א לפרט קטן

לכבוד אונזער מנהלת מרת ... תחי', קרית ברסלב

יעצט ענדיגן מיר די צענטע יאר פון אונזער סקול בית פיגא; די צען יאר וועט קיינמאל נישט אוועקגיין, דאס בלייבט א זכות פאר אייך אויף אייביג. די שווערע ארבעט פון די אלע יארן דאס האט אויפגעשטעלט צענדליגער שטיבער וואס פירן זיך אויף די וועג פון די תורה.

יעצט ווען מיר גייען אריין אינעם עלעפטן יאר עפענען מיר אויף א דריטע בית פיגא אין קרית יואל, ת'פתח ש'ערי ב'ית פ'יגא. איך וויל אייך בעטן איר זאלט מיר העלפן מסדר זיין די לימודים מיט די לערערינס ביי אלע דריי שולעס, סיי אין שטעטל, סיי אין וויליאמסבורג און סיי אין מאנרא; עס איז נישט קיין גרינגע ארבעט, אבער דאך בעט איך אייך איר זאלט מיר העלפן מיט אלע בית פיגא סקולס, איר האט דאך סייעתא דשמיא.

איך וויל איר זאלט צאמנעמען אלע לערערינס און מנהלת'ן אויף אן אסיפה, איך וויל רעדן צו זיי אלע, אוועקשטעלן די יסודות פון "בית פיגא", איבערגעבן וואס מוהרא"ש האט מיר געלערנט, ווי אזוי צו לערנען מיט די קינדער.

דער אייבערשטער זאל העלפן מיר זאלן מצליח זיין מיט די קינדער, מיר זאלן קענען אנטקעגן גיין משיח צדקנו במהרה בימינו, אמן.

בעזרת ה' יתברך

יום א' פרשת עקב, ט"ז מנחם-אב, שנת תשפ"א לפרט קטן

מרת ... תחי'

וואויל איז אייך אז איר העלפט אזוי געטריי די סקול, איר זענט געבליבן אין שטאט פאר'ן זומער צו לערנען מיט די מיידלעך; די עלטערן זענען זייער צופרידן, אויך די קינדער זענען זייער צופרידן.

איך ווייס אז איר ארבעט שווער, איר דארפט אבער וויסן אז יעדער בזה העולם מוטשעט זיך, יעדער ארבעט שווער; וואויל איז דעם וואס ארבעט שווער מיט הייליגע זאכן, אז מען לערנט מיט קינדער – דאס איז פון די הייליגסטע זאכן אין די וועלט.

נאכאמאל, א גרויסן יישר כח.

בעזרת ה' יתברך

יום א' פרשת עקב, ט"ז מנחם-אב, שנת תשפ"א לפרט קטן

מרת ... תחי'

א גרויסן יישר כח פאר'ן העלפן די סקול, די מנהלת מרת ... תחי' זאגט אז איר גייט נאכאמאל צוריק קומען קומענדיגע יאר טיטשן; מיר פרייען זיך זייער.

א גרוס פון אייער מאן ... נרו יאיר, ער לערנט זייער פלייסיג; ער איז אן ערליכער, א פארשטענדליכער; אלע מעלות.

בעזרת ה' יתברך

יום ב' פרשת עקב, י"ז מנחם-אב, שנת תשפ"א לפרט קטן

לכבוד ... נרו יאיר, קרית ברסלב

געב אכטונג וועם דו נעמסט אריין אין שטוב, איך וויל נישט די שטעטל זאל זיין א פלאץ וואו אינגעלייט וואס צעטיילן זיך. אנטלויפן פון שטוב – קומען דא.

דא איז נישט קיין פלאץ פארדעם, נאכדעם וועל איך נאך זיין שולדיג; מען רעדט שוין גענוג אויף אונז, מען רעדט אויף ברסלב אז מיר האבן נישט קיין שלום בית, איך דארף נישט די זאכן.

פון איין זייט איז הכנסת אורחים א גרויסע מצוה, אבער פון די אנדערע זייט איז דאס א גרויסע סכנה און א גרויסע אחריות.

דערפאר בעט איך דיר, געב אכטונג וועם דו נעמסט אריין ביי דיר אין שטוב; דער אינגערמאן איז אנטלאפן, זיין ווייב רופט אים צו דין תורה, באלד קומט ארויס א סירוב אויף אים און אלעס וועט גיין אויף אונזער נאמען.

בעזרת ה' יתברך

ערב שבת קודש פרשת ואתחנן-נחמו, י"ד מנחם-אב, שנת תשפ"א לפרט קטן

מרת ... תחי'

א גרויסן יישר כח פאר'ן העלפן די סקול בית פיגא אזוי געטריי, אין דעם זכות זאלט איר זוכה זיין צו קינדער און צו זען נחת פון זיי.

איך האף איר וועט צוריק קומען קומענדיגע יאר זיין סעקרעטערי פאר די סקול אין וויליאמסבורג.

בעזרת ה' יתברך

ערב שבת קודש פרשת ואתחנן-נחמו, י"ד מנחם-אב, שנת תשפ"א לפרט קטן

מרת ... תחי'

נעכטן זאגט מיר די מנהלת מרת ... תחי' אז זי האפט איר וועט בלייבן טיטשער פאר די קליינע קינדער, ווייל איר זענט זייער א גוטע טיטשער, איר לייגט אריין אין די קינדער יראת שמים, א ליבשאפט צו צניעות, א ליבשאפט צו זיין א איד.

איך דארף אזעלכע טיטשערס וואס האבן ליב אידישקייט, איך דארף טיטשערס אין סקול וואס וועלן איבערגעבן פאר די קינדער א ליבשאפט צו צניעות; די עלטערן זאגן מיר אז זיי וואלטן נישט אזוי מקפיד געווען אויף צניעות ביי די קליינע קינדער, אבער די קינדער ווילן צניעות, די קינדער וויינען און זאגן: "מאמי, די קלייד איז נישט צניעות'דיג".

יישר כח פאר אייער איבערגעגעבענע ארבעט.

בעזרת ה' יתברך

ערב שבת קודש פרשת ואתחנן-נחמו, י"ד מנחם-אב, שנת תשפ"א לפרט קטן

מרת ... תחי'

נעכטן זענען מיר געזיצן אויסצופלאנירן די סקול פאר קומענדיגע יאר תשפ"ב, איך האב געזען אייער נאמען, אז איר גייט זיין לערערין קומענדיגע יאר אין בית פיגא ליבערטי.

איך פריי זיך צו האבן טיטשערס ווי אייך, וואס זענען צניעות'דיג און האבן א געפיל אין צניעות, אזוי וועט דאס איבערגיין צו די תלמידות.

תשפ"ב איז ראשי תיבות ת'פתח ש'ערי ב'ית פ'יגא; מיר עפענען די יאר נאך א סקול אין קרית יואל נאכן האבן הצלחה מיט די חדר.

מיר פירן די סקול לויט די אנווייזונגען פון הייליגן סאטמאר רבי זכותו יגן עלינו. איידער מוהרא"ש זכותו יגן עלינו האט געעפנט די סקול אין יבנאל איז ער געזעצן מיט ר' בנימין הערש בערקאוויטש עליו השלום, מנהל פון בית רחל, הערן פון אים ווי אזוי דער סאטמאר רבי האט אים געלערנט פירן א סקול.

בעזרת ה' יתברך

יום ג' פרשת ואתחנן, י"א מנחם-אב, שנת תשפ"א לפרט קטן

מרת ... תחי'

איך בעט אייך זייער, זייט פרייליך; לאזט אייך נישט פונעם יצר הרע וואס וויל אייך צעברעכן, הערט נישט צו וואס ער זאגט אייך. ווען עס קומען אריין עקלדיגע מחשבות וואס ווילן אייך אראפווארפן, די מחשבות זאגן אייך 'דו ביסט גארנישט ווערד' – זאלט איר זיי נישט צוהערן.

הערט דעם קול פון רבי'ן וואס זאגט אז איר זענט יא ווערד, דער רבי האט געשריגן מיט א הויך קול (לקוטי מוהר"ן חלק ב', סימן עח): "גיוואלד! קיין יאוש איז גארנישט פארהאן!"

א גרוס פון אייער טייערער מאן, איך זאג אים יעדן טאג ווי גליקליך ער איז אז ער האט אייך פאר א ווייב. איר זענט זייער וואויל און זייער טייער, דער יצר הרע קען נישט אויסהאלטן ווי שיין איר האט חתונה געהאט, ער וויל אייך צעברעכן, חס ושלום; עס וועט אים סיי ווי נישט גיין, דער רבי איז שטערקער פון זיי.

בעזרת ה' יתברך

יום ד' פרשת ואתחנן, י"ב מנחם-אב, שנת תשפ"א לפרט קטן

מרת ... תחי'

איך האב ערהאלטן אייער בריוו.

די אלע וואס סטראשען אז מען קען נישט טרעפן קיין שידוך אויב מען איז מקושר צום רבי'ן – דאס איז א גרויסער דמיון, מען פארלירט נישט קיין שידוך אז מען איז ערליך, מען פארלירט נישט קיין שידוך דורך עבודות השם; עס איז א נסיון וואס פרישע מקורבים גייען אריבער.

די שאלה איז, פארוואס דארף מען זאגן פאר'ן שדכן אז מען איז מקושר צום רבי'ן? ווער דארף וויסן אז מען הערט שיעורים? בפרט פרויען און מיידלעך, ביי זיי איז דאך בכלל נישט שייך מען זאל וויסן אז זיי האבן חיות פון רבי'ן, עס איז א זאך וואס דארף קיינעם נישט שטערן.

ביי בחורים און אינגעלייט איז דא אומאן, איינמאל א יאר דארף מען פארן קיין אומאן; דער רבי האט אונז געהייסן מיר זאלן קומען צו אומאן אויף ראש השנה, דאס קען מען נישט אויסלאזן, דעמאלט קען ארויסקומען די באהאלטענע סוד אז מען איז ברסלב (מען קען דאס אויך באהאלטן מיט שכל), אבער ביי פרויען און מיידלעך איז נישטא קיין אומאן.

די שאלה האב איך צו אלע פרישע מקורבים וואס וויינען אז מען רודפ'ט זיי; ווער הייסט אייך זאגן איר זענט ברסלב? ווער הייסט אייך מאכן מחלוקות? די פרישע מקורבים זענען געווענליך זייער צוהיצט, זיי ווילן נישט ארבעטן מיט שכל און חכמה, זיי אליינס מאכן זיך די מחלוקות.

יעצט זענען געקומען צו אונז א משפחה און אריינגעלייגט די קינדער אין קעמפ, די אינגלעך מיט די מיידלעך, און די עלטערן זענען געקומען צו מיר וויינען אז די מוסד וואו זיי שיקן די קינדער א גאנץ יאר האט זיי איינגעמאלדן אז מען נעמט נישט צוריק זייערע קינדער, ווייל זיי זענען זומער אין ברסלב. מיר האט דאס זייער וויי געטון, פארוואס זאל מען ארויסווארפן קינדער פון מוסדות אויב זיי קומען זומער אין ברסלב'ער קעמפ?! איך האב אונטערגעשיקט איינעם, א משפחה פונעם מנהל דארט, פרעגן פארוואס טוט מען דאס צו ברסלב, ביז עס האט זיך ארויסגעשטעלט אז איך בין גערעכט, עס האט גארנישט מיט ברסלב, עס זענען די פרישע מקורבים וואס האבן נישט קיין שכל, זיי רייצן זיך. דער מנהל זאגט, פאריאר זענען די קינדער געווען אין ברסלב'ער קעמפ, נאכן זומער ווען זיי זענען צוריק געקומען האבן זיי חוזק געמאכט פון די מוסד וואו זיי לערנען, זיי האבן געזאגט: "ברסלב איז די אמת", "נאר ברסלב", "אלעס חוץ ברסלב איז שקר"; עס איז געווארן א מהפכה אינעם מוסד, האט די הנהלה באשלאסן אז אויב די קינדער גייען נאכאמאל צו ברסלב, זאלן זיי בלייבן ביים אמת, זיי זוכן נישט קינדער וואס וועלן איבערדרייען זייער מוסד.

דאס איז אויך די סיבה פארוואס ישיבות ווארפן ארויס בחורים וואס פארן קיין אומאן; ווייל די בחורים, די פרישע מקורבים - זענען צוהיצט, זיי שטורעמען זייער ישיבה מיט ברסלב, ביז מען ווארפט זיי ארויס; וואלטן זיי געהאט שכל זיך נישט צו רייצן מיט קיינעם - וואלטן זיי געקענט זיין אין ישיבה אן דעם וואס מען זאל זיי רודפ'ן, זיי וואלט געקענט דינען דעם אייבערשטן, זיך מחי' זיין מיט די עצות פון הייליגן רבי'ן.

אזוי איז אויך מיט הערן די שיעורים אויפ'ן טעלעפאן; פארוואס אין דער וועלט דארף מען זיך רייצן מיט אנדערע? דערפאר פארשטיי איך נישט פארוואס דער שדכן דארף וויסן אז מען שעפט חיות פון רבי'ן.

דער אייבערשטער זאל העלפן איר זאלט האבן הצלחה אין אלע ענינים.

בעזרת ה' יתברך

יום ג' פרשת ואתחנן, י"א מנחם-אב, שנת תשפ"א לפרט קטן

לכבוד מיין טייערער ... נרו יאיר

איך בעט דיר זייער, שטארק זיך מיט דיין הייליגע ארבעט; דו האסט נישט קיין אנונג וויפיל הונדערטער און טויזנטער מענטשן זענען זיך מחי' וועכנטליך. איך באקום בריוו פון אזויפיל משפחות וואס זיי זאגן אז די עצתו אמונה קונטרסים וואס ערשיינט וועכנטליך - דאס איז זייער וועג ווייזער אין לעבן; זייט זיי האבן אנגעהויבן באקומען די וועכנטליכע קונטרסים נעמען זיי נישט אריין אין שטוב קיין שום פרעמדע ליין מאטריאל, זיי נעמען זייער הדרכה ווי אזוי צו פירן די שטוב - פון די קונטרסים.

איך שרייב דיר דאס כדי דו זאלסט וויסן וואס דו טוסט; זאלסט נישט טראכטן קיין איין רגע אפצולאזן די הייליגע ארבעט פון מגיה זיין און אויסשטעלן די קונטרסים עס זאל זיין גרייט אין צייט יעדע וואך.

איך האף אז דו וועסט בקרוב ענדיגן די ספרים איש אמונות פון שנת תש"פ, דאס וועט מחזק זיין אזויפיל משפחות; עס איז דא דארט חיזוק פאר אלע נסיונות, פאר אלע איבערגייאכטס.

איך שיק דיר א מעשה פאר די 'קינדער עצתו אמונה', די מעשה פון רבי'ן ווי דער רבי האט געזאגט פאר'ן בעל עגלה: "איך גיי אויף א נייעם וועג, וואס די נייע וועג פירט צום אלטן וועג".

די נייע וועג פירט צוריק צום אלטן וועג

טייערע קינדער, מיר דארפן זיך זייער פרייען אז מיר ווייסן פון הייליגן רבי'ן; דער רבי ברענגט אונז נאנט צום אייבערשטן, דער רבי האט אזעלכע גוטע וועגן ווי אזוי מיר קענען ווערן גרויסע צדיקים; ווער וויל הערן די וועג פון רבי'ן ווי אזוי צו ווערן א צדיק?

דער הייליגער רבי איז אמאל געפארן אין וועג און אינמיטן האט מען נישט געקענט ווייטער פארן, די וועג איז געווארן אנגעלייגט מיט וועגענער, דער בעל הגעלה האט זיך גוט אויסגעקענט מיט זייטיגע וועגן, ער האט אוועקגעדרייט די פערד זאלן אריין פארן אין וואלד און ער זאגט פאר'ן רבי'ן: "איך נעם א נייעם וועג, אבער באלד וועט איר זען ווי די נייע וועג פירט צוריק צום אלטן וועג".

דער הייליגער רבי איז זייער צופייערט געווארן, דער רבי רופט זיך אן: "דאס טו איך, איך בין אראפ פון וועג, איך האב גענומען א נייעם וועג, אבער די נייע וועג פירט צו די גאר אלטע וועג, די וועג וואס אונזערע עלטערן אברהם אבינו, יצחק אבינו און יעקב אבינו זענען געגאנגען; ביז יעצט איז געווען א וועג פון תעניתים און סיגופים, ווער עס האט געוואלט זיין א צדיק האט גענומען די וועג פון טון שווערע עבודות, פאסטן און זיך פייניגן, אבער יעצט, זאגט דער רבי, האב איך א נייעם וועג, א וועג פון התבודדות און תפילה; ווער עס וויל זיין א צדיק דארף שוין נישט פאסטן, דורך התבודדות און תפילה קען מען ווערן א גרויסער צדיק".

אלע קינדער ווייסן שוין יעצט ווי אזוי מען ווערט א צדיק; אז מען רעדט אסאך צום אייבערשטן, מען גייט התבודדות, מען גייט אין א פלאץ וואו קיינער איז נישט דארט, מען רעדט צום אייבערשטן אין די שפראך וואס מען איז געוואוינט צו רעדן, מען בעט אים: "הייליגער באשעפער, איך וויל זיין אן ערליכער איד, הייליגער באשעפער, איך וויל זיין א צדיק", אזוי איז מען זוכה צו ווערן א צדיק.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ב' פרשת ואתחנן, י' מנחם-אב, שנת תשפ"א לפרט קטן

לכבוד מיין טייערער ... נרו יאיר, קרית ברסלב

וויסן זאלסטו אז דו טראגסט אן אחריות; וואס דו טוסט, דיין אויפפירונג, דיינע דיבורים – אלעס גייט אויף מיר.

דו העלפסט מיר זייער בויען דעם שטעטל, טאקע דערפאר דארפסטו מער אכטונג געבן ווי אזוי דו רעדסט מיט מענטשן, ווי אזוי דו באנעמסט זיך מיט יעדן איינעם.

דער הייליגער רבי זאגט (ספר המדות, אות צדיק, סימן סט): "מִי שֶׁאוֹהֵב אֶת הַצַּדִּיק", דער וואס האט ליב דעם צדיק, "צָרִיךְ לִשְׁמֹר אֶת הַצַּדִּיק", דארף אכטונג געבן אויפ'ן צדיק, "שֶׁלֹּא יֵצֵא עָלָיו שֵׁם רָע", אז עס זאל נישט ארויסגיין א שלעכטע נאמען אויף אים; עס איז א גרויסע זאך צו העלפן בויען די מוסדות, די שטעטל, די הדפסה וכו' וכו', אבער אין די זעלבע צייט איז דאס א גרויסע אחריות.

דערפאר בעט איך דיר זייער, שטארק זיך אויף די נקודה 'רעדן שיין צו אנדערע, רחמנות האבן אויף אנדערע'; אז מען פירט א קהלה דארף מען זיך רעכענען מיט יעדן איינעמס געפילן, נישט מזלזל זיין אין קיינעם.

זאג אלע דיינע ארבעטערס זיי זאלן זייער אכטונג געבן אויף דעם פרט, רעדן שיין צו אלעמען; נאר אזוי וועסטו האבן הצלחה, נאר אז מען געבט אכטונג אויף אנדערע – איז מען מצליח.

עס איז אזוי קלאר די ניסים וואס דער אייבערשטער טוט מיט אונז, מען דארף זיין בלינד נישט צו זען וואס דא טוט זיך. יעצט איז געווארן צוויי יאר פון ווען מיר האבן מייסד געווען דעם שטעטל און עס זעט שוין באלד אויס ווי א שטאט; עס קומען נאך און נאך משפחות וואוינען דא אין שטעטל, וויפיל הייזער עס וועט זיין – וועט נישט זיין גענוג פאר די אלע משפחות וואס ווילן זיין א חלק אין אונזער קהלה.

יישר כח פאר אלעס וואס דו העלפסט מיר.

בעזרת ה' יתברך

יום ב' פרשת ואתחנן, י' מנחם-אב, שנת תשפ"א לפרט קטן

לכבוד מיין טייערער ... נרו יאיר

בשם כל הקהל הקודש הזה דרוקן מיר אויס אונזער הכרת הטוב פאר'ן צושטעלן אזא שפע פון עסן; דו וואלסט געדארפט דא זיין און זען ווי צענדליגער משפחות קומען נעמען פון די גוטע עסן, אלע האבן זיך אזוי מחי' געווען, וגם אני בתוכם.

דער אייבערשטער זאל דיר באצאלן פאר די גוטע מעשים וואס דו טוסט כסדר מיט'ן העלפן אידישע הונגעריגע נפשות, ובזכות דיינע אנדערע גוטע מעשים – זאלסטו זען נחת ביי דיינע קינדערלעך און קינד'ס קינדער.

אז איך שרייב דיר שוין וויל איך דיר דערמאנען זאלסט זיך שטארקן מיט לערנען תורה יעדן טאג. חכמינו זכרונם לברכה זאגן (שמות רבה נג, ב) אויפ'ן פסוק (משלי לא, כה): "עֹז וְהָדָר לְבוּשָׁהּ, וַתִּשְׂחַק לְיוֹם אַחֲרוֹן" - אֵימָתָי הַתּוֹרָה מְשַׂחֶקֶת לָאָדָם, ווען זעט מען די שמייכל פון די תורה? "הֱוֵי לְיוֹם אַחֲרוֹן", דעם לעצטן טאג, ווען מען וועט אונז אויסטון די קליידער און אריינלייגן אין קבר, מען וועט צודעקן דעם קבר מיט ערד, דעמאלט וועט אפיר קומען די פרקים משניות, די בלעטער גמרא, די קאפיטלעך תהלים וכו' וכו', דעמאלט וועט זיין "וַתִּשְׂחַק לְיוֹם אַחֲרוֹן", דעמאלט וועט מען זען דאס גרויסקייט פון אריינכאפן יעדן טאג אביסל תורה ותפלה.

איך האף דו קומסט צום רבי'ן אויף ראש השנה. געלויבט דעם אייבערשטן איך האב שוין טיקעטס פאר מיר מיט מיינע קינדער, די פאספארטן זענען גרייט, מיר ווארטן שוין צו פארן.

בעזרת ה' יתברך

יום ב' פרשת ואתחנן, י' מנחם-אב, שנת תשפ"א לפרט קטן

לכבוד מיין טייערער ליבער ... נרו יאיר, קרית ברסלב

איך זע דו האסט חלישות הדעת, דו האסט געבארגט א טעלעפאן פון איינעם און געזען ווי יענער שרייבט זיך מיט א גרופ פון עבירות, מען שמועסט זיך אפ רחמנא לצלן, רחמנא לצלן; דו ביסט אזוי צעטומלט 'וואס גייט דא פאר? וואו בין איך אויף דער וועלט?'

וויסן זאלסטו אז מיר גייען אריבער אין די היינטיגע דור זייער גרויסע נסיונות, מען פרובירט אונז אויס מיט שווערע ביטערע עבירות, בפרט בחורים, אויף זיי איז א גרויסע רחמנות. קיינער ווייסט נישט וואס גייט אריבער אויף זיי, זיי ווילן זיין ערליך, זיי ווילן זיין אפגעהיטן, אבער זיי קענען נישט. זיי האלטן און איין פאלן אין שווערע ביטערע זינד, פגם הברית רחמנא לצלן; עס זענען דא וואס פאלן נעבעך אין נשג"ז רחמנא לצלן, רחמנא לשיזבן; נישט אז זיי ווילן דאס, זיי פאלן אין דעם באונס, זיי קענען זיך נישט קריגן מיט'ן יצר הרע.

אז דו האסט דאס געזען, דו האסט געזען ווי מען שמועסט זיך אפ צו טון עבירות רחמנא לצלן – ווייזט מען דיר פון הימל דו זאלסט מתפלל זיין פאר זיי, דו זאלסט טון עפעס פאר זיי, פרובירן מאכן שידוכים, רעדן מיט זיי, רחמנות האבן אויף זיי.

דער רבי האט אונז געהייסן מיר זאלן זוכן גוטס ביי אנדערע, מיר זאלן דן זיין יעדן איינעם לכף זכות, אפילו א רשע גמור (לקוטי מוהר"ן חלק א', סימן רפב). מוהרא"ש האט שטענדיג געזאגט: "איך וועל ארויפקומען אין בית דין של מעלה, איך וועל מאכן א רעש און א טומל מען זאל נישט דן זיין בחורים לכף חובה ווייל זיי ווילן אלע זיין גוט, זיי ווילן חתונה האבן, זיי ווילן זיין גאנץ, כל זמן זיי זענען אליינס – פאלן זיי".

איך בעט דיר זייער, קוק גוט אויף יעדן איינעם; כל זמן מען זעט שלעכטס – איז מען נישט ביים אייבערשטן. חכמינו זכרונם לברכה זאגן (ברכות לא:) חנה האט געזאגט פאר עלי הכהן: "לֹא אָדוֹן אַתָּה, לַאו אִיכָּא שְׁכִינָה וְרוּחַ הַקֹּדֶשׁ גַּבָּךְ, שֶׁדַּנְתַּנִי לְכַף חוֹבָה וְלֹא דַּנְתַּנִי לְכַף זְכוּת", עס קען נישט זיין דו האסט רוח הקודש אז דו קוקסט שלעכט אויף מיר.

אידישע קינדער זענען הייליג און טייער, זיי פאלן נעבעך אומוועלנדיג; זיי ווילן זיין גוט.

בעזרת ה' יתברך

יום ב' פרשת ואתחנן, י' מנחם-אב, שנת תשפ"א לפרט קטן

לכבוד מיין טייערער ... נרו יאיר

איך קוק אזוי ארויס אויף דיר, איך וויל אזוי שטארק דו זאלסט זיין אן ערליכער איד, איך טראכט שוין א גוטע שידוך פאר דיר; יעצט הער איך אז דו האסט א טעלעפאן, דו האסט גענומען א נישט גוטע וועג, האסט זיך געטראפן חברים וואס שלעפן דיר אראפ; א שאד, א שאד, א שאד דו ביסט נישט שטארק צו זאגן "ניין" פאר'ן יצר הרע.

איך בעט דיר זייער, נעם נישט אין האנט קיין טעלעפאן, טעבלעט, אייפאד וכו' וכו', עס גלאנצט און עס בליטשקעט, אבער דער סוף איז זייער ביטער.

איך זאג דיר צו, אויב דו וועסט זיך פירן מיט יראת שמים, דו וועסט לערנען און דאווענען, דו וועסט זיך חבר'ן מיט בחורים וואס האבן יראת שמים, רעדן נישט קיין מיאוס'ע רייד – וועסטו טרעפן שנעל דיין שידוך; דו וועסט ברענגען נחת פאר'ן אייבערשטן, נחת פאר דיינע עלטערן און נחת פאר דיר אליינס.

בארעכן זיך, זיי נישט נאריש; עס ווארט דיר א שיינע עתיד.

בעזרת ה' יתברך

יום א' פרשת ואתחנן, ט' מנחם-אב, שנת תשפ"א לפרט קטן

לכבוד ... נרו יאיר

איך וויל דיר מחזק זיין זאלסט זיין דער בעל קורא ביי אונז אין שול אין ירושלים. יעדע זאך וואס מען טוט פאר'ן רבינ'ס בית המדרש איז א גרויסע זכות; עס וועט קומען א צייט וואס מען וועט זען דאס גרויסקייט פון טון פאר'ן רבינ'ס זאך.

דער רבי האט געזאגט (חיי מוהר"ן, סימן שיד): "הַפָּחוּת שֶׁבַּאֲנָשַׁי אֲנִי מוֹלִיךְ אוֹתוֹ בְּדֶרֶךְ שֶׁל צַדִּיק גָּדוֹל מְאֹד", דער קלענסטער פון מיינע מענטשן קען איך צוברענגען צו די מדריגה פון גרויסע צדיקים, "וִיקַנֵּא מְאֹד אֶת הַמְקֹרָבִים אֵלָיו", און אלע וועלן מקנא זיין מיינע מקורבים, "מִכָּל שֶׁכֵּן אֶת מִי שֶׁזּוֹכֶה לְהוֹשִׁיט לוֹ וְכוּ'", בפרט די וואס העלפן מיר אפילו נאר מיט ברענגען פייער וכו' (עיין בהשמטות); זעט מען פון דעם וואס דער רבי צאלט צוריק פאר די וואס העלפן אים.

לאז גרוסן אלע חברים, איך האף אייך אלע צו זען ראש השנה אין אומאן ביים הייליגן רבי'ן.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום א' פרשת ואתחנן, ט' מנחם-אב, שנת תשפ"א לפרט קטן

לכבוד מיין טייערער ליבער ... נרו יאיר

איך בענק זיך זייער נאך דיר, שוין א לאנגע צייט וואס איך האב דיר נישט געזען; איך האף דו דערהאלטסט זיך מיט די עצות פון רבי'ן און מיט דיינע שיעורים כסדרן.

א גרויסן יישר כח פאר'ן מיר ערלעדיגן טיקעטס צו קענען פארן צום רבי'ן אויף ראש השנה קיין אומאן פאר מיר און מיינע קינדער. פאריאר האבן מיר נישט זוכה געווען צו זיין אין אומאן, מען האט פארשפארט די גרעניץ צוליב קאראנע, מיר בעטן און מיר האפן צום אייבערשטן אז די יאר וועלן מיר יא זוכה זיין צו זיין אין אומאן ביים רבי'ן.

איך האב אנגעגרייט די גאנצע געלט דיר צו באצאלן פאר די טיקעטס, זיי מיר מודיע ווי אזוי איך זאל דיר שיקן די געלט. אויך בעט איך דיר אויב דו קענסט מיר באשטעלן א וועג פון עירפארט צו אומאן, פאר מיר און מיינע קינדער, איך וועל דיר אויף דעם אויך באצאלן.

וואס דו דארפסט זאלסטו בעטן פונעם אייבערשטן אויף דיין שפראך, אידיש; וועסטו זען גרויסע ניסים.

בעזרת ה' יתברך

יום א' פרשת ואתחנן, ט' מנחם-אב, שנת תשפ"א לפרט קטן

לכבוד מיין טייערער ... נרו יאיר

איך הער צוריק פון האברך ... נרו יאיר אז דו קומסט צו די חבורה אין ..., דו קומסט צום דף שיעור.

וויסן זאלסטו, איינע פון די וויכטיגסטע זאכן אין לעבן איז "נקודת החבר". דער רבי זאגט (לקוטי מוהר"ן חלק א', סימן לד): "וְגַם צָרִיךְ כָּל אָדָם לְדַבֵּר עִם חֲבֵרוֹ בְּיִרְאַת שָׁמַיִם", יעדער דארף האבן א חבר מיט וועם צו רעדן אין יראת שמים, "כְּדֵי לְקַבֵּל הִתְעוֹרְרוּת בְּלִבּוֹ מֵהַנְּקֻדָּה שֶׁיֵּשׁ בַּחֲבֵרוֹ יוֹתֵר מִמֶּנּוּ", צו מקבל זיין די נקודה פון זיין חבר, "לְעוֹרֵר אֶת לְבָבוֹ", זיך אויפוועקן דאס הארץ, "וְיָסִיר מִמֶּנּוּ עָרְלַת לֵב", און זיך שטארקן קעגן דעם יצר הרע; עס איז זייער גוט אז דו גייסט צו די חבורה, דאס האלט פריש מען זאל זיך נישט אפקילן פון רבי'ן.

איך האף אז דו קומסט ראש השנה צום רבי'ן קיין אומאן. פאר יעדעם איז שווער די נסיעה, יעדער האט מניעות און שטערונגען; דער האט נישט קיין געלט, א צווייטער גייט פארלירן זיין פרנסה, דער האט מיט זיין שווער און שוויגער, זיי ווארענען אים אז זיי גייען אהיים נעמען די טאכטער. אז מען ווייסט וואס ראש השנה איז, מען משפט דעמאלט דעם מענטש: "מִי יִחְיֶה וּמִי יָמוּת, מִי בַחֲנִיקָה וּמִי בַסְּקִילָה", - דעמאלט ווערן בטל אלע מניעות, עס אינטערעסירט שוין גארנישט, מען לויפט צום רבי'ן פאר'ן לעבן, מען הערט קיינעם נישט אויס, נאר דעם רבי'ן וואס זאגט: "קומט צו מיר קיין אומאן אויף ראש השנה, איך וועל זיין ענקער מליץ יושר און עורך דין".

בעזרת ה' יתברך

יום א' פרשת ואתחנן, ט' מנחם-אב, שנת תשפ"א לפרט קטן

לכבוד מיין טייערער ... נרו יאיר, קרית ברסלב

אויף דיין פראגע אויב דו זאלסט גיין עסן ביי משפחת ..., ער רופט דיר צו קומען עסן ביי אים די סעודות שבת; פארוואס זאלסטו נישט מאכן אליינס די שבת'דיגע סעודות? עס איז אזוי שיין צו זיין שבת אין שטוב מיט די ווייב און קינדער; אז אים איז נמאס זיין ווייב, ער האט נישט קיין געדולד צו מאכן סעודות שבת נאר ווען עס קומען צו אים פרעמדע וכו' – זאלסטו זיך מער אכטונג געבן נישט צו גיין.

בלייב אין שטוב, זוך נישט צו גיין צו פרעמדע הייזער; עס ברענגט נישט קיין יראת שמים, עס ברענגט נישט קיין שום גוטס.

דער אייבערשטער זאל העלפן זאלסט האבן הצלחה אין אלע ענינים.

בעזרת ה' יתברך

יום ה' פרשת דברים, ו' מנחם-אב, שנת תשפ"א לפרט קטן

לכבוד המלמד ... נרו יאיר, קרית יואל

איך האב געהערט דיין מעסידזש.

גיין אין מקוה איז זייער א גרויסע זאך; ברסלב'ער חסידים זענען זייער מקפיד צו גיין אין מקוה יעדן טאג, ווייל דער הייליגער רבי האט זייער אסאך גערעדט פון דאס גרויסקייט פון מקוה, נאכמער דארפן מלמדים זייער מקפיד זיין אויף טבילה; מוהרא"ש זאגט אז מלמדים, שוחטים און סופרים דארפן נאכמער נזהר זיין אין דעם.

אוודאי דארף מען זיך מסדר זיין א סדר אויפצושטיין פרי גיין אין מקוה, דאווענען און עסן פת שחרית איידער מען גייט אין חדר, אבער אז מען איז פארשלאפן קען מען נישט לאזן די קינדער אויף הפקר חס ושלום. די קינדער קומען פאר אלעמען, נישטא קיין שום תירוץ צו קומען שפעט אין חדר. אז מען האלט נישט זמנים, מען קומט נישט צייטליך – איז דאס א מעוות לא יוכל לתקון, א זאך וואס מען קען נישט פאררעכטן (עיין שיחות הר"ן, סימן רמ).

ווען מען בא'גנב'עט א צווייטן, פון א שוה פרוטה ביז א מיליאן דאלער – קען מען דאס באצאלן, אבער אז מען קומט אין חדר שפעט, אדער מען קומט צייטליך און מען גייט אוועק, מען גייט שמועסן אדער מען איז עוסק אין אנדערע זאכן – איז מען אין די כלל פון אָרוּר עוֹשֶׂה מְלֶאכֶת ה' רְמִיָּה (עיין רמב"ם פרק ב' מהלכות תלמוד תורה, הלכה ד).

דעריבער, אז מען איז פארשלאפן לייגט מען אלעס אין די זייט און מען גייט צו די קינדער, שפעטער קען מען גיין אין מקוה וכו'.

איך האף אז אלע מלמדים זענען צייטליך אין חדר; איך וויל דו זאלסט מיר שרייבן אויב מלמדים קומען נישט צייטליך, וועל איך זיי פארשיקן.

בעזרת ה' יתברך

יום ד' פרשת דברים, ה' מנחם-אב, שנת תשפ"א לפרט קטן

מרת ... תחי'

א גרויסן יישר כח פאר צאמנעמען די פרויען איינמאל א וואך זיך מחזק זיין מיט די אוצרות פון רבי'ן.

היות עס איז דא א גרויסע פארזאמלונג דארף מען אביסל טוישן דעם פראגראם. כל זמן עס איז געווען א קליינע צאל פרויען האט מען געשמועסט מעשיות פון תפלה וכדומה, אבער יעצט ווען עס איז דא אזויפיל פרויען קען מען נישט מאכן די זאך אז אלע זאלן זיצן שטיל און הערן מעשיות פון תפלה, די פרויען זאגן אז זיי שפירן ווי זיי זענען צוריק אין שולע, מען מוז זיצן שטיל פאר א שעה צייט.

נישט דאס איז דער ציל פון די צאמקום, איך טראכט אפילו צו מבטל זיין דעם שיעור; נישט אלע פרויען וויל זיצן א שעה און הערן א שיעור, שיעורים קען מען הערן אויף די האטליין, די צאמקום איז פאר איין ציל, אביסל ארויסגיין פון שטוב זיך אויסלופטערן, אביסל שמועסן מיט חבר'טעס, טאנצן, זינגען און מאכן א לעבן.

קומענדיגע וואך וועט מען שוין קענען טאנצן, געבט אכטונג אז עס זאל זיין ניגונים און זינגערס ערליכע אידן. קלויבט אויס לעבעדיגע ניגונים, מען זאל ווערן פרייליך.

אדרבה, פרעגט די פרויען אויב עס פעלט אויס יעדע וואך א שיעור.

בעזרת ה' יתברך

יום ד' פרשת דברים, ה' מנחם-אב, שנת תשפ"א לפרט קטן

מרת ... תחי', קרית ברסלב

פון ווען איר האט מיר דערציילט די גוטע נייעס אז איר האט זיך אפגעשוירן די האר – בין איך זייער פרייליך. איך פריי זיך פאר אייך און אייער מאן, איר האט יעצט אלע ברכות וואס דער הייליגער זוהר זאגט.

אין דעם זכות זאלט איר זוכה זיין צו ערליכע דורות, הייליגער דורות.

ווען מען וואלט ווען געקענט זען מיט די אויגן די קליפות און שדים וואס ליגן אויף די האר, די סכנה פון האר – וואלטן אלע פרויען געלאפן זיך אפשערן.

וואויל איז אייך און וואויל איז אייער חלק.

בעזרת ה' יתברך

יום ד' פרשת דברים, ה' מנחם-אב, שנת תשפ"א לפרט קטן

לכבוד מיין טייערער ... נרו יאיר

וואס קען מען טון אז מען רעדט שלעכטס אויף ברסלב'ער חסידים בכלל און אויף תלמידי היכל הקודש בפרט. דער רבי האט שוין געזאגט (שיחות הר"ן, סימן קפב): "עָלַי אֵין חוֹלְקִים כְּלָל", אויף מיר קריגט מען נישט, "זֵייא הָאבִּין זִיךְ אוֹיס גִּישְׁנִיצְט אַה מֶענְטְשׁ, אִין קְרִיגְן אוֹיף אִיהם", אויף דעם מענטש קריג איך אויך; אזוי איז היינט מיט ברסלב'ער חסידים בכלליות און תלמידי היכל הקודש בפרטיות, מען רעדט אויף אונז כל דבר אסור, זאכן וואס איז נישט אמת.

איך שרייב דיר דאס כדי דו זאלסט האבן חיזוק יעצט ווען דיין שווער און שוויגער האבן זיך גענומען צו ענקערע ביינער, זיי פארלאנגען פון ענק איר זאלט אנטלויפן פון היכל הקודש, זיי רעדן נישט שיינע זאכן; עס איז זייער שווער פאר דיר און בעיקר פאר דיין ווייב, ווען איר מאמע רעדט שלעכטס אויף אונזער פלאץ.

ענטפערט נישט, טענה'עט נישט; אז מען פרעגט זאלט איר זאגן מיט דרך ארץ אויב די זאכן זענען אמת אדער נישט אמת. אז איר וועט נישט טענה'ען וועט נישט לאנג נעמען ביז זיי וועלן זען וואס היכל הקודש איז, זיי וועלן זאגן פאר אלעמען: "נאר מיינע קינדער פון ברסלב זענען אונזער נחת".