בריוון פונעם ראש ישיבה שליט"א

#2 - אשה כשרה העושה רצון בעלה, מיינט נישט צו זיין די כפרה הינדל
שלום בית, עצות, ווייב, שוועריקייטן

בעזרת ה' יתברך - יום ד' פרשת חיי שרה, כ"ד מרחשון, שנת תשפ"ז לפרט קטן


... תחי'


איך האב ערהאלטן אייער בריוו.


זיין אן אשה כשרה העושה רצון בעלה מיינט נישט אז מען לאזט דעם מאן פייניגן, ער זאל בינדן די הענט מיט קייטלעך און שלאגן השם ישמרינו, און אויך טון וכו' וכו', דאס איז נישט אן אשה כשרה, דאס איז א שפחה; ווייל דער מאן קען נישט און טאר נישט פייניגן די ווייב, און אז ער האט געזען גוי'אישע מאוויס אדער געליינט גוי'אישע ביכער וואס זאגן ווי גוט עס איז אז מען קען בינדן די ווייב וכו', און געבן מכות וכו' - דארפסטו נישט זיין די כפרה הינדל.


'אשה כשרה' מיינט 'העושה רצון בעלה' ווען עס איז מיט די רצון פונעם אייבערשטן.


איך האב נאך אסאך צו שרייבן פון די זאך, אבער איך דארף זיך צוריק האלטן, ווייל אלע ליינען די בריוו, איז נישט שייך צו שרייבן מער; איך האף אז איר וועט ארויס נעמען רמזים און פארשטיין וואס יא און וואס נישט.


דער אייבערשטער זאל העלפן איר זאלט האבן הצלחה אין אלע ענינים.

#1 - אלע מאכן מיט שוועריקייטן אין לעבן
משניות, מוהרא"ש, נסיונות, חתן, שוועריקייטן

בעזרת ה' יתברך - יום ב' פרשת נח, ב' דראש חודש מרחשון, שנת תשפ"ז לפרט קטן


... נרו יאיר


איך בעט דיר זייער דערהאלט זיך מיט אלע כוחות, לאז זיך נישט נאך. וויסן זאלסטו, מען פרובירט אויס יעדן איינעם, דער הייליגער רבי זאגט (לקוטי מוהר"ן חלק ב, סימן קיט), מען פרובירט אויס יעדן איינעם מיט שווערע ביטערע נסיונות, נישטא איינער וואס זאל נישט אריבערגיין שוועריקייטן; פון אינדרויסן זעט אויס ווי עס גלאנצט פאר יעדן, אבער יעדער איינער מאכט מיט, אפילו די רייכע מענטשן, די שטארקע, די געלונגענע - אלע מאכן מיט שוועריקייטן אין לעבן; איין עצה איז דא, אנטלויפן צום אייבערשטן און אנטלויפן צו די תורה.


זע צו זאגן יעדן טאג משניות, מוהרא"ש האט מקובל פון אנשי שלומינו, דאס וואס דער רבי זאגט אין שיחות הר"ן (סימן יט), אז ווער עס וועט לערנען יעדן טאג כך וכך, אפילו ער זינקט אין די טומאה, ער טוט עבירות - וועט ער ווערן אן ערליכער איד; זאגט מוהרא"ש, דאס מיינט מען ח"י פרקים משניות, אויף דעם זאגט דער רבי אפילו א מענטש וואס איז זייער ווייט פון קדושה - ער טוט עבירות רחמנא לצלן, און ער איז שוין אראפגעפאלן אין שאול תחתית, אויב וועט ער זיך מאכן א קביעות צו לערנען יעדן טאג כך וכך - וועט ער סוף כל סוף ארויסגיין פון זיין בלאטע, ווייל די כח פון תורה איז אזוי גרויס אז עס נעמט ארויס דעם מענטש פון זיין שלעכטס.


זיי פרייליך, נאך אביסל ביסטו א חתן; דראפע זיך און דערהאלט זיך.


דער אייבערשטער זאל העלפן זאלסט האבן הצלחה אין אלע ענינים.


א גוטן חודש.